← All works
Peshitta Leviticus Peshitta (Syriac Old Testament) · 859 sections
Single column Two columns
Leviticus 21:1 ܘܐܡܪ ܡܪܝܐ ܠܡܘܫܐ . ܐܡܪ ܠܟܗ̈ܢܐ ܒܢ̈ܝ ܐܗܪܘܢ . ܕܥܠ ܢܦܫܐ ܕܡܝܬܐ ܠܐ ܢܗܘܘܢ ܡܬܛܡܐܝܢ ܒܥܡܗܘܢ .
Leviticus 21:2 ܐܠܐ ܐܢ ܒܩܪܝܒܗ ܕܩܪܝܒ ܠܗ . ܒܐܒܘܗܝ ܘܒܐܡܗ ܘܒܒܪܗ ܘܒܒܪܬܗ ܘܒܐܚܘܗܝ
Leviticus 21:3 ܘܒܚܬܗ . ܒܬܘܠܬܐ ܕܩܪܝܒܐ ܠܗ ܕܠܐ ܗܘܬ ܠܓܒܪܐ ܢܬܛܡܐܐ .
Leviticus 21:4 ܠܐ ܢܬܛܡܐ ܒܪܒܐ ܕܥܡܗ ܕܠܐ ܢܬܛܢܦ .
Leviticus 21:5 ܘܠܐ ܢܩܕܚܘܢ ܩܘܕܚ̈ܬܐ ܒܪ̈ܫܝܗܘܢ . ܘܦܐܬܐ ܕܕܩ̈ܢܝܗܘܢ ܠܐ ܢܓܪܥܘܢ . ܘܒܒܣܪܗܘܢ ܠܐ ܢܚܪܛܘܢ ܚܘܪ̈ܛܬܐ .
Leviticus 21:6 ܐܠܐ ܢܗܘܘܢ ܩܕܝܫ̈ܝܢ ܠܐܠܗܗܘܢ . ܘܠܐ ܢܛܢܦܘܢ ܫܡܐ ܕܐܠܗܗܘܢ . ܡܛܠ ܕܩܘܪ̈ܒܢܘܗܝ ܕܡܪܝܐ ܠܚܡܐ ܕܐܠܗܗܘܢ ܗܢܘܢ ܡܩܪܒܝܢ . ܘܢܗܘܘܢ ܩܕܝܫ̈ܝܢ .
Leviticus 21:7 ܐܢܬܬܐ ܙܢܝܬܐ ܘܡܛܢܦܬܐ ܠܐ ܢܣܒܘܢ . ܘܐܢܬܬܐ ܕܫܒܝܩܐ ܡܢ ܒܥܠܗ̇ ܠܐ ܢܣܒܘܢ . ܡܛܠ ܕܩܕܝܫ ܗܘ ܠܐܠܗܗ .
Leviticus 21:8 ܩܕܫܝܗܝ ܡܛܠ ܕܠܚܡܐ ܕܐܠܗܟ ܗܘܝܘ ܡܩܪܒ . ܩܕܝܫ ܢܗܘܐ ܠܟ ܡܛܠ ܕܩܕܝܫ ܗܘ . ܐܢܐ ܐܢܐ ܡܪܝܐ ܕܡܩܕܫ ܐܢܐ ܠܟܘܢ .
Leviticus 21:9 ܘܒܪܬ ܓܒܪܐ ܟܗܢܐ ܟܕ ܬܫܪܐ ܠܡܙܢܝܘ ܠܐܒܘܗ̇ ܗܘ ܡܛܢܦܐ . ܒܢܘܪܐ ܬܐܩܕ .
Leviticus 21:10 ܘܟܗܢܐ ܪܒܐ ܡܢ ܐ̈ܚܘܗܝ ܕܡܬܢܣܟ ܥܠ ܪܫܗ ܡܫܚܐ ܕܡܫܝܚܘܬܐ . ܘܕܡܫܡܠܐ ܐܝܕܗ ܠܡܠܒܫ ܡܐ̈ܢܐ . ܪܫܗ ܠܐ ܢܦܪܘܥ . ܘܡܐ̈ܢܘܗܝ ܠܐ ܢܨܪܐ .
Leviticus 21:11 ܘܥܠ ܟܠ ܢܦܫܐ ܕܡܝܬܐ ܠܐ ܢܥܘܠ . ܘܒܐܒܘܗܝ ܘܒܐܡܗ ܠܐ ܢܬܛܢܦ .
Leviticus 21:12 ܘܡܢ ܡܩܕܫܐ ܠܐ ܢܦܘܩ . ܘܠܐ ܢܛܢܦ ܡܩܕܫܐ ܕܐܠܗܗ . ܡܛܠ ܕܟܠܝܠܐ ܕܡܫܚܐ ܕܡܫܝܚܘܬܐ ܕܐܠܗܗ ܥܠܘܗܝ . ܐܢܐ ܐܢܐ ܡܪܝܐ .
Leviticus 21:13 ܘܗܘ ܗܢܐ ܐܢܬܬܐ ܒܬܘܠܬܐ ܢܣܒ .
Leviticus 21:14 ܘܐܪܡܠܬܐ ܘܫܒܝܩܬܐ ܘܕܡܛܢܦܐ ܒܙܢܝܘܬܐ ܚܕܐ ܡܢ ܗܠܝܢ ܠܐ ܢܣܒ . ܐܠܐ ܒܬܘܠܬܐ ܡܢ ܥܡܗ ܢܣܒ ܐܢܬܬܐ .
Leviticus 21:15 ܘܠܐ ܢܛܘܫ ܙܪܥܗ ܒܥܡܗ . ܡܛܠ ܕܐܢܐ ܐܢܐ ܡܪܝܐ ܕܡܩܕܫ ܠܗ .
Leviticus 21:16 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 21:17 ܡܠܠ ܥܡ ܐܗܪܘܢ ܘܐܡܪ ܠܗ . ܓܒܪܐ ܡܢ ܙܪܥܟ ܠܕܪ̈ܝܗܘܢ ܕܢܗܘܐ ܒܗ ܡܘܡܐ . ܠܐ ܢܬܩܪܒ ܠܡܩܪܒܘ ܠܚܡܐ ܕܐܠܗܗ .
Leviticus 21:18 ܡܛܠ ܕܟܠ ܓܒܪܐ ܕܐܝܬ ܒܗ ܡܘܡܐ ܠܐ ܢܬܩܪܒ . ܓܒܪ ܕܚܓܝܪ ܐܘ ܥܘܝܪ ܐܘ ܣܪܡ . ܐܘ ܕܣܪܝܥܐ ܐܕܢܗ .
Leviticus 21:19 ܐܘ ܓܒܪܐ ܕܐܝܬ ܒܗ ܬܒܪܐ ܕܪܓܠܐ ܐܘ ܬܒܪܐ ܕܐܝܕܐ .
Leviticus 21:20 ܐܘ ܟܦܝܦ ܐܘ ܙܥܘܪ . ܐܘ ܢܬܝܪ̈ܝܢ ܓܒܝܢ̈ܘܗܝ . ܐܘ ܓܗܪ . ܐܘ ܚܘܪܘܪܐ ܐܝܬ ܒܥܝܢ̈ܘܗܝ . ܐܘ ܐܝܬ ܒܗ ܓܪܒܐ . ܐܘ ܟܘܣܬܢ . ܐܘ ܕܚܕܐ ܐܫܟܗ .
Leviticus 21:21 ܟܠ ܓܒܪܐ ܕܐܝܬ ܒܗ ܡܘܡܐ ܡܢ ܙܪܥܗ ܕܐܗܪܘܢ ܟܗܢܐ . ܠܐ ܢܬܩܪܒ ܠܡܩܪܒܘ ܩܘܪܒܢܗ ܕܡܪܝܐ . ܡܛܠ ܕܡܘܡܐ ܒܗ . ܠܠܚܡܐ ܕܐܠܗܗ ܠܐ ܢܬܩܪܒ ܠܡܩܪܒܘ .
Leviticus 21:22 ܠܚܡܐ ܕܐܠܗܗ ܒܝܬ ܩܕܘܫ ܩܘܕܫ̈ܐ . ܡܢ ܩܘܕܫܐ ܢܐܟܘܠ .
Leviticus 21:23 ܒܪܡ ܕܝܢ ܠܓܘ ܡܢ ܐ̈ܦܝ ܬܪܥܐ ܠܐ ܢܥܘܠ . ܘܠܡܕܒܚܐ ܠܐ ܢܬܩܪܒ . ܡܛܠ ܕܡܘܡܐ ܐܝܬ ܒܗ . ܘܠܐ ܢܛܘܫ ܡܩܕܫܝ . ܡܛܠ ܕܐܢܐ ܐܢܐ ܡܪܝܐ ܕܡܩܕܫ ܐܢܐ ܠܗܘܢ .
Leviticus 21:24 ܘܐܡܪ ܡܘܫܐ ܠܐܗܪܘܢ ܘܠܒܢ̈ܘܗܝ . ܘܠܟܠܗܘܢ ܒܢ̈ܝ ܐܝܣܪܝܠ .
Leviticus 22:1 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 22:2 ܐܡܪ ܠܐܗܪܘܢ ܘܠܒܢ̈ܘܗܝ . ܘܢܬܢܙܪܘܢ ܡܢ ܩܘܕܫ̈ܐ ܕܒܢ̈ܝ ܐܝܣܪܝܠ . ܘܠܐ ܢܛܢܦܘܢ ܫܡܐ ܕܩܘܕܫܝ ܡܛܠ ܕܡܩܕܫܝܢ ܐܢܘܢ ܠܝ . ܐܢܐ ܐܢܐ ܡܪܝܐ .
Leviticus 22:3 ܐܡܪ ܠܗܘܢ ܠܕܪ̈ܝܗܘܢ . ܟܠ ܓܒܪܐ ܕܢܩܪܘܒ ܡܢ ܟܠܗ ܙܪܥܟܘܢ ܠܩܘܕܫ̈ܐ ܕܡܩܕܫܝܢ ܒܢ̈ܝ ܐܝܣܪܝܠ ܠܡܪܝܐ . ܟܕ ܛܢܦܘܬܗ ܐܝܬ ܥܠܘܗܝ . ܬܐܒܕ ܢܦܫܐ ܗ̇ܝ ܡܢ ܩܕܡ ܥܝ̈ܢܝ . ܐܢܐ ܐܢܐ ܡܪܝܐ .
