Peshitta Maccabees 1 A

ܘܨܪܝ ܝܘܢܬܢ ܢܚ̈ܬܘܗܝ ܘܐܪܡܝ ܥܦܪܐ ܥܠ ܪܫܗ ܘܨܠܝ

ܘܗܦܟ ܥܠܝܗܘܢ ܠܩܪܒܐ ܘܙܟܐ ܐܢܘܢ ܘܥܪܩܘ

ܘܟܕ ܚܙܘ ܐܢܘܢ ܕܥܪܩܝܢ ܗܠܝܢ ܕܐܝܬ ܗܘܘ ܥܡܗ ܐܬܦܢܝܘ ܘܐܬܘ ܨܐܕܘܗܝ ܘܪܕܦܝܢ ܗܘܘ ܠܗܘܢ ܥܕܡܐ ܠܩܠܣ ܡܫܪܝܬܗܘܢ ܘܫܪܘ ܬܡܢ

ܘܢܦܠܘ ܡܢ ܦܠܫ̈ܬܝܐ ܒܗܘ ܝܘܡܐ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ ܘܗܦܟ ܝܘܢܬܢ ܠܐܘܪܫܠܡ

ܘܚܙܐ ܝܘܢܬܢ ܕܙܒܢܐ ܡܥܕܪ ܠܗ ܘܓܒܐ ܓܒܪ̈ܐ ܘܫܕܪ ܐܢܘܢ ܠܪܗܘܡܐ ܠܡܩܡܘ ܘܠܡܚܕܬܘ ܪܚܡܘܬܐ ܕܠܘܬܗܘܢ

ܘܠܘܬ ܐܣܦܪ̈ܛܝܐ ܘܠܐܬܪ̈ܘܬܐ ܐܚܪ̈ܢܐ ܘܫܕܪ ܠܗܘܢ ܐܓܪ̈ܬܐ ܗܟܢܐ

ܘܐܙܠܘ ܠܪܗܘܡܐ ܘܥܠܘ ܠܒܝܬ ܒܘܠܐ ܕܝܠܗܘܢ ܘܐܡܪܘ ܠܗܘܢ ܝܘܢܬܢ ܪܒ ܟܗ̈ܢܐ ܘܥܡܐ ܕܝܗ̈ܘܕܝܐ ܫܕܪܘܢ ܠܡܚܕܬܘ ܪܚܡܘܬܐ ܘܥܘܕܪܢܐ ܐܝܟ ܕܡܢ ܩܕܝܡ

ܘܩܒܠܘ ܐܢܘܢ ܒ̈ܢܝ ܪܗܘܡܐ ܒܚܕܘܬܐ ܘܝܗܒܘ ܠܗܘܢ ܐܓܪ̈ܬܐ ܕܒܟܠ ܐܬܪ̈ܘܬܐ ܕܥܒܪܝܢ ܢܗܘܘܢ ܡܫܕܪܝܢ ܠܗܘܢ ܒܫܠܡܐ ܠܐܪܥܐ ܕܝܗܘܕ

ܘܗܢܘ ܦܚܡܗ ܕܐܓܪܬܐ ܕܫܕܪ ܝܘܢܬܢ ܠܐܣܦܪ̈ܛܝܐ

ܝܘܢܬܢ ܪܒ ܟܗ̈ܢܐ ܘܣ̈ܒܐ ܘܟܗ̈ܢܐ ܘܟܠܗ ܥܡܐ ܕܝܗ̈ܘܕܝܐ ܠܐܣܦܪ̈ܛܝܐ ܐܚ̈ܝܢ ܫܠܡ

ܐܦ ܓܝܪ ܗܫܐ ܐܫܬܕܪ ܐܓܪ̈ܬܐ ܠܘܬ ܚܘܢܝܐ ܪܒ ܟܗ̈ܢܐ ܡܢ ܕܪܝܘܫ ܡܠܟܟܘܢ ܕܐܝܬܝܟܘܢ ܐܚ̈ܝܢ ܐܝܟ ܡܐ ܕܐܓܪ̈ܬܐ ܡܚܘܝܢ

ܘܩܒܠܗ ܗܘܐ ܚܘܢܝܐ ܠܓܒܪܐ ܗܘ ܕܐܫܬܕܪ ܗܘܐ ܒܬܫܒܘܚܬܐ ܘܩܒܠ ܐܓܪ̈ܬܐ ܗܠܝܢ ܕܟܬܝܒܢ ܗܘܝ ܥܠ ܥܘܕܪܢܐ ܘܥܠ ܪܚܡܘܬܐ

