← All works

Peshitta Isaiah

Peshitta (Syriac Old Testament) · 1,290 sections

1. Isaiah 22:3

   ܟܠܗܘܢ ܫ̈ܠܝܛܢܝܟܝ ܢܕܘ ܐܟܚܕܐ ܡܢ ܩܫܬܐ ܐܬܐܣܪܘ ܕܐܫܬܚܪܘ ܒܟܝ ܐܟܚܕܐ ܐܬܐܣܪܘ ܘܠܪܘܚܩܐ ܥܪܩܘ

2. Isaiah 22:4

   ܡܛܠ ܗܢܐ ܐܡ̇ܪܬ ܫܘܒܩܘܢܝ ܐܬܡܪܡܪ ܒܒܟܬܐ ܠܐ ܬܐܠܨܘܢ ܠܡܒܝܐܘܬܢܝ ܥܠ ܬܒܪܗ̇ ܕܒܪܬ ܥܡܝ

3. Isaiah 22:5

   ܡܛܠ ܕܝܘܡܐ ܕܕܠܘܚܝܐ ܘܕܕܝܫܐ ܘܕܒܟܬܐ ܠܡܪܝܐ ܐܠܗܐ ܚܝܠܬܢܐ ܒܢܚܠܐ ܕܚܙܝܘܢ ܒܨܐ ܫܘܪܐ ܘܓܥܐ ܥܠ ܛܘܪ̈ܐ

4. Isaiah 22:6

   ܘܥܝܠܡ ܫܩܠ ܩܛܪܩܐ ܒܪ̈ܟܒܐ ܕܐܢܫܐ ܦܪ̈ܫܐ ܘܫܘܪܐ ܓܠܐ ܣܟܪ̈ܐ

5. Isaiah 22:7

   ܘܢܗܘܘܢ ܓܒ̈ܝܐ ܕܥܘܡܩ̈ܝܟܝ ܡܠܝܢ ܡܪ̈ܟܒܬܐ ܘܦܪ̈ܫܐ ܢܣܬܕܪܘܢ ܥܠ ܬܪ̈ܥܐ

6. Isaiah 22:8

   ܘܝܗܘܕܐ ܢܓܠܐ ܣܕܪ̈ܐ ܘܬܚܙܐ ܒܝܘܡܐ ܗ̇ܘ ܙܝܢܐ ܕܒܝܬ ܥܒܐ

7. Isaiah 22:9

   ܘܬܘܪ̈ܥܬܐ ܕܩܪܝܬܗ ܕܕܘܝܕ ܚܙܝܬܘܢ ܕܣ̈ܓܝ ܘܟܢܫܬܘܢ ܡ̈ܝܐ ܕܝܡܬܐ ܬܚܬܝܬܐ

8. Isaiah 22:10

   ܘܡܠܝܬܘܢ ܒ̈ܬܐ ܕܐܘܪܫܠܡ ܘܥܩܪܬܘܢ ܒ̈ܬܐ ܕܬܥܫܢܘܢ ܫܘܪܐ

9. Isaiah 22:11

   ܘܩ̈ܒܝܬܐ ܥܒܕܬܘܢ ܒܝܬ ܫܘܪܐ ܠܡ̈ܝܐ ܕܝܡܬܐ ܥܬܝܩܬܐ ܘܠܐ ܚܪܬܘܢ ܠܥܒܘܕܗ̇ ܘܠܓܒܘܠܗ̇ ܡܢ ܪܘܚܩܐ ܠܐ ܚܙܝܬܘܢ

10. Isaiah 22:12

    ܘܩܪܐ ܡܪܝܐ ܐܠܗܐ ܚܝܠܬܢܐ ܒܝܘܡܐ ܗ̇ܘ ܠܒܟܬܐ ܘܠܡܪ̈ܩܕܬܐ ܘܠܩ̈ܘܕܚܬܐ ܘܠܟܒܢܐ ܕܣܩ̈ܐ

11. Isaiah 22:13

    ܘܗܐ ܒܘܣܡܐ ܘܚܕܘܬܐ ܢܟܣܬܐ ܕܬܘܪ̈ܐ ܘܢܟܣܬܐ ܕܥܢܐ ܡܐܟܘܠܬܐ ܕܒܣܪܐ ܘܡܫܬܝܐ ܕܚܡܪܐ ܢܐܟܘܠ ܘܢܫܬܐ ܡܛܠ ܕܡܚܪ ܢܡܘܬ

12. Isaiah 22:14

    ܓܠܝܐ ܗܝ ܒܐ̈ܕܢܝ ܡܪܝܐ ܚܝܠܬܢܐ ܘܐܡܪ ܠܐ ܬܣܒܘܢ ܠܟܘܢ ܚܛܝܬܐ ܗܕܐ ܥܕܡܐ ܕܬܡܘܬܘܢ ܐܡ̇ܪ ܡܪܝܐ ܐܠܗܐ ܚܝܠܬܢܐ

