← All works
Peshitta Genesis Peshitta (Syriac Old Testament) · 1,533 sections
Single column Two columns
Genesis 31:27 ܠܡܢܐ ܐܬ̇ܛܫܝܬ ܠܡܥܪܩ ܘܐܬܓܢ̣ܒܬ ܡܢܝ ܘܠܐ ܚܘܝܬܢܝ . ܫܕܪܬܟ ܕܝܢ ܒܚܕܘܬܐ ܘܒܙܡܪܐ . ܘܒܟܢܪ̈ܐ ܘܒ̈ܦܠܓܐ .
Genesis 31:28 ܘܠܐ ܫܒܩܬܢܝ ܠܡܢܫܩܘ ܠܒ̈ܢܝ ܘܠܒܢ̈ܬܝ . ܗܫܐ ܐܣܟܠ̣ܬ ܒܡܕܡ ܕܥܒ̣ܕܬ .
Genesis 31:29 ܡ̇ܛܐ ܗܘܐ ܒܐ̈ܝܕܝ ܕܐܥܒܕ ܠܟܘܢ ܒܝܫܬܐ . ܘܐܠܗܐ ܕܐܒܘܟܘܢ ܒܪܡܫܐ ܐܡ̣ܪ ܠܝ . ܐܙܕܗܪ ܕܠܡܐ ܬܡܠܠ ܥܡ ܝܥܩܘܒ . ܡܢ ܛܒܬܐ ܘܥܕܡܐ ܠܒܝܫܬܐ .
Genesis 31:30 ܘܗܫܐ ܡܐܙܠ ܐܙܠ ܐܢܬ . ܡܛܠ ܕܡܬܪܓܪܓܘ ܐܬܪܓܪܓܬ ܠܒܝܬ ܐܒܘܟ . ܠܡܢܐ ܓܢܒ̣ܬ ܐ̈ܠܗܝ .
Genesis 31:31 ܘܥܢ̣ܐ ܝܥܩܘܒ ܘܐܡ̣ܪ ܠܠܒܢ . ܡܛܠ ܕܕܚ̇ܠܬ ܘܐܡ̇ܪܬ . ܕܕܠܡܐ ܬܕܒ̣ܪ ܒܢ̈ܬܟ ܡܢܝ .
Genesis 31:32 ܠܘܬ ܡ̇ܢ ܕܢܫܬܟܚܘܢ ܐ̈ܠܗܝܟ ܠܐ ܢܚܐ . ܩܕܡ ܐ̈ܚܝܢ ܐܫܬܘܕܥ ܕܝܠܟ . ܡܢܐ ܐܝܬ ܠܘܬܝ ܘܣܒ ܠܟ . ܘܠܐ ܝܕܥ̣ ܝܥܩܘܒ ܕܪܚܝܠ ܓܢܒ̣ܬ ܐܢܘܢ .
Genesis 31:33 ܘܥܠ ܠܒܢ ܠܡܫܟܢܐ ܕܝܥܩܘܒ ܘܠܡܫܟܢܐ ܕܠܝܐ ܘܠܡܫܟܢܐ ܕܬܪ̈ܬܝܢ ܐ̈ܡܗܬܐ ܘܠܐ ܐܫܟܚ . ܘܢܦ̣ܩ ܡܢ ܡܫܟܢܐ ܕܠܝܐ ܘܥܠ ܠܡܫܟܢܐ ܕܪܚܝܠ .
Genesis 31:34 ܘܪܚܝܠ ܢܣ̣ܒܬ ܨ̈ܠܡܐ . ܘܣܡܬ ܐܢܘܢ ܒܥܒܝܛܐ ܕܓܡܠܐ . ܘܝܬ̣ܒܬ ܥܠܝܗܘܢ . ܘܡܫ ܠܒܢ ܟܠܗ ܡܫܟܢܐ ܘܠܐ ܐܫܟܚ .
Genesis 31:35 ܘܐܡ̣ܪܬ ܪܚܝܠ ܠܐܒܘܗ̇ . ܠܐ ܢܬܒܐܫ ܒܥܝܢ̈ܝ ܡܪܝ . ܡܛܠ ܕܠܐ ܡܫܟܚܐ ܐܢܐ ܠܡܩܡ ܡܢ ܩܕܡܝܟ . ܡܛܠ ܕܐܘܪܚܐ ܠܝ ܕܢܫ̈ܐ . ܘܒ̣ܨܐ ܘܠܐ ܐܫܟܚ ܨ̈ܠܡܐ .
Genesis 31:36 ܘܐܬܐܒܫ ܠܝܥܩܘܒ ܘܢ̣ܨܐ ܥܡ ܠܒܢ . ܘܥܢ̣ܐ ܝܥܩܘܒ ܘܐܡ̣ܪ ܠܠܒܢ . ܡܢܐ ܗܝ ܣܟܠܘܬܝ ܘܡܢܘ ܣܘܪܚܢܝ ܕܪܕܦ̣ܬ ܒܬܪܝ .
Genesis 31:37 ܗܐ ܡܫܬ ܟܠܗܘܢ ܡܐ̈ܢܝ . ܡܢܐ ܐܫܟܚܬ ܡܢ ܟܠܗܘܢ ܡܐ̈ܢܝ ܒܝܬܟ . ܣܝܡ ܗܪܟܐ ܩܕܡ ܐ̈ܚܝ . ܘܐܚ̈ܝܟ ܘܢ̇ܟܣܘܢ ܒܝܬ ܬܪ̈ܝܢ .
Genesis 31:38 ܗܐ ܥܣܪ̈ܝܢ ܫ̈ܢܝܢ ܥܡܟ ܐܢܐ . ܢܩ̈ܘܬܟ ܘܥ̈ܙܝܟ ܠܐ ܓܝܙ . ܘܕܟܪ̈ܐ ܕܥܢܟ ܠܐ ܐ̇ܟܠܬ .
Genesis 31:39 ܘܕܬܒܝܪܐ ܠܐ ܐܝܬ̇ܝܬ ܠܟ . ܐܢܐ ܡ̇ܢܛܪ ܗܘ̇ܝܬ ܠܗ̇ . ܕܡܢ ܐ̈ܝܕܝ ܬܒ̇ܥ ܗܘ̣ܝܬ ܠܗ̇ . ܕܡܬܓܢܒ ܒܐܝܡܡܐ ܘܕܡܬܓܢܒ ܒܠܠܝܐ .
Genesis 31:40 ܗܘܝܬ ܒܐܝܡܡܐ ܐܟܠܢܝ ܫܘܒܐ . ܘܐܓܠܝܕܐ ܒܠܠܝܐ . ܦܪܕܬ ܫܢܬܝ ܡܢ ܥܝ̈ܢܝ .
Genesis 31:41 ܗܐ ܥܣܪ̈ܝܢ ܠܝ ܫ̈ܢܝܢ ܒܒܝܬܟ . ܦܠܚܬܟ ܐܪ̈ܒܥܣܪܐ ܫ̈ܢܝܢ ܒܬܪ̈ܬܝܢ ܒܢ̈ܬܟ . ܘܫܬ ܫ̈ܢܝܢ ܒܥܢܟ . ܘܚ̣ܠܦܬ ܐܓܪܝ ܥܣ̣ܪ̈ ܙܒ̈ܢܝܢ .
Genesis 31:42 ܘܐܠܘ ܠܐ ܐܠܗܗ ܕܐܒܝ . ܐܠܗܗ ܕܐܒܪܗܡ ܘܕܚܠܬܗ ܕܐܝܣܚܩ ܩܡ ܠܝ . ܗܫܐ ܣܪܝܩܐܝܬ ܡܫܕܪ ܗܘܝܬ ܠܝ . ܥܡܠܝ ܘܠܐܘܬܐ ܕܐܝ̈ܕܝ ܚ̣ܙܐ ܐܠܗܐ ܘܐܟܣܟ ܒܪܡܫܐ .
Genesis 31:43 ܘܥܢ̣ܐ ܠܒܢ ܘܐܡ̣ܪ ܠܝܥܩܘܒ . ܒܢ̈ܬܐ ܒܢ̈ܬܝ . ܘܒ̈ܢܝܐ ܒܢ̈ܝ . ܘܥܢܐ ܥܢܝ . ܘܟܠ ܕܚ̇ܙܐ ܐܢܬ ܕܝܠܝ ܗ̣ܘ . ܘܠܒܢ̈ܬܝ ܗܠܝܢ ܡܢܐ ܐܥܒܕ ܠܗܝܢ ܝܘܡܢܐ . ܐܘ ܠܒܢ̈ܝܗܝܢ ܕܝܠ̣ܕ .
Genesis 31:44 ܘܗܫܐ ܬܐ ܢܩܝܡ ܩܝܡܐ ܐܢܐ ܘܐܢܬ . ܘܢܗܘܐ ܣܗܕܐ ܒܝܢ̈ܝ ܘܠܟ .
Genesis 31:45 ܘܢܣ̣ܒ ܝܥܩܘܒ ܟܐܦܐ ܘܐܪܝܡܗ̇ ܩܝܡܬܐ .
Genesis 31:46 ܘܐܡ̣ܪ ܝܥܩܘܒ ܠܐ̈ܚܘܗܝ ܠܩ̇ܛܘ ܟܐ̈ܦܐ . ܘܢܣܒܘ ܟܐ̈ܦܐ ܘܥܒܕܘ ܝܓܪܐ . ܘܐܟܠܘ ܬܡܢ ܥܠ ܝܓܪܐ .
Genesis 31:47 ܘܩܪܝܗܝ ܠܒܢ ܝܓܪܐ ܕܣܗܕܘܬܐ . ܘܝܥܩܘܒ ܩܪܝܗܝ ܓܠܥܕ .
Genesis 31:48 ܘܐܡ̣ܪ ܠܒܢ . ܝܓܪܐ ܗܢܐ ܣܗ̇ܕ ܒܝܢ̈ܝ ܘܠܟ ܝܘܡܢܐ . ܡܛܠ ܗܢܐ ܩܪܐ ܫܡܗ ܓܠܥܕ .
Genesis 31:49 ܘܕܘܩܐ ܕܐܡ̣ܪ ܢܚܙܐ ܡܪܝܐ ܒܝܢ̈ܝ ܘܠܟ . ܡܛܠ ܕܦܪܫܝܢܢ ܓܒܪ ܡܢ ܐܚܘܗܝ .
Genesis 31:50 ܐܢ ܬܨܥܪ ܠܒܢ̈ܬܝ . ܘܐܢ ܬܣܒ ܢܫ̈ܐ ܥܠ ܒܢ̈ܬܝ . ܠܝܬ ܐܢܫ ܥܡܢ . ܚܙܝ ܕܐܠܗܐ ܣܗ̇ܕ ܒܝܢ̈ܝ ܘܠܟ .
Genesis 31:51 ܘܐܡ̣ܪ ܠܒܢ ܠܝܥܩܘܒ . ܗܐ ܝܓܪܐ ܗܢܐ ܘܗܐ ܩܝܡܬܐ ܗܕܐ ܕܐܩܝܡܬ ܒܝܢ̈ܝ ܘܠܟ .
Genesis 31:52 ܣܗ̇ܕ ܝܓܪܐ ܗܢܐ ܘܣܗܕܐ ܩܝܡܬܐ ܗܕܐ . ܕܐܢܐ ܠܐ ܐܥܒܪ ܥܠܝܟ ܝܓܪܐ ܗܢܐ . ܘܐܦ ܐܢܬ ܠܐ ܬܥܒܪ ܥܠ ܝܓܪܐ ܗܢܐ ܘܩܝܡܬܐ ܗܕܐ ܠܒܝܫܬܐ .
Genesis 31:53 ܐܠܗܗ ܕܐܒܪܗܡ ܐܠܗܗ ܕܢܚܘܪ ܢܕܘܢ ܒܝܢܬܢ ܐܠܗܐ ܕܐ̈ܒܗܬܢ . ܘܝܡ̣ܐ ܝܥܩܘܒ ܒܕܚܠܬܐ ܕܐܒܘܗܝ ܐܝܣܚܩ .
Genesis 31:54 ܘܕܒ̇ܚ̣ ܝܥܩܘܒ ܕܒܚܬܐ ܒܛܘܪܐ . ܘܩܪܐ ܠܐ̈ܚܘܗܝ ܠܡܐܟܠ ܠܚܡܐ . ܘܐܟܠܘ ܠܚܡܐ ܘܒܬܘ ܒܛܘܪܐ .
Genesis 32:1 ܘܩ̇ܕܡ ܠܒܢ ܒܫܦܪܐ . ܘܢܫ̇ܩ ܠܒܢ̈ܘܗܝ ܘܠܒܢ̈ܬܗ ܘܒ̇ܪܟ ܐܢܘܢ . ܘܗ̣ܦܟ ܠܒܢ ܘܐܙ̣ܠ ܠܐܬܪܗ .
Genesis 32:2 ܘܐܦ ܝܥܩܘܒ ܐܙ̣ܠ ܠܐܘܪܚܗ . ܘܦܓܥܘ ܒܗ ܡܠܐ̈ܟܘܗܝ ܕܐܠܗܐ .
Genesis 32:3 ܘܐܡ̣ܪ ܝܥܩܘܒ ܟܕ ܚ̣ܙܐ ܐܢܘܢ . ܡܫܪܝܬܐ ܗܝ ܕܐܠܗܐ ܗܕܐ . ܘܩ̣ܪܐ ܫܡܗ ܕܐܬܪܐ ܗ̇ܘ ܡܚܢܝܡ .
Genesis 32:4 ܘܫܕܪ ܝܥܩܘܒ ܐܝܙ̈ܓܕܐ ܩܕܡܘܗܝ ܠܘܬ ܥܣܘ ܐܚܘܗܝ . ܠܐܪܥܐ ܕܣܥܝܪ ܠܚܩܠܐ ܕܐܕܘܡ .
Genesis 32:5 ܘܦܩ̇ܕ ܐܢܘܢ ܘܐܡ̣ܪ ܠܗܘܢ . ܗܟܢܐ ܬܐܡܪܘܢ ܠܡܪܝ ܥܣܘ . ܗܟܢܐ ܐܡ̇ܪ ܥܒ̣ܕܟ ܝܥܩܘܒ . ܥܡ ܠܒܢ ܥܡ̇ܪܬ . ܘܐ̇ܘܚܪܬ ܥܕܡܐ ܠܝܘܡܢܐ .
Genesis 32:6 ܘܗܘܘ ܠܝ ܬܘܪ̈ܐ ܘܚܡܪ̈ܐ . ܘܥܢܐ ܘܥܒ̈ܕܐ ܘܐܡܗ̈ܬܐ . ܘܫ̇ܕܪܬ ܠܡܚܘܝܘ ܠܡܪܝ ܕܐܫܟܚ ܪ̈ܚܡܐ ܒܥܝܢ̈ܝܟ .
Genesis 32:7 ܘܗܦܟܘ ܐܝܙ̈ܓܕܐ ܠܘܬ ܝܥܩܘܒ ܘܐܡ̣ܪܘ ܠܗ . ܐܙܠܢ ܠܘܬ ܥܣܘ ܐܚܘܟ . ܘܗܐ ܐܦ ܗ̣ܘ ܐܬ̇ܐ ܠܐܘܪܥܟ . ܘܐܪ̈ܒܥܡܐܐ ܓܒܪ̈ܝܢ ܥܡܗ .
Genesis 32:8 ܘܕܚ̣ܠ ܝܥܩܘܒ ܘܥܩ̣ܬ ܠܗ ܛܒ . ܘܦ̇ܠܓ ܥܡܐ ܕܥܡܗ . ܘܥܢܐ ܘܬܘܪ̈ܐ ܘܓܡ̈ܠܐ ܠܬܪ̈ܬܝܢ ܡܫܪ̈ܝܢ .
Genesis 32:9 ܘܐܡ̣ܪ ܝܥܩܘܒ . ܐܢ ܢܐܬܐ ܥܣܘ ܐܚܝ ܥܠ ܡܫܪܝܬܐ ܚܕܐ ܘܢܚܪܒܝܗ̇ . ܡܫܪܝܬܐ ܕܡܫܬܚܪܐ ܡܬܦܠܛܐ .
Genesis 32:10 ܘܨܠܝ ܘܐܡ̣ܪ . ܐܠܗܗ ܕܐܒܝ ܐܒܪܗܡ . ܐܠܗܗ ܕܐܒܝ ܐܝܣܚܩ . ܡܪܝܐ ܕܐܡ̣ܪ ܠܝ . ܗܦܘܟ ܠܐܪܥܐ ܕܐ̈ܒܗܝܟ ܘܠܬܘ̈ܠܕܬܟ ܘܐܛܐܒ ܠܟ .
Genesis 32:11 ܒܨܝܪ ܐܢܐ ܡܢ ܟܠܗܝܢ ܛܝܒ̈ܘܬܟ . ܘܡܢ ܟܠܗ ܩܘܫܬܐ ܕܥܒ̣ܕܬ ܥܡ ܥܒܕܟ . ܡܛܠ ܕܒܚܘܛܪܝ ܥܒ̇ܪܬ ܝܘܪܕܢܢ ܗܢܐ . ܘܗܫܐ ܗܘܝܬ ܠܬܪ̈ܬܝܢ ܡܫܪ̈ܝܢ .
Genesis 32:12 ܦܨܢܝ ܡܢ ܐ̈ܝܕܘܗܝ ܕܥܣܘ ܐܚܝ . ܡܛܠ ܕܕܚ̇ܠ ܐܢܐ ܡܢܗ ܕܠܡܐ ܢܐܬܐ ܘܢܡܚܝܢܝ ܐܡܐ ܥܡ ܒܢ̈ܝܗ̇ .
Genesis 32:13 ܘܐܢܬ ܐܡ̣ܪܬ ܡܛܐܒ̣ܘ ܐܛܐܒ ܠܟ . ܘܐܥܒܕ ܙܪܥܟ ܐܝܟ ܚܠܐ ܕܝܡܐ . ܕܠܐ ܡܬܡܢܐ ܡܢ ܣܘܓܐܗ .
Genesis 32:14 ܘܒܬ ܬܡܢ ܒܠܠܝܐ ܗ̇ܘ . ܘܢܣ̣ܒ ܡܢ ܡܕܡ ܕܐܝܬܝ ܒܐܝܕܗ ܩܘܪܒܢܐ ܠܥܣܘ ܐܚܘܗܝ .
Genesis 32:15 ܥ̈ܙܐ ܡܐܬ̈ܝܢ . ܘܬܝܫ̈ܐ ܥܣܪ̈ܝܢ . ܢܩܘ̈ܬܐ ܡܐܬܝܢ . ܘܕܟܪ̈ܐ ܥܣܪ̈ܝܢ .
Genesis 32:16 ܓܡ̈ܠܐ ܡܝܢܩ̈ܬܐ ܘܒܢܝ̈ܗܝܢ ܬܠܬܝܢ . ܬܘܪ̈ܬܐ ܐܪ̈ܒܥܝܢ ܘܬܘܪ̈ܐ ܥܣܪܐ . ܐܬ̈ܢܐ ܥܣܪ̈ܝܢ ܘܥ̈ܝܠܐ ܥܣܪܐ .
Genesis 32:17 ܘܝܗ̣ܒ ܒܐܝܕܐ ܕܥܒ̈ܕܘܗܝ ܓܙܪܐ ܓܙܪܐ ܒܠܚܘܕ . ܘܐܡ̣ܪ ܠܥܒ̈ܕܘܗܝ . ܥܒܪܘ ܩܕܡܝ . ܘܐܪܘܚܬܐ ܥܒܕܘ ܒܝܬ ܓܙܪܐ ܠܓܙܪܐ .
Genesis 32:18 ܘܦܩ̇ܕ ܠܩܕܡܝܐ ܘܐܡ̣ܪ ܠܗ . ܕܟܕ ܢܦܓܥ ܒܟ ܥܣܘ ܐܚܝ . ܘܢܫܐܠܟ ܘܢܐܡܪ ܠܟ . ܕܡ̇ܢ ܐܢܬ ܘܠܐܝܟܐ ܐ̇ܙܠ ܐܢܬ . ܘܕܡ̇ܢ ܗܠܝܢ ܕܩܕܡܝܟ .
Genesis 32:19 ܐܡ̣ܪ ܠܗ ܕܥܒܕܟ ܝܥܩܘܒ . ܩܘܪܒܢܐ ܕܫܕܪ ܠܡܪܝ ܥܣܘ . ܘܗܐ ܐܦ ܗ̣ܘ ܐܬ̇ܐ ܒܬܪܢ .
Genesis 32:20 ܘܦܩ̇ܕ ܠܬܢܝܢܐ ܘܐܦ ܠܬܠܝܬܝܐ . ܘܐܦ ܠܟܠ ܕܐܙܠܝܢ ܒܬܪ ܓܙܪ̈ܐ ܠܡܐܡܪ . ܐܝܟ ܦܬܓܡܐ ܗܢܐ ܬܐܡܪܘܢ ܠܥܣܘ ܡܐ ܕܐܫܟܚܬܘܢܝܗܝ .
Genesis 32:21 ܘܬܐܡܪܘܢ ܠܗ . ܕܗܐ ܐܦ ܥܒܕܟ ܝܥܩܘܒ ܒܬܪܢ . ܡܛܠ ܕܐܡ̣ܪ . ܕܐܢܝܚ ܪܘܓܙܗ ܒܩܘܪܒܢܐ ܕܐ̇ܙܠ ܩܕܡܝ . ܘܒܬܪܟܢ ܐ̇ܚܙܐ ܐܦܘ̈ܗܝ . ܟܒܪ ܢܣ̣ܒ ܒܐ̈ܦܝ .
Genesis 32:22 ܘܥ̣ܒܪ ܩܘܪܒܢܐ ܩܕܡܘܗܝ . ܘܗ̣ܘ ܒܬ ܒܠܠܝܐ ܗ̇ܘ ܒܡܫܪܝܬܐ .
Genesis 32:23 ܘܩ̇ܕܡ ܒܠܠܝܐ . ܘܕܒܪ ܬܪ̈ܬܝܢ ܢܫ̈ܘܗܝ ܘܬܪ̈ܬܝܢ ܐܡܗ̈ܬܗ . ܘܚܕܥܣܪ ܒܢ̈ܘܗܝ ܘܐܥܒܪ ܐܢܘܢ ܠܡܕܒܪܐ ܕܝܒܩ .
Genesis 32:24 ܘܕܒ̣ܪ ܐܢܘܢ ܘܐܥܒܪ ܐܢܘܢ ܢܚܠܐ . ܘܐܥܒܪ ܟܠ ܕܐܝܬ ܠܗ .
Genesis 32:25 ܘܦܫ ܝܥܩܘܒ ܒܠܚܘܕܘܗܝ . ܘܐܬܟܬܫ ܓܒܪܐ ܥܡܗ ܥܕܡܐ ܕܣܠ̣ܩ ܫܦܪܐ .
Genesis 32:26 ܘܚ̣ܙܐ ܕܠܐ ܡܬܡܨܐ ܚܝܠܗ ܘܩܪ̣ܒ ܠܚܪܘܬܗ . ܘܫ̣ܢܬ ܚܪܘܬܗ ܕܝܥܩܘܒ ܟܕ ܐܬܟܬܫ ܥܡܗ .
Genesis 32:27 ܘܐܡ̣ܪ ܠܗ . ܫܕܪܝܢܝ ܡܛܠ ܕܣܠ̣ܩ ܫܦܪܐ ܘܐܡ̣ܪ . ܠܐ ܐܫܕܪܟ ܐܠܐ ܐܢ ܒܪܟܬܢܝ .
Genesis 32:28 ܘܐܡ̣ܪ ܠܗ . ܐܝܟܢܐ ܫܡܟ . ܘܐܡ̣ܪ ܝܥܩܘܒ .
Genesis 32:29 ܘܐܡ̣ܪ ܠܗ . ܠܐ ܝܥܩܘܒ ܢܬܩܪܐ ܬܘܒ ܫܡܟ ܐܠܐ ܐܝܣܪܝܠ . ܡܛܘܠ ܕܐܫ̣ܬܪܪܬ ܥܡ ܡܠܐܟܐ ܘܥܡ ܓܒܪܐ ܘܐܬܡܨܝ̣ܬ ܚܝܠܐ .
Genesis 32:30 ܘܫܐܠܗ ܝܥܩܘܒ ܘܐܡ̣ܪ . ܚܘܢܝ ܫܡܟ . ܐܡ̇ܪ ܠܗ . ܠܡܢܐ ܫܐ̇ܠ ܐܢܬ ܥܠ ܫܡܝ . ܘܒܪܟܗ ܬܡܢ .
Genesis 32:31 ܘܩ̣ܪܐ ܝܥܩܘܒ ܫܡܗ ܕܐܬܪܐ ܗ̇ܘ ܦܢܘܐܝܠ . ܡܛܠ ܕܚ̇ܙܝܬ ܡܠܐܟܐ ܐ̈ܦܝܢ ܠܘܩܒܠ ܐ̈ܦܝܢ ܘܐܬܦ̣ܨܝܬ ܢܦܫܝ .
Genesis 32:32 ܘܕܢ̣ܚܬ ܠܗ ܫܡܫܐ ܟܕ ܥܒ̣ܪ ܠܦܢܘܐܝܠ . ܘܗ̣ܘ ܡ̇ܣܡܐ ܗܘܐ ܡܢ ܚܪܘܬܗ .
Genesis 32:33 ܡܛܠ ܗܢܐ ܠܐ ܐܟܠܝܢ ܒܢ̈ܝ ܐܝܣܪܝܠ . ܓܝܕܐ ܕܓܢܫܝܐ ܕܒܚܪܘܬܐ ܕܥܛܡܐ ܥܕܡܐ ܠܝܘܡܢܐ . ܡܛܠ ܕܩ̣ܪܒ ܠܚܪܘܬܐ ܕܥܛܡܗ ܕܝܥܩܘܒ ܠܓܢܫܝܐ .
Genesis 33:1 ܘܐܪܝܡ ܝܥܩܘܒ ܥܝܢ̈ܘܗܝ ܘܚ̣ܙܐ ܘܗܐ ܥܣܘ ܐܬ̇ܐ . ܘܥܡܗ ܐܪܒܥܡܐܐ ܓܒܪ̈ܝܢ . ܘܦ̇ܠܓ ܛ̈ܠܝܐ ܥܠ ܠܝܐ ܘܥܠ ܪܚܝܠ . ܘܥܠ ܬܪ̈ܬܝܢ ܐܡܗ̈ܬܐ .
Genesis 33:2 ܘܥܒ̣ܕ ܠܐܡܗ̈ܬܐ ܘܠܒܢܝ̈ܗܝܢ ܩܕܡܝܬ . ܘܠܠܝܐ ܘܠܒ̈ܢܝܗ̇ ܒܬܪܗܝܢ . ܘܠܪܚܝܠ ܘܠܝܘܣܦ ܒܚܪܬܐ .
Genesis 33:3 ܘܗ̣ܘ ܥܒ̣ܪ ܩܕܡܝܗܘܢ . ܘܣܓ̣ܕ ܥܠ ܐܪܥܐ ܫܒܥ ܙܒ̈ܢܝܢ . ܥܕܡܐ ܕܩܪܒ ܠܘܬ ܐܚܘܗܝ .
Genesis 33:4 ܘܪܗܛ ܥܣܘ ܠܐܘܪܥܗ . ܘܥܦܩܗ ܘܢܦܠ ܥܠ ܨܘܪܗ . ܘܢܫܩܗ ܘܒܟܘ .
Genesis 33:5 ܘܐܪܝܡ ܥܣܘ ܥܝܢ̈ܘܗܝ . ܘܚ̣ܙܐ ܢܫ̈ܐ ܘܛ̈ܠܝܐ ܘܐܡ̣ܪ . ܐܝܡܟܐ ܠܟ ܗܠܝܢ ܘܐܡ̣ܪ . ܛ̈ܠܝܐ ܐܢܘܢ ܕܝܗ̣ܒ ܐܠܗܐ ܠܥܒ̣ܕܟ .
Genesis 33:6 ܘܩܪܒ ܐܡܗ̈ܬܐ ܗ̈ܢܝܢ ܘܒ̈ܢܝܗܝܢ ܘܣܓ̣ܕܘ .
Genesis 33:7 ܘܩ̣ܪܒܬ ܐܦ ܠܝܐ ܘܒ̈ܢܝܗ̇ ܘܣܓ̣ܕܘ . ܘܒܬܪܟܢ ܩܪܒܘ ܐܦ ܪܚܝܠ ܘܝܘܣܦ ܘܣܓ̣ܕܘ .
Genesis 33:8 ܘܐܡܪ ܥܣܘ . ܐܝܡܟܐ ܠܟ ܗܕܐ ܟܠܗ̇ ܡܫܪܝܬܐ ܕܦܓܥܬ ܒܝ . ܘܐܡ̣ܪ ܠܗ ܝܥܩܘܒ . ܡܛܠ ܕܐܫ̇ܟܚܬ ܪ̈ܚܡܐ ܒܥܝܢ̈ܝ ܡܪܝ .
Genesis 33:9 ܘܐܡܪ ܠܗ ܥܣܘ . ܐܝܬ ܠܝ ܘܣ̇ܓܝ ܠܝ . ܐܚܝ ܩܕܐ ܕܝܠܟ .
Genesis 33:10 ܐܡ̇ܪ ܠܗ ܝܥܩܘܒ . ܐܢ ܐܫ̇ܟܚܬ ܪ̈ܚܡܐ ܒܥܝܢ̈ܝܟ . ܣܒ ܩܘܪܒܢܝ ܡܢ ܐ̈ܝܕܝ . ܡܛܠ ܕܗܫܐ ܚ̇ܙܝܬ ܐ̈ܦܝܟ . ܐܝܟ ܚܙܘܐ ܕܐ̈ܦܝ ܡܠܐܟܐ ܘܐܨܛܒܝܬ ܒܝ .
Genesis 33:11 ܣܒ ܒܘܪܟܬܝ ܕܐܝܬ̇ܝܬ ܠܟ . ܡܛܠ ܕܪܚ̇ܡ ܥܠܝ ܐܠܗܐ . ܘܡܛܠ ܕܐܝܬ ܠܝ ܟܠ . ܘܐܠܨܗ ܘܩ̇ܒܠ .
Genesis 33:12 ܐܡܪ ܠܗ ܥܣܘ . ܢܫܩܘܠ ܘܢܐܙܠ . ܘܐܙܠ ܠܩܘܒܠܟ .
Genesis 33:13 ܐܡ̇ܪ ܠܗ ܝܥܩܘܒ . ܡܪܝ ܝܕܥ̇ ܕܛ̈ܠܝܐ ܛܠ̣ܝܢ . ܘܥܢܐ ܘܬܘܪ̈ܐ ܡܝܢܩܢ ܥܠܝ . ܘܐܢ ܪܕܦ̇ ܐܢܐ ܠܗܘܢ ܚܕ ܝܘܡ . ܡܝܬܐ ܟܘܠܗ̇ ܥܢܐ .
Genesis 33:14 ܢܥܒܪ ܡܪܝ ܩܕܡ ܥܒܕܗ . ܘܐܢܐ ܐܗܠܟ ܪܟܝܟܐܝܬ ܠܪܓܠ ܥܒܕܬܐ ܕܩܕܡܝ ܘܠܪܓܠ ܛ̈ܠܝܐ . ܥܕܡܐ ܕܐܬܐ ܠܘܬ ܡܪܝ ܠܣܥܝܪ .
Genesis 33:15 ܐܡ̇ܪ ܠܗ ܥܣܘ . ܐܫܒܘܩ ܠܘܬܟ ܡܢ ܥܡܐ ܕܥܡܝ . ܘܐܡ̣ܪ ܝܥܩܘܒ . ܠܡܢܐ ܗ̇ܘܐ ܠܝ ܐܫܟܚ ܪ̈ܚܡܐ ܒܥܝܢ̈ܝ ܡܪܝ .
Genesis 33:16 ܘܗ̣ܦܟ ܥܣܘ ܒܝܘܡܐ ܗ̇ܘ ܠܐܘܪܚܗ . ܠܣܥܝܪ .
Genesis 33:17 ܘܝܥܩܘܒ ܫܩܠ ܠܣܟܘܬ . ܘܒܢ̣ܐ ܠܗ ܒܝܬܐ . ܘܠܒܥܝܪܗ ܥܒ̣ܕ ܡܛܠܠܐ . ܡܛܠ ܗܢܐ ܩ̣ܪܐ ܫܡܗ ܕܐܬܪܐ ܗ̇ܘ ܣܟܘܬ .
Genesis 33:18 ܘܐܬܐ ܝܥܩܘܒ ܠܫܠܝܡ ܩܪܝܬܐ ܕܫܟܝܡ ܕܒܐܪܥܐ ܕܟܢܥܢ . ܟܕ ܐܬܐ ܡܢ ܦܕܢ ܕܐܪܡ ܘܫ̣ܪܐ ܠܩܘܒܠܗ̇ ܕܩܪܝܬܐ .
Genesis 33:19 ܘܙܒܢ ܡܢܬܐ ܕܚܩܠܐ ܡܢ ܒܢ̈ܝ ܚܡܘܪ ܐܒܘܗܝ ܕܫܟܝܡ ܒܡܐܐ ܢܩ̈ܘܢ . ܘܢܩ̣ܫ ܬܡ̇ܢ ܡܫܟܢܗ .
Genesis 33:20 ܘܐܩܝܡ ܬܡܢ ܡܕܒܚܐ . ܘܩܪܝܗܝ ܐܝܠ ܐܠܗܐ ܕܐܝܣܪܝܠ .
Genesis 34:1 ܘܢܦܩ̣ܬ ܕܝܢ̣ܐ ܒܪܬ ܠܝܐ . ܕܐܬܝ̣ܠܕܬ ܠܝܥܩܘܒ ܠܡܚܙܐ ܒܢ̈ܬ ܐܬܪܐ .
Genesis 34:2 ܘܚܙܗ̇ ܫܟܝܡ ܒܪ ܚܡܘܪ ܚܘܝܐ ܪܒܐ ܕܐܪܥܐ . ܘܕܒܪܗ̇ ܘܕܡ̣ܟ ܥܡܗ̇ ܘܨܥܪܗ̇ .
Genesis 34:3 ܘܢܦ̣ܩܬ ܢܦܫܗ ܒܬܪ ܕܝܢ̣ܐ ܒܪܬ ܝܥܩܘܒ . ܘܪܚܡܗ̇ ܠܛܠܝܬܐ . ܘܡܠ̣ܐ ܒܠܒܗ̇ ܕܛܠܝܬܐ .
Genesis 34:4 ܘܐܡ̣ܪ ܫܟܝܡ ܠܚܡܘܪ ܐܒܘܗܝ . ܣܒ ܠܝ ܛܠܝܬܐ ܗܕܐ ܐܢܬܬܐ .
Genesis 34:5 ܘܝܥܩܘܒ ܫܡ̣ܥ ܕܛ̇ܡܐܘ ܠܕܝܢ̣ܐ ܒܪܬܗ . ܘܒܢ̈ܘܗܝ ܥܡ ܒܥܝܪ̈ܐ ܗܘܘ ܒܚܩܠܐ . ܘܫܬ̣ܩ ܝܥܩܘܒ ܥܕܡܐ ܕܐܬܘ .
Genesis 34:6 ܘܢܦ̣ܩ ܚܡܘܪ ܐܒܘܗܝ ܕܫܟܝܡ ܠܘܬ ܝܥܩܘܒ ܠܡܡܠܠܘ ܥܡܗ .
Genesis 34:7 ܘܒ̈ܢܝ ܝܥܩܘܒ ܐܬܘ ܡܢ ܚܩܠܐ . ܘܟܕ ܫܡܥܘ ܟ̣ܪܝܬ ܠܗܘܢ ܠܓܒܪ̈ܐ . ܘܐܬܐܒܫ ܠܗܘܢ ܛܒ . ܡܛܠ ܕܥܒܕܘ ܛܡܐܘܬܐ ܒܐܝܣܪܝܠ ܘܨܥܪܘ ܠܒܪܬ ܝܥܩܘܒ . ܘܗܟܢܐ ܠܐ ܡܬܥܒܕ .
Genesis 34:8 ܘܡܠܠ ܚܡܘܪ ܥܡܗܘܢ ܘܐܡ̣ܪ ܠܗܘܢ . ܫܟܝܡ ܒܪܝ ܨܒܬ ܢܦܫܗ ܒܒܪܬܟܘܢ . ܗܒܘܗ̇ ܠܗ ܐܢܬܬܐ .
Genesis 34:9 ܘܐܬܚܬܢܘ ܥܡܢ . ܒܢ̈ܬܟܘܢ ܗܒܘ ܠܢ . ܘܒܢܬ̈ܢ ܣܒܘ ܠܟܘܢ .
Genesis 34:10 ܘܥܡܢ ܬܒܘ . ܘܐܪܥܐ ܗܐ ܩܕܡܝܟܘܢ . ܬܒܘ ܘܐܬܬܓܪܘ ܘܝܪܬܘ ܒܗ̇ .
Genesis 34:11 ܘܐܡ̣ܪ ܫܟܝܡ ܠܐܒܘܗ̇ ܘܠܐܚ̈ܝܗ̇ . ܐܫܟܚ ܪ̈ܚܡܐ ܒܥܝܢ̈ܝܟܘܢ . ܘܟܠ ܕܬܐܡܪܘܢ ܠܝ ܐܬܠ .
Genesis 34:12 ܐܣܓܘ ܥܠܝ ܛܒ ܡܗܪܐ ܘܡܘܗ̈ܒܬܐ . ܘܐܬܠ ܐܝܟܢܐ ܕܬܐܡܪܘܢ ܠܝ . ܘܗܒܘ ܠܝ ܛܠܝܬܐ ܗܕܐ ܐܢܬܬܐ .
Genesis 34:13 ܘܥܢܘ ܒܢ̈ܝ ܝܥܩܘܒ ܠܫܟܝܡ ܘܠܚܡܘܪ ܐܒܘܗܝ . ܘܐܡܪܘ ܠܗ ܒܢܟܠܐ . ܥܠ ܕܛܡܐܘ ܠܕܝܢ̣ܐ ܚܬܗܘܢ .
Genesis 34:14 ܘܐܡܪܘ ܠܐ ܡܫܟܚܝܢܢ ܠܡܥܒܕ ܦܬܓܡܐ ܗܢܐ . ܠܡܬܠ ܚܬܢ ܠܓܒܪܐ ܕܐܝܬ ܠܗ ܥܘܪܠܘܬܐ . ܡܛܠ ܕܚܣܕܐ ܗܘ ܠܢ .
Genesis 34:15 ܒܪܡ ܒܗܕܐ ܢܬ̣ܛܦܝܣ ܠܟܘܢ . ܐܢܗ̣ܘ ܕܬܗܘܘܢ ܐܟܘܬܢ . ܘܬܓܙܪܘܢ ܟܠ ܕܟܪܐ ܐܝܟܢܐ ܕܚܢܢ ܓܙܝܪ̈ܝܢ .
Genesis 34:16 ܢܬܠ ܠܟܘܢ ܒܢ̈ܬܢ . ܘܒܢ̈ܬܟܘܢ ܢܣܒ ܠܢ . ܘܢܬܒ ܥܡܟܘܢ ܘܢܗܘܐ ܥܡܐ ܚܕ .
Genesis 34:17 ܘܐܢ ܠܐ ܬܫܡܥܘܢܢ ܠܡܓܙܪ . ܢܕܒ̣ܪ ܒܪܬܢ ܘܢܐܙܠ .
Genesis 34:18 ܘܫ̣ܦܪ ܡ̈ܠܝܗܘܢ ܒܥܝܢ̈ܝ ܚܡܘܪ ܘܒܥܝ̈ܢܝ ܫܟܝܡ ܒܪܗ .
Genesis 34:19 ܘܠܐ ܫܘܚܪ ܛܠܝܐ ܠܡܥܒܕܗ̇ ܠܥܒܝܕܬܐ . ܡܛܘܠ ܕܐܨܛܒܝ ܗܘܐ ܒܒܪܬ ܝܥܩܘܒ . ܘܗ̣ܘ ܝܩܝܪ ܗܘܐ ܡܢ ܟܘܠܗ ܒܝܬ ܐܒܘܗܝ .
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .