← All works
Peshitta Leviticus Peshitta (Syriac Old Testament) · 859 sections
Single column Two columns
Leviticus 26:22 ܘܐܫܕܪ ܥܠܝܟܘܢ ܚܝܘܬܐ ܕܚܩܠܐ ܘܬܓܙܝܟܘܢ . ܘܬܘܒܕ ܒܥܝܪ̈ܟܘܢ ܘܬܙܥܪܟܘܢ ܘܢܨ̈ܕܝܢ ܐܘܪ̈ܚܬܟܘܢ .
Leviticus 26:23 ܘܐܢ ܬܘܒ ܒܗܠܝܢ ܠܐ ܬܬܪܕܘܢ . ܘܬܗܠܟܘܢ ܥܡܝ ܩܪܝܐܝܬ .
Leviticus 26:24 ܐܗܠܟ ܐܦ ܐܢܐ ܥܡܟܘܢ ܩܪܝܐܝܬ . ܘܐܡܚܝܟܘܢ ܐܦ ܐܢܐ ܚܕ ܒܫܒܥܐ ܠܚ̈ܛܗܝܟܘܢ .
Leviticus 26:25 ܘܐܝܬܐ ܥܠܝܟܘܢ ܚܪܒܐ . ܕܡܬܦܪܥܐ ܦܘܪܥܢܐ ܕܩܝܡܐ . ܘܬܥܪܩܘܢ ܠܩܘܪ̈ܝܟܘܢ . ܘܐܫܕܪ ܒܟܘܢ ܡܘܬܢܐ . ܘܬܫܬܠܡܘܢ ܒܐܝܕܐ ܕܒ̈ܥܠܕܒܒܐ .
Leviticus 26:26 ܘܐܬܒܪ ܩܢܝܐ ܕܥܒܘܪܟܘܢ . ܘܢܐ̈ܦܝܢ ܥܣܪ̈ ܢܫ̈ܝܢ ܠܚܡܟܘܢ ܒܚܕ ܬܢܘܪ . ܘܢܬܠܢ ܠܟܘܢ ܠܚܡܐ ܒܡܬܩܠܐ . ܘܬܐܟܠܘܢ ܘܠܐ ܬܣܒܥܘܢ .
Leviticus 26:27 ܘܐܢ ܒܗܠܝܢ ܬܘܒ ܠܐ ܬܫܡܥܘܢܢܝ . ܘܬܗܠܟܘܢ ܥܡܝ ܩܪܝܐܝܬ .
Leviticus 26:28 ܘܐܦ ܐܢܐ ܐܗܠܟ ܥܡܟܘܢ ܒܚܡܬܐ ܘܒܩܪܝܝܘܬܐ . ܘܐܪܕܝܟܘܢ ܚܕ ܒܫܒܥܐ ܠܚ̈ܛܗܝܟܘܢ .
Leviticus 26:29 ܘܬܐܟܠܘܢ ܒܣܪܐ ܕܒܢ̈ܝܟܘܢ . ܘܒܣܪܐ ܕܒܢ̈ܬܟܘܢ ܬܐܟܠܘܢ .
Leviticus 26:30 ܘܐܚܪܒ ܦܪ̈ܟܝܟܘܢ ܘܐܘܒܕ ܕܚ̈ܠܬܟܘܢ . ܘܐܪܡܐ ܦܓܪ̈ܝܟܘܢ ܥܠ ܦܓܪ̈ܐ ܕܕܚ̈ܠܬܟܘܢ . ܘܬܓܥܨ ܢܦܫܝ ܡܢܟܘܢ .
Leviticus 26:31 ܘܐܥܒܕ ܩܘܪ̈ܝܟܘܢ ܠܚܘܪܒܐ . ܘܐܨܕܐ ܡܩܕܫܟܘܢ . ܘܠܐ ܐܪܝܚ ܪܝܚܐ ܕܣܘܬܟܘܢ .
Leviticus 26:32 ܘܐܚܪܒܝܗ̇ ܐܦ ܐܢܐ ܠܐܪܥܐ . ܘܢܬܡܗܘܢ ܥܠܝܗ̇ ܒ̈ܥܠܕܒܒܝܟܘܢ ܕܥܡ̇ܪܝܢ ܒܗ̇ .
Leviticus 26:33 ܘܠܟܘܢ ܐܒܕܪ ܒܝܬ ܥܡ̈ܡܐ . ܘܐܫܡܘܛ ܒܬܪܟܘܢ ܣܝܦܐ . ܘܬܗܘܐ ܐܪܥܟܘܢ ܠܚܒܠܐ . ܘܩܘܪ̈ܝܟܘܢ ܢܗܘܝܢ ܠܚܘܪܒܐ .
Leviticus 26:34 ܘܗܝܕܝܢ ܬܨܛܒܐ ܐܪܥܐ ܒܫ̈ܒܝܗ̇ . ܟܠܗܘܢ ܝܘܡ̈ܬܐ ܕܨܕܝܘܬܗ̇ . ܟܕ ܐܢܬܘܢ ܒܐܪܥܐ ܕܒ̈ܥܠܕܒܒܝܟܘܢ . ܘܗܝܕܝܢ ܬܫܒܬ ܐܪܥܐ ܘܬܨܛܒܐ ܒܫ̈ܒܝܗ̇ .
Leviticus 26:35 ܟܠܗܘܢ ܝܘܡ̈ܬܐ ܕܨܕܝܘܬܗ̇ . ܬܫܒܬ ܥܠ ܕܠܐ ܐܫܒܬܬ ܒܫ̈ܒܝܟܘܢ . ܟܕ ܥܡ̇ܪܝܢ ܗܘܝܬܘܢ ܒܗ̇ .
Leviticus 26:36 ܘܕܡܫܬܚܪܝܢ ܒܟܘܢ ܐܪܡܐ ܪܗܝܒܘܬܐ ܒܠܒܗܘܢ . ܒܐܪ̈ܥܬܐ ܕܒ̈ܥܠܕܒܒܝܗܘܢ . ܘܢܪܕܘܦ ܐܢܘܢ ܩܠ ܛܪܦܐ ܕܢܩ̇ܫ . ܘܢܥܪܩܘܢ ܐܝܟ ܕܥܪܩ̇ܝܢ ܡܢ ܩܕܡ ܣܝܦܐ . ܘܢܦܠܘܢ ܟܕ ܠܝܬ ܕܪܕܦ ܠܗܘܢ .
Leviticus 26:37 ܘܢܬܬܩܠܘܢ ܓܒܪ ܒܐܚܘܗܝ ܐܝܟ ܕܡܢ ܩܕܡ ܚܪܒܐ . ܟܕ ܠܝܬ ܕܪܕܦ ܠܗܘܢ . ܘܠܐ ܬܗܘܐ ܠܗܘܢ ܩܝܡܬܐ ܩܕܡ ܒܥܠܕܒܒܝ̈ܗܘܢ .
Leviticus 26:38 ܘܬܐܒܕܘܢ ܒܝܬ ܥܡ̈ܡܐ . ܘܬܐܟܘܠܟܘܢ ܐܪܥܐ ܕܒ̈ܥܠܕܒܒܝܟܘܢ .
Leviticus 26:39 ܘܐܝܠܝܢ ܕܡܫܬܚܪܝܢ ܒܟܘܢ ܢܬܡܣܘܢ ܒܥܘܠܗܘܢ . ܒܐܪܥܐ ܕܒ̈ܥܠܕܒܒܝܗܘܢ . ܘܐܦ ܒܥܘܠܐ ܕܐ̈ܒܗܝܗܘܢ ܗܢܘܢ ܢܬܡܣܘܢ .
Leviticus 26:40 ܘܢܘܕܘܢ ܥܘܠܗܘܢ ܘܥܘܠܐ ܕܐ̈ܒܗܝܗܘܢ . ܒܥܘܠܐ ܕܐܥܠܝܘ ܒܝ . ܘܕܗܠܟܘ ܥܡܝ ܒܩܪܝܝܘܬܐ .
Leviticus 26:41 ܐܦ ܐܢܐ ܐܗܠܟ ܥܡܗܘܢ ܒܩܪܝܝܘܬܐ . ܘܐܝܬܐ ܐܢܘܢ ܠܐܪܥܐ ܕܒ̈ܥܠܕܒܒܝܗܘܢ . ܘܗܝܕܝܢ ܢܬܬܒܪ ܠܒܗܘܢ ܥܘܪܠܐ . ܘܗܝܕܝܢ ܢܨܛܒܘܢ ܒܥܘܠܗܘܢ .
