← All works

Peshitta Esdras 4

Peshitta (Syriac Old Testament) · 714 sections

1. Esdras 4 8:58

   ܘܐܡ̣ܪܘ ܒܠܒܗܘܢ ܕܠܝܬ ܐܠܗܐ. ܟܕ ܡܕܥ ܝܕ̇ܥ̇ܝܢ ܕܡܡܬ ܡܝܬܝܢ

2. Esdras 4 8:59

   ܡܛܠ ܗܢܐ ܐܝܟ ܕܡܣܟܝܢ ܠܟܘܢ ܗܠܝܢ ܕܐܬܐܡܪ ܡܢ ܩܕܝܡ. ܗܟܢܐ ܐܦ ܠܗ̇ܢܘܢ ܨܗܝܐ ܘܬܫܢܝܩܐ ܕܥܬܝܕ. ܠܐ ܓܝܪ ܨܒ̇ܐ ܡܪܝܡܐ ܕܢܐܒܕܘܢ ܒ̈ܢܝ ܐܢܫܐ

3. Esdras 4 8:60

   ܐܠܐ ܗܢ̇ܘܢ ܕܐܬܒܪܝܘ ܨ̇ܥܪܘ ܫܡܗ ܕܥ̇ܒܘܕܗܘܢ. ܘܒܛܝܒܘܬܐ ܟܦܪܘ ܘܠܐ ܐܘܕܝܘ ܠܝ̇. ܕܥܬ̣ܕܬ ܠܗܘܢ ܚ̈ܝܐ

4. Esdras 4 8:61

   ܡܛܠ ܗܢܐ ܕܝܢܝ ܩܪ̣ܒ ܠܗ

5. Esdras 4 8:62

   ܗ̇ܘ ܕܠܐ ܐܘ̇ܕܥܬ ܠܣܓ̈ܝܐܐ. ܐܠܐ ܐܢ ܠܟ ܘܠܙܥܘܪ̈ܐ ܐܝܠܝܢ ܕܕܡ̇ܝܢ ܠܟ ܀ ܘܥ̇ܢܝܬ ܘܐܡ̇ܪܬ

6. Esdras 4 8:63

   ܗܐ ܗܫܐ ܡܪܝܐ ܐܘ̇ܕܥܬܢܝ ܣܘܓܐܐ ܕܐܬܘ̈ܬܐ ܕܥܬܝܕ ܐܢܬ ܠܡܥܒܕ ܒܝܘܡ̈ܬܐ ܐܚܪ̈ܝܐ. ܐܠܐ ܠܐ ܐܘܕܥܬܢܝ ܕܒܐ̇ܝܢܐ ܙܒܢܐ • ܀

7. Esdras 4 9:1

   ܘܥ̣ܢܐ ܘܐܡ̣ܪ ܠܝ. ܡܡܫܚ ܡܫܘܚ ܒܢܦܫܟ ܕܟܕ ܬܚܙܐ ܕܥܒ̣ܪܬ ܡܢ̇ܬܐ ܚܕܐ ܡܢ ܐܬܘ̈ܬܐ ܕܐܡܝܪ̈ܢ ܡܢ ܩܕܝܡ

8. Esdras 4 9:2

   ܗ̇ܝܕܝܢ ܐܣܬܟܠ ܕܗ̣ܘܝܘ ܙܒܢܐ ܗ̇ܘ ܕܒܗ ܥܬܝܕ ܡܪܝܡܐ ܕܢܦܩܘܕ ܥܠܡܐ ܕܡܢܗ ܐܬܥܒܕ

9. Esdras 4 9:3

   ܘܐܡܬܝ ܕܢܬܚܙܘܢ ܒܥܠܡܐ ܙܘ̈ܥܐ ܕܐܬܪ̈ܘܬܐ ܘܪܘܒܐ ܕܟܢ̈ܫܐ. ܘܢܟܠܐ ܕܥܡ̈ܡܐ. ܘܫܓܘ̈ܫܝܐ ܕܡܕܒܪ̈ܢܐ. ܘܪܗܝܒܘܬܐ ܕܪ̈ܝܫܢܐ

10. Esdras 4 9:4

    ܗܝ̇ܕܝܢ ܐܬܒܝܢ. ܕܥܠ ܗܠܝܢ ܗܘ ܡܠܠ ܗܘܐ ܡܪܝܡܐ ܡܢ ܩܕܝܡ

11. Esdras 4 9:5

    ܐܝܟ̇ܢܐ ܓܝܪ ܕܟܠ ܡܕܡ ܕܗ̣ܘܐ ܒܥܠܡܐ. ܝܕܝܥ ܪܝܫܗ ܘܫܘܠܡܗ ܓܠ̣ܐ

12. Esdras 4 9:6

    ܗܟܢܐ ܐܦ ܙܒܢ̈ܘܗܝ ܕܡܪܝܡܐ. ܪ̈ܝܫܝܗܘܢ ܝܕܝܥܝܢ ܒܢܝ̈ܫܐ ܘܒܐܬ̈ܘܬܐ ܘܒܚ̈ܝܠܐ. ܘܫܘܠܡܗܘܢ ܒܬܒܥܬܐ ܘܒܐܬ̈ܘܬܐ

13. Esdras 4 9:7

    ܘܢܗܘܐ ܟܠ ܡ̣ܢܘ ܕܢܚܐ ܘܟܠ ܕܢܫܟܚ ܕܢܥܪܘܩ. ܒܥ̇ܒ̈ܕܘܗܝ ܐܘ ܒܗܝܡܢܘܬܗ ܕܗܝܡܢ

14. Esdras 4 9:8

    ܗ̣ܘ ܢܫܬܚܪ ܡܢ ܩܝܢܕܘܢܘܣ ܕܐܬܐܡܪ ܡܢ ܩܕܝܡ. ܘܢܚܙܐ ܦܘܪܩܢܝ. ܒܐܪܥܝ ܘܒܬܚ̈ܘܡܝ ܗܠܝܢ ܕܩ̇ܕܫܬ ܠܝ ܡܢ ܥܠܡ

15. Esdras 4 9:9

    ܘܗ̇ܝܕܝܢ ܢܬܕܡܪܘܢ ܐܝܠܝܢ ܕܐܗܡܝܘ ܗܫܐ ܡܢ ܐܘܪ̈ܚܬܝ. ܘܒܬܫܢܝܩܐ ܢܗܘܘܢ ܐܝܠܝܢ ܕܒܣܪܘ̇ ܘܫܕܘ ܐܢܘܢ

16. Esdras 4 9:10

    ܟܠ ܐܝܠܝܢ ܓܝܪ ܕܠܐ ܝܕܥܘܢܝ ܒܚܝܝ̈ܗܘܢ ܟܕ ܡܛܐܒ ܗ̇ܘܝܬ ܠܗܘܢ

17. Esdras 4 9:11

    ܘܟܠ ܐܝܠܝܢ ܕܐܫܬܒܗܪܘ ܥܠ ܢܡܘܣܝ. ܐܝܠܝܢ ܕܐܝܬ ܗܘܐ ܠܗܘܢ ܚܐܪܘܬܐ

18. Esdras 4 9:12

    ܘܟܕ ܦܬܝܚ ܗܘܐ ܠܗܘܢ ܐܬܪܐ ܕܢܓܝܪܘܬ ܪܘܚܐ. ܘܠܐ ܐܣܬܟܠܘ ܐܠܐ ܐܗܡܝܘ. ܠܗܠܝܢ ܡܬܒܥܐ ܗܘܐ ܠܗܘܢ ܕܡܢ ܒܬܪ ܡܘܬܐ ܢܕܥܘܢ

19. Esdras 4 9:13

    ܐܢܬ ܗܟܝܠ ܠܐ ܬܥܩܒ ܡܢ ܗܫܐ ܕܐ̇ܝܟܢ ܡܫܬܢܩܝܢ ܪ̈ܫܝܥܐ. ܐܠܐ ܒܥܝ̣ ܕܐܝܟ̇ܢܐ ܚܐ̇ܝܢ ܙܕܝܩ̈ܐ ܗܠܝܢ ܕܕܝܠܗܘܢ ܗܘ ܥܠܡܐ. ܘܡܛܠܬܗܘܢ ܐܦ ܗ̣ܘܐ ܥܠܡܐ ܀

20. Esdras 4 9:14

    ܘܥ̇ܢܝܬ ܘܐܡ̇ܪܬ . ̇—̇—̇—

21. Esdras 4 9:15

    ܐܦ ܗܫܐ ܬܘܒ ܐܡ̇ܪ ܐܢܐ. ܘܡܢ ܒܬܪܟܢ ܬܘܒ ܐܡ̇ܪ ܐܢܐ. ܕܣܓܝܐܝܢ ܐܢܘܢ ܐܝܠܝܢ ܕܐܒ̇ܕܝܢ ܡܢ ܐܝܠܝܢ ܕܚܐ̇ܝܢ

22. Esdras 4 9:16

    ܐܝܟ ܕܣ̇ܓܝ ܗܘܘ ܓ̈ܠܠܐ ܡܢ ܛܘܦܬܐ ܙܥܘܪܬܐ ܀

23. Esdras 4 9:17

    ܘܥ̣ܢܐ ܘܐܡ̣ܪ ܠܝ. ܐܝܟ ܐܬܪܐ̣ ܗܟܢܐ ܐܦ ܙܪ̈ܥܘܢܘܗܝ. ܘܐܝܟ ܗ̈ܒܒܐ̣ ܗܟܢܐ ܐܦ ܨܘ̈ܒܥܢܐ. ܘܐܝܟ ܥ̇ܒܕܐ ܗܟܢܐ ܐܦ ܪ̈ܝܚܢܐ. ܘܐܝܟ ܐܟܪܐ ܗܟܢܐ ܐܦ ܐܕܪܐ

24. Esdras 4 9:18

    ܡܛܠ ܕܒܙܒܢܗ ܗܘܐ ܕܥܠܡܐ ܟܕ ܥܬ̣ܕܬ ܗ̣ܘܝܬ ܠܐܝܠܝܢ ܕܗܫܐ ܐܢܘܢ. ܡܢ ܩܕܡ ܕܢܗܘܘܢ ܥ̈ܠܡܐ ܕܢܥܡܪܘܢ ܒܗ. ܘܠܐ ܐܢܫ ܩܡ ܠܘܩܒܠܝ. ܐܦ ܠܝܬ ܗܘܐ ܓܝܪ ܐܢܫ

25. Esdras 4 9:19

    ܘܗܫܐ ܕܐܬܒܪܝܘ ܥܠ ܥܠܡܐ ܕܡܬܩܢ. ܘܥܠ ܦܬܘܪܐ ܕܠܐ ܚܣ̇ܪ. ܘܥܠ ܢܡܘܣܐ ܕܠܐ ܡܬܥܩܒ. ܐܬܚܒܠܘ ܒܥ̇ܒ̈ܕܝܗܘܢ

26. Esdras 4 9:20

    ܘܚ̇ܙܝܬܗ ܠܥܠܡܝ ܘܗܐ ܐܒܝܕ. ܘܠܬܒܝܠ ܕܝܠܝ ܘܗܐ ܗܘܬ ܒܩܝܢܕܘܢܘܣ. ܡܛܘܠ ܗ̇ܘ̈ܦܟܝܗܘܢ ܕܥܡܘܪ̈ܝܗ̇

27. Esdras 4 9:21

    ܘܚܙ̇ܝܬ ܘܚ̇ܣܬ ܥܠ ܩܠܝܠ ܙܥܘܪ. ܘܐܚܝܬ ܠܝ ܛܘܛܝܬܐ ܡܢ ܣܓܘܠܐ. ܘܢܨܒܬܐ ܡܢ ܥܒܐ ܣܓܝܐܐ ܀ ܀

28. Esdras 4 9:22

    ܢܐܒܕ ܗܟܝܠ ܣܘܓܐܐ̣. ܥܠ ܕܗ̣ܘܐ ܠܣܪܝܩܘܬܐ. ܘܬܬܢܛܪ ܛܘܛܝܬܐ ܕܝܠܝ. ܘܢܨܒܬܐ ܕܝܠܝ. ܗܠܝܢ ܕܒܠܘܬܐ ܣܓܝܐܬܐ ܐܬܥܒܕܘ • ܀

29. Esdras 4 9:23

    ܐܢܬ ܕܝܢ ܐܢ ܬܦܪܘܫ ܫܒܥܐ ܝܘܡ̈ܝܢ ܐܚܪ̈ܢܝܢ . ܐܠܐ ܠܐ ܬܘܒ ܬܨܘܡ ܐܢܘܢ

30. Esdras 4 9:24

    ܘܙܠ ܠܦܩܥܬܐ ܕܗܒ̈ܒܐ. ܐܝ̇ܟܐ ܕܒܝܬܐ ܠܐ ܐܬܒܢܝ. ܘܐܟܘܠ ܡܢ ܗܒ̈ܒܐ ܕܦܩܥܬܐ ܒܠܚܘܕ. ܘܒܣܪܐ ܠܐ ܬܛܥܡ. ܘܚܡܪܐ ܠܐ ܬܫܬܐ. ܐܠܐ ܗܒ̈ܒܐ ܒܠܚܘܕ

31. Esdras 4 9:25

    ܘܒܥܝ ܡܢ ܡܪܝܡܐ ܚܦܝܛܐܝܬ. ܘܐ̇ܬܐ ܐܢܐ ܠܘܬܟ̣. ܘܡܡܠܠ ܐܢܐ ܥܡܟ ܀

32. Esdras 4 9:26

    ܘܐ̇ܙܠܬ ܐܝܟ ܕܦܩܕܢܝ ܠܦܩܥܬܐ ܕܡܬܩܪܝܐ ܐܪܦܕ ܘܝܬܒ̇ܬ ܬܡܢ ܥܠ ܗܒ̈ܒܐ ܕܐܪܥܐ. ܘܐ̇ܟܠܬ ܡܢ ܥܩ̇ܪ̈ܐ ܕܕܒܪܐ. ܘܗܘܬ ܠܝ ܡܐܟܘܠܬܗܘܢ ܠܣܒܥܐ ܀

33. Esdras 4 9:27

    ܘܗ̣ܘܐ ܡܢ ܒܬܪ ܫܒܥܐ ܝܘܡ̈ܝܢ̣. ܘܐܢܐ ܪܡ̣ܐ ܗ̇ܘܝܬ ܥܠ ܥܡܝܪܐ. ܘܫ̇ܪܝ ܗܘܐ ܬܘܒ ܠܒܝ ܡܫܬܓܫ ܗܘܐ ܥܠܝ ܐܝܟ ܕܡܢ ܩܕܝܡ

34. Esdras 4 9:28

    ܘܐܬܦܬܚ ܦܘܡܝ. ܘܫ̇ܪܝܬ ܕܐܡ̇ܠܠ ܩܕܡ ܡܪܝܡܐ. ܘܐܡܪܬ

35. Esdras 4 9:29

    ܐܘ ܡܪܝܐ ܡܪܝ. ܡܬܓܠܝܘ ܐܬܓ̣ܠܝܬ ܠܐܒܗ̈ܬܢ ܒܡܕܒܪܐ ܕܣܝܢܝ ܟܕ ܢܦܩ̣ܘ ܗܘܘ ܡܢ ܡܨܪܝܢ. ܘܟܕ ܥܒ̇ܪܝܢ ܗܘܘ ܒܡܕܒܪܐ ܒܐܪܥܐ ܕܠܝܬ ܒܗ̇ ܦܐܪ̈ܐ. ܘܠܐ ܥܒ̣ܪ ܒܗ̇ ܐܢܫ ܘܐܡ̣ܪܬ ܠܗܘܢ

36. Esdras 4 9:30

    ܐܢܬ ܐܝܣܪܝܠ ܫܡܥܝܢܝ. ܘܙܪܥܗ ܕܝܥܩܘܒ ܨܘܬ ܠܡ̈ܠܝ

37. Esdras 4 9:31

    ܕܗܐ ܓܝܪ ܙ̇ܪܥ ܐܢܐ ܒܟܘܢ ܢܡܘܣܝ̣. ܘܢܥܒܕ ܒܟܘܢ ܦܐܪ̈ܐ ܕܙܕܝܩܘܬܐ. ܘܬܫܬܒܚܘܢ ܒܗ ܠܥܠܡ

38. Esdras 4 9:32

    ܐܒܗ̈ܬܢ ܕܝܢ ܢܣܒ̣ܘ ܢܡܘܣܐ ܘܠܐ ܢܛܪܘܗܝ. ܘܦܘܩ̈ܕܢܐ ܘܠܐ ܥܒ̣ܕܘ ܐܢܘܢ. ܘܗܘܘ ܠܗܘܢ ܦܐܪ̈ܘܗܝ ܕܢܡܘܣܟ ܕܠܐ ܐܒ̇ܕܝܢ. ܠܐ ܓܝܪ ܡܫܟܚܝܢ ܗܘܘ ܕܢܐܒܕܘܢ ܡܛܘܠ ܕܕܝܠܟ ܗܘ

39. Esdras 4 9:33

    ܗ̇ܢܘܢ ܕܝܢ ܕܢܣܒܘܗܝ ܐܒܕܘ. ܡܛܘܠ ܕܠܐ ܢܛ̣ܪܘ ܡܕܡ ܕܐܙܕܪܥ ܒܗܘܢ

40. Esdras 4 9:34

    ܘܗܢܐ ܢܡܘܣܐ ܐܝܬ. ܕܟܕ ܬܣܒ ܐܪܥܐ ܙܪܥܐ. ܐܘ ܝܡܐ ܐܠܦܐ. ܐܘ ܡܐܢܐ ܐܚܪܢܐ ܕܡܬܬܣܝܡܐ ܒܗ ܡܐܟܘܠܬܐ. ܐܘ ܡܕܡ ܕܐܬܬܣܝܡ. ܐܘ ܡܕܡ ܕܐܬܢܛܪ

41. Esdras 4 9:35

    ܗܠܝܢ ܡܣܬܪܚܝܢ. ܗܠܝܢ ܕܝܢ ܕܩ̇ܒܠܘ ܐܢܘܢ ܡܩܘܝܢ. ܠܘܬܢ ܕܝܢ ܠܐ ܗܘܐ ܗܟܢܐ ܗ̣ܘܐ

42. Esdras 4 9:36

    ܐܠܐ ܚܢܢ ܐܝܠܝܢ ܕܢܣܒܢ ܢܡܘܣܐ ܘܚ̇ܛܝܢ ܐܒ̇ܕܝܢܢ ܥܡ ܠܒܢ ܗ̇ܘ ܕܩܒܠܗ

43. Esdras 4 9:37

    ܢܡܘܣܟ ܕܝܢ ܠܐ ܐ̇ܒܕ . ܐܠܐ ܡܟܬܪ ܒܬܫܒ̈ܚܬܗ ܀

44. Esdras 4 9:38

    ܘܟܕ ܗܠܝܢ ܡܡܠܠ ܗ̇ܘܝܬ ܒܠܒܝ̣. ܐ̇ܪܝܡܬ ܥܝܢ̈ܝ ܘܚܙ̇ܝܬ ܐܢܬܬܐ ܡܢ ܓܒܐ ܕܝܡܝܢܐ ܟܕ ܡܪܩܕܐ ܗܘܬ̣ ܘܒܟܝܐ ܒܩܠܐ ܪܡ̇ܐ. ܘܒܢܦܫܗ̇ ܡܬܬܢܚܐ ܗܘܬ ܘܡܥܩܐ ܣ̇ܓܝ. ܘܡܐ̈ܢܝܗ̇ ܡܣܕܩܝܢ ܗܘܘ. ܘܥܦܪܐ ܪܡ̣ܐ ܗܘܐ ܥܠ ܪܝܫܗ̇

45. Esdras 4 9:39

    ܘܐܢܐ ܫܒܩ̇ܬ ܡܚܫ̈ܒܬܐ ܕܡܬܚܫܒ ܗܘ̇ܝܬ. ܘܐܬ̇ܦܢܝܬ ܠܘܬܗ̇ ܘܐܡ̇ܪܬ ܠܗ̇

46. Esdras 4 9:40

    ܠܡܢܐ ܒܟ̇ܝܐ ܐܢܬܝ ܘܡܥܩܐ ܐܢܬܝ ܒܢܦܫܟܝ

47. Esdras 4 9:41

    ܘܥ̣ܢܬ ܘܐܡ̣ܪܬ ܠܝ. ܫܒܘܩܝܢܝ ܡܪܝ ܘܐܒ̇ܟܐ ܥܠ ܢܦܫܝ. ܘܐܘܣܦ ܬܘܒ ܕܐܬܬܢܚ̣ ܡܛܠ ܕܣ̇ܓܝ ܡܪܝܪܐ ܠܗ̇ ܠܢܦܫܝ. ܘܛܒ ܡܡܟܟܐ ܐܢܐ

48. Esdras 4 9:42

    ܘܐܢܐ ܐܡ̇ܪܬ ܠܗ̇. ܐܫܬܥܝ ܠܝ ܕܡܢܐ ܓܕܫܟܝ. ܘܥ̣ܢܬ ܘܐܡ̣ܪܬ ܠܝ

49. Esdras 4 9:43

    ܥܩܪܬܐ ܗ̇ܘܝܬ ܐܢܐ ܐܡܬܟ̣ ܘܠܐ ܝ̇ܠܕܬ̇. ܟܕ ܗܘܝܬ ܥܡ ܓܒܪܝ ܬܠܬܝܢ ܫܢ̈ܝܢ

50. Esdras 4 9:44

    ܘܐܢܐ ܕܝܢ ܒܟܠܝܘܡ ܘܒܟܠ ܫܥ̈ܝܢ ܒܗܝܢ ܒܗܠܝܢ ܬܠܬܝܢ ܫܢ̈ܝܢ ܒܥ̇ܝܐ ܗܘ̇ܝܬ ܘܡܬܟܫܦܐ ܡܢ ܡܪܝܡܐ. ܒܐܝܡܡܐ ܘܒܠܠܝܐ

51. Esdras 4 9:45

    ܘܗ̣ܘܐ ܡܢ ܒܬܪܗܝܢ ܕܗܠܝܢ ܬܠܬܝܢ ܫܢ̈ܝܢ̣. ܫܡ̣ܥ ܐܠܗܐ ܒܩܠܗ̇ ܕܐܡܬܟ. ܘܚ̣ܙܐ ܡܘܟܟܗ̇. ܘܚܪ ܒܐܘ̈ܠܨܢܝ ܘܝܗ̣ܒ ܠܝ ܒܪܐ. ܘܚ̇ܕܝܬ ܘܐܬܒ̇ܣܡܬ ܒܗ̣ ܣ̇ܓܝ ܐܢܐ ܘܓܒܪܝ̣ ܘܟܠܗܘܢ ܒܢ̈ܝ ܡܕܝܢܬܝ. ܘܫܒܚܢܝܗܝ ܠܚܝܠܬܢܐ

52. Esdras 4 9:46

    ܘܪܒܝܬܗ ܒܠܐܘܬܐ ܣܓܝܐܬܐ̇

53. Esdras 4 9:47

    ܘܟܕ ܪܒܐ̣. ܐܬ̇ܝܬ ܕܐ̇ܣܒ ܠܗ ܐܢܬܬܐ. ܘܥ̇ܒܕܬ ܝܘܡܐ ܕܡܫܪܝܐ ܘܒܣܡܐ ܪܒܐ

54. Esdras 4 10:1

    ܘܗ̣ܘܐ ܕܟܕ ܥܠ ܒܪܝ ܠܓܢܘܢܗ̣. ܢܦ̣ܠ ܘܡ̣ܝܬ

55. Esdras 4 10:2

    ܘܐܢܐ ܕܝܢ ܣܚ̇ܦܬ ܐܢܘܢ ܠܫܪ̈ܓܐ. ܘܩܡ̇ܘ ܟܠܗܘܢ ܒܢ̈ܝ ܡܕܝܢܬܝ ܕܢܒܝܐܘܢܢܝ. ܘܐܢܐ ܫ̇ܠܝܬ ܠܝ ܥܕܡܐ ܠܝܘܡܐ ܐܚܪܝܐ ܘܥܕܡܐ ܠܠܠܝܐ

56. Esdras 4 10:3

    ܘܡܢ ܒܬܪ ܕܕܡܟܘ ܟܘܠܗܘܢ ܘܣ̇ܒܪܝܢ ܗܘܘ ܕܐܦ ܐܢܐ ܕܡܟܐ ܗ̇ܘܝܬ. ܘܩ̇ܡܬ ܒܠܠܝܐ ܘܥ̇ܪܩܬ. ܘܐܬ̇ܝܬ ܐܝܟ ܕܗܐ ܚ̇ܙܐ ܐܢܬ ܠܦܩܥܬܐ ܗܕܐ

57. Esdras 4 10:4

    ܘܡܬܚܫܒܐ ܐܢܐ ܕܬܘܒ ܠܐ ܐܥ̇ܘܠ ܠܗ̇ ܠܡܕܝܢܬܐ. ܐܠܐ ܕܗܪܟܐ ܐܗ̇ܘܐ̣. ܘܠܐ ܐܟܘܠ ܘܠܐ ܐܫ̇ܬܐ. ܐܠܐ ܕܐܡܝܢܐܝܬ ܐܗ̇ܘܐ ܡܬܐܒܠܐ ܘܨܝܡ̇ܐ ܥܕܡܐ ܕܐܡ̇ܘܬ ܀ •

58. Esdras 4 10:5

    ܘܐܢܐ ܕܝܢ ܫܒ̇ܩܬ ܡܚ̈ܫܒܬܝ ܗܠܝܢ ܕܡܬܚܫܒ ܗ̇ܘܝܬ. ܘܥ̇ܢܝܬ ܒܪܘܓܙܐ ܘܐܡ̇ܪܬ ܠܗ̇

59. Esdras 4 10:6

    ܛܒ ܦܟܝܗܬܝ ܐܢܬܬܐ. ܡܢ ܟܘܠܗܝܢ ܢܫ̈ܐ. ܠܐ ܚ̇ܙܝܐ ܐܢܬܝ ܠܐܒܠܢ ܘܠܡܕܡ ܕܓܕܫܢ

60. Esdras 4 10:7

    ܕܗܐ ܨܗܝܘܢ ܐܡܐ ܕܟܠܢ ܐܝܬܝܗ̇ ܒܥܩܬܐ ܣܓܝܐܬܐ. ܘܒܡܘܟܟܐ ܪܒܐ ܡܡܟܟܐ

61. Esdras 4 10:8

    ܗܫܐ ܕܝܢ ܠܡܬܐܒܠܘ ܡܬܒܥܐ̣. ܟܠܢ ܡܬܐܒܠܝܢܢ. ܐܢܬ ܓܝܪ ܡܥܩܐ ܐܢܬܝ ܥܠ ܒܪܐ ܚܕ. ܚܢܢ ܕܝܢ ܟܠܗ ܥܠܡܐ ܥܠ ܐܡܢ

62. Esdras 4 10:9

    ܫܐܠܝܗ̇ ܕܝܢ ܠܐܪܥܐ ܘܬܐܡܪ ܠܟܝ. ܡܛܠ ܕܗ̣ܝ ܚܝ̇ܒܐ ܕܬܬܐܒܠ. ܡܛܠ ܕܣܓ̈ܝܐܝܢ ܐܢܘܢ ܕܗܘܘ ܥܠܝܗ̇

63. Esdras 4 10:10

    ܘܡܢ ܪܝܫ ܟܘܠܗܘܢ ܐܝܠܝܢ ܕܗܘܘ ܥܠܝܗ̇. ܘܐܚܪ̈ܢܐ ܐܝܠܝܢ ܕܐ̇ܬܝܢ̇ ܗܐ ܟܠܗܘܢ ܠܐܒܕܢܐ ܐ̇ܙܠܝܢ. ܘܠܚ̇ܒܠܐ ܗ̇ܘܐ ܣܘܓܐܗܘܢ

64. Esdras 4 10:11

    ܡ̣ܢܘ ܗܟܝܠ ܚ̇ܝܒ ܕܝܬܝܪܐ̣ܝܬ ܢܬܐܒܠ ܗ̈ܝ ܕܗܢܐ ܟܘܠܗ ܣܘܓܐܐ ܐܘܒܕܬܝ̣. ܐܘ ܐܢܬ ܕܥܠ ܚܕ ܡܬܐܒܠܐ ܐܢܬܝ

65. Esdras 4 10:12

    ܘܐܢ ܕܝܢ ܬܐܡܪ ܠܝ ܕܠܐ ܕܡ̇ܐ ܐܒܠܝ ܕܝܠܝ ܠܕܐܪܥܐ. ܡܛܠ ܕܐܢܐ ܦܐܪܗ̇ ܕܟܪܣܝ ܐܘܒ̇ܕܬ. ܗ̇ܘ ܕܒܚܒ̈ܠܐ ܝ̇ܠܕܬ ܘܒܟܐ̈ܒܐ ܪܒܝ̇ܬ

66. Esdras 4 10:13

    ܐܪܥܐ ܓܝܪ ܐܝܟ ܟܝܢܗ̇ ܕܐܪܥܐ ܐܙ̣ܠ ܣܘܓܐܐ. ܕܐܬ̣ܐ ܠܗ̇ ܐܝܟ ܕܐܬ̣ܐ. ܘܐܢܐ ܕܝܢ ܬܘܒ ܐܡ̇ܪ ܐܢܐ ܠܟܝ

67. Esdras 4 10:14

    ܐܝܟ̇ܢܐ ܕܐܢܬܝ ܒܠܐܘܬܐ ܝܠܕܬܝ̣. ܗܟܢܐ ܐܦ ܐܪܥܐ ܝܗ̣ܒܬ ܦܐܪ̈ܝܗ̇. ܡܢ ܪܝܫ ܒܪܢܫܐ̣ ܠܗ̇ܘ ܕܥܒܕܗ

68. Esdras 4 10:15

    ܗܫܐ ܗܟܝܠ ܐܚܘܕܝ ܒܓܘܟܝ ܚܫܟܝ. ܘܒܚܝܠܐ ܣܝܒܪܝ ܒܝܫܬܐ ܕܓܕܫܬܟܝ

69. Esdras 4 10:16

    ܡܛܠ ܕܐܢ ܬܙܕܩܝܢܝܘܗܝ ܠܓܙܪ ܕܝܢ̣ܗ ܕܡܪܝܡܐ̣. ܐܦ ܠܒܪܟܝ ܬܩܒܠܝܢ ܒܙܒܢ. ܘܬܫܬܒܚܝܢ ܒܢܫ̈ܐ

70. Esdras 4 10:17

    ܥܘܠ ܗܟܝܠ ܠܡܕܝܢܬܐ ܠܘܬ ܓܒܪܟܝ. ܘܥܢܬ ܘܐܡ̇ܪܐ ܠܝ

71. Esdras 4 10:18

    ܕܠܐ ܐܥ̇ܒܕ ܗܟܢܐ. ܘܠܐ ܐ̇ܥܘܠ ܠܡܕܝܢܬܐ. ܘܠܐ ܠܘܬ ܓܒܪܝ. ܐܠܐ ܗܪܟܐ ܐܡ̇ܘܬ ܀

72. Esdras 4 10:19

    ܘܐܘܣ̇ܦܬ ܬܘܒ ܕܐܡ̇ܠܠ ܥܡܗ̇. ܘܐܡ̇ܪܬ ܠܗ̇

73. Esdras 4 10:20

    ܠܐ ܐܢܬܬܐ ܠܐ ܐܢܬܬܐ ܠܐ ܬܥܒܕܝܢ ܦܬܓܡܐ ܗܢܐ. ܐܠܐ ܐܬܛܦܝܣܝ ܠܒ̣ܝܫܬܐ ܕܨܗܝܘܢ ܘܐܬܒܝܐܝ ܡܛܠ ܟܐܒܗ̇ ܕܐܘܪܫܠܡ

74. Esdras 4 10:21

    ܗܐ ܓܝܪ ܚܙܝܬܝ ܡܩܕ̈ܫܝܢ ܕܚ̣ܪܒܘ ܘܡܕ̈ܒܚܝܢ ܕܐܣܬܚܦܘ ܘܗܝܟܠܢ ܕܐܣܬܬܪ.

75. Esdras 4 10:22

    ܘܬܫܡܫܬܢ ܕܒܛܠ̣ܬ ܘܬܫܒܘܚܬܢ ܕܐܫܬ̣ܩܠܬ ܘܫܘܒܗܪܢ ܕܢܦ̣ܠ ܘܢܘܗܪܗ̇ ܕܡܢܪܬܢ ܕܕܥ̣ܟ ܘܩܒܘܬܐ ܕܕܝܬܩܐ ܕܐܬܚܛܦ̣ܬ ܘܩܕ̈ܝܫܝܢ ܕܐܬܛܡܐܘ. ܘܫܡܐ ܕܐܬܩܪܝ ܥܠܝܢ ܕܐܣܬܝܒ ܘܒ̈ܢܝ ܚܐܪ̈ܝܢ ܕܐܨܛܥܪܘ ܘܟܗ̈ܢܝܢ ܕܝܩ̣ܕܘ ܒܢܘܪܐ ܘܠܘ̈ܝܝܢ ܕܐܫܬܒܝܘ ܘܒ̈ܬܘܠܬܢ ܕܐܬܛܡܐܘ ܘܢܫ̈ܝ̇ܢ ܐܨܛܥܪ̈ܝ ܒܩܛܝܪܐ ܘܚܙ̈ܝܝܢ ܐܬܚܛܦܘ ܘܙܕܝ̈ܩܝܢ ܐܬܒܕܪܘ ܘܐܫܬܥ̇ܒܕܘ ܥ̈ܠܝܡܝܢ ܘܚܝ̈ܠܬܢܝܢ ܐܬܕܘܝܘ

76. Esdras 4 10:23

    ܘܕܪܒܐ ܕܝܢ ܡܢ ܟܠܗܝܢ ܥܠ ܚܬܡܗ̇ ܕܨܗܝܘܢ. ܕܐܫܬܩܠ ܚܬܡܐ ܕܬܫܒܘܚܬܗ̇ ܗܫܐ̣. ܘܐܫܬ̣ܠܡܬ ܒܐ̣ܝܕܐ ܕܐܝܠܝܢ ܕܣ̇ܢܝܢ ܠܢ

77. Esdras 4 10:24

    ܐܢܬ ܗܟܝܠ̣. ܫܕܝ ܡܢܟܝ ܣܘܓܐܐ ܕܟܐܒ̈ܝܟܝ. ܐܝܟ ܕܢܬܪܥܐ ܠܟܝ ܚܝܠܬܢܐ. ܘܕܢܢܝܚ ܡܢܟܝ ܡܪܝܡܐ ܟܐܒ̈ܐ ܕܠܐܘܬܟܝ

78. Esdras 4 10:25

    ܘܗ̣ܘܐ ܕܟܕ ܡܡ̇ܠܠ ܗ̇ܘܝܬ ܥܡܗ̣̇. ܘܗܐ ܐ̈ܦܝܗ̇ ܢܗܪ̈ܢ ܗ̈ܘܝ ܣܓܝ. ܘܐܝܟ ܕܡܘܬܐ ܕܒܪܩܐ ܗ̣ܘܐ ܠܗ ܚܙܘܐ ܕܦܪܨܘܦܗ̇. ܘܕܚ̇ܠܬ ܣܓ̇ܝ ܕܐܬܩܪܒ ܠܘܬܗ̇. ܘܠܒܝ ܛܒ ܬܡܝܗ ܗܘܐ. ܘܟܕ ܡܬܚܫܒ ܐܢܐ ܕܡ̇ܢܘ ܗܢܐ ܚܙܘܐ̣

79. Esdras 4 10:26

    ܡܢ ܫܠܝܐ ܩܥܬ ܒܩܠܐ ܪܡ̇ܐ ܘܕܚܝܠܐ̣. ܐܝܟ ܕܬܙܘܥ ܟܠܗ̇ ܐܪܥܐ ܡܢ ܩܠܗ̇

80. Esdras 4 10:27

    ܘܚ̇ܙܝܬ ܘܗܐ ܬܘܒ ܠܐ ܡܬܚܙܝܐ ܗܘܬ ܠܝ ܐܢܬܬܐ. ܐܠܐ ܡܕܝܢܬܐ ܕܡܬܒܢܝܐ. ܘܐܬܪܐ ܡܬܚܙܐ ܗܘܐ ܐܝܟ ܕܡܢ ܫܬܐ̈ܣܐ ܕܪ̈ܘܪܒܢ. ܘܕܚ̇ܠܬ ܘܩܥ̇ܝܬ ܒܩܠܐ ܪܡܐ ܘܐܡ̇ܪܬ

81. Esdras 4 10:28

    ܐܝ̇ܟܘ ܐܘܪܐܝܠ ܡܠܐܟܐ. ܗ̇ܘ ܕܡܢ ܝܘܡܐ ܩܕܡܝܐ ܐܬ̣ܐ ܗܘܐ ܠܘܬܝ. ܡܛܠ ܕܗ̣ܘ ܥܒ̣ܕ ܠܝ ܕܐ̇ܬܐ ܠܣܘܓܐܐ ܕܙܘܥܬܐ ܗܕܐ. ܘܗܘܬ ܚܪܬܝ ܠܚܒܠܐ. ܘܒܥܘܬܝ ܠܚܣܕܐ ܀

82. Esdras 4 10:29

    ܘܥܕ ܗܠܝܢ ܡܡܠܠ ܗ̇ܘܝܬ. ܟܕ ܪܡ̣ܐ ܐܢܐ ܐܝܟ ܡܝܬܐ ܥܠ ܐܪܥܐ̣. ܐ̣ܬܐ ܠܘܬܝ ܡܠܐܟܐ̇. ܗ̇ܘ ܕܐ̇ܬܐ ܗܘܐ ܠܘܬܝ ܡܢ ܩܕܝܡ. ܘܚܙܢܝ

83. Esdras 4 10:30

    ܟܕ ܪܡ̣ܐ ܐܢܐ ܥܠ ܐܪܥܐ. ܐܝܟ ܡܝܬܐ. ܘܡܕܥܝ ܡܫܢܝ ܗܘܐ. ܘܐܚܕܢܝ ܒܝܡܝܢܝ ܘܚܝܠܢܝ ܘܐܩܝܡܢܝ ܥܠ ܪ̈ܓܠܝ. ܘܐܡ̣ܪ ܠܝ

84. Esdras 4 10:31

    ܡܐ ܠܟ. ܘܥܠ ܡܢܐ ܡܬܙܝܥ ܐܢܬ. ܘܠܡܢܐ ܐܫܬܢܝ ܪܥܝܢܟ̇. ܘܡܕܥܗ ܕܠܒܟ. ܘܐܡ̇ܪܬ ܠܗ

85. Esdras 4 10:32

    ܡܛܘܠ ܕܫܒܩܬܢܝ. ܐܢܐ ܓܝܪ ܥܒ̇ܕܬ ܐܝܟ ܕܐܡ̣ܪܬ ܠܝ. ܐܦ ܢܦ̇ܩܬ ܠܦܩܥܬܐ. ܘܗܐ ܚ̇ܙܝܬ ܘܚ̇ܙܐ ܐܢܐ ܡܕܡ ܕܠܐ ܡܫܟܚ ܐܢܐ ܕܐ̇ܦܫܩ. ܘܥ̣ܢܐ ܘܐܡ̣ܪ ܠܝ

86. Esdras 4 10:33

    ܩܘܡ ܥܠ ܪ̈ܓܠܝܟ ܘܐܘ̇ܕܥܟ. ܘܐܡ̇ܪܬ ܠܗ

87. Esdras 4 10:34

    ܡܠܠ ܡܪܝ. ܘܒܠܚܘܕ ܠܐ ܬܫܒܩܢܝ ܕܠܐ ܐܡܘܬ ܕܠܐ ܒܙܒܢܝ

88. Esdras 4 10:35

    ܡܛܠ ܕܚ̇ܙܝܬ ܡܕܡ ܕܠܐ ܝܕ̇ܥ ܗ̇ܘܝܬ. ܘܫܡ̇ܥ ܐܢܐ ܡܕܡ ܕܠܐ ܡܦܣ ܐܢܐ

89. Esdras 4 10:36

    ܐܘ ܕܠܡܐ ܡܕܥܝ ܡܟܕܒ ܒܝ. ܘܢܦܫܝ ܚܠܡܐ ܗܘ ܚܙ̇ܝܐ

90. Esdras 4 10:37

    ܗܫܐ ܕܝܢ ܒܥ̇ܐ ܐܢܐ ܡܢܟ ܡܪܝ̣. ܐܘܕܥܝܗܝ ܠܥ̣ܒܕܟ ܥܠ ܚܙܘܐ ܗܢܐ ܕܚܝܠܐ ܀ • •

91. Esdras 4 10:38

    ܘܥ̣ܢܐ ܘܐܡܪ ܠܝ. ܫܡܥܝܢܝ ܘܐ̇ܠܦܟ. ܘܐ̇ܓܠܐ ܠܟ ܥܠ ܐܝܠܝܢ ܕܕܚ̇ܠ ܐܢܬ. ܡܛܠ ܕܡܪܝܡܐ ܓܠ̣ܐ̇ ܠܟ ܪ̈ܐܙܐ ܣܓ̈ܝܐܐ

92. Esdras 4 10:39

    ܚܙܗ̇ ܓܝܪ ܠܬܪܝܨܘܬܟ ܕܣܓܝ ܡܥܩ ܐܢܬ ܥܠ ܥܡܟ. ܘܣ̇ܓܝ ܡܬܐܒܠ ܐܢܬ ܥܠ ܥܡܟ. ܘܣ̇ܓܝ ܡܬܐܒܠ ܐܢܬ ܥܠ ܨܗܝܘܢ

93. Esdras 4 10:40

    ܗܕܐ ܗܝ ܗܟܝܠ ܡܠܬܐ. ܐܢܬܬܐ ܗ̇ܝ ܕܐܬܚ̣ܙܝܬ ܠܟ ܡܢ ܩܕܡ ܩܠܝܠ

94. Esdras 4 10:41

    ܕܡܬܐܒܠܐ ܗܘܬ. ܘܫܪ̣ܝܬ ܠܡܒܝܐܘܬܗ̣̇

95. Esdras 4 10:42

    ܘܗܫܐ ܠܐ ܗܘܐ ܐܝܟ ܐܢܬܬܐ ܡܬܚܙܝܐ ܠܟ. ܐܠܐ ܐܬܚ̣ܙܝܬ ܠܟ ܐܝܟ ܡܕܝܢܬܐ ܕܡܬܒܢܝܐ

96. Esdras 4 10:43

    ܘܕܡܬܢܝܐ ܗܘܬ ܠܟ ܥܠ ܒܝ̣ܫܬܗ ܕܒܪܗ̇. ܗܢܐ ܗܘ ܦܘܫܩܐ

97. Esdras 4 10:44

    ܐܢܬܬܐ ܗ̇ܝ ܕܚ̣ܙܝܬ ܗܕܐ ܗܝ ܨܗܝܘܢ. ܕܗܫܐ ܚ̇ܙܐ ܐܢܬ ܕܐܝܟ ܡܕܝܢܬܐ ܡܬܒܢܝܐ

98. Esdras 4 10:45

    ܘܕܐܡ̣ܪܬ̇· ܠܟ ܥܠ ܢܦܫܗ̇ ܕܥܩܪܬ̇ܐ ܗܘܬ. ܬܠܬܝܢ ܫܢ̈ܝܢ. ܡܛܠ ܕܗܘܬ ܒܥܠܡܐ ܬܠܬܐ ܐ̈ܠܦܝܢ ܫ̈ܢܝܢ. ܟܕ ܠܐ ܡܬܩܪܒ ܗܘܐ ܒܗ̇ ܩܘܪܒܢܐ

99. Esdras 4 10:46

    ܘܗ̣ܘܐ ܡܢ ܒܬܪ ܬܠܬܐ ܐܠ̈ܦܝܢ ܫܢ̈ܝܢ̣. ܫܠܝܡܘܢ ܒ̣ܢܐ ܡܕܝܢܬܐ. ܘܩܪܒ ܒܗ̇ ܩܘܪܒܢܐ. ܗܝ̇ܕܝܢ ܗ̣ܘ ܗ̣ܘܐ ܕܝ̣ܠܕܬ ܥܩܪܬܐ ܒܪܐ

100. Esdras 4 10:47

     ܘܕܐܡ̣ܪܬ ܠܟ ܕܪܒܝܬܗ ܒܥܠܡܐ. ܗܢܐ ܗ̣ܘܐ ܥܘܡܪܗ̇ ܕܐܘܪܫܠܡ

← Previous · Next → — showing 401–500 of 714

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.