← All works

Peshitta Maccabees 1 A

Peshitta (Syriac Old Testament) · 836 sections

1. Maccabees 1 A 4:7

   ܘܚܙܘ ܡܫܪܝܬܐ ܕܥܡ̈ܡܐ ܡܫܪܝܬܐ ܥܫܝܢܬܐ ܟܕ ܡܚܙܩܐ ܒܙܝܢܐ ܘܚܕܝܪ̈ܝܢ ܠܗ ܦܪ̈ܫܐ ܘܗܢܘܢ ܡܠܦܝܢ ܗܘܘ ܩܪܒܐ

2. Maccabees 1 A 4:8

   ܘܐܡܪ ܝܗܘܕܐ ܠܓܒܪ̈ܐ ܕܥܡܗ ܠܐ ܬܕܚܠܘܢ ܡܢ ܣܘܓܐܗܘܢ ܘܡܢ ܛܘܝܒܗܘܢ ܠܐ ܬܬܪܗܒܘܢ

3. Maccabees 1 A 4:9

   ܐܬܕܟܪܘ ܐܝܟܢܐ ܐܬܦܪܩܘ ܐܒ̈ܗܝܢ ܒܝܡܐ ܕܣܘܦ ܟܕ ܪ̈ܕܦ ܗܘܐ ܠܗܘܢ ܦܪܥܘܢ ܒܚܝܠܐ ܪܒܐ

4. Maccabees 1 A 4:10

   ܘܗܫܐ ܢܓܥܐ ܠܘܬ ܥܡܘܪܐ ܕܫܡܝܐ ܕܠܡܐ ܢܪܚܡ ܥܠܝܢ ܘܢܬܕܟܪ ܡܪܝܐ ܕܝܬܩܐ ܕܐ̈ܒܗܝܢ ܘܢܫܚܩܝܗ ܠܗܕܐ ܡܫܪܝܬܐ ܩܕܡܝܢ ܝܘܡܢܐ

5. Maccabees 1 A 4:11

   ܘܢܕܥܘܢ ܟܠܗܘܢ ܥܡ̈ܡܐ ܕܐܝܬܘܗܝ ܡܢ ܕܦܪܩ ܘܡܦܨܐ ܠܐܝܣܪܝܠ

6. Maccabees 1 A 4:12

   ܘܫܩܠܘ ܦܠܫ̈ܬܝܐ ܥܝ̈ܢܝܗܘܢ ܘܚܙܘ ܐܢܘܢ ܕܐܬܝܢ ܠܐܘܪܥܗܘܢ

7. Maccabees 1 A 4:13

   ܘܢܦܩܘ ܡܢ ܡܫܪ̈ܝܬܗܘܢ ܠܩܪܒܐ ܘܩܪܘ ܒܩܪ̈ܢܬܐ ܕܒܝܬ ܝܗܘܕܐ

8. Maccabees 1 A 4:14

   ܘܝܗܒܘ ܥܠܝܗܘܢ ܘܐܬܬܒܪܘ ܥܡ̈ܡܐ ܘܥܪܩܘ ܠܦܩܥܬܐ

9. Maccabees 1 A 4:15

   ܫܪܟܐ ܕܝܢ ܕܐܫܬܚܪܘ ܢܦܠܘ ܒܚܪܒܐ ܘܪܕܦܘ ܐܢܘܢ ܥܕܡܐ ܠܓܙܪ ܘܥܕܡܐ ܠܦܩܥܬܐ ܕܐܕܘܡ ܘܥܕܡܐ ܠܥܐܙܐ ܘܥܕܡܐ ܠܝܡܢܝܢ ܘܢܦܠܘ ܡܢܗܘܢ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ

10. Maccabees 1 A 4:16

    ܘܗܦܟ ܝܗܘܕܐ ܘܚܝܠܗ ܡܢ ܒܬܪܗܘܢ ܕܪܕܦܝܢ ܗܘܘ ܠܗܘܢ

11. Maccabees 1 A 4:17

    ܘܐܡܪ ܠܥܡܐ ܠܐ ܬܬܪܓܪܓܘܢ ܠܒܙܬܐ ܡܛܠ ܕܥܕܟܝܠ ܩܪܒܐ ܩܝܡ ܩܕܡܝܢ

12. Maccabees 1 A 4:18

    ܘܓܘܪܓܝܐ ܘܚܝܠܗ ܒܛܘܪ̈ܐ ܐܢܘܢ ܘܩܪܝܒܝܢ ܐܢܘܢ ܠܢ ܐܠܐ ܩܘܡܘ ܗܫܐ ܠܘܩܒܠ ܒܥ̈ܠܕܒܒܝܢ ܘܐܩܪܒܘ ܥܡܗܘܢ ܘܡܢ ܒܬܪ ܗܠܝܢ ܬܣܒܘܢ ܒܙܬܐ ܒܦܪܗܣܝܐ

13. Maccabees 1 A 4:19

    ܘܥܕ ܝܗܘܕܐ ܡܡܠܠ ܗܠܝܢ ܐܕܝܩܘ ܡܢ ܛܘܪܐ ܡܢ ܐܝܠܝܢ ܕܐܝܬ ܗܘܘ ܥܡ ܓܘܪܓܝܐ

14. Maccabees 1 A 4:20

    ܘܚܙܘ ܕܐܙܕܟܝ ܠܗ ܘܕܒܝܬ ܝܗܘܕܐ ܡܘܩܕܝܢ ܗܘܘ ܡܫܪ̈ܝܬܗܘܢ ܬܢܢܐ ܓܝܪ ܕܡܬܚܙܐ ܗܘܐ ܗܘ ܡܘܕܥ ܗܘܐ ܡܕܡ ܕܗܘܐ

15. Maccabees 1 A 4:21

    ܘܟܕ ܚܙܘ ܕܝܢ ܗܠܝܢ ܕܚܠܘ ܣܓܝ ܘܬܘܒ ܕܚܙܘ ܠܡܫܪܝܬܗ ܕܝܗܘܕܐ ܒܦܩܥܬܐ ܕܡܛܝܒܐ ܠܩܪܒܐ

16. Maccabees 1 A 4:22

    ܘܥܪܩܘ ܟܠܗܘܢ ܠܐܪܥܐ ܕܦܠܫ̈ܬܝܐ

17. Maccabees 1 A 4:23

    ܘܗܦܟ ܝܗܘܕܐ ܥܠ ܒܙܬܗ ܕܡܫܪܝܬܐ ܘܢܣܒ ܕܗܒܐ ܣܓܝܐܐ ܘܟܣܦܐ ܘܟܐ̈ܦܐ ܛܒ̈ܬܐ ܕܝܗܩܢܬܘܢ ܘܐܪܓܘܢܐ ܕܝܡܐ ܘܥܘܬܪܐ ܪܒܐ

18. Maccabees 1 A 4:24

    ܘܗܦܟܘ ܘܡܫܒܚܝܢ ܗܘܘ ܘܡܘܕܝܢ ܠܡܪܝܐ ܕܒܫܡܝܐ ܕܛܒ ܗܘ ܘܠܥܠܡ ܪ̈ܚܡܘܗܝ

19. Maccabees 1 A 4:25

    ܘܗܘܐ ܦܘܪܩܢܐ ܠܐܝܣܪܐܝܠ ܒܗܘ ܝܘܡܐ

20. Maccabees 1 A 4:26

    ܫܪܟܐ ܕܝܢ ܕܐܫܬܚܪܘ ܡܢ ܦܠܫ̈ܬܝܐ ܐܬܘ ܘܚܘܝܘ ܠܠܘܣܝܐ ܡܕܡ ܕܓܕܫ

21. Maccabees 1 A 4:27

    ܗܘ ܕܝܢ ܟܕ ܫܡܥ ܐܬܪܫܠ ܘܐܬܬܥܝܩ ܣܓܝ ܕܠܐ ܗܘܐ ܐܝܟ ܕܨܒܐ ܗܘܐ ܗܟܘܬ ܗܘܝܗܝ ܠܐܝܣܪܝܠ ܘܠܐ ܗܘܐ ܐܝܟ ܕܦܩܕܗ ܡܠܟܐ ܗܟܘܬ ܥܒܕ

22. Maccabees 1 A 4:28

    ܘܠܒܬܪܗ ܕܫܢܬܐ ܟܢܫ ܠܘܣܝܐ ܓܒܪ̈ܐ ܡܓܒ̈ܝܐ ܫܬܝܢ ܐ̈ܠܦܝܢ ܘܚܡܫܐ ܐ̈ܠܦܝܢ ܦܪ̈ܫܐ ܐܝܟ ܕܝܩܪܒܘܢ ܥܡ ܐܝܣܪܐܝܠ

23. Maccabees 1 A 4:29

    ܘܐܬܘ ܠܐܕܘܡ ܘܫܪܘ ܒܒܝܬ ܫܘܪ̈ܐ ܘܐܪܥ ܐܢܘܢ ܝܗܘܕܐ ܒܥܣܪܐ ܐ̈ܠܦܝܢ ܓܒܪ̈ܝܢ

24. Maccabees 1 A 4:30

    ܘܚܙܐ ܡܫܪܝܬܐ ܕܒܥܠܕܒܒܝܗܘܢ ܡܫܪܝܬܐ ܥܫܝܢܬܐ ܘܨܠܝ ܘܐܡܪ ܒܪܝܟ ܐܢܬ ܗܘ ܦܪܘܩܗ ܕܐܝܣܪܐܝܠ ܗܘ ܕܫܚܩ ܬܘܟܠܢܗ ܕܓܢܒܪܐ ܒܐܝܕܗ ܕܕܘܝܕ ܥܒܕܟ ܘܐܫܠܡܬ ܡܫܪܝܬܐ ܕܦܠܫ̈ܬܝܐ ܒܐܝܕܗ ܕܝܘܢܬܢ ܒܪ ܫܐܘܠ ܘܕܫܩܠ ܡܐ̈ܢܘܗܝ ܘܐܦ ܗܫܐ ܚܒܘܫ ܡܫܪܝܬܐ ܗܕܐ ܒܐܝܕܗ ܕܥܡܟ ܐܝܣܪܝܠ

25. Maccabees 1 A 4:31

    ܘܢܒܗܬܘܢ ܒܚܝܠܗܘܢ ܘܒܦܪ̈ܫܝܗܘܢ

26. Maccabees 1 A 4:32

    ܘܐܪܡܐ ܥܠܝܗܘܢ ܕܚܠܬܐ ܘܫܚܘܩ ܥܘܫܢܐ ܕܚܝܠܗܘܢ ܘܢܬܬܙܝܥܘܢ ܒܬܒܪܗܘܢ

27. Maccabees 1 A 4:33

    ܐܪܡܐ ܐܢܘܢ ܒܪ̈ܘܡܚܐ ܕܚܒ̈ܝܒܝܟ ܘܢܫܒܚܘܢܟ ܟܠܗܘܢ ܝܕ̈ܥܝ ܫܡܟ ܒܬܫܒ̈ܚܬܐ

28. Maccabees 1 A 4:34

    ܘܐܩܪܒܘ ܚܕ ܥܡ ܚܕ ܘܢܦܠܘ ܡܢ ܡܫܪܝܬܗ ܕܠܘܣܝܐ ܐܝܟ ܚܡܫܐ ܐ̈ܠܦܝܢ ܓܒܪ̈ܝܢ ܘܐܬܬܒܪܘ ܩܕܡܝܗܘܢ

29. Maccabees 1 A 4:35

    ܘܟܕ ܚܙܐ ܕܝܢ ܠܘܣܝܐ ܕܐܙܕܟܝܬ ܠܗ ܡܫܪܝܬܗ ܘܐܬܥܫܢܬ ܡܫܪܬܗ ܕܝܗܘܕܐ ܘܕܥܬܝܕܝܢ ܐܢܘܢ ܓܢܒܪܐܝܬ ܕܢܡܘܬܘܢ ܐܘ ܕܢܚܘܢ ܫܩܠ ܡܢ ܬܡܢ ܘܐܙܠ ܠܗ ܠܐܢܛܝܘܟܝܐ ܘܟܢܫ ܠܗ ܚܝܠܐ ܣܓܝܐܐ ܘܥܬܕ ܢܦܫܗ ܘܡܬܚܫܒ ܗܘܐ ܕܬܘܒ ܢܣܩ ܥܠ ܝܗܘܕ

30. Maccabees 1 A 4:36

    ܐܡܪ ܕܝܢ ܝܗܘܕܐ ܘܐܚ̈ܘܗܝ ܗܐ ܐܬܬܒܪܘ ܒܥ̈ܠܕܒܒܝܢ ܢܣܩ ܘܢܕܟܐ ܒܝܬ ܡܩܕܫܐ ܘܢܚܕܬܝܘܗܝ

31. Maccabees 1 A 4:37

    ܘܐܬܟܢܫܬ ܟܠܗ ܡܫܪܝܬܐ ܘܣܠܩܘ ܠܛܘܪܐ ܕܨܗܝܘܢ

32. Maccabees 1 A 4:38

    ܘܚܙܘ ܠܒܝܬ ܡܩܕܫܐ ܕܡܚܪܒ ܘܠܡܕܒܚܐ ܕܚܪܒ ܘܠܬܪ̈ܥܐ ܕܡܘܩܕܝܢ ܘܒܕܪ̈ܐ ܕܝܥܘ ܐ̈ܝܠܢܐ ܐܝܟ ܕܒܥܒܐ ܐܘ ܐܝܟ ܕܒܚܕ ܡܢ ܛܘܪ̈ܐ ܘܟܠܗܘܢ ܬܨܒ̈ܥܬܐ ܕܡܣܚܦܝܢ

33. Maccabees 1 A 4:39

    ܘܨܪܝܘ ܢܚ̈ܬܝܗܘܢ ܘܐܪܩܕܘ ܡܪܩܘܕܬܐ ܪܒܬܐ ܘܐܪܡܝܘ ܥܦܪܐ ܥܠ ܪ̈ܫܝܗܘܢ

34. Maccabees 1 A 4:40

    ܘܢܦܠܘ ܥܠ ܐ̈ܦܝܗܘܢ ܥܠ ܐܪܥܐ ܘܩܪܘ ܒܩܪ̈ܢܬܐ ܐܝܕܝ̈ܥܬܐ ܘܓܥܘ ܠܘܬ ܥܡܘܪܐ ܕܫܡܝܐ

35. Maccabees 1 A 4:41

    ܗܝܕܝܢ ܦܩܕ ܝܗܘܕܐ ܘܐܩܝܡ ܓܒܪ̈ܐ ܕܢܬܟܬܫܘܢ ܘܢܩܪܒܘܢ ܥܡ ܐܝܠܝܢ ܕܝܬܒܝܢ ܒܚ̈ܣܢܐ ܥܕܡܐ ܕܢܕܟܐ ܗܘ ܠܒܝܬ ܡܩܕܫܐ

36. Maccabees 1 A 4:42

    ܘܓܒܐ ܟܗ̈ܢܐ ܕܠܝܬ ܒܗܘܢ ܡܘܡܐ ܘܡܨܛܒܝܢ ܒܢܡܘܣܐ

37. Maccabees 1 A 4:43

    ܘܕܟܝ ܠܒܝܬ ܡܩܕܫܐ ܘܢܣܒ ܟܐ̈ܦܐ ܕܛܡܐܘܬܐ ܘܣܡ ܐܢܝܢ ܒܐܬܪܐ ܛܡܐܐ

38. Maccabees 1 A 4:44

    ܘܐܬܡܠܟܘ ܥܠ ܡܕܒܚܐ ܕܩܘܪܒܢܐ ܗܘ ܕܐܣܬܝܒ ܕܡܢܐ ܢܥܒܕܘܢ ܠܗ

39. Maccabees 1 A 4:45

    ܘܢܦܠܬ ܠܗܘܢ ܡܚܫܒܬܐ ܛܒܬܐ ܕܢܫܪܘܢܝܗܝ ܕܕܠܡܐ ܡܢ ܡܬܘܡ ܢܗܘܐ ܠܗܘܢ ܠܚܣܕܐ ܡܛܠ ܕܣܝܒܘܗܝ ܗܘܘ ܥܡ̈ܡܐ ܘܫܪܐܘܗܝ ܠܡܕܒܚܐ

40. Maccabees 1 A 4:46

    ܘܣܡܘ ܟܐ̈ܦܘܗܝ ܒܐܬܪܐ ܝܕܝܥܐ ܥܠ ܓܢܒ ܚܕܪ̈ܘܗܝ ܕܒܝܬܐ ܥܕܡܐ ܕܢܐܬܐ ܢܒܝܐ ܘܢܐܡܪ ܕܡܢܐ ܢܗܘܐ ܠܗܝܢ

41. Maccabees 1 A 4:47

    ܘܢܣܒܘ ܟܐ̈ܦܐ ܡܫܠܡ̈ܬܐ ܐܝܟ ܕܟܬܝܒ ܒܢܡܘܣܐ ܘܒܢܘ ܠܡܕܒܚܐ ܐܝܟ ܕܡܢ ܩܕܝܡ

42. Maccabees 1 A 4:48

    ܘܒܢܘ ܠܒܝܬ ܡܩܕܫܐ ܘܠܟܠܗ ܓܘܗ ܕܒܝܬܐ ܘܠܕܪ̈ܐ ܩܕܫܘ

43. Maccabees 1 A 4:49

    ܘܥܒܕܘ ܡܐ̈ܢܝ ܩܘܕܫܐ ܚܕ̈ܬܐ ܘܐܥܠܘ ܡܢܪܬܐ ܘܡܕܒܚܐ ܕܒܣ̈ܡܐ ܘܦܬܘܪܐ ܠܗܝܟܠܐ

44. Maccabees 1 A 4:50

    ܘܕܒܚܘ ܥܠ ܡܕܒܚܐ ܘܐܢܗܪܘ ܫܪ̈ܓܐ ܕܥܠ ܡܢܪܬܐ ܘܡܢܗܪܝܢ ܗܘܘ ܒܗܝܟܠܐ

45. Maccabees 1 A 4:51

    ܘܣܡܘ ܥܠ ܦܬܘܪܐ ܠܚܡܐ ܘܬܠܘ ܐ̈ܦܝ ܬܪ̈ܥܐ ܘܫܠܡܘ ܟܘܠܗܘܢ ܥܒ̈ܕܝܗܘܢ

46. Maccabees 1 A 4:52

    ܘܩܕܡܘ ܠܨܦܪܗ ܕܝܘܡܐ ܒܚܡܫܐ ܘܥܣܪܝܢ ܒܝܪܚܐ ܕܬܫܥܐ ܕܐܝܬܘܗܝ ܟܢܘܢ ܩܕܝܡ ܒܫܢܬ ܡܐܐ ܘܐܪܒܥܝܢ ܘܬܡܢܐ ܫ̈ܢܝܢ ܕܡܠܟܘܬܐ

47. Maccabees 1 A 4:53

    ܘܐܣܩܘ ܩܘܪ̈ܒܢܐ ܐܝܟ ܢܡܘܣܐ ܥܠ ܡܕܒܚܐ ܕܝܩ̈ܕܐ ܗܘ ܚܕܬܐ ܕܥܒܕܘ ܗܘܘ

48. Maccabees 1 A 4:54

    ܐܝܟ ܝܘ̈ܡܬܐ ܘܐܝܟ ܙܒ̈ܢܐ ܗܢܘܢ ܕܣܝܒܘܗܝ ܗܘܘ ܥܡ̈ܡܐ ܒܗ ܒܗܘ ܝܘܡܐ ܗܘܐ ܚܘܕܬܗ ܒܡܙܡܘܪ̈ܐ ܘܒܩܝܬܪ̈ܐ ܘܒܟܢܪ̈ܐ

49. Maccabees 1 A 4:55

    ܘܢܦܠܘ ܟܠܗ ܥܡܐ ܥܠ ܐ̈ܦܝܗܘܢ ܘܣܓܕܘ ܘܒܪܟܘ ܠܥܡܘܪܐ ܕܫܡܝܐ ܗܘ ܕܬܩܢ ܘܛܝܒ ܐܘܪܚܗܘܢ

50. Maccabees 1 A 4:56

    ܘܥܒܕܘ ܚܘܕܬܗ ܕܡܕܒܚܐ ܬܡܢܝܐ ܝܘ̈ܡܝܢ ܘܩܪܒܘ ܕܒ̈ܚܐ ܒܒܘܣܡܐ ܘܕܒܚܘ ܕܒ̈ܚܐ ܕܦܘܪܩܢܐ ܘܕܬܫܒܘܚܬܐ

51. Maccabees 1 A 4:57

    ܘܨܒܬܘ ܩܕܡ ܐ̈ܦܝ ܗܝܟܠܐ ܒܟ̈ܠܝܠܐ ܕܕܗܒܐ ܘܒܡ̈ܓܢܐ ܘܚܕܬܘ ܬܪ̈ܥܐ ܘܟܠܗܘܢ ܡܐ̈ܢܝ ܬܨܒܝܬܐ

52. Maccabees 1 A 4:58

    ܘܗܘܐ ܒܘܣܡܐ ܪܒܐ ܘܚܕܘܬܐ ܣܓܝܐܬܐ ܠܥܡܐ ܘܗܦܟ ܚܣܕܐ ܕܥܡ̈ܡܐ

53. Maccabees 1 A 4:59

    ܘܐܩܝܡ ܝܗܘܕܐ ܘܐܚ̈ܘܗܝ ܘܟܠܗ ܟܢܘܫܬܐ ܕܐܝܣܪܐܝܠ ܕܢܗܘܘܢ ܗܘܝܢ ܝܘܡ̈ܬܐ ܕܚܘܕܬܗ ܕܡܕܒܚܐ ܒܙܒܢܗܘܢ ܡܢ ܫܢܐ ܠܫܢܐ ܬܡܢܝܐ ܝܘ̈ܡܝܢ ܡܢ ܚܡܫܐ ܘܥܣܪܝܢ ܒܟܢܘܢ ܩܕܝܡ ܒܚܕܘܬܐ ܘܒܒܘܣܡܐ

54. Maccabees 1 A 4:60

    ܘܒܢܘ ܒܗܘ ܙܒܢܐ ܠܛܘܪܐ ܕܨܗܝܘܢ ܟܕ ܚܕܪ̈ ܒܫܘܪ̈ܐ ܪ̈ܡܐ ܘܒܡ̈ܓܕܠܐ ܚܣ̈ܝܢܐ ܕܠܡܐ ܡܢ ܡܬܘܡ ܢܐܬܘܢ ܥܡ̈ܡܐ ܘܢܕܘܫܘܢܝܗܝ ܐܝܟ ܕܥܒܕܘ ܡܢ ܩܕܝܡ

55. Maccabees 1 A 4:61

    ܘܣܡܘ ܬܡܢ ܚܝܠܐ ܕܗܘܐ ܢܛܪ ܠܗ ܘܐܥܫܢܗ ܠܒܝܬ ܫܘܪ̈ܐ ܕܢܗܘܐ ܐܝܬ ܠܗ ܠܥܡܐ ܚܣ̈ܢܐ ܠܘܩܒܠ ܐܕܘܡ

56. Maccabees 1 A 5:1

    ܘܗܘܐ ܕܟܕ ܫܡܥܘ ܥܡ̈ܡܐ ܕܒܚܕܪ̈ܝܗܘܢ ܕܐܬܒܢܝ ܡܕܒܚܐ ܘܐܬܚܕܬ ܒܝܬ ܡܩܕܫܐ ܐܝܟ ܕܡܢ ܩܕܝܡ ܐܬܚܡܬܘ ܣܓܝ

57. Maccabees 1 A 5:2

    ܘܐܬܚܫܒܘ ܕܢܣܩܘܢ ܢܥܛܘܢܝܗܝ ܠܙܪܥܗ ܕܝܥܩܘܒ ܗܢܘܢ ܕܥܡܪܝܢ ܒܝܢܬܗܘܢ ܘܫܪܝܘ ܡܩܛܠܝܢ ܘܚܪܒܝܢ ܒܥܡܐ

58. Maccabees 1 A 5:3

    ܘܡܩܪܒ ܗܘܐ ܝܗܘܕܐ ܥܡ ܒܢ̈ܝ ܥܣܘ ܒܐܕܘܡ ܒܥܩܪܒܬ ܡܛܠ ܕܝܬܒܝܢ ܗܘܘ ܥܠ ܐܝܣܪܝܠ ܘܡܚܐ ܐܢܘܢ ܡܚܘܬܐ ܪܒܬܐ ܘܒܕܪ ܐܢܘܢ ܘܢܣܒ ܒܙܬܗܘܢ

59. Maccabees 1 A 5:4

    ܘܐܬܕܟܪ ܒܝ̈ܫܬܐ ܕܒ̈ܢܝ ܒܝܐܢ ܗܢܘܢ ܕܐܝܬܝܗܘܢ ܗܘܘ ܠܥܡܐ ܠܦܚܐ ܘܠܡܟܫܘܠܐ ܕܟܡܢܝܢ ܗܘܘ ܠܗܘܢ ܒܝܬ ܐܘܪ̈ܚܬܐ

60. Maccabees 1 A 5:5

    ܘܚܒܫ ܐܢܘܢ ܒܡ̈ܓܕܠܐ ܘܐܪܡܝ ܥܠܝܗܘܢ ܘܐܚܪܡ ܐܢܘܢ ܘܐܘܩܕ ܡܓ̈ܕܠܝܗ ܒܢܘܪܐ ܥܡ ܟܠ ܡܕܡ ܕܐܝܬ ܒܗܘܢ

61. Maccabees 1 A 5:6

    ܘܥܒܪ ܝܗܘܕܐ ܥܠ ܒ̈ܢܝ ܥܡܘܢ ܘܐܫܟܚ ܥܡܐ ܥܫܝܢܐ ܘܐܝܕܐ ܬܩܝܦܬܐ ܘܛܝܡܬܐܘܣ ܗܘܐ ܡܕܒܪܢܗܘܢ

62. Maccabees 1 A 5:7

    ܘܐܩܪܒ ܥܡܗܘܢ ܩܪ̈ܒܐ ܪ̈ܘܪܒܐ ܘܐܬܬܒܪܘ ܡܢ ܩܕܡ ܐ̈ܦܘܗܝ ܘܡܚܐ ܐܢܘܢ

63. Maccabees 1 A 5:8

    ܘܟܒܫܗ ܠܝܥܙܝܪ ܘܠܒ̈ܢܬܗ ܘܗܦܟ ܝܗܘܕܐ ܠܐܕܘܡ

64. Maccabees 1 A 5:9

    ܘܐܬܟܢܫܘ ܥܡ̈ܡܐ ܕܒܓܠܥܕ ܥܠ ܐܝܣܪܐܝܠ ܗܢܘܢ ܕܐܝܬܝܗܘܢ ܗܘܘ ܒܬܚܘ̈ܡܝܗܘܢ ܐܝܟ ܕܢܥܛܘܢ ܐܢܘܢ ܘܥܪܩܘ ܠܪܡܬܐ ܚܣܢܐ

65. Maccabees 1 A 5:10

    ܘܫܕܪܘ ܐܓܪ̈ܬܐ ܠܘܬ ܝܗܘܕܐ ܘܐܚ̈ܘܗܝ ܘܐܡܪܝܢ ܠܗ ܐܬܟܢܫܘ ܥܠܝܢ ܥܡ̈ܡܐ ܕܚܕܪ̈ܝܢ ܐܝܟ ܕܢܥܛܘܢܢ

66. Maccabees 1 A 5:11

    ܘܗܐ ܡܬܥܬܕܝܢ ܕܢܐܬܘܢ ܘܢܟܒܫܘܢ ܚܣܢܐ ܗܢܐ ܕܡܪܝܕܝܢ ܚܢܢ ܒܗ ܘܛܡܬܐܘܣ ܗܘܝܘ ܡܕܒܪܢܗܘܢ

67. Maccabees 1 A 5:12

    ܗܫܐ ܕܝܢ ܬܐ ܘܦܪܘܩܝܢ ܡܢ ܐܝ̈ܕܝܗܘܢ ܡܛܠ ܕܢܦܠܘ ܡܢܢ ܥܡܐ ܣܓܝܐܐ

68. Maccabees 1 A 5:13

    ܘܟܠܗܘܢ ܐ̈ܚܝܢ ܕܐܝܬܝܗܘܢ ܗܘܘ ܒܛܘܒܝܢ ܡܝܬܘ ܘܫܒܘ ܢܫ̈ܝܗܘܢ ܘܒܢ̈ܝܗܘܢ ܘܟܠܗ ܐܝܩܪܬܗܘܢ ܘܐܒܕܘ ܬܡܢ ܐܝܟ ܐܠܦ ܐܢܫܝܢ

69. Maccabees 1 A 5:14

    ܘܥܕ ܗܠܝܢ ܐܓܪ̈ܬܐ ܡܬܩܪܝܢ ܗܘ̈ܝ ܘܗܐ ܡܠܐ̈ܟܐ ܐܚܪ̈ܢܐ ܐܬܘ ܡܢ ܓܠܝܠܐ ܟܕ ܡܣܕܩܝܢ ܢܚܬ̈ܝܗܘܢ ܘܡܣܒܪܝܢ ܐܝܟ ܗܠܝܢ ܡ̈ܠܐ

70. Maccabees 1 A 5:15

    ܘܐܡܪܝܢ ܕܐܬܟܢܫܘ ܥܠܝܗܘܢ ܡܢ ܦܛܘܠܡܐܝܣ ܘܨܘܪ ܘܨܝܕܢ ܘܟܠܗ ܓܠܝܠܐ ܥܡ̈ܡܐ ܢܘܟܪ̈ܝܐ ܐܝܟ ܕܢܥܛܘܢܢ ܘܢܓܡܪܘܢܢ

71. Maccabees 1 A 5:16

    ܘܟܕ ܫܡܥ ܕܝܢ ܝܗܘܕܐ ܘܟܠܗ ܥܡܐ ܠܗܠܝܢ ܦܬܓܡ̈ܐ ܐܬܟܢܫܘ ܟܢܘܫܬܐ ܪܒܬܐ ܕܢܬܡܠܟܘܢ ܕܡܢܐ ܢܥܒܕܘܢ ܠܐܚ̈ܝܗܘܢ ܐܝܠܝܢ ܕܐܝܬܝܗܘܢ ܗܘܘ ܒܐܘܠܨܢܐ ܕܡܬܐܠܨܝܢ ܗܘܘ ܡܢܗܘܢ

72. Maccabees 1 A 5:17

    ܘܐܡܪ ܝܗܘܕܐ ܠܫܡܥܘܢ ܐܚܘܗܝ ܟܢܫ ܠܟ ܓܒܪ̈ܐ ܘܙܠ ܦܪܘܩ ܠܐ̈ܚܝܟ ܗܢܘܢ ܕܐܝܬ ܒܓܠܝܠܐ ܐܢܐ ܕܝܢ ܘܝܘܢܬܢ ܐܚܝ ܢܐܙܠ ܠܓܠܥܕ

73. Maccabees 1 A 5:18

    ܘܫܒܩ ܠܝܘܣܦ ܒܪ ܙܟܪܝܐ ܘܠܥܙܪܝܐ ܡܕܒܪ̈ܢܐ ܕܥܡܐ ܥܡ ܫܪܟܗ ܕܚܝܠܐ ܕܒܝܗܘܕ ܕܢܗܘܘܢ ܢܛܪܝܢ

74. Maccabees 1 A 5:19

    ܘܦܩܕ ܐܢܘܢ ܘܐܡܪ ܠܗܘܢ ܚܙܘ ܐܝܨܦܘ ܕܗܢܐ ܥܡܐ ܘܠܐ ܬܡܚܘܢ ܩܪܒܐ ܥܡ ܥܡ̈ܡܐ ܥܕܡܐ ܕܢܗܦܘܟ ܘܢܐܬܐ

75. Maccabees 1 A 5:20

    ܘܐܬܦܠܓܘ ܥܡ ܫܡܥܘܢ ܬܠܬܐ ܐ̈ܠܦܝܢ ܓܒܪ̈ܝܢ ܕܢܐܙܠܘܢ ܥܡܗ ܠܓܠܝܠܐ ܘܥܡ ܝܗܘܕܐ ܬܡܢܝܐ ܐ̈ܠܦܝܢ ܠܓܠܥܕ

76. Maccabees 1 A 5:21

    ܘܐܙܠ ܫܡܥܘܢ ܠܓܠܝܠܐ ܘܐܩܪܒ ܩܪ̈ܒܐ ܪ̈ܘܪܒܐ ܥܡ ܥܡ̈ܡܐ ܘܐܬܬܒܪܘ ܥܡ̈ܡܐ ܡܢ ܩܕܡ ܐ̈ܦܘܗܝ

77. Maccabees 1 A 5:22

    ܘܪܕܦ ܒܬܪܗܘܢ ܥܕܡܐ ܠܦܛܘܠܡܐܝܣ ܘܢܦܠܘ ܡܢ ܥܡ̈ܡܐ ܐܝܟ ܬܠܬܐ ܐ̈ܠܦܝܢ ܓܒܪ̈ܝܢ ܘܢܣܒܘ ܒܙܬܗܘܢ

78. Maccabees 1 A 5:23

    ܘܕܒܪ ܫܡܥܘܢ ܠܐܝܠܝܢ ܕܒܓܠܝܠܐ ܘܕܒܐܪܕܒܛ ܥܡ ܢܫ̈ܝܗܘܢ ܘܒܢ̈ܝܗܘܢ ܘܟܘܠܗ ܐܝܩܪܬܗܘܢ ܘܐܝܬܝ ܐܢܘܢ ܠܝܗܘܕ ܒܒܘܣܡܐ ܪܒܐ

79. Maccabees 1 A 5:24

    ܘܝܗܘܕܐ ܡܩܒܝ ܘܝܘܢܬܢ ܐܚܘܗܝ ܥܒܪܘ ܝܘܪܕܢܢ ܘܐܙܠܘ ܡܪܕܐ ܬܠܬܐ ܝܘ̈ܡܝܢ ܒܡܕܒܪܐ

80. Maccabees 1 A 5:25

    ܘܐܪܥܘ ܐܢܘܢ ܢܒ̈ܛܝܐ ܘܩܒܠܘ ܐܢܘܢ ܒܫܠܡܐ ܘܐܫܬܥܝܘ ܠܗܘܢ ܟܠܡܕܡ ܕܓܕܫ ܠܐ̈ܚܝܗܘܢ ܒܓܠܥܕ

81. Maccabees 1 A 5:26

    ܘܕܣ̈ܓܝܐܐ ܡܢܗܘܢ ܐܚܝܕܝܢ ܒܒܘܨܪܐ ܘܒܒܘܣܪ̈ܝܐ ܘܒܐܠܝܡ ܘܒܟܣܦܘܪ ܘܒܡܩܪ ܘܒܩܪܢܐ ܗܠܝܢ ܟܠܗܝܢ ܡܕܝܢ̈ܬܐ ܕܪ̈ܘܪܒܢ ܘܥܫܝܢܢ

82. Maccabees 1 A 5:27

    ܘܒܫܪܟܐ ܕܡܕܝܢ̈ܬܐ ܕܒܓܠܥܕ ܐܚܝܕܝܢ ܘܠܡܚܪ ܡܛܝܒܝܢ ܕܢܪܡܘܢ ܥܠ ܚܣ̈ܢܐ ܘܢܣܚܦܘܢ ܐܢܘܢ ܘܢܘܒܕܘܢ ܠܟܠܗܘܢ ܒܝܘܡܐ ܚܕ

83. Maccabees 1 A 5:28

    ܘܗܦܟ ܝܗܘܕܐ ܘܟܠܗ ܡܫܪܝܬܗ ܒܐܘܪܚܐ ܕܡܕܒܪܐ ܠܒܘܨܪ̈ܐ ܘܡܢ ܫܠܝܐ ܢܦܠ ܥܠ ܡܕܝܢܬܐ ܘܩܛܠܘ ܒܗ ܟܠ ܕܟܪܐ ܒܦܘܡܐ ܕܚܪܒܐ ܘܢܣܒ ܟܠܗ ܒܙܬܗܘܢ ܘܐܘܩܕܗ ܒܢܘܪܐ

84. Maccabees 1 A 5:29

    ܘܫܩܠ ܝܗܘܕܐ ܡܢ ܬܡܢ ܒܠܠܝܐ ܘܐܙܠܘ ܥܕܡܐ ܠܚܣܢܐ

85. Maccabees 1 A 5:30

    ܘܗܘܐ ܠܨܦܪܗ ܕܝܘܡܐ ܐܪܝܡܘ ܥܝ̈ܢܝܗܘܢ ܘܚܙܘ ܘܗܐ ܥܡܐ ܣܓܝܐܐ ܕܠܝܬ ܠܗ ܡܢܝܢܐ ܕܫܩܝܠܝܢ ܣܒ̈ܠܬܐ ܘܚܒ̈ܠܐ ܘܡܩܪܒܝܢ ܗܘܘ ܕܢܟܒܫܘܢܝܗܝ ܠܚܣܢܐ

86. Maccabees 1 A 5:31

    ܘܚܙܐ ܝܗܘܕܐ ܕܥܫܝܢ ܩܪܒܐ ܘܓܥܬܗ ܕܡܕܝܢܬܐ ܣܠܩܬ ܥܕܡܐ ܠܫܡܝܐ ܘܩܠܐ ܕܩܪ̈ܢܬܐ ܘܪܗܒܐ ܣܓܝܐܐ

87. Maccabees 1 A 5:32

    ܘܐܡܪ ܝܗܘܕܐ ܠܓܒܪ̈ܐ ܕܚܝܠܐ ܐܩܪܒܘ ܝܘܡܢܐ ܥܠ ܐ̈ܦܝ ܐܚ̈ܝܟܘܢ

88. Maccabees 1 A 5:33

    ܘܢܦܩ ܝܗܘܕܐ ܒܬܠܬܐ ܪ̈ܫܝܢ ܡܢ ܒܣܬܪܗܘܢ ܘܩܪܘ ܒܩܪ̈ܢܬܐ ܘܓܥܘ ܒܨܠܘܬܐ

89. Maccabees 1 A 5:34

    ܘܝܕܥܬ ܡܫܪܝܬܗ ܕܛܝܡܬܐܘܣ ܕܡܩܒܝ ܗܘ ܘܥܪܩܘ ܡܢ ܩܕܡܘܗܝ ܘܡܚܐ ܐܢܘܢ ܡܚܘܬܐ ܪܒܬܐ ܘܢܦܠܘ ܡܢܗܘܢ ܒܗܘ ܝܘܡܐ ܐܝܟ ܬܡܢܝܐ ܐ̈ܠܦܝܢ ܓܒܪ̈ܝܢ

90. Maccabees 1 A 5:35

    ܘܐܪܟܢ ܝܗܘܕܐ ܠܐܠܝܡ ܘܥܒܕ ܥܡܗ ܩܪܒܐ ܘܟܠ ܕܟܪܐ ܕܒܗ ܩܛܠܘ ܘܢܣܒܘ ܒܙܬܗ ܘܐܘܩܕܗ ܒܢܘܪܐ

91. Maccabees 1 A 5:36

    ܘܡܢ ܬܡܢ ܫܩܠ ܝܗܘܕܐ ܘܟܒܫܗ ܠܟܣܦܘܪ ܘܠܡܩܪ ܘܠܒܘܣܪ̈ܝܐ ܘܠܫܪܟܐ ܕܡܕܝܢ̈ܬܐ ܕܒܓܠܥܕ

92. Maccabees 1 A 5:37

    ܘܡܢ ܒܬܪ ܕܝܢ ܗܠܝܢ ܟܢܫ ܛܝܡܬܐܘܣ ܡܫܪܝܬܐ ܐܚܪܬܐ ܘܫܪܐ ܥܠ ܓܢܒ ܪܦܝܢ ܡܢ ܣܛܪܗ ܕܢܗܪܐ

93. Maccabees 1 A 5:38

    ܘܫܕܪ ܝܗܘܕܐ ܕܢܓܫܘܢ ܠܡܫܪܝܬܗ ܘܐܬܘ ܘܐܡܪܘ ܠܗ ܐܬܟܢܫܘ ܥܠܝܟ ܟܠܗܘܢ ܥܡ̈ܡܐ ܕܚܕܪ̈ܝܢ ܚܝܠܐ ܪܒܐ ܘܥܫܝܢܐ

94. Maccabees 1 A 5:39

    ܘܐܦ ܥܪ̈ܒܝܐ ܐܓܝܪ̈ܝܢ ܠܗܘܢ ܠܥܘܕܪܢܐ ܘܫܪܝܢ ܥܠ ܣܛܪܗ ܕܢܗܪܐ ܘܡܥܬܕܝܢ ܕܢܐܬܘܢ ܥܠܝܟ ܠܩܪܒܐ ܘܐܙܠ ܝܗܘܕܐ ܠܐܘܪܥܗܘܢ

95. Maccabees 1 A 5:40

    ܘܐܡܪ ܛܝܡܬܐܘܣ ܠܪ̈ܒܝ ܚܝܠܗ ܟܕ ܢܬܩܪܒ ܝܗܘܕܐ ܘܡܫܪܝܬܗ ܥܠ ܓܢܒ ܣܦܬܗ ܕܢܗܪܐ ܐܢܗܘ ܕܢܥܒܪ ܒܩܕܡܐ ܠܘܬܢ ܠܐ ܡܫܟܚܝܢ ܐܢܚܢܢ ܕܢܩܘܡ ܩܕܡܘܗܝ ܡܛܠ ܕܡܛܡܨܝܘ ܢܬܡܨܐ ܚܝܠܢ

96. Maccabees 1 A 5:41

    ܐܢ ܕܝܢ ܢܕܚܠ ܘܢܫܪܐ ܡܢ ܗܘ ܣܛܪܗ ܕܢܗܪܐ ܢܥܒܪ ܠܘܬܗ ܘܢܬܡܨܐ ܚܝܠܗ

97. Maccabees 1 A 5:42

    ܘܟܕ ܡܛܝ ܝܗܘܕܐ ܠܢܗܪܐ ܐܩܝܡ ܠܣܦܪ̈ܘܗܝ ܕܥܡܐ ܥܠ ܢܗܪܐ ܘܦܩܕ ܐܢܘܢ ܘܐܡܪ ܠܗܘܢ ܠܐ ܬܫܒܩܘܢ ܐܦ ܠܐ ܠܐܢܫ ܕܢܫܪܐ ܐܠܐ ܢܐܬܘܢ ܟܠܗܘܢ ܠܩܪܒܐ

98. Maccabees 1 A 5:43

    ܘܥܒܪ ܗܘ ܩܕܡܝ ܥܠܝܗܘܢ ܘܟܠܗ ܥܡܐ ܡܢ ܒܬܪܗ ܘܐܬܬܒܪܘ ܡܢ ܩܕܡܘܗܝ ܥܡ̈ܡܐ ܘܫܕܘ ܙܝܢܗܘܢ ܘܥܪܩܘ ܠܒܝܬ ܦܬܟܪ̈ܐ ܕܒܩܪܢܐ

99. Maccabees 1 A 5:44

    ܘܟܒܫܘܗ ܠܡܕܝܢܬܐ ܕܒܝܬ ܝܗܘܕܐ ܘܠܒܝܬ ܦܬܟܪ̈ܐ ܐܘܩܕܘ ܒܢܘܪܐ ܥܡ ܟܠܡܕܡ ܕܐܝܬ ܒܗ ܘܐܙܕܟܝܬ ܩܪܢܐ ܘܠܐ ܬܘܒ ܡܫܟܚܐ ܗܘܬ ܠܡܩܡ ܩܕܡ ܝܗܘܕܐ

100. Maccabees 1 A 5:45

     ܘܟܢܫ ܝܗܘܕܐ ܠܟܠܗ ܐܝܣܪܝܠ ܕܒܓܠܥܕ ܡܢ ܙܥܘܪܐ ܘܥܕܡܐ ܠܪܒܐ ܘܠܢܫ̈ܝܗܘܢ ܘܠܒܢ̈ܝܗܘܢ ܘܠܟܠܗ ܐܝܩܪܬܗܘܢ ܡܫܪܝܬܐ ܪܒܬܐ ܘܥܫܝܢܬܐ ܠܡܐܬܐ ܠܐܪܥܐ ܕܝܗܘܕ

← Previous · Next → — showing 201–300 of 836

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.