← All works
Peshitta Leviticus Peshitta (Syriac Old Testament) · 859 sections
Single column Two columns
Leviticus 23:44 ܘܐܡܪ ܡܘܫܐ ܠܒܢ̈ܝ ܐܝܣܪܝܠ ܥܕܥܐ̈ܕܘܗܝ ܕܡܪܝܐ .
Leviticus 24:1 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 24:2 ܦܩܕ ܠܒܢ̈ܝ ܐܝܣܪܝܠ ܘܢܝܬܘܢ ܠܟ ܡܫܚܐ ܕܟܝܐ ܕܙܝܬܐ ܥܨܝܪܐ . ܠܡܢܗܪܘ ܫܪ̈ܓܐ ܐܡܝܢܐܝܬ .
Leviticus 24:3 ܠܒܪ ܡܢ ܐ̈ܦܝ ܬܪܥܐ ܕܣܗܕܘܬܐ ܒܡܫܟܢܙܒܢܐ . ܘܢܗܘܐ ܣ̇ܕܪ ܠܗܘܢ ܐܗܪܘܢ ܡܢ ܪܡܫܐ ܘܥܕܡܐ ܠܨܦܪܐ . ܩܕܡ ܡܪܝܐ ܐܡܝܢܐܝܬ . ܢܡܘܣܐ ܠܥܠܡ ܠܕܪ̈ܝܟܘܢ .
Leviticus 24:4 ܥܠ ܡܢܪܬܐ ܪܒܬܐ ܢܗܘܐ ܣ̇ܕܪ ܫܪ̈ܓܐ ܩܕܡ ܡܪܝܐ ܐܡܝܢܐܝܬ .
Leviticus 24:5 ܘܣܒ ܢܫܝܦܐ ܘܐܦܝ ܬܪ̈ܬܥܣܪܐ ܚܚܪ̈ܢ ܡܢ ܬܪ̈ܝܢ ܥܣܪ̈ܘܢܝܢ . ܚܚܘܪܬܐ ܚܕܐ .
Leviticus 24:6 ܘܣܕܘܪ ܐ̈ܢܝܢ ܬܪ̈ܝܢ ܣܕܪ̈ܝܢ ܫܬ ܫܬ ܒܣܕܪܐ . ܥܠ ܦܬܘܪܐ ܕܟܝܐ ܩܕܡ ܡܪܝܐ .
Leviticus 24:7 ܘܣܝܡ ܥܠ ܣܕܪ̈ܐ ܠܒܘܢܬܐ ܕܟܝܬܐ ܩܕܡ ܡܪܝܐ . ܘܢܗܘܐ ܠܠܚܡܐ ܕܘܟܪܢܐ ܘܩܘܪܒܢܐ ܠܡܪܝܐ .
Leviticus 24:8 ܒܝܘܡܐ ܕܫܬܐ ܢܗܘܐ ܣ̇ܕܪ ܠܗܘܢ ܐܗܪܘܢ ܩܕܡ ܡܪܝܐ ܐܡܝܢܐܝܬ . ܡܢ ܠܘܬ ܒܢ̈ܝ ܐܝܣܪܝܠ ܩܝܡܐ ܠܥܠܡ .
Leviticus 24:9 ܢܗܘܐ ܠܐܗܪܘܢ ܘܠܒܢ̈ܘܗܝ . ܘܢܐܟܠܘܢܗ ܒܐܬܪܐ ܩܕܝܫܐ . ܡܛܠ ܕܩܕܘܫ ܩܘܕܫ̈ܝܢ ܗܘ ܠܗ ܡܢ ܩܘܪ̈ܒܢܘܗܝ ܕܡܪܝܐ . ܢܡܘܣܐ ܠܥܠܡ .
Leviticus 24:10 ܘܢܦܩ ܒܪ ܐܢܬܬܐ ܐܝܣܪܠܝܬܐ . ܘܗܘ ܒܪ ܓܒܪܐ ܗܘܐ ܡܨܪܝܐ . ܒܝܢܬ ܒܢ̈ܝ ܐܝܣܪܝܠ . ܘܢܨܘ ܒܡܫܪܝܬܐ ܒܪ ܐܝܣܪܠܝܬܐ ܘܓܒܪܐ ܐܝܣܪܠܝܐ .
Leviticus 24:11 ܘܦܪܫ ܒܪ ܐܢܬܬܐ ܐܝܣܪܠܝܬܐ ܫܡܐ ܘܨܚܝ . ܘܐܝܬܝܘܗܝ ܠܘܬ ܡܘܫܐ . ܘܫܡܐ ܕܐܡܗ ܫܠܘܡܝܬ ܒܪܬ ܕܒܪܝ ܡܢ ܫܒܛܐ ܕܕܢ .
Leviticus 24:12 ܘܚܒܫܘܗܝ ܒܝܬ ܢܛܘܪܬܐ . ܕܢܬܦܫܩ ܠܗܘܢ ܡܢ ܦܘܡܗ ܕܡܪܝܐ .
Leviticus 24:13 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 24:14 ܐܦܩܘܗܝ ܠܗ̇ܘ ܕܨܚܝ ܠܒܪ ܡܢ ܡܫܪܝܬܐ . ܘܟܠ ܕܫܡܥܘܗܝ ܢܣܝܡܘܢ ܐܝ̈ܕܝܗܘܢ ܥܠ ܪܫܗ . ܘܢܪܓܡܘܢܗ ܟܘܠܗ̇ ܟܢܘܫܬܐ .
Leviticus 24:15 ܘܥܡ ܒܢ̈ܝ ܐܝܣܪܝܠ ܡܠܠ ܘܐܡܪ ܠܗܘܢ . ܓܒܪ ܓܒܪ ܟܕ ܢܨܚܐ ܠܐܠܗܗ . ܢܩ̇ܒܠ ܚܛܗܗ .
Leviticus 24:16 ܘܡ̇ܢ ܕܢܦܪܘܫ ܫܡܗ ܕܡܪܝܐ ܡܬܩܛܠܘ ܢܬܩܛܠ . ܘܡܪܓܡ ܢܪܓܡܘܢܗ ܟܠܗ̇ ܟܢܘܫܬܐ . ܐܝܢܐ ܕܡܬܦܢܐ ܠܘܬܝ . ܐܘ ܒܪ ܐܝܣܪܝܠ ܡܐ ܕܦܪܫ ܫܡܝ ܢܬܩܛܠ .
Leviticus 24:17 ܘܓܒܪܐ ܐܢ ܢܩܛܘܠ ܟܠ ܢܦܫܐ ܕܒܪܢܫܐ ܡܬܩܛܠܘ ܢܬܩܛܠ .
Leviticus 24:18 ܘܕܢܩܛܘܠ ܢܦܫܐ ܕܒܥܝܪ̈ܐ . ܢܦܪܘܥ ܢܦܫܐ ܚܠܦ ܢܦܫܐ .
Leviticus 24:19 ܘܓܒܪܐ ܐܢ ܢܥܒܕ ܡܘܡܐ ܒܚܒܪܗ . ܐܝܟ ܕܥܒܕ ܡܘܡܐ ܒܚܒܪܗ . ܗܟܢܐ ܢܬܥܒܕ ܠܗ .
Leviticus 24:20 ܬܒܪܐ ܚܠܦ ܬܒܪܐ . ܥܝܢܐ ܚܠܦ ܥܝܢܐ . ܫܢܐ ܚܠܦ ܫܢܐ . ܐܝܟ ܕܥܒܕ ܡܘܡܐ ܒܚܒܪܗ . ܗܟܢܐ ܢܬܥܒܕ ܠܗ .
Leviticus 24:21 ܘܕܢܩܛܘܠ ܒܥܝܪ̈ܐ ܢܦܪܥܝܗ̇ . ܘܕܢܩܛܘܠ ܢܦܫܐ ܢܬܩܛܠ .
Leviticus 24:22 ܕܝܢܐ ܚܕ ܢܗܘܐ ܠܟܘܢ . ܘܠܐܝܢܐ ܕܡܬܦܢܐ ܠܘܬܝ . ܘܠܒܪ ܐܝܣܪܝܠ ܗܟܢܐ ܢܗܘܐ . ܐܢܐ ܐܢܐ ܡܪܝܐ ܐܠܗܟܘܢ .
Leviticus 24:23 ܘܐܡܪ ܡܘܫܐ ܠܒܢ̈ܝ ܐܝܣܪܝܠ . ܘܐܦܩܘܗܝ ܠܗ̇ܘ ܕܨܚܝ ܠܒܪ ܡܢ ܡܫܪܝܬܐ . ܘܪܓܡܘܗܝ ܒܟܐ̈ܦܐ ܘܡܝܬ . ܘܥܒܕܘ ܒܢ̈ܝ ܐܝܣܪܝܠ ܐܝܟ ܕܦܩܕ ܡܪܝܐ ܠܡܘܫܐ .
Leviticus 25:1 ܘܡܠܠ ܡܪܝܐ ܥܡ ܡܘܫܐ ܒܛܘܪܐ ܕܣܝܢܝ ܘܐܡܪ ܠܗ .
Leviticus 25:2 ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ . ܡܐ ܕܥܠܬܘܢ ܠܐܪܥܐ ܕܝ̇ܗܒ ܐܢܐ ܠܟܘܢ ܝܘܪܬܢܐ . ܬܫܒܬ ܐܪܥܐ ܫܒܬܐ ܠܡܪܝܐ .
Leviticus 25:3 ܫܬ ܫ̈ܢܝܢ ܬܙܪܥܘܢ ܚܩ̈ܠܬܟܘܢ . ܘܫܬ ܫ̈ܢܝܢ ܬܟܣܚܘܢ ܟܪ̈ܡܝܟܘܢ . ܘܫܬ ܫ̈ܢܝܢ ܗܘܝܬܘܢ ܚܡ̇ܠܝܢ ܥ̈ܠܠܬܟܘܢ .
Leviticus 25:4 ܘܫܢܬܐ ܕܫܒܥ . ܫܒܬ ܫ̈ܒܐ ܬܗܘܐ ܠܐܪܥܐ . ܘܬܗܘܐ ܠܟܘܢ ܫܒܬܐ ܠܡܪܝܐ . ܚܩ̈ܠܬܟܘܢ ܠܐ ܬܙܪܥܘܢ . ܘܟܪ̈ܡܝܟܘܢ ܠܐ ܬܟܣܚܘܢ .
Leviticus 25:5 ܘܟܐܬܐ ܕܚܨܕܟܘܢ ܠܐ ܬܚܨܕܘܢ . ܘܥܢ̈ܒܐ ܕܫ̈ܒܫܬܝܟܘܢ ܠܐ ܬܩܛܦܘܢ . ܫܢܬܐ ܕܫܒܬܐ ܬܗܘܐ ܠܐܪܥܐ .
Leviticus 25:6 ܘܬܗܘܐ ܠܟܘܢ ܫܒܬܐ ܕܐܪܥܐ ܠܡܐܟܘܠܬܐ . ܠܟܘܢ ܘܠܥܒ̈ܕܝܟܘܢ ܘܠܐܡ̈ܗܬܟܘܢ . ܘܠܐܓܝܪ̈ܝܟܘܢ ܘܠܬܘܬ̈ܒܐ ܕܥܡ̇ܪܝܢ ܥܡܟܘܢ .
Leviticus 25:7 ܘܠܒܥܝܪ̈ܟܘܢ ܘܠܚܝܘܬܐ ܕܒܐܪܥܟܘܢ ܬܗܘܐ ܠܟܘܢ ܟܘܠܗ̇ ܥܠܠܬܐ ܠܡܐܟܘܠܬܐ .
Leviticus 25:8 ܘܡܢܘ ܠܟܘܢ ܫܒܥ ܫ̈ܢܝܢ ܕܫ̈ܒܐ ܫܒܥ ܫ̈ܢܝܢ ܥܠ ܫܒܥ ܙܒ̈ܢܝܢ . ܘܢܗܘܘܢ ܠܟܘܢ ܝܘܡ̈ܬܐ ܕܫܒܥ ܫ̈ܒܐ ܕܫܢܝܐ . ܐܪ̈ܒܥܝܢ ܘܬܫܥ ܫ̈ܢܝܢ .
Leviticus 25:9 ܘܩܪܘ ܒܫܝܦܘܪܐ ܕܝܘܒܒܐ ܒܥܣܪܬܐ ܒܝܪܚܐ ܕܫܒܥܐ . ܒܝܘܡܐ ܕܚܘܣܝܐ . ܩܪܘ ܫܝܦܘܪܐ ܒܟܠܗ̇ ܐܪܥܟܘܢ .
Leviticus 25:10 ܘܩܕܫܘܗ̇ ܠܫܢܬ ܚܡܫܝܢ ܫ̈ܢܝܢ . ܘܩܪܘ ܚܐܪܘܬܐ ܒܐܪܥܐ ܠܟܠܗܘܢ ܥܡܘܪ̈ܝܗ̇ . ܘܦܘܢܝܐ ܢܗܘܐ ܠܟܘܢ . ܘܗܦܘܟܘ ܐܢܫ ܠܝܪܬܘܬܗ ܘܐܢܫ ܠܫܪܒܬܗ .
Leviticus 25:11 ܘܦܘܢܝܐ ܒܫܢܬ ܚܡܫܝܢ ܫ̈ܢܝܢ ܢܗܘܐ ܠܟܘܢ . ܠܐ ܬܙܪܥܘܢ ܐܪܥܟܘܢ . ܘܠܐ ܬܚܨܕܘܢ ܟܐܬܗ̇ . ܘܠܐ ܬܩܛܦܘܢ ܫܒܫ̈ܬܝܗ̇ .
Leviticus 25:12 ܡܛܠ ܕܦܘܢܝܐ ܗܘ ܘܩܘܕܫܐ ܢܗܘܐ ܠܟܘܢ . ܘܡܢ ܚܩܠܐ ܐܟܘܠܘ ܥܠܠܬܐ .
Leviticus 25:13 ܒܫܢܬܐ ܗܕܐ ܕܦܘܢܝܐ . ܘܗܦܘܟܘ ܐܢܫ ܠܝܪܬܘܬܗ .
Leviticus 25:14 ܘܐܢ ܬܙ̇ܒܢ ܙܒܢܐ ܠܚܒܪܟ ܐܘ ܐܢ ܬܙܒܢ ܡܢ ܚܒܪܟ . ܠܐ ܬܥܠܒܘܢ ܓܒܪ ܠܐܚܘܗܝ .
Leviticus 25:15 ܒܡܢܝܢܐ ܕܫ̈ܢܝܐ ܒܬܪ ܦܘܢܝܐ ܙܒܢ ܡܢ ܚܒܪܟ . ܘܒܡܢܝܢܐ ܕܫ̈ܢܝܐ ܕܥܠܠܬܐ ܢܙܒܢ ܠܟ .
Leviticus 25:16 ܠܦܘܬ ܣܘܓܐܐ ܕܫ̈ܢܝܐ ܬܣܓܐ ܙܒܝܢܬܗ . ܘܠܦܘܬ ܙܥܘܪܘܬܐ ܕܫ̈ܢܝܐ ܬܙܥܪ ܙܒܝܢܬܗ . ܡܛܠ ܕܒܡܢܝܢܐ ܗܘ ܕܥܠܠܬܐ ܕܫܢ̈ܝܐ ܡܙܒܢ ܠܟ .
Leviticus 25:17 ܘܠܐ ܬܥܠܒܘܢ ܐܢܫ ܠܐܚܘܗܝ . ܘܕܚܠ ܡܢ ܐܠܗܟ . ܡܛܠ ܕܐܢܐ ܐܢܐ ܡܪܝܐ ܐܠܗܟ .
Leviticus 25:18 ܥܒܕܘ ܦܘܩ̈ܕܢܝ . ܘܛܪܘ ܕܝܢ̈ܝ ܘܥܒܕܘ ܐܢܘܢ . ܘܬܒܘ ܒܐܪܥܐ ܒܫܠܝܐ .
Leviticus 25:19 ܘܬܬܠ ܐܪܥܐ ܦܐܪ̈ܝܗ̇ . ܘܬܐܟܠܘܢ ܘܬܣܒܥܘܢ . ܘܬܬܒܘܢ ܒܗ̇ ܒܫܠܝܐ .
Leviticus 25:20 ܘܐܢ ܐܡܪ̈ܝܢ ܐܢܬܘܢ ܡܢܐ ܢܐܟܘܠ ܒܫܢܬܐ ܕܫܒܥ . ܕܠܐ ܙܪܥ̇ܝܢ ܚܢܢ ܘܠܐ ܚܡ̇ܠܝܢܢ ܥ̈ܠܠܬܗ̇ .
Leviticus 25:21 ܐܫܕܪ ܠܟܘܢ ܒܘܪ̈ܟܬܝ ܒܫܢܬܐ ܫܬܝܬܝܬܐ . ܘܬܥܒܕ ܥܠܠܬܐ ܕܬܠܬ ܫ̈ܢܝܢ .
Leviticus 25:22 ܘܬܙܪܥܘܢ ܒܫܢܬܐ ܬܡܝܢܝܬܐ . ܘܬܐܟܠܘܢ ܡܢ ܥܠܠܬܐ ܥܬܝܩܬܐ . ܥܕܡܐ ܠܫܢܬܐ ܬܫܝܥܝܬܐ . ܥܕܡܐ ܕܥܐ̇ܠܐ ܥܠܠܬܐ ܗܘܝܬܘܢ ܐܟ̇ܠܝܢ ܥܬܝܩܐ .
Leviticus 25:23 ܘܐܪܥܐ ܒܫܪܪܐ ܠܐ ܬܙܕܒܢ ܠܥܠܡ . ܡܛܠ ܕܕܝܠܝ ܗܝ ܐܪܥܐ . ܘܥܡܘܪ̈ܐ ܐܢܬܘܢ ܘܬܘܬ̈ܒܐ ܥܡܝ .
Leviticus 25:24 ܘܒܟܠܗ̇ ܐܪܥܐ ܕܝܪܬܘܬܟܘܢ . ܦܘܪܩܢܐ ܕܐܪܥܐ ܗܘܝܬܘܢ ܝܗ̇ܒܝܢ .
Leviticus 25:25 ܘܐܢ ܢܬܡܣܟܢ ܐܚܘܟ ܘܢܙ̇ܒܢ ܡܢ ܝܪܬܘܬܗ . ܢܐܬܐ ܩܪܝܒܗ ܕܩܪܝܒ ܠܗ . ܢܦܪܘܩ ܙܒܢܗ ܕܐܚܘܗܝ .
Leviticus 25:26 ܘܐܢ ܠܝܬ ܡ̇ܢ ܕܦ̇ܪܩ . ܘܢܡܛܐ ܒܐ̈ܝܕܘܗܝ . ܘܢܫܟܚ ܡܣܬ ܦܘܪܩܢܗ .
Leviticus 25:27 ܢܚܫܘܒ ܫ̈ܢܝܐ ܕܙܒܝܢܬܗ . ܘܢܦܢܐ ܝܬܝܪܐ ܠܓܒܪܐ ܕܙܒܢ ܡܢܗ . ܘܢܗܦܘܟ ܠܝܪܬܘܬܗ .
Leviticus 25:28 ܘܐܠܐ ܡ̇ܛܐ ܒܐ̈ܝܕܘܗܝ ܐܝܟ ܕܢܦܪܥܝܘܗܝ . ܬܗܘܐ ܙܒܝܢܬܐ ܫܪܝܪܐ ܠܡ̇ܢ ܕܙܒܢܗ̇ . ܥܕܡܐ ܠܫܢܬܐ ܕܦܘܢܝܐ . ܘܢܦܘܩ ܒܦܘܢܝܐ ܘܢܗܦܘܟ ܠܝܪܬܘܬܗ .
Leviticus 25:29 ܘܓܒܪܐ ܐܢ ܢܙ̇ܒܢ ܒܝܬ ܡܥܡܪܐ ܕܩܪܝܬܐ ܕܐܝܬ ܠܗ̇ ܫܘܪܐ . ܢܗܘܐ ܦܘܪܩܢܗ ܥܕܡܐ ܕܫܠܡܐ ܫܢܬܐ ܕܙܒܝܢܬܗ . ܡܢ ܥܕܢ ܠܥܕܢ ܢܗܘܐ ܦܘܪܩܢܗ .
Leviticus 25:30 ܘܐܢ ܠܐ ܡܬܦܪܩ ܥܕܡܐ ܕܫܠܡܐ ܠܗ̇ ܫܢܬܐ ܫܠܡܬܐ . ܢܩܘܡ ܒܝܬܐ ܕܒܩܪܝܬܐ . ܕܐܝܬ ܠܗ̇ ܫܘܪܐ ܒܫܪܪܐ ܠܡ̇ܢ ܕܙܒܢܗ . ܘܢܗܘܐ ܠܕܪ̈ܘܗܝ . ܘܠܐ ܢܦܘܩ ܡܢܗ ܒܦܘܢܝܐ .
Leviticus 25:31 ܒ̈ܬܐ ܕܝܢ ܕܫ̈ܛܚܐ ܕܠܐ ܚ̇ܕܪ ܠܗܘܢ ܫܘܪܐ . ܐܝܟ ܚܩܠܐ ܕܐܪܥܐ ܢܬܚܫܒܘܢ . ܦܘܪܩܢܐ ܢܗܘܐ ܠܗܘܢ . ܘܒܦܘܢܝܐ ܢܦܘܩ .
Leviticus 25:32 ܘܩܘܪ̈ܝܐ ܕܠܘ̈ܝܐ ܒ̈ܬܐ ܕܒܩܘܪ̈ܝܐ ܕܝܪܬܘܬܗܘܢ . ܦܘܪܩܢܐ ܠܥܠܡ ܢܗܘܐ ܠܠܘ̈ܝܐ .
Leviticus 25:33 ܘܕܢܦܪܘܩ ܦܘܪܩܢܐ ܡܢ ܠܘ̈ܝܐ . ܢܦܘܩ ܡܢ ܙܒܢܗ ܕܒܝܬܐ . ܘܩܪܝܬܐ ܕܝܪܬܘܬܗ ܒܦܘܢܝܐ . ܡܛܠ ܕܒ̈ܬܐ ܕܩܘܪ̈ܝܐ ܕܠܘ̈ܝܐ . ܗܢܘܢ ܐܢܘܢ ܝܪܬܘܬܗܘܢ ܒܝܢܬ ܒܢ̈ܝ ܐܝܣܪܝܠ .
Leviticus 25:34 ܘܚܩܠܐ ܕܒܣܦܪ̈ܝ ܩܘܪ̈ܝܗܘܢ ܠܐ ܬܙܕܒܢ . ܡܛܠ ܕܝܘܪܬܢܐ ܗܝ ܠܗܘܢ ܠܥܠܡ .
Leviticus 25:35 ܘܐܢ ܢܬܡܣܟܢ ܐܚܘܟ ܘܢܪܟܢ ܐܝܕܗ . ܥܡܟ ܠܐ ܬܐܚܕܝܘܗܝ ܐܝܟ ܥܡܘܪܐ ܘܐܝܟ ܬܘܬܒܐ . ܘܢܚܐ ܥܡܟ .
Leviticus 25:36 ܠܐ ܬܣܒ ܡܢܗ ܩܨܨܐ ܘܪܒܝܬܐ . ܘܕܚܠ ܡܢ ܐܠܗܟ . ܘܢܚܐ ܐܚܘܟ ܥܡܟ .
Leviticus 25:37 ܟܣܦܟ ܠܐ ܬܬܠ ܠܗ ܒܩܨܨܐ . ܘܒܪܒܝܬܐ ܠܐ ܬܬܠ ܡܐܟܘܠܬܟ .
Leviticus 25:38 ܐܢܐ ܐܢܐ ܡܪܝܐ ܐܠܗܟܘܢ ܕܐܦܩ̇ܬܟܘܢ ܡܢ ܐܪܥܐ ܕܡܨܪܝܢ . ܕܐܬܠ ܠܟܘܢ ܐܪܥܐ ܕܟܢܥܢ . ܘܐܗܘܐ ܠܟܘܢ ܐܠܗܐ .
Leviticus 25:39 ܘܐܢ ܢܬܡܣܟܢ ܐܚܘܟ ܘܢܙܕܒܢ ܠܟ . ܠܐ ܬܦܠܘܚ ܒܗ ܦܘܠܚܢܐ ܕܥܒ̈ܕܐ .
Leviticus 25:40 ܐܝܟ ܐܓܝܪܐ ܘܐܝܟ ܬܘܬܒܐ ܢܗܘܐ ܥܡܟ . ܥܕܡܐ ܠܫܢܬܐ ܕܦܘܢܝܐ ܢܗܘܐ ܥܡܟ .
Leviticus 25:41 ܘܢܦܘܩ ܡܢ ܠܘܬܟ ܗܘ ܘܒ̈ܢܘܗܝ ܥܡܗ . ܘܢܗܦܘܟ ܠܫܪܒܬܗ . ܘܠܝܪܬܘܬܐ ܕܐܒܘܗܝ ܢܗܦܘܟ .
Leviticus 25:42 ܡܛܠ ܕܥܒ̈ܕܝ ܐܢܘܢ ܕܐܦ̇ܩܬ ܐܢܘܢ ܡܢ ܐܪܥܐ ܕܡܨܪܝܢ . ܠܐ ܢܙܕܒܢܘܢ ܒܙܒܢܐ ܕܥܒ̈ܕܐ .
Leviticus 25:43 ܘܠܐ ܬܦܠܚܝܘܗܝ ܦܘܠܚܢܐ ܩܫܝܐ . ܘܕܚܠ ܡܢ ܐܠܗܟ .
Leviticus 25:44 ܘܥܒ̈ܕܝܟܘܢ ܘܐܡ̈ܗܬܟܘܢ ܕܢܗܘܘܢ ܠܟܘܢ ܡܢ ܥܡ̈ܡܐ ܕܒܚܕܪ̈ܝܟܘܢ . ܡܢܗܘܢ ܬܙܒܢܘܢ ܥܒ̈ܕܐ ܘܐܡܗ̈ܬܐ .
Leviticus 25:45 ܘܐܦ ܡܢ ܒ̈ܢܝ ܬܘ̈ܬܒܐ ܕܥܡܪܝܢ ܥܡܟܘܢ . ܡܢܗܘܢ ܬܩܢܘܢ ܘܡܢ ܫܪ̈ܒܬܗܘܢ ܕܥܡܟܘܢ . ܕܐܘܠܕܘ ܒܐܪܥܟܘܢ . ܘܢܗܘܘܢ ܠܟܘܢ ܝܘܪܬܢܐ .
Leviticus 25:46 ܘܐܘܪܬܘ ܐܢܘܢ ܠܒ̈ܢܝܟܘܢ ܒܬܪܟܘܢ ܠܡܐܪܬ ܝܘܪܬܢܐ . ܘܠܥܠܡ ܒܗܘܢ ܬܦܠܚܘܢ . ܘܒܐ̈ܚܝܟܘܢ ܒ̈ܢܝ ܐܝܣܪܐܝܠ . ܓܒܪ ܒܐܚܘܗܝ ܠܐ ܬܦܠܚܘܢ ܦܘܠܚܢܐ ܩܫܝܐ .
Leviticus 25:47 ܘܐܢ ܣܦܩܐ ܒܐ̈ܝܕܘܗܝ ܕܥܡܘܪܐ ܘܕܬܘܬܒܐ ܕܥܡܟ . ܘܢܬܡܣܟܢ ܐܚܘܟ ܥܡܗ . ܘܢܙܕܒܢ ܠܥܡܘܪܐ ܘܠܬܘܬܒܐ ܕܥܡܟ . ܐܘ ܠܐܝܠܝܕܐ ܕܫܪܒܬܐ ܕܥܡܘܪܐ ܕܥܡܟ .
Leviticus 25:48 ܡܢ ܒܬܪ ܕܢܙܕܒܢ . ܦܘܪܩܢܐ ܢܗܘܐ ܠܗ . ܚܕ ܡܢ ܐ̈ܚܘܗܝ ܢܦܪܩܝܘܗܝ .
Leviticus 25:49 ܐܘ ܕܕܗ ܐܘ ܒܪ ܕܕܗ ܢܦܪܩܝܘܗܝ . ܐܘ ܡܢ ܩܪܝܒ ܒܣܪܗ ܡܢ ܫܪܒܬܗ ܢܦܪܩܝܘܗܝ . ܘܐܢ ܬܣܦܩ ܒܐ̈ܝܕܘܗܝ ܘܢܬܦܪܩ .
Leviticus 25:50 ܢܚܫܘܒ ܥܡ ܙܒܘܢܗ ܡܢ ܫܢܬܐ ܕܐܙܕܒܢ ܠܗ . ܥܕܡܐ ܠܫܢܬܐ ܕܦܘܢܝܐ . ܘܢܗܘܐ ܟܣܦܐ ܕܙܒܢܗ . ܒܡܢܝܢܐ ܕܫܢܝ̈ܐ . ܐܝܟ ܝܘܡ̈ܬܐ ܕܐܓܝܪܐ ܢܗܘܐ ܥܡܗ .
Leviticus 25:51 ܘܐܢ ܩܝ̈ܡܢ ܬܘܒ ܣܘܓܐܐ ܕܫ̈ܢܝܐ ܠܦܘܬܗܝܢ . ܢܗܦܟ ܦܘܪܩܢܗ ܡܢ ܟܣܦܐ ܕܙܒܝܢܬܗ .
Leviticus 25:52 ܘܐܢ ܩܠܝܠ ܢܫܬܚܪ ܒܫ̈ܢܝܐ . ܥܕܡܐ ܠܫܢܬܐ ܕܦܘܢܝܐ ܢܚܫܘܒ ܥܡܗ . ܘܐܝܟ ܠܦܘܬ ܫ̈ܢܘܗܝ ܢܗܦܟ ܦܘܪܩܢܗ .
Leviticus 25:53 ܐܝܟ ܐܓܝܪܐ ܫܢܐ ܒܫܢܐ ܢܗܘܐ ܥܡܗ . ܠܐ ܢܦܠܚܝܘܗܝ ܩܫܝܐܝܬ ܠܥܢܝ̈ܟ .
Leviticus 25:54 ܘܐܢ ܠܐ ܢܬܦܪܩ ܒܗܠܝܢ . ܢܦܘܩ ܒܫܢܬܐ ܕܦܘܢܝܐ . ܗܘ ܘܒܢ̈ܘܗܝ ܥܡܗ .
Leviticus 25:55 ܡܛܠ ܕܒܢ̈ܝ ܐܝܣܪܐܝܠ ܕܝܠܝ ܐܢܘܢ ܥܒ̇̈ܕܐ . ܥܒ̈ܕܝ ܐܢܘܢ ܕܐܦ̇ܩܬ ܐܢܘܢ ܡܢ ܐܪܥܐ ܕܡܨܪܝܢ . ܐܢܐ ܐܢܐ ܡܪܝܐ ܐܠܗܟܘܢ .
Leviticus 26:1 ܠܐ ܬܥܒܕܘܢ ܠܟܘܢ ܕܚ̈ܠܬܐ ܘܨ̈ܠܡܐ . ܘܩܝܡ̈ܬܐ ܠܐ ܬܩܝܡܘܢ ܠܟܘܢ . ܘܟܐ̈ܦܐ ܕܣ̈ܓܕܬܐ ܠܐ ܬܥܒܕܘܢ ܒܐܪܥܟܘܢ . ܘܠܐ ܬܣܓܕܘܢ ܠܗܝܢ . ܐܢܐ ܐܢܐ ܡܪܝܐ ܐܠܗܟܘܢ .
Leviticus 26:2 ܦܘܩ̈ܕܢܝ ܛܪܘ . ܘܡܢ ܡܩܕܫܝ ܕܚܠܘ . ܐܢܐ ܐܢܐ ܡܪܝܐ .
Leviticus 26:3 ܐܢ ܒܢܡ̈ܘܣܝ ܬܗܠܟܘܢ ܘܦܘܩ̈ܕܢܝ ܬܛܪܘܢ . ܘܬܥܒܕܘܢ ܐܢܘܢ .
Leviticus 26:4 ܐܬܠ ܡܛܪ̈ܝܟܘܢ ܒܙܒܢܗܘܢ . ܘܐܪܥܐ ܬܬܠ ܥ̈ܠܠܬܗ̇ . ܘܐܝܠܢܐ ܕܚܩܠܐ ܢܬܠ ܦܐܪ̈ܘܗܝ .
Leviticus 26:5 ܘܬܕܪܟ ܕܪܟܬܐ ܠܩܛܦܐ . ܘܩܛܦܐ ܢܕܪܟ ܠܙܪܥܐ . ܘܬܐܟܠܘܢ ܠܚܡܟܘܢ ܘܬܣܒܥܘܢ ܘܬܬܒܘܢ ܒܐܪܥܟܘܢ ܒܫܠܝܐ .
Leviticus 26:6 ܘܐܬܠ ܫܠܡܐ ܒܐܪܥܟܘܢ . ܘܬܕܡܟܘܢ ܘܠܐ ܢܗܘܐ ܕܡܕܚܠ ܠܟܘܢ . ܘܐܒܛܠ ܚܝܘܬܐ ܒܝܫܬܐ ܡܢ ܐܪܥܐ . ܘܚܪܒܐ ܠܐ ܬܥܒܪ ܒܐܪܥܟܘܢ .
Leviticus 26:7 ܘܬܪܕܦܘܢ ܠܒ̈ܥܠܕܒܒܝܟܘܢ . ܘܢܦܠܘܢ ܩܕܡܝܟܘܢ ܒܚܪܒܐ .
Leviticus 26:8 ܘܢܪܕܦܘܢ ܚܡܫܐ ܡܢܟܘܢ ܠܡܐܐ . ܘܡܐܐ ܡܢܟܘܢ ܢܪܕܦܘܢ ܠܪܒܘܬܐ . ܘܢܦܠܘܢ ܒ̈ܥܠܕܒܒܝܟܘܢ ܩܕܡܝܟܘܢ ܒܚܪܒܐ .
Leviticus 26:9 ܘܐܬܦܢܐ ܥܠܝܟܘܢ ܘܐܟܒܪܟܘܢ ܘܐܣܓܝܟܘܢ . ܘܐܩܝܡ ܩܝܡܝ ܥܡܟܘܢ .
Leviticus 26:10 ܘܬܐܟܠܘܢ ܥܬܝܩܐ ܕܥܬܝܩ . ܘܥܬܝܩܐ ܡܢ ܩܕܡ ܚܕܬܐ ܬܦܩܘܢ .
Leviticus 26:11 ܘܐܬܠ ܡܫܟܢܝ ܒܝܢܬܟܘܢ . ܘܠܐ ܬܓܥܨ ܢܦܫܝ ܡܢܟܘܢ .
Leviticus 26:12 ܘܐܗܠܟ ܒܝܢܬܟܘܢ . ܘܐܗܘܐ ܠܟܘܢ ܐܠܗܐ . ܘܐܢܬܘܢ ܬܗܘܘܢ ܠܝ ܥܡܐ .
Leviticus 26:13 ܐܢܐ ܐܢܐ ܡܪܝܐ ܐܠܗܟܘܢ . ܕܐܦܩ̇ܬܟܘܢ ܡܢ ܐܪܥܐ ܕܡܨܪܝܢ . ܕܠܐ ܬܗܘܘܢ ܠܗܘܢ ܥܒ̈ܕܐ . ܘܬܒ̇ܪܬ ܢܝܪܐ ܕܫܘܥܒܕܟܘܢ . ܘܗܠܟܬܟܘܢ ܒܩܘܡܬܐ ܦܫܝܛܬܐ .
Leviticus 26:14 ܐܢ ܠܐ ܕܝܢ ܬܫܡܥܘܢܢܝ . ܘܠܐ ܬܥܒܕܘܢ ܗܠܝܢ ܟܠܗܘܢ ܦܘܩ̈ܕܢܐ .
Leviticus 26:15 ܐܢ ܢܡܘ̈ܣܝ ܬܣܠܘܢ . ܘܒܕܝܢ̈ܝ ܬܓܥܨ ܢܦܫܟܘܢ . ܘܠܐ ܬܥܒܕܘܢ ܟܠܗܘܢ ܦܘܩ̈ܕܢܝ . ܘܩܝ̈ܡܝ ܬܒܛܠܘܢ .
Leviticus 26:16 ܐܦ ܐܢܐ ܗܟܢܐ ܐܥܒܕ ܠܟܘܢ . ܐܦܩܘܕ ܥܠܝܟܘܢ ܬܗܪܐ . ܘܓܪܒܐ ܘܩܠܦܝܬܐ . ܘܪܕܝܐ ܕܡܓܡܪ ܥܝ̈ܢܐ . ܘܡܕܝܒ ܢܦܫܐ . ܘܬܙܪܥܘܢ ܙܪܥܟܘܢ ܣܪܝܩܐܝܬ . ܘܢܐܟܠܘܢܗ ܒ̈ܥܠܕܒܒܝܟܘܢ .
Leviticus 26:17 ܘܐܬܠ ܪܘܓܙܝ ܒܟܘܢ ܘܬܬܒܪܘܢ ܩܕܡ ܒ̈ܥܠܕܒܒܝܟܘܢ . ܘܢܫܬܠܛܘܢ ܒܟܘܢ ܣܢܐ̈ܝܟܘܢ . ܘܬܥܪܩܘܢ ܟܕ ܠܝܬ ܕܪܕܦ ܠܟܘܢ .
Leviticus 26:18 ܘܐܢ ܬܘܒ ܒܗܠܝܢ ܠܐ ܬܫܡܥܘܢܢܝ . ܐܘܣܦ ܠܡܪܕܟܘܢ ܚܕ ܒܫܒܥܐ ܠܚ̈ܛܗܝܟܘܢ .
Leviticus 26:19 ܘܐܬܒܪ ܓܐܝܘܬܐ ܕܥܘܫܢܟܘܢ . ܘܐܥܒܕ ܫܡ̈ܝܟܘܢ ܐܝܟ ܦܪܙܠܐ . ܘܐܪܥܟܘܢ ܐܝܟ ܢܚܫܐ .
Leviticus 26:20 ܘܢܓܡܪ ܚܝܠܟܘܢ ܒܣܪܝܩܘܬܐ . ܘܐܪܥܟܘܢ ܠܐ ܬܬܠ ܥ̈ܠܠܬܗ̇ . ܘܐ̈ܝܠܢܐ ܕܐܪܥܐ ܠܐ ܢܬܠܘܢ ܦܐܪ̈ܝܗܘܢ .
Leviticus 26:21 ܘܐܢ ܬܗܠܟܘܢ ܥܡܝ ܩܪܝܐܝܬ . ܘܠܐ ܬܨܒܘܢ ܠܡܫܡܥܢܝ . ܐܘܣܦ ܥܠܝܟܘܢ ܡܚ̈ܘܬܐ ܚܕ ܒܫܒܥܐ ܠܚ̈ܛܗܝܟܘܢ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .