← All works

Peshitta Isaiah

Peshitta (Syriac Old Testament) · 1,290 sections

1. Isaiah 27:4

   ܫܘܪܐ ܠܝܬ ܠܟܝ ܡ̇ܢ ܕܝܢ ܝܗܒ ܒܟܝ ܝܥܪܐ ܘܟ̈ܘܒܐ ܒܩܘܪܒܐ ܐܦܘܚ ܒܗ ܘܐܘܩܕܝܘܗܝ ܐܟܚܕܐ

2. Isaiah 27:5

   ܐܘ ܢܐܚܘܕ ܒܥܘܫܢܝ ܘܐܥܒܕ ܠܗ ܫܠܡܐ ܫܠܡܐ ܐܥܒܕ ܠܗ

3. Isaiah 27:6

   ܐܝܠܝܢ ܕܡܢ ܥܩܪܗ ܕܝܥܩܘܒ ܢܥܦܐ ܘܢܦܪܥ ܐܝܣܪܝܠ ܘܢܡܠܘܢ ܐ̈ܦܝ ܬܒܝܠ ܦܐܪ̈ܐ

4. Isaiah 27:7

   ܐܝܟ ܡܚܘܬܐ ܕܡܚܝܗܝ ܡܚܝܗܝ ܘܐܝܟ ܩܛܠܐ ܕܩܛܠܗ ܩܛܠܗ

5. Isaiah 27:8

   ܒܣܐܬܐ ܕܐܟܝܠ ܬܕܘܢܝܘܗܝ ܒܕܪܢܐ ܒܪܘܚܗ ܩܫܝܬܐ ܒܝܘܡܐ ܚܡܝܡܐ

6. Isaiah 27:9

   ܡܛܠ ܗܢܐ ܒܗܕܐ ܢܫܬܒܩ ܥܘܠܗ ܕܝܥܩܘܒ ܘܒܗܠܝܢ ܟܠܗܘܢ ܦܐܪ̈ܐ ܬܥܒܪ ܚܛܝܬܗ ܡܐ ܕܣܐ̇ܡ ܟܠܗܝܢ ܟܐ̈ܦܐ ܕܡܕܒܚܐ ܐܝܟ ܟܐ̈ܦܐ ܕܟܠܫܐ ܕܡ̈ܬܦܟܟܢ ܗܟܢܐ ܠܐ ܢܬܩܝܡܘܢ ܦܬܟܪ̈ܐ ܘܕܚ̈ܠܬܐ

7. Isaiah 27:10

   ܡܛܠ ܕܩܪܝܬܐ ܥܫܝܢܬܐ ܒܠܚܘܕܝܗ̇ ܚܪܒܐ ܘܡܫܬܒܩܐ ܘܚܪܒܐ ܐܝܟ ܡܕܒܪܐ ܬܡܢ ܢܪܥܐ ܥܓܠܐ ܘܬܡܢ ܢܪܥܐ ܘܢܓܡܪ ܬܕܐܗ

8. Isaiah 27:11

   ܒܝܒܫܐ ܕܚܨܕܐ ܢܬܬܒܪ̈ܢ ܢܫ̈ܐ ܕܐ̈ܬܝܢ ܡܢܗܪ̈ܢ ܠܗ̇ ܡܛܠ ܕܠܐ ܗܘܐ ܥܡܐ ܣܟܘܠܬܢܐ ܡܛܠ ܗܢܐ ܠܐ ܢܪܚܡ ܥܠܘܗܝ ܥܒܘܕܗ ܘܓܒܘܠܗ ܠܐ ܢܪܚܦ ܥܠܘܗܝ

9. Isaiah 27:12

   ܘܢܗܘܐ ܒܝܘܡܐ ܗ̇ܘ ܢܚܒܘܛ ܡܪܝܐ ܡܢ ܫܒܠܬܐ ܕܢܗܪܐ ܘܥܕܡܐ ܠܢܚܠܐ ܕܡܨܪܝܢ ܘܐܢܬܘܢ ܬܬܠܩܛܘܢ ܚܕ ܠܘܬ ܚܕ ܒܢܝ̈ ܐܝܣܪܝܠ

10. Isaiah 27:13

    ܘܢܗܘܐ ܒܝܘܡܐ ܗ̇ܘ ܢܬܩܪܐ ܒܫܝܦܘܪܐ ܪܒܐ ܘܢܐܬܘܢ ܕܐܒܕܘ ܒܐܪܥܐ ܕܡܨܪܝܢ ܘܕܐܬܒܕܪܘ ܒܐܪܥܐ ܕܐܬܘܪ ܘܢܣܓܕܘܢ ܒܐܪܥܗ ܕܡܪܝܐ ܠܡܪܝܐ ܒܛܘܪܗ ܩܕܝܫܐ ܒܐܘܪܫܠܡ

11. Isaiah 28:1

    ܘܝ ܠܟܠܝܠܐ ܓܐܝܐ ܕܪܘܝܐ ܐܦܪܝܡ ܘܠܓܕܠܐ ܡܨܥܪܐ ܚܝܠܐ ܕܫܘܒܚܗ ܕܒܪܝܫ ܢܚܠܐ ܕܫܡ̈ܝܢܐ ܕܬܘܝܪܝܢ ܒܚܡܪܐ

12. Isaiah 28:2

    ܗܐ ܚܝܠܐ ܘܥܘܫܢܐ ܕܡܪܝܐ ܐܝܟ ܙܪܝܦܬܐ ܕܒܪܕܐ ܘܐܝܟ ܥܠܥܠܐ ܕܬܒܪܐ ܘܐܝܟ ܙܪܝܦܬܐ ܕܡ̈ܝܐ ܣ̈ܓܝܐܐ ܕܓܪܦܝܢ ܐܢܝܚ ܠܐܪܥܐ ܒܐܝܕܟ

13. Isaiah 28:3

    ܘܒܪܓܠܐ ܢܬܕܝܫ ܟܠܝܠܐ ܓܐܝܐ ܕܪܘܝܐ ܐܦܪܝܡ

14. Isaiah 28:4

    ܘܢܗܘܐ ܓܕܠܐ ܡܨܥܪܐ ܚܝܠܐ ܕܫܘܒܚܗ ܕܒܪܝܫ ܢܚܠܐ ܕܫܡܝ̈ܢܐ ܐܝܟ ܒܟܪܬܐ ܕܩܕܡ ܩܝܛܐ ܕܡܐ ܕܚܙܗ̇ ܡ̇ܢ ܕܚ̇ܙܐ ܠܗ̇ ܥܕ ܗܝ ܒܐܝܕܗ ܒ̇ܠܥ ܠܗ̇

15. Isaiah 28:5

    ܒܝܘܡܐ ܗ̇ܘ ܢܗܘܐ ܡܪܝܐ ܚܝܠܬܢܐ ܠܟܠܝܠܐ ܕܚܝܠܐ ܘܠܓܕܠܐ ܡܫܒܚܐ ܠܫܪܟܐ ܕܥܡܗ

16. Isaiah 28:6

    ܠܪܘܚܐ ܕܕܝܢܐ ܠܡ̇ܢ ܕܝܬ̇ܒ ܥܠ ܕܝܢܐ ܘܓܢܒܪܘܬܐ ܕܡܗܦܟܝܢ ܩܪܒܐ ܡܢ ܬܪܥܐ

17. Isaiah 28:7

    ܘܐܦ ܗܠܝܢ ܒܚܡܪܐ ܛܥܘ ܘܒܫܟܪܐ ܛܥܘ ܟܗ̈ܢܐ ܘܢܒ̈ܝܐ ܛܥܘ ܒܫܟܪܐ ܐܬܒܠܥܘ ܡܢ ܚܡܪܐ ܙܥܘ ܡܢ ܫܟܪܐ ܛܥܘ ܒܪܘܝܘܬܐ ܐܟܠܘ ܐܣܘܛܐܝܬ

18. Isaiah 28:8

    ܡܛܠ ܕܟܠܗܘܢ ܦܬܘܪ̈ܐ ܐܬܡܠܝܘ ܬܝܘܒܐ ܘܬܒܬܐ ܡܢ ܒܠܝ ܐܬܪܐ

19. Isaiah 28:9

    ܠܡ̇ܢ ܢܠܦ ܐܝܕܥܬܐ ܘܠܡ̇ܢ ܢܣܟܠ ܫܡܥܐ ܠܕܚܣܝܠܝܢ ܡܢ ܚܠܒܐ ܘܢܓܝܕܝܢ ܡܢ ܬ̈ܕܝܐ

20. Isaiah 28:10

    ܡܛܠ ܕܬܒܬܐ ܥܠ ܬܒܬܐ ܘܬܒܬܐ ܥܠ ܬܒܬܐ ܘܬܝܘܒܐ ܥܠ ܬܝܘܒܐ ܘܬܝܘܒܐ ܥܠ ܬܝܘܒܐ ܩܠܝܠ ܠܬܡܢ ܘܩܠܝܠ ܠܬܡܢ

21. Isaiah 28:11

    ܡܛܠ ܕܒܡܡܠܠܐ ܥܛܠܐ ܘܒܠܫܢܐ ܐܚܪܢܐ ܐܡܠܠ ܥܡܗ ܥܡ ܥܡܐ ܗܢܐ

22. Isaiah 28:12

    ܕܐܡ̇ܪܬ ܠܗܘܢ ܗܕܐ ܗܝ ܢܝܚܬܝ ܐܢܝܚܘ ܠܡܛܪ̈ܦܐ ܘܗܢܘ ܫܠܝܐ ܘܠܐ ܨܒܘ ܠܡܫܡܥ

23. Isaiah 28:13

    ܘܗܘܬ ܠܗܘܢ ܡܠܬܗ ܕܡܪܝܐ ܬܒܬܐ ܥܠ ܬܒܬܐ ܘܬܒܬܐ ܥܠ ܬܒܬܐ ܘܬܝܘܒܐ ܥܠ ܬܝܘܒܐ ܘܬܝܘܒܐ ܥܠ ܬܝܘܒܐ ܩܠܝܠ ܠܬܡܢ ܘܩܠܝܠ ܠܬܡܢ ܕܢܗܦܟܘܢ ܘܢܣܬܚܦܘܢ ܠܒܣܬܪܗܘܢ ܘܢܬܬܒܪܘܢ ܘܢܬܬܨܝܕܘܢ ܘܢܬܬܚܕܘܢ

24. Isaiah 28:14

    ܡܛܠ ܗܢܐ ܫܡܥܘ ܦܬܓܡܗ ܕܡܪܝܐ ܓܒܪ̈ܐ ܡܡܝ̈ܩܢܐ ܫ̈ܠܝܛܘܗܝ ܕܥܡܐ ܗܢܐ ܕܒܐܪܫܠܡ

25. Isaiah 28:15

    ܡܛܠ ܕܐܡܪܬܘܢ ܕܐܩܝܡܢ ܩܝܡܐ ܥܡ ܡܘܬܐ ܘܥܡ ܫܝܘܠ ܥܒܕܢ ܚܙܘܐ ܫܘܛܐ ܕܓܪܘܦܝܐ ܟܕ ܢܥܒܪ ܠܐ ܢܐܬܐ ܥܠܝܢ ܡܛܠ ܕܣܡܢ ܒܕܓܠܘܬܐ ܬܘܟܠܢܢ ܘܒܫܘܩܪܐ ܐܣܬܬܪܢ

26. Isaiah 28:16

    ܡܛܠ ܗܢܐ ܗܟܢܐ ܐܡ̇ܪ ܡܪܝܐ ܐܠܗܐ ܗܐ ܐܢܐ ܡܬܩܢ ܐܢܐ ܒܨܗܝܘܢ ܟܐܦܐ ܟܐܦܐ ܒܚܝܪܬܐ ܒܙܘܝܬܐ ܝܩܝܪܬܐ ܪܝܫ ܐܣܬܐ ܕܫܬܐܣܬܐ ܕܡܗܝܡܢ ܠܐ ܢܕܚܠ

27. Isaiah 28:17

    ܘܐܣܝܡ ܕܝܢܐ ܠܡܫܘܚܬܐ ܘܙܕܝܩܘܬܐ ܠܡܬܩܠܐ ܘܢܚܒܘܛ ܒܪܕܐ ܠܣܒܪܐ ܕܓܠܐ ܘܠܣܬܪܐ ܡ̈ܝܐ ܢܓܪܦܘܢ

28. Isaiah 28:18

    ܘܢܬܟܦܪ ܩܝܡܟܘܢ ܕܥܡ ܡܘܬܐ ܘܚܙܘܟܘܢ ܕܥܡ ܫܝܘܠ ܠܐ ܢܩܘܡ ܫܘܛܐ ܕܓܪܘܦܝܐ ܟܕ ܢܥܒܪ ܬܗܘܘܢ ܠܗ ܠܕܝܫܐ

29. Isaiah 28:19

    ܘܒܙܒܢܐ ܕܥܒ̇ܪ ܢܕܒܪܟܘܢ ܡܛܠ ܕܒܨܦܪܐ ܒܨܦܪܐ ܢܥܒܪ ܒܐܝܡܡܐ ܘܒܠܠܝܐ ܗܘ̇ܝܐ ܙܘܥܬܐ ܒܠܚܘܕ ܐܣܬܟܠ ܫܡܘܥܐ

30. Isaiah 28:20

    ܡܛܠ ܕܟܪܝ ܡܐܢܐ ܠܡܣܬܪܗ ܘܡܫܬܝܬܐ ܩܛܢܬ ܘܠܐ ܡܡܠܝܐ

31. Isaiah 28:21

    ܡܛܠ ܕܒܛܘܪܐ ܒܬܘܪܥܬܐ ܢܩܘܡ ܡܪܝܐ ܐܝܟ ܥܘܡܩܐ ܕܓܒܥܘܢ ܢܪܓܙ ܠܡܥܒܕ ܥ̇ܒ̈ܕܘܗܝ ܢܘܟܪ̈ܝܝܢ ܥ̇ܒ̈ܕܘܗܝ ܘܠܡܥܒܕ ܥܒܝ̈ܕܬܗ ܢܘܟܪ̈ܝܢ ܥܒܝ̈ܕܬܗ

32. Isaiah 28:22

    ܘܗܫܐ ܠܐ ܬܡܝܩܘܢ ܕܠܐ ܢܥܫ̈ܢܢ ܡܪ̈ܕܘܬܟܘܢ ܡܛܠ ܕܓܡܘܪܝܐ ܘܦܣ̈ܝܩܬܐ ܫܡ̇ܥܬ ܡܢ ܡܪܝܐ ܚܝܠܬܢܐ ܥܠ ܟܠܗ̇ ܐܪܥܐ

33. Isaiah 28:23

    ܨܘܬܘ ܘܫܡܥܘ ܩܠܝ ܨܘܬܘ ܘܫܡܥܘ ܡܐܡܪܝ

34. Isaiah 28:24

    ܕܠܡܐ ܝܘܡܐ ܟܠܗ ܕܒ̇ܪ ܐܟܪܐ ܠܡܙܪܥ ܘܙܩ̇ܦ ܘܫ̇ܦܢ ܐܪܥܗ

35. Isaiah 28:25

    ܠܐ ܗܘܐ ܡܐ ܕܐܫܘܝ ܐ̈ܦܝܗ̇ ܒ̇ܕܪ ܫܒܘܒܢܐ ܘܟܡܘܢܐ ܙ̇ܪܥ ܘܪܡ̇ܐ ܚ̈ܛܐ ܘܣܥܪ̈ܐ ܘܟܘܢ̈ܬܐ ܒܬ̈ܚܘܡܝܗ̇

36. Isaiah 28:26

    ܢܪܕܝܘܗܝ ܒܕܝܢܐ ܕܐܠܗܐ ܘܢܫܒܚܘܢ

37. Isaiah 28:27

    ܡܛܠ ܕܠܐ ܗܘܐ ܒܕܪܫܐ ܡܬܕܪܟ ܫܒܘܒܢܐ ܐܦ ܠܐ ܡܬܟܪܟ ܓܪܓܪܐ ܥܠ ܟܡܘܢܐ ܡܛܘܠ ܕܒܚܘܛܪܐ ܡܬܚܒܛ ܫܒܘܒܢܐ ܘܟܡܘܢܐ ܒܙܩ̈ܬܐ

38. Isaiah 28:28

    ܥܒܘܪܐ ܡܬܕܪܟ ܡܛܠܬܢ ܡܛܠ ܕܠܐ ܗܘܐ ܠܙܟܘ ܡܕܪܟܘ ܐܕܪܟܢܝܗܝ ܘܒܣܘܓܐܐ ܕܓܝ̈ܓܠܐ ܕܓܪ̈ܓܪܘܗܝ ܘܒܦܪ̈ܣܘܗܝ ܢܕܩܘܢܗ

39. Isaiah 28:29

    ܐܦ ܗܕܐ ܡܢ ܩܕܡ ܡܪܝܐ ܚܝܠܬܢܐ ܢܦܩܬ ܕܘܡܪܐ ܕܬܪܥܝܬܐ ܐܘܪܒ ܬܪܒܝܬܐ

40. Isaiah 29:1

    ܘܝ ܐܪܝܠ ܐܪܝܠ ܩܪܝܬܐ ܕܫܪܐ ܕܘܝܕ ܐܘܣܦܘ ܫܢܬܐ ܥܠ ܫܢܬܐ ܥܕܥܐ̈ܕܐ ܢܬܥܒܕܘܢ

41. Isaiah 29:2

    ܘܐܥܝܩ ܠܐܪܝܠ ܘܬܗܘܐ ܢܘܗܡܐ ܘܐܘܠܝܬܐ ܘܬܗܘܐ ܐܝܟ ܐܪܝܠ

42. Isaiah 29:3

    ܘܐܫܪܐ ܐܝܟ ܐܣܦܪܐ ܥܠܝܟܝ ܘܐܠܨܟܝ ܒܡܩܒܬܐ ܘܐܩܝܡ ܥܠܝܟܝ ܡܛܪܬܐ

43. Isaiah 29:4

    ܘܬܬܡܟܟܝܢ ܘܡܢ ܥܦܪܐ ܬܡܠܠܝܢ ܘܡܢ ܥܦܪܐ ܢܢܨܪ̈ܢ ܡ̈ܠܝܟܝ ܘܢܫܬܡܥ ܩܠܟܝ ܡܢ ܐܪܥܐ ܐܝܟ ܙܟܘܪܐ ܘܡܢ ܥܦܪܐ ܢܢܨܪ̈ܢ ܡ̈ܠܝܟܝ

44. Isaiah 29:5

    ܘܢܗܘܐ ܐܝܟ ܚܠܐ ܕܩܝܩܐ ܣܘܓܐܐ ܕܕܝܘܫ̈ܝܟܝ ܘܐܝܟ ܥܘܪܐ ܕܥܒ̇ܪ ܣܘܓܐܐ ܕܥܫ̈ܝܢܝܟܝ ܘܢܗܘܐ ܡܢ ܫܠܝܐ ܒܥܓܠ

45. Isaiah 29:6

    ܡܢ ܩܕܡ ܡܪܝܐ ܚܝܠܬܢܐ ܬܬܦܩܕ ܒܙܘ̈ܥܐ ܘܒܪ̈ܥܡܐ ܘܒܩܠܐ ܪܒܐ ܘܒܩ̈ܘܕܚܬܐ ܘܒܥܠܥܠܐ ܘܒܫܠܗܒܝܬܐ ܕܢܘܪܐ ܕܡܘܩܕܐ

46. Isaiah 29:7

    ܘܢܗܘܐ ܐܝܟ ܚܠܡܐ ܒܚܙܘܐ ܕܠܠܝܐ ܣܘܓܐܐ ܕܟܠܗܘܢ ܥܡ̈ܡܐ ܕܡܬܚܝܠܝܢ ܥܠ ܐܪܝܠ ܘܟܘܠ ܚܝ̈ܠܐ ܘܟܢ̈ܫܐ ܕܡܥܝܩܝܢ ܠܗ̇

47. Isaiah 29:8

    ܘܢܗܘܐ ܐܝܟ ܟܦܢܐ ܕܚܙܐ ܒܚܠܡܗ ܕܐܟܠ ܘܡܐ ܕܐܬܬܥܝܪ ܡܛܪܦ ܘܣܪܝܩܐ ܢܦܫܗ ܗܟܢܐ ܢܗܘܐ ܣܘܓܐܐ ܕܟܠܗܘܢ ܥܡ̈ܡܐ ܕܡܬܚܝܠܝܢ ܥܠ ܛܘܪܐ ܕܨܗܝܘܢ

48. Isaiah 29:9

    ܬܡܗܘ ܘܐܬܕܡܪܘ ܘܐܬܛܪܦܘ ܘܬܘܪܘ ܕܪܘܝܢ ܠܐ ܡܢ ܚܡܪܐ ܘܕܛܥ̇ܝܢ ܠܐ ܡܢ ܫܟܪܐ

49. Isaiah 29:10

    ܡܛܠ ܕܢܣܟ ܥܠܝܗܘܢ ܡܪܝܐ ܪܘܚܐ ܛܒܝܥܬܐ ܘܥܫܢܬ ܥܠ ܥܝܢ̈ܝܗܘܢ ܘܥܠ ܢܒ̈ܝܐ ܘܥܠ ܪ̈ܝܫܝܗܘܢ ܕܚܙ̇ܝܢ ܟܣܝ̈ܬܐ

50. Isaiah 29:11

    ܘܢܗܘܐ ܒܗܘܢ ܚܙܘܐ ܕܟܠܗܘܢ ܐܝܟ ܡ̈ܠܐ ܕܟܬܒܐ ܕܚܬܝܡ ܕܡܐ ܕܝܗܒܘܗܝ ܠܡ̇ܢ ܕܝ̇ܕܥ ܣܦܪܐ ܢܐܡܪܘܢ ܠܗ ܩܪܝ ܗܢܐ ܘܢܐܡܪ ܠܐ ܡܫܟܚ ܐܢܐ ܡܛܠ ܕܚܬܝܡ ܗܘ

51. Isaiah 29:12

    ܘܢܬܠܘܢܗ ܠܟܬܒܐ ܠܡ̇ܢ ܕܠܐ ܝ̇ܕܥ ܣܦܪܐ ܘܢܐܡܪܘܢ ܠܗ ܩܪܝ ܗܢܐ ܘܢܐܡܪ ܠܐ ܝ̇ܕܥ ܐܢܐ ܣܦܪܐ

52. Isaiah 29:13

    ܘܐܡܪ ܡܪܝܐ ܥܠ ܕܩܪܒ ܥܡܐ ܗܢܐ ܒܦܘܡܗ ܘܒܣ̈ܦܘܬܗ ܝܩܪܢܝ ܘܠܒܗ ܪܚܝܩ ܡܢܝ ܘܗܘܬ ܕܚܠܬܗܘܢ ܡܢܝ ܒܦܘܩܕܢܐ ܘܒܝܘܠܦܢܐ ܕܐܢܫܐ

53. Isaiah 29:14

    ܡܛܠ ܗܢܐ ܗܐ ܡܘܣܦ ܐܢܐ ܠܡܦܪܫܗ ܠܥܡܐ ܗܢܐ ܒܬܕܡܘܪܬܐ ܘܒܕܘܡܪܐ ܘܬܐܒܕ ܚܟܡܬܐ ܕܚ̈ܟܝܡܘܗܝ ܘܣܘܟܠܐ ܕܣ̈ܟܘܠܬܢܘܗܝ ܢܬܓܠܙ

54. Isaiah 29:15

    ܘܝ ܠܕܡܬܥܩܡܝܢ ܡܢ ܡܪܝܐ ܠܡܛܫܝܘ ܬܪܥܝܬܐ ܘܗ̇ܘܝܢ ܒܚܫܘܟܐ ܥ̇ܒ̈ܕܝܗܘܢ ܘܐܡ̇ܪܝܢ ܡܢܘ ܚ̇ܙܐ ܠܢ ܐܘ ܡܢܘ ܝ̇ܕܥ

55. Isaiah 29:16

    ܡܢܐ ܡܬܗܦܟܝܢܢ ܐܝܟ ܛܝܢܐ ܕܦܚܪܐ ܚܫܝܒܝܢ ܐܢܬܘܢ ܕܠܡܐ ܐܡ̇ܪ ܥ̇ܒܕܐ ܠܥܒܘܕܗ ܠܐ ܥܒܕܬܢܝ ܘܓܒܝܠܬܐ ܐܡ̇ܪܐ ܠܓܒܘܠܗ̇ ܕܚܟܝܡܐܝܬ ܠܐ ܓܒܠܬܢܝ

56. Isaiah 29:17

    ܗܐ ܥܕ ܩܠܝܠ ܙܥܘܪ ܘܢܗܦܘܟ ܠܒܢܢ ܠܟܪܡܠܐ ܘܟܪܡܠܐ ܠܥܒܐ ܢܬܚܫܒ

57. Isaiah 29:18

    ܘܢܫܡܥܘܢ ܒܝܘܡܐ ܗ̇ܘ ܚܪ̈ܫܐ ܡ̈ܠܐ ܕܟܬܒܐ ܘܡܢ ܚܫܘܟܐ ܘܥܡܛܢܐ ܥܝ̈ܢܐ ܕܥܘܝܪ̈ܐ ܢܚ̈ܙܝܢ

58. Isaiah 29:19

    ܘܢܘܣܦܘܢ ܡܟܝ̈ܟܐ ܒܡܪܝܐ ܒܚܕܘܬܐ ܘܐܢܫܐ ܒ̇ܝܫ̈ܐ ܒܩܕܝܫܐ ܕܐܝܣܪܝܠ ܢܕܘܨܘܢ

59. Isaiah 29:20

    ܡܛܠ ܕܥܒܪ ܕܝܘܫܐ ܘܓܡܪ ܡܡܝܩܢܐ ܘܐܒܕܘ ܟܠ ܕܡܓܪܓܝܢ ܥܘܠܐ

60. Isaiah 29:21

    ܘܡܚܛܝܢ ܠܐܢܫܐ ܒܡܠܬܐ ܘܠܕܡܟܣ ܣ̇ܝܡܝܢ ܠܗ ܬܘܩܠܬܐ ܘܨ̇ܠܝܢ ܒܚܫܘܟܐ ܠܙܕܝܩܐ

61. Isaiah 29:22

    ܡܛܠ ܗܢܐ ܗܟܢܐ ܐܡ̇ܪ ܡܪܝܐ ܥܠ ܒܝܬܗ ܕܝܥܩܘܒ ܕܦܪܩ ܠܐܒܪܗܡ ܠܐ ܡܟܝܠ ܢܒܗܬ ܝܥܩܘܒ ܘܠܐ ܡܟܝܠ ܢܚܦܪ̈ܢ ܐ̈ܦܘܗܝ

62. Isaiah 29:23

    ܡܐ ܕܚܙܘ ܒܢ̈ܘܗܝ ܥܒ̇ܕ ܐܝ̈ܕܝ ܒܓܘܗ ܢܩܕܫܘܢ ܫܡܝ ܘܢܩܕܫܘܢ ܠܩܕܝܫܐ ܕܝܥܩܘܒ ܘܠܐܠܗܐ ܕܐܝܣܪܝܠ ܢܥܫܢܘܢ

63. Isaiah 29:24

    ܘܢܕܥܘܢ ܣܟ̈ܠܐ ܐܝܠܝܢ ܕܛܥ̇ܝܐ ܗܘܬ ܪܘܚܗܘܢ ܘܫ̈ܛܝܐ ܢܐܠܦܘܢ ܠܡܫܬܡܥܘ

64. Isaiah 30:1

    ܘܝ ܠܒ̈ܢܝܐ ܡܪ̈ܘܕܐ ܐܡ̇ܪ ܡܪܝܐ ܕܥܒܕܘ ܬܪܥܝܬܐ ܘܠܐ ܡܢܝ ܘܢܩܝܘ ܢܘܩ̈ܝܐ ܕܠܐ ܡܢ ܪܘܚܝ ܕܢܘܣܦܘܢ ܚ̈ܛܗܐ ܥܠ ܚ̈ܛܗܐ

65. Isaiah 30:2

    ܕܐܙܠܘ ܠܡܚܬ ܠܡܨܪܝܢ ܘܡܢ ܦܘܡܝ ܠܐ ܫܐܠܘ ܕܢܬܥܫܢܘܢ ܒܥܘܫܢܗ ܕܦܪܥܘܢ ܘܢܣܬܬܪܘܢ ܒܛܠܠܗ̇ ܕܡܨܪܝܢ

66. Isaiah 30:3

    ܢܗܘܐ ܠܟܘܢ ܥܘܫܢܗ ܕܦܪܥܘܢ ܠܒܗܬܬܐ ܘܣܬܪܐ ܕܛܠܠܗ̇ ܕܡܨܪܝܢ ܠܬܚܦܝܬܐ

67. Isaiah 30:4

    ܡܛܠ ܕܗܘ ܒܨܥܢ ܘܪ̈ܘܪܒܢܘܗܝ ܘܡܠܐ̈ܟܘܗܝ ܚ̈ܠܦܐ ܢܠܐܘܢ

68. Isaiah 30:5

    ܠܘܬ ܥܡܐ ܕܠܐ ܡܘܬܪ ܠܗܘܢ ܠܐ ܠܥܘܕܪܢܐ ܘܠܐ ܠܗܢܝܢܐ ܐܠܐ ܠܒܗܬܬܐ ܘܠܚܣܕܐ

69. Isaiah 30:6

    ܡܫܩܠܐ ܕܒܥܝܪܐ ܕܬܝܡܢܐ ܒܐܪܥܐ ܐܠܝܨܬܐ ܘܡܥܝܩܬܐ ܐܪܝܐ ܘܓܘܪܝܐ ܕܐܪܝܐ ܘܡܢܗܘܢ ܐܣܦܣ ܘܚܪܡܢܐ ܕܦ̇ܪܚ ܢܫܩܠܘܢ ܥܠ ܚܨܐ ܕܥܝ̈ܠܐ ܥܘܬܪܗܘܢ ܘܥܠ ܓܒܐ ܕܓܡ̈ܠܐ ܓܙܝ̈ܗܘܢ ܠܘܬ ܥܡܐ ܕܠܐ ܡܗܢܐ ܠܗܘܢ

70. Isaiah 30:7

    ܘܡܨܪ̈ܝܐ ܒܣܪܝܩܘܬܐ ܘܒܕܓܠܘܬܐ ܡܥܕܪܝܢ ܡܛܠ ܗܢܐ ܩ̇ܪܝܬ ܠܗܘܢ ܕܣܪܝܩ ܗܘ ܬܘܟܠܢܗܘܢ ܗܢܐ

71. Isaiah 30:8

    ܡܟܝܠ ܬܐ ܟܬܘܒ ܥܠ ܠܘܚ̈ܐ ܗܠܝܢ ܘܥܠ ܟܬܒܐ ܕܩܝܡܗܘܢ ܕܢܗܘܐ ܠܝܘܡܐ ܐܚܪܝܐ ܠܣܗܕܘܬܐ ܠܥܠܡ ܥܠܡܝܢ

72. Isaiah 30:9

    ܡܛܠ ܕܥܡܐ ܗܘ ܡܡܪܡܪܢܐ ܒ̈ܢܝܐ ܐܢܘܢ ܕ̈ܓܠܐ ܒ̈ܢܝܐ ܕܠܐ ܨܒܘ ܠܡܫܡܥ ܢܡܘܣܗ ܕܡܪܝܐ

73. Isaiah 30:10

    ܕܐܡܪܘ ܠܚ̈ܙܝܐ ܕܠܐ ܬܚܙܘܢ ܘܠܢܒ̈ܝܐ ܕܠܐ ܬܬܢܒܘܢ ܠܢ ܡܟܣܢܘܬܐ ܡܠܠܘ ܠܢ ܦܠܓܘܬܐ ܘܚܙܘ ܠܢ ܟܕܒܘܬܐ

74. Isaiah 30:11

    ܘܐܣܛܐܘܢ ܡܢ ܐܘܪܚܐ ܘܐܗܦܟܘܢ ܡܢ ܫܒܝ̈ܠܐ ܘܒܛܠܘ ܡܢܢ ܠܩܕܝܫܐ ܕܐܝܣܪܝܠ

75. Isaiah 30:12

    ܡܛܠ ܗܢܐ ܗܟܢܐ ܐܡ̇ܪ ܩܕܝܫܐ ܕܐܝܣܪܝܠ ܥܠ ܕܐܣܠܝܬܘܢ ܡܠܬܐ ܗܕܐ ܘܐܬܬܟܠܬܘܢ ܒܛܠܘܡܝܐ ܘܪܛܢܬܘܢ ܘܐܬܬܟܠܬܘܢ ܥܠܘܗܝ

76. Isaiah 30:13

    ܡܛܠ ܗܢܐ ܬܗܘܐ ܠܟܘܢ ܚܛܝܬܐ ܗܕܐ ܐܝܟ ܬܘܪܥܬܐ ܕܢܦܠܬ ܘܐܝܟ ܫܘܪܐ ܪܡܐ ܕܡܢ ܫܠܝܐ ܗܘܐ ܬܒܪܗ

77. Isaiah 30:14

    ܘܬܒܪܗ ܐܝܟ ܬܒܪܐ ܕܡܐܢܐ ܕܦܚܪܐ ܕܬܒܝܪ ܕܠܐ ܚܘܣܢ ܕܠܐ ܡܫܬܟܚ ܒܬܒܪ̈ܘܗܝ ܚܨܦܐ ܠܡܣܒ ܒܗ ܢܘܪܐ ܡܢ ܝܩܕܢܐ ܐܦܠܐ ܠܡܓܪܦ ܒܗ ܡ̈ܝܐ ܡܢ ܓܘܒܐ

78. Isaiah 30:15

    ܡܛܠ ܕܗܟܢܐ ܐܡ̇ܪ ܩܕܝܫܐ ܕܐܝܣܪܝܠ ܡܐ ܕܬܒܬܘܢ ܘܐܬܬܢܚܬܘܢ ܬܬܦܪܩܘܢ ܘܒܫܠܝܐ ܘܒܣܒܪܐ ܬܗܘܐ ܓܢܒܪܘܬܟܘܢ ܘܠܐ ܐܬܛܦܝܣܬܘܢ

79. Isaiah 30:16

    ܘܐܡܪܬܘܢ ܠܐ ܗܟܢܐ ܥܠ ܪ̈ܟܫܐ ܢܪܟܒ ܘܥܠ ܩ̈ܠܝܠܐ ܢܥܪܘܩ ܡܛܠ ܗܢܐ ܬܥܪܩܘܢ ܘܢܗܘܘܢ ܩܠܝܠܝܢ ܪ̈ܕܘܦܝܟܘܢ

80. Isaiah 30:17

    ܐܠܦ ܡܢ ܟܐܬܐ ܕܚܕ ܘܡܢ ܟܐܬܐ ܕܚܡܫܐ ܬܥܪܩܘܢ ܥܕܡܐ ܕܬܫܬܚܪܘܢ ܐܝܟ ܥܪ̈ܕܐ ܥܠ ܪܝܫ ܛܘܪܐ ܘܐܝܟ ܐܬܐ ܥܠ ܪܡܬܐ

81. Isaiah 30:18

    ܡܛܠ ܕܢܫܪܐ ܡܪܝܐ ܠܡܪܚܡܘ ܥܠܝܟܘܢ ܘܢܬܬܪܝܡ ܠܡܪܚܦܘ ܥܠܝܟܘܢ ܡܛܠ ܕܐܠܗܐ ܗܘ ܕܝ̇ܢܐ ܡܪܝܐ ܘܛܘܒܝܗܘܢ ܠܟܠ ܕܡܣܟܝܢ ܠܗ

82. Isaiah 30:19

    ܡܛܠ ܕܥܡܐ ܒܨܗܝܘܢ ܝܬ̇ܒ ܘܒܐܘܪܫܠܡ ܡܒܟܐ ܠܐ ܬܒܟܘܢ ܡܪܚܡܘ ܢܪܚܡ ܥܠ ܩܠܐ ܕܓܥܬܟܘܢ. ܡܐ ܕܫܡܥ ܢܥܢܝܟܘܢ

83. Isaiah 30:20

    ܘܢܬܠ ܠܟܘܢ ܡܪܝܐ ܠܚܡܐ ܒܐܘܠܨܢܐ ܘܡ̈ܝܐ ܒܐܘܠܨܢܐ ܘܠܐ ܢܟܢܫ ܬܘܒ ܠܡܛܥܝܢ̈ܝܟܘܢ ܘܢܚ̈ܙܝܢ ܥܝܢ̈ܝܟܘܢ ܒܡܛܥܝܢ̈ܝܟܘܢ

84. Isaiah 30:21

    ܘܐ̈ܕܢܝܟܘܢ ܢܫ̈ܡܥܢ ܡܠܬܐ ܡܢ ܒܣܬܪܟܘܢ ܕܐܡ̇ܪܐ ܗܕܐ ܗܝ ܐܘܪܚܐ ܙܠܘ ܒܗ̇ ܘܠܐ ܬܣܛܘܢ ܠܝܡܝܢܐ ܘܠܣܡܠܐ

85. Isaiah 30:22

    ܘܬܛܘܫܘܢ ܣܐܡܐ ܕܩܪܝܡ ܠܦܬܟܪ̈ܝܟܘܢ ܘܦܕܬܐ ܕܢܣܟܬܐ ܕܕܗܒܗܘܢ ܘܬܕܪܘܢ ܐܢܘܢ ܐܝܟ ܡ̈ܝܐ ܕܟܦܣܢܝܬܐ ܘܐܝܟ ܢܦܬܐ ܬܦܩܘܢ ܐܢܘܢ

86. Isaiah 30:23

    ܘܢܬܝܗܒ ܡܛܪܐ ܠܙܪܥܟܘܢ ܕܬܙܪܥܘܢ ܒܐܪܥܐ ܘܥܒܘܪܐ ܕܙܪܥܐ ܕܐܪܥܐ ܢܗܘܐ ܕܗܝܢ ܘܫܡܝܢ ܪܥܝܐ ܕܒܥܝܪܟܘܢ ܒܝܘܡܐ ܗ̇ܘ ܒܐܬܪܐ ܫܡܝܢܐ

87. Isaiah 30:24

    ܘܒܩܪ̈ܐ ܘܐܪ̈ܘܢܐ ܕܦܠܚ̇ܝܢ ܒܐܪܥܐ ܒܠܝܠܐ ܚܡܝܡܐ ܢܐܟܠܘܢ ܕܡܣܠܩ ܒܪܦܫܐ ܘܒܡܕܪܝܐ

88. Isaiah 30:25

    ܘܢܗܘܐ ܥܠ ܟܠ ܛܘܪ ܕܪܡ ܘܥܠ ܟܠ ܪܡܬܐ ܕܪܡܐ ܢܪܕܘܢ ܬ̇ܦܐ ܕܡ̈ܝܐ ܒܝܘܡܐ ܕܩܛܠܐ ܪܒܐ ܘܒܣܘܚܦܐ ܕܡ̈ܓܕܠܐ

89. Isaiah 30:26

    ܘܢܗܘܐ ܢܘܗܪܗ ܕܣܗܪܐ ܐܝܟ ܢܘܗܪܗ ܕܫܡܫܐ ܘܢܘܗܪܗ ܕܫܡܫܐ ܢܗܘܐ ܚܕ ܒܫܒ̈ܥܐ ܐܝܟ ܢܘܗܪܐ ܕܫܒܥܐ ܝܘܡ̈ܝܢ ܒܝܘܡܐ ܕܢܥܨܘܒ ܡܪܝܐ ܬܒܪܐ ܕܥܡܗ ܘܟܐܒܐ ܕܡܚܘܬܗ ܢܐܣܐ

90. Isaiah 30:27

    ܗܐ ܫܡܗ ܕܡܪܝܐ ܐܬ̇ܐ ܡܢ ܪܘܚܩܐ ܝܩ̇ܕ ܪܘܓܙܗ ܘܫܒܝܚ ܡܫܩܠܗ ܘܣ̈ܦܘܬܗ ܡ̈ܠܝܢ ܪܘܓܙܐ ܘܠܫܢܗ ܐܝܟ ܢܘܪܐ ܕܝܩ̇ܕܐ

91. Isaiah 30:28

    ܘܪܘܚܗ ܐܝܟ ܢܚܠܐ ܕܓ̇ܪܦ ܥܕܡܐ ܠܨܘܪܐ ܢܦܣܘܩ ܠܡܕܠܚ ܥܡ̈ܡܐ ܡܛܠ ܛܥܝܘܬܗܘܢ ܣܪܝܩܬܐ ܘܠܦܓܘܕܬܐ ܡܛܥܝܢܝܬܐ ܕܥܠ ܦܟܝ̈ܗܘܢ ܕܥܡ̈ܡܐ

92. Isaiah 30:29

    ܬܫܒܘܚܬܐ ܢܗܘܐ ܠܟܘܢ ܟܠܝܠܐ ܕܐܬܩܕܫ ܒܚܓܐ ܘܚܕܘܬܗ ܕܠܒܐ ܐܝܟ ܗܘ̇ ܕܡܗܠܟ ܒܚܕܘܬܐ ܠܡܐܬܐ ܠܛܘܪܗ ܕܡܪܝܐ ܠܘܬ ܬܩܝܦܐ ܕܐܝܣܪܝܠ

93. Isaiah 30:30

    ܘܢܫܡܥ ܡܪܝܐ ܫܘܒܚܐ ܕܩܠܗ ܘܡܚܘܬܐ ܕܕܪܥܗ ܢܚܘܐ ܒܚܡܬܐ ܕܪܘܓܙܐ ܘܒܫܠܗܒܝܬܐ ܕܢܘܪܐ ܕܐܟ̇ܠܐ ܒܙܪܝܦܬܐ ܕܚܒ̇ܛܐ ܘܟܐ̈ܦܐ ܕܒܪܕܐ

94. Isaiah 30:31

    ܡܛܠ ܕܡܢ ܩܕܡ ܪܒܘܬܗ ܕܡܪܝܐ ܢܬܬܒܪ ܐܬܘܪܝܐ ܘܒܫܒܛܐ ܢܒܠܥ

95. Isaiah 30:32

    ܘܢܗܘܐ ܒܟܠܗܘܢ ܥ̇ܒ̈ܕܘܗܝ ܚܘܛܪܐ ܕܫܘܥܒܕܐ ܕܢܢܝܚ ܡܪܝܐ ܥܠܘܗܝ ܒ̈ܦܠܓܐ ܘܒܟܢܪ̈ܐ ܘܒܩܪܒܐ ܥܫܝܢܐ ܢܬܟܬܫ ܒܗ

96. Isaiah 30:33

    ܡܛܠ ܕܡܛܝܒ ܡܢ ܩܕܡ ܝܘܡ̈ܬܐ ܡܐܟܘܠܬܗ ܐܦ ܗܝ ܐܬܛܝܒܬ ܕܬܡܠܟ ܘܥܡܩܬ ܘܪܘܚܬ ܒܝܬ ܡܥܡܪܗ̇ ܣ̈ܓܝܐܝܢ ܩܝܣ̈ܐ ܘܢܘܪܐ ܘܢܫܡܬܗ ܕܡܪܝܐ ܐܝܟ ܢܚܠܐ ܘܟܒܪܝܬܐ ܕܝܩ̇ܕܐ ܒܗ

97. Isaiah 31:1

    ܘܝ ܠܕܢܚܬܝܢ ܠܡܨܪܝܢ ܠܡܬܥܕܪܘ ܘܥܠ ܪ̈ܟܫܐ ܡܬܬܟܠܝܢ ܘܡܬܬܟܠܝܢ ܥܠ ܡܪ̈ܟܒܬܐ ܣܓܝܐ̈ܬܐ ܘܥܠ ܦܪ̈ܫܐ ܕܛܒ ܥܫܝܢܝܢ ܘܠܐ ܐܬܬܟܠܘ ܥܠ ܩܕܝܫܐ ܕܐܝܣܪܝܠ ܘܠܡܪܝܐ ܠܐ ܒܥܘ

98. Isaiah 31:2

    ܘܒܚܟܡܬܗ ܐܝܬܝ ܒܝܫܬܐ ܘܡ̈ܠܘܗܝ ܠܐ ܐܥܒܪ ܘܩܡ ܥܠ ܒܝܬܐ ܕܒܝܫ̈ܐ ܘܥܠ ܥܘܕܪܢܐ ܕܥ̈ܒ̇ܕܝ ܥܘܠܐ

99. Isaiah 31:3

    ܘܡܨܪ̈ܝܐ ܐܢܫܐ ܐܢܘܢ ܘܠܐ ܗܘܘ ܐ̈ܠܗܐ ܘܪܟܫܗܘܢ ܕܒܣܪܐ ܐܢܘܢ ܘܠܐ ܗܘܘ ܕܪܘܚܐ ܘܡܪܝܐ ܢܪܟܢ ܐܝܕܗ ܘܢܣܬܚܦ ܡܥܕܪܢܐ ܘܢܦܠ ܐܦ ܗ̇ܘ ܕܡܬܥܕܪ ܘܟܠܗܘܢ ܐܟܚܕܐ ܢܣܘܦܘܢ

100. Isaiah 31:4

     ܡܛܠ ܕܗܟܢܐ ܐܡܪ ܠܝ ܡܪܝܐ ܐܝܟ ܕܢܗ̇ܡ ܐܪܝܐ ܘܓܘܪܝܐ ܕܐܪܝܐ ܥܠ ܡܕܡ ܕܬܒ̇ܪ ܘܩ̇ܥܝܢ ܒܗ ܣܘܓܐܐ ܕܪ̈ܥܘܬܐ ܘܡܢ ܩܠܗܘܢ ܠܐ ܕܚ̇ܠ ܘܡܢ ܣܘܓܐܗܘܢ ܠܐ ܡܬܬܙܝܥ ܗܟܢܐ ܢܚܘܬ ܡܪܝܐ ܚܝܠܬܢܐ ܠܡܬܚܝܠܘ ܥܠ ܛܘܪܐ ܕܨܗܝܘܢ ܘܥܠ ܪ̈ܡܬܗ̇

← Previous · Next → — showing 501–600 of 1,290

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.