← All works
Peshitta Numbers Peshitta (Syriac Old Testament) · 1,289 sections
Single column Two columns
Numbers 22:30 ܘܐܡܪܬ ܐܬܢܐ ܠܒܠܥܡ . ܠܐ ܗܘ̇ܝܬ ܐܢܐ ܐܬܢܟ . ܕܪܟܝܒ ܐܢܬ ܥܠܝ ܡܢ ܛܠܝܘܬܟ ܘܥܕܡܐ ܠܝܘܡܢܐ . ܕܠܡܐ ܡܡܬܘܡ ܥܒܕܬ ܠܟ ܗܟܢܐ . ܐ̇ܡܪ ܠܗ̇ ܠܐ .
Numbers 22:31 ܘܓܠܐ ܡܪܝܐ ܥܝܢ̈ܘܗܝ ܕܒܠܥܡ . ܘܚܙܐ ܠܡܠܐܟܗ ܕܡܪܝܐ ܩ̇ܐܡ ܒܐܘܪܚܐ . ܘܣܝܦܗ ܫܡܝܛ ܘܐܚܝܕ ܒܐܝܕܗ . ܘܩܥܕ ܘܣܓܕ ܥܠ ܐ̈ܦܘܗܝ .
Numbers 22:32 ܘܐܡܪ ܠܗ ܡܠܐܟܗ ܕܡܪܝܐ . ܠܡܢܐ ܡܚܝܬ ܐܬܢܟ ܗܐ ܬܠܬ ܙܒܢ̈ܝܢ . ܗܐ ܐܢܐ ܢ̇ܦܩܬ ܕܐܗܘܐ ܠܟ ܣܛܢܐ ܥܠ ܕܬܪܨܬ ܐܘܪܚܐ ܠܘܩܒܠܝ .
Numbers 22:33 ܘܚܙܬܢܝ ܐܬܢܐ ܘܣܛܬ ܡܢ ܩܕܡܝ . ܗܐ ܬܠܬ ܙܒܢ̈ܝܢ . ܘܐܠܘ ܠܐ ܣܛܬ ܡܢ ܩܕܡܝ . ܗܫܐ ܠܟ ܩ̇ܛܠ ܗܘ̇ܝܬ . ܘܠܗ̇ ܡܚܐ ܗܘ̇ܝܬ .
Numbers 22:34 ܘܐܡܪ ܒܠܥܡ ܠܡܠܐܟܗ ܕܡܪܝܐ . ܚ̇ܛܝܬ . ܠܐ ܝ̇ܕܥ ܗܘ̇ܝܬ ܕܐܢܬ ܩ̇ܐܡ ܠܘܩܒܠܝ ܒܐܘܪܚܐ . ܗܫܐ ܐܢ ܒܝܫ ܒܥܝܢ̈ܝܟ ܐܗܦܘܟ ܠܝ .
Numbers 22:35 ܘܐܡܪ ܡܠܐܟܗ ܕܡܪܝܐ ܠܒܠܥܡ . ܙܠ ܥܡ ܓܒܪ̈ܐ . ܒܠܚܘܕ ܦܬܓܡܐ ܕܐ̇ܡܪ ܐܢܐ ܠܟ . ܗ̇ܘ ܥܒܕ . ܘܐܙܠ ܒܠܥܡ ܥܡ ܪ̈ܘܪܒܢܐ ܕܒܠܩ .
Numbers 22:36 ܘܫܡܥ ܒܠܩ ܕܐܬܐ ܒܠܥܡ . ܘܢܦܩ ܠܐܘܪܥܗ ܠܩܪܝܬܐ ܕܡܘܐܒ . ܕܒܬܚܘܡܐ ܕܐܪܢܘܢ ܕܒܣܦܪ̈ܝ ܬܚܘܡܐ .
Numbers 22:37 ܘܐܡܪ ܒܠܩ ܠܒܠܥܡ . ܗܐ ܫ̇ܕܪܬ ܥܠܝܟ ܠܡܩܪܝܟ . ܐܝܟܘ ܠܐ ܐܬܝܬ ܠܘܬܝ . ܟܒܪ ܐ̇ܡܪ ܗܘܝܬ . ܕܠܐ ܡܨܐ ܐܢܐ ܒܚܝܠܐ ܠܡܝܩܪܘܬܟ .
Numbers 22:38 ܘܐܡܪ ܒܠܥܡ ܠܒܠܩ . ܗܐ ܐܬܝ̇ܬ ܠܘܬܟ . ܗܫܐ ܕܠܡܐ ܡܫܟܚܘ ܡܫܟܚ ܐܢܐ ܕܐ̇ܡܪ ܡܕܡ . ܐܠܐ ܦܬܓܡܐ ܕܣ̇ܐܡ ܐܠܗܐ ܒܦܘܡܝ . ܗ̇ܘ ܗܘ ܐ̇ܡܪ ܐܢܐ .
Numbers 22:39 ܘܐܙܠ ܒܠܥܡ ܥܡ ܒܠܩ . ܘܐܥܠܗ ܠܩܘܪܝܬ ܚܨܪܘܬ .
Numbers 22:40 ܘܢܟܣ ܒܠܩ ܬܘܪ̈ܐ ܘܥܢܐ . ܘܫܕܪ ܠܒܠܥܡ ܘܠܪ̈ܘܪܒܢܐ ܕܥܡܗ .
Numbers 22:41 ܘܟܕ ܗܘܐ ܨܦܪܐ . ܕܒܪ ܒܠܩ ܠܒܠܥܡ ܘܐܣܩܗ ܠܒܡܘܬ ܒܥܠܐ . ܘܚܙܐ ܡܢ ܬܡܢ ܣܟܗ ܕܥܡܐ .
Numbers 23:1 ܘܐܡܪ ܒܠܥܡ ܠܒܠܩ . ܒܢܝ ܠܝ ܗܪܟܐ ܫܒܥܐ ܡܕܒܚ̈ܝܢ . ܘܛܝܒ ܠܝ ܗܪܟܐ ܫܒܥܐ ܬܘܪ̈ܝܢ . ܘܫܒܥܐ ܕܟܪ̈ܝܢ .
Numbers 23:2 ܘܥܒܕ ܒܠܩ ܐܝܟ ܕܐܡܪ ܠܗ ܒܠܥܡ . ܘܐܣܩ ܒܠܥܡ ܘܒܠܩ ܬܘܪ̈ܐ ܘܕܟܪ̈ܐ ܥܠ ܡܕܒܚ̈ܐ .
Numbers 23:3 ܘܐܡܪ ܒܠܥܡ ܠܒܠܩ . ܩܘܡ ܗܪܟܐ ܠܘܬ ܥ̈ܠܘܬܟ ܘܐܢܐ ܐܙܠ . ܛܟ ܢܩܪܐ ܡܪܝܐ ܠܐܘܪܥܝ . ܘܦܬܓܡܐ ܕܡܚܘܐ ܠܝ ܐܚܘܝܘܗܝ ܠܟ . ܘܐܙܠ ܫܦܝܐܝܬ .
Numbers 23:4 ܘܐܬܓܠܝ ܐܠܗܐ ܥܠ ܒܠܥܡ ܘܐܡܪ ܠܗ . ܫܒܥܐ ܡܕܒܚ̈ܝܢ ܛܝܒܬ . ܘܐܣܩܬ ܬܘܪ̈ܐ ܘܕܟܪ̈ܐ ܥܠ ܡܕܒܚ̈ܐ .
Numbers 23:5 ܘܣܡ ܡܪܝܐ ܡܠܬܐ ܒܦܘܡܗ ܕܒܠܥܡ . ܘܐܡܪ ܠܗ . ܙܠ ܠܘܬ ܒܠܩ . ܘܗܟܢܐ ܡܠܠ .
Numbers 23:6 ܘܐܬܐ ܠܘܬܗ . ܘܗܘ ܩ̇ܐܡ ܗܘܐ ܠܘܬ ܥ̈ܠܘܬܗ . ܗܘ ܘܟܠܗܘܢ ܪ̈ܘܪܒܢܐ ܕܡܘܐܒ .
Numbers 23:7 ܘܐܪܝܡ ܒܡܬܠܗ ܘܐܡܪ . ܡܢ ܐܪܡ ܕܒܪܢܝ ܒܠܩ ܡܠܟܐ ܕܡܘܐ̈ܒܝܐ ܡܢ ܛܘܪ̈ܝ ܡܕܢܚܐ . ܘܐܡܪ ܠܝ . ܬܐ ܠܘܛ ܠܝ ܠܝܥܩܘܒ . ܘܬܐ ܐܘܒܕ ܠܝ ܠܐܝܣܪܝܠ .
Numbers 23:8 ܡܢܐ ܐܠܘܛܝܘܗܝ ܕܠܐ ܠܛܗ ܐܠܗܐ . ܘܡܢܐ ܐܘܒܕܝܘܗܝ ܕܠܐ ܐܘܒܕܗ ܡܪܝܐ .
Numbers 23:9 ܡܛܠ ܕܡܢ ܪܫܐ ܕܛܘܪ̈ܐ ܚܙܝ̇ܬܗ . ܘܡܢ ܪ̈ܡܬܐ ܚ̇ܪܬܗ . ܗܐ ܥܡܐ ܒܠܚܘܕܘܗܝ ܫܪܐ . ܘܒܥܡ̈ܡܐ ܠܐ ܡܬܚܫܒ .
Numbers 23:10 ܡܢܘ ܡܫܟܚ ܠܡܡܢܐ ܥܟܪܗ ܕܝܥܩܘܒ ܘܡܢܝܢܐ ܕܪܘܒܥܗ ܕܐܝܣܪܝܠ . ܬܡܘܬ ܢܦܫܝ ܡܘܬܐ ܕܬܪ̈ܝܨܝܗܘܢ . ܘܬܗܘܐ ܚܪܬܝ ܐܟܘܬܗܘܢ .
Numbers 23:11 ܘܐܡܪ ܒܠܩ ܠܒܠܥܡ . ܡܢܐ ܥܒܕܬ ܠܝ . ܠܡܠܛ ܒ̈ܥܠܕܒܒܝ ܩܪܝ̇ܬܟ . ܘܗܐ ܡܒܪܟܘ ܡܒܪܟ ܐܢܬ ܠܗܘܢ .
Numbers 23:12 ܘܥܢܐ ܒܠܥܡ ܘܐܡܪ . ܗܐ ܡܕܡ ܕܣ̇ܐܡ ܡܪܝܐ ܒܦܘܡܝ . ܗ̇ܘ ܗܘ ܢ̇ܛܪ ܐܢܐ ܠܡܡܠܠܘ .
Numbers 23:13 ܘܐܡܪ ܠܗ ܒܠܩ . ܬܐ ܥܡܝ ܠܐܬܪܐ ܐܚܪܢܐ . ܕܬܚܙܝܘܗܝ ܡܢ ܬܡܢ . ܒܪܡ ܕܝܢ ܚܪܬܗ ܬܚܙܐ ܘܟܠܗ ܠܐ ܬܚܙܐ . ܘܠܘܛܝܗܝ ܠܝ ܡܢ ܬܡܢ .
Numbers 23:14 ܘܕܒܪܗ ܠܚܩܠ ܕܘܩܐ ܠܪܝܫ ܪܡܬܐ . ܘܒܢܐ ܫܒܥܐ ܡܕܒܚ̈ܝܢ . ܘܐܣܩ ܬܘܪ̈ܐ ܘܕܟܪ̈ܐ ܥܠ ܡܕܒܚ̈ܐ .
Numbers 23:15 ܘܐܡܪ ܒܠܥܡ ܠܒܠܩ . ܩܘܡ ܗܪܟܐ ܠܘܬ ܥ̈ܠܘܬܟ . ܘܐܢܐ ܐܡܛܐ ܥܕܡܐ ܠܗܪܟܐ .
Numbers 23:16 ܘܐܬܓܠܝ ܡܪܝܐ ܥܠ ܒܠܥܡ . ܘܣܡ ܡܠܬܐ ܒܦܘܡܗ ܘܐܡܪ ܠܗ . ܙܠ ܠܘܬ ܒܠܩ ܘܗܟܢܐ ܐܡܪ ܠܗ .
Numbers 23:17 ܘܐܬܐ ܠܘܬܗ . ܘܗܘ ܩ̇ܐܡ ܗܘܐ ܠܘܬ ܥ̈ܠܘܬܗ . ܘܪ̈ܘܪܒܢܐ ܕܡܘܐܒ ܥܡܗ . ܘܐܡܪ ܠܗ ܒܠܩ . ܡܢܐ ܐܡܪ ܡܪܝܐ .
Numbers 23:18 ܘܐܪܝܡ ܒܡܬܠܗ ܘܐܡܪ . ܩܘܡ ܒܠܩ ܘܫܡܥ . ܘܨܘܬ ܠܣܗܕܘܬܝ ܒܪ ܨܦܘܪ .
Numbers 23:19 ܠܐ ܗܘܐ ܓܒܪܐ ܐܠܗܐ ܕܢܕܓܠ . ܘܐܦ ܠܐ ܒܪܢܫܐ ܕܢܬܡܠܟ . ܗܘ ܐܡ̇ܪ ܘܥܒ̇ܕ ܘܡܠܬܗ ܩܝܡܐ ܠܥܠܡܝܢ .
Numbers 23:20 ܗܐ ܠܡܒܪܟܘ ܐܬܕܒܪܬ ܘܒܘܪܟܬܐ ܠܐ ܐܗܦܟ .
Numbers 23:21 ܠܐ ܚ̇ܙܐ ܐܢܐ ܥܘܠܐ ܒܝܥܩܘܒ . ܘܠܐ ܚ̇ܐܪ ܐܢܐ ܥܠܝܐ ܒܐܝܣܪܝܠ . ܡܪܝܐ ܐܠܗܗ ܥܡܗ . ܘܬܫܒܘܚܬܐ ܕܡܠܟܗ ܒܗ .
Numbers 23:22 ܐܠܗܐ ܕܐܦܩ ܐܢܘܢ ܡܢ ܡܨܪܝܢ ܒܥܘܫܢܗ ܘܒܪܘܡܗ .
Numbers 23:23 ܡܛܠ ܕܠܐ ܢܚܫܐ ܒܝܥܩܘܒ . ܘܐܦ ܠܐ ܩܨܡܐ ܒܐܝܣܪܝܠ . ܐܝܟ ܕܒܙܒܢܐ ܗܢܐ ܢܬܐܡܪ ܠܝܥܩܘܒ ܘܠܐܝܣܪܝܠ ܡܢܐ ܥܒܕ ܐܠܗܐ .
Numbers 23:24 ܗܐ ܥܡܐ ܐܝܟ ܐܪܝܐ ܩ̇ܐܡ . ܘܐܝܟ ܐܪܝܐ ܡܫܬܩܠ . ܠܐ ܢܕܡܟ ܥܕܡܐ ܕܢܐܟܘܠ ܬܒܪܐ . ܘܕܡܐ ܕܩ̈ܛܝܠܐ ܢܫܬܐ .
Numbers 23:25 ܘܐܡܪ ܒܠܩ ܠܒܠܥܡ . ܠܐ ܡܠܛ ܬܠܘܛܝܘܗܝ . ܘܐܦܠܐ ܡܒܪܟܘ ܬܒܪܟܝܘܗܝ .
Numbers 23:26 ܘܥܢܐ ܒܠܥܡ ܘܐܡܪ ܠܒܠܩ . ܠܐ ܐܡ̇ܪܬ ܠܟ . ܕܟܠ ܕܐܡ̇ܪ ܠܝ ܡܪܝܐ ܗ̇ܘ ܗܘ ܥܒܕ ܐܢܐ .
Numbers 23:27 ܘܐܡܪ ܒܠܩ ܠܒܠܥܡ . ܬܐ ܐܕܒܪܟ ܠܐܬܪܐ ܐܚܪܢܐ . ܟܒܪ ܢܫܦܪ ܒܥܝ̈ܢܝ ܐܠܗܐ ܘܠܘܛܝܗܝ ܠܝ ܡܢ ܬܡܢ .
Numbers 23:28 ܘܕܒܪ ܒܠܩ ܠܒܠܥܡ . ܠܪܝܫ ܦܥܘܪ ܕܡܬܚܙܐ ܠܘܩܒܠ ܐܫܝܡܘܢ .
Numbers 23:29 ܘܐܡܪ ܒܠܥܡ ܠܒܠܩ . ܒܢܝ ܠܝ ܗܪܟܐ ܫܒܥܐ ܡܕܒܚ̈ܝܢ . ܘܛܝܒ ܠܝ ܗܪܟܐ ܫܒܥܐ ܬܘܪ̈ܝܢ ܘܫܒܥܐ ܕܟܪ̈ܝܢ .
Numbers 23:30 ܘܥܒܕ ܒܠܩ ܐܝܟ ܕܐܡܪ ܠܗ ܒܠܥܡ . ܘܐܣܩ ܬܘܪ̈ܐ ܘܕܟܪ̈ܐ ܥܠ ܡܕܒܚ̈ܐ .
Numbers 24:1 ܘܚܙܐ ܒܠܥܡ ܕܫܦܝܪ ܗܘ ܒܥܝ̈ܢܝ ܡܪܝܐ ܠܡܒܪܟܘܬܗ ܠܐܝܣܪܝܠ . ܘܠܐ ܐܙܠ ܐܝܟ ܕܒܟܠ ܫܥܐ ܠܡܕܥ ܢܚܫܐ . ܘܣܡ ܠܡܕܒܪܐ ܐ̈ܦܘܗܝ .
Numbers 24:2 ܘܐܪܝܡ ܒܠܥܡ ܥܝ̈ܢܘܗܝ . ܘܚܙܐ ܠܐܝܣܪܝܠ ܟܕ ܫܪ̈ܝܢ ܫ̈ܒܛܝܢ ܫ̈ܒܛܝܢ . ܘܗܘܬ ܥܠܘܗܝ ܪܘܚܗ ܕܐܠܗܐ .
Numbers 24:3 ܘܐܪܝܡ ܒܡܬܠܗ ܘܐܡܪ . ܐܡܪ ܒܠܥܡ ܒܪܗ ܕܒܥܘܪ . ܐܡܪ ܓܒܪܐ ܕܓܠܝܐ ܥܝܢܗ .
Numbers 24:4 ܐܡܪ ܕܫܡܥ ܡܐܡܪܐ ܕܐܠܗܐ . ܘܚܙܘܐ ܕܐܠܗܐ ܚܙܐ . ܟܕ ܪܡܐ ܘܦܬܝܚ̈ܢ ܥܝ̈ܢܘܗܝ .
Numbers 24:5 ܡܐ ܫܦܝܪ ܡܫܟܢܟ ܝܥܩܘܒ . ܘܡܫ̈ܟܢܝܟ ܐܝܣܪܝܠ .
Numbers 24:6 ܐܝܟ ܢܚ̈ܠܐ ܕܪܕܝܢ . ܘܐܝܟ ܦܪܕܝܣܐ ܕܥܠ ܢܗܪܐ . ܘܐܝܟ ܡܫܟܢܐ ܕܢܨܒ ܡܪܝܐ . ܘܐܝܟ ܐܪ̈ܙܐ ܕܥܠ ܡ̈ܝܐ .
Numbers 24:7 ܢܦܘܩ ܓܒܪܐ ܡܢ ܒܢ̈ܘܗܝ . ܘܙܪܥܗ ܒܡܝ̈ܐ ܣܓܝ̈ܐܐ . ܘܢܬܬܪܝܡ ܡܢ ܐܓܓ ܡܠܟܐ . ܘܬܬܪܝܡ ܡܠܟܘܬܗ .
Numbers 24:8 ܐܠܗܐ ܕܐܦܩ ܐܢܘܢ ܡܢ ܡܨܪܝܢ ܒܥܘܫܢܗ ܘܒܪܘܡܗ . ܢܐܟܘܠ ܥܡ̈ܡܐ ܣܢܐ̈ܘܗܝ ܘܓܪ̈ܡܝܗܘܢ ܢܬܒܪ . ܘܚ̈ܨܝܗܘܢ ܢܦܣܩ .
Numbers 24:9 ܪܒܥ ܘܕܡܟ ܐܝܟ ܐܪܝܐ . ܘܐܝܟ ܓܘܪܝܐ ܕܐܪܝܐ ܘܡܢܘ ܢܩܝܡܝܘܗܝ . ܒ̇ܪ̈ܟܝܟ ܒܪ̈ܝܟܝܢ ܘܠܝ̈ܛܝܟ ܠܝܛܝ̈ܢ .
Numbers 24:10 ܘܐܬܚܡܬ ܪܘܓܙܗ ܕܒܠܩ ܥܠ ܒܠܥܡ . ܘܛܪܦ ܐ̈ܝܕܘܗܝ . ܘܐܡܪ ܒܠܩ ܠܒܠܥܡ . ܠܡܠܛ ܒܥ̈ܠܕܒܒܝ ܩܪܝ̇ܬܟ . ܘܗܐ ܡܒܪܟܘ ܡܒܪܟ ܐܢܬ ܠܗܘܢ . ܗܐ ܬܠܬ ܙܒܢ̈ܝܢ .
Numbers 24:11 ܗܫܐ ܦܘܩ ܙܠ ܠܟ ܠܐܬܪܟ . ܐܡܪܬ ܕܡܝܩܪܘ ܐܝܩܪܟ . ܘܗܐ ܟܠܟ ܡܪܝܐ ܡܢ ܐܝܩܪܐ .
Numbers 24:12 ܘܥܢܐ ܒܠܥܡ ܘܐܡܪ ܠܒܠܩ . ܗܐ ܐܦ ܠܐܝ̈ܙܓܕܝܟ ܕܫܕܪܬ ܠܘܬܝ ܐܡ̇ܪܬ .
Numbers 24:13 ܕܐܢ ܝ̇ܗܒ ܠܝ ܒܠܩ ܡܠܐ ܒܝܬܗ ܣܐܡܐ ܐܘ ܕܗܒܐ . ܠܐ ܡܫܟܚ ܐܢܐ ܕܐܥܒܪ ܥܠ ܡܠܬ ܦܘܡܗ ܕܡܪܝܐ . ܘܐܥܒܕ ܡܢ ܠܒܝ ܛܒܬܐ ܐܘ ܒܝܫܬܐ . ܡܕܡ ܕܐܡ̇ܪ ܠܝ ܡܪܝܐ . ܗ̇ܘ ܗܘ ܡܡܠܠ ܐܢܐ .
Numbers 24:14 ܗܫܐ ܗܐ ܐܙ̇ܠ ܐܢܐ ܠܝ ܠܐܪܥܝ . ܬܐ ܕܝܢ ܐܡܠܟܟ ܡܕܡ ܕܥ̇ܒܕ ܥܡܐ ܗܢܐ ܠܥܡܟ ܒܚܪܬܐ ܕܝܘܡ̈ܬܐ .
Numbers 24:15 ܘܐܪܝܡ ܒܡܬܠܗ ܘܐܡܪ . ܐܡܪ ܒܠܥܡ ܒܪܗ ܕܒܥܘܪ . ܐܡܪ ܓܒܪܐ ܕܓܠܝܐ ܥܝܢܗ .
Numbers 24:16 ܐܡܪ ܕܫܡܥ ܡܐܡܪܐ ܕܐܠܗܐ . ܘܝܕܥ ܡܕܥܐ ܕܡܪܝܡܐ . ܘܚܙܘܐ ܕܐܠܗܐ ܚܙܐ . ܟܕ ܐܪܡܐ ܘܦܬܝܚ̈ܢ ܥܝ̈ܢܘܗܝ .
Numbers 24:17 ܚܙܝܬܗ ܘܠܐ ܡܢ ܟܕܘ . ܘܚ̇ܪܬܗ ܘܠܐ ܗܘܐ ܩܪܝܒ . ܢܕܢܚ ܟܘܟܒܐ ܡܢ ܝܥܩܘܒ . ܘܢܩܘܡ ܪܫܐ ܡܢ ܐܝܣܪܝܠ . ܘܢܘܒܕ ܠܓܢܒܪ̈ܐ ܕܡܘܐܒ . ܘܢܫܥܒܕ ܠܟܠܗܘܢ ܒܢ̈ܝ ܫܝܬ .
Numbers 24:18 ܘܬܗܘܐ ܐܕܘܡ ܝܪܬܘܬܗ . ܘܣܥܝܪ ܝܪܬܘܬܐ ܕܒ̈ܥܠܕܒܒܘܗܝ ܬܗܘܐ ܕܝܠܗ . ܘܐܝܣܪܝܠ ܢܩܢܐ ܚܝܠܐ .
Numbers 24:19 ܘܢܚܘܬ ܡܢ ܝܥܩܘܒ . ܘܢܘܒܕ ܠܐܝܢܐ ܕܡܫܬܘܙܒ ܡܢ ܩܪܝܬܐ .
Numbers 24:20 ܘܚܙܐ ܠܥܡܠܝܩ ܘܐܪܝܡ ܒܡܬܠܗ ܘܐܡܪ . ܪܝܫ ܥܡ̈ܡܐ ܥܡܠܝܩ . ܘܚܪܬܗ ܬܐܒܕ ܠܥܠܡܝܢ .
Numbers 24:21 ܘܚܙܐ ܠܩܝ̈ܢܝܐ ܘܐܪܝܡ ܒܡܬܠܗ ܘܐܡܪ . ܥܫܝܢ ܡܘܬܒܟ . ܘܣܝܡ ܒܫܩܝܦܐ ܩܢܟ .
Numbers 24:22 ܐܢ ܢܗܘܐ ܠܒܘܥܪܐ ܩܝܢ . ܥܕܡܐ ܠܐܬܘܪ ܢܫܒܘܢܟ .
Numbers 24:23 ܘܐܪܝܡ ܒܡܬܠܗ ܘܐܡܪ . ܘܝ ܡܢܘ ܢܚܐ . ܡܐ ܕܣ̇ܐܡ ܗܠܝܢ ܐܠܗܐ .
Numbers 24:24 ܘܠܓܝܘ̈ܢܐ ܢܦܩ̈ܢ ܡܢ ܐܪܥܐ ܕܟܬ̈ܝܐ . ܘܢܫܥܒܕܘܢ ܠܐܬܘܪ . ܘܢܫܥܒܕܘܢ ܐܦ ܠܥܒܪ̈ܝܐ . ܘܐܦ ܗܢܘܢ ܢܐܒܕܘܢ ܠܥܠܡܝܢ .
Numbers 24:25 ܘܩܡ ܒܠܥܡ ܘܗܦܟ ܐܙܠ ܠܐܬܪܗ . ܘܐܦ ܒܠܩ ܐܙܠ ܠܐܘܪܚܗ .
Numbers 25:1 ܘܝܬܒ ܐܝܣܪܝܠ ܒܣܛܝܡ . ܘܫܪܝ ܥܡܐ ܠܡܙܢܝܘ ܒܒܢ̈ܬ ܡܘܐܒ .
Numbers 25:2 ܘܩܪ̈ܝ ܠܥܡܐ ܠܕܒܚ̈ܐ ܕܐ̈ܠܗܝܗܝܢ . ܘܐܟܠܘ ܥܡܐ ܘܣܓܕܘ ܠܐ̈ܠܗܝܗܝܢ .
Numbers 25:3 ܘܐܫܬܡܠܝ ܐܝܣܪܝܠ ܒܒܥܠ ܦܥܘܪ . ܘܐܬܚܡܬ ܪܘܓܙܗ ܕܡܪܝܐ ܥܠ ܒܢ̈ܝ ܐܝܣܪܝܠ .
Numbers 25:4 ܘܐܡܪ ܡܪܝܐ ܠܡܘܫܐ . ܕܒܪ ܠܟܠܗܘܢ ܪ̈ܫܐ ܕܥܡܐ . ܘܦܪܣܐ ܐܢܘܢ ܩܕܡ ܡܪܝܐ ܠܘܩܒܠ ܫܡܫܐ . ܘܬܗܦܘܟ ܚܡܬܐ ܕܪܘܓܙܝ ܡܢ ܒܢ̈ܝ ܐܝܣܪܝܠ .
Numbers 25:5 ܘܐܡܪ ܡܘܫܐ ܠܕܝ̇ܢ̈ܐ ܕܐܝܣܪܝܠ . ܩܛܘܠܘ ܐܢܫ ܓܒܪ̈ܘܗܝ . ܐܝܠܝܢ ܕܐܫܬܡܠܝܘ ܒܒܥܠ ܦܥܘܪ .
Numbers 25:6 ܘܗܐ ܓܒܪܐ ܡܢ ܒܢ̈ܝ ܐܝܣܪܝܠ ܐܬܐ . ܘܩܪܒ ܩܕܡ ܐܚ̈ܘܗܝ . ܘܥܠ ܥܠ ܡܕܝܢܝܬܐ ܠܥܝܢ ܡܘܫܐ ܘܠܥܝܢ ܟܠܗ̇ ܟܢܘܫܬܐ ܕܒ̈ܢܝ ܐܝܣܪܝܠ . ܘܗܢܘܢ ܒ̇ܟܝܢ ܗܘܘ ܒܬܪܥܐ ܕܡܫܟܢܙܒܢܐ .
Numbers 25:7 ܘܚܙܝܗܝ ܦܝܢܚܣ ܒܪ ܐܠܝܥܙܪ ܒܪ ܐܗܪܘܢ ܟܗܢܐ . ܘܩܡ ܡܢ ܓܘ ܟܢܘܫܬܐ ܘܢܣܒ ܪܘܡܚܐ ܒܐܝܕܗ .
Numbers 25:8 ܘܥܠ ܒܬܪ ܓܒܪܐ ܒܪ ܐܝܣܪܐܝܠ ܠܩܠܝܬܐ . ܘܕܩܪ ܐܢܘܢ ܠܬܪ̈ܝܗܘܢ . ܠܓܒܪܐ ܒܪ ܐܝܣܪܝܠ ܘܠܐܢܬܬܐ ܒܟܪܣܗ̇ ܒܩܠܝܬܐ . ܘܐܬܟܠܝ ܡܘܬܢܐ ܕܡܢ ܫܠܝܐ ܡܢ ܐܝܣܪܝܠ .
Numbers 25:9 ܘܗܘܘ ܕܡܝܬܘ ܒܡܘܬܢܐ ܕܡܢ ܫܠܝܐ . ܥܣܪܝܢ ܘܐܪ̈ܒܥܐ ܐ̈ܠܦܝܢ .
Numbers 25:10 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 25:11 ܦܝܢܚܣ ܒܪ ܐܠܝܥܙܪ ܒܪ ܐܗܪܘܢ ܟܗܢܐ . ܐܗܦܟ ܚܡܬܝ ܡܢ ܒ̈ܢܝ ܐܝܣܪܝܠ . ܘܛܢ ܛܢܢܝ ܒܝܢܬܗܘܢ . ܘܠܐ ܐܘܒܕܬ ܠܒܢ̈ܝ ܐܝܣܪܝܠ ܒܛܢܢܝ .
Numbers 25:12 ܡܛܠ ܗܢܐ ܐܡ̇ܪܬ . ܕܗܐ ܝ̇ܗܒ ܐܢܐ ܠܗ ܩܝܡܐ ܕܫܠܡܐ .
Numbers 25:13 ܘܢܗܘܐ ܠܗ ܘܠܒܢ̈ܘܗܝ ܡܢ ܒܬܪܗ . ܩܝܡܐ ܕܟܗܢܘܬܐ ܠܥܠܡ . ܚܠܦ ܕܛܢ ܒܐܠܗܗ . ܘܚܣܝ ܥܠ ܒܢ̈ܝ ܐܝܣܪܝܠ .
Numbers 25:14 ܘܫܡܗ ܕܓܒܪܐ ܒܪ ܐܝܣܪܝܠ ܩܛܝܠܐ ܕܐܬܩܛܠ ܥܡ ܡܕܝܢܝܬܐ . ܙܡܪܝ ܒܪ ܣܠܘ . ܪܝܫ ܒܝܬ ܐ̈ܒܗܐ ܕܫܒܛܐ ܕܫܡܥܘܢ .
Numbers 25:15 ܘܫܡܗ̇ ܕܐܢܬܬܐ ܡܕܝܢܝܬܐ ܟܘܣܒܝ ܒܪܬ ܨܘܪ . ܪܝܫ ܐܘܡܬܐ ܕܒܝܬ ܐܒ̈ܗܝܗ̇ ܒܡܕܝܢ ܗܘܝܘ ܗܘܐ .
Numbers 25:16 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 25:17 ܐܥܝܩ ܠܡܕܝ̈ܢܝܐ ܘܚܪܘܒ ܐܢܘܢ .
Numbers 25:18 ܡܛܠ ܕܡܥܝܩܝܢ ܠܟܘܢ ܒܢܟܠܗܘܢ ܕܐܬܢܟܠܘ ܥܠܝܟܘܢ . ܒܨܒܘܬܐ ܕܦܥܘܪ ܘܒܨܒܘܬܐ ܕܟܘܣܒܝ ܒܪܬ ܪ̈ܫܐ ܕܡܕܝܢ ܚܬܗܘܢ . ܕܐܬܩܛܠܬ ܒܝܘܡܐ ܕܡܚܘܬܐ ܕܡܢ ܫܠܝܐ ܒܨܒܘܬܐ ܕܦܥܘܪ .
Numbers 25:19 ܘܗܘܐ ܡܢ ܒܬܪ ܡܘܬܢܐ ܕܡܢ ܫܠܝܐ .
Numbers 26:1 ܐܡܪ ܡܪܝܐ ܠܡܘܫܐ ܘܠܐܠܝܥܙܪ ܒܪ ܐܗܪܘܢ ܟܗܢܐ .
Numbers 26:2 ܩܒܠܘ ܚܘܫܒܢܐ ܕܟܠܗ̇ ܟܢܘܫܬܐ ܕܒܢ̈ܝ ܐܝܣܪܝܠ . ܡܢ ܒܪ ܥܣܪ̈ܝܢ ܫ̈ܢܝܢ ܘܠܥܠ . ܠܒܝܬ ܐ̈ܒܗܝܗܘܢ ܟܠ ܕܢ̇ܦܩ ܒܚܝܠܐ ܒܐܝܣܪܝܠ .
Numbers 26:3 ܘܡܠܠ ܡܘܫܐ ܘܐܠܝܥܙܪ ܟܗܢܐ ܥܡܗܘܢ ܒܥܪܒܘܬ ܡܘܐܒ ܕܥܠ ܝܘܪܕܢܢ ܕܐܝܪܝܚܘ .
Numbers 26:4 ܘܡܢܐ ܐܢܘܢ ܡܘܫܐ ܡܢ ܒܪ ܥܣܪ̈ܝܢ ܫ̈ܢܝܢ ܘܠܥܠ . ܐܝܟ ܕܦܩܕ ܡܪܝܐ ܠܡܘܫܐ . ܘܒܢ̈ܝ ܐܝܣܪܝܠ ܕܢܦܩܘ ܡܢ ܐܪܥܐ ܕܡܨܪܝܢ .
Numbers 26:5 ܪܘܒܝܠ ܒܘܟܪܗ ܕܐܝܣܪܝܠ . ܒܢ̈ܝ ܪܘܒܝܠ . ܚܢܘܟ ܫܪܒܬܐ ܕܚܢܘܟ . ܦܠܘ ܫܪܒܬܐ ܕܦܠܘ .
Numbers 26:6 ܚܨܪܘܢ ܫܪܒܬܐ ܕܚܨܪܘܢ . ܟܪܡܝ ܫܪܒܬܐ ܕܟܪܡܝ .
Numbers 26:7 ܗܠܝܢ ܫܪ̈ܒܬܐ ܕܪܘܒܝܠ . ܘܗܘܐ ܡܢܝܢܗܘܢ . ܐܪ̈ܒܥܝܢ ܘܬܠܬܐ ܐ̈ܠܦܝܢ ܘܫܒܥܡܐܐ ܘܬܠܬܝܢ .
Numbers 26:8 Numbers 26:9 ܘܒܢ̈ܝ ܐܠܝܒ ܢܒܘܐܝܠ ܘܕܬܢ ܘܐܒܝܪܡ . ܩܪ̈ܝܚܐ ܕܟܢܘܫܬܐ ܕܐܬܦܠܓܘ ܥܠ ܡܘܫܐ ܘܥܠ ܐܗܪܘܢ ܒܟܢܘܫܬܗ ܕܩܘܪܚ . ܘܐܬܦܠܓܘ ܥܠ ܡܪܝܐ .
Numbers 26:10 ܘܦܬܚܬ ܐܪܥܐ ܦܘܡܗ̇ ܘܒܠܥܬ ܐܢܘܢ . ܘܠܩܘܪܚ ܒܡܘܬܢܐ ܕܟܢܘܫܬܐ . ܟܕ ܐܟܠܬ ܢܘܪܐ ܠܡܐܬܝܢ ܘܚܡܫܝܢ ܓܒܪ̈ܝܢ . ܘܗܘܘ ܠܐܬܐ .
Numbers 26:11 Numbers 26:12 ܘܒܢ̈ܝ ܫܡܥܘܢ ܠܫܪ̈ܒܬܗܘܢ . ܝܡܘܐܝܠ ܫܪܒܬܐ ܕܝܡܘܐܝܠ . ܝܡܢܝ ܫܪܒܬܐ ܕܝܡܢܝ . ܝܟܝܢ ܫܪܒܬܐ ܕܝܟܝܢ .
Numbers 26:13 ܙܪܚ ܫܪܒܬܐ ܕܙܪܚ . ܫܐܘܠ ܫܪܒܬܐ ܕܫܐܘܠ .
Numbers 26:14 ܗܠܝܢ ܫܪ̈ܒܬܐ ܕܫܡܥܘܢ . ܥܣܪ̈ܝܢ ܘܬܪ̈ܝܢ ܐ̈ܠܦܝܢ ܘܡܐܬܝܢ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .