← All works

Peshitta Apocalypse of Baruch

Peshitta (Syriac Old Testament) · 614 sections

1. Apocalypse of Baruch 63:9

   ܐܬܦ̣ܪܩܬ ܕܝܢ ܨܗܝܘܢ ܘܐܘܪܝܫܠܡ ܐܬܦ̣ܨܝܬ. ܐܦ ܐܝܣܪܝܠ ܐܬܚܪܪ ܡܢ ܐܘܠܨ̈ܢܐ

2. Apocalypse of Baruch 63:10

   ܘܚܕܝܘ ܟܘܠܗܘܢ ܐܝܠܝܢ ܕܐܝܬ ܗܘܘ ܒܐܪܥܐ ܩܕܝܫܬܐ. ܘܐܫܬܒܚ ܫܡܗ ܕܚܝܠܬܢܐ ܐܝܟ ܕܢܬܡܠܠ

3. Apocalypse of Baruch 63:11

   ܗܠܝܢ ܐܢܘܢ ܡ̈ܝܐ ܢܗܝܪ̈ܐ ܕܚܙ̣ܝܬ ܀

4. Apocalypse of Baruch 64:1

   ܘܡ̈ܝܐ ܕܬܫܥܐ ܐܘܟܡ̈ܐ ܕܚ̣ܙܝܬ̣. ܗ̇ܘ ܗܘ ܟܘܠܗ ܪܘܫܥܐ ܕܗ̣ܘܐ ܒܝܘܡ̈ܬܗ ܕܡܢܫܐ ܒܪ ܚܙܩܝܐ

5. Apocalypse of Baruch 64:2

   ܡܛܠ ܕܣܓܝ ܐܪܫܥ. ܘܙܕܝ̈ܩܐ ܩܛ̣ܠ ܘܕܝ̣ܢܐ ܨܠ̣ܐ. ܘܕܡܐ ܙܟܝܐ ܐܫ̣ܕ. ܘܢܫ̈ܝ ܓܒܪ̈ܐ ܒܩܛܝܪܐ ܛܡܐ. ܘܣܚܦ ܡܕܒ̈ܚܐ ܘܩܘܪ̈ܒܢܝܗܘܢ ܒ̇ܛܠ. ܘܟ̈ܗܢܐ ܐܦܩ ܕܠܐ ܢܫܡܫܘܢ ܒܝܬ ܡܩܕܫܐ

6. Apocalypse of Baruch 64:3

   ܘܥ̣ܒܕ ܨܠܡܐ ܕܚܡܫ ܐ̈ܦܝܢ. ܐܪܒܥ ܡܢܗܝܢ ܚܝܪ̈ܢ ܠܐܪܒܥ ܪ̈ܘܚܝܢ. ܘܚܡܝܫܝܬܐ ܥܠ ܪܝܫܗ ܕܨܠܡܐ. ܐܝܟ ܕܠܘܩܒܠ ܛܢܢܗ ܕܚܝܠܬܢܐ

7. Apocalypse of Baruch 64:4

   ܘܗܝ̇ܕܝܢ ܢܦ̣ܩ ܪܘܓܙܐ ܡܢ ܩܕܡ ܚܝܠܬܢܐ ܐܝܟ ܕܬܬܥܩܪ ܨܗܝܘܢ. ܐܝܟ ܕܐܦ ܓ̣ܕܫ ܒܝܘܡ̈ܬܟܘܢ

8. Apocalypse of Baruch 64:5

   ܐܠܐ ܐܦ ܥܠ ܬܪܝܢ ܫܒ̈ܛܝܢ ܘܦܠܓܗ ܢܦ̣ܩ ܓܙܪ ܕܝܢ̣ܐ ܕܐܦ ܗ̣ܢܘܢ ܢܫܬܒܘܢ ܐܝܟ ܕܚ̣ܙܝܬ ܗܫܐ

9. Apocalypse of Baruch 64:6

   ܘܥܕܡܐ ܠܗܟܢܐ ܣܓ̣ܝ ܪܘܫܥܗ ܕܡܢܫܐ. ܐܝܟ ܕܬܫܒܘܚܬܗ ܕܡܪܝܡܐ ܬܪܚܩ ܡܢ ܒܝܬ ܡܩܕܫܐ

10. Apocalypse of Baruch 64:7

    ܡܛܠ ܗܢܐ ܡܢܫܐ ܒܗܢܐ ܙܒܢܐ ܐܫܬܡܗ ܪܫܝܥܐ. ܘܒܚܪܝܬܐ ܒܢܘܪܐ ܗ̣ܘܐ ܡܥܡܪܗ

11. Apocalypse of Baruch 64:8

    ܟܕ ܓܝܪ ܐܫܬܡܥܬ ܒܥܘܬܗ ܠܘܬ ܡܪܝܡܐ. ܒܐܚܪܝܬܐ ܟܕ ܢܦ̣ܠ ܒܣܘܣܝܐ ܕܢܚܫܐ ܘܐܬܦܫܪ ܣܘܣܝܐ ܕܢܚܫܐ. ܘܗܘܬ ܠܗ ܐܬ̇ܐ ܠܫܥܬܐ

12. Apocalypse of Baruch 64:9

    ܠܐ ܗܘܐ ܓܝܪ ܡܫܠܡܢܐܝܬ ܚܝ̣ܐ. ܐܦ ܠܐ ܓܝܪ ܫܘ̇ܐ ܗܘܐ. ܐܠܐ ܕܡܢ ܗܫܐ ܢܕܥ. ܕܒܐܚܪܝܬܐ ܡܢ ܡ̣ܢܘ ܐܝܬ ܠܗ ܕܢܫܬܢܩ

13. Apocalypse of Baruch 64:10

    ܗ̇ܘ ܓܝܪ ܕܡܨ̇ܐ ܕܢܛܐܒ ܐܦ ܕܢܫܢܩ ܡܨ̣ܐ ܀

14. Apocalypse of Baruch 65:1

    ܗܟܢܐ ܕܝܢ ܡܪܫܥ ܗܘܐ ܗ̣ܘ ܡܢܫܐ. ܘܡܬܚܫܒ ܗܘܐ ܒܙܒܢܗ ܐܝܟ ܗ̇ܘ ܕܠܐ ܥܬܝܕ ܚܝܠܬܢܐ ܕܢܒܥܐ ܐܢ̈ܝܢ ܠܗܠܝܢ

15. Apocalypse of Baruch 65:2

    ܗܠܝܢ ܐܢܘܢ ܡ̈ܝܐ ܐܘܟ̈ܡܐ̇. ܬܫܝ̈ܥܝܐ ܕܚ̣ܙܝܬ ܀

16. Apocalypse of Baruch 66:1

    ܘܡ̈ܝܐ ܥܣܝܪ̈ܝܐ ܢܗܝܪ̈ܐ ܕܚܙ̣ܝܬ̣. ܗ̣ܝ ܗܝ ܫܦܝܘܬܐ ܕܬܘ̈ܠܕܬܗ ܕܝܘܫܝܐ. ܡ̇ܠܟܐ ܕܝܗܘܕܐ. ܕܒܗ̇ܘ ܙܒܢܐ ܗ̣ܘ ܒܠܚܘܕܘܗܝ ܡܫܥܒܕ ܗܘܐ ܠܚܝܠܬܢܐ ܡܢ ܟܠܗ ܠܒܗ ܘܡܢ ܟܠܗ̇ ܢܦܫܗ

17. Apocalypse of Baruch 66:2

    ܘܗ̣ܘ ܕܟܝ ܠܐܪܥܐ ܡܢ ܦܬܟܪ̈ܐ. ܘܩ̇ܕܫ ܟܠܗܘܢ ܡܐ̈ܢܐ ܐܝܠܝܢ ܕܐܣܬܝܒܘ. ܘܩܘܪ̈ܒܢܐ ܦܢ̇ܝ ܠܡܕܒܚܐ. ܘܐܪܝܡ ܩܪܢܐ ܕܚ̈ܣܝܐ. ܘܪܡܪܡ ܠܙܕܝ̈ܩܐ. ܘܫ̇ܒܚ ܠܟܘܠܗܘܢ ܚܟܝ̈ܡܐ ܒܣܟܘܠܬܢܘܬܐ. ܘܐܗܦܟ ܟܗ̈ܢܐ ܠܬܫܡܫܬܗܘܢ. ܘܥ̣ܛܐ ܘܐܥܒܪ ܐܫܘ̈ܦܐ ܘܚܪ̈ܫܐ ܘܙܟܘܪ̈ܐ ܡܢ ܐܪܥܐ

18. Apocalypse of Baruch 66:3

    ܘܠܐ ܗܘܐ ܒܠܚܘܕ ܠܪ̈ܫܝܥܐ ܕܚ̣ܝܝܢ ܗܘܘ ܩܛ̣ܠ̣. ܘܐܦ ܓܪ̈ܡܝܗܘܢ ