← All works

Peshitta Esdras 3

Peshitta (Syriac Old Testament) · 407 sections

1. Esdras 3 1:0

   ܬܘܒ ܡ̇ܩܦܝܢܢ ܟܬܒܐ ܩܕܡܝܐ ܕܥ̇ܙܪܐ. ܘܗܢܐ ܕܝܢ ܐܝܟ ܡܫܠܡܢܘܬܐ ܕܫ̈ܒܥ̣ܝܢ

2. Esdras 3 1:1

   ܘܥܒܕ ܝܘܫܝܐ ܠܦܨܚܐ ܒܐܘܪܝܫܠܡ ܠܡܪܝܐ ܕܝܠܗ ܘܕܒܚ ܠܦܨܚܐ ܐܪܒܥܣܪ̈ܐ ܕܝܪܚܐ ܩܕܡܝܐ

3. Esdras 3 1:2

   ܟܕ ܐܩܝܡ ܠܟܗ̈ܢܐ ܥܠ ܦܘܠܚܢ ܝܘ̈ܡܬܗܘܢ ܟܕ ܡܥܛܦܝܢ ܒܐܣ̈ܛܠܐ ܒܒܝܬܗ ܕܡܪܝܐ

4. Esdras 3 1:3

   ܘܐܡܪܘ ܠܠܘ̈ܝܐ ܟܗ̈ܢܐ ܓ̈ܒܪܐ ܕܐܝܣܪܝܠ. ܩܕܫܘ ܐܢܬܘܢ ܠܟܘܢ ܠܡܪܝܐ. ܒܣܝܡܐ ܕܩܐܒܘܬܐ ܩܕܝܫܬܐ ܕܡܪܝܐ. ܘܣܡܘ ܠܩܐܒܘܬܐ ܩܕܝܫܬܐ. ܒܒܝܬܐ ܗܘ ܕܒܢܐ ܫܘܠܘܡܘܢ. ܡܠܟܐ ܒܪܗ ܕܕܘܝܕ ܀

5. Esdras 3 1:4

   ܘܐܡܪ ܝܘܫܝܐ ܠܐ ܐܝܬ ܠܟܘܢ ܠܡܫܩܠܗ ܥܠ ܟܬܦ̈ܬܐ ܘܗܫܐ ܗܟܝܠ ܦܠܘܚܘ ܠܡܪܝܐ ܐܠܗܐ ܕܝܠܟܘܢ ܘܐܢܝܚܘ ܠܥܡܐ ܕܝܠܗ ܕܐܝܣܪܝܠ ܘܛܝܒܘ ܠܒܝܬܐ ܐܝܟ ܫܪ̈ܒܬܐ ܕܝܠܟܘܢ ܐܝܟ ܦܘܠܚܢ ܝܘ̈ܡܬܐ ܕܝܠܟܘܢ ܐܝܟ ܟܬܒܐ ܕܕܘܝܕ ܡܠܟܐ ܕܐܝܣܪܝܠ ܘܒܝܕ ܐܝܕܐ ܕܫܘܠܘܡܘܢ ܡܠܟܐ ܒܪܐ ܕܝܠܗ

6. Esdras 3 1:5

   ܘܩܘܡܘ ܒܝܬ ܩܘܕܫܐ ܐܝܟ ܦܘܠܓܐ ܕܒ̈ܬܐ ܕܫܪ̈ܒܬܐ ܕܝܠܟܘܢ ܕܠܘ̈ܝܐ ܗܢܘܢ ܕܡܢ ܩܕܝܡ ܕܐܚ̈ܐ ܕܝܠܟܘܢ ܒܢܝ̈ܐ ܕܐܝܣܪܝܠ ܘܡܢܬܐ ܕܒܝܬܐ ܕܫܪܒܬܐ ܕܠܘ̈ܝܐ ܒܛܟܣܐ

7. Esdras 3 1:6

   ܘܬܕܒܚܘܢ ܦܨܚܐ ܐܝܟ ܕܒ̈ܚܐ ܛܝܒܘ ܠܐܚ̈ܐ ܕܝܠܟܘܢ ܘܥܒܕܘ ܦܨܚܐ ܐܝܟ ܦܘܩܕܢܐ ܕܡܪܝܐ ܗܘ ܕܐܬܝܗܒ ܠܡܘܫܐ

8. Esdras 3 1:7

   ܘܪܫܝ ܝܘܫܝܐ ܠܥܡܐ ܗܘ ܕܐܫܬܟܚ. ܥܪ̈ܒܐ ܘܐܡܪ̈ܐ ܘܡܢ ܒܢܝ̈ܐ ܕܥ̈ܙܐ ܠܦܨܚܐ̣. ܬܠܬܝܢ ܐܠܦ̈ܝܐ. ܬܘܪ̈ܐ ܬܠܬܐ ܐܠܦ̈ܝܐ. ܘܐܬܝܗܒܘ ܡܪ̈ܗܛܐ ܗܠܝܢ ܡܢ ܕܡܠܟܐ. ܘܪܝܫܢܐ ܕܝܠܗ ܪܫܝܘ ܠܥܡܐ̣. ܘܠܟܗ̈ܢܐ ܘܠܠܘ̈ܝܐ ܀

9. Esdras 3 1:8

   ܝܗܒܘ ܚܠܩܝܐ ܘܙܟܪܝܐ ܘܚܙܐܝܠ ܪ̈ܝܫܢܐ ܕܒܝܬܐ ܕܐܠܗܐ ܠܟ̈ܗܢܐ ܘܝܗܒܘ ܠܦܨܚܐ ܥܪ̈ܒܐ ܘܐܡܪ̈ܐ ܘܓ̈ܕܝܐ ܬܪ̈ܝܢ ܐܠܦ̈ܝܐ ܘܫܬܡܐܐ ܘܬܘܪ̈ܐ ܬܠܬܡܐܐ

10. Esdras 3 1:9

    ܘܒܢܝܐ ܘܫܡܥܝܐ ܘܢܬܢܝܐܝܠ ܐܚܘܗܝ ܘܚܫܟܝܐ ܘܐܚܝܐܝܠ ܘܝܘܙܒܪ ܪ̈ܝܫܢܐ ܕܠܘ̈ܝܐ ܪܫܝܘ ܠܠܘ̈ܝܐ ܠܦܨܚܐ ܥܪ̈ܒܐ ܐܠܦܐ ܬܘܪ̈ܐ ܫܒܥܡܐܐ

11. Esdras 3 1:10

    ܘܟܕ ܗܠܝܢ ܗܘܝ ܫܦܝܪ̣. ܦܐܝܬ ܩܡܘ ܟܗ̈ܢܐ ܘܠܘ̈ܝܐ̣. ܟܕ ܐܝܬ ܠܗܘܢ ܦܛܝܪ̈ܐ. ܐܝܟ ܫܪ̈ܒܬܐ ܘܐܝܟ ܪܝܫܢܘܬ ܡܢܘ̈ܬܐ ܕܐܒܗ̈ܬܐ ܩܕܡ ܥܡܐ ܠܡܩܪܒܘ ܠܡܪܝܐ ܐܝܟ ܗܠܝܢ ܕܟܬܝܒ̈ܢ ܒܟܬܒܐ ܕܡܘܫܐ. ܘܗܟܢܐ ܒܨܦܪܐ ܀

12. Esdras 3 1:11

    ܘܛܘܝܘܗܝ ܠܦܨܚܐ ܒܢܘܪܐ ܐܝܟ ܕܙܕܩ ܗܘܐ ܘܠܕܒ̈ܚܐ ܒܫܠܘ ܒܩܪ̈ܕܠܐ ܘܒܩ̈ܕܣܐ ܥܡ ܒܣܝܡܘܬ ܪܝܚܐ ܘܐܘܒܠܘ ܠܟܠܗܘܢ ܒܢܝ̈ܐ ܕܥܡܐ

13. Esdras 3 1:12

    ܒܬܪ ܕܝܢ ܗܠܝܢ ܛܝܒܘ ܘܗܢܘܢ ܠܗܘܢ ܘܠܟܗ̈ܢܐ ܐܚ̈ܐ ܕܝܠܗܘܢ ܒܢܝ̈ܐ ܕܐܗܪܘܢ

14. Esdras 3 1:13

    ܟܗ̈ܢܐ ܓܝܪ ܡܣܩܝܢ ܗܘܘ ܠܬܪܒܐ ܥܕܡܐ ܠܠܠܝܐ ܘܠܘ̈ܝܐ ܛܝܒܘ ܗܢܘܢ ܠܗܘܢ ܘܠܟ̈ܗܢܐ ܐܚ̈ܐ ܕܝܠܗܘܢ ܒܢܝ̈ܐ ܕܐܗܪܘܢ

15. Esdras 3 1:14

    ܘܡܙܡܪ̈ܢܐ ܟܗ̈ܢܐ ܒܢܝ̈ ܐܣܦ ܐܝܬܝܗܘܢ ܗܘܘ ܥܠ ܛܟܣܐ ܕܝܠܗܘܢ ܐܝܟ ܗܠܝܢ ܕܡܢ ܕܘܝܕ ܡܛܟܣܝܢ ܘܐܣܦ ܘܙܟܪܝܐ ܘܐܝܕܝܢܘܣ ܗܢܘܢ ܕܡܢ ܒܝܬ ܡܠܟܐ

16. Esdras 3 1:15

    ܘܬܪ̈ܥܐ ܥܠ ܟܠܚܕ ܡܢ ܒܝܬ ܬܪ̈ܥܐ ܠܐ ܐܝܬ ܗܘܐ ܕܢܥܒܪ ܟܠܚܕ ܡܢ ܦܘܠܚܢ ܝܘ̈ܡܬܐ ܕܝܠܗ ܗܢܘܢ ܓܝܪ ܐܚ̈ܐ ܕܝܠܗܘܢ ܠܘ̈ܝܐ ܛܝܒܘ ܠܗܘܢ

17. Esdras 3 1:16

    ܘܐܫܬܡܠܝܝܢ ܗܠܝܢ ܕܕܒܚܬܗ ܕܡܪܝܐ ܒܗܘ ܝܘܡܐ ܠܡܗܘܐ ܦܨܚܐ ܘܠܡܬܩܪܒܘ ܕܒ̈ܚܐ ܩܕܡ ܡܕܒܚܗ ܕܡܪܝܐ ܐܝܟ ܐܦܝܛܓܐ ܕܡܠܟܐ ܝܘܫܝܐ

18. Esdras 3 1:17

    ܘܥܒܕܘ ܒ̈ܢܝܐ ܕܐܝܣܪܝܠ ܗܢܘܢ ܕܐܫܬܟܚܘ ܒܙܒܢܐ ܗܢܐ ܠܦܨܚܐ ܘܠܥܐܕܐ ܕܦܛܝܪ̈ܐ ܝܘ̈ܡܬܐ ܫܒܥܐ

19. Esdras 3 1:18

    ܘܠܐ ܗܘܐ ܦܨܚܐ ܕܐܝܟ ܗܢܐ ܒܐܝܣܪܝܠ ܡܢ ܝܘ̈ܡܬܐ ܕܙܒܢܐ ܕܫܡܘܐܝܠ ܢܒܝܐ

20. Esdras 3 1:19

    ܘܟܠܗܘܢ ܡ̈ܠܟܐ ܕܐܝܣܪܝܠ ܠܐ ܥܒܕܘ ܦܨܚܐ ܕܐܝܟ ܗܢܐ ܕܥܒܕ ܝܘܫܝܐ ܘܟܗ̈ܢܐ ܘܠܘ̈ܝܐ ܘܝܘ̈ܕܝܐ ܘܟܠܗ ܐܝܣܪܝܠ ܗܘ ܕܐܫܬܟܚ ܒܝܬ ܡܠܟܘܬܐ ܕܝܠܗܘܢ ܒܐܘܪܝܫܠܡ

21. Esdras 3 1:20

    ܒܫܢܬܐ ܕܬܡܢܥܣܪ̈ܐ ܟܕ ܡܡܠܟ ܗܘܐ ܝܘܫܝܐ ܗܘܐ ܦܨܚܐ ܗܢܐ

22. Esdras 3 1:21

    ܘܐܬܬܪܨܘ ܥܒ̈ܕܐ ܕܝܘܫܝܐ ܩܕܡ ܡܪܝܐ ܕܝܠܗ ܒܠܒܐ ܡܠܝܐ ܕܫܦܝܪܘܬ ܕܚܠܬܐ

23. Esdras 3 1:22

    ܘܗܠܝܢ ܕܥܠܘܗܝ ܕܝܢ ܟܬܝܒ̈ܢ ܒܙܒ̈ܢܐ ܕܡܢ ܩܕܝܡ ܡܛܠ ܗܢܘܢ ܕܚܛܘ ܘܐܪܫܥܘ ܒܡܪܝܐ ܘܝܬܝܪ ܡܢ ܟܠ ܥܡܐ ܘܡܠܟܘܬܐ ܘܗܠܝܢ ܕܐܥܝܩܘܗܝ ܒܡܪܓܫܢܘܬܐ ܘܡ̈ܠܐ ܕܡܪܝܐ ܩܡܝܢ ܥܠ ܐܝܣܪܝܠ

24. Esdras 3 1:23

    ܘܒܬܪ ܟܠܗ ܥܒܝܕܬܐ ܗܕܐ ܕܝܘܫܝܐ ܓܕܫܬ ܠܦܪܥܘܢ ܡܠܟܐ ܕܡܨܪܝܢ ܕܟܕ ܐܬܐ ܩܪܒܐ ܢܩܝܡ ܒܟܪܟܡܘܫ ܥܠ ܦܪܬ ܘܢܦܩ ܠܐܘܪܥܐ ܕܝܠܗ ܝܘܫܝܐ

25. Esdras 3 1:24

    ܘܫܕܪ ܡܠܟܐ ܕܡܨܪܝܢ ܠܘܬܗ ܟܕ ܐܡܪ ܡܢܐ ܠܝ ܘܠܟ ܡܠܟܐ ܕܝܗܘܕ

26. Esdras 3 1:25

    ܠܘ ܠܘܬܟ ܡܫܕܪ ܐܢܐ ܡܢ ܡܪܝܐ ܐܠܗܐ ܥܠ ܓܝܪ ܦܪܬ ܩܪܒܐ ܠܝ ܐܝܬܘܗܝ ܘܗܫܐ ܡܪܝܐ ܥܡܝ ܐܝܬܘܗܝ ܐܪܚܩ ܘܠܐ ܬܗܘܐ ܣܩܘܒܠܐ ܠܡܪܝܐ

27. Esdras 3 1:26

    ܘܠܐ ܐܗܦܟ ܗܘ ܠܗ ܝܘܫܝܐ ܥܠ ܡܪܟܒܬܐ ܕܝܠܗ ܐܠܐ ܠܡܩܪܒܘ ܠܩܘܒܠܗ ܒ̇ܥܐ ܗܘܐ ܟܕ ܠܐ ܢܛܪ ܗܘܐ ܒܡ̈ܠܐ ܕܐܪܡܝܐ ܢܒܝܐ ܕܡܢ ܦܘܡܗ ܕܡܪܝܐ

28. Esdras 3 1:27

    ܐܠܐ ܐܩܝܡ ܠܘܬܗ ܩܪܒܐ ܒܦܩܥܬܐ ܕܡܓܕܘ ܘܢܚܬܘ ܪ̈ܝܫܢܐ ܠܘܬ ܡܠܟܐ ܝܘܫܝܐ

29. Esdras 3 1:28

    ܘܐܡܪ ܡܠܟܐ ܠܥܒ̈ܕܐ ܕܝܠܗ ܐܪܚܩܘܢܢܝ ܡܢ ܬܟܬܘܫܐ ܐܬܡܚܠܬ ܓܝܪ ܣܓܝ ܘܡܚܕܐ ܐܪܚܩܘܗܝ ܥܒ̈ܕܐ ܕܝܠܗ ܡܢ ܣܕܝܪܘܬ ܩܪܒܐ

30. Esdras 3 1:29

    ܘܣܠܩ ܥܠ ܡܪܟܒܬܐ ܬܪܝܢܝܬܐ ܕܝܠܗ. ܘܟܕ ܐܬܬ̇ܦܢܝ ܠܐܘܪܝܫܠܡ̣. ܚܠܦ ܠܚܝ̈ܐ ܕܝܠܗ. ܘܐܬܩܒܪ ܒܩܒܪܐ ܐܒܗܝܐ.

31. Esdras 3 1:30

    ܘܒܟܠܗ ܝܗܘܕ ܐܬܐܒܠ ܠܝܘܫܝܐ ܘܐܠܐ ܐܪܡܝܐ ܢܒܝܐ ܚܠܦ ܝܘܫܝܐ ܘܐܝܠܝܢ ܕܩܕܡܝܢ ܝܬܒܝܢ ܥܡ ܢܫ̈ܝܗܘܢ ܐܠܝܢ ܗܘܘ ܠܗ ܥܕܡܐ ܠܝܘܡܐ ܗܢܐ ܘܐܬܝܗܒܬ ܗܕܐ ܠܡܗܘܐ ܐܡܝܢܐܝܬ ܒܟܠܗ ܓܢܣܐ ܕܐܝܣܪܝܠ

32. Esdras 3 1:31

    ܗܠܝܢ ܕܝܢ ܟܬܝܒ̈ܢ ܒܟܬܒܐ ܕܬܫ̈ܥܝܬܐ ܕܡ̈ܠܟܐ ܕܝܗܘܕ ܘܟܠ ܚܕܐ ܚܕܐ ܕܐܣܬܥܪܬ ܕܥܒܝܕܬܐ ܕܝܘܫܝܐ ܘܕܬܫܒܘܚܬܐ ܕܝܠܗ ܘܕܣܟܘܠܬܢܘܬܐ ܕܒܢܡܘܣܗ ܕܡܪܝܐ ܘܗܠܝܢ ܕܩܕܡ̈ܝ ܐܣܬܥܪ̈ܝܢ ܡܢܗ ܘܗܠܝܢ ܕܗܫܐ ܪ̈ܫܝܡܢ ܒܟܬܒܐ ܕܡ̈ܠܟܐ ܕܝܣܪܝܠ ܘܕܝܗܘܕܐ

33. Esdras 3 1:32

    ܘܟܕ ܢܣܒܘ ܗܢܘܢ ܕܡܢ ܥܡܐ ܠܝܗܘܐܚܙ ܒܪܗ ܕܝܘܫܝܐ ܚܘܝܘܗܝ ܡܠܟܐ ܚܠܦ ܝܘܫܝܐ ܐܒܐ ܕܝܠܗ ܟܕ ܐܝܬܘܗܝ ܗܘܐ ܒܪ ܫܢܝ̈ܐ ܥܣܪ̈ܝܢ ܘܬܠܬ

34. Esdras 3 1:33

    ܘܐܡܠܟ ܒܐܝܣܪܝܠ ܘܒܐܘܪܝܫܠܡ ܝܪ̈ܚܐ ܬܠܬܐ ܘܐܗܦܟܗ ܡܠܟܐ ܕܡܨܪܝܢ ܡܢ ܕܠܡܡܠܟܘ ܒܐܘܪܝܫܠܡ

35. Esdras 3 1:34

    ܘܚܣܪܗ ܠܥܡܐ ܟܟܪ̈ܐ ܕܣܐܡܐ ܡܐܐ ܘܕܕܗܒܐ ܟܟܪܐ ܚܕܐ

36. Esdras 3 1:35

    ܘܚܘܝ ܡܠܟܐ ܕܡܨܪܝܢ ܡܠܟܐ ܠܝܘܝܩܝܡ ܐܚܐ ܕܝܠܗ ܡܠܟܐ ܕܝܗܘܕ ܘܕܐܘܪܝܫܠܡ

37. Esdras 3 1:36

    ܘܐܣܪ ܝܘܝܩܝܡ ܠܪ̈ܘܪܒܢܐ ܠܙܗܪܝܘܢ ܕܝܢ ܐܚܐ ܕܝܠܗ ܟܕ ܐܚܝܕ ܐܣܩܗ ܡܢ ܡܨܪܝܢ

38. Esdras 3 1:37

    ܒܪ ܫܢܝ̈ܐ ܕܝܢ ܐܝܬܘܗܝ ܗܘܐ ܥܣܪ̈ܝܢ ܘܚܡܫ ܝܘܝܩܝܡ ܟܕ ܐܡܠܟ ܒܝܗܘܕ ܒܐܘܪܝܫܠܡ ܘܥܒܕ ܗܝ ܕܒܝܫܐ ܩܕܡ ܡܪܝܐ

39. Esdras 3 1:38

    ܒܬܪ ܟܢ ܣܠܩ ܢܒܘܟܕܢܨܪ ܡܠܟܐ ܕܒܒܝܠ ܘܐܣܪܗ ܒܐܣܘܪܐ ܕܢܚܫܐ ܘܐܘܒܠܗ ܠܒܒܝܠ

40. Esdras 3 1:39

    ܘܡܢ ܡܐܢ̈ܐ ܟܗ̈ܢܝܐ ܕܡܪܝܐ ܟܕ ܢܣܒ ܢܒܘܟܕܢܨܪ ܐܘܒܠ ܣܡ ܒܗܝܟܠܐ ܕܝܠܗ ܒܒܒܝܠ

41. Esdras 3 1:40

    ܗܠܝܢ ܕܝܢ ܕܐܬܪܫܡܝܢ ܡܛܠܬܗ ܘܡܛܠ ܛܡܘܐܬܐ ܕܝܠܗ ܘܒܝܫܘܬ ܪܘܫܥܗ ܟܬܝܒ̈ܢ ܒܟܬܒܐ ܕܙܒ̈ܢܐ ܕܡ̈ܠܟܐ

42. Esdras 3 1:41

    ܘܐܡܠܟ ܚܠܦܘܗܝ ܝܘܝܩܝܡ ܒܪܐ ܕܝܠܗ ܟܕ ܓܝܪ ܐܬܚܘܝ ܐܝܬܘܗܝ ܗܘܐ ܒܪ ܫܢܝ̈ܐ ܬܡ̈ܢܐ

43. Esdras 3 1:42

    ܡܡܠܟ ܕܝܢ ܝܪ̈ܚܐ ܬܠܬܐ ܘܝܘ̈ܡܬܐ ܥܣܪ̈ܐ ܒܐܘܪܝܫܠܡ ܥܒܕ ܗܝ ܕܒܝܫ ܩܕܡ ܡܪܝܐ

44. Esdras 3 1:43

    ܘܒܬܪ ܫܢܬܐ ܫܕܪ ܢܒܘܟܕܢܨܪ ܐܥܒܪܗ ܠܒܒܝܠ ܥܡ ܡܐܢ̈ܐ ܟܗ̈ܢܝܐ ܕܡܪܝܐ

45. Esdras 3 1:44

    ܘܚܘܝܗ ܠܨܕܩܝܐ ܡܠܟܐ ܕܝܗܘܕ ܘܕܐܘܪܝܫܠܡ ܟܕ ܐܝܬܘܗܝ ܗܘܐ ܒܪ ܫܢܝ̈ܐ ܥܣܪ̈ܝܢ ܘܚܕܐ ܡ̇ܡܠܟ ܕܝܢ ܫ̈ܢܝܐ ܚܕ ܥܣܪ̈ܐ

46. Esdras 3 1:45

    ܘܥܒܕ ܗܝ ܕܒܝܫܐ ܩܕܡ ܡܪܝܐ ܘܠܐ ܐܬܟܚܕ ܡܢ ܡ̈ܠܐ ܗܠܝܢ ܕܐܬܐܡܪ̈ܝܢ ܡܢ ܐܪܡܝܐ ܗܘ ܢܒܝܐ ܡܢ ܦܘܡܗ ܕܡܪܝܐ

47. Esdras 3 1:46

    ܘܟܕ ܐܬܬܘܡܝ ܡܢ ܢܒܘܟܕܢܨܪ ܒܫܡܗ ܕܡܪܝܐ ܟܕ ܕܓܠ ܒܡ̈ܘܡܬܗ ܐܪܚܩ ܘܟܕ ܩܫܝ ܠܩܕܠܐ ܘܠܠܒܐ ܕܝܠܗ ܥܒܪ ܥܠ ܢܡܘ̈ܣܝܘܬܐ ܕܡܪܝܐ ܐܠܗܐ ܕܐܝܣܪܝܠ

48. Esdras 3 1:47

    ܘܪ̈ܝܫܢܐ ܕܝܢ ܕܥܡܐ ܘܕܟܗ̈ܢܐ ܣ̈ܓܝܐܬܐ ܐܪܫܥܘ ܘܐܥܘܠܘ ܝܬܝܪ ܡܢ ܟܠܗܝܢ ܛܢܦ̈ܘܬܐ ܕܟܠܗܘܢ ܥܡ̈ܡܐ ܘܣܝܒܘ ܠܗܝܟܠܗ ܕܡܪܝܐ ܗܘ ܕܐܬܩܕܫ ܒܐܘܪܝܫܠܡ

49. Esdras 3 1:48

    ܘܫܕܪ ܐܠܗܐ ܕܐܒ̈ܗܐ ܕܝܠܗܘܢ ܒܝܕ ܡܠܐܟܐ ܕܝܠܗ ܠܡܦܢܝܘ ܐܢܘܢ ܒܗܝ ܕܚܐܣ ܗܘܐ ܥܠܝܗܘܢ ܘܥܠ ܡܫܟܢܐ ܕܝܠܗ

50. Esdras 3 1:49

    ܘܗܢܘܢ ܕܝܢ ܡܝܩܘ ܒܡܠܐܟܐ ܕܝܠܗ ܘܒܝܘܡܐ ܗܘ ܕܡܠܠ ܡܪܝܐ ܐܝܬܝܗܘܢ ܗܘܘ ܕܡܓܚܟܝܢ ܒܢ̈ܒܝܐ ܕܝܠܗ ܥܕܡܐ ܕܟܕ ܐܬܚܡܬ ܥܠ ܥܡܐ ܕܝܠܗ ܡܛܠ ܒܝܫܘܬ ܪܘܫܥܗ ܦܩܕ ܠܡܣܩܘ ܥܠܝܗܘܢ ܠܡ̈ܠܟܐ ܕܟ̈ܠܕܝܐ

51. Esdras 3 1:50

    ܗܢܘܢ ܩܛܠܘ ܠܝܢܣ̈ܩܐ ܕܝܠܗܘܢ ܒܣܝܦܐ ܘܒܚ̈ܘܕܪܐ ܕܗܝܟܠܐ ܩܕܝܫܐ ܕܝܠܗ ܘܠܐ ܚܣ ܥܠ ܝܢܣܩܐ ܘܒܬܘܠܬܐ ܘܩܫܝܫܐ ܘܛܠܝܐ ܐܠܐ ܟܠܗܘܢ ܐܫܠܡ ܒܐܝ̈ܕܝܐ ܕܝܠܗܘܢ

52. Esdras 3 1:51

    ܘܠܟܠܗܘܢ ܡ̈ܐܢܐ ܟܗ̈ܢܝܐ ܕܡܪܝܐ ܠܪ̈ܘܪܒܐ ܘܠܙܥܘܪ̈ܐ ܘܠܩܐܒܘܬܗ ܕܡܪܝܐ ܘܠܐܦܘ̈ܕܝܩܣ ܡܠܟ̈ܝܬܐ ܟܕ ܢܣܒܘ ܘܐܘܒܠܘ ܠܒܒܝܠ

53. Esdras 3 1:52

    ܘܐܘܩܕܘ ܠܒܝܬܗ ܕܡܪܝܐ ܘܫܪܘ ܠܫܘܪ̈ܝܗ ܕܐܘܪܝܫܠܡ ܘܠܦܘܪ̈ܩܣܐ ܕܝܠܗ ܐܘܩܕܘ ܒܢܘܪܐ

54. Esdras 3 1:53

    ܘܓܡܪܘ ܠܟܠܗܝܢ ܡܫܒ̈ܚܬܐ ܕܝܠܗ ܠܡܣܪܚܘ ܘܠܗܠܝܢ ܕܫܪܟܐ ܐܘܒܠܘ ܥܡ ܣܝܦܐ ܠܒܒܝܠ

55. Esdras 3 1:54

    ܘܐܝܬܝܗܘܢ ܗܘܘ ܥܒ̈ܕܐ ܠܗ ܘܠܒ̈ܢܝܐ ܕܝܠܗ ܥܕܡܐ ܕܐܡܠܟܘ ܦܪ̈ܣܝܐ ܠܫܘܡܠܝܐ ܕܡܠܬܗ ܕܡܪܝܐ ܕܐܪܡܝܐ

56. Esdras 3 1:55

    ܥܕܡܐ ܕܬܨܛܒܐ ܐܪܥܐ ܒܫܒ̈ܐ ܕܝܠܗ ܟܠܗ ܙܒܢܐ ܕܨܕܝܘܬܐ ܕܝܠܗ ܬܫܒܬ ܠܫܘܡܠܝܐ ܕܫܢܝ̈ܐ ܫܒܥܝܢ

57. Esdras 3 2:1

    ܟܕ ܡܡܠܟ ܗܘܐ ܟܘܪܫ ܡܠܟܐ ܕܦܪ̈ܣܝܐ ܒܫܢܬܐ ܩܕܡܝܬܐ ܠܫܘܡܠܝܐ ܕܡܠܬܗ ܕܡܪܝܐ ܕܒܦܘܡܗ ܕܐܪܡܝܐ

58. Esdras 3 2:2

    ܐܥܝܪ ܡܪܝܐ ܠܪܘܚܗ ܕܟܘܪܫ ܡܠܟܐ ܕܦܪ̈ܣܝܐ ܘܐܟܪܙ ܒܟܠܗ ܡܠܟܘܬܐ ܕܝܠܗ ܘܐܟܚܕܐ ܒܝܕ ܟܬܝܒ̈ܬܐ ܟܕ ܐܡܪ

59. Esdras 3 2:3

    ܗܠܝܢ ܐܡܪ ܡܠܟܐ ܕܦܪ̈ܣܝܐ ܟܘܪܫ ܠܝ ܚܘܝ ܡܠܟܐ ܕܡܬܥܡܪܢܝܬܐ ܡܪܝܐ ܕܐܝܣܪܝܠ ܡܪܝܐ ܡܪܝܡܐ

60. Esdras 3 2:4

    ܘܫܘܕܥ ܠܝ ܠܡܒܢܐ ܠܗ ܒܝܬܐ ܒܐܘܪܝܫܠܡ ܗܝ ܕܒܝܗܘܕ

61. Esdras 3 2:5

    ܡܢܘ ܗܟܝܠ ܕܐܝܬܘܗܝ ܡܢ ܥܡܐ ܕܝܠܟܘܢ. ܢܗܘܐ ܡܪܝܐ ܕܝܠܗ ܥܡܗ. ܘܟܕ ܣܠܩ ܠܐܘܪܝܫܠܡ ܗܝ ܕܒܝܗܘܕ. ܢܒܢܐ ܠܒܝܬ ܕܡܪܝܐ ܕܐܝܣܪܝܠ. ܗܢܐ ܡܪܝܐ ܗܢܐ ܕܫܪܐ ܒܐܘܪܝܫܠܡ ܀

62. Esdras 3 2:6

    ܟܠܗܘܢ ܗܟܝܠ ܗܢܘܢ ܕܒܟܠܕܘܟ ܥܡܪܝܢ ܢܥܕܪܘܢܝܗܝ ܗܢܘܢ ܕܒܕܘܟܬܐ ܕܝܠܗ ܒܕܗܒܐ ܘܒܣܐܡܐ ܒܡܘܗ̈ܒܬܐ ܥܡ ܪ̈ܟܫܐ ܘܒܥܝܪܐ ܥܡ ܐܚܪ̈ܢܝܬܐ ܕܒܢܕܪ̈ܐ ܡܘܣܦܢ ܒܗܝܟܠܗ ܕܡܪܝܐ ܗܘ ܕܒܐܘܪܫܠܡ

63. Esdras 3 2:7

    ܘܩܡܘ ܪ̈ܝܫܝ ܫܒܛܐ ܕܫܪܒܬܐ ܕܝܗܘܕ ܘܕܫܒܛܐ ܕܒܢܝܡܢ ܘܟܗ̈ܢܐ ܘܠܘ̈ܝܐ ܘܟܠܗܘܢ ܗܢܘܢ ܕܐܩܝܡ ܡܪܝܐ ܠܪܘܚܗܘܢ ܠܡܣܩ ܘܠܡܒܢܐ ܒܝܬܐ ܠܡܪܝܐ ܠܗܘ ܕܒܐܘܪܝܫܠܡ

64. Esdras 3 2:8

    ܘܗܢܘܢ ܕܒܚܘܕܪܐ ܕܝܠܗܘܢ ܥܕܪܘ ܒܟܠܗܝܢ ܒܣܐܡܐ ܘܒܕܗܒܐ ܘܒܪ̈ܟܫܐ ܘܒܒܥܝܪܐ ܘܒܢܕܪ̈ܐ ܣ̈ܓܝܐܐ ܕܣ̈ܓܝܐܐ ܕܗܢܘܢ ܕܗܘܢܗܘܢ ܩܡ

65. Esdras 3 2:9

    ܘܡܠܟܐ ܟܘܪܫ ܐܦܩ ܠܡ̈ܐܢܐ ܩܕܝܫ̈ܐ ܕܡܪܝܐ ܗܠܝܢ ܕܐܥܒܪ ܗܘܐ ܢܒܘܟܕܢܨܪ ܡܢ ܐܘܪܝܫܠܡ ܘܣܡ ܗܘܐ ܐܢܘܢ ܒܝܬ ܦܬܟܪ̈ܐ ܕܝܠܗ ܕܦܪ̈ܣܝܐ

66. Esdras 3 2:10

    ܘܐܫܠܡ ܐܢܘܢ ܠܡܝܬܪܝܕܐܛܐ ܢܛܪ ܓܙܐ ܕܝܠܗ

67. Esdras 3 2:11

    ܒܝܕ ܕܝܢ ܗܢܐ ܐܬܬܫܠܡܘ ܗܘܘ ܠܫܠܡܢܥܣܪ ܩܝܘܡܐ ܕܝܗܘܕ

68. Esdras 3 2:12

    ܡܢܝܢܐ ܕܝܢ ܕܗܠܝܢ ܐܝܬܘܗܝ ܗܘܐ ܡܢܝܩ̈ܝܢܝܬܐ ܕܕܗܒܐ ܐܠܦܐ ܘܦ̈ܝܢܟܐ ܕܣܐܡܐ ܥܣܪ̈ܝܢ ܘܬܫܥܐ ܘܦܝ̈ܠܝܐ ܕܕܗܒܐ ܬܠܬܝܢ ܘܕܣܐܡܐ ܬܪ̈ܝܢ ܐܠܦܝܐ ܘܐܪܒܥܡܐܐ ܘܥܣܪ ܘܐܚܪ̈ܢܐ ܡܐܢ̈ܐ ܐܠܦ̈ܐ

69. Esdras 3 2:13

    ܟܠܗܘܢ ܕܝܢ ܡ̈ܐܢܐ ܕܐܬܢܣܒܘ. ܕܕܗܒܐ ܘܕܣܐܡܐ. ܚܡ̈ܫܐ ܐܠܦܝܐ ܘܐܪܒܥܡܐܐ ܘܐܫܬܝܢ ܘܬܫܥܐ ܀

70. Esdras 3 2:14

    ܣܠܩ ܕܝܢ ܡܢ ܫܠܡܢܥܣܪ ܥܡ ܫܒܝܬܐ ܡܢ ܒܒܝܠ ܠܐܘܪܝܫܠܡ

71. Esdras 3 2:15

    ܒܙܒܢܐ ܕܝܢ ܕܐܪܛܚܫܫܬ ܡܠܟܐ ܕܦܪ̈ܣܝܐ ܟܬܒ ܥܠܝܗܘܢ ܥܠ ܗܢܘܢ ܕܥܡܪܝܢ ܗܘܘ ܒܝܗܘܕ ܘܒܐܘܪܝܫܠܡ ܒܠܥܝܡ ܘܡܝܬܪܝܢܛܝܣ ܘܛܘܠܝܐܘܣ ܘܪܬܡܘܣ ܘܒܐܠܛܬܡܘܣ ܘܣܡܐܠܘܣ ܗܘ ܣܦܪܐ ܘܕܫܪܟܐ ܗܢܘܢ ܕܥܡ ܗܠܝܢ ܡܬܚܫܒܝܢ ܥܡܪܝܢ ܕܝܢ ܒܫܡܪܝܢ ܘܒܐܚܪ̈ܢܝܬܐ ܕܘ̈ܟܝܬܐ ܠܐܓܪܬܐ ܗܕܐ ܕܒܬܪܟܢ ܟܬܝܒܐ

72. Esdras 3 2:16

    ܠܡܠܟܐ ܐܪܛܚܫܫܬ ܡܪܢ ܥܒ̈ܕܐ ܕܝܠܟ ܪܐܬܡܘܣ ܗܘ ܕܗܠܝܢ ܕܓܕܫ̈ܢ ܘܣܡܐܠܘܣ ܗܘ ܣܦܪܐ ܘܗܢܘܢ ܕܫܪܟܐ ܕܒܘܠܐ ܕܝܠܗܘܢ ܘܕܝܢ̈ܐ ܗܢܘܢ ܕܒܣܘܪܝܐ ܥܡܝܩܬܐ ܘܒܦܘܢܝܩܐ

73. Esdras 3 2:17

    ܘܗܫܐ ܝܕܝܥܬܐ ܬܗܘܐ ܠܡܪܢ ܡܠܟܐ ܡܛܠ ܕܝ̈ܘܕܝܐ ܗܢܘܢ ܕܣܠܩܘ ܡܢ ܠܘܬܟܘܢ ܟܕ ܠܘܬܢ ܐܬܘ ܠܐܘܪܝܫܠܡ ܠܡܕܝܢܬܐ ܗܝ ܡܪܚܩܢܝܬܐ ܘܒܝܫܬܐ ܒܢܝܢ ܘܠܫܘܩ̈ܐ ܕܝܠܗ ܘܠܫܘܪ̈ܐ ܡܐܣܝܢ ܘܗܝܟܠܐ ܕܝܬܝܪ ܡܥܠܝ ܡܫܬܐܣܝܢ

74. Esdras 3 2:18

    ܐܢ ܗܟܝܠ ܡܕܝܢܬܐ ܗܕܐ ܬܬܒܢܐ ܘܫܘܪ̈ܐ ܢܫܬܡܠܘܢ ܡܕܐܬܐ ܠܐ ܡܣܝܒܪܝܢ ܠܡܬܠ ܐܠܐ ܠܘܩܒܠ ܡ̈ܠܟܐ ܩܝܡܝܢ ܘܡܛܠ ܕܡܬܬܥܒ̈ܕܢ ܗܠܝܢ ܕܥܠ ܗܝܟܠܐ ܕܫܦܝܪܐܝܬ ܠܗ ܡܣܒܪܝܢܢ ܕܠܐ ܢܬܬܗܡܐ ܒܕܐܝܟ ܗܕܐ ܐܠܐ ܠܡܐܡܪ ܠܘܬ ܡܪܢ ܡܠܟܐ ܐܝܟܢܐ ܕܐܢ ܡܬܚܙܐ ܠܟ ܢܣܬܥܪ ܒܟܬܒ̈ܐ ܗܠܝܢ ܕܡܢ ܐܒܗ̈ܐ ܕܝܠܟ

75. Esdras 3 2:19

    ܘܬܫܟܚ ܒܝܬ ܥܘܗ̈ܕܢܐ ܐܝܠܝܢ ܕܟܬܝܒ̈ܢ ܡܛܠܗܕܐ ܘܬܕܥ ܕܡܕܝܢܬܐ ܗܝ ܐܝܬܝܗ ܗܘܬ ܡܪܚܩܢܝܬܐ ܘܠܡ̈ܠܟܐ ܘܠܡܕܝ̈ܢܬܐ ܡܠܙܐ ܗܘܬ ܘܝܘ̈ܕܝܐ ܡܪ̈ܚܩܢܐ ܘܡܢ ܚܒܝܫܘܬ ܩܪܒܐ ܟܕ ܩܦܝܣܝܢ ܒܗ ܬܘܒ ܡܢ ܥܠܡ ܕܡܛܠܬܗ ܕܥܠܬܐ ܡܕܝܢܬܐ ܗܕܐ ܚܪܒܬ

76. Esdras 3 2:20

    ܗܫܐ ܗܟܝܠ ܡܚܘܝܢ ܠܟ ܡܪܢ ܡܠܟܐ ܡܛܠ ܕܐܢ ܡܕܝܢܬܐ ܗܕܐ ܬܬܒܢܐ ܘܕܗܕܐ ܫܘܪ̈ܐ ܢܩܘܡܘܢ ܡܚܬܬܐ ܠܟ ܠܐ ܬܘܒ ܗܘܝܐ ܠܣܘܪܝܐ ܥܡܝܩܬܐ ܘܠܦܘܢܝܩܐ

77. Esdras 3 2:21

    ܗܝܕܝܢ ܦܢܝ ܟܬܒ ܡܠܟܐ ܠܪܐܬܘܡܘܣ ܗܘ ܕܟܬܒ ܗܘܐ ܗܠܝܢ ܕܓܕܫ̈ܢ ܗܘܝ ܘܠܒܠܛܬܘܡܘܣ ܘܠܣܐܡܐܠܐܘܣ ܣܦܪܐ ܘܠܕܫܪܟܐ ܕܗܢܘܢ ܕܡܬܚܫܒܝܢ ܥܡܗܘܢ ܘܥܡܪܝܢ ܒܫܡܪܝܢ ܘܒܣܘܪܝܐ ܘܒܦܘܢܝܩܐ ܗܠܝܢ ܕܟܬܝܒ̈ܢ ܡܢ ܠܬܚܬ

78. Esdras 3 2:22

    ܩܪܝܬ ܐܓܪܬܐ ܗܝ ܕܫܕܪܬܘܢ ܠܘܬܝ ܦܩܕܬ ܗܟܝܠ ܠܡܣܥܪ ܘܐܫܟܚܬ ܕܐܝܬܝܗ ܡܕܝܢܬܐ ܗܝ ܡܢ ܥܠܡ ܕܕܠܩܘܒܠܐ ܕܡ̈ܠܟܐ ܣܥܪܐ

79. Esdras 3 2:23

    ܘܐܢܫܐ ܕܡܬܪ̈ܚܩܢܘܬܐ ܘܩܪ̈ܒܐ ܒܗ ܡܫܡܠܝܢ ܘܕܡ̈ܠܟܐ ܚܝ̈ܠܬܢܐ ܘܩܫܝ̈ܐ ܐܝܬ ܗܘܐ ܒܐܘܪܝܫܠܡ ܕܫܠܝܛܝܢ ܗܘܘ ܘܓܒܝܢ ܡܕܐܬܐ ܠܣܘܪܝܐ ܥܡܝܩܬܐ ܘܠܦܘܢܝܩܐ

80. Esdras 3 2:24

    ܗܫܐ ܗܟܝܠ ܦܩܕܬ ܠܡܟܠܐ ܠܐܢܫܐ ܗܢܘܢ ܡܢ ܕܠܡܒܢܝܗ ܠܡܕܝܢܬܐ ܘܕܢܬܝܨܦ ܐܝܟܢܐ ܕܠܐ ܡܕܡ ܠܒܪ ܡܢ ܗܠܝܢ ܢܗܘܐ ܘܠܐ ܢܫ̈ܬܘܫܛܢ ܝܬܝܪܐ ܗܠܝܢ ܕܒܝܫܘܬܐ ܐܝܟ ܕܠܡ̈ܠܟܐ ܠܡܠܙܘ

81. Esdras 3 2:25

    ܗܝܕܝܢ ܟܕ ܐܬܩܪ̈ܝܝܢ ܗܠܝܢ ܕܡܢ ܡܠܟܐ ܐܪܛܚܫܫܬ ܐܬܟܬܒ̈ܝܢ ܪܐܬܘܡܘܣ ܘܣܡܐܠܘܣ ܗܘ ܣܦܪܐ ܘܗܢܘܢ ܕܥܡ ܗܠܝܢ ܡܬܚܫܒܝܢ ܟܕ ܗܦܟܘ ܥܡ ܝܨܝܦܘܬܐ ܠܐܘܪܝܫܠܡ ܥܡ ܪ̈ܟܫܐ ܘܟܢܫܐ ܡܣܪܗܒܐܝܬ ܫܪܝܘ ܠܡܟܠܐ ܠܗܢܘܢ ܕܒܢܝܢ ܗܘܘ ܘܒܛܝܠ ܗܘܐ ܒܢܝܢܐ ܕܗܝܟܠܐ ܗܘ ܕܒܐܘܪܝܫܠܡ ܥܕܡܐ ܠܫܢܬܐ ܬܪܝܢܝܬܐ ܕܡܠܟܘܬܐ ܕܕܪܝܘܫ ܡܠܟܐ ܕܦܪ̈ܣܝܐ

82. Esdras 3 3:1

    ܘܡܠܟܐ ܕܪܝܘܫ ܥܒܕ ܩܘܒܠܐ ܪܒܐ ܠܟܠܗܘܢ ܕܬܚܘܬܘܗܝ ܘܠܟܠܗܘܢ ܝܠܝ̈ܕܝ ܒܝܬܐ ܕܝܠܗ ܘܠܟܠܗܘܢ ܪ̈ܘܪܒܢܐ ܕܡܕܝ ܘܕܦܪܣ

83. Esdras 3 3:2

    ܘܠܟܠܗܘܢ ܣܛܪ̈ܦܐ ܘܐܣܛܪ̈ܛܝܓܐ ܘܛܘܦܪ̈ܟܘ ܗܢܘܢ ܕܬܚܘܬܘܗܝ ܡܢ ܗܢܕܝܐ ܥܕܡܐ ܠܟܘܫ ܒܡܐܐ ܘܥܣܪ̈ܝܢ ܘܫܒܥ ܣܛܪ̈ܦܘܬܐ

84. Esdras 3 3:3

    ܘܐܟܠܘ ܘܐܫܬܝܘ ܘܟܕ ܣܒܥܘ ܗܦܟܘ ܗܘ ܕܝܢ ܕܪܝܘܫ ܡܠܟܐ ܗܦܟ ܠܩܝܛܘܢܐ ܘܕܡܟ ܘܕܐܬܬܥܝܪ ܗܘܐ

85. Esdras 3 3:4

    ܗܝܕܝܢ ܬܠܬܐ ܝܢܣܩ̈ܐ ܗܢܘܢ ܢܛܪ̈ܝ ܦܓܪܐ ܗܠܝܢ ܕܢܛܪܝܢ ܠܦܓܪܐ ܕܡܠܟܐ ܐܡܪܘ ܐܚܪܢܐ ܠܘܬ ܐܚܪܢܐ

86. Esdras 3 3:5

    ܢܐܡܪ ܟܠܚܕ ܡܢܢ ܚܕܐ ܡܠܬܐ ܗܝ ܕܝܬܝܪ ܚܝܠܬܢܝܐ ܘܗܘ ܕܐܢ ܬܬܚܙܐ ܡܠܬܐ ܕܝܠܗ ܕܝܬܝܪ ܚܟܝܡܐ ܡܢ ܕܚܒܪܗ ܢܬܠ ܠܗ ܕܪܝܘܫ ܡܠܟܐ ܡܘܗ̈ܒܬܐ ܪ̈ܘܪܒܬܐ ܘܕܙܟܘ̈ܬܐ ܪ̈ܘܪܒܬܐ

87. Esdras 3 3:6

    ܘܐܪ̈ܓܘܢܐ ܠܡܬܥܛܦܘ ܘܒܕܗܒܐ ܢܫܬܐ ܘܥܠ ܕܗܒܐ ܢܕܡܟ ܘܡܪܟܒܬܐ ܕܪܟܘܒܗ ܕܕܗܒܐ ܘܩܪܕܪܝܢ ܒܘܨܝܬܐ ܘܙܝܪܐ ܥܠ ܩܕܠܐ

88. Esdras 3 3:7

    ܘܬܪܝܢܐ ܢܬܒ ܕܕܪܝܘܫ ܡܛܠ ܚܟܡܬܐ ܕܝܠܗ ܘܒܪ ܓܢܣܐ ܕܕܪܝܘܫ ܢܬܩܪܐ

89. Esdras 3 3:8

    ܘܗܝܕܝܢ ܟܕ ܟܬܒܘ ܟܠܚܕ ܠܡܠܬܐ ܕܝܠܗ ܚܬܡܘ ܘܣܡܘ ܠܬܚܬ ܡܢ ܐܣ̈ܕܐ ܕܕܪܝܘܫ ܡܠܟܐ ܘܐܡܪܘ

90. Esdras 3 3:9

    ܕܡܐ ܕܐܬܬܥܝܪ ܡܠܟܐ ܢܬܠܘܢ ܠܗ ܠܟܬܒܐ ܘܗܘ ܡܢ ܕܐܢ ܢܕܘܢ ܡܠܟܐ ܘܬܠܬܐ ܪ̈ܘܪܒܢܐ ܕܦܪܣ ܕܡܠܬܐ ܕܝܠܗ ܝܬܝܪ ܚܟܝܡܐ ܠܗ ܬܬܝܗܒ ܙܟܘܬܐ ܐܝܟܢܐ ܕܟܬܝܒ

91. Esdras 3 3:10

    ܚܕ ܚܕ ܗܟܝܠ ܟܬܒܘ ܝܬܝܪ ܚܝܠܬܢ ܚܡܪܐ

92. Esdras 3 3:11

    ܐܚܪܢܐ ܟܬܒ ܝܬܝܪ ܚܝܠܬܢ ܡܠܟܐ

93. Esdras 3 3:12

    ܗܘ ܬܠܝܬܝܐ ܟܬܒ ܝܬܝܪ ܚܝ̈ܠܬܢܝܢ ܢܫ̈ܐ ܝܬܝܪ ܡܢ ܟܠܡܕܡ ܙܟܐ ܫܪܪܐ

94. Esdras 3 3:13

    ܘܡܐ ܕܐܬܬܥܝܪ ܡܠܟܐ ܟܕ ܢܣܒܘܗܝ ܠܟܬܒܐ ܝܗܒܘܗܝ ܠܗ ܘܩܪܐ

95. Esdras 3 3:14

    ܘܫܕܪ ܩܪܐ ܠܟܠܗܘܢ ܪ̈ܘܪܒܢܐ ܕܦܪܣ ܘܕܡܕܝ ܘܠܐܣܛܘܪ̈ܦܐ ܘܠܐܣܛܪ̈ܛܝܓܐ ܘܠܛܘܦܪ̈ܟܘ ܘܠܐܦܛܘ ܘܝܬܒܘ ܒܝܬ ܓܠܝܢܐ ܘܐܬܩܪܝ ܗܘ ܟܬܒܐ ܩܕܡܝܗܘܢ

96. Esdras 3 3:15

    ܘܐܡܪܘ ܩܪܘ ܐܢܘܢ ܠܝܢܣ̈ܩܐ ܘܗܢܘܢ ܢܫܘܕܥܘܢ ܠܡ̈ܠܐ ܕܝܠܗܘܢ ܘܐܬܩܪܝܘ ܘܥܠܘ

97. Esdras 3 3:16

    ܘܐܡ̣ܪܘ ܠܗܘܢ. ܐܘܕܥܘ ܠܢ ܡܛܠ ܗܠܝܢ ܕܟ̈ܬܝܒܢ ܀ ܘܫ̇ܪ̣ܝ ܩܕܡܝܐ ܕܐܡ̣ܪ ܗܘܐ ܡܛܠ ܚܝܠܗ ܕܚܡܪܐ̣ ܘܐܡ̣ܪ ܗܟܢܐ.

98. Esdras 3 3:17

    ܓܒܪ̈ܐ ܐܝܟܢܐ ܠܘ ܝܬܝܪ ܚܝܠܬܢ ܚܡܪܐ ܝܬܝܪ ܡܢ ܟܠܗܘܢ ܒܢܝܢ̈ܫܐ ܗ̇ܢܘܢ ܕܫ̇ܬܝܢ ܠܗ ܡ̇ܛܥܐ ܠܬܪܥܝܬܐ

99. Esdras 3 3:18

    ܘܕܡܠܟܐ ܘܕܝܬܡܐ ܥܒܕ ܬܪܥܝܬܐ ܚܕܐ ܘܕܒܪ ܒܝܬܐ ܘܕܒܪ ܚܐܪ̈ܐ ܘܕܡܣܟܢܐ ܘܕܥܬܝܪܐ

100. Esdras 3 3:19

     ܘܟܠ ܬܪܥܝܬܐ ܡܫܚܠܦ ܘܠܒܘܣܡܐ ܘܠܚܕܘܬܐ ܘܠܐ ܥܗܝܕ ܟܠ ܥܩܬܐ ܘܟܠ ܚܘܒܬܐ

Next → — showing 1–100 of 407

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.