Peshitta Maccabees 1 A

ܘܐܙܠ ܝܘܢܬܢ ܒܬܫܒܘܚܬܐ ܪܒܬܐ ܠܦܛܘܠܡܐܝܣ ܘܐܪܥ ܐܢܘܢ ܠܬܪ̈ܝܗܘܢ ܡ̈ܠܟܐ ܘܝܗܒ ܠܗܘܢ ܕܗܒܐ ܘܣܐܡܐ ܘܡܘܗ̈ܒܬܐ ܘܠܪ̈ܚܡܝܗܘܢ ܘܐܫܟܚ ܪ̈ܚܡܐ ܩܕܡ ܥܝ̈ܢܝܗܘܢ

ܘܐܬܟܢܫܘ ܠܘܬܗ ܐܢܫܐ ܒܝ̈ܫܐ ܡܢ ܐܝܣܪܝܠ ܓܒܪ̈ܐ ܥܘ̈ܠܐ ܠܡܩܒܠ ܥܠ ܝܘܢܬܢ ܘܠܐ ܚܪ ܒܗܘܢ ܡܠܟܐ ܘܠܐ ܩܒܠ ܡܢܗܘܢ

ܘܦܩܕ ܡܠܟܐ ܘܐܫܠܚܘܗܝ ܠܝܘܢܬܢ ܢܚ̈ܬܘܗܝ ܘܐܠܒܫܘܗܝ ܐܪ̈ܓܘܢܐ ܘܟܕ ܥܒܕܘ ܠܗ ܗܟܢܐ

ܐܘܬܒܗ ܥܡܗ ܡܠܟܐ ܘܐܡܪ ܠܪ̈ܘܪܒܢܘܗܝ ܦܘܩܘ ܥܡܗ ܠܡܨܥܬ ܡܕܝܢܬܐ ܘܐܟܪܙܘ ܕܠܐ ܐܢܫ ܢܩܒܘܠ ܥܠܘܗܝ ܥܠ ܟܠ ܨܒܘ ܕܐܝܬ ܘܠܐ ܐܢܫ ܢܗܪܝܘܗܝ ܥܠ ܟܠ ܡܠܐ ܕܐܝܬ

ܘܟܕ ܚܙܘ ܗܠܝܢ ܕܩܒܠܝܢ ܗܘܘ ܥܠ ܝܘܢܬܢ ܬܫܒܘܚܬܗ ܐܝܟ ܕܐܟܪܙܘ ܩܕܡܘܗܝ ܟܪ̈ܘܙܐ ܟܕ ܡܟܣܐ ܐܪ̈ܓܘܢܐ ܥܪܩܘ ܟܠܗܘܢ

ܘܫܒܚܗ ܡܠܟܐ ܠܝܘܢܬܢ ܘܟܬܒܗ ܡܢ ܪ̈ܫܐ ܕܪ̈ܚܡܘܗܝ ܘܣܡܗ ܪܝܫ ܚܝܠܐ ܘܪܒ ܥܡܐ

ܘܗܦܟ ܝܘܢܬܢ ܠܐܘܪܫܠܡ ܒܫܠܡܐ ܘܒܒܘܣܡܐ

ܘܒܫܢܬ ܡܐܐ ܘܫܬܝܢ ܘܚܡܫ ܐܬܐ ܕܡܛܪܝܣ ܒܪܗ ܕܕܡܛܪܝܘܣ ܡܢ ܩܪܛܐ ܠܐܪܥܐ ܕܐܒܗ̈ܘܗܝ

ܘܫܡܥ ܐܠܟܣܢܕܪܘܣ ܡܠܟܐ ܘܐܬܬܥܝܩ ܣܓܝ ܘܗܦܟ ܠܐܢܛܝܘܟܝܐ

ܘܐܩܝܡ ܕܡܛܪܝܘܣ ܠܐܦܠܘܢܝܘܣ ܗܘ ܕܥܒܝܕ ܗܘܐ ܥܠ ܣܘܪܝܐ ܘܟܢܫ ܚܝܠܐ ܣܓܝܐܐ ܘܫܪܐ ܥܠ ܝܡܢܝܢ ܘܫܕܪ ܠܘܬ ܝܘܢܬܢ ܪܒ ܟܗ̈ܢܐ ܘܐܡܪ ܠܗ

ܐܢܬ ܒܠܚܘܕܝܟ ܡܬܪܝܡ ܐܢܬ ܥܠܝܢ ܘܐܢܐ ܗܘܝܬ ܠܚܣܕܐ ܘܠܒܘܙܚܐ ܡܛܠܬܟ ܘܠܡܢܐ ܡܫܬܠܛ ܐܢܬ ܥܠܝܢ ܒܬܚܘ̈ܡܝܢ

ܗܫܐ ܐܢܗܘ ܕܬܟܝܠ ܐܢܬ ܥܠ ܚܝܠܟ ܚܘܬ ܠܘܬܢ ܠܦܩܥܬܐ ܘܢܩܒܠ ܐ̈ܦܐ ܚܕ ܕܚܕ ܬܡܢ ܡܛܠ ܕܥܡܝ ܐܝܬ ܚܝܠܐ ܕܡܕܝܢ̈ܬܐ

ܫܐܠ ܘܚܙܝ ܕܡܢܘ ܐܢܐ ܘܡܢ ܐܢܘܢ ܡܥܕܪ̈ܢܝܢ ܗܠܝܢ ܕܐܡܪܝܢ ܕܠܝܬ ܠܟܘܢ ܩܝܡ ܪ̈ܓܠܐ ܩܕܡܝܢ ܡܛܠ ܕܬܪ̈ܬܝܢ ܙܒ̈ܢܝܢ ܐܙܕܟܝܘ ܐܒ̈ܗܝܟ ܒܐܪܥܗܘܢ

ܘܗܫܐ ܠܐ ܡܬܡܨܐ ܐܢܬ ܚܝܠܐ ܠܡܩܡ ܩܕܡ ܚܝܠܢ ܘܦܪ̈ܫܘܗܝ ܒܦܩܥܬܐ ܐܝܟܐ ܕܠܝܬ ܠܐ ܟܐܦܐ ܘܠܐ ܛܪܢܐ ܐܦܠܐ ܐܬܪܐ ܠܡܥܪܩ

ܘܟܕ ܫܡܥ ܝܘܢܬܢ ܡ̈ܠܘܗܝ ܕܐܦܠܘܢܝܘܣ ܐܬܚܡܬ ܘܐܬܥܙܙ ܒܪܥܝܢܗ ܘܓܒܐ ܥܣܪܐ ܐ̈ܠܦܝܢ ܓܒܪ̈ܐ ܡܢ ܐܘܪܫܠܡ ܘܐܪܥܗ ܫܡܥܘܢ ܐܚܘܗܝ ܠܥܘܕܪܢܗ

ܘܫܪܐ ܝܘܢܬܢ ܥܠ ܝܘܦܐ ܘܐܚܕܘܗ ܥܡܘܪ̈ܝܗ ܠܡܕܝܢܬܐ ܡܛܠ ܕܡܛܪܬܐ ܕܐܦܠܘܢܝܘܣ ܐܝܬ ܗܘܐ ܒܗ ܘܐܩܪܒܘ ܥܡܗ

ܘܕܚܠܘ ܥܡܘܪ̈ܝܗ ܕܡܕܝܢܬܐ ܘܦܬܚܘ ܠܗܘܢ ܘܐܫܬܠܛ ܝܘܢܬܢ ܥܠ ܝܘܦܐ

ܘܫܡܥ ܐܦܠܘܢܝܘܣ ܘܕܒܪ ܬܠܬܐ ܐ̈ܠܦܝܢ ܦܪ̈ܫܐ ܘܚܝܠܐ ܣܓܝܐܐ ܘܐܙܠ ܠܙܘܛܘܣ ܐܝܟ ܥܒܘܪܐ ܘܩܕܡ ܗܘܐ ܠܗܘܢ ܠܦܩܥܬܐ ܡܛܠ ܚܝܠܐ ܕܦܪ̈ܫܐ ܕܐܝܬ ܗܘܐ ܥܡܗ ܘܬܟܝܠ ܗܘܐ ܥܠܝܗܘܢ

ܘܪܕܦ ܝܘܢܬܢ ܒܬܪܗ ܠܙܘܛܘܣ ܘܩܪܒ ܡܫܪ̈ܝܬܐ ܐܟܚܕܐ ܠܩܪܒܐ

ܘܫܒܩ ܐܦܠܘܢܝܘܣ ܐܠܦ ܦܪ̈ܫܝܢ ܡܢ ܒܣܬܪܗܘܢ ܒܟܡܐܢܐ

ܘܝܕܥ ܝܘܢܬܢ ܕܟܡܐܢܐ ܐܝܬ ܒܣܬܪܗ ܘܐܬܟܪܟܘܗ ܠܡܫܪܝܬܗ ܘܫܕܘ ܘܛܠܩܘ ܓܐܪ̈ܝܗܘܢ ܒܥܡܐ ܡܢ ܨܦܪܐ ܘܥܕܡܐ ܠܦܢܝܐ

ܥܡܐ ܕܝܢ ܩܐܡ ܗܘܐ ܐܝܟ ܕܦܩܕ ܝܘܢܬܢ ܘܠܐܝܘ ܦܪ̈ܫܝܗܘܢ

ܘܢܓܕ ܫܡܥܘܢ ܠܚܝܠܗ ܘܐܩܪܒ ܥܡ ܦ̈ܠܓܐ ܥܕܡܐ ܕܐܫܬܪܝܘ ܦܪ̈ܫܐ ܘܚܝ̈ܠܐ ܘܐܬܬܒܪܘ ܘܥܪܩܘ ܡܢ ܩܕܡܘܗܝ

ܘܦܪ̈ܫܐ ܐܬܒܕܪܘ ܒܦܩܥܬܐ ܘܥܪܩܘ ܠܙܘܛܘܣ ܘܥܠܘ ܠܒܝܬ ܕܓܘܢ ܦܬܟܪܗܘܢ ܕܢܫܬܘܙܒܘܢ

ܘܐܘܩܕܗ ܝܘܢܬܢ ܠܒܝܬ ܦܬܟܪܗܘܢ ܘܠܐܝܠܝܢ ܕܥܪܩܘ ܠܡܬܓܘܣܘ ܒܝܬ ܕܓܘܢ ܐܘܩܕ ܐܢܘܢ ܥܡܗ ܘܠܙܘܛܘ̇ܣ ܘܠܡܕܝ̈ܢܬܐ ܕܚܕܝܪܢ ܠܗ ܐܘܩܕ ܐܢܝܢ ܒܢܘܪܐ ܘܢܣܒ ܒܙܬܗܝܢ

ܘܗܘܘ ܐܝܠܝܢ ܕܢܦܠܘ ܒܚܪܒܐ ܥܡ ܐܝܠܝܢ ܕܐܝܩܕܘ ܐܝܟ ܬܡܢܝܐ ܐܠܦܝܢ ܓܒܪ̈ܝܢ

ܘܫܩܠ ܡܢ ܬܡܢ ܝܘܢܬܢ ܘܫܪܐ ܥܠ ܐܫܩܠܘܢ ܘܢܦܩܘ ܝܬܒ̈ܝܗ ܕܡܕܝܢܬܐ ܠܐܘܪܥܗ ܒܬܫܒܘܚܬܐ ܪܒܬܐ

ܘܗܦܟ ܝܘܢܬܢ ܠܐܘܪܫܠܡ ܥܡ ܐܝܠܝܢ ܕܥܡܗ ܟܕ ܐܝܬ ܥܡܗܘܢ ܒܙܬܐ ܣܓܝܐܬܐ

ܘܟܕ ܫܡܥ ܐܠܟܣܢܕܪܘܣ ܡܠܟܐ ܗܠܝܢ ܡ̈ܠܐ ܐܘܣܦ ܠܡܫܒܚܘܬܗ ܠܝܘܢܬܢ

ܘܫܕܪ ܠܗ ܦܝܒܠܐ ܕܕܗܒܐ ܐܝܟ ܕܐܝܬ ܥܝܕܐ ܠܡܬܝܗܒܘ ܠܒ̈ܢܝ ܛܘܗܡܗܘܢ ܕܡ̈ܠܟܐ ܘܝܗܒ ܠܗ ܠܥܩܪܘܢ ܘܠܟܠܗܘܢ ܬܚܘ̈ܡܝܗ ܠܝܪܬܘܬܐ

ܘܡܠܟܐ ܕܡܨܪܝܢ ܟܢܫ ܠܗ ܚܝܠܐ ܣܓܝܐܐ ܐܝܟ ܚܠܐ ܕܥܠ ܣܦܬܗ ܕܝܡܐ ܘܐ̈ܠܦܐ ܣܓܝ̈ܐܬܐ ܘܨܒܐ ܕܢܐܚܘܕ ܡܠܟܘܬܗ ܕܐܠܟܣܢܕܪܘܣ ܒܢܟܠܐ ܘܢܘܣܦܝܗ ܥܠ ܡܠܟܘܬܗ

ܘܢܦܩ ܠܣܘܪܝܐ ܒܡ̈ܠܐ ܕܫܠܡܐ ܘܦܬܚܝܢ ܗܘܘ ܠܗ ܝܬ̈ܒܝ ܡܕܝ̈ܢܬܐ ܘܐܪܥܝܢ ܗܘܘ ܠܗ ܡܛܠ ܕܦܩܕ ܗܘܐ ܐܠܟܣܢܕܪܘܣ ܕܢܗܘܘܢ ܐܪܥܝܢ ܠܗ ܐܝܟ ܕܠܚܡܘܗܝ

ܟܕ ܕܝܢ ܥܐܠ ܗܘܐ ܦܛܘܠܡܐܘܣ ܠܡܕܝ̈ܢܬܐ ܫܒܩ ܗܘܐ ܚܝܠܐ ܘܢܛܘܪ̈ܐ ܒܟܠܗܝܢ

ܘܟܕ ܕܝܢ ܡܛܝ ܠܙܘܛܘܣ ܚܘܝܘ ܠܗ ܠܒܝܬ ܕܓܘܢ ܦܬܟܪܐ ܕܡܘܩܕ ܒܢܘܪܐ ܘܠܙܘܛܘܣ ܘܠܟܠ ܕܚܕܪ̈ܝܗ ܟܕ ܡܣܚܦܢ ܘܦܓܪ̈ܐ ܟܕ ܫܕܝܢ ܘܡܘ̈ܩܕܐ ܗܢܘܢ ܕܐܘܩܕ ܒܩܪܒܐ ܘܥܒܕܘ ܟܫ̈ܝܢ ܟܫ̈ܝܢ ܒܐܘܪܚܐ

ܘܐܫܬܥܝܘ ܠܗ ܠܡܠܟܐ ܟܠ ܕܥܒܕ ܐܝܟ ܕܠܨܥܪܗ ܕܝܠܗ ܘܟܕ ܫܡܥ ܡܠܟܐ ܫܬܩ ܠܗ

ܘܐܪܥܗ ܝܘܢܬܢ ܠܡܠܟܐ ܒܝܘܦܐ ܒܬܫܒܘܚܬܐ ܪܒܬܐ ܘܫܐܠܘ ܒܫܠܡܐ ܚܕ ܕܚܕ ܘܒܬܘ ܬܡܢ

ܘܐܙܠ ܝܘܢܬܢ ܥܡ ܡܠܟܐ ܥܕܡܐ ܠܢܗܪܐ ܕܡܬܩܪܐ ܒܪ ܚܐܪ̈ܐ ܘܗܦܟ ܠܐܘܪܫܠܡ

ܦܛܘܠܡܐܘܣ ܕܝܢ ܡܠܟܐ ܐܫܬܠܛ ܥܠ ܟܠܗܝܢ ܡܕܝܢ̈ܬܐ ܕܒܚܒܠ ܝܡܐ ܥܕܡܐ ܠܣܠܘܩܝܐ ܕܥܠ ܓܢܒ ܝܡܐ ܘܡܬܚܫܒ ܗܘܐ ܥܠ ܐܠܟܣܢܕܪܘܣ ܡܚܫ̈ܒܬܐ ܒܝܫ̈ܬܐ

ܘܫܕܪ ܐܝ̈ܙܓܕܐ ܠܘܬ ܕܡܛܪܝܘܣ ܡܠܟܐ ܘܐܡܪ ܠܗ ܬܐ ܢܩܝܡ ܩܝܡܐ ܚܕ ܥܡ ܚܕ ܘܐܬܠ ܠܟ ܠܒܪܬܝ ܗܝ ܕܫܩܠ ܐܠܟܣܢܕܪܘܣ ܘܬܡܠܟ ܒܡܠܟܘܬܗ ܕܐܒܘܟ

ܐܬܬܘܝܬ ܓܝܪ ܥܠ ܕܝܗܒܬ ܠܗ ܒܪܬܝ ܡܛܠ ܕܨܒܐ ܕܢܩܛܠܢܝ

ܘܫܛܗ ܘܐܣܠܝܗ ܡܛܠ ܕܪܓ ܗܘܐ ܡܠܟܘܬܗ

ܘܢܣܒܗ ܠܒܪܬܗ ܡܢܗ ܘܝܗܒܗ ܠܕܡܛܪܝܘܣ ܘܐܫܬܚܠܦ ܥܠ ܐܠܟܣܢܕܪܘܣ ܘܐܬܓܠܝܬ ܒܥܠܕܒܒܘܬܗ

ܘܥܠ ܦܛܘܠܡܐܘܣ ܠܐܢܛܝܘܟܝܐ ܘܩܛܪ ܬܓܐ ܕܐܣܝܐ ܘܣܡ ܬܪ̈ܝܢ ܬ̈ܓܝܢ ܒܪܫܗ ܡܢ ܐܣܝܐ ܘܥܕܡܐ ܠܡܨܪܝܢ

ܐܠܟܣܢܕܪܘܣ ܕܝܢ ܡܠܟܐ ܒܩܝܠܝܩܝܐ ܗܘܐ ܒܗܘ ܙܒܢܐ ܡܛܠ ܕܡܪܕܘ ܗܘܘ ܥܠܘܗܝ ܒܢ̈ܝ ܐܬܪܐ ܗܘ

ܘܫܡܥ ܐܠܟܣܢܕܪܘܣ ܘܐܬܐ ܥܠܘܗܝ ܠܩܪܒܐ ܘܢܦܩ ܦܛܘܠܡܐܘܣ ܠܩܘܒܠܗ ܒܚܝܠܐ ܣܓܝܐܐ ܘܒܐܝܕܐ ܬܩܝܦܬܐ ܘܙܟܝܗܝ ܠܐܠܟܣܢܕܪܘܣ

ܘܥܪܩ ܗܘ ܐܠܟܣܢܕܪܘܣ ܠܥܪܒܝܐ ܕܢܣܬܬܪ ܬܡܢ ܦܛܘܠܡܐܘܣ ܕܝܢ ܡܠܟܐ ܐܬܪܝܡ

ܘܢܣܒ ܙܝܒܐܝܠ ܥܪܒܝܐ ܪܫܗ ܕܐܠܟܣܢܕܪܘܣ ܘܫܕܪܗ ܠܦܛܘܠܡܐܘܣ

ܘܦܛܘܠܡܐܘܣ ܡܠܟܐ ܐܦ ܗܘ ܡܝܬ ܠܬܠܬܐ ܝܘ̈ܡܝܢ ܘܐܝܠܝܢ ܕܫܒܩ ܗܘܐ ܒܚ̈ܣܢܐ ܡܝܬܘ ܗܘܘ ܡܢܗܘܢ ܒܗܘܢ ܒܚܣ̈ܢܐ

ܘܐܡܠܟ ܕܡܛܪܝܘܣ ܒܫܢܬ ܡܐܐ ܘܫܬܝܢ ܘܫܒܥ

ܒܗܢܘܢ ܝܘܡ̈ܬܐ ܟܢܫ ܝܘܢܬܢ ܚܝܠܐ ܡܢ ܝܗܘܕܐ ܕܢܬܟܬܫ ܥܡ ܝܬ̈ܒܝ ܡܪܕܐ ܕܒܐܘܪܫܠܡ ܘܥܒܕ ܥܠܘܗܝ ܡܐܟ̈ܢܘܣ ܣܓܝܐ̈ܬܐ

ܘܐܙܠܘ ܐܢ̈ܫܝܢ ܣ̈ܢܝܝ ܥܡܗܘܢ ܓܒܪ̈ܐ ܥܘ̈ܠܐ ܠܘܬ ܡܠܟܐ ܘܐܡܪܘ ܠܗ ܕܗܐ ܝܘܢܬܢ ܝܬܒ ܒܥܠ ܒܝܬ ܡܪܕܐ

ܘܟܕ ܫܡܥ ܡܠܟܐ ܐܬܚܡܬ ܘܒܪܫܥܬܗ ܕܫܡܥ ܫܩܠ ܘܐܬܐ ܠܦܛܘܠܡܐܝܣ ܘܟܬܒ ܠܝܘܢܬܢ ܕܠܐ ܢܬܒܘܢ ܥܠ ܡܪܕܐ ܘܕܢܐܙܠ ܘܢܐܪܥܝܘܗܝ ܒܥܓܠ ܒܦܛܘܠܡܐܝܣ

ܟܕ ܕܝܢ ܫܡܥ ܝܘܢܬܢ ܦܩܕ ܕܢܬܒܘܢ ܥܠܘܗܝ ܥܠ ܡܪܕܐ ܘܓܒܐ ܡܢ ܟܗ̈ܢܐ ܘܡܢ ܣܒ̈ܐ ܕܐܝܣܪܐܝܠ ܘܝܗܒ ܢܦܫܗ ܠܩܢܕܝܢܘܣ

ܘܢܣܒ ܕܗܒܐ ܘܣܐܡܐ ܘܡ̈ܐܢܐ ܘܫܪܟܐ ܕܩܘܪ̈ܒܢܐ ܐܚܪ̈ܢܐ ܘܐܙܠ ܠܦܛܘܠܡܐܝܣ ܠܘܬ ܡܠܟܐ ܘܐܫܟܚ ܪ̈ܚܡܐ ܩܕܡܘܗܝ

ܘܩܒܠܝܢ ܗܘܘ ܥܠܘܗܝ ܐܢܫܐ ܥܘ̈ܠܐ ܡܢ ܒ̈ܢܝ ܥܡܐ

ܘܥܒܕ ܠܗ ܡܠܟܐ ܐܝܟ ܕܥܒܕ ܠܗ ܗܘ ܕܡܢ ܩܕܡܘܗܝ ܘܪܡܪܡܗ ܩܕܡ ܟܠܗܘܢ ܪ̈ܚܡܘܗܝ

ܘܝܗܒ ܠܗ ܟܗܢܘܬܐ ܘܟܠ ܐܝܩܪܐ ܕܐܝܬ ܗܘܐ ܠܗ ܡܢ ܩܕܝܡ ܘܐܘܪܒܗ ܘܥܒܕܗ ܡܢ ܪ̈ܚܡܘܗܝ ܪ̈ܘܪܒܐ ܘܡܝܩܪ̈ܐ

ܘܐܦܝܣ ܝܘܢܬܢ ܠܡܠܟܐ ܕܢܥܒܕ ܠܝܗܘܕܐ ܕܠܐ ܗܘܬ ܡܣܩܐ ܡܕܐܬܐ ܘܠܬܠܬܝܗܘܢ ܪ̈ܫܘܗܝ ܕܐܬܪܐ ܘܠܫܡܪܝܢ ܘܐܫܬܘܕܝ ܠܗ ܬܠܬܡܐܐ ܟܟܪ̈ܝܢ

ܘܐܨܛܒܝ ܡܠܟܐ ܘܟܬܒ ܠܗ ܠܝܘܢܬܢ ܐܓܪ̈ܬܐ ܥܠ ܟܠ ܕܒܥܐ ܕܟܬܝܒ ܒܗܝܢ ܗܟܢܐ

ܕܡܛܪܝܘܣ ܡܠܟܐ ܠܝܘܢܬܢ ܐܚܝ ܘܠܥܡܐ ܕܝܗ̈ܘܕܝܐ ܫܠܡ

ܦܚܡܗ ܕܐܓܪܬܐ ܟܬܒܢ ܠܠܘܣܬܢܝܣ ܒܪ ܓܢܣܢ ܥܠܝܟܘܢ ܟܬܒܢ ܕܝܢ ܐܦ ܠܘܬܟܘܢ ܕܐܦ ܐܢܬܘܢ ܬܕܥܘܢ

ܕܡܛܪܝܘܣ ܡܠܟܐ ܠܠܘܣܬܢܝܣ ܐܒܝ ܫܠܡ

ܠܥܡܐ ܕܝܗ̈ܘܕܝܐ ܪ̈ܚܡܝܢ ܘܢܛܪ̈ܝ ܫܠܡܘܬܐ ܕܠܘܬܢ ܨܒܝܢ ܕܢܥܒܕ ܠܗܘܢ ܛܒ̈ܬܐ ܡܛܠ ܬܪܥܝܬܗܘܢ ܕܠܘܬܢ

ܐܩܝܡܢ ܠܗܘܢ ܕܝܢ ܘܝܗܒܢ ܠܗܘܢ ܠܬܚܘ̈ܡܝܗ ܕܝܗܘܕܐ ܘܠܬܠܬܐ ܫܩ̈ܠܝܢ ܠܐܦܪܝܡ ܘܠܠܘܕܐ ܘܠܪܡܬܝܡ ܗܠܝܢ ܕܐܬܬܘܣܦ ܡܢ ܫܡܪܝܢ ܥܠ ܝܗܘܕܐ ܘܟܠܗ ܫܘܠܛܢܗܝܢ ܠܩܘܪ̈ܒܢܐ ܕܒܐܘܪܫܠܡ ܚܠܦ ܫܩ̈ܠܐ ܕܡ̈ܠܟܐ ܕܫܩܠܘ ܡܢܗܘܢ ܡܢ ܩܕܝܡ ܡܢ ܙܪܥܗ ܕܐܪܥܐ ܘܡܢ ܦܐܪ̈ܐ ܕܐ̈ܝܠܢܐ

ܘܕܫܪܟܐ ܕܗܘܐ ܗܘܐ ܠܢ ܡܢ ܡܥܣܪ̈ܐ ܘܡܢ ܡܟ̈ܣܐ ܘܝܡ̈ܡܬܐ ܕܡܠܚܐ ܘܟ̈ܠܝܠܐ ܕܗܘܝܢ ܗܘܘ ܠܢ ܟܠܡܕܡ ܫܒܝܩ ܠܗܘܢ

ܘܠܐ ܬܫܬܪܐ ܚܕܐ ܡܢ ܗܠܝܢ ܡܢ ܗܫܐ ܘܠܗܠ

ܘܗܫܐ ܐܬܚܦܛ ܕܦܚܡܐ ܕܗܠܝܢ ܬܟܬܘܒ ܘܬܬܠ ܠܝܘܢܬܢ ܘܢܬܬܣܝܡ ܒܐܬܪܐ ܝܕܝܥܐ ܘܓܠܝܐ ܒܛܘܪܐ ܩܕܝܫܐ

ܘܚܙܐ ܕܡܛܪܝܘܣ ܡܠܟܐ ܕܫܠܝܬ ܘܐܬܬܢܝܚܬ ܐܪܥܐ ܩܕܡܘܗܝ ܘܠܝܬ ܕܩܐܡ ܠܩܘܒܠܗ ܘܫܪܐ ܠܟܠܗ ܚܝܠܗ ܐܢܫ ܠܕܘܟܬܗ ܣܛܪ ܡܢ ܗܠܝܢ ܕܓܒܐ ܡܢ ܓܙܪ̈ܬܐ ܕܥܡ̈ܡܐ ܘܥܒܕܘ ܥܡܗ ܒܥܠܕܒܒܘܬܐ ܟܠܗܘܢ ܚ̈ܝܠܐ ܕܐܒܗ̈ܘܗܝ

ܛܪܝܦܘܢ ܕܝܢ ܐܝܬ ܗܘܐ ܡܢ ܕܒܝܬ ܐܠܟܣܢܕܪܘܣ ܡܢ ܩܕܝܡ ܘܚܙܐ ܕܟܠܗ ܚܝܠܗ ܪܛܢ ܗܘܐ ܥܠ ܕܡܛܪܝܘܣ ܘܐܙܠ ܠܘܬ ܡܠܟܘ ܥܪܒܝܐ ܗܘ ܕܡܪܒܐ ܗܘܐ ܠܐܢܛܝܟܘܣ ܒܪܗ ܕܐܠܟܣܢܕܪܘܣ

ܘܐܡܪ ܠܗ ܕܢܫܠܡܝܘܗܝ ܠܗ ܐܝܟ ܕܢܡܠܟܝܘܗܝ ܚܠܦ ܐܒܘܗܝ ܘܐܘܕܥܗ ܟܠܡܕܡ ܕܥܒܕ ܕܡܛܪܝܘܣ ܘܒܥܠܕܒܒܘܬܐ ܕܥܒܕ ܥܡܗ ܚܝܠܗ ܘܩܘܝ ܬܡܢ ܝܘܡ̈ܬܐ ܣ̈ܓܝܐܐ

ܘܫܕܪ ܝܘܢܬܢ ܠܘܬ ܕܡܛܪܝܘܣ ܡܠܟܐ ܕܢܦܩ ܠܝ̈ܬܒܝ ܡܪܕܐ ܡܢ ܐܘܪܫܠܡ ܘܠܝ̈ܬܒܝ ܚܣ̈ܢܐ ܡܩܪܒܝܢ ܗܘܘ ܓܝܪ ܥܡ ܐܝܣܪܝܠ

ܘܫܕܪ ܕܡܛܪܝܘܣ ܠܘܬ ܝܘܢܬܢ ܘܐܡܪ ܠܗ ܠܐ ܗܘܐ ܒܠܚܘܕ ܗܠܝܢ ܐܥܒܕ ܠܟ ܘܠܥܡܟ ܐܠܐ ܐܦ ܒܬܫܒܘܚܬܐ ܐܫܒܚܟ ܘܠܥܡܟ ܡܐ ܕܗܘܐ ܠܝ ܐܬܪܐ

ܗܫܐ ܕܝܢ ܫܦܝܪ ܥܒܕ ܐܢܬ ܐܢ ܡܫܕܪ ܐܢܬ ܠܝ ܓܒܪ̈ܐ ܠܥܘܕܪܢܝ ܡܛܠ ܕܣܛܐ ܠܗ ܓܝܪ ܡܢܝ ܟܠܗ ܚܝܠܐ

ܘܫܕܪ ܝܘܢܬܢ ܬܠܬܐ ܐܠܦܝܢ ܓܒܪ̈ܐ ܚܝ̈ܠܬܢܐ ܠܐܢܛܝܘܟܝܐ ܘܐܬܘ ܠܘܬ ܡܠܟܐ ܘܚܕܝ ܡܠܟܐ ܒܡܐܬܝܬܗܘܢ

ܘܐܬܟܢܫܘ ܟܠܗܘܢ ܝܬ̈ܒܝ ܡܕܝܢܬܐ ܐܝܟ ܬܪ̈ܬܥܣܪܐ ܪ̈ܒܘܢ ܠܡܨܥܬ ܡܕܝܢܬܐ ܘܨܒܝܢ ܗܘܘ ܕܢܩܛܠܘܢܝܗܝ ܠܡܠܟܐ ܕܡܛܪܝܘܣ

ܘܥܪܩ ܡܠܟܐ ܘܥܠ ܠܗ ܠܕܪܬܐ ܘܐܚܕܘ ܒܢ̈ܝ ܡܕܝܢܬܐ ܠܟܠܗܘܢ ܡܦܩ̈ܢܝܗ ܕܡܕܝܢܬܐ ܘܫܪܝܘ ܡܩܪܒܝܢ

ܘܩܪܐ ܡܠܟܐ ܠܝܗ̈ܘܕܝܐ ܠܥܘܕܪܢܗ ܘܐܬܟܢܫܘ ܠܘܬܗ ܟܠܗܘܢ ܐܟܚܕܐ ܘܐܬܒܕܪܘ ܟܠܗܘܢ ܒܡܕܝܢܬܐ ܘܩܛܠܘ ܒܗܘ ܝܘܡܐ ܒܡܕܝܢܬܐ ܐܝܟ ܥܣܪ ܪ̈ܒܘܢ

ܘܐܘܩܕܘܗ ܠܡܕܝܢܬܐ ܘܢܣܒܘ ܒܗܘ ܝܘܡܐ ܒܙܬܐ ܣܓܝܐܬܐ ܘܦܨܝܘܗܝ ܠܡܠܟܐ

ܘܚܙܘ ܝܬ̈ܒܝ ܡܕܝܢܬܐ ܕܐܬܥܫܢܘ ܝܗ̈ܘܕܝܐ ܘܐܚܕܘܗ ܠܟܠܗ ܡܕܝܢܬܐ ܐܝܟ ܕܨܒܝܢ ܗܘܘ ܘܐܬܪܫܠܘ ܪ̈ܥܝܢܝܗܘܢ ܘܓܥܘ ܠܘܬ ܡܠܟܐ ܒܒܥܘܬܐ ܘܐܡܪܘ

ܗܒ ܠܢ ܝܡܝܢܐ ܘܢܫܠܘܢ ܡܢܢ ܝܗ̈ܘܕܝܐ ܕܡܩܪܒܝܢ ܥܡܢ ܘܥܡ ܡܕܝܢܬܐ

ܘܫܕܘ ܙܝܢܗܘܢ ܘܝܗܒܘ ܝܡܝܢܐ ܘܥܒܕܘ ܫܠܡܐ ܘܐܫܬܒܚܘ ܝܬܝܪܐܝܬ ܝܗܘ̈ܕܝܐ ܩܕܡ ܡܠܟܐ ܘܩܕܡ ܟܠܗ ܡܠܟܘܬܗ ܘܗܦܟܘ ܠܐܘܪܫܠܡ ܟܕ ܐܝܬ ܗܘܐ ܥܡܗܘܢ ܒܙܬܐ ܣܓܝܐܬܐ

ܘܝܬܒ ܕܡܛܪܝܘܣ ܡܠܟܐ ܥܠ ܟܘܪܣܝܐ ܕܡܠܟܘܬܗ ܘܫܠܝܬ ܘܐܬܬܢܝܚܬ ܐܪܥܐ ܩܕܡܘܗܝ

ܘܕܓܠ ܒܟܠܡܕܡ ܕܐܡܪ ܘܐܫܬܚܠܦ ܥܠ ܝܘܢܬܢ ܘܠܐ ܝܗܒ ܠܗ ܟܘܠ ܕܐܫܬܘܕܝ ܗܘܐ ܠܗ ܘܐܠܨ ܗܘܐ ܠܗ ܣܓܝ

ܡܢ ܒܬܪ ܕܝܢ ܗܠܝܢ ܗܦܟ ܛܪܝܦܘܢ ܘܥܡܗ ܐܢܛܝܟܘܣ ܛܠܝܐ ܙܥܘܪܐ ܘܐܡܠܟ ܘܩܛܪ ܬܓܐ

ܘܐܬܟܢܫܘ ܠܘܬܗ ܟܠܗ ܚܝܠܐ ܕܒܕܪ ܗܘܐ ܕܡܛܪܝܘܣ ܘܐܩܪܒ ܥܡܗ ܘܐܙܕܟܝ ܘܥܪܩ ܕܡܛܪܝܘܣ

ܘܢܣܒ ܛܪܝܦܘܢ ܠܚܝܘܬܗ ܟܠܗ ܘܐܚܕܗ ܠܐܢܛܝܘܟܝܐ

ܘܟܬܒ ܐܢܛܝܟܘܣ ܙܥܘܪܐ ܠܝܘܢܬܢ ܘܐܡܪ ܡܩܝܡ ܐܢܐ ܠܟ ܪܒܘܬ ܟܗܢܘܬܐ ܘܡܫܠܛ ܐܢܐ ܠܟ ܥܠ ܐܪܒܥܬܝܗܘܢ ܫܩ̈ܠܐ ܘܕܬܗܘܐ ܡܢ ܪ̈ܚܡܘܗܝ ܕܡܠܟܐ

ܘܫܕܪ ܠܗ ܡܐ̈ܢܐ ܕܕܗܒܐ ܘܬܫܡܫܬܐ ܘܝܗܒ ܠܗ ܫܘܠܛܢܐ ܕܢܗܘܐ ܫܬܐ ܒܕܗܒܐ ܘܡܟܣܝ ܐܪ̈ܓܘܢܐ ܘܐܝܬ ܥܠܝܗܘܢ ܦܝܒܠܐ ܕܕܗܒܐ

ܘܠܫܡܥܘܢ ܐܚܘܗܝ ܐܩܝܡܗ ܪܫܐ ܡܢ ܬܚܘ̈ܡܐ ܕܨܘܪ ܘܥܕܡܐ ܠܬܚܘܡܐ ܕܡܨܪܝܢ

ܘܢܦܩ ܝܘܢܬܢ ܘܐܙܠ ܗܘܐ ܠܥܒܪ̈ܘܗܝ ܕܢܗܪܐ ܘܒܡܕܝ̈ܢܬܐ ܘܐܬܟܢܫܘ ܠܘܬܗ ܟܠܗ ܚܝܠܐ ܕܣܘܪܝܐ ܠܥܘܕܪܢܗ ܘܐܬܐ ܝܘܢܬܢ ܠܐܫܩܠܘܢ ܘܐܪܥܘܗܝ ܝܬ̈ܒܝ ܡܕܝܢܬܐ ܒܬܫܒܘܚܬܐ ܪܒܬܐ

ܘܐܙܠ ܡܢ ܬܡܢ ܠܥܐܙܐ ܘܐܚܕܘ ܩܕܡܘܗܝ ܒܢ̈ܝ ܥܐܙܐ ܘܝܬܒ ܥܠܝܗ ܘܐܘܩܕܗ ܒܢܘܪܐ ܠܟܠܗ ܚܕܪ̈ܝܗ ܘܒܙܗ

ܘܒܥܘ ܒܢ̈ܝ ܥܐܙܐ ܡܢ ܝܘܢܬܢ ܘܝܗܒ ܠܗܘܢ ܝܡܝܢܐ ܘܢܣܒ ܒܢ̈ܝܗܘܢ ܕܪ̈ܘܪܒܢܐ ܠܗܡܝܪ̈ܐ ܘܫܕܪ ܐܢܘܢ ܠܐܘܪܫܠܡ ܘܗܠܟ ܒܐܪܥܐ ܥܕܡܐ ܠܕܡܣܩܘܣ

ܘܫܡܥ ܝܘܢܬܢ ܕܐܬܘ ܪ̈ܘܪܒܢܘܗܝ ܕܕܡܛܪܝܘܣ ܠܩܕܫ ܕܒܓܠܝܠܐ ܒܚܝܠܐ ܣܓܝܐܐ ܕܨܒܝܢ ܗܘܘ ܕܢܦܪܩܘܢܝܗܝ ܡܢ ܨܒܘ̈ܬܗ

ܘܐܙܠ ܘܐܪܥ ܐܢܘܢ ܠܫܡܥܘܢ ܕܝܢ ܐܚܘܗܝ ܫܒܩܗ ܒܐܬܪܐ

ܘܝܬܒ ܫܡܥܘܢ ܥܠ ܒܝܬ ܫܘܪ̈ܐ ܘܡܩܪܒ ܗܘܐ ܥܡܗ ܝܘ̈ܡܬܐ ܣܓ̈ܝܐܐ ܘܚܒܫ ܐܢܘܢ ܠܝܬ̈ܒܝܗ

ܘܒܥܘ ܡܢܗ ܕܢܬܠ ܠܗܘܢ ܝܡܝܢܐ ܘܝܗܒ ܠܗܘܢ ܘܐܦܩ ܐܢܘܢ ܡܢ ܬܡܢ ܘܐܚܕܗ ܠܡܕܝܢܬܐ ܘܣܡ ܒܗ ܡܛܪܬܐ

ܘܝܘܢܬܢ ܘܡܫܪܝܬܗ ܫܪܘ ܥܠ ܡ̈ܝܐ ܕܓܢܣܪ ܘܩܕܡܘ ܒܨܦܪܐ ܠܦܩܥܬܐ ܕܐܣܘܪ

ܘܗܐ ܡܫܪܝܬܐ ܕܦܠܫ̈ܬܝܐ ܐܪܥܬܗ ܒܦܩܥܬܐ ܘܐܦܩܘ ܥܠܘܗܝ ܟܡܐ̈ܢܐ

ܘܩܡܘ ܡܢ ܒܣܬܪܗܘܢ ܘܫܪܝܘ ܠܡܩܪܒܘ ܘܥܪܩܘ ܟܠܗܘܢ ܕܒܝܬ ܝܘܢܬܢ

ܘܐܢܫ ܡܢܗܘܢ ܠܐ ܐܫܬܚܪ ܠܘܬܗ ܐܠܐ ܐܢ ܡܬܝܬܐ ܒܪ ܐܒܝܫܠܘܡ ܘܝܗܘܕܐ ܒܪ ܚܦܝ ܘܪ̈ܘܪܒܢܐ ܕܪ̈ܫܝ ܚ̈ܝܠܐ