ܐܢܚܢܢ ܕܝܢ ܠܐ ܗܘܐ ܥܠ ܗܠܝܢ ܬܟܝܠܝܢܢ ܡܛܠ ܕܐܝܬ ܗܘ ܠܢ ܒܘܝܐܐ ܟܬ̈ܒܐ ܩܕܝܫ̈ܐ ܕܒܐܝ̈ܕܝܢ

ܡܛܠ ܗܕܐ ܕܝܢ ܨܒܝܢ ܕܢܫܕܪ ܠܘܬܟܘܢ ܕܢܚܕܬ ܪܚܡܘܬܐ ܘܐܚܘܬܐ ܕܠܘܬܟܘܢ ܕܠܐ ܢܗܘܐ ܠܟܘܢ ܐܝܟ ܢܘܟܪ̈ܝܐ ܗܐ ܓܝܪ ܙܒܢܐ ܣܓܝܐܐ ܥܒܪ ܡܢ ܕܫܕܪܬܘܢ ܨܐܕܝܢ

ܐܢܚܢܢ ܕܝܢ ܒܟܠܙܒܢ ܕܠܐ ܫܠܝܘ ܒܥܕܥ̈ܕܐ ܘܒܝܘ̈ܡܬܐ ܐܝ̈ܕܝܥܐ ܡܬܕܟܪܝܢ ܐܢܚܢܢ ܠܟܘܢ ܒܟܠ ܩܘܪ̈ܒܢܐ ܕܡܩܪܒܝܢ ܐܢܚܢܢ ܘܒܟܠ ܨܠܘ̈ܬܢ ܐܝܟ ܕܡܬܒܥܐ ܘܙܕܩ ܕܐܢܫ ܢܬܕܟܪ ܠܐܚ̈ܘܗܝ

ܘܣܓܝ ܡܬܒܣܡܝܢ ܚܢܢ ܥܠ ܬܫܒܘܚܬܟܘܢ

ܠܢ ܕܝܢ ܚܕܪܘܢ ܐܘ̈ܠܨܢܐ ܣܓ̈ܝܐܐ ܘܩܪ̈ܒܐ ܪ̈ܘܪܒܐ ܐܩܪܒܘ ܥܡܢ ܟܠܗܘܢ ܡ̈ܠܟܐ ܕܚܕܪܝܢ

ܘܠܐ ܨܒܝܢ ܕܢܗܪܟܘܢ ܠܐ ܠܟܘܢ ܐܦ ܠܐ ܠܫܪܟܐ ܕܪ̈ܚܡܝܢ ܘܡܥܕܪܢܝܢ ܒܟܠܗܘܢ ܩܪ̈ܒܝܢ

ܐܝܬ ܗܘ ܠܢ ܓܝܪ ܥܘܕܪܢܐ ܕܡܢ ܫܡܝܐ ܕܗܘ ܡܥܕܪ ܠܢ ܕܦܨܝܢ ܡܢ ܒ̈ܥܠܕܒܒܝܢ ܘܡܟܟ ܐܢܘܢ ܩܕܡܝܢ

ܓܒܝܢ ܕܝܢ ܠܝܘܡܢܝܘܣ ܒܪ ܐܢܛܝܟܘܣ ܘܠܐܢܛܝܦܛܪܘܣ ܒܪ ܐܝܣܘܢ ܘܫܕܪܢ ܠܘܬ ܒ̈ܢܝ ܪܗܘܡܐ ܠܡܚܕܬܘ ܥܘܕܪܢܐ ܘܪܚܡܘܬܐ ܕܠܘܬܗܘܢ

ܘܦܩܕܢ ܐܢܘܢ ܕܐܦ ܠܘܬܟܘܢ ܢܐܬܘܢ ܘܢܫܐܠܘܢ ܒܫܠܡܟܘܢ ܘܢܬܠܘܢ ܠܟܘܢ ܐܓܪ̈ܬܢ ܥܠ ܚܘܕܬܐ ܕܐܚܘܬܐ ܕܨܐܕܝܟܘܢ

ܘܗܫܐ ܫܦܝܪ ܥܒܕܝܢ ܐܢܬܘܢ ܐܢ ܗܘ ܕܬܟܬܒܘܢ ܠܢ ܦܚ̈ܡܗܝܢ ܕܗܠܝܢ

ܘܗܢܘ ܦܚܡܗ ܕܐܓܪܬܐ ܕܫܕܪ ܗܘܐ

ܐܢܝܪܝܣ ܡܠܟܐ ܕܐܣܦܪ̈ܛܝܐ ܠܚܘܢܝܐ ܪܒܐ ܪܒ ܟܗ̈ܢܐ ܫܠܡ

ܐܫܬܟܚ ܒܟܬܒܐ ܥܠ ܐܣܦܪ̈ܛܝܐ ܘܥܠ ܝܗ̈ܘܕܝܐ ܕܐܝܬܝܗܘܢ ܐܚ̈ܐ ܘܕܐܝܬܝܗܘܢ ܡܢ ܫܪܒܬܗ ܕܐܒܪܗܡ

ܘܗܫܐ ܡܢ ܕܐܝܕܥܢ ܗܠܝܢ ܫܦܝܪ ܥܒܕܝܢ ܐܢܬܘܢ ܕܟܬܒܝܢ ܐܢܬܘܢ ܠܢ ܥܠ ܫܠܡܟܘܢ

ܘܐܢܚܢܢ ܟܬܒܝܢ ܚܢܢ ܠܟܘܢ ܥܠ ܟܠܡܕܡ ܕܠܘܬܢ ܡܛܠ ܕܟܘܠ ܕܐܝܬ ܠܟܘܢ ܕܝܠܢ ܗܘ ܘܟܠ ܕܐܝܬ ܠܢ ܕܝܠܟܘܢ ܗܘ ܘܦܩܕܢ ܐܢܘܢ ܕܝܢ ܕܗܠܝܢ ܟܠܗܘܝܢ ܢܐܡܪܘܢ ܠܟܘܢ

