← All works

Peshitta Isaiah

Peshitta (Syriac Old Testament) · 1,290 sections

1. Isaiah 14:27

   ܡܪܝܐ ܚܝܠܬܢܐ ܐܬܪܥܝ ܡܢܘ ܢܒܛܠ ܘܠܐܝܕܗ ܪܡܬܐ ܡܢܘ ܢܗܦܟ

2. Isaiah 14:28

   ܡܫܩܠܐ ܕܦܠܫܬ ܒܫܢܬܐ ܕܡܝܬ ܐܚܙ ܡܠܟܐ ܗܘܐ ܡܫܩܠܐ ܗܢܐ

3. Isaiah 14:29

   ܠܐ ܬܚܕܝܢ ܟܠܟܝ ܦܠܫܬܝ ܡܛܠ ܕܐܬܬܒܪ ܫܒܛܐ ܕܡܫܥܒܕܢܟܝ ܡܛܠ ܕܡܢ ܥܩܪܗ ܕܚܘܝܐ ܢܦ̇ܩ ܓܪܣܐ ܘܦܐܪ̈ܘܗܝ ܚܪܡܢܐ ܕܦ̇ܪܚ

4. Isaiah 14:30

   ܘܢܪܥܘܢ ܒܘܟܪ̈ܝ ܡܣ̈ܟܢܐ ܘܒ̇ܝ̈ܫܐ ܒܫܠܝܐ ܢܪܒܥܘܢ ܘܐܡܝܬ ܥܩܪܟܝ ܒܟܦܢܐ ܘܕܡܫܬܚܪ ܡܢܟܝ ܢܬܩܛܠ

5. Isaiah 14:31

   ܐܝܠܠܝ ܩܪܝܬܐ̈ ܒܓܢܝ ܩܪܝܬܐ ܐܬܕܠܚܬ ܦܠܫܬ ܟܠܗ̇ ܡܛܠ ܕܡܢ ܓܪܒܝܐ ܐ̇ܬܐ ܬܢܢܐ ܘܠܝܬ ܕܝܚܝܕܝ ܒܥܕܥܐ̈ܕܘܗܝ

6. Isaiah 14:32

   ܘܡܢܐ ܢܥܢܐ ܠܡܠܐܟܐ ܕܥܡ̈ܡܐ ܕܡܪܝܐ ܡܬܩܢ ܫܬܐ̈ܣܝܗ̇ ܕܨܗܝܘܢ ܘܒܗ̇ ܢܣܬܬܪܘܢ ܒ̇ܝܫ̈ܐ ܕܥܡܗ

7. Isaiah 15:1

   ܡܫܩܠܐ ܕܡܘܐܒ ܒܠܠܝܐ ܐܬܒܙܙܬ ܩܪܝܬܐ ܕܡܘܐܒ ܘܬܡܗܘ ܒܠܠܝܐ ܐܬܒܙܙܘ ܫܘܪ̈ܝܗ̇ ܕܡܘܐܒ ܘܬܘܪܘ

8. Isaiah 15:2

   ܣܠܩܘ ܠܒܝܬܐ ܕܪܝܒܘܢ ܥܠ ܥ̈ܠܘܬܐ ܠܡܒܟܐ ܥܠ ܢܒܘ ܘܥܠ ܡܕܐܒܐ ܡܘܐܒ ܡܝܠܠ ܘܒܟܠ ܪ̈ܝܫܘܗܝ ܩܘܕܚ̈ܬܐ ܘܟܠ ܕܩܢ ܓܙܝܙ

9. Isaiah 15:3

   ܒܫ̈ܘܩܘܗܝ ܐܬܟܒܢܘ ܣܩ̈ܐ ܘܥܠ ܐܓܪ̈ܐ ܘܒܫ̈ܘܩܐ ܟܠ ܐܢܫ ܡܝܠܠ ܘܢܚ̇ܬ ܒܒܟܬܐ

10. Isaiah 15:4

    ܬܝܠܠ ܚܫܒܘܢ ܘܐܠܥܠܐ ܘܥܕܡܐ ܠܝܨܘܬ ܢܫܬܡܥ ܩܠܗܝܢ ܡܛܘܠ ܗܢܐ ܡܚ̈ܣܢܘܗܝ ܕܡܘܐܒ ܢܩܥܘܢ ܘܢܦܫܗ ܬܩܥܐ ܠܗ

11. Isaiah 15:5

    ܘܠܒܝ ܥܠ ܡܘܐܒ ܢܝܠܠ ܒܪܘܚܗ ܥܕܡܐ ܠܨܥܪ ܥܓܠܬܐ ܬܘܠܬܐ ܡܛܠ ܕܒܡܣܩܬܐ ܕܠܘܚܝܬ ܟܕ ܒܟ̇ܝܢ ܢܣܩܘܢ ܒܗ̇ ܘܒܐܘܪܚܐ ܕܚܘܪܢܝܡ ܓܥܬܐ ܕܬܒܪܐ ܢܥܒܕܘܢ

12. Isaiah 15:6

    ܡܛܠ ܕܡ̈ܝܐ ܕܢܡܪܝܡ ܢܓܘܙܘܢ ܡܛܠ ܕܝܒܫ ܥܡܝܪܐ ܘܚܡܐ ܬܕܐܐ ܘܝܘܪܩܐ ܠܐ ܗܘܐ

13. Isaiah 15:7

    ܡܛܠ ܗܢܐ ܡܕܡ ܕܐܫܬܚܪ ܥܒܪ ܘܣܘܥܪܢܗܘܢ ܥܠ ܢܚܠܐ ܕܥܪܒܝܢ ܢܫܩܠܘܢ

14. Isaiah 15:8

    ܡܛܠ ܕܚܕܪܬ ܝܠܠܬܐ ܠܬܚܘܡܐ ܕܡܘܐܒ ܘܥܕܡܐ ܠܓܠܥܡ ܝܠܠܬܗ ܘܠܒܪܐ ܕܐܠܝܡ ܐܝܠܠܬܗ

15. Isaiah 15:9

    ܡܛܠ ܕܡ̈ܝܐ ܕܪܝܒܘܢ ܐܬܡܠܝܘ ܕܡܐ ܡܛܠ ܕܐܣܝܡ ܥܠ ܪܝܒܘܢ ܬܘܣܦܬܐ ܘܐܪܢܐ ܥܠ ܐܝܠܝܢ ܕܡܬܦܨܝܢ ܡܢ ܡܘܐܒ ܘܥܠ ܫܪܟܐ ܕܐܪܥܐ

16. Isaiah 16:1

    ܫܕܪ ܠܒܪ ܫܠܝܛܐ ܕܐܪܥܐ ܡܢ ܟܐܦܐ ܕܡܕܒܪܐ ܠܛܘܪܐ ܕܒܪܬ ܨܗܝܘܢ

17. Isaiah 16:2

    ܘܢܗܘܐ ܐܝܟ ܦܪܚܬܐ ܕܡܫܢܝܐ ܩܢܗ̇ ܘܒܢ̈ܬ ܡܘܐܒ ܫܒܝ̈ܩܬܐ ܢܗ̈ܘܝܢ ܒܡܥܒܪܬܐ ܕܐܪܢܘܢ

18. Isaiah 16:3

    ܐܝܬܝ ܬܪܥܝܬܐ ܘܥܒܕܝ ܬܘܓܢܐ ܣܝܡܝ ܐܝܟ ܠܠܝܐ ܛܠܠܟܝ ܡܨܥܬ ܛܗܪܐ ܛܫܝ ܠܕܛܥ̇ܝܢ ܘܠܕܡܒܕܪܝܢ ܠܐ ܬܓܠܝܢ

19. Isaiah 16:4

    ܢܥܡܪܘܢ ܒܟܝ ܡܒܕܪ̈ܐ ܕܡܘܐܒ ܗܘܝ ܠܗܘܢ ܣܬܪܐ ܡܢ ܩܕܡ ܒܙܘܙܐ ܡܛܠ ܕܓܡܪ ܕܚܝܚܐ ܘܣܦ ܒܙܘܙܐ ܘܓܡܪ ܕܝܘܫܐ ܡܢ ܐܪܥܐ

20. Isaiah 16:5

    ܘܢܬܩܢ ܟܘܪܣܝܐ ܒܛܝܒܘܬܐ ܘܢܬܒ ܥܠܘܗܝ ܒܩܘܫܬܐ ܒܡܫܟܢܗ ܕܕܘܝܕ ܕܝ̇ܢܐ ܘܡܥܩܒ ܕܝ̣ܢܐ ܘܡܣܪܗܒ ܙܕܝܩܘܬܐ

21. Isaiah 16:6

    ܫܡܥܢ ܓܐܝܘܬܗ ܕܡܘܐܒ ܕܛܒ ܐܬܓܐܝ ܓܐܝܘܬܗ ܘܪܡܘܬܗ ܘܐܠܡܗ ܠܐ ܗܘܐ ܗܟܢܐ ܒܕܩܘ ܥܠܘܗܝ ܩܨܘ̈ܡܘܗܝ

22. Isaiah 16:7

    ܡܛܠ ܗܢܐ ܢܝܠܠ ܡܘܐܒ ܘܥܠ ܡܘܐܒ ܟܠܗ ܢܝܠܠ ܥܠ ܐ̈ܫܝܬܐ ܕܫܘܪ̈ܐ ܕܡܬܗ̈ܓܡܢ ܬܢܗܡܘܢ ܐܝܟ ܟܪ̈ܝܗܐ

23. Isaiah 16:8

    ܡܛܠ ܕܚ̈ܩܠܬܐ ܕܚܫܒܘܢ ܚܪܒ ܓܦܬܐ ܕܣܒܡܐ ܓܢܒܪ̈ܐ ܕܥܡ̈ܡܐ ܓܡܘ ܫܒ̈ܘܩܝܗ̇ ܘܥܕܡܐ ܠܝܥܙܝܪ ܡܛܘ ܘܛܥܘ ܒܡܕܒܪܐ ܥܢܩ̈ܝܗ̇ ܢܓܕܘ ܘܥܒܪܘ ܝܡܐ

24. Isaiah 16:9

    ܡܛܠ ܗܢܐ ܐܒܟܝܟܝ ܒܒܟܬܐ ܕܝܥܙܝܪ ܓܦܬܐ̈ ܕܣܒܡܐ ܐܪܘܝܟܝ ܡܢ ܕܡܥܬܟܝ ܚܫܒܘܢ ܘܐܠܥܠܐ ܡܛܠ ܕܥܠ ܚܨܕܟܝ ܘܥܠ ܩܛܦܟܝ ܕܝܘܫܐ ܢܦܠ

25. Isaiah 16:10

    ܘܬܥܒܪ ܚܕܘܬܐ ܘܕܝܨܐ ܡܢ ܟܪܡܠܐ ܘܒܟܪܡܠܐ ܠܐ ܢܚܕܘܢ ܘܠܐ ܢܥܨܪܘܢ ܚܡܪܐ ܒܡܥܨܪܬܐ ܘܠܐ ܢܕܘܫ ܕܝܘܫܐ ܡܛܠ ܕܠܕܝܘܫܐ ܐܒܛܠ

