← All works

Peshitta Maccabees 1 A

Peshitta (Syriac Old Testament) · 836 sections

1. Maccabees 1 A 7:15

   ܘܡܠܠ ܥܡܗܘܢ ܡ̈ܠܐ ܕܫܠܡܐ ܘܐܝܡܐ ܠܗܘܢ ܘܐܡܪ ܕܠܐ ܢܒܥܐ ܘܠܐ ܢܬܚܫܒ ܥܠܝܟܘܢ ܒܝܫܬܐ ܘܠܪ̈ܚܡܝܟܘܢ

2. Maccabees 1 A 7:16

   ܘܗܝܡܢܘܗܝ ܘܐܚܕ ܡܢܗܘܢ ܐܫܬܝܢ ܓܒܪ̈ܝܢ ܘܩܛܠ ܐܢܘܢ ܒܚܕ ܝܘܡܐ ܐܝܟ ܡܠܬܐ ܕܐܡܪ ܢܒܝܐ

3. Maccabees 1 A 7:17

   ܕܒܣܪܐ ܕܚܣ̈ܝܝܟ ܘܕܡܗܘܢ ܐܫܕܘ ܚܕܪ̈ܝܗ ܕܐܘܪܫܠܡ ܘܠܐ ܐܝܬ ܠܗܘܢ ܕܩܒܪ

4. Maccabees 1 A 7:18

   ܘܢܦܠܬ ܕܚܠܬܗܘܢ ܥܠ ܟܠܗ ܥܡܐ ܐܡܪܘ ܓܝܪ ܕܠܝܬ ܠܗܘܢ ܫܪܪܐ ܐܦܠܐ ܕܝܢܐ ܥܒܪܘ ܓܝܪ ܥܠ ܕܝܢܐ ܘܡܘ̈ܡܬܐ ܘܩܝܡܐ ܕܐܩܝܡܘ

5. Maccabees 1 A 7:19

   ܘܫܩܠ ܒܝܟܪܝܘܣ ܡܢ ܐܘܪܫܠܡ ܘܫܪܘ ܥܠ ܒܝܬ ܙܪ̈ܐ ܘܫܕܪ ܘܐܚܕ ܡܢ ܐܢܫܐ ܕܡܪܕܘ ܥܠܘܗܝ ܐܦ ܡܢ ܥܡܐ ܘܢܟܣ ܐܢܘܢ ܥܠ ܒܪܐ ܪܒܬܐ

6. Maccabees 1 A 7:20

   ܘܐܫܠܡ ܐܪܥܐ ܠܐܠܩܝܡܘܣ ܘܫܒܩ ܠܘܬܗ ܚܝܠܐ ܠܥܘܕܪܢܗ ܘܐܬܐ ܒܝܟܪܝܘܣ ܠܘܬ ܡܠܟܐ

7. Maccabees 1 A 7:21

   ܐܠܩܝܡܘܣ ܕܝܢ ܡܬܟܬܫ ܗܘܐ ܥܠ ܪܒܘܬ ܟܗܢܘܬܐ

8. Maccabees 1 A 7:22

   ܘܐܬܟܢܫܘ ܠܘܬܗ ܟܠܗܘܢ ܐܝܠܝܢ ܕܫܓܫܝܢ ܗܘܘ ܠܥܡܗܘܢ ܘܐܚܕܗ ܠܐܪܥܐ ܕܝܗܘܕܐ ܘܥܒܕ ܡܚܘܬܐ ܪܒܬܐ ܒܐܝܣܪܝܠ

9. Maccabees 1 A 7:23

   ܘܚܙܐ ܝܗܘܕܐ ܠܟܠܗ ܒܝܫܬܐ ܕܥܒܕ ܐܠܩܝܡܘܣ ܘܐܝܠܝܢ ܕܥܡܗ ܒܒ̈ܢܝ ܐܝܣܪܐܝܠ ܝܬܝܪ ܡܢ ܥܡ̈ܡܐ

10. Maccabees 1 A 7:24

    ܘܢܦܩ ܠܟܠܗܘܢ ܬܚܘ̈ܡܝܗ ܕܝܗܘܕ ܟܕ ܚܕܪܝܢ ܘܥܒܕ ܕܝܢܐ ܒܓܒܪ̈ܐ ܐܝܠܝܢ ܕܡܪܕܘ ܘܐܫܬܕܪܘ ܕܢܗܠܟܘܢ ܒܐܪܥܐ

11. Maccabees 1 A 7:25

    ܘܟܕ ܕܝܢ ܚܙܐ ܐܠܩܝܡܘܣ ܕܐܬܥ̈ܫܢ ܝܗܘܕܐ ܘܐܝܠܝܢ ܕܥܡܗ ܘܐܝܕܥ ܕܠܐ ܡܫܟܚ ܠܡܩܡ ܩܕܡܝܗܘܢ ܗܦܟ ܠܘܬ ܡܠܟܐ ܘܐܟܠ ܩܪ̈ܨܝܗܘܢ ܒܒܝ̈ܫܬܐ ܣܓܝܐ̈ܬܐ

12. Maccabees 1 A 7:26

    ܘܫܕܪ ܡܠܟܐ ܕܡܛܪܝܘܣ ܠܢܝܩܢܘܪ ܚܕ ܡܢ ܡܫ̈ܒܚܐ ܕܪ̈ܘܪܒܢܘܗܝ ܕܒܣܢܐܬܐ ܘܒܒܥܠܕܒܒܘܬܐ ܐܝܬܘܗܝ ܗܘܐ ܠܘܬ ܐܝܣܪܐܝܠ ܘܦܩܕܗ ܕܢܥܛܝܘܗܝ ܘܢܪܝܡܝܘܗܝ ܠܥܡܐ

13. Maccabees 1 A 7:27

    ܘܐܬܐ ܢܝܩܢܘܪ ܠܐܘܪܫܠܡ ܒܚܝܠܐ ܣܓܝܐܐ ܘܫܕܪ ܠܘܬ ܝܗܘܕܐ ܘܐ̈ܚܘܗܝ ܡ̈ܠܐ ܕܫܠܡܐ ܒܢܟܠܐ ܘܐܡܪ ܠܗܘܢ

14. Maccabees 1 A 7:28

    ܠܐ ܬܗܘܐ ܡܨܘܬܐ ܒܝܢܝ ܘܠܟܘܢ ܘܐܬܐ ܒܓܒܪ̈ܐ ܙܥܘܪ̈ܐ ܘܐܚܙܐ ܐ̈ܦܝܟܘܢ ܒܫܠܡܐ

15. Maccabees 1 A 7:29

    ܘܐܬܘ ܠܘܬ ܝܗܘܕܐ ܘܫܐܠܘ ܒܫܠܡܐ ܚܕ ܕܚܕ ܚܝ̈ܠܐ ܕܝܢ ܡܥܬܕܝܢ ܗܘܘ ܕܢܚܛܦܘܢܝܗܝ ܠܝܗܘܕܐ

16. Maccabees 1 A 7:30

    ܘܐܬܝܕܥܬ ܡܠܬܐ ܠܝܗܘܕܐ ܕܒܢܟܠܐ ܐܬܘ ܨܐܕܘܗܝ ܘܐܪܚܩ ܠܗ ܡܢܗ ܘܬܘܒ ܠܐ ܨܒܐ ܗܘܐ ܕܢܚܙܐ ܐ̈ܦܘܗܝ

17. Maccabees 1 A 7:31

    ܘܐܝܕܥ ܢܝܩܢܘܪ ܕܐܬܓܠܝܬ ܠܗ ܡܚܫܒܬܗ ܘܢܦܩ ܠܐܘܪܥܗ ܕܝܗܘܕܐ ܠܘܩܒܠ ܟܦܪ ܫܠܡܐ

18. Maccabees 1 A 7:32

    ܘܢܦܠܘ ܡܢ ܓܒܪ̈ܐ ܕܥܡ ܢܝܩܢܘܪ ܐܝܟ ܚܡܫܡܐܐ ܘܥܪܩܘ ܠܡܕܝܢܬܗ ܕܕܘܝܕ

19. Maccabees 1 A 7:33

    ܘܡܢ ܒܬܪ ܗܠܝܢ ܡ̈ܠܐ ܣܠܩ ܢܝܩܢܘܪ ܠܛܘܪܐ ܕܨܗܝܘܢ ܘܢܦܩܘ ܟܗ̈ܢܐ ܡܢ ܒܝܬ ܡܩܕܫܐ ܘܡܢ ܩܫܝ̈ܫܐ ܕܥܡܐ ܕܢܫܐܠܘܢ ܒܫܠܡܗ ܘܕܢܚܘܘܢܝܗܝ ܝܩ̈ܕܐ ܘܩܘܪ̈ܒܢܐ ܕܡܬܩܪܒܝܢ ܥܠ ܐ̈ܦܝ ܡܠܟܐ

20. Maccabees 1 A 7:34

    ܘܡܝܩ ܘܒܙܚ ܒܗܘܢ ܘܫܛ ܐܢܘܢ ܘܡܠܠ ܒܫܒܗܪܢܘܬܐ

21. Maccabees 1 A 7:35

    ܘܝܡܐ ܒܚܡܬܐ ܘܐܡܪ ܕܐܢ ܠܐ ܢܫܬܠ̣ܡ ܗܫܐ ܝܗܘܕܐ ܘܡܫܪܝܬܗ ܒܐܝ̈ܕܝ ܡܐ ܕܗܦܟܬ ܒܫܠܡܐ ܐܘܩܕܝܘܗܝ ܠܒܝܬܐ ܗܢܐ ܘܢܦܩ ܒܚܡܬܐ ܪܒܬܐ

22. Maccabees 1 A 7:36

    ܘܥܠܘ ܟܗ̈ܢܐ ܘܩܡܘ ܩܕܡ ܡܕܒܚܐ ܘܩܣܛܪܘܡܐ ܘܒܟܘ ܘܐܡܪܘ

23. Maccabees 1 A 7:37

    ܐܢܬ ܡܪܝܐ ܓܒܝܬ ܠܟ ܗܢܐ ܒܝܬܐ ܕܢܬܩܪܐ ܫܡܟ ܥܠܘܗܝ ܘܕܢܗܘܐ ܒܝܬ ܨܠܘܬܐ ܘܒܥܘܬܐ ܠܥܡܟ

24. Maccabees 1 A 7:38

    ܥܒܕ ܦܘܪܥܢܐ ܡܢ ܓܒܪܐ ܗܢܐ ܘܡܢ ܡܫܪܝܬܗ ܘܢܦܠܘܢ ܒܪܘܡܚܐ ܘܐܬܕܟܪ ܓܘܕܦܗܘܢ ܘܠܐ ܬܬܠ ܒܗܘܢ ܚܝܠܐ ܘܡܣܝܒܪܢܘܬܐ

25. Maccabees 1 A 7:39

    ܘܢܦܩ ܢܝܩܢܘܪ ܡܢ ܐܘܪܫܠܡ ܘܫܪܐ ܥܠ ܒܝܬ ܚܘܪܢ ܘܐܪܥܗ ܚܝܠܐ ܕܣܘܪܝܐ

26. Maccabees 1 A 7:40

    ܘܝܗܘܕܐ ܫܪܐ ܥܠ ܐܪܣܐ ܒܬܠܬܐ ܐܠܦܝܢ ܓܒܪ̈ܝܢ ܘܨܠܝ ܝܗܘܕܐ ܘܐܡܪ

27. Maccabees 1 A 7:41

    ܡܪܝܐ ܐܢܬ ܗܘ ܕܟܕ ܓܕܦܘ ܥܠܝܟ ܚ̈ܝܠܐ ܕܡܠܟܐ ܕܐܬܘܪ ܢܦܩ ܡܠܐܟܟ ܘܚܪܒ ܐܢܘܢ ܠܡܐܐ ܘܬܡܢܐܝܢ ܘܚܡܫܐ ܐܠܦܝܢ

28. Maccabees 1 A 7:42

    ܗܟܢܐ ܫܚܘܩ ܘܬܒܪ ܠܡܫܪܝܬܐ ܗܕܐ ܝܘܡܢܐ ܩܕܡܝܢ ܘܢܕܥܘܢ ܫܪܟܐ ܕܐܚܪ̈ܢܐ ܕܒܝܫܐܝܬ ܡܠܠܘ ܥܠ ܒܝܬ ܡܩܕܫܟ ܘܕܘܢ ܐܢܘܢ ܐܝܟ ܒܝܫܘܬܗܘܢ

29. Maccabees 1 A 7:43

    ܘܫܪܝ ܡܫܪ̈ܝܬܐ ܕܢܩܪܒܢ ܒܬܠܬܥܣܪܐ ܒܐܕܪ ܝܪܚܐ ܘܐܬܬܒܪܬ ܡܫܪܝܬܗ ܕܢܝܩܢܘܪ ܘܢܦܠ ܗܘ ܒܩܕܡܐ ܒܩܪܒܐ

30. Maccabees 1 A 7:44

    ܘܟܕ ܕܝܢ ܚܙܬ ܡܫܪܝܬܗ ܕܢܝܩܢܘܪ ܕܢܦܠ ܠܗ ܫܕܘ ܙܝܢܗܘܢ ܘܥܪܩܘ

31. Maccabees 1 A 7:45

    ܘܪܕܦܝܢ ܗܘܘ ܠܗܘܢ ܕܒܝܬ ܝܗܘܕܐ ܡܪ̈ܕܐ ܝܘܡܐ ܚܕ ܡܢ ܐܪܣܐ ܘܥܕܡܐ ܕܐܬܘ ܠܓܙܝܪܐ ܘܩܪܘ ܒܬܪܗܘܢ ܒܩܪ̈ܢܬܐ ܐܝܕܝ̈ܥܬܐ

32. Maccabees 1 A 7:46

    ܘܢܦܩܘ ܡܢ ܟܠܗܝܢ ܩܘܪ̈ܝܐ ܕܝܗܘܕܐ ܘܡܚܡܠܝܢ ܗܘܘ ܘܡܗܦܟܝܢ ܠܗܘܢ ܚܕ ܠܘܬ ܚܕ ܥܕܡܐ ܕܢܦܠܘ ܟܠܗܘܢ ܒܦܘܡܐ ܕܚܪܒܐ ܥܕܡܐ ܕܠܐ ܐܫܬܚܪ ܡܢܗܘܢ ܐܦܠܐ ܚܕ

33. Maccabees 1 A 7:47

    ܘܢܣܒܘ ܒܙܬܗܘܢ ܘܫܒܝܬܗܘܢ ܘܫܩܠܘ ܪܫܗ ܕܢܝܩܢܘܪ ܘܝܡܝܢܗ ܗܝ ܕܐܪܝܡ ܗܘܐ ܒܫܘܒܗܪܐ ܘܐܝܬܝܘ ܘܬܠܘ ܐܢܘܢ ܒܐܘܪܫܠܡ

34. Maccabees 1 A 7:48

    ܘܐܬܒܣܡ ܥܡܐ ܣܓܝ ܘܐܩܝܡܘܗܝ ܠܝܘܡܐ ܗܢܐ ܒܒܘܣܡܐ ܘܒܚܕܘܬܐ

35. Maccabees 1 A 7:49

    ܘܣܡܘ ܕܗܘܘ ܥܒܕܝܢ ܠܗ ܡܢ ܫܢܐ ܠܫܢܐ ܒܬܠܬܥܣܪܐ ܒܐܕܪ ܝܪܚܐ

36. Maccabees 1 A 7:50

    ܘܫܠܝܬ ܐܪܥܐ ܕܝܗܘܕܐ ܝܘ̈ܡܬܐ ܙܥܘܪ̈ܐ

37. Maccabees 1 A 8:1

    ܘܫܡܥ ܝܗܘܕܐ ܫܡܥܗܘܢ ܕܒ̈ܢܝ ܪܗܘܡܐ ܕܥܫܝܢܝܢ ܒܚܝܠܐ ܘܡܨܛܒܝܢ ܒܟܠ ܐܝܠܝܢ ܕܡܬܢܩܦܝܢ ܠܗܘܢ ܘܠܟܠ ܡܢܘ ܕܡܬܩܪܒ ܠܘܬܗܘܢ ܡܩܝܡܝܢ ܥܡܗ ܪܚܡܘܬܐ

38. Maccabees 1 A 8:2

    ܘܐܫܬܥܝܘ ܠܗ ܥܠ ܓܢܒܪܘܬܗܘܢ ܘܩܪ̈ܒܝܗܘܢ ܕܥܒܕܘ ܒܓ̈ܠܛܝܐ ܘܐܬܥܫܢܘ ܥܠܝܗܘܢ ܘܕܥܒܕܘ ܐܢܘܢ ܕܢܗܘܘܢ ܠܗܘܢ ܡܣ̈ܩܝ ܡܕܐܬܐ

39. Maccabees 1 A 8:3

    ܘܟܠܡܕܡ ܬܘܒ ܕܥܒܕܘ ܒܐܪܥܐ ܕܐܣܦܢܝܐ ܘܕܐܚܕܘ ܡܐܛܠ̣ܐ ܕܕܗܒܐ ܘܕܣܐܡܐ ܕܐܝܬ ܬܡܢ

40. Maccabees 1 A 8:4

    ܘܕܐܚܕܘ ܒܡ̈ܠܟܝܗܘܢ ܘܒܢܓܝܪܘܬ ܪܘܚܗܘܢ ܟܠ ܐܬܪ ܐܬܪܐ ܕܝܢ ܪܚܝܩ ܗܘܐ ܡܢܗܘܢ ܣܓܝ ܘܕܐܝܟܢܐ ܬܘܒ ܫܚܩܘ ܠܡ̈ܠܟܐ ܕܐܬܘ ܥܠܝܗܘܢ ܡܢ ܣܘ̈ܦܝܗ ܕܐܪܥܐ ܘܡܚܘ ܒܗܘܢ ܡܚܘܬܐ ܪܒܬܐ ܘܫܪܟܐ ܕܐܚܪ̈ܢܐ ܡܣܩܝܢ ܗܘܘ ܠܗܘܢ ܡܕܐܬܐ ܒܟܠ ܫܢܐ ܘܫܢܐ

41. Maccabees 1 A 8:5

    ܐܦ ܠܦܝܠܝܦܘܣ ܘܠܡ̈ܠܟܐ ܕܚ̈ܬܝܐ ܘܠܐܝܠܝܢ ܕܡܫܬܩܠܝܢ ܗܘܘ ܥܠܝܗܘܢ ܡܟܟܘ ܘܫܚܩܘ ܐܢܘܢ ܒܩܪ̈ܒܐ ܘܐܬܥܫܢܘ ܥܠܝܗܘܢ

42. Maccabees 1 A 8:6

    ܘܠܐܢܛܝܟܘܣ ܡܠܟܐ ܪܒܐ ܕܐܣܝܐ ܗܘ ܕܐܙܠ ܗܘܐ ܥܠܝܗܘܢ ܠܩܪܒܐ ܘܐܝܬ ܗܘܐ ܥܡܗ ܡܐܐ ܘܥܣܪܝܢ ܦܝ̈ܠܝܢ ܘܦܪ̈ܫܐ ܘܡܪ̈ܟܒܬܐ ܘܚܝܠܐ ܣܓܝܐܐ ܘܥܫܝܢܐ ܫܚܩܘܗ ܠܟܠܗ ܡܫܪܝܬܗ

43. Maccabees 1 A 8:7

    ܘܠܗ ܐܚܕܘܗܝ ܟܕ ܚܝ ܘܐܩܝܡ ܕܗܘܐ ܡܣܩ ܠܗܘܢ ܗܘ ܘܡ̈ܠܟܐ ܕܡܢ ܒܬܪܗ ܡܕܐܬܐ ܪܒܬܐ ܒܟܠ ܫܢܐ ܘܫܢܐ ܘܕܗܘܘ ܝܗܒܝܢ ܗܡܝܪ̈ܐ ܘܦܘܪ̈ܫܢܐ

44. Maccabees 1 A 8:8

    ܘܠܐܪܥܐ ܕܗܢܕܘ ܘܕܡܕܝ ܘܕܠܘܕܝܐ ܡܢ ܐܪ̈ܥܬܗ ܐܪ̈ܥܬܐ ܓܒ̈ܝܬܐ ܘܟܕ ܢܣܒܘ ܐܢܝܢ ܡܢܗ ܝܗܒܘ ܐ̈ܢܝܢ ܠܐܘܡܢܝܘܣ ܡܠܟܐ

45. Maccabees 1 A 8:9

    ܘܟܕ ܬܘܒ ܨܒܘ ܕܢܐܬܘܢ ܡܢ ܗܠܣ ܕܢܥܛܘܢ ܘܢܓܡܪܘܢ ܐܢܘܢ

46. Maccabees 1 A 8:10

    ܘܐܬܝܕܥܬ ܠܗܘܢ ܡܠܬܐ ܘܫܕܪܘ ܥܠܝܗܘܢ ܠܚܕ ܡܢ ܐܣܛܪ̈ܛܓܐ ܘܐܩܪܒ ܥܡܗܘܢ ܘܢܦܠܘ ܡܢܗܘܢ ܩ̈ܛܝܠܐ ܣܓ̈ܝܐܐ ܘܫܒܘ ܢܫ̈ܝܗܘܢ ܘܒܢ̈ܝܗܘܢ ܘܒܙܘ ܐܢܘܢ ܘܐܚܕܘ ܘܐܬܥܫܢܘ ܥܠ ܐܪܥܗܘܢ ܘܣܚܦܘ ܚܣܢ̈ܝܗܘܢ ܘܫܥܒܕܘ ܐܢܘܢ ܥܕܡܐ ܠܝܘܡܐ ܗܢܐ

47. Maccabees 1 A 8:11

    ܘܠܫܪܟܐ ܕܡ̈ܠܟܘܬܐ ܘܠܓܙܪ̈ܬܐ ܘܚܕܐ ܙܒܢ ܠܟܠ ܐܝܠܝܢ ܕܩܝܡܝܢ ܗܘܘ ܠܘܩܒܠܗܘܢ ܡܚܒܠܝܢ ܗܘܘ ܠܗܘܢ ܘܒܙܝܢ ܘܫܒܝܢ ܘܡܫܥܒܕܝܢ ܗܘܘ ܠܗܘܢ ܠܥܒܕܘܬܐ

48. Maccabees 1 A 8:12

    ܥܡ ܪ̈ܚܡܝܗܘܢ ܕܝܢ ܘܥܡ ܐܝܠܝܢ ܕܡܢܚܝܢ ܗܘܘ ܨܐܕܝܗܘܢ ܢܛܪܝܢ ܗܘܘ ܪܚܡܘܬܐ ܘܐܚܕܘ ܘܐܬܥܫܢܘ ܥܠ ܡ̈ܠܟܐ ܕܪܚܝܩܝܢ ܘܕܩܪܝܒܝܢ ܘܟܠ ܕܫܡܥܝܢ ܗܘܘ ܫܡܥܗܘܢ ܡܬܬܙܝܥܝܢ ܗܘܘ ܡܢܗܘܢ

49. Maccabees 1 A 8:13

    ܘܠܟܠ ܡܢܘ ܕܨܒܝܢ ܗܘܘ ܕܢܥܕܪܘܢ ܘܢܡܠܟܘܢ ܡܡܠܟ ܗܘܐ ܘܠܟܠ ܡܢܘ ܕܨܒܝܢ ܗܘܘ ܕܢܡܟܟܘܢ ܡܡܟܟܝܢ ܗܘܘ ܘܐܬܪܝܡܘ ܘܐܬܥܫܢܘ ܣܓܝ

50. Maccabees 1 A 8:14

    ܘܒܗܠܝܢ ܟܠܗܝܢ ܠܐ ܩܛܪ ܐܦܠܐ ܚܕ ܡܢܗܘܢ ܬܓܐ ܘܠܐ ܐܬܟܣܝ ܐܪ̈ܓܘܢܐ ܐܝܟ ܕܢܬܪܘܪܒ ܒܗܘܢ

51. Maccabees 1 A 8:15

    ܘܥܒܕܘ ܠܗܘܢ ܒܝܬ ܒܘܠܐ ܘܟܠܝܘܡ ܡܬܡܠܟܝܢ ܗܘܘ ܬܠܬܡܐܐ ܘܥܣܪܝܢ ܓܒܪ̈ܝܢ ܐܟܚܕܐ ܒ̈ܢܝ ܡܠܟܐ ܘܡܬܚܫܒܝܢ ܗܘܘ ܕܐܝܟܢܐ ܢܐܨܦܘܢ ܘܢܕܒܪܘܢ ܠܥܡܐ

52. Maccabees 1 A 8:16

    ܘܡܫܠܡܝܢ ܗܘܘ ܪܫܢܘܬܐ ܠܚܕ ܓܒܪܐ ܒܫܢܬܐ ܘܗ̣ܘ ܦܩܕ ܗܘܐ ܘܡܫܬܠܛ ܥܠ ܟܠܗ ܐܪܥܗܘܢ ܘܟܠܗܘܢ ܡܫܬܡܥܝܢ ܗܘܘ ܠܗܘ ܚܕ ܓܒܪܐ ܘܠܐ ܐܝܬ ܗܘܐ ܒܝܢܬܗܘܢ ܠܐ ܚܣܡܐ ܘܠܐ ܛܢܢܐ ܘܓܒܐ ܝܗܘܕܐ ܠܐܘܦܠܝܡܘܣ ܒܪܗ ܕܝܘܚܢܢ ܒܪ ܐܩܘܣ ܘܠܐܝܣܘܢ ܒܪܗ ܕܠܥܙܪ

53. Maccabees 1 A 8:17

    ܘܫܕܪ ܐܢܘܢ ܠܪܗܘܡܐ ܕܢܩܝܡܘܢ ܥܡܗܘܢ ܪܚܡܘܬܐ ܘܥܘܕܪܢܐ

54. Maccabees 1 A 8:18

    ܘܕܢܣܒܘܢ ܡܢܗܘܢ ܢܝܪܐ ܡܛܠ ܕܡܠܟܘܬܐ ܕܝܘ̈ܢܝܐ ܡܫܥܒܕܐ ܗܘܬ ܠܐܝܣܪܐܝܠ ܠܥܒܕܘܬܐ

55. Maccabees 1 A 8:19

    ܘܐܙܠܘ ܕܒܝܬ ܐܘܦܠܝܡܘܣ ܠܪܗܘܡܐ ܐܘܪܚܐ ܕܝܢ ܪܒܐ ܗܘܬ ܣܓܝ ܘܥܠܘ ܠܒܝܬ ܒܘܠܐ ܕܝܠܗܘܢ ܘܥܢܘ ܘܐܡܪܘ ܠܗܘܢ

56. Maccabees 1 A 8:20

    ܝܗܘܕܐ ܡܩܒܝ ܘܐܚ̈ܘܗܝ ܘܥܡܐ ܕܝܗ̈ܘܕܝܐ ܫܕܪܘܢ ܠܘܬܟܘܢ ܠܡܩܡܘ ܥܡܟܘܢ ܥܘܕܪܢܐ ܘܪܚܡܘܬܐ ܘܕܬܟܬܒܘܢܢ ܪ̈ܚܡܝܟܘܢ ܘܡܥܕܪ̈ܢܝܟܘܢ

57. Maccabees 1 A 8:21

    ܘܫܦܪܬ ܡܠܬܐ ܒܥܝ̈ܢܝܗܘܢ

58. Maccabees 1 A 8:22

    ܘܗܢܘ ܦܚܡܗ ܕܐܓܪܬܐ ܕܟܬܒܘ ܒܦܢܩܝܬܐ ܕܢܚܫܐ ܘܫܕܪܘ ܠܐܘܪܫܠܡ ܕܬܗܘܐ ܠܘܬܗܘܢ ܠܥܘܗܕܢܐ ܘܪܚܡܘܬܐ ܘܕܥܘܕܪܢܐ ܘܕܫܠܡܐ

59. Maccabees 1 A 8:23

    ܫܦܝܪ ܢܗܘܐ ܠܪ̈ܗܘܡܝܐ ܘܠܥܡܐ ܕܝܗ̈ܘܕܝܐ ܒܝܡܐ ܘܒܝܒܫܐ ܠܥܠܡ ܘܪܘܡܚܐ ܘܒܥܠܕܒܒܐ ܢܬܪܚܩ ܡܢܗܘܢ

60. Maccabees 1 A 8:24

    ܐܢ ܕܝܢ ܢܩܘܡ ܩܪܒܐ ܥܠ ܪ̈ܗܘܡܝܐ ܠܘܩܕܡ ܐܘ ܥܠ ܟܠ ܡܥܕܪ̈ܢܝܗܘܢ ܐܘ ܥܠ ܟܠ ܐܝܟܐ ܕܡܫܠܛܝܢ

61. Maccabees 1 A 8:25

    ܢܐܬܐ ܠܥܘܕܪܢܗܘܢ ܥܡܐ ܕܝܗ̈ܘܕܝܐ ܐܝܟ ܡܐ ܕܫܐܠ ܙܒܢܐ ܒܠܒܐ ܡܠܝܐ

62. Maccabees 1 A 8:26

    ܘܠܒ̈ܥܠܕܒܒܐ ܕܡܩܪܒܝܢ ܥܡܗܘܢ ܠܐ ܢܬܠܘܢ ܠܗܘܢ ܢܦܐܫܐ ܘܢܟܠܘܢ ܡܢܗܘܢ ܚ̈ܛܐ ܘܙܝܢܐ ܘܟܣܦܐ ܘܐ̈ܠܦܐ ܐܝܟ ܕܫܦܪ ܠܪ̈ܗܘܡܝܐ ܘܢܛܪܘܢ ܢܛܘܪ̈ܬܗܘܢ ܟܕ ܡܕܡ ܠܐ ܢܣܒܝܢ ܡܢܗܘܢ

63. Maccabees 1 A 8:27

    ܘܐܢ ܕܝܢ ܠܥܡܐ ܕܝܗ̈ܘܕܝܐ ܢܓܕܫ ܠܘܩܕܡ ܩܪܒܐ ܢܬܟܬܫܘܢ ܘܢܥܕܪܘܢ ܐܢܘܢ ܒ̈ܢܝ ܪ̈ܗܘܡܐ ܡܢ ܟܠܗ ܢܦܫܗܘܢ ܐܝܟ ܡܐ ܕܙܒܢܐ ܫܐܠ

64. Maccabees 1 A 8:28

    ܘܠܐܝܠܝܢ ܕܡܬܟܬܫܝܢ ܘܡܩܪܒܝܢ ܥܡܗܘܢ ܠܐ ܢܬܝܗܒ ܚ̈ܛܐ ܘܙܝܢܐ ܘܟܣܦܐ ܘܐ̈ܠܦܐ ܐܝܟ ܕܫܦܪ ܠܒ̈ܢܝ ܪܗܘܡܐ ܘܢܛܪܘܢ ܢܛܘܪ̈ܬܗܘܢ ܟܕ ܡܕܡ ܠܐ ܢܣܒܘܢ ܡܢܗܘܢ ܕܠܐ ܒܢܟܠܐ

65. Maccabees 1 A 8:29

    ܐܝܟ ܗܠܝܢ ܡ̈ܠܐ ܐܩܝܡܘ ܒ̈ܢܝ ܪܗܘܡܐ ܥܡ ܟܢܫܐ ܕܝܗ̈ܘܕܝܐ

66. Maccabees 1 A 8:30

    ܐܢ ܕܝܢ ܡܢ ܒܬܪ ܡ̈ܠܐ ܗܠܝܢ ܢܨܒܘܢ ܗܠܝܢ ܠܡܒܨܪ ܐܘ ܠܡܘܣܦܘ ܢܥܒܕܘܢ ܟܠ ܕܫܦܪ ܠܬܪܥܝܬܗܘܢ ܘܟܠ ܕܢܒܨܪܘܢ ܐܘ ܢܘܣܦܘܢ ܢܗܘܐ ܫܠܝܛ ܠܗܘܢ

67. Maccabees 1 A 8:31

    ܘܥܠ ܒܝܫ̈ܬܐ ܕܝܢ ܕܥܒܕ ܨܐܕܝܟܘܢ ܕܡܛܪܝܘܣ ܡܠܟܐ ܟܬܒܢ ܘܫܠܚܢ ܠܗ ܕܠܡܢܐ ܐܘܩܪܬ ܘܐܥܫܢܬ ܢܝܪܟ ܥܠ ܪ̈ܚܡܝܢ ܘܡܥܕܪ̈ܢܝܢ ܝܗܘ̈ܕܝܐ

68. Maccabees 1 A 8:32

    ܐܢ ܗܟܝܠ ܬܘܒ ܢܩܒܠܘܢ ܥܠܝܟ ܢܥܒܕ ܠܗܘܢ ܬܒܥܬܐ ܘܕܝܢܐ ܘܢܩܪܒ ܥܡܟ ܒܝܡܐ ܘܒܝܒܫܐ

69. Maccabees 1 A 9:1

    ܘܫܡܥ ܕܡܛܪܝܘܣ ܕܢܦܠ ܢܝܩܢܘܪ ܘܚܝܠܗ ܒܩܪܒܐ ܘܐܘܣܦ ܬܘܒ ܠܡܫܕܪܘ ܠܒܝܟܪܝܘܣ ܘܠܐܠܩܝܡܘܣ ܕܬܪ̈ܬܝܢ ܙܒ̈ܢܝܢ ܠܐܪܥܐ ܕܝܗܘܕܐ ܘܠܚܝܠܐ ܕܡܢ ܝܡܝܢܐ ܥܡܗܘܢ

70. Maccabees 1 A 9:2

    ܘܐܙܠܘ ܕܒܝܬ ܒܝܟܪܝܘܣ ܒܐܘܪܚܐ ܕܓܠܥܕ ܘܫܪܘ ܥܠ ܡܣܠܘܬ ܕܒܐܪܒܠܐ ܘܟܒܫܘܗ ܘܐܘܩܕܘ ܒܗ ܢܦ̈ܫܬܐ ܕܐܢܫܐ ܣܓ̈ܝܐܐ

71. Maccabees 1 A 9:3

    ܘܒܫܢܬ ܡܐܐ ܘܚܡܫܝܢ ܘܬܪ̈ܬܝܢ ܒܝܪܚܐ ܩܕܡܝܐ ܫܪܘ ܥܠ ܐܘܪܫܠܡ

72. Maccabees 1 A 9:4

    ܘܫܩܠܘ ܘܐܙܠܘ ܠܒܝܪܙܬ ܒܥܣܪܝܢ ܐ̈ܠܦܝܢ ܪ̈ܓܠܝܐ ܘܬܪ̈ܝܢ ܐ̈ܠܦܝܢ ܦܪ̈ܫܐ

73. Maccabees 1 A 9:5

    ܘܝܗܘܕܐ ܫܪܐ ܗܘܐ ܒܐܠܣܐ ܘܥܡܗ ܬܠܬܐ ܐܠܦܝܢ ܓܒܪ̈ܐ ܡܓܒ̈ܝܐ

74. Maccabees 1 A 9:6

    ܘܚܙܘ ܠܡܫܪܝܬܐ ܕܒܥܠܕܒ̈ܒܝܗܘܢ ܕܣܓܝ ܥܫܝܢܐ ܘܕܚܠܘ ܛܒ ܘܫܢܝܘ ܣܓ̈ܝܐܐ ܡܢ ܡܫܪܝܬܐ ܘܠܐ ܐܫܬܚܪܘ ܐܠܐ ܬܡܢܡܐܐ ܓܒܪ̈ܝܢ ܒܠܚܘܕ

75. Maccabees 1 A 9:7

    ܘܚܙܐ ܝܗܘܕܐ ܕܐܬܒܕܪܬ ܠܗ ܡܫܪܝܬܗ ܘܩܪܒܐ ܐܠܨ ܠܗ ܘܐܫܬܚܩ ܒܠܒܗ ܘܐܫܬܪܝ ܡܛܠ ܕܠܐ ܐܝܬ ܗܘܐ ܠܗ ܙܒܢܐ ܠܡܟܢܫܘ ܐܢܘܢ

76. Maccabees 1 A 9:8

    ܘܐܡܪ ܠܐܝܠܝܢ ܕܐܫܬܚܪܘ ܠܘܬܗ ܩܘܡܘ ܘܢܣܩ ܥܠ ܒܥ̈ܠܕܒܒܝܢ ܟܒܪ ܢܫܟܚ ܠܡܩܪܒܘ ܥܡܗܘܢ

77. Maccabees 1 A 9:9

    ܘܗܦܟܘ ܠܗܘܢ ܡܢܗ ܘܐܡܪܝܢ ܠܗ ܠܐ ܡܬܡܨܝܢ ܐܢܚܢܢ ܐܠܐ ܗܫܐ ܢܦܠܛ ܢܦܫ̈ܬܢ ܘܢܗܦܘܟ ܘܢܐܬܐ ܥܡ ܐܚ̈ܝܢ ܘܢܩܪܒ ܥܡܗܘܢ ܡܛܠ ܕܐܢܚܢܢ ܙܥܘܪ̈ܐ ܚܢܢ

78. Maccabees 1 A 9:10

    ܘܐܡܪ ܝܗܘܕܐ ܚܣ ܠܝ ܕܐܥܒܕ ܗܕܐ ܘܐܥܪܘܩ ܡܢ ܩܕܡܝܗܘܢ ܘܐܢ ܡܛܝ ܙܒܢܢ ܢܡܘܬ ܓܢܒܪܐܝܬ ܥܠ ܐ̈ܦܝ ܐ̈ܚܝܢ ܘܠܐ ܢܫܒܘܩ ܡܘܡܐ ܒܬܫܒܘܚܬܢ

79. Maccabees 1 A 9:11

    ܘܫܩܠ ܚܝܠܐ ܡܢ ܡܫܪܝܬܐ ܘܩܡܘ ܠܘܩܒܠ ܩܪܒܐ ܘܐܬܦܠܓܘ ܦܪ̈ܫܐ ܠܬܪ̈ܬܝܢ ܡܢ̈ܘܢ ܘܩܫ̈ܬܐ ܘܫ̈ܕܝܝ ܒܩ̈ܠܥܐ ܐܙܠܝܢ ܗܘܘ ܩܕܡ ܚܝܠܐ ܘܟܠܗܘܢ ܚܝ̈ܠܬܢܐ ܘܩܪ̈ܒܬܢܐ ܥܡܗܘܢ

80. Maccabees 1 A 9:12

    ܘܒܝܟܪܝܘܣ ܐܝܬܘܗܝ ܗܘܐ ܒܟܢܦܐ ܕܝܡܝܢܐ ܘܩܪܒ ܦ̈ܠܓܐ ܡܢ ܬܪ̈ܝܗܘܢ ܓܒ̈ܐ ܘܩܪܝܢ ܗܘܘ ܒܩܪ̈ܢܬܐ ܐܦ ܕܒܝܬ ܝܗܘܕܐ ܩܪܝܢ ܗܘܘ ܒܩܪ̈ܢܬܗܘܢ

81. Maccabees 1 A 9:13

    ܘܐܬܬܙܝܥܬ ܐܪܥܐ ܡܢ ܩܠܐ ܕܡܫܪ̈ܝܬܐ ܘܫܪܝܘ ܠܡܩܪܒܘ ܡܢ ܨܦܪܐ ܘܥܕܡܐ ܠܪܡܫܐ

82. Maccabees 1 A 9:14

    ܘܚܙܐ ܝܗܘܕܐ ܕܒܝܟܪܝܘܣ ܘܥܘܫܢܗ ܕܡܫܪܝܬܐ ܒܓܒܐ ܗܘ ܕܝܡܝܢܐ ܘܐܫܠܡܘ ܚܒܪ̈ܘܗܝ ܢܦܫܗܘܢ ܡܢ ܟܠܗ ܠܒܗܘܢ

83. Maccabees 1 A 9:15

    ܘܐܬܬܒܪ ܘܐܫܬܚܩ ܡܢ ܩܕܡܝܗܘܢ ܓܒܐ ܕܝܡܝܢܐ ܘܪ̈ܕܦ ܗܘܐ ܒܬܪܗܘܢ ܥܕܡܐ ܠܛܘܪܐ ܕܙܘܛܘܣ

84. Maccabees 1 A 9:16

    ܘܗܠܝܢ ܕܡܢ ܓܒܐ ܕܣܡܠܐ ܟܕ ܚܙܘ ܕܐܙܕܟܝ ܠܗ ܓܒܐ ܕܝܡܝܢܐ ܗܦܟܘ ܒܬܪ ܝܗܘܕܐ ܘܐܝܠܝܢ ܕܥܡܗ ܡܢ ܒܣܬܪܗܘܢ

85. Maccabees 1 A 9:17

    ܘܐܥܫܢܘ ܩܪܒܐ ܘܢܦܠܘ ܡܢ ܗܠܝܢ ܘܡܢ ܗܠܝܢ

86. Maccabees 1 A 9:18

    ܐܦ ܝܗܘܕܐ ܢܦܠ ܘܕܐܫܬܚܪܘ ܥܪܩܘ

87. Maccabees 1 A 9:19

    ܘܢܣܒܘ ܝܘܢܬܢ ܘܫܡܥܘܢ ܠܝܗܘܕܐ ܐܚܘܗܘܢ ܘܩܒܪܘܗܝ ܒܩܒܪܐ ܕܐܒܗ̈ܘܗܝ ܒܡܘܪܥܝܡ

88. Maccabees 1 A 9:20

    ܘܒܟܘ ܘܐܪܩܕܘ ܥܠ ܝܗܘܕܐ ܟܠܗ ܐܝܣܪܝܠ ܘܐܬܐܒܠܘ ܥܠܘܗܝ ܐܒܠܐ ܪܒܐ ܝܘ̈ܡܬܐ ܣܓ̈ܝܐܐ ܘܐܡܪܘ

89. Maccabees 1 A 9:21

    ܐܝܟܢܐ ܢܦܠ ܓܢܒܪܐ ܘܚܝܠܬܢܐ ܦܪܘܩܗ ܕܐܝܣܪܐܝܠ

90. Maccabees 1 A 9:22

    ܘܫܪܟܐ ܕܡ̈ܠܘܗܝ ܕܝܗܘܕܐ ܘܩܪ̈ܒܘܗܝ ܘܢܨܚ̈ܢܘܗܝ ܘܓܢܒܪܘܬܗ ܘܚܝܠܬܢܘܬܗ ܠܐ ܐܬܟܬܒܘ ܣܓܝܐܝܢ ܗܘܘ ܓܝܪ ܣܓܝ

91. Maccabees 1 A 9:23

    ܘܗܘܐ ܡܢ ܒܬܪ ܡܘܬܗ ܕܝܗܘܕܐ ܐܕܝܩܘ ܘܐܬܚܙܝܘ ܓܒܪ̈ܐ ܥܘ̈ܠܐ ܒܟܠܗ ܬܚܘܡܗܘܢ ܕܒ̈ܢܝ ܐܝܣܪܐܝܠ ܘܐܬܓܠܝܘ ܟܠܗܘܢ ܪ̈ܫܝܥܐ ܘܥܒܪ̈ܝ ܢܡܘܣܐ

92. Maccabees 1 A 9:24

    ܘܒܗܢܘܢ ܝܘ̈ܡܬܐ ܗܘܐ ܟܦܢܐ ܪܒܐ ܘܐܬܚܒܠܬ ܐܦ ܐܪܥܐ ܥܡܗܘܢ

93. Maccabees 1 A 9:25

    ܘܓܒܐ ܒܝܟܪܝܘܣ ܠܐܢܫܐ ܪ̈ܫܝܥܐ ܘܐܩܝܡ ܐܢܘܢ ܡܪ̈ܘܬܐ ܘܫ̈ܠܝܛܢܐ ܥܠ ܐܪܥܐ

94. Maccabees 1 A 9:26

    ܘܡܥܩܒܝܢ ܗܘܘ ܘܒܥܝܢ ܠܪ̈ܚܡܘܗܝ ܕܝܗܘܕܐ ܘܡܝܬܝܢ ܗܘܘ ܠܗܘܢ ܠܘܬ ܒܝܟܪܝܘܣ ܘܡܒܙܚ ܗܘܐ ܘܡܫܬܢܕ ܒܗܘܢ

95. Maccabees 1 A 9:27

    ܘܗܘܐ ܐܘܠܨܢܐ ܪܒܐ ܠܐܝܣܪܐܝܠ ܕܠܐ ܗܘܐ ܐܟܘܬܗ ܡܢ ܝܘܡܐ ܕܠܐ ܐܬܚܙܝ ܢܒܝܐ ܒܝܢܬܗܘܢ

96. Maccabees 1 A 9:28

    ܘܐܬܟܢܫܘ ܟܠܗܘܢ ܪ̈ܚܡܘܗܝ ܕܝܗܘܕܐ ܘܐܡܪܘ ܠܝܘܢܬܢ

97. Maccabees 1 A 9:29

    ܡܢ ܝܘܡܐ ܕܡܝܬ ܝܗܘܕܐ ܐܚܘܟ ܠܐ ܐܝܬ ܓܒܪܐ ܕܕܡܐ ܠܗ ܕܢܦܘܩ ܠܘܩܒܠ ܒ̈ܥܠܕܒܒܝܢ ܘܠܘܩܒܠ ܒܝܟܪܝܘܣ ܘܠܘܩܒܠ ܟܠܗܘܢ ܐܝܠܝܢ ܕܡܬܟܬܫܝܢ ܥܡܢ ܘܣܢܝܢ ܠܢ ܡܢ ܒܢ̈ܝ ܥܡܢ

98. Maccabees 1 A 9:30

    ܗܫܐ ܒܟ ܡܨܛܒܝܢ ܐܢܚܢܢ ܝܘܡܢܐ ܕܬܗܘܐ ܠܢ ܪܫܐ ܘܡܕܒܪܢܐ ܠܡܩܪܒܘ ܩܪ̈ܒܝܢ

99. Maccabees 1 A 9:31

    ܘܩܒܠ ܝܘܢܬܢ ܒܗܘ ܙܒܢܐ ܕܢܗܘܐ ܡܕܒܪܢܐ ܘܩܡ ܚܠܦ ܝܗܘܕܐ ܐܚܘܗܝ

100. Maccabees 1 A 9:32

     ܘܝܕܥ ܒܝܟܪܝܘܣ ܘܨܒܐ ܗܘܐ ܕܢܩܛܠܝܘܗܝ

← Previous · Next → — showing 401–500 of 836

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.