Leviticus 26:42 ܘܐܬܕܟܪ ܩܝܡܝ ܕܥܡ ܝܥܩܘܒ . ܘܩܝܡܝ ܕܥܡ ܐܝܣܚܩ . ܘܩܝܡܝ ܕܥܡ ܐܒܪܗܡ ܐܬܕܟܪ . ܘܐܪܥܐ ܐܬܕܟܪ .
Leviticus 26:43 ܘܐܪܥܐ ܬܫܬܒܩ ܡܢܗܘܢ . ܘܬܨܛܒܐ ܒܫ̈ܒܝܗ̇ . ܡܐ ܕܨܕܬ ܡܢܗܘܢ . ܘܗܢܘܢ ܢܨܛܒܘܢ ܒܥܘܠܗܘܢ . ܥܠ ܕܐܣܠܝܘ ܕܝܢ̈ܝ . ܘܒܦܘܩ̈ܕܢܝ ܓܥܨܬ ܢܦܫܗܘܢ .
Leviticus 26:44 ܘܐܦ ܟܕ ܗܘܘ ܒܐܪܥܐ ܕܒ̈ܥܠܕܒܒܝܗܘܢ . ܠܐ ܐܣ̇ܠܝܬ ܐܢܘܢ ܘܠܐ ܕܚ̇ܩܬ ܐܢܘܢ . ܘܠܐ ܐܘܒ̇ܕܬ ܐܢܘܢ . ܘܠܐ ܒ̇ܛܠܬ ܩܝܡܝ ܕܥܡܗܘܢ .
Leviticus 26:45 ܐܠܐ ܐܬܕܟܪܬ ܠܗܘܢ ܩܝܡܐ ܕܩܕܡ̈ܝܐ . ܡܛܠ ܕܐܢܐ ܐܢܐ ܡܪܝܐ ܐܠܗܗܘܢ . ܕܐܦܩ̇ܬ ܐܢܘܢ ܡܢ ܐܪܥܐ ܕܡܨܪܝܢ . ܠܥܝܢ ܥܡ̈ܡܐ . ܘܗ̇ܘܝܬ ܠܗܘܢ ܐܠܗܐ . ܐܢܐ ܐܢܐ ܡܪܝܐ .
Leviticus 26:46 ܗܠܝܢ ܦܘܩ̈ܕܢܐ ܘܢܡܘ̈ܣܐ ܘܕܝ̈ܢܐ . ܕܝܗܒ ܡܪܝܐ ܒܝܢܘܗܝ . ܠܒ̈ܢܝ ܐܝܣܪܝܠ ܒܛܘܪܐ ܕܣܝܢܝ ܒܐܝܕܐ ܕܡܘܫܐ .
Leviticus 27:1 ܘܡܠܠ ܡܪܝܐ ܥܡ ܡܘܫܐ ܘܐܡܪ ܠܗ .
Leviticus 27:2 ܡܠܠ ܥܡ ܒܢ̈ܝ ܐܝܣܪܝܠ ܘܐܡܪ ܠܗܘܢ . ܓܒܪܐ ܟܕ ܢܦܪܘܫ ܢܕܪܐ ܒܕܡ̈ܝܐ ܕܢܦܫ̈ܬܐ ܠܡܪܝܐ .
Leviticus 27:3 ܢܗܘܘܢ ܕܡ̈ܘܗܝ ܕܕܟܪܐ ܡܢ ܒܪ ܥܣܪ̈ܝܢ ܫ̈ܢܝܢ ܘܠܥܠ . ܘܥܕܡܐ ܠܒܪ ܫܬܝܢ ܫ̈ܢܝܢ . ܢܗܘܘܢ ܕܡ̈ܘܗܝ ܚܡܫܝܢ ܡܬܩ̈ܠܝܢ ܕܟܣܦܐ . ܒܡܬܩܠܐ ܕܩܘܕܫܐ .
Leviticus 27:4 ܘܐܢ ܢܩܒܬܐ ܗܝ . ܢܗܘܘܢ ܕܡ̈ܝܗ̇ ܬܠܬܝܢ ܡܬܩ̈ܠܝܢ .
Leviticus 27:5 ܘܐܢ ܡܢ ܒܪ ܚܡܫ ܫ̈ܢܝܢ . ܘܥܕܡܐ ܠܒܪ ܥܣܪ̈ܝܢ ܫ̈ܢܝܢ . ܢܗܘܘܢ ܕܡ̈ܘܗܝ ܕܕܟܪܐ ܥܣܪ̈ܝܢ ܡܬܩ̈ܠܝܢ . ܘܕܢܩܒܬܐ ܥܣܪܐ ܡܬܩ̈ܠܝܢ .
Leviticus 27:6 ܘܐܢ ܡܢ ܒܪ ܝܪܚܐ . ܘܥܕܡܐ ܠܒܪ ܚܡܫ ܫ̈ܢܝܢ . ܢܗܘܘܢ ܕܡ̈ܘܗܝ ܕܕܟܪܐ . ܚܡܫܐ ܡܬܩ̈ܠܝܢ ܕܟܣܦܐ . ܘܕܢܩܒܬܐ ܬܠܬܐ ܡܬܩ̈ܠܝܢ ܕܟܣܦܐ .
Leviticus 27:7 ܘܐܢ ܕܟܪܐ ܗܘ . ܡܢ ܒܪ ܫܬܝܢ ܫ̈ܢܝܢ ܘܠܥܠ . ܢܗܘܘܢ ܕܡ̈ܘܗܝ ܚܡܫܬܥܣܪ ܡܬܩ̈ܠܝܢ . ܘܕܢܩܒܬܐ ܥܣܪܐ ܡܬ̈ܩܠܝܢ .
Leviticus 27:8 ܘܐܢ ܡܣܟܝܢ ܗܘ ܡܢ ܕܡ̈ܝܐ . ܢܩܝܡܘܢܗ ܩܕܡ ܟܗܢܐ . ܘܢܦܣܘܩ ܟܗܢܐ ܕܡ̈ܘܗܝ . ܐܝܟ ܕܣܦܩܐ ܒܐ̈ܝܕܘܗܝ . ܕܡ̇ܢ ܕܢ̇ܕܪ ܢܕܪܐ . ܗܟܢܐ ܢܦܣܘܩ ܕܡ̈ܘܗܝ ܟܗܢܐ .
Leviticus 27:9 ܘܐܢ ܒܥܝܪܐ ܗܝ ܕܡܩܪܒܝܢ ܡܢܗ̇ ܩܘܪܒܢܐ ܠܡܪܝܐ . ܟܠ ܕܝ̇ܗܒ ܡܢܗ̇ ܠܡܪܝܐ . ܢܗܘܐ ܩܕܝܫ .
Leviticus 27:10 ܠܐ ܢܚܠܦܝܘܗܝ ܛܒܐ ܒܒܝܫܐ ܘܒܝܫܐ ܒܛܒܐ . ܘܐܢ ܡܚܠܦܘ ܢܚܠܦ ܒܥܝܪ̈ܐ ܒܒܥܝܪ̈ܐ . ܗܝ ܘܬܚܠܘܦܗ̇ ܢܗܘܘܢ ܩܘܕܫܐ ܠܡܪܝܐ .
Leviticus 27:11 ܘܐܢ ܒܥܝܪ̈ܐ ܗܝ ܛܡܐܬܐ ܕܠܐ ܡܩܪܒܝܢ ܡܢܗ̇ ܩܘܪܒܢܐ ܠܡܪܝܐ . ܢܩܝܡܘܢܗ̇ ܠܒܥܝܪܐ ܩܕܡ ܟܗܢܐ .
Leviticus 27:12 ܘܢܦܣܘܩ ܕܡ̈ܝܗ̇ ܟܗܢܐ ܒܝܬ ܛܒܬܐ ܠܒܝܫܬܐ . ܘܐܝܟ ܕܦ̇ܣܩ ܕܡ̈ܝܗ̇ ܟܗܢܐ ܗܟܢܐ ܢܗܘܐ .
Leviticus 27:13 ܘܐܢ ܡܦܪܩ ܢܦܪܩܝܗ̇ ܢܘܣܦ ܚܕ ܡܢ ܚܡܫܐ ܥܠ ܕܡ̈ܝܗ̇ .
Leviticus 27:14 ܘܓܒܪܐ ܐܢ ܢܩܕܫ ܒܝܬܗ ܩܘܕܫܐ ܠܡܪܝܐ . ܢܦܣܘܩ ܕܡ̈ܘܗܝ ܟܗܢܐ ܒܝܬ ܛܒܬܐ ܠܒܝܫܬܐ . ܘܐܝܟ ܕܦܣ̇ܩ ܕܡ̈ܘܗܝ ܟܗܢܐ ܗܟܢܐ ܢܩܘܡ .
Leviticus 27:15 ܘܐܢ ܗ̇ܘ ܕܡܩܕܫ ܢܦܪܩܝܘܗܝ ܠܒܝܬܗ . ܢܘܣܦ ܚܕ ܡܢ ܚܡܫܐ ܟܣܦܐ ܕܕܡ̈ܘܗܝ ܥܠܘܗܝ ܘܢܗܘܐ ܕܝܠܗ .
Leviticus 27:16 ܘܐܢ ܡܢ ܚܩܠܐ ܕܝܪܬܘܬܗ ܢܩܕܫ ܓܒܪܐ ܠܡܪܝܐ . ܢܗܘܘܢ ܕܡ̈ܝܗ̇ ܠܦܘܬ ܙܪܥܗ . ܒܝܬ ܙܪܥܐ ܕܟܘܪ ܣܥܪ̈ܝܢ . ܒܚܡܫܝܢ ܡܬܩ̈ܠܝܢ ܕܟܣܦܐ .
Leviticus 27:17 ܘܐܢ ܡܢ ܫܢܬܐ ܕܦܘܢܝܐ ܢܩܕܫ ܚܩܠܗ . ܐܝܟ ܕܡ̈ܝܗ̇ ܗܟܢܐ ܢܩܝܡ .
Leviticus 27:18 ܘܐܢ ܡܢ ܒܬܪ ܦܘܢܝܐ ܢܩܕܫ ܚܩܠܗ ܢܚܫܘܒ ܠܗ ܟܗܢܐ ܟܣܦܐ ܠܦܘܬ ܫ̈ܢܝܐ ܕܐܫܬܚܪ . ܥܕܡܐ ܠܫܢܬܐ ܕܦܘܢܝܐ . ܘܢܒܨܘܪ ܡܢ ܕܡ̈ܝܗ̇ .
Leviticus 27:19 ܘܐܢ ܡܦܪܩ ܢܦܪܩܝܗ̇ ܠܚܩܠܐ ܗ̇ܘ ܡ̇ܢ ܕܡܩܕܫ ܠܗ̇ . ܢܘܣܦ ܚܕ ܡܢ ܚܡܫܐ ܟܣܦܐ ܕܕܡ̈ܝܗ̇ ܥܠܝܗ̇ . ܘܬܗܘܐ ܕܝܠܗ .
Leviticus 27:20 ܘܐܢ ܠܐ ܢܦܪܩܝܗ̇ ܠܚܩܠܐ . ܘܢܙܒܢܝܗ̇ ܠܓܒܪܐ ܐܚܪܢܐ . ܬܘܒ ܠܐ ܬܬܦܪܩ .
Leviticus 27:21 ܐܠܐ ܬܗܘܐ ܚܩܠܐ ܡܐ ܕܢܦܩܐ ܒܦܘܢܝܐ ܩܘܕܫܐ ܠܡܪܝܐ . ܐܝܟ ܚܩܠܐ ܕܚܪܡܐ ܕܟܗܢܐ ܬܗܘܐ ܝܪܬܘܬܐ .
Leviticus 27:22 ܘܐܢ ܚܩܠܐ ܗܝ ܕܙܒܝܢܬܐ . ܘܠܐ ܗܘܐ ܚܩܠܐ ܕܝܪܬܘܬܗ ܡܩܕܫ ܓܒܪܐ ܠܡܪܝܐ .
Leviticus 27:23 ܢܚܫܘܒ ܟܗܢܐ ܕܡܝ̈ܗ̇ ܥܕܡܐ ܠܫܢܬܐ ܕܦܘܢܝܐ . ܘܢܬܠ ܕܡ̈ܝܗ̇ ܒܝܘܡܐ ܗ̇ܘ ܩܘܕܫܐ ܠܡܪܝܐ .
Leviticus 27:24 ܘܒܫܢܬܐ ܕܦܘܢܝܐ . ܬܬܦܢܐ ܚܩܠܐ ܠܡ̇ܢ ܕܙܒܢܗ̇ ܗܘܐ ܡܢܗ . ܠܡ̇ܢ ܕܕܝܠܗ ܗܝ . ܝܪܬܘܬܐ ܕܐܪܥܐ .
Leviticus 27:25 ܘܟܠܗܘܢ ܕܡ̈ܝܗ̇ ܢܗܘܘܢ ܒܡܬܩܠܐ . ܥܣܪ̈ܝܢ ܡ̈ܥܝܢ ܗ̇ܘܐ ܡܬܩܠܐ .
Leviticus 27:26 ܒܪܡ ܕܝܢ ܒܘܟܪܐ ܕܡܬܒܟܪ ܠܡܪܝܐ ܡܢ ܒܥܝܪ̈ܐ . ܠܐ ܢܩܕܫܝܘܗܝ ܓܒܪܐ . ܐܢ ܬܘܪܐ ܗܘ ܐܘ ܐܡܪܐ ܕܡܪܝܐ ܗܘ .
Leviticus 27:27 ܘܐܢ ܒܥܝܪܐ ܗܝ ܛܡܐܬܐ . ܬܬܦܪܩ ܒܕܡ̈ܝܐ . ܘܢܘܣܦ ܚܕ ܡܢ ܚܡܫܐ ܥܠܝܗ̇ . ܘܐܢ ܠܐ ܡܬܦܪܩܐ ܬܙܕܒܢ ܒܕܡ̈ܝܐ .
Leviticus 27:28 ܒܪܡ ܕܝܢ ܟܠ ܚܪܡܐ ܕܡܚܪܡ ܓܒܪܐ ܠܡܪܝܐ . ܡܢ ܟܠ ܡܕܡ ܕܐܝܬ ܠܗ . ܡܢ ܐܢܫܐ ܘܡܢ ܒܥܝܪ̈ܐ . ܘܡܢ ܚܩܠܐ ܕܝܪܬܘܬܗ . ܠܐ ܢܙܕܒܢ ܘܠܐ ܢܬܦܪܩ . ܟܠܗ ܚܪܡܐ ܩܕܘܫ ܩܘܕܫ̈ܝܢ ܗܘ ܠܡܪܝܐ .
Leviticus 27:29 ܘܟܠ ܚܪܡܐ ܕܡܚܪܡ ܡܢ ܐܢܫܐ ܠܐ ܢܬܦܪܩ . ܐܠܐ ܡܬܩܛܠܘ ܢܬܩܛܠ .
Leviticus 27:30 ܘܟܠ ܡܥܣܪܐ ܕܐܪܥܐ ܡܢ ܙܪܥܐ ܕܐܪܥܐ . ܘܡܢ ܦܐܪ̈ܐ ܕܐܝ̈ܠܢܐ . ܕܡܪܝܐ ܗܘ . ܘܩܘܕܫܐ ܗܘ ܠܡܪܝܐ .
Leviticus 27:31 ܘܐܢ ܡܦܪܩ ܢܦܪܘܩ ܓܒܪܐ ܡܢ ܡܥܣܪܗ . ܢܘܣܦ ܥܠܘܗܝ ܚܕ ܡܢ ܚܡܫܐ .
Leviticus 27:32 ܘܟܠ ܡܥܣܪ̈ܐ ܕܬܘܪ̈ܐ ܘܕܥܢܐ . ܟܠ ܕܥܒ̇ܪ ܬܚܝܬ ܚܘܛܪܐ ܕܪܥ̇ܝܐ . ܢܗܘܐ ܩܘܕܫܐ ܠܡܪܝܐ .
Leviticus 27:33 ܠܐ ܢܫܐܠ ܒܝܬ ܛܒ ܠܒܝܫ . ܘܒܝܬ ܒܝܫ ܠܛܒ . ܘܠܐ ܢܚܠܦܝܘܗܝ ܘܐܢ ܡܚܠܦܘ ܢܚܠܦܝܘܗܝ . ܗܘ ܘܬܚܠܘܦܗ ܢܗܘܐ ܩܘܕܫܐ . ܘܠܐ ܢܬܦܪܩ .
Leviticus 27:34 ܗܠܝܢ ܦܘܩ̈ܕܢܐ ܕܦܩܕ ܡܪܝܐ ܠܡܘܫܐ ܥܠ ܒܢ̈ܝ ܐܝܣܪܐܝܠ ܒܛܘܪܐ ܕܣܝܢܝ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .