← All works
Peshitta Esdras 4 Peshitta (Syriac Old Testament) · 714 sections
Single column Two columns
Esdras 4 12:42 ܐܢܬ ܗܘ ܓܝܪ ܐܫܬܚ̣ܪܬ ܠܢ ܡܢ ܟܘܠܗܘܢ ܢܒ̈ܝܐ̣ . ܐܝܟ ܣܓܘܠܐ ܡܢ ܩܛܦܐ . ܘܐܝܟ ܫܪܓܐ ܒܐܬܪܐ ܚܫܘܟܐ . ܘܐܝܟ ܠܡܐܢܐ ܕܚ̈ܝܐ ܠܐܠܦܐ ܡܐ ܕܩܝ̇ܡܐ ܒܡܚܫܘܠܐ
Esdras 4 12:43 ܐܘ ܠܐ ܣ̇ܦܩܢ ܠܢ ܒܝ̈ܫ̣ܬܐ ܕܓܕ̈ܫܢ . ܐܠܐ ܕܐܦ ܐܢܬ ܬܫܒܩܢ
Esdras 4 12:44 ܘܐܢ ܕܝܢ ܫܒ̇ܩ ܐܢܬ ܠܢ̣ . ܦܩܚ ܗܘܐ ܠܢ ܕܐܠܘ ܝܩ̈ܕܢ ܐܦ ܚܢܢ ܒܝܩܕܢܗ̇ ܕܨܗܝܘܢ
Esdras 4 12:45 ܠܐ ܗܘܐ ܓܝܪ ܡܝܬ̇ܪܝܢܢ ܡܢ ܗ̇ܢܘܢ ܕܡܝܬܘ ܬܡܢ .. ܘܒ̇ܟܝܬ ܒܩܠܐ ܪܡ̇ܐ . ܘܥ̇ܢܝܬ ܘܐܡ̇ܪܬ ܠܗܘܢ
Esdras 4 12:46 ܐܬܠܒܒ ܐܝܣܪܝܠ . ܘܠܐ ܬܟܪܐ ܠܟ ܒܝܬܗ ܕܝܥܩܘܒ
Esdras 4 12:47 ܐܝܬܘܗܝ ܓܝܪ ܕܘܟܪܢܟܘܢ ܩܕܡ ܡܪܝܡܐ . ܘܚܝܠܬܢܐ ܠܐ ܛܥ̇ܐ ܠܟܘܢ ܠܥܠܡ
Esdras 4 12:48 ܐܢܐ ܕܝܢ ܠܐ ܫܒܩܬܟܘܢ . ܘܠܐ ܫ̇ܒܩ ܐܢܐ ܠܟܘܢ . ܐܠܐ ܐ̇ܬܝܬ ܠܐܬܪܐ ܗܢܐ ܕܐܒ̇ܥܐ ܥܠ ܚܘܪܒܗ̇ ܕܨܗܝܘܢ . ܘܕܐܫܐܠ ܪ̈ܚ̣ܡܐ ܥܠ ܡܘܟܟܗ ܕܒܝܬ ܡܩܕܫܢ
Esdras 4 12:49 ܘܗܫܐ̣ ܙܠ̣ܘ ܟܘܠ ܐܢܫ ܠܒܝܬܗ . ܘܐܢܐ ܐ̇ܬܐ ܐܢܐ ܠܘܬܟܘܢ ܡܢ ܒܬܪ ܗܠܝܢ ܝܘܡ̈ܬܐ
Esdras 4 12:50 ܘܐܙܠܘ ܥܡܐ ܠܡܕܝܢܬܐ ܐܝܟ ܕܐܡ̇ܪܬ ܠܗܘܢ
Esdras 4 12:51 ܐܢܐ ܕܝܢ ܝܬ̇ܒܬ ܒܦܩܥܬܐ̣ ܫܒܥܐ ܝ̈ܘܡܝܢ . ܐܝܟ ܕܦܩܕܢܝ . ܘܐ̇ܟܠ ܗ̇ܘܝܬ ܡܢ ܗܒ̈ܒܐ ܕܕܒܪܐ ܒܠܚܘܕ . ܘܡܢ ܥ̇ܩܪ̈ܐ ܗ̣ܘܐ ܡܙܘܢܝ ܒܗ̇ܢܘܢ ܝܘܡ̈ܬܐ ܀
Esdras 4 13:1 ܘܗ̣ܘܐ ܡܢ ܒܬܪ ܫܒܥܐ ܝܘܡ̈ܝ̣ܢ ܘܚ̇ܙܝܬ ܚܙܘܐ ܒܠܠܝܐ
Esdras 4 13:2 ܘܗܐ ܪܘܚܐ ܪܒܬܐ ܩܡ̣ܬ ܒܝܡܐ ܐܝܟ ܕܬܫܓܘܫ ܐܢܘܢ ܠܟܠܗܘܢ ܓܠܠܘ̈ܗܝ
Esdras 4 13:3 ܘܚ̇ܙܝܬ ܘܗܐ ܗ̣ܝ ܪܘܚܐ ܐܣܩ̣ܬ ܡܢ ܠܒܗ ܕܝܡܐ ܐܝܟ ܕܡܘܬܐ ܕܒܪܢܫܐ . ܘܚ̇ܙܝܬ ܘܗܐ ܦ̣ܪܚ ܗܘܐ ܗ̣ܘ ܗ̇ܘ ܒܪܢܫܐ ܥܡ ܥܢ̈ܢܐ ܕܫܡܝܐ . ܘܠܐ̇ܝܟܐ ܕܡܦܢܐ ܗܘܐ ܐܦܘ̈ܗܝ ܕܢܚܘܪ ܘܢܚܙܐ̣ . ܪܐ̇ܬ ܗܘܐ ܟܘܠ ܡܕܡ ܡܢ ܩܕܡ ܚܙܘܗ
Esdras 4 13:4 ܘܠܐܝ̇ܟܐ ܕܢܦ̇ܩ ܗܘܐ ܩܠܐ ܕܦܘܡܗ̣ . ܫܝ̇ܚܝܢ ܗܘܘ ܟܘܠܗܘܢ ܐܝܠܝܢ ܕܫ̇ܡܥܝܢ ܗܘܘ ܩܠܗ ܐܝܟ ܕܫ̇ܝܚܐ ܩܪܘܬܐ ܡܐ ܕܡܪܝܚܐ ܒܗ̇ ܢܘܪܐ
Esdras 4 13:5 ܘܚܙ̇ܝܬ ܡܢ ܒܬܪ ܗܠܝܢ̣ . ܘܗܐ ܐܬܟܢܫܘ ܣܘܓܐܐ ܕܒܢܝ̈ܢܫܐ ܕܠܝܬ ܠܗܘܢ ܡܢܝܢܐ . ܡܢ ܐܪܒܥ ܪ̈ܘܚܝ ܫܡܝܐ̣ . ܐܝܟ ܕܢܩܪܒܘܢ ܥܡ ܒܪܢܫܐ ܗ̇ܘ ܕܣ̣ܠܩ ܡܢ ܝܡܐ
Esdras 4 13:6 ܘܚܙ̇ܝܬ ܕܝܢ ܕܓ̣ܙܪ ܠܗ ܛܘ̣ܪܐ ܪܡ̇ܐ ܘܦ̣ܪܚ ܘܩܡ ܥܠܘܗܝ
Esdras 4 13:7 ܐܢܐ ܕܝܢ ܒܥ̇ܝܬ ܕܐܚܙܐ ܐܬܪܐ ܐܘ ܕܘܟܬܐ ܡܢ ܐܝ̇ܟܐ ܕܐܬܓܙܪ ܛܘ̣ܪܐ ܗ̇ܘ̣ . ܘܠܐ ܐܫ̇ܟܚܬ
Esdras 4 13:8 ܘܡܢ ܒܬܪ ܗܠܝܢ ܚ̇ܙܝܬ̣ . ܘܗܐ ܟܘܠܗܘܢ ܗ̇ܢܘܢ ܕܐܬܟܢܫܘ ܕܢܩܪܒܘܢ ܥܡܗ ܕܚ̇ܠܝܢ ܗܘܘ ܣܓܝ . ܒܪܡ ܕܝܢ ܡܡܪܚܝܢ ܗܘܘ ܐܝܟ ܕܢܩܪܒܘܢ
Esdras 4 13:9 ܘܟܕ ܚ̣ܙܐ ܚܐܦܐ ܕܡܬܝܗ ܕܣܘܓܗܘܢ ܕܐ̣ܬܐ̣ . ܠܐ ܐܪܝܡ ܐܝ̣ܕܗ ܐܦ ܠܐ ܪܘܡܚܐ ܐܚܝܕ ܗܘܐ . ܘܠܐ ܡܕܡ ܡܢ ܟܠ ܡܐ̈ܢܐ ܕܩܪܒܐ . ܐܠܐ ܚ̣ܙܝܬ
Esdras 4 13:10 ܕܐܝ̇ܟܢܐ ܫܒ̇ܩ ܗܘܐ ܡܢ ܦܘܡܗ ܒܠܚܘܕ ܐܝܟ ܓ̈ܠܠܐ ܕܢܘܪܐ . ܘܡܢ ܣܦܘ̈ܬܗ ܪܘܚܐ ܕܫܠܗܒܝܬܐ . ܘܡܢ ܠܫܢܗ ܪܡ̇ܐ ܗܘܐ ܓܘܡܪ̈ܐ ܕܥܠܥܠܐ . ܘܗܠܝܢ ܐܬܚܠܛܘ ܟܠܗܘܢ ܐܟܚܕܐ ܓ̈ܠܠܐ ܕܢܘܪܐ ܘܪܘܚܐ ܕܫܠܗܒܝܬܐ . ܘܣܘܓܐܐ ܕܥܠܥܠܐ
Esdras 4 13:11 ܘܢܦ̣ܠܘ ܥܠ ܚܐܦܐ ܕܡܐܬܝܗ ܕܗ̇ܘ ܥܡܐ ܣܓܝܐܐ . ܕܡܛܝܒ ܗܘܐ ܕܢܩܪܒ . ܘܐܘܩܕ ܐܢܘܢ ܠܟܘܠܗܘܢ ܐܝܟ ܕܡܢ ܫܠܝܐ̣ . ܡܕܡ ܠܐ ܢܬܚܙܐ ܡܢ ܗ̇ܘ ܣܘܓܐ ܕܟܢܫܐ ܕܠܝܬ ܗܘܐ ܠܗ ܡܢܝܢܐ . ܐܠܐ ܐܢ ܒܠܚܘܕ ܚܠ̣ܐ ܕܩܛܡܐ̇ . ܘܪܝܚܐ ܕܬܢܢܐ . ܘܚ̇ܙܝܬ ܘܬܡ̇ܗܬ ܀
Esdras 4 13:12 ܘܡܢ ܒܬܪ ܗܠܝܢ̣ . ܚܙ̇ܝܬ ܠܗ̇ܘ ܒܪܢܫܐ ܕܢܚ̣ܬ ܡܢ ܛܘ̣ܪܐ ܗ̇ܘ . ܘܩ̇ܪܐ ܗܘܐ ܠܘܬܗ ܣܘܓܐܐ ܕܟܢܫܐ ܐܚܪܢܐ ܕܫܠܡܐ
Esdras 4 13:13 ܘܡܬܩܪܒܝܢ ܗܘܘ ܠܘܬܗ ܕܡ̈ܘܬܐ ܕܒܢܝܢ̈ܫܐ ܣܓ̈ܝܐܐ . ܡܢܗܘܢ ܚ̇ܕܝܢ ܗܘܘ ܕܝܢ . ܘܡܢܗܘܢ ܟܡܝܪܝܢ ܘܡܢܗܘܢ ܐܣܝܪܝܢ . ܘܡܢܗܘܢ ܡܝܬܝܢ ܠܐܝܠܝܢ ܕܡܬܩܪܒܝܢ . ܘܐܢܐ ܕܝܢ ܡܢ ܣܘܓܐܐ ܕܙܘܥܬܐ ܐܬܬܥܝܪܬ ܀ ܘܒܥ̇ܝܬ ܡܢ ܡܪܝܡܐ ܘܐܡ̇ܪܬ
Esdras 4 13:14 ܐܢܬ ܗܘ ܕܡܢ ܒܪܫܝܬ ܚܘܝܬܝܗܝ ܠܥ̣ܒܕܟ ܬܡܝ̈ܗܬܐ ܗܠܝܢ . ܘܟܕ ܠܐ ܫ̇ܘܐ ܐܢܐ ܚܫܒܬܢܝ ܕܬܩܒܠܝܗ̇ ܠܒܥܘܬܝ
Esdras 4 13:15 ܘܗܫܐ ܓܠܝ ܠܝ ܬܘܒ ܦܘܫܩܗ ܕܚܙܘܐ ܗܢܐ
Esdras 4 13:16 ܐܝܟ ܕܡܬܚܫܒ ܐܢܐ ܓܝܪ ܒܡܕܥܝ̣ . ܘܝ ܠܐܝܠܝܢ ܕܡܫܬܚܪܝܢ ܒܗ̇ܢܘܢ ܝܘܡ̈ܬܐ . ܘܣ̇ܓܝ ܬܘܒ ܝܬܝܪܐܝܬ̣ . ܘܝ ܠܐܝܠܝܢ ܕܠܐ ܡܫܬܚܪܝܢ
Esdras 4 13:17 ܡܛܠ ܓܝܪ ܕܠܐ ܐܫܬܚܪܘ ܢܬܬܥܝܩܘܢ
Esdras 4 13:18 ܒܡܕܡ ܕܢܛܝܪ ܠܐܝܠܝܢ ܕܡܫܬܚܪܝܢ ܒܝܘ̈ܡܬܐ ܐܚܪ̈ܝܐ . ܘܗ̣ܢܘܢ ܕܝܢ ܠܐ ܡܡܛܝܢ ܠܗܝܢ . ܐܦ ܠܐܝܠܝܢ ܕܐܫܬܚܪܘ
Esdras 4 13:19 ܡܛܠ ܗܢܐ ܘܝ . ܚ̇ܙܝܢ ܓܝܪ ܩܘܢܕܝܢܘܣ ܪ̈ܘܪܒܐ̣ . ܥܡ ܐܘ̈ܠܨܢܐ ܣܓ̈ܝܐܐ ܐܝܟ ܕܡܚܘܝܢ ܚ̈ܙܘܐ ܗܠܝܢ
Esdras 4 13:20 ܒܪܡ ܕܝܢ ܦܩܚ ܗܘ ܕܢܩܘܡ ܐܢܫ ܒܩܝܢܕܘܢܣ ܘܢܐܬܐ ܠܗܝܢ ܠܗܠܝܢ . ܐܘ ܕܢܥܒܪ ܐܝܟ ܥܢܢܐ ܡܢ ܥܠܡܐ . ܘܠܐ ܢܚܙܐ ܡܕܡ ܕܓ̇ܕܫ ܒܫܘܠܡܗܘܢ ܕܙܒܢ̈ܐ ܀
Esdras 4 13:21 ܘܥ̣ܢܐ ܘܐܡ̣ܪ ܠܝ ܐܦ ܦܘܫܩܗ ܕܚܙܘܟ ܐܡ̇ܪ ܠܟ . ܐܦ ܥܠ ܐܝܠܝܢ ܕܡܠ̣ܠܬ ܐܓ̇ܠܐ ܠܟ
Esdras 4 13:22 ܡܛܠ ܕܐܡ̣ܪܬ ܥܠ ܐܝܠܝܢ ܕܡܫܬܚܪܝܢ ܘܥܠ ܐܝܠܝܢ ܕܠܐ ܡܫܬܚܪܝ̣ܢ . ܗܕܐ ܗܝ ܡܠܬܐ
Esdras 4 13:23 ܗ̇ܘ ܕܡܣܝܒܪ ܩܘܢܕܘܢܘܣ ܒܗ̇ܘ ܙܒܢܐ̣ . ܗ̣ܘ ܡܢܛܪ ܠܐܝܠܝܢ ܕܒܩܝܢܕܘܢܘܣ ܪܡ̣ܝܢ . ܠܐܝܠܝܢ ܕܐܝܬ ܠܗܘܢ ܥ̇ܒ̈ܕܐ ܘܗܝܡܢܘܬܐ ܠܘܬ ܡܪܝܡܐ ܘܚܝܠܬܢܐ
Esdras 4 13:24 ܚܙܝ ܗܟܝܠ ܕܐܬܝܗܒ ܛܘܒܐ ܠܐܝܠܝܢ ܕܐܫܬܚܪܘ ܝܬܝܪ ܡܢ ܐܝܠܝܢ ܕܡܝܬܘ
Esdras 4 13:25 ܦܘܫܩܗ ܕܝܢ ܕܚܙܘܟ ܗܢܘ . . ܡܛܠ ܕܚܙ̣ܝܬ ܓܒܪܐ ܕܣ̇ܠܩ ܡܢ ܠܒܗ ܕܝܡܐ
Esdras 4 13:26 ܗ̣ܘܝܘ ܗ̇ܘ ܕܢܛ̇ܪ ܡܪܝܡܐ ܠܙܒ̈ܢܐ ܣܓܝܐ̈ܐ . ܗ̇ܘ ܕܒܐܝܕܗ ܢܦܪܩܝܗ̇ ܠܒܪܝܬܗ . ܘܗ̣ܘ ܢܥܒܪ ܠܐܝܠܝܢ ܕܐܫܬܚܪܘ
Esdras 4 13:27 ܘܕܚ̣ܙܝܬ ܕܡܢ ܦܘܡܗ ܢܦ̇ܩܐ ܗܘܬ ܪܘܚܐ ܕܢܘܪܐ ܘܕܥܠܥܠܐ
Esdras 4 13:28 ܘܕܠܐ ܕܝܢ ܐܚܝܕ ܗܘܐ ܒܐ̣ܝܕܗ ܪܘܡܚܐ ܘܠܐ ܡܐܢܐ ܕܩܪܒܐ . ܘܚ̇ܒܠ ܠܣܘܓܐܐ ܕܡܬܝܬܗ ܕܗ̇ܘ ܟܢܫܐ ܕܐ̇ܬܐ ܕܢܥܒܕ ܥܡܗ ܩܪܒܐ . ܗܕܐ ܗܝ ܡܠܬܐ
Esdras 4 13:29 ܗܐ ܝܘܡ̈ܬܐ ܐ̇ܬܝܢ . ܐܡܬܝ ܕܢܥܒܕ ܡܪܝܡܐ ܕܢܦܪܘܩ ܠܐܝܠܝܢ ܕܥܠ ܐܪܥܐ
Esdras 4 13:30 ܬܐܬܐ ܬܘܗܬܐ ܣܓܝܐܬܐ ܥܠ ܥܡܘܪ̈ܝܗ̇ ܕܐܪܥܐ
Esdras 4 13:31 ܘܢܬܚܫܒܘܢ ܕܢܩܪܒܘܢ ܚܕ ܥܡ ܚܕ . ܡܕܝܢܬܐ ܥܡ ܡܕܝܢܬܐ . ܘܐܬܪܐ ܥܡ ܐܬܪܐ . ܘܥܡܐ ܥܡ ܥܡܐ . ܘܡܠܟ̇ܘܬܐ ܥܡ ܡܠܟܘܬܐ
Esdras 4 13:32 ܘܢܗ̇ܘܐ ܟܕ ܢܗ̈ܘܝܢ ܗܠܝܢ ܐܬܘ̈ܬܐ ܕܩܕ̇ܡܬ ܐܡ̇ܪܬ ܠܟ . ܗ̇ܝܕܝܢ ܢܬܓܠܐ ܒܪܝ ܗ̇ܘ ܕܚܙ̣ܝܬ ܐܝܟ ܓܒܪܐ ܕܣ̇ܠܩ
Esdras 4 13:33 ܘܟܕ ܢܫܡܥܘܢ ܥܡܡ̈ܐ ܟܠܗܘܢ ܩܠܗ ܢܫܒܩܘܢ ܟܠ ܐܢܫ ܡܢܗܘܢ ܐܬܪܗ ܘܩܪܒܐ ܕܒܝܢܬܗܘܢ
Esdras 4 13:34 ܘܢܬܟܢܫܘܢ ܐܟܚܕܐ ܟܢܫܐ ܕܠܝܬ ܠܗ ܡܢܝܢܐ . ܐܝܟ ܕܚ̣ܙܝܬ ܕܨ̇ܒܝܢ ܕܢܐܬܘܢ ܘܢܥܒܕܘܢ ܩܪܒܐ ܥܡ ܓܒܪܐ ܗ̇ܘ
Esdras 4 13:35 ܗ̣ܘ ܕܝܢ ܢܩܘܡ ܥܠ ܪܝܫ ܛܘ̣ܪܐ ܕܨܗܝܘܢ
Esdras 4 13:36 ܘܨܗܝܘܢ ܕܝܢ ܬܐܬܐ . ܘܬܬܓܠܐ ܠܟܘܠ ܟܕ ܡܥܬܕܐ ܘܒܢ̣ܝܐ . ܐܝܟ ܕܚ̣ܙܝܬ ܛܘ̣ܪܐ ܕܐܬܓܙܪ ܕܠܐ ܒܐܝܕ̈ܝܢ
Esdras 4 13:37 ܗ̣ܘ ܕܝܢ ܒܪܝ̣ . ܢܟܣ ܠܥܡ̈ܡܐ ܗܠܝܢ ܕܐܬܘ ܥܠ ܪܘܫܥܗܘܢ . ܗ̇ܢܘܢ ܕܐܬܕܡܝܘ ܠܥܠܥܠܐ . ܘܢܣܕܘܪ ܩܕܡܝܗܘܢ ܥ̇ܒ̈ܕܝܗܘܢ ܒܝ̣̈ܫܐ . ܘܬܫܢܝܩܐ ܗ̇ܘ ܕܥܬܝܕܝܢ ܕܢܫܬܢܩܘܢ
Esdras 4 13:38 ܡܢ ܒܬܪܟܢ ܕܝܢ ܗ̇ܘ ܕܐܬܕܡܝ ܠܫܠܗܒܝܬܐ̣ . ܢܘܒܕ ܐܢܘܢ ܕܠܐ ܥܡܠܐ . ܒܢܡܘܣܗ ܕܗ̇ܘ ܕܐܬܕܡܝ ܠܢܘܪܐ ܀
Esdras 4 13:39 ܘܕܚܙܝܬܝܗܝ ܕܩ̇ܪܐ ܘܡܟܢܫ ܠܘܬܗ ܣܘܓܐܐ ܕܟܢܫܐ ܐܚܪܢܐ ܕܫܠܡܐ̣
Esdras 4 13:40 ܗ̣ܢܘܢ ܐܢܘܢ ܬܫܥܐ ܫܒ̈ܛܝܢ ܘܦܠܓܗ . ܗܠܝܢ ܕܐܫܬܒܝܘ ܗܘܘ ܡܢ ܐܪܥܗܘܢ ܒܝܘ̈ܡܬܗ ܕܝܘܫܝܐ ܡ̇ܠܟܐ . ܗܠܝܢ ܕܫ̣ܒܐ ܣܠܒܢܣܪ ܡ̇ܠܟܐ ܕܐܬܘܪ̈ܝܐ . ܘܐܝܬܝ ܐܢܘܢ ܠܥܒܪܗ ܕܢܗܪܐ ܦܪܬ ܘܐܫܬܒܝܘ ܠܐܪܥܐ ܐܚܪܬܐ .
