← All works

Peshitta Esdras 4

Peshitta (Syriac Old Testament) · 714 sections

1. Esdras 4 3:0

   ܟܬܒܐ ܕܥܙܪܐ ܣ̇ܦܪܐ. ܕܡܬܩܪܐ ܫܠܐܬܐܝܠ.

2. Esdras 4 3:1

   ܒܫܢܬ ܬܠܬܝܢ ܕܡܦܘܠܬܗ̇ ܕܡܕܝܢܬܢ ܐܢܐ̇ ܫܠܬܐܝܠ ܕܐܝܬܝ ܥܙܪܐ̣. ܐܝ̇ܬܝ ܗܘ̇ܝܬ ܒܒܒܠ. ܘܪܡ̣ܐ ܗ̇ܘܝܬ ܥܠ ܬܫܘܝܬܝ ܘܬܘܝܗ ܗ̇ܘܝܬ. ܘܡܚܫ̈ܒܬܐ ܣܠ̈ܩܢ ܗ̈ܘܝ ܥܠ ܠܒܝ

3. Esdras 4 3:2

   ܡܛܠ ܕܚ̇ܙܝܬ ܚܘܪܒܗ̇ ܕܨܗܝܘܢ. ܘܟܗܝܢܘܬܗܘܢ ܕܥܘܡܪ̈ܝ ܒܒܠ

4. Esdras 4 3:3

   ܘܐܬܕܡ̣ܪܬ ܪܘܚܝ ܣܓܝ. ܘܫ̇ܪܝܬ ܐܡ̇ܠܠ ܠܘܬ ܡܪܝܡܐ ܡܠ̈ܐ ܕܚܝ̈ܠܬܐ

5. Esdras 4 3:4

   ܘܐܡ̇ܪܬ. ܐܘ ܡܪܝܐ ܡܪܝ. ܠܐ ܗܘܐ ܐܢܬ ܐܡ̣ܪܬ ܡܢ ܪܝܫ ܟܕ ܓܒܠܬܗ̇ ܠܐܪܥܐ ܘܗܕܐ ܒܠܚܘܕܝܟ. ܘܦ̣ܩܕܬ ܠܥܦܪܐ

6. Esdras 4 3:5

   ܘܝܗ̣ܒ ܠܟ ܠܐܕܡ ܦܓܪܐ ܡܝܬܐ. ܘܗ̣ܘ ܓܒܝܠܬܐ ܗܘܐ ܕܐ̈ܝܕܝܟ. ܘܢܦܚ̣ܬ ܒܗ ܪܘܚܐ ܕܚ̈ܝܐ. ܘܗ̣ܘܐ ܚ̇ܝܐ ܩܕܡܝܟ

7. Esdras 4 3:6

   ܘܐ̣ܥܠܬܝܗܝ ܠܦܪܕܝܣܐ̇ ܗ̇ܘ ܕܢ̣ܨܒܬ ܝܡܝܢܟ̇. ܡܢ ܩܕܡ ܕܬܐܬܐ ܐܪܥܐ

8. Esdras 4 3:7

   ܘܠܗܢܐ ܦܩܕܬܝܗܝ ܦܘܩܕܢܐ ܘܥܒܪܗ. ܘܒܪ ܫܥܬܗ ܓܙ̣ܪܬ ܥܠܘܗܝ ܡܘܬܐ ܘܥܠ ܬܘ̈ܠܕܬܗ. ܘܡܢܗ ܐܬܝܠܕܘ ܥܡ̈ܡܐ ܘܫ̈ܒܛܐ. ܘܠܫ̈ܢܐ ܘܐܡ̈ܘܬܐ ܘܫܪ̈ܒܬܐ. ܐܝܠܝܢ ܕܠܝܬ ܠܗܝܢ ܡܢܝܢܐ

9. Esdras 4 3:8

   ܘܐܙܠܘ ܟܠ ܥܡ ܒ̇ܥ̈ܒܕܝܗܘܢ. ܘܡܪܫܥܝܢ ܗܘܘ ܘܡܥܘܠܝܢ ܩܕܡܝܟ. ܘܐܢܬ ܠܐ ܟܠ̣ܝܬ ܐܢܘܢ.

10. Esdras 4 3:9

    ܬܘܒ ܕܝܢ ܒܙܒܢ ܐܝܬ̣ܝܬ ܛܘܦܢܐ ܥܠ ܐܪܥܐ ܘܥܠ ܥܡܘܪ̈ܘܗܝ ܕܥܠܡܐ̣. ܘܐ̣ܘܒܕܬ ܐܢܘܢ

11. Esdras 4 3:10

    ܘܗ̣ܘܐ ܐܟܚܕܐ ܐܒܕܢܗܘܢ. ܘܐܝܟ ܕܠܐܕܡ ܡܘܬܐ̣. ܗܟܢܐ ܐܦ ܠܗ̇ܢܘܢ ܡܘܬܐ ܕܛܘܦܢܐ

12. Esdras 4 3:11

    ܐܘܬ̣ܪܬ ܕܝܢ ܚܕ ܡܢܗܘܢ ܥܡ ܒܝܬܗ. ܘܡܢܗ ܙܕܝ̈ܩܐ ܟܠܗܘܢ ܪܕܘ

13. Esdras 4 3:12

    ܘܗ̣ܘܐ ܕܟܕ ܫܪܝܘ ܢܣܓܘܢ ܥܡܘܪ̈ܝܗ̇ ܕܐܪܥܐ. ܘܐܣܓܝܘ ܒܢ̈ܝܐ ܘܥܡܡ̈ܐ ܘܟܢ̈ܫܐ ܣܓܝܐ̈ܐ ܘܫܪܝܘ ܬܘܒ ܕܢܪܫܥܘܢ ܝܬܝܪ ܡܢ ܩ̈ܕܡܝܐ

14. Esdras 4 3:13

    ܘܗ̣ܘܐ ܕܟܕ ܐܪܫܥܘ ܩܕܡܝܟ ܓܒ̣ܝܬ ܠܟ ܚܕ ܡܢܗܘܢ ܕܫܡܗ ܐܒܪܗܡ

15. Esdras 4 3:14

    ܘܐܚܒܬܝܗܝ ܘܚܘܝܬܝܗܝ ܫܘܠܡܗܘܢ ܕܙܒ̈ܢܐ ܠܗ ܒܠܚܘܕܘܗܝ ܒܝܢܬ ܠܟ ܘܠܗ ܒܠܠܝܐ

16. Esdras 4 3:15

    ܘܐܩܝܡܬ ܠܗ ܩܝܡ̈ܐ ܕܠܥܠܡ ܘܐܡ̣ܪܬ ܠܗ ܕܠܐ ܡܡܬܘܡ ܬܫܒܩܝܘܗܝ ܠܙܪܥܗ. ܘܝܗ̣ܒܬ ܠܗ ܠܐܝܣܚܩ. ܘܠܐܝܣܚܩ ܝܗ̣ܒܬ ܠܝܥܩܘܒ ܘܠܥܝܣܘ

17. Esdras 4 3:16

    ܘܓܒ̣ܝܬ ܠܟ ܠܝܪܬܘܬܐ ܠܝܥܩܘܒ. ܘܠܥܝܣܘ ܣܢ̣ܝܬ ܘܗ̣ܘܐ ܝܥܩܘܒ ܠܥܡܐ ܣܓܝܐܐ

18. Esdras 4 3:17

    ܘܟܕ ܐܣ̣ܩܬ ܠܙܪܥܗ ܡܢ ܡܨܪܝܢ ܘܐܩ̣ܝܡܬ ܠܗ ܩܝܡ̈ܐ ܕܠܥܠܡ. ܘܐܝܬ̣ܝܬ ܐܢܘܢ ܠܛܘܪ ܣܝܢܝ.

19. Esdras 4 3:18

    ܘܐܪܟ̣ܢܬ ܫܡܝܐ ܘܐܙ̣ܝܥܬ ܠܐܪܥܐ. ܘܐܢܝܕܬܗ̇ ܠܬܒܝܠ. ܘܥܒ̣ܕܬ ܠܬܗܘ̈ܡܐ ܕܢܪܬܘܢ. ܘܫܓ̣ܫܬ ܥܠܡ̈ܐ

20. Esdras 4 3:19

    ܘܥܒ̣ܪܬ ܬܫܒܘܚܬܟ ܬܪ̈ܥܐ ܐܪܒܥܐ ܕܢܘܪܐ ܘܕܙܘ̈ܥܐ ܘܕܪܘܚܐ ܘܕܥܪܝܐ̣ ܕܬܬܠ ܠܙܪܥܗ ܕܝܥܩܘܒ ܢܡܘܣܐ. ܘܠܓܢܣܗ ܕܐܝܣܪܐܝܠ ܦܘܩ̈ܕܢܐ

21. Esdras 4 3:20

    ܘܠܐ ܐܪܝܡ̣ܬ ܡܢܗܘܢ ܠܒܐ ܒܝܫ̣ܐ. ܡܛܠ ܕܢܥ̣ܒܕ ܒܗܘܢ ܢܡܘܣܟ ܦܐܪ̈ܐ

22. Esdras 4 3:21

    ܠܒܐ ܓܝܪ ܒܝ̣ܫܐ ܠܒ̣ܫ ܐܕܡ ܩܕܡܝܐ. ܘܐܥܒܪ ܘܐܙܕܟܝ. ܐܠܐ ܐܦ ܟܠ ܐܝܠܝܢ ܕܐܬܝܠܕܘ ܡܢܗ̇

23. Esdras 4 3:22

    ܘܩܘܝ ܒܗܘܢ ܚܫܐ ܘܢܡܘܣܐ ܒܠܒܗ ܕܥܡܐ. ܥܡ ܥܩܪܐ ܒܝ̣ܫܐ. ܗܝ̇ܕܝܢ ܐܪܚ̣ܩܬ ܛ̇ܒܬܐ ܘܐܬܬ ܒܝ̣ܫܬܐ

24. Esdras 4 3:23

    ܘܥ̣ܒܪܘ ܙܒܢ̈ܐ ܘܫܠܡ̇ܘ ܥܕ̈ܢܐ ܀ ܘܐܩ̣ܝܡܬ ܠܟ ܥ̣ܒܕܐ ܕܫܡܗ ܕܘܝܕ

25. Esdras 4 3:24

    ܘܐܡ̣ܪܬ ܠܗ ܕܢܒܢܐ ܡܕܝܢܬܐ ܠܫܡܟ. ܘܒܝܬܐ̣ ܕܢܬܩܪܒܘܢ ܠܟ ܒܗ ܩܘܪ̈ܒܢܐ ܡܢ ܕܝܠܟ

26. Esdras 4 3:25

    ܘܗܘܬ ܗܕܐ ܫܢ̈ܝܐ ܣܓܝܐ̈ܬܐ. ܘܚܛܘ ܠܟ ܥܡܘܪ̈ܝܗ̇ ܕܡܕܝܢܬܐ

27. Esdras 4 3:26

    ܘܡܕܡ ܚܕܬ ܠܐ ܥܒ̣ܕܘ ܥܠ ܡܕܡ ܕܥܒ̣ܕ ܐܕܡ ܘܟܘܠܗܝܢ ܬܘ̈ܠܕܬܗ. ܠܒܝܫܝܢ ܗܘܘ ܓܝܪ ܐܦ ܗ̣ܢܘܢ ܠܒܐ ܒܝܫ̣ܐ

28. Esdras 4 3:27

    ܘܐܫܠܡܬܗ̇ ܠܡܕܝܢܬܟ ܒܝܕ ܒܥܠܕܒ̈ܒܝܟ

29. Esdras 4 3:28

    ܘܐܢܐ ܐܡ̇ܪܬ ܗ̇ܝܕܝܢ ܒܠܒܝ ܕܠܡܐ ܫܦܝܪ ܥ̇ܒܕܝܢ ܥܡܘܪ̈ܝܗ̇ ܕܒܒܠ. ܘܡܛܠ ܗܢܐ ܫܒܩܬܗ̇ ܠܨܗܝܘܢ

30. Esdras 4 3:29

    ܘܗ̣ܘܐ ܕܟܕ ܐܬܝ̇ܬ ܠܗܪܟܐ ܚܙܝܬ ܪ̈ܘܫܥܐ ܣܓܝܐ̈ܐ ܕܠܝܬ ܠܗܘܢ ܡܢܝܢܐ. ܘܥܘ̣̈ܠܐ ܣܓܝܐ̈ܐ ܚܙܬ ܢܦܫܝ ܗܕܐ ܫܢܬܐ ܕܬܠܬܝܢ. ܘܐܬܬܙܝܥ ܠܒܝ

31. Esdras 4 3:30

    ܕܚܙ̇ܝܬ ܕܐܝ̇ܟܢܐ ܡܣܝܒܪ ܐܢܬ ܠܚ̈ܛܝܐ. ܘܚܐ̇ܣ ܐܢܬ ܥܠ ܪ̈ܫܝܥܐ. ܘܐܘܒܕܬ ܠܥܡܟ ܘܢܛ̣ܪܬ ܠܣܢܐ̈ܝܟ

32. Esdras 4 3:31

    ܘܠܐ ܐܘ̣ܕܥܬ ܠܐܢܫ ܕܐܝ̇ܟܢܐ ܡܬܕܪܟܐ ܐܘܪܚܟ. ܕܠܡܐ ܫܦܝܪ ܥ̣ܒܕܬ ܒܒܠ ܝܬܝܪ ܡܢ ܨܗܝܘܢ

33. Esdras 4 3:32

    ܐܘ ܠܥܡܐ ܐܚܪܢܐ ܝ̇ܕܥܬ ܝܬܝܪ ܡܢ ܐܝܣܪܝܠ. ܐܘ ܐܝ̇ܢܐ ܫܒܛܐ ܗܝܡܢ ܒܕܝܬܩܐ ܕܝܠܟ ܐܝܟ ܝܥܩܘܒ

34. Esdras 4 3:33

    ܗܠܝܢ ܕܐܓܪܗܘܢ ܠܐ ܐܬܚܙܝ. ܘܥܡܠܗܘܢ ܠܐ ܥܒ̣ܕ ܦܐܪ̈ܐ. ܡܥܒܪ ܓܝܪ ܥܒ̇ܪܬ ܥܠ ܥܡ̈ܡܐ. ܘܚܙܝܬ ܐܢܘܢ ܕܗܫܐ ܡܨܠܚܝܢ̣. ܘܠܐ ܡܬܕܟܪܝܢ ܦܘܩ̈ܕܢܝܟ • ܀

35. Esdras 4 3:34

    ܗܫܐ ܕܝܢ ܬܩܘܠ ܒܡܣܐܬܐ ܥܘ̣ܠܢ ܕܝܠܢ ܘܕܥ̇ܡܘܪ̈ܘܗܝ ܕܥܠܡܐ. ܘܢܬܚܙܐ ܢܬܥܗ ܕܩܢܝܐ ܕܠܐ ܡܪܟܢ

36. Esdras 4 3:35

    ܐܘ ܐܡܬܝ ܠܐ ܚܛܘ ܩܕܡܝܟ ܥܡܘܪ̈ܘܗܝ ܕܥܠܡܐ. ܐܘ ܐ̇ܝܢܐ ܥܡܐ ܢ̣ܛܪ ܗܟܢܐ ܦܘܩ̈ܕܢܝܟ

37. Esdras 4 3:36

    ܒܢܝ̈ܢܫܐ ܕܝܢ ܒܫܡ̈ܗܐ ܡܫܟܚ ܐܢܬ ܕܢܛ̣ܪܘ ܦܘܩ̈ܕܢܝܟ. ܥܡܐ ܕܝܢ ܠܐ ܡܫܟܚ ܐܢܬ • ܀ •

38. Esdras 4 4:1

    ܘܥ̣ܢܐ ܡܠܐܟܐ ܕܐܫܬܠܚ ܠܘܬܝ ܕܫܡܗ ܐܘܪܐܝܠ

39. Esdras 4 4:2

    ܘܐܡ̣ܪ ܠܝ. ܡܙܥ ܙܥ ܠܒܟ ܒܥܠܡܐ ܗܢܐ. ܘܕܬܕܪܟ ܗܘ ܨ̣ܒܝܬ ܐܘܪܚܗ ܕܡܪܝܡܐ ܀

40. Esdras 4 4:3

    ܘܥ̇ܢܝܬ ܘܐܡܪܬ ܐܝܢ ܡܪܝ • ܘܬܘܒ ܥ̣ܢܐ ܘܐܡ̣ܪ ܠܝ. ܬܠܬ ܐܘܪ̈ܚܢ ܐ̇ܫܬܕܪܬ ܕܐ̇ܚܘܝܟ̇· ܘܬܠܬܐ ܡ̈ܬܠܝܢ ܕܐ̇ܣܝܡ ܩܕܡܝܟ

41. Esdras 4 4:4

    ܗܠܝܢ ܕܐܢ ܬܚܘܝܢܝ ܚܕܐ ܡܢܗܝ̣ܢ. ܐܚ̇ܘܝܟ ܐܦ ܐܢܐ̇. ܐܘܪܚܐ ܗ̇ܝ ܕܡܬܪܓܪܓܬ ܕܬܚܙܐ. ܘܡܠܦ ܐ̇ܢܐ ܠܟ ܕܡܛܠ ܡܢܐ ܠܒܐ ܒܝ̣ܫܐ

42. Esdras 4 4:5

    ܘܥ̇ܢܝܬ ܘܐܡ̇ܪܬ. ܡܠܠ ܡܪܝ ܀ • ܘܥ̣ܢܐ ܘܐ̣ܡܪ ܠܝ. ܙܠ ܬܩܘܠ ܠܝ ܡܬܩܠܐ ܕܢܘܪܐ. ܐܘ ܐܟܝܠ ܠܝ ܣܐܬܐ ܕܪܘܚܐ. ܐܘ ܩܪܝ ܠܝ ܠܝܘܡܐ ܕܥ̣ܒܪ

43. Esdras 4 4:6

    ܘܐܡ̇ܪܬ ܠܗ. ܡ̣̇ܢܘ ܡܢ ܝܠܝ̈ܕܐ ܡܫܟܚ ܕܢܥܒܕ ܗܠܝܢ ܕܐܡ̣ܪܬ. ܕܠܝ ܕܝܠܝ ܡܪܝ݃ ܬܫܐܠ ܗܠܝܢ ܟܘܠܗܝܢ̣ ܀

44. Esdras 4 4:7

    ܘܐܡ̣ܪ ܠܝ. ܐܠܘ ܫܐܠܬܟ ܗ̇ܘܝܬ ܘܐ̇ܡܪܬ ܠܟ. ܕܟܡܐ ܐܘܨܪ̈ܐ ܐܝܬ ܒܠܒܗ ܕܝܡܐ ܐܘ ܟܡܐ ܡܒ̈ܘܥܐ ܐܝܬ ܒܪܝܫܗ ܕܬܗܘܡܐ ܐܘ ܟܡܐ ܫܒ̈ܝܠܝܢ ܐܝܬ ܠܥܠ ܡܢ ܪܩܝܥܐ ܐܘ ܐܝܠܝܢ ܐܢܘܢ ܡܦ̈ܩܢܝܗ̇ ܕܫܝܘܠ ܐܘ ܐܝܠܝܢ ܐ̈ܢܝܢ ܐܘܪ̈ܚܬܗ ܕܦܪܕܝܣܐ̣

45. Esdras 4 4:8

    ܐܡ̇ܪ ܗ̣ܘܝܬ ܠܝ̣ ܕܠܬܗܘܡܐ ܠܐ ܢܚ̇ܬܬ. ܐܦ ܠܐ ܠܫܝܘܠ ܥܕܟܝܠ ܠܐ ܢܚ̇ܬܬ. ܐܦ ܠܐ ܠܫܡܝܐ ܡܢ ܝܘܡ̈ܝ ܣ̇ܠܩܬ

46. Esdras 4 4:9

    ܗܫܐ ܕܝܢ ܠܐ ܫܐ̇ܠܬܟ ܥܠ ܗܠܝܢ. ܐܠܐ ܥܠ ܢܘܪܐ ܘܪܘܚܐ ܘܝܘܡܐ. ܐܝܠܝܢ ܕܒܗܘܢ ܥܒ̣ܪܬ . ܘܐܝܠܝܢ ܕܠܒܪ ܡܢܗܘܢ ܠܐ ܡܫܟܚ ܐܢܬ ܕܬܗܘܐ. ܘܠܐ ܐܡ̣ܪܬ ܠܝ ܥܠܝܗܘܢ ܀

47. Esdras 4 4:10

    ܘܐܡ̣ܪ ܠܝ. ܐܢܬ ܠܐܝܠܝܢ ܕܪܒ̇ܝܢ ܥܡܟ ܠܐ ܡܫܟܚ ܐܢܬ ܠܡܕܥ̣

48. Esdras 4 4:11

    ܘܐܝ̇ܟܢܐ ܡܫܟܚ ܡܐܢܟ ܠܡܚܕ ܐܘܪܚܗ ܕܡܪܝܡܐ. ܡܛܠ ܕܒܡܕܡ ܕܠܐ ܡܬܕܪܟ̣. ܐܬ̣ܒܪܝܬ ܐܘܪܚܗ ܕܡܪܝܡܐ. ܘܠܐ ܡ̣ܨܐ ܐܝ̇ܢܐ ܕܡܬܚܒܠ ܒܥܠܡܐ ܕܡܬܚܒܠ. ܕܢܕܥ ܐܘܪܚܗ ܕܗ̇ܘ ܕܠܐ ܡܬܚܒܠ ܀ ܘܟܕ ܫܡ̇ܥܬ ܗܠܝܢ̣. ܢܦ̇ܠܬ ܥܠ ܐ̈ܦܝ

49. Esdras 4 4:12

    ܘܐܡ̇ܪܬ ܠܗ. ܛܒ ܗܘܐ ܠܢ ܐܠܘ ܠܐ ܐܬ̣ܝܢ. ܐܘ ܕܟܕ ܐܬ̣ܝܢܢ ܚܝܝܢ ܚܢܢ ܒܪܘܫܥܐ. ܘܚ̇ܫܝܢ ܚܢܢ ܘܠܐ ܝܕܥ̇ܝܢܢ̇. ܕܡܛܠ ܡܢܐ ܚ̇ܫܝܢܢ ܀

50. Esdras 4 4:13

    ܘܥ̣ܢܐ ܘܐܡ̣ܪ ܠܝ. ܡܐܙ̣ܠ ܐܙ̣ܠܘ ܥܒ̈ܐ ܕܩܝ̈ܣܐ ܕܦܩܥܬܐ. ܘܐܬܚܫܒܘ ܡܚܫܒܬܐ

51. Esdras 4 4:14

    ܘܐܡ̣ܪܘ. ܬܘ ܢܐܙܠ ܢܥܒܕ ܩܪܒܐ ܥܡ ܝܡܐ. ܕܢܪܚܩ ܡܢ ܩܕܡ̈ܝܢ. ܘܢܥܒܕ ܠܢ ܥܒܐ ܐܚܪܢܐ

52. Esdras 4 4:15

    ܐܦ ܓ̈ܠܠܘܗܝ ܕܝܡܐ ܗܟܘܬ ܐܬܚܫܒܘ ܡܚܫܒܬܐ ܘܐܡ̣ܪܘ. ܬܘ ܢܣܩ ܢܥܒܕ ܩܪܒܐ ܥܡ ܥܒܐ ܕܦܩܥܬܐ. ܡܛܠ ܕܐܦ ܬܡܢ ܢܥܒܕ ܠܢ ܐܬܪܐ ܐܚܪܢܐ

53. Esdras 4 4:16

    ܘܗܘܬ ܡܚܫܒܬܗ ܕܥܒܐ ܠܣܪܝܩܘܬܐ. ܐܬܬ ܓܝܪ ܢܘܪܐ ܘܐ̣ܟܠܬܗ.

54. Esdras 4 4:17

    ܘܗܟܘܬ ܐܦ ܡܚܫܒܬܐ ܕܓ̈ܠܠܘܗܝ ܕܝܡܐ. ܩܡ ܓܝܪ ܚ̇ܠܐ ܘܟܠ̣ܐ ܐܢܘܢ

55. Esdras 4 4:18

    ܐܠܘ ܗܟܝܠ ܗܘ̣ܝܬ ܕܝܢ̇ܗܘܢ ܕܗ̇ܢܘܢ̣. ܠܐ̇ܝܢܐ ܡܢܗܘܢ ܡܙܟܐ ܗ̣ܘܝܬ̣ ܘܠܐܝ̇ܢܐ ܡܚܝܒ ܗܘ̣ܝܬ

56. Esdras 4 4:19

    ܘܥ̇ܢܝܬ ܘܐܡ̇ܪܬ. ܬܪ̈ܝܗܘܢ ܡܚܫܒܬܐ ܣܪܝܩܬܐ ܐܬܚܫܒܘ. ܐܪܥܐ ܓܝܪ ܐܬܝܗ̣ܒܬ ܠܥܒܐ. ܘܐܬܪܐ ܕܝܡܐ ܕܢܛܥܢ ܓ̈ܠܠܘܗܝ ܀ ܀

57. Esdras 4 4:20

    ܘܥ̣ܢܐ ܘܐܡ̣ܪ ܠܝ. ܫܦܝܪ ܕܢܬ̣. ܘܠܡܢܐ ܠܐ ܕܢ̣ܬ ܢܦܫܟ

58. Esdras 4 4:21

    ܐܝܟ̇ܢܐ ܓܝܪ ܕܐܪܥܐ ܠܥܒܐ ܝܗܝܒܐ ܘܐܬܪܐ ܕܝܡܐ ܕܢܛܥܢ ܓܠܠܘ̈ܗܝ̣. ܗܟܢܐ ܐܦ ܐܝܠܝܢ ܕܥܠ ܐܪܥܐ ܥܡ̇ܪܝܢ̇. ܡܕܡ ܕܥܠ ܐܪܥܐ ܗܘ ܒܠܚܘܕ ܡܫܟܚܝܢ ܕܢܕܥܘܢ. ܘܐܝ̇ܢܐ ܕܠܥܠ ܡܢ ܫܡܝܐ̣ ܡܕܡ ܕܠܥܠ ܡܢ ܫܡܝܐ

59. Esdras 4 4:22

    ܘܥ̇ܢܝܬ ܘܐܡ̇ܪܬ. ܒܥ̇ܐ ܐܢܐ ܡܢܟ ܡܪܝ̣. ܠܡܢܐ ܡܪܝ ܐܬܝܗܒ ܠܝ ܡܕܥܐ ܠܡܬܚܫܒܘ

60. Esdras 4 4:23

    ܠܐ ܓܝܪ ܨ̇ܒܝܬ ܕܐܫܐܠ ܥܠ ܐܘܪ̈ܚܬܐ ܕܠܥܠ. ܐܠܐ ܥܠ ܐܝܠܝܢ ܕܥ̇ܒܪ̈ܢ ܥܠܝܢ ܒܟܠܝܘܡ. ܡܛܠ ܕܐܝܣܪܝܠ ܐܬܝܗܒ ܠܥܡܡ̈ܐ. ܘܥܡܐ ܕܐܚ̣ܒܬ ܐܬܝܗܒ ܠܫܒ̈ܛܐ ܪ̈ܫܝܥܐ. ܘܢܡܘܣܐ ܩܕܝܫܐ ܕܐܒܗ̈ܬܢ ܐܬܒ̇ܛܠ ܠܗ. ܘܕܝ̈ܬܩܣ ܕܐܬܟܬܒ ܠܐ ܐܝܬܝܗܝܢ

61. Esdras 4 4:24

    ܘܥܒ̇ܪܝܢܢ ܡܢ ܥܠܡܐ ܐܝܟ ܩܡ̈ܨܐ. ܘܚ̈ܝܝܢ ܐܝܟ ܗܒܠܐ. ܐܦ ܠܐ ܫ̇ܘܝܢܢ ܕܢܗܘܘܢ ܥܠܝܢ ܪ̈ܚܡ̣ܐ

62. Esdras 4 4:25

    ܐܠܐ ܡܢܐ ܢܥܒܕ ܠܗ ܠܫܡܗ ܪܒܐ ܕܐܬܩܪܝ ܥܠܝܢ. ܥܠ ܗܠܝܢ ܫܐ̇ܠܬ

63. Esdras 4 4:26

    ܘܥܢ̣ܐ ܘܐܡ̣ܪ ܠܝ. ܐܢ ܬܗܘܐ ܬܚܙܐ. ܘܐܢ ܬܣܓܐ ܬܐܚܐ̣ ܬܬܕܡܪ. ܡܛܠ ܕܡܣܬܪܗܒ ܥܠܡܐ ܕܢܥܒܪ

64. Esdras 4 4:27

    ܕܠܐ ܡܣܝܒܪ ܕܢܛܥܢ ܡܕܡ ܕܡܠܝܟ ܠܙܕܝ̈ܩܐ. ܡܛܠ ܕܬܐܢ̈ܚܬܐ ܡ̣ܠܐ ܥܠܡܐ ܗܢܐ. ܘܟܘܪ̈ܗܢܐ ܣܓܝܐ̈ܐ

65. Esdras 4 4:28

    ܐܙܕܪ̣ܥܬ ܓܝܪ ܒܝܫ̣ܬܐ ܗ̇ܝ ܕܫܐܠܬܢܝ ܥܠܝܗ̇. ܘܠܐ ܥܕܟܝܠ ܐܬ̣ܐ ܐܕܪܗ̇

66. Esdras 4 4:29

    ܐܠܐ ܗܟܝܠ ܢܬܚܨܕ ܡܕܡ ܕܐܙܕܪܥ ܘܢܫܢܐ ܐܬܪܐ. ܐܝ̇ܟܐ ܕܐܙܕ̣ܪܥܬ ܒܝ̣ܫܬܐ̣. ܠܐ ܐܬ̇ܝܐ ܐܪܥܐ ܐܝ̇ܟܐ ܕܐܙܕ̣ܪܥܬ ܛ̇ܒܬܐ

67. Esdras 4 4:30

    ܡܛܠ ܕܦܪܕܬܐ ܗܘ ܚܕܐ ܕܙܪܥܐ ܕܒܝ̣ܫܬܐ ܐܙܕܪܥ ܒܠܒܗ ܕܐܕܡ. ܡܢ ܪܝܫ. ܘܟܡܐ ܦܐܪ̈ܐ ܕܪܘܫܥܐ ܐܘܠܕ. ܥܕܡܐ ܠܗܫܐ. ܘܢܐܠܕ ܥܕܡܐ ܕܢܐܬܐ ܐܕܪܐ

68. Esdras 4 4:31

    ܦܚܡ ܗܟܝܠ ܐܢܬ ܒܢܦܫܟ ܘܚܙܝ. ܕܦܪܕܬܐ ܚܕܐ ܕܙܪܥܐ ܕܒܝ̣ܫܬܐ ܕܐܙܕܪܥ ܟܡܐ ܦܐܪ̈ܐ ܕܪܘܫܥܐ ܥܒ̣ܕ

69. Esdras 4 4:32

    ܐܡܬܝ ܗܟܝܠ ܕܢܙܕ̇ܪܥܘܢ ܫܢ̈ܢܐ ܕܛ̇ܒ̈ܬܐ ܕܠܝܬ ܠܗܘܢ ܡܢܝܢܐ̣. ܐܝ̇ܢܐ ܐܕܪܐ ܥܬܝܕܝܢ ܕܢܥܒܕܘܢ

70. Esdras 4 4:33

    ܘܥ̇ܢܝܬ ܘܐܡܪܬ. ܥܕܡܐ ܠܐܡܬܝ ܘܐܡܬܝ ܗܠܝܢ. ܡܛܘܠ ܕܙܥܘܪ̈ܝܢ ܐ̈ܢܝܢ ܘܒܝ̈ܫܢ ܫ̈ܢܝܢ ܀

71. Esdras 4 4:34

    ܘܥ̣ܢܐ ܘܐ̣ܡܪ ܠܝ. ܠܐ ܡܣܬܪܗܒ ܐܢܬ ܝܬܝܪ ܡܢ ܡܪܝܡܐ. ܐܢܬ ܓܝܪ ܡܣܬܪܗܒ ܐܢܬ ܡܛܠ ܢܦܫܟ. ܡܪܝܡܐ ܕܝܢ ܡܛܠ ܣܓܝܐ̈ܐ

72. Esdras 4 4:35

    ܠܐ ܗܘܐ ܓܝܪ ܥܠ ܗܠܝܢ ܫܐ̇ܠ ܗܘ̈ܝ ܢܦܫ̈ܬܗܘܢ ܕܙܕܝ̈ܩܐ ܒܐܘܨܪ̈ܝܗܝܢ. ܘܐܡ̣ܪ ܕܥܕܡܐ ܠܐܡܬܝ ܐܝ̇ܬܝܢ ܗܪܟܐ. ܘܐܡܬܝ ܐܕܪܗ ܕܐܓܪܢ ܀

73. Esdras 4 4:36

    ܘܥ̣ܢܐ ܪܡ̇ܐܝܠ ܡܠܐܟܐ ܘܐܡ̣ܪ ܠܗ̈ܝܢ. ܥܕܡܐ ܕܢܬܡܠܐ ܡܢܝܢܐ ܕܐܝܠܝܢ ܕܕܡ̇ܝܢ ܠܟܝ̈ܢ. ܡܛܠ ܕܡܬܩܠ ܬܩ̇ܠܗ ܩܕܝܫܐ ܠܥܠܡܐ

74. Esdras 4 4:37

    ܘܡܡܫܚ ܡ̣ܫܚ ܐܢܘܢ ܠܙܒ̈ܢܐ. ܘܡܡܢܐ ܡܢܐ ܐܢܘܢ ܠܥܕ̈ܢܐ. ܘܠܐ ܢܫܠܐ ܘܠܐ ܢܥܝܪ ܥܕܡܐ ܕܢܬܡܠܐ ܡܢܝܢܐ ܕܐܡܝܪ ܀

75. Esdras 4 4:38

    ܘܥ̇ܢܝܬ ܘܐܡ̇ܪܬ ܐܘ ܡܪܝܐ ܡܪܝ. ܐܠܐ ܗܐ . ܚܢܢ ܟܘܠܢ ܡܠܝܢܢ ܪܘܫܥܐ

76. Esdras 4 4:39

    ܘܕܠܡܐ ܡܛܠܬܢ ܕܝܠܢ ܢܬܟܠܐ ܦܘܪܥܢܐ ܕܙܕܝ̈ܩܐ̇. ܡܛܠ ܚܛܗ̈ܐ ܕܥܡܘܪ̈ܝܗ̇ ܕܐܪܥܐ

77. Esdras 4 4:40

    ܘܥ̣ܢܐ ܘܐܡ̣ܪ ܠܝ. ܙܠ ܘܫܐܠܝܗ̇ ܠܗ̇ܝ ܕܒܟܪܣܗ̇ ܢܣܝܒܐ. ܕܐܡܬܝ ܕܬܡ̇ܠܐ ܬܫܥܐ ܝܪ̈ܚܝܗ݃. ܕܐܢ ܡܫܟܚ ܬܘܒ ܡܪܒܥܐ ܕܢܐܚܕܝܘܗܝ ܠܥ̣ܘܠܐ ܒܓܘܗ

78. Esdras 4 4:41

    ܘܐܡ̇ܪܬ. ܠܐ ܡܫܟܚ ܡܪܝ • ܀ • ܀ ܘܥ̣ܢܐ ܘܐܡ̣ܪ ܠܝ. ܫܝܘܠ ܘܐܘܨܪ̈ܐ ܕܢܦܫ̈ܬܐ ܠܡܪܒܥܐ ܕܡ̇ܝܢ

79. Esdras 4 4:42

    ܐܝܟ̇ܢܐ ܓܝܪ ܕܡܣܬܪܗܒܐ ܗ̇ܝ ܕܝܠ̇ܕܐ ܕܬܥܪܘܩ ܡܢ ܐܘܠܨܢܗ̇ ܕܝܠܕܗ̇. ܗܟܢܐ ܐܦ ܗܠܝܢ ܡܣܬܪܗܒܝܢ ܕܢܬܠܘܢ ܡܕܡ ܕܐܬܬܣܝܡ ܒܗܘܢ ܡܢ ܪܝܫ

80. Esdras 4 4:43

    ܘܗܝ̇ܕܝܢ ܢܬܓܠܐ ܠܟ ܥܠ ܐܝܠܝܢ ܕܡܬܪܓܪܓ ܐܢܬ ܕܬܚܙܐ

81. Esdras 4 4:44

    ܘܥ̇ܢܝܬ ܘܐܡ̇ܪܬ. ܐܢ ܐܫܟ̇ܚܬ ܪ̈ܚ̣ܡܐ ܒܥ̈ܝܢܝܟ. ܘܐܢ ܡܫܟܚܐ ܘܫ̇ܘܐ ܐܢܐ

82. Esdras 4 4:45

    ܐܘܕܥܝܢܝ ܐܦܢ ܗܕܐ. ܕܐܢ ܙܒܢܐ ܕܥ̇ܒܪ ܥܠܝܢ ܣ̇ܓܝ. ܐܘ ܗ̇ܘ ܕܥܬܝܕ ܕܢܐܬܐ

83. Esdras 4 4:46

    ܡܛܠ ܕܙܒܢܐ ܕܥ̣ܒܪ ܝܕ̇ܥܢܐ. ܘܡܕܡ ܕܥܬܝܕ ܠܐ ܝܕ̇ܥ ܐܢܐ ܀

84. Esdras 4 4:47

    ܘܥ̣ܢܐ ܘܐܡ̣ܪ ܠܝ. ܩܘܡ ܡܢ ܓܒܐ ܕܝܡܝܢܐ. ܘܐܚ̇ܘܝܟ ܦܘܫܩܐ ܕܡܬܠܐ

85. Esdras 4 4:48

    ܘܩܡ̇ܬ ܘܚ̇ܙܝܬ. ܘܗܐ ܥ̣ܒܪ ܩܕܡܝ ܐܬܘܢܐ ܕܢܘܪܐ ܕܝܩ̇ܕ. ܘܗ̣ܘܐ ܕܟܕ ܥܒ̣ܪܬ ܫܠܗܒܝܬܐ̣. ܚ̇ܙܝܬ ܘܗܐ ܝܬܪ ܬܢܢܐ

86. Esdras 4 4:49

    ܘܡܢ ܒܬܪ ܗܠܝܢ ܥ̇ܒ̣ܪܬ ܩܕܡܝ ܥܢܢܐ ܕܡܠܝܐ ܡ̈ܝܐ. ܘܢܣ̣ܟܬ ܡܛܪܐ ܙܥܝܦܐ ܣ̇ܓܝ. ܘܟܕ ܥ̣ܒܪ ܙܥܦܗ ܕܡܛܪܐ. ܝܬܪ ܒܗ̇ ܛܘ̈ܦܐ ܀

87. Esdras 4 4:50

    ܘܥ̣ܢܐ ܘܐܡ̣ܪ ܠܝ. ܐܬܪܥܐ ܒܢܦܫܟ ܘܚܙܝ. ܕܐܝܟ̇ܢܐ ܕܡܝܬܪ ܡܛܪܐ ܡܢ ܛܘ̈ܦܐ ܘܢܘܪܐ ܡܢ ܬܢܢܐ̣ ܗܟܢܐ ܐܬܝ̣ܬܪܬ ܡܫܘܚܬܐ ܕܥ̣ܒܪܬ. ܝܬܪ ܕܝܢ ܛܘ̈ܦܐ ܘܬܢܢܐ

88. Esdras 4 4:51

    ܘܒ̇ܥܝܬ ܡܢܗ ܘܐܡ̇ܪܬ. ܐܢ ܟܝ݃ ܚ̇ܝܐ ܐܢܐ ܥܕܡܐ ܠܝܘܡ̈ܬܐ ܗ̇ܢܘܢ̣. ܐܘ ܡ̣ܢܘ ܢܗܘܐ ܒܝܘܡ̈ܬܐ ܗ̇ܢܘܢ ܀

89. Esdras 4 4:52

    ܘܥܢ̣ܐ ܘܐܡ̣ܪ ܠܝ. ܥܠ ܐܬܘ̈ܬܐ ܐܝܠܝܢ ܕܫܐܠܬܢܝ̣. ܡܢܗܝܢ ܡܫܟܚ ܐܢܐ ܕܐܡ̇ܪ ܠܟ. ܥܠ ܚܝܝ̈ܟ ܕܝܢ ܠܐ ܐܫܬ̇ܕܪܬ ܕܐܡ̇ܪ ܠܟ. ܐܦܠܐ ܓܝܪ ܝܕ̇ܥ ܐܢܐ

90. Esdras 4 5:1

    ܥܠ ܐܬܘ̈ܬܐ ܕܝܢ̣. ܗܐ ܝܘܡ̈ܬܐ ܐܬ̇ܝܢ. ܘܢܬܬܚܕܘܢ ܥ̇ܡܘܪ̈ܘܗܝ ܕܥܠܡܐ ܒܬܘܗܬܐ ܣܓܝܐܬܐ. ܘܬܬܟܣܐ ܡܢ̇ܬܐ ܕܫܪܪܐ. ܘܥܩܪܬܐ ܬܗܘܐ ܐܪܥܗ̇ ܕܗܝܡܢܘܬܐ

91. Esdras 4 5:2

    ܘܢܣܓܐ ܥ̣ܘܠܐ ܘܫܪܝܚܘܬܐ̣. ܝܬܝܪ ܡܢ ܗܢܐ ܕܚ̣ܙܝܬ ܗܫܐ. ܘܝܬܝܪ ܡܢ ܗ̇ܘ ܕܫܡ̣ܥܬ ܡܢ ܩܕܝܡ

92. Esdras 4 5:3

    ܘܬܗܘܐ ܕܠܐ ܩܝ̇ܡܐ. ܘܕܠܐ ܡܬܕܝܫܐ ܐܪܥܐ ܗܕܐ ܕܚ̣ܙܝܬ ܕܡܡܠܟܐ ܗܫܐ. ܘܢܚܙܘܢܗ̇ ܠܐܪܥܐ ܗܕܐ ܟܕ ܚܪܒܐ

93. Esdras 4 5:4

    ܐܢ ܕܝܢ ܢܬܠ ܠܟ ܡܪܝܡܐ ܚܙܘܐ̣ . ܚ̇ܙܐ ܐܢܬ ܠܗ̇ܝ ܕܒܬܪ ܬܠܝܬܝܬܐ ܕܡܫܬܓܫܐ. ܘܢܬܚܙܐ ܡܢ ܫܠܝܐ ܫܡ̣ܫܐ ܒܠܠܝܐ. ܘܣܗܪܐ ܒܐܝܡܡܐ

94. Esdras 4 5:5

    ܘܩܝܣܐ ܢ̇ܛܦ ܕܡܐ. ܘܟܐܦܐ ܬܬܠ ܩܠܗ̇. ܘܥܡ̈ܡܐ ܢܬܙܝܥܘܢ. ܘܐܐܪ̈ ܢܬܚܠܦܘܢ

95. Esdras 4 5:6

    ܘܢܡܠܟ ܗ̇ܘ ܕܠܐ ܣܒ̇ܪܝܢ ܥܠܘܗܝ ܣܓܝܐ̈ܐ. ܘܦܪܚܬܐ ܬܫܢܐ

96. Esdras 4 5:7

    ܘܝܡܐ ܕܣܕܘܡ ܢܥܒܕ ܢܘ̈ܢܐ ܣܓ̈ܝܐܐ. ܘܢܬܠ ܩܠܗ ܒܠܠܝܐ ܗ̇ܘ ܕܠܐ ܝܕ̇ܥܝܢ ܠܗ ܣ̈ܓܝܐܐ. ܘܟܠܗܘܢ ܢܫܡܥܘܢܗ̇

97. Esdras 4 5:8

    ܘܦܚ̈ܬܐ ܢܬܥܒܕܘܢ ܒܕܘ̈ܟܝܬܐ ܣܓܝܐ̈ܬܐ. ܘܬܟܝܒܐܝܬ ܢܘܪܐ ܬܗܘܐ ܡܫܬܕܪܐ. ܘܚܝ̈ܘܬܐ ܕܕܒܪܐ ܢܫ̈ܢܝܢ ܡܢ ܐܬܪܗܝܢ. ܘܐܬ̈ܘܬܐ ܡܢ ܢܫ̈ܐ ܢܬܚ̈ܙܝܢ. ܢܬܝܠܕܘܢ ܓܝܪ ܥܘ̣̈ܠܐ. ܟܕ ܠܐ ܡܫܡܠܝܢ

98. Esdras 4 5:9

    ܘܒܡ̈ܝܐ ܚ̈ܠܝܐ ܢܫܬܟܚܘܢ ܡܠ̈ܝܚܐ. ܘܪ̈ܚ̇ܡܐ ܥܠ ܪ̈ܚܡ̇ܝܗܘܢ ܡܢ ܫܠܝܐ ܢܥܒܕܘܢ ܩܪܒܐ. ܘܬܬܟܣܐ ܗܝ̇ܕܝܢ ܚܟܡܬܐ. ܘܣܟܘܠܬܢܘܬܐ ܬܐܙܠ ܠܗ̇ ܠܐܘܨܪ̈ܝܗ̇.

99. Esdras 4 5:10

    ܘܬܬܒܥܐ ܠܘܬ ܣܓܝܐ̈ܐ ܘܠܐ ܬܫܬܟܚ. ܘܢܣܓܐ ܛܠܘܡܝܐ ܘܫܪܝܚܘܬܐ ܥܠ ܐܪܥܐ

100. Esdras 4 5:11

     ܘܢܫܐ̇ܠ ܐܬܪܐ ܠܐ̇ܝܢܐ ܕܩܪܝܒ ܠܗ. ܘܢܐܡܪ ܠܗ ܕܠܡܐ ܥܒ̣ܪܬ ܥܠܝܟ ܙܕܝܩܘܬܐ ܐܘ ܓܒܪܐ ܕܥ̇ܒܕ ܙܕܝܩܘܬܐ. ܘܗ̣ܘ ܕܝܢ ܐܬܪܐ ܢܟܦܘܪ

Next → — showing 1–100 of 714

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.