ܘܫܡܥ ܝܘܢܬܢ ܕܗܦܟܘ ܪ̈ܘܪܒܢܐ ܕܚ̈ܝܠܘܗܝ ܕܕܡܛܪܝܘܣ ܒܚܝܠܐ ܣܓܝܐܐ ܝܬܝܪ ܡܢ ܗܘ ܩܕܡܝܐ ܕܢܩܪܒܘܢ ܥܡܗ

ܘܫܩܠ ܝܘܢܬܢ ܡܢ ܐܘܪܫܠܡ ܘܐܪܥ ܐܢܘܢ ܒܐܪܥܐ ܕܚܡ̈ܬܝܐ ܠܐ ܓܝܪ ܝܗܒ ܗܘܐ ܠܗܘܢ ܐܬܪܐ ܕܢܕܘܫܘܢ ܒܐܪܥܗ

ܘܫܕܪ ܓܫܘ̈ܫܐ ܠܡܫܪܝܬܗܘܢ ܘܗܦܟܘ ܘܐܡܪܘ ܠܗ ܕܗܟܢܐ ܡܬܚܫܒܝܢ ܕܒܠܠܝܐ ܢܪܡܘܢ ܥܠܝܟܘܢ

ܘܟܕ ܥܪܒ ܕܝܢ ܫܡܫܐ ܦܩܕ ܝܘܢܬܢ ܠܐܝܠܝܢ ܕܥܡܗ ܕܗܘܘ ܥܝܪܝܢ ܘܡܛܝܒܝܢ ܙܝܢܗܘܢ ܘܡܥܬܕܝܢ ܠܩܪܒܐ ܟܠܗ ܠܠܝܐ ܘܐܦܩ ܢܛܘܪ̈ܐ ܠܒܪ ܡܢ ܡܫܪܝܬܐ ܒܟܠܗܘܢ ܚܕܪܝܗ

ܘܫܡܥܘ ܒܥܠܕܒ̈ܒܝܗܘܢ ܕܡܥܬܕ ܗܘ ܝܘܢܬܢ ܘܐܝܠܝܢ ܕܥܡܗ ܠܩܪܒܐ ܘܕܚܠܘ ܘܙܥܘ ܒܠܒܗܘܢ ܘܐܪܦܝܘ ܢܘܪܐ ܒܡܫܪ̈ܝܬܗܘܢ ܘܥܪܩܘ

ܝܘܢܬܢ ܕܝܢ ܘܐܝܠܝܢ ܕܥܡܗ ܠܐ ܝܕܥܘ ܥܕܡܐ ܠܨܦܪܐ ܚܙܝܢ ܗܘܘ ܓܝܪ ܢܘܪܐ ܕܝܩܕܐ

ܘܪܕܦ ܝܘܢܬܢ ܒܬܪܗܘܢ ܘܠܐ ܐܕܪܟ ܐܢܘܢ ܥܒܪܘܗܝ ܗܘܘ ܓܝܪ ܠܢܗܪܐ ܕܡܬܩܪܐ ܒܪ ܚܐܪ̈ܐ

ܘܗܦܟ ܝܘܢܬܢ ܥܠ ܥܪ̈ܒܝܐ ܗܢܘܢ ܕܡܬܩܪܝܢ ܙܒܝ̈ܕܝܐ ܘܡܚܐ ܐܢܘܢ ܘܢܣܒ ܒܙܬܗܘܢ

ܘܫܩܠ ܘܐܬܐ ܠܕܡܣܩܘܣ ܘܥܒܪ ܒܐܪ̈ܥܬܐ

ܘܫܡܥܘܢ ܢܦܩ ܘܐܙܠ ܥܕܡܐ ܠܐܫܩܠܘܢ ܘܠܚܣ̈ܢܐ ܕܚܕܪ̈ܝܗ ܘܐܪܟܢ ܠܝܘܦܐ ܘܟܒܫܗ

ܫܡܥ ܓܝܪ ܕܠܚܣܢܐ ܒܥܝܢ ܗܘܘ ܕܢܫܠܡܘܢܝܗܝ ܠܕܒܝܬ ܕܡܛܪܝܘܣ ܘܐܘܬܒ ܬܡܢ ܡܛܪܬܐ ܕܗܘܘ ܢܛܪܝܢ ܠܗ

ܘܗܦܟ ܝܘܢܬܢ ܘܟܢܫ ܠܣܒ̈ܘܗܝ ܕܥܡܐ ܘܐܬܡܠܟ ܥܡܗܘܢ ܕܢܒܢܐ ܒܝܗܘܕ ܚܣ̈ܢܐ

ܘܢܪܡܪܡ ܫܘܪ̈ܝܗ ܕܐܘܪܫܠܡ ܘܥܒܕܘ ܪܘܡܐ ܪܒܐ ܒܝܢܬ ܡܪܕܐ ܠܡܕܝܢܬܐ ܕܗܘܐ ܦܪܝܩ ܡܢ ܡܕܝܢܬܐ ܕܬܗܘܐ ܡܕܝܢܬܐ ܡܢܗ ܘܠܗ ܐܝܟ ܕܠܐ ܗܘܘ ܙܒܢܝܢ ܐܦܠܐ ܡܙܒܢܝܢ

ܘܐܬܟܢܫܘ ܠܡܒܢܐ ܠܡܕܝܢܬܐ ܘܢܦܠ ܡܢ ܫܘܪܐ ܡܢ ܥܠ ܓܢܒ ܢܚܠܐ ܕܒܡܕܢܚܐ ܘܛܡܪܗ ܠܕܘܟܬܐ ܕܡܬܩܪܝܐ ܟܣܦܢܬܐ

ܘܫܡܥܘܢ ܒܢܐ ܠܥܕܝܪܐ ܕܒܨܦܐ ܘܐܥܫܢܗ ܒܬܪ̈ܥܐ ܘܒܡܘ̈ܟܠܐ

ܘܨܒܐ ܛܪܝܦܘܢ ܕܢܡܠܟ ܥܠ ܐܣܝܐ ܘܢܩܛܘܪ ܬܓܐ ܘܢܘܫܛ ܐܝܕܐ ܥܠ ܐܢܛܝܟܘܣ ܡܠܟܐ

ܘܕܚܠ ܕܠܡܐ ܠܐ ܢܫܒܩܝܘܗܝ ܝܘܢܬܢ ܐܘ ܕܠܡܐ ܢܩܪܒ ܥܡܗ ܘܒܥܐ ܗܘܐ ܠܗ ܐܬܪܐ ܕܢܐܚܕܝܘܗܝ ܠܝܘܢܬܢ ܘܢܘܒܕܝܘܗܝ ܘܫܩܠ ܘܐܬܐ ܠܒܝܬ ܝܫܢ

ܘܢܦܩ ܝܘܢܬܢ ܒܐܪܒܥܝܢ ܐ̈ܠܦܝܢ ܓܒܪ̈ܐ ܡܓܒ̈ܝܐ ܠܩܪܒܐ ܘܐܬܐ ܠܒܝܬ ܝܫܢ

ܘܚܙܐ ܛܪܝܦܘܢ ܕܐܬܐ ܝܘܢܬܢ ܒܚܝܠܐ ܣܓܝܐܐ ܘܕܚܠ ܕܢܘܫܛ ܥܠܘܗܝ ܐܝܕܐ

ܘܩܒܠܗ ܒܬܫܒܘܚܬܐ ܘܪܡܪܡܗ ܩܕܡ ܟܠܗܘܢ ܪ̈ܚܡܘܗܝ ܘܝܗܒ ܠܗ ܡܘܗ̈ܒܬܐ ܘܐܡܪ ܠܪ̈ܚܡܘܗܝ ܘܝܗܒܘ ܠܗ ܐܦ ܗܢܘܢ ܡܘܗ̈ܒܬܐ ܘܠܚܝܠܗ ܘܦܩܕ ܕܢܗܘܘܢ ܡܫܬܡܥܝܢ ܠܗ ܐܝܟ ܕܠܗ

ܘܐܡܪ ܠܗ ܠܝܘܢܬܢ ܠܡܢܐ ܫܚܩܬ ܘܐܝܬܝܬ ܠܗܢܐ ܟܠܗ ܥܡܐ ܟܕ ܠܝܬ ܠܢ ܩܪܒܐ

ܘܗܫܐ ܫܕܪ ܐܢܘܢ ܐܢܫ ܠܒܝܬܗ ܘܓܒܝ ܠܟ ܐܢܫܐ ܙܥܘܪ̈ܐ ܕܢܗܘܘܢ ܥܡܟ ܘܬܐ ܥܡܝ ܠܦܛܘܠܡܐܝܣ ܘܐܫܠܡܝܗ ܠܟ ܘܠܫܪܟܐ ܕܚܣ̈ܢܐ ܘܠܫܪܟܐ ܕܚܝܠܐ ܘܠܟܠܗܘܢ ܐܝܠܝܢ ܕܩܝܡܝܢ ܥܠ ܨܒܘ̈ܬܐ ܘܐܗܦܘܟ ܘܐܙܠ ܡܛܠ ܗܕܐ ܗܘ ܓܝܪ ܐܬܝܬ

ܘܗܝܡܢܗ ܘܥܒܕ ܐܝܟ ܕܐܡܪ ܠܗ ܘܫܕܪܗ ܠܚܝܠܗ ܝܘܢܬܢ ܘܐܙܠ ܠܐܪܥܐ ܕܝܗܘܕܐ

ܫܒܩ ܕܝܢ ܠܘܬܗ ܬܠܬܐ ܐܠܦܝܢ ܓܒܪ̈ܝܢ ܘܬܪ̈ܝܢ ܐܠܦܝܢ ܡܢܗܘܢ ܐܪܦܝ ܒܓܠܝܠܐ ܐܠܦ ܕܝܢ ܐܙܠܘ ܥܡܗ

ܟܕ ܕܝܢ ܥܠ ܝܘܢܬܢ ܠܦܛܘܠܡܐܝܣ ܡܕܝܢܬܐ ܚܒܫܘܗܝ ܬܡܢ ܘܠܟܠܗܘܢ ܐܝܠܝܢ ܕܥܠܘ ܥܡܗ ܩܛܠܘ ܐܢܘܢ ܒܚܪܒܐ

ܘܫܕܪ ܛܪܝܦܘܢ ܚܝܠܐ ܘܦܪ̈ܫܐ ܠܓܠܝܠܐ ܘܠܦܩܥܬܐ ܪܒܬܐ ܠܡܘܒܕܘ ܠܟܠܗܘܢ ܕܒܝܬ ܝܘܢܬܢ

ܘܝܕܥܘ ܕܐܬܬܚܕ ܠܗ ܝܘܢܬܢ ܘܐܒܕ ܠܗ ܗܘ ܘܐܝܠܝܢ ܕܥܡܗ ܘܠܒܒܘ ܘܒܝܐܘ ܢܦܫܗܘܢ ܘܐܙܠܘ ܟܕ ܟܢܝܫܝܢ ܠܩܪܒܐ

ܘܚܙܘ ܪ̈ܕܘܦܝܗܘܢ ܕܡܪܬ ܠܗ ܠܗܘܢ ܥܕܡܐ ܠܢܦܫܐ ܘܡܢ ܟܠܗ ܚܝܠܗܘܢ ܡܬܟܬܫܝܢ ܘܗܦܟܘ ܠܗܘܢ ܡܢܗܘܢ

ܘܐܬܘ ܟܠܗܘܢ ܒܫܠܡܐ ܠܐܪܥܐ ܕܝܗܘܕ ܘܐܬܐܒܠܘ ܥܠ ܝܘܢܬܢ ܘܥܠ ܐܝܠܝܢ ܕܥܡܗ ܘܕܚܠܘ ܕܚܠܬܐ ܪܒܬܐ ܘܐܬܐܒܠ ܟܠܗ ܐܝܣܪܝܠ ܐܒܠܐ ܪܒܐ

ܘܨܒܘ ܟܠܗܘܢ ܥܡ̈ܡܐ ܕܚܕܪ̈ܝܗܘܢ ܠܡܓܡܪܘ ܐܢܘܢ ܐܡܪܘ ܓܝܪ ܕܠܝܬ ܠܗܘܢ ܪܫܐ ܕܡܥܕܪ ܠܗܘܢ ܗܫܐ ܬܘ ܢܬܟܬܫ ܥܡܗܘܢ ܘܢܪܝܡ ܕܘܟܪܢܗܘܢ ܡܢ ܒ̈ܢܝ ܐܢܫܐ

ܘܫܡܥ ܫܡܥܘܢ ܕܟܢܫ ܛܪܝܦܘܢ ܚܝܠܐ ܣܓܝܐܐ ܕܢܐܬܐ ܠܐܪܥܐ ܕܝܗܘܕ ܘܢܥܛܝܗ

ܘܚܙܝܗܝ ܠܥܡܐ ܕܕܚܝܠ ܘܪܬܝܬ ܘܣܠܩ ܠܐܘܪܫܠܡ

ܘܟܢܫ ܠܥܡܐ ܘܒܝܐ ܐܢܘܢ ܘܐܡܪ ܠܗܘܢ ܝܕܥܝܢ ܐܢܬܘܢ ܟܠ ܡܕܡ ܕܥܒܕܬ ܐܢܐ ܘܐܚ̈ܝ ܘܟܠܗ ܒܝܬ ܐܒܝ ܥܠ ܐ̈ܦܝ ܢܡܘܣܐ ܘܥܠ ܐ̈ܦܝ ܒܝܬ ܡܩܕܫܐ ܩܪ̈ܒܐ ܘܐܘ̈ܠܨܢܐ ܕܚܙܝܢ

ܘܡܛܠ ܗܕܐ ܗܘ ܡܝܬܘ ܟܠܗܘܢ ܐ̈ܚܝ ܥܠ ܐ̈ܦܝ ܟܠܗ ܐܝܣܪܐܝܠ ܘܐܫܬܚܪܬ ܐܢܐ ܒܠܚܘܕܝ

ܘܗܫܐ ܚܣ ܠܝ ܕܐܚܘܣ ܥܠ ܢܦܫܝ ܒܟܠ ܙܒ̈ܢܐ ܕܐܘܠܨܢܐ ܡܛܠ ܕܠܐ ܗܘܝܬ ܡܝܬܪ ܡܢ ܐ̈ܚܝ

ܒܪܡ ܕܝܢ ܐܬܟܬܫ ܥܠ ܐ̈ܦܝ ܥܡܝ ܘܥܠ ܒܝܬ ܡܩܕܫܢ ܘܥܠ ܐ̈ܦܝ ܒܢ̈ܝܢ ܡܛܠ ܕܐܬܟܢܫܘ ܟܠܗܘܢ ܥܡ̈ܡܐ ܠܡܓܡܪܘܬܢ ܡܛܠ ܒܥܠܕܒܒܘܬܗܘܢ

ܘܐܬܬܥܝܪܬ ܘܪܬܚܬ ܪܘܚܗ ܕܥܡܐ ܒܪܫܥܬܗ ܕܫܡܥܘ ܡ̈ܠܘܗܝ

ܘܥܢܘ ܒܩܠܐ ܪܡܐ ܘܐܡܪܘ ܠܗ ܐܢܬ ܗܘ ܡܕܒܪܢܢ ܚܠܦ ܝܗܘܕܐ ܘܝܘܢܬܢ ܐܚ̈ܝܟ

ܐܩܪܒ ܩܪ̈ܒܝܢ ܘܟܘܠ ܕܬܐܡܪ ܠܢ ܢܥܒܕ

ܘܟܢܫ ܫܡܥܘܢ ܠܟܠܗܘܢ ܓܒܪ̈ܐ ܩܪ̈ܒܬܢܐ ܘܣܪܗܒ ܠܡܫܠܡܘ ܘܠܡܫܟܠܠܘ ܫܘܪܗ ܕܐܪܫܠܡ ܘܐܥܫܢܗ ܠܟܠܗ ܟܕ ܚܕܪ

ܘܫܕܪ ܠܝܘܢܬܢ ܒܪ ܐܒܝܫܠܘܡ ܘܥܡܗ ܚܝܠܐ ܣܓܝܐܐ ܠܝܘܦܐ ܘܐܦܩ ܠܐܝܠܝܢ ܕܐܝܬ ܗܘܘ ܒܗ ܘܫܪܐ ܬܡܢ ܗܘ

ܘܫܩܠ ܛܪܝܦܘܢ ܡܢ ܦܛܘܠܡܐܝܣ ܒܚܝܠܐ ܣܓܝܐܐ ܠܡܥܠ ܠܐܪܥܐ ܕܝܗܘܕܐ ܘܝܘܢܬܢ ܥܡܗ ܗܘܐ ܟܕ ܡܬܢܛܪ

ܫܡܥܘܢ ܕܝܢ ܫܪܐ ܥܠ ܥܕܝܪܐ ܠܘܩܒܠ ܦܩܥܬܐ

ܘܝܕܥ ܛܪܝܦܘܢ ܕܩܡ ܫܡܥܘܢ ܚܠܦ ܝܘܢܬܢ ܐܚܘܗܝ ܘܕܥܬܝܕ ܗܘ ܠܡܩܪܒܘ ܥܡܗ ܘܫܕܪ ܠܘܬܗ ܐܝ̈ܙܓܕܐ ܘܐܡܪ ܠܗ

ܚܠܦ ܟܣܦܐ ܗܘ ܕܚܝܒ ܗܘܐ ܝܘܢܬܢ ܐܚܘܟ ܒܝܬ ܡܠܟܐ ܡܛܠ ܨܒܘ̈ܬܐ ܕܐܚܝܕ ܗܘܐ ܟܪܝܟܝܢ ܐܢܚܢܢ ܠܗ

ܘܗܫܐ ܫܕܪ ܡܐܐ ܟܟܪܝܢ ܕܣܐܡܐ ܘܬܪ̈ܝܢ ܒܢܘ̈ܗܝ ܠܗܡܝܪ̈ܐ ܕܕܠܡܐ ܟܕ ܢܫܪܝܘܗܝ ܢܣܛܐ ܘܢܦܪܘܩ ܠܗ ܡܢܢ ܘܫܪܝܢ ܚܢܢ ܠܗ

ܘܝܕܥ ܫܡܥܘܢ ܕܒܢܟܠܐ ܗܘ ܡܡܠܠܝܢ ܥܡܗ ܘܫܕܪ ܟܣܦܐ ܘܛ̈ܠܝܐ ܕܕܠܡܐ ܢܥܒܕ ܒܥܠܕܒܒܘܬܐ ܪܒܬܐ ܠܐܝܣܪܝܠ

ܥܠ ܕܠܐ ܫܕܪ ܟܣܦܐ ܘܛ̈ܠܝܐ ܗܢܘܢ ܕܐܒܕܘ

ܘܫܕܪ ܛ̈ܠܝܐ ܘܡܐܐ ܟܟܪ̈ܝܢ ܘܕܓܠ ܘܠܐ ܫܕܪܗ ܠܝܘܢܬܢ

ܘܡܢ ܒܬܪ ܗܠܝܢ ܐܬܐ ܛܪܝܦܘܢ ܠܡܗܠܟܘ ܒܐܪܥܐ ܕܝܗܘܕ ܐܝܟ ܕܢܥܛܝܗ ܘܐܙܠ ܒܐܘܪܚܐ ܕܥܕܘܪܐ ܘܫܡܥܘܢ ܘܡܫܪܝܬܗ ܩܕܡ ܗܘܐ ܠܗ ܠܟܠ ܐܬܪ ܕܐܙܠ ܗܘܐ

ܝܬ̈ܒܝ ܡܪܕܐ ܕܝܢ ܫܕܪܘ ܠܘܬ ܛܪܝܦܘܢ ܐܝ̈ܙܓܕܐ ܕܢܐܬܐ ܠܘܬܗܘܢ ܚܦܝܛܐܝܬ ܡܕܒܪܝܬܐ ܘܕܢܫܕܪ ܠܗܘܢ ܐܣܢܐ

ܘܛܝܒ ܛܪܝܦܘܢ ܟܠܗܘܢ ܦܪ̈ܫܘܗܝ ܕܢܐܬܐ ܒܗܘ ܠܠܝܐ ܘܗܘܐ ܬܠܓܐ ܪܒܐ ܘܠܐ ܐܫܟܚ ܕܢܐܬܐ ܡܛܠ ܬܠܓܐ ܘܫܩܠ ܘܐܬܐ ܠܓܠܥܕ

ܟܕ ܕܝܢ ܡܛܝ ܛܪܝܦܘܢ ܠܒܣܩ̈ܡܐ ܩܛܠܗ ܠܝܘܢܬܢ ܘܐܬܩܒܪ ܬܡܢ

ܘܗܦܟ ܛܪܝܦܘܢ ܘܐܙܠ ܠܐܪܥܗ

ܘܫܕܪ ܫܡܥܘܢ ܘܫܩܠ ܓܪ̈ܡܘܗܝ ܕܝܘܢܬܢ ܐܚܘܗܝ ܘܩܒܪܗ ܒܡܘܪܥܝܡ ܒܡܕܝܢܬܐ ܕܐܒܗܘܗܝ

ܘܒܟܘ ܘܐܬܐܒܠܘ ܥܠܘܗܝ ܟܠܗ ܐܝܣܪܐܝܠ ܝܘ̈ܡܬܐ ܣܓ̈ܝܐܐ

ܘܒܢܐ ܫܡܥܘܢ ܠܥܠ ܡܢ ܩܒܪܐ ܕܐܒܘܗܝ ܘܕܐܚ̈ܘܗܝ ܘܪܡܪܡܗ ܒܚܙܬܗ ܒܟܐ̈ܦܐ ܦܠܝܚ̈ܬܐ ܕܓ̈ܠܝܦܢ ܡܢ ܬܪܝܗܘܢ ܓܒ̈ܝܗܝܢ

ܘܐܩܝܡ ܫܒܥ ܢܦܫ̈ܢ ܚܕܐ ܠܘܩܒܠ ܚܕܐ ܠܐܒܘܗܝ ܘܠܐܡܗ ܘܠܐܪܒܥܬܝܗܘܢ ܐܚܘ̈ܗܝ

ܘܥܒܕ ܡܐܟ̈ܢܘܣ ܘܐܩܝܡ ܠܗܝܢ ܐܣ̈ܛܘܢܐ ܪ̈ܘܪܒܐ ܘܓܠܦ ܥܠ ܐܣ̈ܛܘܢܐ ܟܠ ܡܐ̈ܢܝ ܙܝܢܐ ܕܩܪܒܐ ܠܫܡܐ ܕܠܥܠܡ ܘܥܠ ܓܢܒ ܡܐ̈ܢܝ ܙܝܢܐ ܥܒܕ ܐ̈ܠܦܐ ܓܠܝ̈ܦܬܐ ܘܪܡܪܡ ܕܗ̈ܘܝ ܡܬ̈ܚܙܝܢ ܠܟܠ ܢ̈ܚܬܝ ܝܡܐ

ܗܢܐ ܩܒܪܐ ܕܥܒܕ ܫܡܥܘܢ ܒܡܘܪܥܝܡ ܥܕܡܐ ܠܝܘܡܢܐ

ܛܪܝܦܘܢ ܕܝܢ ܡܗܠܟ ܗܘܐ ܒܢܟܠܐ ܥܡ ܐܢܛܝܟܘܣ ܡܠܟܐ ܪܒܐ ܘܩܛܠܗ

ܘܐܡܠܟ ܚܠܦܘܗܝ ܘܩܛܪ ܬܓܐ ܕܐܣܝܐ ܘܥܒܕ ܡܚܘܬܐ ܪܒܬܐ ܒܐܪܥܐ

ܘܒܢܐ ܫܡܥܘܢ ܚܣ̈ܢܝܗ ܕܝܗܘܕܐ ܘܐܚܕܪ ܒܡ̈ܓܕܠܐ ܪ̈ܡܐ ܘܒܫܘܪ̈ܐ ܪ̈ܘܪܒܐ ܘܒܬܪ̈ܥܐ ܘܒܡ̈ܘܟܠܐ ܘܣܡ ܐܣܢܐ ܒܚ̈ܣܢܐ

ܘܓܒܐ ܫܡܥܘܢ ܓܒܪ̈ܐ ܘܫܕܪ ܠܘܬ ܕܡܛܪܝܘܣ ܡܠܟܐ ܠܡܥܒܕ ܫܘܒܩܢܐ ܠܐܪܥܐ ܡܛܠ ܕܟܠܗܘܢ ܣܘܥܪ̈ܢܘܗܝ ܕܛܪܝܦܘܢ ܚܛܘܦܝܐ ܐܝܬܝܗܘܢ ܗܘܘ

ܘܫܕܪ ܕܡܛܪܝܘܣ ܡܠܟܐ ܐܝܟ ܗܠܝܢ ܡ̈ܠܐ ܘܟܬܒ ܠܗ ܥܢܝܢܐ ܒܐܓܪܬܐ ܗܟܢܐ

ܕܡܛܪܝܘܣ ܡܠܟܐ ܠܫܡܥܘܢ ܪܒ ܟܗ̈ܢܐ ܘܪܚܡܐ ܕܡܠܟܐ ܘܠܣ̈ܒܐ ܘܠܥܡܐ ܕܝܗ̈ܘܕܝܐ ܫܠܡ

ܟܠܝܠܐ ܕܕܗܒܐ ܘܫܠܝܚܘܬܐ ܕܫܕܪܬܘܢ ܠܢ ܩܒܠܢ ܘܥܬܝܕܝܢ ܐܢܚܢܢ ܠܡܥܒܕ ܠܟܘܢ ܫܠܡܐ ܪܒܐ ܘܕܢܟܬܘܒ ܠܐܝܠܝܢ ܕܥܒܝܕܝܢ ܥܠ ܨܒܘ̈ܬܐ ܕܢܫܒܩܘܢ ܠܟܘܢ ܫܩ̈ܠܐ

ܘܟܠ ܕܫܠܚܢ ܠܟܘܢ ܩܝܡ ܘܚܣ̈ܢܐ ܕܒܢܝܬܘܢ ܕܝܠܟܘܢ ܢܗܘܘܢ

ܘܫܒܩܝܢ ܐܢܚܢܢ ܕܝܢ ܐܦ ܚܛܗ̈ܐ ܘܣ̈ܟܠܘܬܐ ܕܥܕܡܐ ܠܝܘܡܢܐ ܘܟܠܝܠܐ ܗܘ ܕܚܝܒܝܢ ܗܘܝܬܘܢ ܘܟܠ ܡܢ ܕܝܗܒ ܗܘܐ ܡܟܣܐ ܒܐܘܪܫܠܡ ܡܟܝܠ ܠܐ ܢܗܘܐ ܝܗܒ

ܘܟܠ ܡܢܘ ܡܢ ܕܝܠܟܘܢ ܕܨܒܝܢ ܕܢܬܟܬܒܘܢ ܥܡ ܕܝܠܢ ܢܬܟܬܒܘܢ ܘܢܗܘܐ ܒܝܢܬܢ ܫܠܡܐ

ܒܫܢܬ ܡܐܐ ܘܫܒܥܝܢ ܐܬܪܝܡ ܢܝܪܐ ܕܥܡ̈ܡܐ ܡܢ ܐܝܣܪܝܠ

ܘܫܪܝܘ ܥܡܐ ܟܬܒܝܢ ܘܫܩܠܝܢ ܘܝܗܒܝܢ ܒܫܢܬܐ ܩܕܡܝܬܐ ܒܫܡܗ ܕܫܡܥܘܢ ܪܒ ܟ̈ܗܢܐ ܪܒܐ ܘܪܫܐ ܘܡܕܒܪܢܐ ܕܝܗ̈ܘܕܝܐ

ܒܗܢܘܢ ܝܘ̈ܡܬܐ ܝܬܒ ܫܡܥܘܢ ܥܠ ܥܐܙܐ ܘܚܕܪܗ ܒܡܫܪܝܬܐ ܘܥܒܕ ܡܓ̈ܕܠܐ ܕܩܝܣܐ ܥܫ̈ܝܢܐ ܘܩܪܒ ܠܫܘܪܐ ܕܡܕܝܢܬܐ ܘܗܓܡ ܚܕ ܡܓܕܠܐ ܘܐܚܕܗ ܠܡܕܝܢܬܐ