← All works

Peshitta Maccabees 4

Peshitta (Syriac Old Testament) · 479 sections

1. Maccabees 4 4:20

   ܐܝܟ ܕܠܐ ܗܘܐ ܒܪܫܐ ܕܟܘܠܗ ܐܬܪܢ ܓܘܡܢܣܝܢ ܐܬܩܢ. ܐܠܐ ܐܦ ܢܒ̇ܛܠ ܐܟܝܦܘܬܐ ܕܥܠ ܗܝܟܠܐ.

2. Maccabees 4 4:21

   ܥܠ ܗܠܝܢ ܕܝܢ ܐܬܥܙܙ ܕܝܢ̣ܐ ܕܐܠܗܐ. ܘܠܗ ܠܐܢܛܝܟܘܣ ܥܠܝܗܘܢ ܓ̇ܪܓ.

3. Maccabees 4 4:22

   ܡܛܠ ܓܝܪ ܕܡܩܪܒ ܗܘܐ ܒܐܓܘܦܛܘܣ ܥܡ ܦܛܠܡܐܘܣ. ܘܫܡ̣ܥ ܕܛܒ̣ܐ ܐ̣ܙܠ ܕܡ̣ܝܬ ܠܗ. ܘܒܗܕܐ ܚܕܘܬܐ ܪܒܬܐ ܗܘܬ. ܠܥܡܘܪ̈ܝܗ̇ ܕܐܘܪܫܠ̣ܡ. ܒܥܓܠ ܡܪ̈ܟܒܬܗ ܥܬܕ ܥܠܝܗܘܢ.

4. Maccabees 4 4:23

   ܘܡܢ ܕܒܙ ܐܢܘܢ ܦܣܩܐ ܦܣܩ. ܕܐܢ ܗ̣ܘ ܕܐܢܫ ܡܢܗܘܢ ܡܬܚܙܐ ܕܒܢܡܘ̈ܣܐ ܕܐܒܗ̈ܘܗܝ ܢܬܕܒܪ ܢܡܘܬ.

5. Maccabees 4 4:24

   ܘܟܕ ܠܐ ܐܫܟܚ ܕܒܚܕ ܡܢ ܐܣ̈ܟܡܝܢ ܒܦܣܩ̈ܘܗܝ ܠܡܣܬܪ ܢܡܘ̈ܣܘܗܝ ܕܥܡܐ. ܟܠܗܘܢ ܕܝܢ ܠܘܚ̈ܡܘܗܝ ܘܫܢ̈ܕܘܗܝ ܚ̇ܙܐ ܗܘܐ ܕܡܫܬܪܝܢ.

6. Maccabees 4 4:25

   ܐܝܟ ܕܐܦ ܢ̈ܫܐ ܕܓܙܪ̈ܢ ܗ̈ܘܝ ܝܠܘ̈ܕܐ. ܥܡ ܫܒܪ̈ܝܗܝܢ ܡܢ ܕܘܟܝܬܐ ܪ̈ܡܬܐ ܡܫܬܕܝܢ. ܟܕ ܡܢ ܩܕܝܡ ܝܕ̈ܥܢ ܗ̈ܘܝ. ܕܗܟܢܐ ܓ̇ܕ̣ܫ ܗܘܐ ܠܗܝܢ.

7. Maccabees 4 4:26

   ܗ̣ܘ ܒܝܕ ܫ̈ܢܕܐ ܠܟܠܢܫ ܡܢ ܥܡܐ ܥ̇ܨܐ ܗܘܐ. ܕܟܕ ܐܟ̇ܠܝܢ ܗܘܘ ܡܐܟܘܠܬܐ ܡܣܝܒܬܐ ܢܟܦܪܘܢ ܒܝܗܘܕܝܘܬܐ܀܀

8. Maccabees 4 5:1

   ܟܕ ܝ̣ܬܒ ܗܟܝܠ ܛܪܘܢܐ ܐܢܛܝܟܘܣ ܥܡ ܪ̈ܘܪܒܢܘܗܝ ܒܕܘܟܬܐ ܪܡܬܐ. ܘܟܕ ܚܝܠܘ̈ܬܗ ܚܕܝܪܝܢ ܗܘܘ ܠܗ ܡܟܐ ܘܡܟܐ. ܟܕ ܙܝܢܗܘܢ ܠܒܝ̣ܫܝܢ ܗܘܘ. ܦܩ̣ܕ ܠܐܚ̈ܝܕܝ ܪ̈ܘܡܚܐ. ܕܠܟܠ ܚܕ ܚܕ ܡܢ ܥܒܪ̈ܝܐ ܢܝܬܘܢ. ܘܢܥܨܘܢ ܕܒܣܪܐ ܕܚܙܝܪܐ ܘܕܕܒܝܚܐ ܢܐܟܠܘܢ.

9. Maccabees 4 5:3

   ܐܢ ܕܝܢ ܐܢ̈ܫܝܢ ܠܐ ܢܨܒܘܢ ܠܡܐܟܠ ܡܐܟܘܠܬܐ ܛܡܐܬܐ̣. ܗ̣ܢܘܢ ܒܡܣܡ ܒܪܝܫܐ ܕܪ̈ܓܝܓܬܐ ܢܡܘܬܘܢ.

10. Maccabees 4 5:4

    ܟܕ ܕܝܢ ܣܓܝܐ̈ܐ ܗܟܢܐ ܡܬܚܛܦܝܢ ܗܘܘ̣. ܚܕ ܩܕܡܝܬ ܡܢ ܓܙܪܐ ܥܒܪܝܐ ܕܫܡܗ ܗܘܐ ܐܠܝܥܙܪ. ܡܢ ܓܢܣܐ ܕܟܗ̈ܢܐ. ܣܦܪ ܢܡܘܣܐ ܕܩܫܝܫ ܗܘܐ ܒܝܘܡ̈ܬܗ. ܘܡܛܠ ܣܝܒܘܬܗ ܐܦ ܠܣ̈ܓܝܐ̇ܐ ܡܢ ܩܪ̈ܝܒܘܗܝ ܕܛܪܘܢܐ ܝܕܝܥ ܗܘܐ. ܠܗ ܠܗܢܐ ܗܟܝܠ ܐܝܬܝܘܗܝ ܩܕܡܘܗܝ ܕܛܪܘܢܐ.

11. Maccabees 4 5:5

    ܟܕ ܕܝܢ ܚܙܝܗܝ ܛܪܘܢܐ ܐܢܛܝܟܘܣ ܐܡ̣ܪ.

12. Maccabees 4 5:6

    ܐܘ ܣܒܐ. ܥܕ ܠܐ ܐܫ̇ܪܐ ܒܫܢ̈ܕܐ ܕܥܠܝܟ̣ ܡ̇ܠܟ ܐܢܐ ܠܟ ܗܠܝܢ. ܕܬܐܟܘܠ ܕܚܙܝܪܐ ܘܬܚܐ. ܡܬܟܚܕ ܐܢܐ ܓܝܪ ܡܢ ܫ̈ܢܝܟ ܘܡܢ ܚܘܪ̈ܬܟ ܗܠܝܢ. ܡܢ ܒܬܪ ܓܝܪ ܗܢܐ ܟܘܠܗ ܙܒܢܐ. ܠܐ ܡܬܚܙܐ ܐܢܬ ܠܝ ܕܚܟܝܡܐܝܬ ܣܥܪ ܐܢܬ. ܕܒܕܚܠܬܐ ܕܝܗܘܕ̈ܝܐ ܡܬܕܒܪ ܐܢܬ.

13. Maccabees 4 5:7

    ܥܠ ܡܢܐ ܓܝܪ ܟܕ ܟܝܢܐ ܝܗ̣ܒ ܡܐܟܘܠܬܐ ܡܝܬܪܬܐ ܕܒܣܪܐ ܕܚܝܘܬ̣ܐ̣ ܗܕܐ̇. ܐܢܬ ܢܐ̇ܕ ܐܢܬ ܡܢܗ̇ ܘܡܣܠܐ ܐܢܬ ܠܗ̇.

14. Maccabees 4 5:8

    ܐܦ ܓܝܪ ܣܟܠܐ ܗܝ ܕܠܐ ܐܢܫ ܢܬܒܣܡ ܒܗܢܝ̈ܝܬܐ ܕܚܣܕܐ ܠܝܬ ܒܗܝܢ. ܘܪܘܫܥܐ ܗܘ ܕܐܢܫ ܢܗܦܟ ܡܕܡ ܕܟܝܢܐ ܡܩܪܒ ܘܝܗ̇ܒ.

15. Maccabees 4 5:9

    ܐܢܬ ܕܝܢ ܐܦ ܕܣܟܠܐ ܡܢ ܗܕܐ ܡܬܚܙܐ ܐܢܬ: ܐܢܗ̣ܘ ܕܟܕ ܡܬܚܫܚ ܐܢܬ ܒܪܚܡܬ ܫܘܒܚܐ ܕܡܛܠ ܫܪܪܐ

16. Maccabees 4 5:10

    ܐܦ ܥܠܝ ܬܒܣܪ. ܘܠܡܣܡ ܒܪܫܐ ܬܫܘܛ. ܠܐ ܡܬܬܥܝܪ ܐܢܬ: ܡܢ ܫܛܘܪܘܬܗ ܕܝܘܠܦܢܐ ܗܢܐ:

17. Maccabees 4 5:11

    ܘܢ̇ܦܨ ܐܢܬ ܡܢܟ ܚܘܫܒܐ ܗܢܐ ܦܟܝܗܐ: ܘܢܣ̇ܒ ܐܢܬ ܡܚܫܒܬܐ ܕܫ̇ܘܝܐ ܠܫܢ̈ܝܟ ܘܠܣܝܒܘܬܟ: ܘܝ̇ܠܦ ܐܢܬ ܫܪܪܐ ܕܗܠܝܢ ܕܦܩ̈ܚܢ:

18. Maccabees 4 5:12

    ܘܣܓ̇ܕ ܐܢܬ ܠܢܝܚܐ ܕܡܪܚܡܢܘܬܝ: ܘܚܐ̇ܣ ܐܢܬ ܥܠ ܣܝܒܘܬܟ:

19. Maccabees 4 5:13

    ܐܦ ܓܝܪ ܡܬܒܥܐ ܠܟ ܕܬܬܚܫܒ: ܕܐܦܢ ܐܝܬ ܡܕܡ ܕܥܠ ܕܚܠܬܟܘܢ ܒܛܝܠ ܠܗ̣. ܫܒ̇ܩ ܗܘ ܠܟ ܟܠ ܥܒܪ ܢܡ̈ܘܣܝܢ ܕܡܢ ܩܛܝܪ ܣܥ̇ܪ ܐܢܬ.

20. Maccabees 4 5:14

    ܟܕ ܕܝܢ ܒܗܢܐ ܐܣܟܡܐ ܡܓܪܓ ܗܘܐ ܠܗ ܛܪܘܢܐ: ܕܢܐܟܘܠ ܒܣܪܐ ܕܒܢܡܘܣܐ ܠܐ ܡܦܣ ܗܘܐ̣. ܫܐ̣ܠ ܐܠܝܥܙܪ ܕܢܦܣ ܠܗ ܠܡܡܠܠܘ.

21. Maccabees 4 5:15

    ܟܕ ܕܝܢ ܢܣܒ ܫܘܠܛܢܐ ܕܢܡܠܠ. ܫ̇ܪܝ ܕܢܐܡܪ ܩܕܡ ܟܘܠܗ ܟܢܫܐ̣ ܗܟܢܐ.

22. Maccabees 4 5:16

    ܚܢܢ ܐܘ ܐܢܛܝܟܐ̣. ܒܕܡܦܣܝܢ ܚܢܢ ܕܢܡܘܣܐܝܬ ܢܬܕܒܪ̣. ܐܦ ܠܐ ܚܕ ܡܢ ܩܛܝܪܝܢ ܕܡܢ ܗܢܐ ܩܫ̣ܝ̇ܢ ܡܢ ܡܬܛܦܝܣܢܘܬܐ ܕܠܢܡܘܣܐ.

23. Maccabees 4 5:17

    ܘܡܛܠ ܗܕܐ̣ ܘܠܐ ܒܚܕ ܡܢ ܐܣܟܝܡ ܕܢܥܒܪܝܗ̇ ܡܬܪܡܝܢ ܚܢܢ.

24. Maccabees 4 5:18

    ܘܗܐ ܐܦܢ ܠܐ ܐܝܬܘܗܝ ܗܘܐ ܫܪܝܪܐܝܬ ܐܠܗܝܐ ܢܡܘܣܢ̇. ܐܝܟ ܡܐ ܕܐܢܬ ܫܪܝܪܐܝܬ ܣ̇ܒܪ ܐܢܬ. ܣܒ̇ܪܝܢ ܗ̈ܘܝܢ ܕܝܢ ܐܦ ܗܟܢܐ ܕܐܝܬܘܗܝ ܐܠܗܐ. ܐܦ ܠܐ ܗܟܢܐ ܡܦܣ ܗܘܐ ܠܢ ܕܠܡܣܒܪܢܘܬܐ ܕܕܚܠܬ ܐܠܗܐ ܢܒ̇ܛܠ.

25. Maccabees 4 5:19

    ܠܐ ܗܟܝܠ ܬܣܒܪ ܕܚܛܗܐ ܗܘ ܙܥܘܪܐ ܐܢܗ̣ܘ ܕܡܐܟܘܠܬܐ ܡܣܝܒܬܐ ܢܐܟܘܠ.

26. Maccabees 4 5:20

    ܒܙܥܘܪ̈ܝܬܐ ܓܝܪ ܐܘ ܒܪ̈ܘܪܒܬܐ ܕܐܢܫ ܢܥܒܪ ܥܠ ܢܡܘܣܐ ܚܕ ܚܝܠܐ ܩܢ̣ܝܐ.

27. Maccabees 4 5:21

    ܒܝܕ ܬܪܬܝܗܝܢ ܓܝܪ ܫܘܝܐܝܬ ܫܘܥܠܝܐ ܥܠ ܢܡ̣ܘܣܐ ܗ̇ܘܐ.

28. Maccabees 4 5:22

    ܡܒܙܚ ܐܢܬ ܕܝܢ ܒܝܘܠܦܢܢ. ܐܝܟ ܗ̇ܘ ܕܠܘ ܒܪܥܝܢܐ ܬܩܢܐ ܒܗ ܡܬܕܒܪܝܢܢ.

29. Maccabees 4 5:23

    ܟܢܝܟܘܬܐ ܡܠܦ ܕܠܟܘܠܗܝܢ ܪ̈ܓܝܓܬܐ ܘܚܫ̈ܐ ܢܙܟ̣ܐ ܘܢܬܕܪܫ ܒܓܢܒܪܘܬܐ. ܕܒܨܒܝܢܢ ܟܘܠ ܐܘ̈ܠܨܢܝܢ ܢܣܝ̇ܒܪ.

30. Maccabees 4 5:24

    ܡܠܦ ܕܝܢ ܙܕܝܩܘܬܐ ܗ̇ܝ ܕܒܟܝܢܢ. ܕܒܟܠܗܘܢ ܙܢ̇ܝܢ ܗ̇ܘܝܢ ܫܠܡ̇ܝܢ ܚܢܢ ܠܢܡܘܣܐ. ܡܠܦ ܕܝܢ ܐܦ ܕܚܠܬ ܐܠܗܐ ܫܪܝܪܐܝܬ. ܕܠܗ̇ܘ ܕܗ̣ܘܝܘ ܒܠܚܘܕܘܗܝ ܐܠܗܐ ܢܣܓܘܕ ܙܗܝܐܝܬ.

31. Maccabees 4 5:25

    ܘܥܠ ܗܕܐ ܡܕܡ ܕܡܣܝܒ ܠܐ ܐ̇ܟܠܝܢ ܚܢܢ. ܡܛܠ ܓܝܪ ܕܡܗܝܡܢܝܢܢ ܕܢܡܘܣܐ ܕܐܠܗܐ ܗܘ. ܡܦܣܝܢܢ ܕܐܝܟ ܡܚܝܠܘܬܗ ܕ̣ܟܝܢܢ ܡܬܢܚܬ ܘܡܦܩܕ ܥܒܘܕܗ ܕܥܠܡܐ.

32. Maccabees 4 5:26

    ܗܠܝܢ ܗܟܝܠ ܕܠܐ ܐܝܬܝܗܝܢ ܣܩܘܒܠܐ ܠܢܦܫ̈ܬܢ ܐܦܣ ܠܢ ܠܡܐܟܠ. ܡܢ ܗܠܝܢ ܕܝܢ ܕܐܝܬܝܗܝܢ ܣܩܘܒܠܐ ܟ̇ܠܐ ܠܢ ܕܡܢ ܒܣܪܗܝܢ ܠܐ ܢܐܟܘܠ.

33. Maccabees 4 5:27

    ܕܫܘܥܠܝܐ ܗܟܝܠ ܐܝܬܝܗ̇. ܠܐ ܗܘܐ ܒܠܚܘܕ ܕܬܥܨܐ ܠܢ ܠܡܥܒܪ ܥܠ ܢܡܘܣܐ̣. ܐܠܐ ܐܦ ܕܢܐܟܘܠ. ܕܒܝܕ ܡܐܟܘܠܬܐ ܗܕܐ ܕܡܢ ܟܠܗܝܢ ܡܣܝܒܐ ܥܠܝܢ ܬܓܚܟ.

34. Maccabees 4 5:28

    ܐܠܐ ܠܐ ܓܚ̇ܟ ܐܢܬ ܥܠܝ.

35. Maccabees 4 5:29

    ܠܐ ܩܝܡܗܘܢ ܚܣܝܐ ܘܡܘܡ̈ܬܗܘܢ ܗܝ̣ ܕܐܒ̈ܗܝ̇ܢ ܠܡܛܪ ܢܡܘܣܐ ܝܡܘ.

36. Maccabees 4 5:30

    ܐܦ ܠܐ ܐܢ ܥ̈ܝܢܝ ܬܥܨܐ ܘܬܦܫܪ ܒܡܐ̈ܢܝ ܓܘܝ.

37. Maccabees 4 5:31

    ܠܐ ܗܘܐ ܗܟܢܐ ܣܐܒ ܐܢܐ̇. ܘܡܢ ܓܢܒܪܘܬܐ ܡܢܟܪܝ ܐܢܐ̇. ܕܡܛܘܠ ܕܚܠܬ ܐܠܗܐ ܠܐ ܐܟܪܘܒ ܘܐܥܠܡ ܚܘܫ̈ܒܝ.

38. Maccabees 4 5:32

    ܥܠ ܐ̈ܦܝ ܗܠܝܢ ܗܟܝܠ ܓܝ̈ܓܠܐ ܥܬܕ. ܘܢܘܪܐ ܥܙܝܙܐܝܬ ܓܘܙܠ.

39. Maccabees 4 5:33

    ܠܐ ܗܘܐ ܗܟܢܐ ܚܐ̇ܣ ܐܢܐ ܥܠ ܣܝܒܘܬܝ̇. ܕܡܛܠ ܢܦܫܝ ܢܡܘܣܐ ܕܐܒ̈ܗܝ ܐܫܪܐ.

40. Maccabees 4 5:34

    ܠܐ ܡܕܓܠ ܐܢܐ ܒܟ ܢܡܘܣܐ ܪܕܘܝ. ܘܠܐ ܟ̇ܦܪ ܐܢܐ ܒܟܝ ܐܘ ܢܟܦܘܬܐ ܚܒܝܒܬܝ.

41. Maccabees 4 5:35

    ܘܠܐ ܡܒܗܬ ܐܢܐ ܠܟ ܡܐܡܪܐ ܕܡܠܦ ܫܒܝܚܘܬܐ. ܘܠܐ ܟܦ̇ܪ ܐܢܐ ܒܟܝ ܟܗܢܘܬܐ ܝܩܝܪܬܐ ܘܝܘܠܦܢܐ ܢܡܘܣܝܐ.

42. Maccabees 4 5:36

    ܘܠܐ ܡܣܝܒܐ ܣܝܒܘܬܝ ܣܦܘ̈ܬܝ. ܘܠܐ ܡܛܡܐ ܐܢܐ ܫ̈ܢܝ̇. ܕܒܗܝܢ ܢܡܘܣܐܝܬ ܩ̇ܫܬ.

43. Maccabees 4 5:37

    ܟܕ ܕܟ̣ܐ ܐܢܐ ܐܒܗ̈ܝ ܡܩܒܠܝܢ ܠܝ̣. ܕܠܐ ܐܣܬܪܕܬ ܡܢ ܩܛܝܪ̈ܝܟ ܕܥܕܡܐ ܠܡܘܬܐ ܡܡܛܝܢ.

44. Maccabees 4 5:38

    ܒܕܡܪܫܥ ܐܢܬ ܕܝܢ ܡܬܚܫܚ ܐܢܬ ܒܩܛܝܪܐ. ܥܠ ܚܘܫ̈ܒܝ ܕܝܢ ܕܥܠ ܐ̈ܦܝ ܕܚܠܬ ܐܠܗܐ̣. ܠܐ ܒܐܝ̈ܕܝܟ ܡܫܬܠܛ ܐܢܬ ܘܠܐ ܒܝܕ ܥܒ̈ܕܐ.

45. Maccabees 4 6:1

    ܟܕ ܕܝܢ ܗܟܢܐ ܠܘܩܒܠ ܦܝܣܗ ܕܛܪܘܢܐ ܐܝܟ ܪܗܛܪܐ ܡܠܠ. ܩ̣ܪܒܘ ܠܘܬܗ ܐܚ̈ܝܕܝ ܪ̈ܘܡܚܐ. ܘܡܪܝܪܐܝܬ ܠܘܬ ܫܢ̈ܕܐ ܓܪܘܗܝ ܠܐܠܝܥܙܪ.

46. Maccabees 4 6:2

    ܘܠܘܩܕܡ ܐܫܠܚܘܗܝ ܠܣܒܐ ܕܡܟܢܟ ܗܘܐ ܒܐܣܟܡܐ ܕܕܚܠܬ ܐܠܗܐ.

47. Maccabees 4 6:3

    ܒܬܪ ܟܢ ܕܝܢ ܐܗܦܟܘ ܐܝܕ̈ܘܗܝ ܠܒܣܬܪܗ. ܘܒܫܘܛܐ ܡܢܓܕܝܢ ܗܘܘ ܠܗ.

48. Maccabees 4 6:4

    ܟܕ ܚܕ ܡܢ ܦܠܚ̈ܘܗܝ ܕܛܪܘܢܐ ܕܐܛܦܝܣ ܠܦܘܩ̣̈ܕܢܘܗܝ ܕܡ̇ܠܟܐ. ܒܩܠܐ ܪܡ̇ܐ ܩ̇ܥܐ ܗܘܐ ܠܗ.

49. Maccabees 4 6:5

    ܠܒܝܒܐ ܕܝܢ ܘܓܢܒܪܐ ܫܪܝܪܐܝܬ ܐܠܝܥܙܪ ܐܝܟ ܗ̇ܘ ܕܒܚܠܡܐ ܡܬܢܓܕ ܗܘܐ. ܐܦ ܠܐ ܒܚܕ ܡܢ ܐܣܟܝܡ ܡܢ ܪܥܝܢܗ ܡܫܬܚܠܦ ܗܘܐ.

50. Maccabees 4 6:6

    ܐܠܐ ܟܕ ܥܝܢ̈ܘܗܝ ܠܪܘܡܐ ܡ̇ܬܚ ܗܘܐ. ܒܝܕ ܢܓ̈ܕܐ ܒܣܪܗ ܕܣܒܐ ܐܬܒܣܒܣ ܗܘܐ. ܘܕܡܗ ܥܠܘܗܝ ܪܕ̇ܐ ܗܘܐ. ܟܕ ܒܐܠܥ̈ܘܗܝ ܡܙܩܬܝܢ ܗܘܘ ܠܗ.

51. Maccabees 4 6:7

    ܢܦ̣ܠ ܗܘܐ ܕܝܢ ܥܠ ܐܪܥܐ. ܡܛܠ ܕܠܐ ܡ̇ܣܝܒܪ ܗܘܐ ܓܘܫܡܗ ܟܐܒܐ. ܚܘܫܒܗ ܕܝܢ ܬܪܝܨ ܗܘܐ. ܘܠܐ ܡܨܛܠܐ ܗܘܐ ܠܟܐ ܘܠܟܐ.

52. Maccabees 4 6:8

    ܚܕ ܕܝܢ ܡܢ ܗ̇ܢܘܢ ܡܪܝܪ̈ܐ ܕܡܫܬܢܕܝܢ ܗܘܘ ܒܗ. ܟܕ ܟܪܣܗ ܡܒܥܛ ܗܘܐ ܠܗ. ܟܕ ܡ̇ܚܐ ܠܗ ܕܢܩܘܡ ܡܐ ܕܢܦ̣ܠ.

53. Maccabees 4 6:9

    ܡܣܝܒܪ ܗܘܐ ܕܝܢ ܟܐ̈ܒܐ ܘܡܒܣܪ ܥܠ ܩܛܝܪ̈ܐ. ܘܡܣܝܒܪ ܗܘܐ ܫܢ̈ܕܐ ܘܫܐ̇ܛ ܠܛܪܘܢܐ.

54. Maccabees 4 6:10

    ܘܐܝܟ ܐܬܠܝܛܐ ܚܠܝܨܐ ܟܕ ܒ̇ܠܥ ܗܘܐ ܙܟܐ ܗܘܐ ܣܒܐ ܠܗ̇ܢܘܢ ܕܡܫܬܢܕܝܢ ܗܘܘ ܒܗ.

55. Maccabees 4 6:11

    ܟܕ ܕܝܢ ܕ̈ܥܝܬܢ ܗ̈ܘܝ ܐ̈ܦܘܗܝ ܘܡܠܗܬ ܗܘܐ ܬܟܝܒܐܝܬ̣. ܬܗܝܪܝܢ ܗܘܘ ܒܓܢܒܪܘܬܐ ܕܢܦܫܗ.

56. Maccabees 4 6:12

    ܐܦ ܗ̣ܢܘܢ ܗܠܝܢ ܕܡܫܬܢܕܝܢ ܗܘܘ ܒܗ. ܘܥܠ ܗܕܐ ܐܝܬ ܐܡܬܝ ܕܡܛܠ ܕܚܝܣܝܢ ܗܘܘ ܥܠ ܣܢܒܘܬܗ .

57. Maccabees 4 6:13

    ܘܐܝܬ ܐܡܬܝ ܕܡܛܠ ܕܚ̇ܫܝܢ ܗܘܘ ܥܠܘܗܝ. ܘܐܝܬ ܐܡܬܝ ܕܡܛܠ ܕܬܗܝܪܝܢ ܗܘܘ ܒܚܘܡܣܢܗ. ܩ̇ܪܒܝܢ ܗܘܘ ܐܢ̈ܫܝܢ ܡܢ ܩܪ̈ܝܒܘܗܝ ܕܡ̇ܠܟܐ ܘܐ̇ܡܪܝܢ ܠܗ.

58. Maccabees 4 6:14

    ܒܒ̣̈ܝܫܬܐ ܗܠܝܢ ܕܠܐ ܒܘܝܢ ܢܦܫܟ ܡܘܒܕ ܐܢܬ ܐܠܝܥܙܪ..

59. Maccabees 4 6:15

    ܚܢܢ ܡܢ ܛܥܘ̣̈ܡܐ ܕܡܒܫܠܝܢ ܣܝ̇ܡܝܢܢ ܩܕܡܝܟ. ܘܐܢܬ ܥ̣ܒܕ ܢܦܫܟ. ܐܝܟ ܗ̇ܘ ܕܡܢ ܒܣܪܐ ܕܚܙܝܪܐ ܐ̇ܟܠ ܐܢܬ ܘܚܝܝ.

60. Maccabees 4 6:16

    ܐܠܝܥܙܪ ܕܝܢ ܐܝܟ ܗ̇ܘ ܕܒܫܢܕܐ ܐܚܪܢܐ ܕܡܢ ܗ̇ܘ ܩܕܡܝܐ ܡܪܝܪ ܢܦ̣ܠ. ܒܝܕ ܡ̣ܠܟܐ ܗܢܐ ܕܡܠܟܘܗܝ̣. ܒܩܠܐ ܪ̇ܡܐ ܩ̇ܥܐ ܗܘܐ.

61. Maccabees 4 6:17

    ܠܐ ܗܟܢܐ ܡܬܘܡ ܒܪܥܝܢܐ ܙܐܦܢܐ ܢܦܠܝܢ ܒܢܘ̈ܗܝ ܕܐܒܪܗܡ̇. ܕܒܝܕ ܪܕܘܦܝܗ̇ ܕܢܦܫܐ ܟܕܒܐܝܬ ܢܬܚܫܚ ܒܡܕܡ ܕܠܐ ܦܐܐ. ܟܕ ܢܣ̇ܒܝܢ ܚܢܢ ܦܪܨܘܦܐ ܐܚܪܢܐ.

62. Maccabees 4 6:18

    ܐܦ ܓ̇ܝܪ ܕܠܐ ܛܥܡܐ ܐܝܬܝܗ̇ ܗܕܐ. ܐܢܗ̣ܘ ܕܚ̈ܝܐ ܕܫܪܪܐ ܚܝܝܢ ܥܕܡܐ ܠܡܘܬܐ. ܗܫܐ ܕܝܢ ܢܫܬܚܠܦ.

63. Maccabees 4 6:19

    ܘܢܗܘܐ ܚܢܢ ܩܢܘܡܢ ܠܗܠܝܢ ܕܛ̣ܠܝܢ ܬܚܘܝܬܐ ܒܝܫܬܐ ܕܚܢܦܘܬܐ. ܟܕ ܝܗ̇ܒܝܢܢ ܠܗܘܢ ܛܘܦܣܐ ܕܡܟܘܠܬܐ ܛܡܐܬܐ̇.

64. Maccabees 4 6:20

    ܘܢܚܐ ܒܬܪ ܟܢ ܚ̈ܝܐ ܡܨܥ̈ܪܐ. ܘܗ̣ܢܘܢ ܗܠܝܢ ܟܕ ܥܒܝܕܝܢ ܚܢܢ ܓܘܚܟܐ ܠܥܠܡܐ ܥܠ ܫܦܠܘܬܢ.

65. Maccabees 4 6:21

    ܢܬܒܣܐ ܕܝܢ ܡܢ ܛܪܘܢܐ ܐܝܟ ܚ̈ܠܫܐ. ܚܠܦ ܢܡܘܣܢ ܕܝܢ ܐܠܗܝܐ̣. ܠܐ ܥܕܡܐ ܠܡܘܬܐ ܢܬܟܬܫ

66. Maccabees 4 6:22

    ܥܠ ܐ̈ܦܝ ܗܠܝܢ. ܠܟܘ̇ܢ ܐܡ̇ܪܢܐ ܒܢܘ̈ܗܝ ܕܐܒܪܗܡ. ܓܢܒܪܐܝܬ ܥܠ ܐ̈ܦܝ ܫܪܪܐ ܡܘܬܘ.

67. Maccabees 4 6:23

    ܐܢܬܘܢ ܕܝܢ ܐܘ ܦܠܚ̈ܘܗܝ ܕܛܪܘܢܐ. ܡܢܐ ܡܬܡܬܢܝܢ ܐܢܬܘܢ ܡܢ ܕܠܡܝܬܝܘ ܥܠܝܢ ܐܘܠܨܢܐ.

68. Maccabees 4 6:24

    ܟܕ ܕܝܢ ܚܙܐܘܗܝ ܕܗܟܢܐ ܠܒܝܒ ܘܠܐ ܡܫܬܚܠܦ. ܐܦ ܠܐ ܒܚܘܣܢܐ ܕܥܠܘܗܝ ܚ̇ܣܘ ܥܠ ܢܘܪܐ ܡܩܪܒܝܢ ܗܘܘ ܠܗ.

69. Maccabees 4 6:25

    ܘܬܡܢ ܒܝܕ ܡܐ̈ܢܐ ܚܫܝܠܝ ܒܚܪܥܘܬܐ ܡܘܩܕܝܢ ܗܘܘ ܠܗ. ܘܣܪܝܘܬܐ ܒܢܚܝܪ̈ܘܗܝ ܢܣ̇ܟܝܢ ܗܘܘ.

70. Maccabees 4 6:26

    ܟܕ ܕܝܢ ܥܕܡܐ ܠܓܪ̈ܡܘܗܝ ܝܩ̇ܕ ܗܘܐ. ܘܩܪܝܒܐ ܗܘܬ ܢܦܫܗ ܕܬܣܩ̣. ܬܠܐ ܥܝܢܘ̈ܗܝ ܠܫܡܝܐ ܘܐܡ̣ܪ.

71. Maccabees 4 6:27

    ܐܢܬ ܝܕ̇ܥ ܐܢܬ ܐܠܗܐ ܕܦܩܚ ܗܘ ܠܝ ܐܝܟ ܕܐܬܦܪܩ ܒܫܢܕܐ ܓܝܪ ܡܘܩܕ̈ܢܐ ܡܐ̇ܬ ܐܢܐ ܚܠܦ ܢܡܘܣܐ.

72. Maccabees 4 6:28

    ܐܬܪܥܐ ܠܥܡܟ. ܘܢܣܦܩ ܠܟ ܕܝܢ̣ܐ ܕܝܠܢ ܚܠܦܝܗܘܢ.

73. Maccabees 4 6:29

    ܘܥܒܕܝܗܝ ܠܕܡܝ ܕܘܟܝܐ ܕܥܠ ܐ̈ܦܝܗܘܢ. ܘܚܠܦ ܢܦܫ̈ܬܗܘܢ ܣܒ ܢܦܫܝ..

74. Maccabees 4 6:30

    ܟܕ ܕܝܢ ܐܡ̣ܪ ܗܠܝܢ ܓܒܪܐ ܗܢܐ ܚܣܝܐ̣. ܢܨܝܚܐܝܬ ܒܓܘ ܫܢ̈ܕܐ ܡܝ̣ܬ. ܘܥܕܡܐ ܠܫܢ̈ܕܘܗܝ ܕܡܘܬܐ ܥܙ̣ܝ ܒܪܥܝܢܗ ܡܛܠ ܢܡܘܣܐ܀

75. Maccabees 4 6:31

    ܓܠܐ ܗܝ ܗܟܝܠ ܕܡܫܠܛ ܗܘ ܥܠ ܚ̈ܫܐ ܪܥܝܢܐ ܕܐܝܬܘܗܝ ܒܕܚܠܬ ܐܠܗܐ.

76. Maccabees 4 6:32

    ܐܠܘ ܓܝܪ ܚ̇ܫܐ ܡܡܠܟܝܢ ܗܘܘ ܥܠ ܪܥܝܢܐ. ܠܗܘܢ ܝܗ̇ܒ ܗ̇ܘܝܬ ܣܗܕܘܬܐ ܕܙܟܘܬܐ.

77. Maccabees 4 6:33

    ܗܫܐ ܕܝܢ ܪܥܝܢܐ ܠܚܫ̈ܐ ܠܗ ܒܘܠܝܬܐ ܡܙܕ̇ܩܝܢܢ ܫܘܠܛܢܐ.

78. Maccabees 4 6:34

    ܘܙܕ̇ܩ ܠܢ ܕܢܘܕܐ. ܕܐܘܚܕܢܐ ܕܪܥܝܢܐ ܐܝܬܘܗܝ. ܐܝ̇ܟܐ ܕܐܦ ܥܠ ܚ̈ܫܐ ܕܥܪܨܝܢ ܡܢ ܠܒܪ ܡܡܠܟ.

79. Maccabees 4 6:35

    ܕܓܘܚܟܐ ܗܝ ܗܟܝܠ ܕܐܢܫ ܢܐܡܪ ܕܠܐ ܡܫܠܛ ܪܥܝܢܐ. ܐܝ̇ܟܐ ܕܠܐ ܗܘܐ ܒܠܚܘܕ ܠܚ̈ܫܐ ܚܘܝܢ ܕܙܟ̇ܐ. ܐܠܐ ܐܦ ܠܘܚ̈ܡܐ ܐܚܪ̈ܢܐ. ܘܠܐ ܝܗ̣ܒ ܠܗܘܢ ܐܬܪܐ ܕܢܚܣܢܘܢܝܗܝ.

80. Maccabees 4 7:1

    ܐܝܟ ܩܘܒܪܢܛܐ ܓܝܪ ܡܗܝܪܐ̣. ܗܟܢܐ ܪܥܝܢܗ ܕܐܒܘܢ. ܣܒܐ ܐܠܝܥܙܪ. ܒܝܕ ܠܝܩ̈ܐ ܕܕܚܠܬ ܐܠܗܐ ܡܚܫܒܬܗ ܡܕܒܪ ܗܘܐ̇. ܒܓܘ ܝܡܐ ܪܒܐ ܕܫ̈ܢܕܐ ܘܚ̈ܫܐ̣.

81. Maccabees 4 7:2

    ܘܟܕ ܠܘܚ̈ܡܐ ܘܬܫ̈ܢܝܕܐ ܕܛܪܘܢܐ ܥܠܘܗܝ ܥ̇ܪܨܝܢ ܗܘܘ: ܘܓ̈ܠܠܐ ܫ̈ܓܝܫܐ ܕܐܘ̈ܠܨܢܐ̣.

82. Maccabees 4 7:3

    ܘܠܐ ܒܚܕ ܐܣܟܝܡ ܐܗܦܟܘ ܠܩܘ̈ܗܝ ܡܢ ܕܚܠܬ ܐܠܗܐ. ܥܕܡܐ ܕܪܕܐ ܘܡܛ̣ܐ ܠܠܡܐܢܐ ܕܙܟܘܬܐ ܕܠܐ ܡܝܬܐ.

83. Maccabees 4 7:4

    ܠܐ ܗܟܢܐ ܡܬܘܡ ܡܕܝܢܬܐ ܒܚܒܫܐ ܥܙܝܬ ܠܘܩܒܠ ܡܐ̈ܢܝ ܩܪܒܐ ܣܓ̈ܝܐܐ ܘܡܫ̈ܚܠܦܐ̇. ܐܝܟ ܗܢܐ ܡܢܝܢ ܒܟܠܗ̇ ܬܠܒܫܬܐ. ܟܕ ܓܝܪ ܚܐ̇ܫܐ ܗܘܬ ܢܦܫܗ ܡܚܣܝܬܐ ܒܫ̈ܢܕܐ ܘܒܐܘ̈ܠܨܢܐ ܘܒܝܩܕܢܐ̣. ܙܟܐ ܠܐܘ̈ܠܨܢܐ ܕܚܕܝܪܝܢ ܗܘܘ ܠܗ. ܡܛܠ ܪܥܝܢܗ ܕܡܬܟܬܫ ܗ̣ܘܐ ܥܠ ܐ̈ܦܝ ܫܪܪܐ.

84. Maccabees 4 7:5

    ܙܩܦ̣ ܓܝܪ ܪܥܝܢܗ ܘܐܪܝܡܗ ܐܝܟ ܫܢܐ ܕܙܩܝܦܐ ܐܒܘܢ ܐܠܝܥܙܪ. ܘܠܡܚ̈ܫܘܠܐ ܕܚ̈ܫܐ ܫܗܝ̣ ܒܫܢܝܘܬܗܘܢ.

85. Maccabees 4 7:6

    ܐܘ ܠܟܗܢܐ ܕ̇ܫܘܐ ܗܘܐ ܠܟܗܢܘܬܐ. ܠܐ ܣܝܒܬ ܣ̈ܦܘܬܟ ܕܟ̈ܝܬܐ ܘ̈ܫܢܝܟ. ܘܠܐ ܠܟܪܣܟ ܕܫܪܬ ܒܗ̇ ܕܟܝܘܬܐ ܘܕܚܠܬ ܐܠܗܐ. ܘܐܬܚܠܛܬ ܒܡܐܟܘܠܬܐ ܛܢܦܬܐ.

86. Maccabees 4 7:7

    ܐܘ ܫ̇ܠܡ ܠܢܡܘܣܐ ܘܡܠܦܢܐ ܕܚ̈ܝܐ ܐܠܗ̈ܝܐ.

87. Maccabees 4 7:8

    ܕܐܝܟ ܗܟܢܐ ܘ̇ܠܐ ܠܗܘܢ ܠܡܗܘܐ ܠܡܠܦ̈ܢܐ ܕܢܡܘܣܐ. ܕܒܕܡܗܘܢ ܘܒܕܘܥܬܗܘܢ ܘܒܓܢܒܪܘܬܗܘܢ ܒܝܕ ܚܫ̈ܐ ܕܥܕܡܐ ܠܡܘܬܐ ܢܬܟܬܫܘܢ.

88. Maccabees 4 7:9

    ܐܢܬ ܐܒܘܢ ܠܢܡܘܣܢ ܫܦܝܪܐ ܒܝܕ ܡܣܝܒܪܢܘܬܟ ܒܬܫܒܘܚܬܐ ܫܪ̣ܪܬ. ܘܩܠܣܬ ܩܕܝܫܘܬܗ. ܘܐܘܪܒܬ ܘܠܐ ܣܚ̣̇ܦܬ. ܘܒܝܕ̇ ܥ̇ܒ̈ܕܐ ܥܒ̣ܕ̇ܬ ܕܢܬܗ̈ܝܡܢܢ ܡ̈ܠܐ ܕܚܟܡܬܐ ܐܠܗܝܬܐ.

89. Maccabees 4 7:10

    ܐܘ ܣܒܐ ܕܡܢ ܟܠ ܫܢ̈ܕܝܢ ܩܛܝܪܟ ܩܫܐ ܗܘܐ. ܘܩܫܝܫܐ ܕܡܢ ܢܘܪܐ ܚܣܝܢ ܗ̣ܘܝܬ. ܘܡ̇ܠܟܐ ܪܒܐ ܕܥܠ ܚ̈ܫܐ ܐܠܝܥܙܪ.

90. Maccabees 4 7:11

    ܐܟܙܢܐ ܓܝܪ ܕܐܒܘܢ ܐܗܪܘܢ ܟܕ ܒܦܝܪܡܐ ܐܝܟ ܕܒܙܝܢܐ ܡܙܝܢ ܗܘܐ. ܒܓܘ ܥܡܐ ܪܗ̇ܛ ܗܘܐ: ܘܠܡܠܐܟܐ ܡܘܩܕܢܐ ܙܟ̣ܐ̣.

91. Maccabees 4 7:12

    ܗܟܢܐ ܐܦ ܐܗܪܘܢܝܐ ܐܠܝܥܙܪ ܟܕ ܫܐ̇ܚ ܗܘܐ ܒܢܘܪܐ ܠܐ ܐܫܬܚܠܦ ܪܥܝܢܗ.

92. Maccabees 4 7:13

    ܕܬܡܝܗܐ ܕܝܢ ܡܢ ܟܠܗܝܢ̣. ܕܟܕ ܗ̣ܘ ܣܒܐ ܘܡܫܪܝ̣ ܗܘܐ ܚܝܠܐ ܕܗܕ̈ܡܘܗܝ ܘܡܪܫܠ ܦܓܪܗ. ܘܠܐ̣ܝܢ ܫܪ̈ܝܢܘܗܝ. ܐܬܛܠܝ ܒܪܘܚܐ ܕܪܥܝܢܗ.

93. Maccabees 4 7:14

    ܘܠܫ̈ܢܕܐ ܣܓܝܐ̈ܝ ܐܣܟܡ̈ܐ ܚ̇ܣܢ.

94. Maccabees 4 7:15

    ܐܘ ܠܣܝܒܘܬܐ ܛܘܒܢܝܬܐ ܘܠܕܘܒܪ̈ܐ ܕܟ̈ܝܐ ܘܠܚ̈ܝܐ ܢܡܘ̈ܣܝܐ. ܠܟ ܚܬܡܐ ܫ̇ܪܝܪܐ ܕܡܘܬܐ ܓܡܪ܀

95. Maccabees 4 7:16

    ܐܢܗ̣ܘ ܗܟܝܠ ܕܓܒܪܐ ܣܒܐ: ܥܠ ܫ̈ܢܕܐ ܕܥܕܡܐ ܠܡܘܬܐ ܡܛܠ ܫܪܪܐ ܐܡܣ̣ܪ. ܝܕܝܥܐ ܗܝ̣ ܕܡܫܠܛ ܗܘ ܥܠ ܚܫ̈ܐ ܪܥܝܢܐ ܕܡܠ̣ܐ ܕܚܠܬ ܐܠܗܐ.

96. Maccabees 4 7:17

    ܘܟܒܪ ܐܢܫ ܢܐܡܪ. ܕܚ̈ܫܐ ܠܐ ܗܘܐ ܟܠܢܫ ܚܣܢ. ܡ̇ܛܠ ܕܐܦ ܠܐ ܟܠ ܐܢܫ ܪܥܝܢܐ ܚܟܝܡܐ ܐܝܬ ܠܗ.

97. Maccabees 4 7:18

    ܐܠܐ ܗ̇ܢܘܢ ܕܐܟ̇ܦܐ ܠܗܘܢ ܥܠ ܕܚܠܬ ܐܠܗܐ. ܗ̇ܢܘܢ ܗܘ ܒܠܚܘܕ ܡܨܝܢ ܠܡܙܟܐ ܚ̈ܫܘܗܝ ܕܦܓܪܐ.

98. Maccabees 4 7:20

    ܘܠܐ ܡܕܡ ܗܟܝܠ ܡܟܝܐ ܗܕܐ̇. ܐܢܗ̣ܘ ܕܡܬܚܙܝܢ ܐܢ̈ܫܝܢ ܕܙ̇ܟܝܢ ܠܚ̈ܫܐ ܡܛܠ ܪܥܝܢܗܘܢ ܡܚܝܠܐ.

99. Maccabees 4 7:21

    ܘܐܠܐ ܐܝܢܘ ܕܒܟܘܠܗ ܫܒܝܠܐ ܬܪܝܨܐ ܕܙܕܝܩܘܬܐ ܐܙ̇ܠ ܘܡܗܝܡܢ ܠܐܠܗܐ.

100. Maccabees 4 7:22

     ܘܡܦܣ ܕܡܛܠ ܡܝܬܪܘܬܐ ܛܘܒܢܐ ܗܘ: ܐܢܗ̣ܘ ܕܟܠ ܥܡ̈ܠܝܢ ܢܣܝܒܪ ܘܠܐ ܢܙܟܐ ܠܚ̈ܫܐ ܡܛܠ ܫܪܪܐ.

← Previous · Next → — showing 101–200 of 479

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.