← All works

Peshitta Esdras 4

Peshitta (Syriac Old Testament) · 714 sections

1. Esdras 4 6:56

   ܫܪܟܐ ܕܝܢ ܕܥܡ̈ܡܐ ܐܝܠܝܢ ܕܡܢ ܐܕܡ ܐܬܝܠܕܘ̣. ܐܡ̇ܪܬ ܕܠܐ ܐܝܬܝܗܘܢ ܡܕܡ. ܘܕܡܝܬ ܐܢܘܢ ܠܪܘܩܐ. ܘܐܝܟ ܢܘܛܦܬܐ ܕܡܢ ܩܕܣܐ ܕܡ̣ܝܬ ܟܗܝܢܘܬܗܘܢ

2. Esdras 4 6:57

   ܘܗܫܐ ܡܪܝܐ ܗܐ ܗ̇ܢܘܢ ܥܡ̈ܡܐ ܕܠܡܕܡ ܠܐ ܐܬܚܫܒܘ. ܗܐ ܫܠܝܛܝܢ ܥܠܝܢ ܘܕܝ̇ܫܝܢ ܠܢ

3. Esdras 4 6:58

   ܚܢܢ ܕܝܢ ܥܡܟ ܗ̇ܘ ܕܝܩ̣ܪܬ ܘܩܪܝܬܝܗܝ ܒܘܟܪܐ ܘܝܚܝܕܝܐ ܩܪܝܒܐ ܘܚܒܝܒܐ. ܗܐ ܐܫܬܠܡܢ ܒܐܝ̈ܕܝܗܘܢ

4. Esdras 4 6:59

   ܘܐܢ ܡܛܠܬܢ ܐܬܒܪܝ ܥܠܡܐ̣. ܠܡܢܐ ܠܐ ܝ̇ܪܬܝܢܢ ܠܗ ܠܥܠܡܢ. ܥܕܡܐ ܠܐܡܬܝ ܗܠܝܢ ܀

5. Esdras 4 7:1

   ܘܗ̣ܘܐ ܡܢ ܒܬܪ ܕܫܠܡ̇ܬ ܠܡܡܠܠܘ ܡ̈ܠܐ ܗܠܝܢ. ܗܐ ܐܫܬܠܚ ܠܘܬܝ ܡܠܐܟܐ ܗ̇ܘ ܕܐܫܬܠܚ ܗܘܐ ܠܘܬܝ ܒ̈ܠܝܠܘܬܐ ܩܕܡ̈ܝܐ

6. Esdras 4 7:2

   ܘܐܡ̣ܪ ܠܝ. ܩܘܡ ܥܙܪܐ ܘܫܡ̣ܥ ܡ̈ܠܐ ܐܝ̇ܠܝܢ ܕܐܬ̇ܝܬ ܕܐܡ̇ܪ ܠܟ

7. Esdras 4 7:3

   ܘܐܡ̇ܪܬ ܠܗ ܡܠܠ ܡܪܝ̇·̇· ܘܥ̣ܢܐ ܘܐܡ̣ܪ ܠܝ. ܝܡܐ ܐܢ ܢܗܘܐ ܣܝ̣ܡ ܒܐܬܪܐ ܪܘܝܚܐ. ܐܝܟ ܕܢܗܘܐ ܦ̣ܬܐ ܘܠܐ ܡܣܬܝܟ

8. Esdras 4 7:4

   ܡܥܠܢܗ ܕܝܢ ܣܝ̣ܡ ܒܐܬܪܐ ܐܠܝܨܐ. ܐܝܟ ܕܢܗܘܐ ܕܡܐ ܠܢܗܪܐ

9. Esdras 4 7:5

   ܐܢܕܝܢ ܐܢܫ ܢܨܒܐ ܕܢܥܘܠ ܠܝܡܐ ܘܢܚܙܝܘܗܝ. ܘܢܗܘܐ ܡܪܐ ܥܠܘܗܝ. ܐܢܗ̣ܘ ܗܟܝܠ ܕܠܐ ܢܥܒܪ ܠܗ ܒܐܘܠܨܢܐ ܠܐܪܘܚܬܐ ܐܝ̇ܟܢ ܡܫܟܚ ܕܢܐܬܐ ܀

10. Esdras 4 7:6

    ܫܡ̣ܥ ܬܘܒ ܡܕܡ ܐܚܪܢ. ܡܕܝܢܬܐ ܐܝܬ ܕܒܢ̣ܝܐ ܘܣܝ̣ܡܐ ܒܐܬܪܐ ܪܒܐ ܕܦܩܥܬܐ. ܘܐܝܬܝܗ̇ ܕܝܢ ܗ̇ܝ ܡܕܝܢܬܐ ܕܡܠܝܐ ܛ̇ܒ̈ܬܐ ܣܓܝܐ̈ܬܐ

11. Esdras 4 7:7

    ܘܡܥܠܢܗ̇ ܐܠܝܨ ܘܣ̣ܝܡ ܒܪܘܡܐ. ܐܝܟ ܕܢܗܘܐ ܡܢ ܝܡܝܢܐ ܢܘܪܐ̣ ܘܡܢ ܣܡܠܐ ܡ̈ܝܐ ܕܥܡܝܩܝܢ

12. Esdras 4 7:8

    ܘܫܒܝܠܐ ܚܕ ܕܣ̣ܝܡ ܒܝܢܬ ܗܠܝܢ ܬܪ̈ܝܗܘܢ. ܒܝܢܬ ܢܘܪܐ ܠܡ̈ܝܐ. ܐܝܟ ܕܠܐ ܣ̇ܦܩ ܫܒܝܠܐ ܗ̇ܘ. ܐܠܐ ܐܢ ܠܦܣܬܐ ܕܒܪ ܐܢܫܐ ܒܠܚܘܕ

13. Esdras 4 7:9

    ܐܢܗ̣ܘ ܕܝܢ ܕܡܬܝܗܒܘ ܬܬܝܗܒ ܗ̇ܝ ܡܕܝܢܬܐ ܠܝܪܬܘܬܐ. ܐܢܗ̣ܘ ܕܗ̇ܘ ܝܪܘܬܐ ܠܐ ܢܥܒܪ ܩܝܢܕܘܢܘܣ ܕܣ̣ܝܡ. ܐܝܟܢܐ ܡܫܟܚ ܕܢܣܒܝܗ̇ ܠܝܪܬܘܬܗ.

14. Esdras 4 7:10

    ܘܐܢܐ ܐܡ̇ܪܬ ܠܗ. ܐܝܢ ܗܟܢܐ ܗܘ ܡܪܝ ܀ • ܘܥܢ̣ܐ ܘܐܡ̣ܪ ܠܝ. ܗܟܢܐ ܗܝ ܐܦ ܡܢܬܗ ܕܐܝܣܪܝܠ

15. Esdras 4 7:11

    ܡܛܠܬܗܘܢ ܓܝܪ ܥܒܕܬܗ ܠܥܠܡܐ ܘܟܕ ܐܥܒܪ ܐܕܡ ܦܘܩ̈ܕܢܝ ܐܬܚܝܒ ܗ̇ܘ ܡܕܡ ܕܐܬܥܒܕ

16. Esdras 4 7:12

    ܘܡܛܠ ܗܢܐ ܗܘܘ ܠܗܘܢ ܡ̈ܥܠܢܘܗܝ ܕܥܠܡܐ ܗܢܐ ܕܗܫܐ ܐܠܝܨܝܢ. ܘܡܠ̣ܝܢ ܬܢ̈ܚܬܐ ܘܥܡܠܐ ܘܩܝܢܕܘܢܘܣ ܣܓܝܐܐ. ܘܠܐܘܬܐ ܪܒܬܐ ܥܡ ܟܘܪ̈ܗܢܐ ܘܚܫ̈ܐ ܀

17. Esdras 4 7:13

    ܡ̈ܥܠܢܘܗܝ ܕܝܢ ܕܗ̇ܘ ܥܠܡܐ ܕܥܬܝܕ̣. ܪܘܝܚܝܢ ܘܕܠܐ ܨܦܬܐ ܐܝܬܝܗܘܢ. ܘܥ̇ܒܕܝܢ ܦܐܪ̈ܐ ܕܠܐ ܡ̇ܝܬܝܢ

18. Esdras 4 7:14

    ܐܢ ܗܟܝܠ ܠܐ ܢܥܒܪܘܢ ܚ̈ܝܐ ܒܐܘ̈ܠܨܢܐ ܘܒܒ̣ܝ̈ܫܬܐ ܗܠܝܢ ܠܐ ܡܫܟܚܝܢ ܐܝܠܝܢ ܕܣܝ̣ܡܝܢ ܠܗܘܢ

19. Esdras 4 7:15

    ܗܫܐ ܕܝܢ ܥܠ ܡܢܐ ܡܬܬܙܝܥ ܐܢܬ. ܕܟܕ ܡܬܚܒܠ ܐܢܬ. ܘܠܡܢܐ ܡܫܬܓܫ ܐܢܬ ܟܕ ܡܝܘܬܐ ܐܢܬ

20. Esdras 4 7:16

    ܘܡܛܠ ܡܢܐ ܠܐ ܢܣ̣ܒܬ ܥܠ ܠܒܟ ܡܕܡ ܕܥܬܝܕ ܐܠܐ ܡܕܡ ܕܩܐ̇ܡ ܀ •

21. Esdras 4 7:17

    ܘܥ̇ܢܝܬ ܘܐܡ̇ܪܬ ܡܪܝܐ ܡܪܝ. ܐܠܐ ܗܐ ܦܪܫ̣ܬ ܒܢܡܘܣܟ. ܕܙܕܝ̈ܩܐ ܗܘ ܝ̇ܪܬܝܢ ܠܗܝܢ ܠܗܠܝܢ. ܪ̈ܫܝܥܐ ܕܝܢ ܐܒ̇ܕܝܢ

22. Esdras 4 7:18

    ܙܕܝ̈ܩܐ ܗܟܝܠ ܫܦܝܪ ܡܣܝܒܪܝܢ ܐܘ̈ܠܨܢܐ. ܡܛܠ ܕܡܣܒܪܝܢ ܕܢܐܬܘܢ ܠܪܘܚܬܐ. ܪ̈ܫܝܥܐ ܕܝܢ ܐܘ̈ܠܨܢܐ ܣܒ̇ܠܝܢ̣. ܘܪܘܚܬܐ ܠܐ ܚܙ̇ܝܢ . .

23. Esdras 4 7:19

    ܘܥ̣ܢܐ ܘܐܡ̣ܪ ܠܝ. ܠܐ ܗ̣ܘܝܬ ܐܢܬ ܚܟܝܡ ܝܬܝܪ ܡܢ ܐܠܗܐ. ܘܠܐ ܣܟܘܠܬܢ ܝܬܝܪ ܡܢ ܡܪܝܡܐ

24. Esdras 4 7:20

    ܢܐܒܕܘܢ ܗܟܝܠ ܣܓܝܐ̈ܐ ܐܝܠܝܢ ܕܐܬܘ. ܥܠ ܕܐܬܒܣܝ ܒܗܘܢ ܢܡܘܣܐ ܕܐܬܣܝܡ ܡܢܝ

25. Esdras 4 7:21

    ܦܘܩܕܢܐ ܓܝܪ ܦܩ̇ܕ ܐܠܗܐ ܠܐܝܠܝܢ ܕܐܬܘ. ܟܕ ܐܬܘ ܗܝ̇ܕܝܢ ܕܡܢܐ ܢܥܒܕܘܢ ܘܢܚܘܢ. ܘܡܢܐ ܢܛܪܘܢ ܘܠܐ ܢܫܬܢܩܘܢ

26. Esdras 4 7:22

    ܗ̣ܢܘܢ ܕܝܢ ܥܨܘ ܘܠܐ ܐܫܬܡܥܘ ܠܗ. ܘܐܬܩܢܘ ܠܗܘܢ ܡܚ̈ܫܒܬܐ ܣܪ̈ܝܩܬܐ

27. Esdras 4 7:23

    ܘܐܘܣܦܘ ܠܗܘܢ ܨܢܥ̈ܬܐ ܕܡ̈ܦܠܬܐ. ܘܥܠ ܗܠܝܢ ܟܘܠܗܝܢ ܐܡ̣ܪܘ̣. ܕܠܝܬ ܗܘ ܡܪܝܡܐ. ܘܠܐ ܝܕܥܘ ܐܘܪ̈ܚܬܗ

28. Esdras 4 7:24

    ܘܠܢܡܘܣܗ ܫ̇ܛܘ. ܘܒܩܝܡ̈ܘܗܝ ܟܦ̇ܪܘ . ܘܒܦܘܩܕ̈ܢܘܗܝ ܠܐ ܗܝܡ̇ܢܘ. ܘܥܠ ܥ̇ܒ̈ܕܘܗܝ ܒܣܘ

29. Esdras 4 7:25

    ܡܛܠ ܗܢܐ ܐܘ ܥܙܪܐ. ܣܦܝ̈ܩܬܐ ܠܣܦ̈ܝܩܐ. ܘܡ̈ܠܝܬܐ ܠܐܝܠܝܢ ܕܡ̣ܠܝܢ

30. Esdras 4 7:26

    ܗܐ ܓܝܪ ܝܘܡ̈ܬܐ ܐܬ̇ܝܢ. ܘܢܗܘܐ ܡܐ ܕܐܬ̈ܝ ܐܬܘ̈ܬܐ ܕܩܕ̇ܡܬ ܐܡ̇ܪܬ ܠܟ̣. ܘܬܬܓܠܐ ܟܠܬܐ ܕܡܬܚܙܝܐ ܐܝܟ ܡܕܝܢܬܐ. ܘܬܬܚܙܐ ܗ̇ܝ ܕܦܪܝܫܐ ܗܫܐ

31. Esdras 4 7:27

    ܘܟܠ ܡ̇ܢ ܕܢܬܦܨܐ ܡܢ ܒܝ̣̈ܫܬܐ ܗܠܝܢ ܕܐܬܐܡܪ ܡܢ ܩܕܝܡ̣. ܗ̣ܘ ܢܚܙܐ ܬܡܝ̈ܗܬܝ

32. Esdras 4 7:28

    ܢܬܓܠܐ ܓܝܪ ܒܪܝ ܡܫܝܚܐ ܥܡ ܐܝܠܝܢ ܕܥܡܗ. ܘܢܒܣ̇ܡ ܠܐܝܠܝܢ ܕܐܫܬܚܪܘ̣. ܬܠܬܝܢ ܫ̈ܢܝܢ

33. Esdras 4 7:29

    ܘܢܗܘܐ ܡܢ ܒܬܪ ܗܠܝܢ ܫܢ̈ܝܐ. ܢܡܘܬ ܒܪܝ ܡܫܝܚܐ. ܘܟܠܗܘܢ ܐܝܠܝܢ ܕܐܝܬ ܒܗܘܢ ܢܫܡܬܐ ܕܒܪܢܫܐ

34. Esdras 4 7:30

    ܘܢܗܦܘܟ ܥܠܡܐ ܠܫܬܩܗ ܩܕܡܝܐ̣. ܫܒܥܐ ܝܘܡ̈ܝܢ. ܐܝܟ ܕܗܘܬ ܡܢ ܒܪܫܝܬ. ܐܝܟ ܕܠܐ ܐܢܫ ܢܫܬܚܪ ܀

35. Esdras 4 7:31

    ܘܢܗܘܐ ܡܢ ܒܬܪ ܫܒܥܐ ܝܘܡ̈ܝܢ̣. ܢܬܬܥܝܪ ܗ̇ܘ ܥܠܡܐ ܕܗܫܐ ܠܝܬܘܗܝ ܥܝܪ. ܘܢܡܘܬ ܚ̇ܒܠܐ

36. Esdras 4 7:32

    ܘܐܪܥܐ ܬܬܠ ܠܐܝܠܝܢ ܕܫܟܝܒܝܢ ܒܗ̇. ܘܥܦܪܐ ܢܬܠ ܠܐܝܠܝܢ ܕܕܡܟܝܢ ܒܗ. ܘܐܘܨܪ̈ܐ ܢܬܠܘܢ ܢܦܫ̈ܬܐ ܕܐܬܣܝܡ ܒܗܘܢ

37. Esdras 4 7:33

    ܘܢܬܓܠ̣ܐ ܡܪܝܡܐ ܥܠ ܟܘܪܣܝܐ ܕܕܝ̣ܢܐ. ܘܢܐܬܐ ܫܘܠܡܐ. ܘܢܥܒܪܘܢ ܪ̈ܚ̣ܡܐ ܘܪܘܚܦܐ ܢܪܚܩ. ܘܢܓܝܪܘܬ ܪܘܚܐ ܬܬܟܢܫ

38. Esdras 4 7:34

    ܕܝܢ̣ܝ ܕܝܢ ܕܝܠܝ ܢܫܬܚܪ ܒܠܚܘܕ. ܘܫܪܪܐ ܢܩܘܡ. ܘܗܝܡܢܘܬܐ ܬܪܘܙ

39. Esdras 4 7:35

    ܘܥ̇ܒܕܐ ܢܐܬܐ. ܘܐܓܪܐ ܢܬܝܕܥ. ܘܙܕܝܩ̈ܘܬܐ ܢܬܥܝܪ̈ܢ. ܘܪ̈ܘܫܥܐ ܠܐ ܢܕܡܟܘܢ

40. Esdras 4 7:36

    ܘܢܬܚܙܐ ܥܘܒܐ ܕܬܫܢܝܩܐ. ܘܠܩܘܒܠܗ ܕܝܢ ܕܗܢܐ ܐܬܪܐ ܕܢܝܚܐ. ܢܬܓܠܐ ܬܢܘܪܐ ܕܓܗܢܐ. ܘܠܩܘܒܠܗ ܬܘܒ ܦܪܕܝܣܐ ܕܒܘܣܡ̈ܐ

41. Esdras 4 7:37

    ܘܢܐܡܪ ܗܝ̇ܕܝܢ ܡܪܝܡܐ ܠܘܩܒܠ ܗ̇ܢܘܢ ܥܡܡ̈ܐ ܕܡܬܬܥܝܪܝܢ. ܚܘܪܘ ܘܚܙܘ ܒܡܢܐ ܟܦ̣ܪܬܘܢ. ܐܘ ܠܡ̣ܢܘ ܠܐ ܦܠ̣ܚܬܘܢ ܐܘ ܦܘܩܕ̈ܢܘܗܝ ܕܡ̣ܢܘ ܐܣܠܝܬܘܢ

42. Esdras 4 7:38

    ܚܙܘ ܗܟܝܠ ܠܘܩܒܠܟܘ̇ܢ. ܗܐ ܗܪܟܐ ܢܝ̈ܚܐ ܘܦܘ̈ܢܩܐ. ܘܬܡܢ ܢܘܪܐ ܘܬܫܢܝܩܐ. ܗܠܝܢ ܢܡܠܠ̣ ܠܗܘܢ ܒܗ̇ܘ ܝܘܡܐ ܕܕܝܢ̣ܐ

43. Esdras 4 7:39

    ܗ̇ܘ ܓܝܪ ܝܘܡܐ ܕܕܝ̣ܢܐ ܗܟܢܐ ܐܝܬܘܗܝ. ܠܐ ܫܡܫܐ ܐܝܬ ܒܗ. ܘܠܐ ܣܗܪܐ ܘܠܐ ܟܘܟ̈ܒܐ

44. Esdras 4 7:40

    ܘܠܐ ܥܢ̈ܢܐ ܘܠܐ ܒܪ̈ܩܐ. ܘܠܐ ܪ̈ܥܡܐ. ܘܠܐ ܪ̈ܘܚܐ. ܘܠܐ ܡ̈ܝܐ. ܘܠܐ ܐܐܪ. ܘܠܐ ܚܫܘܟܐ̣. ܘܠܐ ܪܡܫܐ. ܘܠܐ ܨܦܪܐ

45. Esdras 4 7:41

    ܘܠܐ ܩܝܛܐ. ܘܠܐ ܣܬܘܐ. ܘܠܐ ܪܝܫ ܫܢܬܐ. ܘܠܐ ܚܘܡܐ. ܘܠܐ ܓܠܝܕܐ. ܘܠܐ ܥܪܝܐ. ܘܠܐ ܒܪܕܐ. ܘܠܐ ܛܠܐ. ܘܠܐ ܡܛܪܐ

46. Esdras 4 7:42

    ܘܠܐ ܛܗܪܐ. ܘܠܐ ܠܠܝܐ. ܘܠܐ ܐܝܡܡܐ. ܘܠܐ ܢܘܗܪܐ. ܘܠܐ ܢܗܝܪܐ. ܘܠܐ ܒܗܩܐ ܘܠܐ ܙܗܪܐ. ܐܠܐ ܐܢ ܒܠܚܘܕ ܙܠܝܩܐ ܕܬܫܒܘܚܬܗ ܕܡܪܝܡܐ. ܕܡܢܗ ܥܬܝܕܝܢ ܕܢܗܘܘܢ ܚ̇ܙܝܢ ܡܕܡ ܕܡܬܩܢ

47. Esdras 4 7:43

    ܢܘܓܪܐ ܕܝܢ ܢܗܘܐ ܠܗ ܐܝܟ ܫܒܬܐ ܕܫ̈ܢܝܐ

48. Esdras 4 7:44

    ܗܢܘ ܕܝܢܝ ܘܢܡܘܣܗ ܘܠܟ ܒܠܚܘܕܝܟ ܐܘ̣ܕܥܬ ܐܢܘܢ

49. Esdras 4 7:45

    ܘܥ̇ܢܝܬ ܘܐܡ̇ܪܬ. ܡܪܝܐ ܡܪܝ ܐܦ ܗ̇ܝܕܝܢ ܐܡ̇ܪܬ. ܘܗܫܐ ܬܘܒ ܐܡ̇ܪܢܐ. ܕܛܘܒܝܗܘܢ ܠܟܠ ܐܝܠܝܢ ܕܐܬܘ ܘܢܛ̣ܪܘ ܦܘܩ̈ܕܢܐ ܐܝܠܝܢ ܕܡܬܣܝܡܝܢ ܡܢܟ

50. Esdras 4 7:46

    ܐܠܐ ܥܠ ܐܝܠܝܢ ܕܒܥܘܬܝ ܥܠܝܗܘܢ. ܡ̣ܢܘ ܓܝܪ ܡܢ ܐܝܠܝܢ ܕܐ̣ܬܘ ܕܠܐ ܚܛܘ. ܐܘ ܡ̣ܢܘ ܡܢ ܝܠܝ̈ܕܐ ܕܠܐ ܥ̣ܒܪ ܦܘܩܕܢܟ

51. Esdras 4 7:47

    ܘܗܫܐ ܚܙܢܐ ܕܠܙܥܘܪ̈ܐ ܗܘ ܥܬܝܕ ܗ̇ܘ ܥܠܡܐ ܕܐ̇ܬܐ ܕܢܥܒܕ ܒܘܣܡܐ. ܠܣܓ̈ܝܐܐ ܕܝܢ ܬܫܢܝܩܐ

52. Esdras 4 7:48

    ܐܝܬܘܗܝ ܓܝܪ ܒܢ ܠܒܐ ܒܝ̣ܫܐ̣. ܕܗ̣ܘ ܐܛܥܝܢ ܡܢ ܗܠܝܢ. ܘܕܒܪܢ ܠܚܒ̇ܠܐ ܘܐܘܪ̈ܚܬܐ ܕܡܘܬܐ ܚܘ̇ܝܢ. ܘܫܒ̈ܝܠܐ ܕܐܒܕܢܐ ܐܘܕܥܢ. ܘܐܪܚܩܢ ܡܢ ܚ̈ܝܐ. ܘܗܕܐ ܠܐ ܗܘܐ ܠܙܥܘܪ̈ܐ. ܐܠܐ ܚ̇ܒܪ ܕܠܟܠܗܘܢ ܐܝܠܝܢ ܕܗܘܘ ܀

53. Esdras 4 7:49

    ܘܥ̣ܢܐ ܘܐܡ̣ܪ ܠܝ. ܫܡܥܝܢܝ ܥܙܪܐ ܘܐܡ̇ܪ ܠܟ. ܘܡܢܕܪܝܫ ܐܪܬܝܟ

54. Esdras 4 7:50

    ܡܛܠ ܗܢܐ ܠܐ ܥܒ̣ܕ ܡܪܝܡܐ ܚܕ ܥܠܡܐ ܐܠܐ ܬܪܝܢ

55. Esdras 4 7:51

    ܐܢܬ ܕܝܢ ܕܐܡ̣ܪܬ ܕܠܐ ܣܓܝܐܝܢ ܙܕܝܩ̈ܐ ܐܠܐ ܙܥܘܪܝܢ̣. ܫܡ̣ܥ ܠܘܩܒܠ ܗܠܝܢ

56. Esdras 4 7:52

    ܟܐ̈ܦܐ ܡܝܩܪ̈ܬܐ ܐܢ ܢܗ̈ܘܝܢ ܠܟ ܘܙܥܘܪ̈ܝܢ ܠܘܩܒܠ ܡܢܝܢܗܝܢ ܕܗܠܝܢ̣. ܐܬܩܢ ܠܟ ܐܒܪܐ ܘܚܨܦܐ

57. Esdras 4 7:53

    ܘܐܡ̣ܪܬ ܕܐܝ̇ܟܢܐ ܡܪܝ ܡܫܟܚ̇ܐ ܀

58. Esdras 4 7:54

    ܘܥ̣ܢܐ ܘܐܡ̣ܪ ܠܝ. ܠܐ ܗܘܐ ܒܠܚܘܕ ܗܕܐ̣. ܐܠܐ ܫܐܠܝܗ̇ ܠܐܪܥܐ ܘܬܐܡܪ ܠܟ. ܘܐܡ̣ܪ ܠܗ̇ ܘܬܫܬܥܐ ܠܟ

59. Esdras 4 7:55

    ܐܡ̣ܪ ܠܗ̇. ܕܗܒܐ ܝܠ̣ܕܬ ܘܣܐܡܐ ܘܢܚܫܐ. ܘܦܪܙܠܐ ܘܐܒܪܐ. ܘܚܨܦܐ

60. Esdras 4 7:56

    ܣܓܝ ܗܘ ܕܝܢ ܣܐܡܐ ܡܢ ܕܗܒܐ. ܘܢܚܫܐ ܡܢ ܣܐܡܐ. ܘܦܪܙܠܐ ܡܢ ܢܚܫܐ. ܘܐܒܪܐ ܡܢ ܦܪܙܠܐ. ܘܚܨܦܐ ܡܢ ܐܒܪܐ

61. Esdras 4 7:57

    ܦܚܡ ܗܟܝܠ ܐܢܬ ܘܚܙܝ. ܕܐܝܠܝܢ ܡܝܩܪ̈ܢ ܘܚܒ̈ܝܒܢ. ܣܓܝܐ̈ܬ̣ܐ ܐܘ ܙܥܘܪ̈ܝܬܐ

62. Esdras 4 7:58

    ܘܥܢ̇ܝܬ ܘܐܡ̇ܪܬ. ܡܪܝܐ ܡܪܝ. ܣܓܝܐ̈ܬܐ ܕܙ̈ܠܝܠܢ ܘܙܥܘܪ̈ܝܬܐ ܝܩܝܪ̈ܢ

63. Esdras 4 7:59

    ܘܥ̣ܢܐ ܘܐܡ̣ܪ ܠܝ. ܦܚ̇ܡ ܗܟܝܠ ܐܢܬ ܒܢܦܫܟ ܡܕܡ ܕܐܬ̣ܪܥܝܬ. ܡܛܘܠ ܕܟܠ ܕܐܝܬ ܠܗ ܩܠܝܠ ܗܘ ܕܙܥܘܪ ܚ̇ܕܐ ܒܗ ܝܬܝܪ ܡܢ ܗ̇ܘ ܕܐܝܬ ܠܗ ܣܓܝܐ̈ܬܐ

64. Esdras 4 7:60

    ܗܟܢܐ ܐܝܬܘܗܝ ܡܘܠܟܢܗ ܕܕܝܢ̣ܝ. ܚܕܐ ܐܢܐ ܓܝܪ ܘܡܬܒܣܡ ܐܢܐ ܒܙܥܘܪ̈ܐ ܕܚܝܝܢ. ܡܛܠ ܕܗ̣ܢܘܢ ܐܢܘܢ ܐܝܠܝܢ ܕܗܫܐ ܬܫܒܘܚܬܝ ܡܫܪܪܝܢ. ܘܐܝܠܝܢ ܕܡܛܠܬܗܘܢ ܫܡܝ ܐܫܬܒܚ ܗܫܐ

65. Esdras 4 7:61

    ܘܠܐ ܡܬܬܥܝܩ ܐܢܐ ܥܠ ܣܘܓܐܗܘܢ ܕܐܝܠܝܢ ܕܐܒ̇ܕܝܢ. ܗ̣ܢܘܢ ܐܢܘܢ ܓܝܪ ܗܠܝܢ ܕܗܫܐ ܐܬܕܡܝܘ ܠܗܒܠܐ. ܘܐܝܟ ܬܢܢܐ ܗ̣ܢܘܢ ܐܬܚܫܒܘ. ܘܐܝܟ ܫܠܗܒܝܬܐ ܐܬܦܚܡܘ ܕܕܠܩܘ̇ ܘܕܥܟܘ ܀ •

66. Esdras 4 7:62

    ܘܥ̇ܢܝܬ ܘܐܡ̇ܪܬ. ܐܘ ܡܢܐ ܥܒ̣ܕܬܝ ܐܪܥܐ ܕܗܠܝܢ ܐܬܝܠܕܘ ܡܢܟܝ. ܘܐ̇ܙܠܝܢ ܠܐܒܕܢܐ. ܐܢܕܝܢ ܡܕܥܐ ܡܢ ܥܦܪܐ ܗ̇ܘܐ. ܐܝܟ ܫܪܟܐ ܕܒ̣ܪ̈ܝܬܐ

67. Esdras 4 7:63

    ܦܩܚ ܗܘܐ ܕܐܠܘ ܐܦ ܗ̣ܘ ܥܦܪܐ. ܠܐ ܕܝܢ ܗ̣ܘܐ. ܡܛܠ ܕܡܕܥܐ ܠܐ ܢܗܘܐ ܡܢ ܬܡܢ

68. Esdras 4 7:64

    ܗܫܐ ܕܝܢ ܡܕܥܐ ܥܡܢ ܪܒ̇ܐ. ܘܡܛܠ ܗܢܐ ܡܫܬܢܩܝܢ ܚܢܢ. ܡܛܠ ܕܟܕ ܝܕ̇ܥܝܢ ܚܢܢ ܐܒ̇ܕܝܢܢ

69. Esdras 4 7:65

    ܢܬܐ̈ܒܠܢ ܫܪ̈ܒܬܗܘܢ ܕܒܢܝ̈ܢܫܐ. ܚܝ̈ܘܬܐ ܕܝܢ ܕܕܒܪܐ ܬܚܕܐ. ܢܐܠܘܢ ܟܘܠܗܘܢ ܝܠܝ̣̈ܕܐ. ܒܥܝܪܐ ܕܝܢ ܘܥܢܐ ܢܬܒܣܡܘܢ

70. Esdras 4 7:66

    ܕܠܗܘܢ ܦܩ̇ܚ ܣ̇ܓܝ ܛܒ ܡܢܢ. ܡܛܠ ܕܠܐ ܡܣܟܝܢ ܠܕܝ̣ܢܐ. ܐܦ ܠܐ ܝܕ̇ܥܝܢ ܬܫܢܝܩܐ. ܐܦ ܠܐ ܚ̈ܝܐ ܡܢ ܒܬܪ ܡܘܬܐ ܐܬܡܠܟܘ ܠܗܘܢ

71. Esdras 4 7:67

    ܚܢܢ ܓܝܪ ܡܢܐ ܝܬ̇ܪܝܢܢ ܕܡܚܐ ܚ̇ܝܝܢ ܚܢܢ. ܐܠܐ ܡܫܬܢܩܘ ܡܫܬܢܩܝܢ ܚܢܢ

72. Esdras 4 7:68

    ܟܠܗܘܢ ܓܝܪ ܝܠܝܕ̈ܐ ܡܬܦܠܦܠܝܢ ܐܢܘܢ ܒܚܛܗ̈ܐ. ܘܡ̣ܠܝܢ ܐܢܘܢ ܥ̣ܘܠܐ ܘܝܩܝܪ̈ܢ ܥܠܝܗܘܢ ܡ̈ܦܠܬܗܘܢ

73. Esdras 4 7:69

    ܘܐܠܘ ܡܢ ܒܬܪ ܡܘܬܐ ܠܐ ܐܬ̇ܝܢ ܗ̇ܘܝܢ ܠܕܝܢ̣ܐ ܣ̇ܓܝ ܦܩ̇ܚ ܗܘܐ ܠܢ ܀

74. Esdras 4 7:70

    ܘܥ̣ܢܐ ܘܐܡ̣ܪ ܠܝ. ܘܟܕ ܡܪܝܡܐ ܡܥܒܕ ܥ̇ܒܕ ܗܘܐ ܠܗ ܠܥܠܡܐ. ܘܠܐܕܡ ܘܠܟܘܠ ܐܝܠܝܢ ܕܗܘܘ ܡܢܗ ܠܘܩܕܡ ܥܬܕ ܕܝܢ̣ܐ. ܘܐܝܠܝܢ ܕܕܕܝ̣ܢܐ ܐ̈ܢܝܢ

75. Esdras 4 7:71

    ܘܗܫܐ ܡܢ ܡ̈ܠܝܟ ܐܣܬܟܠ ܕܐܡ̣ܪܬ ܕܡܕܥܐ ܥܡܢ ܪܒܐ

76. Esdras 4 7:72

    ܥܡܘܪ̈ܝܗ̇ ܗܟܝܠ ܕܐܪܥܐ̣ ܡܛܠ ܗܕܐ ܗܘ ܡܫܬܢܩܝܢ. ܕܟܕ ܐܝܬ ܒܗܘܢ ܡܕܥܐ ܐܥܘܠܘ. ܘܩ̣ܒܠܘ ܦܘܩ̈ܕܢܐ ܘܠܐ ܢܛ̣ܪܘ ܐܢܘܢ. ܐܦ ܠܢܡܘܣܐ ܕܐܬܬܣܝܡ ܠܗܘܢ ܛܠܡܘܗܝ

77. Esdras 4 7:73

    ܐܦ ܡܢܐ ܐܝܬ ܗܘܐ ܠܗܘܢ ܕܢܐܡܪܘܢ ܒܕܝ̣ܢܐ. ܐܘ ܐܝܟ̇ܢܐ ܢܦܬܚܘܢ ܦܘܡܗܘܢ. ܘܢܡܠܠܘܢ ܒܙܒܢܐ ܐܚܪܝܐ

78. Esdras 4 7:74

    ܟܡܐ ܓܝܪ ܙܒܢܐ ܐܓܪ ܪܘܚܗ ܡܪܝܡܐ ܠܥܡܘܪ̈ܘܗܝ ܕܥܠܡܐ. ܘܠܐ ܗܘܐ ܡܛܠܬܗܘܢ ܕܝܠܗܘܢ. ܐܠܐ ܡܛܠ ܙܒ̈ܢܐ ܕܣܝ̣ܡܝ̣ܢ ܀

79. Esdras 4 7:75

    ܘܥ̇ܢܝܬ ܘܐܡܪܬ. ܐܢ ܐܫܟ̇ܚܬ ܪ̈ܚܡܐ ܩܕܡܝܟ ܡܪܝܐ ܡܪܝ̣. ܐܘܕܥܝܗܝ ܠܥܒܕܟ ܐܦ ܗܕܐ. ܐܝܢ ܡܢ ܒܬܪ ܡܘܬܐ ܗܫܐ. ܟܕ ܝܗ̇ܒܝܢܢ ܟܠ ܚܕ ܚܕ ܡܢܢ ܢܦܫܢ. ܐܢ ܡܬܢܛܪܘ ܡܬܢܛܪܝܢܢ ܒܢܝܚܐ ܥܕܡܐ ܕܢܐܬܘܢ ܗ̇ܢܘܢ ܙܒ̈ܢܐ̇. ܕܒܗܘܢ ܥܬܝܕ ܐܢܬ ܕܬܚܕܬ ܒܪ̣ܝܬܟ. ܐܘ ܡܢ ܗܫܐ ܡܫܬܢܩܝܢܢ

80. Esdras 4 7:76

    ܘܥ̣ܢܐ ܘܐܡ̣ܪ ܠܝ. ܐܘܕܥܟ ܐܦ ܥܠ ܗܕܐ. ܐܢܬ ܕܝܢ ܠܐ ܬܚܠܛ ܢܦܫܟ ܥܡ ܥܨ̈ܝܐ. ܘܠܐ ܬܡܢܐ ܩܢܘܡܟ ܥܡ ܐܝܠܝܢ ܕܡܫܬܢܩܝܢ

81. Esdras 4 7:77

    ܐܝܬ ܗܘ ܠܟ ܓܝܪ ܐܘܨܪܐ ܕ̇ܥ̈ܒܕܐ ܕܣܝܡ ܠܘܬ ܡܪܝܡܐ. ܘܠܐ ܢܬܚܙܐ ܠܟ ܥܕܡܐ ܠܙܒ̈ܢܐ ܐܚܪ̈ܝܐ

82. Esdras 4 7:78

    ܥܠ ܡܘܬܐ ܕܝܢ ܗܕܐ ܗܝ ܡܠܬܐ. ܐܡܬܝ ܕܢܦܘܩ ܩܨܐ ܕܓܙܪ ܕܝ̣ܢܐ ܡܢ ܠܘܬ ܡܪܝܡܐ ܥܠ ܒܪܢܫܐ ܕܢܡܘܬ. ܡܐ ܕܡܬܦܪܫܐ ܢܫܡܬܐ ܡܢ ܦܓܪܐ. ܕܬܫܬܕܪ ܠܘܬ ܗ̇ܘ ܕܝܗܒܗ̇ ܒܩܕܡܐ ܣ̇ܓܕܐ ܠܬܫܒܘܚܬܗ ܕܐܠܗܐ

83. Esdras 4 7:79

    ܘܐܢ ܕܝܢ ܐܝܬܝܗ̇ ܡܢ ܛܠܘܡ̈ܐ ܐܘ ܡܢ ܐܝܠܝܢ ܕܠܐ ܢܛ̣ܪܘ ܐܘܪ̈ܚܬܗ ܕܡܪܝܡܐ. ܐܘ ܡܢ ܐܝܠܝܢ ܕܣܢܘ ܐܢܘܢ ܠܕܚ̈ܠܘܗܝ ܕܐܠܗܐ

84. Esdras 4 7:80

    ܗܠܝܢ ܢܦܫ̈ܬܐ ܠܐܘܨܪ̈ܐ ܠܐ ܥ̈ܠܢ. ܐܠܐ ܡܢ ܗܫܐ ܗ̈ܘܝ̣ܢ ܒܬܫܢܝܩܐ. ܘܡܬ̈ܬܢܚܢ ܘܡܬ̈ܬܥܝܩܢ ܒܫܒܥ ܐܘܪ̈ܚܢ

85. Esdras 4 7:81

    ܐܘܪܚܐ ܩܕܡܝܬܐ ܕܥ̈ܨܝ ܠܢܡܘܣܗ ܕܡܪܝܡܐ

86. Esdras 4 7:82

    ܐܘܪܚܐ ܕܬܪܬܝܢ ܕܠܐ ܡ̈ܨܝܢ ܕܢܬܗ̈ܦܟܢ ܘܢܥܒ̈ܕܢ ܛ̇ܒ̈ܬܐ ܕܚ̈ܝܝܢ ܒܗܝܢ ܀

87. Esdras 4 7:83

    ܐܘܪܚܐ ܕܬܠܬ ܕܚܙ̈ܝܢ ܐܓܪܐ ܕܣ̣ܝܡ ܠܐܝܠܝܢ ܕܗܝ̣ܡܢܘ ܀

88. Esdras 4 7:84

    ܐܘܪܚܐ ܕܐܪܒܥ ܡܐ ܕܝ̣ܕܥ ܘܐܣܬܟܠ ܬܫܢܝܩܐ ܕܥܬܝܕ ܠܗܝܢ ܒܐܚܪܝܬܐ. ܗ̇ܘ ܕܒܗ ܡܬܟ̈ܘܢܢ ܢܦܫܬ̈ܗܘܢ ܕܪ̈ܫܝܥܐ. ܡܛܠ ܕܟܕ ܐܝܬ ܗܘܐ ܠܗܝܢ ܙܒܢܐ ܕܦܘܠܚܢܐ ܠܐ ܐܫܬܥܒܕܝ ܠܦܘܩ̈ܕܢܘܗܝ ܕܡܪܝܡܐ • ܀ •

89. Esdras 4 7:85

    ܐܘܪܚܐ ܕܚܡܫ̣. ܕܚ̈ܙܝܢ ܐܘܨܪ̈ܐ ܕܢܦܫ̈ܬܐ ܐܚܪ̈ܢܝܬܐ ܕܡܬܢܛܪ̈ܢ ܡܢ ܡܠܐ̈ܟܐ ܒܢܝܚܐ ܣܓܝܐܐ ܀

90. Esdras 4 7:86

    ܐܘܪܚܐ ܕܫܬ. ܕܚ̈ܙܝܢ ܬܫܢܝܩܐ ܕܡܢ ܗܫܐ ܡܛܝܒ ܠܗܝܢ • ܀ ܀

91. Esdras 4 7:87

    ܐܘܪܚܐ ܕܫܒܥ ܕܗ̣ܝ ܪܒܐ ܡܢ ܟܠܗܝܢ ܐܘܪ̈ܚܬܐ ܕܐܬܐܡܪ ܡܢ ܩܕܝܡ. ܕܫ̈ܝܚܢ ܒܒܗܬܬܐ ܘܓܡܝܪ̈ܢ ܒܬܚܡܨܬܐ. ܘܚܡ̇ܝܢ ܒܕܚܠܬܐ ܕܚ̇ܙܝܢ ܬܫܒܘܚܬܗ ܕܡܪܝܡܐ. ܗ̇ܘ ܕܗܫܐ ܚܛܝܢ ܩܕܡܘܗܝ. ܕܒܚܝ̈ܝܗܝܢ. ܘܩܕܡ ܗ̇ܘ ܕܥܬܝ̈ܕܢ ܕܒܐܚܪܝܬܐ ܢܬܬܕ̈ܝܢܢ ܀

92. Esdras 4 7:88

    ܕܗܠܝܢ ܕܝܢ ܕܢܛ̣ܪܘ ܐܘܪܚܗ ܕܡܪܝܡܐ. ܗܕܐ ܗܝ ܐܘܪܚܐ ܟܕ ܢܡܛܐ ܝܘܡܐ ܕܢܬܦܪ̈ܩܢ ܡܢ ܡܐܢܐ ܗܢܐ ܕܡܬܚܒܠ

93. Esdras 4 7:89

    ܒܗܘ̇ ܓܝܪ ܙܒܢܐ ܕܥܡ̇ܪ ܒܗ ܐܫܬܥܒܕ ܠܡܪܝܡܐ ܒܠܐܘܬܐ. ܘܒܟܠ ܫ̈ܥܝܢ ܣܝ̇ܒܪ ܩܘܢܕܘܢܘܣ ܡܛܠ ܕܓܡܝܪܐܝܬ ܢ̇ܛܪ̈ܢ ܢܡܘܣܗ. ܗ̇ܘ ܕܣܡ ܠܗܝܢ ܢܡܘܣܐ

94. Esdras 4 7:90

    ܡܛܠ ܗܢܐ̣ ܗܢܘ ܦܬܓܡܐ ܕܥܠܝܗܝܢ

95. Esdras 4 7:91

    ܠܘܩܕܡ ܚܙ̈ܝܢ ܒܚܕܘܬܐ ܣܓܝܐܬܐ ܬܫܒܘܚܬܗ ܕܡܪܝܡܐ ܗ̇ܘ ܕܕܒ̇ܪ ܐ̈ܢܝܢ. ܘܡܬ̈ܬܢܝܚܢ ܘܐ̈ܬܝܢ ܒܫܒܥ ܐܘܪ̈ܚܢ ܀

96. Esdras 4 7:92

    ܐܘܪܚܐ ܩܕܡܝܬܐ. ܡܛܠ ܕܒܠܐܘܬܐ ܣܓܝܐܬܐ ܐܬܟܬܫ ܠܡܙܟܐ ܡܚܫܒܬܐ ܒܝܫ̣ܬܐ ܕܐܬܓܒ̣ܠܬ ܥܡܗܝܢ. ܕܠܐ ܢܛܥ̈ܝܢ ܡܢ ܚ̈ܝܐ ܠܡܘܬܐ ܀

97. Esdras 4 7:93

    ܐܘܪܚܐ ܕܬܪܬܝܢ. ܕܚ̈ܙܝܢ ܗܘܦܟܐ ܕܡܬܗ̈ܦܟܢ ܘܡܬܛܪ̈ܦܢ ܒܗ ܢܦܫ̈ܬܗܘܢ ܕܪ̈ܫܝܥܐ. ܘܬܫܢܝܩܐ ܕܢܛܝܪ ܠܗܘܢ ܀ •

98. Esdras 4 7:94

    ܐܘܪܚܐ ܕܬܠܬ ܕܚ̇ܙܝܢ ܣܗܕܘܬܐ ܕܡܣܗܕ ܥܠܝܗܝܢ ܓܒܘܠܗܝܢ. ܡܛܠ ܕܒܚܝ̈ܝܗܝܢ ܢܛܪ ܢܡܘܣܐ ܕܐܬܗܝܡܢ ܀

99. Esdras 4 7:95

    ܐܘܪܚܐ ܕܐܪܒܥ ܕܚ̈ܙܝܢ ܘܡܣ̈ܬܟܠܢ ܢܝܚܐ ܕܗܫܐ ܡܐ ܕܐܬܟܢܫ ܒܐܘܨܪ̈ܝܗܝܢ̣ ܡ̈ܬܬܢܝܚܢ ܒܢܝܚܐ ܣܓܝܐܐ. ܘܡܢ ܡܠܐ̈ܟܐ ܡܬܢܛܪ̈ܢ ܘܬܫܒܘܚܬܐ ܕܢܛܝܪܐ ܠܗܝܢ ܠܐܚܪܝܬܐ ܀

100. Esdras 4 7:96

     ܐܘܪܚܐ ܕܚܡܫ̣. ܕܚ̇ܕܝܢ ܕܐܝ̇ܟܢܐ ܥ̣ܪܩ ܗܫܐ ܡܢ ܡܐ ܕܡܬܚܒܠ. ܘܐܝܟ̇ܢܐ ܝܪ̈ܬܢ ܡܕܡ ܕܥܬܝܕ. ܘܬܘܒ ܚ̇ܙܝܢ ܐܘܠܨܢܐ ܘܣܘܓܐܐ ܕܥܡܠܐ ܕܐܬܚܪܪ ܡܢܗ̇. ܘܪ̈ܘܚܬܐ ܕܥܬ̈ܝܕܢ ܕܢܩ̈ܒܠܢ. ܘܦܘܢ̈ܩܐ ܕܢܣ̈ܒܢ ܘܗܘ̈ܝܢ ܕܠܐ ܡܝ̈ܬܢ • ܀ •

← Previous · Next → — showing 201–300 of 714

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.