Esdras 4 13:41 ܐܬܚܫܒܘ ܗܘܘ ܓܝܪ ܗ̣ܢܘܢ ܒܝܢܬܗܘܢ . ܘܐܬܡܠܟܘ ܗܢܐ ܡܠ̣ܟܐ̣ . ܕܢܫܒܩܘܢ ܣܘܓܐܐ ܕܥܡ̈ܡܐ ܘܢܐܙܠܘܢ ܠܐܬܪܐ ܓܘܝܐ . ܐܝ̇ܟܐ ܕܡܢ ܝܘܡ̈ܘܗܝ ܠܐ ܥܡ̣ܪܬ ܬܡܢ ܫܪܒܬܐ ܕܒ̈ܢܝܢܫܐ
Esdras 4 13:42 ܕܐܦܢ ܬܡܢ ܢܛܪܘܢ ܢܡܘܣܗܘܢ ܗ̇ܘ ܕܠܐ ܢܛܪܘܗܝ ܗܘܘ ܒܐܪܥܗܘܢ ܀
Esdras 4 13:43 ܘܥܠܘ ܗܘܘ ܕܝܢ ܒܡ̈ܥܠܢܐ ܐ̈ܠܝܨܐ ܕܦܪܬ
Esdras 4 13:44 ܥ̣ܒܕ ܠܗܘܢ ܓܝܪ ܡܪܝܡܐ ܗܝ̇ܕܝܢ ܬܕܡܪ̈ܬܐ . ܟ̇ܠܐ ܗܘܐ ܓܝܪ ܡܦܩܢ̈ܘܗܝ ܕܢܗܪܐ ܥܕܡܐ ܕܥ̣ܒܪܘ ܟܘܠܗܘܢ
Esdras 4 13:45 ܕܢܐܙܠܘܢ ܗܘܘ ܕܝܢ ܒܝܒܫܐ . ܐܘܪܚܐ ܣܓܝܐܐ ܗܘܬ ܠܡܐܙܠ̣ ܡܪܕܐ ܫܢܬܐ ܚܕܐ ܘܦܠܓܗ̇ . ܗ̣ܘ ܕܝܢ ܗ̇ܘ ܐܬܪܐ ܡܬܩܪܐ ܐܪܙܦ . ܣܘܦܗ ܕܥܠܡܐ
Esdras 4 13:46 ܘܥܡ̣ܪܘ ܬܡܢ ܥܕܡܐ ܠܙܒܢܐ ܐܚܪܝܐ . ܘܗܝ̇ܕܝܢ ܬܘܒ ܕܥܬܝܕܝܢ ܕܢܐܬܘܢ̣
Esdras 4 13:47 ܬܘܒ ܡܪܝܡܐ ܢܟܠܐ ܡܦܩ̈ܢܘܗܝ ܕܢܗܪܐ ܦܪܬ . ܐܝܟ ܕܢܫܟܚܘܢ ܢܥܒܪܘܢ . ܡܛܠ ܗܢܐ ܗܘ ܚܙ̣ܝܬ ܣܘܓܐܐ ܕܟܢܫܐ ܕܡܬܟܢܫ ܒܫܠܡܐ
Esdras 4 13:48 ܐܠܐ ܐܦ ܐܝܠܝܢ ܕܐܫܬܚܪܘ ܡܢ ܥܡܟ ܢܐܚܘܢ . ܐܝܠܝܢ ܕܡܫܬܟܚܝܢ ܒܬܚ̈ܘܡܝ ܩܕ̈ܝܫܐ
Esdras 4 13:49 ܘܢܗܘܐ ܕܝܢ ܕܟܕ ܢܘܒܕ ܣܘܓܐܐ ܕܥܡ̈ܡܐ ܕܐܬܟܢܫܘ̣ ܢܓܢ ܥܠ ܥܡܐ ܕܐܫܬܚܪ
Esdras 4 13:50 ܘܗ̇ܝܕܝܢ ܢܚܘܐ ܐܢܘܢ ܬܕܡܪ̈ܬܐ ܝܬܝܪ̈ܬܐ ܀
Esdras 4 13:51 ܘܐܢܐ ܬܘܒ ܐܡ̇ܪܬ ܠܗ . ܐܘ ܡܪܝܐ ܡܪܝ . ܗܕܐ ܐܘܕܥܝܢܝ . ܡܛܠ ܡܢܐ ܚܙ̇ܝܬܗ ܠܓܒܪܐ ܕܡܢ ܠܒܗ ܕܝܡܐ ܣ̇ܠܩ • • ܀ ܘܥ̣ܢܐ ܘܐ̣ܡܪ ܠܝ
Esdras 4 13:52 ܐܝ̇ܟܢܐ ܕܠܐ ܡ̣ܨܐ ܐܢܫ ܕܢܒܨܐ ܘܢܫܟܚ ܐܘ ܢܕܥ ܡܕܡ ܕܒܥܘܡ̈ܩܘܗܝ ܕܝܡܐ̣ . ܗܟܢܐ ܠܐ ܡܫܟܚ ܐܢܫ ܡܢ ܐܝܠܝܢ ܕܥܠ ܐܪܥܐ ܕܢܚܙܝܘܗܝ ܠܒܪܝ ܐܘ ܠܐܝܠܝܢ ܕܥܡܗ̇ . ܐܠܐ ܐܢ ܒܗ̇ܘ ܙܒܢܐ ܒܝܘܡܗ
Esdras 4 13:53 ܗܢܘ ܦܘܫܩܗ ܕܚܙܘܐ ܕܚ̣ܙܝܬ . ܡܛܠ ܗܢܐ ܐܬܓܠܝ ܠܟ ܗܠܝܢ̇ ܠܟ ܒܠܚܘܕܝܟ
Esdras 4 13:54 ܡܛܠ ܕܫܒ̣ܩܬ ܐܝܠܝܢ ܕܕܝܠܟ ܐ̈ܢܝܢ . ܘܐܬܒܛܠ ܠܟ ܥܠ ܐܝܠܝܢ ܕܕܝܠܝ ܐ̈ܢܝܢ . ܘܐܝܠܝܢ ܕܕܢܡܘܣܐ ܐ̈̇ܢܝܢ ܒܥ̣ܝܬ .
Esdras 4 13:55 ܚܝ̈ܝܟ ܓܝܪ ܒܚܟܡܬܐ ܕܒ̣ܪܬ . ܘܠܣܟܘܠܬܢܘܬܐ ܩܪ̣ܝܬ ܐܡܝ
Esdras 4 13:56 ܡܛܠ ܗܢܐ ܚܘܝܬܟ ܗܠܝܢ . ܐܓܪܐ ܓܝܪ ܠܘܬ ܡܪܝܡܐ . ܢܗܘܐ ܕܝܢ ܡܢ ܒܬܪ ܬܠܬܐ ܝܘܡ̈ܝܢ ܐܡܠܠ ܥܡܟ ܐܚܪ̈ܢܝܬܐ . ܘܐܦܫܩ ܠܟ ܬܕܡܪ̈ܬܐ ܐܚܪ̈ܝܬܐ ܀ ܀
Esdras 4 13:57 ܘܐ̇ܙܠܬ ܘܗ̇ܠܟܬ ܒܦܩܥܬܐ ܣ̇ܓܝ . ܘܡܫܒܚ ܗܘ̇ܝܬ ܘܡܘܕܐ ܠܡܪܝܡܐ̇ . ܥܠ ܬܕܡܪ̈ܬܐ ܕܥܒ̣ܕ ܒܙܒܢ ܙܒܢ
Esdras 4 13:58 ܘܡܕܒܪ ܙܒ̈ܢܐ ܘܡܕܡ ܕܐ̇ܬܐ ܒܙܒ̈ܢܐ . ܘܝܬ̇ܒܬ ܬܡܢ ܬܠܬܐ ܝܘܡ̈ܝܢ
Esdras 4 14:1 ܘܗ̣ܘܐ ܡܢ ܒܬܪ ܗܠܝܢ̣ . ܘܐܢܐ ܝܬ̇ܒ ܗ̇ܘܝܬ ܬܚܝܬ ܒܠܘܛܐ
Esdras 4 14:2 ܘܗܐ ܩܠܐ ܢܦܩ̣ ܡܢ ܣܢܝܐ ܕܠܘܩܒܠܝ̣ ܘܥܢܐ ܘܐܡ̣ܪ ܠܝ . ܥܙܪܐ ܥܙܪܐ̣ . ܘܐܡ̇ܪܬ ܗܐ ܐܢܐ . ܘܩܡ̇ܬ ܥܠ ܪ̈ܓܠܝ . ܘܐܡ̣ܪ ܠܝ
Esdras 4 14:3 ܡܬܓܠܝܘ ܐܬ̇ܓܠܝܬ ܡܢ ܣܢܝܐ̇ . ܘܡ̇ܠܠܬ ܥܡ ܡܘܫܐ ܟܕ ܡܫܥܒܕ ܗܘܐ ܥܡܝ ܒܡܨܪܝܢ
Esdras 4 14:4 ܘܫ̇ܕܪܬܗ ܘܐܦܩܗ ܠܥܡܝ ܡܢ ܡܨܪܝܢ . ܘܐܝܬܝܗ ܠܡܕܒܪܐ ܘܐܣܩܗ ܠܛܘܪ ܣܝܢܝ . ܘܐܚ̇ܕܬܗ ܠܘܬܝ ܝܘܡ̈ܬܐ ܣܓܝܐ̈ܐ
Esdras 4 14:5 ܘܦܫ̇ܩܬ ܠܗ ܬܕܡܪ̈ܬܐ ܣܓܝܐ̈ܬܐ . ܘܐܘ̇ܕܥܬܗ ܪ̈ܐܙܐ ܕܙܒ̈ܢܐ . ܘܚ̇ܘܝܬܗ ܫܘܠܡܗܘܢ ܕܥ̈ܕܢܐ . ܘܦ̇ܩܕܬܗ ܘܐܡ̇ܪܬ ܠܗ
Esdras 4 14:6 ܕܗܠܝܢ ܡ̈ܠܐ̣ . ܡܢܗܝܢ ܬܟܣܐ ܘܡܢܗܝܢ ܬܓܠܐ ܀
Esdras 4 14:7 Esdras 4 14:8 ܐܬ̈ܘܬܐ ܕܩܕ̇ܡܬ ܚ̇ܘܝܬܟ . ܘܚܙ̈ܘܢܐ ܕܚܙ̣ܝܬ ܘܦܘܫܩܗܘܢ ܕܫܡ̣ܥܬ . ܣܝ̣ܡ ܐܢܘܢ ܒܠܒܟ ܘܛܫܐ ܐܢܘܢ .
Esdras 4 14:9 ܐܢܬ ܓܝܪ ܡܫܬܩܠ ܐܢܬ ܡܢ ܒܢܝ̈ܢܫܐ . ܘܬܗܘܐ ܡܟܝܠ ܥܡ ܒܪܝ . ܘܥܡ ܐܝܠܝܢ ܕܕܡ̇ܝܢ ܠܟ ܥܕܡܐ ܕܢܫܠܡܘܢ ܙܒ̈ܢܐ
Esdras 4 14:10 ܥܠܡܐ ܓܝܪ ܐܘܒܕܗ̇ ܠܥܠܝܡܘܬܗ . ܘܙܒ̈ܢܐ ܩ̣ܪܒܘ ܠܡܐܣܒ
Esdras 4 14:13 ܗܫܐ ܗܟܝܠ ܦܩܕܝܗܝ ܠܒܝܬܟ . ܘܐܪܬܝܗܝ ܠܥܡܟ . ܘܒܝܐܐ ܐܢܘܢ ܠܥܢܘܝ̈ܝܗܘܢ . ܘܣܟܠ ܠܚܟܝܡ̈ܝܗܘܢ . ܘܫܒܘܩ ܡܟܝܠ ܚ̈ܝܐ ܗܠܝܢ ܕܚܒܠܐ
Esdras 4 14:14 ܘܫܪܝ ܡܢܟ ܝܘܩܪܐ ܕܒܢܝ̈ܢܫܐ . ܘܫܕܝ ܡܚܫ̈ܒܬܐ ܕܡܘܬܐ . ܘܫܠܘܚ ܡܟܝܠ ܟܝܢܐ ܕܟܪܝܗܘܬܐ . ܘܣ̣ܝܡ ܠܚܕ ܓܒܐ ܡܚܫ̈ܒܬܐ ܗܠܝܢ ܕܐ̈ܠܨܢ ܠܟ . ܘܐܣܬܪܗܒ ܕܬܫܢܐ ܡܢ ܗܠܝܢ ܙܒ̈ܢܐ
Esdras 4 14:15 ܒܝܫ̣̈ܬܐ ܓܝܪ ܕܚ̣ܙܝܬ ܕܗ̈ܘܝ ܗܫܐ̣ . ܬܘܒ ܡܢ ܒܬܪܟܢ ܕܒܝ̈ܫܢ ܡܢܗܝܢ ܗ̈ܘܝܢ
Esdras 4 14:16 ܟܡܐ ܓܝܪ ܕܒܨܪ ܥܠܡܐ ܡܢ ܣܝܒܘܬܗ̣ . ܗܟܢܐ ܣ̈ܓܝܢ ܒܝܫ̣̈ܬܐ ܥܠ ܥܡܘܪ̈ܝܗ̇ ܕܐܪܥܐ
Esdras 4 14:17 ܝܬܝܪܐܝܬ ܓܝܪ ܡܬܪܚܩ ܫܪܪܐ . ܘܕܓܠܘܬܐ ܡܬܩܪܒܐ . ܡܢ ܟܕܘ ܓܝܪ ܗܐ ܡܣܬܪܗ̣ܒ ܕܢܐܬܐ ܢܫܪܐ ܗ̇ܘ ܕܚܙܝܬ ܒܚܙܘܐ ܀
Esdras 4 14:18 ܘܥܢ̇ܝܬ ܘܐܡ̇ܪܬ . ܐܡ̇ܠܠ ܩܕܡܝܟ ܡܪܝܐ
Esdras 4 14:19 ܗܐ ܐܢܐ ܐܙ̇ܠ ܐܢܐ ܐܝܟ ܕܦܩܕܬܢܝ . ܘܐܪܬܝܘܗܝ ܠܥܡܐ ܗܢܐ ܕܩ̇ܝܡ . ܠܐܝܠܝܢ ܕܝܢ ܕܬܘܒ ܡܬܝܠܕܝܢ̣ . ܡ̣ܢܘ ܡܪܬܐ ܠܗܘܢ
Esdras 4 14:20 ܥܠܡܐ ܓܝܪ ܣ̣ܝܡ ܒܚܫܘܟܐ . ܘܥܡܘܪ̈ܘܗܝ ܕܠܐ ܢܘܗܪܐ
Esdras 4 14:21 ܢܡܘܣܟ ܓܝܪ ܐܝܩܕ ܘܐܢܫ ܠܐ ܝܕ̇ܥ ܥ̇ܒ̈ܕܐ ܕܥܒ̣ܕܬ . ܐܘ ܡܕܡ ܕܥܬܝܕ ܐܢܬ ܕܬܥܒܕ
Esdras 4 14:22 ܐܢ ܗܟܝܠ ܐܫܟ̇ܚܬ ܪ̈ܚܡܐ ܩܕܡܝܟ̣ . ܐܪܡܐ ܒܝ ܡܪܝ ܪܘܚܐ ܩܕܝܫܐ . ܘܐܟܬܘܒ ܟܘܠ ܡܕܡ ܕܗ̣ܘܐ ܒܥܠܡܐ . ܡܢ ܪܝܫ . ܟܠ ܕܟܬܝܒ ܗܘܐ ܒܢܡܘܣܟ ܕܢܬܡܨܘܢ ܒ̈ܢܝ ܐܢܫܐ ܢܫܟܚܘܢ ܫܒܝܠܐ . ܘܐܝܠܝܢ ܕܨ̇ܒܝܢ ܕܢܐܚܘܢ̣ ܒܐܚܪܝܬܐ ܢܕܥܘܢ ܐܘܪܚܐ ܀
Esdras 4 14:23 ܘܥ̣ܢܐ ܘܐܡ̣ܪ ܠܝ . ܙܠ ܘܟܢܫܝܗܝ ܠܥܡܟ ܘܐܡ̣ܪ ܠܗܘܢ̣ . ܕܠܐ ܢܒܥܘܢܟ ܐܪܒܥܝܢ ܝܘܡ̈ܝܢ
Esdras 4 14:24 ܐܢܬ ܕܝܢ ܥܬܕ ܠܟ ܠܘܚ̈ܐ ܣܓܝܐ̈ܬܐ . ܘܕܒ̣ܪ ܥܡܟ ܠܣܪܝܐ ܘܠܕܪܝܐ ܘܠܫܠܡܝܐ ܥܡ ܗܠܩܢܐ . ܘܠܫܝܐܝܠ . ܠܗܠܝܢ ܚܡܫܐ ܓܒܪ̈ܝܢ . ܡܛܠ ܕܥܬܝܕܝܢ ܐܢܘܢ ܠܡܟܬܒ ܩܠܝܠܐܝܬ
Esdras 4 14:25 ܘܬܐܬܐ ܠܗܪܟܐ . ܘܐܢܐ ܐܕܠܩ ܒܠܒܟ ܫܪܓܐ ܕܒܘܝܢܐ . ܗ̇ܘ ܕܠܐ ܢܕܥܟ ܥܕܡܐ ܕܬܫ̇ܠܡ ܡܕܡ ܕܥܬܝܕ ܐܢܬ ܠܡܟܬܒ
Esdras 4 14:26 ܘܡܐ ܕܫܠ̣ܡܬ̣ . ܡܢܗܘܢ ܬܣܝܡ ܒܓܠܝܐ ܘܡܢܗܘܢ ܬܟܣܐ . ܘܬܫܠܡ ܐܢܘܢ ܠܚܟܝܡ̈ܐ . ܠܡܚܪ ܓܝܪ ܒܗܢܐ ܥܕܢܐ ܡܫܪܐ ܐܢܬ ܠܡܟܬܒ ܀
Esdras 4 14:27 ܘܐ̇ܙܠܬ ܐܝܟ ܕܦܩܕܢܝ . ܘܟܢܫܬܗ ܠܟܠܗ ܥܡܐ . ܘܐܡ̇ܪܬ ܠܗܘܢ
Esdras 4 14:28 ܫܡ̣ܥܘ ܐܝܣܪܐܝܠ ܦܬܓ̈ܡܐ ܗܠܝܢ
Esdras 4 14:29 ܬܘ̈ܬܒܐ ܗܘܘ ܐܒܗ̈ܬܢ ܡܢ ܩܕܝܡ ܒܐܪܥܐ ܕܡܨܪܝܢ ܘܐܬܦܪܩܘ ܡܢ ܬܡܢ̇
Esdras 4 14:30 ܘܢܣܒܘ ܢܡܘܣܐ ܕܚ̈ܝܐ . ܘܠܐ ܢܛܪܘܗܝ . ܗ̇ܘ ܕܐܦ ܐܢܬܘܢ ܡܢ ܒܬܪܗܘܢ ܐܥܒܪܬܘܢܝܗܝ
Esdras 4 14:31 ܘܐܬܝܗ̣ܒܬ ܠܟܘܢ ܐܪܥܐ ܠܝܪܬܘܬܐ . ܒܐܪܥܗ̇ ܕܨܗܝܘܢ . ܘܐܢܬܘܢ ܕܝܢ ܘܐܒܗ̈ܝܟܘܢ ܐܥܘܠܬܘܢ . ܘܠܐ ܢܛܪܬܘܢ ܐܘܪ̈ܚܬܐ ܕܦܩܕܟܘܢ ܡܘܫܐ ܥ̣ܒܕܗ ܕܡܪܝܐ
Esdras 4 14:32 ܡܪܝܡܐ ܕܝܢ ܕܐܝܬܘܗܝ ܕܝ̇ܢܐ ܕܩܘܫܬܐ ܐܪܝܡ ܡܢܟܘܢ ܡܕܡ ܕܠܙܒܢܐ ܐܬܝܗܒ ܠܟܘܢ
Esdras 4 14:33 ܘܗܫܐ ܐܢܬܘܢ ܐܝܬܝܟܘܢ ܗܪܟܐ ܒܐܘܠܨܢܐ ܘܐܚ̈ܝܟܘܢ ܠܓܘ ܡܢܟܘܢ ܒܐܪܥܐ ܐܚܪܬܐ
Esdras 4 14:34 ܐܢ ܗܟܝܠ ܬܐܪܬܘܢ ܢܦܫܟܘܢ ܘܬܪܕܘܢ ܠܒܟܘܢ ܒܚܝ̈ܝܟܘܢ ܬܬܢܛܪܘܢ . ܘܡܢ ܒܬܪ ܡܘܬܐ ܢܗܘܘܢ ܥܠܝܟܘܢ ܪ̈ܚ̣ܡܐ
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .