Peshitta Maccabees 1 A

ܘܫܘܪܘ ܘܢܦܩܘ ܡܢ ܓܘ ܡܓ̈ܕܠܐ ܕܩܝܣܐ ܓܒܪ̈ܐ ܕܚܝܠܐ ܘܢܚܬܘ ܠܡܕܝܢܬܐ ܘܗܘܐ ܙܘܥܐ ܪܒܐ ܒܓܘ ܡܕܝܢܬܐ

ܘܣܠܩܘ ܒ̈ܢܝ ܡܕܝܢܬܐ ܥܡ ܢܫ̈ܝܗܘܢ ܘܒܢ̈ܝܗܘܢ ܟܕ ܡܣܕܩܝܢ ܢܚ̈ܬܝܗܘܢ ܘܓܥܘ ܒܩܠܐ ܪܡܐ ܘܒܥܘ ܡܢ ܫܡܥܘܢ ܕܢܬܠ ܠܗܘܢ ܝܡܝܢܐ

ܘܐܡܪܘ ܠܗ ܠܐ ܬܥܒܕ ܠܢ ܐܝܟ ܒܝܫܘܬܢ ܐܠܐ ܐܝܟ ܛܝܒܘܬܟ

ܘܫܒܩ ܐܢܘܢ ܫܡܥܘܢ ܘܠܐ ܐܩܪܒ ܥܡܗܘܢ ܘܐܦܩ ܐܢܘܢ ܡܢ ܡܕܝܢܬܐ ܘܕܟܝ ܒܬ̈ܐ ܐܝܟܐ ܕܐܝܬ ܗܘܐ ܦܬܟܪ̈ܐ ܘܗܟܢܐ ܥܠ ܠܗ ܟܕ ܡܫܒܚ ܘܡܒܪܟ

ܘܐܦܩ ܡܢܗ ܟܠܗ ܛܡܐܘܬܐ ܘܐܘܬܒ ܬܡܢ ܓܒܪ̈ܐ ܐܝܠܝܢ ܕܡܨܛܒܝܢ ܒܢܡܘܣܐ ܘܒܢܐ ܒܗ ܚܣܢܐ ܘܥܒܕ ܠܗ ܒܗ ܒܝܬܐ

ܝܬ̈ܒܝ ܡܪܕܐ ܕܝܢ ܕܒܐܘܪܫܠܡ ܡܬܟܠܝܢ ܗܘܘ ܠܡܥܠ ܘܠܡܦܩ ܘܠܡܙܒܢ ܘܠܡܙܒܢܘ ܘܟܦܢܘ ܣܓܝ ܘܡܝܬܘ ܡܢܗܘܢ ܣܓ̈ܝܐܐ ܡܢ ܟܦܢܐ

ܘܒܥܘ ܡܢ ܫܡܥܘܢ ܕܢܬܠ ܠܗܘܢ ܝܡܝܢܐ ܘܝܗܒ ܠܗܘܢ ܘܐܦܩ ܐܢܘܢ ܡܢ ܬܡܢ ܘܕܟܝܗ ܠܒܝܬ ܡܪܕܐ ܡܢ ܟܠܗ ܛܡܐܘܬܐ

ܘܥܠܘ ܠܒܝܬ ܡܪܕܐ ܒܥܣܪܝܢ ܘܬܠܬܐ ܒܝܪܚܐ ܕܬܪܝܢ ܒܫܢܬ ܡܐܐ ܘܫܒܥܝܢ ܘܚܕܐ ܒܚܕܘܬܐ ܘܒܬܫܒܚ̈ܬܐ ܘܒܐ̈ܘܫܥܢܐ ܘܒܩܝܬܪ̈ܐ ܘܒܟܢܪ̈ܐ ܡܛܠ ܕܐܬܬܒܪ ܒܥܠܕܒܒܐ ܪܒܐ ܡܢ ܐܝܣܪܐܝܠ ܘܫܠܝ ܢܘܟܪܝܐ ܡܢ ܕܠܡܩܪܒܘ ܥܡ ܐܝܣܪܐܝܠ

ܘܐܩܝܡܘ ܕܗܘܘ ܥܒܕܝܢ ܠܗ ܠܗܢܐ ܝܘܡܐ ܒܟܠ ܫܢܐ ܘܫܢܐ ܒܒܘܣܡܐ ܘܒܚܕܘܬܐ

ܘܐܥܫܢܘ ܠܛܘܪܐ ܕܗܝܟܠܐ ܕܥܠ ܓܢܒ ܒܝܬ ܡܪܕܐ ܘܥܡܪ ܗܘܐ ܬܡܢ ܫܡܥܘܢ ܗܘ ܘܒ̈ܢܝ ܒܝܬܗ ܥܡܗ

ܘܚܙܐ ܫܡܥܘܢ ܠܝܘܚܢܢ ܒܪܗ ܕܓܢܒܪ ܗܘ ܘܐܩܝܡܗ ܡܕܒܪܢܐ ܕܟܘܠܗܘܢ ܚ̈ܝܠܐ ܘܥܡܪ ܗܘ ܒܓܙܝܪܐ

ܘܒܫܢܬ ܡܐܐ ܘܫܒܥܝܢ ܘܬܪ̈ܬܝܢ ܟܢܫ ܕܡܛܪܝܘܣ ܠܚܝܠܗ ܘܐܙܠ ܠܡܕܝ ܕܢܟܢܫ ܠܗ ܚܝܠܐ ܘܢܩܪܒ ܥܡ ܛܪܝܦܘܢ

ܘܫܡܥ ܐܪܣܩ ܡܠܟܐ ܕܦܪܣ ܘܕܡܕܝ ܕܐܬܐ ܕܡܛܪܝܘܣ ܠܬܚܘ̈ܡܘܗܝ ܘܫܕܪ ܠܚܕ ܡܢ ܪ̈ܘܪܒܢܘܗܝ ܕܢܐܚܕܝܘܗܝ ܟܕ ܚܝ

ܘܐܙܠ ܘܡܚܗ ܠܡܫܪܝܬܗ ܕܕܡܛܪܝܘܣ ܘܐܚܕܗ ܘܐܝܬܝܗ ܠܘܬ ܐܪܣܩ ܘܐܪܡܝܗ ܒܝܬ ܐܣܝܪ̈ܐ

ܘܫܠܝܬ ܘܐܬܬܢܝܚܬ ܐܪܥܐ ܟܠܗܘܢ ܝܘ̈ܡܬܗ ܕܫܡܥܘܢ ܘܥܒܕ ܛܒ̈ܬܐ ܠܥܡܗ ܘܫܦܪ ܠܗܘܢ ܫܘܠܛܢܗ ܘܬܫܒܘܚܬܗ ܟܠܗܘܢ ܝܘ̈ܡܬܗ

ܘܥܡ ܟܠܗ ܬܫܒܘܚܬܗ ܫܩܠ ܠܝܘܦܐ ܠܠܡܐܢܐ ܘܥܒܕ ܡܥܠܢܐ ܠܐ̈ܠܦܐ ܕܝܡܐ

ܘܐܦܬܝ ܘܐܘܪܒ ܬܚܘ̈ܡܐ ܕܥܡܗ ܘܐܚܕܗ ܠܟܠܗ ܐܪܥܗܘܢ

ܘܟܢܫ ܫܒܝܬܐ ܣܓܝܐܬܐ ܘܐܫܬܠܛ ܥܠ ܓܙܝܪܐ ܘܥܠ ܒܝܬ ܫܘܪ̈ܐ ܘܥܠ ܒܝܬ ܡܪܕܐ ܘܥܛܐ ܘܐܪܝܡ ܡܢܗܘܢ ܟܘܠܗ ܛܡܐܘܬܐ ܘܠܐ ܐܝܬ ܗܘܐ ܕܩܐܡ ܠܩܘܒܠܗ

ܘܥܡܪܝܢ ܗܘܘ ܘܦܠܚܝܢ ܐܪܥܗܘܢ ܒܫܠܡܐ ܘܐܪܥܐ ܝܗܒܐ ܗܘܬ ܥ̈ܠܠܬܗ ܘܐܝ̈ܠܢܐ ܕܐܪܥܐ ܦܐܪ̈ܝܗܘܢ

ܣܒ̈ܐ ܒܫܘ̈ܩܐ ܝܬܒܝܢ ܗܘܘ ܘܟܠܗܘܢ ܥܠ ܛܒ̈ܬܐ ܡܬܡܠܟܝܢ ܗܘܘ ܘܥ̈ܠܝܡܐ ܐܬܟܣܝܘ ܬܫܒܘܚܬܐ ܘܠܐ ܡܐ̈ܢܐ ܕܩܪܒܐ

ܝܗܒ ܬܘܪܣܝܐ ܠܡܕܝ̈ܢܬܐ ܘܐܥܫܢ ܐܢܝܢ ܒܡܐ̈ܢܝ ܚܣ̈ܢܐ ܥܕܡܐ ܕܐܫܬܡܗ ܫܡܐ ܕܬܫܒܘܚܬܗ ܒܟܠܗܘܢ ܣܘ̈ܦܝܗ ܕܐܪܥܐ

ܘܥܒܕ ܫܠܡܐ ܒܐܪܥܐ ܘܐܬܒܣܡ ܐܝܣܪܝܠ ܒܘܣܡܐ ܪܒܐ

ܘܝܬܒܘ ܐܢܫ ܬܚܝܬ ܓܘ̈ܦܢܘܗܝ ܘܬܚܝܬ ܬܐܢ̈ܘܗܝ ܘܠܐ ܐܝܬ ܗܘܐ ܕܡܕܠܚ ܠܗܘܢ

ܘܐܬܓܡܪܘ ܘܐܬܛܠܩܘ ܡܢܗܘܢ ܒܥ̈ܠܕܒܒܐ ܘܩܪ̈ܒܬܢܐ ܡܢ ܐܪܥܐ ܐܦ ܡ̈ܠܟܐ ܐܬܬܒܪܘ ܒܗܢܘܢ ܝܘ̈ܡܬܐ

ܘܫܪܪ ܘܚܝܠ ܠܟܠܗܘܢ ܡܣ̈ܟܢܐ ܕܥܡܗ ܘܥܛܐ ܘܐܪܝܡ ܟܘܠ ܪܘܫܥܐ ܘܥܘܠܐ ܘܒܝܫܬܐ ܘܢܡܘܣܐ ܦܩܕ

ܘܩܘܕܫܐ ܫܒܚ ܘܐܣܓܝ ܡ̈ܐܢܐ ܕܒܝܬ ܡܩܕܫܐ

ܘܫܡܥܘ ܒܢ̈ܝ ܪܗܘܡܐ ܕܡܝܬ ܝܘܢܬܢ ܐܦ ܠܐܣܦܪ̈ܛܝܐ ܐܫܬܡܥ ܘܐܬܬܥܝܩܘ ܥܩܬܐ ܪܒܬܐ

ܟܕ ܕܝܢ ܫܡܥܘ ܕܫܡܥܘܢ ܐܚܘܗܝ ܗܘܐ ܚܠܦܘܗܝ ܪܒ ܟܗ̈ܢܐ ܘܐܚܕ ܐܪܥܐ ܘܡܕܝ̈ܢܬܐ ܘܟܠ ܕܒܗܝܢ

ܟܬܒܘ ܠܗ ܒܦܢܩܝܬܐ ܕܢܚܫܐ ܠܡܚܕܬܘ ܠܘܬܗ ܪܚܡܘܬܐ ܘܥܘܕܪܢܐ ܕܐܩܝܡܘ ܥܡ ܝܗܘܕܐ ܘܥܡ ܝܘܢܬܢ ܐܚ̈ܘܗܝ

ܘܐܬܩܪܝ ܩܕܡ ܟܢܫܐ ܒܐܘܪܫܠܡ

ܘܗܢܘ ܦܚܡܗ ܕܐܓܪܬܐ ܕܫܕܪܘ ܐܣܦܪ̈ܛܝܐ ܪ̈ܫܐ ܕܐܣܦܪ̈ܛܝܐ ܘܡܕܝ̈ܢܬܐ ܠܫܡܥܘܢ ܪܒ ܟܗ̈ܢܐ ܪܒܐ ܘܠܣܒ̈ܐ ܘܠܟܗ̈ܢܐ ܘܠܫܪܟܐ ܕܥܡܐ ܕܝܗ̈ܘܕܝܐ ܐܚ̈ܝܢ ܫܠܡ

ܣܒ̈ܐ ܕܐܫܬܕܪܘ ܠܘܬܢ ܐܘܕܥܘܢ ܥܠ ܫܠܡܐ ܕܐܝܬ ܠܘܬܟܘܢ ܘܥܠ ܐܝܩܪܟܘܢ ܘܥܠ ܬܫܒܘܚܬܟܘܢ ܘܚܕܝܢ ܣܓܝ ܒܡܐܬܝܬܗܘܢ

ܘܟܬܒܢ ܟܠ ܡܕܡ ܕܐܬܐܡܪ ܡܢܗܘܢ ܒܝܬ ܒܘܠܐ ܕܥܡܢ ܗܟܢܐ ܝܘܡܢܝܘܣ ܒܪ ܐܢܛܝܟܘܣ ܘܐܢܛܝܦܛܪܘܣ ܒܪ ܐܝܣܘܢ ܣܒ̈ܐ ܕܝܗ̈ܘܕܝܐ ܐܬܘ ܠܘܬܢ ܕܢܚܕܬܘܢ ܪܚܡܘܬܐ ܕܨܐܕܝܢ

ܘܫܦܪ ܠܥܡܐ ܕܢܩܒܠ ܡܢܗܘܢ ܪܚܡܘܬܐ ܘܩܒܠܘ ܐܢܘܢ ܠܓܒܪ̈ܐ ܒܬܫܒܘܚܬܐ ܘܣܡܘ ܦܚܡܐ ܕܐܓܪ̈ܬܗܘܢ ܒܝܬ ܓܙܐ ܕܟܬ̈ܒܐ ܕܢܗܘܝܢ ܠܥܡܐ ܕܐܣܦܪ̈ܛܝܐ ܠܕܘܟܪܢܐ ܦܚܡܗܝܢ ܕܝܢ ܕܗܠܝܢ ܘܥܢܝܢܗܝܢ ܟܬܒܘ ܠܫܡܥܘܢ ܪܒ ܟܗ̈ܢܐ

ܡܢ ܒܬܪ ܕܝܢ ܗܠܝܢ ܫܕܪ ܫܡܥܘܢ ܠܝܘܡܢܝܘܣ ܠܪܗܘܡܐ ܟܕ ܐܝܬ ܥܠܘܗܝ ܡܓܢܐ ܪܒܬܐ ܕܕܗܒܐ ܕܐܠܦ ܡܢܝܢ ܠܡܩܡܘ ܥܡܗܘܢ ܥܘܕܪܢܐ

ܟܕ ܫܡܥ ܕܝܢ ܥܡܐ ܗܠܝܢ ܡ̈ܠܐ ܐܡܪܘ ܡܢܐ ܛܝܒܘܬܐ ܢܦܪܥܝܘܗܝ ܠܫܡܥܘܢ ܪܒ ܟܗ̈ܢܐ ܘܠܒܢ̈ܘܗܝ