← All works

Peshitta Maccabees 4

Peshitta (Syriac Old Testament) · 479 sections

1. Maccabees 4 15:27

   ܘܚܠܦ ܒܢ̈ܝܗ̇ ܠܗ̇ܘ ܕܡܚܐ ܫܒܥܐ ܒܢܝ̈ܗ̇ ܒܡ̣ܠܐ ܙܒܢܐ ܠܐ ܓܒܬ.

2. Maccabees 4 15:28

   ܐܠܐ ܒܪܬ ܐܒܪܗܡ ܠܚܘܡܣܢܗ̇ ܕܒܐܠܗܐ ܡܬܕܟܪܐ ܗܘܬ.

3. Maccabees 4 15:29

   ܐܘ ܐܡܐ ܕܥܡܐ. ܘܬܒܥܬ ܨܥܪܗ ܕܢܡܘܣܐ. ܘܡܬܟܬܫܬ ܥܠ ܐ̈ܦܝ ܫܪܪܐ. ܕܡܢ ܐܓܘܢܐ ܕܪ̈ܚܡܝܟܝ ܫܩܠܬܝ ܙܟܘܬܐ.

4. Maccabees 4 15:30

   ܐܘ ܕܡܢ ܕܟܪ̈ܐ ܒܡܚܡܣܢܢܘܬܐ ܓܢܒܪܬܝ.

5. Maccabees 4 15:31

   ܐܟܙܢܐ ܓܝܪ ܕܕܟܘܝܠܗ ܕܢܘܚ ܒܛܘܦܢܐ ܕܠܟܠܗ ܥܠܡܐ ܚ̇ܒܠ. ܒܓܘܗ̇ ܠܒ̣ܪܝܬܐ ܡܢܛܪܐ ܗܘܬ ܘܡܬܪܣܝܐ. ܘܚܝܠܬܢܐܝܬ ܡܡܘܠܐ ܩܒܠܬܝ̣.

6. Maccabees 4 15:32

   ܗܟܢܐ ܐܦ ܐܢܬܝ ܢܛܘܪܬܗ ܕܢܡܘܣܐ ܡܢ ܟܠ ܕܘܟ. ܒܡܡܘܠ ܚ̈ܫܐ ܡܬܢܓܕܐ ܗ̣ܘܝܬܝ. ܘܪ̈ܘܚܐ ܥܙܝ̈ܙܬܐ ܫ̈ܢܕܝܗܘܢ ܕܒ̈ܢܝܟܝ̇ ܡܟܐ ܘܡܟܐ ܒܟܝ ܢܫ̈ܒܢ ܗܘ̈ܝ. ܚܠܝܨܐܝܬ ܣܝܒܪܬܝ ܒܡܚܫ̈ܘܠܐ ܕܥܠ ܐ̈ܦܝ ܫܪܪܐ.

7. Maccabees 4 16:1

   ܐܢܗ̣ܘ ܗܟܝܠ ܕܐܢܬܬܐ ܣܒܬܐ ܘܐܡܐ ܕܫܒܥܐ ܛܠܝ̈ܝܢ ܣܝܒܪܬ. ܟܕ ܚ̇ܙܝܐ ܫܢܕ̈ܐ ܕܒ̈ܢܝܗ̇ ܕܥܕܡܐ ܠܡܘܬܐ̣. ܓܠܝܐ ܗܝ ܕܡܫܠܛ ܗܘ ܥܠ ܚ̈ܫܐ ܪܥܝܢܐ ܕܡ̣ܠܐ ܕܚܠܬ ܐܠܗܐ܀

8. Maccabees 4 16:2

   ܚܘܝܬ ܗܟܝܠ ܕܠܐ ܗܘܐ ܒܠܚܘܕ ܓܒܪ̈ܐ ܙܟܘ ܠܚ̈ܫܐ̣. ܐܠܐ ܐܦ ܐܢܬܬܐ ܐܒܣܪܬ ܥܠ ܫ̈ܢܕܐ ܪ̈ܘܪܒܐ.

9. Maccabees 4 16:3

   ܘܠܐ ܗܟܢܐ ܐܪ̈ܝܘܬܗ ܕܕܢܝܐܝܠ ܒܥܪܝܪܝܢ ܗܘܘ. ܘܠܐ ܐܬܘܢܗ ܕܡܝܫܐܝܠ ܥܙܝܙ ܗܘܐ̇. ܟܕ ܡܫܬܠܗܒ ܗܘܐ ܒܢܘܪܐ ܬܟܝܒܬܐ ܐܝܟ ܕܡܘܩܕ ܗܘܐ ܠܗ̇ܝ ܟܝܢܐ ܕܪܚܡܬܐ ܕܒ̈ܢܝܐ. ܟܕ ܚ̇ܙܝܐ ܗܘܬ ܕܗܟܢܐ ܡܫܚܠܦܐܝܬ ܫܒܥܐ ܒܢ̈ܝܗ̇ ܡܬܩܛܠܝܢ ܗܘܘ.

