Ancient Textssearch the texts themselves, not just their titles

← All works

Peshitta Esdras 4

Peshitta (Syriac Old Testament) · 714 sections

  1. Esdras 4 7:97

    ܐܘܪܚܐ ܕܫܬ̣. ܐܡܬܝ ܕܢܬܚܘܐ ܠܗܝܢ ܕܐܝܟ̇ܢܐ ܥܬܝ̈ܕܢ ܐܦܝܗ̈ܝܢ ܕܢܢܗܪ̈ܢ ܐܝܟ ܫܡܫܐ. ܘܕܐܝܟ̇ܢܐ ܥܬ̈ܝܕܢ ܕܢܬܕܡ̈ܝܢ ܠܢܘܗܪܐ ܕܟܘܟ̈ܒܐ ܘܬܘܒ ܠܐ ܡ̈ܬܚܒܠܢ • ܀

  2. Esdras 4 7:98

    ܐܘܪܚܐ ܕܫܒܥ ܕܗ̣ܝ ܪܒܐ ܡܢ ܟܠܗܝܢ ܗܠܝܢ ܕܐܬܐܡܪ ܡܢ ܩܕܝܡ. ܕܡܫܬܒܗܪ̈ܢ ܒܦܪܗܣܝܐ. ܘܡܬܠܒ̈ܒܢ ܘܠܐ ܒܗ̈ܬܢ. ܘܡܣܬܪ̈ܗܒܢ ܕܢܚ̈ܙܝܢ ܐܦܘ̈ܗܝ ܕܗ̇ܘ ܕܐܫܬܥܒܕ ܠܗ ܒܚܝܝ̈ܗܝܢ. ܘܕܗ̇ܘ ܕܥܬ̈ܝܕܢ ܕܢܫ̈ܬܒܚܢ ܡܢܗ. ܘܕܢܩ̈ܒܠܢ ܡܢܗ ܐܓܪܐ

  3. Esdras 4 7:99

    ܗܠܝܢ ܐ̈ܢܝܢ ܐܘܪ̈ܚܬܐ ܕܢܦܫܬ̈ܗܘܢ ܕܙܕܝ̈ܩܐ. ܕܡܢ ܗܫܐ ܡܣܬܒܪ̈ܢ ܀ ܀ ܘܐܘܪ̈ܚܬܐ ܕܬܫܢ̈ܝܩܐ ܕܐܬܐܡܪ ܡܢ ܩܕܝܡ ܢܩܒܠܘܢ ܡܢ ܗܫܐ ܥܨܝ̈ܐ. ܗܠܝܢ ܢܦܫܬ̈ܐ ܠܐܘܨܪ̈ܐ ܠܐ ܥ̈ܠܢ ܐܠܐ ܡܢ ܗܫܐ ܗܘ̈ܝܢ ܡܬܛܪ̈ܦܢ ܒܬܫܢܝܩܐ. ܘܡܬܬ̈ܢܚܢ ܘܡܬܐ̈ܒܠܢ ܒܫܒܥ ܐܘܪ̈ܚܢ • ܀ •

  4. Esdras 4 7:100

    ܘܥ̇ܢܝܬ ܘܐܡ̇ܪܬ. ܡܟܝܠ ܡܬܝܗܒ ܗܘܐ ܠܗܝܢ ܐܬܪܐ ܐܘ ܙܒܢܐ ܠܢܦܫ̈ܬܐ ܡܢ ܒܬܪ ܕܦܪ̈ܩܢ ܡܢ ܦܓܪ̈ܐ ܕܢܚ̈ܙܝܢ ܡܕܡ ܕܐܡ̣ܪܬ ܠܝ ܀

  5. Esdras 4 7:101

    ܘܥ̣ܢܐ ܘܐܡ̣ܪ ܠܝ. ܫܒܥܐ ܐܢܘܢ ܝܘܡ̈ܝܢ ܕܚܐܪܘܬܗܝܢ ܕܒܗ̇ܢܘܢ ܫܒܥܐ ܝܘܡ̈ܝܢ ܚܙ̈ܝܢ ܡ̈ܠܐ ܗܠܝܢ ܕܐܬܐܡܪ ܡܢ ܩܕܝܡ ܘܡܢ ܒܬܪܟ̣ܢ. ܢܬܟ̈ܢܫܢ ܠܐܘܨܪ̈ܝܗܝܢ ܀ ܀

  6. Esdras 4 7:102

    ܘܥ̇ܢܝܬ ܘܐ̇ܡܪܬ. ܐܢ ܐܫܟ̇ܚܬ ܪ̈ܚ̣ܡܐ ܒܥ̈ܝܢܝܟ̣ ܐܘܕܥܝܢܝ ܠܥܒ̣ܕܟ ܬܘܒ ܐܦ ܗܕܐ. ܕܐܢ ܒܝܘܡܐ ܕܕܝ̣ܢܐ ܡܫܟܚܝܢ ܙܕܝ̈ܩܐ ܕܢܫܐܠܘܢ ܐܢܘܢ ܠܪ̈ܫܝܥܐ. ܐܘ ܕܢܒܥܘܢ ܥܠܝܗܘܢ ܡܢ ܡܪܝܡܐ

  7. Esdras 4 7:103

    ܐܘ ܐܒܗ̈ܐ ܚܠܦ ܒܢܝ̈ܗܘܢ. ܐܘ ܒܢ̈ܝܐ ܚܠܦ ܐܒܗ̈ܝܗܘܢ. ܐܘ ܐܚ̈ܐ ܚܠܦ ܐܚ̈ܝܗܘܢ. ܐܘ ܐܚ̈ܝܢܐ ܚܠܦ ܐܚ̈ܝܢܝܗܘܢ. ܐܘ ܪ̈ܚ̇ܡܐ ܚܠܦ ܪ̈ܚܡܝܗܘܢ ܀

  8. Esdras 4 7:104

    ܘܥ̣ܢܐ ܘܐܡ̣ܪ ܠܝ. ܡܛܠ ܕܐܫܟܚܬ ܪ̈ܚܡ̣ܐ ܩܕܡ ܥܝܢ̈ܝ̣. ܐܦ ܥܠ ܗܕܐ ܐܘܕܥܟ. ܝܘܡܗ ܕܕܝ̣ܢܐ̣. ܝܘܡܐ ܗܘ ܓܙܝܪܐ. ܘܠܟܠ ܡܚܘܐ ܚܬܡܐ ܕܫܪܪܐ. ܐܝ̇ܟܢܐ ܓܝܪ ܕܗܫܐ ܠܐ ܡܫܕܪ ܐܒܐ ܠܒܪܗ. ܐܘ ܒܪܐ ܠܐܒܘܗܝ. ܐܘ ܡܪܐ ܠܥܒ̣ܕܗ. ܐܘ ܪܚ̇ܡܐ ܠܚܒܝܒܗ. ܕܚܠܦܘܗܝ ܢܬܟܪܗ. ܐܘ ܕܢܕܡܟ ܐܘ ܕܢܐܟܘܠ ܐܘ ܕܢܬܐܣܐ ܀

  9. Esdras 4 7:105

    ܗܟܢܐ ܐܦ ܗܝ̇ܕܝܢ ܠܐ ܡܫܟܚ ܐܢܫ ܕܢܒܥܐ̇. ܥܠ ܐ̈ܦܝ ܐܢܫ ܒܗ̇ܘ ܝܘܡܐ. ܐܦܠܐ ܕܢܘܩܪ ܐܢܫ ܥܠ ܐܢܫ. ܟܠܗܘܢ ܓܝܪ ܗܝ̇ܕܝܢ ܢܛܥܢܘܢ ܐܢܫ ܐܢܫ ܙܕܝܩܘܬܗ ܐܘ ܥܘ̣ܠܗ

  10. Esdras 4 7:106

    ܘܥ̇ܢܝܬ ܘܐܡ̇ܪܬ. ܘܐܝܟܢܐ ܡܪܝ ܐܫܟܚܢ ܕܒ̣ܥܐ ܡܢ ܩܕܝܡ ܐܒܪܗܡ ܥܠ ܣܕܘܡ̈ܝܐ. ܐܦ ܡܘܫܐ ܒܡܕܒܪܐ ܥܠ ܐܒܗ̈ܬܐ ܟܕ ܚܛܘ

  11. Esdras 4 7:107

    ܘܝܫܘܥ ܒܪ ܢܘܢ ܡܢ ܒܬܪܗ ܥܠ ܐܝܣܪܝܠ ܒܝܘܡ̈ܬܗ ܕܥܟܪ

  12. Esdras 4 7:108

    ܘܫܡܘܐܝܠ ܒܝܘܡ̈ܝ ܫܐܘܠ. ܘܕܘܝܕ ܥܠ ܬܒܪܗ ܕܥܡܐ. ܘܫܠܝܡܘܢ ܥܠ ܗܢ̇ܘܢ ܕܒܝܬ ܡܩܕܫܐ

  13. Esdras 4 7:109

    ܘܐܠܝܐ ܥܠ ܐܝܠܝܢ ܕܩܒܠܘ ܡܛܪܐ. ܘܥܠ ܡܝܬܐ ܡܛܠ ܕܢܚܐ

  14. Esdras 4 7:110

    ܘܚܙܩܝܐ ܥܠ ܥܡܐ ܒܝܘܡ̈ܬܗ ܕܣܢܚܝܪܝܒ ܘܣ̈ܓܝܐܐ ܚܠܦ ܣܓܝܐ̈ܐ

  15. Esdras 4 7:111

    ܐܢ ܗܟܝܠ ܗܫܐ ܕܟܕ ܚܒ̇ܠܐ ܪܒܐ ܗ̣ܘܐ. ܘܛܠܘܡܝܐ ܣܓ̣ܐ. ܒܥܘ ܙܕܝ̈ܩܐ ܥܠ ܪ̈ܫܝܥܐ . ܘܠܡܢܐ ܡܪܝ ܐܦ ܗ̇ܝܕܝܢ ܠܐ ܢܗܘܐ ܗܟܢܐ ܀

  16. Esdras 4 7:112

    ܘܥܢܐ ܘܐܡ̣ܪ ܠܝ. ܗܢܐ ܥܠܡܐ ܐܝܬ ܠܗ ܫܘܠܡܐ. ܘܬܫܒܘܚܬܗ ܕܐܠܗܐ ܠܐ ܗܘܐ ܐܡܝܢܐܝܬ ܡܩܘܝܐ ܒܗ. ܡܛܠ ܗܢܐ ܒܥܘ ܚܝ̈ܠܬܢܐ ܥܠ ܗ̇ܢܘܢ ܕܠܝܬ ܒܗܘܢ ܚܝܠܐ

  17. Esdras 4 7:113

    ܝܘܡܗ ܕܝܢ ܕܕܝܢ̣ܐ ܫܘܠܡܗ ܗܘ ܕܗܢܐ ܥܠܡܐ̣. ܘܪܝܫܗ ܕܥܠܡܐ ܕܥܬܝܕ ܗ̇ܘ ܕܠܐ ܡܐ̇ܬ ܕܒܗ ܥ̇ܒܪ ܚܒ̇ܠܐ ܀

  18. Esdras 4 7:114

    ܘܡܫܬܪܝܐ ܫܪܝܚܘܬܐ. ܘܡܬܒܛܠܐ ܟܦܘܪܘܬܐ. ܘܪܒ̇ܝܐ ܙܕܝܩܘܬܐ. ܘܕܢ̇ܚ ܫܪܪܐ

  19. Esdras 4 7:115

    ܗܝ̇ܕܝܢ ܗܟܝܠ ܠܐ ܡܫܟܚ ܐܢܫ ܕܢܪܚܡ ܥܠ ܐܝ̇ܢܐ ܕܐܙܕܟܝ ܒܕܝ̣ܢܐ. ܐܦܠܐ ܕܢܒܐܫ ܠܐܝ̇ܢܐ ܕܙܟ̣ܐ ܒܕܝܢ̣ܐ

  20. Esdras 4 7:116

    ܘܥܢ̇ܝܬ ܘܐܡ̇ܪܬ. ܕܗܕܐ ܗܝ ܡܠܬܝ ܩܕܡܝܬܐ ܘܐܚܪܝܬܐ ܕܦܩܚ ܗܘܐ ܠܗ̇ ܠܐܪܥܐ ܕܠܐ ܬܬܠܝܘܗܝ ܠܐܕܡ. ܐܘ ܕܟܕ ܝܗܒ̣ܬܗ ܐܪܬܝܬܗ ܕܠܐ ܢܚܛܐ

  21. Esdras 4 7:117

    ܡܢܐ ܓܝܪ ܗܢܝܢܐ ܐܝܬ ܠܗܘܢ ܠܟܘܠܗܘܢ ܐܝܠܝܢ ܕܐܬܘ. ܕܗܐ ܚ̈ܝܝܢ ܒܥܩ̈ܬܐ. ܘܡܐ ܕܡܝ̣ܬܘ ܡܣܟܝܢ ܠܬܫܢܝܩܐ

  22. Esdras 4 7:118

    ܐܘ ܡܢܐ ܥܒܕܬ ܐܕܡ. ܐܢ ܓܝܪ ܐܢܬ ܚܛܝܬ̣. ܐܠܐ ܠܐ ܗܘܬ ܒܝ̣ܫܬܐ ܕܝܠܟ ܒܠܚܘܕܝܟ. ܐܠܐ ܐܦ ܕܝܠܢ ܐܝܠܝܢ ܕܡܢܟ ܗ̇ܘܝܢ

  23. Esdras 4 7:119

    ܡܢܐ ܓܝܪ ܝܘܬܪܢܐ ܐܝܬ. ܕܗܐ ܐܬܡܠܟ ܠܢ ܙܒܢܐ ܕܠܐ ܡܐ̇ܬ. ܚܢܢ ܕܝܢ ܥ̇ܒ̈ܕܐ ܡܝ̈ܬܐ ܥܒܕܢ

  24. Esdras 4 7:120

    ܘܕܐܬܝܕܥ ܠܢ ܣܒܪܐ ܕܠܐ ܓܐ̇ܙ. ܚܢܢ ܕܝܢ ܒܝ̣ܫܐܝܬ ܐܣܬܪܩܢ

  25. Esdras 4 7:121

    ܘܕܗܐ ܢܛܝܪܝܢ ܐܘܨܪ̈ܐ ܕܠܐ ܨܦܬܐ ܘܕܠܐ ܟܘܪܗܢܐ. ܚܢܢ ܕܝܢ ܒܝܫ̣ܐܝܬ ܐܬܗܦܟܢ ܚܢܢ

  26. Esdras 4 7:122

    ܘܕܥܬܝܕܐ ܬܫܒܘܚܬܗ ܕܡܪܝܡܐ ܕܬܓܢ ܥܠ ܐܝܠܝܢ ܕܒܢܟܦܘܬܐ ܚܝܘ. ܚܢܢ ܕܝܢ ܒܐܘܪ̈ܚܬܐ ܒܝ̣ܫ̈ܬܐ ܪܕܝܢ

  27. Esdras 4 7:123

    ܘܕܡܬܚܙܐ ܦܪܕܝܣܐ ܗ̇ܘ ܕܠܐ ܚܡ̇ܝܢ ܦܐܪ̈ܘܗܝ. ܕܒܗ ܐܝܬ ܦܘ̈ܢܩܐ ܘܐܣܝܘܬܐ

  28. Esdras 4 7:124

    ܚܢܢ ܕܝܢ ܠܐ ܥܐܠܝܢܢ. ܡܛܠ ܕܠܐܬܪ̈ܘܬܐ ܒܝ̣ܫ̈ܐ ܦܠܚܢܢ

  29. Esdras 4 7:125

    ܘܕܥܬ̈ܝܕܢ ܐܦܝܗ̈ܘܢ ܕܩܕܝ̈ܫܐ ܕܢܢܗܪ̈ܢ ܝܬܝܪ ܡܢ ܟܘܟ̈ܒܐ. ܘܐ̈ܦܝܢ ܕܝܠܢ ܢܐܟܡ̈ܢ ܝܬܝܪ ܡܢ ܚܫܘܟܐ

  30. Esdras 4 7:126

    ܕܠܐ ܓܝܪ ܐܬܒܝܢ ܚܢܢ ܒܚܝ̈ܝܢ ܟܕ ܡܥܘܠܝܢ ܗ̈ܘܝܢ ܕܥܬܝܕܝܢܢ ܕܢܚܫ ܡܢ ܒܬܪ ܡܘܬܢ

  31. Esdras 4 7:127

    ܘܥ̣ܢܐ ܘܐܡܪ ܠܝ. ܗܕܐ ܗܝ ܡܚܫܒܬܐ ܕܐܓܘܢܐ. ܗ̇ܘ ܕܡܬܟܬܫ ܥܠ ܐܪܥܐ̣. ܒܪܢܫܐ ܕܡܬܝܠܕ

  32. Esdras 4 7:128

    ܐܢ ܡܙܕܟܐ ܢܚܫ ܗ̇ܘ ܡܕܡ ܕܐܡ̇ܕܬ. ܘܐܢ ܕܝܢ ܢܙ̇ܟܐ ܢܩܒܠ ܗ̇ܘ ܡܕܡ ܕܐܡ̇ܪܬ

  33. Esdras 4 7:129

    ܡܛܠ ܕܗܕܐ ܗܝ ܐܘܪܚܐ ܗ̇ܝ ܕܐܡ̣ܪ ܡܘܫܐ̇. ܟܕ ܚܝ ܗܘܐ ܠܥܡܐ ܘܐܡ̣ܪ ܠܗܘܢ. ܗܐ ܝܗ̇ܒܬ ܩܕܡܝܟܘܢ ܝܘܡܢܐ̣. ܚ̈ܝܐ ܘܡܘܬܐ. ܛ̇ܒܬ̈ܐ ܘܒܝ̣ܫ̈ܬܐ. ܓܒܘ ܠܟܘܢ ܗܟܝܠ ܚ̈ܝܐ ܕܬܚܘܢ. ܐܢܬܘܢ ܘܙܪܥܟܘܢ

  34. Esdras 4 7:130

    ܘܥܨܘ ܘܠܐ ܐܬܛܦܝܣܘ ܠܗ. ܘܠܐ ܠܢܒ̈ܝܐ ܕܡܢ ܒܬܪܗ. ܐܦ ܠܝ ܕܡ̇ܠܠܬ ܥܡܗܘܢ.

  35. Esdras 4 7:131

    ܡܛܠ ܗܢܐ ܠܐ ܬܗܘܐ ܥܩܬܐ ܥܠ ܐ̣ܒܕܢܗܘܢ. ܐܝܟ̇ܢܐ ܕܗܘ̇ܝܐ ܚܕܘܬܐ ܥܠ ܚܝܝ̈ܗܘܢ ܕܐܝܠܝܢ ܕܐܬܛܦܝܣܘ ܀

  36. Esdras 4 7:132

    ܘܥ̇ܢܝܬ ܘܐܡ̇ܪܬ ܠܗ. ܝܕ̇ܥ ܐܢܐ ܡܪܝ̣ ܕܗܫܐ ܐܬܩܪܝ ܡܪܝܡܐ ܡܪܚܡܢܐ. ܡܛܠ ܕܡܪܚܡ ܥܠ ܐܝܠܝܢ ܕܥܕܟܝܠ ܠܐ ܐܬܘ ܠܥܠܡܐ

  37. Esdras 4 7:133

    ܘܚܢܢܐ ܡܛܠ ܕܚܐ̇ܢ ܠܐܝܠܝܢ ܕܡܬܦܢܝܢ ܥܠ ܢܡܘܣܗ

  38. Esdras 4 7:134

    ܘܢܓܝܪ ܪܘܚܐ ܡܛܠ ܕܡܓܪ ܪܘܚܗ ܥܡܢ ܥܡ ܐܝܠܝܢ ܕܚ̇ܛܝܢ. ܡܛܘܠ ܕܥ̣̈ܒܕܘܗܝ ܚܢܢ

  39. Esdras 4 7:135

    ܘܝܗ̇ܘܒܐ ܡܛܠ ܕܨ̇ܒܐ ܗܘ ܠܡܬܠ ܝܬܝܪ ܡܢ ܕܠܡܬܒܥ

  40. Esdras 4 7:136

    ܘܣ̇ܓܝ ܪ̈ܚ̣ܡܐ. ܡܛܠ ܕܝܬܝܪܐܝܬ ܡܣܓܐ ܪ̈ܚ̣ܡܐ ܥܠ ܐܝܠܝܢ ܕܐܝܬܝܗܘܢ ܗܫܐ. ܘܥܠ ܐܝܠܝܢ ܕܥ̣ܒܪܘ. ܘܥܠ ܐܝܠܝܢ ܕܥܬܝܕܝܢ

  41. Esdras 4 7:137

    ܐܢ ܓܝܪ ܠܐ ܢܣܓܐ ܐܢܘܢ ܠܪ̈ܚܡܘܗܝ̣. ܠܐ ܡܫܟܚ ܥܠܡܐ ܕܢܚܐ ܥܡ ܥ̇ܡܘܪ̈ܘܗܝ

  42. Esdras 4 7:138

    ܘܝܗܘܒܐ ܡܛܠ ܕܐܠܐ ܢܬܠ ܒܛܒܘܬܗ̣. ܐܝܟ ܕܢܬܩܠܠܘܢ ܥ̇ܘ̈ܠܐ ܡܢ ܥܘ̣ܠܗܘܢ. ܘܐܠܐ ܠܐ ܡܫܟܚ ܗܘܐ ܕܢܚܐ ܚܕ ܡܢ ܪܒܘ ܡܢ ܒ̈ܢܝ ܐܢܫܐ.

  43. Esdras 4 7:139

    ܘܕܝ̇ܢܐ ܡܛܠ ܕܐܠܐ ܢܕܥ ܡܢ ܢܦܫܗܘܢ ܕܐܝܠܝܢ ܕܐܬܒܪܝܘ ܒܡܠܬܗ. ܘܢܛܥܐ ܣܘܓܐܐ ܕܥܘ̣ܠܗܘܢ. ܘܐܠܐ ܠܐ ܡܫܬܚܪ ܗܘܐ ܡܢ ܣܘܓܐܐ ܕܠܝܬ ܠܗ ܡܢܝܢܐ. ܐܠܐ ܐܢ ܩܠܝܠ ܙܥܘܪ̈ܐ ܀ •

  44. Esdras 4 8:1

    ܘܥܢ̣ܐ ܘܐܡ̣ܪ ܠܝ. ܗܢܐ ܥܠܡܐ ܥ̣ܒܕ ܡܪܝܡܐ ܡܛܘܠ ܣܓ̈ܝܐܐ. ܘܗ̇ܘ ܕܝܢ ܕܥܬܝܕ ܡܛܠ ܙܥܘܪ̈ܐ

  45. Esdras 4 8:2

    ܐܦܫܩ ܕܝܢ ܡܠܬܐ ܩܕܡܝܟ ܐܘ ܥܙܪܐ. ܐܝܟ ܕܬܫܐܠܝܗ̇ ܠܐܪܥܐ ܘܬܐܡܪ ܠܟ ܕܐܝ̇ܢܐ ܥܦܪܐ ܝܗ̇ܒܐ. ܣ̇ܓܝ ܗ̇ܘ ܕܗ̇ܘܐ ܡܢܗ ܚܨܦܐ. ܐܘ ܗ̇ܘ ܕܗ̇ܘܐ ܡܢܗ ܕܗܒܐ̣. ܗܟܢܐ ܐܝܬܘܗܝ ܥ̇ܒܕܗ ܕܗܢܐ ܥܠܡܐ

  46. Esdras 4 8:3

    ܣܓ̈ܝܐܐ ܐܬܒܪܝܘ ܐܠܐ ܙܥܘܪܝܢ ܗܘܘ ܚ̈ܝܝܢ ܀ • •

  47. Esdras 4 8:4

    ܘܥ̇ܢܝܬ ܘܐܡ̇ܪܬ. ܣܪܘܦܝ ܢܦܫܝ ܡܕܥܐ̣. ܘܐܫܬܝ ܠܒܝ ܒܘܝܢܐ

  48. Esdras 4 8:5

    ܐܬ̇ܝܬ ܓܝܪ ܕܠܐ ܒܨܒܝܢܟܝ. ܘܐ̇ܙܠܐ ܐܢܬܝ ܟܕ ܠܐ ܨܒܝܬܝ. ܠܐ ܓܝܪ ܐܬܝܗܒ ܠܟܝ ܫܘܠܛܢܐ. ܐܠܐ ܐܢ ܒܠܚܘܕ ܒܚܝ̈ܐ ܕܙܒܢܐ ܙܥܘܪܐ ܀ ܀

  49. Esdras 4 8:6

    ܐܘ ܡܪܝܐ ܡܪܝ. ܐܢ ܦܩ̇ܕ ܐܢܬ ܠܥܒܕܟ̣. ܐܒ̇ܥܐ ܩܕܡܝܟ. ܘܬܬܠ ܠܢ ܙܪܥܐ ܘܦܘܠܚܢܐ ܕܠܒܐ ܚܕܬܐ ܡܢ ܐܝ̇ܟܐ ܕܗ̇ܘܝܢ ܦܐܪ̈ܐ ܐܝܟ ܕܢܫܟܚ ܠܡܚܐ ܟܠ ܕܡܬܚܒܠ̇· ܗ̇ܘ ܕܠܒ̣ܫ ܕܡܘܬܗ ܕܒܪܢܫܐ

  50. Esdras 4 8:7

    ܚܕ ܓܝܪ ܐܝܬܝܟ̣ ܘܓܒܝܠܬܐ ܚܕܐ. ܐܝܬܝܢ ܚܢܢ ܥܒܕ ܐܝ̈ܕܝܟ ܐܝܟ ܕܐܡ̣ܪܬ

  51. Esdras 4 8:8

    ܘܡܚܝܘ ܡ̇ܚܐ ܐܢܬ ܠܢ̇. ܗܫܐ ܒܡܪܒܥܐ ܠܦܓܪܐ ܕܓܒ̣ܠܬ ܘܡܪܟܒ ܐܢܬ ܗܕ̈ܡܐ. ܘܡܬܢܛܪܐ ܒܪܝܬܟ. ܒܢܘܪܐ ܘܡ̈ܝܐ. ܘܬܫܥܐ ܝܪ̈ܚܝܢ ܡܣܝܒܪܐ ܓܒܝܠܬܟ ܠܒ̣ܪܝܬܐ ܕܒܪ̣ܝܬ ܒܓܘܗ̇

  52. Esdras 4 8:9

    ܗ̣ܘ ܕܝܢ ܗ̇ܘ ܕܢܛ̇ܪ ܘܗ̇ܘ ܕܡܬܢܛܪ ܬܪ̈ܝܗܘܢ ܒܢܛܘܪܬܟ ܕܝܠܟ ܡܬܢܛܪܝܢ. ܘܡܐ ܕܝܗ̇ܒ ܬܘܒ ܡܪܒܥܐ ܡܕܡ ܕܗ̣ܘܐ ܒܗ

  53. Esdras 4 8:10

    ܦܩ̣ܕܬ ܕܡܢܗܘܢ ܡܢ ܗܕ̈ܡܐ ܢܗܘܐ ܚܠ̣ܒܐ. ܦܐܪ̈ܐ ܕܬ̈ܕܝܐ ܕܡܠܝܘܬܐ

  54. Esdras 4 8:11

    ܕܗ̇ܘ ܡܕܡ ܕܐܬܓܒܠ ܢܬܪܒܐ̣. ܥܕܡܐ ܠܙܒܢܐ ܩܠܝܠ. ܘܡܢ ܒܬܪܟܢ ܡܕܒܪ ܐܢܬ ܠܗ ܒܪ̈ܚ̣ܡܝܟ

  55. Esdras 4 8:12

    ܘ̇ܙܐܢ ܐܢܬ ܠܗ ܒܙܕܝܩܘܬܟ. ܘܪܕ̇ܐ ܐܢܬ ܠܗ ܒܢܡܘܣܟ. ܘܡܪܬܐ ܐܢܬ ܠܗ ܒܣܟܘܠܬܢܘܬܟ

  56. Esdras 4 8:13

    ܘܡܡܝܬ ܐܢܬ ܠܗ ܐܝܟ ܒ̣ܪܝܬܟ. ܘܡܚܐ ܐܢܬ ܠܗ ܐܝܟ ܥܒ̇ܕܟ

  57. Esdras 4 8:14

    ܐܢ ܗܟܝܠ ܒܥܓܠ ܘܩܠܝܠܐܝܬ ܡܘܒܕ ܐܢܬ ܠܗ ܠܗܢܐ. ܕܒܗܕܐ ܟܠܗ̇ ܠܐܘܬܐ ܣܓܝܐܬܐ ܐܬܓܒܠ ܒܦܘܩܕܢܟ. ܘܥܠ ܡܢܐ ܗܟܝܠ ܗ̣ܘܐ ܀ ܀

  58. Esdras 4 8:15

    ܐܦ ܗܫܐ ܡܐܡܪ ܐܡ̇ܪܬ ܥܠ ܟܘܠ ܐܢܫ. ܝܬܝܪܐܝܬ ܕܝܢ̣. ܐܢܬ ܝܕ̇ܥ ܐܢܬ̣. ܕܥܠ ܥܡܟ ܗܘ ܚܐ̇ܫ ܐܢܐ

  59. Esdras 4 8:16

    ܘܥܠ ܝܪܬܘܬܟ ܕܥܠܝܗ̇ ܡܬܐܒܠ ܐܢܐ. ܘܥܠ ܐܝܣܪܝܠ ܕܥܠܘܗܝ ܟ̣ܪܝܐ ܠܝ. ܘܥܠ ܙܪܥܗ ܕܝܥܩܘܒ ܕܥܠܘܗܝ ܡܬܙܝܥ ܐܢܐ

  60. Esdras 4 8:17

    ܡܛܠ ܗܕܐ ܐܫ̇ܪܐ ܕܐܒ̇ܥܐ ܘܐܬܟܫܦ ܩܕܡܝܟ ܥܠܝ ܘܥܠܝܗܘܢ. ܡܛܠ ܕܗܐ ܚ̇ܙܐ ܐܢܐ ܫܘܪ̈ܥܬܢ ܕܐܝܠܝܢ ܕܥܡ̇ܪܝܢ ܒܥܠܡܐ

  61. Esdras 4 8:18

    ܐܠܐ ܐܦ ܗܫܐ ܫܡܥ̣ܬ ܓܙܪܗ ܕܕܝܢ̣ܐ ܕܥܬܝܕ

  62. Esdras 4 8:19

    ܡܛܠ ܗܢܐ ܫܡ̣ܥ ܒܩܠܝ. ܘܨܘܬ ܠܡ̈ܠܝ ܨܠܘܬܝ̣. ܘܐܡ̇ܠܠ ܩܕܡܝܟ ܡܪܝܐ ܐܠܗܝ.

  63. Esdras 4 8:20

    ܡܪܝܐ ܕܥ̇ܡܪ ܐܢܬ ܠܥܠܡ. ܗ̇ܘ ܕܡܪ̈ܘܡܘܗܝ ܪܡ̇ܝܢ ܘܡܕܝܪ̈ܘܗܝ ܒܐܐܪ

  64. Esdras 4 8:21

    ܗ̇ܘ ܕܟܘܪܣܝܗ ܠܐ ܡܣܬܝܟ ܘܬܫܒܘܚܬܗ ܠܐ ܡܬܕܪܟܐ. ܗ̇ܘ ܕܚܝ̈ܠܘܬܐ ܒܕܚܠܬܐ ܩܝ̇ܡܝܢ ܩܕܡܘܗܝ

  65. Esdras 4 8:22

    ܗ̇ܘ ܕܒܡܠܬܗ ܠܢܘܪܐ ܘܠܪܘܚܐ ܡܬܚܠܦܝܢ. ܗ̇ܘ ܕܡܠܬܗ ܡܗܝܡܢܐ. ܘܡܐܡܪܗ ܡܩܘܐ

  66. Esdras 4 8:23

    ܗ̇ܘ ܕܦܘܩܕܢܗ ܫܪܝܪ. ܘܦܬܓ̈ܡܘܗܝ ܕܚܝܠܝܢ. ܗ̇ܘ ܕܚܙܘܗ ܡܘܒܫ ܬܗܘܡܐ. ܘܟܐܬܗ ܛܘ̣ܪ̈ܐ ܡ̇ܫܚܐ. ܗ̇ܘ ܕܫܪܪܗ ܡܣܗܕ̣

  67. Esdras 4 8:24

    ܫܡ̣ܥ ܒܩܠܗ ܕܥ̣ܒܕܟ. ܘܨܘܬ ܠܒܥܘܬܐ ܕܓܒܝܠܬܟ. ܘܚܘܪ ܒܡ̈ܠܝ

  68. Esdras 4 8:25

    ܥܕ ܚܝ ܐܢܐ ܓܝܪ ܐܡ̇ܠܠ. ܘܥܕ ܐܝܬ ܒܝ ܡܕܥܐ ܐܬܝܒ ܦܬܓܡܐ̣

  69. Esdras 4 8:26

    ܠܐ ܬܚܘܪ ܒܫܘܪ̈ܥܬܗ ܕܥܡܟ. ܐܠܐ ܒܐܝܠܝܢ ܕܐܫܬܥܒܕܘ ܠܟ ܒܩܘܫܬܐ

  70. Esdras 4 8:27

    ܘܠܐ ܬܚܘܪ ܒܣܟ̈ܠܘܬܐ ܕܨܢܥ̈ܬܗܘܢ ܕܥ̈ܘ̇ܠܐ. ܐܠܐ ܒܐܝܠܝܢ ܕܒܨܥܪܐ ܢܛܪ̣ܘ ܩܝܡ̈ܝܟ

  71. Esdras 4 8:28

    ܘܠܐ ܬܬܚܫܒ ܥܠ ܐܝܠܝܢ ܕܒܝܫ̣ܐܝܬ ܐܬܗܦܟܘ ܩܕܡܝܟ. ܐܠܐ ܐܬܕܟܪ ܠܐܝܠܝܢ ܕܒܨܒܝܢܐ ܛ̇ܒܐ ܝܕܥܘ ܕܚܠܬܟ

  72. Esdras 4 8:29

    ܘܠܐ ܬܨܒܐ ܕܬܘܒܕ ܐܢܘܢ ܠܐܝܠܝܢ ܕܐܬܕܡܝܘ ܠܒܥܝܪܐ. ܐܠܐ ܚܘܪ ܒܐܝܠܝܢ ܕܩ̇ܒܠܘ ܢܗܝܪܘܬܗ ܕܢܡܘܣܟ

  73. Esdras 4 8:30

    ܘܠܐ ܬܪܓܙ ܥܠ ܐܝܠܝܢ ܕܐܒܫܘ ܝܬܝܪ ܡܢ ܚܝ̈ܘܬܐ. ܐܠܐ ܐ̣ܚܒ ܠܐܝܠܝܢ ܕܐܡܝܢܐܝܬ ܥܠ ܬܫܒܘܚܬܟ ܬܟܝܠܝܢ ܗܘܘ

  74. Esdras 4 8:31

    ܡܛܠ ܕܚܢܢ ܘܐܝܠܝܢ ܕܡܢ ܩܕܡܝܢ ܥ̇ܒ̈ܕܐ ܕܚ̇ܒܠܐ ܥܒܕܢ ܘܦܩܪܢ ܀ • ܐܢܬ ܕܝܢ ܡܛܠܬܢ ܕܝܠܢ ܕܚ̇ܛܝܢ ܡܪܚܡܢܐ ܐܬܩܪܝܬ

  75. Esdras 4 8:32

    ܥܠܝܢ ܓܝܪ ܥܠ ܐܝܠܝܢ ܕܠܝܬ ܠܢ ܥ̇ܒ̈ܕܐ. ܐܢ ܬܨܒܐ ܕܬܪܚܡ ܚܢ̇ܢܐ ܡܫܬܡܗ ܐܢܬ

  76. Esdras 4 8:33

    ܙܕܝܩ̈ܐ ܓܝܪ ܐܝܠܝܢ ܕܐܝܬ ܠܗܘܢ ܥ̇ܒ̈ܕܐ ܕܣܝ̣ܡܝܢ ܠܘܬܟ. ܡܢ ܥ̇ܒ̈ܕܝܗܘܢ ܕܝܠܗܘܢ ܐܝܬ ܠܗܘܢ ܕܢܣܒܘܢ

  77. Esdras 4 8:34

    ܐܘ ܡܢܐ ܗܘ ܓܝܪ ܒܪܢܫܐ ܕܬܪܓܙ ܥܠܘܗܝ. ܐܘ ܓܢܣܐ ܕܡܬܚܒܠ ܕܬܬܚܡܬ ܥܠܘܗܝ

  78. Esdras 4 8:35

    ܫܪܝܪܐܝܬ ܓܝܪ ܠܝܬ ܡܢ ܝܠܝ̈ܕܐ ܕܠܐ ܐܥܘܠ. ܘܠܐ ܡܢ ܐܝܠܝܢ ܕܗܘܘ ܕܠܐ ܚ̣ܛܐ

  79. Esdras 4 8:36

    ܒܗܕܐ ܗܘ ܓܝܪ ܡܬܝܕܥܐ ܛܒܘܬܟ ܡܪܝܐ ܡܪܝ. ܐܡܬܝ ܕܡܬܪܚܡ ܐܢܬ ܥܠ ܐܝܠܝܢ ܕܠܝܬ ܠܗܘܢ ܚܝܠܐ ܕܥ̇ܒ̈ܕܐ ܀ •

  80. Esdras 4 8:37

    ܘܥ̣ܢܐ ܘܐܡ̣ܪ ܠܝ. ܡܢܗܝܢ ܬܪܝܨܐܝܬ ܡܠ̣ܠܬ. ܘܐܝܟ ܡ̈ܠܝܟ ܗܟܢܐ ܢܗܘܐ

  81. Esdras 4 8:38

    ܡܛܠ ܕܫܪܝܪܐܝܬ ܠܐ ܡܬܚܫܒ ܐܢܐ ܥܠ ܓܒܝܠܬܗܘܢ ܕܥ̈ܘ̇ܠܐ. ܐܘ ܥܠ ܡܘܬܗܘܢ. ܐܘ ܥܠ ܕܝܢܗܘܢ. ܐܘ ܥܠ ܐܒܕܢܗܘܢ

  82. Esdras 4 8:39

    ܐܠܐ ܡܬܒܣܡ ܐܢܐ ܥܠ ܡܐܬܝܬܐ ܕܓܒܝܠܬܗܘܢ ܕܙܕܝ̈ܩܐ. ܘܥܠ ܚܝܝ̈ܗܘܢ ܘܥܠ ܦܘܪܥܢܗ ܕܐܓܪܗܘܢ

  83. Esdras 4 8:40

    ܐܝܟ̇ܢܐ ܓܝܪ ܕܡ̇ܠܠܬ ܗܟܢܐ ܢܗܘܐ

  84. Esdras 4 8:41

    ܐܝܟ̇ܢܐ ܓܝܪ ܐܟܪܐ ܕܙ̇ܪܥ ܙܪ̈ܥܘܢܐ ܣܓܝܐ̈ܐ. ܘܢܨܒ̈ܬܐ ܣܓܝܐ̈ܬܐ ܢܨ̇ܒ̣. ܐܠܐ ܠܐ ܗܘܐ ܒܙܒܢ ܟܘܠܗܘܢ ܙܪ̈ܥܘܢܐ ܚܝ̈ܝܢ. ܐܦܠܐ ܟܠܗܝܢ ܢܨܒ̈ܬܐ ܝܗ̈ܒܢ ܥ̇ܩ̣ܪܐ. ܗܟܢܐ ܐܦ ܐܝܠܝܢ ܕܐܬܘ ܠܥܠܡܐ. ܠܐ ܗܘܐ ܟܘܠܗܘܢ ܚܐ̇ܝܢ ܀

  85. Esdras 4 8:42

    ܘܥ̇ܢܝܬ ܘܐܡ̇̇ܪܬ. ܐܢ ܐܫܟ̇ܚܬ ܪ̈ܚ̣ܡܐ ܒܥܝ̈ܢܝܟ ܐ̇ܡܠܠ ܩܕܡܝܟ

  86. Esdras 4 8:43

    ܙܪܥܗ ܓܝܪ ܕܐܟܪܐ. ܐܢ ܡܣܒ ܠܐ ܢܣ̇ܒ ܡܛܪܟ ܒܙܒܢܗ. ܕܠܡܐ ܚܝܐ. ܐܦ ܡܢ ܡܛܪܐ ܕܝܢ ܣܓܝܐܐ ܡܬܚܒܠ

  87. Esdras 4 8:44

    ܒܪܢܫܐ ܕܝܢ ܕܒܐܝ̈ܕܝܟ ܐܬܓܒܠ ܘܠܝܘܩܢܟ ܐܬܕܡܝ ܕܡܛܠܬܗ ܒܪܝܬ ܟ̇ܠܐ. ܕܡܝܬܝܗܝ ܠܙܪܥܗ ܕܐܟܪܐ̣

  88. Esdras 4 8:45

    ܠܐ. ܒܥ̇ܐ ܐܢܐ ܡܢܟ ܡܪܝܐ ܡܪܝ̣. ܚܘܣ ܥܠ ܥܡܟ. ܘܐܬܪܚܡ ܥܠ ܝ̇ܪܬܘܬܟ. ܥܠ ܒܪ̈ܝܬܟ ܗ̣ܘ ܓܝܪ ܕܝܠܟ ܡܬܪܚܡ ܐܢܬ ܀

  89. Esdras 4 8:46

    ܘܥ̣ܢܐ ܘܐܡ̣ܪ ܠܝ. ܐܝܠܝܢ ܕܗܫܐ ܐ̈ܢܝܢ ܠܐܝܠܝܢ ܕܗܫܐ ܐܢܘܢ. ܘܐܝܠܝܢ ܕܥܬܝ̈ܕܢ ܠܐܝܠܝܢ ܕܥܬܝܕܝܢ

  90. Esdras 4 8:47

    ܣ̇ܓܝ ܓܝܪ ܚܣܝܪ ܠܟ ܕܬܫܟܚ ܬܚܒܝܗ̇ ܠܒ̣ܪܝܬܝ ܝܬܝܪ ܡܢܝ. ܐܢܬ ܕܝܢ ܣ̇ܓܝ ܕܡܝܬ ܢܦܫܟ ܠܪ̈ܫܝܥܐ. ܠܐ ܢܗܘܐ ܗܟܢܐ

  91. Esdras 4 8:48

    ܐܠܐ ܐܦ ܒܗܕܐ ܬܫܬܒܚ ܩܕܡ ܡܪܝܡܐ

  92. Esdras 4 8:49

    ܡܛܠ ܕܐܬܡ̣ܟܟܬ ܐܝܟ ܕܙ̇ܕܩ ܠܟ. ܘܠܐ ܦܚ̣ܡܬ ܢܦܫܟ ܥܠ ܙܕܝ̈ܩܐ. ܡܛܠ ܗܢܐ ܝܬܝܪܐܝܬ ܬܫܬܒܚ.

  93. Esdras 4 8:50

    ܡܛܠ ܕܕܘܝܘܬܐ ܣܓܝܐܬܐ ܢܬܕܘܘܢ ܥܡܘܪ̈ܘܗܝ ܕܥܠܡܐ ܒܐܚܪܝܬܐ. ܚܠܦ ܫܘܒܗܪܐ ܣܓܝܐܐ ܕܐܫܬܒܗܪ

  94. Esdras 4 8:51

    ܐܢܬ ܕܝܢ ܕܥܠ ܢܦܫܟ ܐܣܬ̣ܟܠ. ܘܥܠ ܬܫܒܚ̈ܬܗܘܢ ܕܐܝܠܝܢ ܕܕܡ̇ܝܢ ܠܟ ܒܥܝ

  95. Esdras 4 8:52

    ܠܟܘܢ ܓܝܪ ܐܬܦܬܚ ܦܪܕܝܣܐ. ܘܐܬܢܨܒ ܐ̇ܝܠܝܐ ܕܚ̈ܝܐ. ܘܐܬܥܬܕ ܥܠܡܐ ܕܥܬܝܕ. ܘܐܬܛܝܒ ܦܘܢܩܐ. ܘܐܬ̣ܒܢܝܬ ܡܕܝܢܬܐ. ܘܐܬܬܩܢ ܢܝܚܐ. ܘܐܫܬ̣ܟܠܠܬ ܛܒ̇ܘܬܐ ܘܫ̣ܠܡܬ ܚܟܡܬܐ

  96. Esdras 4 8:53

    ܘܥܩܪܐ ܐܬܚܬܡ ܡܢܟܘܢ ܘܟܘܪܗܢܐ ܕܥ̇ܟ ܡܢܟܘܢ. ܘܡܘܬܐ ܐܬܛܫܝ. ܘܫܝܘܠ ܥܪ̣ܩܬ. ܘܚ̇ܒܠܐ ܐܬܛܥܝ

  97. Esdras 4 8:54

    ܘܟܐ̈ܒܐ ܐܪܚܩܘ ܡܢܟܘܢ. ܘܒܫܘܠܡܐ ܐܬܚܙܝ ܣܝܡ̈ܬܐ ܕܚ̈ܝܐ

  98. Esdras 4 8:55

    ܠܐ ܗܟܝܠ ܬܘܣܦ ܬܘܒ ܕܬܒܥܐ ܥܠ ܣܓ̈ܝܐܐ ܐܝܠܝܢ ܕܐܒ̇ܕܝܢ

  99. Esdras 4 8:56

    ܡܛܠ ܕܗ̣ܢܘܢ ܢܣ̣ܒܘ ܚܐܪܘܬܐ ܘܐܣܠܝܘ ܠܡܪܝܡܐ. ܐܦ ܠܢܡܘܣܗ ܐܣܓܝܘ ܫ̣̇ܛܘ. ܘܠܐܘܪ̈ܚܬܗ ܒܛ̇ܠܘ

  100. Esdras 4 8:57

    ܐܦ ܠܚܣ̈ܝܘܗܝ ܕܫ̇ܘ

← Previous · Next → — showing 301–400 of 714

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.