← All works
Peshitta Numbers Peshitta (Syriac Old Testament) · 1,289 sections
Single column Two columns
Numbers 28:27 ܘܩܪܒܘ ܝܩ̈ܕܐ ܫܠܡ̈ܐ ܠܪܝܚ ܣܘܬܐ ܠܡܪܝܐ . ܬܘܪ̈ܐ ܒ̈ܢܝ ܒܩܪܐ ܬܪ̈ܝܢ . ܘܕܟܪܐ ܚܕ . ܘܐܡܪ̈ܐ ܒܢ̈ܝ ܫܢܬܐ ܫܒܥܐ .
Numbers 28:28 ܘܩܘܪܒܢܗܘܢ ܢܫܝܦܐ ܕܦܝܠ ܒܡܫܚܐ . ܬܠܬܐ ܥܣܪ̈ܘܢܝܢ ܠܬܘܪܐ ܚܕ . ܘܬܪ̈ܝܢ ܥܣܪ̈ܘܢܝܢ ܠܕܟܪܐ ܚܕ .
Numbers 28:29 ܘܥܣܪܘܢܐ ܚܕ ܠܐܡܪܐ ܚܕ . ܗܟܢܐ ܠܫܒ̈ܥܬܝܗܘܢ ܐܡܪ̈ܐ .
Numbers 28:30 ܘܨܦܪܝܐ ܚܕ ܕܥ̈ܙܐ ܠܡܚܣܝܘ ܥܠܝܟܘܢ .
Numbers 28:31 ܣܛܪ ܡܢ ܝܩܕܐ ܫܠܡܐ ܐܡܝܢܐ . ܘܣܡܝܕܗ ܗܘܝܬܘܢ ܥ̇ܒܕܝܢ ܕܠܝܬ ܒܗܘܢ ܡܘܡܐ . ܘܢܘܩܝܗܘܢ .
Numbers 29:1 ܘܒܚܕ ܒܝܪܚܐ . ܒܝܪܚܐ ܕܫܒܥܐ . ܩܪܝܐ ܘܩܕܝܫܐ ܢܗܘܐ ܠܟܘܢ . ܘܟܠ ܥܒ̇ܕ ܕܦܘܠܚܢܐ ܠܐ ܬܥܒܕܘܢ . ܝܘܡܐ ܕܝܘܒܒܐ ܢܗܘܐ ܠܟܘܢ .
Numbers 29:2 ܘܥܒܕܘ ܝܩ̈ܕܐ ܫ̈ܠܡܐ ܠܪܝܚܐ ܕܣܘܬܐ ܠܡܪܝܐ . ܬܘܪܐ ܚܕ ܒܪ ܒܩܪܐ ܘܕܟܪܐ ܚܕ . ܘܐܡܪ̈ܐ ܒܢ̈ܝ ܫܢܬܐ ܫܒܥܐ . ܕܠܝܬ ܒܗܘܢ ܡܘܡܐ .
Numbers 29:3 ܘܩܘܪܒܢܗܘܢ ܢܫܝܦܐ ܕܦܝܠ ܒܡܫܚܐ . ܬܠܬܐ ܥܣܪ̈ܘܢܝܢ ܠܬܘܪܐ ܚܕ . ܘܬܪ̈ܝܢ ܥܣܪ̈ܘܢܝܢ ܠܕܟܪܐ ܚܕ .
Numbers 29:4 ܘܥܣܪܘܢܐ ܚܕ ܠܐܡܪܐ ܚܕ ܗܟܢܐ ܠܫܒ̈ܥܬܝܗܘܢ ܐܡܪ̈ܐ .
Numbers 29:5 ܘܨܦܪܝܐ ܚܕ . ܕܥ̈ܙܐ ܠܚܛܗܐ ܠܡܚܣܝܘ ܥܠܝܟܘܢ .
Numbers 29:6 ܣܛܪ ܡܢ ܝܩܕܐ ܫܠܡܐ ܕܪܝܫ ܝܪܚܐ ܘܣܡܝܕܗ ܝܩܕܐ ܫܠܡܐ ܐܡܝܢܐ . ܘܣܡܝܕܗܘܢ ܘܢܘܩܝܗܘܢ ܐܝܟ ܙܕܩܗܘܢ . ܠܪܝܚ ܣܘܬܐ ܩܘܪܒܢܐ ܠܡܪܝܐ .
Numbers 29:7 ܘܒܥܣܪܬܐ ܒܝܪܚܐ ܗܢܐ ܕܫܒܥܐ . ܩܪܝܐ ܘܩܕܝܫܐ ܢܗܘܐ ܠܟܘܢ . ܘܟܠ ܥܒ̇ܕ ܕܦܘܠܚܢܐ ܠܐ ܬܥܒܕܘܢ .
Numbers 29:8 ܘܩܪܒܘ ܝܩ̈ܕܐ ܫ̈ܠܡܐ ܠܡܪܝܐ . ܠܪܝܚܐ ܕܣܘܬܐ . ܬܘܪܐ ܚܕ ܒܪ ܒܩܪܐ . ܘܕܟܪܐ ܚܕ . ܘܐܡܪ̈ܐ ܒܢ̈ܝ ܫܢܬܐ ܫܒܥܐ ܕܠܝܬ ܒܗܘܢ ܡܘܡܐ .
Numbers 29:9 ܘܩܘܪܒܢܗܘܢ ܢܫܝܦܐ ܕܦܝܠ ܒܡܫܚܐ . ܬܠܬܐ ܥܣܪ̈ܘܢܝܢ ܠܬܘܪܐ . ܘܬܪ̈ܝܢ ܥܣܪ̈ܘܢܝܢ ܠܕܟܪܐ .
Numbers 29:10 ܘܥܣܪܘܢܐ ܚܕ ܠܐܡܪܐ ܚܕ . ܗܟܢܐ ܠܫܒ̈ܥܬܝܗܘܢ ܐܡܪ̈ܐ .
Numbers 29:11 ܘܨܦܪܝܐ ܚܕ ܕܥ̈ܙܐ ܚܠܦ ܚܛܗܐ . ܣܛܪ ܡܢ ܝܩܕܐ ܕܚܘܣܝܐ . ܝܩܕܐ ܫܠܡܐ ܐܡܝܢܐ ܘܣܡܝܕܗܘܢ ܘܢܘܩܝܗܘܢ .
Numbers 29:12 ܘܒܚܡܫܥܣܪܐ ܒܝܪܚܐ ܗܢܐ ܕܫܒܥܐ . ܩܪܝܐ ܘܩܕܝܫܐ ܢܗܘܐ ܠܟܘܢ . ܘܟܠ ܥܒ̇ܕ ܕܦܘܠܚܢܐ ܠܐ ܬܥܒܕܘܢ . ܘܥܒܕܘ ܥܕܥܐܕܐ ܠܡܪܝܐ ܫܒܥܐ ܝܘܡ̈ܝܢ .
Numbers 29:13 ܘܩܪܒܘ ܝܩܕܐ ܫܠܡܐ ܩܘܪܒܢܐ ܠܪܝܚܐ ܕܣܘܬܐ ܠܡܪܝܐ . ܬܘܪ̈ܐ ܒ̈ܢܝ ܒܩܪܐ ܬܠܬܥܣܪ . ܘܕܟܪ̈ܐ ܬܪ̈ܝܢ . ܘܐܡܪ̈ܐ ܒܢ̈ܝ ܫܢܬܐ ܐܪ̈ܒܬܥܣܪ . ܕܠܝܬ ܒܗܘܢ ܡܘܡܐ .
Numbers 29:14 ܘܩܘܪܒܢܗܘܢ ܢܫܝܦܐ ܕܦܝܠ ܒܡܫܚܐ . ܬܠܬܐ ܥܣܪ̈ܘܢܝܢ ܠܬܘܪܐ ܚܕ . ܗܟܢܐ ܠܬܠܬܥܣܪ ܬܘܪ̈ܝܢ . ܘܬܪ̈ܝܢ ܥܣܪ̈ܘܢܝܢ ܠܕܟܪܐ ܚܕ . ܗܟܢܐ ܠܬܪ̈ܝܢ ܕܟܪ̈ܝܢ .
Numbers 29:15 ܘܥܣܪܘܢܐ ܚܕ ܠܐܡܪܐ ܚܕ . ܗܟܢܐ ܠܐܪ̈ܒܬܥܣܪ ܐܡܪ̈ܝܢ .
Numbers 29:16 ܘܨܦܪܝܐ ܚܕ ܕܥ̈ܙܐ ܠܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ . ܘܣܡܝܕܗ ܘܢܘܩܝܗ .
Numbers 29:17 ܘܒܝܘܡܐ ܕܬܪ̈ܝܢ . ܬܘܪ̈ܐ ܒ̈ܢܝ ܒܩܪܐ ܬܪ̈ܥܣܪ . ܘܕܟܪ̈ܐ ܬܪ̈ܝܢ ܘܐܡܪ̈ܐ ܒܢ̈ܝ ܫܢܬܐ ܐܪ̈ܒܬܥܣܪ ܕܠܝܬ ܒܗܘܢ ܡܘܡܐ .
Numbers 29:18 ܘܣܡܝܕܗܘܢ ܘܢܘܩܝܗܘܢ ܕܬܘܪ̈ܐ ܘܕܕܟܪ̈ܐ ܘܕܐܡܪ̈ܐ . ܒܡܢܝܢܗܘܢ ܐܝܟ ܙܕܩܗܘܢ .
Numbers 29:19 ܘܨܦܪܝܐ ܚܕ ܕܥ̈ܙܐ ܚܠܦ ܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ . ܘܣܡܝܕܗ ܘܢܘܩܝܗ .
Numbers 29:20 ܘܒܝܘܡܐ ܕܬܠܬܐ . ܬܘܪ̈ܐ ܚܕ ܥܣܪ ܘܕܟܪ̈ܐ ܬܪ̈ܝܢ . ܘܐܡܪ̈ܐ ܒܢ̈ܝ ܫܢܬܐ ܐܪ̈ܒܬܥܣܪ ܕܠܝܬ ܒܗܘܢ ܡܘܡܐ .
Numbers 29:21 ܘܣܡܝܕܗܘܢ ܘܢܘܩܝܗܘܢ ܕܬܘܪ̈ܐ ܘܕܕܟܪ̈ܐ ܘܕܐܡܪ̈ܐ . ܒܡܢܝܢܗܘܢ ܐܝܟ ܙܕܩܗܘܢ .
Numbers 29:22 ܘܨܦܪܝܐ ܚܕ ܕܥ̈ܙܐ ܚܠܦ ܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ . ܘܣܡܝܕܗ ܘܢܘܩܝܗ .
Numbers 29:23 ܘܒܝܘܡܐ ܕܐܪ̈ܒܥܐ . ܬܘܪ̈ܐ ܥܣܪܐ . ܘܕܟܪ̈ܐ ܬܪ̈ܝܢ . ܘܐܡܪ̈ܐ ܒ̈ܢܝ ܫܢܬܐ ܐܪ̈ܒܬܥܣܪ ܕܠܝܬ ܒܗܘܢ ܡܘܡܐ .
Numbers 29:24 ܘܣܡܝܕܗܘܢ ܘܢܘܩܝܗܘܢ ܕܬܘܪ̈ܐ ܘܕܕܟܪ̈ܐ ܘܕܐܡܪ̈ܐ . ܒܡܢܝܢܗܘܢ ܐܝܟ ܙܕܩܗܘܢ .
Numbers 29:25 ܘܨܦܪܝܐ ܚܕ ܕܥ̈ܙܐ ܠܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ ܘܣܡܝܕܗ ܘܢܘܩܝܗ .
Numbers 29:26 ܘܒܝܘܡܐ ܕܚܡܫܐ . ܬܘܪ̈ܐ ܬܫܥܐ ܘܕܟܪ̈ܐ ܬܪ̈ܝܢ . ܘܐܡܪ̈ܐ ܒܢ̈ܝ ܫܢܬܐ ܐܪ̈ܒܬܥܣܪ . ܕܠܝܬ ܒܗܘܢ ܡܘܡܐ .
Numbers 29:27 ܘܣܡܝܕܗܘܢ ܘܢܘܩܝܗܘܢ ܕܬܘܪ̈ܐ ܘܕܕܟܪ̈ܐ ܘܕܐܡܪ̈ܐ . ܒܡܢܝܢܗܘܢ ܐܝܟ ܙܕܩܗܘܢ .
Numbers 29:28 ܘܨܦܪܝܐ ܚܕ ܕܥ̈ܙܐ ܠܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ . ܘܣܡܝܕܗ ܘܢܘܩܝܗ .
Numbers 29:29 ܘܒܝܘܡܐ ܕܫܬܐ . ܬܘܪ̈ܐ ܬܡܢܝܐ ܘܕܟܪ̈ܐ ܬܪ̈ܝܢ . ܘܐܡܪ̈ܐ ܒܢ̈ܝ ܫܢܬܐ ܐܪ̈ܒܬܥܣܪ . ܕܠܝܬ ܒܗܘܢ ܡܘܡܐ .
Numbers 29:30 ܘܣܡܝܕܗܘܢ ܘܢܘܩܝܗܘܢ ܕܬܘܪ̈ܐ ܘܕܕܟܪ̈ܐ ܘܕܐܡܪ̈ܐ . ܒܡܢܝܢܗܘܢ ܐܝܟ ܙܕܩܗܘܢ .
Numbers 29:31 ܘܨܦܪܝܐ ܚܕ ܕܥ̈ܙܐ ܚܠܦ ܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ . ܘܣܡܝܕܗ ܘܢܘܩܝܗ .
Numbers 29:32 ܘܒܝܘܡܐ ܕܫܒܥܐ . ܬܘܪ̈ܐ ܫܒܥܐ . ܘܕܟܪ̈ܐ ܬܪ̈ܝܢ . ܘܐܡܪ̈ܐ ܒܢ̈ܝ ܫܢܬܐ ܐܪ̈ܒܬܥܣܪ ܕܠܝܬ ܒܗܘܢ ܡܘܡܐ .
Numbers 29:33 ܘܣܡܝܕܗܘܢ ܘܢܘܩܝܗܘܢ ܕܬܘܪ̈ܐ ܘܕܕܟܪ̈ܐ ܘܕܐܡܪ̈ܐ . ܒܡܢܝܢܗܘܢ ܐܝܟ ܙܕܩܗܘܢ .
Numbers 29:34 ܘܨܦܪܝܐ ܚܕ ܕܥ̈ܙܐ ܠܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ . ܘܣܡܝܕܗ ܘܢܘܩܝܗ .
Numbers 29:35 ܘܒܝܘܡܐ ܕܬܡܢܝܐ . ܗܘܝܬܘܢ ܟ̇ܢܫܝܢ . ܘܟܠ ܥܒܕ ܕܦܘܠܚܢܐ ܠܐ ܬܥܒܕܘܢ .
Numbers 29:36 ܘܩܪܒܘ ܝܩ̈ܕܐ ܫ̈ܠܡܐ ܩܘܪܒܢܐ ܠܪܝܚ ܣܘܬܐ ܠܡܪܝܐ . ܬܘܪܐ ܚܕ ܒܪ ܒܩܪܐ ܘܕܟܪܐ ܚܕ . ܘܐܡܪ̈ܐ ܒܢ̈ܝ ܫܢܬܐ ܐܪ̈ܒܥܐ ܕܠܝܬ ܒܗܘܢ ܡܘܡܐ .
Numbers 29:37 ܘܣܡܝܕܗܘܢ ܘܢܘܩܝܗܘܢ . ܕܬܘܪ̈ܐ ܘܕܕܟܪ̈ܐ ܘܕܐܡܪ̈ܐ . ܒܡܢܝܢܗܘܢ ܐܝܟ ܙܕܩܗܘܢ .
Numbers 29:38 ܘܨܦܪܝܐ ܚܕ ܕܥ̈ܙܐ ܠܚܛܗܐ . ܣܛܪ ܡܢ ܝܩܕܐ ܫܠܡܐ ܐܡܝܢܐ ܘܣܡܝܕܗ ܘܢܘܩܝܗ .
Numbers 29:39 ܗܠܝܢ ܗܘܝܬܘܢ ܥ̇ܒܕܝܢ ܠܡܪܝܐ ܒܙܒܢܐ ܕܥܕܥ̈ܕܝܟܘܢ . ܣܛܪ ܡܢ ܢܕܪ̈ܝܟܘܢ . ܘܣܛܪ ܡܢ ܦܘܪ̈ܫܢܝܟܘܢ ܘܝܩ̈ܕܝܟܘܢ ܫ̈ܠܡܐ . ܘܣܡܝܕܟܘܢ ܘܢܘܩܝܟܘܢ ܘܩܘܪ̈ܒܢܝܟܘܢ .
Numbers 30:1 ܘܐܡܪ ܡܘܫܐ ܠܒܢ̈ܝ ܐܝܣܪܝܠ ܟܘܠ ܕܦܩܕ ܡܪܝܐ ܠܡܘܫܐ .
Numbers 30:2 ܘܡܠܠ ܡܘܫܐ ܥܡ ܪ̈ܫܐ ܕܫ̈ܒܛܐ ܕܒܢ̈ܝ ܐܝܣܪܝܠ ܘܐܡܪ ܠܗܘܢ . ܗܢܐ ܗܘ ܦܬܓܡܐ ܕܦܩܕ ܡܪܝܐ .
Numbers 30:3 ܓܒܪܐ ܟܕ ܢܕܘܪ ܢܕܪܐ ܠܡܪܝܐ . ܘܢܐܡܐ ܒܡ̈ܘܡܬܐ ܘܢܐܣܘܪ ܐܣܪܐ ܥܠ ܢܦܫܗ . ܠܐ ܢܒܛܠ ܡܠܬܗ . ܟܠ ܡܕܡ ܕܢܦܩ ܡܢ ܦܘܡܗ ܢܥܒܕ .
Numbers 30:4 ܘܐܢܬܬܐ ܟܕ ܬܕܘܪ ܢܕܪܐ ܠܡܪܝܐ . ܘܬܐܣܘܪ ܐܣܪܐ ܥܠ ܢܦܫܗ̇ ܒܛܠܝܘܬܗ̇ ܒܝܬ ܐܒܘܗ̇ .
Numbers 30:5 ܘܢܫܡܥ ܐܒܘܗ̇ ܢܕܪ̈ܐ ܘܐܣܪ̈ܐ . ܕܐܣܪܬ ܥܠ ܢܦܫܗ̇ . ܘܢܫܬܘܩ ܠܗ ܐܒܘܗ̇ . ܢܬܩܝܡܘܢ ܟܠܗܘܢ ܢܕܪ̈ܐ ܘܟܠܗܘܢ ܐܣܪ̈ܐ . ܕܐܣܪܬ ܥܠ ܢܦܫܗ̇ .
Numbers 30:6 ܘܐܢ ܢܒܛܠ ܐܢܘܢ ܐܒܘܗ̇ ܒܝܘܡܐ ܕܫ̇ܡܥ . ܟܠܗܘܢ ܢܕܪ̈ܐ ܘܟܠܗܘܢ ܐܣܪ̈ܐ . ܕܐܣܪܬ ܥܠ ܢܦܫܗ̇ . ܠܐ ܢܬܩܝܡܘܢ . ܘܡܪܝܐ ܢܫܒܘܩ ܠܗ̇ . ܡܛܠ ܕܒܛܠ ܐܢܘܢ ܐܒܘܗ̇ .
Numbers 30:7 ܘܐܢ ܬܗܘܐ ܠܓܒܪܐ ܘܢܕܪ̈ܝܗ̇ ܥܠܝܗ̇ . ܐܘ ܦܘܪܫܢܐ ܕܣ̈ܦܘܬܗ̇ . ܕܐܣܪܬ ܥܠ ܢܦܫܗ̇ .
Numbers 30:8 ܘܢܫܡܥ ܒܥܠܗ̇ ܒܝܘܡܐ ܕܫ̇ܡܥ ܘܢܫܬܘܩ ܠܗ . ܢܬܩܝܡܘܢ ܟܠܗܘܢ ܢܕܪ̈ܐ . ܘܐܣܪ̈ܐ ܕܐܣܪܬ ܥܠ ܢܦܫܗ̇ ܢܬܩܝܡܘܢ .
Numbers 30:9 ܘܐܢ ܒܝܘܡܐ ܕܫܡܥ ܒܥܠܗ̇ ܒܛܠ ܐܢܘܢ . ܢܒܛܠܘܢ ܢܕܪ̈ܐ ܘܦܘܪ̈ܫܢܐ ܕܣ̈ܦܘܬܗ̇ . ܕܐܣܪܬ ܥܠ ܢܦܫܗ̇ . ܘܡܪܝܐ ܢܫܒܘܩ ܠܗ̇ .
Numbers 30:10 ܘܢܕܪܐ ܕܐܪܡܠܬܐ ܘܕܫܒܝܩܬܐ . ܟܘܠ ܕܐܣ̇ܪܐ ܥܠ ܢܦܫܗ̇ ܢܬܩܝܡ ܥܠܝܗ̇ .
Numbers 30:11 ܘܐܢ ܒܝܬ ܒܥܠܗ̇ ܢܕܪܬ . ܐܘ ܐܣܪܬ ܐܣܪܐ ܥܠ ܢܦܫܗ̇ ܒܡ̈ܘܡܬܐ .
Numbers 30:12 ܘܢܫܡܥ ܒܥܠܗ̇ ܘܢܫܬܘܩ ܠܗ ܘܠܐ ܢܒܛܠ ܐܢܘܢ . ܢܬܩܝܡܘܢ ܟܠܗܘܢ ܢܕܪ̈ܐ . ܘܟܠܗܘܢ ܐܣܪ̈ܐ ܕܐܣܪܬ ܥܠ ܢܦܫܗ̇ ܢܬܩܝܡܘܢ .
Numbers 30:13 ܘܐܢ ܡܒܛܠܘ ܢܒܛܠ ܐܢܘܢ ܒܥܠܗ̇ ܒܝܘܡܐ ܕܫܡܥ . ܟܠ ܡܕܡ ܕܢܦܩ ܡܢ ܣܦܘ̈ܬܗ̇ ܠܢܕܪ̈ܝܗ̇ ܘܠܐܣܪ̈ܐ ܕܐܣܪܬ ܥܠ ܢܦܫܗ̇ ܠܐ ܢܬܩܝܡܘܢ . ܡܛܠ ܕܒܥܠܗ̇ ܒܛܠ ܐܢܘܢ . ܘܡܪܝܐ ܢܫܒܘܩ ܠܗ̇ .
Numbers 30:14 ܟܠܗܘܢ ܢܕܪ̈ܐ ܘܟܠܗܝܢ ܡ̈ܘܡܝܬܐ ܕܐܣܪ̈ܐ ܕܡܣܓܦܝܢ ܢܦܫܐ . ܒܥܠܗ̇ ܢܩܝܡ ܐܢܘܢ . ܘܒܥܠܗ̇ ܢܒܛܠ ܐܢܘܢ .
Numbers 30:15 ܘܐܢ ܡܫܬܩ ܢܫܬܘܩ ܠܗ ܒܥܠܗ̇ ܡܢ ܝܘܡ ܠܝܘܡ . ܢܬܩܝܡܘܢ ܟܠܗܘܢ ܢܕܪ̈ܐ . ܘܟܠܗܘܢ ܐܣܪ̈ܐ ܕܐܣܪܬ ܥܠ ܢܦܫܗ̇ . ܡܛܘܠ ܕܫܬܩ ܠܗ ܒܥܠܗ̇ ܒܝܘܡܐ ܕܫܡܥ .
Numbers 30:16 ܘܐܢ ܡܒܛܠܘ ܢܒܛܠ ܐܢܘܢ ܡܢ ܒܬܪ ܕܫ̇ܡܥ . ܢܩܒܠ ܚܛܗܗ .
Numbers 30:17 ܗܠܝܢ ܢܡܘܣ̈ܐ ܕܦܩܕ ܡܪܝܐ ܠܡܘܫܐ . ܒܝܬ ܓܒܪܐ ܠܐܢܬܬܗ . ܘܒܝܬ ܐܒܐ ܠܒܪܬܗ ܒܛܠܝܘܬܗ̇ ܒܝܬ ܐܒܘܗ̇ .
Numbers 31:1 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 31:2 ܐܬܬܒܥ ܥܝܪܬܐ ܕܒܢ̈ܝ ܐܝܣܪܝܠ ܡܢ ܡܕܝܢ̈ܝܐ . ܘܗܝܕܝܢ ܬܬܟܢܫ ܠܘܬ ܥܡܟ .
Numbers 31:3 ܘܐܡܪ ܡܘܫܐ ܠܥܡܐ . ܙܝܢܘ ܡܢܟܘܢ ܓܒܪ̈ܐ ܠܚܝܠܐ . ܘܢܗܘܘܢ ܥܠ ܡܕܝܢ̈ܝܐ ܘܢܬܒܥܘܢ ܬܒܥܬܗ ܕܡܪܝܐ ܡܢ ܡܕܝܢ̈ܝܐ .
Numbers 31:4 ܐܠܦ ܐܠܦ ܡܢ ܫܒܛܐ . ܡܢ ܟܠܗܘܢ ܫܒ̈ܛܐ ܕܒܢ̈ܝ ܐܝܣܪܝܠ . ܫܕܪܘ ܒܚܝܠܐ .
Numbers 31:5 ܘܐܬܓܒܝܘ ܡܢ ܐ̈ܠܦܐ ܕܒܢ̈ܝ ܐܝܣܪܝܠ ܐܠܦܐ ܡܢ ܫܒܛܐ . ܬܪ̈ܥܣܪ ܐ̈ܠܦܝܢ ܕܡܙܝܢܝܢ ܒܚܝܠܐ .
Numbers 31:6 ܘܫܕܪ ܐܢܘܢ ܡܘܫܐ ܐܠܦ ܡܢ ܫܒܛܐ . ܬܪ̈ܥܣܪ ܐ̈ܠܦܝܢ ܕܡܙܝܢ̈ܝܢ . ܠܗܘܢ ܘܠܦܝܢܚܣ ܒܪ ܐܠܝܥܙܪ ܟܗܢܐ ܒܚܝܠܐ . ܘܡܐ̈ܢܐ ܕܩܘܕܫܐ ܘܩܪ̈ܢܬܐ ܕܝܘܒܒܐ ܒܐܝܕܗ .
Numbers 31:7 ܘܐܬܚܝܠܘ ܥܠ ܡܕܝܢ ܐܝܟ ܕܦܩܕ ܡܪܝܐ ܠܡܘܫܐ . ܘܩܛܠܘ ܟܠ ܕܟܪ̈ܐ .
Numbers 31:8 ܘܠܡ̈ܠܟܐ ܕܡܕܝܢ ܩܛܠܘ . ܥܡ ܩ̈ܛܝܠܝܗܘܢ . ܠܐܘܝ ܘܠܪܩܡ . ܘܠܨܘܪ ܘܠܚܘܪ ܘܠܪܒܥ . ܚܡܫܐ ܡ̈ܠܟܐ ܡܕܝܢ̈ܝܐ . ܘܠܒܠܥܡ ܒܪ ܒܥܘܪ ܩܛܠܘ ܒܚܪܒܐ .
Numbers 31:9 ܘܫܒܘ ܒܢ̈ܝ ܐܝܣܪܝܠ ܠܢܫ̈ܐ ܕܡܕܝܢ . ܘܠܝܩܪܬܗܘܢ ܘܠܟܠܗ̇ ܒܥܝܪܗܘܢ . ܘܠܟܠܗ ܩܢܝܢܗܘܢ ܘܠܟܠܗܘܢ ܢܟܣ̈ܝܗܘܢ ܒܙܘ .
Numbers 31:10 ܘܠܟܠܗܝܢ ܩܘܪ̈ܝܐ ܕܒܝܬ ܡܥܡܪܗܘܢ . ܘܠܟܠܗܘܢ ܫܛܚ̈ܝܗܘܢ ܐܘܩܕܘ ܒܢܘܪܐ .
Numbers 31:11 ܘܕܒܪܘ ܠܟܠܗ̇ ܫܒܝܬܐ ܘܠܟܠܗ̇ ܕܒܪܬܐ ܕܒܢ̈ܝ ܐܢܫܐ ܘܕܒܥܝܪ̈ܐ .
Numbers 31:12 ܘܐܝܬܝܘܗ̇ ܠܘܬ ܡܘܫܐ ܘܠܘܬ ܐܠܝܥܙܪ ܟܗܢܐ . ܘܠܘܬ ܟܠܗ̇ ܟܢܘܫܬܐ ܕܒܢ̈ܝ ܐܝܣܪܝܠ ܫܒܝܬܐ ܘܕܒܪܬܐ ܘܒܙܬܐ ܠܡܫܪܝܬܐ . ܠܥܪܒܘܬ ܡܘܐܒ ܕܥܠ ܝܘܪܕܢܢ ܕܐܝܪܝܚܘ .
Numbers 31:13 ܘܢܦܩ ܡܘܫܐ ܘܐܠܝܥܙܪ ܟܗܢܐ . ܘܟܠܗܘܢ ܪ̈ܘܪܒܢܐ ܕܟܢܘܫܬܐ ܠܐܘܪܥܗܘܢ . ܠܒܪ ܡܢ ܡܫܪܝܬܐ .
Numbers 31:14 ܘܪܓܙ ܡܘܫܐ ܥܠ ܦܩ̈ܘܕܐ ܕܚܝܠܐ . ܪ̈ܝܫܝ ܐ̈ܠܦܐ ܘܪ̈ܝܫܝ ܡܐ̈ܘܬܐ . ܕܐܬܘ ܡܢ ܚܝܠܐ ܕܩܪܒܐ .
Numbers 31:15 ܘܐܡܪ ܠܗܘܢ ܡܘܫܐ . ܠܡܢܐ ܐܚܝܬܘܢ ܟܠܗܝܢ ܢܩ̈ܒܬܐ .
Numbers 31:16 ܕܗ̈ܢܝܢ ܗ̈ܘܝ ܬܘܩܠܬܐ ܠܒܢ̈ܝ ܐܝܣܪܝܠ . ܒܡܠܬܗ ܕܒܠܥܡ . ܘܡܪܕܘ ܘܐܥܠܝܘ ܒܡܪܝܐ ܒܨܒܘܬܐ ܕܦܥܘܪ . ܘܗܘܐ ܡܘܬܢܐ ܕܡܢ ܫܠܝܐ ܒܟܢܘܫܬܗ ܕܡܪܝܐ .
Numbers 31:17 ܗܫܐ ܩܛܠܘ ܟܠܗܘܢ ܛ̈ܠܝܐ ܕܟܪ̈ܐ . ܘܟܠ ܐܢܬܬܐ ܕܝܕܥܐ ܡܕܡܟܐ ܕܕܟܪܐ ܩܛܘܠܘ .
Numbers 31:18 ܘܟܠ ܝܩܪܬܐ ܕܢܫ̈ܐ ܕܠܐ ܝܕܥ ܡܕܡܟܐ ܕܕܟܪܐ ܐܚܘ ܠܟܘܢ .
Numbers 31:19 ܐܢܬܘܢ ܕܝܢ ܫܪܘ ܠܒܪ ܡܢ ܡܫܪܝܬܐ ܫܒܥܐ ܝܘܡ̈ܝܢ . ܟܘܠ ܕܩܛܠ ܢܦܫܐ . ܘܟܠ ܕܩܪܒ ܠܩܛܝܠܐ . ܪܘܣܘ ܥܠܘܗܝ ܒܝܘܡܐ ܕܬܠܬܐ ܘܒܝܘܡܐ ܕܫܒܥܐ . ܐܢܬܘܢ ܘܫܒܝܬܟܘܢ .
Numbers 31:20 ܘܟܠܗ̇ ܬܟܣܝܬܐ ܘܟܘܠ ܡܐܢܐ ܕܡܫܟܐ . ܘܟܠ ܥܒ̇ܕܐ ܕܣܥܪܐ . ܘܟܠ ܡܐܢܐ ܕܩܝܣܐ ܪܘܣܘ ܥܠܘܗܝ .
Numbers 31:21 ܘܐܡܪ ܐܠܝܥܙܪ ܟܗܢܐ . ܠܓܒܪ̈ܐ ܕܚܝܠܐ ܕܐܬܘ ܡܢ ܩܪܒܐ . ܗܢܐ ܦܘܩܕܢܐ ܕܢܡܘܣܐ ܕܦܩܕ ܡܪܝܐ ܠܡܘܫܐ .
Numbers 31:22 ܒܪܡ ܕܝܢ ܕܗܒܐ ܘܣܐܡܐ ܘܢܚܫܐ ܘܦܪܙܠܐ ܘܐܢܟܐ ܘܐܒܪܐ .
Numbers 31:23 ܘܟܠ ܡܕܡ ܕܥ̇ܐܠ ܠܟܘܪܐ . ܐܥܒܪܘܗܝ ܒܢܘܪܐ ܘܢܬܕܟܐ . ܘܡ̈ܝܐ ܕܪܣܣܐ ܪܘܣ ܥܠܘܗܝ . ܘܟܠ ܕܠܐ ܥ̇ܒܪ ܒܢܘܪܐ ܐܥܡܕܘܗܝ ܒܡ̈ܝܐ .
Numbers 31:24 ܘܚܠܠܘ ܡܐ̈ܢܝܟܘܢ ܒܝܘܡܐ ܕܫܒܥܐ ܘܬܬܕܟܘܢ . ܘܒܬܪܟܢ ܬܥܠܘܢ ܠܡܫܪܝܬܐ .
Numbers 31:25 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Numbers 31:26 ܩܒܠܘ ܚܘܫܒܢܐ ܕܕܒܪܬܐ ܘܕܫܒܝܬܐ ܕܒܢ̈ܝ ܐܢܫܐ ܘܕܒܥܝܪ̈ܐ . ܐܢܬ ܘܐܠܝܥܙܪ ܟܗܢܐ . ܘܪ̈ܝܫܝ ܐܒ̈ܗܐ ܕܟܢܘܫܬܐ .
Numbers 31:27 ܘܦܠܓܘ ܕܒܪܬܐ ܒܝܬ ܓܒܪ̈ܐ ܥ̇ܒ̈ܕܝ ܩܪܒܐ ܕܢܦܩܘ ܒܚܝܠܐ . ܘܒܝܬ ܟܠܗ̇ ܟܢܘܫܬܐ .
Numbers 31:28 ܘܦܪܘܫܘ ܡܟܣܐ ܠܡܪܝܐ ܡܢ ܓܒܪ̈ܐ ܥ̇ܒ̈ܕܝ ܩܪܒܐ ܕܢܦܩܘ ܒܚܝܠܐ . ܘܡ̇ܢ ܟܠܗ̇ ܟܢܘܫܬܐ ܚܕܐ ܢܦܫܐ ܡܢ ܚܡܫܝܢ ܡܢ ܒܢ̈ܝ ܐܢܫܐ . ܘܡܢ ܬܘܪ̈ܐ ܘܡܢ ܚܡܪ̈ܐ . ܘܡܢ ܥܢܐ .
Numbers 31:29 ܘܡܢ ܦܠܓܘܬܗܘܢ ܣܒ . ܘܗܒ ܠܐܠܝܥܙܪ ܟܗܢܐ ܦܘܪܫܢܗ ܕܡܪܝܐ .
Numbers 31:30 ܘܡܢ ܦܠܓܘܬܐ ܕܒܢ̈ܝ ܐܝܣܪܝܠ ܣܒ . ܚܕ ܡܢ ܚܡܫܝܢ ܡܢ ܐܢܫܐ ܘܡܢ ܚܡܪ̈ܐ ܘܡܢ ܬܘܪ̈ܐ ܘܡܢ ܥܢܐ . ܘܡܢ ܟܠܗ̇ ܒܥܝܪܐ . ܘܗܒ ܐܢܘܢ ܠܠܘ̈ܝܐ ܕܢ̇ܛܪܝܢ ܡܛܪܬܐ . ܕܡܫܟܢܗ ܕܡܪܝܐ .
Numbers 31:31 ܘܥܒܕ ܡܘܫܐ ܘܐܠܝܥܙܪ ܟܗܢܐ ܐܝܟ ܕܦܩܕ ܡܪܝܐ ܠܡܘܫܐ .
Numbers 31:32 ܘܗܘܬ ܕܒܪܬܐ ܘܫܒܝܬܐ ܕܒܙܘ ܥܡܐ ܘܚܝܠܐ . ܥܢܐ ܫܬܡܐܐ ܘܫܒܥܝܢ ܘܚܡܫܐ ܐ̈ܠܦܝܢ .
Numbers 31:33 ܘܬܘܪ̈ܐ ܫܒܥܝܢ ܘܬܪ̈ܝܢ ܐ̈ܠܦܝܢ .
Numbers 31:34 Numbers 31:35 ܘܢܦܫ̈ܬܐ ܕܐܢܫܐ ܡܢ ܢܫ̈ܐ ܕܠܐ ܝܕܥ ܡܕܡܟܐ ܕܕܟܪܐ . ܟܘܠܗܝܢ ܢܦܫ̈ܬܐ ܬܠܬܝܢ ܘܬܪ̈ܝܢ ܐ̈ܠܦܝܢ .
Numbers 31:36 ܘܗܘܬ ܦܠܓܘܬܐ ܒܡܢܬܐ ܕܐܝܠܝܢ ܕܢܦܩܘ ܒܚܝܠܐ . ܥܢܐ ܬܠܬܡܐܐ ܘܬܠܬܝܢ ܘܫܒܥܐ ܐ̈ܠܦܝܢ ܘܚܡܫܡܐܐ .
Numbers 31:37 ܘܗܘܐ ܡܟܣܐ ܠܡܪܝܐ ܡܢ ܥܢܐ . ܫܬܐ ܐ̈ܠܦܝܢ ܘܫܒܥܡܐܐ ܘܚܡܫܝܢ .
Numbers 31:38 ܘܬܘܪ̈ܐ ܬܠܬܝܢ ܘܫܬܐ ܐ̈ܠܦܝܢ . ܘܡܟܣܗܘܢ ܠܡܪܝܐ ܫܒܥܡܐܐ ܘܥܣܪ̈ܝܢ .
Numbers 31:39 ܘܚܡܪ̈ܐ ܬܠܬܝܢ ܐ̈ܠܦܝܢ ܘܚܡܫܡܐܐ . ܘܡܟܣܗܘܢ ܠܡܪܝܐ ܫܬܡܐܐ ܘܥܣܪܐ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .