← All works

Peshitta Esdras 3

Peshitta (Syriac Old Testament) · 407 sections

1. Esdras 3 8:41

   ܘܟܢܫܬ ܐܢܘܢ ܥܠ ܗܘ ܕܡܬܐܡܪ ܬܐܪܐܢ ܢܗܪܐ ܘܫܪܝܢܢ ܬܡܢ ܝܘ̈ܡܐ ܬ̈ܠܬܐ ܘܐܬܒܩܝܬ ܒܗܘܢ

2. Esdras 3 8:42

   ܘܡܢ ܟܗ̈ܢܐ ܘܡܢ ܠܘ̈ܝܐ ܠܐ ܐܫܟܚܬ ܬܡܢ

3. Esdras 3 8:43

   ܘܫܕܪܬ ܠܘܬ ܐܠܝܥܙܪ ܘܟܕ ܐܬܐ ܐܓܘܢ ܘܡܥܣܡܢ ܣܠܛܢ ܘܫܡܥܝܐ ܘܢܘܪܝܒܢ ܢܬܢܢ ܛܐܢܛܢ ܙܟܪܝܐ ܘܡܘܫܝܐ ܠܒܝܬ ܪ̈ܝܫܢܐ ܘܝܕܘ̈ܥܬܢܐ

4. Esdras 3 8:44

   ܘܐܡܪܬ ܠܗܘܢ ܠܡܐܬܐ ܠܘܬ ܠܥܕܢ ܪܝܫܢܐ ܗܘ ܕܒܕܘܟܬܐ ܕܢܛܪ ܒܝܬܓܙܐ

5. Esdras 3 8:45

   ܟܕ ܦܩܕܬ ܐܢܘܢ ܠܡܡܠܠܘ ܠܠܥܕܢ ܘܠܐܚ̈ܐ ܕܝܠܗ ܘܠܗܢܘܢ ܕܒܕܘܟܬܐ ܕܢܛܪ ܒܝܬܓܙܐ ܠܡܫܕܪܘ ܠܢ ܠܗܢܘܢ ܕܡܟܗܢܝܢ ܒܒܝܬܗ ܕܡܪܝܐ ܕܝܠܢ

6. Esdras 3 8:46

   ܘܐܝܬܝ ܠܢ ܐܝܟ ܐܝ̣ܕܐ ܐܚܝܕܬܐ ܕܡܪܝܐ ܐܠܗܐ ܕܝܠܢ ܓܒܪ̈ܐ ܝܕܘ̈ܥܬܢܐ ܡܢ ܒܢܝ̈ܐ ܕܡܚܠܝ ܗ̇ܘ ܕܠܘܝܐ ܕܝܣܪܝܠ ܠܫܒܟܝܐ ܘܠܒ̈ܢܝܐ ܘܠܐܚ̈ܐ ܕܝܠܗ ܕܐܝܬܝܗܘܢ ܬܡܢܬܥܣܪ̈ܐ

7. Esdras 3 8:47

   ܘܠܚܫܒܝܐ ܘܠܚܢܘܢܐ ܘܥܐܛܢ ܡܢ ܐܚ̈ܐ ܕܒܢܝܐ ܕܟܢܥܢܝܐ ܘܒܢܝ̈ܐ ܕܝܠܗܘܢ ܓܒܪ̈ܐ ܥܣܪ̈ܝܢ

8. Esdras 3 8:48

   ܘܡܢ ܥܒ̈ܕܝ ܟܗ̈ܢܐ ܗ̇ܢܘܢ ܕܝܗܒ ܗܘܐ ܕܘܝܕ ܘܪ̈ܝܫܢܐ ܠܦܘܠܚܢܐ ܕܠܘ̈ܝܐ ܥܒ̈ܕܝ ܟܗ̈ܢܐ ܡ̈ܬܝܢ ܘܥܣܪ̈ܝܢ ܕܟܠܗܘܢ ܐܫܬܘܕܥܬ ܟܬܝܒܘܬ ܫܡ̈ܗܐ

9. Esdras 3 8:49

   ܘܢ̇ܕܪܬ ܬܡܢ ܨܘܡܐ ܠܝܘܢܣ̈ܩܐ ܩܕܡ ܡܪܝܐ ܐܠܗܐ ܕܝܠܢ

10. Esdras 3 8:50

    ܠܡܒܥܐ ܡܢܗ ܡܨܠܚܢܘܬܐ ܘܠܢ ܘܠܗ̇ܢܘܢ ܕܐܝܬ ܗܘܐ ܥܡܢ ܒܢܝ̈ܐ ܘܒܥܝܪ̈ܐ

11. Esdras 3 8:51

    ܐܬ̇ܟܚܕܬ ܓܝܪ ܠܡܫܐܠ ܡܢ ܡܠܟܐ ܦܪ̈ܫܐ ܘܪ̈ܓܠܝܐ ܠܠܘܝܬܐ ܡܛܠ ܙܗܝܪܘܬܐ ܗ̇ܝ ܕܠܘܬ ܗ̇ܢܘܢ ܕܗܘ̇ܝܢ ܕܠܩܘܒܠܐ ܠܢ

12. Esdras 3 8:52

    ܐܡ̣ܪܢܢ ܓܝܪ ܠܡܠܟܐ. ܕܚܝܠܐ ܕܡܪܝܐ ܐܠܗܐ ܕܝܠܢ܉ ܗܘ̇ܐ ܥܡ ܗ̇ܢܘܢ ܕܒ̇ܥܝܢ ܠܗ̣. ܒܟܠ ܬܘܪܨܐ

13. Esdras 3 8:53

    ܘܟܠܗ̈ܝܢ ܬܢܝܢ ܐܬܟܫܦܢܢ ܩܕܡ ܡܪܝܐ ܐܠܗܐ ܕܝܠܢ ܘܐܫܬ̣ܘܝܠܢ ܠܚܘܣܝܐ

14. Esdras 3 8:54

    ܘܦ̇ܪܫܬ ܡܢ ܪ̈ܝܫܝ ܫܪ̈ܒܬܐ ܕܟܗ̈ܢܐ ܓܒܪ̈ܐ ܬܪ̈ܥܣܪ ܡܫܒ̈ܚܐ ܘܠܫܡܥܝܐ ܘܥܡܗܘܢ ܡܢ ܐܚ̈ܐ ܕܝܠܗܘܢ ܓܒܪ̈ܐ ܥܣܪ̈ܐ

15. Esdras 3 8:55

    ܘܬܩܠܬ ܠܗܘܢ ܠܣܐܡܐ ܘܠܕܗܒܐ ܘܠܡ̈ܐܢܐ ܟܗ̈ܢܝܐ ܠܒܝܬܗ ܕܡܪܝܐ ܕܝܠܢ ܗܟܢܐ ܫ̇ܟ̣ܢ ܡܠܟܐ ܘܡܠܘ̈ܟܐ ܕܝܠܗ ܘܪ̈ܘܪܒܢܐ ܘܟܠܗ ܐܝܣܪܝܠ

16. Esdras 3 8:56

    ܘܐܫܠܡܬ ܠܗܘܢ ܟܕ ܬܩ̇ܠܬ. ܟܟܪ̈ܐ ܕܣܐܡܐ ܡܐ̈ܐ ܘܫܬܡܐܐ ܘܚܡ̈ܫܝܢ. ܘܡ̈ܐܢܐ ܕܣܐܡܐ ܟܟܪܐ ܡܐܐ. ܘܕܕܗܒܐ ܟܟܪ̈ܐ ܡܐ̈ܐ. ܘܡ̈ܐܢܝ ܕܗܒܐ ܥܣܪ̈ܝܢ. ܘܡ̈ܐܢܐ ܕܢܚܫܐ. ܡܢ ܢܚܫܐ ܛ̇ܒܐ ܡܙܗܪܐ ܡ̈ܐܢܐ ܬܪ̈ܥܣܪ

17. Esdras 3 8:57

    ܘܐ̇ܡܪܬ ܠܗܘܢ ܐܦ ܐܢܬܘܢ ܩܕ̈ܝܫܐ ܐܝܬܝܟܘܢ ܠܡܪܝܐ ܘܡ̈ܐܢܐ ܩܕ̈ܝܫܐ ܘܕܗܒܐ ܘܣܐܡܐ ܢܕܪܐ ܠܡܪܝܐ ܐܠܗܐ ܕܐܒܗ̈ܐ ܕܝܠܟܘܢ

18. Esdras 3 8:58

    ܫܗܪܘ ܘܛܪ̣ܘ ܥܕܡܐ ܕܡܫܠܡܝܢ ܐܢܬܘܢ ܠܗܘܢ ܫܪ̈ܒܬܐ ܕܟܗ̈ܢܐ ܘ̈ܕܠܘܝܐ ܘܠܪ̈ܝܫܢܐ ܕܫܪܒܬܐ ܕܐܝܣܪܝܠ ܒܐܘܪܝܫܠܡ ܒܒܝܬܓܙܐ ܕܒܝܬܗ ܕܡܪܝܐ ܕܝܠܢ

19. Esdras 3 8:59

    ܘܗ̇ܢܘܢ ܕܩܒܠܘ ܟܗ̈ܢܐ ܘܠܘܝ̈ܐ ܠܣܐܡܐ ܘܠܕܗܒܐ ܘܠܡ̈ܐܢܐ ܗܠܝܢ ܕܒܐܘܪܝܫܠܡ ܐܥ̣ܠܘ ܠܗܝܟܠܗ ܕܡܪܝܐ

20. Esdras 3 8:60

    ܘܟܕ ܐܫܩܠܢܢ ܡܢ ܢܗܪܐ ܬܐܪܬܐ ܒܬܪܥܣܪ̈ܐ ܕܝܪܚܐ ܩܕܡܝܐ. ܐܬܝܢܢ ܠܐܘܪܝܫܠܡ ܐܝܟ ܐܝܕܐ ܐܚܝܕܬܐ ܕܡܪܝܐ ܐܠܗܐ ܕܝܠܢ. ܗ̇ܝ ܕܥܠܝܢ. ܘܦ̣ܨܝܬ̇ ܠܢ ܡܢ ܡܥܠܬܐ ܕܡܢ ܟܠ ܒܥܠܕܒܒܐ. ܘܐܬܝܢܢ ܠܐܘܪܝܫܠܡ

21. Esdras 3 8:61

    ܘܟܕ ܗܘ̣ܐ ܠܢ ܬܡܢ ܝܘܡܐ ܬܠܝܬܝܐ ܒܝܘܡܐ ܪܒܝܥܝܐ ܟܕ ܐܬܬܩܠ ܣܐܡܐ ܘܕܗܒܐ ܐܬܬܫܠܡ ܒܒܝܬܗ ܕܡܪܝܐ ܐܠܗܐ ܕܝܠܢ ܠܐܢܪܡܘܬ ܒܪܗ ܕܐܘܪܝܐ ܟܗܢܐ

22. Esdras 3 8:62

    ܘܥܡܗ ܐܠܝܥܙܪ ܗܘ ܕܦܝܢܚܣ ܘܐܝܬ ܗܘܘ ܥܡܗܘܢ ܝܘܒܕ ܝܫܘܥ ܒܪ ܡܚܘܕ ܕܐܒܢܘ ܠܘܝܐ ܐܝܟ ܡܢܝܢܐ ܘܡܬܩܠܐ ܟܠ ܡܕܡ ܟܠܗ ܡܬܩܠܐ ܒܗ ܒܫܥܬܐ

23. Esdras 3 8:63

    ܗ̇ܢܘܢ ܕܝܢ ܕܐܬ̣ܘ ܡܢ ܫܒܝ̣ܬܐ ܩܪܒܘ ܕܒ̈ܚܐ ܠܐܠܗܐ ܕܐܝܣܪܝܠ. ܐܡܪ̈ܐ ܬܫ̈ܥܝܢ ܘܐܫ̈ܬܐ. ܬ̈ܝܫܐ ܡܐ̈ܬܝܢ ܘܫ̈ܒܥܝܢ ܘܐܫ̈ܬܐ. ܘܕܚܠܦ ܦܘܪܩܢܐ. ܥ̈ܓܠܐ ܬܪ̈ܥܣܪ. ܟܠܗܘܢ ܕܒ̈ܚܐ ܠܡܪܝܐ ܀

24. Esdras 3 8:64

    ܘܝܗܒܘ ܠܦܘܩ̈ܕܢܐ ܕܡܠܟܐ ܠܐܘܩ̈ܢܡܐ ܡ̈ܠܟܝܐ ܘܠܗܘܦܪ̈ܟܐ ܕܣܘܪܝܐ ܥܡܝܩܬܐ ܘܕܦܘܢܝܩܐ ܘܫܒܚܘ ܠܥܡܐ ܘܠܗܝܟܠܗ ܕܡܪܝܐ

25. Esdras 3 8:65

    ܘܟܕ ܗܠܝܢ ܐܫܬܡ̈ܠܝܝܢ ܩܪܒܘ ܠܝ ܪ̈ܝܫܢܐ ܟܕ ܐܡܪܝܢ

26. Esdras 3 8:66

    ܠܐ ܦܪܫܘ ܥܡܐ ܕܐܝܣܪܝܠ ܘܪ̈ܝܫܢܐ ܘܟܗ̈ܢܐ ܘܠܘ̈ܝܐ ܘܐܚܪ̈ܢܝܝ ܓܢܣܐ ܥܡ̈ܡܐ ܕܐܪܥܐ ܠܛܡܘܐ̈ܬܐ ܕܝܠܗܘܢ ܕܟ̈ܢܥܢܝܐ ܘܕܚܝ̈ܬܝܐ ܘܕܦܪ̈ܙܝܐ ܘܕܝܒܘ̈ܣܝܐ ܘܕܡܘܐܒܝ̈ܐ ܘܕܡܨܪ̈ܝܐ

27. Esdras 3 8:67

    ܥܡܪܘ ܗܘܘ ܓܝܪ ܥܡ ܒ̈ܢܬܐ ܕܝܠܗܘܢ ܘܗ̇ܢܘܢ ܘܒ̈ܢܝܐ ܕܝܠܗܘܢ ܘܐܬܚ̇ܠ̣ܛ ܙܪܥ̇ܐ ܗܘ ܩܕܝܫܐ ܒܐܚܪ̈ܢܝܝ ܓܢܣܐ̣ ܥܡ̈ܡܐ ܕܐܪܥܐ ܘܡܫܘܬܦܝܢ ܗܘܘ ܪ̈ܝܫܢܐ ܩܕܡܝ̈ܐ ܘܪ̈ܘܪܒܢܐ ܒܠܐ ܢܡܘܣܝܘܬܐ ܗܕܐ ܡܢ ܫܘܪܝܗ ܕܣܘܥܪܢܐ

28. Esdras 3 8:68

    ܘܡܚܕܐ ܕܫܡ̇ܥܬ ܗܠܝܢ ܨ̇ܪܝܬ ܠܢܚ̈ܬܐ ܕܝܠܝ ܘܠܠܒܘܫܐ ܟܗܢܝܐ ܘܡܢܬܫ ܗܘܝܬ ܡܢ ܣܥܪܐ ܕܪܝܫܐ ܕܝܠܝ ܘܕܕܩܢܐ ܕܝܠܝ ܘܝܬ̇ܒܐ ܡܬܘܝܐ ܘܡܥܩܐ

29. Esdras 3 8:69

    ܘܐܬܟܢܫܘ ܠܘܬܝ ܟܠܗܘܢ ܗ̇ܢܘܢ ܕܒܙܒܢ ܡܬܬܙܝܥܝܢ ܗܘܘ ܥܠ ܡܠܬܗ ܕܡܪܝܐ ܐܠܗܐ ܕܐܝܣܪܝܠ ܟܕ ܐܢ̇ܐ ܡܬܐܒܠ ܗܘܝܬ ܥܠܝܗ̇ ܕܠܐ ܢܡܘܣܝܘܬܐ ܘܝܬܝܒ ܗܘܝܬ ܡ̇ܥܩܐ ܥܕܡܐ ܠܕܒܚܬܐ ܦܢܝܝܬܐ

30. Esdras 3 8:70

    ܘܟܕ ܩ̇ܡܬ ܡܢ ܨܘܡܐ ܘܡܣܕܩܐ ܐܝܬ ܗܘܐ ܠܝ ܠܢܚ̈ܬܐ ܘܠܠܒܘܫܐ ܟܗܢܝܐ ܟ̇ܦܬ ܠܒܘܪ̈ܟܐ ܘܦܫܛܬ ܠܐܝ̈ܕܝܐ ܠܘܬ ܡܪܝܐ ܐܡ̇ܪ ܗ̇ܘܝܬ

31. Esdras 3 8:71

    ܡܪܝܐ ܒ̇ܗ̣ܝܬ ܐܢ̣ܐ ܘܡܟܚܕ ܐܢ̣ܐ ܩܕܡ ܦܪܨܘܦܐ ܕܝܠܟ

32. Esdras 3 8:72

    ܚܛܗ̈ܐ ܓܝܪ ܕܝܠܢ ܣܓ̣ܝܘ ܡܢ ܣܥܪܐ ܕܪ̈ܝܫܐ ܕܝܠܢ ܠܐ ܝ̣ܕܝ̈ܥܬܐ ܕܝܠܢ ܥܒܪ̈ܝܢ ܥܕܡܐ ܠܫܡܝܐ

33. Esdras 3 8:73

    ܬܘܒ ܡܢ ܙܒ̈ܢܐ ܕܐܒ̈ܗܐ ܕܝܠܢ ܘܐܝ̇ܬܝܢ ܒܚܛܝܬܐ ܪܒܬܐ ܥܕܡܐ ܠܝܘܡܐ ܗܢܐ

34. Esdras 3 8:74

    ܘܡܛܠ ܚܛܗ̈ܐ ܕܝܠܢ ܘܕܐܒ̈ܗܝܢ ܐܬܬܫܠܡܢܢ ܥܡ ܐ̈ܚܝܢ ܘܥܡ ܡ̈ܠܟܐ ܕܝܠܢ ܘܥܡ ܟܗ̈ܢܐ ܕܝܠܢ ܠܡ̈ܠܟܐ ܕܝܠܢ ܠܣܝܦܐ ܘܠܫܒܝ̣ܬܐ ܘܠܒܙܬܐ ܥܡ ܒܗܬܬܐ ܥܕܡܐ ܠܝܘܡܐ ܕܝܘܡܢܐ

35. Esdras 3 8:75

    ܘܗܫܐ ܢܘܚ ܡܛܠ ܕܩܠܝܠ ܡܕܡ ܗܘܘ ܠܢ ܪܚ̈ܡܐ ܡܢܟ ܡܪܝܐ ܠܡܫܬܒܩܘ ܠܢ ܥܩ̣ܪܐ. ܘܫܡܐ ܒܕܘܟܬܐ ܕܡܩܕܫܐ ܕܝܠܟ.

36. Esdras 3 8:76

    ܠܡܬܓܠܝܘ ܢܗܝܪܐ ܕܝܠܟ ܒܒܝܬܗ ܕܡܪܝܐ ܐܠܗܐ ܕܝܠܢ ܠܡܬܠ ܬܘܪܣܝܐ ܒܙܒ̣̇ܢܐ ܕܥܒ̣ܕܘܬܐ ܕܝܠܢ ܘܟܕ ܦ̇ܠܚܝܢ ܗܘ̣ܝܢ ܥܒ̇ܕܘܬܐ ܠܐ ܐܫܬܒܩܢܢ ܡܢ ܡܪܝܐ

37. Esdras 3 8:77

    ܐܠܐ ܥܒ̣ܕ ܠܢ ܒܛܝܒܘܬܐ ܩܕܡ ܡ̈ܠܟܐ ܦܪ̈ܣܝܐ ܠܡܬܠ ܠܢ ܬܘܪܣܝܐ

38. Esdras 3 8:78

    ܘܠܡܫܒܚܘ ܠܗܝܟܠܗ ܕܡܪܝܐ ܕܝܠܢ ܘܠܡܩܡܘ ܠܨܗܝܘܢ ܚܪܒܬܐ ܠܡܬܠ ܠܢ ܡܫܪܪܘܬܐ ܒܝܗܘܕ ܘܒܐܘܪܝܫܠܡ

39. Esdras 3 8:79

    ܘܗܫܐ ܡܢܐ ܢܐ̇ܡܪ ܡܪܝܐ ܟܕ ܐܝܬ ܠܢ ܗܠܝܢ ܥܒ̣ܪܢܢ ܠܦܘܩ̈ܕܢܐ ܕܝܠܟ ܗܠܝܢ ܕܝܗܒܬ ܒܐܝ̣ܕܐ ܕܥ̈ܒ̣ܕܐ ܕܝܠܟ ܢܒ̈ܝܐ ܟܕ ܐܡܪ ܐܢܬ

40. Esdras 3 8:80

    ܕܐܪܥܐ ܠܗ̇ܝ ܕܥܐܠܝܢ ܐܢܬܘܢ ܠܡܐܪܬܗ̇ ܐܝܬܝܗ̇ ܐܪܥܐ ܡܣܝܒܬܐ ܒܡܣܝܒܘܬܐ ܕܐܚܪ̈ܢܝܝ ܓܢܣܐ ܕܐܪܥܐ ܘܡܢ ܛܡܘܐܬܐ ܕܝܠܗܘܢ ܡܠܐܘܗ̇ ܛܡܘܐܬܐ

41. Esdras 3 8:81

    ܗܫܐ ܠܒ̈ܢܬܐ ܕܝܠܗܘܢ ܠܐ ܬܥܡܪܘܢ ܥܡ ܒܢܝ̈ܐ ܕܝܠܟܘܢ ܘܠܒ̈ܢܬܐ ܕܝܠܟܘܢ ܠܐ ܬܬܠܘܢ ܠܒܢܝ̈ܐ ܕܝܠܗܘܢ

42. Esdras 3 8:82

    ܘܠܐ ܬܒܥܘܢ ܫܝܢܐ ܕܠܘܬܗܘܢ ܒܟܠܗ ܙܒ̣̇ܢܐ. ܐܝܟܢܐ ܕܬܬ̣ܡܨܘܢ ܘܬܟܠܘܢ ܠܛܒ̈ܬܗ̇ ܕܐܪܥܐ. ܘܬܘܪܬܘܢ ܠܒܢܝ̈ܐ ܕܝܠܟܘܢ ܥܕܡܐ ܠܥܠܡ ܀

43. Esdras 3 8:83

    ܘܗܠܝܢ ܟܠܗܝ̈ܢ ܕܓܕܫ̣ܝ̈ܢ ܠܢ ܗ̣̈ܘܝܢ ܡܛܠ ܥ̇ܒ̈ܕܐ ܕܝܠܢ ܒ̈ܝ̣ܫܐ. ܘܚܛܗ̈ܐ ܕܝܠܢ ܒ̈ܝ̣ܫܐ. ܘܚܛܗ̈ܐ ܗܠܝܢ ܪ̈ܘܪܒܐ. ܐܢܬ ܓܝܪ ܡܪܝܐ. ܐܩ̣ܠܬ ܠܚܛܗ̈ܐ ܕܝܠܢ

44. Esdras 3 8:84

    ܘܝܗܒ̣ܬ ܠܢ ܕܐܝܟ ܗܢܐ ܥܩܪܐ ܬܘܒ ܟܕ ܗܦܟܢܢ ܠܡܥ̣ܒܪ ܢܡܘܣܐ ܕܝܠܟ ܠܗ̇ܝ ܕܠܡܬܚܠܛܘ ܒܛܡܘܐܬܐ ܕܥܡ̈ܡܐ ܕܐܪܥܐ

45. Esdras 3 8:85

    ܠܐ̣ ܪܓ̣ܙܬ ܥܠܝܢ ܠܡܘܒܕܘ ܠܢ ܥܕܡܐ ܕܠܐ ܢܫܬ̣ܒܩ ܥܩܪܐ ܘܙܪܥܐ ܘܫܡܐ ܕܝܠܢ

46. Esdras 3 8:86

    ܡܪܝܐ ܡܪܝܐ̈ ܐܠܗܐ ܕܐܝܣܪܝܠ ܫܪܝܪܐ ܐܝܬܝܟ ܐܫܬ̣ܒܩ ܠܢ ܥܩܪܐ ܒܝܘܡܢܐ

47. Esdras 3 8:87

    ܗܐ ܗܫܐ ܐܝܬܝܢ ܩܕܡܝܟ. ܒܠܐ ܢܡܘܣ̈ܝܘܬܐ ܕܝܠܢ. ܠܐ ܓܝܪ ܐܝܬ ܠܡܩܡ ܬܘܒ ܩܕܡܝܟ ܥܡ ܗܠܝܢ ܀

48. Esdras 3 8:88

    ܘܟܕ ܡܨܠܐ ܥܙܪܐ ܘܡܘܕܐ ܗܘܐ ܟܕ ܒ̇ܟܐ ܘܢܦܝ̣ܠ ܥܠ ܐܪܥܐ ܩܕܡ ܗܝܟܠܐ. ܐܬܟܢ̣ܫܘ ܥܠܘܗܝ. ܡܢ ܐܘܪܝܫܠܡ. ܥܡܐ ܣܓܝܐܐ ܣܓܝ. ܕܓܒܪ̈ܐ ܘܢܫ̈ܐ. ܘܥܠܝ̈ܡܐ ܘܛܠܝ̈ܐ. ܒܟܝܐ ܓܝܪ ܐܝܬ ܗܘܐ ܪܒܐ. ܣܘܓܐܐ.

49. Esdras 3 8:89

    ܘܟܕ ܐܙܥܩ ܝܘܟܢܝܐ ܕܥ̇ܐܠ ܡܢ ܒܢܝ̈ܐ ܕܝܣܪܝܠ ܐܡ̣ܪ ܥܙܪܐ ܚܢܢ ܚܛܝ̣ܢܢ ܒܡܪܝܐ ܘܐܥܡܪܢܢ ܢܫ̈ܐ ܐܚܪ̈ܢܝܬ ܓܢܣܐ ܡܢ ܥܡܐ ܕܐܪܥܐ ܥܡܢ ܘܗܫܐ ܐܝܬ ܗܘ ܣܒܪܐ ܠܐܝܣܪܝܠ

50. Esdras 3 8:90

    ܡܛܠ ܗܠܝܢ. ܒܗܕܐ ܬܗ̣ܘܐ ܠܢ ܡܘܡ̈ܬܐ ܠܘܬ ܡܪܝܐ. ܠܡܦܩܘ ܠܟܠܗ̈ܝܢ ܢܫ̈ܐ ܕܝܠܢ܇ ܗܠܝܢ ܕܡܢ ܐܚܪ̈ܢܝܝ ܓܢܣܐ ܥܡ ܒܢܝ̈ܐ ܕܝܠܗܝܢ. ܐܝܟ ܕܐܬ̣ܬܕܝܢܬ̇ ܠܟ ܀ ܘܟܠܗܘܢ ܗ̇ܢܘܢ ܕܡܬܬܦܝܣܝܢ ܠܢܡܘܣܗ ܕܡܪܝܐ

51. Esdras 3 8:91

    ܟܕ ܩܡܘ ܐܡܪܘ ܠܘܬ ܥܙܪܐ ܩܘܡ ܫܡܠܐ ܠܘܬܟ ܗܘ ܓܝܪ ܣܘܥܪܢܐ ܘܚܢܢ ܥܡܟ ܟܕ ܡܬܚܝܠ ܐܢܬ ܥܒ̣ܕ

52. Esdras 3 8:92

    ܘܟܕ ܩ̣ܡ ܥܙܪܐ ܐܘܡ̣ܝ ܠܪ̈ܝܫܝ ܫܪ̈ܒܬܐ ܕܟܗ̈ܢܐ ܘܕܠܘ̈ܝܐ ܠܟܠܗܘܢ ܒܢܝ̈ܐ ܕܐܝܣܪܝܠ ܠܡܥܒܕ ܐܝܟ ܗܠܝܢ ܘܐܝܡ̣ܝܘ

53. Esdras 3 9:1

    ܘܟܕ ܩܡ ܥܙܪܐ ܡܢ ܕܪܬܐ ܕܗܝܟܠܐ ܐܙܠ ܠܒܝܬܓܙܐ ܕܝܘܢܬܢ ܒܪܗ ܕܐܠܝܫܒ

54. Esdras 3 9:2

    ܘܒܬ ܬܡܢ ܟܕ ܠܚܡܐ ܠܐ ܛܥ̣ܡ ܘܠܐ ܡܝ̈ܐ ܐܫܬܝ ܟܕ ܐܒܝܠ ܚܠܦ ܠܐ ܢܡܘܣ̈ܝܘܬܐ ܗܠܝܢ ܪ̈ܘܪܒܬܐ ܕܣܘܓܐܐ

55. Esdras 3 9:3

    ܘܗܘ̣ܬ ܟܪܘܙܘܬܐ ܒܟܠܗ̇ ܝܗܘܕ ܘܒܐܘܪܝܫܠܡ ܠܟܠܗܘܢ ܗ̇ܢܘܢ ܕܡܢ ܫܒܝ̣ܬܐ ܕܢܥܠܘܢ ܠܐܘܪܝܫܠܡ

56. Esdras 3 9:4

    ܘܟܠܗܘܢ ܗ̇ܢܘܢ ܕܐܢ ܠܐ ܢܦܓܥܘܢ ܒܗܠܝܢ ܬܪ̈ܝܢ ܐܘ ܬܠܬܐ ܝܘ̈ܡܬܐ ܐܝܟ ܕܝ̣ܢܐ ܕܩܫܝ̈ܫܐ ܘܪ̈ܝܫܝ ܡܘܬܒܐ ܢܬܟ̇ܗܢܘܢ ܒܥܝܪ̈ܐ ܕܝܠܗܘܢ ܘܗ̣ܘ ܢܬܢ̇ܟܪܐ ܡܢ ܣܘܓܗ̇ ܕܫܒܝ̣ܬܐ

57. Esdras 3 9:5

    ܘܐܬܟ̇ܢܫܘ ܟܠܗܘܢ ܗ̇ܢܘܢ ܕܡܢ ܫܪܒܬܐ ܕܝܗܘܕܐ ܘܕܒܢܝܡܢ ܒܬܠܬܐ ܝܘ̈ܡܬܐ ܠܐܘܪܝܫܠܡ ܗܢܐ ܗܘ ܝܪܚܐ ܬܫܝܥܝܐ ܒܥܣܪܝܢ ܒܝܪܚܐ

58. Esdras 3 9:6

    ܘܝܬܒ̣ܘ ܐܟܚܕܐ ܟܠܗ ܣܘܓܐܐ̣. ܒܐܘܪ̈ܚܬܐ ܕܗܝܟܠܐ. ܟܕ ܪܥܠܝܢ ܗܘܘ. ܡܛܠ ܕܣܬܘܐ ܩ̇ܐܡ ܗܘܐ ܀

59. Esdras 3 9:7

    ܘܟܕ ܩ̣ܡ ܥܙܪܐ̣. ܐܡ̣ܪ ܠܗܘܢ. ܐܢܬܘܢ ܐܥ̣ܘܠܬܘܢ ܘܐܥܡܪܬܘܢ ܥܡܟܘܢ ܢܫ̈ܐ ܐܚܪ̈ܢܝܬ ܓܢܣܐ. ܠܡܘܣܦܘ ܚܛܗ̈ܐ ܕܐܝܣܪܝܠ.

60. Esdras 3 9:8

    ܐܦܢ ܗܫܐ ܗܒܘ ܬܘܕܝܬܐ ܘܬܫܒܘܚܬܐ ܠܡܪܝܐ ܐܠܗܐ ܕܐܒ̈ܗܐ ܕܝܠܢ

61. Esdras 3 9:9

    ܘܥܒܕܘ ܨܒܝܢܐ ܕܝܠܗ ܘܐܬܦܪܫܘ ܡܢ ܥܡ̈ܡܐ ܕܐܪܥܐ ܘܡܢ ܢܫ̈ܐ ܗܠܝܢ ܐܚܪ̈ܢܝܬ ܓܢܣܐ

62. Esdras 3 9:10

    ܘܐܙܥܩܘ ܗܘܘ ܣܘܓܐܐ ܘܐܡ̣ܪܘ ܒܩܠܐ ܪܡܐ ܗܟܢܐ ܐܝܟ ܕܐܡ̣ܪܬ ܢܥ̣ܒܕ

63. Esdras 3 9:11

    ܐܠܐ ܗ̣ܘ ܣܘܓܐܐ ܣ̇ܓܝ. ܘܫ̇ܥܬܐ ܣܬܘܝܬܐ ܗܝ. ܘܠܐ ܡܨ̣ܝܢܢ ܠܡܩܡ ܬܚܝܬ ܐܬܝܪ. ܘܥ̇ܒܕܐ ܠܐ ܐܝܬܘܗܝ ܠܢ ܝܘܡܐ ܚܕ ܘܠܐ ܬܪ̈ܝܢ. ܣܘܓܐܐ ܓܝܪ ܚܛܝܢܢ ܒܗܠܝܢ

64. Esdras 3 9:12

    ܢܩܘܡܘܢ ܗܟܝܠ ܪ̈ܝܫܢܐ ܩܕܡܝ̈ܐ ܕܣܘܓܐܐ ܘܟܠܗܘܢ ܗ̇ܢܘܢ ܕܡܢ ܒܝܬ ܡܥܡܪܐ ܕܝܠܢ ܗܢܘܢ ܕܐܝܬ ܠܗܘܢ ܢܫ̈ܐ ܐܚܪ̈ܢܝܬ ܓܢܣܐ ܢܐܬܘܢ ܟܕ ܢܣܒܝܢ ܙܒ̣̇ܢܐ

65. Esdras 3 9:13

    ܘܡܢ ܟܠ ܕܘܟܬܐ ܩܫܝ̈ܫܐ ܘܕܝ̈ܢܐ ܥܕܡܐ ܕܢܫ̣ܪܐ ܠܪܘܓܙܐ ܕܡܪܝܐ ܕܣܘܥܪܢܐ ܗܢܐ

66. Esdras 3 9:14

    ܝܘܢܬܢ ܕܝܢ ܗ̇ܘ ܕܚܙܐܝܠ. ܘܚܙܝܐ ܗ̇ܘ ܕܬܘܩܢܐ. ܩ̇ܒ̣ܠܘ ܕܐܝܟ ܗܠܝܢ. ܘܡܘܫܐ ܘܝܢܐܒ. ܘܠܘܝ. ܘܫܒܛܝܐ. ܐܡܨܥܘ ܒܝܢܬܗܘܢ

67. Esdras 3 9:15

    ܘܥܒ̣ܕܘ ܐܝܟ ܟܠܗܝܢ ܗܠܝܢ ܗܢܘܢ ܕܡܢ ܫܒܝ̣ܬܐ

68. Esdras 3 9:16

    ܘܓܒ̣ܐ ܠܗ ܥܙܪܐ ܗ̇ܘ ܟܗܢܐ ܓܒܪ̈ܐ ܪ̈ܝܫܢܐ ܕܫܪ̈ܒܬܐ ܕܝܠܗܘܢ ܟܠܗܘܢ ܒܫܡܐ ܘܝܬܒ̣ܘ ܐ̇ܟܚܕܐ ܒܢܘܡܢܝܐ ܕܝܪܚܐ ܕܥܣܪܐ ܠܡܩܡܘ ܣܘܥܪܢܐ

69. Esdras 3 9:17

    ܘܐܬ̣ܝ̈ ܠܐ̈ܦܝ ܫܘ̈ܠܡܐ ܗܠܝܢ ܕܝܠܗܘܢ ܓܒܪ̈ܐ ܗ̇ܢܘܢ ܕܐܚܝܕܝܢ ܗܘܘ ܢܫ̈ܐ ܐܚܪ̈ܢܝܬ ܓܢܣܐ ܥܕܡܐ ܠܢܘܡܢܝܐ ܕܝܪܚܐ ܩܕܡܝܐ

70. Esdras 3 9:18

    ܘܐܫܬܟܚܘ ܡܢ ܟܗ̈ܢܐ ܗ̇ܢܘܢ ܕܐܬܟܢܫܘ ܕܢܫ̈ܐ ܐܚܪ̈ܢܝܬ ܓܢܣܐ ܐܝܬ ܠܗܘܢ

71. Esdras 3 9:19

    ܡܢ ܒ̈ܢܝܐ ܕܝܫܘܥ ܗܘ ܕܝܘܙܕܩ ܘܡܢ ܐܚ̈ܐ ܕܝܠܗ ܡܬܝܐ ܘܐܠܝܥܙܪ ܘܝܘܪܝܒܐ ܘܝܘܢܕܒ

72. Esdras 3 9:20

    ܘܐܪܡܝܘ ܐܝܕܐ ܠܡ̇ܦܩܘ ܠܢܫ̈ܐ ܕܝܠܗܘܢ ܘܠܚܘܣܝܐ ܕܟܪ̈ܐ ܚܠܦ ܠܐ ܝܕܥܬܐ ܕܝܠܗܘܢ

73. Esdras 3 9:21

    ܘܡܢ ܒ̈ܢܝܐ ܕܐܡܪܝܐ ܚܢܢܝܐ ܘܙܒܕܝܐ ܘܡܐܢܝ ܘܫܡܥܝܐ ܘܡܢ ܒ̈ܢܝܐ ܕܐܘܡܢ ܡܥܣܝܐ ܘܡܥܢܐ ܘܫܡܥܝܐ ܘܢܪܝܐܝܠ ܘܥܙܪܝܐ

74. Esdras 3 9:22

    ܡܢ ܒ̈ܢܝܐ ܕܦܫܚܘܪ ܐܠܚܢܢ ܘܡܥܣܝܐ ܐܝܫܡܥܠ ܘܢܬܢܐܝܠ ܘܩܝܢܝܪܘܣ ܘܫܥܐܬܐ

75. Esdras 3 9:23

    ܘܡܢ ܠܘ̈ܝܐ ܘܙ̣ܒܕܐ ܘܫܡܥܝ ܘܩܘܠܝܐ ܗܢܐ ܐܝܬܘܗܝ ܩܠܝܐܛܝܘܣ ܘܦܬܘܫ ܘܝܗܘܕܐ ܘܝܘܢܢ

76. Esdras 3 9:24

    ܘܡܢ ܡܙܡܪ̈ܢܐ ܟܗ̈ܢܝܐ ܐܠܝܣܒ ܒܟܘܪܐ

77. Esdras 3 9:25

    ܘܡܢ ܒ̈ܢܬܐ ܕܫܘܠܡ ܘܛܘܒܠܢ

78. Esdras 3 9:26

    ܡܢ ܐܝܣܪܝܠ ܀ ܡܢ ܒ̈ܢܝܐ ܕܦܪܘܨ ܐܝܪܝܡܝܐ. ܝܕܥܝܐ ܘܡܠܟܝ. ܘܡܝܚܐܝܠ. ܐܠܝܥܙܪ ܘܚܫܒܠܝܐ. ܘܒܢܝܐ ܀

79. Esdras 3 9:27

    ܡܢ ܒ̈ܢܝܐ ܕܐܘܠܥ ܘܕܡܬܢܝܐ ܘܕܙܟܪܝܐ ܥܙܘܪܐܝܠ ܘܝܐܘܥܕܝܐ ܘܝܪܝܡܘܬ ܘܝܕܥܝܐ

80. Esdras 3 9:28

    ܘܡܢ ܒ̈ܢܝܐ ܕܬܬܘܡ ܐܠܝܕܥ ܐܠܝܫܡܥ ܥܘܬܢܝܐ ܛܪܝܡܘܣ ܘܫܟܬܝܐ ܘܙܪܕܝܐ

81. Esdras 3 9:29

    ܘܡܢ ܒ̈ܢܝܐ ܕܒܝܒܠ ܝܘܚܢܢ ܘܚܢܢܝܐ ܘܙܟܪܝܐ ܘܚܡܬܝܐ

82. Esdras 3 9:30

    ܘܡܢ ܒܢܝܡܢ ܘܠܡ ܡܠܘܟܘܣ ܝܕܥܝܐ ܝܫܘܒ ܘܐܓܝܠܘܫ ܘܝܪܝܡܘܬ

83. Esdras 3 9:31

    ܘܡܢ ܒ̈ܢܝܐ ܕܥܕܝ ܢܚܬܘܫ ܒܣܐܘܣ ܐܝܣܡܘ ܘܣܝܣܐܝܠ ܘܒܥܢܐ ܘܡܢܫܐ

84. Esdras 3 9:32

    ܘܡܢ ܒ̈ܢܝܐ ܕܚܢܢ ܐܠܝܘܢܐ ܘܐܘܫܝܐ ܘܡܠܟܝ ܘܫܒܐܐ ܘܣܝܡܘܢܝܟܘܢܘܣ ܚܡܝܐ

85. Esdras 3 9:33

    ܘܡܢ ܒ̈ܢܝܐ ܕܢܚܫܘܡ ܡܛܬܢܝܐ ܘܡܛܬܢܐ ܘܒܢܝܐ ܘܐܠܝܦܠܛ ܘܡܢܫܐ ܘܫܘܡܥܝ

86. Esdras 3 9:34

    ܘܡܢ ܒ̈ܢܝܐ ܕܒܥܢܝ. ܐܝܪܝܡܝܐ. ܘܡܘܥܕܫ. ܐܝܫܡܥܐܝܠ ܒܪܗ ܕܐܠܡܕܐ. ܘܦܝܫܝܐ. ܘܚܙܘ ܘܐܒܝܨܗܝܘܢ. ܘܐܠܝܬܫܘܥ. ܘܐܡܛܝܠܝܡܘܣ ܐܠܝܫܝܫ. ܒܥܢܘܣ. ܐܠܝܫܡܝܫ. ܫܠܡܝܐ. ܢܬܢܝܐ ܀ ܘܡܢ ܒܢܝ̈ܐ ܕܙܪܚ ܫܝܫܝ. ܐܨܒܪܝܐ. ܚܙܐܝܠ ܫܡܘܛ ܙܡܪܝ. ܝܘܣܦ ܀

87. Esdras 3 9:35

    ܡܢ ܒ̈ܢܝܐ ܕܢܘܥܡܐ ܡܪܛܝܐ ܙܒܕܝܐ ܚܕܝܐ ܝܘܐܬܪ ܒܢܝܐ

88. Esdras 3 9:36

    ܟܠܗܘܢ ܗܠܝܢ ܐܥܡ̣ܪܘ ܥܡܗܘܢ ܢ̈ܫܐ ܐܚܪ̈ܢܝܬ ܓܢܣܐ ܘܫ̇ܡ̣ܗܘ ܐܢܝ̈ܢ ܥܡ ܒܢܝܗ̈ܝܢ

89. Esdras 3 9:37

    ܘܥܡ̣ܪܘ ܟܗ̈ܢܐ ܘܠܘ̈ܝܐ ܗ̇ܢܘܢ ܕܡܢ ܐܝܣܪܝܠ ܒܐܘܪܝܫܠܡ ܒܢܘܡܝܢܝܐ ܕܝܪܚܐ ܫܒܝܥܝܐ ܘܒ̈ܢܝܐ ܕܐܝܣܪܝܠ ܒܒܝܬ ܡܥܡܪܐ ܕܝܠܗܘܢ

90. Esdras 3 9:38

    ܘܐܬܟܢܫܘ ܟܠܗ ܣܘܓܐܐ ܐܟܚܕܐ ܥܠ ܐܪܘܚܬܐ ܗ̇ܝ ܕܠܘܬ ܡܕܢܚܐ ܕܣܦܐ ܟܗܢܝܐ

91. Esdras 3 9:39

    ܘܐܡ̣ܪܘ ܠܥܙܪܐ ܪܝܫ ܟ̈ܗܢܐ ܘܩ̇ܪܘܝܐ. ܐܝܬܐ ܢܡܘܣܐ ܕܡܘܫܐ܇ ܗ̇ܘ ܕܐܬܝܗܒ ܡܢ ܡܪܝܐ ܐܠܗܐ ܕܐܝܣܪܝܠ. ܀

92. Esdras 3 9:40

    ܘܐܝܬܝ ܥܙܪܐ ܪܝܫ ܟ̈ܗܢܐ ܠܢܡܘܣܐ ܠܟܠܗ ܣܘܓܐܐ ܕܝܠܗܘܢ ܡܢ ܒܪܢܫܐ ܥܕܡܐ ܠܐܢܬܬܐ ܘܠܟܠܗܘܢ ܟܗ̈ܢܐ ܠܡܫܡܥ ܠܢܡܘܣܐ ܒܢܘܡܝܢܝܐ ܕܝܪܚܐ ܫܒܝܥܝܐ

93. Esdras 3 9:41

    ܘܩ̣ܪܐ ܗܘܐ ܒܐܪܘܚܬܐ ܘܩܕܡ ܬܪܥܐ ܟܗܢܝܐ ܡܢ ܨ̇ܦܪܐ ܥܕܡܐ ܠܛܗܪܐ ܩܕܡ ܓܒܪ̈ܐ ܘܢܫ̈ܐ ܘܝܗ̣ܒܘ ܟܠܗ ܣܘܓܐܐ ܠܗܘܢܗܘܢ ܒܢܡܘܣܐ

94. Esdras 3 9:42

    ܘܩ̣ܡ ܥܙܪܐ ܗ̇ܘ ܟܗܢܐ ܘܩܪܘܝܐ ܕܢܡܘܣܐ ܥܠ ܒܐܝܡܐ ܕܩܝܣܐ ܗ̇ܝ ܕܐܬ̣ܥܬܕܬ̇

95. Esdras 3 9:43

    ܘܩܡܘ ܥܡܗ ܡܬܝܐ ܫܡܘܥ ܚܢܢܝܐ ܥܙܪܝܐ ܐܘܪܝܐ ܚܙܩܝܐ ܒܥܠܫܡܘܫ ܡܢ ܝܡܝܢܐ

96. Esdras 3 9:44

    ܘܡܢ ܣܡܠܐ ܦܥܠܕܢܐ ܡܝܫܐܝܠ ܡܠܟܝܐ ܕܘܬܐ ܬܣܘܒ ܢܒܪܐܠܫ ܙܟܪܝܐ

97. Esdras 3 9:45

    ܘܟܕ ܢܣ̣ܒ ܥܙܪܐ ܠܟܬܒܐ ܕܢܡܘܣܐ ܩܕܡܘܗܝ ܕܣܘܓܐܐ ܝܬܝ̣ܒ ܗܘܐ ܓܝܪ ܒܪܝܫܐ ܡܫܒܚܐܝܬ ܩܕܡ ܟܠܗܘܢ

98. Esdras 3 9:46

    ܘܟܕ ܫܪܐ ܗܘܐ ܠܗ ܠܢܡܘܣܐ̣. ܟܠܗܘܢ ܬܪ̈ܝܨܐ ܩܡܘ ܀ ܘܒ̣̇ܪܟ ܥܙܪܐ ܠܡܪܝܐ ܡܪܝܡܐ ܐܚܝܕ ܟܠ

99. Esdras 3 9:47

    ܘܐܙܥܩܘ ܟܠܗ ܥܡܐ ܐܡܝܢ ܐܡܝܢ. ܘܟܕ ܐܪܝܡܘ ܠܥܠ ܐܝܕܝ̈ܐ ܢܦ̣ܠܘ ܥܠ ܐܪܥܐ. ܣܓܕܘ ܠܡܪܝܐ

100. Esdras 3 9:48

     ܝܫܘܥ ܘܒܢܝܐ ܘܫܪܒܝܐ ܘܢܪܥܢܝܐ ܥܘܩܒܝܐ ܫܒܛܝܐ ܚܘܕܝܐ ܡܥܢܐ ܘܩܠܝܛܐ ܥܙܪܝܐ ܓܘܙܒܕ ܚܢܢܝܐ ܦܐܬܘܫ ܠܘ̈ܝܐ ܡܠܦܝܢ ܗܘܘ ܢܡܘܣܐ ܕܡܪܝܐ ܘܠܘܬܗ ܕܣܘܓܐܐ ܩܪܝܢ ܗܘܘ ܠܢܡܘܣܗ ܕܡܪܝܐ ܟܕ ܡܬܢܦܚܝܢ ܗܘܘ ܐܟܚܕܐ ܘܠܩܪܝܢܐ

← Previous · Next → — showing 301–400 of 407

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.