← All works

Peshitta Esdras 4

Peshitta (Syriac Old Testament) · 714 sections

1. Esdras 4 5:12

   ܘܢܗܘܐ ܒܗ̇ܘ ܙܒܢܐ. ܢܣܒܪܘܢ ܒ̈ܢܝ ܐܢܫܐ ܘܠܐ ܢܣܒܘܢ. ܘܢܠܐܘܢ ܘܠܐ ܢܫܟܚܘܢ. ܘܢܥܡܠܘܢ ܘܠܐ ܬܬܩܢ ܐܘܪܚܗܘܢ

2. Esdras 4 5:13

   ܗܠܝܢ ܐܬܘ̈ܬܐ ܐܬܦܩܕ ܠܝ ܕܐܡ̇ܪ ܠܟ. ܘܐܢ ܕܝܢ ܬܨܠܐ ܬܘܒ ܘܬܒܥܐ ܐܝܟ ܕܗܫܐ. ܘܬܨܘܡ ܫܒܥܐ ܝܘܡ̈ܝܢ. ܫܡ̇ܥܬ ܕܪ̈ܘܪܒܢ ܡܢ ܗܠܝܢ

3. Esdras 4 5:14

   ܘܐܬ̇ܬܥܝܪܬ. ܘܦܓܪܝ ܪܐ̇ܬ ܗܘܐ ܣ̇ܓܝ. ܘܢܦܫܝ ܠܐܝܐ ܗܘܬ ܐܝܟ ܕܬܦܘܩ

4. Esdras 4 5:15

   ܘܐܚܕܢܝ ܡܠܐ̇ܟܐ ܗ̇ܘ ܕܡܡܠܠ ܒܝ. ܘܚܝܠܢܝ ܘܐܩܝܡܢܝ ܥܠ ܪ̈ܓܠܝ ܀ ܀ •

5. Esdras 4 5:16

   ܘܗ̣ܘܐ ܒܠܠܝܐ ܕܬܪܝܢ. ܘܐ̣ܬܐ ܠܘܬܝ ܦܣܠܛܐܝܠ ܪܝܫܗ ܕܥܡܐ. ܘܐܡ̣ܪ ܠܝ. ܐܝ̇ܟܐ ܗ̣ܘܝܬ. ܘܠܡܢܐ ܟܡܝܪ̈ܢ ܐ̈ܦܝܟ

6. Esdras 4 5:17

   ܐܘ ܠܐ ܝܕ̇ܥ ܐܢܬ. ܕܐܢܬ ܗܘ ܕܐܬܗ̣ܝܡܢܬ ܥܠ ܐܝܣܪܝܠ ܒܐܬܪܐ ܕܫܒܝܬܗܘܢ

7. Esdras 4 5:18

   ܩܘܡ ܗܟܝܠ ܘܐܟܘܠ ܠܚܡܐ ܩܠܝܠ. ܕܠܐ ܬܫܒܘܩ ܐܢܘܢ ܐܝܟ ܪܥ̇ܝܐ ܠܡܪܥܝܬܗ ܒܐܝ̣ܕܐ ܕܕܐ̈ܒܐ ܚ̈ܒܠܐ

8. Esdras 4 5:19

   ܘܐܢܐ ܐܡ̇ܪܬ ܠܗ. ܙܠ ܠܟ ܡܢܝ ܘܠܐ ܬܬܩܪܒ ܨܐܕܝ ܥܕܡܐ ܠܫܒܥܐ ܝܘܡ̈ܝܢ. ܘܗܝ̇ܕܝܢ ܬܐܬܐ ܠܘܬܝ ܘܐܫܡ̇ܥܟ ܡ̈ܠܐ. ܘܟܕ ܐܡ̇ܪܬ ܠܗ ܐܙ̣ܠ ܠܗ ܡܢ ܠܘܬܝ ܀

9. Esdras 4 5:20

   ܘܐܢܐ ܨܡ̇ܬ ܫܒܥܐ ܝܘܡ̈ܝܢ. ܟܕ ܡܬܬܢܚ ܗ̇ܘܝܬ ܘܒܟ̇ܐ̣ ܐܝܟ ܕܦܩܕܢܝ ܪܡܐܝܠ ܡܠܐܟܐ

10. Esdras 4 5:21

    ܘܗ̣ܘܐ ܡܢ ܒܬܪ ܫܒܥܐ ܝܘ̈ܡܝܢ. ܘܗܐ ܬܘܒ ܡܚ̈ܫܒܬܗ ܕܠܒܝ ܐ̈ܠܨܢ ܗ̈ܘܝ ܠܝ ܣ̇ܓܝ

11. Esdras 4 5:22

    ܘܢܣ̣ܒܬ ܢܦܫܝ ܪܘܚܐ ܕܒܘܝܢܐ. ܘܬܘܒ ܫ̇ܪܝܬ ܠܡܡܠܠܘ ܩܕܡ ܡܪܝܡܐ ܡ̈ܠܐ ܗܠܝܢ ܕܒܥܘܬܐ ܘܕܬܟܫܦܬܐ

12. Esdras 4 5:23

    ܘܥ̇ܢܝܬ ܘܐܡ̇ܪܬ. ܐܘ ܡܪܝܐ ܡܪܝ. ܡܢ ܟܘܠܗܘܢ ܥܒ̈ܝܗ̇ ܕܐܪܥܐ ܘܐ̈ܝܠܢܝܗ̇ ܓܒܝܬ ܠܟ ܓܦܬܐ ܚܕܐ

13. Esdras 4 5:24

    ܘܡܢ ܟܠܗܝܢ ܐܪ̈ܥܬܐ ܕܬܒܝܠ ܓ̣ܒܝܬ ܠܟ ܐܬܪܐ ܚܕ

14. Esdras 4 5:25

    ܘܡܢ ܟܘܠܗܘܢ ܬܗ̈ܘܡܐ ܕܝܡܐ ܐܣܓܝܬ ܠܟ ܚܕ ܢܚܠܐ. ܘܡܢ ܟܘܠܗܘܢ ܗܒ̈ܒܐ ܕܬܒܝܠ ܓܒ̣ܝܬ ܠܟ ܗܒܒܐ ܚܕ. ܘܡܢ ܟܠܗܝܢ ܡ̈ܕܝܢܬܐ ܕܐܬܒܢܝ ܩܕ̣ܫܬ ܠܟ ܠܨܗܝܘܢ

15. Esdras 4 5:26

    ܘܡܢ ܟܘܠܗ̇ ܦܪܚܬܐ ܕܐܬܒ̣ܪܝܬ ܫܡ̣ܗܬ ܠܟ ܝܘܢܐ ܚܕܐ. ܘܡܢ ܟܠܗ̇ ܥܢܐ ܕܐܬܒ̣ܪܝܬ ܨܒ̣ܝܬ ܒܢܩܝܐ ܚܕܐ

16. Esdras 4 5:27

    ܘܡܢ ܣܘܓܐܐ ܕܥܡ̈ܡܐ ܩ̣ܪܒܬ ܠܟ ܥܡܐ ܚܕ. ܘܢܡܘܣܐ ܗ̇ܘ ܕܐܬܒܚܪ ܡܢ ܟܠ̣. ܝܗ̣ܒܬ ܠܥܡܐ ܗ̇ܘ ܕܪܚ̣ܡܬ

17. Esdras 4 5:28

    ܘܗܫܐ ܡܪܝܐ ܠܡܢܐ ܐܫܠ̣ܡܬ ܚܕ ܠܣܓ̈ܝܐܐ. ܘܒܣܪܬܝܗܝ ܠܚܕ ܥ̇ܩܪܐ ܝܬܝܪ ܡܢ ܣܓ̈ܝܐܐ. ܘܒ̣ܕܪܬ ܘܕ̣ܪܝܬ ܠܝܚܝܕܝܟ ܒܝܢܬ ܣ̈ܓܝܐܐ

18. Esdras 4 5:29

    ܘܕ̇ܫܘ ܗܠܝܢ ܕܩܝ̇ܡܝܢ ܠܘܩܒܠ ܦܘ̈ܩܕܢܝܟ. ܠܐܝܠܝܢ ܕܗܝܡܢܘ ܒܕܝܬܩܐ ܕܝܠܟ

19. Esdras 4 5:30

    ܘܐܢܕܝܢ ܡܣ̣ܢܐ ܣܢܝܬܝܗܝ ܠܥܡܟ. ܒܐܝ̈ܕܝܟ ܕܝܠܟ ܚܝܒ ܗܘܐ ܕܢܬܪܕܐ ܀ ܀

20. Esdras 4 5:31

    ܘܡܢ ܒܬܪ ܕܡ̇ܠܠܬ ܡ̈ܠܐ ܗܠܝܢ̣. ܐܫܬܠܚ ܠܘܬܝ ܡܠܐܟܐ ܗ̇ܘ ܕܐܫܬܠܚ ܗܘܐ ܠܘܬܝ ܒܠܠܝܐ ܕܥ̣ܒܪ

21. Esdras 4 5:32

    ܘܐܡ̣ܪ ܠܝ. ܨܘܬܝܢܝ ܥܙܪܐ ܘܐܫ̇ܡܥܟ. ܘܚܘܪ ܒܝ ܘܐܣܝܡ ܩܕܡܝܟ ܡ̈ܠܐ ܀

22. Esdras 4 5:33

    ܘܥ̇ܢܝܬ ܘܐܡ̇ܪܬ ܠܗ ܡܠܠ ܡܪܝ̇·̇· ܘܐܡ̣ܪ ܠܝ. ܣ̇ܓܝ ܐܬܬܙܝܥܬ ܥܠ ܐܝܣܪܝܠ. ܐܘ ܛܒ ܪܚܡܬܝܗܝ ܝܬܝܪ ܡܢ ܥܒ̇ܘܕܗ

23. Esdras 4 5:34

    ܘܐܡ̇ܪܬ ܠܐ ܡܪܝ̇·̇· ܐܠܐ ܡܚܫ ܗܘ ܚ̇ܫܬ ܘܡ̇ܠܠܬ. ܡܛܘܠ ܕܡܢܓ̈ܕܢ ܠܝ ܟܘ̈ܠܝܬܝ ܟܘܠ ܫܥܐ. ܕܒ̇ܥܐ ܐܢܐ ܕܐܕܪܟ ܓܙܪ ܕܝܢ̣ܐ ܕܡܪܝܡܐ. ܘܐܥ̇ܩܒ ܡܕܡ ܡܢ ܕܝܢ̣ܗ

24. Esdras 4 5:35

    ܘܐܡ̣ܪ ܠܝ ܠܐ ܡܫܟܚ ܐܢܬ. ܘܐܡ̇ܪܬ ܠܗ ܡܛܠ ܡܢܐ ܡܪܝ ܡ̇ܨܠܐ ܐܢܐ. ܐܘ ܠܡܢܐ ܐܬ̣̇ܝܠܕܬ. ܘܠܡܢܐ ܠܐ ܗ̣ܘܐ ܠܝ ܡܪܒܥܗ̇ ܕܐܡܝ ܩܒܪܐ. ܕܠܐ ܐܚܙܐ ܥܡܠܗ ܕܝܥܩܘܒ ܘܠܐܘܬܗ ܕܙܪܥܗ ܕܐܝܣܪܝܠ ܀ • •

25. Esdras 4 5:36

    ܘܥܢ̣ܐ ܘܐܡ̣ܪ ܠܝ. ܡܢܝ ܠܝ ܐܝܠܝܢ ܕܥܕܟܝܠ ܠܐ ܐܬܘ. ܘܟ̇ܢܫ ܠܝ ܛܘ̈ܦܐ ܐܝܠܝܢ ܕܐܬܒܕܪ. ܘܐܘܪܩ ܠܝ ܗ̈ܒܒܐ ܕܝܒ̣ܫܘ

26. Esdras 4 5:37

    ܘܦ̣ܬܚ ܠܝ ܐܘܨܪ̈ܐ ܕܐܚܝܕܝܢ. ܘܐܦܩ ܠܝ ܪ̈ܘܚܐ ܕܚܒܝܫܝܢ ܒܗܘܢ. ܘܚܘܢܝ ܕܡܘܬܐ ܕܦܪ̈ܨܘܦܐ ܐܝܠܝܢ ܕܥܕܟܝܠ ܠܐ ܚܙ̣ܝܬ. ܐܘ ܚܘܢܝ ܕܡܘܬܐ ܕܩܠܐ̣. ܘܗ̇ܝܕܝܢ ܐܘܕܥܟ ܥܠ ܥܡܠܐ ܘܙܒܢܐ ܕܒܥ̣ܝܬ ܕܬܚܙܐ ܀

27. Esdras 4 5:38

    ܘܐܡ̇ܪܬ ܡܪܝܐ ܡܪܝ̣. ܡ̣ܢܘ ܕܡ̣ܨܐ ܕܢܕܥ ܐ̈ܢܝܢ ܠܗܠܝܢ. ܐܠܐ ܐܝ̇ܢܐ ܕܥܡ ܒܢܝ̈ܢܫܐ ܠܐ ܥܡ̇ܪ

28. Esdras 4 5:39

    ܐܢܐ ܕܝܢ ܣܟܠܐ ܘܕܘ̇ܝܐ. ܐ̇ܝܟܢ ܡܫܟܚ ܐܢܐ ܕܐܡܪ ܥܠ ܐܝܠܝܢ ܕܫܐܠܬܢܝ

29. Esdras 4 5:40

    ܘܐܡ̣ܪ ܠܝ. ܐܝܟ ܕܠܐ ܡܫܟܚ ܐܢܬ ܠܡܥܒܕ ܚܕܐ ܡܢ ܗܠܝܢ ܕܐܬܐܡܪ. ܗܟܢܐ ܠܐ ܡ̣ܨܐ ܐܢܬ ܕܬܫܟܚܝܘܗܝ ܠܕܝ̣ܢܝ ܐܘ ܠܫܘܠܡܐ ܕܚܘܒܐ. ܐܝ̇ܢܐ ܕܠܥܡܝ ܐܫܬܘܕܝܬ.

30. Esdras 4 5:41

    ܘܐܡܪܬ. ܐܠܐ ܡܪܝ ܗܐ ܐܫ̇ܬܘܕܝܬ ܠܐܝܠܝܢ ܕܒܫܘܠܡܐ ܐܢܘܢ. ܘܡܢܐ ܢܥܒܕܘܢ ܐܝܠܝܢ ܕܡܢ ܩܕܡܝܢ ܐܢܘܢ. ܐܘ ܚܢܢ ܐܘ ܐܝܠܝܢ ܕܡܢ ܒܬܪܢ

31. Esdras 4 5:42

    ܘܥ̣ܢܐ ܘܐܡ̣ܪ ܠܝ. ܠܟܠܝܠܐ ܕܡܝܬܗ ܠܕܝ̣ܢܝ. ܐܝܟ ܕܠܐ ܐܝܬ ܠܐܚܪ̈ܝܐ ܫܘܘܚܪ̈ܐ̣. ܗܟܢܐ ܐܦܠܐ ܠܩܕܡ̈ܝܐ ܩܘܕܡܐ

32. Esdras 4 5:43

    ܘܥܢܝ̇ܬ ܘܐܡ̇ܪܬ. ܕܠܡܐ ܓܝܪ ܠܐ ܡܫܟܚ ܗ̇ܘܝܬ ܠܡܥܒܕ ܠܐܝܠܝܢ ܕܗܘܘ ܘܠܐܝܠܝܢ ܕܐܝܬܝܗܘܢ. ܘܠܐܝܠܝܢ ܕܗ̇ܘܝܢ ܐܟܚܕܐ. ܕܒܥܓܠ ܕܝ̣ܢܟ ܬܘܕܥ.

33. Esdras 4 5:44

    ܘܥ̣ܢܐ ܘܐܡ̣ܪ ܠܝ. ܠܐ ܡܣܬܪܗܒܐ ܒ̣ܪܝܬܐ̣ ܝܬܝܪ ܡܢ ܒܪܘܝܗ̇. ܘܐܠܐ ܠܐ ܛ̇ܥܢ ܗܘܐ ܥܠܡܐ ܠܐܝܠܝܢ ܕܗ̈ܘܝܢ ܗ̈ܘܝ ܒܗ ܐܟܚܕܐ

34. Esdras 4 5:45

    ܘܬܘܒ ܥܢ̇ܝܬ ܘܐܡ̇ܪܬ. ܘܐܝܟ̇ܢܐ ܐܡܪܬ ܠܥܒ̣ܕܟ. ܕܡܚܝܘ ܬܚ̇ܝܗ̇ ܠܒ̣ܪܝܬܐ. ܗ̇ܝ ܕܐܬ̣ܒܪܝܬ ܡܢܟ ܐܟܚܕܐ. ܐܢ ܗܟܝܠ ܡܚܐ ܚ̈ܝܝܢ ܐܟܚܕܐ. ܘܡܣܝܒܪܐ ܒܪ̣ܝܬܐ. ܡܫܟܚܐ ܗܘܬ̇ ܐܦ ܗܫܐ ܕܬܣܝܒܪ ܐܢܘܢ ܠܐܝܠܝܢ ܕܗ̇ܘܝܢ ܐܟܚܕܐ

35. Esdras 4 5:46

    ܘܥܢ̣ܐ ܘܐ̣ܡܪ ܠܝ. ܫܐܠ ܠܡܪܒܥܐ ܕܐܢܬܬܐ ܘܐܡ̣ܪ ܠܗ. ܕܐܢ ܥܣܪܐ ܝ̇ܠܕ ܐܢܬ. ܠܡܢܐ ܒܙܒܢ ܙܒܢ ܝ̇ܠܕ ܐܢܬ ܠܗܘܢ. ܒܥܝ ܗܟܝܠ ܡܢܗ ܐܝܟ ܕܢܬܠ ܐܢܘܢ ܠܥܣܪ̈ܬܝܗܘܢ

36. Esdras 4 5:47

    ܘܐܡ̇ܪܬ ܕܠܐ ܡܫܟܚ ܡܪܝ. ܐܠܐ ܐܢ ܒܙܒܢ ܙܒܢ

37. Esdras 4 5:48

    ܘܐܡ̣ܪ ܠܝ. ܐܦ ܐܢܐ ܝܗܒܬܗ̇ ܠܐܪܥܐ ܡܪܒܥܐ ܠܐܝܠܝܢ ܕܐ̇ܬܝܢ ܥܠܝܗ̇ ܒܙܒܢ ܙܒܢ

38. Esdras 4 5:49

    ܐ̇ܝܟܢܐ ܓܝܪ ܕܝܠܘܕܐ ܠܐ ܝ̇ܠܕ. ܐܦ ܠܐ ܗ̇ܝ ܕܣܐܒܬ ܬܘܒ. ܗܟܢܐ ܐܦ ܐܢܐ ܐܬܩ̇ܢܬ ܠܥܠܡܐ ܕܒ̇ܪܝܬ

39. Esdras 4 5:50

    ܘܫܐܠܬܗ ܘܐܡ̇ܪܬ. ܡܢ ܗܫܐ ܕܝܗ̣ܒܬ ܠܝ ܐܘܪܚܐ ܐܡ̇ܠܠ ܩܕܡܝܟ. ܗ̣ܝ ܐܡܢ ܨܗܝܘܢ ܕܐܡ̣ܪܬ ܠܝ ܥܠܝܗ̇. ܐܝܢ ܡܪܝ ܥܠܝܡܬܐ ܗܝ ܥܕܟܝܠ̣ ܐܘ ܡܢ ܟܕܘ ܩܪܝܒܐ ܗܝ ܠܣܝܒܘܬܐ

40. Esdras 4 5:51

    ܘܥ̣ܢܐ ܘܐܡ̣ܪ ܠܝ. ܫܐ̇ܠ ܠܗ̇ܝ ܕܝܠ̇ܕܐ ܘܬܐܡܪ ܠܟ

41. Esdras 4 5:52

    ܐܡ̣ܪ ܠܗ̇. ܡܛܠ ܡܢܐ ܐܝܠܝܢ ܕܝܠ̇ܕܐ ܐܢܬܝ ܗܫܐ ܕܡ̇ܝܢ ܠܩܕܡ̈ܝܐ. ܐܠܐ ܒܨܝܪܝܢ ܐܢܘܢ ܒܪܒܘܬܐ

42. Esdras 4 5:53

    ܘܬܐܡܪ ܠܟ ܐܦ ܗ̣ܝ. ܕܐܚܪ̈ܢܐ ܐܢܘܢ ܐܝܠܝܢ ܕܒܚܝܠܐ ܕܥܠܝܡܘܬܐ ܐܬܝܠܕܘ. ܘܐܚܪ̈ܢܐ ܐܢܘܢ ܗܠܝܢ ܕܒܣܝܒܘܬܐ ܡܬܝܠܕܝ̇ܢ ܡܐ ܕܒܨ̇ܪ ܡܪܒܥܐ

43. Esdras 4 5:54

    ܚܘܪ ܐܦ ܐܢܬ ܘܚܙܝ ܕܒܨܝܪܝܢ ܐܢܬܘܢ ܗܘ ܒܪܒܘܬܐ ܡܢ ܗ̇ܢܘܢ ܕܡܢ ܩܕܡܝܟܘܢ

44. Esdras 4 5:55

    ܐܦ ܐܝܠܝܢ ܕܡܢ ܒܬܪܟܘܢ ܐܬ̇ܝܢ ܗܘ̇ܝܢ ܒܨܝܪ ܝܬܝܪ ܡܢܟܘܢ. ܡܛܠ ܕܡܢ ܟܕܘ ܣܐ̣ܒܬ ܠܗ̇ ܒ̣ܪܝܬܐ ܘܥܘܙܐ ܕܥܠܝܡܘܬܗ̇ ܥ̣ܒܪ ܠܗ

45. Esdras 4 5:56

    ܘܥ̇ܢܝܬ ܘܐܡܪܬ. ܒܥ̇ܐ ܐܢܐ ܡܢܟ ܡܪܝ ܐܢ ܐܫܟܚ̇ܬ ܪ̈ܚ̣ܡܐ ܩܕܡܝܟ̣. ܐܘܕܥܝܗܝ ܠܥܒ̣ܕܟ ܕܒܝܕ ܡܢ̣ܘ ܦܩ̇ܕ ܐܢܬ ܒ̣ܪܝܬܟ

46. Esdras 4 6:1

    ܘܥ̣ܢܐ ܘܐܡ̣ܪ ܠܝ. ܩܕܡܝ ܒܝܕ ܒܪ ܐܢܫܐ. ܫܘܠܡܐ ܕܝܢ ܒܐܝ̈ܕܝ ܕܝܠܝ. ܐܝܟܢܐ ܓܝܪ ܕܡܢ ܩܕܡ ܕܬܗܘܐ ܐܪܥܗ̇ ܕܬܒܝܠ ܘܡܢ ܩܕܡ ܕܢܩܘܡܘܢ ܡܦܩ̈ܢܘܗܝ ܕܥܠܡܐ. ܘܡܢ ܩܕܡ ܕܢܢܫ̈ܒܢ ܝܘܩܪܗܝܢ ܕܪ̈ܘܚܐ

47. Esdras 4 6:2

    ܘܡܢ ܩܕܡ ܕܢܫܬܡܥ ܩܠܗܘܢ ܕܪ̈ܥܡܐ. ܘܡܢ ܩܕܡ ܕܢܢܗܪܘܢ ܙܠܝܩ̈ܝܗܘܢ ܕܒܪ̈ܩܐ. ܘܡܢ ܩܕܡ ܕܬܫܬܪܪ ܐܪܥܗ ܕܦܪܕܝܣܐ

48. Esdras 4 6:3

    ܘܡܢ ܩܕܡ ܕܢܬܚܙܐ ܫܘܦܪܗܘܢ ܕܗ̈ܒܒܐ. ܘܡܢ ܩܕܡ ܕܢܬܚܝܠ ܥܘܫܢܐ ܕܙܘ̈ܥܢܐ. ܘܡܢ ܩܕܡ ܕܢܬܟܢܫ̇ܘܢ ܚܝܠܘ̈ܬܐ ܕܡܠܐ̈ܟܐ ܕܠܝܬ ܠܗܘܢ ܡܢܝܢܐ

49. Esdras 4 6:4

    ܘܡܢ ܩܕܡ ܕܢܬܬܪܝܡ ܪܘܡܗܘܢ ܕܐܐܪ̈ . ܘܡܢ ܩܕܡ ܕܢܫܬܡܗܢ ܡܘܫ̈ܚܬܗܘܢ ܕܪ̈ܩܝܥܐ. ܘܡܢ ܩܕܡ ܕܢܫܬܪܪ ܟܘܒܫܗ̇ ܕܨܗܝܘܢ

50. Esdras 4 6:5

    ܘܡܢ ܩܕܡ ܕܢܬܥܩ̈ܒܢ ܫܢ̈ܝܐ ܗܠܝܢ ܕܩ̇ܝ̈ܡܢ. ܘܡܢ ܩܕܡ ܕܢܬܓ̈ܒܠܢ ܣܟܠܘ̈ܬܗܘܢ ܕܚ̈ܛܝܐ ܗܫܐ. ܘܡܢ ܩܕܡ ܕܢܬܚܬܡܘܢ ܐܝܠܝܢ ܕܣܡ̇ܘ ܠܗܘܢ ܣܝܡ̈ܬܐ ܕܗܝܡܢܘܬܐ

51. Esdras 4 6:6

    ܗܝ̇ܕܝܢ ܐܬܚܫ̣ܒܬ ܘܗ̈ܘܝ ܗܠܝܢ ܟܠܗܝܢ ܒܐ̈ܝܕܝ ܕܝܠܝ ܒܠܚܘܕ. ܘܠܐ ܒܐܝ̈ܕܝ ܐܚܪܢܐ ܀

52. Esdras 4 6:7

    ܘܥܢ̇ܝܬ ܘܐܡ̇ܪܬ. ܐܝ̇ܢܘ ܦܘܪܫܗܘܢ ܕܙܒ̈ܢܐ. ܐܘ ܐܡܬܝ ܗܘ ܫܘܠܡܗ ܕܥܠܡܐ ܩܕܡܝܐ. ܐܘ ܐܝ̇ܢܘ ܪܝܫܗ ܕܬܢܝܢܐ

53. Esdras 4 6:8

    ܘܥ̣ܢܐ ܘܐܡ̣ܪ ܠܝ. ܡܢ ܐܒܪܗܡ ܥܕܡܐ ܠܐܒܪܗܡ. ܡܢ ܐܒܪܗܡ ܐܬܝܠܕ ܐܝܣܚܩ. ܘܡܢ ܐܝܣܚܩ ܐܬܝܠܕ ܝܥܩܘܒ ܘܥܣܘ. ܘܐܝ̣ܕܗ ܕܝܥܩܘܒ ܐܚܝܕܐ ܗܘܬ ܒܥܩܒܗ ܕܥܣܘ

54. Esdras 4 6:9

    ܥܩܒܐ ܕܩܕܡܝܐ ܥܣܘ. ܘܐ̣ܝܕܐ ܕܬܢܝܢܐ ܝܥܩܘܒ

55. Esdras 4 6:10

    ܩܕܡܝܗ ܓܝܪ ܕܒܪܢܫܐ ܐ̣ܝܕܗ. ܘܫܘܠܡܗ ܕܒܪܢܫܐ ܥܩܒܗ. ܒܝܢܬ ܗܟܝܠ ܥܩܒܐ ܠܐܝ̣ܕܐ ܡܕܡ ܐܚܪܢ ܠܐ ܬܒܥܐ ܐܘ ܥܙܪܐ ܀ ܀

56. Esdras 4 6:11

    ܘܥ̇ܢܝܬ ܘܐܡ̇ܪܬ. ܐܘ ܡܪܝܐ ܡܪܝ. ܐܢ ܐܫ̇ܟܚܬ ܪ̈ܚܡ̣ܐ ܒܥ̈ܝܢܝܟ̣

57. Esdras 4 6:12

    ܐܘܕܥܝܢܝ ܠܥܒ̣ܕܟ ܫܘܠܡܐ ܕܐܬ̈ܘܬܐ ܗܠܝܢ ܕܡܢܟ ܐܘܕܥܬܢܝ ܩܠܝܠ. ܒܠܠܝܐ ܕܥ̣ܒܪ • ܀ •

58. Esdras 4 6:13

    ܘܥ̣ܢܐ ܘܐܡ̣ܪ ܠܝ. ܩܘܡ ܥܠ ܪ̈ܓܠܝܟ. ܘܬܫܡܥ ܩܠܐ ܪܒܐ

59. Esdras 4 6:14

    ܘܢܗܘܐ ܕܐܢ ܡܙܥ ܢܙܘܥ ܐܬܪܐ ܗ̇ܘ ܕܩܐ̇ܡ ܐܢܬ ܥܠܘܗܝ̣

60. Esdras 4 6:15

    ܟܕ ܡܬܡܠܠ ܥܡܟ̣. ܠܐ ܬܬܪܗܒ. ܡܛܠ ܕܡܠܬܐ ܥܠ ܛܒ̣ܐ ܗܝ ܕܫܘܠܡܐ. ܘܫܬܐ̈ܣܝܗ̇ ܕܐܪܥܐ ܢܣܬܟ̈ܠܢ

61. Esdras 4 6:16

    ܕܥܠܝܗܝܢ ܗܝ ܡܠܬܐ. ܘܡܬܪ̈ܗܒܢ ܘܡܬܬ̈ܙܝܥܢ. ܪ̈ܓܫܢ ܓܝܪ ܕܫܘܠܡܗܝܢ ܡܬܚܠܦ

62. Esdras 4 6:17

    ܘܗ̣ܘܐ ܕܟܕ ܫܡ̇ܥܬ ܩܡ̇ܬ ܥܠ ܪ̈ܓܠܝ. ܘܫܡ̇ܥܬ ܘܗܐ ܩܠܐ ܕܡܡܠܠ. ܘܩܠܗ ܐܝܟ ܩܠܐ ܕܡ̈ܝܐ ܣܓܝܐ̈ܐ

63. Esdras 4 6:18

    ܘܐܡ̣ܪ ܕܗܐ ܝܘܡ̈ܬܐ ܐܬ̇ܝܢ. ܘܢܗܘܐ ܐܡܬܝ ܕܩ̇ܪܒ ܐܢܐ ܕܐܣܥܘܪ ܠܥܡܘܪ̈ܝܗ̇ ܕܐܪܥܐ

64. Esdras 4 6:19

    ܘܐܡܬܝ ܕܥܬܝܕ ܐܢܐ ܕܐܦܩܘܕ ܒܐܝ̣ܕ̈ܝܗܘܢ ܕܥ̇ܘ̈ܠܐ. ܘܐܡܬܝ ܕܫ̇ܠܡ ܡܘܟܟܗ̇ ܕܨܗܝܘܢ

65. Esdras 4 6:20

    ܘܐܡܬܝ ܕܥܬܝܕ ܕܢܬܚܬܡ ܥܠܡܐ ܗܢܐ ܕܥܬܝܕ ܕܢܥܒܪ̈. ܗܠܝܢ ܐܬܘ̈ܬܐ ܥ̇ܒܕ ܐܢܐ. ܣ̣ܦܪ̈ܐ ܢܬܦܬܚܘܢ ܥܠ ܐ̈ܦܝ ܪܩܝܥܐ. ܘܟܠܗܘܢ ܢܚܙܘܢ ܕܝ̣ܢܝ ܐܟܚܕܐ

66. Esdras 4 6:21

    ܘܝ̈ܠܘܕܐ ܒܢ̈ܝ ܫܢܬܐ ܢܡܠܠܘܢ. ܘܢܬܠܘܢ ܩܠܗܘܢ. ܘܐܝܠܝܢ ܕܫܩ̇ܝܠܢ ܒܟܪ̈ܣܬܐ ܕܠܐ ܒܙܒܢܗܝܢ ܢܐ̈ܠܕܢ. ܝܠܘ̈ܕܐ ܠܬܠܬܐ ܝܪ̈ܚܝܢ ܘܠܐܪܒܥܐ. ܘܢܚܘܢ ܘܢܫܘܪܘܢ

67. Esdras 4 6:22

    ܘܡܢ ܫܠܝܐ ܐܬܪ̈ܘܬܐ ܐܝܠܝܢ ܕܠܐ ܙܪܝܥܝܢ ܟܕ ܙܪܝܥܝܢ ܢܫܬܟܚܘܢ. ܘܐܘܨܪ̈ܐ ܕܡ̣ܠܝܢ ܡܢ ܫܠܝܐ ܢܫܬܟܚܘܢ ܟܕ ܣܦܝܩܝܢ

68. Esdras 4 6:23

    ܘܩܪܢܐ ܬܩܪܐ ܒܩܠܐ ܪܡ̇ܐ. ܐܝ̇ܕܐ ܕܟܠܗܘܢ ܢܫܡܥܘܢܗ̇ ܡܢ ܫܠܝܐ ܘܢܬܪܗܒܘܢ

69. Esdras 4 6:24

    ܘܢܗܘܐ ܒܗ̇ܘ ܙܒܢܐ. ܢܩܪܒܘܢ ܪ̈ܚ̇ܡܐ ܥܡ ܪ̈ܚܡܝܗܘܢ ܐܝܟ ܒܥܠܕܒ̈ܒܐ. ܕܬܬܡܗ ܐܪܥܐ ܥܡ ܥܡ̇ܘܪ̈ܝܗ̇. ܘܡ̈ܦܩܢܐ ܕܡܒܘ̈ܥܐ ܢܩܘܡܘܢ ܕܠܐ ܢܪܕܘܢ ܬܠܬ ܫ̈ܥܝܢ

70. Esdras 4 6:25

    ܘܢܗܘܐ ܟܠ ܡܐ ܕܡܫܬܚܪ ܡܢ ܗܠܝܢ ܟܠܗܝܢ ܕܩܕ̇ܡܬ ܐܡ̇ܪܬ ܠܟ. ܗ̣ܘ ܢܚܐ ܘܢܚܙܐ ܦܘܪܩܢܝ ܘܫܘܠܡܗ ܕܥܠܡܐ

71. Esdras 4 6:26

    ܘܗ̇ܝܕܝܢ ܢܚܙܐ ܠܒܢܝܢ̈ܫܐ ܗ̇ܢܘܢ ܕܐܬܥܠܝܘ. ܐܝܠܝܢ ܕܡܘܬܐ ܠܐ ܛܥܡ̣ܘ ܡܢ ܬܘ̈ܠܕܬܗܘܢ. ܘܢܬܗܦܟ ܠܒܗܘܢ ܕܥܡܘܪ̈ܝܗ̇ ܕܐܪܥܐ. ܘܢܬܚܠܦ ܠܡܕܥܐ ܐܚܪܢܐ

72. Esdras 4 6:27

    ܡܬܛܥܝܐ ܓܝܪ ܒܝ̣ܫܬܐ ܘܕ̇ܥܟ ܢܟܠܐ

73. Esdras 4 6:28

    ܘܫ̇ܘܚܐ ܗܝܡܢܘܬܐ. ܘܡܙܕܟܐ ܚ̇ܒܠܐ. ܘܡܬܚܙܐ ܫܪܪܐ. ܐ̇ܝܢܐ ܕܩܘܝ ܕܠܐ ܦܐܪ̈ܐ ܫܢ̈ܝܐ ܣܓܝܐ̈ܬܐ ܀

74. Esdras 4 6:29

    ܘܗ̣ܘܐ ܕܟܕ ܡܡܠܠ ܗܘܐ ܥܡܝ ܘܗܐ ܩܠܝܠ ܩܠܝܠ ܙܐ̇ܥ ܗܘܐ ܐܬܪܐ ܗ̇ܘ ܕܩܐ̇ܡ ܗ̇ܘܝܬ ܥܠܘܗܝ

75. Esdras 4 6:30

    ܘܐܡ̣ܪ ܠܝ. ܗܠܝܢ ܐ̇ܬܝܬ ܕܐܘܕܥܟ ܒܗܢܐ ܠܠܝܐ

76. Esdras 4 6:31

    ܐܢ ܗܟܝܠ ܬܘܒ ܬܒܥܐ ܘܬܨܘܡ ܫܒ̈ܥܐ ܝܘܡ̈ܝ̣ܢ. ܬܘܒ ܐ̇ܓܠܐ ܠܟ ܕܪ̈ܘܪܒܢ ܡܢ ܗܠܝܢ

77. Esdras 4 6:32

    ܡܛܠ ܕܡܫܬܡܥܘ ܐܫܬܡܥ ܩܠܟ ܠܘܬ ܡܪܝܡܐ. ܚܙܗ̇ ܓܝܪ ܚܝܠܬܢܐ ܠܫܦܝܘܬܟ. ܐܦ ܩܕܝܫܘܬܐ ܗ̇ܝ ܕܐܝܬ ܠܟ ܡܢ ܛܠܝܘܬܟ

78. Esdras 4 6:33

    ܘܡܛܠ ܗܢܐ ܫܕܪܢܝ ܕܐ̇ܓܠܐ ܠܟ ܗܠܝܢ ܟܠܗܝܢ ܀ ܘܐܡ̣ܪ ܠܝ ܐܬܠܒܒ. ܘܠܐ ܬܕܚܠ

79. Esdras 4 6:34

    ܘܠܐ ܬܣܬܪܗܒ ܠܡܬܚܫܒܘ ܥܠ ܙܒ̈ܢܐ ܩܕܡ̈ܝܐ ܒܝ̈ܫܬܐ. ܕܠܐ ܢܗܘܐ ܥܠܝܟ ܥܘܩܒܐ ܒܙܒ̈ܢܐ ܐܚܪ̈ܝܐ ܀

80. Esdras 4 6:35

    ܘܗ̣ܘܐ ܡܢ ܒܬܪ ܗܠܝܢ̣. ܒܟ̇ܝܬ ܘܨܡ̇ܬ ܫܒ̈ܥܐ ܝܘܡ̈ܝܢ. ܕܐ̇ܫܠܡ ܬܠܬ ܫ̈ܒܝܢ ܕܐܡܝܪ̈ܢ ܠܝ ܀ • • ܀

81. Esdras 4 6:36

    ܘܗ̣ܘܐ ܒܠܠܝܐ ܕܬܡܢܝܐ̣. ܘܗܐ ܠܒܝ ܬܘܒ ܡܫܬܓܫ ܗܘܐ ܒܝ. ܘܫ̇ܪܝܬ ܕܐܡ̇ܠܠ ܩܕܡ ܡܪܝܡܐ

82. Esdras 4 6:37

    ܡܛܠ ܕܪܬ̇ܚܐ ܗܘܬ ܪܘܚܝ ܣ̇ܓܝ. ܘܢܦܫܝ ܡܬܓܘܙܠܐ ܗܘܬ ܀ •

83. Esdras 4 6:38

    ܘܐܡ̇ܪܬ ܐܘ ܡܪܝܐ ܡܪܝ ܡܡܠܠܘ ܡ̣̇ܠܠܬ ܡܢ ܪܝܫ ܒ̣ܪܝܬܟ ܒܝܘܡܐ ܩܕܡܝܐ. ܘܐܡ̣ܪܬ ܕܢܗܘܘܢ ܫܡܝܐ ܘܐܪܥܐ. ܘܡܠܬܟ ܡܪܝ ܥ̇ܒܕܐ ܬܩ̣ܢܬ

84. Esdras 4 6:39

    ܘܗܘܬ ܗ̇ܝܕܝܢ ܪܘܚܐ ܡܪܚܦܐ ܘܚܫܘܟܐ ܡܚܦܐ. ܘܫܬܩܐ ܕܩܠܐ. ܘܩܠܐ ܕܒܪܢܫܐ ܠܝܬ ܗܘܐ ܥܕܟܝܠ

85. Esdras 4 6:40

    ܗ̇ܝܕܝܢ ܐܡ̇ܪܬ. ܕܡܢ ܐܘܨܪ̈ܝܟ ܕܝܠܟ ܢܦܘܩ ܙܗܪܐ ܕܢܘܗܪܐ. ܡܛܘܠ ܕܢܬܚܙܘܢ ܥ̇ܒ̈ܕܝܟ •

86. Esdras 4 6:41

    ܘܒܝܘܡܐ ܬܘܒ ܕܬܪܝܢ ܒܪ̣ܝܬ ܪܘܚܐ ܕܪܩܝܥܐ. ܘܦܩ̣ܕܬ ܠܗ̇ ܕܬܥܒܕ ܦܘܪܫܢܐ ܒܝܬ ܡ̈ܝܐ ܠܡ̈ܝܐ. ܡܛܠ ܕܡ̇ܢܬܐ ܡܢܗܘܢ ܬܣܩ ܠܥܠ. ܘܐܚܪܬܐ ܡܢ̇ܬܐ ܬܩܘܐ ܠܬܚܬ ܀ ܀ •

87. Esdras 4 6:42

    ܘܒܝܘܡܐ ܕܬܠܬܐ ܦܩ̣ܕܬ ܠܡ̈ܝܐ ܕܢܬܟܢܫܘܢ. ܠܚܕܐ ܡܢ ܫܒܥ ܡܢ̈ܘܬܗ̇ ܕܐܪܥܐ. ܫܬ ܕܝܢ ܡܢ̈ܘܢ ܝܒܫ̣ܬ ܘܢܛ̣ܪܬ ܕܡܢܗܝܢ ܢܗ̈ܘܝܢ ܡܫܡ̈ܫܢ ܩܕܡܝܟ ܘܡܬ̈ܦܠܚܢ ܘܡܙܕܪ̈ܥܢ

88. Esdras 4 6:43

    ܡܠܬܟ ܕܝܢ ܕܝܠܟ ܢܦ̣ܩܬ. ܘܒܪܫܥܬܗ ܥ̇ܒܕܐ ܐܬܥܒܕ.

89. Esdras 4 6:44

    ܨܡܚܘ ܓܝܪ ܗܝ̇ܕܝܢ ܡܢ ܫܠܝܐ ܦܐܪ̈ܐ ܣܓ̈ܝܐܐ ܕܠܐ ܡܢܝܢܐ. ܘܚ̣ܠܝܢ ܒܛܥܡ̈ܝܗܘܢ ܒܟܠ ܓܢܣ ܘܓܢܣ. ܘܗܒ̈ܒܐ ܕܒܕܡ̈ܘܬܐ ܚܕ ܠܚܕ ܠܐ ܕܡ̇ܝܢ. ܘܐ̈ܝܠܢܐ ܕܒܚܙܘܗܘܢ ܠܐ ܡܬܦܚܡܝܢ. ܘܪ̈ܝܚܢܐ ܕܒܪ̈ܝܚܢܝܗܘܢ ܠܐ ܡܬܥܩܒܝܢ. ܗܠܝܢ ܗ̈ܘܝ ܒܝܘܡܐ ܕܬܠܬܐ

90. Esdras 4 6:45

    ܘܒܝܘܡܐ ܕܐܪܒܥܐ ܦܩ̣ܕܬ ܘܗ̣ܘܐ ܫܡ̣ܫܐ ܢܗܝܪܐ. ܘܙܗܪܗ ܕܣܗܪܐ. ܘܬܘܩܢܐ ܕܟ̈ܘܟܒܐ

91. Esdras 4 6:46

    ܘܦܩ̣ܕܬ ܠܗܘܢ ܕܢܫܡܫܘܢ ܠܒܪܢܫܐ ܕܥܬܝܕ ܗܘܐ ܕܢܬܓܒܠ ܡܢܟ ܀

92. Esdras 4 6:47

    ܘܒܝܘܡܐ ܕܚܡܫܐ̣. ܐܡ̣ܪܬ ܠܡ̇ܢܬܐ ܫܒܝܥܝܬܐ ܐܝ̇ܟܐ ܕܐܝܬ ܗܘܘ ܡ̈ܝܐ ܕܢܦܩܘܢ ܚܝܘ̈ܬܐ ܘܦܪ̈ܚܬܐ ܘܢܘ̈ܢܐ

93. Esdras 4 6:48

    ܘܗܘܘ. ܡ̈ܝܐ ܕܠܐ ܡܡܠܠܝܢ. ܘܕܠܐ ܢܦܫܐ̣ ܡܕܡ ܕܐܝܬ ܒܗ ܢܦܫܐ ܥܒ̇ܕܝܢ ܗܘܘ. ܕܡܢ ܗܠܝܢ ܢܬܢܘܢ ܕܪ̈ܐ ܬܡܝܗ̈ܬܐ ܕܝܠܟ

94. Esdras 4 6:49

    ܘܗ̇ܝܕܝܢ ܢܛܪ̣ܬ ܬܪ̈ܬܝܢ ܚܝ̈ܘܢ ܕܒ̣ܪܝܬ. ܘܩ̣ܪܝܬ ܫܡܗ̇ ܕܚܕܐ ܒܗܡܘܬ. ܘܫܡܗ̇ ܕܐܚܪܬܐ̣. ܩ̣ܪܝܬ ܠܘܝܬܢ

95. Esdras 4 6:50

    ܘܦܪ̣ܫܬ ܐܢ̈ܝܢ ܚܕܐ ܡܢ ܚܕܐ. ܡܛܠ ܕܠܐ ܓܝܪ ܡܫܟܚܐ ܗܘܬ ܗ̇ܝ ܡܢ̇ܬܐ ܫܒܝܥܝܬܐ ܪ̣ܛܝܒܬܐ ܕܬܐܚܘܕ ܐ̈ܢܝܢ

96. Esdras 4 6:51

    ܘܝܗܒܬ ܠܒܗܡܘܬ ܚܕܐ ܡܢ ܡܢ̈ܘܬܐ ܕܝܒ̣ܫܬ ܒܝܘܡܐ ܕܬܠܬܐ̣. ܕܢܥܡܪ ܬܡܢ. ܐܝ̇ܟܐ ܕܐܝܬ ܐܠܦ ܛܘܪ̈ܝܢ

97. Esdras 4 6:52

    ܠܠܘܝܬܢ ܕܝܢ ܝܗ̣ܒܬ̣. ܚܕܐ ܡܢ ܫܒܥ ܡܢ̈ܘܬܗ̇ ܕܪܛܝܒܘܬܐ. ܘܢܛ̣ܪܬ ܐܢܘܢ ܕܢܗܘܘܢ ܡܐܟܘܠܬܐ ܠܐܝܠܝܢ ܕܨ̇ܒܐ ܐܢܬ. ܘܐܡܬܝ ܕܨ̇ܒܐ ܐܢܬ

98. Esdras 4 6:53

    ܘܒܝܘܡܐ ܕܫܬܐ ܦܩ̣ܕܬ ܠܐܪܥܐ ܕܬܦܩ ܩܕܡܝܟ ܒܥܝܪ̈ܐ ܘܚܝܘ̈ܬܐ ܘܪ̈ܚܫܐ

99. Esdras 4 6:54

    ܘܥܠ ܗܠܝܢ ܕܝܢ ܐܩܝ̣ܡܬ ܠܐܕܡ ܡܕܒܪܢܐ ܥܠ ܟܠܗܘܢ ܥ̇ܒ̈ܕܐ ܕܒ̣ܪܝܬ ܡܢ ܩܕܝܡ. ܘܡܢܗ ܗ̇ܘܝܢ ܚܢܢ ܥܡܐ ܕܓܒ̣ܝܬ

100. Esdras 4 6:55

     ܗܠܝܢ ܕܝܢ ܟܠܗܝܢ ܐܡ̇ܪܬ ܩܕܡܝܟ ܡܪܝܐ ܡܪܝ. ܡܛܘܠ ܕܐܡ̣ܪܬ ܕܡܛܠܬܢ ܕܝܠܢ ܒܪܝܬܝܗܝ ܠܥܠܡܐ ܗܢܐ

← Previous · Next → — showing 101–200 of 714

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.