← All works

Peshitta Maccabees 1 A

Peshitta (Syriac Old Testament) · 836 sections

1. Maccabees 1 A 9:33

   ܘܝܕܥ ܝܘܢܬܢ ܘܫܡܥܘܢ ܐܚܘܗܝ ܘܟܠܗܘܢ ܐܝܠܝܢ ܕܐܝܬ ܗܘܘ ܥܡܗ ܘܥܪܩܘ ܠܗܘܢ ܠܡܕܒܪܐ ܕܬܩܘܥ ܘܫܪܘ ܥܠ ܡ̈ܝܐ ܕܓܘܒܐ ܕܐܣܦܪ

2. Maccabees 1 A 9:34

   ܘܝܕܥ ܒܝܟܪܝܘܣ ܒܝܘܡܐ ܕܫܒܬܐ ܘܐܬܐ ܗܘ ܘܟܠܗ ܚܝܠܗ ܠܥܒܪ̈ܘܗܝ ܕܝܘܪܕܢܢ

3. Maccabees 1 A 9:35

   ܘܫܕܪ ܝܘܢܬܢ ܠܝܘܚܢܢ ܐܚܘܗܝ ܕܢܗܘܐ ܡܕܒܪܢܐ ܠܥܡܐ ܘܒܥܐ ܡܢ ܢܒ̈ܛܝܐ ܪ̈ܚܡܘܗܝ ܕܢܫܒܘܩ ܠܘܬܗܘܢ ܟܠܗ ܐܝܩܪܬܗܘܢ

4. Maccabees 1 A 9:36

   ܘܢܦܩܘ ܒ̈ܢܝ ܐܡܒܪܝ ܡܢ ܡܐܕܒܐ ܘܐܚܕܘܗܝ ܠܝܘܚܢܢ ܘܠܟܠ ܕܐܝܬ ܗܘܐ ܥܡܗ ܘܕܒܪܘ ܘܐܙܠܘ

5. Maccabees 1 A 9:37

   ܡܢ ܒܬܪ ܕܝܢ ܗܠܝܢ ܡ̈ܠܐ ܐܡܪܘ ܠܝܘܢܬܢ ܘܠܫܡܥܘܢ ܐܚܘܗܝ ܕܒ̈ܢܝ ܐܡܒܪܝ ܥܒܕܝܢ ܡܫܬܘܬܐ ܪܒܬܐ ܘܡܝܬܝܢ ܟܠܬܐ ܡܢ ܢܒܛ ܒܪܬ ܪ̈ܫܐ ܕܚܕ ܡܢ ܪ̈ܘܪܒܢܐ ܕܟܢܥܢ ܒܬܫܒܘܚܬܐ ܪܒܬܐ ܘܒܥܡܐ ܣܓܝܐܐ

6. Maccabees 1 A 9:38

   ܘܐܬܕܟܪ ܝܘܢܬܢ ܠܝܘܚܢܢ ܐܚܘܗܝ ܘܣܠܩܘ ܘܐܬܛܫܝܘ ܒܟܢܦܗ ܕܛܘܪܐ

7. Maccabees 1 A 9:39

   ܘܐܪܝܡܘ ܥܝ̈ܢܝܗܘܢ ܘܚܙܘ ܘܗܐ ܪܘܒܐ ܕܟܢܫܐ ܣܓܝܐܐ ܘܚܬܢܐ ܘܪ̈ܚܡܘܗܝ ܢܦܩܘ ܓܝܪ ܪ̈ܚܡܘܗܝ ܘܐܚ̈ܘܗܝ ܠܐܘܪܥܗ ܒܩܝܬܪ̈ܐ ܘܒܟܢܪ̈ܐ ܘܒܡ̈ܐܢܝ ܙܝܢܐ ܣܓܝܐܐ

8. Maccabees 1 A 9:40

   ܘܩܡܘ ܥܠܝܗܘܢ ܡܢ ܟܡܐܢܐ ܕܒܝܬ ܝܘܢܬܢ ܘܩܛܠܘ ܐܢܘܢ ܘܢܦܠܘ ܩ̈ܛܝܠܐ ܣ̈ܓܝܐܐ ܘܫܪܟܐ ܕܐܚܪ̈ܢܐ ܥܪܩܘ ܠܛܘܪܐ ܘܢܣܒܘ ܟܠܗ ܒܙܬܗܘܢ

9. Maccabees 1 A 9:41

   ܘܐܬܗܦܟܬ ܡܫܬܘܬܐ ܠܐܒܠܐ ܘܩܠܐ ܕܙܡܪܗܘܢ ܠܡܪܩܘܕܬܐ

10. Maccabees 1 A 9:42

    ܘܐܬܬܒܥܘ ܬܒܥܬܐ ܕܕܡܗ ܕܐܚܘܗܘܢ ܘܗܦܟܘ ܠܥܒܪܐ ܕܝܘܪܕܢܢ

11. Maccabees 1 A 9:43

    ܘܫܡܥ ܒܝܟܪܝܘܣ ܕܗܦܟ ܘܐܬܐ ܝܘܢܬܢ ܘܐܬܐ ܠܬܚܘ̈ܡܘܗܝ ܕܝܘܪܕܢܢ ܒܝܘܡܐ ܕܫܒܬܐ ܒܚܝܠܐ ܣܓܝܐܐ

12. Maccabees 1 A 9:44

    ܘܐܡܪ ܝܘܢܬܢ ܠܐܝܠܝܢ ܕܥܡܗ ܩܘܡܘ ܘܢܬܟܬܫ ܥܠ ܐ̈ܦܝ ܢܦܫ̈ܬܢ ܠܐ ܓܝܪ ܐܝܬܘܗܝ ܝܘܡܢܐ ܐܝܟ ܕܐܬܡܠܝ ܘܐܝܟ ܕܡܢ ܩܕܡܘܗܝ

