← All works

Peshitta Esdras 3

Peshitta (Syriac Old Testament) · 407 sections

1. Esdras 3 3:20

   ܘܟܠܗܘܢ ܠܒܘ̈ܬܐ ܥܒܕ ܥܬܝܪ̈ܐ ܘܠܐ ܥܗܝܕ ܠܡܠܟܐ ܘܠܐ ܠܣܛܪܦܐ ܘܟܠܗܝܢ ܒܝܕ ܟܟܪ̈ܐ ܥܒܕ ܠܡܡܠܠܘ

2. Esdras 3 3:21

   ܘܠܐ ܥܗܝܕ ܐܡܬܝ ܕܫܬܝܢ ܠܡܪܚܡ ܠܪ̈ܚܡܐ ܘܠܐܚ̈ܐ ܘܒܬܪ ܠܘ ܣܓܝ ܫܡܛܝܢ ܣܝ̈ܦܐ

3. Esdras 3 3:22

   ܘܐܡܬܝ ܕܡܢ ܚܡܪܐ ܢܩܘܡܘܢ ܠܐ ܥܗܝܕܝܢ ܗܠܝܢ ܕܣܥܪܘ

4. Esdras 3 3:23

   ܐܘ ܓܒܪ̈ܐ ܠܘ ܝܬܝܪ ܚܝܠܬܢ ܚܡܪܐ ܕܗܟܢܐ ܐ̇ܠܨ ܠܡܥܒܕ ܘܫܬܩ ܟܕ ܗܟܢܐ ܐܡܪ

5. Esdras 3 4:1

   ܘܫܪܝ ܬܪܝܢܐ ܠܡܡܠܠܘ ܗܘ ܕܐܡܪ ܗܘܐ ܡܛܠ ܚܝܠܬܢܘܬܐ ܕܡܠܟܐ

6. Esdras 3 4:2

   ܐܘ ܓܒܪ̈ܐ ܠܘ ܝܬܝܪ ܚܝܠܬܢܝܢ ܒ̈ܢܝܢܫܐ ܕܠܐܪܥܐ ܘܠܝܡܐ ܐܚܝܕܝܢ ܘܠܟܠܗܝܢ ܗܠܝܢ ܕܒܗܘܢ

7. Esdras 3 4:3

   ܡܠܟܐ ܕܝܢ ܚܝܠܬܢܐ ܡܫܠܛ ܥܠܝܗܘܢ ܘܡܪܐ ܗܘ ܕܝܠܗܘܢ ܘܟܠ ܗܘ ܡܐ ܕܐܢ ܕܢܐܡܪ ܠܗܘܢ ܡܫܬܡܥܝܢ

8. Esdras 3 4:4

   ܐܢ ܢܐܡܪ ܠܗܘܢ ܠܡܥܒܕ ܩܪܒܐ ܐܚܪܢܐ ܠܘܬ ܐܚܪܢܐ ܥܒܕܝܢ ܐܢ ܕܝܢ ܢܫܕܪ ܐܢܘܢ ܠܘܬ ܡܩܪ̈ܒܢܐ ܡܗܠܟܝܢ ܘܕܪ̈ܫܝܢ ܛܘܪ̈ܐ ܘܠܫܘܪ̈ܐ ܘܠܦܘܪ̈ܩܣܐ

9. Esdras 3 4:5

   ܘܩܛܠܝܢ ܘܡܬܩܛܠܝܢ ܘܠܡܠܬܐ ܕܡܠܟܐ ܠܐ ܥܒܪܝܢ ܐܢܕܝܢ ܢܙܟܘܢ ܠܡܠܟܐ ܡܝܬܝܢ ܟܠܡܕܡ ܘܐܢ ܢܒܙܘܢ ܘܗܠܝܢ ܐܚܪ̈ܢܝܬܐ ܟܠܗܝܢ

10. Esdras 3 4:6

    ܘܟܠ ܐܝܠܝܢ ܕܠܐ ܡܦܠܚܝܢ ܘܠܐ ܡܩܪܒܝܢ ܐܠܐ ܡܐܟܪܝܢ ܠܐܪܥܐ ܬܘܒ ܡܐ ܕܙܪܥܝܢ ܡܐ ܕܚܨܕܘ ܡܣܩܝܢ ܠܡܠܟܐ ܘܐܚܪܢܐ ܠܐܚܪܢܐ ܟܕ ܐܠܨܝܢ ܡܣܩܝܢ ܡܕܐܬܐ ܠܡܠܟܐ

11. Esdras 3 4:7

    ܘܗܘ ܚܕ ܒܠܚܘܕܘܗܝ ܐܝܬܘܗܝ ܐܢ ܢܐܡܪ ܠܡܩܛܠ ܩܛܠܝܢ ܐܡܪ ܠܡܫܒܩ ܫܒܩܝܢ

12. Esdras 3 4:8

    ܐܡܪ ܠܡܡܚܐ ܡܚܝܢ ܐܡܪ ܠܡܚܪܒܘ ܡܚܪܒܝܢ ܐܡܪ ܠܡܒܢܐ ܒܢܝܢ

13. Esdras 3 4:9

    ܐܡܪ ܠܡܦܣܩ ܦܣܩܝܢ ܐܡܪ ܠܡܢܨܒ ܢܨܒܝܢ

14. Esdras 3 4:10

    ܘܟܠܗ ܥܡܐ ܕܝܠܗ ܘܚ̈ܝܠܘܬܗ ܠܗ ܫܡܥܝܢ ܥܡ ܕܝܢ ܗܠܝܢ ܗܘ ܡܓܣ ܟܕ ܐܟܠ ܘܫܬܐ ܘܕܡܟ

15. Esdras 3 4:11

    ܗܠܝܢ ܕܝܢ ܢܛܪܝܢ ܠܘܬܗ ܘܠܐ ܡܨܝܢ ܟܠܚܕ ܠܡܐܙܠ ܘܠܡܥܒܕ ܠܥܒ̈ܕܐ ܕܝܠܗ ܘܠܐ ܠܐ ܡܫܬܡܥܝܢ ܠܗ

16. Esdras 3 4:12

    ܐܘ ܓܒܪ̈ܐ ܠܘ ܝܬܝܪ ܚܝܠܬܢ ܡܠܟܐ ܡܛܠ ܕܗܟܢܐ ܡܫܬܡܥܢܐ ܐܝܬܘܗܝ ܘܫܬܩ

17. Esdras 3 4:13

    ܗܘ ܕܝܢ ܬܠܝܬܝܐ ܗܘ ܕܐܡܪ ܡܛܠ ܢܫ̈ܐ ܘܫܪܪܐ ܗܢܐ ܕܐܝܬܘܗܝ ܙܘܪܒܒܝܠ ܗܘ ܕܫܠܐܬܝܠ ܡܢ ܫܪܒܬܐ ܕܝܗܘܕܐ ܫܪܝ ܠܡܡܠܠܘ

18. Esdras 3 4:14

    ܓܒܪ̈ܐ ܠܘ ܪܒܐ ܗܘ ܡܠܟܐ ܘܣ̈ܓܝܐܐ ܒܢܝ̈ܢܫܐ ܘܚܡܪܐ ܚܝܠܬܢ ܡܢܘ ܗܟܝܠ ܗܘ ܕܡܙܟܝ ܥܠܝܗܘܢ ܐܘ ܡܢܘ ܗܘ ܕܡܫܠܛ ܥܠܝܗܘܢ

19. Esdras 3 4:15

    ܠܘ ܢܫ̈ܐ ܝ̈ܠܕܢ ܠܡ̈ܠܟܐ ܘܠܟܠܗ ܥܡܐ ܗܘ ܕܫܠܝܛ ܥܠ ܝܡܐ ܘܥܠ ܐܪܥܐ

20. Esdras 3 4:16

    ܘܡܢܗܝܢ ܗܘܐ ܘܗܢܝܢ ܪܒܝܝܢ ܐܢܘܢ ܠܗܢܘܢ ܕܢܨܒܘ ܠܟܪ̈ܡܐ ܡܢ ܗܢܘܢ ܕܚܡܪܐ ܗܘܐ

21. Esdras 3 4:17

    ܘܗܢܝܢ ܥܒ̈ܕܢ ܐܣ̈ܛܠܐ ܕܒܢܝ̈ܢܫܐ ܘܗܢܝܢ ܥܒ̈ܕܢ ܬܫܒܘܚܬܐ ܠܒ̈ܢܝܢܫܐ ܘܠܐ ܡܨܝܢ ܒܢܝ̈ܢܫܐ ܠܡܗܘܐ ܣܛܪ ܡܢ ܢܫ̈ܐ

22. Esdras 3 4:18

    ܐܢ ܕܝܢ ܢܟܢܫܘܢ ܕܗܒܐ ܘܣܐܡܐ ܘܟܠ ܣܘܥܪܢܐ ܫܦܝܪܐ ܘܢܚܙܘܢ ܐܢܬܬܐ ܚܕܐ ܫܦܝܪܐ ܒܚܙܘܐ ܘܒܫܘܦܪܐ

23. Esdras 3 4:19

    ܐܦ ܗܠܝܢ ܟܠܗܝܢ ܟܕ ܫܒܩܝܢ ܘܒܗ ܬܘܝܪܝܢ ܘܟܕ ܦܥܪܝܢ ܦܘܡܐ ܚܝܪܝܢ ܒܗ ܘܟܠܗܘܢ ܠܗ ܪܚܡܝܢ ܡܐܠܠܘܢ ܐܘ ܠܕܗܒܐ ܘܠܣܐܡܐ ܘܠܟܠ ܣܘܥܪܢܐ ܫܦܝܪܐ

24. Esdras 3 4:20

    ܒܪܢܫܐ ܠܐܒܐ ܕܝܠܗ ܫܒܩ ܗܘ ܕܪܒܝܗ ܘܠܐܬܪܐ ܕܝܠܗ ܘܠܘܬ ܐܢܬܬܐ ܕܝܠܗ ܕܒܩ

25. Esdras 3 4:21

    ܘܥܡ ܐܢܬܬܐ ܕܝܠܗ ܫܒܩ ܢܦܫܐ ܘܠܐ ܠܐܒܐ ܥܗܝܕ ܘܠܐ ܠܐܡܐ ܘܠܐ ܠܐܬܪܐ

26. Esdras 3 4:22

    ܘܡܢ ܗܪܟܐ ܙܕܩ ܠܟܘܢ ܠܡܕܥ ܕܢܫ̈ܐ ܡܫܠܛܢ ܥܠܝܟܘܢ ܠܐ ܥܡܠܝܢ ܐܢܬܘܢ ܘܠܐܝܢ ܘܟܠ ܡܕܡ ܠܢܫ̈ܐ ܝܗܒܝܢ ܐܢܬܘܢ ܘܡܝܬܝܢ ܐܢܬܘܢ

27. Esdras 3 4:23

    ܘܢܣܒ ܒܪܢܫܐ ܠܣܝܦܐ ܒܐܝܕܗ ܕܢܐܙܠ ܠܡܚܙܩ ܘܠܡܠܣܛܝܘ ܘܠܡܓܢܒ ܘܒܝܡܐ ܠܡܛܦ ܘܒܢܗܪ̈ܘܬܐ

28. Esdras 3 4:24

    ܘܠܐܪܝܐ ܚܙܐ ܘܒܚܫܘܟܐ ܡܗܠܟ ܘܡܐ ܕܓܢܒ ܘܚܛܦ ܘܫܠܚ ܠܗܝ ܕܪܚܝܡܐ ܡܝܬܐ

29. Esdras 3 4:25

    ܘܣܓܝܐܝܬ ܡܚܒ ܒܪܢܫܐ ܠܐܢܬܬܐ ܡܐܠܠܘܢ ܐܘ ܠܐܒܐ ܘܐܡܐ

30. Esdras 3 4:26

    ܘܣܓ̈ܝܐܐ ܫܢܘ ܒܬܪܥܝܬܐ ܕܝܠܗܘܢ ܡܛܠ ܢܫ̈ܐ ܘܥܒ̈ܕܐ ܗܘܘ ܡܛܠܬܗܝܢ

31. Esdras 3 4:27

    ܘܣܓܝ̈ܐܐ ܐܒܕܘ ܘܛܥܫܘ ܘܦܕܘ ܡܛܠ ܢܫ̈ܐ

32. Esdras 3 4:28

    ܘܗܫܐ ܠܐ ܡܗܝܡܢܝܢ ܐܢܬܘܢ ܠܝ ܠܘ ܪܒܐ ܗܘ ܡܠܟܐ ܒܫܘܠܛܢܐ ܕܝܠܗ ܠܘ ܟܠܗܘܢ ܐܬܪ̈ܘܬܐ ܕܚܠܝܢ ܠܡܓܫܦ ܒܗ

33. Esdras 3 4:29

    ܚܙܐ ܗܘܝܬ ܠܗ ܘܠܐܦܐܡܐ ܗ̇ܝ ܒܪܬܐ ܕܪܒܐ ܐܪܛܩ ܗܘ ܬܡܝܗܐ ܗܝ ܕܪܘܟܬܐ ܕܡܠܟܐ

34. Esdras 3 4:30

    ܘܕܡܪܝܡܐ ܗܘܬ ܠܬܓܐ ܡܢ ܪܝܫܐ ܕܝܠܗ ܘܣܝܡܐ ܗܘܬ ܗܝ ܠܗ ܘܡܫܩܦܐ ܗܘܬ ܠܡܠܟܐ ܒܣܡܠܗ

35. Esdras 3 4:31

    ܘܠܘܬ ܗܠܝܢ ܡܠܟܐ ܟܕ ܦܥܝܪ ܦܘܡܗ ܚܐܪ ܗܘܐ ܒܗ̇. ܘܐܢ ܓܚܟܐ ܗܘܬ ܠܘܬܗ ܓܚܟ ܗܘܐ. ܐܢܕܝܢ ܬܬܡܪܡܪ ܥܠܘܗܝ. ܡܫܓܫ ܗܘܐ ܠܗ̣̇. ܐܝܟܢܐ ܕܬܬܪܥܐ ܠܗ

36. Esdras 3 4:32

    ܐܘ ܓܒܪ̈ܐ ܐܝܟܢܐ ܠܐ ܚܝ̈ܠܬܢܝܢ ܢܫ̈ܐ ܕܗܟܢܐ ܣܥܪ̈ܢ

37. Esdras 3 4:33

    ܘܗܝܕܝܢ ܡܠܟܐ ܘܪ̈ܘܪܒܢܐ ܚܝܪܝܢ ܗܘܘ ܐܚܪܢܐ ܒܐܚܪܢܐ ܘܫ̇ܪ̣ܝܘ ܠܡܡܠܠܘ ܡܛܠ ܫܪܪܐ

38. Esdras 3 4:34

    ܓܒܪ̈ܐ ܠܐ ܚܝ̈ܠܬܢܝܢ ܢܫ̈ܐ ܪܒܐ ܐܪܥܐ ܘܪܡ ܫܡܝܐ ܘܩܠܝܠ ܒܪܗܛܐ ܫܡܫܐ ܡܛܠ ܕܗܦܟ ܒܚܘܕܪܐ ܕܫܡܝܐ ܘܬܘܒ ܪܗܛ ܠܕܘܟܬܐ ܕܝܠܗ ܒܚܕ ܝܘܡܐ

39. Esdras 3 4:35

    ܠܘ ܪܒܐ ܗܘ ܗܘ ܕܗܠܝܢ ܥܒܕ ܘܗܘ ܫܪܪܐ ܪܒ ܘܚܝܠܬܢ ܛܒ ܡܢ ܟܠ

40. Esdras 3 4:36

    ܟܠܗ ܐܪܥܐ ܠܫܪܪܐ ܩܪܝܐ ܘܫܡܝܐ ܠܗ ܡܒܪܟ ܘܟܠܗܘܢ ܥܒ̈ܕܐ ܙܝܥܝܢ ܘܪܥܠܝܢ ܘܠܐ ܐܝܬ ܥܡܗ ܕܗܢܐ ܥܘܠܐ ܘܠܐ ܡܕܡ

41. Esdras 3 4:37

    ܥܘܠ ܡܠܟܐ ܥ̈ܘܠܢ ܢܫ̈ܐ ܥ̈ܘܠܝܢ ܟܠܗܘܢ ܒܢܝ̈ܐ ܕܐܢܫܐ ܘܥܘ̈ܠܝܢ ܟܠܗܘܢ ܥܒ̈ܕܐ ܕܝܠܗܘܢ ܟܠܗܘܢ ܕܐܝܟ ܗܠܝܢ ܘܠܐ ܐܝܬܘܗܝ ܒܗܘܢ ܫܪܪܐ ܘܒܥܘܠܘܬܐ ܕܝܠܗܘܢ ܐܒܕܝܢ

42. Esdras 3 4:38

    ܘܫܪܪܐ ܩܝܡ ܘܚܝܠܬܢ ܠܥܠܡ ܘܐܚܝܕ ܠܥܠܡ ܕܥܠܡ̈ܐ

43. Esdras 3 4:39

    ܘܠܐ ܐܝܬ ܠܘܬܗ ܠܡܣܒ ܒܦܪܨܘܦܐ ܘܠܐ ܫܘܚܠܦܐ ܐܠܐ ܗܢܝܢ ܕܟ̈ܐܢܢ ܥܒܕ ܡܢ ܟܠܗܘܢ ܗܢܘܢ ܕܥܘ̈ܠܝܢ ܘܒ̈ܝܫܝܢ ܘܟܠܗܘܢ ܫܦܝܪ ܡܨܛܒܝܢ ܒܥܒ̈ܕܐ ܕܝܠܗ

44. Esdras 3 4:40

    ܘܠܐ ܐܝܬ ܒܕܝܢܐ ܕܝܠܗ̣ ܘܠܐ ܡܕܡ ܥ̣̇ܘܠܐ ܀ ܘܕܝܠܗ ܗܘ ܚܝܠܐ ܘܡܠܟܘܬܐ. ܘܫܘܠܛܢܐ ܘܪܒܘܬܐ ܕܟܠܗܘܢ ܥܡ̈ܡܐ. ܡܒܪܟܐ ܗܘ ܐܠܗܗ ܕܫܪܪܐ̣.

45. Esdras 3 4:41

    ܘܫܬܩ ܡܢ ܕܠܡܡܠܠܘ ܘܟܠܗ ܥܡܐ ܗܝܕܝܢ ܐܙܥܩ ܘܐܡܪܘ ܪܒ ܗܘ ܫܪܪܐ ܘܝܬܝܪ ܚܝܠܬܢ

46. Esdras 3 4:42

    ܗܝܕܝܢ ܡܠܟܐ ܐܡܪ ܠܗ ܫܐܠ ܗܘ ܡܐ ܕܨܒܐ ܐܢܬ ܝܬܝܪ ܡܢ ܗܠܝܢ ܕܟܬܝܒ̈ܢ ܘܢܬܠ ܠܟ ܒܗܘ ܙܢܐ ܕܐܫܬܟܚܬ ܝܬܝܪ ܚܟܝܡܐ ܘܥܠ ܓܢܒܝ ܬܬܒ ܘܒܪ ܓܢܣܐ ܕܝܠܝ ܬܬܩܪܐ

47. Esdras 3 4:43

    ܗܝܕܝܢ ܐܡܪ ܠܡܠܟܐ ܐܬܥܗܕ ܠܢܕܪܐ ܕܢܕܪܬ ܠܡܒܢܐ ܠܐܘܪܝܫܠܡ ܒܝܘܡܐ ܗܘ ܕܠܬܓܐ ܕܝܠܟ ܩܒܠܬ

48. Esdras 3 4:44

    ܘܠܟܠܗܘܢ ܡ̈ܐܢܐ ܕܐܬܢܣܒܘ ܡܢ ܐܘܪܝܫܠܡ ܠܡܫܕܪܘ ܗܠܝܢ ܕܦܪܫ ܗܘܐ ܟܘܪܫ ܟܕ ܢܕܪ ܗܘܐ ܠܡܫܕܪܘ ܠܬܡܢ

49. Esdras 3 4:45

    ܘܐܢܬ ܢܕܪܬ ܠܡܒܢܐ ܬܡܢ ܗܝܟܠܐ ܗܘ ܕܐܘܩܕܘ ܐܕܘܡܝ̈ܐ ܟܕ ܚܪܒܬ ܝܗܘܕ ܡܢ ܟ̈ܠܕܝܐ

50. Esdras 3 4:46

    ܘܗܫܐ ܗܕܐ ܐܝܬܝܗ ܗܝ ܕܠܟ ܡܦܝܣ ܐܢܐ ܡܪܝ ܡܠܟܐ ܘܗܝ ܕܫܐܠ ܐܢܐ ܠܟ ܘܗܕܐ ܐܝܬܝܗ ܪܒܘܬܐ ܗܝ ܕܡܢܟ ܒܥܐ ܐܢܐ ܗܟܝܠ ܐܝܟܢܐ ܕܬܥܒܕ ܠܢܕܪܐ ܗܘ ܕܢܕܪܬ ܠܡܠܟܐ ܗܘ ܕܫܡܝܐ ܠܡܥܒܕ ܡܢ ܦܘܡܐ ܕܝܠܟ

51. Esdras 3 4:47

    ܗܝܕܝܢ ܟܕ ܩܡ ܕܪܝܘܫ ܡܠܟܐ ܢܫܩܗ ܘܟܬܒ ܠܗ ܐܓܪ̈ܬܐ ܠܘܬ ܟܠܗܘܢ ܐܘ̈ܩܘܢܘܡܐ ܘܛܘܦܪ̈ܟܘ ܘܣ̈ܛܪܛܝܓܐ ܘܣܛܪ̈ܦܐ ܐܝܟܢܐ ܕܢܠܘܘܢܝܗܝ ܘܠܗܢܘܢ ܕܥܡܗ ܟܠܗܘܢ ܕܣܠܩܝܢ ܠܡܒܢܐ ܠܐܘܪܝܫܠܡ

52. Esdras 3 4:48

    ܘܠܟܠܗܘܢ ܛܘܦܪ̈ܟܘ ܕܒܣܘܪܝܐ ܥܡܝܩܬܐ ܘܦܘܢܝܩܐ ܘܠܗܢܘܢ ܕܒܠܒܢܢ ܟܬܒ ܐܓܪ̈ܬܐ ܠܡܥܒܪܘ ܩ̈ܝܣܐ ܕܐܪܙܐ ܡܢ ܠܒܢܢ ܠܐܘܪܝܫܠܡ ܘܐܝܟܢܐ ܕܢܒܢܘܢ ܥܡܗ ܠܡܕܝܢܬܐ

53. Esdras 3 4:49

    ܘܟܬܒ ܠܟܠܗܘܢ ܝܘ̈ܕܝܐ ܗܢܘܢ ܕܣܠܩܝܢ ܡܢ ܡܠܟܘܬܐ ܠܝܗܘܕ ܚܠܦ ܚܘܪܪܐ ܕܟܠ ܚܝܠܬܢܐ ܘܣܛܪ̈ܦܐ ܘܛܘܦܪ̈ܟܐ ܘܐܩܘܢܘܡܐ ܠܐ ܢܣܥܐ ܥܠ ܬܪ̈ܥܐ ܕܝܠܗܘܢ

54. Esdras 3 4:50

    ܘܕܟܠ ܐܬܪܐ ܗܘ ܕܐܚܕܝܢ ܕܠܐ ܡܕܐܬܐ ܠܗܘܢ ܢܗܘܐ ܐܝܬܘܗܝ ܘܐܝܟܢܐ ܕܐܕܘ̈ܡܝܐ ܢܪܦܘܢ ܠܩܘܪ̈ܝܐ ܕܐܚܝܕܝܢ ܡܢ ܕܝܘ̈ܕܝܐ

55. Esdras 3 4:51

    ܘܠܒܢܝܢܐ ܕܗܝܟܠܐ ܢܬܝܗܒ ܒܟܠ ܫܢܬܐ ܟܟܪ̈ܐ ܕܟܣܦܐ ܥܣܪ̈ܝܢ ܥܕܡܐ ܕܡܬܒܢܐ

56. Esdras 3 4:52

    ܘܕܥܠ ܡܕܒܚܐ ܝܩ̈ܕܐ ܫ̈ܠܡܐ ܢܣܩܘܢ ܒܟܠ ܝܘܡܐ ܐܝܟܢܐ ܕܐܝܬ ܠܗܘܢ ܦܘܩܕܢܐ ܠܡܩܪܒܘ ܘܐܚܪ̈ܢܝܬܐ ܥܣܪ ܟܟܪ̈ܐ ܒܟܠ ܫܢܬܐ

57. Esdras 3 4:53

    ܘܕܠܟܠܗܘܢ ܗܢܘܢ ܕܡܫܬܘܫܛܝܢ ܡܢ ܒܒܝܠ ܠܡܒܢܐ ܠܡܕܝܢܬܐ ܢܗܘܐ ܐܝܬ ܚܘܪܪܐ ܘܠܗܘܢ ܘܠܒ̈ܢܝܐ ܕܝܠܗܘܢ ܘܠܟܠܗܘܢ ܟܗ̈ܢܐ ܗܢܘܢ ܕܡܫܬܘܫܛܝܢ

58. Esdras 3 4:54

    ܟܬܒ ܕܝܢ ܘܠܝܗܘܒܘܬ ܣܘܢܩܢܐ ܘܠܐܣܛܠܐ ܟܗܢܝܬܐ ܒܗܝ ܕܡܫܡܫܝܢ ܗܘܘ ܒܗ

59. Esdras 3 4:55

    ܘܠܠܘ̈ܝܐ ܟܬܒ ܠܡܬܠ ܝܗܘܒܘܬ ܣܘܢܩܢܐ̣. ܥܕܡܐ ܠܝܘܡܐ ܕܢܫܬܡܠܐ ܒܝܬܐ. ܘܐܘܪܝܫܠܡ ܬܬܒܢܐ.

60. Esdras 3 4:56

    ܘܠܟܠܗܘܢ ܗܢܘܢ ܕܢܛܪܝܢ ܠܡܕܝܢܬܐ ܟܬܒ ܠܡܬܠ ܠܗܘܢ ܦܣܐ ܘܐܦܣ̈ܢܝܬܐ

61. Esdras 3 4:57

    ܘܫܕܪ ܟܠܗܘܢ ܡ̈ܐܢܐ. ܗܠܝܢ ܕܦܪܫ ܟܘܪܫ ܡܠܟܐ ܡܢ ܒܒܝܠ. ܘܟܠܗܝܢ ܗܠܝܢ ܕܐܡܪ ܟܘܪܫ ܠܡܥܒܕ. ܐܦ ܗܘ ܦܩܕ ܠܡܥܒܕ ܘܠܡܫܕܪܘ ܠܐܘܪܝܫܠܡ ܀

62. Esdras 3 4:58

    ܘܗܝܕܝܢ ܢܦܩ ܗܘ ܝܢܣܩܐ ܘܟܕ ܐܪܝܡ ܠܦܪܨܘܦܗ ܠܫܡܝܐ ܠܘܩܒܠ ܐܘܪܝܫܠܡ ܒܪܟ ܠܡܠܟܐ ܕܫܡܝܐ ܟܕ ܐܡܪ

63. Esdras 3 4:59

    ܡܢܟ ܗܝ ܙܟܘܬܐ ܘܡܢܟ ܗܝ ܚܟܡܬܐ ܘܕܝܠܟ ܗܝ ܬܫܒܘܚܬܐ ܘܐܢܐ ܒܪ ܒܝܬܐ ܕܝܠܟ

64. Esdras 3 4:60

    ܡܒܪܟܐ ܐܝܬܝܟ ܗܘ ܕܝܗܒܬ ܠܝ ܚܟܡܬܐ ܘܠܟ ܡܘܕܐ ܐܢܐ ܡܪܝܐ ܕܐܒܗ̈ܬܐ

65. Esdras 3 4:61

    ܘܢܣܒ ܠܐܓܪ̈ܬܐ ܘܢܦܩ ܘܐܬܐ ܠܒܒܝܠ ܘܐܘܕܥ ܠܐܚ̈ܐ ܕܝܠܗ ܟܠܗܘܢ

66. Esdras 3 4:62

    ܘܒܪܟܘ ܠܐܠܗܐ ܕܐܒܗ̈ܬܐ ܕܝܠܗܘܢ ܡܛܠ ܕܝܗܒ ܠܗܘܢ ܢܝܚܐ ܘܫܘܒܩܢܐ

67. Esdras 3 4:63

    ܠܡܣܩ ܘܠܡܒܢܐ ܠܐܘܪܫܠܡ ܘܠܗܝܟܠܐ ܗܘ ܕܐܫܬܡܗ ܫܡܐ ܕܝܠܗ ܥܠܘܗܝ ܘܫܬܝܢ ܗܘܘ ܥܡ ܡܘܣܝ̈ܩܐ ܘܚܕܘܬܐ ܝܘ̈ܡܬܐ ܫܒܥܐ

68. Esdras 3 5:1

    ܒܬܪ ܕܝܢ ܗܠܝܢ ܐܬܓܒܝܘ ܠܡܣܩ ܪ̈ܝܫܐ ܕܒܝܬܐ ܕܫܪ̈ܒܬܐ ܐܝܟ ܫܒ̈ܛܐ ܕܝܠܗܘܢ ܘܢܫ̈ܐ ܕܝܠܗܘܢ ܘܒܢܝ̈ܐ ܘܒ̈ܢܬܐ ܘܥܒ̈ܕܐ ܕܝܠܗܘܢ ܘܐܡܗ̈ܬܐ ܘܒܥܝܪ̈ܐ ܕܝܠܗܘܢ

69. Esdras 3 5:2

    ܘܕܪܝܘܫ ܫܕܪ ܥܡܗܘܢ ܦܪ̈ܫܐ ܐܠܦܐ ܥܕܡܐ ܕܡܩܝܡܝܢ ܠܗܘܢ ܒܐܘܪܝܫܠܡ ܥܡ ܫܝܢܐ ܘܥܡ ܡܘܣܝܩ̈ܐ ܘܦ̈ܠܓܐ ܘܥܡ ܐܒܘ̈ܒܐ

70. Esdras 3 5:3

    ܘܟܠܗܘܢ ܐܚ̈ܐ ܕܝܠܗܘܢ ܟܕ ܡܫܬܥܝܢ ܘܥܒܕ ܐܢܘܢ ܠܡܣܩ ܐܟܚܕܐ ܥܡ ܗܢܘܢ

71. Esdras 3 5:4

    ܘܗܠܝܢ ܫܡ̈ܗܐ ܕܓܒܪ̈ܐ ܗܢܘܢ ܕܣܠܩܝܢ ܗܘܘ ܥܠ ܪܝܫܢܘܬܐ ܕܝܠܗܘܢ

72. Esdras 3 5:5

    ܟܗ̈ܢܐ ܒܢܘ̈ܗܝ ܕܦܝܢܚܣ ܒܪܐ ܕܐܗܪܘܢ ܩܘܥ ܗܘ ܕܝܘܙܕܩ ܗܘ ܕܫܐܪܝܐ ܘܝܘܝܩܝܡ ܗܘ ܕܙܘܪܒܒܝܠ ܗܘ ܕܫܠܐܬܝܠ ܡܢ ܒܝܬܗ ܕܕܘܝܕ ܡܢ ܓܢܣܐ ܕܦܪܨ ܫܪܒܬܐ ܕܝܢ ܕܝܗܘܕܐ

73. Esdras 3 5:6

    ܗ̇ܘ ܕܡܠܠ ܩܕܡ ܕܪܝܘܫ ܡܠܟܐ ܕܦܪ̈ܣܝܐ ܡ̈ܠܐ ܚܟܝ̈ܡܬܐ ܒܫܢ̇ܬܐ ܬܪܝܢܝܬܐ ܕܡܠܟܘܬܐ ܕܝܠܗ. ܒܢܝܣܢ ܝܪܚܐ ܩܕܡܝܐ ܀

74. Esdras 3 5:7

    ܐܝܬܝܗܘܢ ܕܝܢ ܗܢܘܢ ܡܢ ܝܗܘܕ ܗܢܘܢ ܕܣܠܩܘ ܡܢ ܫܒܝܬܐ ܡܢ ܬܘܬܒܘܬܐ ܗܢܘܢ ܕܓܠܘܝ ܗܘܐ ܢܒܘܟܕܢܨܪ ܡܠܟܐ ܕܒܒܝܠ ܠܒܒܝܠ

75. Esdras 3 5:8

    ܘܗܦܟܘ ܠܐܘܪܝܫܠܡ ܘܠܫܪܟܐ ܕܝܗܘܕ ܟܠܚܕ ܠܡܕܝܢܬܐ ܕܝܠܗ ܗܢܘܢ ܕܐܬܘ ܥܡ ܙܘܪܒܒܝܠ ܘܝܫܘܥ ܗܘ ܕܢܚܡܝܐ ܕܙܪܚܝܐ ܕܪܝܫܐܝܐ ܕܚܢܢܝܐ ܕܡܘܪܕܟܝ ܕܒܥܠܫܐܪܝܐ ܕܐܣܦܪܣܘ ܕܒܘܪܐܠܝܐ ܕܪܘܐܝܡ ܕܒܥܢܐ ܕܪ̈ܝܫܢܐ ܕܝܠܗܘܢ

76. Esdras 3 5:9

    ܡܢܝܢܐ ܕܗܢܘܢ ܕܡܢ ܥܡܐ ܘܡܕܒܪ̈ܢܐ ܕܝܠܗܘܢ ܒ̈ܢܝܐ ܕܦܪܨ ܬܪ̈ܝܢ ܐܠܦ̈ܝܐ ܘܡܐܐ ܘܫܒ̈ܥܝܢ ܘܬܪ̈ܝܢ ܒ̈ܢܝܐ ܕܫܦܛ ܬܠܬ ܡܐܐ ܘܫܒ̈ܥܝܢ ܘܬܪ̈ܝܢ

77. Esdras 3 5:10

    ܒܢܝ̈ܐ ܕܐܪܘܫ ܫܒܥ ܡܐܐ ܘܚܡ̈ܫܝܢ ܘܫܬܐ

78. Esdras 3 5:11

    ܒܢܝ̈ܐ ܕܦܐܠܝ ܪܝܫܢܐ ܕܡܘܐܒ ܘܒܪܗ ܕܝܫܘܥ ܘܕܚܘܒܕ ܐܠܦܐ ܘܬܡܢܡܐܐ ܘܬܪ̈ܝܢ

79. Esdras 3 5:12

    ܒ̈ܢܝܐ ܕܝܘܠܚܡ ܬܪ̈ܝܢ ܒܢܝ̈ܐ ܕܐܙܐܛܘ ܬܫܥܡܐܐ ܘܫܒܥܝܢ ܒ̈ܢܝܐ ܕܟܘܪܒܐ ܫܬܡܐܐ ܘܬܠܬܝ̈ܢ ܘܬܠܬܐ ܒ̈ܢܝܐ ܕܒܢܝ ܫܬܡܐܐ ܘܐܪ̈ܒܥܝܢ ܘܬܡܢܝܐ

80. Esdras 3 5:13

    ܒܢܝ̈ܐ ܕܒܝܒܐ ܫܒܥܡܐܐ ܘܚܡܫܐ ܒܢܝ̈ܐ ܕܐܪܓܘ ܐܠܦܐ ܘܬܠܬܡܐܐ ܘܥܣܪ̈ܝܢ ܘܬܪ̈ܝܢ

81. Esdras 3 5:14

    ܒܢܝ̈ܐ ܕܐܕܘܢܝܩܡ ܬܠܬܝܢ ܘܫܒܥܐ ܒܢܝ̈ܐ ܕܒܥܫܐ ܬܪ̈ܝܢ ܐܠܦ̈ܝܐ ܘܫܬܡܐܐ ܘܐܫܬܐ ܒ̈ܢܝܐ ܕܥܫܐܝܠ ܐܪܒܥܡܐܐ ܘܚܡ̈ܫܝܢ ܘܐܪ̈ܒܥܐ

82. Esdras 3 5:40

    ܘܐܡܪ ܠܗܘܢ ܢܚܡܝܐ ܠܐ ܬܫܘܬܦܘܢ ܕܝܢ ܒܩܘܕܫ̈ܐ ܥܕܡܐ ܕܢܩܝܡ ܪܝܫ ܟܗ̈ܢܐ ܕܠܒܝܫ ܓܠܝܢܐ ܘܫܪܪܐ

83. Esdras 3 5:41

    ܟܠܗܘܢ ܕܝܢ ܐܝܬܝܗܘܢ ܗܘܘ ܕܐܝܣܪܝܠ ܡܢ ܒܪ ܬܪ̈ܬܥܣܪܐ ܫ̈ܢܝܐ ܣܛܪ ܡܢ ܥܒ̈ܕܐ ܘܐܡܗ̈ܬܐ ܪ̈ܒܘܬܐ ܐܪ̈ܒܥ ܘܬܪ̈ܝܢ ܐܠܦ̈ܝܐ ܘܐܪ̈ܒܥܡܐܐ ܘܐܫܬܝܢ ܥܒ̈ܕܐ ܕܗܠܝܢ ܘܐܡ̈ܗܬܐ ܫܒܥܐ ܐܠܦ̈ܝܐ ܘܬܠܬ ܡܐܐ ܘܬܠܬܝܢ ܘܫܒܥܐ ܦܣܠܛܘ̈ ܘܡܙܡܪ̈ܢܐ ܡܐܬܝܢ ܘܐܪ̈ܒܥܝܢ ܘܚܡܫܐ

84. Esdras 3 5:42

    ܓܡ̈ܠܐ ܐܪܒܥܡܐܐ ܘܬܠܬܝܢ ܘܚܡܫ ܘܪ̈ܟܫܐ ܫܒܥܐ ܐܠܦ̈ܝܐ ܘܬܠܬܝܢ ܘܫ̈ܬܐ ܡܘ̈ܠܝܬܐ ܡܐܬܝܢ ܘܐܪ̈ܒܥܝܢ ܘܚܡܫ ܚܡܪ̈ܐ ܚܡܫܐ ܐܠܦ̈ܝܐ ܘܚܡܫ ܡܐܐ ܘܥܣܪ̈ܝܢ ܘܚܡܫܐ

85. Esdras 3 5:43

    ܘܡܢ ܪ̈ܝܫܢܐ ܐܝܟ ܫܪ̈ܒܬܐ ܟܕ ܐܬܝܢ ܗܘܘ ܠܗܝܟܠܐ ܕܐܠܗܐ ܗܘ ܕܒܐܘܪܝܫܠܡ ܢܕܪܘ ܗܘܘ ܕܢܩܝܡܘܢ ܠܒܝܬܐ ܥܠ ܕܘܟܬܐ ܕܝܠܗ ܘܗܝܟܠܐ ܕܝܠܗܘܢ

86. Esdras 3 5:44

    ܘܒܝܬ ܓܙܐ ܟܗܢܝܐ ܕܥܒ̈ܕܐ ܡܢ̈ܐܣ ܕܕܗܒܐ ܐܠܦܐ ܘܣܐܡܐ ܡܢ̈ܐܣ ܚܡܫܐ ܐܠܦ̈ܝܐ ܘܐܣ̈ܛܠܐ ܟܗ̈ܢܝܬܐ ܡܐܐ

87. Esdras 3 5:45

    ܘܐܬܬܥܡܪܘ ܟܗ̈ܢܐ ܘܠܘ̈ܝܐ ܘܗܢܘܢ ܕܡܢ ܥܡܐ ܕܝܠܗ ܒܐܘܪܝܫܠܡ ܘܒܐܬܪܐ ܘܡܙܡܪ̈ܢܐ ܟܗ̈ܢܝܐ ܘܬܪ̈ܥܐ ܘܟܠܗ ܐܝܣܪܝܠ ܒܩܘܪ̈ܝܐ ܕܝܠܗܘܢ

88. Esdras 3 5:46

    ܟܕ ܩܡ ܕܝܢ ܝܪܚܐ ܫܒܝܥܝܐ ܘܐܝܬܝܗܘܢ ܗܘܘ ܒܢܝ̈ܐ ܕܐܣܪܝܠ ܟܠܚܕ ܒܕܝܠܗܘܢ ܐܬܟܢܫܘ ܐܟܚܕܐ ܒܪܘܝܚܘܬܐ ܕܬܪܥܐ ܩܕܡܝܐ ܗܘ ܕܠܘܬ ܡܕܢܚܐ

89. Esdras 3 5:47

    ܘܟܕ ܐܬܬܩܝܡ ܝܫܘܥ ܒܪܗ ܕܝܘܙܕܩ ܘܐܚ̈ܐ ܕܝܠܗ ܟܗ̈ܢܐ ܘܙܘܪܒܒܝܠ ܗܘ ܕܫܠܐܬܝܠ ܘܐܚ̈ܐ ܕܗܢܐ ܛܝܒܘ ܡܕܒܚܐ ܕܐܠܗܐ

90. Esdras 3 5:48

    ܠܡܩܪܒܘ ܥܠܘܗܝ ܝ̈ܩܕܐ ܫ̈ܠܡܐ ܢܩܦܐܝܬ ܠܗܠܝܢ ܕܒܟܬܒܐ ܕܡܘܫܐ ܗܘ ܒܪܢܫܐ ܕܐܠܗܐ ܐܡܝܪ̈ܢ

91. Esdras 3 5:49

    ܘܐܬܟܢܫܘ ܟܠܗܘܢ ܡܢ ܥܡ̈ܡܐ ܐܚܪ̈ܢܐ ܕܐܪܥܐ ܘܬܪܨܘ ܠܡܕܒܚܐ ܥܠ ܕܘܟܬܐ ܕܝܠܗ ܡܛܠ ܕܒܒܥܠܕܒܒܘܬܐ ܐܝܬܝܗܘܢ ܗܘܘ ܠܗܘܢ ܟܠܗܘܢ ܥܡ̈ܡܐ ܗܠܝܢ ܕܥܠ ܐܪܥܐ ܘܐܬܚܝܠܘ ܘܡܣܩܝܢ ܗܘܘ ܕܒ̈ܚܐ ܒܙܒܢܐ ܘܝܩ̈ܕܐ ܫ̈ܠܡܐ ܠܡܪܝܐ ܒܨܦܪܐ ܘܒܦܢܝܐ

92. Esdras 3 5:50

    ܘܥܒܕܘ ܠܥܐܕܐ ܕܩܒܝܥܘܬ ܡܛ̈ܠܠܐ ܐܝܟ ܕܦܩܝܕ ܒܢܡܘܣܐ ܘܕܒ̈ܚܐ ܒܟܠ ܝܘܡܐ ܐܝܟ ܕܙܕܩ ܗܘܐ

93. Esdras 3 5:51

    ܘܒܬܪ ܗܠܝܢ ܩܘܪ̈ܒܢܐ ܕܐܡܝܢܘܬܐ ܘܕܒ̈ܚܐ ܕܫܒ̈ܐ ܘܕܪܝܫ ܝܪ̈ܚܐ ܘܕܥ̈ܐܕܐ ܟܠܗܘܢ ܡܩܕܫ̈ܐ

94. Esdras 3 5:52

    ܘܟܠܗܘܢ ܗܢܘܢ ܕܢܕܪܘ ܗܘܘ ܢܕܪܐ ܠܐܠܗܐ ܡܢ ܢܘܡܢܝܐ ܕܝܪܚܐ ܫܒܝܥܝܐ ܫܪܝܘ ܠܡܩܪܒܘ ܕܒ̈ܚܐ ܠܐܠܗܐ ܘܗܝܟܠܐ ܕܐܠܗܐ ܠܐ ܥܕܟܝܠ ܐܬܒܢܝ ܗܘܐ

95. Esdras 3 5:53

    ܘܝܗܒܘ ܗܘܘ ܟܣܦܐ ܠܦܣ̈ܩܝ ܟܐܦ̈ܐ ܘܠܢܓܪ̈ܐ ܘܡܫܬܝܐ ܘܡܐܟ̈ܠܬܐ ܘܚܕܘܬܐ ܠܨܝܕܢܝ̈ܐ ܘܠܨܘܪ̈ܝܐ ܠܡܥܒܪܘ ܠܗܘܢ ܡܢ ܠܒܢܢ ܩܝ̈ܣܐ ܩܝܕܪܢܝܐ ܘܠܡܥܒܪܘ ܐܣ̈ܟܕܝܐ ܠܠܡܐܢܐ ܕܝܘܦܐ ܐܝܟ ܦܘܩܕܢܐ ܗܘ ܕܐܬܟܬܒ ܠܗܘܢ ܡܢ ܟܘܪܫ ܡܠܟܐ

96. Esdras 3 5:54

    ܒܫܢܬܐ ܬܪܝܢܝܬܐ ܟܕ ܐܬܐ ܠܗܝܟܠܐ ܕܐܠܗܐ ܠܐܘܪܝܫܠܡ ܒܝܪܚܐ ܬܪܝܢܐ ܫܪܝ ܙܘܪܒܒܝܠ ܗܘ ܕܫܠܐܬܝܠ ܘܝܫܘܥ ܗܘ ܕܝܘܙܕܩ ܘܐܚ̈ܐ ܕܝܠܗܘܢ ܘܟܗ̈ܢܐ ܘܠܘܝ̈ܐ ܘܟܠܗܘܢ ܗܢܘܢ ܕܐܬܘ ܡܢ ܫܒܝܬܐ ܕܐܘܪܝܫܠܡ

97. Esdras 3 5:55

    ܘܫܬܐܣܘ ܠܗܝܟܠܗ ܕܐܠܗܐ ܒܢܘܡܢܝܐ ܕܝܪܚܐ ܬܪܝܢܐ ܕܫܢܬܐ ܬܪܝܢܝܬܐ ܕܐܬܘ ܠܝܗܘܕ ܘܠܐܘܪܝܫܠܡ

98. Esdras 3 5:56

    ܘܐܩܝܡܘ ܠܠܘܝ̈ܐ ܡܢ ܒ̈ܢܝ ܥܣܪ̈ܝܢ ܫ̈ܢܝܐ ܥܠ ܥܒ̈ܕܐ ܕܡܪܝܐ ܘܩܡ ܝܫܘܥ ܘܒܢܝ̈ܐ ܘܐܚ̈ܐ ܕܝܠܗ ܘܙܡܘܝܠ ܗܘ ܐܚܐ ܘܒܢܝ̈ܐ ܕܝܫܘܥ ܥܡܕܐܒܘܢ ܘܒܢܝ̈ܐ ܕܝܗܘܕܐ ܘܐܠܝܕܥ ܥܡ ܒܢܝ̈ܐ ܘܐܚ̈ܐ ܕܝܠܗ ܟܠܗܘܢ ܠܘ̈ܝܐ ܐܟܚܕܐ ܪ̈ܕܦܝ ܥܒ̈ܕܐ ܕܥܒܕܝܢ ܒܥܒܕܐ ܒܒܝܬܗ ܕܡܪܝܐ ܘܒܢܘ ܒܢܘ̈ܝܐ ܠܗܝܟܠܗ ܕܡܪܝܐ

99. Esdras 3 5:57

    ܘܩܡܘ ܟܗ̈ܢܐ ܟܕ ܡܥܛܦܝܢ ܒܐܣ̈ܛܠܐ ܥܡ ܡܘܣܝܩ̈ܐ ܘܫܝܦܘܪ̈ܐ ܀ ܘܠܘܝ̈ܐ ܒܢܝ̈ܐ ܕܐܣܦ ܕܐܝܬ ܠܗܘܢ ܨܝ̈ܨܠܐ ܟܕ ܡܫܒܚܝܢ ܗܘܘ ܠܡܪܝܐ ܘܡܒܪܟܝܢ. ܐܝܟ ܕܘܝܕ ܡܠܟܐ ܕܐܝܣܪܝܠ

100. Esdras 3 5:58

     ܘܐܙܥܩܘ ܒܝܕ ܬܫܒ̈ܚܬܐ ܟܕ ܡܒܪܟܝܢ ܠܡܪܝܐ ܡܛܠ ܕܒܣܝܡܘܬܐ ܕܝܠܗ ܘܬܫܒܘܚܬܐ ܠܥܠܡܝܢ ܥܠ ܟܠܗ ܐܝܣܪܝܠ

← Previous · Next → — showing 101–200 of 407

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.