← All works

Peshitta Maccabees 3

Peshitta (Syriac Old Testament) · 228 sections

1. Maccabees 3 6:37

   ܘܩܪܒܘ ܘܐܡܪܘ ܠܡܠܟܐ ܕܢܫܬܪܘܢ ܘܢܐܙܠܘܢ ܠܒ̈ܬܝܗܘܢ

2. Maccabees 3 6:38

   ܐܟܬܒܘ ܗܘܘ ܐܢܘܢ ܕܝܢ ܡܢ ܚܡ̈ܫܐ ܘܥܣܪ̈ܝܢ ܒܝܪܚܐ ܥܕܡܐ ܠܐܪܒܥܬܐ ܐܪ̈ܒܥܝܢ ܝܘ̈ܡܝܢ ܐܩܝܡܘ ܗܘܘ ܓܝܪ ܕܢܘܒܕܘܢ ܐܢܘܢ ܡܢ ܚܡܫܬܐ ܥܕܡܐ ܠܫܒܥܬܐ ܬܠ̈ܬܐ ܝܘ̈ܡܝܢ

3. Maccabees 3 6:39

   ܕܒܗܘܢ ܚܘܝ ܬܫܒܘܚܬܐ ܕܪܒܘܬܗ ܘܕܪ̈ܚܡܘܗܝ ܡܪܝܐ ܕܫܠܝܛ ܥܠ ܟܠ ܘܦܪܩ ܐܢܘܢ ܒܬܕܡܘܪܬܐ ܪܒܬܐ

4. Maccabees 3 6:40

   ܟܠܗܘܢ ܕܝܢ ܡܬܒܣܡܝܢ ܗܘܘ ܡܢ ܡܕܡ ܕܝܗܒ ܗܘܐ ܠܗܘܢ ܡܠܟܐ ܥܕܡܐ ܠܐܪܒܥܣܪ̈ܐ ܕܒܗ ܩܪܒܘ ܗܘܘ ܠܡܠܟܐ ܕܢܫܬܕܪܘܢ

5. Maccabees 3 6:41

   ܡܠܟܐ ܕܝܢ ܫܒܚ ܐܢܘܢ ܘܟܬܒ ܠܗܘܢ ܐܓܪܬܐ ܗܟܢܐ ܠܘܬ ܐܣܛܪ̈ܛܝܓܐ ܕܒܟܠ ܡܕܝ̈ܢܬܐ ܟܕ ܡܘܕܐ ܗܘܐ ܠܗܘܢ ܣܓܝ

6. Maccabees 3 7:1

   ܦܛܘܠܘܡܘܣ ܦܝܠܘܡܛܘܪ ܡܠܟܐ ܠܟܠܗܘܢ ܐܣܛܪ̈ܛܓܐ ܕܒܡܨܪܝܢ ܘܠܟܠܗܘܢ ܐܝܠܝܢ ܕܡܩܝܡܝܢ ܠܢ ܥܠ ܨܒܘ̈ܬܐ ܫܠܡܐ ܘܚܘܠܡܢܐ

7. Maccabees 3 7:2

   ܚܠܝܡܝܢܢ ܕܝܢ ܐܦ ܚܢܢ ܐܦ ܒܢܝ̈ܢ ܐܦ ܥܒ̈ܝܕܬܢ ܡܛܘܠ ܕܐܠܗܐ ܪܒܐ ܗܘ ܐܬܩܢ ܨ̈ܒܘܬܢ ܐܟܡܐ ܕܨܒܝܢ ܗܘܝܢ

8. Maccabees 3 7:3

   ܐܢܫܐ ܕܝܢ ܡܢ ܪ̈ܚܡܝܢ ܘܐܝܠܝܢ ܕܣܓܝ ܢܩܝܦܝܢ ܗܘܘ ܠܢ ܒܣܢܐܬܐ ܕܐܝܬ ܗܘܬ ܠܗܘܢ ܥܡ ܝܘ̈ܕܝܐ ܐܦܝܣܘ ܕܢܟܢܫ ܠܟܠܗܘܢ ܝܘ̈ܕܝܐ ܕܬܚܝܬ ܫܘܠܛܢܢ ܘܢܫܢܩ ܘܢܘܒܕ ܐܢܘܢ ܘܢܫܬܢܕ ܒܗܘܢ ܒܟܠ ܐܘܠܨ̈ܢܝܢ

9. Maccabees 3 7:4

   ܟܕ ܐܡܪܝܢ ܗܘܘ ܕܗܢܘܢ ܠܐ ܫܒܩܝܢ ܠܗ ܠܡܠܟܘܬܢ ܕܢܗܘܐ ܒܗ ܫܠܡܐ ܘܫܝܢܐ ܡܛܠ ܒܥܠܕܒܒܘܬܐ ܕܐܝܬ ܗܘܬ ܠܗܘܢ ܥܠ ܟܠܗܘܢ ܝܘ̈ܕܝܐ ܘܒܣܢܐܬܐ ܕܐܝܬ ܗܘܬ ܠܗܘܢ ܥܡܗܘܢ

10. Maccabees 3 7:5

    ܦܟܪܘ ܘܐܝܬܝܘ ܐܢܘܢ ܐܝܟ ܕܠܐܢܫܐ ܒܝܫ̈ܐ ܘܡܚܝܒ̈ܐ ܕܠܐ ܕܝܢܐ ܘܕܠܐ ܫܘܐܠܐ ܘܨܒܘ ܕܢܩܛܠܘܢ ܘܢܘܒܕܘܢ ܐܢܘܢ ܐܟܚܕܐ ܠܟܠܗܘܢ ܒܒܝܫܬܐ ܘܒܪܘܓܙܐ ܘܛܪܘܢܘܬܐ ܕܡܠܒܫܝܢ ܗܘܘ ܝܬܝܪ ܡܢ ܣܩ̈ܘܬܝܐ

11. Maccabees 3 7:6

    ܚܢܢ ܕܝܢ ܥܠ ܗܠܝܢ ܐܬܒܐܫ ܠܢ ܘܐܬܚܡܬܢ ܣܓܝ ܘܐܝܟ ܡܪܚܡܢܘܬܐ ܘܢܝܚܘܬܐ ܕܐܝܬ ܠܢ ܠܘܬ ܟܠܢܫ ܥܠ ܡܚܣܢ ܐܫܟܚܢ ܕܢܦܨܐ ܐܢܘܢ ܡܢ ܡܘܬܐ ܘܕܢܬܠ ܠܗܘܢ ܚܝ̈ܐ ܘܝܕܥܢ ܫܪܝܪܐܝܬ ܕܐܠܗܐ ܗܘ ܡܥܕܪܢܗܘܢ ܕܝܘ̈ܕܝܐ ܘܐܝܟ ܐܒܐ ܥܠ ܐܦ̈ܝ ܒܢܘ̈ܗܝ ܗܟܢܐ ܡܬܟܬܫ ܚܠܦܝܗܘܢ

12. Maccabees 3 7:7

    ܘܡܛܠ ܪܚܡܘܬܗܘܢ ܘܫܠܡܘܬܗܘܢ ܕܥܡܢ ܘܥܡ ܐܒܗ̈ܝܢ ܐܬܚܫܒܢ ܘܫܒܩܢ ܐܢܘܢ ܒ̈ܢܝ ܚܐܪ̈ܐ ܡܢ ܟܠ ܨܒܘ ܕܐܝܬ

13. Maccabees 3 7:8

    ܘܦܩܕܢ ܕܟܠܢܫ ܐܢܫ ܡܢܗܘܢ ܢܬܦܢܐ ܠܗ ܡܕܡ ܕܐܬܢܣܒ ܡܢܗ ܟܕ ܠܐ ܐܦ ܩܠܝܠ ܐܢܫ ܢܛܠܘܡ ܐܢܘܢ ܘܢܚܣܕ ܐܢܘܢ ܥܠ ܟܠܡܕܡ ܕܓܕܫ ܠܗܘܢ

14. Maccabees 3 7:9

    ܬܗܘܘܢ ܕܝܢ ܝܕܥܝܢ ܕܐܢ ܗܘ ܕܢܨܛܢܥ ܘܢܥܒܕ ܠܗܘܢ ܡܕܡ ܕܒܝܫ ܐܘ ܢܥܝܩ ܐܢܘܢ ܒܡܕܡ ܠܐ ܗܘܐ ܠܒܪܢܫܐ ܥܒܕܝܢ ܚܢܢ ܐܠܐ ܠܐܠܗܐ ܡܪܝܡܐ ܗܘ ܕܫܠܝܛ ܥܠ ܟܠ ܚܝܠ ܡܛܠ ܕܗܘܝܘ ܬܒܘܥܐ ܕܗܠܝܢ ܘܕܐܢܫ ܢܥܪܘܩ ܐܘ ܢܬܦܠܛ ܡܢܗ ܠܐ ܡܫܟܚ ܗܘܝܬܘܢ ܚܠܝܡܝܢ. .

15. Maccabees 3 7:10

    ܘܟܕ ܢܣܒܘ ܕܝܢ ܐܓܪܬܐ ܠܐ ܨܒܘ ܕܒܪܫܥܬܗ ܢܚܙܩܘܢ ܐܠܐ ܒܥܘ ܡܢ ܡܠܟܐ ܕܠܝܘ̈ܕܝܐ ܐܝܠܝܢ ܕܡܢ ܨܒܝܢܗܘܢ ܣܛܘ ܘܐܪܚܩܘ ܡܢ ܐܠܗܐ ܩܕܝܫܐ ܘܢܡܘܣܗ

16. Maccabees 3 7:11

    ܡܛܠ ܝܥܢܘܬܐ ܕܟܪܣܗܘܢ ܢܩܒܠܘܢ ܦܘܪܥܢܐ ܘܕܝܢܐ ܐܝܟ ܕܫܘܝܢ ܡܛܠ ܕܐܦܠܐ ܒܨ̈ܒܘܬܗ ܕܝܢ ܕܡܠܟܐ ܐܫܬܟܚܘ ܫܪܝܪܝܢ

17. Maccabees 3 7:12

    ܗܘ ܕܝܢ ܟܕ ܫܡܥ ܕܫܪܝܪܐܝܬ ܐܡܪܝܢ ܩܒܠ ܡܢܗܘܢ ܘܫܒܚ ܐܢܘܢ ܘܝܗܒ ܠܗܘܢ ܫܘܠܛܢܐ ܕܠܟܠܗܘܢ ܡܣܛܝ̈ܢܐ ܘܥܒܪ̈ܝ ܢܡܘܣܐ ܢܩܛܠܘܢ ܘܢܘܒܕܘܢ ܐܢܘܢ ܟܠ ܕܐܝܬ ܬܚܝܬ ܫܘܠܛܢܐ ܕܡܠܟܘܬܗ ܟܠ ܐܝܟܐ ܕܨܒܝܢ ܗܢܘܢ ܒܫܘܠܛܢܐ ܕܢܦܫܗܘܢ

18. Maccabees 3 7:13

    ܗܝܕܝܢ ܟܗ̈ܢܐ ܘܥܡܐ ܫܒܚܘ ܠܡܠܟܐ ܐܝܟ ܡܐ ܕܙܕܩ ܗܘܐ ܘܐܪܝܡܘ ܩܠܐ ܕܬܫܒܘܚܬܐ ܕܗܠܠܘܢܝܗܝ ܘܢܦܩܘ ܟܕ ܚܕܝܢ

19. Maccabees 3 7:14

    ܘܟܕ ܐܬܝܢ ܗܘܘ ܒܐܘܪܚܐ ܟܠ ܡܢ ܕܢܦܠ ܗܘܐ ܒ̈ܐܝܕܝܗܘܢ ܡܢ ܡܣܛܝ̈ܢܐ ܩܛܠܝܢ ܗܘܘ ܠܗ ܒܡܘܬܐ ܩܫܝܐ ܘܡܦܪܣܝܐ

20. Maccabees 3 7:15

    ܘܒܗܘ ܝܘܡܐ ܩܛܠܘ ܬܠܬܡܐܐ ܓܒܪ̈ܝܢ ܘܥܒܕܘ ܒܣܡܐ ܘܚܕܘܬܐ ܪܒܬܐ ܘܩܛܠܘ ܠܟܠܗܘܢ ܡܣܝ̈ܒܐ

21. Maccabees 3 7:16

    ܗܢܘܢ ܕܝܢ ܗܠܝܢ ܕܗܘܐ ܠܗܘܢ ܐܠܗܐ ܡܥܕܪܢܐ ܥܕܡܐ ܠܡܘܬܐ ܘܦܪܩ ܐܢܘܢ ܡܫܠܡܢܐܝܬ ܡܢ ܟܘܠ ܐܘܠܨܢ ܢܦܩܘ ܡܢ ܡܕܝܢܬܐ ܟܕ ܡܟܠܠܝܢ ܒܟܠ ܗܒܒ̈ܐ ܕܒܣܡ̈ܢܐ ܘܒܚܕܘܬܐ ܘܒܕܝܨܐ ܡܘܕܝܢ ܗܘܘ ܘܡܫܒܚܝܢ ܒܬ̈ܫ̈ܒܚܬܐ ܪ̈ܘܪܒܬܐ ܠܐܠܗܐ ܕܐܒ̈ܗܝܗܘܢ ܕܠܥܠܡ ܗܘܝܘ ܦܪܘܩܗ ܕܐܝܣܪܝܠ

22. Maccabees 3 7:17

    ܘܟܕ ܐܬܘ ܕܝܢ ܠܦܛܘܠܡܐܝܣ ܗܝ ܕܡܛܠ ܫܦܝܪܘܬܐ ܕܡܘܬܒܗ ܡܬܩܪܝܐ ܡܟܠܠܬ ܒܘܪܕܐ ܢܦܩܘ ܟܠܗܘܢ ܒ̈ܢܝ ܡܕܝܢܬܐ ܐܟܚܕܐ ܘܐܪܥܘ ܐܢܘܢ ܒܫܠܡܐ ܘܩܘܝܘ ܬܡܢ ܫܒܥܐ ܝܘ̈ܡܝܢ

23. Maccabees 3 7:18

    ܘܐܬܒܣܡܘ ܪܘܪܒܐܝܬ ܡܛܠ ܕܦܩܕ ܗܘܐ ܓܝܪ ܡܠܟܐ ܕܡܢ ܕܝܠܗ ܢܗܘܘܢ ܡܬܙܝܢܝܢ ܥܕܡܐ ܕܟܠ ܐܢܫ ܐܢܫ ܡܢܗܘܢ ܢܐܙܠ ܠܒܝܬܗ ܒܫܠܡܐ

24. Maccabees 3 7:19

    ܘܥܒܕܘ ܗܠܝܢ ܝܘ̈ܡܬܐ ܒܬܫܒ̈ܚܬܐ ܘܒܬܘ̈ܕܝܬܐ ܐܝܠܝܢ ܕܙܕܩ̈ܢ ܗܘ̈ܝ ܘܐܩܝܡܘ ܐܦ ܬܡܢ ܕܢܗܘܘܢ ܥܒܕܝܢ ܠܗܘܢ ܠܗܢܘܢ ܝܘ̈ܡܬܐ ܟܠܗܘܢ ܝܘ̈ܡܬܗܘܢ ܒܚܕܘܬܐ ܘܒܕܝܨܐ

25. Maccabees 3 7:20

    ܘܒܗܘ ܐܬܪܐ ܕܫܪܝܢ ܗܘܘ ܒܗ ܐܩܝܡܘ ܒܗ ܥܡܘܕܐ ܘܥܒܕܘ ܬܡܢ ܒܝܬ ܨܠܘܬܐ ܘܐܙܠܘ ܒܚܕܘܬܐ ܟܕ ܚܕܝܢ ܘܡܬܒܣܡܝܢ ܟܠܢܫ ܠܐܬܪܗ ܘܠܡܕܝܢܬܗ ܒܝܡܐ ܘܒܝܒܫܐ ܘܒܢܗܪ̈ܘܬܐ

26. Maccabees 3 7:21

    ܘܒܦܘܩܕܢܗ ܕܡܠܟܐ ܐܬܬܪܝܡܘ ܘܐܫܬܩܠܘ ܥܠ ܒܥܠܕܒܒ̈ܝܗܘܢ

27. Maccabees 3 7:22

    ܘܫܩܠܘ ܟܠܡܕܡ ܕܐܬܒܙܙ ܗܘܐ ܡܢܗܘܢ ܟܕ ܠܐ ܐܢܫ ܡܡܪܚ ܗܘܐ ܕܢܛܠܘܡ ܐܢܘܢ ܐܦܠܐ ܩܠܝܠ ܒܦܘܪܩܢܐ ܪܒܐ ܕܥܒܕ ܗܘܐ ܠܗܘܢ ܐܠܗܐ ܪܒܐ ܘܚܝܠܬܢܐ

28. Maccabees 3 7:23

    ܘܒܪܝܟ ܗܘ ܦܪܘܩܗ ܕܐܝܣܪܝܠ ܠܥܠܡ ܥܠܡܝܢ

← Previous — showing 201–228 of 228

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.