← All works
Peshitta Numbers Peshitta (Syriac Old Testament) · 1,289 sections
Single column Two columns
Numbers 31:40 ܘܢܦܫ̈ܬܐ ܕܐܢܫܐ ܫܬܬܥܣܪ ܐ̈ܠܦܝܢ . ܘܡܟܣܗܘܢ ܠܡܪܝܐ . ܬܠܬܡܐܐ ܘܥܣܪ̈ܝܢ ܢܦܫ̈ܢ .
Numbers 31:41 ܘܝܗܒ ܡܘܫܐ ܟܣܦܐ ܕܦܘܪܫܢܐ ܕܡܪܝܐ ܠܐܠܝܥܙܪ ܟܗܢܐ . ܐܝܟ ܕܦܩܕ ܡܪܝܐ ܠܡܘܫܐ .
Numbers 31:42 ܡܢ ܦܠܓܘܬܐ ܕܒܢ̈ܝ ܐܝܣܪܝܠ ܕܦܠܓ ܠܗܘܢ ܡܘܫܐ ܡܢ ܓܒܪ̈ܐ ܕܢܦܩܘ ܒܚܝܠܐ .
Numbers 31:43 ܘܗܘܬ ܦܠܓܘܬܐ ܕܟܢܘܫܬܐ ܡܢ ܥܢܐ ܬܠܬܡܐܐ ܘܬܠܬܝܢ ܘܫܒܥܐ ܐ̈ܠܦܝܢ ܘܚܡܫܡܐܐ .
Numbers 31:44 ܘܬܘܪ̈ܐ ܬܠܬܝܢ ܘܫܬܐ ܐ̈ܠܦܝܢ .
Numbers 31:45 ܘܚܡܪ̈ܐ ܬܠܬܝܢ ܐ̈ܠܦܝܢ ܘܚܡܫܡܐܐ .
Numbers 31:46 ܘܢܦܫ̈ܬܐ ܕܐܢܫܐ ܫܬܬܥܣܪ ܐ̈ܠܦܝܢ .
Numbers 31:47 ܘܢܣܒ ܡܘܫܐ ܡܢ ܦܠܓܘܬܐ ܕܒܢ̈ܝ ܐܝܣܪܝܠ . ܚܕ ܡܢ ܚܡܫܝܢ ܡܢ ܒܢ̈ܝ ܐܢܫܐ ܘܡܢ ܒܥܝܪ̈ܐ . ܘܝܗܒ ܐܢܘܢ ܠܠܘ̈ܝܐ ܕܢ̇ܛܪܝܢ ܡܛܪܬܐ ܕܡܫܟܢܗ ܕܡܪܝܐ . ܐܝܟ ܕܦܩܕ ܡܪܝܐ ܠܡܘܫܐ .
Numbers 31:48 ܘܩܪܒܘ ܠܘܬ ܡܘܫܐ ܓܒܪ̈ܐ ܕܦܩܝܕܝܢ ܥܠ ܐ̈ܠܦܐ ܕܚܝܠܐ . ܪ̈ܝܫܝ ܐ̈ܠܦܐ ܘܪ̈ܝܫܝ ܡܐ̈ܘܬܐ .
Numbers 31:49 ܘܐܡܪܘ ܠܡܘܫܐ . ܥܒ̈ܕܝܟ ܩܒܠܘ ܚܘܫܒܢܐ ܕܚܝܠܐ ܕܓܒܪ̈ܐ ܥ̇ܒ̈ܕܝ ܩܪܒܐ ܕܥܡܢ . ܘܠܐ ܛܥܐ ܡܢܢ ܓܒܪ .
Numbers 31:50 ܘܩܪܒܢ ܩܘܪܒܢܗ ܕܡܪܝܐ ܓܒܪܐ ܕܐܫܟܚ ܡܐ̈ܢܐ ܕܕܗܒܐ . ܐ̈ܩܠܢܐ ܘܫܐܪ̈ܐ ܘܥܙܩ̈ܬܐ . ܘܩ̈ܕܫܐ ܘܗܡ̈ܢܝܟܐ . ܕܢܚܣܐ ܥܠ ܢܦܫ̈ܬܢ ܩܕܡ ܡܪܝܐ .
Numbers 31:51 ܘܢܣܒ ܡܘܫܐ ܘܐܠܝܥܙܪ ܟܗܢܐ ܕܗܒܐ ܡܢܗܘܢ . ܟܠܗܘܢ ܡܐ̈ܢܐ ܕܥܒܕܐ .
Numbers 31:52 ܘܗܘܐ ܟܠܗ ܕܗܒܐ ܕܦܘܪܫܢܐ ܕܐܦܪܫܘ ܠܡܪܝܐ . ܫܬܬܥܣܪ ܐ̈ܠܦܝܢ ܘܫܒܥܡܐܐ ܘܚܡܫܝܢ ܡܬܩ̈ܠܝܢ . ܡܢ ܪ̈ܝܫܝ ܐ̈ܠܦܐ ܘܡܢ ܪ̈ܝܫܝ ܡܐ̈ܘܬܐ .
Numbers 31:53 ܓܒܪ̈ܐ ܕܝܢ ܕܚܝܠܐ ܒܙܘ ܠܗܘܢ ܐܢܫ ܠܢܦܫܗ .
Numbers 31:54 ܘܢܣܒܘ ܡܘܫܐ ܘܐܠܝܥܙܪ ܟܗܢܐ ܕܗܒܐ . ܡܢ ܪ̈ܝܫܝ ܐ̈ܠܦܐ ܘܡܢ ܪ̈ܝܫܝ ܡܐ̈ܘܬܐ . ܘܐܝܬܝܘܗܝ ܠܡܫܟܢ ܙܒܢܐ ܕܘܟܪܢܐ ܠܒܢ̈ܝ ܐܝܣܪܝܠ . ܩܕܡ ܡܪܝܐ .
Numbers 32:1 ܘܩܢܝܢܐ ܪܒܐ ܗܘܐ ܠܒܢ̈ܝ ܪܘܒܝܠ ܘܠܒܢ̈ܝ ܓܕ . ܘܛܒ ܥܫܝܢ . ܘܚܙܐܘܗ̇ ܠܝܥܙܝܪ ܘܠܐܪܥܐ ܕܓܠܥܕ ܐܬܪܐ ܕܐܙ̇ܠ ܠܒܝܬ ܩܢܝܢܐ .
Numbers 32:2 ܘܐܬܘ ܒܢ̈ܝ ܪܘܒܝܠ ܘܒܢ̈ܝ ܓܕ . ܘܐܡܪܘ ܠܡܘܫܐ ܘܠܐܠܝܥܙܪ ܟܗܢܐ . ܘܠܪ̈ܘܪܒܢܐ ܕܟܢܘܫܬܐ .
Numbers 32:3 ܥܛܪܘܬ ܘܪܝܒܘܢ ܘܝܥܙܝܪ ܘܢܡܪܐ . ܘܚܫܒܘܢ ܘܐܠܥܠܐ ܘܫܒܐ ܘܢܒܘ ܘܒܥܘܢ .
Numbers 32:4 ܐܪܥܐ ܕܚܪܒ ܡܪܝܐ ܩܕܡ ܒܢ̈ܝ ܐܝܣܪܝܠ . ܐܪܥܐ ܗܝ ܕܐܙܠܐ ܠܒܝܬ ܩܢܝܢܐ . ܘܠܥܒ̈ܕܝܟ ܐܝܬ ܩܢܝܢܐ .
Numbers 32:5 ܘܐܡܪܘ ܐܢ ܐܫܟܚܢ ܪ̈ܚܡܐ ܩܕܡܝܟ . ܬܬܝܗܒ ܐܪܥܐ ܗܕܐ ܠܥܒ̈ܕܝܟ ܝܘܪܬܢܐ . ܘܠܐ ܬܥܒܪܢ ܝܘܪܕܢܢ .
Numbers 32:6 ܘܐܡܪ ܡܘܫܐ ܠܒܢ̈ܝ ܪܘܒܝܠ ܘܠܒܢ̈ܝ ܓܕ . ܐܚ̈ܝܟܘܢ ܢ̇ܦܩܝܢ ܠܩܪܒܐ ܘܐܢܬܘܢ ܝ̇ܬܒܝܢ ܐܢܬܘܢ ܗܪܟܐ .
Numbers 32:7 ܠܡܢܐ ܬܒ̇ܪܝܢ ܐܢܬܘܢ ܠܒܐ ܕܒܢ̈ܝ ܐܝܣܪܝܠ . ܕܠܐ ܢܥܒܪܘܢ ܠܐܪܥܐ ܕܝܗܒ ܠܗܘܢ ܡܪܝܐ .
Numbers 32:8 ܗܟܢܐ ܥܒܕܘ ܐ̈ܒܗܝܟܘܢ . ܟܕ ܫ̇ܕܪܬ ܐܢܘܢ ܡܢ ܪܩܡ ܕܓܝܐ . ܠܡܓܫ ܐܪܥܐ .
Numbers 32:9 ܘܣܠܩܘ ܥܕܡܐ ܠܢܚܠܐ ܕܣܓܘܠܐ . ܘܚܙܐܘܗ̇ ܠܐܪܥܐ . ܘܬܒܪܘ ܠܒܐ ܕܒܢ̈ܝ ܐܝܣܪܝܠ . ܕܠܐ ܢܥܠܘܢ ܠܐܪܥܐ ܕܝܗܒ ܠܗܘܢ ܡܪܝܐ .
Numbers 32:10 ܘܐܬܚܡܬ ܥܠܝܗܘܢ ܪܘܓܙܗ ܕܡܪܝܐ ܒܝܘܡܐ ܗ̇ܘ . ܘܝܡܐ ܘܐܡܪ .
Numbers 32:11 ܕܠܐ ܢܚܙܘܢ ܓܒܪ̈ܐ ܕܣܠܩܘ ܡܢ ܡܨܪܝܢ . ܡܢ ܒܪ ܥܣܪ̈ܝܢ ܫܢ̈ܝܢ ܘܠܥܠ . ܐܪܥܐ ܕܝܡܝܬ ܠܐܒܪܗܡ ܘܠܐܝܣܚܩ ܘܠܝܥܩܘܒ . ܡܛܠ ܕܠܐ ܫܡܠܝܘ ܒܬܪܝ .
Numbers 32:12 ܐܠܐ ܐܢ ܟܠܒ ܒܪ ܝܘܦܢܐ ܩܢܙܝܐ . ܘܝܫܘܥ ܒܪ ܢܘܢ ܕܫܡܠܝܘ ܒܬܪ ܡܪܝܐ .
Numbers 32:13 ܘܐܬܚܡܬ ܪܘܓܙܗ ܕܡܪܝܐ ܥܠ ܐܝܣܪܝܠ . ܘܐܛܥܝ ܐܢܘܢ ܒܡܕܒܪܐ ܐܪ̈ܒܥܝܢ ܫ̈ܢܝܢ . ܥܕܡܐ ܕܣܦܘ ܟܠܗ ܕܪܐ ܕܓܒܪ̈ܐ ܕܥܒܕܘ ܒܝܫܬܐ ܩܕܡ ܡܪܝܐ .
Numbers 32:14 ܘܗܐ ܩܡܬܘܢ ܐܦ ܐܢܬܘܢ ܝܘܡܢܐ ܚܠܦ ܐ̈ܒܗܝܟܘܢ . ܬܪܒܝܬܐ ܕܓܒܪ̈ܐ ܚ̈ܛܝܐ . ܕܬܘܣܦܘܢ ܬܘܒ ܪܘܓܙܗ ܕܡܪܝܐ ܥܠ ܐܝܣܪܝܠ .
Numbers 32:15 ܘܐܢ ܬܗܦܟܘܢ ܡܢ ܡܪܝܐ . ܢܘܣܦ ܬܘܒ ܠܡܛܥܝܘܬܟܘܢ ܒܡܕܒܪܐ . ܘܡܚܒܠܝܢ ܐܢܬܘܢ ܥܠ ܗܢܐ ܟܠܗ ܥܡܐ .
Numbers 32:16 ܘܩܪܒܘ ܠܘܬܗ ܘܐܡܪܘ . ܛܝܪ̈ܐ ܕܥܢܐ ܢܒܢܐ ܠܩܢܝܢܢ ܗܪܟܐ . ܘܩܘܪ̈ܝܐ ܠܝܩܪܬܢ .
Numbers 32:17 ܘܚܢܢ ܢܙܕܝܢ ܘܢܐܙܠ ܩܕܡ ܒܢ̈ܝ ܐܝܣܪܝܠ . ܥܕܡܐ ܕܢܥܠ ܐܢܘܢ ܠܐܬܪܗܘܢ . ܘܝܩܪܬܢ ܬܬܒ ܒܩܘܪ̈ܝܐ ܥܫܝ̈ܢܬܐ . ܡܢ ܩܕܡ ܥܡܘܪ̈ܝܗ̇ ܕܐܪܥܐ .
Numbers 32:18 ܠܐ ܢܗܦܘܟ ܠܒ̈ܬܝܢ . ܥܕܡܐ ܕܢܐܪܬܘܢ ܒܢ̈ܝ ܐܝܣܪܝܠ ܐܢܫ ܝܪܬܘܬܗ .
Numbers 32:19 ܘܠܐ ܢܐܪܬ ܥܡܗܘܢ ܡܢ ܥܒܪܐ ܕܝܘܪܕܢܢ ܘܠܗܠ . ܡܛܠ ܕܩܒܠܢ ܝܪܬܘܬܢ ܡܢ ܥܒܪܐ ܕܝܘܪܕܢܢ ܡܢ ܡܕܢܚܐ .
Numbers 32:20 ܘܐܡܪ ܠܗܘܢ ܡܘܫܐ . ܐܢ ܥ̇ܒܕܝܢ ܐܢܬܘܢ ܦܬܓܡܐ ܗܢܐ . ܘܡܙܕܝܢܝܢ ܐܢܬܘܢ ܩܕܡ ܡܪܝܐ ܠܩܪܒܐ .
Numbers 32:21 ܘܥ̇ܒܪܝܢ ܐܢܬܘܢ ܝܘܪܕܢܢ ܟܠܟܘܢ . ܟܕ ܡܙܝܢܝܢ ܐܢܬܘܢ ܩܕܡ ܡܪܝܐ ܠܩܪܒܐ . ܥܕܡܐ ܕܢܘܒܕ ܒ̈ܥܠܕܒܒܘܗܝ ܡܢ ܩܕܡܘܗܝ .
Numbers 32:22 ܘܬܬܟܒܫ ܐܪܥܐ ܩܕܡ ܡܪܝܐ . ܗܝܕܝܢ ܬܗܦܟܘܢ ܘܬܬܚܣܘܢ ܡܢ ܡܪܝܐ ܘܡܢ ܐܝܣܪܐܝܠ . ܘܬܗܘܐ ܠܟܘܢ ܐܪܥܐ ܗܕܐ ܠܝܪܬܘܬܐ ܩܕܡ ܡܪܝܐ .
Numbers 32:23 ܘܐܢ ܠܐ ܥ̇ܒܕܝܢ ܐܢܬܘܢ ܗܟܢܐ . ܚ̇ܛܝܢ ܐܢܬܘܢ ܠܡܪܝܐ . ܘܕܥܘ ܕܚ̈ܛܗܝܟܘܢ ܡܕܪܟܝܢ ܠܟܘܢ .
Numbers 32:24 ܒܢܘ ܠܟܘܢ ܩܘܪ̈ܝܐ ܠܝܩܪܬܟܘܢ . ܘܛܝܪ̈ܐ ܠܥܢܟܘܢ . ܘܡܕܡ ܕܢܦܩ ܡܢ ܦܘܡܟܘܢ ܥܒܕܘ .
Numbers 32:25 ܘܐܡܪܘ ܒܢ̈ܝ ܪܘܒܝܠ ܘܒܢ̈ܝ ܓܕ ܠܡܘܫܐ . ܥܒ̈ܕܝܟ ܢܥܒܕܘܢ ܐܝܟ ܕܡܪܢ ܦ̇ܩܕ .
Numbers 32:26 ܝܩܪܬܢ ܘܢܫ̈ܝܢ ܘܩܢܝܢܢ ܘܟܠܗ̇ ܒܥܝܪ̈ܢ . ܢܗܘܘܢ ܒܩܘܪ̈ܝܐ ܕܓܠܥܕ .
Numbers 32:27 ܘܥܒ̈ܕܝܟ ܢܥܒܪܘܢ ܟܕ ܡܙܝܢ̈ܝܢ ܒܚܝܠܐ ܩܕܡ ܡܪܝܐ ܠܩܪܒܐ . ܐܝܟ ܕܡܪܢ ܐܡܪ .
Numbers 32:28 ܘܦܩܕ ܥܠ ܟܠܗܘܢ ܡܘܫܐ ܠܐܠܝܥܙܪ ܟܗܢܐ ܘܠܝܫܘܥ ܒܪ ܢܘܢ . ܘܠܪ̈ܫܐ ܕܫ̈ܒܛܐ ܕܐ̈ܒܗܐ ܕܒܢ̈ܝ ܐܝܣܪܝܠ .
Numbers 32:29 ܘܐܡܪ ܠܗܘܢ ܡܘܫܐ . ܐܢ ܥ̇ܒܪܝܢ ܒܢ̈ܝ ܪܘܒܝܠ ܘܒܢ̈ܝ ܓܕ ܥܡܟܘܢ ܝܘܪܕܢܢ . ܟܕ ܡܙܝܢܝܢ ܩܕܡ ܡܪܝܐ ܠܩܪܒܐ . ܘܬܬܟܒܫ ܐܪܥܐ ܩܕܡܝܟܘܢ . ܬܬܠܘܢ ܠܗܘܢ ܐܪܥܐ ܕܓܠܥܕ ܝܘܪܬܢܐ .
Numbers 32:30 ܘܐܢ ܠܐ ܢܥܒܪܘܢ ܥܡܟܘܢ ܟܕ ܡܙܝܢܝܢ . ܢܐܪܬܘܢ ܥܡܟܘܢ ܒܐܪܥܐ ܕܟܢܥܢ .
Numbers 32:31 ܘܥܢܘ ܒܢ̈ܝ ܪܘܒܝܠ ܘܒܢ̈ܝ ܓܕ ܘܐܡܪܘ ܠܡܘܫܐ . ܐܝܟ ܕܐܡܪ ܡܪܝܐ ܠܥܒ̈ܕܝܟ ܗܟܢܐ ܢܥܒܕ .
Numbers 32:32 ܚܢܢ ܢܥܒܪ ܟܕ ܡܙܝܢܝܢܢ ܩܕܡ ܡܪܝܐ ܠܩܪܒܐ . ܠܐܪܥܐ ܕܟܢܥܢ . ܘܕܝܠܢ ܐܘܚܕܢܐ ܕܝܪܬܘܬܢ ܒܥܒܪܐ ܕܝܘܪܕܢܢ .
Numbers 32:33 ܘܝܗܒ ܠܗܘܢ ܡܘܫܐ ܠܒܢ̈ܝ ܪܘܒܝܠ ܘܠܒܢ̈ܝ ܓܕ . ܘܠܦܠܓܗ ܕܫܒܛܐ ܕܡܢܫܐ ܒܪ ܝܘܣܦ . ܡܠܟܘܬܗ ܕܣܝܚܘܢ ܡܠܟܐ ܕܐܡܘܪ̈ܝܐ . ܘܡܠܟܘܬܗ ܕܥܘܓ ܡܠܟܐ ܕܡܬܢܝܢ . ܐܪܥܐ ܟܠܗ̇ ܘܩܘܪ̈ܝܗ̇ ܒܬܚ̈ܘܡܝܗ̇ . ܘܩܘܪ̈ܝܐ ܕܐܪܥܐ ܕܚܕܝܪ̈ܢ ܠܗ̇ .
Numbers 32:34 ܘܒܢܘ ܒܢ̈ܝ ܓܕ ܠܪܝܒܘܢ ܘܠܥܛܪܘܬ ܘܠܥܕܘܥܝܪ .
Numbers 32:35 ܘܠܥܛܪܘܬ ܫܘܦܢ . ܘܠܝܥܙܝܪ ܘܠܝܒܓܗܐ .
Numbers 32:36 ܘܠܒܝܬ ܢܡܪܐ . ܘܠܒܝܬ ܗܪܢ . ܩܘܪ̈ܝܐ ܥܫܝܢ̈ܬܐ ܘܛܝܪ̈ܐ ܕܥܢܐ .
Numbers 32:37 ܘܒܢ̈ܝ ܪܘܒܝܠ ܒܢܘ ܠܚܫܒܘܢ ܘܠܐܠܥܠܐ . ܘܠܩܘܪܝܬܝܡ .
Numbers 32:38 ܘܠܢܒܘ ܘܠܒܥܠܡܘܢ ܕܢܣ̈ܝܒܢ ܗ̈ܘܝ ܫܡܐ ܘܠܣܒܡܐ . ܘܩܪܘ ܫܡ̈ܗܝܗܝܢ ܥܠ ܫܡ̈ܗܐ ܕܩܘܪ̈ܝܐ ܕܒܢܘ .
Numbers 32:39 ܘܐܙܠܘ ܒܢ̈ܝ ܡܟܝܪ ܒܪ ܡܢܫܐ ܠܓܠܥܕ . ܘܟܒܫܘܗ̇ ܘܐܘܒܕܘ ܠܐܡܘܪ̈ܝܐ ܕܒܗ̇ .
Numbers 32:40 ܘܝܗܒܗ̇ ܡܘܫܐ ܠܓܠܥܕ ܠܡܟܝܪ ܒܪ ܡܢܫܐ ܘܝܬܒ ܒܗ̇ .
Numbers 32:41 ܘܝܐܝܪ ܒܪ ܡܢܫܐ ܐܙܠ ܘܟܒܫ ܟܦܪ̈ܘܢܝܗܝܢ . ܘܩܪܐ ܐܢ̈ܝܢ ܟܦܪ̈ܘܢܐ ܕܝܐܝܪ . ܥܕܡܐ ܠܝܘܡܢܐ .
Numbers 32:42 ܘܢܟܚ ܐܙܠ ܘܟܒܫ ܠܩܝܬ ܘܠܟܦܪ̈ܘܢܝܗ̇ ܘܩܪܗ̇ ܒܫܡܗ ܢܟܚ .
Numbers 33:1 ܘܗܠܝܢ ܡܫܩ̈ܠܢܐ ܕܒܢ̈ܝ ܐܝܣܪܝܠ . ܕܢܦܩܘ ܡܢ ܐܪܥܐ ܕܡܨܪܝܢ ܠܚܝ̈ܠܘܬܗܘܢ ܒܐܝܕܐ ܕܡܘܫܐ ܘܕܐܗܪܘܢ .
Numbers 33:2 ܘܟܬܒ ܡܘܫܐ ܡܦܩ̈ܢܝܗܘܢ ܘܡܫܩ̈ܠܢܝܗܘܢ ܒܡܠܬ ܦܘܡܗ ܕܡܪܝܐ . ܘܗܠܝܢ ܡܫܩ̈ܠܢܝܗܘܢ ܘܡܦܩ̈ܢܝܗܘܢ .
Numbers 33:3 ܘܫܩܠܘ ܡܢ ܪܥܡܣܝܣ ܒܚܡܫܥܣܪܐ ܒܝܪܚܐ ܩܕܡܝܐ . ܡܢ ܒܬܪ ܦܨܚܐ ܢܦܩܘ ܒܢ̈ܝ ܐܝܣܪܝܠ ܡܢ ܡܨܪܝܢ . ܒܐܝܕܐ ܪܡܬܐ . ܠܥܝܢ ܟܠܗܘܢ ܡܨܪܝܐ .
Numbers 33:4 ܘܡܨܪ̈ܝܐ ܩ̇ܒܪܝܢ ܗܘܘ ܠܒܘܟܪ̈ܐ ܕܩܛܠ ܒܗܘܢ ܡܪܝܐ . ܘܒܐ̈ܠܗܝܗܘܢ ܥܒܕ ܡܪܝܐ ܕܝܢܐ .
Numbers 33:5 ܘܫܩܠܘ ܒܢ̈ܝ ܐܝܣܪܝܠ ܡܢ ܪܥܡܣܝܣ . ܘܫܪܘ ܒܣܟܘܬ .
Numbers 33:6 ܘܫܩܠܘ ܡܢ ܣܟܘܬ . ܘܫܪܘ ܒܐܬܡ ܕܒܣ̈ܘܦܝ ܡܕܒܪܐ .
Numbers 33:7 ܘܫܩܠܘ ܡܢ ܐܬܡ . ܘܫܪܘ ܥܠ ܦܘܡ ܚܐܪܝܬܐ ܕܩܕܡ ܒܥܠܨܦܘܢ . ܘܫܪܘ ܩܕܡ ܡܓܕܘܠ .
Numbers 33:8 ܘܫܩܠܘ ܡܢ ܦܘܡ ܚܐܪܝܬܐ . ܘܐܙܠܘ ܒܓܘ ܝܡܐ ܠܡܕܒܪܐ . ܘܐܙܠܘ ܡܪܕܐ ܬܠܬܐ ܝܘܡ̈ܝܢ ܒܡܕܒܪܐ ܕܐܬܡ . ܘܫܪܘ ܒܡܘܪܬ .
Numbers 33:9 ܘܫܩܠܘ ܡܢ ܡܘܪܬ . ܘܐܬܘ ܠܐܠܝܡ . ܘܒܐܠܝܡ ܐܝܬ ܗ̈ܘܝ ܬܪ̈ܬܥܣܪܐ ܥܝ̈ܢܬܐ ܕܡ̈ܝܐ ܘܫܒܥܝܢ ܕܩ̈ܠܝܢ . ܘܫܪܘ ܬܡܢ ܥܠ ܡ̈ܝܐ .
Numbers 33:10 ܘܫܩܠܘ ܡܢ ܐܠܝܡ . ܘܫܪܘ ܥܠ ܝܕ ܝܡܐ ܕܣܘܦ .
Numbers 33:11 ܘܫܩܠܘ ܡܢ ܝܕ ܝܡܐ ܕܣܘܦ . ܘܫܪܘ ܒܡܕܒܪܐ ܕܣܝܢ .
Numbers 33:12 ܘܫܩܠܘ ܡܢ ܡܕܒܪܐ ܕܣܝܢ . ܘܫܪܘ ܒܪܦܩܐ .
Numbers 33:13 ܘܫܩܠܘ ܡܢ ܪܦܩܐ . ܘܫܪܘ ܒܐܠܘܫ .
Numbers 33:14 ܘܫܩܠܘ ܡܢ ܐܠܘܫ . ܘܫܪܘ ܒܪܦܝܕܝܢ . ܘܠܝܬ ܗܘܘ ܬܡܢ ܡ̈ܝܐ ܠܥܡܐ ܕܢܫܬܘܢ .
Numbers 33:15 ܘܫܩܠܘ ܡܢ ܪܦܝܕܝܢ . ܘܫܪܘ ܒܡܕܒܪܐ ܕܣܝܢܝ .
Numbers 33:16 ܘܫܩܠܘ ܡܢ ܡܕܒܪܐ ܕܣܝܢܝ . ܘܫܪܘ ܒܩܒܪ̈ܐ ܕܪ̈ܓܝ ܪܓܬܐ .
Numbers 33:17 ܘܫܩܠܘ ܡܢ ܩܒܪ̈ܐ ܕܪ̈ܓܝ ܪܓܬܐ . ܘܫܪܘ ܒܚܨܪܘܬ .
Numbers 33:18 ܘܫܩܠܘ ܡܢ ܚܨܪܘܬ . ܘܫܪܘ ܒܪܬܡܐ .
Numbers 33:19 ܘܫܩܠܘ ܡܢ ܪܬܡܐ . ܘܫܪܘ ܒܪܡܘܢ ܦܪܨ .
Numbers 33:20 ܘܫܩܠܘ ܡܢ ܪܡܘܢ ܦܪܨ . ܘܫܪܘ ܒܠܒܢܐ .
Numbers 33:21 ܘܫܩܠܘ ܡܢ ܠܒܢܐ . ܘܫܪܘ ܒܪܣܐ .
Numbers 33:22 ܘܫܩܠܘ ܡܢ ܪܣܐ . ܘܫܪܘ ܒܩܗܠܬ .
Numbers 33:23 ܘܫܩܠܘ ܡܢ ܩܗܠܬ . ܘܫܪܘ ܒܛܘܪܐ ܕܫܦܪ .
Numbers 33:24 ܘܫܩܠܘ ܡܢ ܛܘܪܐ ܕܫܦܪ . ܘܫܪܘ ܒܚܕܕܐ .
Numbers 33:25 ܘܫܩܠܘ ܡܢ ܚܕܕܐ . ܘܫܪܘ ܒܡܩܗܠܘܬ .
Numbers 33:26 ܘܫܩܠܘ ܡܢ ܡܩܗܠܘܬ . ܘܫܪܘ ܒܬܚܬ .
Numbers 33:27 Numbers 33:28 ܘܫܩܠܘ ܡܢ ܬܪܚ . ܘܫܪܘ ܒܡܬܩܐ .
Numbers 33:29 ܘܫܩܠܘ ܡܢ ܡܬܩܐ . ܘܫܪܘ ܒܚܫܡܘܢܐ .
Numbers 33:30 ܘܫܩܠܘ ܡܢ ܚܫܡܘܢܐ . ܘܫܪܘ ܒܡܣܪܘܬ .
Numbers 33:31 ܘܫܩܠܘ ܡܢ ܡܣܪܘܬ . ܘܫܪܘ ܒܒܢ̈ܝ ܝܥܩܢ .
Numbers 33:32 ܘܫܩܠܘ ܡܢ ܒܢ̈ܝ ܝܥܩܢ . ܘܫܪܘ ܒܚܕܓܕܓܕ .
Numbers 33:33 ܘܫܩܠܘ ܡܢ ܚܕܓܕܓܕ . ܘܫܪܘ ܒܝܛܒܬ .
Numbers 33:34 ܘܫܩܠܘ ܡܢ ܝܛܒܬ . ܘܫܪܘ ܒܥܟܪܘܢܐ .
Numbers 33:35 ܘܫܩܠܘ ܡܢ ܥܟܪܘܢܐ . ܘܫܪܘ ܒܥܨܝܢܘܓܒܪ .
Numbers 33:36 ܘܫܩܠܘ ܡܢ ܥܨܝܢܘܓܒܪ . ܘܫܪܘ ܒܡܕܒܪܐ ܕܨܝܢ ܕܗܝ ܗܝ ܩܕܫ .
Numbers 33:37 ܘܫܩܠܘ ܡܢ ܩܕܫ . ܘܫܪܘ ܒܗܘܪ ܛܘܪܐ ܕܒܣ̈ܘܦܝ ܐܪܥܐ ܕܐܕܘܡ .
Numbers 33:38 ܘܣܠܩ ܐܗܪܘܢ ܟܗܢܐ ܠܗܘܪ ܛܘܪܐ ܒܡܠܬ ܦܘܡܗ ܕܡܪܝܐ . ܘܡܝܬ ܬܡܢ . ܒܫܢܬ ܐܪ̈ܒܥܝܢ ܕܢܦܩܘ ܒܢ̈ܝ ܐܝܣܪܝܠ ܡܢ ܐܪܥܐ ܕܡܨܪܝܢ . ܒܝܪܚܐ ܩܕܡܝܐ ܒܚܕ ܒܝܪܚܐ .
Numbers 33:39 ܘܐܗܪܘܢ ܒܪ ܡܐܐ ܗܘܐ ܘܥܣܪ̈ܝܢ ܘܬܠܬ ܫ̈ܢܝܢ . ܟܕ ܡܝܬ ܒܗܘܪ ܛܘܪܐ .
Numbers 33:40 ܘܫܡܥ ܟܢܥܢܝܐ ܡܠܟܐ ܕܓܕܪ ܕܥ̇ܡܪ ܒܬܝܡܢܐ ܒܐܪܥܐ ܕܟܢܥܢ . ܟܕ ܐܬܘ ܒܢ̈ܝ ܐܝܣܪܝܠ .
Numbers 33:41 ܘܫܩܠܘ ܡܢ ܗܘܪ ܛܘܪܐ . ܘܫܪܘ ܒܨܠܡܘܢܐ .
Numbers 33:42 ܘܫܩܠܘ ܡܢ ܨܠܡܘܢܐ . ܘܫܪܘ ܒܦܝܢܘܢ .
Numbers 33:43 ܘܫܩܠܘ ܡܢ ܦܝܢܘܢ . ܘܫܪܘ ܒܐܒܘܬ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .