← All works
Peshitta Genesis Peshitta (Syriac Old Testament) · 1,533 sections
Single column Two columns
Genesis 37:17 ܐܡ̇ܪ ܠܗ ܓܒܪܐ . ܫܩ̣ܠܘ ܠܗܘܢ ܡܟܐ . ܘܫܡ̇ܥܬ ܕܐܡܪ̈ܝܢ . ܢܐܙܠ ܠܕܘܬܢ . ܘܐ̣ܙܠ ܝܘܣܦ ܒܬܪ ܐܚ̈ܘܗܝ . ܘܐܫܟܚ ܐܢܘܢ ܒܕܘܬܢ .
Genesis 37:18 ܘܚܙܐܘܗܝ ܡܢ ܪܘܚܩܐ . ܘܥܕܠܐ ܢܬܩܪܒ ܠܘܬܗܘܢ . ܡܬܚܫܒܝܢ ܗܘܘ ܥܠܘܗܝ ܠܡܩܛܠܗ .
Genesis 37:19 ܘܐܡܪܘ ܓܒܪ ܠܐܚܘܗܝ . ܗܐ ܚ̇ܠܡ ܚ̈ܠܡܐ ܗܘ ܐܬ̇ܐ .
Genesis 37:20 ܬܘ ܢܩܛ̣ܠܝܘܗܝ ܘܢܪܡܝܘܗܝ ܒܚܕ ܡܢ ܓܘܒ̈ܐ . ܘܢܐܡܪ ܕܚܝܘܬܐ ܒܝܫܬܐ ܐܟܠܬܗ . ܘܢܚܙܐ ܡܢܐ ܗ̇ܘܐ ܠܚ̈ܠܡܘܗܝ .
Genesis 37:21 ܘܫܡ̣ܥ ܪܘܒܝܠ ܘܦܨܝܗ ܡܢ ܐ̈ܝܕܝܗܘܢ . ܘܐܡ̣ܪ ܠܗܘܢ . ܠܐ ܢܩܛܘܠ ܢܦܫܐ .
Genesis 37:22 ܘܐܡ̣ܪ ܠܗܘܢ ܪܘܒܝܠ . ܠܐ ܬܐܫܕܘܢ ܕܡܐ . ܐܪܡܐܘܗܝ ܒܓܘܒܐ ܗܢܐ ܕܒܡܕܒܪܐ . ܘܐܝܕܐ ܠܐ ܬܘܫܛܘܢ ܒܗ . ܕܢܦܨܝܘܗܝ ܡܢ ܐ̈ܝܕܝܗܘܢ ܘܢܗܦܟܝܘܗܝ ܠܐܒܘܗܝ .
Genesis 37:23 ܘܟܕ ܐܬ̣ܐ ܝܘܣܦ ܠܘܬ ܐ̈ܚܘܗܝ . ܐܫܠܚܘܗܝ ܟܘܬܝܢܐ ܕܦܕܝ̈ܬܐ ܕܠܒܝܫ ܗܘܐ .
Genesis 37:24 ܘܢܣܒܘܗܝ ܘܐܪܡܝܘܗܝ ܒܓܘܒܐ . ܘܓܘܒܐ ܣܪܝܩ ܗܘܐ ܘܠܝܬ ܒܗ ܡ̈ܝܐ .
Genesis 37:25 ܘܝܬܒܘ ܠܡ̣ܐܟܠ ܠܚܡܐ . ܘܐܪܝܡܘ ܥܝܢ̈ܝܗܘܢ ܘܚܙܝܢ . ܘܗܐ ܫܝܪܬܐ ܕܥܪ̈ܒܝܐ ܐܬܝܐ ܡܢ ܓܠܥܕ ܘܓܡ̈ܠܝܗܘܢ ܛܥܝܢܝܢ . ܪ̈ܗܛܢܐ ܘܨܪܘܐ ܘܒ̈ܛܡܐ . ܘܐܙܠܝܢ ܠܡܘܒܠܘ ܠܡܨܪܝܢ .
Genesis 37:26 ܘܐܡ̣ܪ ܝܗܘܕܐ ܠܐ̈ܚܘܗܝ . ܡܢܐ ܝܘܬܪܢܐ ܕܢܩܛܘܠ ܠܐܚܘܢ . ܘܢܟܣܐ ܕܡܗ .
Genesis 37:27 ܬܘ ܢܙܒܢܝܘܗܝ ܠܥܪ̈ܒܝܐ . ܘܐܝܕܢ ܠܐ ܬܗܘܐ ܒܗ . ܡܛܠ ܕܐܚܘܢ ܗܘ ܘܒܣܪܢ . ܘܫܡܥܘ ܡܢܗ ܐ̈ܚܘܗܝ .
Genesis 37:28 ܘܥܒܪܘ ܓܒܪ̈ܐ ܬܓܪ̈ܐ ܡܕܝܢ̈ܝܐ . ܘܢܓ̣ܕܘ ܐܣܩܘܗܝ ܠܝܘܣܦ ܡܢ ܓܘܒܐ . ܘܙܒܢܘܗܝ ܠܝܘܣܦ ܠܥܪ̈ܒܝܐ ܒܥܣܪ̈ܝܢ ܕܟܣܦܐ . ܘܐܝܬܝܘܗܝ ܠܡܨܪܝܢ .
Genesis 37:29 ܘܗ̣ܦܟ ܪܘܒܝܠ ܠܓܘܒܐ . ܘܗܐ ܠܝܬ ܒܗ ܝܘܣܦ . ܘܨܪܝ ܠܒ̣ܘܫ̈ܘܗܝ .
Genesis 37:30 ܘܗܦܟ ܠܘܬ ܐ̈ܚܘܗܝ . ܘܐܡ̣ܪ ܠܗܘܢ . ܛܠܝܐ ܐܝܟܘ . ܐܢܐ ܠܐܝܟܐ ܐ̇ܙܠ ܐܢܐ .
Genesis 37:31 ܘܢܣܒܘܗ̇ ܠܟܘܬܝܢܗ ܕܝܘܣܦ . ܘܢܟܣܘ ܨܦܪܝܐ ܕܥܙ̈ܐ . ܘܦܠܦܠܘܗ̇ ܠܟܘܬܝܢܐ ܒܕܡܗ .
Genesis 37:32 ܘܫܕܪܘܗ̇ ܠܟܘܬܝܢܐ ܕܦܕ̈ܝܬܐ . ܘܐܝܬܝܘܗ̇ ܠܐܒܘܗܘܢ . ܘܐܡܪܘ ܗܕܐ ܐܫܟܚܢ . ܐܫܬܘܕܥ ܟܘܬܝܢܐ ܐܢ ܕܒܪܟ ܗܝ ܐܘ ܠܐ .
Genesis 37:33 ܘܐܫܬܘܕܥܗ̇ ܘܐܡ̣ܪ . ܟܘܬܝܢܐ ܕܒܪܝ ܗܝ . ܚܝܘܬܐ ܒܝܫܬܐ ܐܟܠܬܗ . ܡܬܒܪ ܬܒܝܪ ܝܘܣܦ ܒܪܝ .
Genesis 37:34 ܘܨܪܝ ܝܥܩܘܒ ܠܒ̈ܘܫܘܗܝ ܘܐܣܪ ܣܩܐ ܒܚܨ̈ܘܗܝ . ܘܐܬܐܒܠ ܥܠ ܒܪܗ ܝܘܡ̈ܬܐ ܣ̈ܓܝܐܐ .
Genesis 37:35 ܘܩܡܘ ܟܠܗܘܢ ܒܢ̈ܘܗܝ ܘܟܠܗܝܢ ܒܢ̈ܬܗ ܠܡܒܝܐܘܬܗ . ܘܠܐ ܨܒ̣ܐ ܠܡܬܒܝܐܘ ܘܐܡ̣ܪ . ܐܚܘܬ ܥܠ ܒܪܝ ܟܕ ܐܒܝܠ ܐܢܐ ܠܫܝܘܠ . ܘܒܟܝܗܝ ܐܒܘܗܝ .
Genesis 37:36 ܘܡܕܝܢ̈ܝܐ ܙܒܢܘܗܝ ܒܡܨܪܝܢ . ܠܦܘܛܝܦܪ ܡܗܝܡܢܐ ܪܒ ܕܚܫ̈ܐ ܕܦܪܥܘܢ .
Genesis 38:1 ܘܗܘ̣ܐ ܒܙܒܢܐ ܗ̇ܘ . ܘܢܚ̣ܬ ܝܗܘܕܐ ܡܢ ܠܘܬ ܐܚ̈ܘܗܝ . ܘܣ̣ܛܐ ܠܘܬ ܓܒܪܐ ܥܪܠܡܝܐ ܘܫܡܗ ܚܝܪܐ .
Genesis 38:2 ܘܚ̣ܙܐ ܬܡܢ ܝܗܘܕܐ ܒܪܬ ܓܒܪܐ ܟܢܥܢܝܐ . ܘܫܡܗ̇ ܫܘܥ . ܘܢܣܒܗ̇ ܘܥܠ ܠܘܬܗ̇ .
Genesis 38:3 ܘܒܛ̣ܢܬ ܘܝܠ̣ܕܬ ܠܗ ܒܪܐ . ܘܩܪܐ ܫܡܗ ܥܝܪ .
Genesis 38:4 ܘܒ̣ܛܢܬ ܬܘܒ ܘܝܠܕܬ ܒܪܐ . ܘܩ̣ܪܐ ܫܡܗ ܐܘܢܢ .
Genesis 38:5 ܘܐܘܣ̣ܦܬ ܬܘܒ ܘܝܠ̣ܕܬ ܒܪܐ . ܘܩ̣ܪܐ ܫܡܗ ܫܠܐ . ܘܦܣ̣ܩܬ ܗܘܬ ܟܕ ܝܠܕܬܗ .
Genesis 38:6 ܘܢܣ̣ܒ ܝܗܘܕܐ ܐܢܬܬܐ ܠܥܝܪ ܒܘܟܪܗ . ܘܫܡܗ̇ ܬܡܪ .
Genesis 38:7 ܘܗܘ̣ܐ ܥܝܪ ܒܘܟܪܗ ܕܝܗܘܕܐ ܒܝܫ ܩܕܡ ܡܪܝܐ . ܘܐܡܝܬܗ ܡܪܝܐ .
Genesis 38:8 ܘܐܡ̣ܪ ܝܗܘܕܐ ܠܐܘܢܢ ܒܪܗ . ܥܘܠ ܥܠ ܐܢܬܬ ܐܚܘܟ ܘܝܒܡܝܗ̇ . ܘܐܩܝܡ ܙܪܥܐ ܠܐܚܘܟ .
Genesis 38:9 ܘܝܕܥ̣ ܐܘܢܢ ܕܠܗ ܠܐ ܗ̇ܘܐ ܙܪܥܐ . ܘܡܐ ܕܥܐ̇ܠ ܗܘܐ ܥܠ ܐܢܬܬ ܐܚܘܗܝ . ܡ̇ܚܒܠ ܗܘܐ ܥܠ ܐܪܥܐ ܕܠܐ ܢܩܝܡ ܙܪܥܐ ܠܐܚܘܗܝ .
Genesis 38:10 ܘܐܬܐܒܫ ܩܕܡ ܡܪܝܐ ܡܕܡ ܕܥܒ̣ܕ ܘܐܡܝܬܗ ܐܦ ܠܗ .
Genesis 38:11 ܘܐܡ̣ܪ ܝܗܘܕܐ ܠܬܡܪ ܟܠܬܗ . ܬܒܝ ܒܐܪܡܠܘܬܐ ܒܝܬ ܐܒܘܟܝ . ܥܕܡܐ ܕܢܪܒܐ ܫܠܐ ܒܪܝ . ܡܛܠ ܕܐܡ̣ܪ . ܕܠܡܐ ܢܡܘܬ ܐܦ ܗ̣ܘ ܐܝܟ ܐܚ̈ܘܗܝ . ܘܐܙܠ̣ܬ ܬܡܪ ܘܝܬ̣ܒܬ ܒܝܬ ܐܒܘܗ̇ .
Genesis 38:12 ܘܣܓܝܘ ܝܘܡ̈ܬܐ . ܘܡܝܬܬ ܒܪܬ ܫܘܥ ܐܢܬܬܗ ܕܝܗܘܕܐ . ܘܐܬܒܝܐ ܝܗܘܕܐ . ܘܣܠ̣ܩ ܠܘܬ ܓܙܝ̈ ܥܢܗ . ܗ̣ܘ ܘܚܝܪܐ ܪܚܡܗ ܥܪܠܡܝܐ ܠܬܡܢܬ .
Genesis 38:13 ܘܚܘܝܘ ܠܬܡܪ ܘܐܡܪܘ ܠܗ̇ . ܗܐ ܚܡܘܟܝ ܣ̇ܠܩ ܠܬܡܢܬ ܠܡܓܙ ܥܢܗ .
Genesis 38:14 ܘܐܥܒ̣ܪܬ ܠܒܘ̈ܫܝ ܐܪܡܠܘܬܗ̇ ܡܢܗ̇ . ܘܐܬܟܣܝܬ ܒܐܪܕܝܕܐ ܘܐܨܛܒܬܬ ܘܝܬ̣ܒܬ ܒܦܠܫܬ ܐܘܪ̈ܚܬܐ . ܕܒܐܘܪܚܐ ܕܬܡܢܬ . ܡܛܠ ܕܚܙܬ ܕܪܒܐ ܫܠܐ . ܘܗ̣ܝ ܠܐ ܡܬܝܗܒܐ ܠܗ .
Genesis 38:15 ܘܚܙܗ̇ ܝܗܘܕܐ ܘܚܫܒܗ̇ ܐܝܟ ܙܢܝܬܐ . ܡܛܠ ܕܟܣ̣ܝܬ ܐ̈ܦܝܗ̇ .
Genesis 38:16 ܘܣ̣ܛܐ ܠܘܬܗ̇ ܠܐܘܪܚܐ ܘܐܡ̣ܪ ܠܗ̇ . ܬܝ ܐܥܘܠ ܠܘܬܟܝ . ܡܛܠ ܕܠܐ ܝܕܥ̇ ܗܘܐ ܕܟܠܬܗ ܗܝ . ܘܐܡ̣ܪܬ ܠܗ . ܡܢܐ ܝܗ̇ܒ ܐܢܬ ܕܥܐ̇ܠ ܐܢܬ ܠܘܬܝ .
Genesis 38:17 ܘܐܡ̣ܪ ܐܢܐ ܐܫܕܪ ܓܕܝܐ ܕܥ̈ܙܐ ܡܢ ܥܢܐ . ܘܐܡ̣ܪܬ ܐܢ ܬܬܠ ܠܝ ܡܫܟܢܐ ܥܕܡܐ ܕܡܫܕܪ ܐܢܬ .
Genesis 38:18 ܘܐܡ̣ܪ ܡܢܐ ܡܫܟܢܐ ܐܬܠ ܠܟܝ . ܘܐܡ̣ܪܬ ܥܙܩܬܟ ܘܫܘܫܦܟ ܘܚܘܛܪܟ ܕܒܐܝܕܟ . ܘܝܗ̣ܒ ܠܗ̇ ܘܥܠ ܠܘܬܗ̇ . ܘܒ̣ܛܢܬ ܡܢܗ .
Genesis 38:19 ܘܩܡܬ ܘܐܙܠ̣ܬ . ܘܐܥܒ̣ܪܬ ܐܪܕܝܕܐ ܡܢܗ̇ . ܘܠܒܫ̣ܬ ܠܒܘܫ̈ܝ ܐܪܡܠܘܬܗ̇ .
Genesis 38:20 ܘܫܕܪ ܝܗܘܕܐ ܓܕܝܐ ܕܥ̈ܙܐ ܒܝܕ ܪܚܡܗ ܥܪܠܡܝܐ . ܠܡܣܒ ܡܫܟܢܐ ܡܢ ܐ̈ܝܕܝܗ̇ ܕܐܢܬܬܐ ܘܠܐ ܐܫܟܚܗ̇ .
Genesis 38:21 ܘܫܐ̇ܠ ܠܐܢܫ̈ܝ ܐܬܪܐ ܘܐܡ̣ܪ . ܐܝܟܐ ܗܝ ܙܢܝܬܐ ܕܝܬܒܐ ܒܦܠܫܬ ܐܘܪ̈ܚܬܐ ܘܐܡܪܘ . ܠܝܬ ܗܪܟܐ ܙܢܝܬܐ .
Genesis 38:22 ܘܗ̣ܦܟ ܠܘܬ ܝܗܘܕܐ ܘܐܡܪ . ܠܐ ܐܫܟܚܬܗ̇ . ܘܐܦ ܐܢܫ̈ܝ ܐܬܪܐ ܐܡܪ̈ܝܢ . ܠܝܬ ܗܪܟܐ ܙܢܝܬܐ .
Genesis 38:23 ܘܐܡ̣ܪ ܝܗܘܕܐ . ܬܣܒ ܠܗ̇ ܕܠܡܐ ܐܗܘܐ ܓܘܚܟܐ . ܗܐ ܫ̇ܕܪܬ ܓܕܝܐ ܗܢܐ ܘܐܢܬ ܠܐ ܐܫܟܚܬܗ̇ .
Genesis 38:24 ܘܗܘ̣ܐ ܡܢ ܒܬܪ ܬܠܬܐ ܝܪ̈ܚܝܢ . ܘܐܬܚܘܝ ܠܝܗܘܕܐ ܘܐܡܪܘ ܠܗ . ܙܢܝܬ ܬܡܪ ܟܠܬܟ . ܘܗܐ ܡܢ ܙܢܝܘܬܐ ܒܛܢܐ . ܘܐܡ̣ܪ ܝܗܘܕܐ . ܐܦܩܘܗ̇ ܘܬܐܩܕ .
Genesis 38:25 ܘܟܕ ܗ̣ܢܘܢ ܡܦܩܝܢ ܠܗ̇ . ܫܠܚܐ ܠܚܡܘܗ̇ . ܡܢ ܓܒܪܐ ܕܗܠܝܢ ܕܝܠܗ ܡܢܗ ܒܛܢܐ ܐܢܐ ܘܐܡܪܬ . ܐܫܬܘܕܥ ܕܡ̇ܢ ܗܝ ܥܙܩܬܐ ܘܫܘܫܦܐ ܘܚܘܛܪܐ ܗܠܝܢ .
Genesis 38:26 ܘܗ̣ܘ ܐܫܬܘܕܥ ܘܐܡ̣ܪ ܝܗܘܕܐ . ܙܟܝܐ ܗܝ ܡܢܝ . ܡܛܠ ܗܢܐ ܠܐ ܝܗܒܬܗ̇ ܠܫܠܐ ܒܪܝ . ܘܠܐ ܐܘܣܦ ܬܘܒ ܠܡܕܥܗ̇ .
Genesis 38:27 ܘܗܘ̣ܐ ܙܒܢ ܡܘܠܕܗ̇ . ܘܗܐ ܬܐ̈ܡܐ ܒܟܪܣܗ̇ .
Genesis 38:28 ܘܗܘ̣ܐ ܕܟܕ ܝܠܕܐ ܝܗ̣ܒ ܐܝܕܗ . ܘܢܣ̣ܒܬ ܚܝܬܐ ܚܘܛܐ ܕܙܚܘܪܝܬܐ . ܘܩܛܪܬ ܥܠ ܐܝܕܗ ܘܐܡ̣ܪܬ . ܗܢܐ ܢܦܘܩ ܩܕܡܝܬ .
Genesis 38:29 ܘܟܕ ܐܗܦܟ ܐܝܕܗ ܢܦ̣ܩ ܐܚܘܗܝ ܘܐܡ̣ܪܬ . ܡܐ ܐܬܬܪܥ̣ܬ ܥܠܝܟܝ ܬܘܪܥܬܐ ܘܩܪܬ ܫܡܗ ܦܪܨ .
Genesis 38:30 ܘܒܬܪܟܢ ܢܦ̣ܩ ܐܚܘܗܝ ܕܥܠ ܐܝܕܗ ܚܘܛܐ ܕܙܚܘܪܝܬܐ . ܘܩܪܬ ܫܡܗ ܙܪܚ .
Genesis 39:1 ܘܠܝܘܣܦ ܐܚܬܘܗܝ ܡܕܝܢ̈ܝܐ ܠܡܨܪܝܢ . ܘܙܒܢܗ ܦܘܛܝܦܪ ܡܗܝܡܢܐ ܪܒ ܕܚܫ̈ܐ ܕܦܪܥܘܢ . ܓܒܪܐ ܡܨܪܝܐ ܡܢ ܐܝܕܐ ܕܥܪ̈ܒܝܐ . ܕܐܚܬܘܗܝ ܠܬܡܢ .
Genesis 39:2 ܘܗܘ̣ܐ ܡܪܝܐ ܥܡ ܝܘܣܦ . ܘܗܘ̣ܐ ܓܒܪܐ ܡܨܠܚ ܒܝܬ ܡܪܗ ܡܨܪܝܐ .
Genesis 39:3 ܘܚ̣ܙܐ ܡܪܗ ܕܡܪܝܐ ܥܡܗ . ܘܟܠ ܕܥܒ̇ܕ ܡܪܝܐ ܡ̣ܨܠܚ ܒܐܝܕܗ .
Genesis 39:4 ܘܐܫܟܚ ܝܘܣܦ ܪ̈ܚܡܐ ܒܥܝܢ̈ܘܗܝ ܘܫܡܫܗ . ܘܐܫܠܛܗ ܥܠ ܒܝܬܗ . ܘܟܠ ܕܐܝܬ ܠܗ ܝܗ̣ܒ ܒܐ̈ܝܕܘܗܝ .
Genesis 39:5 ܘܗܘ̣ܐ ܡܢ ܙܒܢܐ ܕܐܫܠܛܗ ܥܠ ܒܝܬܗ ܘܥܠ ܟܠ ܕܐܝܬ ܠܗ . ܒ̇ܪܟ ܡܪܝܐ ܠܒܝܬܗ ܕܡܨܪܝܐ ܡܛܠ ܝܘܣܦ . ܘܗܘܬ ܒܘܪܟܬܗ ܕܡܪܝܐ ܒܟܠ ܕܐܝܬ ܠܗ ܒܒܝܬܐ ܘܒܚܩܠܐ .
Genesis 39:6 ܘܫܒ̣ܩ ܟܠܡܕܡ ܕܐܝܬ ܠܗ ܒܝܕ ܝܘܣܦ . ܘܠܐ ܝܕܥ̣ ܥܡܗ ܡܕܡ . ܐܠܐ ܐܢ ܠܚܡܐ ܕܐ̇ܟܠ ܗܘܐ . ܘܝܘܣܦ ܫܦܝܪ ܗܘܐ ܚܙܘܗ ܘܝܐܐ ܗܘܐ ܩܘܒܠܠܗ .
Genesis 39:7 ܘܗܘܐ ܡܢ ܒܬܪ ܦ̈ܬܓܡܐ ܗܠܝܢ . ܐܪܡ̣ܝܬ ܐܢܬܬ ܡܪܗ ܥܝܢܗ̇ ܥܠ ܝܘܣܦ . ܘܐܡ̣ܪܬ ܠܗ ܕܡ̣ܟ ܥܡܝ .
Genesis 39:8 ܘܠܐ ܨܒ̣ܐ ܘܐܡ̣ܪ ܠܐܢܬܬ ܡܪܗ . ܗܐ ܡܪܝ ܠܐ ܝܕܥ̇ ܥܡܝ ܡܢܐ ܐܝܬ ܒܒܝܬܗ . ܘܟܠ ܕܐܝܬ ܠܗ ܐܫܠܛ ܒܐ̈ܝܕܝ .
Genesis 39:9 ܘܠܝܬ ܕܪܒ ܒܒܝܬܐ ܗܢܐ ܡܢܝ . ܘܠܐ ܚܣܟ ܡܢܝ ܡܕܡ . ܐܠܐ ܐܢ ܠܟܝ ܕܐܢܬܬܗ ܐܢܬܝ . ܘܐܝܟܢܐ ܐܥܒܕ ܒܝܫܬܐ ܗܕܐ ܪܒܬܐ . ܘܐܚܛܐ ܠܐܠܗܐ .
Genesis 39:10 ܘܟܕ ܐܡܪܐ ܗܘܬ ܠܗ ܟܠܝܘܡ ܘܠܐ ܫܡ̇ܥ ܗܘܐ ܠܗ̇ . ܠܡܕܡܟ ܠܘܬܗ̇ ܘܠܡܗܘܐ ܥܡܗ̇ .
Genesis 39:11 ܘܗܘ̣ܐ ܒܚܕ ܡܢ ܝܘܡ̈ܬܐ . ܘܥܠ ܝܘܣܦ ܠܒܝܬܐ ܠܡܥܒܕ ܥܒ̇ܕܐ ܘܠܝܬ ܐܢܫ ܡܢ ܐܢܫ̈ܝ ܒܝܬܐ ܬܡܢ ܒܒܝܬܐ .
Genesis 39:12 ܘܐܚܕܬܗ ܒܠܒܫܗ ܘܐܡ̣ܪܬ ܠܗ ܕܡ̣ܟ ܥܡܝ . ܘܫܒܩܗ ܠܒܫܗ ܒܐ̈ܝܕܝܗ̇ . ܘܥ̣ܪܩ ܢܦ̣ܩ ܠܗ ܠܫܘܩܐ .
Genesis 39:13 ܘܗܘ̣ܐ ܕܟܕ ܚܙܬ ܕܫܒܩܗ ܠܒܫܗ ܒܐ̈ܝܕܝܗ̇ ܘܥ̣ܪܩ ܠܫܘܩܐ .
Genesis 39:14 ܩ̣ܪܬ ܠܐܢܫ̈ܝ ܒܝܬܗ̇ ܘܐܡ̣ܪܬ ܠܗܘܢ . ܚܙܘ ܕܐܝܬܝ ܠܢ ܥܒ̣ܕܐ ܥܒܪܝܐ ܠܡܓܚܟ ܥܠܝܢ . ܥܠ ܥܠܝ ܠܡܕܡܟ ܥܡܝ . ܘܩܥ̇ܝܬ ܒܩܠܐ ܪܡܐ .
Genesis 39:15 ܘܟܕ ܫܡ̣ܥ ܕܐܪܝܡ̇ܬ ܩܠܝ ܘܩ̇ܥܝܬ . ܫܒܩܗ ܠܒܫܗ ܠܘܬܝ . ܘܥ̣ܪܩ ܢܦ̣ܩ ܠܗ ܠܫܘܩܐ .
Genesis 39:16 ܘܣܡܬܗ ܠܒܫܗ ܠܘܬܗ̇ . ܥܕܡܐ ܕܥܠ ܡܪܗ ܠܒܝܬܐ .
Genesis 39:17 ܘܐܡ̣ܪܬ ܠܗ ܐܝܟ ܡ̈ܠܐ ܗܠܝܢ . ܥܠ ܥܠܝ ܥܒ̣ܕܐ ܥܒܪܝܐ ܕܐܝܬܝܬ ܠܢ ܠܡܓܚܟܘ ܒܢ .
Genesis 39:18 ܘܟܕ ܐܪܝܡ̇ܬ ܩܠܝ ܘܩ̇ܥܝܬ . ܫܒܩܗ ܠܒܫܗ ܒܐ̈ܝܕܝ ܘܥܪ̣ܩ ܢܦ̣ܩ ܠܗ ܠܫܘܩܐ .
Genesis 39:19 ܘܟܕ ܫܡ̣ܥ ܡܪܗ ܡ̈ܠܝܗ̇ ܕܐܢܬܬܗ ܕܐܡ̣ܪܬ ܠܗ . ܕܐܝܟ ܡ̈ܠܐ ܗܠܝܢ ܥܒ̣ܕ ܠܝ ܥܒ̣ܕܟ . ܐܬܚܡ̣ܬ ܪܘܓܙܗ .
Genesis 39:20 ܘܕܒܪܗ ܡܪܗ ܘܐܪܡܝܗ ܒܝܬ ܐܣܝܪ̈ܐ . ܐܬܪ ܕܐܣܝܪ̈ܝ ܡ̇ܠܟܐ ܐܣܝܪ̈ܝܢ ܗܘܘ . ܘܗܘ̣ܐ ܬܡ̇ܢ ܒܝܬ ܐܣܝܪ̈ܐ .
Genesis 39:21 ܘܗ̣ܘܐ ܡܪܝܐ ܥܡ ܝܘܣܦ . ܘܐܪܡܝ ܥܠܘܗܝ ܚܣܕܐ . ܘܝܗܒܗ ܠܪ̈ܚܡܐ ܒܥܝ̈ܢܝ ܪܒ ܒܝܬ ܐܣܝܪ̈ܐ .
Genesis 39:22 ܘܐܫܠܡ ܪܒ ܐܣܝܪ̈ܐ ܒܝܕ ܝܘܣܦ ܟܠܗܘܢ ܐܣܝܪ̈ܐ ܕܒܒܝܬ ܐܣܝܪ̈ܐ . ܘܟܠ ܕܥܒܕܝܢ ܗܘܘ ܬܡ̇ܢ ܗ̣ܘ ܥܒ̇ܕ ܗܘܐ .
Genesis 39:23 ܘܪܒ ܐܣܝܪ̈ܐ ܠܐ ܚ̇ܙܐ ܗܘ̣ܐ ܡܕܡ ܒܐܝܕܗ . ܡܛܠ ܕܡܪܝܐ ܥܡܗ . ܘܟܠ ܡܕܡ ܕܥܒ̇ܕ ܗܘܐ ܡܪܝܐ ܡܨܠܚ .
Genesis 40:1 ܘܗܘ̣ܐ ܡܢ ܒܬܪ ܦܬ̈ܓܡܐ ܗܠܝܢ . ܚܛܘ ܪܒ ܫܩ̈ܘܬܐ ܕܡ̇ܠܟܐ ܕܡܨܪܝܢ ܘܪܒ ܢܚ̈ܬܘܡܐ ܠܡܪܗܘܢ ܡ̇ܠܟܐ ܕܡܨܪܝܢ .
Genesis 40:2 ܘܪܓܙ ܦܪܥܘܢ ܥܠ ܬܪ̈ܝܢ ܡܗܝܡܢ̈ܘܗܝ . ܥܠ ܪܒ ܫܩ̈ܘܬܐ ܘܥܠ ܪܒ ܢܚ̈ܬܘܡܐ .
Genesis 40:3 ܘܐܪܡܝ ܐܢܘܢ ܒܝܬ ܐܣܝܪ̈ܐ . ܒܝܬ ܪܒ ܕܚܫ̈ܐ . ܒܐܬܪܐ ܕܝܘܣܦ ܐܣܝܪ ܬܡ̇ܢ .
Genesis 40:4 ܘܐܫܠܛ ܪܒ ܕܚܫ̈ܐ ܠܝܘܣܦ ܥܠܝܗܘܢ ܘܫܡܫ ܐܢܘܢ . ܘܗܘܘ ܝܘܡ̈ܬܐ ܒܝܬ ܐܣܝܪ̈ܐ .
Genesis 40:5 ܘܚ̣ܠܡܘ ܚ̈ܠܡܐ ܬܪ̈ܝܗܘܢ . ܓܒܪ ܚܠܡܗ ܒܠܠܝܐ ܚܕ ܓܒܪ ܐܝܟ ܦܫܪ ܚܠܡܗ . ܫܩܝܐ ܘܢܚܬܘܡܐ ܕܡ̇ܠܟܐ ܕܡܨܪܝܢ ܕܐܣܝܪ̈ܝܢ ܒܝܬ ܐܣܝܪ̈ܐ .
Genesis 40:6 ܘܥܠ ܠܘܬܗܘܢ ܝܘܣܦ ܒܨܦܪܐ ܘܚ̣ܙܐ ܐܢܘܢ . ܘܗܐ ܟܡܝܪ̈ܝܢ .
Genesis 40:7 ܘܫܐ̇ܠ ܠܡܗ̈ܝܡܢܝ ܦܪܥܘܢ ܕܥܡܗ ܒܚܒܘܫܝܐ ܒܝܬ ܡܪܗ ܘܐܡ̣ܪ ܠܗܘܢ . ܠܡܢܐ ܟܡܝܪ̈ܢ ܐ̈ܦܝܟܘܢ ܝܘܡܢܐ .
Genesis 40:8 ܘܐܡܪܘ ܠܗ . ܚܠܡܐ ܚܠܡܢ ܘܦܫܘܪܐ ܠܝܬ ܠܗ . ܐܡ̇ܪ ܠܗܘܢ ܝܘܣܦ . ܗܐ ܕܐܠܗܐ ܐܢܘܢ ܦܫܪ̈ܐ . ܐܫܬܥܘ ܠܝ .
Genesis 40:9 ܘܐܫܬܥܝ ܪܒ ܫܩ̈ܘܬܐ ܚܠܡܗ ܠܝܘܣܦ . ܘܐܡ̣ܪ ܠܗ . ܒܚܠܡܝ ܗܐ ܓܦܬܐ ܩܕܡܝ .
Genesis 40:10 ܘܒܓܦܬܐ ܬܠܬ ܫܒܫ̈ܬܝܢ . ܘܗ̣ܝ ܟܕ ܦܪܥ̣ܬ . ܝܥܘ ܛܪ̈ܦܝܗ̇ ܘܒܫܠܘ ܣ̈ܓܘܠܝܗ̇ . ܗܘܘ ܥܢ̈ܒܐ .
Genesis 40:11 ܘܟܣܐ ܕܦܪܥܘܢ ܒܐ̈ܝܕܝ . ܘܢܣ̇ܒܬ ܥܢ̈ܒܐ ܘܥܨܪܬ ܐܢ̈ܝܢ ܒܟܣܗ ܕܦܪܥܘܢ . ܘܝܗ̇ܒܬ ܟܣܐ ܠܐ̈ܝܕܝ ܦܪܥܘܢ .
Genesis 40:12 ܐܡ̇ܪ ܠܗ ܝܘܣܦ . ܗܢܘ ܦܫܪܗ ܕܚܠܡܟ . ܬܠܬ ܫܒܫ̈ܬܝܢ ܬܠܬܐ ܐܢܘܢ ܝܘܡ̈ܝܢ .
Genesis 40:13 ܒܬܪ ܬܠܬܐ ܝܘܡ̈ܝܢ ܢܬܕܟܪܟ ܦܪܥܘܢ . ܘܢܗܦܟܟ ܥܠ ܫܕܬܟ . ܘܬܬܠ ܟܣܐ ܠܦܪܥܘܢ ܒܐܝܕܗ . ܐܝܟ ܢܡܘܣܐ ܩܕܡܝܐ ܕܡܫ̇ܩܐ ܗܘ̣ܝܬ ܠܗ .
Genesis 40:14 ܐܠܐ ܐܬܕܟܪܝܢܝ ܥܡܟ ܟܕ ܢܛܐܒ ܠܟ . ܘܥܒ̣ܕ ܥܡܝ ܛܝܒܘܬܐ ܘܩܘܫܬܐ . ܘܐܬܕܟܪܝܢܝ ܩܕܡ ܦܪܥܘܢ . ܘܐܦܩܝܢܝ ܡܢ ܒܝܬ ܐܣܝܪ̈ܐ ܗܢܐ .
Genesis 40:15 ܡܛܠ ܕܡܓܢܒ ܓܢܝܒ ܐܢܐ ܡܢ ܐܪܥܐ ܕܥܒܪ̈ܝܐ . ܘܐܦ ܗܪܟܐ ܡܕܡ ܠܐ ܥܒ̇ܕܬ . ܕܐܪܡܝܘܢܝ ܒܓܘܒܐ .
Genesis 40:16 ܘܚ̣ܙܐ ܪܒ ܢܚ̈ܬܘܡܐ ܕܫܦܝܪ ܦܫ̣ܪ . ܘܐܡ̣ܪ ܠܝܘܣܦ . ܘܐܦ ܐܢܐ ܒܚܠܡܝ . ܘܗܐ ܬܠܬܐ ܣ̈ܠܐ ܕܚܘܪ̈ܬܐ ܥܠ ܪܫܝ .
Genesis 40:17 ܘܒܣܠܐ ܥܠܝܐ ܡܢ ܟܠ ܡܐܟܠܗ ܕܦܪܥܘܢ . ܥܒ̇ܕܐ ܕܢܚܬܘܡܐ . ܘܚܝܘܬ ܟܢܦܐ ܐܟܠܐ ܠܗܘܢ ܡܢ ܣܠܐ ܡܢ ܠܥܠ ܡܢ ܪܫܝ .
Genesis 40:18 ܥܢ̣ܐ ܝܘܣܦ ܘܐܡ̣ܪ ܠܗ . ܗܢܘ ܦܫܪܗ ܕܚܠܡܟ . ܬܠܬܐ ܣ̈ܠܝܢ ܬܠܬܐ ܐܢܘܢ ܝܘܡ̈ܝܢ .
Genesis 40:19 ܒܬܪ ܬܠܬܐ ܝܘܡ̈ܝܢ . ܢܣ̣ܒ ܦܪܥܘܢ ܪܫܟ ܡܢܟ ܘܢܙܩܦܟ ܥܠ ܩܝܣܐ . ܘܬܐܟܘܠ ܦܪܚܬܐ ܒܣܪܟ ܡܢܟ .
Genesis 40:20 ܘܗܘܐ ܒܝܘܡܐ ܬܠܝܬܝܐ ܒܝܘܡܐ ܕܒܝܬ ܝܠܕܗ ܕܦܪܥܘܢ . ܥܒ̣ܕ ܦܪܥܘܢ ܡܫܬܝܐ ܠܟܠܗܘܢ ܥܒ̣̈ܕܘܗܝ . ܘܐܬܕܟܪ ܠܪܒ ܫܩ̈ܘܬܐ ܘܠܪܒ ܢܚܬ̈ܘܡܐ ܒܓܘ ܥܒ̈ܕܘܗܝ .
Genesis 40:21 ܘܐܩܝܡ ܠܪܒ ܫ̈ܩܘܬܐ ܥܠ ܫܕܬܗ . ܘܝܗ̣ܒ ܟܣܐ ܥܠ ܐܝ̈ܕܝ ܦܪܥܘܢ .
Genesis 40:22 ܘܠܪܒ ܢܚܬ̈ܘܡܐ ܙܩܦ̣ ܐܝܟ ܕܦܫ̣ܪ ܠܗܘܢ ܝܘܣܦ .
Genesis 40:23 ܘܠܐ ܐܬܕܟܪ ܪܒ ܫܩ̈ܘܬܐ ܠܝܘܣܦ ܘܛܥܝܗܝ .
Genesis 41:1 ܘܗܘܐ ܡܢ ܒܬܪ ܬܪ̈ܬܝܢ ܫ̈ܢܝܢ . ܘܦܪܥܘܢ ܚܠ̣ܡ ܚܠܡܐ . ܘܗܐ ܩܐܡ ܥܠ ܢܗܪܐ .
Genesis 41:2 ܘܗܐ ܡܢ ܢܗܪܐ ܣ̈ܠܩܢ ܫܒܥ ܬܘܪ̈ܢ . ܫܦܝܪ̈ܢ ܒܚܙܘܗܝܢ ܘܫܡܝܢܢ ܒܒܣܪܗܝܢ ܘܪܥܝܢ ܒܡܪܓܐ .
Genesis 41:3 ܘܗܐ ܫܒܥ ܬܘܪ̈ܬܐ ܐܚܪ̈ܢܝܬܐ ܣ̈ܠܩܢ ܒܬܪܗܝܢ ܡܢ ܢܗܪܐ . ܒܝܫ̈ܢ ܒܚܙܘܗܝܢ ܘܡܚܝܠܢ ܒܒܣܪܗܝܢ . ܘܩܡ ܥܠ ܓܢܒ ܬܘܪ̈ܬܐ ܥܠ ܣܦܬ ܢܗܪܐ .
Genesis 41:4 ܘܐܟ̣ܠ ܬܘܪ̈ܬܐ ܕܒܝܫ̈ܢ ܒܚܙܘܗܝܢ ܘܡܚܝ̈ܠܢ ܒܒܣܪܗܝܢ . ܠܫܒܥ ܬܘܪ̈ܬܐ ܕܫܦܝܪ̈ܢ ܒܚܙܘܗܝܢ ܘܫܡܝ̈ܢܢ ܒܒܣܪܗܝܢ . ܘܐܬܬܥܝܪ ܦܪܥܘܢ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .