← All works

Peshitta Maccabees 3

Peshitta (Syriac Old Testament) · 228 sections

1. Maccabees 3 1:1

   ܦܛܠܘܡܐܘܣ ܕܝܢ ܦܝܠܘܡܐܛܘܪ ܝܠܦ ܗܘܐ ܡܢ ܐܝܠܝܢ ܕܦܢܘ ܠܘܬܗ ܕܐܚܕ ܐܢܛܝܘܟܘܣ ܐܬܪ̈ܘܬܐ ܐܝܠܝܢ ܕܗܘ ܫܠܝܛ ܗܘܐ ܥܠܝܗܘܢ ܘܫܩܠ ܐܢܘܢ ܡܢܗ ܘܦܩܕ ܠܟܠܗܘܢ ܚܝܠܘ̈ܬܗ ܠܦܪ̈ܫܐ ܘܠܪ̈ܓܠܐ ܕܢܙܕܝܢܘܢ ܘܕܒܪ ܥܡܗ ܐܦ ܠܚܬܗ ܐܪܣܝܢܘܐܐ ܘܐܬܐ ܥܕܡܐ ܠܐܬܪ̈ܘܬܐ ܕܪܦܝ ܐܝܟܐ ܕܫܪܝܐ ܗܘܬ ܡܫܪܝܬܗ ܕܐܢܛܝܘܟܘܣ

2. Maccabees 3 1:2

   ܓܒܪܐ ܕܝܢ ܚܕ ܕܫܡܗ ܗܘܐ ܬܐܕܛܘܣ ܟܕ ܨܒܐ ܗܘܐ ܕܢܫܡܠܐ ܢܟܠܗ ܐܬܚܫܒ ܘܕܒܪ ܥܡܗ ܓܒܪ̈ܐ ܚܝ̈ܠܬܢܐ ܟܕ ܡܙܝܢܝܢ ܐܝܠܝܢ ܕܡܢ ܩܕܝܡ ܡܫܠܡܝܢ ܗܘܘ ܠܗ ܡܢ ܚܝܠܘ̈ܗܝ ܕܦܛܘܠܡܘܣ ܘܐܬܐ ܒܠܠܝܐ ܘܢܦܠ ܥܠ ܡܫܟܢܗ ܕܦܛܘܠܡܐܘܣ ܕܢܩܛܠܝܘܗܝ ܠܗ ܒܠܚܘܕܘܗܝ ܘܗܟܢܐ ܢܫܬܪܐ ܘܪܒܐ

3. Maccabees 3 1:3

   ܒܗܕܐ ܕܝܢ ܝܕܥ ܕܘܣܝܬܐܘܣ ܒܪ ܕܪܝܡܠܘܣ ܕܡܬܩܪܐ ܗܘܐ ܝܗܘܕܐ ܡܢ ܒܬܪܟܢ ܕܝܢ ܩܒܠ ܗܘܐ ܢܡܘܣܐ ܐܝܬܘܗܝ ܗܘܐ ܕܝܢ ܢܘܟܪܝܐ ܠܩܝܡܐ ܕܐܒܗ̈ܬܐ ܗܘ ܗܢܐ ܐܪܡܝ ܒܡܫܟܢܗ ܕܦܛܠܘܡܘܣ ܠܓܒܪܐ ܚܕ ܡܣܟܢܐ ܘܠܗ ܓܕܫ ܕܢܬܩܛܠ ܚܠܦ ܡܠܟܐ

4. Maccabees 3 1:4

   ܗܘܐ ܗܘܐ ܕܝܢ ܩܪܒܐ ܥܫܝܢܐ ܘܨ̈ܒܘܬܗ ܕܐܢܛܝܘܟܘܣ ܣܓܝ ܡܬܩܢܢ ܗ̈ܘܝ ܐܪܣܝܢܘܐܐ ܕܝܢ ܥܒܪܐ ܗܘܬ ܥܠ ܚܝ̈ܠܐ ܟܕ ܫܪܐ ܣܥܪܗ ܘܒܟܝܐ ܗܘܬ ܒܕܡܥ̈ܐ ܣܓܝ̈ܐܬܐ ܘܒܚ̈ܢܓܬܐ ܘܒܥܝܐ ܗܘܬ ܡܢܗܘܢ ܕܢܥܕܪܘܢ ܢܦܫܗܘܢ ܘܢܫܝ̈ܗܘܢ ܘܒ̈ܢܝܗܘܢ ܘܢܬܟܬܫܘܢ ܓܢܒܪܐܝܬ ܘܡܫܬܘܕܝܐ ܗܘܬ ܠܗܘܢ ܕܬܬܠ ܠܟܠ ܓܒܪ ܡܢܗܘܢ ܬܪ̈ܬܝܢ ܡܢ̈ܝܢ ܕܕܗܒܐ ܐܢ ܗܘ ܕܢܬܟܬܫܘܢ ܘܢܙܟܘܢ

5. Maccabees 3 1:5

   ܘܗܟܢܐ ܓܕܫ ܘܢܦܠܘ ܩܕܡܝܗܘܢ ܟܠܗܘܢ ܕܠܘܩܒܠܗܘܢ ܘܠܣܓܝ̈ܐܐ ܕܝܢ ܡܢܗܘܢ ܟܕ ܡܡܚܝܢ ܐܚܕܘ ܐܢܘܢ

6. Maccabees 3 1:6

   ܘܟܕ ܙܟܐ ܦܛܘܠܘܡܘܣ ܐܬܚܫܒ ܕܢܣܩ ܠܡܕܝ̈ܢܬܐ ܕܩܪ̈ܝܒܢ ܠܗ ܘܢܒܢܐ ܐܢܝܢ

7. Maccabees 3 1:7

   ܘܥܒܕ ܕܝܢ ܗܟܢܐ ܘܐܪܦܝ ܫܘܒܩ̈ܢܐ ܠܗܝܟ̈ܠܐ ܕܕܚܠܬܗܘܢ ܘܝܗܒ ܠܗܘܢ ܡܘ̈ܗܒܬܐ ܘܚܝܠ ܘܐܩܝܡ ܐܢܘܢ ܬܚܝܬ ܐܝܕܗ

8. Maccabees 3 1:8

   ܐܦ ܝܘ̈ܕܝܐ ܕܝܢ ܫܕܪܘ ܠܘܬܗ ܕܦܝܠܘܡܛܘܪ ܡܢ ܣܒ̈ܐ ܘܩܫܝ̈ܫܐ ܕܥܡܐ ܘܢܫܐܠܘܢ ܒܫܠܡܗ ܘܢܘܒܠܘܢ ܠܗ ܩܘܪܒܢܐ ܘܚܕܘܬܐ ܕܙܟܘܬܗ ܘܟܕ ܩܒܠ ܡܢܗܘܢ ܚܕܝ ܘܝܬܝܪܐܝܬ ܐܬܪܓܪܓ ܕܢܐܬܐ ܠܘܬܗܘܢ

9. Maccabees 3 1:9

   ܐܬܐ ܕܝܢ ܠܐܘܪܫܠܡ ܕܒܚ ܠܐܠܗܐ ܪܒܐ ܘܚܝܠܬܢܐ ܐܦ ܠܐܬܪܐ ܝܩܪ ܒܩܘܪ̈ܒܢܐ ܣܓܝ̈ܐܐ

10. Maccabees 3 1:10

    ܟܕ ܓܝܪ ܚܙܐ ܒܢܝܢܗ ܕܐܬܪܐ ܘܛܘܟܣܗ ܘܬܫܒܘܚܬܗ ܕܗܝܟܠܐ ܐܬܚܫܒ ܕܢܥܘܠ ܐܦ ܠܓܘܗ ܕܗܝܟܠܐ

11. Maccabees 3 1:11

    ܘܗܢܘܢ ܕܝܢ ܐܡܪܘ ܠܗ ܕܠܐ ܫܠܝܛ ܠܟ ܕܬܥܒܕ ܗܕܐ ܡܛܠ ܕܠܐ ܫܠܝܛ ܠܐ ܠܒ̈ܢܝ ܥܡܢ ܐܦܠܐ ܠܟܠܗܘܢ ܟܗ̈ܢܐ ܠܡܥܠ ܐܠܐ ܒܠܚܘܕ ܠܪܒܐ ܕܪ̈ܒܝ ܟܗ̈ܢܐ ܚܕܐ ܙܒܢ ܒܫܢܬܐ ܘܗܘ ܕܝܢ ܒܚܕܐ ܡܢ ܗܠܝܢ ܠܐ ܡܬܛܦܝܣ ܗܘܐ

12. Maccabees 3 1:12

    ܘܐܝܬܝܘ ܘܩܪܘ ܩܕܡܘܗܝ ܢܡܘܣܐ ܘܬܘܒ ܠܐ ܡܬܛܦܝܣ ܗܘܐ ܐܠܐ ܐܡܪ ܕܠܡܥܠ ܗܘ ܡܬܒܥܐ ܠܝ ܘܐܢܗܘ ܕܗܢܘܢ ܐܬܓܠܙܘ ܡܢ ܗܢܐ ܐܝܩܪܐ ܐܠܐ ܐܢܐ ܠܐ ܡܬܓܠܙ ܡܢܗ

13. Maccabees 3 1:13

    ܘܡܫܐܠ ܗܘܐ ܠܗܘܢ ܘܐܡܪ ܕܡܢܘ ܕܟܕ ܥܐܠ ܐܢܐ ܠܟܠܗܘܢ ܗܝܟ̈ܠܐ ܕܕܚܠܬܐ ܐܢܫ ܠܐ ܟܠܢܝ ܡܢ ܐܝܠܝܢ ܕܐܝܬ ܒܗܘܢ

14. Maccabees 3 1:14

    ܘܥܢܐ ܚܕ ܡܢܗܘܢ ܘܐܡܪ ܠܗ ܬܟܝܠܐܝܬ ܕܒܝܫܐܝܬ ܗܝ ܗܕܐ ܡܥܪܝܢ ܐܢܬܘܢ

15. Maccabees 3 1:15

    ܘܗܘ ܕܝܢ ܥܢܐ ܘܐܡܪ ܕܐܢ ܬܨܒܘܢ ܘܐܠܐ ܠܡܥܠ ܡܬܒܥܐ ܠܝ

16. Maccabees 3 1:16

    ܟܗ̈ܢܐ ܕܝܢ ܐܬܟܣܝܘ ܠܒܘܫܗܘܢ ܩܕܝܫܐ ܘܢܦܠܘ ܥܠ ܐܦ̈ܝܗܘܢ ܘܓܥܝܢ ܗܘܘ ܘܒܥܝܢ ܩܕܡ ܐܠܗܐ ܪܒܐ ܘܚܝܠܬܢܐ ܕܢܥܕܪ ܘܢܦܪܘܩ ܐܢܘܢ ܘܢܗܦܟ ܬܪܥܝܬܗ ܒܝܫܬܐ ܘܡܚܫܒܬܗ ܕܥܘܠܐ ܘܡܠܐܘܗܝ ܗܘܘ ܕܝܢ ܠܗܝܟܠܐ ܕܡܥ̈ܐ ܘܩܠܐ ܕܓܥܬܐ

17. Maccabees 3 1:17

    ܒ̈ܢܝ ܡܕܝܢܬܐ ܕܝܢ ܟܠܗܘܢ ܟܕ ܙܝܥܝܢ ܘܪܗܝܒܝܢ ܫܘܪ̈ܝܢ ܗܘܘ ܘܢܦܩܝܢ ܘܡܣܟܝܢ ܕܡܢܐ ܢܓܕܫ

18. Maccabees 3 1:18

    ܘܒ̈ܬܘܠܬܐ ܚܒ̈ܝܫܬܐ ܥܡ ܐܡܗ̈ܬܗܝܢ ܢܦ̈ܩܢ ܗܘܝ ܟܕ ܪܡܐ ܥܦܪܐ ܘܩܛܡܐ ܥܠ ܪ̈ܝܫܝܗܝܢ ܘܒܒܟܬܐ ܘܒ̈ܕܡܥܐ ܘܒܚ̈ܢܓܬܐ ܡܬܟܪ̈ܟܢ ܗܘܝ ܒܫ̈ܘܩܐ

19. Maccabees 3 1:19

    ܘܟ̈ܠܠܬܐ ܕܝܢ ܐܝܠܝܢ ܕܗܫܐ ܗܘܝ ܠܓܒܪ̈ܐ ܫܒ̈ܩܝ ܓܢܘ̈ܢܝܗܝܢ ܕܙܒܢܐ ܘܬܚܦܝܬܐ ܕܐܣܟܝܡܐ ܕܢܟܦܘܬܗܝܢ ܘܪ̈ܗܛܢ ܗܘܝ ܘܦܗ̈ܝܢ ܒܫܘܩܐ ܕܠܐ ܒܗܬܬܐ

20. Maccabees 3 1:20

    ܘܢܫ̈ܐ ܫܒ̈ܩܝ ܝܠܘ̈ܕܝܗܝܢ ܘܡܬܟܪ̈ܟܢ ܗܘ̈ܝ ܘܚܕܪ̈ܢ ܠܟܐ ܘܠܟܐ ܒܫܘ̈ܩܐ ܘܒܒܪ̈ܝܬܐ ܘܟܠܗ ܕܝܢ ܥܡܐ ܡܬܟܢܫ ܗܘܐ ܘܐܬܐ ܠܘܬ ܗܝܟܠܐ ܡܫܒܚܐ

21. Maccabees 3 1:21

    ܘܓܥܝܢ ܗܘܘ ܘܒܥܝܢ ܕܬܬܒܛܠ ܬܪܥܝܬܗ ܘܟܠܡܕܡ ܕܐܬܚܫܒ

22. Maccabees 3 1:22

    ܒ̈ܢܝ ܥܡܐ ܕܝܢ ܟܕ ܚܙܘ ܕܥܨܐ ܗܘܐ ܕܢܥܘܠ ܘܠܐ ܡܬܛܦܝܣ ܕܢܬܟܠܐ ܡܢ ܪܥܝܢܗ ܒܝܫܐ

23. Maccabees 3 1:23

    ܐܡܪܘ ܚܕ ܠܚܕ ܒܩܠܐ ܪܡܐ ܕܢܣܒܘܢ ܙܝܢܗܘܢ ܘܥܬܝܕܐܝܬ ܘܓܢܒܪܐܝܬ ܢܡܘܬܘܢ ܥܠ ܐܦ̈ܝ ܢܡܘܣܐ ܘܩܝ̈ܡܐ ܕܐܒܗ̈ܬܐ ܘܗܘܐ ܫܓܘܫܝܐ ܘܫܚܩܐ ܪܒܐ ܒܐܬܪܐ ܠܡܚܣܢ ܕܝܢ ܩܡܘ ܡܢ ܟܗ̈ܢܐ ܘܩܫܝ̈ܫܐ ܘܟܠܐܘܗܝ ܠܥܡܐ ܒܩܛܝܪܐ ܘܐܦܢܝܘ ܐܢܘܢ ܥܠ ܨܠܘܬܐ ܘܓܥܬܐ

24. Maccabees 3 1:24

    ܟܠܗ ܕܝܢ ܥܡܐ ܩܐܡ ܗܘܐ ܒܨܠܘܬܐ ܘܒܒܥܘܬܐ ܩܕܡܝܗܘܢ ܕܗܢܘܢ

25. Maccabees 3 1:25

    ܪ̈ܘܪܒܢܐ ܕܝܢ ܘܡܝܩܪ̈ܐ ܕܐܝܬ ܗܘܐ ܥܡܗ ܥܡ ܡܠܟܐ ܡܬܦܪܣܝܢ ܗܘܘ ܘܒܥܝܢ ܘܡܦܝܣܝܢ ܠܗ ܕܢܗܦܘܟ ܘܢܫܠܐ ܡܢ ܬܪܥܝܬܗ ܒܝܫܬܐ ܘܡܢ ܡܚܫܒܬܗ ܕܥܘܠܐ

26. Maccabees 3 1:26

    ܗܘ ܕܝܢ ܒܚܕܐ ܡܢ ܗܠܝܢ ܠܐ ܡܬܛܦܝܣ ܗܘܐ ܐܠܐ ܡܬܬܪܝܡ ܗܘܐ ܘܡܫܬܩܠ ܘܫܪܝ ܗܘܐ ܕܢܥܘܠ ܒܥܙܝܙܘܬܗ ܟܕ ܣܒܪ ܗܘܐ ܕܢܫܠܡ ܬܪܥܝܬܗ

27. Maccabees 3 1:27

    ܟܕ ܗܘܝܢ ܕܝܢ ܗܠܝܢ ܐܦ ܐܝܠܝܢ ܕܥܡܗ ܚܙܘ ܘܗܦܟܘ ܡܢ ܕܚܠܬܗܘܢ ܚܙܝܢ ܗܘܘ ܠܟܠܗ ܥܡܢ ܕܒܥܝܢ ܗܘܘ ܘܩܪܘ ܠܗܘ ܕܐܚܝܕ ܫܘܠܛܢܐ ܥܠ ܟܠ ܕܢܗܦܟ ܦܘܪܥܢܐ ܘܒܝܫܬܐ ܥܠ ܒܥܠܕܒ̈ܒܐ ܘܠܐ ܢܗܡܐ ܚܝܪܗ ܡܢ ܥܒܕܐ ܕܥܘܠܐ ܘܡܢ ܣܘܥܪܢܐ ܕܪܡܘܬܐ ܘܕܫܘܒܗܪܐ ܕܗܘܐ ܒܥܒܪ ܢܡܘܣܐ

28. Maccabees 3 1:28

    ܡܬܟܢܫܝܢ ܗܘܘ ܕܝܢ ܟܠܗܘܢ ܐܟܚܕܐ ܘܒܥܝܢ ܗܘܘ ܘܓܥܝܢ ܒܩܠܐ ܕܚܢܓܬܐ ܝܬܝܪ ܡܢ ܕܠܡܐܡܪ

29. Maccabees 3 1:29

    ܕܗܟܢܐ ܡܣܬܒܪ ܗܘܐ ܩܠܐ ܕܠܐ ܗܘܐ ܒ̈ܢܝܢܫܐ ܒܠܚܘܕ ܓܥܝܢ ܗܘܘ ܐܠܐ ܘܐܦ ܫܘܪ̈ܐ ܘܐܣ̈ܐ ܘܐܦ ܗܝ ܐܪܥܐ ܘܕܟܠܗܘܢ ܡܫܠܡܐ ܗܘܬ ܢܦܫܗܘܢ ܠܡܘܬܐ ܥܠ ܐܦܝ̈ ܗܝܟܠܐ ܕܠܐ ܢܣܬܝܒ

30. Maccabees 3 2:1

    ܫܡܥܘܢ ܕܝܢ ܪܒ ܟܗ̈ܢܐ ܣܡ ܒܘܪܟܐ ܩܕܡ ܡܕܒܚܐ ܘܦܫܛ ܐܝܕܘ̈ܗܝ ܘܨܠܝ ܒܚܟܡܬܐ ܘܐܡܪ ܗܟܢܐ

31. Maccabees 3 2:2

    ܡܪܝܐ ܡܪܝܐ ܡܠܟܐ ܕܫܡܝܐ ܘܡܪܐ ܕܟܠ ܕܝܢܐ ܩܕܝܫܐ ܕܒܩܕܝܫ̈ܐ ܒܠܚܘܕܘܗܝ ܩܕܡܝܐ ܐܚܝܕ ܟܘܠ ܚܘܪ ܒܢ ܕܗܐ ܡܬܐܠܨܝܢܢ ܡܢ ܛܡܐܐ ܘܡܣܝܒܐ ܘܫܒܗܪܢܐ ܘܚܝܠܐ ܟܪܝܗܐ ܘܕܘܝܐ

32. Maccabees 3 2:3

    ܐܢܬ ܗܘ ܓܝܪ ܕܒܪܝܬ ܟܠ ܘܟܠ ܐܚܝܕ ܐܢܬ ܒܚܝܠܟ ܙܕܝܩܐ ܐܢܬ ܗܘ ܓܝܪ ܕܠܟܘܠ ܐܝܠܝܢ ܕܡܬܬܪܝܡܝܢ ܘܡܫܬܩܠܝܢ ܒܟܠ ܥܒ̇ܕ ܐܢܬ

33. Maccabees 3 2:4

    ܕܐܢ ܐܢܬ ܠܩܕܡܝ̈ܐ ܕܥܒܕܘ ܥܘܠܐ ܐܦ ܠܓܢܒܪ̈ܐ ܕܥܡܗܘܢ ܕܬܟܝܠܝܢ ܗܘܘ ܥܠ ܥܘܫܢܐ ܕܚܝܠܗܘܢ ܚܒܠܬ ܒܡ̈ܝܐ ܣܓܝ̈ܐܐ ܕܛܘܦܢܐ ܕܠܐ ܡܬܟܠܝܢ

34. Maccabees 3 2:5

    ܐܢܬ ܠܣܕܘ̈ܡܝܐ ܕܡܫܬܩܠܝܢ ܗܘܘ ܘܡܬܬܪܝܡܝܢ ܒܥܒ̈ܕܝܗܘܢ ܟܕ ܐܬܓܠܝܬ ܘܐܬܝܕܥܬ ܒܝܫܘܬܗܘܢ ܐܘܩܕܬ ܐܢܘܢ ܒܢܘܪܐ ܘܒܟܒܪܝܬܐ ܘܥܒܕܬ ܐܢܘܢ ܚܙܘܐ ܕܬܕܡܘܪܬܐ ܠܟܠܗܘܢ ܕܪ̈ܐ ܕܡܢ ܒܬܪܗܘܢ

35. Maccabees 3 2:6

    ܐܢܬ ܠܦܪܥܘܢ ܪܒܐ ܘܫܒܗܪܢܐ ܕܫܥܒܕ ܠܥܡܟ ܩܕܝܫܐ ܕܐܝܣܪܝܠ ܫܢܩܬ ܘܢܓܕܬ ܒܟܠ ܡܚܘ̈ܢ ܘܐܘܕܥܬ ܚܝܠܐ ܕܪܒܘܬܟ ܘܚܘܝܬ ܐܘܚܕܢܟ ܥܫܝܢܐ

36. Maccabees 3 2:7

    ܘܟܕ ܪܕܦ ܒܬܪ ܥܡܟ ܒܪ̈ܟܫܐ ܘܒܡܪ̈ܟܒܬܐ ܘܒܥܡܐ ܣܓܝܐܐ ܛܒܥܬܝܗܝ ܒܥܘ̈ܡܩܘܗܝ ܕܝܡܐ ܥܡ ܟܠܗ ܚܝܠܗ ܠܗܢܘܢ ܕܝܢ ܕܗܝܡܢܘ ܒܟ ܒܗܘ ܕܡܬܡܨܐ ܐܢܬ ܒܟܠ ܕܨܒܝܬ ܒܟܘܠܗ̇ ܒܪܝܬܐ ܟܕ ܚܠܝܡܝܢ ܢܛܪܬ ܐܢܘܢ

37. Maccabees 3 2:8

    ܘܟܕ ܚܙܘ ܥܒ̈ܕܝܟ ܫܒܚܘܟ ܠܟ ܐܚܝܕ ܟܠ

38. Maccabees 3 2:9

    ܐܢܬ ܡܠܟܐ ܕܥܒܕܬ ܐܪܥܐ ܕܠܐ ܡܬܬܟܝܠܐ ܘܠܐ ܡܬܡܫܚܐ ܓܒܝܬ ܗܕܐ ܡܕܝܢܬܐ ܘܩܕܫܬ ܗܢܐ ܐܬܪܐ ܠܫܡܟ ܗܘ ܕܠܐ ܣܢܝܩ ܥܠ ܡܕܡ ܘܫܒܚܬܝܗܝ ܒܓܠܝܢܐ ܕܪܒܘܬ ܝܐܝܘܬܟ ܘܥܒܕܬ ܠܗ ܫܡܐ ܘܩܝܡܐ ܠܬܫܒܘܚܬܗ ܕܫܡܟ ܪܒܐ ܘܡܝܩܪܐ

39. Maccabees 3 2:10

    ܘܡܛܠ ܕܥܒܕܬ ܘܐܚܒܬ ܠܒܝܬܐ ܕܒܝܬ ܐܝܣܪܝܠ ܐܫܬܘܕܝܬ ܠܗܘܢ ܕܐܢ ܢܚܛܘܢ ܘܢܗܦܟܘܢ ܡܢ ܠܘܬܟ ܘܢܩܕܡܘܢ ܐܢܘܢ ܐܘ̈ܠܨܢܐ ܘܥܩ̈ܬܐ ܘܢܐܬܘܢ ܘܢܨܠܘܢ ܒܐܬܪܐ ܗܢܐ ܕܬܫܡܥ ܒܩܠܐ ܕܒܥܘܬܗܘܢ

40. Maccabees 3 2:11

    ܘܗܫܐ ܡܗܝܡܢ ܐܢܬ ܗܘ ܘܫܪܝܪ ܐܢܬ

41. Maccabees 3 2:12

    ܡܛܠ ܕܙܒ̈ܢܬܐ ܣܓܝ̈ܐܬܐ ܕܐܬܐܠܨܘ ܐܒ̈ܗܝܢ ܥܕܪܬ ܐܢܘܢ ܡܢ ܐܘܠܨ̈ܢܝܗܘܢ ܘܦܪܩܬ ܐܢܘܢ ܡܢ ܟܠ ܥܩܐ ܘܟܘܠ ܩܝܢܕܘܢܘܣ

42. Maccabees 3 2:13

    ܘܗܫܐ ܡܠܟܐ ܩܕܝܫܐ ܡܛܠ ܚܛܗ̈ܝܢ ܪ̈ܘܪܒܐ ܘܣܓܝ̈ܐܐ ܗܐ ܡܬܐܠܨܝܢܢ ܘܡܫܬܥܒܕܝܢܢ ܠܒܥܠܕܒ̈ܒܝܢ ܘܡܫܪܝܢܢ ܒܟܪܝܗܘܬܢ

43. Maccabees 3 2:14

    ܘܗܐ ܗܢܐ ܪܫܝܥܐ ܘܛܡܐܐ ܘܡܣܝܒܐ ܨܒܐ ܕܢܨܥܪ ܠܐܬܪܐ ܩܕܝܫܐ ܕܐܬܓܒܝ ܘܐܬܝܕܥ ܥܠ ܐܪܥܐ ܠܫܡܟ ܡܝܬܪܐ ܘܩܕܝܫܐ

44. Maccabees 3 2:15

    ܡܥܡܪܟ ܓܝܪ ܒܫܡ̈ܝ ܫܡܝܐ ܐܝܬܘܗܝ ܘܡܥܠܝ ܡܢ ܟܠܗܘܢ ܒܢܝ̈ܢܫܐ

45. Maccabees 3 2:16

    ܐܠܐ ܡܛܠ ܕܨܒܝܬ ܕܬܫܪܐ ܬܫܒܘܚܬܟ ܒܥܡܟ ܐܝܣܪܝܠ ܩܕܫܬ ܠܐܬܪܐ ܗܢܐ

46. Maccabees 3 2:17

    ܠܐ ܗܟܝܠ ܬܬܒܥ ܡܢܢ ܒܝܕ ܛܡܐܘܬܗܘܢ ܕܗܠܝܢ ܘܠܐ ܬܟܣܢ ܒܣܘܝܒܗܘܢ ܕܠܐ ܢܫܬܒܗܪܘܢ ܥܘ̈ܠܐ ܒܪܘܫܥܗܘܢ ܘܠܐ ܢܚܕܘܢ ܒܪܡܘܬܐ ܕܠܫܢܗܘܢ ܘܢܐܡܪܘܢ

47. Maccabees 3 2:18

    ܕܚܢܢ ܕܫܢ ܒܝܬ ܡܩܕܫܐ ܐܝܟ ܕܡܬܬܕܝܫܝܢ ܒܝܬ ܦܬܟܪ̈ܐ

48. Maccabees 3 2:19

    ܐܠܐ ܥܛܝ ܚܛܗ̈ܝܢ ܘܫܒܘܩ ܣܟ̈ܠܘܬܢ ܘܐܢܗܪ ܐܦܝ̈ܟ ܒܢ ܒܗܕܐ ܫܥܬܐ

49. Maccabees 3 2:20

    ܘܒܥܓܠ ܢܩܕܡܘܢܢ ܪ̈ܚܡܝܟ ܡܪܝܐ ܘܗܒ ܬܫܒܘܚܬܟ ܒܦܘܡܗܘܢ ܕܡܡ̈ܟܟܐ ܘܫܚܝܩ̈ܝ ܢܦܫܐ ܘܥܒܕ ܠܢ ܫܠܡܐ

50. Maccabees 3 2:21

    ܒܗܢܐ ܐܬܪܐ ܡܪܝܐ ܕܝܢ ܐܠܗܐ ܚܙܐ ܟܠ ܘܐܒܐ ܕܐܒܗ̈ܐ ܘܩܕܝܫܐ ܕܩܕܝ̈ܫܐ ܫܡܥ ܒܩܠܐ ܕܨܠܘܬܗ ܘܕܒܥܘܬܗ ܘܠܗܘ ܕܩܕܡ ܩܠܝܠ ܡܫܬܒܗܪ ܗܘܐ ܘܡܬܬܪܝܡ ܢܓܕܗ

51. Maccabees 3 2:22

    ܡܟܐ ܘܡܟܐ ܘܫܢܩܗ ܒܐܘܠܨܢܐ ܣܓܝܐܐ ܘܐܫܬܪܝ ܘܢܦܠ ܥܠ ܐܪܥܐ ܘܪܥܠ ܗܘܐ ܟܠܗ ܐܝܟ ܩܢܝܐ ܡܢ ܩܕܡ ܪܘܚܐ ܐܝܟܢܐ ܕܐܦܠܐ ܡܠܬܐ ܡܫܟܚ ܗܘܐ ܠܡܡܠܠܘ ܒܦܘܪܥܢܐ ܕܕܝܢܐ ܟܐܢܐ ܕܩܕܡܗ

52. Maccabees 3 2:23

    ܗܟܢܐ ܕܟܕ ܚܙܘ ܪ̈ܚܡܘܗܝ ܘܢܛܘܪ̈ܘܗܝ ܦܘܪܥܢܐ ܚܪܝܦܐ ܕܐܕܪܟܗ ܕܚܠܘ ܕܠܡܐ ܐܦ ܡܡܬ ܢܡܘܬ ܠܗ ܘܒܪܫܥܬܗ ܢܓܕܘ ܘܐܦܩܘܗܝ ܠܒܪ ܟܕ ܕܚܝܠܝܢ ܗܘܘ ܕܚܠܬܐ ܪܒܬܐ

53. Maccabees 3 2:24

    ܡܢ ܒܬܪ ܩܠܝܠ ܕܝܢ ܬܒܬ ܢܦܫܗ ܘܗܘܐ ܥܠ ܗܘܢܗ ܘܠܐ ܨܒܐ ܕܢܬܘܒ ܡܢ ܪܥܝܢܗ ܩܫܝܐ ܐܠܐ ܟܕ ܡܬܠܚܡ ܠܗܘܢ ܒܚܡܬܐ ܪܒܬܐ ܘܩܫܝܬܐ ܫܩܠ ܘܐܙܠ ܡܢ ܬܡܢ

54. Maccabees 3 2:25

    ܘܟܕ ܐܙܠ ܕܝܢ ܦܝܠܘܡܛܘܪ ܠܡܨܪܝܢ ܘܥܕܟܝܠ ܒܝܫܬܗ ܪܒܝܐ ܗܘܬ ܘܣܓܝܐ ܥܡ ܟܠܗܘܢ ܪ̈ܘܪܒܢܘܗܝ ܘܪ̈ܚܡܘܗܝ ܗܢܘܢ ܕܦܪܝܩܝܢ ܗܘܘ ܡܢ ܟܠܗ ܟܐܢܘܬܐ

55. Maccabees 3 2:26

    ܠܐ ܣܦܩ ܠܗ ܪ̈ܘܫܠܝܗܘܢ ܣܓܝ̈ܐܐ ܕܠܐ ܡܬܡܢܝܢ ܐܠܐ ܥܕܡܐ ܠܗܕܐ ܟܠܗ ܡܪܚܘܬܐ ܐܬܐ ܥܕܡܐ ܕܢܡܠܠ ܡ̈ܠܐ ܕܓܘܕܦܐ ܥܠ ܐܬܪܐ ܐܦ ܣܓܝ̈ܐܐ ܡܢ ܪ̈ܚܡܘܗܝ ܟܕ ܚܙܘ ܪܥܝܢܗ ܕܡܠܟܐ ܐܦ ܗܢܘܢ ܫܠܡܘ ܠܬܪܥܝܬܗ ܕܪܫܝܥܐ

56. Maccabees 3 2:27

    ܟܬܒ ܕܝܢ ܡܠܟܐ ܘܣܡ ܦܘܩܕܢܐ ܥܠ ܒ̈ܢܝ ܥܡܢ ܘܥܒܕ ܨܠܡܐ ܓܠܝܦܐ ܘܐܩܝܡ ܒܝܢܬ ܡ̈ܓܕܠܐ ܕܕܪܬܐ

57. Maccabees 3 2:28

    ܘܟܬܒ ܕܟܠ ܡܢ ܕܠܐ ܢܕܒܚ ܠܗ ܠܐ ܢܗܘܐ ܥܐܠ ܠܗܝܟܠܐ ܕܐܠܗܐ ܘܟܠܗܘܢ ܕܝܢ ܝܘ̈ܕܝܐ ܢܬܟܬܒܘܢ ܘܢܐܬܘܢ ܠܦܘܠܚܢܐ ܘܠܫܘܥܒܕܐ ܕܥܒܕܘܬܐ ܘܠܐܝܠܝܢ ܕܥܨܝܢ ܡܢܗܘܢ ܢܗܘܘܢ ܡܝܬܝܢ ܒܩܛܝܪܐ ܘܒܫ̈ܢܕܐ ܢܩܛܠܘܢ ܐܢܘܢ

58. Maccabees 3 2:29

    ܘܠܗܢܘܢ ܕܝܢ ܕܡܬܟܬܒܝܢ ܢܪܫܡܘܢ ܐܢܘܢ ܒܢܘܪܐ ܒܪܘܫܡܗ ܕܕܝܘܢܘܣܝܣ ܕܢܗܘܘܢ ܬܚܝܬ ܫܘܥܒܕܗ ܕܡܠܟܐ

59. Maccabees 3 2:30

    ܘܕܠܐ ܕܝܢ ܢܬܚܙܐ ܠܣܓܝ̈ܐܐ ܐܝܟ ܕܒܩܛܝܪܐ ܐܠܝܨܝܢ ܚܢܢ ܟܬܒ ܗܟܢܐ ܕܟܠ ܐܝܠܝܢ ܕܨܒܝܢ ܡܢܗܘܢ ܕܢܫܬܘܬܦܘܢ ܠܪܥܝܢܐ ܕܕܚܠܬܢ ܢܬܟܬܒܘܢ ܐܠܟܣܢܕܪ̈ܝܐ ܒܢܝ̈ ܡܕܝܢܬܗ ܕܡܕܝܢܬܗ ܕܡܠܟܐ

60. Maccabees 3 2:31

    ܘܐܢܫܝܢ ܡܢܗܘܢ ܩܠܝܠ ܐܝܠܝܢ ܕܠܐ ܡܫܪܪ ܗܘܐ ܪܥܝܢܗܘܢ ܒܦܘܠܚܢܐ ܕܕܚܠܬ ܐܠܗܐ ܘܒܩܝ̈ܡܝܗ ܕܡܕܝܢܬܢ ܥܬܝܕܐܝܬ ܐܫܠܡܘ ܢܦܫܗܘܢ ܐܝܟ ܐܢܫܐ ܕܠܡܕܡ ܕܛܒ ܘܡܝܬܪ ܐܫܬܘܬܦܘ ܠܦܘܩܕܢܗ ܕܡܠܟܐ

61. Maccabees 3 2:32

    ܣܘܓܐܗ ܕܝܢ ܕܥܡܐ ܐܬܚܝܠܘ ܘܐܬܥܫܢܘ ܓܢܒܪܐܝܬ ܘܠܐ ܦܪܩܘ ܘܫܢܝܘ ܡܢ ܟܠܗ ܙܕܝܩܘܬܐ ܐܠܐ ܐܫܠܡܘ ܩܢܝ̈ܢܝܗܘܢ ܥܠ ܐܦܝ̈ ܚܝܝ̈ܗܘܢ ܕܢܦܪܩܘܢ ܢܦ̈ܫܬܗܘܢ ܡܢ ܡܟܬܒܢܘܬܐ

62. Maccabees 3 2:33

    ܘܡܣܒܪܝܢ ܗܘܘ ܘܡܣܟܝܢ ܗܘܘ ܕܗܘܐ ܗܘܐ ܠܗܘܢ ܦܘܪܩܢܐ ܘܠܐܝܠܝܢ ܕܦܪܫܝܢ ܢܦܫܗܘܢ ܘܡܫܢܝܢ ܗܘܘ ܡܢܗܘܢ ܐܝܟ ܛܡ̈ܐܐ ܐܚܝܕܝܢ ܗܘܘ ܠܗܘܢ ܘܐܝܟ ܒܥܠܕܒ̈ܒܐ ܚܫܝܒܝܢ ܗܘܘ ܠܗܘܢ ܘܡܢ ܛܝܒܘܬܐ ܕܫܘܬܦܘܬܐ ܟܢܫ̈ܐ ܓܠܙܝܢ ܗܘܘ ܠܗܘܢ

63. Maccabees 3 3:1

    ܘܒܪ ܫܥܬܗ ܕܝܢ ܕܫܡܥ ܗܠܝܢ ܪܫܝܥܐ ܐܬܚܡܬ ܣܓܝ ܕܠܐ ܗܘܐ ܒܠܚܘܕ ܥܠ ܐܝܠܝܢ ܕܥܡܪܝܢ ܒܐܠܟܣܢܕܪܝܐ ܢܪܓܙ ܐܠܐ ܐܦ ܥܠ ܥܡܐ ܕܥܡܪ ܒܐܬܪܐ ܩܫܝܐܝܬ ܗܘܐ ܠܗܘܢ ܣܩܘܒܠܐ ܘܦܩܕ ܕܒܥܓܠ ܘܡܣܪܗܒܐܝܬ ܢܟܢܫܘܢ ܐܢܘܢ ܠܟܠܗܘܢ ܐܟܚܕܐ ܘܒܡܘܬܐ ܩܫܝܐ ܘܡܪܝܪܐ ܢܩܛܠܘܢ ܐܢܘܢ

64. Maccabees 3 3:2

    ܘܟܕ ܐܬܦܩܕܘ ܕܝܢ ܗܢܐ ܦܘܩܕܢܐ ܛܒܐ ܒܝܫܐ ܘܡܪܝܪܐ ܢܦܩ ܗܘܐ ܥܠ ܟܠܗ ܥܡܢ ܒܝܕ ܐܢܫ̈ܐ ܕܗܦܟܘ ܡܢ ܢܡܘܣܐ ܥܠ ܕܠܐ ܫܒܩܘ ܐܢܘܢ ܕܢܫܬܘܬܦܘܢ ܥܡܗܘܢ

65. Maccabees 3 3:3

    ܝܘ̈ܕܝܐ ܕܝܢ ܢܛܪܝܢ ܗܘܘ ܪܚܡܘܬܐ ܠܘܬ ܡܠܟܐ

66. Maccabees 3 3:4

    ܟܕ ܙܗܝܪܝܢ ܗܘܘ ܒܩ̈ܝܡܘܗܝ ܘܢܡ̈ܘܣܘܗܝ ܕܐܠܗܐ ܘܢܛܪܝܢ ܗܘܘ ܦܘܪ̈ܫܢܐ ܕܡܐܟ̈ܠܬܐ ܘܡܛܠܗܢܐ ܡܬܚܙܝܢ ܗܘܘ ܠܣܓ̈ܝܐܐ ܐܝܟ ܪ̈ܡܐ ܘܫܒܗܪ̈ܢܐ

67. Maccabees 3 3:5

    ܗܢܘܢ ܕܝܢ ܒܟܠ ܦܘܠܚܢܐ ܕܟܐܢܘܬܐ ܡܬܕܒܪܝܢ ܗܘܘ ܘܡܬܚܙܝܢ ܗܘܘ ܕܓܒܝܢ ܘܒܚܝܪܝܢ ܡܢ ܟܠܗܘܢ ܒܢܝ̈ܢܫܐ

68. Maccabees 3 3:6

    ܥܠ ܦܘܩܕܢܐ ܕܝܢ ܕܢܦܩ ܥܠ ܥܡܢ ܕܢܬܡܢܐ ܡܢ ܥܡ̈ܡܐ ܠܐ ܐܬܡܨܝܘ ܒܚܝܠܐ ܕܢܡܢܘܢ ܐܢܘܢ

69. Maccabees 3 3:7

    ܘܡܛܠ ܕܠܐ ܡܬܪܡܝܢ ܗܘܘ ܠܡܐܟ̈ܠܬܗܘܢ ܘܠܣ̈ܓܕܬܗܘܢ ܐܦܩܘ ܥܠܝܗܘܢ ܛܒܐ ܕܐܡܪܝܢ ܕܠܐ ܠܡܠܟܐ ܚܫܒܝܢܢ ܘܠܐ ܫܠܡܝܢܢ ܠܦܘܠܚܢܐ ܕܚܝܠܘ̈ܗܝ ܡܛܠ ܕܐܝܬܝܗܘܢ ܐܢܫ̈ܐ ܡܪ̈ܘܕܐ ܘܣܓܝ ܩܝܡܝܢ ܠܘܩܒܠ ܦܘܩ̈ܕܢܘܗܝ ܘܨܒܘ̈ܬܗ ܕܡܠܟܐ ܘܠܐ ܗܘܐ ܫܚܝܡܐܝܬ ܐܦܩܘ ܣܢܐܬܗܘܢ ܘܛܒܗܘܢ ܒܝܫܐ

70. Maccabees 3 3:8

    ܥܡ̈ܡܐ ܕܝܢ ܕܐܝܬ ܗܘܘ ܒܗ ܒܡܕܝܢܬܐ ܡܛܠ ܕܡܕܡ ܕܒܝܫ ܠܐ ܚܙܘ ܒܝܘ̈ܕܝܐ ܕܗܘܝܢ ܗܘܘ ܥܡܗܘܢ ܘܚܙܘ ܒܝܫܬܐ ܘܫܓܘܫܝܐ ܕܡܢ ܫܠܝܐ ܗܘܐ ܠܗܘܢ ܘܪܗܛܐ ܡܣܪܗܒܐ ܕܩܛܝܪܐ ܕܢܥܕܪܘܢ ܐܢܘܢ ܡܕܡ ܠܐ ܡܫܟܚܝܢ ܗܘܘ ܡܛܠ ܕܩܫܐ ܗܘܐ ܘܥܙܝܙ ܦܘܩܕܢܐ ܕܥܠܝܗܘܢ ܒܥܝܢ ܗܘܘ ܕܝܢ ܘܡܦܝܣܝܢ ܠܐܠܘܨ̈ܝܗܘܢ ܒܥܩܬܐ ܣܓܝܐܬܐ ܘܐܡܪܝܢ ܗܘܘ ܠܗܘܢ

71. Maccabees 3 3:9

    ܕܠܐ ܗܟܢܐ ܩܫܝܐܝܬ ܬܐܠܨܘܢ ܐܢܘܢ ܠܐ ܓܝܪ ܡܫܟܚ ܟܠܗ ܗܢܐ ܣܘܓܐܐ ܕܥܡܐ ܕܢܐܒܕ ܕܠܐ ܣܟܠܘܬܐ

72. Maccabees 3 3:10

    ܫܪܝܘ ܗܘܘ ܕܝܢ ܐܦ ܡܢ ܪ̈ܚܡܝܗܘܢ ܘܫܒ̈ܒܝܗܘܢ ܕܙܒܢܝܢ ܗܘܘ ܡܢܗܘܢ ܘܡܦܝܣܝܢ ܗܘܘ ܠܗܘܢ ܠܐܠܘ̈ܨܐ ܒܢܟܠܐ ܘܐܡܪܝܢ ܗܘܘ ܠܗܘܢ ܕܚܢܢ ܥܒܕܝܢܢ ܠܗܘܢ ܕܢܕܒܚܘܢ ܗܢܘܢ ܕܝܢ ܐܝܬܝܗܘܢ ܗܘܘ ܒܨܠܘܬܐ ܘܒܓܥܬܐ ܘܡܣܟܝܢ ܗܘܘ ܘܚܝܪܝܢ ܕܢܗܘܐ ܠܗܘܢ ܦܘܪܩܢܐ

73. Maccabees 3 3:11

    ܡܠܟܐ ܕܝܢ ܡܫܬܒܗܪ ܗܘܐ ܘܡܬܬܪܝܡ ܘܡܬܥܙܙ ܒܪܥܝܢܗ ܡܫܩܠܐ ܘܠܐ ܚܐܪ ܗܘܐ ܘܡܣܟܐ ܠܐܘܚܕܢܗ ܕܐܠܗܐ ܪܒܐ ܐܠܐ ܣܒܪ ܗܘܐ ܕܒܟܠܙܒܢ ܒܗܕܐ ܬܪܥܝܬܐ ܡܩܘܐ ܗܘܐ ܘܒܗܢܐ ܫܘܠܛܢܐ ܕܚܝܠܗ ܟܬܒ ܘܫܕܪ ܥܠܝܗܘܢ ܐܓܪܬܐ ܗܟܢܐ

74. Maccabees 3 3:12

    ܦܛܘܠܡܐܘܣ ܦܝܠܘܡܐܛܘܪ ܡܠܟܐ ܠܐܣܛܪ̈ܛܝܓܐ ܘܡܕܒܪ̈ܢܐ ܘܦ̈ܠܚܐ ܕܡܨܪܝܢ ܘܕܟܠ ܐܬܪ ܫܠܡܐ ܘܚܘܠܡܢܐ

75. Maccabees 3 3:13

    ܚܠܝܡ ܐܢܐ ܕܝܢ ܐܦ ܐܢܐ ܘܨܒ̈ܘܬܢ

76. Maccabees 3 3:14

    ܡܢ ܒܬܪ ܕܙܟܝܢ ܘܐܬܝܢ ܡܢ ܩܪܒܐ ܕܗܘܐ ܠܢ ܒܐܣܝܐ ܗܘ ܕܝܕܥܝܢ ܐܢܬܘܢ ܠܗ ܐܦ ܐܢܬܘܢ ܒܥܘܕܪܢܐ ܕܐܠܗ̈ܐ ܕܠܐ ܡܙܕܟܝܢ ܕܗܘܐ ܥܡܢ

77. Maccabees 3 3:15

    ܨܒܝܢ ܕܠܐ ܒܐܘܠܨܢܐ ܘܠܐ ܒܩܛܝܪܐ ܐܠܐ ܒܡܟܝܟܘܬܐ ܣܓܝܐܬܐ ܘܒܡܪܚܡܢܘܬܐ ܢܣܥܘܪ ܥܡ ܟܠܗܘܢ ܥܡ̈ܡܐ ܕܥܡܪܝܢ ܒܣܘܪܝܐ ܘܒܦܘܢܝܩܐ ܐܟܡܐ ܕܐܦ ܥܒܕܢ

78. Maccabees 3 3:16

    ܘܝܗܒܢ ܩܘܪ̈ܒܢܐ ܣܓܝ̈ܐܐ ܘܪ̈ܘܪܒܐ ܠܟܠܗܘܢ ܟܘܡܪ̈ܐ ܕܒܟܠ ܡܕܝ̈ܢܬܐ ܘܐܬܪܥܝܢ ܕܢܦܘܩ ܐܦ ܠܐܘܪܫܠܡ ܘܢܝܩܪ ܠܗܝܟܠܗܘܢ ܕܡܚܝ̈ܒܐ ܘܚܣܝܪ̈ܝ ܪܥܝܢܐ ܕܒܟܠܙܒܢ

79. Maccabees 3 3:17

    ܗܢܘܢ ܕܝܢ ܒܡܠܬܐ ܩܒܠܘ ܡܐܬܝܬܢ ܘܒܥܒܕܐ ܐܝܟ ܢܘܟܪ̈ܝܐ ܚܫܒܘܢ ܟܕ ܓܝܪ ܨܒܝܢ ܕܢܥܘܠ ܠܗܝܟܠܗܘܢ ܘܢܝܩܪܝܘܗܝ ܒܡܘܗ̈ܒܬܐ ܘܐܝܩܪ̈ܐ ܪ̈ܘܪܒܐ

80. Maccabees 3 3:18

    ܗܢܘܢ ܒܪܡܘܬܐ ܘܒܫܘܒܗܪܐ ܕܐܚܝܕ ܗܘܐ ܠܗܘܢ ܟܠܐܘܢ ܕܠܐ ܢܥܘܠ ܘܚܣܪܘ ܡܢ ܐܝܩܪܐ ܕܨܒܝܢ ܠܡܥܒܕ ܠܗܘܢ ܐܝܟ ܪܚܡܬܢ ܕܠܘܬ ܟܠ ܐܢܫ

81. Maccabees 3 3:19

    ܘܗܢܘܢ ܓܠܘ ܘܚܘܝܘ ܣܢܐܬܗܘܢ ܕܠܘܬܢ ܕܐܝܟ ܕܥܠ ܥܡ̈ܡܐ ܗܘ ܒܠܚܘܕ ܡܡܠܟܝܢܢ ܘܠܥܒ̈ܕܝ ܛܒ̈ܬܗܘܢ ܕܒܟܠܙܒܢ ܗܢܘܢ ܡܛܠ ܪܡܘܬܗܘܢ ܘܫܘܒܗܪܗܘܢ ܒܨܥܪܐ ܩܒܠܘ ܘܡܕܡ ܕܚܘܒܐ ܨܝܕܝܗܘܢ ܠܐ ܚܘܝܘ

82. Maccabees 3 3:20

    ܠܢ ܕܝܢ ܣܓܝ ܐܬܒܐܫ ܠܢ ܥܠ ܡܪܚܘܬܗܘܢ ܘܚܣܝܪܘܬ ܪܥܝܢܗܘܢ ܕܗܠܝܢ ܘܒܙܟܘܬܐ ܐܬܝܢ ܠܡܨܪܝܢ ܘܠܟܠܗܘܢ ܥܡ̈ܡܐ ܒܚܕܘܬܐ ܘܒܫܠܡܐ ܩܒܠܢ ܘܐܝܟ ܡܐ ܕܙܕܩ ܗܘܐ ܠܢ ܗܟܢܐ ܥܒܕܢ

83. Maccabees 3 3:21

    ܘܥܠ ܗܠܝܢ ܕܝܢ ܘܥܠ ܒ̈ܢܝ ܥܡܗܘܢ ܐܟܬܐ ܐܘ ܪܘܓܙܐ ܡܕܡ ܠܐ ܐܝܬ ܗܘܐ ܠܢ ܡܛܠ ܕܒܫܘܝܘܬܐ ܘܒܐܘܝܘܬܐ ܐܝܬܝܢ ܗܘܝܢ ܘܨ̈ܒܘܬܐ ܗܝܡܢܢ ܐܢܘܢ ܘܫܒܩܢ ܒܐܝܕܝ̈ܗܘܢ ܘܣܟ̈ܠܘܬܐ ܘܡܪ̈ܚܘܬܐ ܕܥܒ̈ܝܕܢ ܗܘ̈ܝ ܠܗܘܢ ܙܒ̈ܢܬܐ ܣܓܝ̈ܐܬܐ ܡܢ ܩܕܝܡ ܫܒܩܢ ܠܗܘܢ ܘܨܒܝܢ ܕܢܟܬܘܒ ܐܢܘܢ ܐܠܟܣܢܕܪ̈ܝܐ ܒ̈ܢܝ ܡܕܝܢܬܢ ܘܫ̈ܘܬܦܐ ܠܟܘܡܪ̈ܐ ܕܐܒ̈ܗܝܢ

84. Maccabees 3 3:22

    ܗܢܘܢ ܕܝܢ ܚܝܪܝܢ ܗܘܘ ܘܡܣܟܝܢ ܠܣܢܐܬܐ ܘܒܒܝܫܬܐ ܗܝ ܕܢܨܝܒܐ ܒܗܘܢ ܕܚܘ ܘܫܕܘ ܡܢܗܘܢ ܛܒܬܐ ܘܡܛܠ ܕܒܟܠܙܒܢ ܠܒܝܫܬܐ ܚܝܪܝܢ

85. Maccabees 3 3:23

    ܠܐ ܗܘܐ ܒܠܚܘܕ ܡܦܪܩ ܠܐ ܦܪܩܘ ܘܫܢܝܘ ܡܢ ܕܚܠܬܗܘܢ ܫܛܝܬܐ ܘܡܨܥܪܬܐ ܐܠܐ ܐܦ ܡܣܠܝܢ ܒܡܠܬܐ ܘܒܥܒܕܐ ܠܐܝܠܝܢ ܕܩܠܝܠ ܐܫܟܚܘ ܒܗܘܢ ܕܒܚܘܒܐ ܘܒܫܠܡܘܬܐ ܐܝܬܝܗܘܢ ܨܐܝܕܝܢ ܘܒܟܠ ܙܒܢ ܠܩܘܒܠܢ ܩܝܡܝܢ ܘܫܪܝܢ ܟܠ ܦܘܩ̈ܕܢܐ ܘܢܡ̈ܘܣܐ ܕܡܬܬܣܝܡܝܢ ܡܢܢ

86. Maccabees 3 3:24

    ܘܒܟܠܡܕܡ ܣܩܘܒܠܐ ܐܢܘܢ ܠܢ ܘܟܒܪ ܐܢ ܢܓܕܫ ܘܢܗܘܐ ܠܢ ܩܪܒܐ ܥܡ ܒܥܠܕܒܒ̈ܝܢ ܐܦ ܗܠܝܢ ܪ̈ܫܝܥܐ ܘܡܚܝ̈ܒܐ ܢܬܬܘܣܦܘܢ ܠܢ ܥܡܗܘܢ ܘܢܗܘܘܢ ܡܢ ܡܫܠܡ̈ܢܝܢ ܘܒܥܠܕܒܒ̈ܝܢ

87. Maccabees 3 3:25

    ܡܛܠ ܗܢܐ ܗܟܝܠ ܦܩܕܢ ܘܫܕܪܢ ܕܒܗ ܒܫܥܬܐ ܕܡܩܒܠܝܢ ܐܢܬܘܢ ܐܓܪܬܢ ܗܕܐ ܠܗܠܝܢ ܕܟܬܝܒܝܢ ܒܗ ܬܐܚܕܘܢ ܐܢܘܢ ܥܡ ܢܫ̈ܝܗܘܢ ܘܒ̈ܢܝܗܘܢ ܘܥܡ ܟܠ ܕܐܝܬ ܠܗܘܢ ܘܒܨܥܪܐ ܘܒܐܣܘܪܝܐ ܬܫܕܪܘܢ ܐܢܘܢ ܠܘܬܢ ܟܕ ܦܟܝܪܝܢ ܒܦܪܙܠܐ ܘܐܠܝܨܝܢ ܒܟܠ ܐܘܠܨܢ

88. Maccabees 3 3:26

    ܟܕ ܓܝܪ ܢܫܬܩܠܘܢ ܘܢܐܒܕܘܢ ܗܠܝܢ ܡܢܢ ܢܗܘܐ ܠܢ ܫܠܡܐ ܘܫܝܢܐ ܒܟܠܙܒܢ ܒܡܠܟܘܬܢ ܘܐܢܬܘܢ ܬܐܪܒܘܢ ܘܬܬܝܬܪܘܢ ܘܬܬܩܪܒܘܢ ܠܬܪܥܝܬܝ

89. Maccabees 3 3:27

    ܐܢ ܐܢܫ ܕܝܢ ܢܛܫܐ ܡܢ ܝܘ̈ܕܝܐ ܡܢ ܣܒ̈ܐ ܘܥܕܡܐ ܠܛܠܝ̈ܐ ܘܝܠܘ̈ܕܐ ܕܝܢܩܝܢ ܚܠܒܐ ܒܐܘܠܨܢܐ ܘܒܫ̈ܢܕܐ ܣܓܝ̈ܐܐ ܢܡܘܬ ܥܡ ܟܠܗ ܒܝܬܗ

90. Maccabees 3 3:28

    ܘܐܝܢܐ ܕܢܐܬܐ ܘܢܒܕܩ ܥܠܘܗܝ ܢܬܝܗܒ ܠܗ ܩܢܝܢܗ ܕܗܘ ܕܡܫܬܟܚ ܒܗܕܐ ܣܟܠܘܬܐ ܘܡܢ ܒܝܬ ܩܣܪ ܬ̈ܠܬܐ ܐܠܦ̈ܝܢ ܕܟܣܦܐ ܘܚܐܪܘܬܐ ܘܟܠܝܠܐ ܢܩܒܠ

91. Maccabees 3 3:29

    ܟܠ ܐܬܪ ܕܝܢ ܕܢܫܬܟܚ ܒܗ ܝܘܕܝܐ ܕܡܛܫܝ ܢܗܘܐ ܝܩܝܕ ܒܢܘܪܐ ܘܚܪܒ ܐܝܟ ܡܕܒܪܐ ܘܒܢܝ̈ܢܫܐ ܕܐܝܬ ܒܗ ܢܣܬܪܚܘܢ ܘܢܐܒܕܘܢ ܡܢ ܒܢܝ̈ܢܫܐ

92. Maccabees 3 3:30

    ܦܚܡܐ ܕܝܢ ܕܡܠܝ̈ܗ ܕܐܓܪܬܐ ܗܠܝܢ ܐܝܬܝܗܝܢ ܗܘܝ

93. Maccabees 3 4:1

    ܘܟܠ ܐܝܟܐ ܕܡܫܬܡܥ ܗܘܐ ܗܢܐ ܦܘܩܕܢܐ ܚܕܘܬܐ ܘܕܝܨܐ ܪܒܐ ܘܒܘܣܡܐ ܗܘܐ ܗܘܐ ܠܗܘܢ ܠܥܡ̈ܡܐ ܐܝܟ ܐܢܫܐ ܕܠܗܕܐ ܡܣܟܝܢ ܗܘܘ ܕܬܓܕܫ ܘܐܬܝܗܒܬ ܠܗܘܢ ܒܓܠܝܐ ܕܢܥܒܕܘܢܗ

94. Maccabees 3 4:2

    ܠܝܘ̈ܕܝܐ ܕܝܢ ܐܒܠܐ ܪܒܐ ܐܝܬ ܗܘܐ ܠܗܘܢ ܘܒܩܠܐ ܒܟܝܢ ܗܘܘ ܘܓܥܝܢ ܘܡܬܬܢܚܝܢ ܗܘܘ ܣܓܝ ܕܡܛܐ ܟܐܒܐ ܘܚܫܐ ܥܕܡܐ ܠܠܒܗܘܢ ܡܛܠ ܕܚܕܪܘ ܐܢܘܢ ܐܘܠܨܢܐ ܡܢ ܟܠ ܐܬܪ ܘܕܝܢܐ ܕܚܒܠܐ ܘܕܡܘܬܐ ܡܢ ܫܠܝܐ ܐܝܢܐ ܕܠܐ ܡܣܟܝܢ ܗܘܘ ܠܗ

95. Maccabees 3 4:3

    ܐܝܕܐ ܓܝܪ ܡܕܝܢܬܐ ܐܘ ܐܝܢܐ ܐܬܪܐ ܕܝܬܝܒ ܐܘ ܐܝܠܝܢ ܫܘ̈ܩܐ ܐܘ ܐܝܠܝܢ ܒܪ̈ܝܬܐ ܕܠܐ ܡܠܝ̈ܢ ܗܘܝ ܐܒܠܐ ܘܡܪܩܘܕܬܐ ܣܓܝܐܬܐ

96. Maccabees 3 4:4

    ܗܟܢܐ ܓܝܪ ܡܬܬܚܕܝܢ ܗܘܘ ܡܢ ܐܣܛܪ̈ܛܝܓܐ ܕܒܟܠ ܡܕܝ̈ܢܬܐ ܒܩܛܝܪܐ ܘܒܐܘܠܨܢܐ ܣܓܝܐܐ ܘܡܪܝܪܐ ܘܡܫܬܢܕܝܢ ܗܘܘ ܗܟܢܐ ܕܝܢ ܩܫܐ ܗܘܐ ܘܡܪܝܪ ܐܘܠܨܢܗܘܢ ܕܟܕ ܚܙܘ ܒܥܠܕܒ̈ܒܝܗܘܢ ܟܪܝܬ ܠܗܘܢ ܘܒܟܝܢ ܗܘܘ ܥܠܝܗܘܢ

97. Maccabees 3 4:5

    ܚܙܝܢ ܗܘܘ ܓܝܪ ܠܣܘܓܐܐ ܕܣܒ̈ܐ ܡܝܩܪ̈ܐ ܕܡܬܕܒܪܝܢ ܗܘܘ ܒܨܥܪܐ ܘܒܩܛܝܪܐ ܣܓܝܐܐ ܟܕ ܐܦܠܐ ܩܠܝܠ ܒܗܬܝܢ ܗܘܘ ܡܢܗܘܢ

98. Maccabees 3 4:6

    ܘܟ̈ܠܠܬܐ ܕܝܢ ܐܝܠܝܢ ܕܗܫܐ ܗܘܝ ܗܘܝ ܠܓܒܪ̈ܐ ܫܒ̈ܩܝ ܓܢܘ̈ܢܐ ܕܥܠܝܡܘܬܗܝܢ ܘܚܠܦ ܚܕܘܬܐ ܢܣܒ̈ܝ ܥܠܝܗܝܢ ܒܟܝܐ ܘܚܠܦ ܒܣܡ̈ܢܐ ܢܣ̈ܟܝ ܗܘܝ ܪ̈ܝܫܝܗܝܢ ܒܩܛܡܐ ܘܐܬܝܢ ܗܘܝ ܒܩܛܝܪܐ ܟܕ ܫܩܝܠܐ ܡܢܗܝܢ ܬܚܦܝܬܐ ܘܒܗܬܬܐ ܕܟ̈ܠܠܬܐ

99. Maccabees 3 4:7

    ܟܕ ܡܦܟܪ̈ܢ ܘܐܣܝܪ̈ܢ ܒܦܪܙܠܐ ܡܢ ܥܡ̈ܡܐ ܢܘܟܪ̈ܝܐ ܘܡܬܕܒܪ̈ܢ ܒܐܘ̈ܠܨܢܐ ܘܐܬܝܢ ܒܫܘ̈ܩܐ ܥܕܡܐ ܠܐܠܦ̈ܐ

100. Maccabees 3 4:8

     ܘܫܘܬܦ̈ܝܗܝܢ ܕܝܢ ܕܗܠܝܢ ܡܬܕܒܪܝܢ ܗܘܘ ܘܐܬܝܢ ܒܩܛܝܪܐ ܘܚܠܦ ܟܠܝܠܐ ܪܡܝܢ ܗܘܘ ܩܘ̈ܠܪܐ ܕܦܪܙܠܐ ܒܨܘܪ̈ܝܗܘܢ ܘܚܠܦ ܚܕܘܬܐ ܘܒܘܣܡܐ ܕܥܠܝܡܘܬܐ ܘܕܝܨܐ ܕܫܪܟܐ ܕܝܘܡ̈ܬܐ ܕܡܫܬܘܬܗܘܢ ܒܐܒܠܐ ܘܒܒܟܬܐ ܘܒܬܐܢܚ̈ܬܐ ܐܝܬܝܗܘܢ ܗܘܘ ܕܚܙܝܢ ܗܘܘ ܡܘܬܗܘܢ ܩܕܡ ܥܝܢܝ̈ܗܘܢ

Next → — showing 1–100 of 228

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.