← All works
Peshitta Numbers Peshitta (Syriac Old Testament) · 1,289 sections
Single column Two columns
Numbers 19:16 ܘܟܠ ܕܢܩܪܘܒ ܠܐ̈ܦܝ ܚܩܠܐ ܠܩܛܝܠܐ ܕܚܪܒܐ . ܐܘ ܠܡܝܬܐ ܐܘ ܠܓܪܡܐ . ܕܐܢܫܐ ܐܘ ܠܩܒܪܐ . ܢܗܘܐ ܛܡܐ ܫܒܥܐ ܝܘܡ̈ܝܢ .
Numbers 19:17 ܘܢܣܒܘܢ ܠܐܝܢܐ ܕܛܡܐ ܡܢ ܥܦܪܐ ܕܝܩܕܢܐ ܕܚܛܗܐ . ܘܢܪܡܘܢ ܥܠܘܗܝ ܡ̈ܝܐ ܚ̈ܝܐ ܥܠ ܡܐܢܐ .
Numbers 19:18 ܘܢܣܒ ܙܘܦܐ ܘܢܨܒܘܥ ܒܡ̈ܝܐ ܓܒܪܐ ܕܕܟܐ . ܘܢܪܘܣ ܥܠ ܡܫܟܢܐ ܘܥܠ ܡܐ̈ܢܐ . ܘܥܠ ܟܠ ܢܦܫ̈ܬܐ ܕܐܝܬ ܗ̈ܘܝ ܬܡܢ . ܘܥܠ ܡ̇ܢ ܕܩܪܒ ܠܓܪܡܐ ܐܘ ܠܩܛܝܠܐ . ܐܘ ܠܡܝܬܐ ܐܘ ܠܩܒܪܐ .
Numbers 19:19 ܢܪܘܣ ܕܟܝܐ ܥܠ ܛܡܐܐ . ܒܝܘܡܐ ܕܬܠܬܐ ܘܒܝܘܡܐ ܕܫܒܥܐ . ܘܢܪܘܣ ܥܠܘܗܝ ܒܝܘܡܐ ܕܫܒܥܐ . ܘܢܚܠܠ ܡܐ̈ܢܘܗܝ ܘܢܣܚܐ ܒܡ̈ܝܐ . ܘܢܬܕܟܐ ܒܪܡܫܐ .
Numbers 19:20 ܘܓܒܪܐ ܕܢܗܘܐ ܛܡܐ . ܘܠܐ ܢܬܪܣܣ ܥܠܘܗܝ . ܬܐܒܕ ܢܦܫܐ ܗ̇ܝ ܡܢ ܓܘ ܟܢܘܫܬܗ̇ . ܡܛܠ ܕܡܩܕܫܗ ܕܡܪܝܐ ܛܡܐ . ܡ̈ܝܐ ܕܪܣܣܐ ܠܐ ܪܣ ܥܠܘܗܝ . ܛܡܐ ܗܘ .
Numbers 19:21 ܘܢܗܘܐ ܠܟܘܢ ܢܡܘܣܐ ܠܥܠܡ . ܘܡ̇ܢ ܕܪܐ̇ܣ ܡ̈ܝܐ ܕܪܣܣܐ . ܢܚܠܠ ܡܐ̈ܢܘܗܝ . ܘܡ̇ܢ ܕܩ̇ܪܒ ܠܡ̈ܝܐ ܕܪܣܣܐ . ܢܗܘܐ ܛܡܐ . ܥܕܡܐ ܠܪܡܫܐ .
Numbers 19:22 ܘܟܠ ܕܢܩܪܘܒ ܠܗ ܛܡܐܐ . ܢܗܘܐ ܛܡܐ . ܘܢܦܫܐ ܕܬܩܪܘܒ ܠܗ . ܬܗܘܐ ܛܡܐܐ ܥܕܡܐ ܠܪܡܫܐ .
Numbers 20:1 ܘܐܬܘ ܒ̈ܢܝ ܐܝܣܪܝܠ ܟܘܠܗ̇ ܟܢܘܫܬܐ ܠܡܕܒܪܐ ܕܨܝܢ . ܒܝܪܚܐ ܩܕܡܝܐ ܘܝܬܒܘ ܥܡܐ ܒܪܩܡ . ܘܡܝܬܬ ܬܡܢ ܡܪܝܡ . ܘܐܬܩܒܪܬ ܬܡܢ .
Numbers 20:2 ܘܠܝܬ ܗܘܐ ܡ̈ܝܐ ܠܥܡܐ ܕܢܫܬܐ . ܘܐܬܟܢܫܘ ܥܡܐ ܥܠ ܡܘܫܐ ܘܥܠ ܐܗܪܘܢ .
Numbers 20:3 ܘܢܨܘ ܥܡܐ ܥܡ ܡܘܫܐ ܘܐܡܪܘ ܠܗ . ܐܫܬܘܦ ܕܝܢ ܡܝܬܢ ܒܡܘܬܢܐ ܕܐ̈ܚܝܢ ܩܕܡ ܡܪܝܐ .
Numbers 20:4 ܠܡܢܐ ܐܝܬܝܬܘܢ ܟܢܘܫܬܗ ܕܡܪܝܐ ܠܡܕܒܪܐ ܗܢܐ . ܕܢܡܘܬ ܬܢܢ ܚܢܢ ܘܒܥܝܪ̈ܢ .
Numbers 20:5 ܘܠܡܢܐ ܐܣܩܬܘܢܢ ܡܢ ܡܨܪܝܢ . ܘܐܝܬܝܬܘܢܢ ܠܐܬܪܐ ܗܢܐ ܒܝܫܐ . ܠܐ ܐܬܪܐ ܕܒܝܬ ܙܪܥܐ . ܘܐܦ ܠܐ ܕܓܘ̈ܦܢܐ ܘܬܐ̈ܢܐ ܘܪ̈ܘܡܢܐ . ܘܐܦ ܠܐ ܡ̈ܝܐ ܠܡܫܬܐ .
Numbers 20:6 ܘܐܬܘ ܡܘܫܐ ܘܐܗܪܘܢ ܡܢ ܩܕܡ ܟܢܘܫܬܐ ܠܬܪܥܐ ܕܡܫܟܢܙܒܢܐ . ܘܢܦܠܘ ܥܠ ܐ̈ܦܝܗܘܢ ܘܐܬܓܠܝ ܥܠܝܗܘܢ ܫܘܒܚܗ ܕܡܪܝܐ .
Numbers 20:7 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 20:8 ܣܒ ܠܟ ܫܒܛܐ ܘܟܢܘܫ ܟܢܘܫܬܐ ܐܢܬ ܘܐܗܪܘܢ ܐܚܘܟ . ܘܡܠܠ ܥܠ ܟܐܦܐ ܠܥܢܝ̈ܗܘܢ ܘܬܬܠ ܡ̈ܝܗ̇ . ܘܐܦܩ ܠܗܘܢ ܡ̈ܝܐ ܡܢ ܟܐܦܐ . ܘܐܫܩܐ ܠܟܢܘܫܬܐ ܘܠܒܥܝܪܗܘܢ .
Numbers 20:9 ܘܢܣܒ ܡܘܫܐ ܫܒܛܐ ܡܢ ܩܕܡ ܡܪܝܐ ܐܝܟ ܕܦܩܕܗ .
Numbers 20:10 ܘܟܢܫ ܡܘܫܐ ܘܐܗܪܘܢ ܠܟܘܠܗ̇ ܟܢܘܫܬܐ ܠܘܬ ܟܐܦܐ . ܘܐܡܪ ܠܗܘܢ . ܫܡܥܘ ܗܫܐ ܡܡܪ̈ܡܪܢܐ . ܡܢ ܗܕܐ ܟܐܦܐ ܢܦܩ ܠܟܘܢ ܡ̈ܝܐ .
Numbers 20:11 ܘܐܪܝܡ ܡܘܫܐ ܐܝܕܗ . ܘܡܚܗ̇ ܠܟܐܦܐ ܒܫܒܛܗ ܬܪ̈ܬܝܢ ܙܒ̈ܢܝܢ . ܘܢܦܩܘ ܡ̈ܝܐ ܣ̈ܓܝܐܐ . ܘܐܫܬܝܘ ܥܡܐ ܟܠܗ ܘܒܥܝܪ̈ܗܘܢ .
Numbers 20:12 ܘܐܡܪ ܡܪܝܐ ܠܡܘܫܐ ܘܠܐܗܪܘܢ . ܥܠ ܕܠܐ ܗܝܡܢܬܘܢ ܒܝ ܠܡܩܕܫܘܬܢܝ ܩܕܡ ܒܢ̈ܝ ܐܝܣܪܝܠ . ܡܛܠ ܗܢܐ ܠܐ ܬܥܠܘܢܗ̇ ܠܟܢܘܫܬܐ ܗܕܐ ܠܐܪܥܐ ܕܝܗ̇ܒܬ ܠܗܘܢ .
Numbers 20:13 ܗܠܝܢ ܐܢܘܢ ܡ̈ܝܐ ܕܡܨܘܬܐ . ܕܢܨܘ ܒܢ̈ܝ ܐܝܣܪܝܠ ܩܕܡ ܡܪܝܐ ܘܐܬܩܕܫ ܒܗܘܢ .
Numbers 20:14 ܘܫܕܪ ܡܘܫܐ ܐܝ̈ܙܓܕܐ ܡܢ ܪܩܡ ܠܘܬ ܡܠܟܐ ܕܐܕܘܡ . ܗܟܢܐ ܐ̇ܡܪ ܐܚܘܟ ܐܝܣܪܝܠ . ܐܢܬ ܝ̇ܕܥ ܐܢܬ ܟܠܗ̇ ܠܐܘܬܐ ܕܐܕܪܟܬܢ .
Numbers 20:15 ܘܢܚܬܘ ܐܒ̈ܗܝܢ ܠܡܨܪܝܢ . ܘܝܬܒܢ ܒܡܨܪܝܢ ܝܘ̈ܡܬܐ ܣ̈ܓܝܐܐ . ܘܐܒܐܫܘ ܠܢ ܡܨܪ̈ܝܐ ܘܠܐ̈ܒܗܝܢ .
Numbers 20:16 ܘܨܠܝܢ ܩܕܡ ܡܪܝܐ ܘܫܡܥ ܒܩܠܢ . ܘܫܕܪ ܡܠܐܟܐ ܘܐܦܩܢ ܡܢ ܡܨܪܝܢ . ܘܗܐ ܚܢܢ ܒܪܩܡ ܩܪܝܬܐ ܕܒܣܘܦ ܬܚܘܡܟ .
Numbers 20:17 ܗܫܐ ܢܥܒܪ ܒܐܪܥܟ . ܠܐ ܢܥܒܪ ܒܚܩܠܐ ܘܒܟܪܡܐ . ܘܠܐ ܢܫܬܐ ܡ̈ܝܐ ܕܓܘܒ̈ܐ . ܐܠܐ ܒܐܘܪܚ ܡܠܟܐ ܢܐܙܠ . ܘܠܐ ܢܣܛܐ ܠܐ ܠܝܡܝܢܐ ܘܠܐ ܠܣܡܠܐ . ܥܕܡܐ ܕܢܥܒܪ ܬܚܘܡܟ .
Numbers 20:18 ܘܐܡܪ ܠܗ ܐܕܘܡ . ܠܐ ܬܥܒܪ ܒܬܚܘܡܝ . ܕܠܐ ܒܚܪܒܐ ܐܦܘܩ ܠܐܘܪܥܟ .
Numbers 20:19 ܘܐܡܪܘ ܠܗ ܒܢ̈ܝ ܐܝܣܪܝܠ . ܒܫܒܝܠܐ ܢܣܩ . ܘܐܢ ܡܢ ܡ̈ܝܟ . ܢܫܬܐ ܚܢܢ ܘܒܥܝܪ̈ܢ ܢܬܠ ܕܡܝ̈ܗܘܢ . ܒܠܚܘܕ ܒܪ̈ܓܠܝܢ ܢܥܒܪ .
Numbers 20:20 ܘܐܡܪ ܐܕܘܡ ܠܐ ܬܥܒܪܘܢ . ܘܢܦܩ ܐܕܘܡ ܠܐܘܪܥܗܘܢ ܒܥܡܐ ܥܫܝܢܐ . ܘܒܐܝܕܐ ܬܩܝܦܬܐ .
Numbers 20:21 ܘܠܐ ܨܒܐ ܐܕܘܡ ܠܡܫܒܩ ܠܒ̈ܢܝ ܐܝܣܪܝܠ ܠܡܥܒܪ ܒܬܚܘܡܗ . ܘܣܛܐ ܠܗ ܐܝܣܪܝܠ ܡܢܗ .
Numbers 20:22 ܘܫܩܠܘ ܡܢ ܪܩܡ . ܘܐܬܘ ܒ̈ܢܝ ܐܝܣܪܝܠ ܟܠܗ̇ ܟܢܘܫܬܐ ܠܗܘܪ ܛܘܪܐ .
Numbers 20:23 ܘܐܡܪ ܡܪܝܐ ܠܡܘܫܐ ܘܠܐܗܪܘܢ ܒܗܘܪ ܛܘܪܐ ܒܬܚܘܡܐ ܕܐܪܥܐ ܕܐܕܘܡ .
Numbers 20:24 ܢܬܟܢܫ ܐܗܪܘܢ ܠܘܬ ܥܡܗ . ܡܛܠ ܕܠܐ ܢܥܘܠ ܠܐܪܥܐ ܕܝܗ̇ܒܬ ܠܒ̈ܢܝ ܐܝܣܪܝܠ . ܥܠ ܕܡܪܡܪܬܘܢ ܡܠܬ ܦܘܡܝ ܒܡ̈ܝܐ ܕܡܨܘܬܐ . ܘܠܐ ܩܕܫܬܘܢܢܝ ܒܡ̈ܝܐ ܠܥܢܝ̈ܗܘܢ .
Numbers 20:25 ܕܒܪ ܠܐܗܪܘܢ ܘܠܐܠܝܥܙܪ ܒܪܗ . ܘܐܣܩ ܐܢܘܢ ܠܗܘܪ ܛܘܪܐ .
Numbers 20:26 ܘܐܫܠܚ ܠܐܗܪܘܢ ܢܚ̈ܬܘܗܝ . ܘܐܠܒܫ ܐܢܘܢ ܠܐܠܝܥܙܪ ܒܪܗ . ܘܐܗܪܘܢ ܢܬܟܢܫ ܘܢܡܘܬ ܬܡܢ .
Numbers 20:27 ܘܥܒܕ ܡܘܫܐ ܐܝܟ ܕܦܩܕܗ ܡܪܝܐ . ܘܣܠܩܘ ܠܗܘܪ ܛܘܪܐ ܠܥܝܢ ܟܘܠܗ̇ ܟܢܘܫܬܐ .
Numbers 20:28 ܘܐܫܠܚ ܡܘܫܐ ܠܐܗܪܘܢ ܢܚ̈ܬܘܗܝ . ܘܐܠܒܫ ܐܢܘܢ ܠܐܠܝܥܙܪ ܒܪܗ . ܘܡܝܬ ܬܡܢ ܐܗܪܘܢ ܒܗܘܪ ܛܘܪܐ . ܘܢܚܬ ܡܘܫܐ ܘܐܠܝܥܙܪ ܡܢ ܛܘܪܐ .
Numbers 20:29 ܘܚܙܘ ܟܠܗ̇ ܟܢܘܫܬܐ ܕܡܝܬ ܐܗܪܘܢ . ܘܒܟܘ ܥܠ ܐܗܪܘܢ ܬܠܬܝܢ ܝܘܡ̈ܝܢ . ܟܠܗܘܢ ܕܒܝܬ ܐܝܣܪܝܠ .
Numbers 21:1 ܘܫܡܥ ܟܢܥܢܝܐ ܡܠܟܐ ܕܓܕܪ ܕܥ̇ܡܪ ܒܬܝܡܢܐ . ܕܐܬܐ ܐܝܣܪܝܠ ܒܐܘܪܚܐ ܕܓܫ̈ܘܫܐ ܘܐܬܟܬܫ ܥܡ ܐܝܣܪܝܠ . ܘܫܒܐ ܡܢܗܘܢ ܫܒܝܬܐ .
Numbers 21:2 ܘܢܕܪ ܐܝܣܪܐܝܠ ܢܕܪܐ ܠܡܪܝܐ ܘܐܡܪ . ܐܢ ܡܫܠܡܘ ܬܫܠܡ ܥܡܐ ܗܢܐ ܒܐ̈ܝܕܝ . ܐܚܪܡ ܐ̈ܢܝܢ ܩܘܪ̈ܝܗܘܢ .
Numbers 21:3 ܘܫܡܥ ܡܪܝܐ ܒܩܠܗ ܕܐܝܣܪܝܠ . ܘܐܫܠܡ ܐܢܘܢ ܠܟܢ̈ܥܢܝܐ ܒܐܝ̈ܕܝܗܘܢ . ܘܚܪܒܘ ܐܢܘܢ ܘܐܚܪܡܘ ܐܢܘܢ ܘܠܩܘܪ̈ܝܗܘܢ . ܘܩܪܘ ܫܡܗ ܕܐܬܪܐ ܗ̇ܘ ܚܪܡܐ .
Numbers 21:4 ܘܫܩܠܘ ܡܢ ܗܘܪ ܛܘܪܐ ܒܐܘܪܚܐ ܕܝܡܐ ܕܣܘܦ . ܠܡܬܟܪܟܘܬܗ̇ ܠܐܪܥܐ ܕܐܕܘܡ . ܘܐܬܥܝܩܬ ܢܦܫܗ ܕܥܡܐ ܒܐܘܪܚܐ .
Numbers 21:5 ܘܪܛܢܘ ܥܡܐ ܥܠ ܐܠܗܐ ܘܥܠ ܡܘܫܐ ܘܐܡܪܘ . ܠܡܢܐ ܐܣܩܬܢ ܡܢ ܡܨܪܝܢ ܕܢܡܘܬ ܒܡܕܒܪܐ . ܡܛܠ ܕܠܝܬ ܠܚܡܐ ܘܠܐ ܡ̈ܝܐ ܘܢܦܫܢ ܥܩܬ ܒܠܚܡܐ ܙܥܘܪܐ .
Numbers 21:6 ܘܫܕܪ ܡܪܝܐ ܥܠ ܥܡܐ ܚܘܘ̈ܬܐ ܚܪ̈ܡܢܐ ܘܢܟܬܘܗܝ ܠܥܡܐ . ܘܡܝܬܘ ܥܡܐ ܣܓܝܐܐ ܡܢ ܐܝܣܪܝܠ .
Numbers 21:7 ܘܐܬܘ ܥܡܐ ܠܘܬ ܡܘܫܐ ܘܐܡܪܘ ܠܗ . ܚܛܝܢ ܥܠ ܕܪܛܢܢ ܥܠ ܡܪܝܐ ܘܐܦ ܥܠܝܟ . ܨܠܐ ܩܕܡ ܡܪܝܐ ܘܢܦܪܩ ܡܢܢ ܚ̈ܘܘܬܐ . ܘܨܠܝ ܡܘܫܐ ܥܠ ܥܡܐ .
Numbers 21:8 ܘܐܡܪ ܡܪܝܐ ܠܡܘܫܐ . ܥܒܕ ܠܟ ܚܘܝܐ ܚܪܡܢܐ ܕܢܚܫܐ ܘܣܝܡܝܗܝ ܠܐܬܐ . ܘܟܠ ܡ̇ܢ ܕܢ̇ܟܬ ܠܗ ܚܘܝܐ . ܢܚܙܝܘܗܝ ܘܢܚܐ .
Numbers 21:9 ܘܥܒܕ ܡܘܫܐ ܚܘܝܐ ܕܢܚܫܐ ܘܣܡܗ ܠܐܬܐ . ܘܡܐ ܕܢ̇ܟܬ ܚܘܝܐ ܠܓܒܪܐ . ܚ̇ܐܪ ܒܚܘܝܐ ܕܢܚܫܐ ܘܚ̇ܝܐ .
Numbers 21:10 ܘܫܩܠܘ ܒ̈ܢܝ ܐܝܣܪܝܠ ܘܫܪܘ ܒܐܒܘܬ .
Numbers 21:11 ܘܫܩܠܘ ܡܢ ܐܒܘܬ . ܘܫܪܘ ܒܥܝܢܐ ܕܥܒܪ̈ܝܐ . ܒܡܕܒܪܐ ܕܩܕܡ ܡܘܐܒ . ܡܢ ܡܕܢܚܐ ܡܢ ܡܕܢܚ̈ܝ ܫܡܫܐ .
Numbers 21:12 ܘܡܢ ܬܡܢ ܫܩܠܘ ܘܫܪܘ ܒܢܚܠܐ ܕܙܪܕ .
Numbers 21:13 ܘܡܢ ܬܡܢ ܫܩܠܘ ܘܫܪܘ ܒܥܒܪܐ ܕܐܪܢܘܢ . ܒܡܕܒܪܐ ܕܢܦܩ ܡܢ ܬܚܘܡܐ ܕܐܡܘܪ̈ܝܐ . ܡܛܠ ܕܐܪܢܘܢ ܬܚܘܡܐ ܗܘ ܕܡ̈ܘܐܒܝܐ . ܒܝܬ ܡܘܐ̈ܒܝܐ ܠܒܝܬ ܐܡܘܪ̈ܝܐ .
Numbers 21:14 ܡܛܠ ܗܢܐ ܡܬܐܡܪ ܒܣܦܪ ܩܪ̈ܒܘܗܝ ܕܡܪܝܐ . ܫܠܗܒܝܬܐ ܒܥܠܥܠܐ ܘܒܢܚܠܐ ܕܐܪܢܘܢ .
Numbers 21:15 ܘܐܬܩܢ ܢܚ̈ܠܐ ܕܨܠܝܢ ܗܘܘ ܠܝܬܒܐ ܕܥܕ . ܘܣ̇ܡܟܝܢ ܗܘܘ ܥܠ ܬܚܘܡܐ ܕܡܘܐ̈ܒܝܐ .
Numbers 21:16 ܘܬܡܢ ܒܪܐ . ܗ̇ܝ ܒܪܐ ܕܐܡܪ ܡܪܝܐ ܠܡܘܫܐ . ܟܢܫ ܠܝ ܥܡܐ ܘܐܬܠ ܠܗܘܢ ܡ̈ܝܐ .
Numbers 21:17 ܗ̇ܝܕܝܢ ܫܒܚ ܐܝܣܪܝܠ ܬܫܒܘܚܬܐ ܗܕܐ ܣܩܝ ܒܪܐ ܥܢܘ ܠܗ̇ .
Numbers 21:18 ܒܪܐ ܕܚܦܪܘܗ̇ ܪ̈ܘܪܒܢܐ . ܘܚܛܘܗ̇ ܫ̈ܠܝܛܢܐ ܕܥܡܐ . ܘܒܕܩܘܗ̇ ܒܚܘܛܪ̈ܝܗܘܢ . ܘܡܢ ܡܕܒܪܐ ܐܬܝܗܒܬ ܠܡ̈ܬܢܐ .
Numbers 21:19 ܘܡܢ ܡܬ̈ܢܐ ܠܢܚܠܐܝܠ . ܘܡܢ ܢܚܠܐܝܠ ܠܒܡܘܬ .
Numbers 21:20 ܘܡܢ ܒܡܘܬ ܕܢܚܠܐ ܕܒܚܩܠܐ ܕܡܘܐܒ . ܠܪܝܫ ܪܡܬܐ ܕܡܬܚܙܝܐ ܠܘܩܒܠ ܐܫܝܡܘܢ .
Numbers 21:21 ܘܫܕܪ ܐܝܣܪܝܠ ܐܝ̈ܙܓܕܐ ܠܘܬ ܣܝܚܘܢ ܡܠܟܐ ܕܐܡܘܪ̈ܝܐ ܘܐܡܪ ܠܗ .
Numbers 21:22 ܐܥܒܪ ܒܐܪܥܟ . ܘܠܐ ܢܣܛܐ ܒܚܩܠܐ ܘܒܟܪܡܐ . ܘܠܐ ܢܫܬܐ ܡܢ ܡ̈ܝܐ ܕܓܘ̈ܒܐ . ܐܠܐ ܒܐܘܪܚ ܡܠܟܐ ܢܐܙܠ . ܥܕܡܐ ܕܢܥܒܪ ܬܚܘܡܟ .
Numbers 21:23 ܘܠܐ ܫܒܩ ܣܝܚܘܢ ܠܐܝܣܪܝܠ ܕܢܥܒܪ ܒܬܚܘܡܗ . ܘܟܢܫ ܣܝܚܘܢ ܠܟܘܠܗ ܚܝܠܗ . ܘܢܦܩ ܠܐܘܪܥܐ ܕܐܝܣܪܝܠ ܠܡܕܒܪܐ ܘܐܬܐ ܠܝܗܨ . ܘܐܬܟܬܫ ܥܡ ܐܝܣܪܝܠ .
Numbers 21:24 ܘܡܚܝܗܝ ܐܝܣܪܝܠ ܒܦܘܡܐ ܕܣܝܦܐ . ܘܝܪܬܘ ܐܪܥܗ ܡܢ ܐܪܢܘܢ ܘܥܕܡܐ ܠܝܒܩ . ܘܥܕܡܐ ܠܒ̈ܢܝ ܥܡܘܢ . ܡܛܘܠ ܕܥܫܝܢ ܗܘܐ ܬܚܘܡܐ ܕܒ̈ܢܝ ܥܡܘܢ .
Numbers 21:25 ܘܢܣܒ ܐܝܣܪܝܠ ܗܠܝܢ ܟܠܗܝܢ ܩܘܪ̈ܝܐ . ܘܝܬܒ ܐܝܣܪܐܝܠ ܒܟܠܗܝܢ ܩܘܪ̈ܝܐ ܕܐܡܘܪ̈ܝܐ . ܒܚܫܒܘܢ ܘܒܟܠܗܘܢ ܟܦܪ̈ܘܢܝܗ̇ .
Numbers 21:26 ܡܛܠ ܕܚܫܒܘܢ ܩܪܝܬܗ ܗܝ ܕܣܝܚܘܢ ܡܠܟܐ ܕܐܡܘܪ̈ܝܐ . ܘܗܘ ܐܬܟܬܫ ܥܡ ܡܠܟܐ ܕܡܘܐܒ ܩܕܡܝܐ . ܘܢܣܒ ܟܠܗ̇ ܐܪܥܗ . ܡܢ ܬܚܘܡܗ ܘܥܕܡܐ ܠܐܪܢܘܢ .
Numbers 21:27 ܡܛܠ ܗܢܐ ܐ̇ܡܪܝܢ ܒܡܬܠܐ . ܥܘܠܘ ܠܚܫܒܘܢ . ܬܬܒܢܐ ܘܬܬܩܢ ܩܪܝܬܗ ܕܣܝܚܘܢ .
Numbers 21:28 ܡܛܠ ܕܢܘܪܐ ܢܦܩܬ ܡܢ ܚܫܒܘܢ . ܘܫܠܗܒܝܬܐ ܡܢ ܟܪܟܐ ܕܣܝܚܘܢ . ܘܐܟܠܬ ܠܥܕ ܕܡܘܐܒ . ܘܠܦܠܚ̇ܝ ܥ̇ܠܘܬܐ ܕܐܪܢܘܢ .
Numbers 21:29 ܘܝ ܠܟ ܐܪܢܘܢ . ܘܝ ܠܟ ܡܘܐܒ . ܐܒܕܬ ܥܡܐ ܕܟܡܘܫ . ܝ̇ܗܒ ܒܢ̈ܘܗܝ ܒܗܡܝܪ̈ܐ . ܘܒ̈ܢܬܗ ܒܫܒܝܐ . ܠܣܝܚܘܢ ܡܠܟܐ ܕܐܡܘܪ̈ܝܐ .
Numbers 21:30 ܘܚܩ̈ܠܬܐ ܕܚܫܒܘܢ ܐܒܕ ܥܕܡܐ ܠܪܝܒܘܢ . ܘܨ̈ܕܝ ܥܕܡܐ ܠܢܟܚ ܕܒܡܕܒܪܐ .
Numbers 21:31 ܘܝܬܒ ܐܝܣܪܝܠ ܒܐܪܥܐ ܕܐܡܘܪ̈ܝܐ .
Numbers 21:32 ܘܫܕܪ ܡܘܫܐ ܠܡܓܫ ܠܝܥܙܝܪ . ܘܟܒܫ ܟܦܪ̈ܘܢܝܗ̇ . ܘܐܘܒܕ ܠܐܡܘܪ̈ܝܐ ܕܬܡܢ .
Numbers 21:33 ܘܗܦܟܘ ܣܠܩܘ ܠܐܪܥܐ ܕܡܬܢܝܢ . ܘܢܦܩ ܥܘܓ ܡܠܟܐ ܕܡܬܢܝܢ ܠܐܘܪܥܗܘܢ . ܗܘ ܘܟܠܗ ܥܡܗ ܠܩܪܒܐ ܒܐܪܕܥܝ .
Numbers 21:34 ܘܐܡܪ ܡܪܝܐ ܠܡܘܫܐ . ܠܐ ܬܕܚܠ ܡܢܗ . ܡܛܠ ܕܒ̈ܐܝܕܝܟ ܡܫܠܡ ܐܢܐ ܠܗ ܘܠܟܘܠܗ ܥܡܗ . ܘܠܟܠܗ̇ ܐܪܥܗ . ܘܥܒܕ ܠܗ ܐܝܟ ܕܥܒܕܬ ܠܣܝܚܘܢ ܡܠܟܐ ܕܐܡܘܪ̈ܝܐ . ܕܝ̇ܬܒ ܗܘܐ ܒܚܫܒܘܢ .
Numbers 21:35 ܘܚܪܒܘܗܝ ܠܗ ܘܠܒ̈ܢܘܗܝ ܘܠܟܠܗ ܥܡܗ . ܘܠܐ ܫܒܩܘ ܠܗ ܣܪܝܕܐ . ܘܝܪܬܘ ܐܪܥܗ .
Numbers 22:1 ܘܫܩܠܘ ܒܢ̈ܝ ܐܝܣܪܝܠ . ܘܫܪܘ ܒܥܪܒܘܬ ܡܘܐܒ ܕܒܥܒܪܐ ܕܝܘܪܕܢܢ ܕܐܝܪܝܚܘ .
Numbers 22:2 ܘܚܙܐ ܒܠܩ ܒܪ ܨܦܘܪ ܟܘܠ ܕܥܒܕ ܐܝܣܪܝܠ ܠܐܡܘܪ̈ܝܐ .
Numbers 22:3 ܘܕܚܠܘ ܡܘܐ̈ܒܝܐ ܡܢ ܩܕܡ ܥܡܐ ܛܒ . ܡܛܠ ܕܣܓܝ ܗܘܐ ܛܒ . ܘܥܩܬ ܠܗܘܢ ܠܡܘܐ̈ܒܝܐ ܡܢ ܩܕܡ ܒ̈ܢܝ ܐܝܣܪܝܠ .
Numbers 22:4 ܘܐܡܪ ܡܘܐܒ ܠܣ̈ܒܐ ܕܡܕܝܢ . ܡܟܝܠ ܪܥܝܢ ܟܢܫܐ ܗܢܐ ܠܟܠܗܘܢ ܕܚܕܪܝܢ . ܐܝܟ ܕܪܥܐ ܬܘܪܐ ܠܝܘܪܩܐ ܕܚܩܠܐ . ܘܒܠܩ ܗܘܐ ܒܪ ܨܦܘܪ ܡܠܟܐ ܕܡܘܐ̈ܒܝܐ ܒܙܒܢܐ ܗ̇ܘ .
Numbers 22:5 ܘܫܕܪ ܐܝ̈ܙܓܕܐ ܠܘܬ ܒܠܥܡ ܒܪ ܒܥܘܪ ܦܫܘܪܐ . ܕܥܠ ܢܗܪܐ ܠܐܪܥܐ ܕܒ̈ܢܝ ܥܡܘܢ . ܠܡܩܪܝܗ ܘܠܡܐܡܪ ܠܗ . ܗܐ ܥܡܐ ܢܦܩ ܡܢ ܡܨܪܝܢ . ܘܟܣܝ ܐ̈ܦܝܗ̇ ܕܐܪܥܐ . ܘܗܐ ܫܪܝܢ ܠܘܩܒܠܝ .
Numbers 22:6 ܡܟܝܠ ܬܐ ܠܘܛܝܗܝ ܠܝ ܠܥܡܐ ܗܢܐ . ܡܛܠ ܕܥܫܝܢ ܗܘ ܡܢܝ . ܟܒܪ ܢܫܟܚ ܢܚܪܘܒ ܡܢܗ ܘܢܘܒܕܝܘܗܝ ܡܢ ܐܪܥܐ . ܡܛܠ ܕܝܕܥ ܐܢܐ ܕܠܡ̇ܢ ܕܒܪܟ ܐܢܬ ܒܪܝܟ ܗܘ . ܘܠܡ̇ܢ ܕܠܐܛ ܐܢܬ ܠܝܛ ܗܘ .
Numbers 22:7 ܘܐܙܠܘ ܣ̈ܒܐ ܕܡܘܐܒ ܘܣ̈ܒܐ ܕܡܕܝܢ ܘܩ̈ܨܡܝܗܘܢ ܒܐ̈ܝܕܝܗܘܢ . ܘܐܬܘ ܠܘܬ ܒܠܥܡ . ܘܐܡܪܘ ܠܗ . ܡ̈ܠܘܗܝ ܕܒܠܩ .
Numbers 22:8 ܘܐܡܪ ܠܗܘܢ . ܒܘܬܘ ܗܪܟܐ ܒܠܠܝܐ . ܘܐܬܠ ܠܟܘܢ ܦܬܓܡܐ ܐܝܟ ܕܐܡܪ ܠܝ ܡܪܝܐ . ܘܦܫܘ ܪ̈ܘܪܒܢܐ ܕܡܘܐܒ ܠܘܬ ܒܠܥܡ .
Numbers 22:9 ܘܐܬܐ ܐܠܗܐ ܥܠ ܒܠܥܡ ܘܐܡܪ ܠܗ . ܡ̇ܢ ܐܢܘܢ ܗܠܝܢ ܓܒܪ̈ܐ ܕܥܡܟ .
Numbers 22:10 ܘܐܡܪ ܒܠܥܡ ܠܐܠܗܐ . ܒܠܩ ܒܪ ܨܦܘܪ ܡܠܟܐ ܕܡܘܐܒ ܫܕܪ ܥܠܝ ܘܐܡܪ ܠܝ .
Numbers 22:11 ܗܐ ܥܡܐ ܢܦܩ ܡܢ ܡܨܪܝܢ . ܘܟܣܝ ܐܦܝܗ̇ ܕܐܪܥܐ ܗܫܐ ܬܐ ܠܘܛܝܗܝ ܠܝ . ܟܒܪ ܐܫܟܚ ܠܡܬܟܬܫܘ ܥܡܗ ܘܐܘܒܕܝܘܗܝ .
Numbers 22:12 ܘܐܡܪ ܐܠܗܐ ܠܒܠܥܡ . ܠܐ ܬܐܙܠ ܥܡܗܘܢ . ܘܠܐ ܬܠܘܛܝܗܝ ܠܥܡܐ . ܡܛܠ ܕܒܪܝܟ ܗܘ .
Numbers 22:13 ܘܩܡ ܒܠܥܡ ܒܨܦܪܐ . ܘܐܡܪ ܠܪ̈ܘܪܒܢܐ ܕܒܠܩ . ܙܠܘ ܠܐܪܥܟܘܢ . ܡܛܠ ܕܠܐ ܨܒܐ ܡܪܝܐ ܠܡܫܒܩܢܝ ܕܐ̇ܙܠ ܥܡܟܘܢ .
Numbers 22:14 ܘܩܡܘ ܪ̈ܘܪܒܢܐ ܕܡܘܐܒ . ܘܐܬܘ ܠܘܬ ܒܠܩ ܘܐ̇ܡܪܝܢ ܠܗ . ܠܐ ܨܒܐ ܒܠܥܡ ܠܡܐܬܐ ܥܡܢ .
Numbers 22:15 ܘܗܦܟ ܬܘܒ ܒܠܩ . ܘܫܕܪ ܐܝ̈ܙܓܕܐ ܕܪ̈ܘܪܒܝܢ ܘܝܩܝܪ̈ܝܢ ܡܢ ܗܠܝܢ .
Numbers 22:16 ܘܐܬܘ ܠܘܬ ܒܠܥܡ ܘܐܡܪܘ ܠܗ . ܗܟܢܐ ܐ̇ܡܪ ܒܠܩ ܒܪ ܨܦܘܪ . ܠܐ ܬܬܟܠܐ ܠܡܐܬܐ ܠܘܬܝ .
Numbers 22:17 ܡܛܠ ܕܡܝܩܪܘ ܐܝܩܪܟ ܛܒ . ܘܟܠ ܕܬܐܡܪ ܠܝ ܐܥܒܕ . ܘܬܐ ܠܘܛ ܠܝ ܠܥܡܐ ܗܢܐ .
Numbers 22:18 ܘܥܢܐ ܒܠܥܡ ܘܐܡܪ ܠܥܒ̈ܕܘܗܝ ܕܒܠܩ . ܐܢ ܢܬܠ ܠܝ ܒܠܩ ܡܠܐ ܒܝܬܗ ܣܐܡܐ ܐܘ ܕܗܒܐ . ܠܐ ܡܫܟܚ ܐܢܐ ܕܐܥܒܪ ܥܠ ܡܠܬ ܦܘܡܗ ܕܡܪܝܐ ܐܠܗܝ . ܠܐ ܥܠ ܕܙܥܘܪܝܐ ܘܠܐ ܥܠ ܕܪܒܐ .
Numbers 22:19 ܡܟܝܠ ܦܘܫܘ ܐܦ ܐܢܬܘܢ ܗܪܟܐ ܒܠܠܝܐ . ܘܐܕܥ ܡܢܐ ܡܘܣܦ ܡܪܝܐ ܠܡܡܠܠܘ ܥܡܝ .
Numbers 22:20 ܘܐܬܐ ܐܠܗܐ ܥܠ ܒܠܥܡ ܒܠܠܝܐ ܘܐܡܪ ܠܗ . ܐܢ ܠܡܩܪܝܟ ܐܬܘ ܗܠܝܢ ܓܒܪ̈ܐ . ܩܘܡ ܙܠ ܥܡܗܘܢ . ܒܠܚܘܕ ܦܬܓܡܐ ܕܐ̇ܡܪ ܐܢܐ ܠܟ . ܗ̇ܘ ܥܒܕ .
Numbers 22:21 ܘܩܡ ܒܠܥܡ ܒܨܦܪܐ . ܘܐܪܡܝ ܥܠ ܐܬܢܗ . ܘܐܙܠ ܥܡ ܪ̈ܘܪܒܢܐ ܕܡܘܐܒ .
Numbers 22:22 ܘܐܬܚܡܬ ܪܘܓܙܗ ܕܐܠܗܐ ܥܠܘܗܝ ܥܠ ܕܐܙܠ . ܘܩܡ ܡܠܐܟܗ ܕܡܪܝܐ ܒܐܘܪܚܐ ܕܢܗܘܐ ܠܗ ܣܛܢܐ . ܘܗܘ ܪܟܝܒ ܥܠ ܚܡܪܗ . ܘܬܪ̈ܝܢ ܥܠܝܡ̈ܘܗܝ ܥܡܗ .
Numbers 22:23 ܘܚܙܬ ܐܬܢܐ ܠܡܠܐܟܗ ܕܡܪܝܐ ܕܩ̇ܐܡ ܒܐܘܪܚܐ . ܘܣܝܦܗ ܫܡܝܛ ܘܐܚܝܕ ܒܐܝܕܗ . ܘܣܛܬ ܐܬܢܐ ܡܢ ܐܘܪܚܐ . ܘܐܙܠܬ ܒܚܩܠܐ . ܘܡܚܗ̇ ܒܠܥܡ ܠܐܬܢܐ ܠܡܣܛܝܘܬܗ̇ ܠܐܘܪܚܐ .
Numbers 22:24 ܘܩܡ ܡܠܐܟܗ ܕܡܪܝܐ ܒܫܒܝܠܐ ܕܟܪܡܐ . ܕܣܝܓܐ ܡܟܐ ܘܣܝܓܐ ܡܟܐ .
Numbers 22:25 ܘܚܙܬ ܐܬܢܐ ܠܡܠܐܟܗ ܕܡܪܝܐ . ܘܐܬܚܒܨܬ ܒܐܣܬܐ ܘܚܒܨܬܗ̇ ܪܓܠܗ ܕܒܠܥܡ ܒܐܣܬܐ . ܘܐܘܣܦ ܠܡܡܚܝܗ̇ .
Numbers 22:26 ܘܐܘܣܦ ܡܠܐܟܗ ܕܡܪܝܐ . ܘܥܒܪ ܘܩܡ ܠܗ ܒܐܬܪܐ ܐܠܝܨܐ . ܐܬܪ ܕܠܝܬ ܐܘܪܚܐ ܠܡܣܛܐ . ܠܐ ܠܝܡܝܢܐ ܘܠܐ ܠܣܡܠܐ .
Numbers 22:27 ܘܚܙܬ ܐܬܢܐ ܠܡܠܐܟܗ ܕܡܪܝܐ . ܘܪܒܥܬ ܬܚܝܬ ܒܠܥܡ . ܘܐܬܚܡܬ ܪܘܓܙܗ ܕܒܠܥܡ ܘܡܚܗ̇ ܠܐܬܢܐ ܒܚܘܛܪܐ .
Numbers 22:28 ܘܦܬܚ ܡܪܝܐ ܦܘܡܗ̇ ܕܐܬܢܐ ܘܐܡܪܬ ܠܒܠܥܡ . ܡܢܐ ܥܒܕܬ ܠܟ ܕܡܚܝܬܢܝ ܗܐ ܬܠܬ ܙܒ̈ܢܝܢ .
Numbers 22:29 ܘܐܡܪ ܒܠܥܡ ܠܐܬܢܐ . ܥܠ ܕܒܙܚܬ ܒܝ . ܘܐܠܘ ܐܝܬ ܗܘܐ ܣܝܦܐ ܒܐ̈ܝܕܝ . ܗܫܐ ܩ̇ܛܠ ܗܘ̇ܝܬ ܠܟܝ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .