← All works
Peshitta Genesis Peshitta (Syriac Old Testament) · 1,533 sections
Single column Two columns
Genesis 34:20 ܘܐܬܐ ܚܡܘܪ ܘܫܟܝܡ ܒܪܗ ܠܬܪܥܐ ܕܩܪܝܬܗܘܢ . ܘܡܠܠܘ ܥܡ ܐܢܫ̈ܐ ܕܩܪܝܬܗܘܢ . ܘܐܡܪܘ ܠܗܘܢ .
Genesis 34:21 ܓܒܪ̈ܐ ܗܠܝܢ ܫܠܡܝܢ ܐܢܘܢ ܥܡܢ . ܢܬܒܘܢ ܒܐܪܥܐ ܘܢܬܬܓܪܘܢ ܒܗ̇ . ܘܐܪܥܐ ܗܐ ܪܘܚܬܐ ܕܐ̈ܝܕܝܐ ܩܕܡܝܗܘܢ . ܒܢ̈ܬܗܘܢ ܢܣܒ ܠܢ ܢܫ̈ܐ . ܘܒܢ̈ܬܢ ܢܬܠ ܠܗܘܢ .
Genesis 34:22 ܒܪܡ ܒܗܕܐ ܡܬܛܦܝܣܝܢ ܠܢ ܓܒܪ̈ܐ ܕܢܬܒܘܢ ܥܡܢ . ܘܢܗܘܐ ܥܡܐ ܚܕ ܡܐ ܕܓܙܪܢ ܟܠ ܕܟܪܐ ܐܝܟܢܐ ܕܗ̣ܢܘܢ ܓܙܝܪ̈ܝܢ .
Genesis 34:23 ܢܟܣ̈ܝܗܘܢ ܘܩܢܝܢܗܘܢ ܘܟܠܗ̇ ܒܥܝܪܗܘܢ . ܗܐ ܕܝܠܢ ܐܢܘܢ . ܒܪܡ ܢܬܛܦܝܣ ܠܗܘܢ ܘܢܬܒܘܢ ܥܡܢ .
Genesis 34:24 ܘܫܡܥܘ ܡܢ ܫܟܝܡ . ܘܡܢ ܚܡܘܪ ܐܒܘܗܝ ܟܠ ܢܦܩ̈ܝ ܬܪܥܐ ܕܩܪܝܬܗ . ܘܓܙܪܘ ܟܠ ܕܟܪܐ ܟܘܠ ܢܦܩ̈ܝ ܬܪܥܐ ܕܩܪܝܬܗ .
Genesis 34:25 ܘܗܘ̣ܐ ܒܝܘܡܐ ܬܠܝܬܝܐ ܟܕ ܚܣܢܘ ܟܐ̈ܒܝܗܘܢ . ܢܣ̣ܒܘ ܬܪ̈ܝܢ ܒܢ̈ܘܗܝ ܕܝܥܩܘܒ ܫܡܥܘܢ ܘܠܘܝ ܐܚ̈ܝܗ̇ ܕܕܝܢ̣ܐ ܓܒܪ ܚܪܒܗ . ܘܥܠܘ ܥܠ ܩܪܝܬܐ ܒܫܠܝܐ . ܘܩ̇ܛܠܘ ܟܠ ܕܟܪܐ .
Genesis 34:26 ܘܠܚܡܘܪ ܘܠܫܟܝܡ ܒܪܗ . ܩ̣ܛܠܘ ܒܦܘܡܐ ܕܚܪܒܐ . ܘܕܒܪܘܗ̇ ܠܕܝܢ̣ܐ ܡܢ ܒܝܬ ܫܟܝܡ ܘܢܦܩܘ .
Genesis 34:27 ܘܒܢ̈ܝ ܝܥܩܘܒ ܥܠܘ ܥܠ ܩ̈ܛܝܠܐ ܘܒܙܘ ܠܩܪܝܬܐ . ܥܠ ܕܛܡܐܘ ܠܕܝܢ̣ܐ ܚܬܗܘܢ .
Genesis 34:28 ܘܥܢܗܘܢ ܘܬܘܪ̈ܝܗܘܢ ܘܚܡܪ̈ܗܘܢ ܕܒܩܪܝܬܐ ܘܕܒܚܩܠܐ ܕܒܪܘ .
Genesis 34:29 ܘܟܠܗܘܢ ܢܟܣ̈ܝܗܘܢ ܘܟܠܗ̇ ܝܩܪܬܗܘܢ ܘܠܢܫ̈ܝܗܘܢ ܫܒܘ . ܕܒܙܘ ܟܠ ܕܐܝܬ ܒܩܪܝܬܐ .
Genesis 34:30 ܘܐܡ̣ܪ ܝܥܩܘܒ ܠܫܡܥܘܢ ܘܠܠܘܝ . ܐܗܪܬܘܢܢܝ ܕܬܒܐܫܘܢ ܠܝ ܒܝܬ ܥܡܘܪ̈ܝܗ̇ ܕܐܪܥܐ . ܒܝܬ ܟܢܥ̈ܢܝܐ ܘܒܝܬ ܦܪ̈ܙܝܐ ܘܐܢܐ ܩܠܝܠ ܐܢܐ ܒܡܢܝܢܐ . ܘܡܬܟܢܫܝܢ ܥܠܝ ܘܡܚܝܢ ܠܝ . ܘܐ̇ܒܕ ܐܢܐ ܐܢܐ ܘܒܝܬܝ .
Genesis 34:31 ܘܐܡܪܘ ܐܝܟ ܙܢܝܬܐ ܐܬܥܒܕ ܠܚܬܢ .
Genesis 35:1 ܘܐܡ̣ܪ ܡܪܝܐ ܠܝܥܩܘܒ . ܩܘܡ ܣܩ ܠܒܝܬ ܐܝܠ ܘܬܒ ܬܡܢ . ܘܥܒ̣ܕ ܬܡ̇ܢ ܡܕܒܚܐ ܠܐܝܠ ܕܐܬܓܠܝ ܥܠܝܟ . ܟܕ ܥ̇ܪܩ ܐܢܬ ܡܢ ܩܕܡ ܥܣܘ ܐܚܘܟ .
Genesis 35:2 ܘܐܡ̣ܪ ܝܥܩܘܒ ܠܒ̈ܢܝ ܒܝܬܗ . ܘܠܟܠ ܕܥܡܗ . ܐܥܒܪܘ ܐ̈ܠܗܐ ܢܘܟܪ̈ܝܐ ܕܒܝܢܬܟܘܢ . ܘܐܬܕܟܘ ܘܚܠܦܘ ܢܚ̈ܬܝܟܘܢ .
Genesis 35:3 ܘܩܘܡܘ ܢܣܩ ܠܒܝܬ ܐܝܠ . ܘܐܥܒܕ ܬܡ̇ܢ ܡܕܒܚܐ ܠܐܠܗܐ ܕܥܢܢܝ ܒܝܘܡܐ ܕܐܘܠܨܢܝ . ܘܗܘ̣ܐ ܥܡܝ ܒܐܘܪܚܐ ܕܐ̇ܙܠܬ .
Genesis 35:4 ܘܝܗܒܘ ܠܝܥܩܘܒ ܟܠܗܘܢ ܐ̈ܠܗܐ ܢܘܟܪ̈ܝܐ ܕܒܐ̈ܝܕܝܗܘܢ ܘܩ̈ܕܫܐ ܕܒܐ̈ܕܢܝܗܘܢ . ܘܛܡ̣ܪ ܐܢܘܢ ܝܥܩܘܒ ܬܚܝܬ ܒܛܡܬܐ ܕܥܡ ܫܟܝܡ .
Genesis 35:5 ܘܫܩ̣ܠܘ ܘܗܘܬ ܕܚܠܬܗ ܕܐܠܗܐ ܥܠ ܩܘܪ̈ܝܐ ܕܒܚܕܪ̈ܝܗܘܢ . ܘܠܐ ܪܕܦܘ ܒܬܪ ܝܥܩܘܒ ܘܒܬܪ ܒܢ̈ܘܗܝ .
Genesis 35:6 ܘܐܬ̣ܐ ܝܥܩܘܒ ܠܠܘܙ ܕܒܐܪܥܐ ܕܟܢܥܢ . ܗ̣ܝ ܗܝ ܒܝܬ ܐܝܠ . ܗ̣ܘ ܘܟܠܗ ܥܡܐ ܕܥܡܗ .
Genesis 35:7 ܘܒܢ̣ܐ ܬܡ̇ܢ ܡܕܒܚܐ . ܘܩܪܝܗܝ ܠܐܬܪܐ ܗ̇ܘ ܒܝܬ ܐܝܠ . ܡܛܠ ܕܬܡ̇ܢ ܐܬܓܠܝ ܥܠܘܗܝ ܐܠܗܐ . ܟܕ ܥܪܩ̇ ܗܘܐ ܡܢ ܩܕܡ ܥܣܘ ܐܚܘܗܝ .
Genesis 35:8 ܘܡܝܬܬ ܕܒܘܪܐ ܡܝܢܩܬܗ̇ ܕܪܦܩܐ . ܘܐܬܩܒ̣ܪܬ ܠܬܚܬ ܡܢ ܒܝܬ ܐܝܠ ܬܚܝܬ ܒܛܡܬܐ . ܘܩ̣ܪܐ ܫܡܗ̇ ܒܛܡܬܐ ܕܒܟܬܐ .
Genesis 35:9 ܘܐܬܓܠܝ ܬܘܒ ܐܠܗܐ ܥܠ ܝܥܩܘܒ . ܟܕ ܐܬ̇ܐ ܡܢ ܦܕܢ ܕܐܪܡ ܘܒܪܟܗ .
Genesis 35:10 ܘܐܡ̣ܪ ܠܗ ܐܠܗܐ . ܠܐ ܢܬܩܪܐ ܬܘܒ ܫܡܟ ܝܥܩܘܒ . ܐܠܐ ܢܗܘܐ ܫܡܟ ܐܝܣܪܝܠ . ܘܩ̣ܪܐ ܫܡܗ ܐܝܣܪܝܠ .
Genesis 35:11 ܘܐܡ̣ܪ ܠܗ ܐܠܗܐ . ܐܢܐ ܐܢܐ ܐܝܠܫܕܝ ܐܠܗܐ . ܟܒܪ ܘܣܓܝ ܥܡܐ . ܘܟܢܫܐ ܕܥܡ̈ܡܐ ܡܢܟ ܢܗܘܘܢ . ܘܡ̈ܠܟܐ ܡܢ ܚܨܟ ܢܦܩܘܢ .
Genesis 35:12 ܘܐܪܥܐ ܕܝܡ̇ܝܬ ܠܐܒܪܗܡ ܘܠܐܝܣܚܩ ܠܟ ܐܬܠܝܗ̇ . ܘܠܙܪܥܟ ܡܢ ܒܬܪܟ ܐܬܠܝܗ̇ ܐܪܥܐ .
Genesis 35:13 ܘܐܬܬܪܝܡ ܡܢܗ ܐܠܗܐ ܒܐܬܪܐ ܕܡܠܠ ܥܡܗ .
Genesis 35:14 ܘܐܩܝܡ ܝܥܩܘܒ ܩܝܡܬܐ ܒܐܬܪܐ ܕܡܠܠ ܥܡܗ ܩܝܡܬܐ ܕܟܐܦܐ . ܘܢܩܝ ܥܠܝܗ̇ ܢܘܩܝܐ . ܘܢܣܟ ܥܠܝܗ̇ ܡܫܚܐ .
Genesis 35:15 ܘܩ̣ܪܐ ܝܥܩܘܒ ܫܡܗ ܕܐܬܪܐ ܕܡܠܠ ܥܡܗ ܬܡܢ ܐܠܗܐ ܒܝܬ ܐܝܠ .
Genesis 35:16 ܘܫܩ̣ܠ ܡܢ ܒܝܬ ܐܝܠ . ܘܪܕܐ ܬܘܒ ܐܝܟ ܡܪܕܐ ܦܪܣܚܐ ܕܐܪܥܐ ܠܡܥܠ ܠܐܦܪܬ . ܘܝܠ̣ܕܬ ܪܚܝܠ ܘܚܣ̣ܢܬ ܟܕ ܝܠܕܐ .
Genesis 35:17 ܘܗܘ̣ܐ ܕܟܕ ܚܣܢ̣ܬ . ܐܡ̣ܪܬ ܠܗ̇ ܚܝ̇ܬܐ . ܠܐ ܬܕܚܠܝܢ . ܡܛܠ ܕܐܦ ܗܢܐ ܒܪܐ ܗܘ ܠܟܝ .
Genesis 35:18 ܘܗܘܐ ܕܟܕ ܢܦܩܐ ܢܦܫܗ̇ ܘܡܝܬܐ . ܩܪܬ ܫܡܗ ܒܪ ܟܐ̈ܒܝ . ܘܐܒܘܗܝ ܩܪܝ̣ܗܝ ܒܢܝܡܝܢ .
Genesis 35:19 ܘܡܝܬܬ ܪܚܝܠ ܘܐܬܩܒܪܬ ܒܐܘܪܚܐ ܕܐܦܪܬ . ܗ̣ܝ ܗܝ ܒܝܬ ܠܚܡ .
Genesis 35:20 ܘܐܩܝܡ ܝܥܩܘܒ ܩܝܡܬܐ ܥܠ ܩܒܪܗ̇ ܕܪܚܝܠ . ܗ̣ܝ ܗܝ ܩܝܡܬܐ ܕܩܒܪܗ̇ ܕܪܚܝܠ ܥܕܡܐ ܠܝܘܡܢܐ .
Genesis 35:21 ܘܫܩ̣ܠ ܐܝܣܪܝܠ ܘܢܩ̣ܫ ܡܫܟܢܗ ܡܢ ܬܡܢ ܠܡܓܕܠܐ ܕܓܕܪ .
Genesis 35:22 ܘܗܘ̣ܐ ܕܟܕ ܫ̣ܪܐ ܐܝܣܪܝܠ ܒܐܪܥܐ ܗ̇ܝ . ܐܙܠ ܪܘܒܝܠ ܘܫܟ̣ܒ ܥܡ ܒܠܗܐ ܕܪܘܟܬܗ ܕܐܒܘܗܝ . ܘܫܡ̣ܥ ܐܝܣܪܝܠ ܘܗܘܘ ܒܢ̈ܘܗܝ ܕܝܥܩܘܒ ܬܪܥܣܪ̈ .
Genesis 35:23 ܒܢ̈ܝܗ̇ ܕܠܝܐ . ܒܘܟܪܗ ܕܝܥܩܘܒ ܪܘܒܝܠ ܘܫܡܥܘܢ ܘܠܘܝ . ܘܝܗܘܕܐ ܘܐܝܣܟܪ ܘܙܒܘܠܘܢ .
Genesis 35:24 ܘܒܢ̈ܝܗ̇ ܕܪܚܝܠ . ܝܘܣܦ ܘܒܢܝܡܝܢ .
Genesis 35:25 ܘܒܢ̈ܝܗ̇ ܕܒܠܗܐ ܐܡܬܗ̇ ܕܪܚܝܠ . ܕܢ ܘܢܦܬܠܝ .
Genesis 35:26 ܘܒܢ̈ܝܗ̇ ܕܙܠܦܐ ܐܡܬܗ̇ ܕܠܝܐ . ܓܕ ܘܐܫܝܪ . ܗܠܝܢ ܒܢ̈ܘܗܝ ܕܝܥܩܘܒ ܕܐܬܝܠܕܘ ܠܗ ܒܦܕܢ ܕܐܪܡ .
Genesis 35:27 ܘܐܬ̣ܐ ܝܥܩܘܒ ܠܘܬ ܐܝܣܚܩ ܐܒܘܗܝ ܠܡܡܪܐ ܩܘܪܝܬ ܓܢܒܪ̈ܐ . ܗܝ ܗܝ ܚܒܪܘܢ ܕܒܐܪܥܐ ܕܟܢܥܢ . ܕܥܡ̣ܪ ܬܡܢ ܐܒܪܗܡ ܘܐܝܣܚܩ .
Genesis 35:28 ܘܗܘܘ ܝܘܡ̈ܘܗܝ ܕܐܝܣܚܩ . ܡܐܐ ܘܬܡܢܐܝܢ ܫ̈ܢܝܢ .
Genesis 35:29 ܘܐܬܟܪܗ ܐܝܣܚܩ ܘܡܝܬ . ܘܐܬܟܢܫ ܠܘܬ ܥܡܗ . ܣܐܒ ܘܣܒܥ ܝܘܡ̈ܬܗ . ܘܩܒܪܘܗܝ ܥܣܘ ܘܝܥܩܘܒ ܒܢ̈ܘܗܝ . ܒܩܒܪܐ ܕܙܒ̣ܢ ܐܒܪܗܡ ܐܒܘܗܝ .
Genesis 36:1 ܘܗܠܝܢ ܬ̈ܘܠܕܬܗ ܕܥܣܘ . ܥܣܘ ܗܘܝܘ ܐܕܘܡ .
Genesis 36:2 ܥܣܘ ܢܣ̣ܒ ܢܫ̈ܘܗܝ ܡܢ ܒܢ̈ܬ ܟܢܥܢ . ܠܥܕܐ ܒܪܬ ܐܠܘܢ ܚܬܝܐ . ܘܠܐܗܠܝܒܡܐ ܒܪܬ ܥܢܐ ܒܪ ܨܒܥܘܢ ܚܘܝܐ .
Genesis 36:3 ܘܠܒܣܡܬ ܒܪܬ ܐܝܫܡܥܝܠ ܚܬܗ ܕܢܒܝܘܬ .
Genesis 36:4 ܘܝܠܕܬ ܥܕܐ ܠܥܣܘ ܠܐܠܝܦܙ ܘܒܣܡܬ ܝܠ̣ܕܬ ܠܪܥܘܐܝܠ .
Genesis 36:5 ܘܐܗܠܝܒܡܐ ܝܠ̣ܕܬ ܠܝܥܘܫ ܘܠܝܥܠܢ ܘܠܩܘܪܚ . ܗܠܝܢ ܒܢ̈ܘܗܝ ܕܥܣܘ . ܕܐܬܝܠܕܘ ܠܗ ܒܐܪܥܐ ܕܟܢܥܢ .
Genesis 36:6 ܘܕܒ̣ܪ ܥܣܘ ܢܫ̈ܘܗܝ ܘܒܢ̈ܘܗܝ ܘܒܢ̈ܬܗ . ܘܟܠ ܢܦܫ̈ܬܐ ܕܒܝܬܗ . ܘܟܠܗ̇ ܒܥܝܪܗ . ܘܟܠܗ ܩܢܝܢܗ ܕܩܢ̣ܐ ܒܐܪܥܐ ܕܟܢܥܢ . ܘܐܙܠ ܠܐܪܥܐ ܕܣܥܝܪ ܡܢ ܩܕܡ ܝܥܩܘܒ ܐܚܘܗܝ .
Genesis 36:7 ܡܛܠ ܕܣ̇ܓܝ ܗܘܐ ܩܢܝܢܗܘܢ ܠܡܬܒ ܐܟܚܕܐ . ܘܠܐ ܡܘܦܝܐ ܗܘܬ ܐܪܥܐ ܕܡܥܡܪܗܘܢ ܠܡܣܝܒܪܘ ܐܢܘܢ ܡܛܠ ܩܢܝܢܗܘܢ .
Genesis 36:8 ܘܝܬ̣ܒ ܥܣܘ ܒܛܘܪܐ ܕܣܥܝܪ . ܥܣܘ ܗܘܝܘ ܐܕܘܡ .
Genesis 36:9 ܘܗܠܝܢ ܬܘ̈ܠܕܬܗ ܕܥܣܘ ܐܒܘܗܘܢ ܕܐ̈ܕܘܡܝܐ ܒܛܘܪܐ ܕܣܥܝܪ .
Genesis 36:10 ܘܗܠܝܢ ܫܡ̈ܗܐ ܕܒܢ̈ܝ ܥܣܘ . ܪܥܘܐܝܠ ܒܪ ܒܣܡܬ ܐܢܬܬܗ ܕܥܣܘ . ܐܠܝܦܙ ܒܪ ܥܕܐ ܐܢܬܬܗ ܕܥܣܘ .
Genesis 36:11 ܘܗܘܘ ܒܢ̈ܘܗܝ ܕܐܠܝܦܙ . ܬܝܡܢ ܘܐܘܡܪ ܘܨܦܘ ܘܓܥܬܡ ܘܩܢܙ .
Genesis 36:12 ܘܬܡܢܥ ܗܘܬ ܕܪܘܟܬܐ ܠܐܠܝܦܙ ܒܪ ܥܣܘ . ܘܝܠ̣ܕܬ ܠܐܠܝܦܙ ܠܥܡܠܝܩ . ܗܠܝܢ ܒܢ̈ܝܗ̇ ܕܥܕܐ ܐܢܬܬܗ ܕܥܣܘ .
Genesis 36:13 ܘܗܠܝܢ ܒܢ̈ܝ ܪܥܘܐܝܠ . ܢܚ̇ܬ ܘܙܪܚ . ܘܫܡ̇ܐ ܘܡܙܐ . ܗܠܝܢ ܒ̈ܢܝ ܒܣܡܬ ܐܢܬܬܗ ܕܥܣܘ .
Genesis 36:14 ܘܗܠܝܢ ܒܢ̈ܝ ܐܗܠܝܒܡܐ ܒܪܬ ܥܢܐ ܒܪ ܨܒܥܘܢ ܐܢܬܬܗ ܕܥܣܘ . ܘܝܠ̣ܕܬ ܠܥܣܘ . ܠܝܥܘܫ ܘܠܝܥܠܢ ܘܠܩܘܪܚ .
Genesis 36:15 ܘܗܠܝܢ ܪ̈ܘܪܒܢܐ ܕܒܢ̈ܝ ܥܣܘ . ܒܢ̈ܝ ܐܠܝܦܙ ܒܘܟܪܗ ܕܥܣܘ . ܪܒܐ ܬܝܡܢ . ܪܒܐ ܐܘܡܪ . ܪܒܐ ܨܦܘ . ܪܒܐ ܩܢܙ .
Genesis 36:16 ܪܒܐ ܓܥܬܡ . ܪܒܐ ܩܘܪܚ . ܪܒܐ ܥܡܠܝܩ . ܗܠܝܢ ܪ̈ܘܪܒܢܐ ܕܐܠܝܦܙ ܒܐܪܥܐ ܕܐܕܘܡ . ܗܠܝܢ ܒܢ̈ܝܗ̇ ܕܥܕܐ .
Genesis 36:17 ܘܗܠܝܢ ܒ̈ܢܝ ܪܥܘܐܝܠ ܒܪ ܥܣܘ . ܪܒܐ ܢܚ̇ܬ . ܪܒܐ ܙܪܚ . ܪܒܐ ܫܡܐ . ܪܒܐ ܡܙܐ . ܗܠܝܢ ܪ̈ܘܪܒܢܐ ܕܪܥܘܐܝܠ ܒܐܪܥܐ ܕܐܕܘܡ . ܗܠܝܢ ܒܢ̈ܝܗ̇ ܕܒܣܡܬ ܐܢܬܬܗ ܕܥܣܘ .
Genesis 36:18 ܘܗܠܝܢ ܒܢ̈ܝ ܐܗܠܝܒܡܐ ܐܢܬܬܗ ܕܥܣܘ . ܪܒܐ ܝܥܘܫ . ܪܒܐ ܝܥܠܢ . ܪܒܐ ܩܘܪܚ . ܗܠܝܢ ܒܢ̈ܝ ܐܗܠܝܒܡܐ ܒܪܬ ܥܢܐ ܐܢܬܬܗ ܕܥܣܘ .
Genesis 36:19 ܗܠܝܢ ܒܢ̈ܝ ܥܣܘ ܘܗܠܝܢ ܪ̈ܘܪܒܢܝܗܘܢ . ܥܣܘ ܗܘܝܘ ܐܕܘܡ .
Genesis 36:20 ܘܗܠܝܢ ܒܢ̈ܝ ܣܥܝܪ ܚܘܪ̈ܝܐ ܝܬ̈ܒܝ ܐܪܥܐ . ܠܘܛܢ ܘܫܘܒܠ . ܘܨܒܥܘܢ ܘܥܢܐ .
Genesis 36:21 ܘܕܝܫܘܢ ܘܐܨܪ ܘܕܝܫܢ . ܗܠܝܢ ܪ̈ܘܪܒܢܐ ܕܚܘܪ̈ܝܐ . ܒܢ̈ܝ ܣܥܝܪ ܒܐܪܥܐ ܕܐܕܘܡ .
Genesis 36:22 ܘܗܘܘ ܒ̈ܢܝ ܠܘܛܢ . ܚܘܪܝ ܘܗܘܡܡ . ܘܚܬܗ ܕܠܘܛܢ ܬܡܢܥ .
Genesis 36:23 ܘܗܠܝܢ ܒ̈ܢܝ ܫܘܒܠ . ܐܠܘܢ ܘܡܢܚ̣ܬ ܘܥܘܒܠ ܘܫ̇ܦܪ ܘܐܘܝܡ .
Genesis 36:24 ܘܗܠܝܢ ܒܢ̈ܝ ܨܒܥܘܢ ܐܢܐ ܘܥܢܐ . ܗ̇ܘ ܥܢܐ ܕܐܫܟܚ ܠܗ ܡ̈ܝܐ ܒܡܕܒܪܐ . ܟܕ ܪܥ̇ܐ ܗܘܐ ܚܡܪ̈ܐ ܕܨܒܥܘܢ ܐܒܘܗܝ .
Genesis 36:25 ܘܗܠܝܢ ܒܢ̈ܝ ܥܢܐ . ܕܝܫܘܢ ܘܐܗܠܝܒܡܐ .
Genesis 36:26 ܘܗܠܝܢ ܒܢ̈ܝ ܕܝܫܘܢ . ܚܡܪܢ ܘܐܫܒܢ . ܘܝܬܪܢ ܘܟܪܢ .
Genesis 36:27 ܘܗܠܝܢ ܒܢ̈ܝ ܐܨܪ . ܟܠܗܢ ܘܙܥܘܢ ܘܥܩܢ .
Genesis 36:28 ܘܗܠܝܢ ܒ̈ܢܝ ܕܝܫܢ ܥܘܨ ܘܐܪܢ .
Genesis 36:29 ܘܗܠܝܢ ܪ̈ܘܪܒܢܐ ܕܚܘܪ̈ܝܐ . ܪܒܐ ܠܘܛܢ . ܪܒܐ ܫܘܒܠ . ܪܒܐ ܨܒܥܘܢ . ܪܒܐ ܥܢܐ .
Genesis 36:30 ܪܒܐ ܕܝܫܘܢ . ܪܒܐ ܐܨܪ . ܪܒܐ ܕܝܫܢ . ܗܠܝܢ ܪ̈ܘܪܒܢܐ ܕܚܘܪ̈ܝܐ ܠܪ̈ܘܪܒܢܝܗܘܢ ܒܐܪܥܐ ܕܣܥܝܪ .
Genesis 36:31 ܘܗܠܝܢ ܡ̈ܠܟܐ ܕܐܡܠܟܘ ܒܐܪܥܐ ܕܐܕܘܡ . ܩܕܡ ܕܢܡܠܟ ܡ̇ܠܟܐ ܠܒ̈ܢܝ ܐܝܣܪܝܠ .
Genesis 36:32 ܐܡܠܟ ܒܐܕܘܡ ܒܠܥ ܒܪ ܒܥܘܪ . ܘܫܡܐ ܕܩܪܝܬܗ ܕܝܗܒ .
Genesis 36:33 ܘܡܝܬ ܒܠܥ . ܘܐܡܠܟ ܒܬܪܗ ܝܘܒܒ ܒܪ ܙܪܚ ܡܢ ܒܘܨܪ .
Genesis 36:34 ܘܡܝܬ ܝܘܒܒ . ܘܐܡܠܟ ܒܬܪܗ ܚܫ̣ܘܡ ܡܢ ܐܪܥܐ ܕܬܝܡܢܐ .
Genesis 36:35 ܘܡܝܬ ܚܫܘܡ ܘܐܡܠܟ ܒܬܪܗ ܗܕܕ ܒܪ ܒܕܕ . ܕܩ̣ܛܠ ܠܡܕܝܢ̈ܝܐ ܒܚܩ̈ܠܬܐ ܕܡܘܐܒ . ܘܫܡܐ ܕܩܪܝܬܗ ܓܘܝܬ .
Genesis 36:36 ܘܡܝܬ ܗܕܕ ܘܐܡܠܟ ܒܬܪܗ ܣܡܠܐ ܡܢ ܡܣܪܩܐ .
Genesis 36:37 ܘܡܝܬ ܣܡܠܐ . ܘܐܡܠܟ ܒܬܪܗ ܫܐܘܠ ܡܢ ܪܚܒܘܬ ܢܗܪܐ .
Genesis 36:38 ܘܡܝܬ ܫܐܘܠ . ܘܐܡܠܟ ܒܬܪܗ ܒܥܠܚܢܢ ܒܪ ܥܒܟܘܪ .
Genesis 36:39 ܘܡܝܬ ܒܥܠܚܢܢ ܒܪ ܥܒܟܘܪ . ܘܐܡܠܟ ܒܬܪܗ ܗܕܕ ܘܫܡܐ ܕܩܪܝܬܗ ܦܥܘ . ܘܫܡܐ ܕܐܢܬܬܗ ܡܗܛܒܐܝܠ ܒܪܬ ܡܛܪܝܕ ܒܪ ܡܝܙܗܒ .
Genesis 36:40 ܘܗܠܝܢ ܫ̈ܡܗܐ ܕܪ̈ܘܪܒܢܐ ܕܥܣܘ ܠܫܪ̈ܒܬܗܘܢ ܠܬܘ̈ܠܕܬܗܘܢ ܒܫ̈ܡܗܝܗܘܢ ܪܒܐ ܬܡܢܥ . ܪܒܐ ܥܢܘܐ . ܪܒܐ ܐܝܬܝܬ .
Genesis 36:41 ܪܒܐ ܐܗܠܝܒܡܐ . ܪܒܐ ܐܝܠܐ . ܪܒܐ ܦܝܢܘܢ .
Genesis 36:42 ܪܒܐ ܩܢܙ . ܪܒܐ ܬܝܡܢ . ܪܒܐ ܡܒ̣ܨܪ .
Genesis 36:43 ܪܒܐ ܡܓܕܝܠ ܪܒܐ ܓܝܪܡ . ܗܠܝܢ ܪ̈ܘܪܒܢܐ ܕܐ̈ܕܘܡܝܐ ܒܝܬ ܡܥܡܪܗܘܢ . ܒܐܪܥܐ ܕܝܪܬܘܬܗܘܢ ܗܘܝܘ ܥܣܘ ܐܒܘܗܘܢ ܕܐ̈ܕܘܡܝܐ .
Genesis 37:1 ܘܝܬ̣ܒ ܝܥܩܘܒ ܒܐܪܥܐ ܕܡܥܡܪܗ ܕܐܒܘܗܝ ܒܐܪܥܐ ܕܟܢܥܢ .
Genesis 37:2 ܘܗܠܝܢ ܬܘ̈ܠܕܬܗ ܕܝܥܩܘܒ . ܝܘܣܦ ܒܪ ܫܒܥܣܪܐ ܫ̈ܢܝܢ . ܪܥ̇ܐ ܗܘܐ ܥܡ ܐܚ̈ܘܗܝ ܥܢܐ . ܘܗ̣ܘ ܪܒ̇ܐ ܗܘܐ ܥܡ ܒܢ̈ܝ ܙܠܦܐ ܘܥܡ ܒܢ̈ܝ ܒܠܗܐ . ܢܫ̈ܘܗܝ ܕܐܒܘܗܝ . ܘܐܝܬܝ ܝܘܣܦ ܛܒܗܘܢ ܒܝ̣ܫܐ ܠܐܒܘܗܘܢ .
Genesis 37:3 ܘܐܝܣܪܝܠ ܪܚ̇ܡ ܗܘܐ ܠܗ ܠܝܘܣܦ ܝܬܝܪ ܡܢ ܟܠܗܘܢ ܒܢ̈ܘܗܝ . ܡܛܠ ܕܒܪ ܣܝܒܘܬܐ ܗܘܐ ܠܗ . ܘܥܒܕ ܠܗ ܟܘܬܝܢܐ ܕܦܕܝ̈ܬܐ .
Genesis 37:4 ܘܚܙܘ ܐ̈ܚܘܗܝ ܕܠܗ ܪܚ̇ܡ ܗܘܐ ܐܒܘܗܘܢ . ܝܬܝܪ ܡܢ ܟܠܗܘܢ ܘܣܢܐܘܗܝ . ܘܠܐ ܐܫܟܚܘ ܠܡܡܠܠܘ ܥܡܗ ܫܠܡܐ .
Genesis 37:5 ܘܚ̣ܠܡ ܝܘܣܦ ܚܠܡܐ ܘܚܘܝܗ ܠܐ̈ܚܘܗܝ . ܘܐܘܣܦܘ ܠܡܣܢܝܗ .
Genesis 37:6 ܘܐܡ̣ܪ ܠܗܘܢ . ܫܡ̣ܥܘ ܚܠܡܐ ܗܢܐ ܕܚ̇ܠܡܬ .
Genesis 37:7 ܗܐ ܚܢܢ ܐ̇ܣܪܝܢܢ ܟ̈ܦܐ ܒܓܘ ܚܩܠܐ . ܘܗܐ ܩܡܬ ܟܦܝ ܘܐܙܕܩ̣ܦܬ . ܘܗܐ ܚܕܪ̈ܢ ܟܦܝ̈ܟܘܢ ܘܣܓܕܢ ܠܟܦܝ .
Genesis 37:8 ܘܐܡܪܘ ܠܗ ܐܚ̈ܘܗܝ . ܡܡܠܟܘ ܡܡܠܟ ܐܢܬ ܥܠܝܢ ܐܘ ܡܫ̇ܬܠܛܘ ܡܫܬ̇ܠܛ ܐܢܬ ܒܢ . ܘܐܘܣܦܘ ܬܘܒ ܠܡܣܢܝܗ ܥܠ ܚ̈ܠܡܘܗܝ ܘܥܠ ܦܬ̈ܓܡܘܗܝ .
Genesis 37:9 ܘܚ̣ܠܡ ܬܘܒ ܚܠܡܐ ܐܚܪܢܐ . ܘܐܫܬܥܝܗ ܠܐ̈ܚܘܗܝ ܘܐܡ̣ܪ ܠܗܘܢ . ܗܐ ܚܠܡܐ ܚ̇ܠܡܬ ܬܘܒ . ܘܗܐ ܫܡܫܐ ܘܣܗܪܐ ܘܚܕܥܣܪ ܟܘܟܒ̈ܝܢ ܣܓܕܝܢ ܠܝ .
Genesis 37:10 ܘܐܫܬܥܝ ܠܐܒܘܗܝ ܘܠܐܚ̈ܘܗܝ . ܘܟܐܐ ܒܗ ܐܒܘܗܝ ܘܐܡ̣ܪ ܠܗ . ܡܢܘ ܚܠܡܐ ܗܢܐ ܕܚ̣ܠܡܬ . ܡܐܬܐ ܢܐܬܐ ܐܢܐ ܘܐܡܟ ܘܐܚ̈ܝܟ ܠܡܣܓܕ ܠܟ ܥܠ ܐܪܥܐ .
Genesis 37:11 ܘܛܢܘ ܒܗ ܐ̈ܚܘܗܝ . ܘܐܒܘܗܝ ܢ̇ܛܪ ܗܘܐ ܦܬܓܡ̈ܐ .
Genesis 37:12 ܘܐܙܠܘ ܐܚ̈ܘܗܝ ܕܝܘܣܦ ܠܡܪܥܐ ܥܢܐ ܕܐܒܘܗܘܢ ܒܫܟܝܡ .
Genesis 37:13 ܘܐܡ̣ܪ ܐܝܣܪܝܠ ܠܝܘܣܦ . ܗܐ ܐ̈ܚܝܟ ܪܥ̇ܝܢ ܒܫܟܝܡ . ܬܐ ܐܫܕܪܟ ܠܘܬܗܘܢ . ܘܐܡ̣ܪ ܠܗ ܗܐ ܐܢܐ .
Genesis 37:14 ܘܐܡ̣ܪ ܠܗ ܐܒܘܗܝ . ܙܠ ܚܙܝ ܫܠܡܐ ܕܐ̈ܚܝܟ ܘܫܠܡܐ ܕܥܢܐ ܘܐܬܝܒܝܢܝ ܦܬܓܡܐ . ܘܫܕܪܗ ܝܥܩܘܒ ܡܢ ܥܘܡܩܐ ܕܚܒܪܘܢ ܘܐܬ̣ܐ ܠܫܟܝܡ .
Genesis 37:15 ܘܐܫܟܚܗ ܓܒܪܐ ܟܕ ܛܥ̇ܐ ܒܚܩܠܐ . ܘܫܐܠܗ ܓܒܪܐ ܗ̇ܘ ܘܐܡ̣ܪ ܠܗ . ܡܢܐ ܒ̇ܥܐ ܐܢܬ .
Genesis 37:16 ܘܐܡ̣ܪ ܠܐܚ̈ܝ ܒ̇ܥܐ ܐܢܐ . ܚܘܢܝ ܐܝܟܐ ܪܥ̇ܝܢ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .