← All works

Peshitta Maccabees 3

Peshitta (Syriac Old Testament) · 228 sections

1. Maccabees 3 4:9

   ܡܚܬܝܢ ܗܘܘ ܠܗܘܢ ܕܝܢ ܒܩܛܝܪܐ ܠܐܠܦ̈ܐ ܐܝܟ ܚܝܘ̈ܬܐ ܟܕ ܡܦܟܪܝܢ ܘܐܣܝܪܝܢ ܒܦܪܙܠܐ ܡܢܗܘܢ ܓܝܪ ܐܣܝܪܝܢ ܗܘܘ ܒܨܘܪ̈ܝܗܘܢ ܘܡܢܗܘܢ ܒܪ̈ܓܠܝܗܘܢ

2. Maccabees 3 4:10

   ܘܡܢܗܘܢ ܡܦܟܪܝܢ ܗܘܘ ܘܐܣܝܪܝܢ ܒܕܦ̈ܐ ܕܐ̈ܠܦܐ ܕܡܢ ܟܠ ܦܪܘܣ ܢܗܘܘܢ ܐܠܝܨܝܢ ܡܢ ܟܠܗܘܢ ܓܒ̈ܝܗܘܢ ܐܝܟܢܐ ܕܐܦ ܠܐ ܩܠܝܠ ܬܗܘܐ ܠܗܘܢ ܪܘܚܬܐ

3. Maccabees 3 4:11

   ܘܟܕ ܟܠܗܘܢ ܢܚܬܘ ܠܐܠܦ̈ܐ ܘܐܬܘ ܠܘܬ ܡܠܟܐ ܦܩܕ ܕܢܫܪܘܢ ܠܒܪ ܡܢ ܡܕܝܢܬܐ ܒܐܬܪܐ ܪܘܝܚܐ ܐܝܟ ܕܠܨܥܪܐ ܘܠܦܘܪܣܝܐ ܢܦܩ ܟܠ ܡܢܘ ܕܨܒܐ ܘܚܙܐ ܠܗܘܢ ܘܐܚܕܪ ܘܐܟܪܟ ܐܢܘܢ ܚܝܠܐ ܕܦܠܚ̈ܘܗܝ ܕܠܐ ܐܢܫ ܡܢܗܘܢ ܢܥܪܘܩ

4. Maccabees 3 4:12

   ܘܟܕ ܥܒܕ ܗܟܢܐ ܫܡܥ ܕܢܦܩܝܢ ܗܘܘ ܡܢ ܒܢܝ̈ ܥܡܗܘܢ ܠܘܬܗܘܢ ܘܒܟܝܢ ܗܘܘ ܘܡܬܬܢܚܝܢ ܥܠ ܕܘܘ̈ܢܐ ܘܒܝܫܬܐ ܕܓܕܫܬ ܠܐܚܝ̈ܗܘܢ

5. Maccabees 3 4:13

   ܘܐܬܚܡܬ ܘܪܓܙ ܣܓܝ ܘܦܩܕ ܕܐܦ ܠܗܠܝܢ ܒܗ ܒܕܡܘܬܐ ܕܚܒܪ̈ܝܗܘܢ ܢܐܠܨܘܢ ܐܢܘܢ ܒܟܠ ܐܘܠܨܢ ܘܡܕܡ ܠܐ ܢܬܒܨܪ ܠܗܘܢ ܡܢ ܗܢܘܢ

6. Maccabees 3 4:14

   ܘܢܟܬܒܘܢ ܐܢܘܢ ܠܟܠܗܘܢ ܒܫܡܐ ܘܐܩܝܡ ܝܘܡܐ ܕܠܟܠܗܘܢ ܢܚܒܠ ܘܢܘܒܕ ܐܢܘܢ

7. Maccabees 3 4:15

   ܘܫܪܝܘ ܗܘܘ ܡܟܬܒܝܢ ܠܗܘܢ ܒܐܘܠܨܢܐ ܩܫܝܐ ܘܡܪܝܪܐ ܒܚܦܝܛܘܬܐ ܣܓܝܐܬܐ ܡܢ ܕܕܢܚ ܫܡܫܐ ܘܥܕܡܐ ܕܥܪܒ ܘܝܗܒ ܗܘܐ ܠܗܘܢ ܙܒܢܐ ܐܪ̈ܒܥܝܢ ܝܘ̈ܡܝܢ ܕܢܟܬܒܘܢ ܠܟܠܗܘܢ

8. Maccabees 3 4:16

   ܡܠܟܐ ܕܝܢ ܚܕܐ ܗܘܐ ܘܡܬܒܣܡ ܘܥܒܕ ܡܫܬܝܐ ܣܓܝܐܐ ܒܝܬ ܦܬܟܪ̈ܘܗܝ ܒܥܘܝܪܘܬܐ ܘܒܫܘܒܗܪܐ ܣܓܝܐܐ ܕܐܚܝܕ ܗܘܐ ܠܗ ܘܒܦܘܡܗ ܗܘ ܡܣܝܒܐ ܘܒܬܪܥܝܬܐ ܫܛܝܬܐ ܠܚܪ̈ܫܐ ܥܘܝܪ̈ܐ ܕܠܐ ܡܡܠܠܝܢ ܘܠܐ ܫܡܥܝܢ ܡܫܒܚ ܗܘܐ ܘܠܟܐܢܘܬܐ ܘܙܕܝܩܘܬܐ ܫܐܛ ܗܘܐ ܘܡܣܠܐ ܘܡܡܠܠ ܗܘܐ ܡ̈ܠܐ ܕܓܘܕܦܐ

9. Maccabees 3 4:17

   ܡܢ ܒܬܪ ܕܝܢ ܙܒܢܐ ܕܣܝܡ ܗܘܐ ܠܗܘܢ ܠܡܟܬܒ̈ܢܐ ܩܪܒܘ ܠܘܬ ܡܠܟܐ ܘܐܡܪܘ ܠܗ ܕܠܐ ܡܬܡܨܝܢܢ ܚܝܠܐ ܠܡܟܬܒܘ ܐܢܘܢ ܠܟܠܗܘܢ ܝܘ̈ܕܝܐ ܡܛܠ ܕܣܓܝ̈ܐܝܢ ܐܢܘܢ ܛܒ

10. Maccabees 3 4:18

    ܘܠܐ ܡܫܟܚܝܢ ܠܡܬܡܢܝܘ ܡܛܠ ܕܡܠܐ ܗܘܐ ܡܢܗܘܢ ܐܬܪܐ ܘܠܐ ܐܝܬ ܒܝܬܐ ܕܠܐ ܐܝܬ ܒܗ ܡܢܗܘܢ ܘܩܛܝܥܐ ܗܝ ܗܕܐ ܕܠܐ ܡܫܟܚܝܢ ܐܣܛܪ̈ܛܝܓܐ ܕܡܨܪܝܢ ܕܢܡܢܘܢ ܐܢܘܢ

11. Maccabees 3 4:19

    ܘܟܕ ܫܡܥ ܡܠܟܐ ܠܗܘܢ ܠܗܠܝܢ ܐܬܚܡܬ ܥܠܝܗܘܢ ܣܓܝ ܐܝܟ ܕܫܘܚܕܐ ܠܡ ܫܩܠܘ ܡܢܗܘܢ ܘܥܠܬܐ ܐܚܕܘ ܠܗܘܢ ܕܢܐܡܪܘܢ ܥܠܝܗܘܢ ܗܠܝܢ ܗܝܕܝܢ ܩܪܒܘ ܘܡܦܝܣܝܢ ܗܘܘ ܠܗ ܒܫܪܪܐ

12. Maccabees 3 4:20

    ܘܡܚܘܝܢ ܗܘܘ ܠܗ ܟܪ̈ܛܐܣܐ ܐܝܟܐ ܕܐܟܬܒܘ ܗܘܘ ܐܢܘܢ ܘܐܡܪܝܢ ܗܘܘ ܠܗ ܕܐܦ ܟܠܗܘܢ ܩܢܝܢ ܓܡܪܘ ܘܐܘܦܝܘ

13. Maccabees 3 4:21

    ܗܕܐ ܕܝܢ ܐܝܬܝܗ ܗܘܬ ܒܡܥܒܕܢܘܬܐ ܕܚܝܠܗ ܕܐܠܗܐ ܕܠܐ ܡܙܕܟܐ ܠܥܘܕܪܢܐ ܕܝܘ̈ܕܝܐ

14. Maccabees 3 5:1

    ܗܝܕܝܢ ܩܪܐ ܡܠܟܐ ܠܗܪܡܘܢ ܗܘ ܕܥܒܝܕ ܗܘܐ ܪܝܫܐ ܘܡܕܒܪܢܐ ܕܦ̈ܝܠܐ ܘܦܩܕܗ ܕܣܓܝ ܢܐܨܦ ܕܦܝ̈ܠܐ ܕܡܫܝܚܢ ܗܘܐ ܘܡܠܐ ܚܡܬܐ ܘܪܘܓܙܐ ܕܠܐ ܡܬܬܚܝܕܝܢ

15. Maccabees 3 5:2

    ܘܐܡܪ ܠܗ ܕܠܡܚܪ ܐܣܓܐ ܐܫܩܐ ܠܒܘܢܬܐ ܘܚܡܪܐ ܚܝܐ ܠܦ̈ܝܠܐ ܟܠܗܘܢ ܕܗܘܝܢ ܗܘܘ ܒܡܢܝܢܐ ܐܝܟ ܚܡܫ ܡܐܐ ܘܫܝܚܢ ܐܢܘܢ ܒܫܩܝܐ ܣܓܝܐܐ ܕܪܘܝܘܬܐ ܕܢܥܠ ܘܢܪܡܐ ܐܢܘܢ ܥܠ ܝܘ̈ܕܝܐ ܕܢܚܒܠܘܢ ܘܢܘܒܕܘܢ ܐܢܘܢ

16. Maccabees 3 5:3

    ܘܟܕ ܦܩܕ ܕܝܢ ܗܢܝܢ ܗܠܝܢ ܐܬܦܢܝ ܠܗ ܠܒܘܣܡܐ ܘܩܪܐ ܠܪ̈ܚܡܘܗܝ ܘܠܪ̈ܘܪܒܢܘܗܝ ܗܢܘܢ ܕܝܬܝܪܐܝܬ ܣܢܝܢ ܗܘܘ ܠܝܘ̈ܕܝܐ

17. Maccabees 3 5:4

    ܡܕܒܪܢܗܘܢ ܕܝܢ ܕܦܝ̈ܠܐ ܕܫܡܗ ܗܘܐ ܐܪܗܪܘܛ ܡܕܡ ܕܐܬܦܩܕ ܗܘܐ ܠܗܪܡܘܢ ܥܒܕ

18. Maccabees 3 5:5

    ܡܫܡ̈ܫܢܝܗܘܢ ܕܝܢ ܕܗܠܝܢ ܒܟܠ ܪܡܫܐ ܢܦܩܝܢ ܗܘܘ ܘܡܦܟܪܝܢ ܐܝ̈ܕܝܗܘܢ ܕܒܝܫ̈ܐ ܘܕܡܣܟ̈ܢܐ ܘܡܙܕܗܪܝܢ ܗܘܘ ܘܢܛܪܝܢ ܠܗܘܢ ܒܟܠ ܙܘܗܪ ܘܣܒܪܝܢ ܗܘܘ ܘܡܣܟܝܢ ܕܠܨܦܪܐ ܢܗܘܐ ܫܘܠܡܐ ܕܐܒܕܢܐ ܕܟܠܗܘܢ

19. Maccabees 3 5:6

    ܝܘ̈ܕܝܐ ܕܝܢ ܗܢܘܢ ܕܡܣܬܒܪܝܢ ܗܘܘ ܠܗܘܢ ܠܥܡܡ̈ܐ ܕܠܐ ܐܝܬ ܠܗܘܢ ܥܘܕܪܢܐ ܐܦܠܐ ܩܠܝܠ ܡܢ ܕܘܟܐ ܡܛܠ ܐܣܘܪ̈ܝܗܘܢ ܘܐܘܠܨ̈ܢܝܗܘܢ ܡܪܝܪ̈ܐ

20. Maccabees 3 5:7

    ܓܥܝܢ ܗܘܘ ܘܒܥܝܢ ܘܡܨܠܝܢ ܕܠܐ ܫܠܝܘ ܩܕܡ ܐܠܗܐ ܐܚܝܕ ܟܠ ܘܡܪܝܐ ܕܟܠ ܚܝ̈ܠܐ ܘܐܠܗܐ ܡܪܚܡܢܐ ܘܐܒܐ ܒܚ̈ܢܓܬܐ ܘܒܕܡ̈ܥܐ ܣܓܝ̈ܐܬܐ

21. Maccabees 3 5:8

    ܕܢܦܪܘܩ ܐܢܘܢ ܡܢ ܬܪܥܝܬܐ ܘܡܚܫܒܬܐ ܒܝܫܬܐ ܕܡܬܚܫܒܝܢ ܗܘܘ ܥܠܝܗܘܢ ܘܢܚܘܐ ܒܗܘܢ ܦܘܪܩܢܗ ܓܠܝܐܝܬ ܘܢܦܨܐ ܐܢܘܢ ܡܢ ܡܘܬܐ ܡܪܝܪܐ ܕܡܛܝܒ ܠܗܘܢ

22. Maccabees 3 5:9

    ܕܗܠܝܢ ܕܝܢ ܒܥܘܬܗܘܢ ܐܡܝܢܐܝܬ ܣܠܩܐ ܗܘܬ

23. Maccabees 3 5:10

    ܘܗܪܡܘܢ ܕܝܢ ܠܦ̈ܝܠܐ ܕܠܐ ܪ̈ܚܡܐ ܐܫܩܝ ܘܐܪܘܝ ܐܢܘܢ ܒܚܡܪܐ ܕܡܚܠܛ ܥܡ ܠܒܘܢܬܐ ܘܠܨܦܪܗ ܕܝܘܡܐ ܐܬܐ ܠܕܪܬܗ ܕܡܠܟܐ ܕܢܘܕܥܝܘܗܝ ܗܝ ܗܕܐ

24. Maccabees 3 5:11

    ܡܪܚܡܢܐ ܕܝܢ ܘܡܠܟ ܡܠܟ̈ܐ ܐܪܡܝ ܫܢܬܐ ܥܠ ܡܠܟܐ

25. Maccabees 3 5:12

    ܘܕܡܟ ܒܫܢܬܐ ܝܩܝܪܬܐ ܡܢ ܪܡܫܐ ܘܥܕܡܐ ܠܬܫܥ ܫ̈ܥܝܢ ܒܡܥܒܕܢܘܬܐ ܕܗܘ ܕܫܠܝܛ ܥܠ ܟܠ ܘܡܢ ܥܕܢܐ ܕܣܝܡ ܗܘܐ ܠܗ ܕܢܘܒܕ ܐܢܘܢ ܣܓܝ ܐܫܬܘܚܪ ܘܐܬܒܛܠ ܪܥܝܢܐ ܪܡܐ ܘܫܒܗܪܢܐ

26. Maccabees 3 5:13

    ܝܘ̈ܕܝܐ ܕܝܢ ܟܕ ܚܙܘ ܕܦܠܛܘ ܡܢ ܫܥܬܐ ܗܝ ܕܣܝܡܐ ܗܘܬ ܠܗܘܢ ܐܘܕܝܘ ܘܫܒܚܘ ܠܐܠܗܗܘܢ ܩܕܝܫܐ ܘܬܘܒ ܒܥܝܢ ܗܘܘ ܘܡܬܟܫܦܝܢ ܡܢ ܡܪܚܡܢܐ ܕܢܬܪܥܐ ܠܗܘܢ ܡܠܝܐܝܬ ܘܢܚܘܐ ܘܢܘܕܥ ܚܝܠܐ ܘܥܘܕܪܢܗ ܕܕܪܥܗ ܒܥ̈ܡܡܐ ܪ̈ܡܐ ܘܫܒܗܪ̈ܢܐ

27. Maccabees 3 5:14

    ܟܕ ܓܝܪ ܩܪ̈ܝܒܢ ܕܢܗ̈ܘܝܢ ܥܣܪ̈ ܫ̈ܥܝܢ ܘܚܙܐ ܪܒܝܬܗ ܕܟܠܗܘܢ ܐܝܠܝܢ ܕܩܪܝܢ ܠܗ ܠܡܠܟܐ ܐܬܘ ܠܫܪܘܬܐ ܩܪܒ ܘܕܩܪܗ ܠܡܠܟܐ ܒܣܛܪܗ

28. Maccabees 3 5:15

    ܘܠܡܚܣܢ ܐܬܬܥܝܪ ܘܐܘܕܥܗ ܕܥܕܢܐ ܗܘ ܕܫܪܘܬܐ ܗܘܐ ܘܐܡܪ ܠܗ ܥܠ ܟܠܡܕܡ ܕܗܘ ܡܠܟܐ ܐܬܚܫܒ ܗܘܐ ܕܢܥܒܕ

29. Maccabees 3 5:16

    ܗܘ ܕܝܢ ܟܕ ܫܡܥ ܗܘܐ ܐܙܠ ܠܡܫܬܝܐ ܘܦܩܕ ܕܟܠܗܘܢ ܐܝܠܝܢ ܕܐܬܘ ܠܫܪܘܬܗܘܢ ܢܣܬܡܟܘܢ ܠܩܘܒܠܗ

30. Maccabees 3 5:17

    ܘܗܘ ܡܓܪܓ ܗܘܐ ܠܗܘܢ ܠܒܘܣܡܐ ܘܟܕ ܗܘܐ ܪܡܫܐ ܘܣܓܝ ܡܓܪܝܢ ܗܘܘ ܒܡܫܬܝܐ

31. Maccabees 3 5:18

    ܘܒܡܡܠܠܐ ܣܓܝܐܐ ܩܪܝܗܝ ܡܠܟܐ ܠܗܪܡܘܢ ܒܚܡܬܐ ܩܫܝܬܐ ܘܡܫܐܠ ܗܘܐ ܠܗ ܕܒܐܝܕܐ ܥܠܬܐ ܦܠܛܘ ܝܘ̈ܕܝܐ ܡܢ ܝܘܡܐ ܕܣܝܡ ܗܘܐ ܠܗܘܢ ܕܢܐܒܕܘܢ ܒܗ

32. Maccabees 3 5:19

    ܘܗܘ ܥܢܐ ܘܐܡܪ ܠܗ ܕܟܠܡܕܡ ܕܦܩܕܬ ܛܝܒܬ ܘܥܬܕܬ ܡܢ ܠܠܝܐ ܐܦ ܪ̈ܚܡܘܗܝ ܣܗܕܘ ܘܐܡܪܘ ܕܗܟܢܐ ܥܒܕ

33. Maccabees 3 5:20

    ܘܗܘ ܕܝܢ ܟܕ ܫܡܥ ܠܐ ܐܬܡܟܟ ܡܢ ܪܥܝܢܗ ܪܡܐ ܘܫܒܗܪܢܐ ܐܠܐ ܐܡܪܚ ܘܐܡܪ ܠܗܘܢ ܛܝܒܘܬܐ ܕܝܘܡܢܐ ܠܫܢܬܐ ܢܐܚܕܘܢ ܠܡܚܪ ܕܝܢ ܕܠܐ ܟܠܝܢܐ ܟܠܡܕܡ ܕܐܬܦܩܕܬ ܥܬܕ ܘܛܝܒ ܦܝ̈ܠܐ ܠܐܒܕܢܗܘܢ ܘܠܚܘܒܠܗܘܢ ܕܝܘ̈ܕܝܐ

34. Maccabees 3 5:21

    ܘܟܕ ܗܠܝܢ ܦܩܕ ܡܠܟܐ ܟܠܗܘܢ ܪ̈ܘܪܒܢܘܗܝ ܚܕܝܐܝܬ ܐܙܠܘ ܠܒ̈ܬܝܗܘܢ

35. Maccabees 3 5:22

    ܘܠܐ ܐܬܬ ܠܗܘܢ ܫܢܬܐ ܡܢ ܨܦܬܐ ܘܪܢܝܐ ܕܡܨܛܢܥܝܢ ܗܘܘ ܕܐܝܟܢܐ ܢܘܒܕܘܢ ܘܢܚܒܠܘܢ ܐܢܘܢ ܠܝܘ̈ܕܝܐ

36. Maccabees 3 5:23

    ܟܕ ܩܪܐ ܬܪܢܘܓܠܐ ܘܩܪܝܒ ܕܢܢܗܪ ܙܝܢ ܗܪܡܘܢ ܠܦ̈ܝܠܐ ܘܐܬܐ ܩܕܡ ܕܪܬܗ ܕܡܠܟܐ

37. Maccabees 3 5:24

    ܡܕܝܢܬܐ ܕܝܢ ܟܠܗ ܡܬܟܢܫܐ ܗܘܬ ܥܠ ܚܙܬܐ ܕܥܘܠܐ ܕܡܛܝܒܐ ܗܘܬ ܕܬܓܕܫ ܠܝܘ̈ܕܝܐ ܠܨܦܪܗ ܕܝܘܡܐ

38. Maccabees 3 5:25

    ܝܘ̈ܕܝܐ ܕܝܢ ܟܕ ܚܙܘ ܕܩܪܒܬ ܫܥܬܐ ܕܣܝܡܐ ܕܢܐܒܕܘܢ ܒܗ ܒܟܝܢ ܗܘܘ ܒܕܡ̈ܥܐ ܣܓܝ̈ܐܬܐ ܘܦܪ̈ܝܣܢ ܗܘܝ ܐܝܕܝ̈ܗܘܢ ܠܫܡܝܐ ܘܓܥܝܢ ܗܘܘ ܘܒܥܝܢ ܡܢ ܐܠܗܐ ܪܒܐ ܘܚܝܠܬܢܐ ܕܥܓܠ ܘܡܣܪܗܒܐܝܬ ܢܥܕܪ ܐܢܘܢ

39. Maccabees 3 5:26

    ܡܠܟܐ ܕܝܢ ܩܡ ܩܕܡ ܕܠܐ ܢܣܩ ܫܡܫܐ ܘܡܣܟܐ ܗܘܐ ܠܪ̈ܚܡܘܗܝ ܘܩܪܒ ܗܪܡܘܢ ܘܐܥܒܪ ܩܕܡܘܗܝ ܟܠܗܘܢ ܦܝ̈ܠܐ ܟܕ ܡܚܙܩܝܢ ܘܡܙܝܢܝܢ ܐܝܟ ܦܘܩܕܢܗ ܕܡܠܟܐ

40. Maccabees 3 5:27

    ܗܘ ܕܝܢ ܟܕ ܚܙܐ ܬܡܗ ܘܐܬܕܡܪ ܥܠ ܥܘܬܕܗ ܕܥܘܠܐ ܗܘ ܕܒܟܠܡܕܡ ܥܘܝܪ ܗܘܐ ܒܡܚܫܒܬܗ ܘܡܫܐܠ ܗܘܐ ܠܗܘܢ ܕܐܢ ܟܠܡܕܡ ܕܦܩܕܬ ܗܘܐ ܒܒܛܝܠܘܬܐ

41. Maccabees 3 5:28

    ܗܕܐ ܕܝܢ ܐܝܬܝܗ ܗܘܬ ܡܕܒܪܢܘܬܐ ܕܐܠܗܐ ܕܐܪܡܝ ܗܘܐ ܛܥܝܘܬܐ ܒܠܒܗ ܥܠ ܡܕܡ ܕܝܢ ܕܩܕܝܡ ܡܬܚܫܒ ܗܘܐ ܠܗ

42. Maccabees 3 5:29

    ܩܪܒ ܕܝܢ ܗܪܡܘܢ ܘܟܠܗܘܢ ܪ̈ܚܡܘܗܝ ܘܐܡܪܘ ܠܡܠܟܐ ܟܠܡܕܡ ܕܦܩܕܬ ܡܥܬܕ ܘܡܛܝܒ ܐܦ ܦܝ̈ܠܐ ܐܦ ܚ̈ܝܠܐ

43. Maccabees 3 5:30

    ܗܘ ܕܝܢ ܟܕ ܫܡܥ ܡܢܗܘܢ ܗܠܝܢ ܐܬܡܠܝ ܒܪܘܓܙܐ ܣܓܝܐܐ. ܕܨܒܘ ܪ̈ܚܡܘܗܝ ܕܐܠܗܐ ܘܒܛܠ ܠܟܠܗ ܡܚܫܒܬܗ ܘܚܪ ܒܗܪܡܘܢ ܩܫܝܐܝܬ ܘܨܥܪܗ ܒܡ̈ܠܐ ܩܫ̈ܝܬܐ ܘܐܡܪ ܠܗ

44. Maccabees 3 5:31

    ܐܠܘ ܗܘܘ ܐܢܫܝ̈ܟ ܘܒܢܝ̈ ܫܪܒܬܟ ܗܟܢܐ ܕܠܐ ܪ̈ܚܡܐ ܡܫܩܐ ܗܘܝܬ ܘܡܪܘܐ ܦܝ̈ܠܐ ܐܝܟ ܕܥܠ ܝܘ̈ܕܝܐ ܪ̈ܚܡܝ ܘܚܒ̈ܝܒܝ ܘܒܟܠ ܡܕܡ ܡܗܝܡ̈ܢܐ

45. Maccabees 3 5:32

    ܘܐܠܘ ܠܐ ܡܪܚܡܢܘܬܢ ܣܓܝܐܬܐ ܕܠܘܬ ܟܠܢܫ ܚܝ̈ܝܟ ܚܠܦܝܗܘܢ ܡܘܒܕ ܗܘܝܬ

46. Maccabees 3 5:33

    ܘܗܟܢܐ ܕܚܠ ܗܪܡܘܢ ܕܚܠܬܐ ܪܒܬܐ ܕܠܐ ܪܚܝܩ ܗܘܐ ܡܢ ܡܘܬܐ ܐܠܐ ܐܢ ܩܠܝܠ ܘܐܫܬܚܠܦ ܓܘܢܗ ܘܐܬܡܟܟ ܡܢ ܪܥܝܢܗ ܪܡܐ

47. Maccabees 3 5:34

    ܘܐܦ ܪ̈ܚܡܘܗܝ ܟܕ ܚܙܘ ܢܓܕܘ ܢܦܫܗܘܢ ܠܒܣܬܪܗܘܢ ܒܕܚܠܬܐ ܪܒܬܐ ܘܫܪܘ ܠܥܡܐ ܕܐܝܬ ܗܘܐ ܥܡܗܘܢ ܐܢܫ ܐܢܫ ܠܐܬܪܗ ܘܠܥܒܕܗ

48. Maccabees 3 5:35

    ܝܘ̈ܕܝܐ ܕܝܢ ܟܕ ܫܡܥܘ ܥܠ ܡܠܘ̈ܗܝ ܕܡܠܟܐ ܡܫܒܚܝܢ ܗܘܘ ܘܡܘܕܝܢ ܠܡܪܝܐ ܐܠܗܐ ܡܠܟ ܡܠܟ̈ܐ ܕܐܬܦܢܝ ܥܠܝܗܘܢ ܘܗܘܐ ܠܗܘܢ ܡܥܕܪܢܐ

49. Maccabees 3 5:36

    ܘܟܕ ܦܛܪ ܡܠܟܐ ܡܢ ܗܠܝܢ ܐܙܠ ܠܫܪܘܬܐ ܗܘ ܘܟܠܗܘܢ ܪ̈ܚܡܘܗܝ

50. Maccabees 3 5:37

    ܘܩܪܝܗܝ ܠܗܪܡܘܢ ܘܐܡܪ ܠܗ ܒܚܡܬܐ ܟܡܐ ܐܢܫ ܢܗܘܐ ܦܩܕ ܠܟ ܥܠܝܗܝܢ ܥܠ ܗܠܝܢ ܕܘܝܐ

51. Maccabees 3 5:38

    ܙܠ ܥܬܕ ܘܛܝܒ ܦ̈ܝܠܐ ܠܡܚܪ ܠܐܒܕܢܗܘܢ ܘܚܘܒܠܗܘܢ ܕܝܘ̈ܕܝܐ

52. Maccabees 3 5:39

    ܪ̈ܚܡܘܗܝ ܕܝܢ ܘܒ̈ܢܝ ܓܢܣܗ ܐܝܠܝܢ ܕܣܡܝܟܝܢ ܗܘܘ ܥܡܗ ܟܕ ܚܙܘ ܪܥܝܢܗ ܫܓܝܫܐ ܘܬܪܥܝܬܗ ܕܠܐ ܩܝܡܐ ܥܢܘ ܘܐܡܪܘ ܠܗ

53. Maccabees 3 5:40

    ܡܠܟܐ ܥܕܡܐ ܠܐܡܬܝ ܡܢܣܐ ܐܢܬ ܠܢ ܕܗܐ ܬܠܬ ܙܒ̈ܢܝܢ ܦܩܕܬ ܕܢܐܒܕܘܢ ܘܬܘܒ ܗܦܟ ܐܢܬ ܘܫܪܐ ܐܢܬ ܦܘܩ̈ܕܢܝܟ

54. Maccabees 3 5:41

    ܘܡܛܠ ܗܢܐ ܐܦ ܡܕܝܢܬܐ ܡܬܟܢܫܐ ܘܩܪܝܒܐ ܕܟܠܗ ܬܚܪܒ ܡܢ ܫܚܩܐ ܕܟܘܠ ܝܘܡ

55. Maccabees 3 5:42

    ܘܡܠܟܐ ܟܕ ܫܡܥ ܗܠܝܢ ܐܬܡܠܝ ܪܡܘܬܐ ܘܫܘܒܗܪܐ ܘܐܥܘܪ ܟܠܗ ܡܕܥܗ ܘܛܥܐ ܥܘܕܪܢܐ ܕܗܘܘ ܥܡ ܝܘ̈ܕܝܐ ܡܢ ܩܕܝܡ ܘܕܐܬܒܛܠܬ ܡܚܫܒܬܗ ܬܠܬ ܙܒ̈ܢܝܢ ܥܕ ܗܫܐ ܘܝܡܐ ܡܘܡܬܐ ܗܝ ܕܠܐ ܡܫܬܠܡܐ ܘܐܡܪ ܕܠܗܠܝܢ ܡܢ ܩܕܡ ܟܠܡܕܡ ܠܡܚܪ ܐܫܕܪ ܠܫܝܘܠ ܥܡ ܐܒܗ̈ܐ ܘܒ̈ܢܝܐ ܒܫܚܩܐ ܕܚܡܬܐ ܘܕܝܫܐ ܕܪ̈ܓܠܐ

56. Maccabees 3 5:43

    ܐܣܩ ܕܝܢ ܬܘܒ ܥܠ ܝܗܘܕܐ ܘܒܥܓܠ ܐܫܚܘܩ ܘܐܘܒܕܝܗ ܒܣܝܦܐ ܘܒܢܘܪܐ ܘܐܥܒܕܝܗ ܐܝܟ ܦܩܥܬܐ ܘܠܗܝܟܠܗܘܢ ܗܘ ܕܟܠܐܘܢܝ ܕܢܥܘܠ ܠܗ ܒܥܓܠ ܐܘܩܕܝܘܗܝ ܒܢܘܪܐ ܘܐܬܪܐ ܕܡܩܪܒܝܢ ܒܗ ܬܡܢ ܩܘܪ̈ܒܢܐ ܐܚܪܒܝܘܗܝ ܘܐܥܒܕܝܘܗܝ ܐܝܟ ܡܕܒܪܐ ܟܠܗܘܢ ܝܘ̈ܡܬܗ

57. Maccabees 3 5:44

    ܗܝܕܝܢ ܪ̈ܚܡܘܗܝ ܘܒ̈ܢܝ ܓܢܣܗ ܫܢܝܘ ܡܢ ܠܘܬܗ ܒܚܕܘܬܐ ܟܕ ܫܡܥܘ ܕܒܡܘܡܬܐ ܐܫܪ ܕܢܘܒܕ ܐܢܘܢ ܘܐܙܠܘ ܘܥܬܕܘ ܘܟܢܫܘ ܚܝ̈ܠܐ ܒܐܬܪ̈ܘܬܐ ܪ̈ܘܝܚܐ ܕܡܕܝܢܬܐ ܕܢܗܘܘܢ ܢܛܪܝܢ ܠܗܘܢ ܠܝܘ̈ܕܝܐ

58. Maccabees 3 5:45

    ܗܘ ܕܝܢ ܕܥܒܝܕ ܗܘܐ ܥܠ ܦܝ̈ܠܐ ܐܝܟ ܕܐܬܦܩܕ ܐܫܩܝ ܠܦ̈ܝܠܐ ܘܐܪܘܝ ܐܢܘܢ ܘܫܝܚܢ ܐܢܘܢ ܣܓܝ ܒܚܡܪܐ ܘܠܒܘܢܬܐ ܘܐܝܬܝ ܐܢܘܢ ܠܐܬܪܐ ܪܘܝܚܐ ܕܐܝܬ ܗܘܐ ܒܡܕܝܢܬܐ

59. Maccabees 3 5:46

    ܥܡܐ ܕܝܢ ܣܓܝܐܐ ܐܬܟܢܫ ܗܘܐ ܠܒܪ ܡܢ ܡܕܝܢܬܐ ܥܠ ܚܙܬܐ ܕܥܘܠܐ ܘܥܠ ܗܘ ܕܥܒܝܕ ܗܘܐ ܥܠ ܦܝ̈ܠܐ ܠܕܪܬܗ ܕܡܠܟܐ ܘܐܡܪ ܠܗ ܘܓܘܙܠܗ ܠܪܥܝܢܗ

60. Maccabees 3 5:47

    ܘܗܘ ܟܕ ܫܡܥ ܐܬܡܠܝ ܒܚܡܬܐ ܘܒܪܘܓܙܐ ܪܒܐ ܘܒܬܪܥܝܬܐ ܕܪܘܫܥܐ ܘܕܒܪ ܠܟܠܗ ܚܝܠܗ ܥܡ ܦ̈ܝܠܐ ܘܟܠܗ ܥܘܬܕܗ ܘܢܦܩ ܘܨܒܐ ܗܘܐ ܕܒܠܒܐ ܩܫܝܐ ܘܒܥܝܢܐ ܪܫܝܥܬܐ ܢܚܘܪ ܘܢܚܙܐ ܡܘܬܗܘܢ ܘܒܝܫܬܗܘܢ ܕܡܣܟ̈ܢܐ ܘܕܒܝܫ̈ܐ

61. Maccabees 3 5:48

    ܘܟܕ ܢܦܩܘ ܦܝ̈ܠܐ ܠܒܪ ܡܢ ܬܪܥܗ ܕܡܕܝܢܬܐ ܥܡܐ ܣܓܝܐܐ ܢܩܝܦ ܗܘܐ ܠܗܘܢ ܘܟܕ ܚܙܘ ܝܘ̈ܕܝܐ ܚܠܐ ܣܓܝܐܐ ܕܣܠܩ ܘܩܠܐ ܕܪܘܒܐ ܥܫܝܢܐ

62. Maccabees 3 5:49

    ܣܒܪܘ ܕܗܝ ܗܝ ܫܥܬܐ ܕܫܘܠܡܐ ܕܚܪܬܗܘܢ ܘܟܕ ܒܟܝܢ ܘܡܕܡܥܝܢ ܣܓܝ ܡܢܫܩܝܢ ܗܘܘ ܚܕ ܠܚܕ ܘܡܥܦܩܝܢ ܗܘܘ ܐܢܫ ܠܐܢܫ ܠܒܪ ܫܪܒܬܗ ܘܐܚܪ̈ܢܐ ܕܝܢ ܟܕ ܚܙܘ ܝܠܘ̈ܕܐ ܕܝܢܩܝܢ ܚܠܒܐ ܒܟܝܢ ܗܘܘ ܘܡܬܬܢܚܝܢ ܥܠܝܗܘܢ ܕܡܛܬ ܗܘܬ ܫܥܬܐ ܕܫܘܠܡܗܘܢ

63. Maccabees 3 5:50

    ܘܟܕ ܐܬܕܟܪܘ ܥܘܕܪ̈ܢܐ ܘܦܘܪ̈ܩܢܐ ܕܡܢ ܫܡܝܐ ܕܗܘܘ ܥܡܗܘܢ ܡܢ ܩܕܝܡ ܫܕܘ ܢܦܫܗܘܢ ܟܠܗܘܢ ܥܠ ܐܪܥܐ ܘܦܪܫܘ ܝܠܘ̈ܕܐ ܡܢ ܬܕܝ̈ܐ ܕܐܡܗ̈ܝܗܘܢ

64. Maccabees 3 5:51

    ܘܓܥܘ ܒܚܢܓܬܐ ܘܒܓܥܬܐ ܪܒܬܐ ܘܥܫܝܢܬܐ ܠܘܬ ܗܘ ܕܡܨܐ ܒܚܝܠܐ ܥܠ ܟܠ ܕܨܒܐ ܕܢܥܕܪ ܐܢܘܢ ܒܪ̈ܚܡܐ ܣܓܝ̈ܐܐ ܠܗܢܘܢ ܕܗܐ ܩܝܡܝܢ ܥܠ ܬܪ̈ܥܐ ܕܡܘܬܐ

65. Maccabees 3 6:1

    ܐܠܝܥܙܪ ܕܝܢ ܓܒܪܐ ܚܕ ܝܕܝܥܐ ܕܐܝܬܘܗܝ ܗܘܐ ܡܢ ܟܗ̈ܢܐ ܕܒܘܟܪ̈ܐ ܘܒܫܢܝ̈ܐ ܣܒܐ ܗܘܐ ܘܒܦܘܠܚܢܐ ܕܕܚܠܬ ܐܠܗܐ ܡܫܡܠܝ ܗܘܐ ܒܟܠܡܕܡ ܦܩܕ ܠܩܫ̈ܝܫܐ ܕܥܡܗ ܕܢܨܠܘܢ ܘܢܒܥܘܢ ܡܢ ܐܠܗܐ ܩܕܝܫܐ ܐܦ ܗܘ ܨܠܝ ܟܕ ܐܡܪ ܗܟܢܐ

66. Maccabees 3 6:2

    ܡܠܟܐ ܥܫܝܢ ܐܘܚܕܢܐ ܡܪܝܡܐ ܕܐܚܝܕ ܟܠ ܕܡܕܒܪܬ ܟܠܗ ܒܪܝܬܟ ܒܪ̈ܚܡܐ

67. Maccabees 3 6:3

    ܚܘܪ ܘܐܬܦܢܝ ܥܠ ܙܪܥܗ ܕܐܒܪܗܡ ܘܒܢܘ̈ܗܝ ܕܝܥܩܘܒ ܩܕܝܫܟ ܡܢܬܐ ܩܕܝܫܬܐ ܕܓܒܝܬ ܠܟ ܥܡܟ ܒܐܪܥܐ ܢܘܟܪܝܬܐ ܥܡܐ ܐܟܣܢܝܐ ܘܡܣܟܢܐ ܕܐܒܕ ܣܪܝܩܐܝܬ ܒܥܘܠܐ ܐܒܐ

68. Maccabees 3 6:4

    ܐܢܬ ܠܦܪܥܘܢ ܚܝܠܬܢܗ ܕܡܨܪܝܢ ܕܐܣܓܝ ܗܘܐ ܠܗ ܡܪ̈ܟܒܬܐ ܘܐܬܬܪܝܡ ܘܐܫܬܩܠ ܒܫܘܒܗܪܐ ܪܒܐ ܘܒܠܫܢܐ ܕܡܡܠܠ ܪ̈ܘܪܒܬܐ ܥܡ ܚܝܠܗ ܥܫܝܢܐ ܘܪܡܐ ܛܒܥܬ ܘܐܘܒܕܬ ܒܥܘ̈ܡܩܘܗܝ ܕܝܡܐ ܘܐܕܢܚܬ ܢܘܗܪܐ ܕܪ̈ܚܡܐ ܠܙܪܥܗ ܕܐܝܣܪܝܠ

69. Maccabees 3 6:5

    ܐܢܬ ܠܣܢܚܪܝܒ ܡܠܟܐ ܕܐܬܘܪ ܕܐܬܬܪܝܡ ܘܐܫܬܒܗܪ ܥܠ ܚܝܠܗ ܕܠܐ ܡܬܡܢܐ ܕܟܒܫ ܘܫܩܠ ܐܪ̈ܥܬܐ ܣܓܝ̈ܐܬܐ ܘܐܬܬܪܝܡ ܐܦ ܥܠ ܡܕܝܢܬܟ ܩܕܝܫܬܐ ܘܡܠܠ ܡ̈ܠܐ ܕܓܘܕܦܐ ܘܕܫܘܒܗܪܐ ܫܚܩܬ ܘܡܟܟܬ ܡܪܝܐ ܘܐܘܕܥܬ ܠܥ̈ܡܡܐ ܣܓܝ̈ܐܐ ܐܘܚܕܢܟ ܪܒܐ ܘܥܫܝܢܐ

70. Maccabees 3 6:6

    ܐܢܬ ܠܬܠܬܝ̈ܗܘܢ ܚܒܪ̈ܐ ܒܒܒܝܠ ܕܐܫܠܡܘ ܢܦܫܗܘܢ ܠܝܩܕܢܐ ܕܢܘܪܐ ܕܠܐ ܢܦܠܚܘܢ ܠܣܪܝܩܘܬܐ ܘܠܣܦܝܩܘܬܐ ܢܛܪܬ ܐܢܘܢ ܒܓܘ ܐܬܘܢܐ ܕܢܘܪܐ ܘܐܦܩܬ ܐܢܘܢ ܟܕ ܡܫܠܡܝܢ ܕܠܐ ܢܟܝܢ ܥܕܡܐ ܠܡܢܬܐ ܕܣܥܪܐ ܘܠܒܥܠܒ̈ܒܝܗܘܢ ܐܘܩܕܬ ܫܠܗܒܝܬܐ ܕܢܘܪܐ

71. Maccabees 3 6:7

    ܐܢܬ ܗܟܝܠ ܠܕܢܝܐܝܠ ܕܐܬܐܟܠܘ ܩܪ̈ܨܘܗܝ ܘܐܫܬܪܝ ܠܓܘܒܐ ܕܐܪ̈ܝܘܬܐ ܕܢܚܒܠܘܢ ܘܢܘܒܕܘܢܗ ܐܦܩܬ ܠܢܘܗܪܐ ܟܕ ܠܝܬ ܒܗ ܢܟܝܢܐ

72. Maccabees 3 6:8

    ܘܠܝܘܢܢ ܕܐܫܬܕܝ ܒܥܘܡܩ̈ܘܗܝ ܕܝܡܐ ܘܐܬܒܠܥ ܡܢ ܢܘܢܐ ܘܒܟܐ ܘܨܠܝ ܩܕܡܝܟ ܡܢ ܟܪܣܗ ܕܢܘܢܐ ܫܡܥܬ ܒܩܠܗ ܘܐܚܝܬܝܗܝ ܘܦܠܛܬܝܗܝ ܡܢ ܟܪܣܗ ܕܢܘܢܐ ܘܚܘܝܬ ܠܟܠܗܘܢ ܕܪ̈ܐ ܐܒܐ ܚܝܠܟ ܘܪܒܘܬܟ

73. Maccabees 3 6:9

    ܘܗܫܐ ܠܢ ܕܗܐ ܐܝܬܝܢ ܒܨܥܪܐ ܘܒܐܘܠܨܢܐ ܪܒܐ ܐܢܬ ܡܪܚܡܢܐ ܕܡܓܢ ܐܢܬ ܟܢܦ̈ܝܟ ܥܠ ܟܘܠ ܚܘܪ ܘܐܬܦܢܝ ܒܥܓܠ ܥܠ ܙܪܥܗ ܕܐܝܣܪܝܠ ܕܗܐ ܡܨܛܥܪܝܢ ܡܢ ܥܡ̈ܡܐ ܪ̈ܫܝܥܐ ܘܛܡ̈ܐܐ

74. Maccabees 3 6:10

    ܐܢ ܚܛܗ̈ܝܢ ܘܣܟ̈ܠܘܬܢ ܣܗܕܘ ܒܢ ܕܗܟܢܐ ܢܡܘܬ ܦܪܘܩ ܠܢ ܡܪܝܐ ܡܢ ܐܝܕܐ ܕܒܥܠܕܒ̈ܒܝܢ ܘܐܢܬ ܐܝܟܢܐ ܕܨܒܐ ܐܢܬ ܒܐܝܕܝܟ ܐܪܕܝܢ ܘܐܘܒܕܢ

75. Maccabees 3 6:11

    ܕܠܐ ܢܫܒܚܘܢ ܚܣܝܪ̈ܝ ܪܥܝܢܐ ܠܕܚ̈ܠܬܗܘܢ ܣܪ̈ܝܩܬܐ ܥܠ ܐܒܕܢܗܘܢ ܕܚܒ̈ܝܒܝܟ ܘܢܐܡܪܘܢ ܕܐܦܠܐ ܐܠܗܗܘܢ ܐܫܟܚ ܢܥܕܪ ܐܢܘܢ ܘܢܦܪܘܩ ܐܢܘܢ

76. Maccabees 3 6:12

    ܐܢܬ ܡܪܝܐ ܕܟܠ ܚܝܠܐ ܘܥܘܫܢܐ ܡܢ ܠܘܬܗ ܗܘ ܗܘ ܕܡܢ ܥܠܡ ܗܫܐ ܚܘܪ ܡܪܝܐ ܘܪܚܡ ܥܠܝܢ ܥܠ ܗܢܘܢ ܕܐܒܕܝܢ ܣܪܝܩܐܝܬ ܡܢ ܐܝܕܐ ܕܥܘ̈ܠܐ ܘܚܣܝܪ̈ܝ ܪܥܝܢܐ

77. Maccabees 3 6:13

    ܐܠܐ ܢܬܓܠܐ ܚܝܠܟ ܗܘ ܕܠܐ ܡܙܕܟܐ ܒܗܢܐ ܝܘܡܐ ܕܢܫܪܐ ܕܚܠܬܐ ܘܙܘܥܬܐ ܒܗܠܝܢ ܥܡ̈ܡܐ ܘܢܦܪܫ ܠܒ̈ܘܬܗܘܢ ܘܢܦܪܘܩ ܠܙܪܥܗ ܕܐܝܣܪܝܠ

78. Maccabees 3 6:14

    ܕܗܐ ܒܥܐ ܡܢܟ ܘܡܬܟܫܦ ܠܟ ܣܘܓܐܐ ܕܝܠܘ̈ܕܐ ܘܐܢܫ̈ܝܗܘܢ ܕܗܠܝܢ ܒܕܡ̈ܥܐ ܘܒܒܟܬܐ ܣܓܝܐܬܐ

79. Maccabees 3 6:15

    ܘܢܬܝܕܥ ܠܟܠܗܘܢ ܥܡ̈ܡܐ ܕܥܡܢ ܐܢܬ ܡܪܝܐ ܘܠܐ ܐܗܦܟܬ ܐܦܝ̈ܟ ܡܢܢ ܐܠܐ ܐܝܟ ܕܐܡܪܬ ܕܐܦܠܐ ܟܕ ܐܝܬܝܗܘܢ ܗܘܘ ܒܐܪܥܐ ܕܒܥܠܕܒ̈ܒܝܗܘܢ ܠܐ ܐܗܡܝܬ ܥܝ̈ܢܝ ܡܢܗܘܢ ܗܟܢܐ ܐܦ ܗܫܐ ܫܠܡ ܥܡܢ ܡܪܝܐ

80. Maccabees 3 6:16

    ܘܟܕ ܫܠܡ ܐܠܝܥܙܪ ܨܠܘܬܗ ܐܬܐ ܡܠܟܐ ܥܡ ܟܠܗ ܚܝܠܗ ܘܥܘܬܕܐ ܕܐܝܬ ܗܘܐ ܥܡܗ ܠܐܝܟܐ ܕܫܪܝܢ ܗܘܘ ܝܘ̈ܕܝܐ

81. Maccabees 3 6:17

    ܘܟܕ ܚܙܘ ܝܘ̈ܕܝܐ ܓܥܘ ܒܓܥܬܐ ܪܒܬܐ ܠܫܡܝܐ ܐܝܟ ܕܬܬܙܝܥ ܟܠܗ ܐܪܥܐ ܘܢܬܪܗܒܘܢ ܟܠܗܘܢ ܚܝܠܘ̈ܗܝ ܕܡܠܟܐ ܡܢ ܩܠ ܓܥܬܗܘܢ

82. Maccabees 3 6:18

    ܗܝܕܝܢ ܡܪܝܐ ܐܚܝܕ ܟܠ ܘܪܒ ܬܫܒܘܚܬܐ ܘܐܠܗܐ ܕܫܪܪܐ ܐܢܗܪ ܐܦܘ̈ܗܝ ܩܕܝܫ̈ܬܐ ܘܦܬܚ ܬܪ̈ܥܐ ܕܫܡܝܐ ܘܢܚܬܘ ܬܪ̈ܝܢ ܡܠܐܟ̈ܐ ܡܫܒ̈ܚܐ ܘܕܚܝ̈ܠܐ ܟܕ ܠܐ ܡܬܚܙܝܢ ܗܘܘ ܠܟܠܢܫ ܐܠܐ ܐܢ ܠܝܘ̈ܕܝܐ ܒܠܚܘܕ

83. Maccabees 3 6:19

    ܘܩܡܘ ܠܘܩܒܠ ܒܥܠܕܒ̈ܒܐ ܘܠܟܠܗ ܚܝܠܗܘܢ ܘܡܫܪ̈ܝܬܗܘܢ ܡܠܐܘܗ ܕܚܠܬܐ ܘܙܘܥܬܐ ܘܪܗܝܒܘܬܐ ܘܐܣܪܘ ܘܦܟܪܘ ܐܢܘܢ ܕܠܐ ܢܬܬܙܝܥܘܢ

84. Maccabees 3 6:20

    ܘܐܫܪܝܘ ܙܘܥܬܐ ܘܪܬܝܬܐ ܒܦܓܪܗ ܕܡܠܟܐ ܘܛܥܐ ܠܟܠܗ ܪܥܝܢܗ ܗܘ ܪܡܐ ܘܫܒܗܪܢܐ ܕܡܬܓܘܙܠ ܗܘܐ ܒܪܘܓܙܐ ܘܒܚܡܬܐ

85. Maccabees 3 6:21

    ܘܗܦܟܘ ܦܝ̈ܠܐ ܥܠ ܚܝ̈ܠܘܗܝ ܘܡܕܝܫܝܢ ܗܘܘ ܘܡܘܒܕܝܢ ܘܡܩܛܠܝܢ ܠܗܘܢ

86. Maccabees 3 6:22

    ܘܐܬܗܦܟ ܪܘܓܙܗ ܕܡܠܟܐ ܠܪ̈ܚܡܐ ܘܒܟܐ ܥܠ ܟܠܡܕܡ ܕܐܨܛܢܥ ܗܘܐ ܘܥܬܕ ܕܢܥܒܕ

87. Maccabees 3 6:23

    ܟܕ ܓܝܪ ܫܡܥ ܗܘܐ ܩܠܐ ܕܓܥܬܗܘܢ ܘܚܙܐ ܕܟܠܗܘܢ ܪܡܝܢ ܗܘܘ ܥܠ ܐܦ̈ܝܗܘܢ ܐܝܟ ܕܠܐܒܕܢܐ ܒܟܐ ܘܐܬܚܡܬ ܒܪܘܓܙܐ ܥܠ ܪ̈ܚܡܘܗܝ ܘܐܡܪ ܠܗܘܢ

88. Maccabees 3 6:24

    ܕܝܬܝܪ ܥܠ ܡܠܟ̈ܐ ܘܛܪ̈ܘܢܐ ܥܒܪܬ ܒܝܫܘܬܟܘܢ ܘܠܗ ܠܥܒܕ ܛܒܬܟܘܢ ܡܨܛܢܥܝܢ ܐܢܬܘܢ ܕܐܝܟܢܐ ܬܣܒܘܢܗ ܡܢܗ ܪܝܫܢܘܬܐ ܕܗܐ ܚܙܝܢ ܐܢܬܘܢ ܓܡܪܬ ܠܗ ܪܘܚܝ ܘܡܬܚܫܒܝܢ ܐܢܬܘܢ ܐܝܠܝܢ ܕܠܐ ܫܦܝܪ̈ܢ ܠܡܠܟܘܬܐ

89. Maccabees 3 6:25

    ܡܢܘ ܕܠܐܝܠܝܢ ܕܢܛܪܘ ܥܡܢ ܪ̈ܚܡܘܬܐ ܘܢܛܪܘ ܚܣ̈ܢܐ ܕܐܪܥܢ ܗܟܢܐ ܦܟܪ ܘܐܝܬܝ ܐܢܘܢ ܐܝܟ ܕܠܚܝܘ̈ܬܐ

90. Maccabees 3 6:26

    ܐܘ ܡܢܘ ܕܠܐܝܠܝܢ ܕܡܢ ܕܪܝܫ ܘܒܟܠܙܒܢ ܗܘܘ ܥܡܢ ܒܫܠܡܘܬܐ ܘܢܛܪܘ ܪ̈ܚܡܘܬܐ ܕܨܐܝܕܝܢ ܝܬܝܪ ܡܢ ܟܠܗܘܢ ܥܡ̈ܡܐ ܘܙܒ̈ܢܬܐ ܣܓܝ̈ܐܬܐ ܩܡܘ ܠܘܩܒܠ ܒܥܠܕܒ̈ܒܝܢ ܗܟܢܐ ܦܟܪ ܘܐܠܨ ܒܐܘܠܨ̈ܢܐ ܩܫܝ̈ܐ

91. Maccabees 3 6:27

    ܫܪܘ ܫܪܘ ܐܣܘܪ̈ܐ ܕܥܘܠܐ ܘܫܕܪܘ ܐܢܘܢ ܒܫܠܡܐ ܠܒ̈ܬܝܗܘܢ ܕܒܝܫܐܝܬ ܐܬܚܫܒܢ ܘܐܝܬܝܢ ܐܢܘܢ

92. Maccabees 3 6:28

    ܫܪܘ ܠܒ̈ܢܘܗܝ ܕܐܚܝܕ ܟܠ ܐܠܗܐ ܕܫܡܝܐ ܗܘ ܕܗܘܐ ܡܢ ܩܕܝܡ ܥܡ ܐܒ̈ܗܝܢ ܘܥܡܢ ܕܝܠܢ ܘܢܛܪ ܡܠܟܘܬܢ ܡܢ ܟܠ ܫܚܩܐ ܘܐܘܠܨܢܐ ܘܐܬܩܢ ܐܘܪ̈ܚܬܢ ܒܟܠܙܒܢ

93. Maccabees 3 6:29

    ܘܟܕ ܐܡܪ ܡܠܟܐ ܗܠܝܢ ܐܫܬܪܝܘ ܟܠܗܘܢ ܘܒܪܟܘ ܘܐܘܕܝܘ ܠܐܠܗܐ ܦܪܘܩܗܘܢ ܕܐܬܦܨܝܘ ܡܢ ܡܘܬܐ

94. Maccabees 3 6:30

    ܘܡܢ ܒܬܪ ܗܠܝܢ ܥܠ ܡܠܟܐ ܠܡܕܝܢܬܐ ܘܦܩܕ ܕܢܬܝܗܒ ܠܗܘܢ ܠܝܘ̈ܕܝܐ ܚܡܪܐ ܘܣܝܒܪܬܐ ܫܒ̈ܥܐ ܝܘ̈ܡܝܢ ܘܐܡܪ ܕܒܗܘ ܐܬܪܐ ܕܒܗ ܡܛܝܒ ܗܘܐ ܠܗܘܢ ܕܒܗ ܢܡܘܬܘܢ ܘܢܐܒܕܘܢ ܒܗ ܢܥܒܕܘܢ ܒܣܡܐ ܘܕܝܨܐ ܕܦܘܪܩܢܗܘܢ

95. Maccabees 3 6:31

    ܗܝܕܝܢ ܗܢܘܢ ܕܡܢ ܩܕܝܡ ܡܬܚܣܕܝܢ ܗܘܘ ܘܩܪܝܒܝܢ ܗܘܘ ܠܡܘܬܐ ܒܪܡ ܕܝܢ ܐܦ ܡܛܝܘ ܗܘܘ ܚܠܦ ܥܩܬܐ ܘܐܒܠܐ ܡܪܝܪܐ ܥܒܕܘ ܕܝܨܐ ܕܦܘܪܩܢܐ ܘܐܬܪܐ ܗܘ ܕܡܛܝܒ ܗܘܐ ܠܗܘܢ ܕܢܦܠܘܢ ܘܢܬܩܒܪܘܢ ܒܗ ܦܠܓܘܗܝ ܠܣܡ̈ܟܐ ܘܡܠܐ ܗܘܐ ܒܣܡܐ ܘܚܕܘܬܐ

96. Maccabees 3 6:32

    ܘܫܒܩܘ ܥܩܬܐ ܘܐܒܠܐ ܘܢܣܒܘ ܬܫܒ̈ܚܬܐ ܘܡܙܡܘܪ̈ܐ ܕܐܒܗ̈ܬܐ ܘܡܘܕܝܢ ܗܘܘ ܘܡܒܪܟܝܢ ܒܩܠܐ ܘܒܩܥܬܐ ܠܐܠܗܐ ܕܥܒܕ ܨܐܝܕܝܗܘܢ ܬܕܡܪ̈ܬܐ ܘܚܕܝܢ ܗܘܘ ܘܕܝܨܝܢ ܥܠ ܐܬܐ ܕܫܠܡܐ ܕܥܒܕ ܠܗܘܢ

97. Maccabees 3 6:33

    ܐܦ ܡܠܟܐ ܕܝܢ ܥܒܕ ܐܦ ܗܘ ܒܣܡܐ ܪܒܐ ܘܩܪܐ ܠܥܡܐ ܣܓܝܐܐ ܘܕܠܐ ܫܠܝܘ ܡܘܕܐ ܗܘܐ ܠܐܠܗܐ ܕܫܡܝܐ ܠܗܘ ܕܒܬܫܒܘܚܬܐ ܪܒܬܐ ܥܒܕ ܠܗ ܦܘܪܩܢܐ

98. Maccabees 3 6:34

    ܗܢܘܢ ܕܝܢ ܕܡܢ ܩܕܝܡ ܡܛܝܒܝܢ ܗܘܘ ܠܐܒܕܢܗܘܢ ܕܝܘ̈ܕܝܐ ܘܕܢܗܘܘܢ ܡܐܟܘܠܬܐ ܠܚܝܘ̈ܬܐ ܘܠܦܪ̈ܚܬܐ ܐܟܬܒܘ ܗܘܘ ܡܢܝܢܗܘܢ ܒܚܕܘܬܐ ܘܟܕ ܚܙܘ ܗܠܝܢ ܕܗܘܝܢ ܠܗܘܢ ܐܬܬܢܚܘ ܘܐܬܬܥܝܩܘ ܘܠܒܫܘ ܒܗܬܬܐ ܘܡܪܚܘܬܗܘܢ ܘܪܘܓܙܗܘܢ ܕܝܩܕ ܗܘܐ ܐܝܟ ܢܘܪܐ ܕܥܟܘ ܘܗܘܘ ܒܒܗܬܬܐ ܘܒܨܥܪܐ

99. Maccabees 3 6:35

    ܝܘ̈ܕܝܐ ܕܝܢ ܐܝܟ ܕܩܕܡܢ ܐܡܪܢ ܥܒܕܘ ܒܣܡܐ ܘܕܝܨܐ ܘܚܕܘܬܐ ܒܡܙܡܘܪ̈ܐ ܘܒܬܫܒ̈ܚܬܐ ܘܒܬܘ̈ܕܝܬܐ

100. Maccabees 3 6:36

     ܘܐܬܚܫܒܘ ܒܝܢܬܗܘܢ ܕܟܠ ܐܝܟܐ ܕܥܡܪܝܢ ܢܗܘܘܢ ܥܒܕܝܢ ܠܗܘܢ ܠܗܠܝܢ ܝܘ̈ܡܬܐ ܒܕܝܨܐ ܘܒܚܕܘܬܐ ܠܐ ܗܘܐ ܐܝܟ ܕܡܛܠ ܡܐܟܠܐ ܘܡܫܬܝܐ ܐܠܐ ܡܛܠ ܦܘܪܩܢܐ ܕܥܒܕ ܠܗܘܢ ܐܠܗܐ

← Previous · Next → — showing 101–200 of 228

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.