Leviticus 22:4 ܓܒܪ ܓܒܪ ܡܢ ܙܪܥܗ ܕܐܗܪܘܢ . ܘܗܘ ܓܪܒ ܐܘ ܕܐܒ . ܡܢ ܩܘܕܫܐ ܠܐ ܢܐܟܘܠ ܥܕܡܐ ܕܡܬܕܟܐ . ܘܡ̇ܢ ܕܢܩܪܘܒ ܠܟܠܗ̇ ܛܡܐܘܬܐ ܕܢܦܫܐ . ܐܘ ܓܒܪܐ ܕܢܦܘܩ ܡܢܗ ܙܪܥܐ ܕܡܕܡܟܐ .
Leviticus 22:5 ܐܘ ܓܒܪܐ ܕܢܩܪܘܒ ܠܟܠ ܪܚܫܐ ܕܛܡܐ ܠܗ . ܐܘ ܒܐܢܫܐ ܕܛܡܐ ܠܗ ܒܟܠܗ̇ ܛܡܐܘܬܗ .
Leviticus 22:6 ܢܦܫܐ ܕܬܩܪܘܒ ܠܗ . ܬܗܘܐ ܛܡܐܐ ܥܕܡܐ ܠܪܡܫܐ . ܘܠܐ ܢܐܟܘܠ ܡܢ ܩܘܕܫܐ . ܐܠܐ ܐܢ ܐܫܝܓ ܒܣܪܗ ܒܡ̈ܝܐ .
Leviticus 22:7 ܘܒܡܥܪ̈ܒܝ ܫܡܫܐ ܢܬܕܟܐ . ܘܗܝܕܝܢ ܢܐܟܘܠ ܡܢ ܩܘܕܫܐ . ܡܛܠ ܕܠܚܡܗ ܗܘ .
Leviticus 22:8 ܘܦܓܪܐ ܕܬܒܝܪ ܠܚܝܘܬܐ ܠܐ ܢܐܟܘܠ ܕܠܐ ܢܬܛܡܐܐ ܒܗ . ܐܢܐ ܐܢܐ ܡܪܝܐ .
Leviticus 22:9 ܘܢܛܪܘܢ ܢܛܘܪ̈ܬܝ . ܕܠܐ ܢܩܒܠܘܢ ܥܠܝܗܘܢ ܚ̈ܛܗܐ ܘܢܡܘܬܘܢ ܒܗܘܢ . ܡܛܠ ܕܛܘܫܘ ܢܦܫ̈ܬܗܘܢ . ܐܢܐ ܐܢܐ ܡܪܝܐ ܕܡܩܕܫ ܐܢܐ ܠܗܘܢ .
Leviticus 22:10 ܘܟܠ ܢܘܟܪܝܐ ܠܐ ܢܐܟܘܠ ܩܘܕܫܐ . ܬܘܬܒܐ ܕܟܗܢܐ ܘܐܓܝܪܐ ܠܐ ܢܐܟܘܠ ܩܘܕܫܐ .
Leviticus 22:11 ܘܟܗܢܐ ܟܕ ܢܙܒܢ ܢܦܫܐ . ܙܒܝܢ ܟܣܦܗ ܢܐܟܘܠ ܡܢ ܠܚܡܗ . ܘܝ̈ܠܝܕܝ ܒܝܬܗ ܗܢܘܢ ܢܐܟܠܘܢ ܡܢ ܠܚܡܗ .
Leviticus 22:12 ܘܒܪܬ ܟܗܢܐ ܟܕ ܬܗܘܐ ܠܓܒܪܐ ܢܘܟܪܝܐ . ܐܦ ܗܝ ܡܢ ܦܘܪܫܢܐ ܕܩܘܕܫܐ ܠܐ ܬܐܟܘܠ .
Leviticus 22:13 ܘܒܪܬ ܟܗܢܐ ܟܕ ܬܗܘܐ ܐܪܡܠܬܐ ܘܫܒܝܩܬܐ . ܘܒܢ̈ܝܐ ܠܝܬ ܠܗ̇ . ܘܬܗܦܘܟ ܠܒܝܬ ܐܒܘܗ̇ ܐܝܟ ܕܒܛܠܝܘܬܗ̇ . ܡܢ ܠܚܡܐ ܕܐܒܘܗ̇ ܬܐܟܘܠ . ܘܟܠ ܢܘܟܪܝܐ ܠܐ ܢܐܟܘܠ ܡܢܗ .
Leviticus 22:14 ܘܓܒܪܐ ܕܢܐܟܘܠ ܩܘܕܫܐ ܒܛܘܥܝܝ . ܢܘܣܦ ܚܕ ܡܢ ܚܡܫܐ ܥܠܘܗܝ . ܘܢܬܠܝܘܗܝ ܠܟܗܢܐ ܩܘܕܫܐ .
Leviticus 22:15 ܘܠܐ ܢܛܘܫܘܢ ܒܢܝ̈ ܐܝܣܪܝܠ ܩܘܕܫ̈ܐ ܕܡܦܪܫܝܢ ܠܡܪܝܐ .
Leviticus 22:16 ܘܢܫܩܠܘܢ ܥܠܝܗܘܢ ܥܘܠܐ ܘܚ̈ܛܗܐ . ܡܐ ܕܐܟ̇ܠܝܢ ܡܢ ܩܘܕܫ̈ܝܗܘܢ . ܡܛܠ ܕܐܢܐ ܐܢܐ ܡܪܝܐ ܕܡܩܕܫ ܠܗܘܢ .
Leviticus 22:17 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 22:18 ܡܠܠ ܥܡ ܐܗܪܘܢ ܘܥܡ ܒܢ̈ܘܗܝ ܘܥܡ ܟܠܗܘܢ ܒܢ̈ܝ ܐܝܣܪܝܠ . ܘܐܡܪ ܠܗܘܢ ܓܒܪ ܓܒܪ ܡܢ ܒܝܬ ܐܝܣܪܝܠ . ܘܡܢ ܐܝܠܝܢ ܕܡܬܦܢܝܢ ܠܘܬܝ ܕܥܡ̇ܪܝܢ ܒܐܝܣܪܝܠ . ܕܢܩܪܒ ܩܘܪܒܢܗ ܡܢ ܟܠ ܢܕܪ̈ܝܗܘܢ . ܘܡܢ ܟܠ ܦܘܪ̈ܫܢܝܗܘܢ ܕܡܩܪܒܝܢ ܠܡܪܝܐ ܝܩܕܐ ܫܠܡܐ .
Leviticus 22:19 ܠܩܘܒܠܐ ܕܟܪܐ ܕܠܝܬ ܒܗ ܡܘܡܐ . ܡܢ ܬܘܪ̈ܐ ܘܡܢ ܐܡܪ̈ܐ ܘܡܢ ܥ̈ܙܐ .
Leviticus 22:20 ܟܠ ܕܐܝܬ ܒܗ ܡܘܡܐ ܠܐ ܬܩܪܒܘܢ . ܡܛܠ ܕܠܐ ܗ̇ܘܐ ܠܟܘܢ ܠܨܒܝܢܐ .
Leviticus 22:21 ܘܓܒܪܐ ܕܢܩܪܒ ܕܒܚܐ ܫܠܡܐ ܠܡܪܝܐ . ܠܡܦܪܫ ܢܕܪܐ ܐܘ ܦܘܪܫܢܐ . ܡܢ ܬܘܪ̈ܐ ܐܘ ܡܢ ܥ̈ܙܐ . ܡܐ ܕܠܝܬ ܒܗ ܡܘܡܐ . ܢܬܩܒܠ ܐܢ ܟܠ ܡܘܡ ܠܝܬ ܒܗ .
Leviticus 22:22 ܕܥܘܝܪ ܐܘ ܕܬܒܝܪ . ܐܘ ܕܚܙܙ ܐܘ ܕܪܫܠ . ܐܘ ܕܓܪܒ ܐܘ ܕܩܣܕܢ . ܠܐ ܬܩܪܒܘܢ ܚܕ ܡܢ ܗܠܝܢ ܠܡܪܝܐ . ܘܩܘܪܒܢܐ ܡܢ ܗܠܝܢ ܠܐ ܬܣܝܡܘܢ ܥܠ ܡܕܒܚܐ ܠܡܪܝܐ .
Leviticus 22:23 ܘܬܘܪܐ ܘܐܡܪܐ ܕܣܪܝܥܐ ܐܕܢܗ ܐܘ ܕܟܪܝܐ ܐܠܝܬܗ . ܠܦܘܪܫܢܐ ܬܥܒܕܝܘܗܝ . ܒܪܡ ܠܢܕܪܐ ܠܐ ܢܬܩܒܠ .
Leviticus 22:24 ܘܕܪܨܝܨ ܘܕܦܣܝܩ ܘܕܩܛܝܥ . ܠܐ ܬܩܪܒܘܢ ܠܡܪܝܐ . ܘܠܐ ܬܥܒܕܘܢ ܒܐܪܥܟܘܢ .
Leviticus 22:25 ܘܡܢ ܝܕ ܒܪ ܢܘܟܪ̈ܝܐ ܠܐ ܬܩܪܒܘܢ ܠܚܡܐ ܕܐܠܗܟܘܢ . ܡܢ ܗܠܝܢ ܟܠܗܘܢ . ܡܛܠ ܕܡܚܒܠܝܢ ܐܢܘܢ ܘܡܘܡܐ ܐܝܬ ܒܗܘܢ . ܠܐ ܡܬܩܒܠܝܢ ܡܢܟܘܢ .
Leviticus 22:26 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 22:27 ܬܘܪܐ ܐܘ ܐܡܪܐ ܐܘ ܓܕܝܐ . ܟܕ ܢܬܝܠܕ ܢܗܘܐ ܫܒܥܐ ܝܘܡ̈ܝܢ ܒܬܪ ܐܡܗ . ܘܡܢ ܝܘܡܐ ܕܬܡܢܝܐ ܘܠܗܠ . ܢܬܩܒܠ ܩܘܪܒܢܗ ܩܘܪܒܢܐ ܠܡܪܝܐ .
