← Library

Dhammasaṅgaṇī — 2 Niddesa — 2.1 Cittuppādakaṇḍa

Early Buddhist texts (SuttaCentral): Abhidhamma · abhidhamma · 530 sections

1. ds2.1.1:106.3

   ayaṁ tasmiṁ samaye sammāsati hoti.

2. ds2.1.1:107.1

   Katamo tasmiṁ samaye sammāsamādhi hoti?

3. ds2.1.1:107.2

   Yā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi—

4. ds2.1.1:107.3

   ayaṁ tasmiṁ samaye sammāsamādhi hoti.

5. ds2.1.1:107.4

   Ayaṁ tasmiṁ samaye pañcaṅgiko maggo hoti.

6. ds2.1.1:108.1

   Katamāni tasmiṁ samaye satta balāni honti?

7. ds2.1.1:108.2

   Saddhābalaṁ, vīriyabalaṁ, satibalaṁ, samādhibalaṁ, paññābalaṁ, hiribalaṁ, ottappabalaṁ.

8. ds2.1.1:109.1

   Katamaṁ tasmiṁ samaye saddhābalaṁ hoti?

9. ds2.1.1:109.2

   Yā tasmiṁ samaye saddhā saddahanā okappanā abhippasādo saddhā saddhindriyaṁ saddhābalaṁ—

10. ds2.1.1:109.3

    idaṁ tasmiṁ samaye saddhābalaṁ hoti.

11. ds2.1.1:110.1

    Katamaṁ tasmiṁ samaye vīriyabalaṁ hoti?

12. ds2.1.1:110.2

    Yo tasmiṁ samaye cetasiko vīriyārambho nikkamo parakkamo uyyāmo vāyāmo ussāho ussoḷhī thāmo dhiti asithilaparakkamatā anikkhittachandatā anikkhittadhuratā dhurasampaggāho vīriyaṁ vīriyindriyaṁ vīriyabalaṁ sammāvāyāmo—

13. ds2.1.1:110.3

    idaṁ tasmiṁ samaye vīriyabalaṁ hoti.

14. ds2.1.1:111.1

    Katamaṁ tasmiṁ samaye satibalaṁ hoti?

15. ds2.1.1:111.2

    Yā tasmiṁ samaye sati anussati paṭissati sati saraṇatā dhāraṇatā apilāpanatā asammussanatā sati satindriyaṁ satibalaṁ sammāsati—

16. ds2.1.1:111.3

    idaṁ tasmiṁ samaye satibalaṁ hoti.

17. ds2.1.1:112.1

    Katamaṁ tasmiṁ samaye samādhibalaṁ hoti?

18. ds2.1.1:112.2

    Yā tasmiṁ samaye cittassa ṭhiti saṇṭhiti avaṭṭhiti avisāhāro avikkhepo avisāhaṭamānasatā samatho samādhindriyaṁ samādhibalaṁ sammāsamādhi—

19. ds2.1.1:112.3

    idaṁ tasmiṁ samaye samādhibalaṁ hoti.

20. ds2.1.1:113.1

    Katamaṁ tasmiṁ samaye paññābalaṁ hoti?

21. ds2.1.1:113.2

    Yā tasmiṁ samaye paññā pajānanā vicayo pavicayo dhammavicayo sallakkhaṇā upalakkhaṇā paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā pariṇāyikā vipassanā sampajaññaṁ patodo paññā paññindriyaṁ paññābalaṁ paññāsatthaṁ paññāpāsādo paññāāloko paññāobhāso paññāpajjoto paññāratanaṁ amoho dhammavicayo sammādiṭṭhi—

22. ds2.1.1:113.3

    idaṁ tasmiṁ samaye paññābalaṁ hoti.

23. ds2.1.1:114.1

    Katamaṁ tasmiṁ samaye hiribalaṁ hoti?

24. ds2.1.1:114.2

    Yaṁ tasmiṁ samaye hirīyati hiriyitabbena hirīyati pāpakānaṁ akusalānaṁ dhammānaṁ samāpattiyā—

25. ds2.1.1:114.3

    idaṁ tasmiṁ samaye hiribalaṁ hoti.

26. ds2.1.1:115.1

    Katamaṁ tasmiṁ samaye ottappabalaṁ hoti?

27. ds2.1.1:115.2

    Yaṁ tasmiṁ samaye ottappati ottappitabbena ottappati pāpakānaṁ akusalānaṁ dhammānaṁ samāpattiyā—

28. ds2.1.1:115.3

    idaṁ tasmiṁ samaye ottappabalaṁ hoti.

29. ds2.1.1:115.4

    Imāni tasmiṁ samaye satta balāni honti.

30. ds2.1.1:116.1

    Katame tasmiṁ samaye tayo hetū honti?

31. ds2.1.1:116.2

    Alobho, adoso, amoho.

32. ds2.1.1:117.1

    Katamo tasmiṁ samaye alobho hoti?

33. ds2.1.1:117.2

    Yo tasmiṁ samaye alobho alubbhanā alubbhitattaṁ asārāgo asārajjanā asārajjitattaṁ anabhijjhā alobho kusalamūlaṁ—

34. ds2.1.1:117.3

    ayaṁ tasmiṁ samaye alobho hoti.

35. ds2.1.1:118.1

    Katamo tasmiṁ samaye adoso hoti?

36. ds2.1.1:118.2

    Yo tasmiṁ samaye adoso adussanā adussitattaṁ abyāpādo abyāpajjo adoso kusalamūlaṁ—

37. ds2.1.1:118.3

    ayaṁ tasmiṁ samaye adoso hoti.

38. ds2.1.1:119.1

    Katamo tasmiṁ samaye amoho hoti?

39. ds2.1.1:119.2

    Yā tasmiṁ samaye paññā pajānanā …pe… amoho dhammavicayo sammādiṭṭhi—

40. ds2.1.1:119.3

    ayaṁ tasmiṁ samaye amoho hoti.

41. ds2.1.1:119.4

    Ime tasmiṁ samaye tayo hetū honti.

42. ds2.1.1:120.1

    Katamo tasmiṁ samaye eko phasso hoti?

43. ds2.1.1:120.2

    Yo tasmiṁ samaye phasso phusanā samphusanā samphusitattaṁ—

44. ds2.1.1:120.3

    ayaṁ tasmiṁ samaye eko phasso hoti.

45. ds2.1.1:121.1

    Katamā tasmiṁ samaye ekā vedanā hoti?

46. ds2.1.1:121.2

    Yaṁ tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—

47. ds2.1.1:121.3

    ayaṁ tasmiṁ samaye ekā vedanā hoti.

48. ds2.1.1:122.1

    Katamā tasmiṁ samaye ekā saññā hoti?

49. ds2.1.1:122.2

    Yā tasmiṁ samaye saññā sañjānanā sañjānitattaṁ—

50. ds2.1.1:122.3

    ayaṁ tasmiṁ samaye ekā saññā hoti.

51. ds2.1.1:123.1

    Katamā tasmiṁ samaye ekā cetanā hoti?

52. ds2.1.1:123.2

    Yā tasmiṁ samaye cetanā sañcetanā cetayitattaṁ—

53. ds2.1.1:123.3

    ayaṁ tasmiṁ samaye ekā cetanā hoti.

54. ds2.1.1:124.1

    Katamaṁ tasmiṁ samaye ekaṁ cittaṁ hoti?

55. ds2.1.1:124.2

    Yaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—

56. ds2.1.1:124.3

    idaṁ tasmiṁ samaye ekaṁ cittaṁ hoti.

57. ds2.1.1:125.1

    Katamo tasmiṁ samaye eko vedanākkhandho hoti?

58. ds2.1.1:125.2

    Yaṁ tasmiṁ samaye cetasikaṁ sātaṁ cetasikaṁ sukhaṁ cetosamphassajaṁ sātaṁ sukhaṁ vedayitaṁ cetosamphassajā sātā sukhā vedanā—

59. ds2.1.1:125.3

    ayaṁ tasmiṁ samaye eko vedanākkhandho hoti.

60. ds2.1.1:126.1

    Katamo tasmiṁ samaye eko saññākkhandho hoti?

61. ds2.1.1:126.2

    Yā tasmiṁ samaye saññā sañjānanā sañjānitattaṁ—

62. ds2.1.1:126.3

    ayaṁ tasmiṁ samaye eko saññākkhandho hoti.

63. ds2.1.1:127.1

    Katamo tasmiṁ samaye eko saṅkhārakkhandho hoti?

64. ds2.1.1:127.2

    Phasso cetanā vitakko vicāro pīti cittassekaggatā saddhindriyaṁ vīriyindriyaṁ satindriyaṁ samādhindriyaṁ paññindriyaṁ jīvitindriyaṁ sammādiṭṭhi sammāsaṅkappo sammāvāyāmo sammāsati sammāsamādhi saddhābalaṁ vīriyabalaṁ satibalaṁ samādhibalaṁ paññābalaṁ hiribalaṁ ottappabalaṁ alobho adoso amoho anabhijjhā abyāpādo sammādiṭṭhi hirī ottappaṁ kāyapassaddhi cittapassaddhi kāyalahutā cittalahutā kāyamudutā cittamudutā kāyakammaññatā cittakammaññatā kāyapāguññatā cittapāguññatā kāyujukatā cittujukatā sati sampajaññaṁ samatho vipassanā paggāho avikkhepo;

65. ds2.1.1:127.3

    ye vā pana tasmiṁ samaye aññepi atthi paṭiccasamuppannā arūpino dhammā ṭhapetvā vedanākkhandhaṁ ṭhapetvā saññākkhandhaṁ ṭhapetvā viññāṇakkhandhaṁ—

66. ds2.1.1:127.4

    ayaṁ tasmiṁ samaye eko saṅkhārakkhandho hoti.

67. ds2.1.1:128.1

    Katamo tasmiṁ samaye eko viññāṇakkhandho hoti?

68. ds2.1.1:128.2

    Yaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—

69. ds2.1.1:128.3

    ayaṁ tasmiṁ samaye eko viññāṇakkhandho hoti.

70. ds2.1.1:129.1

    Katamaṁ tasmiṁ samaye ekaṁ manāyatanaṁ hoti?

71. ds2.1.1:129.2

    Yaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—

72. ds2.1.1:129.3

    idaṁ tasmiṁ samaye ekaṁ manāyatanaṁ hoti.

73. ds2.1.1:130.1

    Katamaṁ tasmiṁ samaye ekaṁ manindriyaṁ hoti?

74. ds2.1.1:130.2

    Yaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—

75. ds2.1.1:130.3

    idaṁ tasmiṁ samaye ekaṁ manindriyaṁ hoti.

76. ds2.1.1:131.1

    Katamā tasmiṁ samaye ekā manoviññāṇadhātu hoti?

77. ds2.1.1:131.2

    Yaṁ tasmiṁ samaye cittaṁ mano mānasaṁ hadayaṁ paṇḍaraṁ mano manāyatanaṁ manindriyaṁ viññāṇaṁ viññāṇakkhandho tajjāmanoviññāṇadhātu—

78. ds2.1.1:131.3

    ayaṁ tasmiṁ samaye ekā manoviññāṇadhātu hoti.

79. ds2.1.1:132.1

    Katamaṁ tasmiṁ samaye ekaṁ dhammāyatanaṁ hoti?

80. ds2.1.1:132.2

    Vedanākkhandho, saññākkhandho, saṅkhārakkhandho—

81. ds2.1.1:132.3

    idaṁ tasmiṁ samaye ekaṁ dhammāyatanaṁ hoti.

82. ds2.1.1:133.1

    Katamā tasmiṁ samaye ekā dhammadhātu hoti?

83. ds2.1.1:133.2

    Vedanākkhandho, saññākkhandho, saṅkhārakkhandho—

84. ds2.1.1:133.3

    ayaṁ tasmiṁ samaye ekā dhammadhātu hoti.

85. ds2.1.1:134.1

    Ye vā pana tasmiṁ samaye aññepi atthi paṭiccasamuppannā arūpino dhammā—

86. ds2.1.1:134.2

    ime dhammā kusalā.

87. ds2.1.1:134.3

    Koṭṭhāsavāro.

88. ds2.1.1:135.0

    2.1.1.3. Suññatavāra

89. ds2.1.1:135.1

    Tasmiṁ kho pana samaye dhammā honti, khandhā honti, āyatanāni honti, dhātuyo honti, āhārā honti, indriyāni honti, jhānaṁ hoti, maggo hoti, balāni honti, hetū honti, phasso hoti, vedanā hoti, saññā hoti, cetanā hoti, cittaṁ hoti, vedanākkhandho hoti, saññākkhandho hoti, saṅkhārakkhandho hoti, viññāṇakkhandho hoti, manāyatanaṁ hoti, manindriyaṁ hoti, manoviññāṇadhātu hoti, dhammāyatanaṁ hoti, dhammadhātu hoti;

90. ds2.1.1:135.2

    ye vā pana tasmiṁ samaye aññepi atthi paṭiccasamuppannā arūpino dhammā—

91. ds2.1.1:135.3

    ime dhammā kusalā.

92. ds2.1.1:136.1

    Katame tasmiṁ samaye dhammā honti?

93. ds2.1.1:136.2

    Vedanākkhandho, saññākkhandho, saṅkhārakkhandho, viññāṇakkhandho—

94. ds2.1.1:136.3

    ime tasmiṁ samaye dhammā honti.

95. ds2.1.1:137.1

    Katame tasmiṁ samaye khandhā honti?

96. ds2.1.1:137.2

    Vedanākkhandho, saññākkhandho, saṅkhārakkhandho, viññāṇakkhandho—

97. ds2.1.1:137.3

    ime tasmiṁ samaye khandhā honti.

98. ds2.1.1:138.1

    Katamāni tasmiṁ samaye āyatanāni honti?

99. ds2.1.1:138.2

    Manāyatanaṁ, dhammāyatanaṁ—

100. ds2.1.1:138.3

     imāni tasmiṁ samaye āyatanāni honti.

← Previous · Next → — showing 301–400 of 530

SuttaCentral (suttacentral.net), from the bilara-data and sc-data repositories. Licence: Public Domain. Source.