← All works

Peshitta Esdras 4

Peshitta (Syriac Old Testament) · 714 sections

1. Esdras 4 10:48

   ܘܕܐܡܪܬ ܠܟ ܕܒܪܝ ܥܠ ܠܓܘ ܓܢܘܢܗ ܘܡܝܬ̣. ܗܕܐ ܗܝ ܡܦܘܠܬܗ̇ ܘܒܝ̣ܫܬܗ̇ ܕܐܘܪܫܠܡ

2. Esdras 4 10:49

   ܘܕܚ̣ܙܝܬ ܕܡܘܬܗ̇ ܕܐܝ̇ܟܢܐ ܡܬܐܒܠܐ ܥܠ ܒ̈ܢܝܗ̇. ܘܐܢܬ ܫ̣ܪܝܬ ܠܡܒܝܐܘܬܗ̇ ܥܠ ܡܕܡ ܕܓܕܫܗ̇ ܀

3. Esdras 4 10:50

   ܘܗܫܐ ܚ̣ܙܐ ܡܪܝܡܐ ܕܡܢ ܟܠܗ̇ ܢܦܫܟ ܡܥܩ ܐܢܬ. ܘܡܢ ܟܘܠܗ ܠܒܟ ܟܐ̇ܒ ܠܟ ܥܠܝܗ̇. ܘܚܘܝܟ ܢܘܗܪܐ ܕܬܫܒܘܚܬܐ ܘܫܘܦܪܗ̇ ܕܝܐܝܘܬܗ̇

4. Esdras 4 10:51

   ܡܛܠ ܗܢܐ ܐܡ̇ܪܬ ܠܟ ܕܬܩܘܐ ܠܝ ܒܦܩܥܬܐ. ܐܝ̇ܟܐ ܕܒܝܬܐ ܠܐ ܐܬܒܢܝ

5. Esdras 4 10:52

   ܝܕ̇ܥ ܗ̇ܘܝܬ ܓܝܪ ܕܥܬܝܕ ܗܘܐ ܡܪܝܡܐ ܕܢܚܘܐ ܠܟ ܗܠܝܢ ܟܠܗܝܢ

6. Esdras 4 10:53

   ܡܛܠ ܗܢܐ ܐܡ̇ܪܬ ܠܟ ܕܬܐܬܐ ܠܐܬܪܐ ܐܝ̇ܟܐ ܕܠܝܬ ܫܬܐܣܬܐ ܕܒܢܝܢܐ

7. Esdras 4 10:54

   ܠܐ ܓܝܪ ܡܫܟܚ ܗܘܐ ܥܒ̇ܕܐ ܕܒܪܢܫܐ ܕܢܩܘܐ ܒܐܬܪܐ ܐܝ̇ܟܐ ܕܥܬܝܕܐ ܗܘܬ ܡܕܝܢܬܐ ܕܡܪܝܡܐ ܕܬܬܚܙܐ ܀

8. Esdras 4 10:55

   ܐܢܬ ܕܝܢ ܠܐ ܬܕܚܠ. ܘܠܐ ܢܬܬܙܝܥ ܠܒܟ. ܐܠܐ ܥܘܠ ܘܚܙܝ ܢܘܗܪܐ ܕܬܫܒܘܚܬܗ̇ ܘܪܒܘܬܗ ܕܒܢܝܢܗ̇ ܐܝܟ ܡܐ ܕܣ̇ܦܩܐ ܚܙܬܐ ܕܥܝ̈ܢܝܟ ܕܬܚܙܐ

9. Esdras 4 10:56

   ܘܡܢ ܒܬܪ ܗܠܝܢ ܬܫܡܥ ܐܝܟ ܡܐ ܕܣ̇ܦܩ ܫܡܥܐ ܕܐܕ̈ܢܝܟ ܕܬܫܡܥ

10. Esdras 4 10:57

    ܐܢܬ ܓܝܪ ܗ̣ܘܝܬ ܛܘܒܢܐ ܝܬܝܪ ܡܢ ܣܓ̈ܝܐܐ. ܘܐܫܬܡ̣ܗܬ ܠܘܬ ܡܪܝܡܐ ܐܝܟ ܙܥܘܪ̈ܐ

11. Esdras 4 10:58

    ܠܠܝܐ ܕܝܢ ܕܡܚܪ ܬܩܘܐ ܗܪܟܐ

12. Esdras 4 10:59

    ܘܢܚܘܐ ܠܟ ܡܪܝܡܐ ܚܙܘܐ ܕܓ̈ܠܝܢܐ. ܗܠܝܢ ܕܥ̇ܒܕ ܡܪܝܡܐ ܠܥܡܘܪ̈ܝܗ̇ ܕܐܪܥܐ ܒܝܘܡ̈ܬܐ ܐܚܪ̈ܝܐ

13. Esdras 4 10:60

    ܘܕܡ̇ܟܬ ܬܡܢ ܠܠܝܐ ܐܚܪܢܐ ܐܝܟ ܕܦܩܕܢܝ

14. Esdras 4 11:1

    ܘܗ̣ܘܐ ܒܠܠܝܐ ܬܢܝܢܐ ܚ̇ܙܝܬ ܚܙܘܐ. ܘܗܐ ܣ̇ܠܩ ܗܘܐ ܡܢ ܝܡܐ ܢܫܪܐ ܕܪܒ ܒܪܒܘܬܗ ܣ̇ܓܝ. ܘܐܝܬ ܗܘܘ ܠܗ ܬܪܥܣܪ ܓ̈ܦܝܢ ܘܬܠܬܐ ܪ̈ܝܫܝܢ

15. Esdras 4 11:2

    ܘܚܙ̇ܝܬ ܘܗܐ ܡܬ̣ܚ ܓܦ̈ܘܗܝ ܒܟܠܗ̇ ܐܪܥܐ. ܘܟܘܠܗܝܢ ܪ̈ܘܚܐ ܕܫܡܝܐ ܠܘܬܗ ܢܫܒ̈ܢ ܗ̈ܘܝ. ܘܥܢ̈ܢܐ ܠܘܬܗ ܡ̈ܬܟܢܫܢ ܗ̈ܘܝ

16. Esdras 4 11:3

    ܘܚ̇ܙܝܬ ܡܢ ܓܦ̈ܘܗܝ ܕܡܬܝܠܕܝܢ ܗܘܘ ܓ̈ܦܐ ܕܩܕܩ̈ܐ ܘܩܛܝܢ̈ܐ ܘܙܥܘܪ̈ܐ

17. Esdras 4 11:4

    ܘܪ̈ܝܫܘܗܝ ܕܝܢ ܫ̣ܠܝܢ ܗܘܘ. ܪܝܫܐ ܕܝܢ ܡܨܥܝܐ ܪܒ ܗܘܐ ܡܢ ܗܠܝܢ ܐܚܪ̈ܢܐ. ܒܪܡ ܕܝܢ ܐܦ ܗ̣ܘ ܫ̣ܠܐ ܗܘܐ ܥܡܗܘܢ

18. Esdras 4 11:5

    ܘܚܙ̇ܝܬ ܘܗܐ ܢܫܪܐ ܦ̣ܩܕ ܠܓܦܘ̈ܗܝ ܐܝܟ ܕܢܫܬܠܛܘܢ ܥܠ ܟܠܗ̇ ܐܪܥܐ ܘܥܠ ܥ̇ܡܘܪ̈ܝܗ̇

19. Esdras 4 11:6

    ܘܚ̇ܙܝܬ ܕܐܝ̇ܟܢ ܡܫܬܥܒܕ ܗܘܐ ܠܗ ܟܠܡܕܡ ܕܬܚܝܬ ܫܡܝܐ. ܘܡܕܡ ܠܐ ܥ̇ܨܐ ܗܘܐ ܠܗ ܡܢ ܒܪ̣̈ܝܬܐ ܕܥܠ ܐܪܥܐ

20. Esdras 4 11:7

    ܘܚ̇ܙܝܬ ܘܗܐ ܩܡ ܢܫܪܐ ܥܠ ܛܦܪ̈ܘܗܝ. ܘܫܒ̣ܩ ܩܠܐ ܠܓܦܘ̈ܗܝ ܘܐܡ̣ܪ ܠܗܘܢ. ܙܠܘ ܐܫܬܠܛܘ ܥܠ ܟܠܗ̇ ܐܪܥܐ. ܗܫܐ ܕܝܢ ܫܠܘ

21. Esdras 4 11:8

    ܘܠܐ ܬܨܒܘܢ ܕܬܬܥܝܪܘܢ ܟܠܟܘܢ ܐܟܚܕܐ. ܐܠܐ ܕܡܟܘ ܟܠ ܚܕ ܚܕ ܡܢܟܘܢ ܒܕܘܟܬܗ. ܘܒܙܒܢ ܙܒܢ ܬܬܥܝܪܘܢ

22. Esdras 4 11:9

    ܪ̈ܝܫܐ ܕܝܢ ܠܐܚܪܝܬܐ ܢܬܢܛܪܘܢ ܀

23. Esdras 4 11:10

    ܘܚ̇ܙܝܬ ܕܩܠܗ ܠܐ ܢܦ̇ܩ ܗܘܐ ܡܢ ܪ̈ܝܫܘܗܝ. ܐܠܐ ܡܢ ܡܨܥܬ ܦܓܪܗ

24. Esdras 4 11:11

    ܘܡ̇ܢܝܬ ܐܢܘܢ ܠܓܦ̈ܘܗܝ ܙܥܘܪ̈ܐ. ܘܐܦ ܗ̣ܢܘܢ ܗ̇ܘܝܢ ܗܘܘ ܬܡܢܝܐ • ܀

25. Esdras 4 11:12

    ܘܚ̇ܙܝܬ ܘܗܐ ܩܡ ܡܢ ܓܒܐ ܕܝܡܝܢܐ ܓܦܐ ܚܕ. ܘܐܫܬܠܛ ܥܠ ܟܘܠܗ̇ ܐܪܥܐ

26. Esdras 4 11:13

    ܘܚ̇ܙܝܬ ܕܐܬ̣ܐ ܫܘܠܡܗ ܘܐܬܚܒܠ̣. ܐܝܟ ܕܠܐ ܬܬܝܕܥ ܐܦ ܠܐ ܕܘܟܬܗ ܀ ܘܚ̇ܙܝܬ ܘܗܐ ܩܡ ܓܦܐ ܬܢܝܢܐ. ܘܐܫܬܠܛ ܐܦ ܗ̣ܘ ܒܟܠܗ̇ ܐܪܥܐ̣. ܙܒܢܐ ܣܓܝܐܐ

27. Esdras 4 11:14

    ܘܗ̣ܘܐ ܕܟܕ ܐܫܬܠܛ ܐܬ̣ܐ ܫܘܠܡܗ ܕܢܬܚܒܠ ܐܝܟ ܩܕܡܝܐ ܀

28. Esdras 4 11:15

    ܘܗܐ ܩܠܐ ܐܫܬܡܥ ܠܗ ܕܐܡ̇ܪ

29. Esdras 4 11:16

    ܫܡ̣ܥ. ܐܢܬ ܗܘ ܕܟܘܠܗ ܙܒܢܐ ܗܢܐ ܐܚܕܬܗ̇ ܠܐܪܥܐ. ܗܕܐ ܣܒܪܬܐ ܐܣܬܒܪ. ܡܢ ܩܕܡ ܕܬܬܚܒܠ

30. Esdras 4 11:17

    ܠܐ ܐܢܫ ܡܢ ܐܝܠܝܢ ܕܒܬܪܟ ܢܐܚܘܕ ܐܝܟ ܗܢܐ ܟܠܗ ܙܒܢܐ ܐܦ ܠܐ ܐܝܟ ܦܠܓܗ

31. Esdras 4 11:18

    ܘܚ̇ܙܝܬ ܘܗܐ ܩܡ̇ ܓܦܐ ܬܠܝܬܝܐ ܘܐܫܬܠܛ ܐܦ ܗ̣ܘ ܐܝܟ ܚܒܪ̈ܘܗܝ ܩܕܡ̈ܝܐ ܥܠ ܟܠܗ̇ ܐܪܥܐ. ܘܐܬܚܒܠ ܐܦ ܗ̣ܘ ܐܝܟ ܩܕܡ̈ܝܐ

32. Esdras 4 11:19

    ܘܗܟܢܐ ܓ̇ܕܫ ܗܘܐ ܠܟܠܗܘܢ ܓ̈ܦܐ ܕܚܕ ܚܕ ܡܢܗܘܢ ܢܫܬܠܛܘܢ ܘܬܘܒ ܢܬܚܒܠܘܢ ܀

33. Esdras 4 11:20

    ܘܚ̇ܙܝܬ ܘܗܐ ܒܙܒܢ ܓ̈ܦܐ ܙܥܘܪ̈ܐ ܐܦ ܗ̣ܢܘܢ ܩܡ̇ܘ ܡܢ ܓܒܐ ܕܝܡܝܢܐ. ܐܝܟ ܕܢܐܚܕܘܢܗ̇ ܠܐܪܥܐ. ܘܡܢܗܘܢ ܐܚ̇ܕܝܢ ܗܘܘ. ܐܠܐ ܕܝܢ ܒܥܓܠ ܡܬܚܒܠܝܢ ܗܘܘ

34. Esdras 4 11:21

    ܘܡܢܗܘܢ ܩܝ̇ܡܝܢ ܗܘܘ ܐܠܐ ܠܐ ܐܚܝܕܝܢ ܗܘܘ ܫܘܠܛܢܐ

35. Esdras 4 11:22

    ܘܚ̇ܙܝܬ ܡܢ ܒܬܪ ܗܠܝ̣ܢ. ܘܬܪܥܣܪ ܓܦ̈ܘܗܝ ܐܬܚܒܠܘ ܗܘܘ. ܘܬܪܝܢ ܡܢ ܓ̈ܦܐ ܙܥܘܪ̈ܐ

36. Esdras 4 11:23

    ܘܠܐ ܐܫܬܚܪ ܡܕܡ ܡܢ ܦܓܪܗ ܕܢܫܪܐ. ܐܠܐ ܒܠܚܘܕ ܬܠܬܝܗܘܢ ܪ̈ܫܐ ܕܫ̣ܠܝܢ ܗܘܘ. ܘܫܬܐ ܓ̈ܦܐ ܙܥܘܪ̈ܐ

37. Esdras 4 11:24

    ܘܚ̇ܙܝܬ ܘܗܐ ܡܢܗܘܢ ܡܢ ܓܦ̈ܐ ܙܥܘܪ̈ܐ ܐܬܦܪܫܘ ܬܪ̈ܝܢ ܓ̈ܦܐ. ܘܐܙܠܘ ܘܩ̇ܡܘ ܬܚܝܬ ܪܝܫܐ ܕܒܓܒܐ ܕܝܡܝܢܐ. ܐܪܒܥܐ ܕܝܢ ܩܘܝܘ ܒܕܘܟܬܗܘܢ

38. Esdras 4 11:25

    ܘܚ̇ܙܝܬ ܘܗܐ ܗ̇ܢܘܢ ܐܪܒܥܐ ܓ̈ܦܐ ܙܥܘܪ̈ܐ ܡܬܚܫܒܝܢ ܗܘܘ ܕܢܩܘܡܘܢ ܘܢܐܚܕܘܢ ܫܘܠܛܢܐ

39. Esdras 4 11:26

    ܘܚ̇ܙܝܬ ܘܗܐ ܩܡ ܚܕ. ܐܠܐ ܒܥܓܠ ܐܬܚܒܠ

40. Esdras 4 11:27

    ܘܬܘܒ ܬܢܝܢܐ. ܐܠܐ ܐܦ ܗ̣ܘ ܐܬܚܒܠ ܒܥܓܠ ܝܬܝܪ ܡܢ ܩܕܡܝܐ

41. Esdras 4 11:28

    ܘܚ̇ܙܝܬ ܘܗܐ ܗ̇ܢܘܢ ܬܪܝܢ ܕܡܢܗܘܢ ܐܫܬܚܪܘ. ܡܬܚܫܒܝܢ ܗܘܘ ܡܢܗܘܢ ܐܦ ܗ̣ܢܘܢ ܕܢܐܚܕܘܢ ܪܝܫܢܘܬܐ

42. Esdras 4 11:29

    ܘܥܕ ܗ̣ܢܘܢ ܡܬܚܫܒܝܢ ܗܘܘ ܕܢܫܬܠܛܘܢ ܥܠ ܐܪܥܐ. ܚܙ̇ܝܬ ܘܗܐ ܚܕ ܡܢ ܪ̈ܝܫܐ ܕܫ̣ܠܝܢ ܗܘܘ. ܡܨܥܝܐ ܐܬܬܥܝܪ. ܗ̣ܘ ܕܝܢ ܪܒ ܗܘܐ ܡܢ ܬܪ̈ܝܗܘܢ ܪ̈ܝܫܐ ܐܚܪ̈ܢܐ.

43. Esdras 4 11:30

    ܠܬܪ̈ܝܗܘܢ ܥܡܗ

44. Esdras 4 11:31

    ܘܥܡ ܬܪܝܗܘܢ ܕܥܡܗ ܐܬܗܦܟ . ܘܐܟ̣ܠ ܐܢܘܢ ܠܬܪ̈ܝܗܘܢ ܓ̈ܦܐ ܙܥܘܪ̈ܐ ܗܠܝܢ ܕܡܬܚܫܒܝܢ ܗܘܘ ܕܢܫܬܠܛܘܢ

45. Esdras 4 11:32

    ܗ̣ܘ ܕܝܢ ܗ̇ܘ ܪܝܫܐ ܐܚܕܗ̇ ܠܟܠܗ̇ ܐܪܥܐ. ܘܡܟܟ ܐܢܘܢ ܠܥܡܘܪ̈ܝܗ̇ ܒܥܡܠܐ ܣܓܝܐܐ. ܘܐܬܚܝܠ ܥܠ ܬܒܝܠ ܝܬܝܪ ܡܢ ܟܠܗܘܢ ܓ̈ܦܐ ܕܗܘܘ

46. Esdras 4 11:33

    ܘܚ̇ܙܝܬ ܡܢ ܒܬܪ ܗܠܝܢ. ܘܗܐ ܡܢ ܫܠܝܐ ܪܝܫܐ ܗ̇ܘ ܡܨܥܝܐ ܐܬܚܒܠ ܐܦ ܗ̣ܘ ܐܝܟ ܕܐܦ ܓܦ̈ܐ

47. Esdras 4 11:34

    ܐܫܬܚܪܘ ܕܝܢ ܬܪܝܢ ܪ̈ܝܫܐ. ܐܦ ܗܢ̣ܘܢ ܐܫܬܠܛܘ ܥܠ ܟܘܠܗ̇ ܐܪܥܐ ܘܥܠ ܥܡ̈ܘܪܝܗ̇

48. Esdras 4 11:35

    ܘܚ̇ܙܝܬ ܘܗܐ ܐܟ̣ܠ ܪܝܫܐ ܕܒܓܒܐ ܕܝܡܝܢܐ ܠܗ̇ܘ ܕܒܣܡܠܐ ܀

49. Esdras 4 11:36

    ܘܫܡ̇ܥܬ ܩܠܐ ܕܐܡ̇ܪ ܠܝ. ܚܘܪ ܠܩܘܒܠܟ ܥܙܪܐ. ܘܚܙܝ ܡܢܐ ܚ̇ܙܐ ܐܢܬ ܫܘܠܡܐ.

50. Esdras 4 11:37

    ܘܚ̇ܙܝܬ ܘܗܐ ܐܝܟ ܐܪܝܐ ܕܐܬܥܝܪ ܡܢ ܥܒܐ ܕܓ̇ܥܐ ܘܢܗ̇ܡ. ܘܫܡ̇ܥܬ ܕܐܝ̇ܟܢܐ ܫܒ̣ܩ ܩܠܐ ܕܒܪܢܫܐ ܠܘܬ ܢܫܪܐ. ܘܡܠܠ ܘܐܡ̣ܪ ܠܗ

51. Esdras 4 11:38

    ܫܡ̣ܥ ܐܢܬ ܢܫܪܐ ܘܐ̇ܡܪ ܠܟ. ܐܡ̇ܪ ܠܟ ܡܪܝܡܐ

52. Esdras 4 11:39

    ܠܐ ܗܘܐ ܐܢܬ ܗܘ ܕܐܫܬ̣ܚܪܬ ܡܢ ܐܪ̈ܒܥܬܝܗܝܢ ܚܝ̈ܘܬܐ ܗܠܝܢ ܕܥܒ̣ܕܬ ܗ̣ܘܝܬ ܕܢܫܬܠܛܢ ܥܠ ܥܠܡܝ. ܘܕܒܐ̈ܝܕܝܗܝܢ ܢܐܬܐ ܫܘܠܡܗܘܢ ܕܙܒ̈ܢܐ

53. Esdras 4 11:40

    ܐܢܬ ܕܝܢ ܪܒܝܥܝܐ ܐ̣ܬܝܬ. ܘܙܟ̣ܝܬ ܠܟܠܗܝܢ ܚܝܘ̈ܬܐ ܕܥ̣ܒܪ. ܘܐܬܚ̣ܝܠܬ ܥܠ ܥܠܡܐ ܒܥܡ̈ܠܐ ܣܓܝܐ̈ܐ. ܘܥܠ ܟܠܗ̇ ܬܒܝܠ ܒܩܛܝܪܐ ܡܪܝܪܐ. ܘܒܢܟܠܐ ܥܡ̣ܪܬ ܒܬܒܝܠ ܙܒܢܐ ܣܓܝܐܐ

54. Esdras 4 11:41

    ܘܕܢܬܗ̇ ܠܐܪܥܐ ܕܠܐ ܒܩܘܫܬܐ

55. Esdras 4 11:42

    ܒܙܬ ܓܝܪ ܘܚܛܦ̣ܬ ܠܥܢ̈ܘܝܐ ܘܫܪܝܪ̈ܐ. ܘܐܒܐ̣ܫܬ ܠܡܟ̈ܝܟܐ. ܘܣܢܝܬ ܠܬܪ̈ܝܨܐ. ܘܪܚ̣ܡܬ ܠܕܓ̈ܠܐ. ܘܣܚ̣ܦܬ ܚܣ̈ܢܐ ܕܐܝܠܝܢ ܕܟܗܝܢܝܢ. ܘܡ̣ܟܟܬ ܫܘܪ̈ܐ ܕܐܝܠܝܢ ܕܠܐ ܐܗܪܘܟ

56. Esdras 4 11:43

    ܘܣ̣ܠܩ ܨܥܪܟ ܠܘܬ ܡܪܝܡܐ. ܘܠܘܬ ܚܝܠܬܢܐ

57. Esdras 4 11:44

    ܘܚܪ ܡܪܝܡܐ ܒܙܒ̈ܢܘܗܝ ܘܗܐ ܫܠ̣ܡܘ. ܘܥܠܡ̈ܘܗܝ ܐܬܡܠܝܘ

58. Esdras 4 11:45

    ܡܛܠ ܗܢܐ ܡܬܚܒܠܘ ܬܬܚܒܠ ܐܢܬ ܢܫܪܐ. ܘܓ̈ܦܝܟ ܡܪ̈ܝܡܐ. ܘܓ̈ܦܝܟ ܙܥܘܪ̈ܐ ܘܒܝ̣̈ܫܐ. ܘܪ̈ܝܫܝܟ ܡܪ̈ܝܪܐ ܘܛܦܪ̈ܝܟ ܒܝ̣̈ܫܬܐ. ܘܟܘܠܗ ܦܓܪܟ ܣ̣ܢܝܐ ܘܒܝ̣ܫܐ

59. Esdras 4 11:46

    ܡܛܠ ܕܬܬܢܝܚ ܘܬܬܩܠܠ ܟܠܗ̇ ܐܪܥܐ. ܡܐ ܕܝܢ ܕܐܬ̣ܦܨܝܬ ܡܢ ܩܛܝܪܐ ܕܡܣܟܝܐ ܠܕܝ̣ܢܐ ܘܠܪ̈ܚ̣ܡܘܗܝ ܕܥ̇ܒܘܕܗ̇ ܀

60. Esdras 4 12:1

    ܘܗ̣ܘܐ ܕܟܕ ܡܠܠ ܗܘܐ ܐܪܝܐ ܡ̈ܠܐ ܗܠܝܢ ܠܘܬ ܢܫܪܐ̣. ܚܙܝ̇ܬ

61. Esdras 4 12:2

    ܘܗܐ ܪܝܫܐ ܗ̇ܘ ܕܐܫܬܚܪ ܐܬܚܒܠ ܡܢ ܫܠܝܐ. ܘܗ̇ܝܕܝܢ ܗ̇ܢܘܢ ܬܪܝܢ ܓܦ̈ܐ ܕܐܙ̣ܠܘ ܠܘܬܗ̣. ܩܡ̇ܘ ܐܝܟ ܕܢܫܬܠܛܘܢ. ܘܠܪ̈ܝܫܢܘܬܗܘܢ ܢܗܘܐ ܫܘܠܡܐ. ܘܫܓܘܫܝܐ ܬܗܘܐ ܡܠܝ̣ܐ

62. Esdras 4 12:3

    ܘܚ̇ܙܝܬ ܕܐܦ ܗ̣ܢܘܢ ܐܬܚܒܠܘ. ܘܟܠܗ ܦܓܪܗ ܕܢܫܪܐ ܝܩ̇ܕ ܗܘܐ. ܐܪܥܐ ܕܝܢ ܬܡܝܗܐ ܗܘܬ ܣ̇ܓܝ. ܐܢܐ ܕܝܢ ܡܢ ܣܘܓܐܐ ܕܙܘܥܬܐ ܘܡܢ ܕܚܠܬܐ ܪܒܬܐ ܐܬ̇ܬܥܝܪܬ. ܘܐܡ̇ܪܬ ܠܪܘܚܝ

63. Esdras 4 12:4

    ܕܐܢܬܝ ܥܒ̣ܕܬܝ ܠܝ ܗܠܝܢ ܟܠܗܝܢ̇ ܡܛܠ ܕܡܥܩܒܐ ܐܢܬ ܥܠ ܐܘܪ̈ܚܬܗ ܕܡܪܝܡܐ

64. Esdras 4 12:5

    ܘܗܐ ܡܫܪܝ ܐܢܐ ܒܢܦܫܝ. ܘܪܘܚܝ ܒܨܪܬ ܣ̇ܓܝ. ܘܠܐ ܐܫܬܚܪ ܒܝ ܚܝܠܐ ܐܦܠܐ ܩܠܝܠ ܡܢ ܕܚܠܬܐ ܣܓܝܐܬܐ ܕܕܚ̇ܠܬ ܒܗܢܐ ܠܠܝܐ ܀

65. Esdras 4 12:6

    ܘܗܫܐ ܐܒ̇ܥܐ ܡܢ ܡܪܝܡܐ ܘܢܚܝܠܢܝ ܥܕܡܐ ܠܚܪܬܐ

66. Esdras 4 12:7

    ܘܐܡ̇ܪܬ. ܐܘ ܡܪܝܐ ܡܪܝ. ܐܢ ܐܫܟ̇ܚܬ ܪ̈ܚ̣ܡܐ ܒܥ̈ܝܢܝܟ ܘܐܢ ܫܪܝܪܐܝܬ ܐܝܬ ܠܝ ܛܘܒܐ ܠܘܬܟ ܝܬܝܪ ܡܢ ܣܓ̈ܝܐܐ ܘܐܢ ܒܩܘܫܬܐ ܣܠ̣ܩܬ ܒܥܘܬܝ ܩܕܡ ܪܒܘܬܐ ܕܦܪܨܘܦܟ̣

67. Esdras 4 12:8

    ܚܝܠܝܢܝ ܘܐܘܕܥܝܢܝ ܠܝ ܠܥ̣ܒܕܟ ܦܘܫܩܗ ܘܦܘܪܫܢܗ ܕܚܙܘܐ ܗܢܐ ܕܚ̇ܙܝܬ. ܡܛܠ ܕܡܠܝܐܝܬ ܬܒܝܐܗ̇ ܠܢܦܫܝ

68. Esdras 4 12:9

    ܠܘ ܓܝܪ ܕܫ̇ܘܐ ܐܢܐ̇. ܚܫܒܬܢܝ ܕܬܓܠܐ ܠܝ ܫܘܠܡܗܘܢ ܕܙܒ̈ܢܐ. ܘܚܪܬܗܘܢ ܕܥܕ̈ܢܐ • ܀ ܘܥܢ̣ܐ ܘܐܡ̣ܪ ܠܝ

69. Esdras 4 12:10

    ܗܢܘ ܦܘܫܩܗ ܕܚܙܘܐ ܕܚ̣ܙܝܬ

70. Esdras 4 12:11

    ܢܫܪܐ ܕܚܙ̣ܝܬ ܕܣܠ̣ܩ ܡܢ ܝܡܐ̣. ܗܕܐ ܗܝ ܡ̇ܠܟܘܬܐ ܪܒܝܥܝܬܐ ܗ̇ܝ ܕܐܬ̣ܚܙܝܬ ܒܚܙܘܐ ܠܐܚܘܟ ܕܢܝܐܝܠ

71. Esdras 4 12:12

    ܐܠܐ ܠܐ ܐܬܦܫ̣ܩܬ ܠܗ ܐܝܟ ܕܡܦܫܩ ܐܢܐ ܠܟ ܗܫܐ. ܐܘ̣ ܐܝܟ ܕܦܫ̇ܩܬ ܠܟ • ܀ •

72. Esdras 4 12:13

    ܗܐ ܝܘܡ̈ܬܐ ܐܬ̇ܝܢ. ܘܬܩܘܡ ܡܠܟܘܬܐ ܥܠ ܐܪܥܐ. ܘܬܗܘܐ ܕܚܝܠܐ ܡܢ ܟܠܗܝܢ ܡܠܟܘ̈ܬܐ ܕܗ̈ܘܝ ܡܢ ܩܕܡܝܗ̇

73. Esdras 4 12:14

    ܘܢܡܠܟܘܢ ܒܗ̇ ܬܪܥܣܪ ܡ̈ܠܟ̇ܝܢ ܚܕ ܒܬܪ ܚܕ

74. Esdras 4 12:15

    ܬܢܝܢܐ ܕܝܢ ܟܕ ܢܡܠܟ̣. ܗ̣ܘ ܢܐܚܘܕ ܙܒܢܐ ܝܬܝܪ ܡܢ ܗ̇ܢܘܢ ܬܪܥܣܪ

75. Esdras 4 12:16

    ܗܢܘ ܦܘܫܩܐ ܕܬܪܥܣܪ ܓ̈ܦܐ ܕܚ̣ܙܝܬ

76. Esdras 4 12:17

    ܘܡܛܠ ܕܚ̣ܙܝܬ ܩܠܐ ܕܡܡܠܠ ܗܘܐ ܘܠܐ ܢܦ̇ܩ ܗܘܐ ܡܢ ܪܝܫܗ ܕܢܫܪܐ ܐܠܐ ܡܢ ܡܨܥܬܗ ܕܦܓܪܗ̣

77. Esdras 4 12:18

    ܗܕܐ ܗܝ ܡܠܬܐ. ܡܛܠ ܕܒܝܢܬ ܙܒܢܗ̇ ܕܡܠܟܘܬܐ ܗ̇ܝ̣ ܗ̈ܘܝܢ ܦܠܓܘ̈ܬܐ ܣܓܝܐ̈ܬܐ. ܘܩܝܢܕܘܢܘܣ ܬܥܒܕ ܕܬܦ̣ܠ. ܘܠܐ ܬܦ̣ܠ ܗܝ̇ܕܝܢ. ܐܠܐ ܕܬܘܒ ܬܬܩܢ ܠܪܝܫܢܘܬܗ̇ ܩܕܡܝܬܐ

78. Esdras 4 12:19

    ܘܡܛܠ ܕܚ̣ܙܝܬ ܓ̈ܦܐ ܙܥܘܪ̈ܐ ܬܡܢܝܐ ܕܝܥܘ ܬܚܝܬ ܓܦܘ̈ܗܝ̣

79. Esdras 4 12:20

    ܗܕܐ ܗܝ ܡܠܬܐ. ܢܩܘܡܘܢ ܒܗ̇ ܓܝܪ ܬܡܢܝܐ ܡ̈ܠܟ̇ܝܢ̇. ܗܠܝܢ ܕܗ̇ܘܝܢ ܙܒܢܝ̈ܗܘܢ ܩܠܝܠܝܢ. ܘܥܕܢ̈ܝܗܘܢ ܡܣܪܗܒܝܢ. ܘܬܪܝܢ ܡܢܗܘܢ ܢܐܒܕܘܢ

80. Esdras 4 12:21

    ܟܕ ܢܡܛܐ ܙܒܢܐ ܕܢܦܠܓ. ܘܐܪܒܥܐ ܢܬܢܛܪܘܢ ܠܙܒܢܐ. ܕܟܕ ܢܡܛܐ ܙܒܢܗ ܕܢܫܠܡ. ܬܪܝܢ ܕܝܢ ܢܬܢܛܪܘܢ ܠܫܘܠܡܐ

81. Esdras 4 12:22

    ܘܡܛܠ ܕܚ̣ܙܝܬ ܒܗ ܬܠܬܐ ܪ̈ܝܫܝܢ ܕܫ̣ܠܝܢ̣

82. Esdras 4 12:23

    ܗܕܐ ܗܝ ܡܠܬܐ. ܒܚܪܬܗܘܢ ܕܙܒ̈ܢܐ ܢܩܝܡ ܡܪܝܡܐ ܬܠܬܐ ܡ̈ܠܟ̇ܝܢ. ܘܢܚܕܬܘܢ ܒܗ̇ ܣܓܝܐ̈ܬܐ. ܘܢܫܚܩܘܢܝܗ̇ ܠܐܪܥܐ

83. Esdras 4 12:24

    ܘܠܥܡܘܪ̈ܝܗ̇ ܒܥܡܠܐ ܣܓܝܐܐ. ܝܬܝܪ ܡܢ ܟܠܗܘܢ ܐܝܠܝܢ ܕܗܘܘ ܡܢ ܩܕܡܝܗܘܢ. ܡܛܠ ܗܢܐ ܗ̣ܢܘܢ ܐܬܩܪܝܘ ܪ̈ܝܫܘܗܝ ܕܢܫܪܐ

84. Esdras 4 12:25

    ܗ̣ܢܘܢ ܐܢܘܢ ܓܝܪ ܕܡܚܕܬܝܢ ܪܘܫܥܗ. ܘܗ̣ܢܘܢ ܡܫܠܡܝܢ ܠܗ ܠܚܪܬܗ

85. Esdras 4 12:26

    ܘܡܛܠ ܕܚ̣ܙܝܬ ܠܗ̇ܘ ܚܕ ܪܫܐ ܪܒܐ ܕܐܬܚܒܠ̣. ܡܛܠ ܕܚܕ ܡܢܗܘܢ ܢܡܘܬ ܒܠܚܘܕ ܥܠ ܥܪܣܗ. ܐܦ ܗ̣ܘ ܕܝܢ ܟܕ ܡܫܬܢܩ

86. Esdras 4 12:27

    ܗ̇ܢܘܢ ܕܝܢ ܬܪܝܢ ܕܐܫܬܚܪܘ̣ ܚܪܒܐ ܬܐܟܘܠ ܐܢܘܢ

87. Esdras 4 12:28

    ܡܛܠ ܕܚܪܒܗ ܕܚܕ ܬܐܟܘܠ ܠܚܒܪܗ . ܐܠܐ ܕܝܢ ܐܦ ܗ̣ܘ ܒܚܪܬܐ ܒܚܪܒܐ ܢ̇ܦܠ

88. Esdras 4 12:29

    ܘܡܛܠ ܕܚܙ̣ܝܬ ܓ̈ܦܐ ܬܪܝܢ ܕܐܙܠܘ ܠܘܬ ܪܝܫܐ ܕܒܓܒܐ ܕܝܡܝܢܐ

89. Esdras 4 12:30

    ܗܕܐ ܗܝ ܡܠܬܐ. ܗܠܝܢ ܐܢܘܢ ܕܦ̣ܪܫ ܡܪܝܡܐ ܠܫܘܠܡܗ. ܘܠܡܠܟܘܬܗܘܢ ܢܗܘܐ ܫܘܠܡܐ. ܘܫܓܘܫܝܐ ܬܗܘܐ ܡܠ̣ܝܐ

90. Esdras 4 12:31

    ܐܝܟ ܕܚ̣ܙܝܬ • ܀ ܘܕܚܙܝܬ ܐܪܝܐ ܕܐܬܬܥܝܪ ܡܢ ܥܒܐ. ܕ̇ܓܥܐ ܘܢܗ̇ܡ ܘܡܡܠܠ ܠܘܬ ܢܫܪܐ. ܘܡܟܣ ܗܘܐ ܠܗ ܥܠ ܥ̣ܘܠܗ. ܘܟܠܗܝܢ ܡ̈ܠܐ ܐܝܟ ܕܫܡ̣ܥܬ

91. Esdras 4 12:32

    ܗ̣ܘܝܘ ܡܫܝܚܐ̇. ܗ̇ܘ ܕܢܛ̇ܪ ܡܪܝܡܐ ܠܫܘܠܡܗܘܢ ܕܝܘܡ̈ܬܐ. ܗ̇ܘ ܕܕܢ̇ܚ ܡܢ ܙܪܥܗ ܕܕܘܝܕ. ܘܢܐܬܐ ܘܢܡܠܠ ܥܡܗܘܢ. ܘܢܟܣ ܐܢܘܢ ܥܠ ܪܘܫܥܗܘܢ. ܘܥܠ ܡܒܐܫܢܘܬܗܘܢ ܢܟܘܢ ܐܢܘܢ. ܘܢܣܕܘܪ ܩܕܡܝܗܘܢ ܥ̣ܘܠܗܘܢ

92. Esdras 4 12:33

    ܢܩܝܡ ܐܢܘܢ ܓܝܪ ܩܕܡܝ ܒܕܝ̣ܢܗܘܢ ܟܕ ܚ̈ܝܝܢ. ܘܢܗܘܐ ܟܕ ܢܟܣ ܐܢܘܢ ܗ̇ܝܕܝܢ ܢܚ̇ܒܠ ܐܢܘܢ

93. Esdras 4 12:34

    ܠܥܡܝ ܕܝܢ ܕܐܫܬܚܪ ܢܦܪܘܩ ܒ̣ܪ̈ܚܡܐ ܠܐܝܠܝܢ ܕܩ̣ܘܝܘ ܒܬܚ̈ܘܡܝ. ܘܢܒܣܡ ܐܢܘܢ ܥܕܡܐ ܕܢܐܬܐ ܫܘܠܡܐ ܕܝܘܡܗ ܕܕܝ̣ܢܐ ܥܠ ܗ̇ܘ ܕܡ̇ܠܠܬ ܥܡܟ ܡܢ ܩܕܝܡ̣

94. Esdras 4 12:35

    ܗܢܘ ܚܙܘܐ ܕܚܙ̣ܝܬ. ܘܗܢܘ ܦܘܫܩܗ

95. Esdras 4 12:36

    ܘܐܢܬ ܗܘ ܒܠܚܘܕܝܟ ܐܫܬܘ̣ܝܬ ܕܬܕܥ ܪܐܙܗ ܕܡܪܝܡܐ

96. Esdras 4 12:37

    ܟܬܘܒ ܗܟܝܠ ܒܣܦܪܐ ܗܠܝܢ ܟܠܗܝܢ ܕܚܙ̣ܝܬ. ܘܣ̣ܝܡ ܐ̈ܢܝܢ ܒܕܘܟܬܐ ܕܟܣܝܐ

97. Esdras 4 12:38

    ܘܐܠܦ ܐ̈ܢܝܢ ܠܚܟܝ̈ܡܘܗܝ ܕܥܡܟ. ܐܝܠܝܢ ܕܝ̣ܕܥܬ ܕܡܫܟܚܝܢ ܠܒܘ̈ܬܗܘܢ ܐܚ̇ܕܝܢ ܠܡܛܪ ܪ̈ܐܙܐ ܗܠܝܢ

98. Esdras 4 12:39

    ܐܢܬ ܕܝܢ ܣܝܒܪ ܗܪܟܐ ܬܘܒ ܫܒܥܐ ܝܘܡ̈ܝܢ ܐܚܪ̈ܢܝܢ. ܡܛܠ ܕܢܬܓܠܐ ܠܟ ܡܕܡ ܕܨ̇ܒܐ ܡܪܝܡܐ ܕܢܓܠܐ ܠܟ

99. Esdras 4 12:40

    ܘܐ̣ܙܠ ܠܗ ܡܢ ܠܘܬܝ ܀ ܘܗ̣ܘܐ ܕܟܕ ܚܙܘ ܥܡܐ ܕܥ̣ܒܪܘ ܫܒܥܐ ܝܘܡ̈ܝܢ ܘܠܐ ܐ̇ܬܝܬ ܠܡܕܝܢܬܐ̣. ܐܬܟܢܫܘ ܟܠܗ ܥܡܐ. ܡܢ ܙܥܘܪܐ̣ ܥܕܡܐ ܠܪܒܐ. ܘܩ̇ܡܘ ܘܐܬܘ ܠܘܬܝ. ܘܥܢܘ ܘܐܡ̇ܪܝܢ ܠܝ

100. Esdras 4 12:41

     ܡܢܐ ܚ̇ܛܝܢܢ ܠܟ. ܐܘ ܡܢܐ ܐܒܫܢܢ ܠܟ̇. ܕܫܒܩܬܢ ܘܝܬ̣ܒܬ ܠܟ ܒܐܬܪܐ ܗܢܐ

← Previous · Next → — showing 501–600 of 714

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.