← All works

Peshitta Maccabees 4

Peshitta (Syriac Old Testament) · 479 sections

1. Maccabees 4 7:23

   ܒܠܚܘܕ ܓܝܪ ܐܝ̇ܢܐ ܕܐܝܬܘܗܝ ܚܟܝܡܐ ܘܓܢܒܪܐ ܐܝܬܘܗܝ ܡܫܠܛ ܥܠ ܚ̈ܫܘܗܝ.

2. Maccabees 4 7:24

   ܘܥܠ ܗܕܐ ܐܦ ܛ̈ܠܝܐ ܟܕ ܒܪܥܝܢܐ ܕܕܚܠܬ ܐܠܗܐ ܐܝܬܝܗܘܢ ܗܘܘ. ܠܫܢ̈ܕܐ ܕܡܢ ܗܠܝܢ ܩܫ̣ܝܢ ܙܟܘ܀

3. Maccabees 4 7:25

   ܡܛܠ ܓܝܪ ܕܒܢܣܝܢܐ ܩܕܡܝܐ ܐܙܕܟ̇ܝ ܛܪܘܢܐ ܪܘܪܒܐܝܬ ܠܥܝܢ ܟܠ ܐܢܫ. ܘܠܐ ܐܫܟܚ ܠܡܥܨܐ ܠܓܒܪܐ ܣܒܐ ܠܡܐܟܠ ܡܐܟܘܠܬܐ ܡܣܝܒܬܐ.

4. Maccabees 4 8:1

   ܗ̇ܝܕܝܢ ܥܙܝܙܐܝܬ ܐܝܟ ܕܡܢ ܚܫܐ ܦ̣ܩܕ ܠܡܝܬܝܘ ܠܐܚܪ̈ܢܐ ܡܢ ܓܙܪܐ ܕܥܒܪ̈ܝܐ. ܘܐܢ ܗ̣ܘ ܕܢܐܟܠܘܢ ܕܛܡ̣ܐ ܢܫܒܩܘܢ ܐܢܘܢ ܡܐ ܕܐܟܠܘ. ܐܢ ܕܝܢ ܠܐ ܢܬܛܦܝܣܘܢ ܢܫܬܢܕܘܢ ܒܗܘܢ ܡܪܝܪܐܝܬ.

5. Maccabees 4 8:2

   ܟܕ ܕܝܢ ܦܩ̣ܕ ܗܠܝܢ ܛܪܘܢܐ̣. ܛ̈ܠܝܐ ܫܒܥܐ ܐܬܘ. ܟܕ ܡܬܢܓܕܝܢ ܥܡ ܐܡܗܘܢ ܕܐܝܬܝܗ̇ ܗܘܬ ܣܒܬܐ. ܦܐ̈ܝܐ ܘܢܟ̈ܦܐ ܘܚܝ̈ܠܬܢܐ. ܕܒܟܠ ܡܕܡ ܪܘ̇ܙܝܢ ܗܘܘ.

6. Maccabees 4 8:3

   ܠܗܠܝܢ ܟܕ ܚ̣ܙܐ ܛܪܘܢܐ ܕܒܕܡܘܬ ܓܘܕܐ ܒܡܨܥܬܐ ܠܐܡܗܘܢ ܟܪܝܟܝܢ ܗܘܘ̣. ܚܕܝ ܘܬܗ̣ܪ ܒܚܙܬܗܘܢ ܘܒܐܘܝܘܬܗܘܢ. ܘܐܦܨܚ ܐ̈ܦܘܗܝ ܠܘܩܒܠܗܘܢ. ܘܩ̣ܪܐ ܐܢܘܢ ܥܠ ܓܒܗ ܘܐܡ̣ܪ.

7. Maccabees 4 8:4

   ܐܘ ܥܠܝ̈ܡܐ. ܡܛܠ ܕܒܪܥܝܢܐ ܛܒ̇ܐ ܒܫܘܦܪܐ ܕܟܠ ܚܕ ܚܕ ܡܢܟܘܢ ܬܗ̇ܪ ܐܢܐ. ܘܟܢܘܫܝܐ ܗܢܐ ܟܘܠܗ ܕܐ̈ܚܐ ܡܝܩܪ ܐܢܐ. ܠܐ ܗܘܐ ܒܠܚܘܕ ܡ̇ܠܟ ܐܢܐ ܠܟܘܢ ܕܠܐ ܬܫ̣ܢܘܢ ܗ̇ܝ ܫܢܝܘܬܐ ܕܫ̣ܢܐ ܣܒܐ ܗ̇ܘ ܕܩ̇ܒܠ ܫ̈ܢܕܐ.

8. Maccabees 4 8:5

   ܐܠܐ ܐܦ ܒ̇ܥܐ ܐܢܐ ܡܢܟܘܢ ܕܬܬܛܦܝܣܘܢ ܠܝ ܘܬܗܘܘܢ ܠܝ ܪ̈ܚܡ̇ܐ. ܡܨ̣ܐ ܐܢܐ ܗܘ ܓܝܪ ܐܟܙܢܐ ܕܐܣܝܡ ܒܪܫܐ ܕܗ̇ܢܘܢ ܕܠܐ ܡܬܛܦܝܣܝܢ ܠܦܘܩܕܢܝ. ܗܟܘܬ ܕܐܥܒܕ ܫܦܝܪ̈ܬܐ ܠܗ̇ܢܘܢ ܕܡܬܛܦܝܣܝܢ ܠܝ.

9. Maccabees 4 8:6

   ܗܝܡܢܘ ܗܟܝܠ ܕܐܦ ܫܘܠܛܢܐ ܘܪ̈ܝܫܢܘܬܐ ܒܐܘܚܕܢܝ ܢܣ̇ܒܝܢ ܐܢܬܘܢ. ܟܕ ܬܟܦܪܘܢ ܒܢܡܘ̈ܣܐ ܘܒܕܘܒܪ̈ܐ ܕܐܒܗ̈ܝܟܘܢ.

10. Maccabees 4 8:7

    ܘܬܬܚܠܛܘܢ ܒܕܘܒܪ̈ܐ ܕܚܢܦܘܬܐ. ܡܐ ܓܝܪ ܕܫܚܠܦܘܢ ܥܝܕ̈ܝܟܘܢ ܡܬܦܢܩܝܬܘܢ ܒܛܠܝܘܬܟܘܢ.

11. Maccabees 4 8:8

    ܘܐܠܐ ܐܢܗ̣ܘ ܕܪܘܓܙܐ ܒܝ ܬܓܘܙܠܘܢ ܒܝܕ ܠܐ ܡܬܛܦܝܣܢܘܬܟܘܢ. ܥ̇ܨܝܢ ܐܢܬܘܢ ܠܝ ܕܒܫ̈ܢܕܐ ܩ̈ܫܝܐ ܠܟܠ ܚܕ ܚܕ ܡܢܟܘܢ ܐܘܒܕ.

12. Maccabees 4 8:9

    ܚܘܣܘ ܗܟܝܠ ܥܠ ܢܦܫܟܘܢ. ܗ̇ܝ ܕܐܦ ܐܢܐ ܕܠܩܘܒܠܟܘܢ ܡܩܪܒ ܐܢܐ ܥܠܝܗ̇ ܚܐ̇ܣܢܐ ܘܡܪܚܡ ܐܢܐ ܥܠ ܩܘܡ̈ܬܟܘܢ ܘܥܠ ܫܘܦܪ̈ܝܟܘܢ .

13. Maccabees 4 8:10

    ܠܐ ܗܟܝܠ ܡܬܪܥܝܢ ܐܢܬܘܢ ܕܠܘ ܡܕܡ ܐܚܪܝܢ ܗ̇ܘܐ ܠܟܘܢ ܐܢ ܗ̣ܘ ܕܠܐ ܬܬܛܦܝܣܘܢ. ܐܠܐ ܐܢ ܕܒܫ̈ܢܕܐ ܬܡܘܬܘܢ.

14. Maccabees 4 8:11

    ܟܕ ܕܝܢ ܗܠܝܢ ܐܡ̣ܪ̣ ܦ̣ܩܕ ܕܢܣܬܕܪܘܢ ܡܐ̈ܢܝ ܫ̈ܢܕܐ ܩܕܡܝܗܘܢ. ܥܒ̣ܕ ܕܝܢ ܗܕܐ̣. ܐܝܟ ܡ̇ܢ ܕܒܝܕ ܕܚܠܬܐ ܣ̇ܒܪ ܗܘܐ. ܕܡܦܝܣ ܗܘܐ ܠܗܘܢ ܕܢܐܟܠܘܢ ܡܕܡ ܕܡܣܝܒ.

15. Maccabees 4 8:12

    ܟܕ ܕܝܢ ܐܝܬܝܘ ܠܡܨܥܬܐ ܠܓܝ̈ܓܠܐ ܘܠܦܪ̈ܙܠܐ. ܘܠܦܪ̈ܩܝ ܫܪ̈ܝܬܐ. ܘܥܪ̈ܩܐ ܕܡ̈ܬܚܐ. ܘܩܕ̈ܣܐ ܘܛܓ̈ܢܐ ܘܫܦܘ̈ܕܐ. ܘܐܝ̈ܕܝܐ ܕܦܪܙܠܐ ܘܐܣ̈ܦܢܐ. ܘܓܘܡܪ̈ܐ ܕܢܘܪܐ. ܥܢ̣ܐ ܛܪܘܢܐ ܘܐܡ̣ܪ.

16. Maccabees 4 8:13

    ܛܠܝܐ ܕܚ̣ܠܘ. ܐܦ ܕܝ̇ܢܐ ܗ̇ܘ ܕܡܢܗ ܕܚ̇ܠܝܢ ܐܢܬܘܢ ܫܒ̇ܩ ܠܟܘܢ. ܡܛܠ ܕܡܢ ܩܛܝܪܐ ܥܒ̇ܪܝܢ ܐܢܬܘܢ. ܥܠ ܢܡܘܣܐ.

17. Maccabees 4 8:14

    ܗ̣ܢܘܢ ܕܝܢ ܟܕ ܫܡ̣ܥܘ ܡ̈ܠܐ ܕܫܕܠܐ ܐܦ ܕܠܘܚܡܐ. ܘܚܙܘ ܚܙܬܐ ܗ̇ܝ ܕܚܝܠܬܐ̣ ܠܐ ܐܣܬܪܕܘ. ܐܠܐ ܐܦ ܡ̈ܠܐ ܕܚܟܡܬܐ̣ ܦܢ̇ܝܘ ܠܛܪܘܢܐ. ܘܒܝܕ ܛܥܡܐ ܕܚܟܡܬܗܘܢ̣ ܠܛܪܘܢܘܬܗ ܣܚܦܘ.

18. Maccabees 4 8:15

    ܢܬܚܫܒ ܕܝܢ ܐܠܘ ܕܚܘ̈ܠܬܢܝܢ ܗ̇ܘܝ ܢܦܫ̈ܬܗܘܢ ܘܠܐ ܠܒܝܒܝܢ ܗܘܘ. ܐܝܠܝܢ ܡ̈ܠܐ ܒܪ̈ܥܝܢܝܗܘܢ ܡܬܚܫܚܝܢ ܗܘܘ. ܠܐ ܗܘܐ ܒܗܠܝܢ.

19. Maccabees 4 8:16

    ܕܘ̈ܝܐ ܚܢܢ ܘܐܢܫܐ ܕܛܒ ܣܟܠܝܢ. ܡ̇ܠܟܐ ܡܢܢ ܒ̇ܥܐ ܘܠܛܒ̇ܬܐ ܩ̇ܪܐ ܠܢ. ܘ̇ܠܐ ܕܢܬܛܦܝܣ ܠܨܒܝܢܗ.

20. Maccabees 4 8:17

    ܡܢܐ ܡܬܠܠܠܝܢ ܚܢܢ̇. ܘܒܠܐ ܡܬܛܦܝܣܢܘܬܐ ܕܡܝܬܝܐ ܡܘܬܐ ܡܡܪܚܝܢ ܚܢܢ ܠܡܩܘܝܘ.

21. Maccabees 4 8:18

    ܢܕܚܠ ܡܢ ܫܢ̈ܕܐ ܓ̇ܒܪܐ ܐܚ̈ܐ. ܘܢܣܩ ܥܠ ܒܠܢ ܠܘܚܡ̈ܝܗܘܢ. ܘܢ̇ܥܪܘܩ ܡܢ ܪܚܡܬ ܬܫܒܘܚܬܐ ܗܕܐ̇ ܘܡܢ ܫܒܗܪܢܘܬܐ ܕܛܥܝܢܐ ܡܘܬܐ.

22. Maccabees 4 8:19

    ܢܚܘܣ ܥܠ ܩܘ̈ܡܬܢ. ܘܬܟ̇ܪܐ ܠܢ ܥܠ ܣܝܒܘܬܗ̇ ܕܐܡܢ.

23. Maccabees 4 8:20

    ܘܢܬܪܥܐ ܕܐܠܐ ܢܬܛܦܝܣ̣. ܡ̇ܝܬܝܢܢ.

24. Maccabees 4 8:21

    ܠܐ ܕܝܢ ܪܓ̇ܙ ܥܠܝܢ ܐܦܠܐ ܕܝܢ̣ܐ ܐܠܗܝܐ̇. ܕܡܛܠ ܩܛܝܪܐ ܕܚ̇ܠܢܢ ܡܢ ܡ̇ܠܟܐ.

25. Maccabees 4 8:22

    ܡܢܐ ܡܦܩܝܢܢ ܢܦܫܢ ܡܢ ܚ̈ܝܐ ܗܠܝܢ ܗܢ̈ܝܐ̇. ܘܡܢ ܥܠܡܐ ܗܢܐ ܚܠܝܐ ܓ̇ܠܙܝܢܢ ܠܗ̇.

26. Maccabees 4 8:23

    ܠܐ ܢܕܒܪܗ̇ ܒܩܛܝܪܐ ܠܐܢܢܩܐ. ܘܠܐ ܢܗܘܐ ܪ̈ܚ̇ܡܝ ܫܘܒܚܐ ܡܛܠ ܫܢ̈ܕܐ.

27. Maccabees 4 8:24

    ܐܦܠܐ ܗ̣ܘ ܢܡܘܣܐ ܡܡܝܬ ܠܢ ܟܕ ܠܐ ܨܒ̇ܝܢܢ.

28. Maccabees 4 8:25

    ܡܢ ܐܝܡܟܐ ܗܢܐ ܟܠܗ ܚܪܝܢܐ ܩܒܝܥ ܒܢ. ܘܚܘܡܣܢܐ ܕܫܘܦܪܢܘܬܐ ܕܡܝܬܝܐ ܡܘܬܐ. ܟܕ ܦܫܝܩ ܠܢ ܕܕܠܐ ܫܓܘܫܝܐ ܢܬܛܦܝܣ ܠܡ̇ܠܟܐ ܘܢܚܐ.

29. Maccabees 4 8:26

    ܐܠܐ ܘܠܐ ܚܕ̇ܐ ܡܢ ܗ̣ܠܝܢ ܐܡ̣ܪܘ ܥ̈ܠܝܡܐ̇. ܟܕ ܥܬܝܕܝܢ ܗܘܘ ܠܡܥܠ ܠܐܘ̈ܠܨܢܐ. ܘܠܐ ܐܣܩܘ ܥܠ ܒܠܗܘܢ.

30. Maccabees 4 8:27

    ܐܝܬܝܗܘܢ ܗܘܘ ܓܝܪ ܡܒܣܪܝ ܥܠ ܚܫ̈ܐ ܘܙ̈ܟܝܝ ܠܟܐ̈ܒܐ.

31. Maccabees 4 8:28

    ܗܟܢܐ ܕܥܡܗ ܕܫܠܝ ܛܪܘܢܐ ܡܢ ܕܡܠ̣ܟ ܠܗܘܢ ܕܢܐܟܠܘܢ ܕܡܣܝܒ̣. ܟܠܗܘܢ ܐܝܟ ܕܡܢ ܚܕ ܩܠܐ ܘܐܝܟ ܕܡܢ ܚܕܐ ܢܦܫܐ ܫܘܝܐܝܬ ܐܡ̣ܪܘ.

32. Maccabees 4 9:1

    ܡܢܐ ܡܫܬܘܚܪ ܐܢܬ ܐܘ ܛܪܘܢܐ. ܥܬܝܕܝܢ ܚܢܢ ܗܘ ܓܝܪ ܠܡܡܬ̣ ܐܘ ܕܢܥܒܪ ܦܘܩܕܢܐ ܕܐܒ̈ܗܝܢ.

33. Maccabees 4 9:2

    ܒܗ̇ܬܝܢܢ ܓܝܪ ܡܢܗܘܢ ܙܕܩ̇ܐܝܬ̇. ܐܢܗ̣ܘ ܕܠܐ ܒܡܬܛܦܝܣܢܘܬܗ ܕܢܡܘܣܐ. ܘܒܡܘܫܐ ܐܝܟ ܕܒܡܠܘܟܐ ܢܬܚܫܚ.

34. Maccabees 4 9:3

    ܐܘ ܛܪܘܢܐ ܡ̇ܠܘܟܐ ܕܥܒܪ ܢܡܘܣܐ. ܠܐ ܟܕ ܣ̇ܢܐ ܐܢܬ ܠܢ ܚܠܦ ܢܦܫܟ ܬܚܘܣ ܥܠܝܢ.

35. Maccabees 4 9:4

    ܣܝܡ̣ܐ ܗܝ ܠܢ ܓܝܪ ܕܡܢ ܡܘܬܐ ܩܫܝܐ ܗܝ ܡܪܚܡܢܘܬܟ ܕܥܠ ܐ̈ܦܝ ܚ̇ܝܐ ܕܠܒܪ ܡܢ ܢܡܘܣܐ ܗ̈ܘܝܐ ܠܘܬܢ.

