← All works

Peshitta Maccabees 1 A

Peshitta (Syriac Old Testament) · 836 sections

1. Maccabees 1 A 5:46

   ܘܐܬܐ ܥܕܡܐ ܠܥܘܦܪܐ ܘܗܝ ܡܕܝܢܬܐ ܗܝ ܪܒܬܐ ܕܝܬܒܐ ܥܠ ܐܘܪܚܐ ܘܥܫܝܢܐ ܣܓܝ ܘܠܝܬ ܠܡܣܛܐ ܡܢܗ ܠܐ ܠܝܡܝܢܐ ܐܦܠܐ ܠܣܡܠܐ ܐܠܐ ܐܢ ܠܡܥܒܪ ܒܓܘܗ

2. Maccabees 1 A 5:47

   ܘܐܚܕܘ ܒܐ̈ܦܝܗܘܢ ܥܡܘܪ̈ܝܗ ܕܩܪܝܬܐ ܘܣܟܪܘ ܬܪ̈ܥܐ ܒܟܐ̈ܦܐ

3. Maccabees 1 A 5:48

   ܘܫܕܪ ܠܘܬܗܘܢ ܝܗܘܕܐ ܒܡ̈ܠܐ ܕܫܠܡܐ ܘܐܡܪ ܠܗܘܢ ܐܥܒܪ ܒܐܪܥܟܘܢ ܘܐܙܠ ܠܐܪܥܢ ܘܐܢܫ ܠܐ ܢܒܐܫ ܠܟܘܢ ܐܠܐ ܒܠܚܘܕ ܒܪ̈ܓܠܝܢ ܢܥܒܪ ܘܠܐ ܨܒܘ ܕܢܦܬܚܘܢ ܠܗܘܢ

4. Maccabees 1 A 5:49

   ܘܦܩܕ ܝܗܘܕܐ ܕܢܟܪܙܘܢ ܒܡܫܪܝܬܐ ܕܟܠܢܫ ܢܫܪܐ ܥܠ ܕܘܟܬܗ

5. Maccabees 1 A 5:50

   ܘܫܪܘ ܐܢܫܐ ܕܚܝܠܐ ܘܐܩܪܒܘ ܥܡ ܡܕܝܢܬܐ ܟܠܗ ܗܘ ܝܘܡܐ ܘܟܘܠܗ ܠܠܝܐ ܘܐܫܬܠܡܬ ܡܕܝܢܬܐ ܒܐܝ̈ܕܘܗܝ

6. Maccabees 1 A 5:51

   ܘܐܘܒܕ ܡܢܗ ܟܠ ܕܟܪܐ ܒܦܘܡܐ ܕܚܪܒܐ ܘܥܩܪܘܗ ܘܢܣܒܘ ܒܙܬܗ ܘܥܒܪܘ ܒܓܘ ܡܕܝܢܬܐ ܠܥܠ ܡܢ ܩ̈ܛܝܠܐ

7. Maccabees 1 A 5:52

   ܘܥܒܪܘ ܝܘܪܕܢܢ ܠܦܩܥܬܐ ܪܒܬܐ ܠܘܩܒܠ ܒܝܬ ܝܫܢ

8. Maccabees 1 A 5:53

   ܘܝܗܘܕܐ ܕܝܢ ܡܟܢܫ ܗܘܐ ܠܐܚܪ̈ܝܐ ܘܡܒܝܐ ܗܘܐ ܠܥܡܐ ܒܟܠܗ ܐܘܪܚܐ ܥܕܡܐ ܕܐܬܘ ܠܐܪܥܐ ܕܝܗܘܕ

9. Maccabees 1 A 5:54

   ܘܣܠܩܘ ܠܛܘܪܐ ܕܨܗܝܘܢ ܒܒܘܣܡܐ ܘܒܚܕܘܬܐ ܘܩܪܒܘ ܩܘܪ̈ܒܢܐ ܘܝܩ̈ܕܐ ܕܠܐ ܢܦܠ ܡܢܗܘܢ ܐܦܠܐ ܚܕ ܘܗܦܟܘ ܒܫܠܡܐ

10. Maccabees 1 A 5:55

    ܘܒܗܢܘܢ ܝܘܡ̈ܬܐ ܕܐܝܬܝܗܘܢ ܗܘܘ ܝܗܘܕܐ ܘܝܘܢܬܢ ܐܚܘܗܝ ܒܐܪܥܐ ܕܓܠܥܕ ܘܫܡܥܘܢ ܐܚܘܗܝ ܒܓܠܝܠܐ ܠܘܩܒܠ ܦܛܘܠܡܐܝܣ

11. Maccabees 1 A 5:56

    ܫܡܥ ܝܘܣܦ ܒܪ ܙܟܪܝܐ ܘܥܙܪܝܐ ܪ̈ܫܐ ܕܚܝ̈ܠܘܬܐ ܠܓܢܒܪܘܬܗ ܘܠܢܨܚ̈ܢܘܗܝ ܘܠܩܪ̈ܒܘܗܝ ܕܝܗܘܕܐ

12. Maccabees 1 A 5:57

    ܘܐܡܪܘ. ܢܥܒܕ ܠܢ ܐܦ ܐܢܚܢܢ ܫܡܐ ܘܢܐܙܠ ܘܢܩܪܒ ܥܡ ܥܡ̈ܡܐ ܕܚܕܪܝܢ

13. Maccabees 1 A 5:58

    ܘܦܩܕܘ ܠܚܝܠܐ ܕܥܡܗܘܢ ܘܐܙܠܘ ܠܝܡܢܝܢ

14. Maccabees 1 A 5:59

    ܘܢܦܩ ܓܘܪܓܝܐ ܡܢ ܡܕܝܢܬܐ ܘܓܒܪ̈ܐ ܕܥܡܗ ܠܘܩܒܠܗܘܢ ܠܩܪܒܐ

15. Maccabees 1 A 5:60

    ܘܐܙܕܟܝܘ ܝܘܣܦ ܘܥܙܪܝܐ ܘܪܕܦܘ ܒܬܪܗܘܢ ܥܕܡܐ ܠܬܚܘܡܐ ܕܐܕܘܡ ܘܢܦܠܘ ܒܗܘ ܝܘܡܐ ܡܢ ܥܡܐ ܕܐܝܣܪܐܝܠ ܐܝܟ ܬܪ̈ܝܢ ܐ̈ܠܦܝܢ ܓܒܪ̈ܝܢ

16. Maccabees 1 A 5:61

    ܘܗܘܐ ܬܒܪܐ ܪܒܐ ܒܐܝܣܪܝܠ ܥܠ ܕܠܐ ܐܫܬܡܥܘ ܠܝܗܘܕܐ ܘܠܐܚ̈ܘܗܝ ܕܨܒܝܢ ܗܘܘ ܐܦ ܗܢܘܢ ܕܢܥܒܕܘܢ ܠܗܘܢ ܫܡܐ ܘܢܨܚܢܐ

17. Maccabees 1 A 5:62

    ܗܢܘܢ ܕܝܢ ܠܐ ܐܝܬܝܗܘܢ ܗܘܘ ܡܢ ܙܪܥܐ ܕܗܢܘܢ ܓܒܪ̈ܐ ܕܒܐ̈ܝܕܝܗܘܢ ܥܒܕ ܐܠܗܐ ܦܘܪܩܢܐ ܠܐܝܣܪܝܠ

18. Maccabees 1 A 5:63

    ܘܝܗܘܕܐ ܕܝܢ ܘܐ̈ܚܘܗܝ ܐܫܬܒܚܘ ܝܬܝܪܐܝܬ ܠܥܝܢ ܟܠܗ ܐܝܣܪܝܠ ܘܒܝܢܬ ܟܠܗܘܢ ܥܡ̈ܡܐ ܘܟܠ ܐܝܟܐ ܕܡܫܬܡܥ ܗܘܐ ܫܡܥܗܘܢ

19. Maccabees 1 A 5:64

    ܡܬܟܢܫܝܢ ܗܘܘ ܘܐܬܝܢ ܡܫܒܚܝܢ ܠܗܘܢ

20. Maccabees 1 A 5:65

    ܘܢܦܩ ܝܗܘܕܐ ܘܐܚ̈ܘܗܝ ܘܡܩܪܒܝܢ ܗܘܘ ܥܡ ܒܢ̈ܝ ܥܣܘ ܒܐܪܥܐ ܕܬܝܡܢܐ ܘܡܚܐܘܗ ܠܚܒܪܘܢ ܘܠܒܢ̈ܬܗ ܘܣܚܦܘ ܚ̈ܣܢܝܗ ܘܡܓ̈ܕܠܝܗ ܐܘܩܕܘ ܟܕ ܚܕܪ̈ܝܢ ܘܫܩܠ ܝܗܘܕܐ ܡܢ ܬܡܢ ܕܢܐܙܠ ܠܐܪܥܐ ܕܦܠܫ̈ܬܝܐ

21. Maccabees 1 A 5:66

    ܘܥܒܪ ܗܘܐ ܒܫܡܪܝܢ

22. Maccabees 1 A 5:67

    ܘܒܗܘ ܝܘܡܐ ܢܦܠܘ ܟܗ̈ܢܐ ܒܩܪܒܐ ܕܨܒܘ ܕܢܥܒܕܘܢ ܠܗܘܢ ܢܨܚܢܐ ܘܢܦܩܘ ܠܩܪܒܐ ܕܠܐ ܒܡܠܟܐ

23. Maccabees 1 A 5:68

    ܘܐܪܟܢ ܝܗܘܕܐ ܠܙܘܛܘܣ ܠܐܪܥܐ ܕܦܠܫ̈ܬܝ̈ܐ ܘܣܚܦܘ ܥܠܘ̈ܬܗܘܢ ܘܓ̈ܠܝܦܐ ܕܦܬܟܪ̈ܝܗܘܢ ܐܘܩܕܘ ܒܢܘܪܐ ܘܒܙܘ ܒܙܬܗܝܢ ܕܡܕܝ̈ܢܬܐ ܘܗܦܟ ܠܐܪܥܐ ܕܝܗܘܕ

24. Maccabees 1 A 6:1

    ܐܢܛܝܟܘܣ ܕܝܢ ܡܠܟܐ ܡܗܠܟ ܗܘܐ ܒܐܪ̈ܥܬܐ ܥܠܝ̈ܬܐ ܘܫܡܥ ܕܐܝܬ ܒܦܪܣ ܥܝܠܡ ܡܕܝܢܬܐ ܫܒܝܚܬܐ ܒܥܘܬܪܐ ܕܕܗܒܐ ܘܕܣܐܡܐ

25. Maccabees 1 A 6:2

    ܘܗܝܟܠܐ ܕܒܝܬ ܦܬܟܪ̈ܝܗ ܥܬܝܪ ܣܓܝ ܘܬܡܢ ܐܝܬ ܣܢܘܪ̈ܬܐ ܕܕܗܒܐ ܘܫܪ̈ܝܢܐ ܘܡܐ̈ܢܝ ܙܝܢܐ ܗܠܝܢ ܕܫܒܩ ܗܘܐ ܬܡܢ ܐܠܟܣܢܕܪܘܣ ܒܪ ܦܝܠܝܦܘܣ ܡܠܟܐ ܡܩܕܘܢܝܐ ܗܘ ܕܗܘ ܗܘܐ ܠܘܩܕܡ ܡܠܟܐ ܕܝܘ̈ܢܝܐ

26. Maccabees 1 A 6:3

    ܘܐܬܐ ܘܒܥܐ ܗܘܐ ܕܢܟܒܫܝܗ ܠܡܕܝܢܬܐ ܘܢܒܙܝܗ ܘܠܐ ܐܫܟܚ ܡܛܠ ܕܐܬܝܕܥܬ ܡܠܬܐ ܠܥܡܘܪ̈ܝܗ ܕܡܕܝܢܬܐ

27. Maccabees 1 A 6:4

    ܘܩܡܘ ܠܩܘܒܠܗ ܒܩܪܒܐ ܘܥܪܩ ܘܫܩܠ ܡܢ ܬܡܢ ܒܥܩܬܐ ܪܒܬܐ ܕܢܗܦܘܟ ܠܒܒܠ

28. Maccabees 1 A 6:5

    ܘܐܬܘ ܘܐܡܪܘ ܠܗ ܠܐܢܛܝܟܘܣ ܒܦܪܣ ܕܐܙܕܟܝ ܡܫܪ̈ܝܬܗ ܗܠܝܢ ܕܐܙܠ ܠܝܗܘܕ

29. Maccabees 1 A 6:6

    ܘܕܐܝܟܢܐ ܐܙܠ ܠܘܣܝܐ ܠܘܩܕܡ ܒܚܝܠܐ ܪܒܐ ܘܐܙܕܟܝ ܡܢܗܘܢ ܘܐܬܥܫܢܘ ܒܙܝܢܐ ܕܒܝܬ ܝܗܘܕܐ ܘܒܚܝܠܐ ܘܒܒܙܬܐ ܣܓܝܐܬܐ ܕܢܣܒܘ ܡܢ ܡܫܪ̈ܝܬܐ ܕܙܟܘ

30. Maccabees 1 A 6:7

    ܘܣܚܦܘܗ ܠܛܡܐܘܬܐ ܗܝ ܕܐܬܒܢܝܬ ܥܠ ܡܕܒܚܐ ܕܒܐܘܪܫܠܡ ܘܠܒܝܬ ܡܩܕܫܐ ܐܚܕܪܘܗܝ ܫܘܪ̈ܐ ܪ̈ܘܪܒܐ ܐܝܟ ܕܡܢ ܩܕܝܡ ܘܠܒܝܬ ܫܘܪ̈ܐ ܡܕܝܢܬܗܘܢ

31. Maccabees 1 A 6:8

    ܘܗܘܐ ܕܟܕ ܫܡܥ ܡܠܟܐ ܗܠܝܢ ܦܬܓܡ̈ܐ ܬܡܗ ܘܐܬܬܙܝܥ ܣܓܝ ܘܢܦܠ ܥܠ ܥܪܣܗ ܘܐܬܟܪܗ ܡܢ ܥܩܬܗ ܡܛܠ ܕܠܐ ܗܘܐ ܠܗ ܐܝܟ ܕܡܬܪܥܐ ܗܘܐ

32. Maccabees 1 A 6:9

    ܘܗܘܐ ܬܡܢ ܝܘܡ̈ܬܐ ܣܓ̈ܝܐܐ ܡܛܠ ܕܐܬܚܕܬܬ ܥܠܘܗܝ ܥܩܬܗ ܘܐܬܚܫܒ ܐܢܛܝܟܘܣ ܕܡܐܬ ܠܗ

33. Maccabees 1 A 6:10

    ܘܩܪܐ ܠܟܘܠܗܘܢ ܪ̈ܚܡܘܗܝ ܘܐܡܪ ܠܗܘܢ ܕܦܪܕܬ ܠܗ ܫܢܬܐ ܡܢ ܥܝ̈ܢܝ ܘܠܒܝ ܐܬܡܣܝ ܠܗ ܒܓܘܝ ܡܢ ܪܢܝܐ ܣܓܝܐܐ

34. Maccabees 1 A 6:11

    ܘܐܡܪܬ ܠܗ ܠܠܒܝ ܕܥܕܡܐ ܠܐܝܢܐ ܐܘܠܨܢܐ ܐܬܝܬ ܘܠܡܚܫܘܠܐ ܗܢܐ ܪܒܐ ܕܐܪܡܐ ܐܢܐ ܒܗ ܡܛܠ ܕܒܣܝܡ ܗܘܝܬ ܘܪܚܝܡ ܒܫܘܠܛܢܝ

35. Maccabees 1 A 6:12

    ܗܫܐ ܕܝܢ ܗܐ ܡܬܥܗܕ ܐܢܐ ܒܝܫ̈ܬܐ ܕܥܒܕܬ ܒܐܘܪܫܠܡ ܘܢܣܒܬ ܡܐ̈ܢܐ ܕܕܗܒܐ ܘܕܟܣܦܐ ܕܒܓܘܗ ܘܫܕܪܬ ܕܢܥܛܘܢ ܠܥܡܘܪ̈ܝܗ ܕܝܗܘܕܐ ܣܪܝܩܐܝܬ

36. Maccabees 1 A 6:13

    ܝܕܥܬ ܕܝܢ ܕܡܛܠ ܗܠܝܢ ܐ̈ܬܝ ܥܠܝ ܗܠܝܢ ܟܠܗܝܢ ܒܝܫ̈ܬܐ ܘܗܐ ܐܒܕ ܐܢܐ ܡܢ ܥܩܬܐ ܣܓܝܐܬܐ ܒܐܪܥܐ ܢܘܟܪܝܬܐ

