← All works

Peshitta Maccabees 4

Peshitta (Syriac Old Testament) · 479 sections

1. Maccabees 4 1:0

   ܣ̣ܦܪܐ ܕܐܪܒܥܐ ܕܥܠ ܡܩ̈ܒܝܐ ܘܐܡܗܘܢ̈܀

2. Maccabees 4 1:1

   ܡܠܬܐ ܕܦܝܠܘܣܦܘܬܐ ܡܛܝܒ ܐܢܐ ܕܐܚ̇ܘܐ ܩܕܡܝܟܘܢ. ܕܐܢ ܡܫܠܛܐ ܗܘ ܪܥܝܢܐ ܫܪܝܪܐ ܕܫ̇ܠܡ ܠܕܚܠܬ ܐܠܗܐ. ܘܡ̇ܠܟ ܐܢܐ ܠܟܘܢ ܬܪܝܨܐܝܬ̣ ܕܒܚܦܝܛܘܬܐ ܬܚܘܪܘܢ ܒܦܝܠܣܘܦܘܬܐ.

3. Maccabees 4 1:2

   ܐܦ ܓܝܪ ܐܠܨܐܝܬ ܠܟܠܢܫ ܚܫ̇ܚܐ. ܝܬܝܪܐܝܬ ܠܐܝܠܝܢ ܕܪ̈ܓܝܢ ܠܡܝܬܪܘܬܐ. ܛܥܝܢܐ ܓܝܪ ܪܥܝܢܐ ܪܡܝܣܐ.

4. Maccabees 4 1:3

   ܐܢ ܗ̣ܘ ܕܥܠ ܚܫ̈ܐ ܡܥܟܪ̈ܢܐ ܕܟܢܝܟܘܬܐ ܡܬܚܙܐ ܕܡܡܠܟ ܪܥܝܢܐ ܡܝܬܪܐ. ܥܠ ܐܣܘܛܘܬܐ. ܥܠ ܪܓܬܐ.

5. Maccabees 4 1:4

   ܘܠܐ ܗܘܐ ܒܠܚܘܕ ܥܠ ܗܠܝ̣ܢ. ܐܠܐ ܐܦ ܥܠ ܚ̈ܫܐ ܐܚܪ̈ܢܐ ܕܠܙܕܝܩܘܬܐ ܡܥ̣ܘܟܝܢ.. ܡܬܚܙܐ ܕܡܫܠܛ. ܥܠ ܙ̈ܢܝܐ ܒܝܫ̈ܐ. ܘܥܠ ܚ̈ܫܐ ܐܚܪ̈ܢܐ ܕܠܓܢܒܪܘܬܐ ܡܟܠܝܢ. ܥܠ ܚܡܬܐ. ܘܥܠ ܕܠܐ ܐܢܫ ܢܬܪܦܐ ܩܕܡ ܐܘ̈ܠܨܢܐ. ܘܥܠ ܕܚܠܬܐ.

6. Maccabees 4 1:5

   ܘܟܒܪ ܐܢܫ ܢܐܡܪ. ܕܐܢܗ̣ܘ ܕܥܠ ܚ̈ܫܐ ܡܫܠܛ ܗܘܢܐ. ܐܝ̇ܟܢܐ ܥܠ ܛܘܐܝܝ ܘܥܠ ܠܐ ܝܕܥܬܐ ܠܐ ܡܫܠܛ. ܐܡ̇ܪܝܢ ܕܝܢ ܡܠܬܐ ܗܕܐ ܕܠܓܘܚܟܐ ܫ̇ܘܝܐ.

7. Maccabees 4 1:6

   ܠܐ ܗܘܐ ܓܝܪ ܥܠ ܚ̈ܫܐ ܕܝܠܗ ܡܫܠܛ ܗܘܐ. ܐܠܐ ܥܠ ܚ̈ܫܐ ܕܠܘܩܒܠ ܓܢܒܪܘܬܐ ܘܙܕܝܩܘܬܐ. ܘܟܢܝܟܘܬܐ ܐܝܬܝܗܘܢ. ܘܥܠ ܗܠܝܢ ܠܐ ܗܘܐ ܐܝܟ ܡ̇ܢ ܕܡܨ̣ܐ ܕܢܒ̇ܛܠ ܐܢܘܢ. ܐܠܐ ܕܠܐ ܢܬܚܣܢ ܡܢܗܘܢ ܰ

8. Maccabees 4 1:7

   ܡܢ ܣܓܝܐ̈ܬܐ ܕܝܢ ܘܡܢ ܐܚܪ̈ܢܝܬܐ ܐܝܬ ܠܝ ܕܐ̣ܚܘܐ ܕܡܡܠܟ ܗ̣ܘ ܥܠ ܚ̈ܫܐ̇ ܪܥ̇ܝܢܐ ܕܫ̇ܠܡ̇ ܠܕܚܠܬ ܐܠܗܐ.

9. Maccabees 4 1:8

   ܝܬܝܪܐܝܬ ܕܝܢ ܗܕܐ ܡܚܘܐ ܐܢܐ. ܡܢ ܚܠܝܨܘܬܐ ܕܗܠܝܢ ܕܥܠ ܐ̈ܦܝ ܕܚܠܬ ܐܠܗܐ ܡܝܬܘ. ܐ̇ܡ̇ܪ ܐܢܐ ܕܝܢ ܐܠܝܥܙܪ ܘܫܒܥܐ ܐܚ̈ܐ ܘܐܡܗܘܢ.

10. Maccabees 4 1:9

    ܟܠܗܘܢ ܓܝܪ ܗܠܝܢ ܥܠ ܟܐ̈ܒܐ ܕܥܕܡܐ ܠܡܘܬܐ ܡܡܛܝܢ ܐܡܣܪܘ. ܘܚ̇ܘܝܘ ܕܡܫܠܛ ܥܠ ܚ̈ܫܐ ܐܝܬܘܗܝ ܪܥܝܢܐ.

11. Maccabees 4 1:10

    ܡܢ ܐܢܫܐ ܕܝܢ ܫܒܝ̈ܚܐ ܗܫܐ ܠܗܠܝܢ ܗܘ ܣܝܡ̣ܐ ܠܝ ܕܐܩܠܣ. ܠܗܠܝܢ ܕܒܙܒܢܐ ܗܢܐ ܡܛܠ ܕܚܠܬ ܐܠܗܐ ܡܝܬܘ ܥܡ ܐܡܗܘܢ. ܟܕ ܝܗ̇ܒ ܐܢܐ ܠܗܘܢ ܛܘܒܐ ܥܠ ܚܫܝ̈ܗܘܢ.

12. Maccabees 4 1:11

    ܗܘ̇ܘ ܓܝܪ ܬܗܪܐ. ܠܐ ܗܘܐ ܒܠܚܘܕ ܠܟܠܗܘܢ ܒܢܝ̈ܢܫܐ ܕܫܪܟܐ ܡܛܠ ܓܢܒܪܘܬܗܘܢ. ܐܠܐ ܐܦ ܠܗ̇ܢܘܢ ܕܐܫܬܢܕܘ ܒܗܘܢ. ܗܘܘ ܓܝܪ ܥܠ̣ܬܐ ܠܡܦܘܠܬܗ̇ ܕܛܪܘܢܘܬܐ ܕܥܠ ܥܡܐ. ܘܙܟܐܘܗܝ ܠܛܪܘܢܐ. ܘܕܟܝܘܗܝ ܠܐܬܪܗܘܢ.

13. Maccabees 4 1:12

    ܘܥܠ ܗܕܐ ܗܫܐ ܠܡܐܡܪ ܕܠܝܠܐ ܠܢ. ܡܢ ܒܬܪ ܕܥܠܬܗ̇ ܕܡܠܬܢ ܢܘܕܥ. ܗ̇ܝ ܕܗܟܢܐ ܡܥܕܝܢܢ ܠܡܥܒܕ. ܘܗܝ̇ܕܝܢ ܒܥܘܕܪܢܗ ܕܐܠܗܐ ܡܚܟܡ ܟܠ ܡܠܬܢ ܥܠܝܗܝܢ ܡܦܢܝܢܢ.

14. Maccabees 4 1:13

    ܒܥܬܢ ܗܟܝܠ ܗܕܐ ܗܝ. ܐܢ ܡܫܠܛ ܥܠ ܚܫܐ ܪܥܝܢܐ.

15. Maccabees 4 1:14

    ܢܒ̇ܚܢ ܕܝܢ ܡܢܐ ܐܝܬܘܗܝ ܪܥܝܢܐ. ܘܡܢܐ ܐܝܬܘܗܝ ܚܫܐ. ܘܟܡ̣ܐ ܙ̈ܢܝܢ ܕܚܫܐ. ܘܐܢܗ̣ܘ ܕܥܠ ܟܠܗܘܢ ܪܥܝܢܐ ܡܫܠܛ.

16. Maccabees 4 1:15

    ܪܥܝܢܐ ܗܟܝܠ ܐܝܬܘܗܝ ܗܘܢܐ ܕܒܟܐܢܘܬܐ ܓܒ̇ܐ ܠܚ̈ܝܐ ܕܒܚܟܡܬܐ.

17. Maccabees 4 1:16

    ܚܟܡܬܐ ܕܝܢ ܐܝܬܝܗ̇ ܐܝܕܥܬܐ ܕܨܒ̈ܘܬܐ ܕܐܠܗܘܬܐ ܘܕܐܢܫܘܬܐ ܘܕܥܠܠ̈ܬܗܝܢ.

18. Maccabees 4 1:17

    ܗܝ̣ ܕܝܢ ܗܕܐ ܐܝܬܝܗ̇ ܡܪܕܘܬܐ ܕܒܢܡܘܣܐ. ܗ̇ܝ ܕܒܐܝ̈ܕܝܗ̇ ܐܦ ܗܠܝܢ ܕܐܠܗܘܬܐ ܪ̈ܘܪܒܐܝܬ. ܘܗܠܝܢ ܕܐܢܫܘܬܐ ܥܗܢܐܝܬ ܝܠܦ̇ܝܢ ܚܢܢ.

19. Maccabees 4 1:18

    ܡܢܘ̈ܬܐ ܕܝܢ ܕܝܠܗ̇ ܕܚܟܡܬܐ ܐܝܬܝܗܝܢ ܗܠܝܢ. ܡܗܘܢܘܬܐ. ܙܕܝܩܘܬܐ. ܟܢܝܟܘܬܐ.

20. Maccabees 4 1:19

    ܕܡܢ ܟܘܠܗܝܢ ܕܝܢ ܪܫܝܐ ܐܝܬܝܗ̇ ܡܗܘܢܘܬܐ. ܕܒܐ̈ܝܕܝܗ̇ ܥܠ ܟܠ ܚ̈ܫܝܢ ܡܡܠܟ ܪܥܝܢܐ.

21. Maccabees 4 1:20

    ܟܝܢܗܘܢ ܕܝܢ ܕܚ̈ܫܐ ܕܠܓܘ ܡܢܗܘܢ ܚܒܝܫܝܢ. ܐܚܪ̈ܢܐ. ܐܝܬܝܗܘܢ̣ ܬܪܝܢ. ܗܢܝܝܘܬܐ ܘܐܘܠܨܢܐ. ܗܠܝܢ ܕܝܢ ܠܘ̇ܝܢ ܠܗ̇ ܠܢܦܫܐ.

22. Maccabees 4 1:21

    ܚܫ̈ܐ ܕܝܢ ܣܓܝܐ̈ܐ ܐܝܟ ܕܒܝܘܒܠܐ ܣܕܝܪܝܢ ܒܬܪܗܘܢ.

23. Maccabees 4 1:22

    ܡܢ ܩܕܡ ܗܢܝܝܘܬܐ ܗܟܝܠ ܐܝܬܝܗ̇ ܪܓܬܐ. ܒܬܪܗ̇ ܕܝܢ ܚܕܘܬܐ.

24. Maccabees 4 1:23

    ܡܢ ܩܕܡ ܐܘܠܨܢܐ ܕܝܢ ܐܝܬ ܕܚܠܬܐ. ܡܢ ܒܬܪܗ ܕܝܢ ܕܐܘܠܨܢܐ̣ ܥܩܬܐ.

25. Maccabees 4 1:24

    ܚܡܬܐ ܕܝܢ ܚܫܐ ܗܘ ܕܓܘܐ. ܕܗܢܝܝܘܬܐ ܘܕܐܘܠܨܢܐ. ܢܕܥ ܕܝܢ ܐܢܫ ܕܗܟܢܐ ܗܝ̣. ܐܡܬܝ ܕܢ̇ܦܠ ܒܗ̇.

26. Maccabees 4 1:25

    ܒܗܢܝܝܘܬܐ ܗܟܝܠ ܐܝܬܝܗ̇ ܡܨܛܠܝܢܘܬܐ ܕܠܘܬ ܚ̈ܫܐ ܒܝܫ̣̈ܐ. ܕܡܢ ܟܠܗܘܢ ܚ̈ܫܐ̣ ܐܣܟ̈ܡܝܗ ܣܓܝܐܝܢ.

27. Maccabees 4 1:26

    ܕܒܢܦܫܐ ܗܠܝܢ ܣ̇ܥܪܐ. ܚܬܝܪܘܬܐ ܘܪܚܡܬ ܟܣܦܐ ܘܪܚܡܬ ܬܫܒܘܚܬܐ ܘܚܪܝܢܘܬܐ.

28. Maccabees 4 1:27

    ܒܦܓܪܐ ܕܝܢ ܕܢܐܟܘܠ ܕܟܠ ܡܕܡ ܘܕܗ̇ܘܐ ܙ̇ܟܐ ܠܟܪܣܗ. ܘܕܗ̣ܘܐ ܐ̇ܟܠ ܡܫܘܚܕܐܝܬ̣.

29. Maccabees 4 1:28

    ܐܝ̇ܟܢܐ ܗܟܝܠ ܕܢܨ̈ܒܬܐ ܐܝܬܝܗܝܢ ܕܦܓܪܐ ܘܕܢܦܫܐ ܬܪ̈ܬܝܗܝܢ ܗܠܝܢ. ܗܢܝܝܘܬܐ ܘܐܘܠܨܢܐ ܕܡܬܝܠܕܝܢ ܡܢ ܟܐ̈ܒܐ. ܗܟܢܐ ܣܓܝܐ̈ܝܢ ܥܘ̈ܦܐ ܕܗܠܝܢ ܚ̈ܫܐ.

30. Maccabees 4 1:29

    ܕܠܚܕ ܚܕ ܡܢܗܘܢ ܗ̣ܘ ܪܥܝܢܐ ܕܫ̣ܠܡ ܠܕܚܠܬ ܐܠܗܐ ܦ̇ܠܚ ܘܡܕܟܐ ܘܟ̇ܣܚ. ܘܡܛܥܡ ܘܡܟܪܟ ܘܡܫܩܐ. ܘܡܪܝܚ ܠܟܘܠ ܥ̈ܠܠܢ ܕܡܘ̈ܠܕܢ ܟܐ̈ܒܐ.

31. Maccabees 4 1:30

    ܗܘܢܐ ܓܝܪ ܐܝܬܘܗܝ ܡܕܒܪܢܗ̇ ܕܡܝܬܪܘܬܐ. ܡ̇ܠܟܐ ܕܝܢ ܕܥܠ ܚܫ̈ܐ. ܘܡܬܚܙܐ ܠܘܩܕܡ ܒܝܕ ܥܒ̈ܕܐ ܡܥܟܪ̈ܢܐ ܕܟܢܝܟܘܬܐ. ܕܡܫܠܛ ܗܘ ܥܠ ܚ̈ܫܐ.

32. Maccabees 4 1:31

    ܟܢܝܟܘܬܐ ܗܟܝܠ ܕܐܢܫ̣. ܢܗܘܐ ܙܟ̇ܐ ܠܐܪ̈ܓܝܓܬܐ.

33. Maccabees 4 1:32

    ܗܠܝܢ ܕܐܝܬܝܗܝܢ ܡܢܗܝܢ ܢܦܫ̈ܢܝܬܐ ܘܡܢܗܝܢ ܦܓܪ̈ܢܝܬܐ. ܡܬܚܙܐ ܕܝܢ ܕܐܦ ܥܠ ܗܠܝܢ ܘܥܠ ܗܠܝܢ ܡܫܠܛ.

34. Maccabees 4 1:33

    ܘܐܠܐ ܐܝ̇ܟܢܐ ܡܐ ܕܡܬܙܝܥܝܢ ܚܢܢ ܠܡܐܟܠ ܡܕܡ ܕܠܐ ܡܦܣ. ܡܗܦܟܝܢ ܚܢܢ ܢܦܫܢ ܡܢ ܐ̈ܪܓܝܓܬܢ. ܠܐ ܗܘܐ ܕܡܨ̣ܐ ܪܥܝܢܐ ܠܡܙܟܐ ܠܪ̈ܓܝܓܬܐ. ܐܢܐ ܗܟܢܐ ܣ̇ܒܪ ܐܢܐ.

35. Maccabees 4 1:34

    ܪ̈ܓܝܢ ܚܢܢ ܓܝܪ ܠܡܐܟܠ ܠܚܝܘ̈ܬܐ ܕܒܝܡܐ ܘܠܦܪܚܬܐ ܘܠܐܪܒܥܬ ܪ̈ܓܠܐ. ܘܠܟܘܠ ܡܐ̈ܟܠܢ. ܘܡܬܟܠܝܢ ܚܢܢ ܡܛܠ ܡܫܠܛܘܬܗ ܕܪܥܝܢܐ.

36. Maccabees 4 1:35

    ܘܡܬܛܦܝܣܝܢ ܚܢܢ ܘܡܬܬܟܣܝܢ ܚܫ̈ܝܗܝܢ ܕܪ̈ܓܝܓܬܐ. ܟܕ ܡܢ ܪܥܝܢܐ ܪܡܝܣܐ ܡܙܕܓܪܝܢ. ܘܡܬܒܠܡܝܢ ܟܠܗܘܢ ܙܘ̈ܥܐ ܕܦܓܪܐ.

37. Maccabees 4 2:1

    ܘܠܘ ܕܕܘܡܪܐ ܗܝ ܐܢ ܗܘ ܕܐܪ̈ܓܝܓܬܗ̇ ܕܢܦܫܐ ܕܪ̈ܓܢ ܠܫܘܦܪܐ ܡ̈ܬܟܠܝܢ.

38. Maccabees 4 2:2

    ܗܟܢܐ ܓܝܪ ܝܘܣܦ ܡܬܩܠܣ. ܕܒܝܕ ܡܗܘܢܘܬܐ ܙܟ̣ܐ ܠܗܢܝܘܬܐ ܕܚܫܐ.

39. Maccabees 4 2:3

    ܟܕ ܓܝܪ ܐܝܬܘܗܝ ܛܠܝܐ ܘܒܗ̇ܘ ܥܘܙܐ ܕܒܗ ܠܫܘܬܦܘܬܐ ܐܢܫ ܡ̣ܛܐ̣. ܦܩܪܘܬܐ ܕܚ̈ܫܘܗܝ ܒܗ ܢܝ̇ܚ̣.

40. Maccabees 4 2:4

    ܠܐ ܗܘܐ ܕܝܢ ܠܦܩܪܘܬܐ ܒܠܚܘܕ ܕܝܠܗ ܕܣܘܥܪܢܐ ܡܬܚܙܐ ܪܥܝܢܐ ܕܡܨ̣ܐ ܠܡܙܟܐ̣. ܐܠܐ ܐܦ ܠܟܠ ܪ̈ܓܝܓܢ.

41. Maccabees 4 2:5

    ܐܡ̣ܪ ܓܝܪ ܢܡܘܣܐ. ܠܐ ܬܪܓ ܐܢܬܬ ܚܒܪܟ. ܘܠܐ ܟܠ ܡܕܡ ܕܐܝܬ ܠܚܒܪܟ.

42. Maccabees 4 2:6

    ܘܗܐ ܐܦ ܐܠܘ ܠܐ ܐܡ̇ܪ ܢܡܘܣܐ ܕܠܐ ܬܪܓ̣. ܡ̣ܨܐ ܗ̣ܘܝܬ ܐܦ ܗܟܢܐ ܕܐܦܝܣܟܘܢ. ܕܡ̣ܨܐ ܗܘ ܪܥܝܢܐ ܠܡܙܟܐ ܠܪ̈ܓܝܓܬܐ ܐܟܙܢܐ ܕܐܦ ܠܣܘܥܪ̈ܢܐ ܡܥܘܟ̈ܢܐ ܕܙܕܝܩܘܬܐ.

43. Maccabees 4 2:7

    ܘܐܠܐ ܐܝܟܢܐ ܟܕ ܐܝܬܘܗܝ ܐܢܫ ܠܥܒܐ ܐܘ ܪܘܝܐ̇. ܝ̇ܠܦ ܬܩܢܘܬܐ ܟܕ ܡܪܦܐ ܗܠܝܢ ܩܕ̈ܡܝܬܐ. ܐܠܘ ܠܐ ܓܠܝ̣ܐ ܕܡܫܠܛ ܗܘ ܥܠ ܚܫ̈ܐ ܪܥܝܢܐ ܕܫ̇ܠܡ ܠܕܚܠܬ ܐܠܗܐ.

44. Maccabees 4 2:8

    ܒܪܫܥܬܗ ܓܝܪ ܐܢ ܗ̣ܘ ܕܒܢܡܘܣܐ ܢܬܕܒܪ̣. ܐܦܢ ܐܝܬܘܗܝ ܪܚܡ̇ ܟܣܦܐ̣. ܥܨ̇ܐ ܢܦܫܗ ܘܡܘܙܦ ܠܣܢܝ̈ܩܐ. ܘܕܠܐ ܪܒܝܬܐ ܝܗ̇ܒ ܟܣܦܗ ܘܡܚܫܒ ܒܫ̈ܒܐ. ܘܫܒ̇ܩ ܡܢ ܡܐ ܕܡܬܚܝܒ ܠܗ.

45. Maccabees 4 2:9

    ܐܦܢ ܢܗܘܐ ܕܚܣܘܟܬܢܐ ܗܘܐ. ܡܙܕܟܐ ܡܢ ܢܡܘܣܐ ܡܛܠ ܪܥܝܢܐ ܡܝܬܪܐ. ܟܕ ܠܐ ܡܠܩܛ ܡܒܕܪ̈ܬܐ ܒܚܨܕܐ. ܘܠܐ ܡܒܥܪ ܟܪܡܗ. ܘܒܥ̇ܒܕܐ ܕܝܢ ܕܠܝܠܐ ܗܕܐ ܠܡܕܥ. ܕܡܫܠܛ ܗܘ ܥܠ ܚ̈ܫܐ ܪܥܝܢܐ.

46. Maccabees 4 2:10

    ܢܡܘܣܐ ܓܝܪ ܐܦ ܥܠ ܪܚܡܬܐ ܕܒ̈ܢܝܐ ܠܘܬ ܐܒܗ̈ܐ ܡܫܠܛ. ܟܕ ܠܐ ܡܬܟܚܕܝܢ ܡܢܗܘܢ ܘܡܫܠܡܝܢ ܙܕܩܗ.

47. Maccabees 4 2:11

    ܘܥܠ ܪܚܡܬ ܫܘܬܦܘܬܐ ܬܘܒ ܡܫܠܛ. ܕܐܢܗ̣ܘ ܕܒܠܐ ܢܡܘܣܐ ܬܗܘܐ ܢܟܣܗ̇.

48. Maccabees 4 2:12

    ܘܥܠ ܪܚܡܬܐ ܕܐܒܗ̈ܐ ܕܠܘܬ ܒܢ̈ܝܐ ܬܘܒ ܡܫܠܛ. ܘܒܐ̈ܝܕܝ ܐܒܗ̈ܝܗܘܢ ܣ̇ܐܡ ܒܪܫܗܘܢ ܡܛܠ ܒܝܫ̣ܘܬܗܘܢ. ܡܫܠܛ ܕܝܢ ܐܦ ܥܠ ܚܘܒܐ ܕܪ̈ܚ̇ܡܐ. ܟܕ ܡܟܣ ܠܗܘܢ ܡ̣ܛܠ ܪܘܫܥܗܘܢ ܒܐܝ̈ܕܝ ܪ̈ܚ̇ܡܝܗܘܢ.

49. Maccabees 4 2:13

    ܘܠܐ ܬܣܒܪܘܢ ܕܡܕܡ ܗܘ ܚܕܬ ܗܢܐ ܡܕܡ ܕܐܡ̇ܪܬ. ܐܝ̇ܟܐ ܕܐܦ ܠܒܥܠܕܒܒܘܬܐ ܡܨ̣ܐ ܪܥܝܢܐ ܠܡܙܟܐ. ܡܛܘܠ ܢܡܘܣܐ.

50. Maccabees 4 2:14

    ܟܕ ܠܐ ܦܣ̇ܩ ܐܝ̈ܠܢܐ ܫܦܝܪܐ ܕܣܢܐ̈ܘܗܝ ܐܠܐ ܡ̇ܢܛܪ ܠܗܘܢ ܕܢܗ̣ܘܘܢ ܠܒܥܠܕ̈ܒܒܘܗܝ ܘܡ̣ܩܝܡ ܠܐܝܠܝܢ ܕܪܡ̣ܝܢ.

51. Maccabees 4 2:15

    ܐܦ ܒܚ̈ܫܐ ܕܝܢ ܥܙ̈ܝܙܐ ܡܬܚܙܐ ܪܥܝܢܐ ܕܙܟ̇ܐ. ܗܢܘ ܕܝܢ ܠܪܚܡܬ ܪܫܢܘܬܐ ܘܠܪܚܡܬ ܬܫܒܘܚܬܐ. ܘܠܫܒܗܪܢܘܬܐ ܘܠܚܬܝܪܘܬܐ ܘܠܚܣܡܐ.

52. Maccabees 4 2:16

    ܠܟܠܗܘܢ ܓܝܪ ܗܠܝܢ ܚ̈ܫܐ ܣ̈ܢܝܐ ܥܨ̇ܐ ܘܡܫܥܒܕ ܐܝ̇ܢܐ ܕܚܝܐ ܢܟܦܐܝܬ. ܐܟܙܢܐ ܕܐܦ ܠܚܡܬܐ ܙ̇ܟܐ. ܐܦ ܥܠ ܗܕܐ ܓܝܪ ܡܫ̇ܠܛ ܗܘ.

53. Maccabees 4 2:17

    ܗܐ ܓܝܪ ܟܕ ܐܬܚܡܬ ܡܘܫܐ ܥܠ ܕܬܘܢ ܘܐܒܝܪܡ̣. ܠܐ ܣܥ̣ܪ ܠܘܬܗܘܢ ܡܕܡ ܕܚܡܬܐ. ܐܠܐ ܒܪܡܝܣܘܬܐ ܕܪܥܝܢܗ̣. ܚܡܬܗ ܟܒ̣ܫ ܐܝܟ ܕܒܕܝ̣ܢܐ.

54. Maccabees 4 2:18

    ܡܨ̣ܐ ܗܘ ܓܝܪ ܪܥܝܢܐ ܐܝܟ ܡܐ ܕܐܡ̇ܪܬ ܕܢܣܒ ܙܟܘܬܐ ܥܠ ܚ̈ܫܐ. ܕܠܗܠܝܢ ܢܫܗ̇ܐ ܘܠܗܠܝܢ ܢܦܟܗ.

55. Maccabees 4 2:19

    ܘܐܠܐ ܥܠ ܡܢܐ ܐܒܘܢ ܚܟܝܡ ܒܟܠ ܝܥܩܘܒ̇. ܠܫܡܥܘܢ ܘܠܠܘܝ ܥ̇ܕܠ. ܡܛܠ ܕܕܠܐ ܪܥܝܢܐ ܠܒ̈ܢܝ ܫܟܝܡ ܟܠܗ ܥܡܐ ܡܢ ܣܟܗ ܩ̇ܛܠܘ. ܟܕ ܐܡ̇ܪ. ܠܝܛ ܗܘ ܪܘܓܙܗܘܢ ܘܚܡܬܗܘܢ ܡܛܠ ܕܩܫܝܐ ܗܝ.

56. Maccabees 4 2:20

    ܐܠܘ ܓܝܪ ܠܐ ܡܨ̣ܐ ܗܘܐ ܪܥܝܢܐ ܠܡܚܣܢ ܠܚܡܬܐ̣. ܠܐ ܐܡ̇ܪ ܗܘܐ ܗܟܢܐ.

57. Maccabees 4 2:21

    ܟܕ ܓܝܪ ܒ̣ܪܐ ܐܠܗܐ ܠܒܪܢܫܐ̣. ܚܫ̈ܐ ܘܙܘ̈ܥܐ ܢ̣ܨܒ ܒܗ.

58. Maccabees 4 2:22

    ܟܕ ܕܝܢ ܒܝܕ ܪ̈ܓܫܐ ܠܪܥܝܢܐ ܚܣܝܐ ܥܠ ܟܘܠܗܘܢ ܐܡܠܟ. ܘܐܝܟ ܕܥܠ ܬܪܘܢܘܣ ܐ̣ܘܬܒ.

59. Maccabees 4 2:23

    ܝܗ̣ܒ ܠܗ ܠܗܢܐ ܢܡܘܣܐ. ܕܟܕ ܒܗ ܡܬܕܒܪ̣. ܢܡܠܟ ܡܠܟܘܬܐ ܟܢܝܟܬܐ ܘܙܕܝ̣ܩܬܐ ܘܓܢܒܪܬܐ.

60. Maccabees 4 2:24

    ܐܝܟܢܐ ܗܟܝܠ ܐܝܬ ܠܟܘܢ ܠܡܐܡܪ. ܐܢ ܐܝܢ ܥܠ ܟܠܗܘܢ ܚܫ̈ܐ ܡܡܠܟ ܪܥܝܢܐ.

61. Maccabees 4 3:1

    ܕܓܘܚܟܐ ܓܝܪ ܣܓܝܐܐ ܐܝܬܝܗ̇ ܡܠܬܐ ܗܕܐ. ܠܐ ܗܘܐ ܓܝܪ ܥܠ ܚܫܘ̈ܗܝ ܡܬܚܙܐ ܗܘܢܐ ܕܡܫܠܛ. ܐܠܐ ܥܠ ܚܫ̈ܐ ܦܓܪ̈ܢܝܐ. ܕܐܝܟ ܐܝܟ̇ܢܐ.

62. Maccabees 4 3:2

    ܕܠܐ ܐܢܫ ܡܢܟܘܢ ܠܐ ܢܪܓ ܠܐ ܡܨ̇ܝܐ. ܕܠܐ ܕܝܢ ܢܫܬܥܒܕ ܠܪܓܬܗ ܡ̣ܨܐ ܗܘ ܢܡܘܣܐ ܠܡܥܒܕܢܘܬܗ.

63. Maccabees 4 3:3

    ܠܐ ܐܢܫ ܡ̣ܨܐ ܕܚܡܬܐ ܡܢ ܢܦܫܗ ܢܦܣܘܩ. ܐܠܐ ܡܨ̇ܝܐ ܕܢ̇ܥܕܪ ܪܥܝܢܐ ܕܠܐ ܢܬܚܡܬ.

64. Maccabees 4 3:4

    ܡܪܝܪܘܬ ܝܨܪܐ ܠܐ ܡ̣ܨܐ ܐܢܫ ܕܡܢܗ ܢܢܟܪܐ. ܐܠܐ ܡ̣ܨܐ ܪܥܝܢܐ ܕܢܬܠ ܠܗ ܐ̣ܝܕܐ ܕܡܢܗ ܠܐ ܢܬܚܣܢ.

65. Maccabees 4 3:5

    ܠܐ ܗܘܐ ܓܝܪ ܥ̇ܩܘܪܐ ܕܚ̈ܫܐ ܗܘ ܪܥܝܢܐ̣. ܐܠܐ ܒܥܠܕܪܐ.

66. Maccabees 4 3:6

    ܘܐܝܬ ܠܢ ܗܕܐ ܠܡܣܬܟܠܘ ܢܗܝܪܐܝܬ̣ ܒܝܕ ܨܗܝܗ ܕܡܠܟܐ ܕܘܝܕ.

67. Maccabees 4 3:7

    ܡܛܠ ܓܝܪ ܕܝܘܡܐ ܟܠܗ ܥܡ ܦܠܫ̈ܬܝܐ ܐܩܪܒ. ܘܣܘܓܐ ܡܢܗܘܢ ܚ̣ܪܒ ܥܡ ܦܠܚ̈ܐ ܕܡܢ ܥܡܐ ܐܝܬ ܗܘܘ ܥܡܗ.

68. Maccabees 4 3:8

    ܘܪܡܫܐ ܡܟܝܠ ܐܕܪܟ ܗܘܐ ܠܗ. ܘܡܣܬܪܗܒ ܗܘܐ ܟܕ ܕܥ̣ܝܬ ܛܒ ܘܠܐܐ ܠܡܐܬܐ ܠܡܫܟܢ ܡܠܟܘܬܗ. ܕܥܠ ܓܒܗ ܠܟܐ ܘܠܟܐ ܡܫܪܝܬܐ ܕܚܝܠܐ ܕܐܒ̈ܗܝܢ ܫ̣ܪܝܐ ܗܘܬ.

69. Maccabees 4 3:9

    ܘܟܕ ܟܘܠܗܘܢ ܒܚܫܡܝܬܐ ܥ̣ܢܝܢ ܗܘܘ.

70. Maccabees 4 3:10

    ܡ̇ܠܟܐ ܐܝܟ ܡ̇ܢ ܕܣ̇ܓܝ ܨܗ̣ܐ ܗܘܐ. ܟܕ ܛܒ ܫܟܝ̈ܚܢ ܗ̈ܘܝ ܠܗ ܡܥ̈ܝܢܐ ܕܠܐ ܚܣܡ. ܘܡ̣ܨܐ ܗܘܐ ܕܨܗܝܗ ܒܐ̈ܝܕܝܗܝܢ ܢܦܝ̇ܓ.

71. Maccabees 4 3:11

    ܐܠܐ ܪܓܬܐ ܕܠܐ ܒܘܝܢܐ ܫܚ̇ܩܐ ܗܘܬ ܠܗ. ܕܡܢ ܡ̈ܝܐ ܕܒܝܬ ܒܥܠܕܒ̈ܒܐ ܢܫܬܐ ܗܘܐ. ܘܡܢܗ̇ ܡܬܒܘܪܪ ܗܘܐ ܘܡܫܬܠܗܒ.

72. Maccabees 4 3:12

    ܘܡܢܗܘܢ ܡܢ ܦܠ̣ܚܘܗܝ ܥܠ ܪܓܬܗ ܡܬܬܢܚܝܢ ܗܘܘ ܘܡܒܓܢܝܢ. ܬܪܝܢ ܥܠܝܡ̈ܝܢ ܡܢ ܦܠܚ̈ܐ ܕܐܝܬܝܗܘܢ ܗܘܘ ܚܝ̈ܠܬܢܐ ܘܓܢܒ̈ܪ̣ܐ ܚܓ̇ܘ ܡܢ ܪܓܬܗ ܕܡ̇ܠܟܐ. ܘܩܘܩܬܐ ܫ̣ܩܠܘ. ܘܟܘܠܗ ܙܝܢܗܘܢ ܐܬܠܒܫܘ. ܘܥܒ̣ܪܘ ܬܚܘ̈ܡܐ ܕܒܥܠܕܒ̈ܒܝܗܘܢ. ܘܙܩ̈ܦܐ ܕܠܛܝܝܗܘܢ.

73. Maccabees 4 3:13

    ܘܐܬܓܢܝܘ ܡܢ ܢ̇ܛܘܪ̈ܐ ܕܬܪ̈ܥܐ. ܘܢܦܩܘ ܟܕ ܡܥܩܒܝܢ ܒܝܬ̇ ܒܥܠܕܒ̈ܒܐ.

74. Maccabees 4 3:14

    ܘܡܒܨܝܢ ܕܐܝ̇ܟܐ ܐܝܬܝܗܘܢ ܡ̈ܝܐ. ܘܡܢܗܘܢ ܠܒܝܒܐܝܬ ܫܩܝܐ ܠܡ̇ܠܟܐ ܐܝܬܝܘ.

75. Maccabees 4 3:15

    ܗ̣ܘ ܕܝܢ ܟܕ ܥܙܝܙܐܝܬ ܝܩ̇ܕ ܗܘܐ ܡܢ ܨܗܝܐ̣. ܐ̣ܬܚܫܒ ܕܨܒܘܬܐ ܗܝ ܩܫܝܬܐ ܘܡܠܝܐ ܩܢܕܝܢܘܣ ܣܡ ܕܐܝܬܘ̇ܗܝ ܫܩܝܐ. ܕܒܕܡܐ ܡܬܬܩܠ ܗܘܐ.

76. Maccabees 4 3:16

    ܘܡܛܠ ܗܕܐ ܐܩܝܡ ܚܘܫܒܐ ܛ̇ܒܐ ܠܘܩܒܠ ܪܓܬܗ. ܘܢܩܝܗ ܠܫܩܝܐ ܕ̣ܐܬ̣ܐ ܠܗ ܠܐܠܗܐ.

77. Maccabees 4 3:17

    ܡ̣ܨܐ ܗܘ ܓܝܪ ܪܥܝܢܐ ܡܝܬܪܐ ܠܡܙܟܐ ܩܛܝܪ̈ܝܗܘܢ ܕܚ̈ܫܐ. ܘܠܡܪܟܟܘ ܥܘܒ̈ܝܢܐ ܕܦܩܪܘܬܐ.

78. Maccabees 4 3:18

    ܘܠܡܚܣܢ ܠܐܘܠܨ̈ܢܘܗܝ ܕܦܓܪܐ. ܘܒܪܚܡܬܐ ܕܫܦܝ̈ܪܬܐ ܢܒܣܪ ܥܠ ܟܘܠܗܘܢ ܩܛܝܪ̈ܐ ܕܚ̈ܫܐ.

79. Maccabees 4 3:19

    ܗܐ ܕܝܢ ܡܟܝܠ ܥܕܢܐ ܩ̇ܪܐ ܠܢ ܠܡܚܘܝܘܬܗ̇ ܠܬܫܥܝܬܐ ܕܪܥܝܢܐ ܡܝܬܪܐ.

80. Maccabees 4 3:20

    ܡܛܠ ܕܫܝܢܐ ܥܡܝܩܐ ܐܝܬܘܗܝ ܗܘܐ. ܠܐܒ̈ܗܝܢ ܢܡܘܣܐ. ܘܐܝܬܝܗܘܢ ܗܘܘ ܒ̈ܛܒܬܐ ܘܒܢܝ̈ܚܐ ܐܝܟ ܕܐܦ ܡ̇ܠܟܐ ܣܠܘܩܘܣ ܢܝܩܛܘܪ ܕܗܒܐ ܘܣܐܡܐ ܦ̣ܪܫ ܠܗܘܢ ܠܦܘܠܚܢܐ ܕܩܘܕܫܐ. ܘܕܘܒܪ̈ܝܗܘܢ ܥܠܘܗܝ ܐܬܩܒܠܘ ܗܘܘ.

81. Maccabees 4 3:21

    ܗܝ̇ܕܝܢ ܐܢ̈ܫܝܢ ܠܐܘܝܘܬܐ ܕܓܘܐ ܒܝܕ ܫܓܝܫܘܬܗܘܢ ܕܠܚܘ. ܘܒܥܩ̈ܬܐ ܕܙ̈ܢܝܢ ܙ̈ܢܝܢ ܢܦ̣ܠܘ.

82. Maccabees 4 4:1

    ܫܡܥܘܢ ܓܝܪ ܐܢܫ ܕܠܩܘܒܠܐ ܕܕܘܒܪ̈ܘܗܝ ܕܚܘܢܝܐ ܡܬܕܒܪ ܗܘܐ. ܗ̇ܘ ܕܗܝ̇ܕܝܢ ܐܝܬ ܗܘܐ ܠܗ ܪܒܘܬ ܟܗܢܘܬܐ. ܓܒܪܐ ܛ̇ܒܐ ܘܫܦܝܪܐ. ܡܛܠ ܕܒܟܠ ܐܣܟܝܡ ܩܪ̈ܨܘܗܝ ܩܕܡ ܥܡܐ ܐܟ̣ܠ. ܘܠܐ ܐܫܟܚ ܕܢܒܐܫ ܠܗ. ܥ̣ܪܩ ܘܫ̇ܢܝ ܕܠܐܬܪܗ ܢܫܠܡ.

83. Maccabees 4 4:2

    ܘܥܠ ܗܕܐ ܐܬ̣ܐ ܠܘܬ ܐܦܘܠܘܢܝܣ ܕܒܣܘܪܝܐ ܘܒܦܘܢܝܩܐ ܘܒܩܝܠܝܩܝܐ ܫܘܠܛܢܐ ܐܚܝܕ ܗܘܐ.

84. Maccabees 4 4:3

    ܘܐܡ̣ܪ ܠܗ. ܕܐܝܟ ܡ̇ܢ ܕܡܚܒ ܨܒ̈ܘܬܐ ܕܡ̇ܠܟܐ ܐܬܝ̇ܬ ܠܘܬܟ ܕܐܘܕܥܟ. ܕܪ̈ܒܘܬܐ ܣܓ̈ܝܐܬܐ ܕܟܣܦܐ ܕܐܢܫܐ ܕܠܝܬ ܠܗܘܢ ܦܠܚܘܬܐ ܒܒܝܬ ܓܙܐ ܕܐܘܪܫܠܡ. ܣܝ̣ܡܝܢ. ܨܝܕ ܟܗ̈ܢܐ. ܘܙܕ̈ܩܢ ܗ̣̈ܢܝܢ ܗܠܝܢ ܠܡܠܟܐ ܣܠܘܩܘܣ.

85. Maccabees 4 4:4

    ܐܦܘܠܘܢܝܘܣ ܕܝܢ. ܟܕ ܫܡ̣ܥ ܗܠܝܢ̣. ܠܫܡܥܘܢ ܫܒ̇ܚ ܥܠ ܚܨܝܦܘܬܐ ܕܐܝܬ ܠܗ ܠܘܬ ܡܠܟܐ. ܣ̣ܠܩ ܕܝܢ ܠܘܬ ܡ̇ܠܟܐ ܣܠܘܩܘܣ. ܘܐܘܕܥܗ ܥܠ ܣܝܡ̣̈ܬܐ ܕܟܣܦܐ ܗܢܐ.

86. Maccabees 4 4:5

    ܘܢܣ̣ܒ̇ ܫܘܠܛܢܐ ܕܥܠܘܗܝ. ܘܒܥܓܠ ܠܐܬܪܢ ܥܡ ܫܡܥܘܢ ܠܝܛܐ ܘܚܝܠܐ ܥܫܝܢܐ ܥܠ.

87. Maccabees 4 4:6

    ܘܐ̣ܡܪ ܗܘܐ ܕܐܝܟ ܡ̇ܢ ܕܠܦܘܩ̈ܕܢܘܗܝ ܕܡ̇ܠܟܐ ܡܫܬܡܥ ܐ̣ܬܐ. ܕܟܣܦܐ ܕܕܩܘܛܢܐ ܐܝܬܘܗܝ ܡܢ ܒܝܬ ܓܙܐ ܢܣ̣ܒ.

88. Maccabees 4 4:7

    ܟܕ ܕܝܢ ܥܡܐ ܠܘܩܒܠ ܡ̈ܠܘܗܝ ܐܬܬܘܗ. ܘܡܬܚܪܐ ܗܘܐ ܠܩܘܒܠܗ. ܘܡܬܪܥܐ ܕܨܒܘܬܐ ܗܝ ܡܪܝܪܬܐ̇. ܐܢ ܗ̣ܘ ܕܐܢ ܡܢ ܓܘܥ̈ܠܢܝܗܘܢ ܗܠܝܢ ܕܐܬܬܟܠܘ ܥܠ ܒܝܬ ܓܙܐ ܕܩܘܕܫܐ. ܡܬܛܠܡܝܢ.

89. Maccabees 4 4:8

    ܒܠܘܚܡܐ ܐܦܘܠܘܢܝܘܣ ܐ̇ܙܠ ܗܘܐ ܠܘܬ ܗܝܟܠܐ.

90. Maccabees 4 4:9

    ܣ̈ܒܐ ܕܝܢ ܥܡ ܢ̈ܫܐ ܘ̈ܛܠܝܐ ܡܢ ܐܠܗܐ ܒܥ̇ܝܢ ܗܘܘ. ܕܢܓܢ ܐܝܕܗ ܥܠ ܕܘܟܬܐ ܩܕܝܫܬܐ ܕܡܬܫܝܛܐ.

91. Maccabees 4 4:10

    ܟܕ ܕܝܢ ܣܠ̣ܩ ܗܘܐ ܒܚܝܠܐ ܕܠܒ̈ܫܐ ܐܦܠܘܢܝܣ ܠܡܒܙ ܟܣܦܐ ܗ̇ܘ. ܡܢ ܫܡܝܐ ܦܪ̈ܫܐ ܐܬܚܙܝܘ ܠܗ ܡܠܐ̈ܟܐ ܕܡܒܪܩܝܢ ܒܙܝܢܗܘܢ. ܘܕܚܠܬܐ ܣܓܝܐܬܐ ܘܪܥܠܐ ܒܗ ܪܡ̇ܝܢ ܗܘܘ.

92. Maccabees 4 4:11

    ܗܟܢܐ ܕܐܦ ܢܦ̣ܠ ܐܦܘܠܘܢܝܘܣ ܥܠ ܐܪܥܐ ܕܗܝܟܠܐ. ܘܩܪܝܒ ܗܘܐ ܠܡܡܬ. ܘܬ̣ܠܐ ܐܝܕ̈ܘܗܝ ܠܫܡܝܐ. ܘܒܕܡ̈ܥܐ ܣܓܝܐ̈ܬܐ ܡܢ ܥܒܪ̈ܝܐ ܡܬܟܫܦ ܗܘܐ ܕܢܨܠܘܢ ܥܠܘܗܝ. ܘܢܪܥܘܢ ܠܚܝܠܘ̈ܬܐ ܕܡܢ ܫܡܝܐ ܥܠܘܗܝ ܐܬܘ.

93. Maccabees 4 4:12

    ܐܡ̇ܪ ܗܘܐ ܓܝܪ ܕܥܠ ܕܚܛ̣ܐ ܫ̇ܘܐ ܗܘܐ ܕܢܡܘܬ. ܐܢܗ̣ܘ ܕܝܢ ܕܢܚܐ̣. ܠܟ̣ܠܗ̈ܘܢ ܒ̈ܢܝ ܐܢܫܐ ܢܬܢܐ ܛܘܒܗ ܕܗܝܟܠܐ.

94. Maccabees 4 4:13

    ܚܘܢܝܐ ܕܝܢ ܪܒ ܟܗ̈ܢܐ ܕܐܬܛܦܝܣ ܠܡ̈ܠܐ ܗܠܝܢ. ܘܬܘܒ ܕܕ̇ܚܠ ܗܘܐ ܕܠܐ ܢܣܒܪ ܠܗ ܡ̇ܠܟܐ ܣܠܘܩܘܣ̇. ܕܡܢ ܢܟܠܐ ܐܢܫܝܐ ܘܠܐ ܗܘܐ ܡܢ ܕܝܢ̣ܐ ܐܠܗܝܐ̇. ܐܦܠܢܝܣ ܐܬܩܛܠ. ܨ̇ܠܝ ܥܠܘܗܝ.

95. Maccabees 4 4:14

    ܘܗܟܢܐ ܚ̣ܝܐ ܬܗܝܪܐܝܬ. ܘܫ̇ܢܝ ܠܡܚܘܝܘܬܗ ܠܡ̇ܠܟܐ ܗܠܝܢ ܕܓܕܫܝܗܝ.

96. Maccabees 4 4:15

    ܟܕ ܕܝܢ ܡ̣ܝܬ ܣܠܘܩܘܣ ܡ̇ܠܟܐ. ܡܩ̇ܒܠ ܠܗ ܒܪܗ ܐܢܛܝܟܘܣ ܕܡܬܩܪܐ ܐܦܝܦܢܝܘܣ ܫܘܠܛܢܗ. ܓܒܪܐ ܪܡ̇ܐ ܘܒܝܫܐ.

97. Maccabees 4 4:16

    ܗ̣ܘ ܗܢܐ ܫܪܝܗܝ ܠܚܘܢܝܐ ܡܢ ܪܒܘܬ ܟܗܢܘܬܐ. ܘܐܩܝܡ ܠܐܝܣܘܢ ܐܚܘܗܝ. ܪܒ ܟܗ̈ܢܐ ܒܬܢܘܝ.

98. Maccabees 4 4:17

    ܕܐܢ ܗ̣ܘ ܕܢܦܣ ܠܗ ܪܫܢܘܬܐ̣. ܢܬܠ ܠܗ ܡܕܐܬܐ ܟܠ ܫܢܬܐ ܕܐܝܬ̣ ܬܠܬܐ ܐ̈ܠܦܝܢ ܘܫܬܡܐܐ ܘܫܬܝܢ ܟ̇ܟܪ̈ܝܢ.

99. Maccabees 4 4:18

    ܐܦܣ ܠܗ ܕܝܢ ܕܢܗܘܐ ܪܒ ܟܗ̈ܢܐ. ܘܐܫܠܛܗ ܕܢܕܒܪ ܠܥܡܐ.

100. Maccabees 4 4:19

     ܗ̣ܘ ܕܝܢ ܗܢܐ ܫܚܠܦ ܠܕܘܒܪ̈ܘܗܝ ܕܥܡܐ ܘܠܢܡܘ̈ܣܘܗܝ. ܟܕ ܢ̇ܓܕ ܠܗ ܠܘܬ ܟܠ ܥܒܪ ܢܡܘ̈ܣܝܢ.

Next → — showing 1–100 of 479

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.