13. Maccabees 1 A 9:45

    ܡܛܠ ܕܗܐ ܩܪܒܐ ܡܛܝܒ ܠܩܘܒܠܢ ܡܢ ܩܕܡܝܢ ܘܡܢ ܒܣܬܪܢ ܘܡܘ̈ܗܝ ܕܝܘܪܕܢܢ ܚܕܝܪܝܢ ܠܢ ܡܟܐ ܘܡܟܐ ܘܥܒܐ ܒܡܨܥܬܐ ܘܠܐ ܐܝܬ ܐܬܪܐ ܠܡܪܟܢܘ ܡܢܗ

14. Maccabees 1 A 9:46

    ܗܫܐ ܓܥܘ ܠܘܬ ܥܡܘܪܐ ܕܫܡܝܐ ܕܐܝܟܢܐ ܬܬܦܪܩܘܢ ܡܢ ܐܝܕܐ ܕܒܥ̈ܠܕܒܒܝܟܘܢ

15. Maccabees 1 A 9:47

    ܘܫܪܝܘ ܠܡܩܪܒܘ ܘܐܪܝܡ ܝܘܢܬܢ ܐܝܕܗ ܕܢܡܚܝܘܗܝ ܠܒܝܟܪܝܘܣ ܘܐܪܟܢ ܠܗ ܡܢܗ ܠܒܣܬܪܗ

16. Maccabees 1 A 9:48

    ܘܗܦܟܘ ܘܥܒܪܘܗܝ ܠܝܘܪܕܢܢ ܒܣܚܘܐ ܝܘܢܬܢ ܘܐܝܠܝܢ ܕܥܡܗ ܘܠܐ ܥܒܪܘ ܒܬܪܗܘܢ

17. Maccabees 1 A 9:49

    ܢܦܠܘ ܕܝܢ ܡܢ ܕܒܝܬ ܒܝܟܪܝܘܣ ܒܗܘ ܝܘܡܐ ܐܝܟ ܐܠܦ ܓܒܪ̈ܝܢ

18. Maccabees 1 A 9:50

    ܘܗܦܟ ܒܝܟܪܝܘܣ ܠܐܘܪܫܠܡ ܘܒܢܐ ܡܕܝ̈ܢܬܐ ܥܫܝ̈ܢܬܐ ܒܝܗܘܕ ܠܚܣܢܐ ܕܒܐܝܪܝܚܘ ܘܠܥܡܐܘܣ ܘܠܒܝܬ ܚܘܪ̈ܢ ܘܠܒܝܬ ܐܝܠ ܘܠܬܡܢܬ ܘܠܦܪܬ ܘܠܛܦܘܣ ܒܫܘܪ̈ܐ ܪ̈ܡܐ ܘܒܬܪ̈ܥܐ ܘܒܡܘ̈ܟܠܐ

19. Maccabees 1 A 9:51

    ܘܐܩܝܡ ܒܗܝܢ ܢܛܘܪ̈ܐ ܠܒܥ̈ܠܕܒܒܘܗܝ ܕܐܝܣܪܐܝܠ

20. Maccabees 1 A 9:52

    ܘܐܥܫܢܗ ܠܒܝܬ ܫܘܪ̈ܐ ܡܕܝܢܬܐ ܘܠܓܙܝܪܐ ܘܠܒܝܬ ܡܪܕܐ ܘܐܘܬܒ ܒܗܝܢ ܚܝܠܐ ܘܣܡ ܠܗܘܢ ܒܗܝܢ ܐܣܢܐ

21. Maccabees 1 A 9:53

    ܘܢܣܒ ܒܝܟܪܝܘܣ ܠܒ̈ܢܝ ܪ̈ܘܪܒܢܝܗ ܕܐܪܥܐ ܠܗܡܝܪ̈ܐ ܘܣܡ ܐܢܘܢ ܒܢܛܘܪܬܐ ܒܡܪܕܐ ܕܐܘܪܫܠܡ

22. Maccabees 1 A 9:54

    ܘܒܫܢܬ ܡܐܐ ܘܚܡܫܝܢ ܘܬܠܬ ܒܝܪܚܐ ܕܬܪ̈ܝܢ ܦܩܕ ܐܠܩܝܡܘܣ ܕܢܣܬܪܘܢ ܫܘܪܐ ܕܕܪܬܐ ܓܘܝܬܐ ܕܒܝܬ ܡܩܕܫܐ ܘܣܚܦ ܥܒ̈ܕܝܗܘܢ ܕܢܒ̈ܝܐ ܘܫܪܝ ܕܢܓܡܪ

23. Maccabees 1 A 9:55

    ܘܒܗ ܒܗܘ ܙܒܢܐ ܒܠܥ ܐܠܩܝܡܘܣ ܘܒܛܠܘ ܥܒ̈ܕܘܗܝ ܘܐܫܬܪܝ ܘܐܣܬܟܪ ܦܘܡܗ ܘܠܐ ܐܫܟܚ ܠܡܡܠܠܘ ܐܦܠܐ ܚܕܐ ܡܠܬܐ ܐܦܠܐ ܠܡܦܩܕܘ ܥܠ ܒܝܬܗ

24. Maccabees 1 A 9:56

    ܘܡܝܬ ܐܠܩܝܡܘܣ ܒܗܘ ܙܒܢܐ ܒܬܫ̈ܢܝܩܐ ܪ̈ܘܪܒܐ

25. Maccabees 1 A 9:57

    ܘܚܙܐ ܒܝܟܪܝܘܣ ܕܡܝܬ ܠܗ ܐܠܩܝܡܘܣ ܘܗܦܟ ܠܘܬ ܡܠܟܐ ܘܫܠܝܬ ܘܐܬܢܝܚܬ ܐܪܥܐ ܕܝܗܘܕܐ ܬܪ̈ܬܝܢ ܫ̈ܢܝܢ

26. Maccabees 1 A 9:58

    ܘܐܬܡܠܟܘ ܟܠܗܘܢ ܐܢܫܐ ܥܘ̈ܠܐ ܘܐܡܪܘ ܗܐ ܝܘܢܬܢ ܘܐܝܠܝܢ ܕܥܡܗ ܝܬܒܝܢ ܬܟܝܠܐܝܬ ܒܫܠܝܐ ܗܫܐ ܢܝܬܐ ܠܒܝܟܪܝܘܣ ܘܢܐܚܘܕ ܐܢܘܢ ܒܚܕ ܠܠܝܐ

27. Maccabees 1 A 9:59

    ܘܐܙܠܘ ܘܡܠܟܘܗܝ

28. Maccabees 1 A 9:60

    ܘܫܩܠ ܒܝܟܪܝܘܣ ܕܢܐܬܐ ܒܚܝܠܐ ܪܒܐ ܘܫܕܪ ܐܓܪ̈ܬܐ ܡܛܫܝܐܝܬ ܠܟܠܗܘܢ ܡܥܕܪ̈ܢܘܗܝ ܕܒܝܗܘܕ ܕܢܐܚܕܘܢܝܗܝ ܠܝܘܢܬܢ ܘܠܟܠܗܘܢ ܕܥܡܗ ܘܠܐ ܡܫܟܚܝܢ ܗܘܘ ܡܛܠ ܕܐܬܓܠܝܬ ܗܘܬ ܠܗ ܡܚܫܒܬܗܘܢ ܠܝܘܢܬܢ

29. Maccabees 1 A 9:61

    ܘܐܚܕܘ ܕܒܝܬ ܝܘܢܬܢ ܚܡܫܝܢ ܓܒܪ̈ܝܢ ܡܢ ܒ̈ܢܝ ܐܪܥܐ ܪ̈ܫܢܝܗ ܕܒܝܫܬܐ ܘܩܛܠܘ ܐܢܘܢ

30. Maccabees 1 A 9:62

    ܘܫܢܝ ܝܘܢܬܢ ܘܫܡܥܘܢ ܘܐܝܠܝܢ ܕܥܡܗ ܠܒܝܬ ܝܫܢ ܕܒܡܕܒܪܐ ܘܒܢܘ ܡܣ̈ܚܦܬܗ ܘܫܪܪܘܗ

31. Maccabees 1 A 9:63

    ܘܝܕܥ ܒܝܟܪܝܘܣ ܘܟܢܫ ܠܟܠܗ ܚܝܠܗ ܘܦܩܕ ܠܐܝܠܝܢ ܕܐܝܬ ܒܝܗܘܕ

32. Maccabees 1 A 9:64

    ܘܢܦܩ ܘܝܬܒ ܥܠ ܒܝܬ ܝܫܢ ܘܐܩܪܒ ܥܡܗ ܝܘܡ̈ܬܐ ܣܓ̈ܝܐܐ ܘܥܒܕ ܡܐ̈ܟܢܘܣ

33. Maccabees 1 A 9:65

    ܘܫܒܩ ܝܘܢܬܢ ܠܫܡܥܘܢ ܐܚܘܗܝ ܒܓܘ ܡܕܝܢܬܐ ܘܢܦܩ ܗܘ ܠܐܬܪܐ ܘܢܦܩ ܒܡܢܝܢܐ

34. Maccabees 1 A 9:66

    ܘܡܚܝܗܝ ܠܥܕܘܪܐ ܘܠܐܚ̈ܘܗܝ ܘܠܒ̈ܢܝ ܦܫܝܪܘܢ ܒܡܫܟܢܗܘܢ ܘܫܪܝܘ ܡܚܝܢ ܘܣܠܩܝܢ ܒܚ̈ܝܠܘܬܐ

35. Maccabees 1 A 9:67

    ܘܫܡܥܘܢ ܘܐܝܠܝܢ ܕܥܡܗ ܢܦܩܘ ܡܢ ܡܕܝܢܬܐ ܘܐܘܩܕܘ ܐ̈ܢܝܢ ܠܡܐ̈ܟܢܘܣ

36. Maccabees 1 A 9:68

    ܘܐܩܪܒܘ ܥܡ ܒܝܟܪܝܘܣ ܘܐܬܬܒܪ ܩܕܡܝܗܘܢ ܘܐܠܨܝܢ ܗܘܘ ܠܗ ܣܓܝ ܡܛܘܠ ܕܐܣܬܪܩܬ ܗܘܬ ܠܗ ܡܚܫܒܬܗ ܘܡܐܬܝܬܗ

37. Maccabees 1 A 9:69

    ܘܐܬܚܡܬ ܒܝܟܪܝܘܣ ܒܪܘܓܙܐ ܥܠ ܓܒܪ̈ܐ ܥܘ̈ܠܐ ܗܢܘܢ ܕܡܠܟܘܗܝ ܗܘܘ ܕܢܐܬܐ ܥܠ ܐܪܥܐ ܘܩܛܠ ܡܢܗܘܢ ܣܓ̈ܝܐܐ ܘܐܬܚܫܒ ܕܢܐܙܠ ܠܗ ܠܐܪܥܗ

38. Maccabees 1 A 9:70

    ܘܝܕܥ ܝܘܢܬܢ ܘܫܕܪ ܠܘܬܗ ܐܝ̈ܙܓܕܐ ܠܡܥܒܕ ܥܡܗ ܫܠܡܐ ܘܕܢܬܠ ܠܗܘܢ ܫܒܝܬܗܘܢ

39. Maccabees 1 A 9:71

    ܘܩܒܠ ܒܝܟܪܝܘܣ ܘܥܒܕ ܐܝܟ ܡ̈ܠܘܗܝ ܘܝܡܐ ܠܗ ܕܠܐ ܢܒܥܐ ܠܗ ܒܝܫܬܐ ܟܠܗܘܢ ܝܘ̈ܡܬܐ ܕܚ̈ܝܘܗܝ

40. Maccabees 1 A 9:72

    ܘܝܗܒ ܠܗ ܫܒܝܬܐ ܗܝ ܕܫܒܐ ܗܘܐ ܡܢ ܩܕܝܡ ܡܢ ܐܪܥܐ ܕܝܗܘܕܐ ܘܗܦܟ ܘܐܙܠ ܒܝܟܪܝܘܣ ܠܐܪܥܗ ܘܠܐ ܬܘܒ ܐܘܣܦ ܠܡܚܙܐ ܬܚܘ̈ܡܝܗܘܢ

41. Maccabees 1 A 9:73

    ܘܫܠܝܬ ܪܘܡܚܐ ܡܢ ܐܝܣܪܝܠ ܘܥܡܪ ܝܘܢܬܢ ܒܡܟܡܣ ܘܫܪܝ ܝܘܢܬܢ ܠܡܕܢ ܠܥܡܐ ܕܐܝܣܪܝܠ ܘܠܡܚܒܠܘ ܘܠܡܘܒܕܘ ܡܢܗ ܠܐܢܫܐ ܪ̈ܫܝܥܐ

42. Maccabees 1 A 10:1

    ܘܒܫܢܬ ܡܐܐ ܘܫܬܝܢ ܣܠܩ ܐܠܟܣܢܕܪܘܣ ܒܪ ܐܢܛܝܟܘܣ ܐܦܝܦܢܘܣ ܒܪܗ ܕܐܢܛܝܟܘܣ ܘܐܚܕܗ ܠܦܛܘܠܡܐܝܣ ܘܟܒܫܗ ܘܩܒܠܘܗܝ ܘܐܡܠܟ ܬܡܢ

43. Maccabees 1 A 10:2

    ܘܫܡܥ ܕܡܛܪܝܘܣ ܡܠܟܐ ܘܟܢܫ ܚܝܠܐ ܣܓܝܐܐ ܘܢܦܩ ܠܐܘܪܥܗ ܠܩܪܒܐ

44. Maccabees 1 A 10:3

    ܘܫܕܪ ܕܡܛܪܝܘܣ ܐܓܪ̈ܬܐ ܠܘܬ ܝܘܢܬܢ ܒܡ̈ܠܐ ܕܫܠܡܐ ܐܝܟ ܕܢܫܒܚܝܘܗܝ

45. Maccabees 1 A 10:4

    ܐܡܪ ܓܝܪ ܕܡܛܪܝܘܣ ܢܩܕܡ ܘܢܥܒܕ ܥܡܗ ܪܚܡܘܬܐ ܡܢ ܩܕܡ ܕܠܐ ܢܐܙܠ ܘܢܥܒܕ ܥܡ ܐܠܟܣܢܕܪܘܣ ܘܢܗܘܐ ܠܢ ܣܩܘܒܠܐ

46. Maccabees 1 A 10:5

    ܡܬܕܟܪ ܓܝܪ ܟܠܗܝܢ ܒܝܫ̈ܬܐ ܕܥܒܕܢ ܠܗ ܘܠܐܚ̈ܘܗܝ ܘܠܥܡܗ

47. Maccabees 1 A 10:6

    ܘܝܗܒ ܠܗ ܫܘܠܛܢܐ ܕܢܟܢܫ ܚܝܠܐ ܘܢܥܬܕ ܙܝܢܐ ܘܢܗܘܐ ܡܥܕܪܢܗ ܘܗܡܝܪ̈ܐ ܕܐܝܬ ܗܘܐ ܒܡܪܕܐ ܐܡܪ ܕܢܬܝܗܒܘܢ ܠܗ

48. Maccabees 1 A 10:7

    ܘܐܬܐ ܝܘܢܬܢ ܠܐܘܪܫܠܡ ܘܩܪܐ ܐܓܪ̈ܬܐ ܒܐ̈ܕܢܘܗܝ ܕܟܠܗ ܥܡܐ ܘܕܝܬ̈ܒܝ ܡܪܕܐ

49. Maccabees 1 A 10:8

    ܘܕܚܠܘ ܕܚܠܬܐ ܪܒܬܐ ܕܫܡܥܘ ܕܝܗܒ ܠܗ ܫܘܠܛܢܐ ܡܠܟܐ ܠܡܟܢܫܘ ܚܝܠܐ

50. Maccabees 1 A 10:9

    ܘܐܫܠܡܘ ܝܬ̈ܒܝ ܡܪܕܐ ܗܡܝܪ̈ܐ ܠܝܘܢܬܢ ܘܐܫܠܡ ܐܢܘܢ ܠܐܢܫܝܗܘܢ

51. Maccabees 1 A 10:10

    ܘܥܡܪ ܝܘܢܬܢ ܒܐܘܪܫܠܡ ܘܫܪܝ ܗܘܐ ܡܒܢܐ ܘܡܚܕܬ ܠܡܕܝܢܬܐ

52. Maccabees 1 A 10:11

    ܘܐܡܪ ܝܘܢܬܢ ܠܥܒ̈ܕܝ ܥܒܕܐ ܕܢܒܢܘܢ ܫܘܪܐ ܘܛܘܪܐ ܕܨܗܝܘܢ ܟܕ ܚܕܪ ܒܟܐ̈ܦܐ ܡܪ̈ܒܥܬܐ ܠܚܣܢܐ ܘܥܒܕܘ ܗܟܢܐ

53. Maccabees 1 A 10:12

    ܘܥܪܩܘ ܒܢ̈ܝ ܢܘܟܪ̈ܝܐ ܐܝܠܝܢ ܕܐܝܬ ܗܘܘ ܒܚ̈ܣܢܐ ܗܢܘܢ ܕܒܢܐ ܗܘܐ ܒܝܟܪܝܘܣ

54. Maccabees 1 A 10:13

    ܘܫܒܩܘ ܟܠܢܫ ܕܘܟܬܗ ܘܐܙܠܘ ܠܐܬܪܗܘܢ

55. Maccabees 1 A 10:14

    ܒܪܡ ܕܝܢ ܒܒܝܬ ܫܘܪ̈ܐ ܐܫܬܚܪܘ ܡܢ ܐܝܠܝܢ ܕܫܒܩܘ ܢܡܘܣܐ ܘܦܘ̈ܩܕܢܐ ܐܝܬܝܗ ܗܘܬ ܠܗܘܢ ܓܝܪ ܒܝܬ ܥܪܘܩܝܐ

56. Maccabees 1 A 10:15

    ܘܫܡܥ ܐܠܟܣܢܕܪܘܣ ܡܠܟܐ ܟܠܡܕܡ ܕܫܠܚ ܘܐܫܬܘܕܝ ܕܡܛܪܝܘܣ ܠܝܘܢܬܢ ܘܐܫܬܥܝܘ ܠܗ ܥܠ ܩܪ̈ܒܐ ܘܓܢܒܪ̈ܘܬܐ ܘܢܨ̈ܚܢܐ ܕܥܒܕ ܗܘ ܘܐ̈ܚܘܗܝ

57. Maccabees 1 A 10:16

    ܘܐܡܪ ܕܠܡܐ ܡܫܟܚܝܢ ܐܢܚܢܢ ܐܝܟ ܗܢܐ ܓܒܪܐ ܐܠܐ ܗܫܐ ܢܥܒܕܝܘܗܝ ܠܢ ܪܚܡܐ ܘܡܥܕܪܢܐ

58. Maccabees 1 A 10:17

    ܘܟܬܒ ܐܓܪܬܐ ܘܫܠܚ ܠܗ ܐܝܟ ܗܠܝܢ ܡ̈ܠܐ

59. Maccabees 1 A 10:18

    ܐܠܟܣܢܕܪܘܣ ܡܠܟܐ ܠܝܘܢܬܢ ܐܚܝ ܫܠܡ

60. Maccabees 1 A 10:19

    ܫܡܥܢܢ ܥܠܝܟ ܕܓܒܪܐ ܐܢܬ ܚܝܠܬܢܐ ܘܚܫܚ ܐܢܬ ܠܢ ܕܬܗܘܐ ܠܢ ܪܚܡܐ

61. Maccabees 1 A 10:20

    ܘܗܫܐ ܐܩܝܡܢܟ ܝܘܡܢܐ ܪܒ ܟܗ̈ܢܐ ܕܥܡܟ ܕܬܗܘܐ ܡܬܩܪܐ ܪܚܡܗ ܕܡܠܟܐ ܘܫܕܪ ܠܗ ܐܪ̈ܓܘܢܐ ܘܟܠܝܠܐ ܕܕܗܒܐ ܘܐܡܪ ܬܗܘܐ ܠܗ ܫܠܡܘܬܐ ܠܘܬ ܬܪܥܝܬܢ ܘܢܛܪ ܪܚܡܘܬܐ ܕܨܐܕܝܢ

62. Maccabees 1 A 10:21

    ܘܐܬܟܣܝ ܝܘܢܬܢ ܐܣܛܠܐ ܩܕܝܫܬܐ ܒܝܪܚܐ ܫܒܝܥܝܐ ܒܫܢܬ ܡܐܐ ܘܫܬܝܢ ܒܥܕܥܕܐ ܕܡ̈ܛܠܐ ܘܟܢܫ ܚܝܠܐ ܘܥܬܕ ܙܝܢܐ ܣܓܝܐܐ

63. Maccabees 1 A 10:22

    ܘܫܡܥ ܕܡܛܪܝܘܣ ܗܠܝܢ ܡ̈ܠܐ ܘܐܬܬܥܝܩ ܘܐܡܪ

64. Maccabees 1 A 10:23

    ܡܢܐ ܥܒܕܢ ܕܩܕܡܢ ܐܠܟܣܢܕܪܘܣ ܠܡܥܒܕ ܪܚܡܘܬܐ ܥܡ ܝܗ̈ܘܕܝܐ ܕܢܗܘܘܢ ܠܗ ܡܥܕܪ̈ܢܐ

65. Maccabees 1 A 10:24

    ܐܟܬܘܒ ܠܗܘܢ ܐܦ ܐܢܐ ܡ̈ܠܐ ܕܒܥܘܬܐ ܘܕܪܘܡܪܡܐ ܘܕܡܘܗ̈ܒܬܐ ܕܢܗܘܘܢ ܠܢ ܠܥܘܕܪܢܐ

66. Maccabees 1 A 10:25

    ܘܫܠܚ ܠܗܘܢ ܐܝܟ ܗܠܝܢ ܡ̈ܠܐ ܕܡܛܪܝܘܣ ܡܠܟܐ ܠܥܡܐ ܕܝܗ̈ܘܕܝܐ ܫܠܡ

67. Maccabees 1 A 10:26

    ܡܛܠ ܕܩܘܝܬܘܢ ܒܩܝܡܐ ܕܥܡܢ ܘܢܛܪܬܘܢ ܪܚܡܘܬܐ ܕܠܘܬܢ ܘܠܐ ܢܩܦܬܘܢ ܠܒ̈ܥܠܕܒܒܝܢ ܫܡܥܢ ܘܚܕܝܢ

68. Maccabees 1 A 10:27

    ܘܗܫܐ ܩܘܘ ܒܬܪܥܝܬܐ ܕܠܘܬܢ ܘܢܦܪܘܥܟܘܢ ܛܒ̈ܬܐ ܣܓܝܐ̈ܬܐ ܐܝܟ ܕܥܒܕܬܘܢ ܥܡܢ

69. Maccabees 1 A 10:28

    ܘܢܫܒܘܩ ܠܟܘܢ ܫܩ̈ܠܐ ܣܓ̈ܝܐܐ ܘܢܬܠ ܠܟܘܢ ܡܘܗ̈ܒܬܐ ܪ̈ܘܪܒܬܐ

70. Maccabees 1 A 10:29

    ܘܗܫܐ ܫܪܐ ܐܢܐ ܠܟܘܢ ܘܡܪܦܐ ܐܢܐ ܠܟܠܗܘܢ ܝܗ̈ܘܕܝܐ ܡܢ ܫܩ̈ܠܐ ܘܡܢ ܕܡܝܗ ܕܡܠܚܐ ܘܡܢ ܟ̈ܠܝܠܐ

71. Maccabees 1 A 10:30

    ܘܚܕܐ ܡܢ ܬܠܬ ܡܢ̈ܘܬܐ ܕܙܪܥܐ ܘܡܕܡ ܕܗܘܐ ܗܘܐ ܠܝ ܡܢ ܦܐܪ̈ܐ ܕܐܝ̈ܠܢܐ ܫܒܩ ܐܢܐ ܡܢ ܝܘܡܢܐ ܘܠܗܠ ܕܠܐ ܐܣܒ ܡܢ ܐܪܥܐ ܕܝܗܘܕܐ ܘܬܘܒ ܫܒܩ ܐܢܐ ܬܠܬܐ ܫܩ̈ܠܝܢ ܕܐܬܬܣܝܡܘ ܥܠܝܗ ܡܢ ܫܡܪܝܢ ܘܡܢ ܓܠܝܠܐ ܡܢ ܝܘܡܢܐ ܘܠܗܠ

72. Maccabees 1 A 10:31

    ܘܐܘܪܫܠܡ ܬܗܘܐ ܩܕܝܫܐ ܘܡܚܪܪܐ ܘܟܠܗܘܢ ܬܚܘ̈ܡܝܗ ܘܡܥܣܪ̈ܐ ܘܡܟ̈ܣܐ ܫܒܩ ܐܢܐ

73. Maccabees 1 A 10:32

    ܘܫܘܠܛܢܐ ܝܗܒ ܐܢܐ ܠܪܒ ܟܗ̈ܢܐ ܥܠ ܡܪܕܐ ܕܒܐܘܪܫܠܡ ܕܢܩܝܡ ܥܠܘܗܝ ܓܒܪ̈ܐ ܕܢܛܪܘܢܝܗܝ ܐܝܠܝܢ ܕܗܘ ܨܒܐ

74. Maccabees 1 A 10:33

    ܘܟܠ ܢܦܫܐ ܕܝܗܘ̈ܕܝܐ ܕܐܫܬܒܝܬ ܡܢ ܐܪܥܐ ܕܝܗܘܕ ܒܟܠܗ ܡܠܟܘܬܝ ܫܒܩ ܐܢܐ ܒܪܬ ܚܐܪ̈ܐ ܡܓܢ ܘܟܠܢܫ ܢܫܒܩܘܢ ܫܩ̈ܠܝܗܘܢ ܘܕܒܥܝܪܗܘܢ

75. Maccabees 1 A 10:34

    ܘܟܠܗܘܢ ܥܕܥ̈ܕܝܗ ܘܫܒ̈ܝܗ ܘܪܝܫ ܝܪ̈ܚܝܗ ܘܝܘ̈ܡܬܐ ܐܝ̈ܕܝܥܐ ܘܬܠܬܐ ܝܘ̈ܡܝܢ ܡܢ ܩܕܡ ܥܕܥܕܐ ܘܬܠܬܐ ܝܘ̈ܡܝܢ ܡܢ ܒܬܪ ܥܕܥܕܐ ܢܗܘܘܢ ܡܚܪܪܝܢ ܘܫܒܝܩܝܢ ܡܢ ܡܟ̈ܣܐ ܟܠܗܘܢ ܝܗ̈ܘܕܝܐ ܕܥܡܪܝܢ ܒܡܠܟܘܬܝ

76. Maccabees 1 A 10:35

    ܘܠܐ ܐܝܬ ܫܘܠܛܢܐ ܠܐܢܫ ܕܢܬܒܥ ܐܘ ܕܢܐܠܘܨ ܠܚܕ ܡܢܗܘܢ ܥܠ ܟܠ ܨܒܘ ܕܐܝܬ

77. Maccabees 1 A 10:36

    ܘܢܬܟܬܒܘܢ ܡܢ ܝܗܘ̈ܕܝܐ ܒܚ̈ܝܠܘܗܝ ܕܡܠܟܐ ܬܠܬܐ ܐ̈ܠܦܝܢ ܘܢܬܝܗܒܢ ܠܗܘܢ ܡܘܗ̈ܒܬܐ ܐܝܟ ܕܙܕܩ ܠܚܝ̈ܠܘܗܝ ܕܡܠܟܐ

78. Maccabees 1 A 10:37

    ܘܢܩܘܡܘܢ ܡܢܗܘܢ ܥܠ ܚܣ̈ܢܘܗܝ ܪ̈ܘܪܒܐ ܕܡܠܟܐ ܘܡܢܗܘܢ ܬܘܒ ܢܩܘܡܘܢ ܥܠ ܨܒܘ̈ܬܐ ܡܗܝ̈ܡܢܬܐ ܕܡܠܟܐ ܘܡܕܒܪ̈ܢܝܗܘܢ ܘܪ̈ܫܢܝܗܘܢ ܢܗܘܘܢ ܡܢܗܘܢ ܘܢܬܕܒܪܘܢ ܒܢܡܘ̈ܣܝܗܘܢ ܐܝܟ ܕܦܩܕ ܡܠܟܐ ܒܐܪܥܐ ܕܝܗܘܕ

79. Maccabees 1 A 10:38

    ܘܬܠܬܐ ܫܩ̈ܠܝܢ ܕܐܬܬܣܝܡܘ ܥܠ ܝܗܘܕܐ ܡܢ ܐܪܥܐ ܕܫܡܪܝܢ ܘܡܢ ܕܓܠܝܠܐ ܢܬܝܗܒܘܢ ܠܗ ܠܝܗܘܕܐ ܕܢܗܘܘܢ ܟܠܗܘܢ ܬܚܝܬ ܚܕ ܫܘܠܛܢܐ ܕܠܐ ܐܢܫ ܐܚܪܝܢ ܢܫܬܠܛ ܥܠܝܗܘܢ ܐܠܐ ܐܢ ܪܒ ܟܗ̈ܢܐ ܒܠܚܘܕ

80. Maccabees 1 A 10:39

    ܘܠܦܛܘܠܡܐܝܣ ܕܝܢ ܘܠܟܠܗ ܫܘܠܛܢܗ ܝܗܒܬ ܠܩܕ̈ܝܫܐ ܕܒܐܘܪܫܠܡ ܠܢܦܩܬܐ ܕܒܝܬ ܡܩܕܫܐ

81. Maccabees 1 A 10:40

    ܘܐܢܐ ܝܗܒ ܐܢܐ ܒܟܠ ܫܢܐ ܚܡܫܬܥܣܪ ܐ̈ܠܦܝܢ ܕܟܣܦܐ ܡܢ ܓܙܗ ܕܡܠܟܐ

82. Maccabees 1 A 10:41

    ܘܟܠ ܡܕܡ ܕܡܬܬܚܝܒ ܠܝ ܡܢ ܨܒܘ̈ܬܐ ܐܝܠܝܢ ܕܠܐ ܐܬܝܗܒ ܠܝ ܐܝܟ ܕܠܥܡ̈ܡܐ ܩܕܡ̈ܝܐ ܡܢ ܗܫܐ ܢܬܝܗܒܢ ܠܥܒܕܗ ܕܒܝܬܐ

83. Maccabees 1 A 10:42

    ܘܬܘܒ ܚܡܫܐ ܐܠܦܝܢ ܟܣܦܐ ܗܢܘܢ ܕܢܣܒ ܗܘܝܬ ܡܢ ܨܒܘ̈ܬܐ ܕܒܝܬ ܡܩܕܫܐ ܒܟܠ ܫܢܐ ܘܫܢܐ ܫܒܩ ܐܢܐ ܡܛܠ ܕܠܟܗ̈ܢܐ ܗܘ ܙܕܩ ܕܡܫܡܫܝܢ ܗܝܟܠܐ

84. Maccabees 1 A 10:43

    ܘܟܠ ܐܝܠܝܢ ܕܢܥܪܩܘܢ ܘܢܬܓܘܣܘܢ ܒܗܝܟܠܐ ܕܒܐܘܪܫܠܡ ܘܒܟܠܗܘܢ ܬܚܘ̈ܡܘܗܝ ܕܚܝܒܝܢ ܚܘܒܬܐ ܕܡܠܟܐ ܐܘ ܟܠ ܨܒܘ ܢܗܘܘܢ ܡܫܬܪܝܢ ܘܟܠܡܕܡ ܕܐܝܬ ܠܗܘܢ ܒܡܠܟܘܬܝ

85. Maccabees 1 A 10:44

    ܘܕܗܘܐ ܡܬܒܢܐ ܘܡܬܚܕܬ ܒܝܬ ܡܩܕܫܐ

86. Maccabees 1 A 10:45

    ܘܕܢܬܒܢܐ ܫܘܪܗ ܕܐܘܪܫܠܡ ܘܢܬܥܫܢ ܟܕ ܚܕܪ ܘܢܦܩܬܐ ܬܬܝܗܒ ܠܗܘܢ ܡܢ ܒܝܬܗ ܕܡܠܟܐ ܘܕܢܒܢܘܢ ܫܘܪ̈ܝܗ ܕܝܗܘܕܐ

87. Maccabees 1 A 10:46

    ܘܟܕ ܫܡܥ ܕܝܢ ܝܘܢܬܢ ܘܥܡܐ ܗܠܝܢ ܡ̈ܠܐ ܕܫܠܚ ܕܡܛܪܝܘܣ ܠܐ ܗܝܡܢܘܗܝ ܘܠܐ ܩܒܠܘ ܡܢܗ ܐܬܕܟܪܘ ܓܝܪ ܠܟܠܗ ܒܝܫܬܐ ܕܥܒܕ ܒܐܝܣܪܝܠ ܘܕܐܠܨ ܐܢܘܢ ܪܘܪܒܐܝܬ

88. Maccabees 1 A 10:47

    ܐܠܐ ܐܨܛܒܝܘ ܒܐܠܟܣܢܕܪܘܣ ܡܛܠ ܕܗܘ ܗܘܐ ܠܗܘܢ ܪܫܐ ܕܡ̈ܠܐ ܕܫܠܡܐ ܘܡܥܕܪܝܢ ܗܘܘ ܠܗ ܟܠܗܘܢ ܝܘܡ̈ܬܐ

89. Maccabees 1 A 10:48

    ܘܟܢܫ ܐܠܟܣܢܕܪܘܣ ܡܠܟܐ ܚܝܠܐ ܪܒܐ ܘܫܪܐ ܠܘܩܒܠ ܕܡܛܪܝܘܣ

90. Maccabees 1 A 10:49

    ܘܫܪܝܘ ܠܡܩܪܒܘ ܬܪ̈ܝܗܘܢ ܡ̈ܠܟܐ ܘܥܪܩܬ ܡܫܪܝܬܗ ܕܕܡܛܪܝܘܣ ܘܪܕܦ ܐܢܘܢ ܐܠܟܣܢܕܪܘܣ ܘܐܬܥܫܢ ܥܠܝܗܘܢ

91. Maccabees 1 A 10:50

    ܘܥܫܢ ܩܪܒܐ ܣܓܝ ܥܕܡܐ ܕܥܪܒ ܫܡܫܐ ܘܢܦܠ ܕܡܛܪܝܘܣ ܒܗܘ ܝܘܡܐ

92. Maccabees 1 A 10:51

    ܘܫܕܪ ܐܠܟܣܢܕܪܘܣ ܒܗܘ ܝܘܡܐ ܠܘܬ ܦܛܘܠܡܐܘܣ ܡܠܟܐ ܕܡܨܪܝܢ ܐܝ̈ܙܓܕܐ ܒܗܠܝܢ ܡ̈ܠܐ

93. Maccabees 1 A 10:52

    ܡܛܠ ܕܗܦܟܬ ܠܡܠܟܘܬܝ ܘܝܬܒܬ ܥܠ ܟܘܪܣܝܐ ܕܐܒ̈ܗܝ ܘܐܚܕܬ ܪܫܢܘܬܐ ܘܬܒܪܬܗ ܠܕܡܛܪܝܘܣ ܘܐܬܥܫܢܬ ܘܐܚܕܬ ܐܪ̈ܥܬܢ

94. Maccabees 1 A 10:53

    ܐܩܪܒܬ ܓܝܪ ܥܡܗ ܘܐܬܬܒܪ ܗܘ ܘܡܫܪܝܬܗ ܩܕܡܝܢ ܘܝܬܒܬ ܥܠ ܟܘܪܣܝܐ ܕܡܠܟܘܬܗ

95. Maccabees 1 A 10:54

    ܘܗܫܐ ܢܩܝܡ ܚܕ ܥܡ ܚܕ ܪܚܡܘܬܐ ܘܗܒ ܠܝ ܒܪܬܟ ܠܐܢܬܬܐ ܘܐܗܘܐ ܠܟ ܚܬܢܐ ܘܐܬܠ ܠܟ ܘܠܗ ܡܘܗ̈ܒܬܐ ܕܫ̈ܘܝܢ ܠܟ

96. Maccabees 1 A 10:55

    ܘܥܢܐ ܦܛܘܠܡܐܘܣ ܡܠܟܐ ܘܐܡܪ ܫܦܝܪ ܢܗܘܐ ܝܘܡܐ ܕܗܦܟܬ ܠܐܪܥܐ ܕܐܒ̈ܗܝܟ ܘܝܬܒܬ ܥܠ ܟܘܪܣܝܐ ܕܡܠܟܘܬܐ

97. Maccabees 1 A 10:56

    ܘܗܫܐ ܐܥܒܕ ܠܟ ܟܠܡܕܡ ܕܫܠܚܬ ܐܠܐ ܬܐ ܠܦܛܘܠܡܐܝܣ ܕܬܡܢ ܢܚܙܐ ܚܕ ܠܚܕ ܘܐܬܠ ܠܟ ܠܒܪܬܝ ܐܝܟ ܕܐܡܪܬ

98. Maccabees 1 A 10:57

    ܘܢܦܩ ܦܛܘܠܡܐܘܣ ܡܢ ܡܨܪܝܢ ܗܘ ܘܩܠܐܘܦܛܪܐ ܒܪܬܗ ܘܐܬܘ ܠܦܛܘܠܡܐܝܣ ܒܫܢܬ ܡܐܐ ܘܫܬܝܢ ܘܬܪ̈ܬܝܢ

99. Maccabees 1 A 10:58

    ܘܐܪܥܗ ܐܠܟܣܢܕܪܘܣ ܡܠܟܐ ܘܝܗܒ ܠܗ ܠܩܠܐܘܦܛܪܐ ܒܪܬܗ ܘܥܒܕ ܡܫܬܘܬܐܬ ܒܦܛܘܠܡܐܝܣ ܐܝܟ ܡ̈ܠܟܐ ܒܬܫܒܘܚܬܐ ܪܒܬܐ

100. Maccabees 1 A 10:59

     ܘܟܬܒ ܐܠܟܣܢܕܪܘܣ ܡܠܟܐ ܠܝܘܢܬܢ ܕܢܐܬܐ ܠܐܘܪܥܗ

← Previous · Next → — showing 501–600 of 836

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.