37. Maccabees 1 A 6:14

    ܘܩܪܐ ܐܢܛܝܟܘܣ ܠܦܝܠܝܦܘܣ ܚܕ ܡܢ ܪ̈ܚܡܘܗܝ ܘܐܩܝܡܗ ܥܠ ܟܠܗ ܡܠܟܘܬܗ

38. Maccabees 1 A 6:15

    ܘܝܗܒ ܠܗ ܬܓܗ ܘܐܣܛܠܗ ܘܥܙܩܬܗ ܕܢܝܬܐ ܐܢܘܢ ܠܐܢܛܝܟܘܣ ܒܪܗ ܘܢܪܒܝܘܗܝ ܐܝܟ ܕܢܗܘܐ ܡܠܟܐ

39. Maccabees 1 A 6:16

    ܘܡܝܬ ܬܡܢ ܐܢܛܝܟܘܣ ܡܠܟܐ ܒܫܢܬ ܡܐܐ ܘܐܪܒܥܝܢ ܘܬܫܥ

40. Maccabees 1 A 6:17

    ܘܝܕܥ ܠܘܣܝܐ ܕܡܝܬ ܠܗ ܡܠܟܐ ܘܐܩܝܡ ܠܐܢܛܝܟܘܣ ܒܪܗ ܒܡܠܟܘܬܗ ܗܘ ܕܗܘ ܪܒܝܗ ܗܘܐ ܡܢ ܛܠܝܘܬܗ ܘܩܪܐ ܫܡܗ ܐܘܦܛܘܪ

41. Maccabees 1 A 6:18

    ܘܐܝܠܝܢ ܕܝܬܒܝܢ ܗܘܘ ܒܡܪܕܐ ܚܒܝܫܝܢ ܗܘܘ ܠܐܝܣܪܐܝܠ ܡܢ ܟܠ ܚܕܪ̈ܘܗܝ ܕܒܝܬ ܡܩܕܫܐ ܘܨܒܝܢ ܗܘܘ ܕܟܠ ܡܒܐܫܘ ܢܒܐܫܘܢ ܘܗܘܝܢ ܗܘܘ ܥܘܕܪܢܐ ܠܥܡ̈ܡܐ

42. Maccabees 1 A 6:19

    ܘܐܬܚܫܒ ܝܗܘܕܐ ܕܢܪܝܡ ܐܢܘܢ ܘܟܢܫ ܠܟܠܗ ܥܡܐ ܕܢܬܒܘܢ ܥܠܝܗܘܢ

43. Maccabees 1 A 6:20

    ܘܐܬܟܢܫܘ ܐܟܚܕܐ ܘܝܬܒܘ ܥܠܝܗܘܢ ܒܫܢܬ ܡܐܐ ܘܚܡܫܝܢ ܘܥܒܕܘ ܠܘܩܒܠܗܘܢ ܡܓ̈ܕܠܐ ܘܡܐܟܢܣ ܠܡܬܟܬܫܘ ܥܡܗܘܢ

44. Maccabees 1 A 6:21

    ܘܢܦܩܘ ܐܢܫܝܢ ܡܢܗܘܢ ܡܢ ܒܝܬ ܚܒܘܫܝܐ ܘܢܩܦܘ ܐܢܘܢ ܐܢܫܐ ܪ̈ܫܝܥܐ ܡܢ ܐܝܣܪܝܠ

45. Maccabees 1 A 6:22

    ܘܐܙܠܘ ܠܘܬ ܡܠܟܐ ܘܐܡܪܘ ܠܗ ܥܕܡܐ ܠܐܡܬܝ ܠܐ ܬܥܒܕ ܕܝܢܐ ܘܬܒܥܬܐ ܡܢ ܐ̈ܚܝܢ

46. Maccabees 1 A 6:23

    ܐܢܚܢܢ ܡܨܛܒܝܢ ܚܢܢ ܕܢܦܠܘܚ ܥܒܕܘܬܐ ܠܐܒܘܟ ܘܢܗܠܟ ܒܟܠܗܘܢ ܦܘܩ̈ܕܢܘܗܝ ܘܢܐܙܠ ܒܬܪ ܟܠܗܘܢ ܨܒܝ̈ܢܘܗܝ

47. Maccabees 1 A 6:24

    ܘܗܐ ܒܢ̈ܝ ܥܡܢ ܝܬܒܝܢ ܥܠ ܡܪܕܐ ܡܛܠܬܗ ܕܗܕܐ ܘܥܒܝܕܝܢܢ ܠܗܘܢ ܐܝܟ ܢܘܟܪ̈ܝܐ ܘܠܟܠ ܡܢܘ ܕܡܫܟܚܝܢ ܡܢܢ ܩܛܠܝܢ ܘܝܪܬܘܬܢ ܡܬܒܙܐ ܡܢܗܘܢ

48. Maccabees 1 A 6:25

    ܘܠܐ ܗܘܐ ܥܠܝܢ ܒܠܚܘܕ ܐܘܫܛܘ ܐܝ̈ܕܝܐ ܐܠܐ ܐܦ ܥܠ ܟܠܗܘܢ ܬܚܘ̈ܡܝܗܘܢ

49. Maccabees 1 A 6:26

    ܘܗܐ ܫܪܝܢ ܝܘܡܢܐ ܥܠ ܡܪܕܐ ܕܒܐܪܫܠܡ ܕܢܟܒܫܘܢܝܗܝ ܘܠܒܝܬ ܡܩܕܫܐ ܘܠܒܝܬ ܫܘܪ̈ܐ ܐܥܫܢܘ

50. Maccabees 1 A 6:27

    ܘܐܠܐ ܒܥܓܠ ܬܕܪܟܘܢ ܐܢܘܢ ܕܪ̈ܘܪܒܢ ܘܕܝܬܝܪ̈ܢ ܡܢ ܗܠܝܢ ܢܥܒܕܘܢ ܘܠܐ ܡܬܡܨܝܢ ܐܢܬܘܢ ܚܝܠܗܘܢ

51. Maccabees 1 A 6:28

    ܘܐܬܚܡܬ ܡܠܟܐ ܟܕ ܫܡܥ ܗܠܝܢ ܘܟܢܫ ܠܟܠܗܘܢ ܪ̈ܚܡܘܗܝ ܘܠܪ̈ܒܝ ܚܝܠܗ ܘܠܐܝܠܝܢ ܕܥܒܝܕܝܢ ܥܠ ܡܪ̈ܟܒܬܐ

52. Maccabees 1 A 6:29

    ܘܡܢ ܡ̈ܠܟܘܬܐ ܐܚܪ̈ܢܝܬܐ ܘܡܢ ܓܙܪ̈ܬܐ ܣܓܝܐ̈ܬܐ ܘܐܬܘ ܠܘܬܗ ܚܝ̈ܠܐ ܕܐܓܝܪܝܢ ܠܗ

53. Maccabees 1 A 6:30

    ܘܐܝܬܘܗܝ ܗܘܐ ܡܢܝܢܐ ܕܚܝܠܗ ܡܐܐ ܐ̈ܠܦܝܢ ܪ̈ܓܠܝܝܢ ܘܥܣܪܝܢ ܐ̈ܠܦܝܢ ܦܪ̈ܫܐ ܘܦܝ̈ܠܐ ܬܠܬܝܢ ܘܬܪ̈ܝܢ ܕܝܕܥܝܢ ܩܪܒܐ

54. Maccabees 1 A 6:31

    ܘܐܬܘ ܥܠ ܐܕܘܡ ܘܫܪܘ ܥܠ ܒܝܬ ܫܘܪ̈ܐ ܘܐܩܪܒܘ ܝܘ̈ܡܬܐ ܣܓ̈ܝܐܐ ܘܥܒܕܘ ܡܐ̈ܟܢܘܣ ܘܢܦܩܘ ܘܐܘܩܕܘ ܐܢܝܢ ܒܢܘܪܐ ܘܐܬܟܬܫܘ ܓܢܒܪܐܝܬ

55. Maccabees 1 A 6:32

    ܘܫܩܠ ܝܗܘܕܐ ܡܢ ܒܝܬ ܡܪܕܐ ܘܫܪܐ ܥܠ ܓܢܒ ܒܝܬ ܙܟܪܝܐ ܠܘܩܒܠ ܡܫܪܝܬܗ ܕܡܠܟܐ

56. Maccabees 1 A 6:33

    ܘܩܕܡ ܡܠܟܐ ܒܨܦܪܐ ܘܕܒܪܗ ܠܡܫܪܝܬܗ ܒܚܐܦܐ ܒܐܘܪܚܐ ܕܒܝܬ ܙܟܪܝܐ ܘܐܬܥܬܕܘ ܚܝ̈ܠܐ ܠܩܪܒܐ ܘܩܪܘ ܒܩܪ̈ܢܬܐ

57. Maccabees 1 A 6:34

    ܘܠܦ̈ܝܠܐ ܚܘܝܘ ܐܢܘܢ ܕܡܐ ܕܥܢ̈ܒܐ ܘܕܬܘ̈ܬܐ ܘܛܝܒܘ ܐܢܘܢ ܠܩܪܒܐ

58. Maccabees 1 A 6:35

    ܘܦܠܓܘ ܐܢܘܢ ܒ̈ܦܠܓܐ ܘܐܫܠܡܘ ܠܟܠ ܚܕ ܚܕ ܡܢ ܦܝ̈ܠܐ ܐܠܦ ܓܒܪ̈ܝܢ ܕܡܠܒܫܝܢ ܒܫܪ̈ܝܢܐ ܕܦܪܙܠܐ ܘܣܝܡܝܢ ܣܢܘܪ̈ܬܐ ܕܢܚܫܐ ܒܪ̈ܫܝܗܘܢ ܘܚܡܫ ܡܐܐ ܦܪ̈ܫܝܢ ܕܒܝܩܝܢ ܠܚܕ ܚܕ ܡܢ ܦܝ̈ܠܐ ܕܡܓܒܝܢ

59. Maccabees 1 A 6:36

    ܗܠܝܢ ܡܢ ܩܕܡ ܙܒܢܐ ܘܠܐܝܟܐ ܕܐܙܠ ܗܘܐ ܚܕ ܡܢܗܘܢ ܬܡܢ ܗܘܝܢ ܗܘܘ ܐܦ ܗܠܝܢ ܘܠܐ ܡܪܚܩܝܢ ܗܘܘ ܡܢ ܠܘܬܗ

60. Maccabees 1 A 6:37

    ܘܐܝܬ ܗܘܐ ܠܥܠ ܡܢܗܘܢ ܡܓ̈ܕܠܐ ܕܩܝܣܐ ܥܫ̈ܝܢܐ ܕܡܛܠܠܝܢ ܗܘܘ ܥܠ ܚܕ ܚܕ ܡܢ ܦܝ̈ܠܐ ܘܡܚܙܩܝܢ ܗܘܘ ܒܡܐ̈ܟܢܘܣ ܘܥܠ ܟܠ ܚܕ ܚܕ ܡܢܗܘܢ ܓܒܪ̈ܐ ܕܚܝܠܐ ܬܠܬܝܢ ܗܢܘܢ ܕܡܩܪܒܝܢ ܗܘܘ ܥܠܘܗܝ ܘܡܕܒܪܢܗ

61. Maccabees 1 A 6:38

    ܘܠܫܪܟܐ ܕܦܪ̈ܫܐ ܐܩܝܡܘ ܡܟܐ ܘܡܟܐ ܡܢ ܬܪ̈ܝܗܘܢ ܓܒ̈ܝܗ ܕܡܫܪܝܬܐ ܟܕ ܡܩܪܒܝܢ ܘܡܚܘܝܢ ܚܙܘܐ ܕܙܝܢܗܘܢ ܒܓܘ ܦ̈ܠܓܐ

62. Maccabees 1 A 6:39

    ܘܗܘܐ ܕܝܢ ܕܟܕ ܕܢܚ ܘܨܡܚ ܫܡܫܐ ܥܠ ܡܓ̈ܢܐ ܕܕܗܒܐ ܘܕܢܚܫܐ ܡܢܗܪܝܢ ܗܘܘ ܘܡܙܗܪܝܢ ܛܘܪ̈ܐ ܡܢܗܝܢ ܐܝܟ ܠܡ̈ܦܝܕܐ ܕܢܘܪܐ

63. Maccabees 1 A 6:40

    ܘܡܢܗ ܡܢ ܡܫܪܝܬܗ ܐܣܬܕܪܬ ܘܩܡܬ ܥܠ ܛܘܪ̈ܐ ܪ̈ܡܐ ܘܡܢܗ ܥܠ ܛܘܪ̈ܐ ܙܥܘܪ̈ܐ ܘܐܬܝܢ ܗܘܘ ܬܟܝܠܐܝܬ ܒܣܕܪ̈ܝܗܘܢ

64. Maccabees 1 A 6:41

    ܘܡܬܙܝܥܝܢ ܗܘܘ ܟܠܗܘܢ ܐܝܠܝܢ ܕܫܡܥܝܢ ܗܘܘ ܩܠܐ ܕܚܝܠܗܘܢ ܘܗܠܟܬܐ ܕܣܘܓܐܗܘܢ ܘܢܩܫܐ ܕܙܝܢܗܘܢ ܐܝܬܝܗ ܗܘܬ ܓܝܪ ܡܫܪܝܬܐ ܪܒܐ ܘܥܫܝܢܐ ܣܓܝ

65. Maccabees 1 A 6:42

    ܘܩܪܒ ܝܗܘܕܐ ܘܡܫܪܝܬܗ ܠܩܪܒܐ ܘܢܦܠܘ ܡܢ ܡܫܪܝܬܗ ܕܡܠܟܐ ܫܬܡܐܐ ܓܒܪ̈ܝܢ

66. Maccabees 1 A 6:43

    ܘܚܙܐ ܐܠܝܥܙܪ ܕܡܬܩܪܐ ܚܘܪܢ ܠܚܕ ܡܢ ܦܝ̈ܠܐ ܕܡܚܙܩ ܒܙܝܢܐ ܕܡܠܟܘܬܐ ܘܡܝܬܪ ܗܘܐ ܡܢ ܟܠܗܘܢ ܦܝ̈ܠܐ ܘܐܬܚܙܝ ܕܒܗ ܗܘ ܡܠܟܐ

67. Maccabees 1 A 6:44

    ܘܝܗܒ ܢܦܫܗ ܕܢܦܪܘܩ ܠܥܡܗ ܘܕܢܥܒܕ ܠܗ ܫܡܐ ܕܠܥܠܡ

68. Maccabees 1 A 6:45

    ܘܪܗܛ ܥܠܘܗܝ ܒܚܝܠܐ ܘܒܠܒܝܒܘܬܐ ܒܝܢܬ ܡܫܪ̈ܝܬܐ ܘܦ̈ܠܓܐ ܘܚܪܒ ܗܘܐ ܠܝܡܝܢܗ ܘܠܣܡܠܗ ܘܥܪܩܝܢ ܗܘܘ ܡܢ ܩܕܡܘܗܝ ܠܟܐ ܘܠܟܐ

69. Maccabees 1 A 6:46

    ܘܥܠ ܬܚܘܬܘܗܝ ܕܦܝܠܐ ܘܡܚܝܗܝ ܒܣܝܦܐ ܒܟܪܣܗ ܘܩܛܠܗ ܘܢܦܠ ܠܥܠ ܡܢܗ ܥܠ ܐܪܥܐ ܘܡܝܬ ܬܡܢ

70. Maccabees 1 A 6:47

    ܘܚܙܐ ܝܗܘܕܐ ܥܘܫܢܗ ܕܡܠܟܘܬܐ ܘܛܘܝܒܗ ܕܚܝܠܐ ܘܐܪܟܢ ܡܢܗܘܢ

71. Maccabees 1 A 6:48

    ܘܡܢ ܡܫܪܝܬܗ ܕܡܠܟܐ ܣܠܩܝܢ ܗܘܘ ܠܘܩܒܠܗܘܢ ܠܐܘܪܫܠܡ ܘܫܪܐ ܡܠܟܐ ܒܝܗܘܕ ܘܒܛܘܪܐ ܕܨܗܝܘܢ

72. Maccabees 1 A 6:49

    ܘܥܒܕ ܫܠܡܐ ܥܡ ܐܝܠܝܢ ܕܐܝܬ ܗܘܘ ܒܒܝܬ ܫܘܪ̈ܐ ܘܢܦܩܘ ܡܢ ܡܕܝܢܬܐ ܡܛܠ ܕܠܝܬ ܗܘܐ ܠܗܘܢ ܐܣܢܐ ܕܢܬܚܒܫܘܢ ܒܓܘܗ ܡܛܠ ܕܫܒܬܐ ܗܘܬ ܕܐܪܥܐ

73. Maccabees 1 A 6:50

    ܘܟܒܫܗ ܡܠܟܐ ܠܒܝܬ ܫܘܪ̈ܐ ܘܐܩܝܡ ܬܡܢ ܡܛܪܬܐ ܕܢܗܘܘܢ ܢܛܪܝܢ ܠܗ

74. Maccabees 1 A 6:51

    ܘܫܪܐ ܥܠ ܒܝܬ ܡܩܕܫܐ ܘܐܬܟܬܫ ܥܠܘܗܝ ܝܘܡ̈ܬܐ ܣܓ̈ܝܐܐ ܘܐܩܝܡܘ ܬܡܢ ܡܓ̈ܕܠܐ ܘܡܐܟܢܘܣ ܠܡܩܪܒܘ ܥܠܝܗܘܢ ܘܠܡܫܕܐ ܒܒܠܣܛܘܣ ܓܐܪ̈ܐ ܘܟܐ̈ܦܐ ܘܢܘܪܐ

75. Maccabees 1 A 6:52

    ܘܥܒܕܘ ܐܦ ܗܢܘܢ ܡܐ̈ܟܢܘܣ ܠܘܩܒܠ ܡܐܟܢܘ̈ܬܗܘܢ ܘܐܩܪܒܘ ܝܘ̈ܡܬܐ ܣ̈ܓܝܐܐ

76. Maccabees 1 A 6:53

    ܐܣܢܐ ܕܝܢ ܠܝܬ ܗܘܐ ܒܝܬ ܡܩܕܫܐ ܡܛܠ ܕܫܢܬܐ ܗܘܬ ܫܒܝܥܝܬܐ ܘܐܝܠܝܢ ܕܡܬܦܨܝܢ ܗܘܘ ܡܢ ܒܝܬ ܥܡ̈ܡܐ ܐܟܠܝܢ ܗܘܘ ܠܗ ܠܫܪܟܐ ܕܣܝܒܪܬܗܘܢ

77. Maccabees 1 A 6:54

    ܘܐܫܬܚܪܘ ܒܝܬ ܡܩܕܫܐ ܐܢܫܐ ܙܥܘܪ̈ܐ ܡܛܠ ܕܥܫܢ ܥܠܝܗܘܢ ܟܦܢܐ ܘܐܬܒܕܪܘ ܐܢܫ ܠܐܬܪܗ

78. Maccabees 1 A 6:55

    ܘܫܡܥ ܠܘܣܝܐ ܕܦܝܠܝܦܘܣ ܗܘ ܕܐܩܝܡܗ ܗܘܐ ܐܢܛܝܟܘܣ ܥܕ ܗܘ ܚܝ ܕܢܪܒܐ ܠܒܪܗ ܘܢܡܠܟܝܘܗܝ

79. Maccabees 1 A 6:56

    ܗܦܟ ܡܢ ܦܪܣ ܘܡܕܝ ܘܥܡܗ ܟܠܗ ܚܝܠܐ ܕܐܙܠ ܗܘܐ ܥܡ ܡܠܟܐ ܕܨܒܐ ܕܢܐܚܘܕ ܨܒ̈ܘܬܐ ܕܡܠܟܘܬܐ

80. Maccabees 1 A 6:57

    ܘܡܣܬܪܗܒ ܗܘܐ ܕܢܐܙܠ ܘܐܡܪ ܠܘܣܝܐ ܠܡܠܟܐ ܘܠܡܕܒܪ̈ܢܘܗܝ ܕܚܝܠܐ ܘܠܪ̈ܘܪܒܢܐ ܕܥܡܐ ܡܬܓܡܪܝܢܢ ܗܪܟܐ ܘܣܝܒܪܬܐ ܙܥܘܪܝܐ ܗܝ ܠܢ ܘܐܬܪܐ ܗܢܐ ܕܫܪܝܢ ܐܢܚܢܢ ܥܠܘܗܝ ܥܫܝܢ ܗܘ ܚܣܢܗ ܣܓܝ ܘܨܒ̈ܘܬܐ ܕܡܠܟܘܬܐ ܣܝܡܢ ܥܠܝܢ

81. Maccabees 1 A 6:58

    ܗܫܐ ܢܬܠ ܝܡܝܢܐ ܠܗܠܝܢ ܐܢܫܐ ܘܢܥܒܕ ܥܡܗܘܢ ܫܠܡܐ ܘܥܡ ܟܠܗ ܥܡܗܘܢ

82. Maccabees 1 A 6:59

    ܘܢܩܝܡ ܠܗܘܢ ܕܢܗܠܟܘܢ ܒܢܡܘ̈ܣܝܗܘܢ ܐܝܟ ܕܡܢ ܩܕܝܡ ܡܛܠ ܓܝܪ ܕܒܛܠܢ ܢܡܘ̈ܣܝܗܘܢ ܐܬܚܡܬܘ ܘܪܓܙܘ ܘܥܒܕܘ ܗܠܝܢ ܟܠܗܝܢ

83. Maccabees 1 A 6:60

    ܘܫܦܪܬ ܡܠܬܐ ܩܕܡ ܡܠܟܐ ܘܪ̈ܘܪܒܢܘܗܝ ܘܫܕܪ ܠܘܬܗܘܢ ܕܢܥܒܕ ܥܡܗܘܢ ܫܠܡܐ ܘܩܒܠܘ ܡܢܗܘܢ

84. Maccabees 1 A 6:61

    ܘܐܝܡܐ ܠܗܘܢ ܡܠܟܐ ܘܪ̈ܘܪܒܢܘܗܝ ܘܥܠ ܗܠܝܢ ܢܦܩܘ ܡܢ ܚܣܢܗܘܢ

85. Maccabees 1 A 6:62

    ܘܥܠ ܡܠܟܐ ܠܛܘܪܐ ܕܨܗܝܘܢ ܘܚܙܐ ܚܣܢܗ ܕܐܬܪܐ ܘܗܦܟ ܒܡܘ̈ܡܬܐ ܕܐܝܡܐ ܘܦܩܕ ܕܢܣܬܪܘܢܝܗܝ ܫܘܪܗ ܟܕ ܚܕܪ

86. Maccabees 1 A 6:63

    ܘܫܩܠ ܡܢ ܬܡܢ ܘܗܦܟ ܚܦܝܛܐܝܬ ܠܐܢܛܝܘܟܝܐ ܘܐܫܟܚܗ ܠܦܝܠܝܦܘܣ ܕܐܚܕܗ ܠܡܕܝܢܬܐ ܘܐܫܬܠܛ ܥܠܝܗ ܘܐܩܪܒ ܥܡܗ ܘܢܣܒܗ ܠܡܕܝܢܬܐ ܡܢܗ ܒܩܛܝܪܐ

87. Maccabees 1 A 7:1

    ܒܫܢܬ ܡܐܐ ܘܚܡܫܝܢ ܘܚܕܐ ܢܦܩ ܕܡܛܪܝܘܣ ܒܪ ܣܠܘܩܘܣ ܡܢ ܪܗܘܡܐ ܘܣܠܩ ܒܐܢܫܐ ܙܥܘܪ̈ܐ ܥܠ ܡܕܝܢ̈ܬܐ ܕܥܠ ܣܦܪ̈ܝ ܝܡܐ ܘܐܡܠܟ ܬܡܢ

88. Maccabees 1 A 7:2

    ܘܗܘܐ ܕܟܕ ܥܐܠ ܗܘܐ ܠܒܝܬ ܡܠܟܘܬܐ ܕܐܒܗ̈ܘܗܝ ܐܚܕܘ ܚܝ̈ܠܐ ܠܐܢܛܝܟܘܣ ܘܠܠܘܣܝܐ ܕܢܣܩܘܢ ܐܢܘܢ ܠܘܬܗ

89. Maccabees 1 A 7:3

    ܘܐܬܝܕܥܬ ܠܗ ܨܒܘܬܐ ܘܐܡܪ ܠܐ ܬܚܘܘܢܢܝ ܐ̈ܦܝܗܘܢ

90. Maccabees 1 A 7:4

    ܘܩܛܠܘ ܐܢܘܢ ܚ̈ܝܠܐ ܘܝܬܒ ܕܡܛܪܝܘܣ ܥܠ ܟܘܪܣܝܐ ܕܡܠܟܘܬܗ

91. Maccabees 1 A 7:5

    ܘܐܬܘ ܠܘܬܗ ܟܠܗܘܢ ܓܒܪ̈ܐ ܥܘ̈ܠܐ ܘܪ̈ܫܝܥܐ ܡܢ ܐܝܣܪܐܝܠ ܘܐܠܩܝܡܘܣ ܗܘ ܗܘܐ ܡܕܒܪܢܗܘܢ ܕܨܒܐ ܗܘܐ ܕܢܗܘܐ ܪܒ ܟܗ̈ܢܐ

92. Maccabees 1 A 7:6

    ܘܐܟܠܘ ܩܪ̈ܨܘܗܝ ܕܥܡܐ ܩܕܡ ܡܠܟܐ ܘܐܡܪܘ ܐܘܒܕܘ ܝܗܘܕܐ ܘܐܚ̈ܘܗܝ ܠܪ̈ܚܡܝܟ ܘܠܢ ܒܕܪܘܢ ܡܢ ܐܪܥܢ

93. Maccabees 1 A 7:7

    ܗܫܐ ܫܕܪ ܓܒܪܐ ܐܝܢܐ ܕܡܗܝܡܢ ܠܟ ܘܢܐܙܠ ܘܢܚܙܐ ܟܠܗ ܐܒܕܢܐ ܕܥܒܕܘ ܒܢ ܘܒܐܪܥܗ ܕܡܠܟܐ ܕܐܝܟܢܐ ܫܢܩ ܐܢܘܢ ܘܠܟܠܗܘܢ ܡܥܕܪ̈ܢܝܗܘܢ

94. Maccabees 1 A 7:8

    ܘܓܒܐ ܡܠܟܐ ܠܒܝܟܪܝܘܣ ܪܚܡܗ ܕܡܫܠܛ ܗܘܐ ܒܗܘ ܥܒܪܗ ܕܢܗܪܐ ܘܪܒܐ ܗܘܐ ܘܡܗܝܡܢܐ ܒܡܠܟܘܬܗ

95. Maccabees 1 A 7:9

    ܘܫܕܪܗ ܘܠܐܠܩܝܡܘܣ ܪܫܝܥܐ ܘܐܩܝܡ ܠܗ ܟܗܢܘܬܐ ܘܦܩܕܗ ܕܢܥܒܕ ܦܘܪܥܢܐ ܒܒ̈ܢܝ ܐܝܣܪܐܝܠ

96. Maccabees 1 A 7:10

    ܘܫܩܠܘ ܘܐܬܘ ܠܐܪܥܐ ܕܝܗܘܕܐ ܒܚܝܠܐ ܣܓܝܐܐ ܘܫܕܪܘ ܡܠܐ̈ܟܐ ܠܘܬ ܝܗܘܕܐ ܘܐܚ̈ܘܗܝ ܒܡ̈ܠܐ ܕܫܠܡܐ ܒܢܟܠܐ

97. Maccabees 1 A 7:11

    ܘܚܪܘ ܘܐܣܬܟܠܘ ܒܡ̈ܠܝܗܘܢ ܚܙܘ ܓܝܪ ܕܐܬܘ ܠܘܬܗܘܢ ܒܚܝܠܐ ܪܒܐ

98. Maccabees 1 A 7:12

    ܘܐܬܟܢܫܘ ܠܘܬ ܐܠܩܝܡܘܣ ܘܒܝܟܪܝܘܣ ܟܢܘܫܬܐ ܕܣܦܪ̈ܐ ܠܡܦܩܕ ܘܠܡܒܥܐ ܟܐܢܘܬܐ

99. Maccabees 1 A 7:13

    ܘܩܕܡ̈ܝܐ ܐܝܬܝܗܘܢ ܗܘܘ ܡܫܒ̈ܚܢܐ ܒܒ̈ܢܝ ܐܝܣܪܝܠ ܘܒܥܝܢ ܗܘܘ ܡܢܗܘܢ ܫܠܡܐ

100. Maccabees 1 A 7:14

     ܐܡܪܘ ܓܝܪ ܕܓܒܪܐ ܟܗܢܐ ܐܬܐ ܡܢ ܙܪܥܗ ܕܐܗܪܘܢ ܥܡ ܚܝܠܐ ܘܠܐ ܡܒܐܫܝܢ ܠܢ

← Previous · Next → — showing 301–400 of 836

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.