36. Maccabees 4 9:5

    ܡܣܪܕ ܐܢܬ ܠܢ ܕܝܢ ܟܕ ܡܬܠܚܡ ܐܢܬ̣ ܥܠܝܢ ܡܘܬܐ ܕܒܝܕ ܫ̈ܢܕܐ. ܐܝܟ ܗ̇ܘ ܕܠܘ ܡܢ ܩܕܡ ܩܠܝܠ ܡܢ ܐܠܝܥܙܪ ܐܝܠܦ̣ܬ̇. ܕܡܚܝܠ ܗܘ ܚܝܠܐ ܕܫ̈ܢܕܝܟ.

37. Maccabees 4 9:6

    ܐܢ ܕܝܢ ܣܒܐ ܡܢ ܒ̈ܢܝ ܓܒܪ̈ܝܐ ܡܛܠ ܫ̣ܪܪܐ ܐܦ ܐܘ̈ܠܨܢܐ ܣܝܒܪ ܘܡ̣ܝܬ̣. ܠܐ ܕܝܢ ܝܬܝܪܐܝܬ ܙܕ̇ܩ ܠܢ ܕܛܠ̣ܝܢ ܚܢܢ ܠܡܣܝ̇ܒܪܘ. ܟܕ ܡܒܣܪܝܢܢ ܥܠ ܫܢ̈ܕܝܟ ܩܫ̈ܝܐ. ܗ̇ܢܘܢ ܕܐܦ ܡܠܦܢܢ ܣܒܐ ܙܟ̣ܐ.

38. Maccabees 4 9:7

    ܢܣܐ ܗܟܝܠ ܐܘ ܛܪܘܢܐ ܢܦ̈ܫܬܢ. ܐܢ ܗܘ ܓܝܪ ܕܬܡܝܬ ܠܢ ܡܛܠ ܫܪܪܐ̣. ܠܐ ܬܣܒܪ ܕܙܟ̇ܐ ܐܢܬ ܠܢ ܒܝܕ ܫܢ̈ܕܝܟ.

39. Maccabees 4 9:8

    ܚܢܢ ܓܝܪ ܒܝܕ ܗܠܝܢ ܐܘܠܨ̈ܢܐ ܘܒܝܕ ܗܕܐ ܡܣܝܒܪܢܘܬܐ ܟ̈ܠܝ̈ܠܐ ܕܢܨܝܚܘܬܢ ܫܩ̇ܠܝܢ ܚܢܢ̇.

40. Maccabees 4 9:9

    ܐܢܬ ܕܝܢ ܡܛܠ ܕܡܬܛܦܠ ܐܢܬ ܒܩܛܠܢ̣. ܣܒ̇ܠ ܐܢܬ ܡܢ ܕܝܢ̣ܐ ܕܐܠܗܐ ܬܫܝܩܐ ܕܠܥܠܡ.

41. Maccabees 4 9:10

    ܟܕ ܕܝܢ ܐܡ̣ܪܘ ܗܠܝ̣ܢ. ܠܐ ܒܠܚܘܕ ܐܝܟ ܕܠܘܩܒܠ ܗܠܝܢ ܕܠܐ ܡܛܦܝܣܝܢ ܐܬܚܡܬ ܛܪܘܢܐ̣. ܐܠܐ ܐܦ ܐܝܟ ܕܠܘܩܒܠ ܚܪ̈ܝܝܐ.

42. Maccabees 4 9:11

    ܘܥܠ ܗܕܐ ܠܩܫܝܫܗܘܢ ܐܬܦܩܕܘ ܦ̇ܠܚ̈ܐ ܠܡܝܬܝܘ ܠܡܨܥܬܐ. ܘܣܕܩܘܗ̇ ܠܟܘܬܝܢܗ. ܘܐܣܪܘ ܐܝܕ̈ܘܗܝ ܘܕܪ̈ܥܘܗܝ̣. ܒܥܪܩܐ ܡܢ ܬܪ̈ܝܗܘܢ ܓܒ̈ܐ.

43. Maccabees 4 9:12

    ܟܕ ܕܝܢ ܠܐܝܘ ܡܢ ܕܡܢܓܕܝܢ ܗܘܘ ܠܗ ܘܡܕܡ ܠܐ ܣ̇ܥܪܝܢ. ܐܪܡܝܘܗܝ ܥܠ ܓܝܓܠܐ.

44. Maccabees 4 9:13

    ܘܒܡܬܚܐ ܕܥܠܝܗ̇ ܥܠܝܡܐ ܢܨܝܚܐ ܡܢ ܫܪ̈ܝܬܗ ܡܬܦܪܩ ܗܘܐ.

45. Maccabees 4 9:14

    ܘܟܕ ܟܠܗܘܢ ܗܕܡ̈ܘܗܝ ܡܬܒܪܝܢ ܗܘܘ̣. ܡܨܚܐ ܗܘܐ ܘܐܡ̇ܪ.

46. Maccabees 4 9:15

    ܐܘ ܛܪܘܢܐ ܛܡܐ ܘܒܥܠܕܒܒܐ ܕܕܝ̣ܢܐ ܫܡ̇ܝܢܐ. ܘܚܪܡܐ ܒܪܥܝܢܗ. ܠܐ ܗܘܐ ܕܩܛ̇ܠܬ ܐܢܫ ܒܐܣܟܡܐ ܗ̇ܢܐ ܡܫܬܢܕ ܐܢܬ ܒܝ. ܘܠܐ ܗܘܐ ܕܒܐܠܗܐ ܐܪܫ̇ܥܬ. ܐܠܐ ܕܡܥܙܐ ܐܢܐ ܡܛܠ ܢܡܘܣܐ ܐܠܗܝܐ.

47. Maccabees 4 9:16

    ܟܕ ܕܝܢ ܐܡ̇ܪܝܢ ܗܘܘ ܠܗ ܦܠܚ̈ܐ ܕܐܘܕܐ ܕܐܟ̇ܠ ܐܢܬ ܕܬܓܗܐ ܡܢ ܫܢ̈ܕܐ̣.

48. Maccabees 4 9:17

    ܐܡ̣ܪ. ܠܐ ܗܟܢܐ ܚܣܝܢܐ ܓܝܓܠܟܘܢ ܐܘ ܡܫܡ̈ܫܢܐ ܛܡ̈ܐܐ ܕܠܪܥܝܢܝ ܬܟܒܘܫ. ܦܣܩܘ ܗܕ̈ܡܝ ܘܐܘܩܕܘ ܒܢܘܪܐ ܒܣܪܝ.

49. Maccabees 4 9:18

    ܘܫܪ̈ܝܬܝ ܦܫ̇ܚ̣ܘ. ܒܝܕ ܓܝܪ ܟܠ ܫ̈ܢܕܝܢ ܐܦܝܣܟ̣ܘܢ. ܕܒܠܚܘܕ ܒܢ̈ܝ ܥܒܪ̈ܝܐ ܒܬܟܬܘܫܐ ܕܚܠܦ ܡܝܬܪܘܬܐ ܐܝܬܝܗܘܢ ܠܐ ܡܙܕ̈ܟܝܢܐ.

50. Maccabees 4 9:19

    ܟܕ ܕܝܢ ܐ̇ܡ̣ܪ ܗܠܝ̣ܢ. ܢܘܪܐ ܬܚܘܬܘܗܝ ܡ̇ܟܘ. ܘܓܝ̈ܓܠܐ ܐܝܟ ܕܒܥܨܝܢܐ ܥܠܘܗܝ ܒܐܘܡܢܘܬܐ ܐܩܫܝܘ.

51. Maccabees 4 9:20

    ܡܬܦܠܦܠܐ ܗܘܬ ܕܝܢ ܓܝܓܠܐ ܡܢ ܟܘܠ ܓܒ̈ܝܢ. ܘܟܪܝܐ ܕܓܘܡܪܐ ܕܬܚܘܬܘܗܝ ܡܢ ܢܘ̈ܛܦܬܐ ܕܕܡܗ ܡܬܕܥܟ ܗܘܐ. ܘܟܕ ܥܠ ܣ̈ܪܢܘܗܝ ܕܡܐܢܐ ܗܢܐ ܒܣܪܗ ܫ̇ܐ̣ܚ ܗܘܐ:

52. Maccabees 4 9:21

    ܘܓܪ̈ܡܘܗܝ ܡܬܦܪܩܝܢ ܗܘܘ. ܠܐ ܒܓܢ ܥܠܝܡܐ ܠܒܝܒܐ ܒܪܗ ܕܐܒܪܗܡ.

53. Maccabees 4 9:22

    ܐܠܐ ܐܝܟ ܗ̇ܘ ܕܒܓܘ ܢܘܪܐ ܡܫܬܚܠܦ ܗܘܐ ܠܠܐ ܡܬܚܒܠܢܘܬܐ. ܡܣܝܒܪ ܗܘܐ ܚܠܝܨܐܝܬ ܫܢ̈ܕܐ ܟܕ ܐܡ̇ܪ.

54. Maccabees 4 9:23

    ܐܬܕܡܘ ܒܝ ܐܚ̈ܝ. ܘܡܢ ܬܓܡܐ ܗܢܐ ܕܝܠܝ̣ ܠܥܠܡ ܠܐ ܬܫܢܘܢ. ܘܠܐ ܬܟܦܪܘܢ ܒܐܚܘܬܐ ܕܠܒܝܒܘܬܐ ܕܢܦܫܝ. ܦܠܚܘܬܐ ܙܗܝܬܐ ܘܢܨܝܚܬܐ ܦܠܘܚܘ ܥܠ ܐ̈ܦܝ ܫܪܪܐ.

55. Maccabees 4 9:24

    ܕܒܐܝܕܗ̇ ܒܛܝܠܘܬܐ ܟܐܢܬܐ ܕܐܠܗܐ ܕܡܢ ܝܘܡ̈ܝ ܐܒܗ̈ܝܢ ܬ̇ܬܪܥܐ ܠܥܡܢ. ܘܬܣܝܡ ܒܪܫܗ ܕܛܪܘܢܐ ܗܢܐ ܕܐܝܬܘܗܝ ܕܝܘܐ ܡܚܒܠܢܐ.

56. Maccabees 4 9:25

    ܘܟܕ ܐܡ̣ܪ ܗܠܝܢ ܛܠܝܐ ܙܗܝܐ ܢܦܫܗ ܫܠܡܬ܀

57. Maccabees 4 9:26

    ܟܕ ܕܝܢ ܟܠܢܫ ܬܗ̇ܪ ܗܘܐ ܒܡܚܡܣܢܢܘܬܐ ܕܢܦܫܗ. ܢܓ̣ܕܘ ܦܠܚ̈ܐ ܠܗ̇ܘ ܕܛܠ̣ܐ ܗܘܐ ܒܩܘܡܬܗ ܕܐܝܬܘܗܝ ܡܢ ܒܬܪ ܗ̇ܘ ܩܕܡܝܐ. ܘܐܠܒܫܘ ܠܐܝ̈ܕܝܗܘܢ ܐܝ̈ܕܝܐ ܕܦܪܙܠܐ. ܘܒܛܦܪ̈ܝܗܘܢ ܚܪ̈ܝܦܬܐ ܟܕ ܬܠ̣ܐ ܓܙܡܝܢ ܗܘܘ ܕܢܣܪܩܘܢܝܗܝ.

58. Maccabees 4 9:27

    ܟܕ ܕܝܢ ܫܐܠܘܗܝ ܕܐܢ ܗ̣ܘ ܕܨ̇ܒܐ ܕܢܐܟܘܠ ܥܕ ܠܐ ܢ̇ܩܒܠ ܫܢ̈ܕܐ: ܘܫܡ̣ܥܘ ܡܢܗ ܡܠܬܐ ܠܒܝܒܬܐ̣.

59. Maccabees 4 9:28

    ܐܝ̈ܕܝܐ ܕܦܪܙܠܐ̣ ܐܩܬܘ ܒܣܬܪ ܩܕܠܗ. ܘܢܓܕܘܗܝ ܠܒܣܪܐ ܟܘܠܗ̣ ܥܕܡܐ ܠܕܩܢܗ. ܘܠܡܫܟܐ ܕܪܫܗ ܗܘ̣ ܗܟܢܐ ܢܫ̣ܛܘ ܗ̇ܢܘܢ ܚܝ̈ܘܬܐ ܢܡܪ̈ܝܬܐ. ܗ̣ܘ ܕܝܢ ܟܕ ܚܫܐ ܗܢܐ ܝܩܝܪܐܝܬ ܡܣܝܒܪ ܗܘܐ ܐܡ̇ܪ ܗܘܐ.

60. Maccabees 4 9:29

    ܡܐ ܗܢܝ ܟܠ ܐܣܟܝܡ ܕܡܘܬܐ ܡܛܠ ܗܝܡܢܘܬܐ ܕܐܒ̈ܗܝܢ. ܐܡ̇ܪ ܗܘܐ ܕܝܢ ܐܦ ܠܛܪܘܢܐ.

61. Maccabees 4 9:30

    ܠܐ ܣ̣ܝܡܐ ܠܟ ܐܘ ܛܪܘܢܐ ܕܡܢ ܟܘܠ ܛܪܘܢܝܢ ܚ̣ܪܡ ܐܢܬ. ܕܛܒ ܡܢ ܕܝܠܝ ܐܢܬ ܐܝܬܝܟ ܒܐܘܠܨܢܐ. ܕܚܐ̇ܪ ܐܢܬ ܕܚܘܫܒܐ ܕܫܘܥܠܝܐ ܕܪܡܘܬܟ̇. ܡܢ ܡܣܝܒܪܢܘܬܐ ܕܥܠ ܐ̈ܦܝ ܫܪܪܐ ܐܙܕܟܝ.

62. Maccabees 4 9:31

    ܐܢܐ ܓܝܪ ܒܝܕ ܪܓܝܓܘܬܐ ܕܥܠ ܐ̈ܦܝ ܢܨܝܚܘܬܐ ܚܫ̈ܝ ܥܠܝ ܩ̇ܠܝܢ.

63. Maccabees 4 9:32

    ܐܢܬ ܕܝܢ ܒܠܘܚ̈ܡܐ ܕܫܘ̈ܢܩܐ̇. ܕܟܦܘܪܘܬܟ ܠܗܘܢ ܢܛܝܪܐ ܡܬܢܓܕ ܐܢܬ. ܠܐ ܕܝܢ ܡܫܬܘܙܒ ܐܢܬ ܐܘ ܛܪܘܢܐ ܛܡܐܐ̇. ܡܢ ܕܝܢ̣ܐ ܟܐܢܐ ܕܐܠܗܐ܀

64. Maccabees 4 10:1

    ܟܕ ܕܝܢ ܐܦ ܗܢܐ ܡܘܬܐ ܕܫ̣ܘܐ ܕܒܟܠܙܒܢ ܢܬܬܢܐ ܣܝ̇ܒ̣ܪ. ܠܗ̇ܘ ܕܬܠܬܐ ܐܝܬܝܘ. ܟܕ ܒܥ̇ܝܢ ܡܢܗ ܣܓܝܐ̈ܐ̣ ܕܢܐܟܘܠ ܘܢܚܐ.

65. Maccabees 4 10:2

    ܗ̣ܘ ܕܝܢ ܒܩܠܐ ܪܡ̇ܐ ܐܡ̣ܪ. ܠܐ ܝܕܥܝܬܘܢ ܕܗ̇ܘ ܐܒܐ ܕܠܗܠܝܢ ܕܡܝܬܘ ܙܪ̣ܥ: ܗ̣ܘ ܐܦ ܠܝ ܙܪ̣ܥ̣. ܘܗ̣ܝ ܟܕ ܗ̣ܝ ܐܡܐ ܐܦ ܠܝ ܝܠܕܬ. ܘܒܗ ܟܕ ܒܗ ܒܝܘܠܦܢܐ ܐܬ̇ܪܒܝܬ.

66. Maccabees 4 10:3

    ܠܐ ܟ̇ܦܪ ܐܢܐ ܒܫܪܪܗܘܢ ܫܒܝܚܐ ܕܐܚ̈ܝ.

67. Maccabees 4 10:5

    ܡܪܝܪܐܝܬ ܕܝܢ ܠܦܪܗܣܝܐ ܕܝܠܗ ܩܒ̇ܠܘ. ܘܒܡܐ̈ܢܐ ܡܦܪ̈ܩܝ ܫܪ̈ܝܬܐ̣ ܐܝܕ̈ܘܗܝ ܘܪ̈ܓܠܘܗܝ ܦܫ̇ܚܘ ܘܦܪܩܘ.

68. Maccabees 4 10:6

    ܘܥܨ̇ܝܢ ܗܘܘ ܘܡܦܣܩܝܢ ܨܒ̈ܥܬܗ. ܘܕܪ̈ܥܘܗܝ ܘܩܦܣ̈ܐ ܕܒܘܪ̈ܟܘܗܝ ܘܝܨ̈ܝܠܘܗܝ ܡܬܒܪܝܢ ܗܘܘ.

69. Maccabees 4 10:7

    ܘܟܕ ܠܐ ܡܨܝܢ ܗܘܘ ܕܒܚܕ ܡܢ ܐܣܟܝܡ ܢܙܟܘܢܝܗܝ. ܫܪܘ ܡܐ̈ܢܐ ܕܒܗܘܢ ܪܒܝܨ ܘܒܪܫܥܬܗ ܡܝܬܝܢ ܗܘܘ ܠܗ ܥܠ ܓܝܓܠܐ.

70. Maccabees 4 10:8

    ܘܥܠܝܗ̇ ܚܘܡ̈ܪܘܗܝ ܡܬܦܪ̈ܩܢ ܗ̈ܘܝ. ܘܗܕܡ̈ܘܗܝ ܡܫܬܪܝܢ ܗܘܘ. ܘܚ̇ܙܐ ܗܘܐ ܠܒܣܪܗ ܕܡܬܦܩܥ. ܘܢܘ̈ܛܦܬܐ ܕܕܡܐ ܕܡܢ ܓܘܗ ܪܕ̈ܝܢ ܗ̈ܘܝ.

71. Maccabees 4 10:9

    ܟܕ ܕܝܢ ܩܪܝܒ ܗܘܐ ܠܡܡܬ̣. ܐܡ̣ܪ.

72. Maccabees 4 10:10

    ܚܢܢ ܐܘ ܛܪܘܢܐ ܛܡܐܐ ܡܛܘܠ ܝܘܠܦܢܐ ܘܫܪܪܐ ܕܐܠܗܐ ܗܠܝܢ ܣܒ̇ܠܝܢ ܚܢܢ.

73. Maccabees 4 10:11

    ܐܢܬ ܕܝܢ ܡܛܠ ܪܘܫܥܟ ܘܛܡܐܘܬܐ ܕ̈ܩܛܠܝܟ̣. ܫܢ̈ܕܐ ܕܠܐ ܡܫܬܪܝܢ ܥܬܝܕ ܐܢܬ ܠܡܣܝܒܪܘ.

74. Maccabees 4 10:12

    ܟܕ ܕܝܢ ܐܦ ܗܢܐ ܡܝ̣ܬ ܐܝܟ ܕܦܐܐ ܗܘܐ ܠܡܡܬ̇. ܠܐܝ̇ܢܐ ܕܐܝܬܘܗܝ ܐܚܐ ܕܗܠܝܢ ܩܕܡ̈ܝܐ. ܠܗ̇ܘ ܕܐܪܒܥܐ ܢܓܕܘܗܝ ܟܕ ܐܡ̇ܪܝܢ ܠܗ.

75. Maccabees 4 10:13

    ܠܐ ܬܫܢܐ ܐܦ ܐܢܬ ܗ̇ܝ ܫܢܝܘܬܐ ܕܫܢܘ ܒܗ̇ ܐܚ̈ܝܟ.

76. Maccabees 4 10:14

    ܗ̣ܘ ܕܝܢ ܐܡ̣ܪ ܠܗܘܢ. ܠܐ ܗܘܐ ܗܟܢܐ ܐܝܬ ܠܟܘܢ ܢܘܪܐ. ܕܛܒ ܡܢ ܗ̇ܝ ܩܕܡܝܬܐ ܕܐ̈ܚܝ ܚܡܝܡܐ ܕܬܣܪܕܘܢܢܝ̣.

77. Maccabees 4 10:15

    ܠܐ ܡܘܬܗܘܢ ܕܐ̈ܚܝ ܕܡ̣ܠܐ ܛܘ̈ܒܐ. ܘܠܐ ܐܒܕܢܗ ܕܛܪܘܢܐ ܕܠܥܠܡ. ܘܠܐ ܚܝܝ̈ܗܘܢ ܕܫܪ̈ܝܪܐ ܕܠܐ ܫ̇ܠܡܝܢ. ܕܠܐ ܟ̇ܦܪ ܐܢܐ ܒܐܚܘܬܐ ܦܐܝܬܐ ܕܐܚ̈ܝ.

78. Maccabees 4 10:16

    ܒܥܝ ܗܟܝܠ ܒܨܢܥ̈ܬܟ ܐܘ ܛܪܘܢܐ ܫ̈ܢܕܐ ܚ̈ܕܬܐ ܕܐܦ ܒܗܘܢ ܬܐܠܦ̣. ܕܐܚܘܗܘܢ ܐܢܐ ܕܗ̇ܢܘܢ ܕܣ̇ܝܒܪܘ ܫܢ̈ܕܝܟ.

79. Maccabees 4 10:17

    ܟܕ ܕܝܢ ܫܡ̣ܥ ܗܠܝܢ ܗ̇ܘ ܠܐ̇ܥ ܕܡܐ. ܘܨ̣ܗܐ ܠܩܛܠܐ ܘܛܡ̣ܐ ܛܡܐ̈ܐ ܐܢܬܝܟܣ. ܦܩ̣ܕ ܕܠܫܢܗ ܢܦܣܩܘܢ.

80. Maccabees 4 10:18

    ܗ̣ܘ ܕܝܢ ܐܡ̣ܪ. ܕܐܦܢ ܬܦܣܘܩ ܡܐܢܗ ܕܩܠܝ ܐܦ ܕܫܠܝܐ ܫܡ̇ܥ ܗܘ ܐܠܗܐ.

81. Maccabees 4 10:19

    ܗܐ ܡܪܫܠ ܠܟ ܠܫܢܐ ܦܣܘܩܝܗܝ. ܠܐ ܓܝܪ ܡܢ ܗܕܐ ܐܦ ܠܫܢ ܡܚܫ̈ܒܬܢ ܦܣ̇ܩ ܐܢܬ.

82. Maccabees 4 10:20

    ܟܕ ܗܢܝ ܠܢ ܡܛܠ ܐܠܗܐ ܪ̈ܝܫܝ ܗ̈ܕܡܝ ܦܓܪܢ ܠܚܒ̇ܠܐ ܝܗܒ̇ܝܢ ܚܢ̇ܢ.

83. Maccabees 4 10:21

    ܡܢܟ ܕܝܢ ܒܥܓܠ ܐܠܗܐ ܢ̣ܬ̣ܢܩܡ. ܠܠܫܢܐ ܓܝܪ ܕܙܡܝܪ̈ܬܐ ܐܠܗ̈ܝܬܐ ܙܡ̇ܪ ܗܘܐ ܦܣ̇ܩ ܐܢ̇ܬ.

84. Maccabees 4 11:1

    ܟܕ ܕܝܢ ܐܦ ܗܢܐ ܣܒ̣ܠ ܫܢܕܐ ܘܡ̣ܝܬ̣. ܗ̇ܘ ܕܚܡܫܐ ܫܘܪ ܠܡܨܥܬܐ̣. ܘܐܡ̣ܪ.

85. Maccabees 4 11:2

    ܠܐ ܡܬܡܬܢ ܐܢܐ ܐܘ ܛܪܘܢܐ ܠܡܐܬܐ ܠܐܘܠ̈ܨܢܐ ܡܛܠ ܫܪܪܐ.

86. Maccabees 4 11:3

    ܐܢܐ ܕܝܢ ܡܢ ܨܒܘܬ ܢܦܫܝ ܥ̇ܒܪܬ ܠܡܨܥܬܐ. ܕܟܕ ܐ̇ܠܨ ܐܢܬ ܐܦ ܠܝ ܥܠ ܐ̈ܦܝ ܚܛܗ̈ܐ ܣܓܝܐ̈ܐ ܬܣܒ ܡܣܡܒܪܫܐ ܠܕܝ̣ܢܐ ܫܡܝܢܐ.

87. Maccabees 4 11:4

    ܐܘ ܣ̇ܢܐ ܠܡܝܬܪܘܬܐ ܘܣ̇ܢܐ ܠܒ̈ܝ ܐܢܫܐ. ܡܢܐ ܣܥܪܢ ܕܡܛܠܬܗ ܒܗܢܐ ܐܣܟܡܐ ܚ̇ܪܒ ܐܢܬ ܠܢ.

88. Maccabees 4 11:5

    ܡܛܘܠ ܕܠܒܪܘܝܐ ܣܓܕܝܢ ܚܢܢ. ܘܒܢܡܘܣܗ ܫܒܝܚܐ ܡܬܗܦܟܝܢ ܚܢܢ.

89. Maccabees 4 11:6

    ܐܠܐ ܗܕܐ ܠܐܝܩܪܐ ܘܠܐ ܗܘܐ ܠܫܢ̈ܕܐ ܫܘ̇ܝܐ ܗܘܬ.

90. Maccabees 4 11:9

    ܟܕ ܕܝܢ ܡܡܠܠ ܗܘܐ ܗܠܝ̣ܢ. ܐܣܪܘܗܝ ܦܠܚ̈ܐ ܘܠܘܬ ܩܝܣܐ ܐܝܬܝܘܗܝ.

91. Maccabees 4 11:10

    ܘܥܠܘܗܝ ܥܠ ܩܝܣܐ ܗܢܐ ܟܘܠܗ ܡܢ ܩܕܠܗ ܡܬܟܦܦ ܗܘܐ ܒܕܡܘܬ ܥܩܪܒܐ. ܘܡܬܦܪܩܝܢ ܗܘܘ ܗܕܡ̈ܘܗܝ.

92. Maccabees 4 11:11

    ܟܕ ܕܝܢ ܪܘܚܗ ܒܙܢܐ ܗܢܐ ܕ̈ܫܢܕܐ ܡܬܥܠܨܐ ܗܘܬ. ܘܦܓܪܗ ܡܬܥܨܐ ܗܘܐ ܠܡܬܦܫܚܘ ܐܡ̣ܪ.

93. Maccabees 4 11:12

    ܛܝܒ̈ܘܬܐ ܫܦܝܪ̈ܬܐ ܟܕ ܠܐ ܨܒ̇ܐ ܐܢܬ ܝܗ̇ܒ ܐܢܬ ܠܢ ܐܘ ܛܪܘܢܐ: ܕܒܝܕ ܟܐܒ̈ܐ ܩ̈ܫܝܐ ܥ̇ܡܕ ܐܢܬ ܠܢ ܠܡܚܘܝܘ ܚܘܡܣܢܢ ܕܡܛܠ ܢܡܘܣܐ.

94. Maccabees 4 11:13

    ܟܕ ܕܝܢ ܡܝ̣ܬ ܐܦ ܗܢܐ̣. ܠܛܠܝܐ ܗܘ̇ ܕܫܬܐ ܒܬܪܗ ܡܩܪܒܝܢ ܗܘܘ. ܟܕ ܕܝܢ ܡܫܐܠ ܠܗ ܛܪܘܢܐ ܕܐܢ ܗ̣ܘ ܕܢܨܒܐ ܕܢܐܟܘܠ ܘܢܫܬܒܩ̣. ܥ̣ܢܐ ܗ̣ܘ ܘܐܡ̣ܪ ܠܗ.

95. Maccabees 4 11:14

    ܐܢܐ ܒܫܢ̈ܝܐ ܡܢ ܐܚ̈ܝ ܛܠ̣ܐ ܐܢܐ. ܒܪܥܝܢܐ ܕܝܢ ܚܠܝܡܐ̣. ܒܪ ܫܢܝܗ̈ܘܢ ܐܢܐ.

96. Maccabees 4 11:15

    ܘܒܗܝܢ ܟܕ ܒܗܝܢ ܗܟܝܠ ܒܨܒܘ̈ܬܐ ܐܬܝܠܕܢ ܘܒܗܝܢ ܐܬܪܒܝܢ. ܡܛܘܠܬܗܝܢ ܕܝܠܗܝܢ̣. ܐܦ ܕܢܡܘܬ ܙܕ̇ܩ ܠܢ ܫܘܝܐܝܬ.

97. Maccabees 4 11:16

    ܐܢ ܗܟܝܠ ܡܬܚܙܝܐ ܩܕܡܝܟ ܕܬܫܬܢܕ ܒܝ. ܐܢܗ̣ܘ ܕܠܐ ܐܟܘܠ ܕܡܣ̇ܝܒ ܐܫܬܢܕ.

98. Maccabees 4 11:17

    ܟܕ ܕܝܢ ܐܡ̣ܪ ܗܠܝ̣ܢ. ܗܝ̇ܕܝܢ ܐܝܬܝܘܗܝ ܥܠ ܓܝܓܠܐ.

99. Maccabees 4 11:18

    ܘܟܕ ܥܠܝܗ̇ ܡܬܝܚ ܗܘܐ. ܗܕܡ̈ܘܗܝ ܘܚܘܡܪ̈ܘܗܝ ܡܫܬܪ̈ܝܢ ܗ̈ܘܝ. ܡܫܬܓܪܐ ܕܝܢ ܬܚܘܬܘܗܝ ܢܘܪܐ.

100. Maccabees 4 11:19

     ܘܫܦܘ̈ܕܐ ܚܪܝ̈ܦܐ ܡܚܡܝܢ ܗܘܘ. ܘܒܚܨܗ ܡܙܩܬܝܢ ܗܘܘ ܠܗ. ܘܐܠܥ̈ܘܗܝ ܫ̇ܦܕܝܢ ܗܘܘ. ܘܡܐ̈ܢܝ ܓܘܗ ܡܘܩܕܝܢ ܗܘܘ.

← Previous · Next → — showing 201–300 of 479

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.