26. Isaiah 16:11

    ܡܛܠ ܗܢܐ ܟܪܣܝ ܥܠ ܡܘܐܒ ܐܝܟ ܟܢܪܐ ܬܡܠܠ ܘܓܘܝ ܥܠ ܫܘܪܐ ܕܡܬܗܓܡ

27. Isaiah 16:12

    ܘܡܐ ܕܚܙܐ ܕܠܐܝ ܡܘܐܒ ܥܠ ܥ̈ܠܘܬܐ ܢܐܬܐ ܠܡܩܕܫܐ ܠܡܨܠܝܘ ܘܠܐ ܢܫܟܚ

28. Isaiah 16:13

    ܗܢܐ ܦܬܓܡܐ ܡܠܠ ܡܪܝܐ ܥܠ ܡܘܐܒ ܡܢ ܗܝܕܝܢ

29. Isaiah 16:14

    ܘܗܫܐ ܡܠܠ ܡܪܝܐ ܘܐܡܪ ܒܬܠܬ ܫ̈ܢܝܢ ܐܝܟ ܫ̈ܢܝܐ ܕܐܓܝܪܐ ܢܨܛܥܪ ܐܝܩܪܗ ܕܡܘܐܒ ܥܠ ܣܘܓܐܐ ܕܥܡܗ ܘܢܫܬܚܪ ܩܠܝܠ ܙܥܘܪ ܘܠܐ ܣܓܝ

30. Isaiah 17:1

    ܡܫܩܠܐ ܕܕܪܡܣܘܩ ܗܐ ܕܪܡܣܘܩ ܡܥܒܪܐ ܡܢ ܩܪܝܬܐ ܘܬܗܘܐ ܠܚܘܪܒܐ ܘܠܡܦܘܠܬܐ

31. Isaiah 17:2

    ܘܢܗ̈ܘܝܢ ܫܒܝ̈ܩܬܐ ܩܘܪ̈ܝܐ ܕܥܕܘܥܝܪ ܘܢܗ̈ܘܝܢ ܠܓܙܪ̈ܐ ܕܢܪܒܥܘܢ ܒܗܝܢ ܘܠܐ ܢܗܘܐ ܠܗܘܢ ܡܗܪܢܐ

32. Isaiah 17:3

    ܘܢܬܒܛܠ ܥܘܫܢܐ ܡܢ ܐܦܪܝܡ ܘܡܠܟܘܬܐ ܡܢ ܕܪܡܣܘܩ ܘܫܪܟܐ ܕܐܦܪܝܡ ܐܝܟ ܐܝܩܪܐ ܕܒܢ̈ܝ ܐܝܣܪܝܠ ܢܗܘܘܢ ܐܡ̇ܪ ܡܪܝܐ ܚܝܠܬܢܐ

33. Isaiah 17:4

    ܘܢܗܘܐ ܒܝܘܡܐ ܗ̇ܘ ܢܬܡܣܟܢ ܐܝܩܪܗ ܕܝܥܩܘܒ ܘܫܘܡܢܐ ܕܒܣܪܗ ܢܬܪܙܐ

34. Isaiah 17:5

    ܘܢܗܘܐ ܐܝܟ ܗ̇ܘ ܕܟܢ̇ܫ ܚܨܕܐ ܕܩܝܡܬܐ ܘܕܪܥܗ ܫܒ̈ܠܐ ܚܨ̇ܕ ܘܢܗܘܐ ܐܝܟ ܗ̇ܘ ܕܡܠܩܛ ܫܒ̈ܠܐ ܒܥܘܡܩܐ ܕܪܦܐܝܡ

35. Isaiah 17:6

    ܘܢܫܬܚܪ ܒܗ ܒܘܥܪܐ ܐܝܟ ܙܝܬܐ ܕܚܒܝܛ ܘܬܪ̈ܝܢ ܬܠܬܐ ܙܝ̈ܬܝܢ ܒܪܝܫ ܟܢܐ ܒܣ̈ܘܟܘܗܝ ܘܐܪ̈ܒܥܐ ܘܚܡܫܐ ܐܡ̇ܪ ܡܪܝܐ ܐܠܗܐ ܕܐܝܣܪܝܠ

36. Isaiah 17:7

    ܒܗ ܒܝܘܡܐ ܗ̇ܘ ܢܬܬܟܠ ܐܢܫ ܥܠ ܥܒܘܕܗ ܘܥܝ̈ܢܘܗܝ ܢܚܘܪ̈ܢ ܠܩܕܝܫܐ ܕܐܝܣܪܝܠ

37. Isaiah 17:8

    ܘܠܐ ܢܬܬܟܠ ܥܠ ܡܕܒ̈ܚܐ ܕܥܒܕ ܐ̈ܝܕܘܗܝ ܘܥܒܕ ܨܒ̈ܥܬܗ ܘܠܐ ܢܚܘܪ ܒܦܬܟܪ̈ܐ ܘܒܕܚ̈ܠܬܐ

38. Isaiah 17:9

    ܒܗ ܒܝܘܡܐ ܗ̇ܘ ܢܗ̈ܘܝܢ ܩܘܪ̈ܝܐ ܕܥܘܫܢܗ ܐܝܟ ܓܘܒܐ ܕܚܪܫ ܘܕܐܡܝܪ ܕܐܫܬܒܩ ܡܢ ܩܕܡ ܒܢ̈ܝ ܐܝܣܪܝܠ ܘܗܘܝܬܝ ܠܚܒܠܐ

39. Isaiah 17:10

    ܘܛܥܝܬܝ ܠܐܠܗܐ ܦܪܘܩܟܝ ܘܠܬܩܝܦܐ ܡܥܫܢܢܟܝ ܠܐ ܐܬܕܟܪܬܝ ܡܛܠ ܗܢܐ ܬܨܒܝܢ ܢܨܒܬܐ ܝܐܝܬܐ ܒܫ̈ܒܘܩܐ ܢܘܟܪ̈ܝܐ ܬܙܪܥܝܢܗ̇

40. Isaiah 17:11

    ܒܝܘܡܐ ܕܬܨܒܝܢܗ̇ ܢܦܘܩ ܣܡܕܪܐ ܘܒܨܦܪܐ ܙܪܥܟܝ ܬܦܪܥܝܢ ܐܝܟ ܢܝܪܐ ܕܩܛܦܐ ܒܝܘܡܐ ܟܪܝܐ ܘܐܝܟ ܟܐܒܐ ܕܐܢܫܐ

41. Isaiah 17:12

    ܘܝ ܠܚܝܠܐ ܕܥܡ̈ܡܐ ܣ̈ܓܝܐܐ ܕܐ̇ܙܠ ܩܠܗܘܢ ܐܝܟ ܩܠܐ ܕܝܡ̈ܡܐ ܘܪܓܘܫܝܐ ܕܐ̈ܡܘܬܐ ܐܝܟ ܩܠܐ ܕܡ̈ܝܐ ܣ̈ܓܝܐܐ

42. Isaiah 17:13

    ܢܓܥܘܪ ܒܗ ܘܢܥܪܘܩ ܠܪܘܚܩܐ ܘܢܪܗܛ ܐܝܟ ܕܚܝܚܐ ܕܛܘܪ̈ܐ ܩܕܡ ܪܘܚܐ ܘܐܝܟ ܓܠܐ ܩܕܡ ܥܠܥܠܐ

43. Isaiah 17:14

    ܒܙܒܢܐ ܕܪܡܫܐ ܘܗܐ ܚܘܛܦܐ ܥܕܠܐ ܗܘܐ ܨܦܪܐ ܘܠܐ ܢܫܬܚܪ ܗܕܐ ܗܝ ܦܠܓܘܬܐ ܕܕܝܘܫܢ ܘܡܢܬܐ ܕܒܙܘܙܢ

44. Isaiah 18:1

    ܘܝ ܠܐܪܥܐ ܕܛܠܠܐ ܕܟܢ̈ܦܐ ܕܒܥܒܪ ܢܗܪ̈ܘܬܐ ܕܟܘܫ

45. Isaiah 18:2

    ܕܡܫܕܪ ܗܡܝܪ̈ܐ ܒܝܡܐ ܘܒܡܐ̈ܢܐ ܕܦܦܝܪܘܢ ܥܠ ܐ̈ܦܝ ܡ̈ܝܐ ܐܙܠܘ ܐܝ̈ܙܓܕܐ ܩ̈ܠܝܠܐ ܠܘܬ ܥܡܐ ܕܡܠܝܓ ܘܥܩܝܪ ܠܘܬ ܥܡܐ ܕܚܝܠܐ ܡܢܗ ܘܠܗܠ ܥܡܐ ܕܡܫܟܪ ܘܕܝܫ ܕܒܙܘ ܢܗܪ̈ܘܬܐ ܐܪܥܗ

46. Isaiah 18:3

    ܟܠܗܘܢ ܥܡܘܪ̈ܝܗ̇ ܕܬܒܝܠ ܕܫܪܝܢ ܒܐܪܥܐ ܡܐ ܕܫܩܠܘ ܐܬܐ ܛܘܪ̈ܐ ܬܚܙܘܢ ܘܡܐ ܕܩܪܐ ܫܝܦܘܪܐ ܬܫܡܥܘܢ

47. Isaiah 18:4

    ܡܛܠ ܕܗܟܢܐ ܐܡܪ ܠܝ ܡܪܝܐ ܐܫܠܐ ܘܚܘܪ ܒܛܘܝܒܝ ܐܝܟ ܚܘܡܐ ܨܚܝܚܐ ܕܥܠ ܢܗܪܐ ܘܐܝܟ ܥܢܢܐ ܕܛܠܐ ܒܝܘܡܐ ܕܚܨܕܐ

48. Isaiah 18:5

    ܡܛܠ ܕܡܢ ܩܕܡ ܚܨܕܐ ܓܡܪ ܦܪܥܐ ܘܗܒܒܐ ܚܣܠ ܘܢܗܘܐ ܥܘܦܝܐ ܘܢܦܣܘܩ ܙܠܝܠܐ ܒܡܓܠܐ ܘܫܒܘܩܐ ܢܥܒܪ ܘܢܦܨ

49. Isaiah 18:6

    ܘܢܫܬܒܩܘܢ ܐܟܚܕܐ ܠܛܝܪܐ ܕܛܘܪ̈ܐ ܘܠܚܝܘܬܐ ܕܐܪܥܐ ܘܬܟܢܫ ܥܠܘܗܝ ܛܝܪܐ ܘܟܠܗ̇ ܚܝܘܬܐ ܕܐܪܥܐ ܥܠܘܗܝ ܬܪܓܙ

50. Isaiah 18:7

    ܒܗ ܒܝܘܡܐ ܗ̇ܘ ܢܘܒܠ ܩܘܪ̈ܒܢܐ ܠܡܪܝܐ ܚܝܠܬܢܐ ܥܡܐ ܡܠܝܓܐ ܘܥܩܝܪܐ ܥܡܐ ܕܚܝܠܐ ܡܢܗ ܘܠܗܠ ܥܡܐ ܕܡܫܟܪ ܘܕܝܫ ܕܒܙܘ ܢܗܪ̈ܘܬܐ ܐܪܥܗ ܠܐܬܪܐ ܕܫܡܗ ܕܡܪܝܐ ܚܝܠܬܢܐ ܠܛܘܪܐ ܕܨܗܝܘܢ

51. Isaiah 19:1

    ܡܫܩܠܐ ܕܡܨܪܝܢ ܗܐ ܡܪܝܐ ܪܟܝܒ ܥܠ ܥܢ̈ܢܐ ܩ̈ܠܝܠܬܐ ܘܥܐ̇ܠ ܠܡܨܪܝܢ ܘܢܙܘܥܘܢ ܦܬܟܪ̈ܐ ܕܡܨܪܝܢ ܡܢ ܩܕܡܘܗܝ ܘܠܒܗ ܕܡܨܪܝܐ ܢܬܡܣܐ ܒܓܘܗ

52. Isaiah 19:2

    ܘܐܓܪܐ ܡܨܪܝܐ ܒܡܨܪܝܐ ܘܢܬܟܬܫ ܓܒܪܐ ܥܡ ܐܚܘܗܝ ܘܓܒܪܐ ܥܡ ܚܒܪܗ ܡܕܝܢܬܐ ܥܡ ܡܕܝܢܬܐ ܘܡܠܟܘܬܐ ܥܡ ܡܠܟܘܬܐ

53. Isaiah 19:3

    ܘܬܬܦܣܩ ܪܘܚܗ ܕܡܨܪܝܐ ܒܓܘܗ ܘܬܪܥܝܬܗ ܐܛܒܥ ܘܢܫܐܠܘܢ ܡܢ ܦܬܟܪ̈ܐ ܘܡܢ ܡܓܘܫ̈ܐ ܘܡܢ ܙܟܘܪ̈ܐ ܘܡܢ ܝܕܘ̈ܥܐ

54. Isaiah 19:4

    ܘܐܫܠܡ ܠܡܨܪ̈ܝܐ ܒܐܝܕܐ ܕܡܪ̈ܝܐ ܩܫ̈ܝܐ ܘܡܠܟܐ ܥܫܝܢܐ ܢܫܬܠܛ ܒܗܘܢ ܐܡ̇ܪ ܡܪܝܐ ܚܝܠܬܢܐ

55. Isaiah 19:5

    ܘܢܓܘܙܘܢ ܡ̈ܝܐ ܡܢ ܝܡܐ ܘܢܗܪܐ ܢܚܪܒ ܘܢܐܒܫ

56. Isaiah 19:6

    ܘܢܓܘܙܘܢ ܢܗܪ̈ܘܬܐ ܘܢܬܡܣܟܢܘܢ ܘܢܚܪܒܘܢ ܢܗܪ̈ܘܬܐ ܥܫ̈ܝܢܐ ܩܢܝܐ ܘܐܪܒܢܐ ܘܦܦܝܪܘܢ ܢܐܒܫܘܢ

57. Isaiah 19:7

    ܘܠܘܥܐ ܕܥܠ ܢܗܪܐ ܘܥܠ ܦܘܡܗ ܕܢܗܪܐ ܘܟܠ ܕܡܙܕܪܥ ܥܠ ܓܒܗ ܕܢܗܪܐ ܢܐܒܫ ܘܢܫܬܩܦ ܘܠܐ ܢܫܬܟܚ

58. Isaiah 19:8

    ܘܢܐܠܘܢ ܨܝ̈ܕܐ ܘܢܬܒܘܢ ܒܐܒܠܐ ܕܪܡ̇ܝܢ ܨܢܪ̈ܝܬܐ ܒܢܗܪܐ ܘܕܦ̇ܪܣܝܢ ܡܨܝ̈ܕܬܐ ܥܠ ܐ̈ܦܝ ܡ̈ܝܐ ܐܬܟܪܗܘ

59. Isaiah 19:9

    ܘܢܒܗܬܘܢ ܥ̇ܒ̈ܕܝ ܟܬܢܐ ܕܣ̇ܪܩܝܢ ܘܙܩ̇ܪܝܢ ܠܚܕܘܬܐ

60. Isaiah 19:10

    ܘܢܬܡܟܟܘܢ ܟܠ ܕܥܒ̇ܕܝܢ ܫܟܪܐ ܠܡܫܬܝܐ ܕܢܦܫܐ

61. Isaiah 19:11

    ܫܛܘ ܪ̈ܘܪܒܢܐ ܕܨܥܢ ܚ̈ܟܝܡܐ ܕܡ̇ܠܟܝܢ ܠܦܪܥܘܢ ܡܠ̇ܟܐ ܡ̈ܠ̣ܟܐ ܫ̈ܛܝܐ ܐܝܟܢܐ ܬܐܡܪܘܢ ܠܦܪܥܘܢ ܕܚ̈ܟܝܡܐ ܚܢܢ ܘܒܢ̈ܝ ܡ̈ܠ̇ܟܐ ܩܕ̈ܡܝܐ

62. Isaiah 19:12

    ܐܝܟܐ ܐܢܘܢ ܚ̈ܟܝܡܝܟ ܢܚܘܘܢܟ ܘܢܕܥܘܢ ܡܢܐ ܐܬܪܥܝ ܡܪܝܐ ܚܝܠܬܢܐ ܥܠ ܡܨܪܝܢ

63. Isaiah 19:13

    ܫܛܘ ܪ̈ܘܪܒܢܐ ܕܨܥܢ ܐܬܬܪܝܡܘ ܪ̈ܘܪܒܢܐ ܕܡܦܣ ܘܐܛܥܝܘ ܠܡܨܪܝܢ ܒ̈ܙܘܝܬܐ ܕܫܪ̈ܒܬܗ̇

64. Isaiah 19:14

    ܡܪܝܐ ܡܙܓ ܒܓܘܗ̇ ܪܘܚܐ ܛܥܝܬܐ ܘܐܛܥܝܗ ܠܡܨܪܝܐ ܒܟܠܗܘܢ ܥ̇ܒ̈ܕܘܗܝ ܐܝܟ ܕܛ̇ܥܐ ܪܘܝܐ ܒܬܝܒܬܗ

65. Isaiah 19:15

    ܘܠܐ ܢܗܘܐ ܠܡܨܪܝܐ ܓܒܪܐ ܕܢܥܒܕ ܪܝܫܐ ܘܕܢܘܒܬܐ ܘܕܢܘܒܬܐ ܘܪܝܫܐ

66. Isaiah 19:16

    ܒܝܘܡܐ ܗ̇ܘ ܢܗܘܐ ܡܨܪܝܐ ܐܝܟ ܢܫ̈ܐ ܘܢܕܚܠ ܘܢܙܘܥ ܡܢ ܩܕܡ ܪܘܡܐ ܕܐܝܕܗ ܕܡܪܝܐ ܚܝܠܬܢܐ ܕܡܪܝܡ ܥܠܘܗܝ

67. Isaiah 19:17

    ܘܬܗܘܐ ܐܪܥܐ ܕܝܗܘܕܐ ܠܡܨܪܝܐ ܠܣܘܪܕܐ ܘܟܠ ܕܢܕܟܪܝܗ̇ ܠܗ ܢܬܪܗܒ ܡܢ ܩܕܡ ܬܪܥܝܬܗ ܕܡܪܝܐ ܚܝܠܬܢܐ ܕܐܬܪܥܝ ܥܠܘܗܝ

68. Isaiah 19:18

    ܒܝܘܡܐ ܗ̇ܘ ܢܗ̈ܘܝܢ ܚܡܫ ܩܘܪ̈ܝܐ ܒܐܪܥܐ ܕܡܨܪܝܢ ܕܡܡ̈ܠܠܢ ܒܠܫܢܐ ܟܢܥܢܝܐ ܘܝ̇ܡ̈ܝܢ ܒܡܪܝܐ ܚܝܠܬܢܐ ܘܚܕܐ ܡܢܗܝܢ ܗܪܣ ܬܬܩܪܐ

69. Isaiah 19:19

    ܒܝܘܡܐ ܗ̇ܘ ܢܗܘܐ ܡܕܒܚܐ ܠܡܪܝܐ ܒܓܘܗ̇ ܕܐܪܥܐ ܕܡܨܪܝܢ ܘܩܝܡܬܐ ܠܡܪܝܐ ܥܠ ܓܢܒ ܬܚܘܡܗ̇

70. Isaiah 19:20

    ܘܬܗܘܐ ܠܐܬܐ ܘܠܣܗܕܘܬܐ ܠܡܪܝܐ ܚܝܠܬܢܐ ܒܐܪܥܐ ܕܡܨܪܝܢ ܡܛܠ ܕܢܓܥܘܢ ܩܕܡ ܡܪܝܐ ܡܢ ܩܕܡ ܐܠܘܨܐ ܘܢܫܕܪ ܠܗܘܢ ܦܪܘܩܐ ܘܕܝ̇ܢܐ ܘܢܦܨܐ ܐܢܘܢ

71. Isaiah 19:21

    ܘܢܬܝܕܥ ܡܪܝܐ ܠܡܨܪ̈ܝܐ ܘܢܕܥܘܢܗ ܡܨܪ̈ܝܐ ܠܡܪܝܐ ܒܝܘܡܐ ܗ̇ܘ ܘܢܩܪܒܘܢ ܕܒܚ̈ܐ ܘܣܡܝܕܐ ܘܢܕܪܘܢ ܢܕܪ̈ܐ ܠܡܪܝܐ ܘܢܫܠܡܘܢ

72. Isaiah 19:22

    ܘܢܡܚܐ ܡܪܝܐ ܠܡܨܪ̈ܝܐ ܡܚܘܬܐ ܘܢܐܣܐ ܐܢܘܢ ܘܢܬܦܢܘܢ ܠܘܬ ܡܪܝܐ ܘܢܥܢܐ ܐܢܘܢ ܘܢܐܣܐ ܐܢܘܢ

73. Isaiah 19:23

    ܒܝܘܡܐ ܗ̇ܘ ܢܗܘܐ ܫܒܝܠܐ ܡܢ ܡܨܪܝܢ ܠܐܬܘܪ ܘܡܢ ܐܬܘܪ ܠܡܨܪܝܢ ܘܢܥܘܠ ܐܬܘܪܝܐ ܠܡܨܪܝܢ ܘܡܨܪܝܐ ܠܐܬܘܪ ܘܢܦܠܚܘܢ ܡܨܪ̈ܝܐ ܠܐܬܘܪ̈ܝܐ

74. Isaiah 19:24

    ܒܝܘܡܐ ܗ̇ܘ ܢܗܘܐ ܐܝܣܪܝܠ ܚܕ ܡܢ ܬܠܬܐ ܠܡܨܪ̈ܝܐ ܘܠܐܬܘܪ̈ܝܐ ܒܘܪܟܬܐ ܒܓܘ ܐܪܥܐ

75. Isaiah 19:25

    ܕܠܗ ܒܪܟ ܡܪܝܐ ܚܝܠܬܢܐ ܘܐܡܪ ܒܪܝܟ ܥܡܝ ܕܒܡܨܪܝܢ ܘܥܒ̇ܕ ܐ̈ܝܕܝ ܕܒܐܬܘܪ ܘܝܘܪܬܢܝ ܐܝܣܪܝܠ

76. Isaiah 20:1

    ܒܫܢܬܐ ܕܐܬܐ ܬܐܪܬܢ ܠܐܫܕܘܕ ܟܕ ܫܕܪܗ ܣܪܓܘܢ ܡܠܟܐ ܕܐܬܘܪ ܘܐܬܟܬܫ ܥܡ ܐܫܕܘܕ ܘܟܒܫܗ̇

77. Isaiah 20:2

    ܒܗ ܒܙܒܢܐ ܗ̇ܘ ܡܠܠ ܡܪܝܐ ܒܝܕ ܐܫܥܝܐ ܢܒܝܐ ܒܪ ܐܡܘܨ ܘܐܡܪ ܠܗ ܙܠ ܫܪܝ ܣܩܐ ܡܢ ܚܨ̈ܝܟ ܘܡ̈ܣܢܝܟ ܡܢ ܪ̈ܓܠܝܟ ܘܥܒܕ ܗܟܢܐ ܘܗܠܟ ܚܦܝܝ ܘܥܪܛܠ

78. Isaiah 20:3

    ܘܐܡܪ ܡܪܝܐ ܐܝܟܢܐ ܕܗܠܟ ܥܒܕܝ ܐܫܥ̇ܝܐ ܚܦܝܝ ܘܥܪܛܠ ܗܟܢܐ ܢܗ̈ܘܝܢ ܐܬ̈ܘܬܐ ܘܬܕܡܪ̈ܬܐ ܬܠܬ ܫ̈ܢܝܢ ܥܠ ܡܨܪܝܢ ܘܥܠ ܟܘܫ

79. Isaiah 20:4

    ܗܟܢܐ ܢܕܒܪ ܡܠܟܐ ܕܐܬܘܪ ܫܒܝܬܐ ܕܡܨܪܝܢ ܘܫܒܝܬܐ ܕܟܘܫ ܥܠܝܡ̈ܐ ܘܣ̈ܒܐ ܥܪܛܠ ܘܚܦܝܝ ܘܢܬܓܠܐ ܦܘܪܣܝܗ̇ ܕܡܨܪܝܢ

80. Isaiah 20:5

    ܘܢܬܬܒܪܘܢ ܘܢܒܗܬܘܢ ܡܢ ܟܘܫ ܬܘܟܠܢܗܘܢ ܘܡܢ ܡܨܪܝܢ ܬܫܒܘܚܬܗܘܢ

81. Isaiah 20:6

    ܘܢܐܡܪ ܥܡܘܪܐ ܕܓܙܪܬܐ ܗܕܐ ܒܝܘܡܐ ܗ̇ܘ ܗܪܟܐ ܗܘ ܬܘܟܠܢܢ ܕܥܪܩܢ ܠܡܬܥܕܪܘ ܘܠܡܬܦܨܝܘ̇ ܡܢ ܩܕܡ ܡܠܟܐ ܕܐܬܘܪ ܘܚܢܢ ܐܝܟܢܐ ܢܬܦܨܐ

82. Isaiah 21:1

    ܡܫܩܠܐ ܕܡܕܒܪܐ ܕܝܡܐ ܐܝܟ ܥܠܥܠܐ ܡܢ ܬܝܡܢܐ ܬܪܗܛ ܡܢ ܡܕܒܪܐ ܘܬܐܬܐ ܡܢ ܐܪܥܐ ܪܚܝܩܬܐ

83. Isaiah 21:2

    ܚܙܘܐ ܩܫܝܐ ܐܬܚܙܝ ܠܢ ܛܠܘܡܐ ܛ̇ܠܡ ܘܒܙܘܙܐ ܒܐ̇ܙ ܣܩܝ ܥܝܠ̈ܡ ܘܛܘܪ̈ܝ ܡܕܝ ܘܟܠܗܝܢ ܬܢܚ̈ܬܗ̇ ܒܛܠܬ

84. Isaiah 21:3

    ܡܛܠ ܗܢܐ ܐܬܡܠܝ ܚܨܝ ܙܘܥܬܐ ܘܐܚܕܘܢܝ ܨܘܪ̈ܢܐ ܐܝܟ ܨܘܪ̈ܢܐ ܕܝܠܕܬܐ. ܙܥ̇ܬ ܕܠܐ ܐܫܡܥ. ܘܐܬܕܠܚ̇ܬ ܕܠܐ ܐܚܙܐ

85. Isaiah 21:4

    ܛܥܐ ܠܒܝ ܘܨܘܪ̈ܢܐ ܐܙܝܥܘܢܝ ܘܫܘܦܪ̈ܐ ܕܨܒܝܢܝ ܣܡܘ ܠܝ ܠܣܘܪܕܐ

86. Isaiah 21:5

    ܛܝܒܘ ܦܬܘܪ̈ܐ ܕܘܩܘ ܕܘܩ̈ܐ ܐܟܘܠܘ ܘܐܫܬܘ ܩܘܡܘ ܪ̈ܘܪܒܢܐ̈ ܡܫܘܚܘ ܣܟܪ̈ܐ

87. Isaiah 21:6

    ܡܛܠ ܕܗܟܢܐ ܐܡܪ ܠܝ ܡܪܝܐ. ܙܠ ܐܩܝܡ ܕܘܩܐ ܕܡܕܡ ܕܚ̇ܙܐ ܢܚܘܐ

88. Isaiah 21:7

    ܘܚܙܐ ܪܟܘܒܐ ܕܬܪ̈ܝܢ ܦܪ̈ܫܝܢ ܕܪܟܝܒ ܚܡܪܐ ܘܕܪܟܝܒ ܓܡܠܐ ܘܨܬ ܫܡܥܐ ܣܓܝܐܐ

89. Isaiah 21:8

    ܘܩܪܐ ܕܘܩܐ ܒܐ̈ܕܢܝ ܘܐܡܪ ܐܢܐ ܡܪܝܐ ܩܐ̇ܡ ܐܢܐ ܐܡܝܢܐܝܬ ܒܐܝܡܡܐ ܘܥܠ ܡܛܪܬܝ ܩܐ̇ܡ ܐܢܐ ܟܠܗܘܢ ܠܝ̈ܠܘܬܐ

90. Isaiah 21:9

    ܘܗܐ ܐܬܐ ܓܒܪܐ ܡܢ ܪ̈ܟܒܐ ܕܦܪ̈ܫܐ ܘܥܢܐ ܘܐܡܪ ܢܦܠܬ ܢܦܠܬ ܒܒܠ ܘܟܘܠܗܘܢ ܐ̈ܠܗܝܗ̇ ܓܠܝ̈ܦܐ ܐܬܬܒܪܘ ܒܐܪܥܐ

91. Isaiah 21:10

    ܡܢ ܚܨܕ ܘܡܢ ܒܠܝ ܐܕܪ ܡܕܡ ܕܫܡ̇ܥܬ ܡܢ ܡܪܝܐ ܐܠܗܐ ܕܐܝܣܪܝܠ ܚܘܝ̇ܬܟܘܢ

92. Isaiah 21:11

    ܡܫܩܠܐ ܕܕܘܡܐ ܠܝ ܩܪܐ ܡܢ ܣܥܝܪ ܢܛܘܪܐ ܕܒܠܠܝܐ

93. Isaiah 21:12

    ܐܡܪ ܢܛܘܪܐ ܐܬܐ ܨܦܪܐ ܐܦ ܠܠܝܐ ܐܢ ܒܥ̇ܝܢ ܐܢܬܘܢ ܒܥܘ ܬܘܒ ܐܬ̇ܝܢ ܐܢܬܘܢ

94. Isaiah 21:13

    ܡܫܩܠܐ ܕܥܪܒ ܒܪܡܫܐ ܒܥܒܐ ܬܒܘܬܘܢ ܒܫܒܝܠܐ ܕܕܘܪܢܝܡ

95. Isaiah 21:14

    ܠܐܘܪܥ ܨܗ̈ܝܐ ܐܝܬܘ ܡ̈ܝܐ ܥܡܘܪ̈ܐ ܕܐܪܥܐ ܕܬܝܡܢܐ ܒܠܚܡܟܘܢ ܐܪܘܥܘ ܠܡܒܕܪ̈ܐ

96. Isaiah 21:15

    ܡܛܠ ܕܡܢ ܩܕܡ ܣܦܣܪܐ ܐܬܒܕܪܘ ܘܡܢ ܩܕܡ ܚܪܒܐ ܕܠܛܝܫܐ ܘܡܢ ܩܕܡ ܩܫܬܐ ܕܡܠܝܐ ܘܡܢ ܩܕܡ ܥܘܫܢܐ ܕܩܪܒܐ

97. Isaiah 21:16

    ܡܛܠ ܕܗܟܢܐ ܐܡܪ ܠܝ ܡܪܝܐ ܒܡܫܠܡ ܫܢܬܐ ܐܝܟ ܫ̈ܢܝܐ ܕܐܓܝܪܐ ܢܣܘܦ ܟܠܗ ܐܝܩܪܐ ܕܩܕܪ

98. Isaiah 21:17

    ܘܫܪܟܐ ܕܡܢܝܢܐ ܕܩܫ̈ܬܐ ܓܒܪ̈ܐ ܕܒ̈ܢܝ ܩܕܪ ܢܙܥܪܘܢ ܡܛܠ ܕܡܪܝܐ ܐܠܗܐ ܕܐܝܣܪܝܠ ܡܠܠ

99. Isaiah 22:1

    ܡܫܩܠܐ ܕܢܚܠܐ ܕܚܙܝܘܢ ܡܢܐ ܐܝܬ ܠܟܝ ܗܪܟܐ ܕܣܠܩܬܝ ܟܘܠܟܝ ܠܐܓܪܐ

100. Isaiah 22:2

     ܕܠܘܚܝܐ ܐܬܡܠܝܬ ܩܪܝܬܐ ܩܠܐ ܐܬܡܠܝܬ ܩܪܝܬܐ ܥܫܝܢܬܐ ܩܛܝ̈ܠܝܟܝ ܠܐ ܗܘܘ ܩ̈ܛܝܠܐ ܕܣܝܦܐ ܐܦ ܠܐ ܡܝ̈ܬܐ ܕܩܪܒܐ

← Previous · Next → — showing 301–400 of 1,290

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.