← All works

Peshitta Maccabees 4

Peshitta (Syriac Old Testament) · 479 sections

1. Maccabees 4 11:20

   ܗ̣ܘ ܕܝܢ ܟܕ ܐܝܬܘܗܝ ܗܘܐ ܒܐܘܠܨܢܐ ܗܢܐ̣̣.. ܐܘ ܠܐܓܘܢܐ ܗܢܐ ܫܒܝܚܐ ܐܡ̇ܪ ܗܘܐ. ܕܠܗ ܡܛܠ ܫܪܪܐ ܒܕܘܪܫܐ ܕܟܐ̈ܒܐ ܗܠܝܢ ܟܘܠܗܘܢ ܐܚ̈ܐ ܐܬܩܪܝܢ ܘܠܐ ܐܙܕܟܝܢ.

2. Maccabees 4 11:21

   ܠܐ ܡܙܕܟܝܢܐ ܗܘ ܓܝܪ ܐܘ ܛܪܘܢܐ ܐܝ̇ܢܐ ܕܐܝܬܘܗܝ ܒܡܪܕܘܬܐ ܕܝܘܠܦܢܐ ܕܫܪܪܐ.

3. Maccabees 4 11:22

   ܘܡܙܝܢ ܒܪܚܡܬ ܫܦܝܪ̈ܬܐ. ܡܐ̇ܬ ܐܢܐ ܐܦ ܐܢܐ ܥܡ ܐܚ̈ܝ.

4. Maccabees 4 11:23

   ܟܕ ܡܝܬܐ ܐܢܐ ܐܦ ܐܢܐ ܐܦ ܐܢܐ ܥܠܝܟ ܚܘܒܠܐ ܪܒܐ. ܐܘ ܫܐܕܐ ܚ̇ܒܠܐ ܘܡܫܟܚܢܐ ܕܫܢ̈ܕܐ ܚܕ̈ܬܐ. ܘܒܥܠܕܒܒܐ ܕܣ̇ܓ̈ܘܕܐ ܫܪܝܪܐ.

5. Maccabees 4 11:24

   ܫܬܐ ܥܠܝܡ̈ܝܢ ܠܛܪܘܢܘܬܟ ܣ̇ܬܪܢ.

6. Maccabees 4 11:25

   ܕܠܐ ܓܝܪ ܐܫܟ̣ܚܬ ܕܬܦܝܣ ܠܪܥܝܢܢ. ܠܐ ܗܘܐ ܕܡܘܟܟܟ ܗܝ ܗܕܐ̣.

7. Maccabees 4 11:26

   ܢܘܪܟ ܠܢ ܩܪܝܪܐ ܗܝ. ܘܕܠܐ ܟܐܒ ܐܝܬܝܗܘܢ ܦܪ̈ܙܠܝܟ. ܘܕܠܐ ܚܝܠ ܩܛܝܪ̈ܝܟ.

8. Maccabees 4 11:27

   ܠܐ ܗܘܐ ܓܝܪ ܐܚܝ̈ܕܝ ܪܘܡܚܐ ܕܛܪܘܢܘܬܐ. ܐܠܐ ܐܚܝ̈ܕܝ ܪ̈ܘܡܚܐ ܕܢܡܘܣܐ ܐܠܗܝܐ ܚܕܝܪܝܢ ܠܢ. ܘܥܠ ܗܕܐ ܪܥܝܢܐ ܠܐ ܡܙܕܟܝܢܐ ܐܝܬ ܠܢ܀

9. Maccabees 4 12:1

   ܟܕ ܕܝܢ ܐܦ ܗܢܐ ܛܘܒܬܢܐܝܬ ܡܝ̣ܬ ܡܢ ܒܬܪ ܕܢܦ̣ܠ ܒܩܕܣܐ. ܗ̇ܘ ܕܫܒܥܐ ܐܬ̣ܐ ܗܘܐ ܕܡܢ ܟܘܠܗܘܢ ܛܠ̣ܐ ܗܘܐ.

10. Maccabees 4 12:2

    ܥܠܘܗܝ ܥܠ ܗܢ̣ ܛܪܘܢܐ ܐܝܟ ܕܒܚܘܣܢܐ ܟܪܝܬ ܠܗ. ܟܕ ܛܒ ܩܫܝܐܝܬ ܐܨܛܪ ܡܢ ܐܚ̈ܘܗܝ.

11. Maccabees 4 12:3

    ܘܟܕ ܚܙܝܗܝ ܕܡܟܝܠ ܒܐܣܘܪ̈ܐ ܐܬܐܣܪ ܫܕ̇ܪ ܒܬܪܗ. ܘܡܢ ܕܘܟܬܐ ܕܒܗ̇ ܩܐ̇ܡ ܗܘܐ ܝܬܝܪܐܝܬ ܠܘܬܗ ܩܪܒܗ. ܘܐܡ̣ܪ ܠܗ.

12. Maccabees 4 12:4

    ܫܘܠܡܐ ܕܢܣܒܬ ܚܣܝܪܘܬ ܪܥܝܢܐ ܕܐ̈ܚܝ̈ܟ ܗܐ ܚ̇ܙܐ ܐܢܬ. ܡܛܠ ܓܝܪ ܠܐ ܡܬܛܦܝܣܢܘܬܗܘܢ ܡܣܡ ܒܪܫܐ ܩ̇ܒܠܘ ܘܡܝܬܘ. ܐܦ ܐܢܬ ܐܢܗ̣ܘ ܕܠܐ ܬܛܦܝܣ ܐܘ ܕܘ̇ܝܐ ܠܐܘ̈ܠܨܢܐ ܥܐ̇ܠ ܐܢܬ. ܘܒܗܘܢ ܡܐ̇ܬ ܐܢܬ ܩܕܡ ܙܒܢܐ.

13. Maccabees 4 12:5

    ܐܢ ܕܝܢ ܬܛܦܝܣ ܪܚܡ̇ܐ ܠܝܬ ܗܘܐ. ܘܥܠ ܨܒܘ̈ܬܐ ܒܡ̇ܠܟܘܬܝ ܬܫܬܠܛ.

14. Maccabees 4 12:6

    ܘܟܕ ܗܟܢܐ ܡܢܗ ܒܥ̇ܐ ܗܘܐ̣. ܠܐܡܗ ܕܛܠܝܐ ܫ̇ܕܪ ܐܝܬܝ. ܕܟܕ ܚܝ̇ܣܐ ܥܠ ܢܦܫܗ ܕܡܢ ܟܠܗܘܢ ܗܠܝܢ ܒܢ̈ܝܐ ܐܬܓܙܝܬ. ܬܓܪܓܗ ܠܗ̇ܘ ܕܐܫܬܚܪ ܕܢܬܛܦܝܣ ܘܢܚܐ.

15. Maccabees 4 12:7

    ܗ̣ܘ ܕܝܢ ܟܕ ܐܡܗ ܒܠܫܢܐ ܥܒܪܝܐ ܓܪܓܬܗ. ܐܝܟ ܡܐ ܕܒܬܪ ܩܠܝܠ ܥܬ̇ܝܕܝܢܢ ܠܡܐܡܪ.

16. Maccabees 4 12:8

    ܥܢ̣ܐ ܘܐܡ̣ܪ ܠܡ̇ܠܟܐ ܘܠܟܠܗܘܢ ܪ̈ܚ̇ܡܘܗܝ ܕܥܡܗ ܕܫܪܐܘܢܝ.

17. Maccabees 4 12:9

    ܗ̣ܢܘܢ ܕܝܢ ܒܕܚܕܝܘ ܝܬܝ̇ܪܐܝܬ ܡܛܠ ܫܘܘܕܝܗ ܕܛܠܝܐ ܒܥܓܠ ܠܗ ܫܪܘ.

18. Maccabees 4 12:10

    ܗ̣ܘ ܕܝܢ ܪܗ̣ܛ ܥܠ ܓܒ ܚܕ ܡܢ ܛܓ̈ܢܐ ܕܠܗ ܩܪܝܒܝܢ ܗܘܘ ܘܐܡ̣ܪ.

19. Maccabees 4 12:11

    ܐܘ ܛܪܘܢܐ ܪܫܝܥܐ ܕܡܢ ܟܠ ܪ̈ܫܝܥܝܢ ܪܫܝܥ. ܠܐ ܬܬܟܚܕ ܕܢܣܒܬ ܡܢ ܐܠܗܐ ܛ̇ܒܬ̇ܐ ܘܡ̇ܠܟܘܬܐ ܕܠܥ̈ܒ̣ܕܘܗܝ ܬܢܟܣ ܘܬܫܬܢܕ ܒܐ̈ܬܠܝܛܐ ܕܫܪܪܐ.

20. Maccabees 4 12:12

    ܥܠ ܗܠܝܢ ܕܝܢ̣ܐ ܕܐܠܗܐ ܢ̇ܛܪ ܠܟ. ܠܢܘܪܐ ܕܥܙܝܙܐ ܡܢ ܗܕܐ ܘܡܘܩܕܐ ܠܥܠܡ. ܘܫܢ̈ܕܐ ܠܟ ܠܐ ܢܪܦܘܢ ܠܥܠܡ.

21. Maccabees 4 12:13

    ܠܐ ܒܗ̇ܬ ܐܢܬ ܕܟܕ ܐܝܬܝܟ ܐܦ ܐܢܬ ܒܪܢܫ̣ܐ. ܐܝܟ ܚܝ̈ܘܬܐ ܠܒܢܝ̈ܢܫܐ ܚܫܘ̈ܫܐ ܕܐܟܘܬܟ. ܕܡܢܗܘܢ ܟܕ ܡܢܗܘܢ ܕܐܣ̈ܛܘܟܣܐ ܗܘ̣ܘ ܡܢ ܗܠܝܢ ܕܐܦ ܐܢܬ. ܕܬܦܣܩ ܠܫܢܝ̈ܗܘܢ. ܘܒܐܣܟܡܐ ܗܢܐ ܬܫܬܢܕ ܘܬܘܩܕ ܐܢܘܢ.

22. Maccabees 4 12:14

    ܐܠܐ ܗ̣ܢܘܢ ܕܚܠܬܐ ܕܐܠܗܐ ܫܡ̇ܠܝܘ.

23. Maccabees 4 12:15

    ܐܢܬ ܕܝܢ ܒܬܢܚ̈ܬܐ ܒܝ̈ܫ̣ܬܐ ܬܗܘܐ. ܕܠܐܬ̈ܠܝܛܘܗܝ ܕܫܪܪܐ ܕܠܐ ܥܠܐ ܩܛ̣ܠܬ.

24. Maccabees 4 12:16

    ܐܦ ܐܢܐ ܕܝܢ ܕܥܬܝܕ ܐܢܐ ܕܐ̇ܡܘܬ ܐܡ̇ܪ ܐܢܐ ܠܟ.

25. Maccabees 4 12:17

    ܕܠܐ ܥ̇ܪܩ ܐܢܐ ܡܢ ܢܚܫܝܪܬܢܘܬܐ ܕܐ̈ܚܝ.

26. Maccabees 4 12:18

    ܩ̇ܪܐ ܐܢܐ ܕܝܢ ܠܐܠܗܐ ܕܐܒ̈ܗܝ ܕܢܬܪܥܐ ܠܥܡܢ.

27. Maccabees 4 12:19

    ܠܟ ܕܝܢ ܐܦ ܒܥܠܡܐ ܗܢܐ ܘܡܢ ܒܬܪ ܡܘܬܟ ܢܫܢ̇ܩ..

28. Maccabees 4 12:20

    ܟܕ ܕܝܢ ܨ̇ܠܝ ܕܢܐ̈ܬܝܢ ܗܠܝܢ ܥܠ ܛܪܘܢܐ̣. ܫ̣ܕܐ ܢܦܫܗ ܥܠ ܛܓܢܐ. ܘܗܟܢܐ ܪܘܚܗ ܐܫ̣ܠܡ. .

29. Maccabees 4 13:1

    ܐܢ ܗ̣ܘ ܗܟܝܠ ܕܥܕܡܐ ܠܚ̈ܫܐ ܕܡܘܬܐ ܫܒܥܐ ܛ̈ܠܝܐ ܒܣ̇ܪܘ. ܡܢ ܟܘܠ ܕܘܟ ܝܕܝܥܐ̣ ܕܡܫܠܛ ܗܘ ܪܥܝܢܐ ܥܠ ܚܫ̈ܐ.

30. Maccabees 4 13:2

    ܐܟܙܢܐ ܓܝܪ ܕܐܠܘ ܐܫܬܥܒܕܘ ܠܚ̈ܫܐ ܘܐܟܠܘ ܕܡܣܝܒ. ܐܡ̇ܪܝܢ ܗܘܘ ܕܐܙܕܟܝܘ ܠܚ̈ܫܐ ܗܠܝܢ.

31. Maccabees 4 13:3

    ܗܫܐ ܕܝܢ ܕܠܐ ܗܘܐ ܗܟܢܐ. ܐܠܐ ܒܪܥܝܢܐ ܕܥܠ ܐܠܗܐ ܡܩܒܠ ܙܟܘ ܠܟܐ̈ܒܐ.

32. Maccabees 4 13:4

    ܠܝܬ ܠܡܒܣܪܘ ܥܠ ܐܘܚܕܢܗ ܕܪܥܝܢܐ. ܚܣܢܘ ܓܝܪ ܠܟܐ̈ܒܐ ܘܠܚܫ̈ܐ.

33. Maccabees 4 13:5

    ܐܝ̇ܟܢܐ ܗܟܝܠ ܠܐ ܢܘܕܐ ܕܗܘܬ ܠܘܬܗܘܢ ܙܟܘܬܐ ܕܥܠ ܚܫ̈ܐ ܒܒܘܝܢܐ. ܗ̇ܢܘܢ ܕܡܢ ܫ̈ܢܕܐ ܕܢܘܪܐ ܠܐ ܐܫܬܐܠܘ.

34. Maccabees 4 13:6

    ܐܝ̇ܟܢܐ ܓܝܪ ܕܡܓ̈ܕܠܐ ܕܥܒܝܕܝܢ ܐܝܟ ܣܟܪ̈ܐ ܩܕܡ ܠܡܐ̈ܢܐ ܠܠܘܚ̈ܡܐ ܕܓ̈ܠܠܐ ܡܒܛܠܝܢ: ܘܝܗ̇ܒܝܢ ܠܗܠܝܢ ܕܡܢ ܡܪܕܝܬܐ ܐܬܝܢ ܕܠܠܡܐܢܐ ܢܝܚܐ ܢܫܟܚܘܢ.

35. Maccabees 4 13:7

    ܗܟܢܐ ܐܦ ܚܟܡܬܐ ܕܫܒܥܬ ܡܓ̈ܕܠܐ ܕܥܠܝ̈ܡܐ ܗܠܝܢ̇. ܠܠܡܐܢܐ ܕܕܚܠܬ ܐܠܗܐ ܐܝܟ ܕܠܓܘ ܡܢ ܚܣ̈ܢܐ ܚܒܫܬ. ܘܠܚܫܐ ܕܡܢ ܫ̈ܢܕܐ ܙܟܬ.

36. Maccabees 4 13:8

    ܓܘܕܐ ܓܝܪ ܙܗܝܬܐ ܒܕܚܠܬ ܐܠܗܐ ܐܩܝܡܘ. ܘܠܚܕ̈ܕܐ ܠܒܒܘ ܟܕ ܐܡ̇ܪܝܢ.

37. Maccabees 4 13:9

    ܐܚܝܢܐܝܬ ܢܡܘܬ ܐܚ̈ܐ ܥܠ ܐ̈ܦܝ ܢܡܘܣܐ. ܢܬܕܡܐ ܒܬܠܬܐ ܛ̈ܠܝܐ ܕܒܐܬܘܪ. ܗܢ̇ܘܢ ܕܥܠ ܚܫ̈ܐ ܐܡܣܪܘ.

38. Maccabees 4 13:10

    ܠܐ ܢܫܦܠ ܡܢ ܕܠܡܚܘܝܘ ܫܪܪܢ.

39. Maccabees 4 13:11

    ܘܗܢܐ ܐܬܠܒܒܘ ܐܚ̈ܝ ܐܡ̇ܪ ܗܘܐ. ܗܢܐ ܕܝܢ ܚܠܝܨܐܝܬ ܢܣܝܒܪ.

40. Maccabees 4 13:12

    ܐܚܪܢܐ ܕܝܢ ܟܕ ܡܬܥܗܕ ܐܡ̇ܪ ܗܘܐ. ܐܬܕܟܪܘ ܡܢ ܐܝ̇ܟܐ ܐܝܬܝܟܘܢ. ܘܡܢ ܐܝ̣ܕܐ ܕܐܝ̇ܢܐ ܐܒܐ ܣܝܒܪ ܐܝܣܚܩ ܕܢܬܢܟܣ.

41. Maccabees 4 13:13

    ܟܠ ܚܕ ܚܕ ܡܢܗܘܢ ܕܝܢ ܐܟܚܕܐ ܟܕ ܪܘ̇ܙܝܢ ܘܠܒܝܒܝܢ ܐܡ̇ܪܝܢ ܗܘܘ. ܕܠܐܠܗܐ ܢܦܫܢ ܢܓܥܠ̣ ܡܢ ܟܠܗ ܠܒܢ. ܠܗ̇ܘ ܕܝܗ̣ܒ ܢܦܫ̈ܬܐ. ܘܢܬܠ ܡܛܘܠ ܢܛܘܪ̈ܬܗ ܕܢܡܘܣܐ ܓܘܫܡܢ.

42. Maccabees 4 13:14

    ܠܐ ܢܕܚܠ ܡܢ ܡ̇ܢ ܕܡܣܬܒܪ ܕܩ̇ܛܠ.

43. Maccabees 4 13:15

    ܩܝܢܕܘܢܣ ܓܝܪ ܪܒܐ ܕܢܦܫܐ ܗܘ. ܕܒܫܘܢܩܐ ܕܠܥܠܡ ܣܝ̣ܡ ܥܠ ܗ̇ܢܘܢ ܕܥ̇ܒܪܝܢ ܥܠ ܦܘܩ̈ܕܢܘܗܝ ܕܐܠܗܐ. ܢܙܕܝܢ ܗܟܝܠ ܒܡܫܠܛܘܬܐ ܕܥܠ ܚ̈ܫܐ ܕܐܝܬ ܠܪܥܝܢܐ ܕܕܚ̇ܠ ܡܢ ܐܠܗܐ.

44. Maccabees 4 13:16

    ܟܕ ܓܝܪ ܗܟܢܐ ܢܡܘܬ̣. ܐܒܪܗܡ ܘܐܝܣܚܩ ܘܝܥܩܘܒ ܢܩܒܠܘܢܢ ܘܟܠܗܘܢ ܐܒܗ̈ܝܢ ܢܩܠܣܘܢܢ.

45. Maccabees 4 13:17

    ܘܠܟܠ ܚܕ ܚܕ ܡܢܗܘܢ ܕܡܬܢܬܦ ܗܘܐ ܡܢ ܐܚܘ̈ܗܝ. ܐܡ̇ܪܝܢ ܗܘܘ ܠܗ ܗ̇ܢܘܢ ܕܡܫܬܚܪܝܢ. ܠܐ ܬܒܗܬ ܐܚܘܢ. ܠܐ ܬܕܓܠ ܒܐܚ̈ܝܟ ܗܠܝܢ ܕܐܙ̣ܠܘ.

46. Maccabees 4 13:18

    ܠܐ ܕܝܢ ܟܣ̣ܝܐ ܡܢܟܘܢ ܪܚܡܬܐ ܕܟܝܢܐ ܕܐܢܫܘܬܐ. ܗ̇ܝ ܕܒܛܝܠܘܬܐ ܐܠܗܝܬܐ ܕܒܟܠ ܚܟܝܡܐ ܒܝܕ ܐܒ̈ܗܐ ܠܗ̇ܢܘܢ ܕܡܬܝܠܕܝܢ ܦܠܓܬ. ܘܒܝܕ ܟܪ̇ܣ ܐܡܐ ܒܗܘܢ ܢܨܒܬ.

47. Maccabees 4 13:19

    ܕܒܗ̇ ܙܒ̈ܢܐ ܫܘ̈ܝܐ ܐܚ̈ܐ ܓܡ̣ܪܘ. ܘܒܗ̇ ܟܕ ܒ̇ܗ ܐܬܓܒܠܘ. ܘܡܢܗ ܟܕ ܡܢܗ ܕܕܡܐ ܪܒܘ. ܘܡܢܗ̇ ܬܘܒ ܕܢܦܫܐ ܫܘܚܘ ܘܐܬܘ ܠܡܫܡܠܝܘܬܐ.

48. Maccabees 4 13:20

    ܘܒܙܒ̈ܢܐ ܫܘ̈ܝܐ ܐܬܝܠܕܘ. ܘܡܢܗܝܢ ܟܕ ܡܢܗ̣ܝܢ ܕܡܥ̈ܝܢܐ ܕܚ̣̇ܠܒܐ ܐܫܬܝܘ. ܘܒܗܝܢ ܒܟܢ̈ܦܬܐ ܐܬܛܥܢܘ. ܘܡܢ ܗܠܝܢ ܚܘܒܐ ܕܚܕ̈ܕܐ ܒܢ̈ܦܫܬܗܘܢ ܗܘܐ.

49. Maccabees 4 13:21

    ܘܥܙܝܙܐܝܬ ܫ̣ܘܚ̇. ܡܛܠ ܚܕ ܥܢܝܢܐ ܕܬܪܒܝܬܐ ܘܥܝܕܐ ܕܒܟܠ ܝܘܡ ܕܥܡ ܚܕ̈ܕܐ. ܘܒܡܪܕܘܬܐ ܕܣ̣ܦܪܐ ܘܒܕܘܪܫܐ ܕܝܠܢ ܕܒܢܡܘܣܐ ܐܠܗܝܐ.

50. Maccabees 4 13:22

    ܟܕ ܗܟܝܠ ܗܟܢܐ ܐܝܬܝܗ̇ ܚܒܝܒܘܬ ܪܚܡܬܐ ܕܐܚ̈ܐ. ܗܠܝܢ ܫܒܥܐ ܐܚ̈ܝܢ ܝܬܝܪܐܝܬ ܒܚܘܒܐ ܕܚܕ̈ܕܕܐ ܐܣܝܪܝܢ ܗܘܘ.

51. Maccabees 4 13:23

    ܡܛܠ ܓܝܪ ܕܒܗ ܒܢܡܘܣܐ ܐܬܪܕܝܘ: ܘܒܗ̇ ܟܕ ܒܗ̇ ܒܡܝܬܪܘܬܐ ܐܬܝܠܦܘ: ܘܒܚ̈ܝܐ ܕܙܕܝܩܘܬܐ ܥܡ ܚܕ̈ܕܐ ܐܬܪܒܝܘ̣. ܝܬܝܪܐܝܬ ܠܚܕܕܐ ܡܚܒܒܝܢ ܗܘܘ.

52. Maccabees 4 13:24

    ܛܢܢܐ ܓܝܪ ܕܫܦܝܪ̈ܬܐ ܕܒܟܠܗܘܢ ܐܝܬ ܗܘܐ̣. ܝܬܝܪܐܝܬ ܠܚܘܒܗܘܢ ܘܠܐܘܝܘܬܗܘܢ ܐܬܩܦ.

53. Maccabees 4 13:25

    ܥܡ ܕܚܠܬ ܐܠܗܐ ܓܝܪ̣. ܐܦ ܗ̣ܘ ܗܢܐ ܛܢܢܐ ܠܐܚܘܬܗܘܢ ܥܠܝܗܘܢ ܪܘܪܒܐܝܬ ܡܪܚܡ ܗܘܐ.

54. Maccabees 4 13:26

    ܐܠܐ ܘܟܕ ܛܒ ܐܦ ܟܝܢܐ ܘܥܝܕܐ ܘ̈ܙܢܝܐ ܕܕܘܒ̈ܪܐ ܡܝܬܪ̈ܐ ܚܘܒܐ ܕܐܚܘܬܗܘܢ ܡܫܘܚ ܗܘܐ ܩܒ̇ܠܘ ܥܠܝܗܘܢ ܡܛܠ ܫܪܪܐ ܗܠܝܢ ܕܡܫܬܚܪܝܢ ܕܢܚܙܘܢ ܠܐܚܝ̈ܗܘܢ ܕܒܫ̈ܢܕܐ ܡܬܐܠܨܝܢ.

55. Maccabees 4 14:1

    ܘܠܐ ܗܘܐ ܒܠܚܘܕ ܗܕܐ̣. ܐܠܐ ܐܦ ܡܓܪܓܝܢ ܗܘܘ ܠܗܘܢ ܠܡܬܠ ܢܦܫܗܘܢ ܠܐܘܠܨ̈ܢܐ. ܐܝܟܢܐ ܕܠܐ ܗܘܐ ܒܠܚܘܕ ܥܠ ܐܘ̈ܠܨܢܐ ܢܒܣܪܘܢ̣. ܐܠܐ ܐܦ ܠܚ̈ܫܐ ܕܪܚܡܬ ܐܚܘܬܐ ܢܙܟܘܢ.

56. Maccabees 4 14:2

    ܐܘ ܚܘܫ̈ܒܐ ܕܝܬܝܪ ܡܢ ܡ̈ܠܟ̇ܐ ܡܡܠܟܝܢ. ܘܡܢ ܚܐܪ̈ܐ ܚܐܪܝܝܢ ܗܘܘ.

57. Maccabees 4 14:3

    ܐܘ ܠܫܘܝܘܬܐ ܕܪܘܟܒܐ ܕܩܠܗܘܢ ܕܛ̈ܠܝܐ ܫܒܥܐ ܕܥܠ ܐ̈ܦܝ ܫܪܪܐ.

58. Maccabees 4 14:4

    ܘܠܐ ܚܕ ܡܢ ܫܒܥܐ ܛ̈ܠܝܐ ܩܢ̣ܛܘ. ܘܠܐ ܡܢ ܡܘܬܐ ܕܚ̣ܠܘ.

59. Maccabees 4 14:5

    ܐܠܐ ܐܝܟ ܗ̇ܘ ܕܠܐܘܪܚܐ ܕܠܐ ܡܝܘܬܘܬܐ ܪܗ̇ܛܝܢ ܗܘܘ̣. ܟܘܠܗܘܢ ܠܡܘܬܐ ܕܒܝܕ ܫܢ̈ܕܐ ܐܣܬܪܗܒܘ.

60. Maccabees 4 14:6

    ܐܟܙܢܐ ܓܝܪ ܕܐܝ̈ܕܝܐ ܘܪ̈ܓܠܐ ܫܘܝܐܝܬ ܒܝܕ ܙܘ̈ܥܐ ܕܢܦܫܐ ܡ̈ܬܢܓܕܢ̣. ܗܟܢܐ ܐܦ ܛ̈ܠܝܐ ܗ̇ܢܘܢ ܙܗ̈ܝܐ̇. ܐܝܟ ܕܡܢ ܢܦܫܐ ܠܐ ܡܝܘܬܬܐ ܡܢ ܕܚܠܬ ܐܠܗܐ ܥܠ ܡܘܬܐ ܕܚܠܦܝܗ̇ ܠܚܕ̈ܕܐ ܫܠ̣ܡܘ.

61. Maccabees 4 14:7

    ܐܘ ܫܒܬܐ ܩܕܝܫܬܐ ܕܐܚ̈ܐ ܐܘ̈ܝܐ. ܐܝܟܢܐ ܓܝܪ ܕܝܘ̈ܡܐ ܫܒܥܐ ܕܥ̇ܒܘܕܘܬܐ ܐܝܬܝܗܘܢ ܡܬܟܪ̈ܟܝ ܥܠ ܢܛܘܪ̈ܬܐ ܕܢܡܘܣܐ.

62. Maccabees 4 14:8

    ܗܟܢܐ ܐܦ ܥܠܝܡ̈ܐ ܗܠܝܢ ܟܕ ܕܝܨ̇ܝܢ ܒܫܒܝܥܝܘܬܗܘܢ ܡܬܟܪܟܝܢ ܗܘܘ. ܟܕ ܕܚܠܐ ܕܫܢ̈ܕܐ ܫ̣ܪܝܢ ܗܘܘ.

63. Maccabees 4 14:9

    ܗܫܐ ܚܢܢ ܕܫ̇ܡܥܝܢܢ ܐܘܠܨ̈ܢܝܗܘܢ ܕܥ̈ܠܝܡܐ ܗ̇ܢܘܢ ܡ̇ܣܬܪܕܝܢܢ. ܗ̇ܢܘܢ ܕܝܢ ܠܐ ܗܘܐ ܒܠܚܘܕ ܕܚ̇ܙܝܢ ܗܘܘ ܐܦ ܡܚܙܐ. ܘܠܐ ܒܠܚ̇ܘܕ ܕܫ̇ܡܥܝܢ ܗܘܘ ܡܠܬܐ ܕܠܘܚܡܐ ܡ̣ܢ ܫܠܝ. ܐܠܐ ܐܦ ܟܕ ܚ̇ܫܝܢ ܗܘܘ ܙܟ̇ܝܢ ܗܘܘ.

64. Maccabees 4 14:10

    ܘܗܠܝܢ ܠܟܐܒ̈ܐ ܚܪ̈ܝܦܐ ܕܢܘܪܐ ܕܡܢܗܘܢ ܡܕܡ ܕܩ̣ܫܐ ܠܝܬ. ܒܕܚܪܝܦ ܗܘܐ ܕܝܢ ܘܩܠܝܠ ܚܝܠܗ̇ ܕܢܘܪܐ̣. ܥܓܠ ܫ̇ܪܝܐ ܗܘܬ ܓܘܫܡ̈ܝܗܘܢ.

65. Maccabees 4 14:11

    ܘܠܐ ܬܣܒܪܘܢ ܕܕܘܡܪܐ ܗ̇ܝ. ܐܢ ܗ̣ܘ ܕܪ̈ܥܝܢܝܗܘܢ ܚܡܣܢܘ ܕܓܒܪ̈ܐ ܗܢ̇ܘܢ ܒܓܘ ܫ̈ܢܕܐ̇. ܐܝ̇ܟܐ ܕܐܦ ܠܒܗ̇ ܕܐܢܬܬܐ ܗܕܐ ܥܠ ܚ̈ܫܐ ܕܡܢ ܗܠܝܢ ܥܙܝܙܝܢ ܐܫܝܚ.

66. Maccabees 4 14:12

    ܐܡܐ ܓܝܪ ܕܫܒܥܐ ܥܠܝܡ̈ܐ ܗܠܝܢ. ܣܝ̣ܒܪܬ ܥܠܝܗ̇ ܫܢ̈ܕܐ ܕܥܠ ܟܠ ܚܕ ܚܕ ܡܢܗܘܢ ܥܕ̇ܝܢ ܗܘܘ.

67. Maccabees 4 14:13

    ܐܬܒܩܘ ܓܝܪ ܟܡܐ ܣܓܝܐ̈ܝܢ ܥܘܪ̈ܙܠܝ ܫܪ̈ܫܘܗܝ ܕܚܘܒܐ ܕܠܘܬ ܒܢ̈ܝܐ. ܢܓ̇ܕ ܓܝܪ ܒܟܘܠܗܝ̣ܢ ܕܢܓܘܠܘܢ ܪ̈ܚ̣ܡܐ.

68. Maccabees 4 14:14

    ܐܝܟ ܕܐܦ ܚܝܘ̈ܬܐ ܕܠܐ ܡܠܬܐ ܐܣܝܪܘܬ ܚܘܒܐ ܕܠܕܒ̈ܢܝܢܫܐ ܕܡ̇ܝܢ ܩ̣ܢܝܢ ܠܘܬ ܗܠܝܢ. ܕܡܢܗܝܢ ܐܬܝܠܕܘ.

69. Maccabees 4 14:15

    ܐܦ ܓܝܪ ܡܢ ܦܪܚܬܐ ܗ̇ܝ ܕܒܫܝܢܐ ܘܒܓܘ ܒܝܬܐ. ܬܚܝܬ ܡܛܠܠܐ ܥܐܠܐ ܡܬܟܬܫܐ ܚܠܦ ܦܪ̈ܘܓܝܗ̇.

70. Maccabees 4 14:16

    ܐܝ̇ܕܐ ܕܝܢ ܕܒܪ̈ܫܝ ܛܘ̣̈ܪܐ ܘܒܫ̈ܢܢܬܐ ܕܫܩ̈ܝܦܐ ܘܒܚܘ̈ܪܐ ܕܐ̈ܝܠܢܐ̇. ܘܒܪ̈ܫܝܗܘܢ ܩܢ̣̇ܐ ܓܕ̇ܠܐ ܘܣܝܡ̇ܐ ܦܪ̈ܘܓܝܗ̇.

71. Maccabees 4 14:17

    ܠܐܚܘܕܗܘܢ ܟܠܝܐ ܟܕ ܛ̇ܝܪܐ ܥܠܝܗܘܢ ܘܡܬܟܪܟܐ. ܘܟܐ̇ܒ ܠܗ̇ ܡܢ ܪ̈ܚܡܝܗ̇. ܘܒܝܕ ܩܠܗ̇ ܩ̇ܪܝܐ ܠܗܘܢ ܘܟܡܐ ܕܡܨܝܐ ܡܥܕܪܐ ܠܒܢ̈ܝܗ̇.

72. Maccabees 4 14:18

    ܘܡܢܐ ܡܬܒܥܐ ܕܚܘܒܐ ܕܒܚܝ̈ܘܬܐ ܕܠܐ ܡܠܬܐ ܐܝܬ ܠܘܬ ܒܢܝ̈ܗܝܢ ܠܡܚܘܝܘ.

73. Maccabees 4 14:19

    ܐܝ̇ܟܐ ܕܐܦ ܕܒܘܪ̈ܝܬܐ ܒܙܒܢܐ ܕܟܟܪ̈ܝܬܐ ܩܛܪ̈ܢ. ܟ̈ܠܝܢ ܘܡܬܡܪܡܪ̈ܢ ܥܠ ܗܠܝܢ ܕܒ̇ܥܝܢ ܕܢܩܪܒܘܢ ܠܗܝܢ. ܘܐܝܟ ܕܒܦܪܙܠܐ ܒܝܕ ܥܘ̈ܩܣܝܗܝܢ ܛܪ̈ܝܢ ܠܐܝܠܝܢ ܕܡܬܩܪܒܝܢ ܠܒܢܝ̈ܗܝܢ. ܘܥܕܡܐ ܠܡܘܬܐ ܡܬܢܩ̈ܡܢ.

74. Maccabees 4 14:20

    ܐܠܐ ܠܢܦܫܐ ܕܐܝܟ ܕܐܒܪܗܡ ܐܝܬܝܗ̇ ܗܘܬ ܕܐܡܗܘܢ ܕ̈ܛܠܝܐ. ܠܐ ܐܙܝܥ ܚܘܒܐ ܕܒܢ̈ܝܐ.

75. Maccabees 4 15:1

    ܐܘ ܠܪܥܝܢܐ ܛܪܘܢܐ ܕܥܠ ܚܫ̈ܐ ܕܒ̈ܢܝܐ. ܐܘ ܫܪܪܐ ܕܐܬܪܚ̣ܡܬ ܥܠ ܐܡܐ ܡܢ ܒܢ̈ܝܐ.

76. Maccabees 4 15:2

    ܐܡܐ ܟܕ ܣ̣ܝ̈ܡܢ ܗ̈ܘܝ ܩܕܡ ܥܝ̈ܢܝܗ̇ ܬܪ̈ܬܝܢ. ܪܚܡܬ ܫܢ̈ܕܐ ܘܚ̈ܝܐ ܕܡ̣ܠܐ ܙܒܢܐ. ܕܫܒܥܐ ܒܢ̈ܝܗ̇ ܐܝܟ ܫܘܘܕܝܗ ܕܛܪܘܢܐ

77. Maccabees 4 15:3

    ܓܒܬ ܠܗ̇ ܪܚ̇ܡܬ ܫܪܪܐ. ܕܡܚܐ ܚ̈ܝܐ ܕܠܐܠܡ ܒܐܠܗܐ.

78. Maccabees 4 15:4

    ܐܘ ܐܝܟ̇ܢܐ ܐܫ̇ܬܥܐ ܥܠ ܙܢ̈ܝܐ ܕܚܫ̈ܐ ܕܪܚܡܬ ܒܢ̈ܝܐ. ܕܡܘܬܐ ܓܝܪ ܕܦܪܨܘܦܐ ܒܐ̈ܦܐ ܙܥܘܪ̈ܝܬܐ ܕ̈ܛܠܝܐ ܬܡܝܗܐܝܬ ܡܬܛܒܥܐ. ܘܥܠ ܗܕܐ ܡܛܠ ܚ̈ܫܐ ܡܬܪܦܝܐ ܠܘܬ ܪ̈ܚܡ̣ܐ.

79. Maccabees 4 15:5

    ܟܡܐ ܓܝܪ ܕܡܚ̈ܝܠܢ ܢܦܫ̈ܬܗܝܢ ܘܣܓܝܐ̈ܝܢ ܝܠܕܝ̈ܗܝܢ ܕܐܡ̈ܗܬܐ̣ ܗܟܢܐ ܝܬܝ̇ܪܐܝܬ ܠܒܢܝ̈ܗܝܢ ܪܚ̇ܡܢ.

80. Maccabees 4 15:6

    ܡܢ ܟܠܗܝܢ ܕܝܢ ܐܡ̈ܗܬܐ ܐܡܗܘܢ ܕܫܒܥܐ ܠܒܢ̈ܝܗ̇ ܪܚܡ̇ܐ ܗܘܬ. ܗ̇ܝ ܕܒܫܒܥܐ ܒܛܢ̈ܝܢ ܚܘܒܐ ܕܥܠܝܗܘܢ ܒܗ̇ ܐܬܢܨܒ.

81. Maccabees 4 15:7

    ܘܡܛܘܠ ܚܒ̣̈ܠܐ ܕܟܠܚܕ ܚܕ ܡܢܗܘܢ. ܡܬܥܨܝܐ ܗܘܬ ܕܪܚܡܬܐ̇ ܠܘܬܗܘܢ ܬܗܘܐ ܠܗ̇.

82. Maccabees 4 15:8

    ܘܡܛܠ ܕܚܠܬ ܐܠܗܐ ܫܛܬ ܚ̈ܝܐ ܕܙܒܢܐ ܕܒܢ̈ܝܗ̇.

83. Maccabees 4 15:9

    ܗܢܘ ܕܝܢ ܐܦ ܡܛܘܠ ܝܐܝܘܬܗܘܢ ܘܡܛܦܝܣܢܘܬܗܘܢ ܕܠܢܡܘܣܐ. ܪܚܡܬܐ ܝܬܝܪܐܝܬ ܠܘܬܗܘܢ ܩܢ̣ܝܐ ܗܘܬ.

84. Maccabees 4 15:10

    ܙܕܝܩܝܢ ܗܘܘ ܓܝܪ ܘܢܟܦܝܢ ܘܓܢܒܪܝܢ ܘܠܒܝܒܝܢ. ܘܠܚܕ̈ܕܐ ܪܚ̇ܡܝܢ ܗܘܘ. ܘܠܐܡܗܘܢ ܡܚܒܝܢ ܗܘܘ. ܘܗܟܢܐ ܡܚܒܝܢ ܗܘܘ. ܐܝܟ ܕܥܕܡܐ ܠܡܘܬܐ ܟܕ ܢ̇ܛܪܝܢ ܗܘܘ ܢܡܘܣܐ ܢܬܛܦܝܣܘܢ ܠܗ̇.

85. Maccabees 4 15:11

    ܐܠܐ ܘܟܕ ܛܒ ܗܠܝܢ ܟܠܗܝܢ ܗܟܢܐ ܐܝܬܝܗܝܢ ܗܘ̈ܝ. ܕܡܛܠ ܪܚܡܬ ܒܢ̈ܝܐ̣ ܢ̈ܓܕܢ ܗ̈ܘܝ ܠܗ̇. ܠܐܡܐ ܠܪ̈ܚܡܐ. ܘܠܐ ܒܚܕ ܡܢܗܘܢ ܠܪܥܝܢܗ̇ ܫܢ̈ܕܐ ܡܫܚ̈ܠܦܐ ܐܫܟܚܘ ܕܢܫܚܠܦܘܢ.

86. Maccabees 4 15:12

    ܐܠܐ ܐܦ ܠܚܕ ܚܕ ܡܢܗܘܢ ܒܝܢܘܗܝ ܘܠܗ. ܘܠܟܘܠܗܘܢ ܬܘܒ ܐܟܚܕܐ ܠܡܘܬܐ ܕܥܠ ܐ̈ܦܝ ܫܪܪܐ ܡܓܪܓܐ ܗܘܬ.

87. Maccabees 4 15:13

    ܐܘ ܪܥܝܢܐ ܙܗܝܐ ܘܪܚܡܬܐ ܕܗܠܝܢ ܐܒܗ̈ܐ. ܘܝܠܕܐ ܘܬܪܒܝܬܐ ܕܡ̣ܠܝܐ ܚܘܒܐ. ܘܪ̈ܚ̣ܡܐ ܕܐܡܐ ܕܠܐ ܡܬܪܟܟܝܢ.

88. Maccabees 4 15:14

    ܟܕ ܚܙܝܐ ܠܟܠ ܚܕ ܚܕ ܡܢܗܘܢ ܕܪܡܐ ܗܘܐ ܒܫ̈ܢܕܐ ܘܝ̇ܩܕ ܠܐ ܡܫܬܚܠܦܐ ܗܘܬ ܡܛܠ ܫܪܪܐ.

89. Maccabees 4 15:15

    ܒܣܪܐ ܕܒܢ̈ܝܗ̇ ܚ̇ܙܝܐ ܕܥܠ ܢܘܪܐ ܫܐ̇ܚ ܗܘܐ. ܘܨܒ̈ܥܬܐ ܕܐܝ̈ܕܝܐ ܘܕܪ̈ܓܠܐ ܕܥܠ ܐܪܥܐ ܡܬܥ̈ܘܩܕܢ ܗ̈ܘܝ. ܘܡܫܟܐ ܕܪ̈ܫܝܗܘܢ ܕܥܕܡܐ ܠܒܣܪܐ ܕܕܩܢܐ ܢܫܝܛ ܗܘܐ ܘܐܝܟ ܐ̈ܦܐ ܢܘܟܪ̈ܝܬܐ ܥܠ ܪܝܫܐ ܡܠܒܫ.

90. Maccabees 4 15:16

    ܐܘ ܠܚ̈ܫܐ ܡܪܝܪ̈ܐ ܕܐܡܐ ܠܗܘܢ ܗܫܐ ܥܠܝܠܐ ܗܘܬ. ܛܒ ܡܢ ܕܟܕ ܒܚܒ̈ܠܝܗܘܢ ܪܡܝܐ ܗܘܬ.

91. Maccabees 4 15:17

    ܐܘ ܐܢܬܬܐ ܕܒܠܚܘܕܝܟܝ ܒܕܚܠܬ ܐܠܗܐ ܡܫܡܠܝܐ ܗܘܝܬܝ.

92. Maccabees 4 15:18

    ܠܐ ܫܚܠܦܟܝ ܒܘܟܪܐ. ܟܕ ܢܦܫܗ ܡܢܗ ܣ̇ܠܩܐ ܗܘܬ. ܘܠܐ ܕܒܬܪܗ ܕܚܘܪܐ ܪܥܘܡܐ ܡܢ ܓܘ ܫܢ̈ܕܐ ܒܟܝ ܚܐ̇ܪ ܗܘܐ. ܘܠܐ ܕܬܠܬܐ ܟܕ ܛ̇ܠܩ ܡܢ ܚ̈ܝܐ.

93. Maccabees 4 15:19

    ܐܢܬ ܕܝܢ ܟܕ ܚ̇ܝܪܐ ܗ̣ܘܝܬܝ ܒܥܝܢܐ ܕܟܠ ܚܕ ܚܕ ܡܢܗܝܢ. ܕܚܘܪܗܝܢ ܡܢ ܐܘܠܨܢܐ ܗܦܝܟ ܗܘܐ. ܘܒܢܚܝܪܝܗܝܢ ܕܩܕ̇ܡ̇ܝܢ ܡܘܕܥܝܢ ܥܠ ܡܘܬܐ ܠܐ ܒܟ̣ܝܬܝ.

94. Maccabees 4 15:20

    ܘܕܚܙܝܐ ܗ̣ܘܝܬ ܕܥܠ ܒܣܪܐ ܩܕܡܝܐ ܕܒܢ̈ܝܟܝ ܒܣܪܐ ܐܚܪܢܐ ܕܒܢ̈ܝܟܝ ܡܬܦܣܩ ܗܘܐ. ܘܡܢ ܒܬܪ ܐܝ̈ܕܝܐ ܬܘܒ ܐܝ̈ܕܝܐ ܕܡ̈ܬܦܣܩܢ. ܘܡܢ ܒܬܪ ܩܪ̈ܩܦܬܐ ܩܪ̈ܩܦܬܐ ܕܡ̈ܬܢܫܛܢ ܘܥܠ ܡܝ̈ܬܐ ܬܘܒ ܕܢ̇ܦܠܝܢ ܡܝ̈ܬܐ. ܘܟܕ ܚ̇ܙܝܐ ܗ̣ܘܝܬܝ ܕܐܝܟ ܥܠܥܠܐ ܦܠܚ̈ܘܗܝ ܕܛܪܘܢܐ ܒܒܢܝ̈ܟܝ ܢܦ̇ܠܝܢ ܗܘܘ ܠܐ ܕܡܥܬܝ.

95. Maccabees 4 15:21

    ܠܐ ܗܟܢܐ ܢܥܡܬܐ ܕܣܝܪܝܢܘܣ ܘܩܠܐ ܕܩܘ̈ܩܢܘ ܠܪܚܡܬ ܫܡܥܐ ܠܗܠܝܢ ܕܨܝ̇ܬܝܢ ܢܬ̇ܦܝܢ. ܐܝܟ ܩܠܐ ܕ̈ܒܢܝܐ ܕܡܢ ܫܢ̈ܕܐ ܩ̇ܪܝܢ ܗܘܘ.

96. Maccabees 4 15:22

    ܐܝܠܝܢ ܘܟܡܐ. ܗ̣ܝ ܕܝܢ ܐܡܐ ܟܕ ܒܢ̈ܝܗ̇ ܡܬܐܠܨܝܢ ܗܘܘ. ܘܒܓܝ̈ܓܠܐ ܘܒܟܘ̈ܝܐ ܡܫܬܢܩܝܢ ܗܘܘ̣.

97. Maccabees 4 15:23

    ܫܢ̈ܕܐ ܣ̇ܒܠܐ ܗܘܬ. ܐܠܐ ܠܪ̈ܚܡܝܗ̇ ܪܥܝܢܐ ܕܕܚܠܬ ܐܠܗܐ ܒܓܘ ܚܫ̈ܐ ܓܒܪ ܘܚܝܠ. ܕܪܚܡܬܐ ܥ̇ܒܘܪܬܐ ܕܒܢ̈ܝܐ ܬܫܘܛ.

98. Maccabees 4 15:24

    ܟܕ ܛܒ ܐܒܕܢܐ ܕܫܒܥܐ ܒ̈ܢܝܐ ܚ̇ܙܝܐ ܗܘܬ. ܘܫܘܚ̈ܠܦܐ ܡܦ̈ܬܟܐ ܕܫܢ̈ܕܝܗܘܢ. ܘܥܩܪܬܗ ܐܡܐ ܢܨܝܚܬܐ ܘܫܕܬܗ. ܡܛܠ ܗܝܡܢܘܬܐ ܕܒܐܠܗܐ.

99. Maccabees 4 15:25

    ܐܝܟ ܗ̇ܘ ܓܝܪ ܕܒܒܝܬ ܟܢܘܫܝܐ ܕܡ̇ܠܘ̈ܟܐ ܚ̇ܙܝܐ ܗܘܬ ܡܠܘ̈ܟܐ ܣܢ̈ܝܐ ܕܝܠܗ̇ ܕܢܦܫܐ. ܕܐܝܬܝܗܘܢ ܟܝܢܐ ܘܝܠܕܐ ܘܪܚܡܬ ܒܢ̈ܝܐ ܘܫ̈ܢܕܐ ܕܒ̈ܢܝܐ.

100. Maccabees 4 15:26

     ܘܬܪܝܢ ܕܝ̈ܢ̣ܝܢ ܐܡܐ ܕܢܬܝ. ܕܡܘܬܐ ܘܕܚ̈ܝܐ.

← Previous · Next → — showing 301–400 of 479

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.