← All works

Peshitta Esdras 3

Peshitta (Syriac Old Testament) · 407 sections

1. Esdras 3 5:59

   ܟܠܗ ܥܡܐ ܝܒܒܘ ܘܓܥܘ ܒܩܠܐ ܪܒܐ ܟܕ ܡܫܒܚܝܢ ܠܡܪܝܐ ܥܠ ܩܘܡܐ ܕܒܝܬܗ ܕܡܪܝܐ

2. Esdras 3 5:60

   ܘܐܬܘ ܡܢ ܟܗ̈ܢܐ ܘܠܘܝ̈ܐ ܘܡܢ ܗܢܘܢ ܪ̈ܝܫܝ ܡܘܬܒ̈ܐ ܐܝܟ ܫܪ̈ܒܬܐ ܕܝܠܗܘܢ ܩܫܝ̈ܫܐ ܗܢܘܢ ܕܚܙܐܘܗܝ ܠܒܝܬܐ ܕܩܕܡ ܗܢܐ ܠܘܬ ܒܢܝܢܐ ܕܗܢܐ ܥܡ ܩܥܬܐ ܘܒܟܝܐ ܪܒܐ

3. Esdras 3 5:61

   ܘܣܓܝ̈ܐܐ ܥܡ ܫܝܦܘܪ̈ܐ ܘܚܕܘܬܐ ܒܩܠܐ ܪܒܐ

4. Esdras 3 5:62

   ܐܝܟܢܐ ܕܥܡܐ ܠܐ ܢܫܡܥ ܠܫܝܦܘܪ̈ܐ ܡܛܠ ܒܟܝܐ ܕܥܡܐ ܟܢܫܐ ܓܝܪ ܐܝܬܘܗܝ ܗܘܐ ܕܡܝܒܒ ܪܘܪܒܐܝܬ ܡܕܡ ܐܝܟܢܐ ܕܡܢ ܪܘܚܩܐ ܬܫܬܡܥ

5. Esdras 3 5:63

   ܘܟܕ ܫܡܥܘ ܒ̈ܥܠܕܒܒܐ ܕܫܪ̈ܒܬܐ ܕܝܗܘܕܐ ܘܕܒܢܝܡܝܢ ܐܬܘ ܠܡܫܬܘܕܥܘ ܡܢܘ ܩܠܐ ܕܫܝܦܘܪ̈ܐ

6. Esdras 3 5:64

   ܘܐܫܬܘܕܥܘ ܕܗܢܘܢ ܕܡܢ ܫܒܝܬܐ ܒܢܝܢ ܗܝܟܠܐ ܠܡܪܝܐ ܐܠܗܐ ܕܝܣܪܝܠ

7. Esdras 3 5:65

   ܘܟܕ ܩܪܒܘ ܠܙܘܪܒܒܝܠ ܘܠܝܫܘܥ ܘܠܪ̈ܝܫܢܐ ܕܫܪ̈ܒܬܐ ܐܡܪܝܢ ܠܗܘܢ ܢܒܢܐ ܥܡܟܘܢ

8. Esdras 3 5:66

   ܒܕܡܘܬܐ ܓܝܪ ܕܝܠܟܘܢ ܫܡܥܝܢܢ ܠܗ ܠܡܪܝܐ ܕܝܠܟܘܢ ܘܠܗ ܡܕܒܚܝܢܢ ܡܢ ܝܘ̈ܡܬܐ ܕܐܫܬܩܦܬ ܡܠܟܐ ܕܐܬܘܪ̈ܝܐ ܗܘ ܕܐܥܒܪ ܗܘܐ ܠܢ ܠܗܪܟܐ

9. Esdras 3 5:67

   ܘܐܡܪܘ ܠܗܘܢ ܙܘܪܒܒܝܠ ܘܝܫܘܥ ܘܪ̈ܝܫܢܐ ܕܫܪ̈ܒܬܐ ܕܝܣܪܝܠ ܠܐ ܠܢ ܘܠܟܘܢ ܗܝ ܕܠܡܒܢܐ ܒܝܬܐ ܠܡܪܝܐ ܐܠܗܐ ܕܝܠܢ

10. Esdras 3 5:68

    ܚܢܢ ܓܝܪ ܒܠܚܘܕܝܢ ܒܢܝܢܢ ܠܡܪܝܐ ܐܠܗܐ ܕܝܠܢ ܝܣܪܝܠ ܢܩܦܐܝܬ ܠܗܠܝܢ ܕܦܩܕ ܠܢ ܟܘܪܫ ܡܠܟܐ ܕܦܪ̈ܣܝܐ

11. Esdras 3 5:69

    ܥܡ̈ܡܐ ܕܝܢ ܕܐܪܥܐ ܕܣܝܡܝܢ ܗܘܘ ܥܠ ܗܢܘܢ ܕܒܝܗܘܕ ܘܚܒܫܝܢ ܠܗܘܢ ܒܩܪܒܐ ܟܠܝܢ ܗܘܘ ܠܡܒܢܐ

12. Esdras 3 5:70

    ܘܟܕ ܡ̈ܠܟܐ ܘܡܝܬܝܘܬ ܥܡܐ ܘܟܢܘ̈ܫܝܐ ܥܒܕܝܢ ܗܘܘ ܟܠܘ ܗܘܘ ܠܡܒܢܐ ܘܠܡܫܡܠܝܘ ܠܒܢܝܢܐ ܟܠܗ ܙܒܢܐ ܕܚܝܘ̈ܗܝ ܕܡܠܟܐ ܟܘܪܫ ܘܐܬܟܠܝܘ ܡܢ ܕܠܡܒܢܐ ܫ̈ܢܝܐ ܬܪ̈ܬܝܢ ܥܕܡܐ ܠܡܠܟܘܬܗ ܕܕܪܝܘܫ

13. Esdras 3 6:1

    ܐܬܢܒܝ ܚܓܝ ܘܙܟܪܝܐ ܗܘ ܕܥܕܘ ܗܢܘܢ ܢܒ̈ܝܐ ܥܠ ܝܘ̈ܕܝܐ ܗܢܘܢ ܕܒܝܗܘܕ ܘܒܐܘܪܝܫܠܡ ܥܠ ܫܡܗ ܕܡܪܝܐ ܐܠܗܐ ܕܝܣܪܝܠ ܥܠܝܗܘܢ

14. Esdras 3 6:2

    ܗܝܕܝܢ ܟܕ ܩܡ ܙܘܪܒܒܝܠ ܗܘ ܕܫܠܐܬܝܠ ܘܝܫܘܥ ܗܘ ܕܝܘܙܕܩ ܫܪܝܘ ܠܡܒܢܐ ܠܒܝܬܗ ܕܐܠܗܐ ܗܘ ܕܒܐܘܪܝܫܠܡ ܟܕ ܥܡܗܘܢ ܐܝܬ ܗܘܘ ܢܒ̈ܝܐ ܕܡܪܝܐ ܕܡܥܕܪܝܢ ܗܘܘ ܠܗܘܢ

15. Esdras 3 6:3

    ܒܗ ܒܙܒܢܐ ܩܪܝܒ ܗܘܐ ܠܘܬܗܘܢ ܣܝܣܝܢܘܣ ܗܘ ܗܘܦܪܟܐ ܕܣܘܪܝܐ ܘܕܦܘܢܝܩܐ ܘܣܬܪܘܒܘܪܢܝܣ ܘܚܒܪ̈ܐ ܕܐܟܚܕܐ ܘܐܡܪܘ ܠܗܘܢ

16. Esdras 3 6:4

    ܡܢܘ ܕܟܕ ܠܟܘܢ ܦܩܕ ܠܒܝܬܐ ܗܢܐ ܒܢܝܢ ܐܢܬܘܢ ܘܠܬܛܠܝܠܐ ܗܢܐ ܘܠܗܠܝܢ ܐܚܪ̈ܢܝܬܐ ܟܠܗܝܢ ܡܫܡܠܝܢ ܐܢܬܘܢ ܘܡܢܘ ܐܝܬܝܗܘܢ ܒܢܘ̈ܝܐ ܗܢܘܢ ܕܗܠܝܢ ܡܫܡܠܝܢ

17. Esdras 3 6:5

    ܘܩܢܘ ܛܝܒܘܬܐ ܟܕ ܣܥܘܪܘܬܐ ܗܘܬ ܥܠ ܫܒܝܬܐ ܡܢ ܡܪܝܐ ܩܫܝ̈ܫܐ ܕܝ̈ܘܕܝܐ

18. Esdras 3 6:6

    ܘܠܐ ܐܬܟܠܝܘ ܡܢ ܒܢܝܢܐ ܥܕܡܐ ܕܐܫܬܘܕܥ ܠܕܪܝܘܫ ܡܛܠܬܗܘܢ ܘܐܬܐܡܪ ܠܘܬܗ

19. Esdras 3 6:7

    ܨܚܚܐ ܕܐܓܪܬܐ ܗܝ ܕܟܬܒܘ ܗܘܘ ܠܕܪܝܘܫ ܘܫܕܪܘ ܣܝܣܝܢܘܣ ܗܘ ܗܘܦܪܟܐ ܕܣܘܪܝܐ ܘܕܦܘܢܝܩܐ ܘܣܬܪܘܒܘܪܙܢܝܣ ܘܚܒܪ̈ܐ ܕܐܟܚܕܐ ܗܢܘܢ ܕܒܣܘܪܝܐ ܘܒܦܘܢܝܩܐ ܗܓ̈ܡܘܢܐ ܠܡܠܟܐ ܕܪܝܘܫ ܠܡܚܕܐ

20. Esdras 3 6:8

    ܟܠܗܝܢ ܝܕܝ̈ܥܬܐ ܢܗܘܝܢ ܠܡܪܐ ܕܝܠܢ ܡܠܟܐ ܡܛܠ ܕܟܕ ܐܬܝܢܢ ܠܐܬܪܐ ܕܝܗܘܕ ܘܐܬܝܢܢ ܠܐܘܪܝܫܠܡ ܡܕܝܢܬܐ ܐܕܪܟܢܢ ܠܩ̈ܫܝܫܐ ܕܫܒܝܬܐ ܕܝܘ̈ܕܝܐ ܒܐܘܪܝܫܠܡ ܡܕܝܢܬܐ ܟܕ ܒܢܝܢ ܒܝܬܐ ܠܡܪܝܐ ܪܒܐ ܚܕܬܐ ܒܝܕ ܟܐܦ̈ܐ ܓܙܝܪ̈ܬܐ ܣܓܝ̈ܐܬ ܛܝܡܐ ܘܩܝ̈ܣܐ ܕܡܬܬܣܝܡܝܢ ܒܒ̈ܬܐ

21. Esdras 3 6:9

    ܠܥ̇ܒ̈ܕܐ ܗܢܘܢ ܕܒܝܨܝܦܘܬܐ ܗܘܝܢ ܘܡܬܬܨܠܚ ܗܘܐ ܥܒܕܐ ܒܐܝ̈ܕܝܐ ܕܝܠܗܘܢ ܘܒܟܠܗ ܬܫܒܘܚܬܐ ܒܝܨܝܦܘܬܐ ܡܫܬܡܠܐ

22. Esdras 3 6:10

    ܗܝܕܝܢ ܡܫܐܠܝܢ ܗܘܝܢ ܠܩ̈ܫܝܫܐ ܗܢܘܢ ܟܕ ܐܡܪܝܢܢ ܡܢܘ ܕܟܕ ܠܟܘܢ ܦܩܕ ܒܢܝܢ ܐܢܬܘܢ ܠܒܝܬܐ ܗܢܐ ܘܠܥܒ̈ܕܐ ܗܠܝܢ ܡܫܬܐܣܝܢ ܐܢܬܘܢ

23. Esdras 3 6:11

    ܫܐܠܢ ܐܢܘܢ ܗܟܝܠ ܡܛܠ ܗܝ ܕܐܦ ܢܫܘܕܥ ܠܟ ܘܢܟܬܘܒ ܠܟ ܐܢܫܐ ܪ̈ܝܫܢܝܗܘܢ ܡܟܬܒܘܬ ܫܡ̈ܗܐ ܫܐܠܝܢ ܗܘܝܢ ܠܗܘܢ ܕܩܕܡܝܐ ܕܪ̈ܝܫܢܝܗܘܢ

24. Esdras 3 6:12

    ܗܢܘܢ ܕܝܢ ܦܢܝܘ ܠܢ ܟܕ ܐܡܪܝܢ ܐܝܬܝܢ ܥܒ̈ܕܐ ܕܡܪܝܐ ܗܘ ܕܒܪܐ ܠܫܡܝܐ ܘܠܐܪܥܐ

25. Esdras 3 6:13

    ܘܒܢܐ ܗܘܐ ܒܝܬܐ ܡܢ ܩܕܡ ܫܢܝ̈ܐ ܣܓܝ̈ܐܬܐ ܒܝܕ ܡܠܟܐ ܕܐܝܣܪܝܠ ܪܒܐ ܘܚܝܠܬܢܐ ܘܐܫܬܡܠܝ

26. Esdras 3 6:14

    ܘܡܛܠ ܕܐܒ̈ܗܐ ܕܝܠܢ ܟܕ ܡܪܡܪܘ ܗܘܘ ܚܛܘ ܒܡܪܝܐ ܗܘ ܫܡܝܢܐ ܕܐܝܣܪܝܠ ܐܫܠܡ ܐܢܘܢ ܒܐܝ̈ܕܝܐ ܕܢܒܘܟܕܢܨܪ ܡܠܟܐ ܕܒܒܝܠ ܡܠܟܐ ܕܟܠܕܝ̈ܐ

27. Esdras 3 6:15

    ܘܠܒܝܬܐ ܟܕ ܣܬܪܘ ܐܘܩܕܘ ܘܠܥܡܐ ܫܒܘ ܠܒܒܝܠ

28. Esdras 3 6:16

    ܒܫܢܬܐ ܕܝܢ ܩܕܡܝܬܐ ܟܕ ܡܠܟܐ ܗܘܐ ܟܘܪܫ ܠܡܒܢܐ ܒܝܬܐ ܗܢܐ

29. Esdras 3 6:17

    ܘܠܡ̈ܐܢܐ ܟܗ̈ܢܝܐ ܕܕܗܒܐ ܘܕܣܐܡܐ ܗܠܝܢ ܕܐܦܩ ܗܘܐ ܢܒܘܟܕܢܨܪ ܡܢ ܗܝܟܠܐ ܗܘ ܕܒܐܘܪܝܫܠܡ ܘܣ̣ܡ ܗܘܐ ܐܢܘܢ ܒܗܝܟܠܐ ܕܝܠܗ ܬܘܒ ܐܦܩ ܐܢܘܢ ܟܘܪܫ ܡܠܟܐ ܡܢ ܗܝܟܠܐ ܗܘ ܕܒܒܒܝܠ ܘܐܬܬܫܠܡܘ ܠܙܘܪܒܒܝܠ ܘܠܫܢܒܫܘܪ ܗܘ ܗܘܦܪܟܐ

30. Esdras 3 6:18

    ܘܐܬܦܩܕ ܠܗ ܘܐܘܒܠ ܠܟܠܗܘܢ ܡ̈ܐܢܐ ܗܠܝܢ ܠܡܬܬܣܡܘ ܒܗܝܟܠܐ ܗܘ ܕܒܐܘܪܝܫܠܡ ܘܕܗܝܟܠܗ ܕܡܪܝܐ ܢܬܒܢܐ ܥܠ ܕܘܟܬܗ

31. Esdras 3 6:19

    ܗܝܕܝܢ ܫܢܒܫܘܪ ܗ̇ܘ ܕܟܕ ܐܬܐ ܗܘܐ ܐܪܡܝ ܫܬܐܣ̈ܐ ܕܒܝܬܗ ܕܡܪܝܐ ܗܘ ܕܒܐܘܪܝܫܠܡ ܘܡܢ ܗܘ ܥܕܡܐ ܠܗܫܐ ܟܕ ܡܬܒܢܐ ܠܐ ܢܣܒ ܫܘܡܠܝܐ

32. Esdras 3 6:20

    ܗܫܐ ܗܟܝܠ ܐܢ ܕܝܢܝܢ ܐܢܬܘܢ ܡܠܟܐ ܢܣܬܥܪ ܒܒܝܬ ܢܛܘܪܘܬ ܟܬܒ̈ܐ ܡ̈ܠܟܝܐ ܕܟܘܪܫ ܡܠܟܐ ܗܢܘܢ ܕܒܒܒܝܠ

33. Esdras 3 6:21

    ܘܐܢ ܡܫܟܚܝܢ ܐܢܬܘܢ ܕܥܡ ܦܘܩܕܢܐ ܕܟܘܪܫ ܡܠܟܐ ܗܘܐ ܒܢܝܢܐ ܕܒܝܬܗ ܕܡܪܝܐ ܗܘ ܕܒܐܘܪܝܫܠܡ ܘܡܬܬܕܝܢܐ ܡܢ ܡܪܢ ܡܠܟܐ ܕܝܠܢ ܦܪܘܣܦܘܢܝܘܣ ܢܥܒܕ ܠܢ ܡܛܠ ܗܠܝܢ

34. Esdras 3 6:22

    ܗܝܕܝܢ ܗܘ ܡܠܟܐ ܕܪܝܘܫ. ܦܩܕ ܠܡܣܥܪ ܠܒܝܬ ܢܛܘܪܘܬ ܟܬܒ̈ܐ ܗܠܝܢ ܕܣܝܡܝܢ ܒܒܒܝܠ. ܘܐܫܬܟܚܘ ܒܩܒܛܝܢܘܣ ܕܒܣܚܪܬܐ ܗܝ ܕܒܡܕܝ ܐܬܪܐ̣. ܕܘܟܬܐ ܚܕܐ ܗܝ ܕܒܗ ܡܥܗܕܢ ܗܘܝ ܗܠܝܢ ܀

35. Esdras 3 6:23

    ܒܫܢܬܐ ܩܕܡܝܬܐ ܟܕ ܡܡܠܟ ܗܘܐ ܟܘܪܫ ܡܠܟܐ ܟܘܪܫ ܦܩܕ ܕܒܝܬܐ ܕܡܪܝܐ ܗܘ ܕܒܐܘܪܝܫܠܡ ܢܬܒܢܐ ܐܝܟܐ ܕܕܒܚܝܢ ܒܝܕ ܢܘܪܐ ܐܡܝܢܐܝܬ

36. Esdras 3 6:24

    ܗ̇ܘ ܕܪܘܡܗ ܕܐܡ̈ܐ ܫ̈ܬܝܢ. ܦܬܝܐ ܕܐܡ̈ܐ ܫ̈ܬܝܢ. ܒܝܕ ܕܘܡܣ̈ܐ ܕܟܐ̈ܦܐ ܕܦܣܝ̣ܠܝܢ ܬܠܬܐ. ܘܕܘܡܣܐ ܕܩܝ̈ܣܐ ܕܡܢܗ ܕܐܬܪܐ ܚܕܬܐ ܚܕ. ܘܕܢܦܩܬܐ ܬܬܝܗܒ. ܡܢ ܒܝܬܗ ܕܟܘܪܫ ܡܠܟܐ.

37. Esdras 3 6:25

    ܘܠܡ̈ܐܢܐ ܟܗ̈ܢܝܐ ܕܒܝܬܗ ܕܡܪܝܐ ܕܕܗܒܐ ܘܕܣܐܡܐ ܗܢܘܢ ܕܐܦܩ ܢܒܘܟܕܢܨܪ ܡܢ ܒܝܬܐ ܗܘ ܕܒܐܘܪܝܫܠܡ ܘܐܘܒܠ ܗܘܐ ܠܒܒܝܠ ܢܬܦܢܘܢ ܠܒܝܬܐ ܗܘ ܕܒܐܘܪܝܫܠܡ ܐܝܟܐ ܕܐܝܬܝܗܘܢ ܗܘܘ ܕܣܝܡܝܢ ܐܝܟܢܐ ܕܢܬܬܣܝܡܘܢ ܬܡܢ

38. Esdras 3 6:26

    ܦܩܕ ܕܝܢ ܕܢܝ̣ܨܦ ܠܣܝܣܢܐ ܗܘܦܪܟܐ ܕܣܘܪܝܐ ܘܕܦܘܢܝܩܐ ܘܠܣܬܪܘܒܘܪܙܢܐ ܘܠܚܒܪ̈ܐ ܕܐܟܚܕܐ ܘܠܗܢܘܢ ܕܡܛܟܣܝܢ ܒܣܘܪܝܐ ܘܒܦܘܢܝܩܐ ܗܝ̈ܓܡܘܢܐ ܠܡܪܚܩܘ ܡܢ ܕܘܟܬܐ ܢܫܒܩܘܢ ܕܝܢ ܠܥܒܕܗ ܕܡܪܝܐ ܙܘܪܒܒܝܠ ܗܘܦܪܟܐ ܕܝܢ ܕܝܗܘܕ ܘܠܩܫ̈ܝܫܐ ܕܝܘ̈ܕܝܐ ܕܠܒܝܬܐ ܗܘ ܠܡܒܢܐ ܥܠܝܗ ܕܕܘܟܬܐ

39. Esdras 3 6:27

    ܐܦ ܐܢܐ ܕܝܢ ܦܩܕܬ ܟܠܢܐܝܬ ܠܡܒܢܐ ܘܠܡܨܕܘ ܐܝܟܢܐ ܕܢܥܒܕܘܢ ܥܡ ܫܒܝܬܐ ܕܝܗܘܕܐ ܥܕܡܐ ܕܡܫܬܡܠܐ ܒܝܬܗ ܕܡܪܝܐ

40. Esdras 3 6:28

    ܘܡܢ ܡܕܐܬܐ ܕܣܘܪܝܐ ܥܡܝܩܬܐ ܘܕܦܘܢܝܩܐ ܝܨܝܦܐܝܬ ܦܘܪܫܢܐ ܢܬܝܗܒ ܠܗܢܘܢ ܐܢܫܐ ܠܕܒܚܬܐ ܠܡܪܝܐ ܠܙܘܪܒܒܝܠ ܗܘܦܪܟܐ ܠܬܘܪ̈ܐ ܘܠܕܟܪ̈ܐ ܘܠܐܡܪ̈ܐ

41. Esdras 3 6:29

    ܒܗ ܒܕܡܘܬܐ ܕܝܢ ܘܚ̈ܛܐ ܘܡܠܚܐ ܘܚܡܪܐ ܘܡܫܚܐ ܐܡܝܢܐܝܬ ܒܟܠ ܫܢܬܐ ܐܟܡܐ ܕܟܗ̈ܢܐ ܗܢܘܢ ܕܒܐܘܪܝܫܠܡ ܡܨܚܝܢ ܕܡܬܛܠܩ ܒܟܠ ܝܘܡܐ ܕܠܐ ܦܘܫܟܐ

42. Esdras 3 6:30

    ܐܝܟܢܐ ܕܢܬܩܪܒܘܢ ܢܘܩ̈ܝܐ ܠܐܠܗܐ ܗ̇ܘ ܡܪܝܡܐ. ܚܠܦ ܡܠܟܐ ܘܥܒ̈ܕܘܗܝ ܘܢܨܠܘܢ ܥܠ ܚܝ̈ܐ ܕܝܠܗܘܢ ܀

43. Esdras 3 6:31

    ܘܬܦܩܘܕ ܐܝܟܢܐ ܕܟܠ ܐܝܠܝܢ ܕܐܢ ܢܥܒܪܘܢ ܠܡܕܡ ܡܢ ܐܝܠܝܢ ܕܟܬܝܒ̈ܢ ܐܘ ܐܦ ܢܒܛܠܘܢ ܢܬܢܣܒ ܩܝܣܐ ܡܢ ܕܝܠܗ ܘܥܠܘܗܝ ܢܬܬܠܐ ܘܗܠܝܢ ܕܐܝܬ ܠܗ ܢܗ̣̈ܘܝܢ ܡ̈ܠܟܝܬܐ

44. Esdras 3 6:32

    ܡܛܠ ܗܠܝܢ ܐܦ ܡܪܝܐ ܗܘ ܕܫܡܐ ܕܝܠܗ ܩܪܐ ܬܡܢ ܢܣܪܘܚ ܠܟܠ ܡܠܟܐ ܘܥܡܐ ܗܘ ܕܡܘܫܛ ܐܝܕܐ ܕܝܠܗ ܠܡܟܠܐ ܐܘ ܠܡ̇ܐܒܫܘ ܠܒܝܬܗ ܕܡܪܝܐ ܗܘ ܕܒܐܘܪܝܫܠܡ

45. Esdras 3 6:33

    ܐܢܐ ܡܠܟܐ ܕܪܝܘܫ ܦܩܕܬ ܝܨܝܦܐܝܬ ܕܐܝܟ ܗܠܝܢ ܠܡܗܘܐ

46. Esdras 3 7:1

    ܗܝܕܝܢ ܣܝܣܝܢܘܣ ܗܘܦܪܟܐ ܕܣܘܪܝܐ ܥܡܝܩܬܐ ܘܕܦܘܢܝܩܐ ܘܣܬܪܘܒܘܪܙܝܢܘܣ ܘܚܒܪ̈ܐ ܕܐܟܚܕܐ ܟܕ ܢܩܦܘ ܠܗܠܝܢ ܕܡܢ ܡܠܟܐ ܕܪܝܘܫ ܐܬܦܩܕܝܢ

47. Esdras 3 7:2

    ܩܝܡܝܢ ܗܘܘ ܥܠ ܥܒ̈ܕܐ ܟܗ̈ܢܝܐ ܟܕ ܝܬܝܪ ܝܨܝܦܐܝܬ ܡܥܕܪܝܢ ܗܘܘ ܠܩܫܝ̈ܫܐ ܕܝܘ̈ܕܝܐ ܘܩܝܘ̈ܡܐ ܟܗ̈ܢܝܐ

48. Esdras 3 7:3

    ܘܡܬܬܨ̈ܠܚܢܐ ܗܘܘ ܥܒ̈ܕܐ ܟܗ̈ܢܝܐ ܟܕ ܡܬܢܒܝܢ ܗܘܘ ܚܓܝ ܘܙܟܪܝܐ ܢܒ̈ܝܐ

49. Esdras 3 7:4

    ܘܫܡܠܝܘ ܗܠܝܢ ܒܝܕ ܦܘܩܕܢܐ ܕܡܪܝܐ ܐܠܗܐ ܕܝܣܪܝܠ ܘܥܡ ܦܘܩܕܢܐ ܕܟܘܪܫ ܘܕܕܪܝܘܫ ܘܐܪܛܚܫܫܬ ܡ̈ܠܟܐ ܕܦܪ̈ܣܝܐ

50. Esdras 3 7:5

    ܥܕܡܐ ܠܫܢ̇ܬܐ ܫܬܝܬܝܬܐ ܕܕܪܝܘܫ ܡܠܟܐ ܕܦܪ̈ܣܝܐ ܐܫܬܡܠܝ ܒܝܬܐ ܗܘ ܩܕܝܫܐ ܥܕܡܐ ܠܬܠܬܐ ܘܥܣܪ̈ܝܢ ܕܝܪܚܐ ܐܕܪ ܕܫܢܬܐ ܫܬܝܬܝܬܐ ܕܡܠܟܐ ܕܪܝܘܫ

51. Esdras 3 7:6

    ܘܥܒܕܘ ܒܢܝ̈ܐ ܕܐܝܣܪܝܠ ܘܟܗ̈ܢܐ ܘܠܘ̈ܝܐ ܘܗܢܘܢ ܕܫܪܟܐ ܕܡܢ ܫܒܝܬܐ ܗܢܘܢ ܕܐܬܬܘܣܦܘ ܢܩܝܦܐܝܬ ܠܗܢܝܢ ܕܒܟܬܒܐ ܕܡܘܫܐ

52. Esdras 3 7:7

    ܘܩܪܒܘ ܠܚܘܕܬܐ ܕܗܝܟܠܗ ܕܡܪܝܐ ܬܘܪ̈ܐ ܡܐܐ ܕܟܪ̈ܐ ܡܐܬܝ̈ܢ ܐܡܪ̈ܐ ܐܪ̈ܒܥܡܐܐ

53. Esdras 3 7:8

    ܨܝܦܪ̈ܝܐ ܕܚܠܦ ܚܛܗ̈ܐ ܕܟܠܗ ܐܝܣܪܝܠ ܬܪ̈ܥܣܪ ܐܝܟ ܡܢܝܢܐ ܡܢ ܕܪ̈ܝܫܢܝ ܫܪ̈ܒܬܐ ܕܝܣܪܝܠ ܬܪ̈ܥܣܪ

54. Esdras 3 7:9

    ܘܩܡܘ ܟܗ̈ܢܐ ܘܠܘ̈ܝܐ ܟܕ ܡܥܛܦܝܢ ܐܣ̈ܛܠܐ ܐܝܟ ܫܪ̈ܒܬܐ ܥܠ ܥܒ̈ܕܐ ܕܡܪܝܐ ܐܠܗܐ ܕܐܝܣܪܝܠ ܢܩܝܦܐܝܬ ܠܟܬܒܐ ܕܡܘܫܐ ܘܬܪ̈ܥܐ ܥܠ ܟܠܚܕ ܡܢ ܬܪ̈ܥܐ

55. Esdras 3 7:10

    ܘܥܒܕܘ ܒܢܝ̈ܐ ܕܐܝܣܪܝܠ ܗܢܘܢ ܕܡܢ ܫܒܝܬܐ ܦܨܚܐ ܒܐܪ̈ܒܥܣܪܐ ܕܝܪܚܐ ܩܕܡܝܐ ܡܛܠ ܕܐܬܕܟܝܘ ܟܗ̈ܢܐ ܘܠܘ̈ܝܐ ܐܟܚܕܐ

56. Esdras 3 7:11

    ܘܟܠܗܘܢ ܒܢܝ̈ܐ ܕܫܒܝܬܐ ܠܐ ܐܬܕܟܝܘ ܗܘܘ ܡܛܠ ܕܠܘ̈ܝܐ ܟܠܗܘܢ ܐܟܚܕܐ ܐܬܕܟܝܘ

57. Esdras 3 7:12

    ܘܕܒܚܘܗܝ ܠܦܨܚܐ ܠܟܠܗܘܢ ܒ̈ܢܝܐ ܕܫܒܝܬܐ ܘܠܐܚ̈ܐ ܕܝܠܗܘܢ ܠܟܗ̈ܢܐ ܘܠܗܘܢ

58. Esdras 3 7:13

    ܘܐܟܠܘ ܒܢܝ̈ܐ ܕܐܝܣܪܝܠ ܗܢܘܢ ܕܡܢ ܫܒܝܬܐ ܟܠܗܘܢ ܗܢܘܢ ܕܐܬܦܪܫܘ ܡܢ ܢܕܝܕܘܬܐ ܕܥܡ̈ܡܐ ܕܐܪܥܐ ܟܕ ܒܥܝܢ ܠܡܪܝܐ

59. Esdras 3 7:14

    ܘܥܒܕܘ ܠܥܐܕܐ ܕܦܛܝܪ̈ܐ ܫܒܥܐ ܝܘ̈ܡܐ ܟܕ ܚܕܝܢ ܩܕܡ ܡܪܝܐ

60. Esdras 3 7:15

    ܡܛܠ ܕܫܚܠܦ ܠܡܚܫܒܬܐ ܕܡܠܟܐ ܕܐܬܘܪ̈ܝܐ ܥܠܝܗܘܢ ܠܡܚܝܠܘ ܠܐܝܕܝ̈ܗܘܢ ܥܠ ܥܒ̈ܕܐ ܕܡܪܝܐ ܐܠܗܐ ܕܐܝܣܪܝܠ

61. Esdras 3 8:1

    ܘܕܛܠܐ ܡܢ ܗܠܝܢ ܐܝܬܘܗܝ ܟܕ ܡܡܠܟ ܗܘܐ ܐܪܛܚܫܫܬ ܡܠܟܐ ܕܦܪ̈ܣܝܐ ܥܠ ܗܘܐ ܥܙܪܐ ܕܒܝܬ ܫܐܪܝܐ ܗܘ ܕܥܙܪܝܐ ܗܘ ܕܚܠܩܝܐ ܗܘ ܕܫܠܘܡ

62. Esdras 3 8:2

    ܗܘ ܕܨܕܘ ܗܘ ܕܐܚܝܛܘܒ ܗܘ ܕܐܡܐܪܝܐ ܗܘ ܕܥܘܙܝܐ ܗܘ ܕܡܪܪܘܬ ܗܘ ܕܙܪܚ ܗܘ ܕܫܘܝܐ ܗܘ ܕܒܘܩܐ ܗܘ ܕܐܒܝܫܘܝ ܗܘ ܕܦܝܢܚܣ ܗܘ ܕܐܠܝܥܙܪ ܗܘ ܕܐܗܪܘܢ ܟܗܢܐ ܩܕܡܝܐ

63. Esdras 3 8:3

    ܗܢܐ ܥܙܪܐ ܣܠܩ ܡܢ ܒܒܝܠ ܐܟܡܢ ܕܣܦܪܐ ܡܗܝܪܐ ܐܝܬܘܗܝ ܗܘܐ ܒܢܡܘܣܗ ܕܡܘܫܐ ܗܘ ܕܐܬܝܗܒ ܡܢ ܐܠܗܐ ܕܐܝܣܪܝܠ

64. Esdras 3 8:4

    ܘܝܗܒ ܠܗ ܡܠܟܐ ܬܫܒܘܚܬܐ ܟܕ ܐܫܟܚ ܛܝܒܘܬܐ ܩܕܡܘܗܝ ܥܠ ܟܠܗܝܢ ܦܝܣ̈ܬܐ ܕܝܠܗ

65. Esdras 3 8:5

    ܘܣܠܩܘ ܥܡܗ ܡܢ ܒܢܝ̈ܐ ܕܐܝܣܪܝܠ ܘܡܢ ܟܗ̈ܢܐ ܘܠܘ̈ܝܐ ܘܡܙܡܪ̈ܢܐ ܕܟܗ̈ܢܝܬܐ ܘܬܪ̈ܥܐ ܘܥܒ̈ܕܝ ܟܗ̈ܢܐ ܠܐܘܪܝܫܠܡ

66. Esdras 3 8:6

    ܒܫܢܬܐ ܫܒܝܥܝܬܐ. ܟܕ ܐܡܠܟ ܗܘܐ ܐܪܛܚܫܫܬ ܒܝܪܚܐ ܕܚܡܫܐ. ܗܕܐ ܗܝ ܫܢܬܐ ܫܒܝܥܝܬܐ ܕܡܠܟܐ ܀ ܟܕ ܢܦܩܘ ܗܟܝܠ ܡܢ ܒܒܝܠ ܒܢܘܡܢܝܐ ܕܝܪܚܐ ܩܕܡܝܐ. ܒܢܘܡܢܝܐ ܕܝܪܚܐ ܕܚܡܫܐ ܐܬܘ ܠܐܘܪܝܫܠܡ. ܐܝܟ ܡܨܠܚܢܘܬܐ ܕܐܬܝܗܒܬ ܠܗܘܢ ܡܢ ܡܪܝܐ ܥܠܘܗܝ ܀

67. Esdras 3 8:7

    ܗܘ ܓܝܪ ܥܒܫܪܫ ܝܕܥܬܐ ܣܓܝܐܬܐ ܐܚܝܕ ܗܘܐ ܠܗܝ ܕܠܐ ܡܕܡ ܢܒܨܪ ܡܢ ܗܠܝܢ ܕܒܢܡܘܣܐ ܕܡܪܝܐ ܘܡܢ ܦܘܩ̈ܕܢܐ ܐܟܚܕܐ ܠܡܠܦܘ ܠܟܠܗ ܐܝܣܪܝܠ ܙܕܩ̈ܐ ܘܕܝ̈ܢܐ

68. Esdras 3 8:8

    ܐܬܐ ܕܝܢ ܦܘܩܕܢܐ ܗܘ ܕܐܬܟܬܒ ܡܢ ܐܪܛܚܫܫܬ ܡܠܟܐ ܠܘܬ ܥܙܪܐ ܟܗܢܐ ܘܩܪܘܝܐ ܕܢܡܘܣܐ ܕܡܪܝܐ ܕܗ̇ܘ ܕܐܝܬܘܗܝ ܨܚܚܐ ܗܢܐ ܕܣܝܡ

69. Esdras 3 8:9

    ܡܠܟܐ ܐܪܛܚܫܫܬ ܠܥܙܪܐ ܗܘ ܟܗܢܐ ܘܩܪܘܝܐ ܕܢܡܘܣܗ ܕܡܪܝܐ ܠܡܚܕܐ

70. Esdras 3 8:10

    ܘܗܠܝܢ ܪ̈ܚܡܬ ܐܢܫ̈ܐ ܐܢܐ ܟܕ ܕܢܬ ܦܩܕܬ ܠܗܢܘܢ ܕܒܥܝܢ ܡܢ ܥܡܐ ܕܝܘ̈ܕܝܐ ܗܢܘܢ ܕܪܚܡܝܢ ܘܡܢ ܟܗ̈ܢܐ ܘܡܢ ܠܘ̈ܝܐ ܕܐܝܬܝܗܘܢ ܕܝܢ ܒܡܠܟܘܬܐ ܕܝܠܢ ܠܡܐܙܠ ܥܡܟ ܠܐܘܪܝܫܠܡ

71. Esdras 3 8:11

    ܟܠ ܐܝܠܝܢ ܗܟܝܠ ܕܡܬܚܫܒܝܢ ܢܫܩܠܘܢ ܐܝܟܢܐ ܕܫܦܪܬ ܘܠܝ ܘܠܫܒܥܐ ܪ̈ܚܡܐ ܘܡܠܘ̈ܟܐ

72. Esdras 3 8:12

    ܐܝܟܢܐ ܕܢܣܥܪܘܢ ܠܗܠܝܢ ܕܥܠ ܝܗܘܕ ܘܥܠ ܐܘܪܝܫܠܡ ܢܩܦܐܝܬ ܠܗܢܝܢ ܕܐܝܬ ܒܢܡܘܣܐ ܕܡܪܝܐ

73. Esdras 3 8:13

    ܘܠܡܘܒܠܘ ܩܘܪ̈ܒܢܐ ܠܡܪܝܐ ܗܠܝܢ ܕܢܕܪܬ ܘܐܢܐ ܘܪ̈ܚܡܐ ܠܐܘܪܝܫܠܡ ܘܟܠ ܕܗܒܐ ܘܣܐܡܐ ܗܘ ܕܐܢ ܢܫܬܟܚ ܒܐܬܪܐ ܕܒܒܝܠ ܠܡܪܝܐ ܒܐܘܪܝܫܠܡ ܥܡ ܗܘ ܕܐܬܩܪܒ ܡܢ ܥܡܐ ܠܗܝܟܠܐ ܕܡܪܝܐ ܕܝܠܗܘܢ ܗܘ ܕܒܐܘܪܝܫܠܡ

74. Esdras 3 8:14

    ܠܡܬܟܢܫܘ ܕܗܒܐ ܘܣܐܡܐ ܠܬܘܪ̈ܐ ܘܠܕܟܪ̈ܐ ܘܠܐܡܪ̈ܐ ܘܠܗܢܝܢ ܕܠܗܠܝܢ ܢܩ̈ܦܢ

75. Esdras 3 8:15

    ܐܝܟ ܕܠܡܩܪܒܘ ܕܒ̈ܚܐ ܥܠ ܡܕܒܚܐ ܕܡܪܝܐ ܕܝܠܗܘܢ ܗܘ ܕܒܐܘܪܝܫܠܡ

76. Esdras 3 8:16

    ܘܟܠܗܝܢ ܗܠܝܢ ܕܐܢ ܬܒܥܐ ܥܡ ܐܚ̈ܐ ܕܝܠܟ ܠܡܥܒܕ ܒܕܗܒܐ ܘܒܣܐܡܐ ܫܡܠܐ ܐܝܟ ܨܒܝܢܐ ܕܐܠܗܐ ܕܝܠܟ

77. Esdras 3 8:17

    ܘܠܡ̈ܐܢܐ ܟܗ̈ܢܝܐ ܕܡܪܝܐ ܗܠܝܢ ܕܡܬܝܗܒܝܢ ܠܚܫܚܬܐ ܕܗܝܟܠܐ ܕܐܠܗܐ ܕܝܠܟ ܗܘ ܕܒܐܘܪܝܫܠܡ ܘܗܠܝܢ ܕܫܪܟܐ ܕܐܢ ܗܘ ܕܢ̈ܦܠܢ ܠܟ ܠܚܫܚܬܐ ܕܗܝܟܠܐ ܕܐܠܗܐ ܕܝܠܟ

78. Esdras 3 8:18

    ܬܬܠ ܡܢ ܒܝܬ ܓܙܐ ܕܡܠܟܐ

79. Esdras 3 8:19

    ܐܦ ܐܢܐ ܕܝܢ ܐܪܛܚܫܫܬ ܡܠܟܐ ܦܩܕܬ ܠܢܛܪ̈ܝ ܒܝܬ ܓܙܐ ܕܣܘܪܝܐ ܘܕܦܘܢܝܩܐ ܐܝܟܢܐ ܕܟܠ ܡܐ ܕܐܢ ܢܫܠܘܚ ܥܙܪܐ ܗܘ ܟܗܢܐ ܘܩܪܘܝܐ ܕܢܡܘܣܐ ܕܐܠܗܐ ܗܘ ܡܪܝܡܐ ܝܨܝܦܐܝܬ ܢܬܠܘܢ ܠܗ ܥܕܡܐ ܠܟܟܪ̈ܐ ܡܐܐ ܕܟܣܦܐ

80. Esdras 3 8:20

    ܒܗ ܒܕܡܘܬܐ ܕܝܢ ܘܥܕܡܐ ܠܟܘܪ̈ܐ ܡܐܐ ܕܚ̈ܛܐ ܘܕܚܡܪܐ ܟܝ̈ܠܐ ܡܐܐ ܘܐܚܪ̈ܢܝܬܐ

81. Esdras 3 8:21

    ܐܝܟ ܢܡܘܣܐ ܕܐܠܗܐ ܢܫܬܡ̈ܠܝܢ ܠܐܠܗܐ ܗܘ ܡܪܝܡܐ ܡܛܠ ܕܠܐ ܢܗܘܐ ܪܘܓܙܐ ܥܠ ܡܠܟܘܬܐ ܕܡܠܟܐ ܘܕܒܢܝ̈ܐ ܕܝܠܗ

82. Esdras 3 8:22

    ܘܠܟܘܢ ܕܝܢ ܡܬܐܡܪܐ ܐܝܟܢܐ ܕܠܟܠܗܘܢ ܟܗ̈ܢܐ ܘܠܘܝ̈ܐ ܘܡܙܡܪ̈ܢܐ ܕܟܗ̈ܢܝܬܐ ܘܬܪ̈ܥܐ ܥܒ̈ܕܝ ܟܗ̈ܢܐ ܘܣܦܪ̈ܐ ܕܗܝܟܠܐ ܗܢܐ ܐܦܠܐ ܚܕܐ ܡܕܐܬܐ ܐܦܠܐ ܐܚܪܬܐ ܐܦܝܒܘܠܐ ܘܠܐ ܠܐܢܫ ܢܗܘܐ ܐܝܬ ܫܘܠܛܢܐ ܠܡܪܡܝܘ ܥܠ ܗܢܘܢ

83. Esdras 3 8:23

    ܘܐܢܬ ܥܙܪܐ ܐܝܟ ܚܟܡܬܐ ܕܐܠܗܐ ܚܘܐ ܕܝܢ̈ܐ ܘܬܒܘ̈ܥܐ ܐܝܟܢܐ ܕܢܗܘܘܢ ܕܝܢܝܢ ܒܟܠܗ ܣܘܪܝܐ ܘܦܘܢܝܩܐ ܠܟܠܗܘܢ ܗܢܘܢ ܕܐܢ ܢܥܒܪܘܢ ܠܢܡܘܣܗ ܕܐܠܗܐ ܕܝܠܟ ܕܠܗ̇ܢܘܢ ܕܝܢ ܕܠܐ ܝܕܥܝܢ ܬܠܦ

84. Esdras 3 8:24

    ܘܟܠܗܘܢ ܗܢܘܢ ܕܐܢ ܢܥܒܪܘܢ ܠܢܡܘܣܗ ܕܐܠܗܐ ܕܝܠܟ ܘܠܡܠܟܝܐ ܒܛܝܠܐܝܬ ܢܫܬܢܩܘܢ ܘܐܢ ܒܡܘܬܐ ܘܐܢ ܐܦ ܒܡܣܡ ܒܪܝܫܐ ܐܘ ܒܚܘܣܪܢܐ ܕܟܣܦܐ ܐܘ ܒܡܬܬܘܒܠܢܘܬܐ

85. Esdras 3 8:25

    ܘܐܡܪ ܥܙܪܐ ܣܦܪܐ ܡܒܪܟܐ ܗܘ ܡܪܝܐ ܒܠܚܘܕܘܗܝ ܗܘ ܕܝܗܒ ܗܠܝܢ ܒܠܒܗ ܕܡܠܟܐ ܠܡܫܒܚܘ ܠܒܝܬܐ ܕܝܠܗ ܗܘ ܕܒܐܘܪܝܫܠܡ

86. Esdras 3 8:26

    ܘܠܝ ܝܩܪ ܩܕܡܘܗܘܝ ܕܡܠܟܐ ܘܕܗܢܘܢ ܕܥܡܗ ܡܡܠܟܝܢ ܘܕܟܠܗܘܢ ܪ̈ܚܡܐ ܘܪ̈ܘܪܒܢܐ ܕܝܠܗ

87. Esdras 3 8:27

    ܘܐܢܐ ܫܦܝܪ ܠܒܝܒܐ ܗܘܝܬ ܐܝܟ ܡܥܕܪܢܘܬܐ ܕܡܪܝܐ ܐܠܗܐ ܕܝܠܝ ܘܟܢܫܬ ܡܢ ܐܝܣܪܝܠ ܓܒܪ̈ܐ ܐܝܟܢܐ ܕܢܣܩܘܢ ܥܡܝ

88. Esdras 3 8:28

    ܘܗܠܝܢ ܪ̈ܝܫܢܐ ܩ̈ܕܡܝܐ ܐܝܟ ܫܪ̈ܒܬܐ ܕܝܠܗܘܢ ܘܕܪ̈ܝܫܝ ܦ̈ܠܓܘܬܐ ܗܢܘܢ ܕܣܠܩܝܢ ܗܘܘ ܥܡܝ ܡܢ ܒܒܝܠ ܒܡܠܟܘܬܗ ܕܐܪܛܚܫܫܬ ܡܠܟܐ

89. Esdras 3 8:29

    ܡܢ ܒܢܝ̈ܐ ܕܦܪܘܨ ܛܐܪܘܫ. ܗܘ ܕܛܐܡܘܫ ܀ ܡܢ ܒܢܝ̈ܐ ܕܥܛܪܘܬ. ܓܡܠܘܣܝ. ܡܢ ܒ̈ܢܝܐ ܕܕܘܝܕ.

90. Esdras 3 8:30

    ܦܪܨ ܙܟܪܝܐ ܘܥܡܗ ܡܢ ܟܬܒܐ ܓܒܪ̈ܐ ܡܐܐ ܘܚܡܫܝܢ

91. Esdras 3 8:31

    ܡܢ ܒ̈ܢܝܐ ܕܡܐܬ ܡܘܐܒ ܘܐܠܚܢܢ ܒܪܗ ܕܙܪܚ ܘܥܡܗ ܓܒܪ̈ܐ ܡܐܬܝܢ

92. Esdras 3 8:32

    ܡܢ ܒ̈ܢܝܐ ܕܙܝܬܘܥ ܝܘܟܢܝܐ ܕܥܬܝܠܘ ܘܥܡܗ ܓܒܪ̈ܐ ܡܐܬܝܢ ܡܢ ܒ̈ܢܝܐ ܕܥܕܝܢܘܒܝܢ ܢܘܢܬܢ ܘܥܡܗ ܓܒܪ̈ܐ ܡܐܬܝܢ ܘܚܡ̈ܫܝܢ

93. Esdras 3 8:33

    ܡܢ ܒܢܝ̈ܐ ܕܠܡܥܣܝܐ ܥܬܠܝܐ ܘܥܡܗ ܓܒܪ̈ܐ ܡܐܬܝܢ ܘܫܒ̈ܥܝܢ

94. Esdras 3 8:34

    ܘܡܢ ܒܢܝ̈ܐ ܕܫܦܛܝܐ ܙܪܢܥ ܕܡܝܟܐܝܠ ܘܥܡܗ ܓܒܪ̈ܐ ܫܒ̈ܥܝܢ

95. Esdras 3 8:35

    ܡܢ ܒ̈ܢܝܐ ܕܝܘܐܒ ܥܘܒܕܝܐ ܒܪܗ ܕܚܙܩܝܐܝܠ ܘܥܡܗ ܓܒܪ̈ܐ ܡܐܬܝܢ ܘܬܪ̈ܥܣܪ

96. Esdras 3 8:36

    ܡܢ ܓܒܪ̈ܐ ܕܢܟܙܝܥ ܫܠܝܡܘܬ ܕܝܘܫܦܝܐ ܘܥܡܗ ܓܒܪ̈ܐ ܡ̈ܐܐ ܘܫ̈ܬܝܢ

97. Esdras 3 8:37

    ܡܢ ܒܢܝ̈ܐ ܕܒܚܝܪ ܙܟܪܝܐ ܕܒܝܒܠ ܘܥܡܗ ܓܒܪ̈ܐ ܥܣܪ̈ܝܢ ܘܬܡܢܝܐ

98. Esdras 3 8:38

    ܡܢ ܒܢܝ̈ܐ ܕܐܫܕܘܬ ܝܘܚܢܢ ܒܪܗ ܕܐܩܛܐ ܘܥܡܗ ܓܒܪ̈ܐ ܡܐܐ ܘܥܣܪ̈ܐ

99. Esdras 3 8:39

    ܡܢ ܒܢܝ̈ܐ ܕܐܕܘܢܝܩܡ ܗܢܘܢ ܐܚܪ̈ܝܐ ܘܗܠܝܢ ܫܡ̈ܗܐ ܕܝܠܗܘܢ ܐܠܝܦܕܠ ܗܘ ܕܓܠܘܠ ܘܫܡܥܝܐ ܘܥܡܗܘܢ ܓܒܪ̈ܐ ܫܒ̈ܥܝܢ

100. Esdras 3 8:40

     ܘܡܢ ܒܢܝ̈ܐ ܕܒܢܝܐ ܗܘ ܕܒܥܩܪܘܢ ܘܥܡܗ ܓܒܪ̈ܐ ܫܒ̈ܥܝܢ

← Previous · Next → — showing 201–300 of 407

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.