10. Maccabees 4 16:4

    ܐܠܐ ܒܪܥܝܢܐ ܕܕܚܠܬ ܐܠܗܐ ܕܥܟܬ ܐܡܐ ܗܠܝܢ ܘܕܐܝܟ ܗܠܝܢ ܚ̈ܫܐ.

11. Maccabees 4 16:5

    ܐܬܪܥܘ ܓܝܪ ܐܦ ܗܕܐ. ܕܐܠܘ ܐܢܬܬܐ ܗܘܬ ܕܫܦܠܐ. ܗܘܬ ܒܢܦܫܗ̣. ܝ̇ܬܝܪܐܝܬ ܕܐܦ ܐܡܐ ܐܝܬܝܗ̇ ܗܘܬ. ܡܬܐܒܠܐ ܗܘܬ ܥܠܝܗܘܢ. ܘܕܡ̇ܝܐ ܕܗܠܝܢ ܐܡܪܐ ܗܘܬ.

12. Maccabees 4 16:6

    ܐܘ ܚܠܫܬܐ ܐܢܐ. ܘܕܣܓܝ ܕܘܝܐ ܫܒܥܐ ܒ̈ܢܝܢ ܝ̇ܠܕܬ. ܘܕܚܕ ܡܢܗܘܢ ܐܡܐ ܠܐ ܗܘܝ̇ܬ.

13. Maccabees 4 16:7

    ܐܘ ܒ̈ܛܢܐ ܫܒܥܐ ܕܗܘܘ ܣܪ̈ܝܩܐ. ܘܡܘܠܕܐ ܕܝܪ̈ܚܐ ܥܣܪܐ ܥܣܪܐ ܕܕܠܐ ܝܘܬܪܢ ܘܕܠܐ ܦܐܪ̈ܝܢ ܗܘܘ. ܘܬܪܒܝܬܐ ܕܟܝܬܐ ܕܚ̣ܠܒܐ.

14. Maccabees 4 16:8

    ܣܪܝܩܐܝܬ ܥܠܝܟܘܢ ܐܘ ܛ̈ܠܝܐ ܚܒ̈ܠܐ ܣܓ̈ܝܐܐ ܣ̇ܒܠܬ. ܘܨܦܬܐ ܩܫܝܬܐ ܕܬܪܒܝܬܟܘܢ

15. Maccabees 4 16:9

    ܕܡܢܟܘܢ ܠܐ ܐܙܕܘܓܘ. ܕܐܙܕܘܓܘ ܕܝܢ ܕܠܐ ܝܘܬܪܢ. ܠܐ ܚ̇ܙܝܐ ܐܢܐ ܒܢܝ̈ܟܘܢ. ܘܠܐ ܟܕ ܡܬܩܪܝܐ ܐܢܐ ܐܡܐ ܕܒ̈ܢܝܐ ܝܗ̇ܒܝܢ ܠܝ ܛܘ̣ܒܐ.

16. Maccabees 4 16:10

    ܐܘ ܣܓܝܐܬ ܒܢ̈ܝܐ ܘܫܦܝܪܬ ܒ̈ܢܝܐ. ܐܠܐ ܐܢܬܬܐ ܐܪܡܠܬܐ. ܕܝܠܝ ܒܠܚܘܕܝ ܣܓܝܘ ܐܒ̈ܠܝ.

17. Maccabees 4 16:11

    ܘܐܦ ܠܐ ܐܢ ܐܡܘܬ ܐܝܬ ܠܝ ܕܚܕ ܡܢ ܒܢ̈ܝ ܢܩܒܪܘܢܢܝ. ܐܠܐ ܒܗܠܝܢ ܐܘ̈ܠܝܬܐ̣ ܘܠܐ ܠܚܕ ܡܢܗܘܢ ܐܠܬ: ܐܡܐ ܛܘܒܬܢܝܬܐ ܘܕܚܠܬ ܡܢ ܐܠܗܐ.

18. Maccabees 4 16:12

    ܘܠܐ ܕܕܠܐ ܢܡܘܬܘܢ ܡܥܘܟܐ ܗܘܬ ܠܗܘܢ. ܘܠܐ ܟܕ ܡܝܬܝܢ ܐܬܬܥܝܩܬ.

19. Maccabees 4 16:13

    ܐܠܐ ܐܝܟ ܗ̇ܘ ܪܥܝܢܐ ܕܐܕܡܘܣ ܐܝܬ ܗܘܐ ܠܗ̇. ܘܠܠܐ ܡܝܘܬܘܬܐ ܡܢܕܪܝܫ ܠܡܢܝܢܐ ܕܒ̈ܢܝܗ̇ ܡܚܒܠܐ ܗܘܬ ܠܡܐܠܕ. ܝܬܝܪܐܝܬ ܥܠ ܡܘܬܐ ܕܥܠ ܐ̈ܦܝ ܫܪܪܐ ܡܚܦܛܐ ܗܘܬ ܠܗܘܢ̇. ܟܕ ܒ̇ܥܝܐ ܡܢܗܘܢ ܘܡܬܟܫܦܐ.

20. Maccabees 4 16:14

    ܐܘ ܐܡܐ ܕܡܛܠ ܫܪܪܐ ܒܣܝܒܘܬܐ ܐܦܠܚܬ. ܘܐܢܬܬܐ ܣܒܬܐ ܕܒܝܕ ܚܘܡܣܢܟܝ ܠܛܪܘܢܐ ܙܟ̣ܝܬܝ ܘܒ̇ܥ̈ܒܕܐ ܘܒܡ̈ܠܐ ܐܫܬܟܚܬܝ ܕܡܢ ܓܒܪ̈ܐ ܚܝܠܬܢܝܐ ܐܢܬܝ.

21. Maccabees 4 16:15

    ܐܦ ܓܝܪ ܟܕ ܐܬܬܚܕܬܝ ܥܡ ܒܢܝ̈ܟܝ̣. ܩܝܡܐ ܗ̣ܘܝܬܝ ܘܡܬܒܩܝܐ ܗ̣ܘܝܬܝ ܒܐܠܝܥܙܪ ܟܕ ܡܫܬܢܕܝܢ ܒܗ. ܘܐܡ̇ܪܐ ܗ̣ܘܝܬܝ ܠܒܢܝ̈ܟܝ ܒܠܫܢܐ ܥܒܪܝܐ.

22. Maccabees 4 16:16

    ܐܘ ܒ̈ܢܝܐ̣. ܓܢܒܪ ܗܘ ܐܓܘܢܐ ܕܠܗ ܡܛܠ ܣܗܕܘܬܐ ܕܥܡܢ ܐܬܩܪܝܢ ܕܒܪܥܝܢܐ ܚܦܝܛܐ ܢܬܟܬܫ. ܘܚܠܦ ܢܡܘܣܐ ܕܐܒܗ̈ܝܢ.

23. Maccabees 4 16:17

    ܐܦ ܓܝܪ ܕܚܣܕܐ ܗܝ ܕܣܒܐ ܗܢܐ ܢܣܝܒܪ ܚܫ̈ܐ ܕܡܛܠ ܕܚܠܬ ܐܠܗܐ. ܘܐܢܬܘܢ ܕܥܠܝܡܝܢ ܐܢܬܘܢ ܬܟܘܙܘܢ ܡܢ ܫܪܪܐ.

24. Maccabees 4 16:18

    ܐܬܕܟܪܘ ܕܡܛܠ ܐܠܗܐ ܐܬܝܬܘܢ ܠܒܪܝܬܐ. ܘܗܘܝܬܘܢ ܒܚ̈ܝܐ ܗܠܝܢ.

25. Maccabees 4 16:19

    ܘܥܠ ܗܕܐ ܚܝ̇ܒܝܢ ܐܢܬܘܢ ܕܟܠ ܥܡ̈ܠܝܢ ܬܣܝܒܪܘܢ ܡܛܠ ܐܠܗܐ.

26. Maccabees 4 16:20

    ܕܡܛܠܬܗ ܐܦ ܐܒܪܗܡ ܐܒܘܢ ܐܣܬܪܗܒ. ܕܠܐܒܐ ܕܥܡܢ ܐܝܣܚܩ ܒܪܗ ܢܟܘܣ. ܗ̣ܘ ܓܝܪ ܐܝܣܚܩ ܟܕ ܚ̣ܙܐ ܗܘܐ ܠܐܝܕܐ ܕܐܒܘܗܝ: ܕܐܚܝܕܐ ܣ̇ܟܝܢܐ ܘܢܚ̇ܬܐ ܥܠܘܗܝ̣. ܠܐ ܙܥ.

27. Maccabees 4 16:21

    ܘܕܢܝܐܝܠ ܙܕܝܩܐ ܠܐܪ̈ܝܘܬܐ ܢܦ̣ܠ. ܘܚܢܢܝܐ ܘܥܙܪܝܐ ܘܡܝܫܐܝܠ ܒܓܘ ܐܬܘܢܐ ܐܝܟ ܕܒܩܠܥܐ ܐܫܬܕܝܘ. ܘܣܝܒܪܘ ܡܛܠ ܐܠܗܐ.

28. Maccabees 4 16:22

    ܐܢܬܘܢ ܗܟܝܠ ܕܗܝ ܟܕ ܗ̣ܝ ܗܝܡܢܘܬܐ ܕܗܠܝܢ ܠܘܬ ܐܠܗܐ ܐܝܬ ܠܟܘܢ ܠܐ ܬܬܪܥܡܘܢ.

29. Maccabees 4 16:23

    ܣܟܠܐ ܗܝ ܓܝܪ ܕܟܕ ܝܕ̇ܥܝܢ ܐܢܬܘܢ ܕܚܠܬ ܐܠܗܐ ܡܢܐ ܗܝ̣. ܠܐ ܬܥܙܘܢ ܩܕܡ ܫܢܕ̈ܐ.

30. Maccabees 4 16:24

    ܒܝܕ ܗܠܝܢ ܡ̈ܠܐ ܐܡܗܘܢ ܕܫܒܥܐ. ܡܢ ܟܠ ܚܕ ܚܕ ܡܢ ܒ̈ܢܝܗ̇ ܡܬܟܫܦܐ ܗܘܬ ܕܢܡܘܬܘܢ. ܐܘ ܕܢܥܒܪܘܢ ܥܠ ܦܘܩܕܢܗ ܕܐܠܗܐ.

31. Maccabees 4 16:25

    ܘ̇ܠܐ ܠܟܘܢ ܕܝܢ ܠܡܕܥ. ܕܕܡܝܬܘ ܡܛܠ ܐܠܗܐ̣. ܚܐܝܢ ܐܢܘܢ ܠܐܠܗܐ. ܐܝܟ ܡܐ ܕܐܦ ܐܒܪܗܡ ܘܐܝܣܚܩ ܘܝܥܩܘܒ ܘܟܠܗܘܢ ܐܒܗ̈ܬܐ.

32. Maccabees 4 17:1

    ܐܡ̇ܪܝܢ ܗܘܘ ܕܝܢ ܐܦ ܐܢ̈ܫܝܢ ܡܢ ܦܠ̣ܚ̈ܐ. ܕܟܕ ܥܬܝܕܐ ܗܘܬ ܕܬܬܐܚܕ ܐܦ ܗ̣ܝ ܠܡܘܬܐ. ܕܕܠܐ ܐܢܫ ܢܩܪܘܒ ܠܓܘܫܡܗ̇. ܗ̣ܝ ܡܢ ܨܒܝܢܗ̇ ܢܦܫܗ̇ ܥܠ ܢܘܪܐ ܫܕܬ.

33. Maccabees 4 17:2

    ܐܘ ܐܡܐ ܕܥܡ ܒܢܝ̈ܟܝ ܫܒܥܐ ܩܛܝܪܗ ܕܛܪܘܢܐ ܣܚܦܬܝ ܘܨܢ̈ܥܬܗ ܒܛܠܬܝ. ܘܚܠܝܨܘܬܐ ܕܗܝܡܢܘܬܟܝ ܚܘܝܬܝ.

34. Maccabees 4 17:3

    ܐܟܙܢܐ ܓܝܪ ܕܬܛܠܝܠܐ ܐܝܬܝܟܝ ܗ̣ܘܝܬܝ. ܘܥܠ ܒܢܝ̈ܟܝ ܐܝܟ ܕܥܠ ܥܡ̈ܘܕܐ ܡܫܪܪܐܝܬ ܣܡܝܟܐ ܗ̣ܘܝܬܝ. ܘܕܠܐ ܢܘܪܐ ܣܝܒܪܬܝ ܙܘܥܐ ܕܒܝܕ ܫ̈ܢܕܐ.

35. Maccabees 4 17:4

    ܐܬܬܟܠ ܗܟܝܠ ܡܟܝܠ ܐܘ ܐܡܐ ܙܗܝܬܐ. ܕܣܒܪܐ ܕܚܘܡܣܢܟܝ ܐܫܬܪܪ ܠܟܝ ܠܘܬ ܐܠܗܐ.

36. Maccabees 4 17:5

    ܠܐ ܗܟܢܐ ܣܗܪܐ ܒܫܡܝܐ ܗܕܝܪ̇. ܐܝܟ ܡܐ ܕܐܢܬ ܝܩܝܪܬܝ ܩܕܡ ܐܠܗܐ ܕܠܫܒܥܐ ܒ̈ܢܝܐ ܢܨܝ̈ܚܐ̣. ܐܚ̣ܕܬ ܒܐܝܕܝܗܘܢ. ܘܢܗܪܬ ܐܢܘܢ ܕܢܐܬܘܢ ܠܘܬ ܫܪܪܐ. ܘܐܝܬܝܟܝ ܒܫܡܝܐ ܥܡܗܘܢ.

37. Maccabees 4 17:6

    ܐܝܬܘܗܝ ܗܘܐ ܓܝܪ ܝܠܕܐ ܕܒܢܝܟܝ ܡܢ ܐܒܘܢ ܐܒܪܗܡ.

38. Maccabees 4 17:7

    ܘܐܠܘ ܦܫܝܩ ܗܘܐ ܠܢ ܕܥܠ ܡܕܡ ܬܫܥܝܬܐ ܕܪܚܡܬ ܫܪܪܟܝ ܠܡܨܪ̣. ܐܣܬܪܕܘ ܚܙ̈ܝܐ ܕܚ̇ܙܝܢ ܗܘܘ. ܕܐܡܐ ܕܫܒܥܐ ܒ̈ܢܝܢ ܡܛܠ ܫܪܪܐ ܫܢ̈ܕܐ ܡܫܚ̈ܠܦܐ ܣ̇ܒ̇ܠܐ.

39. Maccabees 4 17:8

    ܐܦ ܓܝܪ ܙܕ̇ܩ ܗܘܐ ܕܒܩܘܠܣܐ ܕܡܘܬܟܝ̇. ܠܡܟܬܒ ܗܠܝܢ ܥܠ ܩܒܪܟܝ. ܕܗ̈ܘܝ ܡܡ̈ܠܠܢ ܘܡ̈ܥܗܕܢ ܠܥܡܐ̇.

40. Maccabees 4 17:9

    ܕܬܢܢ ܟܗܢܐ ܣ̇ܒܐ ܘܐܢܬܬܐ ܣܒܬܐ ܘܫܒܥܐ ܒܢܝ̈ܗ̇ ܫܦܝܪ ܡܥܦܝܢ. ܡܛܠ ܛܪܘܢܐ ܕܨ̇ܒܐ ܗܘܐ ܠܡܣܬܪ ܛܘܟ̈ܣܐ ܕܢܡܘܣܐ ܘܕܘܒܪ̈ܐ ܕܥܒܪ̈ܝܐ.

41. Maccabees 4 17:10

    ܗ̇ܢܘܢ ܬܒܥܘ ܨܥܪܗ ܕܢܡܘܣܐ ܘܕܥܡܐ ܕܚ̇ܪܘ ܒܐܠܗܐ. ܘܥܕܡܐ ܠܡܘܬܐ ܫܢ̈ܕܐ ܣܝ̇ܒܪܘ.

42. Maccabees 4 17:11

    ܫܪܝܪܐܝܬ ܓܝܪ ܐܓܘܢܐ ܕܒܐܝ̈ܕܝܗܘܢ ܗ̣ܘܐ̣. ܐܓܘܢܐ ܗܘܐ ܕܡܛܠ ܐܠܗܐ.

43. Maccabees 4 17:12

    ܡܝܬܪܘܬܐ ܓܝܪ ܣ̇ܡܬܗ ܗܘܐ ܠܐܓܘܢܐ ܗ̇ܝܕܝܟ. ܟܕ ܒܝܕ ܡܣܝܒܪܢܘܬܐ ܒܚ̇ܪܐ ܗܘܬ ܠܗ̇ ܠܙܟܘܬܐ. ܘܝܗ̇ܒܐ ܗܘܬ ܠܐ ܡܬܚܒܠܢܘܬܐ ܒܚ̈ܝܐ ܕܠܐ ܡܝܬܝܢ.

44. Maccabees 4 17:13

    ܐܠܝܥܙܪ ܕܝܢ ܠܘܩܕܡ ܠܐܓܘܢܐ ܢܚ̣ܬ ܗܘܐ. ܘܫܒܥܐ ܛ̈ܠܝܝܢ ܘܐܡܗܘܢ. ܒܬܪ ܟܢ ܡܬܟܬܫܝܢ ܗܘܘ.

45. Maccabees 4 17:14

    ܘܛܪܘܢܐ ܒܥܠܕܪܐ ܐܝܬܘܗܝ ܗܘܐ. ܘܥܠܡܐ ܕܝܢ ܐܝܬܘܗܝ ܗܘܐ ܚܙܝܐ.

46. Maccabees 4 17:15

    ܕܚܠܬ ܐܠܗܐ ܕܝܢ ܙܟ̇ܝܐ ܗܘܬ. ܟܕ ܡܟܠܠܐ ܠܐܬ̈ܠܝܛܝܗ̇.

47. Maccabees 4 17:16

    ܡ̣ܢܘ ܗ̇ܘ ܕܠܐ ܬܗ̣ܪ ܒܐ̈ܬܠܝܛܐ ܕܡܝܬܪܘܬܐ ܐܠܗܝܬܐ. ܐܘ ܡܢܘ ܕܠܐ ܐܬܕܡܪ.

48. Maccabees 4 17:17

    ܗ̣ܘ ܛܪܘܢܐ ܩܢܘܡܗ ܘܟܘܠܗܘܢ ܒܢ̈ܝ ܡܠܟܗ ܬܗܪܘ ܗܘܘ ܒܡܚܡܣܢܢܘܬܗܘܢ.

49. Maccabees 4 17:18

    ܕܡܛܠܬܗ ܥܠ ܓܒ ܟܘܪܣܝܐ ܐܠܗܝܐ ܩܝ̇ܡܝܢ. ܘܒܐܬܪܐ ܕܡܠ̣ܐ ܢܝ̈ܚܐ ܘܛܘ̈ܒܐ ܡܕܝܪܝܢ.

50. Maccabees 4 17:19

    ܐܦ ܓܝܪ ܡܘܫܐ ܐܡ̣ܪ. ܕܟܠܗܘܢ ܩܕܝ̈ܫܐ ܬܚܝܬ ܐܝ̈ܕܝܗܘܢ ܐܝܬܝܗܘܢ.

51. Maccabees 4 17:20

    ܘܗ̇ܢܘܢ ܗܟܝܠ ܐܬܩܕܫܘ ܘܡܛܠ ܐܠܗܐ ܐܬܝ̇ܩܪܘ. ܘܠܐ ܗܘܐ ܒܠܚܘܕ ܒܗܢܐ ܐܝܩܪܐ. ܐܠܐ ܐܦ ܕܡܛܠܬܗܘܢ ܥܡܢ ܠܒܥ̈ܠܕܒܒܘܗܝ ܙܟ̣ܐ.

52. Maccabees 4 17:21

    ܘܛܪܘܢܐ ܡܣܡ ܒܪܫܐ ܩ̇ܒܠ. ܘܐܬܪܢ ܐܬܕܟܝ.

53. Maccabees 4 17:22

    ܐܝܟ ܗ̇ܘ ܓܝܪ ܕܕܡܗܘܢ ܕܛܘܒ̈ܢܐ ܗܠܝܢ ܚܠܦ ܚܛܗ̈ܘܗܝ ܕܥܡܐ ܐܬܐܫܕ. ܘܡܘܬܗܘܢ ܐܝܬܘܗܝ ܗܘܐ ܬܪܥܘܬܐ ܒܛܝܠܘܬܐ ܕܐܠܗܐ ܠܐܝܣܪܐܝܠ ܕܡܡܚܝ ܗܘܐ ܦܪܩܬ.

54. Maccabees 4 17:23

    ܛܪܘܢܐ ܓܝܪ ܐܢܛܝܟܘܣ ܕܚܕ ܒܓܢܒܪܘܬܐ ܕܡܝܬܪܘܬܗܘܢ ܘܒܡܚܡܣܢܢܘܬܗܘܢ ܕܒܐ̈ܘܠܨܢܐ ܐܟܪܙ ܠܦܠܚ̈ܘܗܝ ܕܒܡܣܝܒܪܘܬܐ ܕܗܠܝܢ ܢܗܘܘܢ ܡܬܕܡܝܢ. ܘܓܪܓ ܐܢܘܢ ܕܡܢ ܕܡܘܬܐ ܗܕܐ.

55. Maccabees 4 17:24

    ܕܢܗܘܘܢ ܢܚܫܝܪ̈ܬܢܐ ܘܠܒܝ̈ܒܐ ܒܪܓܠܘܬܐ ܘܒܦܪܫܘܬܐ ܕܗܘܘ ܚ̇ܣܢܝܢ ܠܡ̈ܕܝܢܬܐ ܒܚܒ̈ܫܐ. ܘܒܕܓܘܢ ܙܟ̣ܐ ܘܚ̣ܪܒ ܠܟܠܗܘܢ ܒܥܠܕܒ̈ܒܘܗܝ.

56. Maccabees 4 18:1

    ܐܘ ܒܢ̈ܝܐ ܕܡܢ ܙܪܥܐ ܕܚܨܗ ܕܐܒܪܗܡ. ܐܢܬܘܢ ܕܝܢ ܒܢ̈ܝ ܐܝܣܪܐܝܠ ܐܬܛܦܝܣܘ ܠܢܡܘܣܐ ܗܢܐ. ܘܒܟܠ ܐܣܟܝܡ ܝܩܪܘܢܝܗܝ.

57. Maccabees 4 18:2

    ܐܝܟ ܐܢܫܐ ܕܡܦܣܝܢ ܕܡܫܠܛ ܥܠ ܚ̈ܫܐ ܐܝܬܘܗܝ ܪܥܝܢܐ ܕ̇ܫܠܡ ܠܕܚܠܬ ܐܠܗܐ. ܘܠܐ ܗܘܐ ܒܠܚܘܕ ܠܚ̈ܫܐ ܕܡܢ ܠܓܘ. ܐܠܐ ܐܦ ܥܠ ܟܐܒ̈ܐ ܕܡܢ ܠܒܪ ܡܡܠܟ.

58. Maccabees 4 18:3

    ܗ̇ܢܘܢ ܓܝܪ ܢܨܝܚ̈ܐ ܥܠ ܕܡܛܠ ܫܪܪܐ ܝܗ̣ܒܘ ܓܘܫ̈ܡܝܗܘܢ ܠܐܘ̈ܠܨܢܐ. ܠܐ ܗܘܐ ܒܠܚܘܕ ܒ̈ܢܝ ܐܢܫܐ ܒܗܘܢ ܬܗ̇ܪܘ. ܐܠܐ ܐܦ ܠܡܢ̇ܬܐ ܐܠܗܝܬܐ ܐܫܬܘܝܘ.

59. Maccabees 4 18:4

    ܘܡܛܠܗܘܢ ܒܫܝܢܐ ܝܬ̣ܒ ܥܡܢ. ܘܚܕܬ ܒܐܬܪܗ ܛܘ̈ܟܣܝ ܢܡܘ̈ܣܘܗܝ. ܘܠܒܥܠܕ̈ܒܒܘܗܝ ܙܟ̣ܐ.

60. Maccabees 4 18:5

    ܛܪܘܢܐ ܕܝܢ ܐܢܛܝܟܘܣ ܐܦ ܗܪܟܐ ܥܠ ܐܪܥܐ ܡܣܡ ܒܪܫܐ ܩܒ̇ܠ. ܘܕܡܝܬ ܐܝܬܘܗܝ ܒܫܘܢܩܐ. ܟܕ ܓܝܪ ܠܐ ܐܫܟܚ ܕܒܡܕܡ ܢܥܨܐ ܠܒ̈ܢܝ ܐܘܪܫܠܡ. ܕܒܡܕܡ ܐܚܪܝܢ ܢܣܥܪܘܢ. ܟܕ ܡܫܢܝܢ ܡܢ ܥܝܕܐ ܕܐܒ̈ܗܝܗܘܢ.

61. Maccabees 4 18:6

    ܗ̇ܝܕܝܢ ܐܫܩܠ ܡܢ ܒ̈ܢܝ ܐܘܪܫܠܡ. ܘܥܠ ܦܪ̈ܣܝܐ ܒܚܝܠܗ ܐܙ̣ܠ. ܐܡ̇ܪܐ ܗܘܬ ܕܝܢ ܐܡܐ ܙܕܩ̈ܐ ܗܠܝܢ ܠܒܢ̈ܝܗ̇.

62. Maccabees 4 18:7

    ܕܐܢܐ ܗܘܝܬ ܒܬܘܠܬܐ ܕܟܝܬܐ. ܘܡܢ ܒܝܬ ܐܒܝ ܠܐ ܢܦܩ̇ܬ. ܐܠܐ ܢ̇ܛܪܐ ܗ̇ܘܝܬ ܒܬܘܠܘܬܝ ܡܢ ܟܠ ܢܟܝ̈ܢܝܢ.

63. Maccabees 4 18:8

    ܘܡܚܒܠܢܐ ܐܝܟ ܕܒܡܕܒܪܐ ܒܡܕܝܢܬܐ ܠܝ ܠܐ ܩܪܒ. ܘܠܐ ܢܟܗ̇ ܠܒܬܘܠܘܬܝ ܫܕܠܐ ܢܟ̇ܘܝܐ ܕܚܙܬܐ. ܗ̇ܘܝܬ ܕܝܢ ܒܙܒܢܐ ܕܥܠܝܡܘܬܝ ܥܡ ܓܒܪܐ.

64. Maccabees 4 18:9

    ܘܡܢ ܕܗ̣ܘܝܬܘܢ ܐܢܬܘܢ ܡܢܗ: ܘܐܬ̣ܝܬܘܢ ܠܩܘܡܬܐ ܡܝܬ ܐܒܘܟܘܢ. ܠܗ̇ܘ ܕܝܢ ܛܘܒ. ܓܒܪܐ ܓܝܪ ܕܒܥ̇ܐ ܗܘܐ ܚܝ̈ܐ ܕܒܗܘܢ ܒ̈ܢܝܐ ܣ̈ܓܝܐܐ ܢܗܘܘܢ ܠܗ. ܥܠ ܡܓܙܝܘܬܐ ܕܡܢ ܒܢܘ̈ܗܝ ܠܐ ܐܬܬܢܚ.

65. Maccabees 4 18:10

    ܗ̇ܘ ܕܡܠܦ ܗܘܐ ܠܟܘܢ ܟܕ ܥܕܟܝܠ ܥܡܟܘܢ ܗܘܐ ܢܡܘܣܐ ܘܢܒ̈ܝܐ.

66. Maccabees 4 18:11

    ܘܡܠܦ ܗܘܐ ܠܟܘܢ ܥܠ ܗܒܝܠ ܕܡܢ ܩܐܝܢ ܐܬܩܛܠ. ܘܩ̇ܪܐ ܗܘܐ ܩܕܡܝܟܘܢ ܠܝܩܕܐ ܕܫܠܡܐ ܠܐܝܣܚܩ. ܘܠܝܘܣܦ ܕܒܒܝܬ ܐܣܝܪ̈ܐ.

67. Maccabees 4 18:12

    ܘܐܡ̇ܪ. ܗܘܐ ܠܟܘܢ ܥܠ ܦܝܢܚܣ ܛ̇ܢܢܐ. ܘܡܫܬܥܐ ܗܘܐ ܠܟܘܢ ܥܠ ܚܢܢܝܐ ܘܥܙܪܝܐ ܘܡܝܫܐܝܠ ܕܒܢܘܪܐ.

68. Maccabees 4 18:13

    ܡܩܠܣ ܗܘܐ ܕܝܢ ܐܦ ܠܕܢܝܐܝܠ ܕܒܓܘܒܐ ܕܐܪ̈ܝܘܬܐ.

69. Maccabees 4 18:14

    ܘܡܥܗܕ ܗܘܐ ܠܟܘܢ: ܥܠ ܟܬܒܗ ܕܐܫܥܝܐ ܗ̇ܘ ܕܐܡ̇ܪ ܕܐܦ ܒܢܘܪܐ ܬܥܒܪ ܫܠܗܒܝܬܐ ܠܐ ܬܘܩܕܟ.

70. Maccabees 4 18:15

    ܙܡ̇ܪ ܗܘܐ ܩܕܡܝܟܘܢ ܠܕ̣ܘܝܕ ܡܟܬܒܢܐ ܕܙܡܝܪ̈ܬܐ ܟܕ ܐܡ̇ܪ. ܕܣܓ̈ܝܐܢ ܒܝ̣ܫ̈ܬܗ ܕܙܕܝܩܐ.

71. Maccabees 4 18:16

    ܘܡܢ ܫܠܝܡܘܢ ܡܬܠܐ ܐܡ̇ܪ ܗܘܐ ܠܟܘܢ. ܕܐܝܠܢܐ ܗܘ ܕܚ̈ܝܐ ܠܥ̇ܒ̈ܕܝ ܨܒܝܢܗ.

72. Maccabees 4 18:17

    ܘܡܠܬ ܚܙܩܝܐܝܠ ܡܫܪܪ ܗܘܐ ܗ̇ܘ ܕܐܡ̇ܪ. ܕܚܐ̇ܝܢ. ܓܪ̈ܡܐ ܗܠܝܢ ܝܒܝ̈ܫܐ.

73. Maccabees 4 18:18

    ܬܫܒܘܚܬܐ ܕܝܢ ܗ̇ܝ ܕܡܠܦ ܗܘܐ ܡܘܫܐ ܠܐ ܛܥ̣ܐ. ܟܕ ܡ̇ܠܦ ܗܘܐ ܠܟܘܢ ܗ̇ܝ ܕܐܡ̇ܪܐ. ܐܢܐ ܡܡܝܬ ܐܢܐ ܘܐܢܐ ܡܚܐ ܐܢܐ.

74. Maccabees 4 18:19

    ܗܠܝܢ ܐܢܘܢ ܚܝ̈ܝܢ ܘܢܘܓܪܐ ܕܝܘ̈ܡܬܢ.

75. Maccabees 4 18:20

    ܐܘ ܠܝܘܡܐ ܗ̇ܘ ܡܪܝܪܐ ܘܠܐ ܡܪܝܪܐ. ܟܕ ܡ̇ܠܟܐ ܕܝ̈ܘܢܝܐ ܢܘܪܐ ܒܢܘܪܐ ܕܥ̇ܟ. ܟܕ ܡܝܬܐ ܠܗܘܢ ܠܛܘܒ̈ܢܐ ܥܠ ܩܕܣ̈ܐ ܕܩܫܝܐܝܬ ܫܓܝܪܝܢ. ܘܒܟܒܕܐ ܚܡܝܡܬܐ ܒܫ̈ܦܘܕܐ ܘܒܫܢ̈ܕܐ. ܗܠܝܢ ܕܥܠ ܫܒܥܐ ܒܢ̈ܝܗ̇ ܕܒܪܬ ܐܒܪܗܡ ܥܬܕ ܗܘܐ.

76. Maccabees 4 18:21

    ܘܒ̈ܒܬܐ ܕܥ̈ܝܢܐ ܚܨ̇ܐ ܗܘܐ. ܘܠܫ̈ܢܐ ܦܣ̇ܩ ܗܘܐ. ܘܒܫ̈ܢܕܐ ܡܪܝ̈ܪܐ ܩ̇ܛܠ ܗܘܐ.

77. Maccabees 4 18:22

    ܕܡܛܠ ܗܠܝܢ ܕܝܢ̣ܐ ܐܠܗܝܐ ܫܢܩܗ. ܘܥܬܝܕ ܬܘܒ ܕܢܫܢܩܝܘܗܝ ܠܛܪܘܢܐ ܕܗ̣ܘܐ ܐܝܟ ܕܝܘܐ ܚܒ̇ܠܐ.

78. Maccabees 4 18:23

    ܒܢܘ̈ܗܝ ܕܝܢ ܕܐܒܪܗܡ ܥܡ ܐܡܗܘܢ ܛܥܝܢܬ ܙܟܘܬܐ ܡܕܝܪܝܢ ܒܕܟܝܘܬܐ ܕܢܦܫܐ. ܘܒܠܐ ܡܝܘܬܘܬܐ ܕܡܢ ܐܠܗܐ ܢܣ̣ܒܘ.

79. Maccabees 4 18:24

    ܕܠܗ ܫܘܒܚܐ ܘܐܝܩܪܐ ܗܫܐ ܘܠܥܠܡ ܥܠܡܝܢ ܐܡܝܢ. ܫ̣ܠܡ ܡܐܡܪܐ ܕܥܠ ܡܩ̈ܒܝܐ ܘܐܡܗܘܢ.

← Previous — showing 401–479 of 479

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.