13. Isaiah 22:15

    ܗܟܢܐ ܐܡ̇ܪ ܡܪܝܐ ܚܝܠܬܢܐ ܙܠ ܠܘܬ ܣܘܟܢ ܗܢܐ ܠܘܬ ܫܒܢܐ ܪܒܝܬܐ ܘܐܡܪ ܠܗ

14. Isaiah 22:16

    ܡܢܐ ܥܒ̇ܕ ܐܢܬ ܗܪܟܐ ܘܡܢܐ ܐܝܬ ܠܟ ܗܪܟܐ ܕܢܩܪܬ ܠܟ ܗܪܟܐ ܩܒܪܐ ܢܩ̇ܪ ܒܪܘܡܐ ܩܒܪܗ ܘܪܫ̇ܡ ܒܟܐܦܐ ܡܫܪܝܗ

15. Isaiah 22:17

    ܗܐ ܡܪܝܐ ܡܫܕܐ ܫ̇ܕܐ ܠܟ ܓܒܪܐ ܘܡܛܥܐ ܛܥ̇ܐ ܠܟ

16. Isaiah 22:18

    ܢܐܠܨܟ ܒܐܘܠܨܢܐ ܐܝܟ ܐܘܠܨܢܐ ܕܐܣܦܪܐ ܒܐܪܥܐ ܐܪܘܚܬܐ ܕܐ̈ܝܕܝܐ ܬܡܢ ܬܡܘܬ ܘܬܡܢ ܡܪܟܒܬܐ ܕܐܝܩܪܟ ܨܥܪܐ ܕܒܝܬ ܡܪܟ

17. Isaiah 22:19

    ܘܐܗܓܡܟ ܡܢ ܐܝܩܪܟ ܘܐܣܚܦܟ ܡܢ ܩܝܡܟ

18. Isaiah 22:20

    ܘܢܗܘܐ ܒܝܘܡܐ ܗ̇ܘ ܐܡ̇ܪ ܡܪܝܐ ܐܩܪܐ ܠܥܒܕܝ ܐܠܝܩܝܡ ܒܪ ܚܠܩܝܐ

19. Isaiah 22:21

    ܘܐܠܒܫܝܘܗܝ ܟܘܬܝܢܟ ܘܒܗܡܝܢܟ ܐܚܙܩܝܘܗܝ ܘܫܘܠܛܢܟ ܐܬܠ ܒܐ̈ܝܕܘܗܝ ܘܢܗܘܐ ܐܒܐ ܠܥܡܘܪ̈ܝܗ̇ ܕܐܪܫܠܡ ܘܠܓܒܪ̈ܐ ܕܒܝܬ ܝܗܘܕܐ

20. Isaiah 22:22

    ܘܢܣܝܡ ܩ̈ܠܝܕܐ ܕܒܝܬ ܕܘܝܕ ܥܠ ܟܬܦܗ ܘܢܦܬܚ ܘܠܝܬ ܕܢܐܚܘܕ ܘܢܐܚܘܕ ܘܠܝܬ ܕܢܦܬܚ

21. Isaiah 22:23

    ܘܐܩܫܝܘܗܝ ܣܟܬܐ ܒܐܬܪܐ ܡܗܝܡܢܐ. ܘܢܗܘܐ ܟܘܪܣܝܐ ܕܐܝܩܪܐ ܠܒܝܬ ܐܒܘܗܝ

22. Isaiah 22:24

    ܘܢܬܠܘܢ ܥܠܘܗܝ ܟܠܗ ܐܝܩܪܐ ܕܒܝܬ ܐܒܘܗܝ ܡܝܩܪܐ ܘܡܫܒܚܐ ܘܟܠ ܡܐܢܐ ܙܥܘܪܐ ܡܢ ܡܐܢܐ ܕܙܡܪܐ ܘܥܕܡܐ ܠܡܐܢܐ ܕܟܢܪܐ

23. Isaiah 22:25

    ܒܝܘܡܐ ܗ̇ܘ ܐܡ̇ܪ ܡܪܝܐ ܚܝܠܬܢܐ ܬܬܥܩܪ ܣܟܬܐ ܕܢܩܝܫܐ ܒܐܬܪܐ ܡܗܝܡܢܐ ܘܬܣܬܚܦ ܘܬܦܠ ܘܢܐܒܕ ܫܩܠܐ ܕܣܝܡ ܥܠܝܗ̇ ܡܛܠ ܕܡܪܝܐ ܡܠܠ

24. Isaiah 23:1

    ܡܫܩܠܐ ܕܨܘܪ ܐܝ̈ܠܠܝܢ ܐ̈ܠܦܐ ܕܬܪܫܝܫ ܡܛܠ ܕܐܬܒܙܙ ܡܢ ܒܝܬܐ ܡܝܬܝܢܐ ܘܡܢ ܐܪܥܐ ܕܟܬܝܡ ܐܬܓܠܝ ܠܢ

25. Isaiah 23:2

    ܫܬܘܩܘ ܥܡܘܪ̈ܐ̈ ܕܓܙܪܬܐ ܬܓܪܐ ܕܨܝܕܢ ܕܥܒ̇ܪ ܒܝܡܐ ܡܠܐܘܟ

26. Isaiah 23:3

    ܒܡ̈ܝܐ ܣ̈ܓܝܐܐ ܙܪܥܐ ܕܬܓܪܐ ܚܨܕܐ ܕܢܗܪܐ ܥܠܠܬܗ ܗܘܬ ܬܐܓܘܪܬܐ ܠܥܡ̈ܡܐ

27. Isaiah 23:4

    ܒܗܬܝ ܨܝܕܢ ܡܛܠ ܕܐܡܪ ܝܡܐ ܘܥܘܫܢܗ ܕܝܡܐ ܠܐ ܚܒ̇ܠܬ ܘܠܐ ܝܠ̇ܕܬ ܘܠܐ ܪܒܝ̇ܬ ܓܕܘ̈ܕܐ ܐܦܠܐ ܪܡܪܡ̇ܬ ܒܬ̈ܘܠܬܐ

28. Isaiah 23:5

    ܡܐ ܕܐܫܬܡܥ ܠܡܨܪܝܢ ܚܒ̈ܠܐ ܢܐܚܕܘܢ ܐܢܘܢ ܐܝܟ ܫܡܥܐ ܕܨܘܪ

29. Isaiah 23:6

    ܥܒܪܘ ܠܬܪܫܝܫ ܐܝܠܠܘ ܥܡܘܪ̈ܐ̈ ܕܓܙܪܬܐ

30. Isaiah 23:7

    ܗܕܐ ܗܝ ܠܟܘܢ ܥܫܝܢܬܐ ܕܡܢ ܝܘܡ̈ܬܐ ܩܕܡ̈ܝܐ ܩܕܡܝܗ̇ ܢܐ̈ܙܠܢ ܪ̈ܓܠܝܗ̇ ܕܬܥܡܪ ܒܪܘܚܩܐ

31. Isaiah 23:8

    ܡܢܘ ܐܬܡܠܟ ܗܟܢܐ ܥܠ ܨܘܪ ܡܟܠܠܬܐ ܕܬܓܪ̈ܝܗ̇ ܪ̈ܘܪܒܢܐ ܘܟܢ̈ܥܢܝܗ̇ ܝܩܝܪ̈ܝܗ̇ ܕܐܪܥܐ

32. Isaiah 23:9

    ܡܪܝܐ ܚܝܠܬܢܐ ܐܬܪܥܝ ܠܡܒܛܠܘ ܐܝܩܪܐ ܕܟܠ ܚܝܠ ܘܠܡܨܥܪܘ ܠܟܠܗܘܢ ܝܩܝܪ̈ܝܗ̇ ܕܐܪܥܐ

33. Isaiah 23:10

    ܥܒܪܝ ܠܐܪܥܟܝ ܐܝܟ ܢܗܪܐ ܒܪܬ ܬܪܫܝܫ ܠܝܬ ܬܘܒ ܕܕܚ̇ܩ ܠܟܝ

34. Isaiah 23:11

    ܐܝܕܗ ܐܪܝܡ ܥܠ ܝܡܐ ܘܐܪܓܙ ܡ̈ܠܟܘܬܐ ܡܪܝܐ ܦܩܕ ܥܠ ܟܢܥܢ ܕܢܘܒܕ ܥܫ̈ܝܢܝܗ̇

35. Isaiah 23:12

    ܘܐܡܪ ܠܐ ܬܘܣܦܝܢ ܬܘܒ ܠܡܬܥܫܢܘ ܛܠܝܡܬܐ̈ ܒܬܘܠܬܐ ܒܪܬ ܨܝܕܢ ܩܘܡܝ ܥܒܪܝ ܠܟܬܝܡ ܘܐܦ ܬܡܢ ܠܐ ܢܢܝܚ ܠܟܝ

36. Isaiah 23:13

    ܗܐ ܐܪܥܐ ܕܟ̈ܠܕܝܐ ܗܢܘ ܥܡܐ ܕܠܐ ܗܘܐ ܐܬܘܪܝܐ ܥܒܕܗ ܠܪܘܚܐ ܘܐܩܝܡ ܒܨ̈ܘܝܐ ܒܨܘ ܣܚܪ̈ܬܗ̇ ܘܥܒܕܘܗ̇ ܠܡܦܘܠܬܐ

37. Isaiah 23:14

    ܐܝ̈ܠܠܝܢ ܐ̈ܠܦܐ ܕܬܪܫܝܫ ܡܛܠ ܕܐܬܒܙܙ ܥܘܫܢܟܝܢ

38. Isaiah 23:15

    ܢܗܘܐ ܕܝܢ ܒܝܘܡܐ ܗ̇ܘ ܬܬܛܥܐ ܨܘܪ ܫܒܥܝܢ ܫ̈ܢܝܢ ܐܝܟ ܝ̈ܘܡܝ ܡܠܟܐ ܚܕ ܘܡܢ ܒܬܪ ܫܒܥܝܢ ܫ̈ܢܝܢ ܢܙܡܪܘܢ ܠܨܘܪ ܙܡܝܪܬܐ ܕܙܢܝܬܐ

39. Isaiah 23:16

    ܣܒܝ ܟܢܪܐ ܘܐܬܟܪܟܝ ܩܪܝܬܐ ܙܢܝܬܐ ܕܐܬܛܥܝܬ ܩܘܫܝ ܫܦܝܪ ܐܣܓܝ ܙܡܪܐ ܕܬܬܕܟܪܝܢ

40. Isaiah 23:17

    ܘܢܗܘܐ ܡܢ ܒܬܪ ܫܒܥܝܢ ܫ̈ܢܝܢ ܢܦܩܘܕ ܡܪܝܐ ܠܨܘܪ ܘܢܗܦܟܝܗ̇ ܠܐܓܝܪ̈ܬܗ̇ ܘܬܙܢܐ ܒܟܠܗܝܢ ܡ̈ܠܟܘܬܐ ܕܥܠ ܐ̈ܦܝ ܐܪܥܐ

41. Isaiah 23:18

    ܘܬܗܘܐ ܬܐܓܘܪܬܗ̇ ܘܐܓܝܪ̈ܬܗ̇ ܩܘܕܫܐ ܠܡܪܝܐ ܠܐ ܢܬܬܣ̈ܝܡܢ ܒܝܬ ܓܙܐ ܘܠܐ ܢܬܢܛܪ̈ܢ ܐܠܐ ܠܕܥܡ̇ܪܝܢ ܩܕܡ ܡܪܝܐ ܬܗܘܐ ܬܐܓܘܪܬܗ̇ ܠܡܐܟܠ ܘܠܡܣܒܥ ܘܠܡܟܣܝܘ ܥܬܝܩ̈ܝܗ̇

42. Isaiah 24:1

    ܗܐ ܡܪܝܐ ܡܚܒܠ ܐܪܥܐ ܘܡܬܪܥ ܠܗ̇ ܘܣܚ̇ܦ ܐ̈ܦܝܗ̇ ܘܡܒܕܪ ܥܡܘܪ̈ܝܗ̇

43. Isaiah 24:2

    ܘܢܗܘܐ ܥܡܐ ܐܝܟ ܟܗܢܐ ܘܥܒܕܐ ܐܝܟ ܡܪܗ ܘܐܡܬܐ ܐܝܟ ܡܪܬܗ̇ ܩܢܝܐ ܐܝܟ ܡܙܒܢܢܐ ܘܝܙܘܦܐ ܐܝܟ ܡܘܙܦܢܐ ܐܝܟ ܡܪܐ ܚܘܒܬܗ ܕܚܝܒ ܠܗ

44. Isaiah 24:3

    ܡܬܚܒܠܘ ܬܬܚܒܠ ܐܪܥܐ ܘܡܬܒܙܙܘ ܬܬܒܙܙ ܡܛܠ ܕܡܪܝܐ ܡܠܠ ܦܬܓܡܐ ܗܢܐ

45. Isaiah 24:4

    ܐܠܬ ܘܝܬܒܬ ܒܐܒܠܐ ܐܪܥܐ ܐܠܬ ܘܝܬܒܬ ܘܐܬܐܒܠܬ ܬܒܝܠ ܐܠܐ ܪܘܡܗ̇ ܕܐܪܥܐ

46. Isaiah 24:5

    ܘܐܪܥܐ ܐܬܕܡܝܬ ܠܥܡܘܪ̈ܝܗ̇ ܡܛܠ ܕܥܒܪܘ ܢܡܘܣܐ ܘܚܠܦܘ ܦܘܩܕܢܐ ܘܒܛܠܘ ܩܝܡܐ ܕܥܠܡ

47. Isaiah 24:6

    ܡܛܠ ܗܠܝܢ ܬܬܒ ܒܐܒܠܐ ܐܪܥܐ ܘܢܬܚܝܒܘܢ ܟܠܗܘܢ ܥܡܘܪ̈ܝܗ̇ ܡܛܠ ܗܢܐ ܢܬܚܪܒܘܢ ܟܠܗܘܢ ܥܡܘܪ̈ܝܗ̇ ܕܐܪܥܐ ܘܢܫܬܚܪܘܢ ܐܢܫܐ ܩܠܝܠ

48. Isaiah 24:7

    ܝܬܒ ܒܐܒܠܐ ܥܒܘܪܐ ܘܐ̈ܠܝ ܓܘܦܢ̈ܐ ܘܐܬܬܢܚܘ ܟܠ ܚ̈ܕܝܝ ܠܒܐ

49. Isaiah 24:8

    ܒܛܠܬ ܚܕܘܬܐ ܘ̈ܦܠܓܐ ܘܫܠܝ ܩܠܐ ܕܕܝܨܐ ܒܛܠܬ ܚܕܘܬܐ ܘܟܢܪ̈ܐ

50. Isaiah 24:9

    ܒܙܡܪܐ ܠܐ ܢܫܬܘܢ ܚܡܪܐ ܢܡܪ ܫܟܪܐ ܠܫܬܝ̈ܘܗܝ

51. Isaiah 24:10

    ܐܬܒܙܬ ܩܪܝܬܐ ܘܐܬܬܚܕܘ ܟܠ ܒܝܬ ܡ̈ܕܢܐ

52. Isaiah 24:11

    ܝܠܠܬܐ ܥܠ ܚܡܪܐ ܒܫ̈ܘܩܐ ܒܛܠܬ ܟܠܗ̇ ܚܕܘܬܐ ܘܥܒܪ ܕܝܨܗ̇ ܕܐܪܥܐ

53. Isaiah 24:12

    ܘܐܫܬܚܪ ܒܩܪܝܬܐ ܚܒܠܐ ܘܕܘܘܢܐ ܢܦܣܩ ܬܪ̈ܥܝܗ̇

54. Isaiah 24:13

    ܗܟܢܐ ܢܗܘܐ ܒܓܘܗ̇ ܕܐܪܥܐ ܒܝܢܬ ܥܡ̈ܡܐ ܐܝܟ ܚܒܛܐ ܕܙܝܬܐ ܘܐܝܟ ܒܘܥܪܐ ܡܐ ܕܓܡܪ ܩܛܦܐ

55. Isaiah 24:14

    ܗܢܘܢ ܢܪܝܡܘܢ ܩܠܗܘܢ ܘܢܫܒܚܘܢ ܒܓܐܝܘܬܗ ܕܡܪܝܐ ܘܢܨܗܠܘܢ ܡܢ ܝܡܐ

56. Isaiah 24:15

    ܡܛܠ ܗܢܐ ܒܬܫܒܘܚܬܐ ܫܒܚܘ ܠܡܪܝܐ ܘܒܓܙܪ̈ܬܐ ܕܝܡܐ ܫܡܗ ܕܡܪܝܐ ܐܠܗܐ ܕܐܝܣܪܝܠ

57. Isaiah 24:16

    ܡܢ ܟܢ̈ܦܝܗ̇ ܕܐܪܥܐ ܙܡܝܪܬܐ ܫܡܥܢ ܚܝܠܐ ܕܙܕܝܩܐ ܕܐܡ̇ܪ ܪܐܙ ܠܝ ܪܐܙ ܠܝ ܐܘܝ ܠܝ ܥ̇ܘ̈ܠܐ ܐܥܠܝܘ ܥ̇ܘ̈ܠܐ ܥܘ̣ܠܐ ܐܥܠܝܘ

58. Isaiah 24:17

    ܕܚܠܬܐ ܘܓܘܡܨܐ ܘܦܚܐ ܥܠܝܟ̈ ܥܡܘܪܐ̈ ܕܐܪܥܐ

59. Isaiah 24:18

    ܘܡ̇ܢ ܕܢܥܪܘܩ ܡܢ ܩܠܐ ܕܕܚܠܬܐ ܢܦܠ ܒܓܘܡܨܐ ܘܡ̇ܢ ܕܢܣܩ ܡܢ ܓܘ ܓܘܡܨܐ ܢܬܬܚܕ ܒܦܚܐ ܡܛܠ ܕܡܣ̈ܘܟܐ ܡܢ ܡܪܘܡܐ ܐܬܦܬܚܘ ܘܙܥ ܫܬܐ̈ܣܝܗ̇ ܕܐܪܥܐ

60. Isaiah 24:19

    ܡܙܥ ܬܙܘܥ ܐܪܥܐ ܘܡܕܠ ܬܕܘܠ ܐܪܥܐ ܘܡܡܛ ܬܡܘܛ ܐܪܥܐ

61. Isaiah 24:20

    ܘܡܙܥ ܬܙܘܥ ܐܪܥܐ ܐܝܟ ܪܘܝܐ ܘܬܢܘܕ ܐܝܟ ܥܪܙܠܐ ܘܢܥܫܢ ܥܠܝܗ̇ ܥܘܠܗ̇ ܘܬܦܠ ܘܠܐ ܬܘܣܦ ܠܡܩܡ

62. Isaiah 24:21

    ܒܝܘܡܐ ܗ̇ܘ ܢܦܩܘܕ ܡܪܝܐ ܥܠ ܚܝ̈ܠܐ ܕܪܘܡܐ ܒܪܘܡܐ ܘܥܠ ܡ̈ܠܟܐ ܕܐܪܥܐ ܒܐܪܥܐ

63. Isaiah 24:22

    ܘܢܟܢܫܘܢ ܟܢܘܫܝܐ ܥܠ ܐܣܝܪ ܓܘܒܐ ܘܢܬܚܫܒܘܢ ܥܠ ܚܒܝܫܐ ܘܠܣܘܓܐܐ ܕܝܘܡ̈ܬܐ ܢܬܦܪܩܘܢ

64. Isaiah 24:23

    ܘܢܚܦܪ ܣܗܪܐ ܘܢܒܗܬ ܫܡܫܐ ܡܛܠ ܕܐܡܠܟ ܡܪܝܐ ܚܝܠܬܢܐ ܒܛܘܪܐ ܕܨܗܝܘܢ ܘܒܐܘܪܫܠܡ ܘܩܕܡ ܩܕܝܫ̈ܘܗܝ ܢܫܬܒܚ

65. Isaiah 25:1

    ܡܪܝܐ ܐܠܗܝ ܐܢܬ ܐܪܡܪܡܟ ܘܐܘܕܐ ܠܫܡܟ ܕܥܒܕܬ ܕܘܡܪܐ ܘܬܪܥܝܬܐ ܡܗܝܡܢܬܐ ܡܢ ܪܘܚܩܐ ܐܡܝܢ

66. Isaiah 25:2

    ܡܛܠ ܕܥܒܕܬ ܩܪܝܬܐ ܠܝܓܪܐ ܘܩܪܝܬܐ ܥܫܝܢܬܐ ܠܡܦܘܠܬܐ ܢܘܣܐ ܕܢܘܟܪ̈ܝܐ ܠܥܠܡ ܡܢ ܩܪܝܬܐ ܠܐ ܢܬܒܢܐ

67. Isaiah 25:3

    ܡܛܠ ܗܢܐ ܢܫܒܚܘܢܟ ܥܡ̈ܡܐ ܣ̈ܓܝܐܐ ܘܩܪܝܬܐ ܕܥܡ̈ܡܐ ܥܫܝ̈ܢܐ ܢܕܚܠܘܢ ܠܟ

68. Isaiah 25:4

    ܡܛܠ ܕܗܘܝܬ ܡܣܝܥܢܐ ܠܡܣܟܢܐ ܘܥܕܘܪܐ ܠܒܝ̇ܫܐ ܒܐܘܠܨܢܗ ܣܬܪܐ ܡܢ ܙܪܝܦܬܐ ܘܛܠܠܐ ܡܢ ܫܘܒܐ ܡܛܠ ܕܪܘܚܐ ܕܥܫܝܢܐ ܐܝܟ ܙܪܝܦܬܐ ܒܐܣܬܐ

69. Isaiah 25:5

    ܘܐܝܟ ܛܠܠܐ ܒܫܘܒܐ ܪܡܘܬܐ ܕܢܘܟܪ̈ܝܐ ܬܬܡܟܟ ܘܫܘܒܐ ܒܛܠܠܐ ܕܥܢ̈ܢܐ ܫܒܘܩܐ ܕܥܫܝ̈ܢܐ ܢܬܡܟܟ

70. Isaiah 25:6

    ܘܢܥܒܕ ܡܪܝܐ ܚܝܠܬܢܐ ܒܟܠܗܘܢ ܥܡ̈ܡܐ ܒܛܘܪܐ ܗܢܐ ܡܫܬܝܐ ܫܡܝܢܐ ܘܡܫܬܝܐ ܢܛܝܪܐ ܘܫܡܝܢܐ ܕܡܚܝܢܢ ܫܡܝܢܐ ܘܥܫܝܢܐ

71. Isaiah 25:7

    ܘܢܬܒܠܥ ܒܛܘܪܐ ܗܢܐ ܐ̈ܦܝ ܫܠܝܛܐ ܕܫܠܝܛ ܗܘܐ ܥܠ ܟܠܗܘܢ ܥܡ̈ܡܐ ܘܢܟܣܬܐ ܕܐܬܢܟܣܬ ܥܠ ܐ̈ܦܝ ܟܠܗܘܢ ܥܡ̈ܡܐ

72. Isaiah 25:8

    ܘܢܬܒܠܥ ܡܘܬܐ ܠܙܟܘ ܠܥܠܡܝܢ ܘܢܥܒܪ ܡܪܝܐ ܐܠܗܐ ܚܝܠܬܢܐ ܕܡܥܬܐ ܡܢ ܟܠ ܐ̈ܦܝܢ ܘܚܣܕܐ ܕܥܡܗ ܢܥܒܪ ܡܢ ܟܠܗ̇ ܐܪܥܐ ܡܛܠ ܕܡܪܝܐ ܡܠܠ

73. Isaiah 25:9

    ܘܬܐܡܪ ܒܝܘܡܐ ܗ̇ܘ ܗܢܘ ܡܪܝܐ ܐܠܗܢ ܕܣܟܝܢ ܠܗ ܢܦܪܩܢ ܗܢܘ ܡܪܝܐ ܐܠܗܢ ܕܣܟܝܢ ܠܗ ܢܕܘܨ ܘܢܚܕܐ ܒܦܘܪܩܢܗ

74. Isaiah 25:10

    ܡܛܠ ܕܬܬܢܝܚ ܐܝܕܗ ܕܡܪܝܐ ܒܛܘܪܐ ܗܢܐ ܘܢܬܕܝܫ ܡܘܐܒ ܬܚܘܬܘܗܝ ܐܝܟ ܕܡܬܕܝܫ ܬܒܢܐ ܒܓܪܓܪܐ

75. Isaiah 25:11

    ܘܢܦܪܣ ܐܝ̈ܕܘܗܝ ܒܓܘܗ ܐܝܟ ܕܡܦܪܣ ܣܚܝܐ ܠܡܣܚܐ ܘܢܡܟ ܥܘܫܢܗ ܥܡ ܫܘܘܛܐ ܕܐ̈ܝܕܘܗܝ

76. Isaiah 25:12

    ܘܒܝܬ ܡܪܕܐ ܕܥܘܫܢܐ ܕܫܘܪ̈ܝܟܝ ܢܡܟܟ ܘܢܫܦܠ ܘܢܡܛܐ ܠܐܪܥܐ ܥܕܡܐ ܠܥܦܪܐ

77. Isaiah 26:1

    ܒܗ ܒܝܘܡܐ ܗ̇ܘ ܬܙܕܡܪ ܙܡܝܪܬܐ ܗܕܐ ܒܐܪܥܐ ܕܝܗܘܕ ܩܪܝܬܐ ܕܥܫܢ ܦܘܪܩܢܗ̇ ܣܡܘ ܫܘܪܐ ܘܒܪ ܫܘܪܐ

78. Isaiah 26:2

    ܦܬܚܘ ܬܪ̈ܥܐ ܢܥܘܠ ܥܡܐ ܙܕܝܩܐ ܕܢ̇ܛܪ ܗܝܡܢܘܬܐ

79. Isaiah 26:3

    ܕܢ̇ܛܪ ܒܫܪܪܐ ܬܛܪ ܠܢ ܫܠܡܐ ܡܛܠ ܕܒܟ ܣܒܪܢ

80. Isaiah 26:4

    ܡܪܝܐ ܠܥܠܡ ܥܠܡܝܢ ܡܛܘܠ ܕܡܪܝܐ ܐܠܗܐ ܬܩܝܦܐ ܠܥܠܡܝܢ

81. Isaiah 26:5

    ܡܛܠ ܕܢܡܟ ܠܕܥܡ̇ܪܝܢ ܒܪܘܡܐ ܘܩܪܝܬܐ ܥܫܝܢܬܐ ܢܡܟܟܝܗ̇ ܥܕܡܐ ܠܐܪܥܐ ܘܢܡܛܝܗ̇ ܥܕܡܐ ܠܥܦܪܐ

82. Isaiah 26:6

    ܬܕܘܫܝܗ̇ ܪܓܠܐ ܕܒܝ̇ܫ̈ܐ ܘܗܠܟܬܐ ܕܡܣ̈ܟܢܐ

83. Isaiah 26:7

    ܫܒܝܠܐ ܬܪܝܨ ܠܡܣ̈ܟܢܐ ܘܬܪܝܨܐ ܘܫܦܝܐ ܐܘܪܚܐ ܕܙܕܝ̈ܩܐ

84. Isaiah 26:8

    ܘܐܦ ܠܐܘܪܚܐ ܕܕܝܢ̈ܝܟ ܡܪܝܐ ܣܟܝܢ ܠܫܡܟ ܘܠܕܘܟܪܢܟ ܪܓܬ ܢܦܫܢ

85. Isaiah 26:9

    ܢܦܫܝ ܐܬܐܘܐܒܬ ܠܟ ܒܠܠܝܐ ܘܐܦ ܪܘܚܝ ܒܓܘܝ ܡܩܕܡܐ ܠܘܬܟ ܡܛܠ ܕܐܝܟ ܕܝܢ̈ܝܟ ܥܠ ܐܪܥܐ ܙܕܝܩܘܬܐ ܝܠܦܘ ܥܡܘܪ̈ܝܗ̇ ܕܬܒܝܠ

86. Isaiah 26:10

    ܐܬܪܚܩ ܥܘ̇ܠܐ ܕܠܐ ܢܐܠܦ ܙܕܝܩܘܬܐ ܡܟܣܢܘܬܐ ܒܐܪܥܐ ܡܟܘܢܐ ܘܠܐ ܢܚܙܘܢ ܒܓܐܝܘܬܗ ܕܡܪܝܐ

87. Isaiah 26:11

    ܡܪܝܐ ܒܪܡܘܬܐ ܕܐ̈ܝܕܝܟ ܠܐ ܢܚܙܘܢ ܢܚܙܘܢ ܘܢܒܗܬܘܢ ܛܢܢܗ ܕܥܡܐ ܘܐܝܟ ܬܢܘܪܐ ܬܐܟܘܠ ܐܢܘܢ ܠܒ̈ܥܠܕܒܒܝܟ

88. Isaiah 26:12

    ܡܪܝܐ ܬܛܪ ܠܢ ܫܠܡܐ ܡܛܠ ܕܐܝܟ ܟܠܗܘܢ ܥ̇ܒ̈ܕܝܢ ܥܬܕܬ ܠܢ

89. Isaiah 26:13

    ܡܪܝܐ ܐܠܗܢ ܗܘܘ ܥܠܝܢ ܡܪ̈ܝܐ ܠܒܪ ܡܢܟ ܒܠܚܘܕ ܫܡܟ ܕܝܠܟ ܢܬܕܟܪ

90. Isaiah 26:14

    ܡܝ̈ܬܐ ܠܐ ܡܚ̇ܝܢ ܘܓܢܒܪ̈ܐ ܠܐ ܡܩܝܡܝܢ ܡܛܠ ܗܢܐ ܦܩܕܬ ܘܕܢܒܬ ܐܢܘܢ ܘܐܘܒܕܬ ܟܠܗ ܕܘܟܪܢܗܘܢ

91. Isaiah 26:15

    ܐܘܣܦܬ ܡܪܝܐ ܥܠ ܥܡܐ ܐܘܣܦܬ ܥܠ ܥܡܐ ܐܬܪܚܩܬ ܘܕܚܩܬ ܠܟܠܗܘܢ ܣܘ̈ܦܝܗ̇ ܕܐܪܥܐ

92. Isaiah 26:16

    ܡܪܝܐ ܒܐܘܠܨܢܐ ܦܩܕܘܟ ܘܒܚܒܘܫܝܐ ܠܚܫܘ ܡܪܕܘܬܟ

93. Isaiah 26:17

    ܐܝܟ ܒܛܢܬܐ ܕܩܪܝܒܐ ܠܡܐܠܕ ܘܡܚܒܠܐ ܘܡܝܠܠܐ ܒܚ̈ܒܠܝܗ̇ ܗܟܢܐ ܗܘܢ ܡܢ ܩܕܡܝܟ ܡܪܝܐ

94. Isaiah 26:18

    ܒܛܢܢ ܘܚܒܠܢ ܐܝܟ ܗ̈ܢܝܢ ܕܝ̈ܠܕܢ ܪ̈ܘܚܐ ܦܪܘܩܝܢ ܕܠܐ ܢܐܒܕ ܒܐܪܥܐ ܘܠܐ ܢܦܠܘܢ ܥܡܘܪ̈ܝܗ̇ ܕܬܒܝܠ

95. Isaiah 26:19

    ܢܚܘܢ ܡܝ̈ܬܝܟ ܘܫ̈ܠܕܝܗܘܢ ܢܩ̈ܘܡܢ ܘܢܬܬܥܝܪܘܢ ܘܢܫܒܚܘܢ ܫ̈ܟ̇ܒܝ ܥܦܪܐ ܡܛܠ ܕܛܠܟ ܛܠܐ ܗܘ ܕܢܘܗܪܐ ܘܐܪܥܐ ܕܓܢܒܪ̈ܐ ܬܣܬܚܦ

96. Isaiah 26:20

    ܙܠ ܥܡܝ̈ ܥܘܠ ܠܬܘ̈ܢܝܟ ܘܐܚܘܕ ܬܪ̈ܥܝܟ ܒܐ̈ܦܝܟ ܘܐܬܛܫܐ ܩܠܝܠ ܙܥܘܪ ܥܕ ܥܒ̇ܪ ܪܘܓܙܝ

97. Isaiah 26:21

    ܡܛܠ ܕܗܐ ܡܪܝܐ ܢܦ̇ܩ ܡܢ ܐܬܪܗ ܘܦܩ̇ܕ ܥܘܠܗ ܕܥܡܘܪܐ ܕܐܪܥܐ ܥܠܘܗܝ ܘܬܓܠܐ ܐܪܥܐ ܕܡܗ̇ ܘܠܐ ܬܟܣܐ ܬܘܒ ܥܠ ܩܛܝ̈ܠܝܗ̇

98. Isaiah 27:1

    ܒܝܘܡܐ ܗ̇ܘ ܢܦܩܘܕ ܡܪܝܐ ܒܚܪܒܗ ܩܫܝܬܐ ܘܪܒܬܐ ܘܥܫܝܢܬܐ ܥܠ ܠܘܝܬܢ ܚܘܝܐ ܚܪܡܢܐ ܘܥܠ ܠܘܝܬܢ ܚܘܝܐ ܥܩܠܩܠܐ ܘܢܩܛܘܠ ܠܬܢܝܢܐ ܕܒܝܡܐ

99. Isaiah 27:2

    ܒܝܘܡܐ ܗ̇ܘ ܟܪܡܐ ܕܚܡܪܐ ܥܢܘ ܠܗ

100. Isaiah 27:3

     ܐܢܐ ܡܪܝܐ ܢ̇ܛܪ ܐܢܐ ܠܗ ܐܡܝܢܐܝܬ ܐܫܩܝܘܗܝ ܘܐܦܩܘܕ ܥܠܘܗܝ ܒܠܠܝܐ ܘܒܐܝܡܡܐ ܐܛܪܝܘܗܝ

← Previous · Next → — showing 401–500 of 1,290

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.