Leviticus 22:28 ܘܬܘܪܐ ܐܘ ܥܪܒܐ . ܠܗ ܘܠܒܪܗ ܠܐ ܬܟܣܘܢ ܒܝܘܡܐ ܚܕ .
Leviticus 22:29 ܘܐܢ ܬܕܒܚܘܢ ܕܒܚܐ ܕܬܘܕܝܬܐ ܠܡܪܝܐ . ܠܩܘܒܠܐ ܕܘܒܚܘܗܝ .
Leviticus 22:30 ܘܒܗ ܒܝܘܡܐ ܗ̇ܘ ܢܬܐܟܠ . ܘܠܐ ܬܘܬܪܘܢ ܡܢܗ ܠܨܦܪܐ . ܐܢܐ ܐܢܐ ܡܪܝܐ .
Leviticus 22:31 ܛܪܘ ܦܘܩ̈ܕܢܝ ܘܥܒܕܘ ܐܢܘܢ . ܐܢܐ ܐܢܐ ܡܪܝܐ .
Leviticus 22:32 ܘܠܐ ܬܛܢܦܘܢ ܫܡܐ ܕܩܘܕܫܝ . ܕܐܬܩܕܫ ܒܝܢܬ ܒܢ̈ܝ ܐܝܣܪܝܠ . ܐܢܐ ܐܢܐ ܡܪܝܐ ܕܡܩܕܫ ܠܟܘܢ .
Leviticus 22:33 ܕܐܦܩ̇ܬܟܘܢ ܡܢ ܐܪܥܐ ܕܡܨܪܝܢ . ܕܐܗܘܐ ܠܟܘܢ ܐܠܗܐ . ܐܢܐ ܐܢܐ ܡܪܝܐ .
Leviticus 23:1 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 23:2 ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ . ܥܕܥܐ̈ܕܘܗܝ ܕܡܪܝܐ ܕܬܩܪܘܢ ܐܢܘܢ ܩܪ̈ܝܐ ܘܩܕܝܫ̈ܐ ܗܠܝܢ ܐܢܘܢ ܥܕܥܐ̈ܕܝ .
Leviticus 23:3 ܫܬܐ ܝܘܡ̈ܝܢ ܬܥܒܕܘܢ ܥܒ̇ܕܐ . ܘܝܘܡܐ ܫܒܝܥܝܐ ܫܒܬܐ ܘܢܝܚܐ ܬܗܘܐ ܩܘܕܫܐ ܠܡܪܝܐ . ܘܟܠ ܥܒܕ ܠܐ ܬܥܒܕܘܢ . ܫܒܬܐ ܗܝ ܠܡܪܝܐ ܒܟܠܗ ܒܝܬ ܡܥܡܪܟܘܢ .
Leviticus 23:4 ܗܠܝܢ ܥܕܥܐ̈ܕܘܗܝ ܕܡܪܝܐ . ܩܪ̈ܝܐ ܘܩܕܝܫ̈ܐ ܬܩܪܘܢ ܐܢܘܢ ܒܙܒܢܝ̈ܗܘܢ .
Leviticus 23:5 ܒܝܪܚܐ ܩܕܡܝܐ ܒܐܪܒܥܣܪܐ ܒܝܪܚܐ . ܒܝܬ ܪ̈ܡܫܐ ܦܨܚܐ ܠܡܪܝܐ .
Leviticus 23:6 ܘܒܚܡܫܥܣܪܐ ܒܗ ܒܝܪܚܐ ܗܢܐ . ܥܕܥܐܕܐ ܕܦܛܝܪ̈ܐ ܠܡܪܝܐ . ܫܒܥܐ ܝܘܡ̈ܝܢ ܦܛܝܪܐ ܬܐܟܠܘܢ .
Leviticus 23:7 ܝܘܡܐ ܩܕܡܝܐ ܩܪܐ ܘܩܕܝܫ ܢܗܘܐ ܠܟܘܢ . ܘܟܠ ܥܒܕ ܕܦܘܠܚܢܐ ܠܐ ܬܥܒܕܘܢ .
Leviticus 23:8 ܘܩܪܒܘ ܩܘܪܒܢܐ ܠܡܪܝܐ ܫܒܥܐ ܝܘܡ̈ܝܢ . ܘܝܘܡܐ ܕܫܒܥܐ ܢܗܘܐ ܩܪܐ ܘܩܕܝܫ . ܘܟܠ ܥܒܕ ܕܦܘܠܚܢܐ ܠܐ ܬܥܒܕܘܢ .
Leviticus 23:9 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 23:10 ܡܠܠ ܥܡ ܒܢ̈ܝ ܐܝܣܪܐܝܠ ܘܐܡܪ ܠܗܘܢ . ܡܐ ܕܥܠܬܘܢ ܠܐܪܥܐ ܕܝ̇ܗܒ ܐܢܐ ܠܟܘܢ . ܘܚܨܕܬܘܢ ܚܨܕܗ̇ . ܐܝܬܘ ܟܦܐ ܕܪܝܫ ܚܨܕܟܘܢ ܠܟܗܢܐ .
Leviticus 23:11 ܘܢܦܪܫܝܗ̇ ܠܟܦܐ ܩܕܡ ܡܪܝܐ ܠܩܘܒܠܐ . ܘܒܬܪ ܝܘܡܐ ܐܚܪܢܐ . ܢܦܪܫܝܗ̇ ܟܗܢܐ .
Leviticus 23:12 ܘܬܥܒܕܘܢ ܒܝܘܡܐ ܕܦܪܫܝܢ ܐܢܬܘܢ ܟܦܐ . ܐܡܪܐ ܒܪ ܫܢܬܐ ܕܠܝܬ ܒܗ ܡܘܡܐ . ܝܩܕܐ ܫܠܡܐ ܠܡܪܝܐ .
Leviticus 23:13 ܘܩܘܪܒܢܗ ܬܪ̈ܝܢ ܥܣܪ̈ܘܢܝܢ . ܡܢ ܬܪ̈ܬܝܢ ܣܐܝܢ ܢܫܝܦܐ ܕܦܝܠ ܒܡܫܚܐ . ܩܘܪܒܢܐ ܠܡܪܝܐ ܠܪܝܚ ܣܘܬܐ . ܘܢܘܩܝܗ ܚܡܪܐ ܪܘܒܥܗ ܕܗܡܝܢܐ .
Leviticus 23:14 ܘܠܚܡܐ ܘܩܠܝ̈ܬܐ ܘܦܪ̈ܝܟܬܐ . ܠܐ ܬܐܟܠܘܢ ܥܕܡܐ ܠܝܘܡܐ ܗܢܐ . ܥܕܡܐ ܠܝܘܡܐ ܕܡܝܬܝܢ ܐܢܬܘܢ ܩܘܪܒܢܐ ܠܐܠܗܟܘܢ . ܢܡܘܣܐ ܠܥܠܡ ܠܕܪ̈ܝܟܘܢ ܒܟܠܗ ܒܝܬ ܡܥܡܪܟܘܢ .
Leviticus 23:15 ܘܡܢܘ ܠܟܘܢ ܡܢ ܒܬܪܗ ܕܝܘܡܐ . ܡܢ ܝܘܡܐ ܕܡܝܬܝܢ ܐܢܬܘܢ ܟܦܐ ܕܦܘܪܫܢܐ . ܫܒܥ ܫ̈ܒܘܥܢ ܫܠܡ̈ܠܡܢ ܢܗ̈ܘܝܢ .
Leviticus 23:16 ܥܕܡܐ ܠܒܬܪ ܫܒܘܥܬܐ ܫܒܝܥܝܬܐ . ܡܢܘ ܚܡܫܝܢ ܝܘ̈ܡܝܢ . ܘܩܪܒܘ ܣܡܝܕܐ ܡܢ ܚܕܬܐ ܠܡܪܝܐ .
Leviticus 23:17 ܡܢ ܒܝܬ ܡܥܡܪܟܘܢ ܐܝܬܘ ܠܚܡܐ ܕܦܘܪܫܢܐ . ܬܪ̈ܬܝܢ ܚܚܪ̈ܢ ܡܢ ܬܪ̈ܝܢ ܥܣܪ̈ܘܢܝܢ ܕܢܫܝܦܐ ܢܗܘܝܢ . ܘܚܡܝܥ ܢܬܐ̈ܦܝܢ . ܒܟܪ̈ܐ ܠܡܪܝܐ .
Leviticus 23:18 ܘܩܪܒܘ ܥܠ ܠܚܡܐ . ܫܒܥܐ ܐܡܪ̈ܝܢ ܒܢ̈ܝ ܫܢܬܐ ܕܠܝܬ ܒܗܘܢ ܡܘܡܐ . ܘܬܘܪܐ ܚܕ ܒܪ ܒܩܪܐ . ܘܬܪ̈ܝܢ ܕܟܪ̈ܝܢ ܢܗܘܘܢ ܝܩܕܐ ܫܠܡܐ ܠܡܪܝܐ . ܘܣܡܝܕܗܘܢ ܘܢܘܩܝܗܘܢ . ܩܘܪܒܢܐ ܠܪܝܚ ܣܘܬܐ ܠܡܪܝܐ .
Leviticus 23:19 ܘܥܒܕ ܨܦܪܝܐ ܚܕ ܕܥ̈ܙܐ ܚܠܦ ܚܛܗܐ . ܘܬܪ̈ܝܢ ܐܡܪ̈ܝܢ ܒ̈ܢܝ ܫܢܬܐ ܠܕܒܚܐ ܫܠܡܐ .
Leviticus 23:20 ܘܢܦܪܘܫ ܐܢܘܢ ܟܗܢܐ ܥܠ ܠܚܡܐ ܕܒܟܪ̈ܐ . ܦܘܪܫܢܐ ܩܕܡ ܡܪܝܐ . ܥܠ ܬܪ̈ܝܢ ܐܡܪ̈ܝܢ . ܩܘܕܫܐ ܢܗܘܘܢ ܩܕܡ ܡܪܝܐ ܠܟܗܢܐ .
Leviticus 23:21 ܘܩܪܘ ܠܝܘܡܐ ܗܢܐ ܩܪܝܐ ܘܩܕܝܫܐ . ܘܟܠ ܥܒ̇ܕܐ ܕܦܘܠܚܢܐ ܠܐ ܬܥܒܕܘܢ . ܢܡܘܣܐ ܠܥܠܡ ܠܕܪ̈ܝܟܘܢ . ܒܟܠܗ ܒܝܬ ܡܥܡܪܟܘܢ .
Leviticus 23:22 ܘܡܐ ܕܚܨܕܝܢ ܐܢܬܘܢ ܚܨܕܐ ܕܐܪܥܟܘܢ . ܠܐ ܬܓܡܪܘܢ ܣܦܪ̈ܐ ܕܚܩ̈ܠܬܟܘܢ ܒܚܨܕܟܘܢ . ܘܠܩܛܐ ܕܚܨܕܟܘܢ ܠܐ ܬܠܩܛܘܢ . ܐܠܐ ܠܡܣ̈ܟܢܐ ܘܠܐܝܠܝܢ ܕܡܬܦܢܝܢ ܠܘܬܝ ܫܒܘܩܘ ܐܢܘܢ . ܐܢܐ ܐܢܐ ܡܪܝܐ ܐܠܗܟܘܢ .
Leviticus 23:23 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 23:24 ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ . ܒܚܕ ܒܝܪܚܐ ܒܝܪܚܐ ܫܒܝܥܝܐ . ܢܗܘܐ ܠܟܘܢ ܢܝܚܐ ܘܕܘܟܪܢܐ ܕܩܪܝܬܐ . ܩܪܝܐ ܘܩܕܝܫܐ ܢܗܘܐ ܠܟܘܢ .
Leviticus 23:25 ܘܟܘܠ ܥܒ̇ܕ ܕܦܘܠܚܢܐ ܠܐ ܬܥܒܕܘܢ . ܘܩܪܒܘ ܩܘܪܒܢܐ ܠܡܪܝܐ .
Leviticus 23:26 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ . ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ .
Leviticus 23:27 ܒܥܣܪܬܐ ܒܝܪܚܐ ܗܢܐ ܕܫܒܥܐ . ܝܘܡܐ ܗܘ ܕܚܘܣܝܐ . ܩܪܝܐ ܘܩܕܝܫܐ ܢܗܘܐ ܠܟܘܢ . ܘܡܟܟܘ ܢܦܫ̈ܬܟܘܢ . ܘܩܪܒܘ ܩܘܪܒܢܐ ܠܡܪܝܐ .
Leviticus 23:28 ܘܟܠ ܥܒ̇ܕ ܠܐ ܬܥܒܕܘܢ ܒܗ ܒܝܘܡܐ ܗܢܐ . ܡܛܠ ܕܝܘܡܐ ܗܘ ܕܚܘܣܝܐ ܠܡܚܣܝܘ ܥܠܝܟܘܢ ܩܕܡ ܡܪܝܐ ܐܠܗܟܘܢ .
Leviticus 23:29 ܡܛܠ ܕܟܠ ܢܦܫܐ ܕܠܐ ܬܬܡܟܟ ܒܗ ܒܝܘܡܐ ܗܢܐ . ܬܐܒܕ ܡܢ ܥܡܗ̇ .
Leviticus 23:30 ܘܟܠ ܢܦܫܐ ܕܬܥܒܕ ܟܠ ܥܒ̇ܕ ܒܗ ܒܝܘܡܐ ܗܢܐ . ܐܘܒܕܝܗ̇ ܠܢܦܫܐ ܗ̇ܝ ܡܢ ܓܘ ܥܡܗ̇ .
Leviticus 23:31 ܘܟܠ ܥܒ̇ܕ ܠܐ ܬܥܒܕܘܢ . ܢܡܘܣܐ ܠܥܠܡ ܠܕܪ̈ܝܟܘܢ . ܒܟܠܗ ܒܝܬ ܡܥܡܪܟܘܢ .
Leviticus 23:32 ܫܒܬ ܫ̈ܒܐ ܗܝ ܠܟܘܢ ܘܡܟܟܘ ܢܦܫ̈ܬܟܘܢ ܒܬܫܥܬܐ ܒܝܪܚܐ . ܒܪܡܫܐ ܒܝܬ ܪ̈ܡܫܐ . ܡܢ ܪܡܫܐ ܘܥܕܡܐ ܠܪܡܫܐ . ܐܫܒܬܘ ܫܒܝ̈ܟܘܢ .
Leviticus 23:33 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 23:34 ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ . ܒܚܡܫܥܣܪܐ ܒܝܪܚܐ ܗܢܐ ܕܫܒܥܐ . ܥܒܕܘ ܥܕܥܐܕܐ ܕܡ̈ܛܠܐ . ܫܒܥܐ ܝܘܡ̈ܝܢ ܩܕܡ ܡܪܝܐ .
Leviticus 23:35 ܝܘܡܐ ܩܕܡܝܐ ܩܪܝܐ ܘܩܕܝܫܐ ܢܗܘܐ ܠܟܘܢ . ܘܟܠ ܥܒ̇ܕ ܕܦܘܠܚܢܐ ܠܐ ܬܥܒܕܘܢ .
Leviticus 23:36 ܫܒܥܐ ܝܘܡ̈ܝܢ . ܘܩܪܒܘ ܩܘܪܒܢܐ ܠܡܪܝܐ . ܘܝܘܡܐ ܕܬܡܢܝܐ . ܩܪܝܐ ܘܩܕܝܫܐ ܢܗܘܐ ܠܟܘܢ . ܘܩܪܒܘ ܩܘܪܒܢܐ ܠܡܪܝܐ . ܘܗܘܝܬܘܢ ܟ̇ܢܫܝܢ . ܘܟܠ ܥܒܕ ܕܦܘܠܚܢܐ ܠܐ ܬܥܒܕܘܢ .
Leviticus 23:37 ܗܠܝܢ ܐܢܘܢ ܥܕܥܐ̈ܕܘܗܝ ܕܡܪܝܐ . ܕܬܩܪܘܢ ܐܢܘܢ ܩܪ̈ܝܐ ܘܩ̈ܕܝܫܐ . ܘܬܩܪܒܘܢ ܒܗܘܢ ܩܘܪܒܢܐ ܠܡܪܝܐ . ܝܩ̈ܕܐ ܫ̈ܠܡܐ ܘܣܡܝܕܐ . ܘܢܘܩ̈ܝܐ ܘܕܒܚ̈ܐ ܙܕܩܐ ܕܝܘܡܐ ܒܝܘܡܐ .
Leviticus 23:38 ܣܛܪ ܡܢ ܫܒ̈ܘܗܝ ܕܡܪܝܐ . ܘܣܛܪ ܡܢ ܩܘܪ̈ܒܢܝܟܘܢ . ܘܣܛܪ ܡܢ ܡܘܗ̈ܒܬܟܘܢ . ܘܣܛܪ ܡܢ ܟܠܗܘܢ ܢܕܪ̈ܝܟܘܢ . ܘܣܛܪ ܡܢ ܟܠܗ ܦܘܪܫܢܟܘܢ ܕܝܗܒܝܢ ܐܢܬܘܢ ܠܡܪܝܐ .
Leviticus 23:39 ܒܪܡ ܕܝܢ ܒܚܡܫܥܣܪܐ ܒܝܪܚܐ ܕܫܒܥܐ . ܡܐ ܕܚܡ̇ܠܝܢ ܐܢܬܘܢ ܥܠܠܬܐ ܕܐܪܥܐ . ܥܒܕܘ ܥܕܥܐܕܐ ܠܡܪܝܐ . ܫܒܥܐ ܝܘܡ̈ܝܢ . ܒܝܘܡܐ ܩܕܡܝܐ ܒܛܠܢܐ . ܘܒܝܘܡܐ ܕܬܡܢܝܐ ܢܝܚܐ .
Leviticus 23:40 ܣܒܘ ܠܟܘܢ ܒܝܘܡܐ ܩܕܡܝܐ . ܦܐܪ̈ܝ ܐܝ̈ܠܢܐ ܫܦܝܪ̈ܐ . ܐܛܪ̈ܘܓܐ ܘܠܒ̈ܘܬܐ ܕܕܩ̈ܠܐ . ܘܐܣܐ ܘܥܪ̈ܒܐ . ܘܚܕܘ ܩܕܡ ܡܪܝܐ ܐܠܗܟܘܢ ܫܒܥܐ ܝܘܡ̈ܝܢ . ܟܠܗܘܢ ܕܒܝܬ ܐܝܣܪܐܝܠ .
Leviticus 23:41 ܘܥܘܒܕܘܗܝ ܥܕܥܐܕܐ ܗܢܐ ܠܡܪܝܐ ܫܒܥܐ ܝܘܡ̈ܝܢ ܒܫܢܬܐ . ܢܡܘܣܐ ܠܥܠܡ ܠܕܪ̈ܝܟܘܢ . ܒܝܪܚܐ ܕܫܒܥܐ ܥܘܒܕܘܗܝ .
Leviticus 23:42 ܒܡ̈ܛܠܐ ܬܒܘ ܫܒܥܐ ܝܘܡ̈ܝܢ . ܟܠܗܘܢ ܕܒܝܬ ܐܝܣܪܝܠ ܢܬܒܘܢ ܒܡ̈ܛܠܐ .
Leviticus 23:43 ܕܢܕܥܘܢ ܕܪ̈ܝܟܘܢ . ܕܒܡ̈ܛܠܐ ܐܘܬ̇ܒܬ ܠܒ̈ܢܝ ܐܝܣܪܐܝܠ ܟܕ ܐܦܩ̇ܬ ܐܢܘܢ ܡܢ ܐܪܥܐ ܕܡܨܪܝܢ . ܐܢܐ ܐܢܐ ܡܪܝܐ ܐܠܗܟܘܢ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .