← All works
Peshitta Numbers Peshitta (Syriac Old Testament) · 1,289 sections
Single column Two columns
Numbers 33:44 ܘܫܩܠܘ ܡܢ ܐܒܘܬ . ܘܫܪܘ ܒܥܝܢܐ ܕܥܒܪ̈ܝܐ ܒܬܚܘܡܐ ܕܡܘܐܒ .
Numbers 33:45 ܘܫܩܠܘ ܡܢ ܥܝܢܐ ܕܥܒܪ̈ܝܐ . ܘܫܪܘ ܒܪܝܒܘܢ ܓܕ .
Numbers 33:46 ܘܫܩܠܘ ܡܢ ܪܝܒܘܢ ܓܕ . ܘܫܪܘ ܒܥܠܡܘܢ ܕܒܠܬܝܡ .
Numbers 33:47 ܘܫܩܠܘ ܡܢ ܒܥܠܡܘܢ ܕܒܠܬܝܡ . ܘܫܪܘ ܒܛܘܪܐ ܕܥܒܪ̈ܝܐ ܕܩܕܡ ܢܒܘ .
Numbers 33:48 ܘܫܩܠܘ ܡܢ ܛܘܪܐ ܕܥܒܪ̈ܝܐ ܘܫܪܘ ܒܥܪܒܘܬ ܡܘܐܒ . ܕܥܠ ܝܘܪܕܢܢ ܕܐܝܪܝܚܘ .
Numbers 33:49 ܘܫܪܘ ܥܠ ܝܘܪܕܢܢ ܡܢ ܒܝܬ ܐܫܝܡܘܢ . ܘܥܕܡܐ ܠܐܒܠ ܕܣܛܝܡ ܕܒܥܪܒܘܬ ܡܘܐܒ .
Numbers 33:50 ܘܐܡܪ ܡܪܝܐ ܠܡܘܫܐ . ܒܥܪܒܘܬ ܡܘܐܒ ܕܥܠ ܝܘܪܕܢܢ ܕܐܝܪܝܚܘ .
Numbers 33:51 ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ . ܐܢܬܘܢ ܥ̇ܒܪܝܢ ܐܢܬܘܢ ܝܘܪܕܢܢ ܠܐܪܥܐ ܕܟܢܥܢ .
Numbers 33:52 ܘܬܘܒܕܘܢ ܟܠܗܘܢ ܥܡܘܪ̈ܝܗ̇ ܕܐܪܥܐ ܡܢ ܩܕܡܝܟܘܢ . ܘܬܘܒܕܘܢ ܟܠܗܝܢ ܣ̈ܓܕܬܗܘܢ . ܘܟܠܗܘܢ ܨ̈ܠܡܐ ܕܢܣܟܬܗܘܢ ܬܘܒܕܘܢ . ܘܟܠܗܝܢ ܥ̈ܠܘܬܗܘܢ ܬܥܩܪܘܢ .
Numbers 33:53 ܘܬܐܪܬܘܢܗ̇ ܠܐܪܥܐ ܘܬܬܒܘܢ ܒܗ̇ . ܡܛܠ ܕܠܟܘܢ ܝܗ̇ܒܬܗ̇ ܐܪܥܐ ܠܡܐܪܬܗ̇ .
Numbers 33:54 ܘܝܪܬܘ ܐܪܥܐ ܒܦܨ̈ܐ ܕܫܪ̈ܒܬܟܘܢ . ܠܣܓ̈ܝܐܐ ܬܣܓܘܢ ܝܪܬܘܬܐ . ܘܠܙܥܘܪ̈ܐ ܬܙܥܪܘܢ ܝܪܬܘܬܐ . ܡ̇ܢ ܕܣ̇ܠܩܐ ܠܗ ܦܨܬܐ ܠܫ̈ܒܛܐ ܕܐ̈ܒܗܝܗܘܢ ܢܐܪܬܘܢ .
Numbers 33:55 ܘܐܢ ܠܐ ܬܘܒܕܘܢ ܠܥܡܘܪ̈ܐ ܕܐܪܥܐ . ܡܢ ܩܕܡܝܟܘܢ ܗ̇ܢܘܢ ܕܡܫܬܚܪܝܢ ܡܢܗܘܢ . ܢܗܘܘܢ ܣ̈ܟܐ ܒ̈ܥܝܢܝܟܘܢ . ܘܠܘܠܝ̈ܬܐ ܒܨ̈ܕܥܝܟܘܢ . ܘܢܥܝܩܘܢ ܠܟܘܢ ܒܐܪܥܐ ܕܥ̇ܡܪܝܢ ܐܢܬܘܢ ܒܗ̇ .
Numbers 33:56 ܘܐܝܟܢܐ ܕܐܬܚܫܒܬ ܕܐܥܒܕ ܠܗܘܢ ܐܥܒܕ ܠܟܘܢ .
Numbers 34:1 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 34:2 ܦܩܕ ܠܒܢ̈ܝ ܐܝܣܪܝܠ ܘܐܡܪ ܠܗܘܢ . ܐܢܬܘܢ ܥܐ̇ܠܝܢ ܐܢܬܘܢ ܠܐܪܥܐ ܕܟܢܥܢ . ܗܕܐ ܐܪܥܐ ܬܬܦܠܓ ܠܟܘܢ ܒܝܘܪܬܢܐ ܐܪܥܐ ܕܟܢܥܢ ܒܬ̈ܚܘܡܝܗ̇ .
Numbers 34:3 ܘܢܗܘܐ ܠܟܘܢ ܣܛܪܐ ܕܬܝܡܢܐ . ܡܢ ܡܕܒܪܐ ܕܨܝܢ ܥܠ ܬܚܘܡܐ ܕܐܕܘܡ . ܘܢܗܘܐ ܠܟܘܢ ܬܚܘܡܐ ܕܬܝܡܢܐ . ܡܢ ܣܘܦ ܝܡܐ ܕܡܠܚܐ ܡܢ ܡܕܢܚܐ .
Numbers 34:4 ܘܢܗܘܐ ܟ̇ܪܟ ܬܚܘܡܟܘܢ ܡܢ ܬܝܡܢܐ . ܠܡܣܩܢܐ ܕܣܦܪܘܝܡ . ܘܢܗܘܐ ܥ̇ܒܪ ܠܨܝܢ . ܘܢܗܘܘܢ ܡܦܩ̈ܢܘܗܝ ܡܢ ܬܝܡܢܐ ܠܪܩܡ ܕܓܝܐ . ܘܢܦܘܩ ܥܠ ܚܨܪ ܐܕܪ . ܘܢܥܒܪ ܠܥܨܡܘܢ .
Numbers 34:5 ܘܢܬܟܪܟ ܬܚܘܡܐ ܡܢ ܥܨܡܘܢ ܠܢܚܠܐ ܕܡܨܪܝܢ . ܘܢܗܘܘܢ ܡܦܩ̈ܢܘܗܝ ܠܝܡܐ .
Numbers 34:6 ܘܬܚܘܡܐ ܕܝܡܐ ܢܗܘܐ ܠܟܘܢ . ܝܡܐ ܪܒܐ ܘܬܚܘܡܗ . ܗܢܐ ܢܗܘܐ ܠܟܘܢ ܬܚܘܡܐ ܕܝܡܐ .
Numbers 34:7 ܘܗܢܐ ܢܗܘܐ ܠܟܘܢ ܬܚܘܡܐ ܕܓܪܒܝܐ ܘܡܢ ܝܡܐ ܪܒܐ . ܬܬܚܡܘܢ ܠܟܘܢ ܠܗܘܪ ܛܘܪܐ .
Numbers 34:8 ܘܡܢ ܗܘܪ ܛܘܪܐ ܬܬܚܡܘܢ ܠܡܥܠܢܐ ܕܚܡܬ . ܘܢܗܘܘܢ ܡܦܩ̈ܢܘܗܝ ܕܬܚܘܡܐ ܠܨܕܕ .
Numbers 34:9 ܘܢܗܘܐ ܢ̇ܦܩ ܬܚܘܡܐ ܠܙܦܪܘܢ . ܘܢܗܘܘܢ ܡܦܩ̈ܢܘܗܝ ܠܚܨܪ ܥܝܢܢ . ܗܠܝܢ ܢܗܘܘܢ ܠܟܘܢ ܬܚ̈ܘܡܐ ܕܓܪܒܝܐ .
Numbers 34:10 ܘܬܬܚܡܘܢ ܠܟܘܢ ܠܬܚܘܡܐ ܕܡܕܢܚܐ . ܡܢ ܚܨܪ ܥܝܢܢ ܠܫܦܡ .
Numbers 34:11 ܘܢܗܘܐ ܢ̇ܚܬ ܬܚܘܡܐ ܡܢ ܫܦܡ ܠܕܒܠܬ . ܡܢ ܡܕܢܚ ܠܥܝܢ . ܘܢܗܘܐ ܢ̇ܚܬ ܬܚܘܡܐ . ܘܢܗܘܐ ܣ̇ܡܟ ܠܣܛܪܐ ܕܝܡܐ ܕܟܢܪܬ ܡܢ ܡܕܢܚܐ .
Numbers 34:12 ܘܢܗܘܐ ܢ̇ܚܬ ܬܚܘܡܐ ܠܝܘܪܕܢܢ . ܘܢܗܘܘܢ ܡܦܩ̈ܢܘܗܝ ܠܝܡܐ ܕܡܠܚܐ . ܗܕܐ ܬܗܘܐ ܠܟܘܢ ܐܪܥܐ ܒܬܚ̈ܘܡܝܗ̇ ܟܕ ܚ̇ܕܪܐ .
Numbers 34:13 ܘܦܩܕ ܡܘܫܐ ܠܒܢ̈ܝ ܐܝܣܪܝܠ ܘܐܡܪ ܠܗܘܢ . ܗܕܐ ܗܝ ܐܪܥܐ ܕܬܦܠܓܘܢ ܒ̈ܦܨܐ . ܕܦܩܕ ܡܪܝܐ ܠܡܬܠ ܠܬܫܥܐ ܫܒ̈ܛܝܢ ܘܠܦܠܓܘܬ ܫܒܛܐ .
Numbers 34:14 ܡܛܠ ܕܢܣܒܘ ܫܒܛܐ ܕܒܢ̈ܝ ܪܘܒܝܠ ܠܒܝܬ ܐ̈ܒܗܝܗܘܢ . ܘܫܒܛܐ ܕܒܢ̈ܝ ܓܕ ܠܒܝܬ ܐ̈ܒܗܝܗܘܢ . ܘܦܠܓܗ ܕܫܒܛܐ ܕܡܢܫܐ ܩܒܠܘ ܝܪܬܘܬܗܘܢ .
Numbers 34:15 ܬܪ̈ܝܢ ܫ̈ܒܛܝܢ ܘܦܠܓܘܬ ܫܒܛܐ . ܩܒܠܘ ܝܪܬܘܬܗܘܢ ܡܢ ܥܒܪܐ ܕܝܘܪܕܢܢ ܕܐܝܪܝܚܘ . ܩܕܡܝܬ ܬܡܢ ܡܢ ܡܕܢܚܐ .
Numbers 34:16 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 34:17 ܗܠܝܢ ܫܡ̈ܗܐ ܕܓܒܪ̈ܐ ܕܡܘܪ̈ܬܝܢ ܠܟܘܢ ܐܪܥܐ . ܐܠܝܥܙܪ ܟܗܢܐ . ܘܝܫܘܥ ܒܪ ܢܘܢ .
Numbers 34:18 ܘܚܕ ܚܕ ܪܫܐ ܡܢ ܫܒܛܐ ܕܒܪܘ . ܕܢܦܠܓܘܢ ܠܟܘܢ ܐܪܥܐ .
Numbers 34:19 ܘܗܠܝܢ ܫ̈ܡܗܐ ܕܪ̈ܫܐ ܕܓܒܪ̈ܐ . ܡܢ ܫܒܛܐ ܕܝܗܘܕܐ ܟܠܒ ܒܪ ܝܘܦܢܐ .
Numbers 34:20 ܡܢ ܫܒܛܐ ܕܫܡܥܘܢ ܫܠܡܘܐܝܠ ܒܪ ܥܡܝܗܘܕ .
Numbers 34:21 ܡܢ ܫܒܛܐ ܕܒܢܝܡܝܢ ܐܠܕܕ ܒܪ ܟܣܠܘܢ .
Numbers 34:22 ܡܢ ܫܒܛܐ ܕܕܢ . ܒܩܝ ܒܪ ܝܓܠܝ .
Numbers 34:23 ܡܢ ܫܒܛܐ ܕܝܘܣܦ . ܡܢ ܫܒܛܐ ܕܡܢܫܐ . ܢܚܠܐܝܠ ܒܪ ܐܦܘܕ .
Numbers 34:24 ܡܢ ܫܒܛܐ ܕܐܦܪܝܡ . ܩܡܘܐܝܠ ܒܪ ܫܦܛܢ .
Numbers 34:25 ܡܢ ܫܒܛܐ ܕܙܒܘܠܘܢ . ܐܠܝܨܦܢ ܒܪ ܦܪܢܟ .
Numbers 34:26 ܡܢ ܫܒܛܐ ܕܐܝܣܟܪ . ܦܛܐܝܠ ܒܪ ܥܙܘܪ .
Numbers 34:27 ܡܢ ܫܒܛܐ ܕܐܫܝܪ . ܐܚܝܗܘܕ ܒܪ ܫܠܘܡܝ .
Numbers 34:28 ܡܢ ܫܒܛܐ ܕܢܦܬܠܝ . ܦܕܐܝܠ ܒܪ ܥܡܝܗܘܕ .
Numbers 34:29 ܠܗܠܝܢ ܦܩܕ ܡܪܝܐ ܕܢܘܪܬܘܢ ܠܒܢ̈ܝ ܐܝܣܪܝܠ ܒܐܪܥܐ ܕܟܢܥܢ .
Numbers 35:1 ܘܡܠܠ ܡܪܝܐ ܥܡ ܡܘܫܐ ܒܥܪܒܘܬ ܡܘܐܒ ܕܥܠ ܝܘܪܕܢܢ ܕܐܝܪܝܚܘ ܘܐܡܪ ܠܗ .
Numbers 35:2 ܦܩܕ ܠܒܢ̈ܝ ܐܝܣܪܐܝܠ . ܘܢܬܠܘܢ ܠܠܘ̈ܝܐ ܡܢ ܝܘܪܬܢܐ ܕܐܘܚܕܢܗܘܢ ܩܘܪ̈ܝܐ ܠܡܬܒ . ܘܐܓܘܪ̈ܣܐ ܕܩܘܪ̈ܝܐ ܕܒܚܕܪ̈ܝܗܘܢ . ܢܬܠܘܢ ܠܠܘ̈ܝܐ .
Numbers 35:3 ܘܢܗܘ̈ܝܢ ܠܗܘܢ ܩܘܪ̈ܝܐ ܠܡܬܒ . ܘܐܓܘܪ̈ܣܝܗܝܢ ܢܗܘܘܢ ܠܒܥܝܪ̈ܗܘܢ ܘܠܩܢܝܢܗܘܢ ܘܠܟܠܗ ܚܝܘܬܗܘܢ .
Numbers 35:4 ܘܐܓܘܪ̈ܣܐ ܕܩܘܪ̈ܝܐ ܕܬܬܠܘܢ ܠܠܘ̈ܝܐ . ܡܢ ܐܣܬܐ ܕܩܪܝܬܐ ܘܠܒܪ . ܐܠܦ ܐ̈ܡܝܢ ܟܕ ܚ̇ܕܪܐ .
Numbers 35:5 ܘܡܫܘܚ ܡܢ ܠܒܪ ܠܩܪܝܬܐ . ܠܣܛܪܐ ܕܡܕܢܚܐ . ܬܪ̈ܝܢ ܐ̈ܠܦܝܢ ܐܡ̈ܝܢ . ܘܠܣܛܪܐ ܕܬܝܡܢܐ ܬܪ̈ܝܢ ܐ̈ܠܦܝܢ ܐ̈ܡܝܢ . ܘܠܣܛܪܐ ܕܡܥܪܒܐ ܬܪ̈ܝܢ ܐ̈ܠܦܝܢ ܐܡ̈ܝܢ . ܘܠܣܛܪܐ ܕܓܪܒܝܐ ܬܪ̈ܝܢ ܐ̈ܠܦܝܢ ܐܡ̈ܝܢ . ܘܩܪܝܬܐ ܒܡܨܥܬܐ . ܗܢܐ ܢܗܘܐ ܠܟܘܢ ܫܛܚܐ ܕܩܘܪ̈ܝܐ .
Numbers 35:6 ܘܩܘܪ̈ܝܐ ܕܝ̇ܗܒܝܢ ܐܢܬܘܢ ܠܠܘ̈ܝܐ . ܫܬ ܩܘܪ̈ܝܐ ܕܒܝܬ ܓܘܣܐ ܢܗ̈ܘܝܢ ܠܟܘܢ . ܕܢܗܘܐ ܥ̇ܪܩ ܠܬܡܢ ܩܛܘܠܐ . ܕܩ̇ܛܠ ܠܚܒܪܗ ܕܠܐ ܒܨܒܝܢܗ . ܘܥܠܝܗܝܢ ܐܪܡܘ ܐܪ̈ܒܥܝܢ ܘܬܪ̈ܬܝܢ ܩܘܪ̈ܝܐ .
Numbers 35:7 ܟܠܗܝܢ ܩܘܪ̈ܝܐ ܕܝܗܒܝܢ ܐܢܬܘܢ ܠܠܘ̈ܝܐ . ܐܪ̈ܒܥܝܢ ܘܬܡܢܐ ܩܘܪ̈ܝܐ . ܗ̈ܢܝܢ ܘܫ̈ܛܚܝܗܝܢ .
Numbers 35:8 ܘܩܘܪ̈ܝܐ ܕܝ̇ܗܒܝܢ ܐܢܬܘܢ ܡܢ ܝܪܬܘܬܐ ܕܒܢ̈ܝ ܐܝܣܪܝܠ . ܡܢ ܣ̈ܓܝܐܐ ܬܣܓܘܢ . ܘܡܢ ܙܥܘܪ̈ܐ ܬܙܥܪܘܢ . ܐܢܫ ܐܝܟ ܠܦܘܬ ܝܪܬܘܬܐ ܕܝ̇ܪܬ ܢܬܠ ܡܢ ܩܘܪ̈ܝܗ̇ ܠܠܘ̈ܝܐ .
Numbers 35:9 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 35:10 ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ . ܡܐ ܕܥܒܪܬܘܢ ܝܘܪܕܢܢ ܠܐܪܥܐ ܕܟܢܥܢ .
Numbers 35:11 ܛܝܒܘ ܠܟܘܢ ܩܘܪ̈ܝܐ ܕܒܝܬ ܓܘܣܐ ܕܢܗ̈ܘܝܢ ܠܟܘܢ . ܕܢܥܪܘܩ ܠܬܡܢ ܩܛܘܠܐ . ܐܝܢܐ ܕܢܩܛܘܠ ܢܦܫܐ ܒܛܘܥܝܝ .
Numbers 35:12 ܘܢܗ̈ܘܝܢ ܠܟܘܢ ܗܠܝܢ ܩܘܪ̈ܝܐ ܠܒܝܬ ܓܘܣܐ . ܡܢ ܬܒ̇ܥ ܥܝܪܬܐ ܕܕܡܐ . ܘܠܐ ܢܬܩܛܠ ܩܛܘܠܐ ܥܕܡܐ ܕܩ̇ܐܡ ܩܕܡ ܟܢܘܫܬܐ ܒܕܝܢܐ .
Numbers 35:13 ܘܩܘܪ̈ܝܐ ܕܝ̇ܗܒܝܢ ܐܢܬܘܢ ܫܬ ܩܘܪ̈ܝܐ ܕܒܝܬ ܓܘܣܐ ܢܗܘܝܢ ܠܟܘܢ .
Numbers 35:14 ܬܠܬ ܩܘܪ̈ܝܐ ܗܒܘ ܒܥܒܪܐ ܕܝܘܪܕܢܢ . ܘܬܠܬ ܩܘܪ̈ܝܐ ܗܒܘ ܒܐܪܥܐ ܕܟܢܥܢ . ܩܘܪ̈ܝܐ ܕܒܝܬ ܓܘܣܐ ܢܗ̈ܘܝܢ .
Numbers 35:15 ܠܒܢ̈ܝ ܐܝܣܪܝܠ . ܘܠܐܝܢܐ ܕܡܬܦܢܐ ܠܘܬܝ ܘܠܐܝܠܝܢ ܕܥ̇ܡܪܝܢ ܒܝܢܬܟܘܢ . ܘܢܗ̈ܘܝܢ ܠܟܘܢ ܗܠܝܢ ܫܬ ܩܘܪ̈ܝܐ ܠܒܝܬ ܓܘܣܐ . ܕܢܥܪܘܩ ܠܗܝܢ ܟܠ ܕܩ̇ܛܠ ܢܦܫܐ ܒܛܘܥܝܝ .
Numbers 35:16 ܘܐܢ ܒܡܐܢܐ ܕܦܪܙܠܐ ܡܚܝܗܝ ܐܝܟ ܕܢܡܘܬ ܘܡܝܬ . ܩܛܘܠܐ ܗܘ . ܡܬܩܛܠܘ ܢܬܩܛܠ ܩܛܘܠܐ ܗ̇ܘ .
Numbers 35:17 ܘܐܢ ܒܟܐܦܐ ܒܐܝܕܐ ܡܚܝܗܝ ܐܝܟ ܕܢܡܘܬ ܘܡܝܬ . ܩܛܘܠܐ ܗ̇ܘ ܡܬܩܛܠܘ ܢܬܩܛܠ .
Numbers 35:18 ܘܐܢ ܒܡܐܢܐ ܕܩܝܣܐ ܒܐܝܕܐ ܡܚܝܗܝ ܐܝܟ ܕܢܡܘܬ ܘܡܝܬ . ܩ̇ܛܘܠܐ ܗܘ ܡܬܩܛܠܘ ܢܬܩܛܠ .
Numbers 35:19 ܬܒ̇ܥ ܥܝܪܬܐ ܕܕܡܐ . ܗܘ ܢܩܛܠܝܘܗܝ ܠܩܛܘܠܐ ܡܐ ܕܦ̇ܓܥ ܒܗ .
Numbers 35:20 ܘܐܢ ܒܣܢܐܬܐ ܡܚܝܗܝ . ܐܘ ܫܕܐ ܒܗ ܒܢܟܠܐ ܘܡܝܬ . ܩܛܘܠܐ ܗ̇ܘ .
Numbers 35:21 ܒܒܥܠܕܒܒܘܬܐ ܡܚܝܗܝ ܒܐܝܕܗ ܐܝܟ ܕܢܡܘܬ ܘܡܝܬ . ܩܛܘܠܐ ܗܘ ܡܬܩܛܠܘ ܢܬܩܛܠ . ܬܒ̇ܥ ܥܝܪܬܐ ܕܕܡܐ ܗܘ ܢܩܛܠܝܘܗܝ ܠܩܛܘܠܐ ܡܐ ܕܦ̇ܓܥ ܒܗ .
Numbers 35:22 ܘܐܢ ܡܢ ܫܠܝܐ ܕܠܐ ܒܥܠܕܒܒܘܬܐ ܡܚܝܗܝ . ܐܘ ܫܕܐ ܒܗ ܟܠ ܡܐܢ ܕܠܐ ܒܢܟܠܐ .
Numbers 35:23 ܐܘ ܒܟܠ ܟܐܦ ܕܩܛܠܐ . ܕܟܕ ܠܐ ܚܙܐ ܫܕܐ ܥܠܘܗܝ ܘܡܝܬ . ܘܠܐ ܗܘܐ ܒܥܠܕܒܒܗ . ܘܠܐ ܨ̇ܒܐ ܗܘܐ ܠܒܝܫܬܗ .
Numbers 35:24 ܬܕܘܢ ܟܢܘܫܬܐ ܒܝܬ ܩܛܘܠܐ ܠܬܒ̇ܥ ܥܝܪܬܐ ܕܕܡܐ ܥܠ ܕܝ̈ܢܐ ܗܠܝܢ .
Numbers 35:25 ܘܬܦܨܝܘܗܝ ܟܢܘܫܬܐ ܠܩܛܘܠܐ ܡܢ ܬܒ̇ܥ ܥܝܪܬܐ ܕܕܡܐ . ܘܬܫܕܪܝܘܗܝ ܟܢܘܫܬܐ ܠܩܪܝܬܐ ܕܒܝܬ ܓܘܣܐ ܕܥܪܩ ܗܘܐ ܠܗ̇ . ܘܢܬܒ ܒܗ̇ ܥܕܡܐ ܕܢܡܘܬ ܟܗܢܐ ܪܒܐ ܕܐܬܡܫܚ ܒܡܫܚܐ ܕܩܘܕܫܐ .
Numbers 35:26 ܘܐܢ ܢܦܘܩ ܩܛܘܠܐ ܠܒܪ ܡܢ ܬܚ̈ܘܡܐ ܕܩܪܝܬܐ ܕܒܝܬ ܓܘܣܐ ܕܥܪܩ ܠܗ̇ .
Numbers 35:27 ܘܢܫܟܚܘܗܝ ܬܒ̇ܥ ܥܝܪܬܐ ܕܕܡܐ . ܠܒܪ ܡܢ ܬܚ̈ܘܡܐ ܕܩܪܝܬܐ ܕܒܝܬ ܓܘܣܐ . ܘܢܩܛܘܠ ܬܒ̇ܥ ܥܝܪܬܐ ܕܕܡܐ ܠܩܛܘܠܐ . ܠܝܬ ܠܗ ܥܝܪܬܐ .
Numbers 35:28 ܡܛܠ ܗܢܐ ܒܩܪܝܬܐ ܕܒܝܬ ܓܘܣܐ ܢܬܒ ܥܕܡܐ ܕܢܡܘܬ ܟܗܢܐ ܪܒܐ . ܘܡܐ ܕܡܝܬ ܟܗܢܐ ܪܒܐ . ܢܗܦܘܟ ܩܛܘܠܐ ܠܐܪܥܐ ܕܝܪܬܘܬܗ .
Numbers 35:29 ܘܢܗܘܘܢ ܠܟܘܢ ܗܠܝܢ ܢܡܘܣ̈ܐ ܠܥܠܡ ܠܕܪ̈ܝܟܘܢ ܒܟܠܗ ܒܝܬ ܡܥܡܪܟܘܢ .
Numbers 35:30 ܟܠ ܕܢܩܛܘܠ ܢܦܫܐ . ܥܠ ܦܘܡ ܣܗ̈ܕܐ ܢܬܩܛܠ ܩܛܘܠܐ . ܘܣܗܕܐ ܚܕ ܠܐ ܢܣܗܕ ܥܠ ܢܦܫܐ ܕܬܡܘܬ .
Numbers 35:31 ܘܠܐ ܬܩܒܠܘܢ ܫܘܚܕܐ ܥܠ ܢܦܫܐ ܕܩܛܘܠܐ ܕܚܝܒ ܡܘܬܐ . ܐܠܐ ܡܬܩܛܠܘ ܢܬܩܛܠ .
Numbers 35:32 ܘܠܐ ܬܣܒܘܢ ܫܘܚܕܐ . ܕܢܥܪܘܩ ܠܩܪܝܬܐ ܕܒܝܬ ܓܘܣܐ . ܘܢܐܙܠ ܘܢܬܒ ܒܐܪܥܐ . ܥܕܡܐ ܕܢܡܘܬ ܟܗܢܐ ܪܒܐ .
Numbers 35:33 ܘܠܐ ܬܛܢܦܘܢܗ̇ ܠܐܪܥܐ ܕܥ̇ܡܪܝܢ ܐܢܬܘܢ ܒܗ̇ . ܡܛܠ ܕܕܡܐ ܗܘ ܡܛܢܦ ܠܐܪܥܐ . ܘܐܪܥܐ ܕܕܡܐ ܐܫܝܕ ܒܗ̇ . ܠܐ ܢܬܚܣܐ ܥܠܝܗ̇ . ܐܠܐ ܐܢ ܐܬܐܫܕ ܒܗ̇ ܕܡܐ ܕܗ̇ܘ ܡ̇ܢ ܕܐܫܕܗ .
Numbers 35:34 ܘܠܐ ܬܛܡܐܘܢܗ̇ ܠܐܪܥܐ ܕܥ̇ܡܪܝܢ ܐܢܬܘܢ ܒܗ̇ ܕܫ̇ܪܐ ܐܢܐ ܒܓܘܗ̇ . ܡܛܠ ܕܐܢܐ ܐܢܐ ܡܪܝܐ ܕܫ̇ܪܐ ܐܢܐ ܒܝܢܬ ܒܢ̈ܝ ܐܝܣܪܝܠ .
Numbers 36:1 ܘܩܪܒܘ ܪ̈ܝܫܝ ܐ̈ܒܗܐ ܕܫܪܒܬܐ ܕܒܢ̈ܝ ܓܠܥܕ ܒܪ ܡܟܝܪ ܒܪ ܡܢܫܐ . ܡܢ ܫܪܒܬܐ ܕܡܢܫܐ ܒܪ ܝܘܣܦ . ܘܡܠܠܘ ܩܕܡ ܡܘܫܐ ܘܩܕܡ ܐܠܝܥܙܪ ܟܗܢܐ ܘܩܕܡ ܪ̈ܘܪܒܢܐ ܕܟܢܘܫܬܐ . ܪ̈ܫܐ ܕܐ̈ܒܗܐ ܕܒܢ̈ܝ ܐܝܣܪܝܠ .
Numbers 36:2 ܘܐܡܪܘ . ܠܡܪܢ ܦܩܕ ܡܪܝܐ ܠܡܬܠ ܐܪܥܐ ܠܝܘܪܬܢܐ ܒ̈ܦܨܐ ܠܒܢ̈ܝ ܐܝܣܪܝܠ . ܘܡܪܢ ܐܬܦܩܕ ܡܢ ܡܪܝܐ . ܕܢܬܠ ܝܪܬܘܬܗ ܕܨܠܦܚܕ ܐܚܘܢ ܠܒܢ̈ܬܗ .
Numbers 36:3 ܘܐܢ ܢܗ̈ܘܝܢ ܠܚܕ ܡܢ ܫܒ̈ܛܐ ܕܒܢ̈ܝ ܐܝܣܪܝܠ ܢܫ̈ܐ . ܬܬܒܨܪ ܝܪܬܘܬܗܝܢ ܡܢ ܝܪܬܘܬܐ ܕܐܒܘܗܝܢ . ܘܬܬܘܣܦ ܥܠ ܝܪܬܘܬܐ ܕܫ̈ܒܛܐ ܕܢܗ̈ܘܝܢ ܠܗܘܢ . ܘܡܢ ܦܨܬܐ ܕܝܪܬܘܬܢ ܬܬܒܨܪ .
Numbers 36:4 ܘܐܢ ܢܗܘܐ ܦܘܢܝܐ ܠܒܢ̈ܝ ܐܝܣܪܝܠ . ܬܬܘܣܦ ܝܪܬܘܬܗܝܢ ܥܠ ܝܪܬܘܬܐ ܕܫ̈ܒܛܐ ܕܢܗ̈ܘܝܢ ܠܗܘܢ . ܘܡܢ ܝܪܬܘܬܐ ܕܫܒܛܐ ܕܐܒܘܗܝܢ ܬܬܒܨܪ ܝܪܬܘܬܗܝܢ .
Numbers 36:5 ܘܦܩܕ ܡܘܫܐ ܠܒܢ̈ܝ ܐܝܣܪܝܠ . ܡܢ ܡܠܬ ܦܘܡܗ ܕܡܪܝܐ ܘܐܡܪ . ܟܐܢܐܝܬ ܡܡܠܠܝܢ ܫܒܛܐ ܕܒܢ̈ܝ ܝܘܣܦ .
Numbers 36:6 ܗܢܐ ܦܬܓܡܐ ܕܦܩܕ ܡܪܝܐ ܥܠ ܒܢ̈ܬܗ ܕܨܠܦܚܕ ܘܐܡܪ . ܕܠܡ̇ܢ ܕܫ̇ܦܪ ܒܥܝܢ̈ܝܗܝܢ ܢܗ̈ܘܝܢ ܢܫ̈ܐ . ܒܪܡ ܠܫܒܛܐ ܕܫܪܒܬܐ ܕܐܒܘܗܝܢ ܢܗܘܝܢ .
Numbers 36:7 ܘܠܐ ܬܬܟܪܟ ܝܪܬܘܬܐ ܕܒܢ̈ܝ ܐܝܣܪܐܝܠ ܡܢ ܫܒܛܐ ܠܫܒܛܐ ܐܚܪܢܐ . ܐܠܐ ܓܒܪ ܒܝܪܬܘܬܐ ܕܫܒܛܐ ܕܐܒܘܗܝ ܢܬܢܩܦܘܢ ܒܢ̈ܝ ܐܝܣܪܝܠ .
Numbers 36:8 ܘܟܠ ܒܪܬܐ ܕܝܪܬܐ ܝܘܪܬܢܐ ܡܢ ܫ̈ܒܛܐ ܕܒܢ̈ܝ ܐܝܣܪܝܠ . ܠܚܕ ܡܢ ܫܪܒܬܐ ܕܫܒܛܐ ܕܐܒܘܗ̇ ܬܗܘܐ ܐܢܬܬܐ . ܕܢܐܪܬܘܢ ܒܢ̈ܝ ܐܝܣܪܝܠ ܐܢܫ ܝܪܬܘܬܐ ܕܐܒܘܗܝ .
Numbers 36:9 ܘܠܐ ܬܬܟܪܟ ܝܪܬܘܬܐ ܡܢ ܫܒܛܐ ܠܫܒܛܐ ܐܚܪܢܐ . ܐܠܐ ܓܒܪ ܒܝܪܬܘܬܗ ܢܬܢܩܦܘܢ ܫ̈ܒܛܐ ܕܒܢ̈ܝ ܐܝܣܪܝܠ .
Numbers 36:10 ܘܐܝܟ ܕܦܩܕ ܡܪܝܐ ܠܡܘܫܐ . ܗܟܢܐ ܥܒܕ ܒܢ̈ܬܗ ܕܨܠܦܚܕ .
Numbers 36:11 ܘܗܘܝ ܡܚܠܐ ܘܬܪܨܐ . ܘܚܓܠܐ ܘܡܠܟܐ ܘܝܥܐ ܒܢ̈ܬ ܨܠܦܚܕ . ܠܒܢ̈ܝ ܕܕܝܗ̈ܝܢ .
Numbers 36:12 ܠܫܪܒܬܐ ܕܒܢ̈ܝ ܡܢܫܐ ܒܪ ܝܘܣܦ ܗ̈ܘܝ ܢܫ̈ܐ . ܘܗܘܬ ܝܪܬܘܬܗܝܢ ܥܠ ܫܒܛܐ ܕܫܪܒܬܐ ܕܐܒܘܗܝܢ .
Numbers 36:13 ܗܠܝܢ ܦܘܩ̈ܕܢܐ ܘܢܡ̈ܘܣܐ ܘܕܝ̈ܢܐ . ܕܦܩܕ ܡܪܝܐ ܒܐܝܕܐ ܕܡܘܫܐ ܥܠ ܒܢ̈ܝ ܐܝܣܪܝܠ . ܒܥܪܒܘܬ ܡܘܐܒ ܕܥܠ ܝܘܪܕܢܢ ܕܐܝܪܝܚܘ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .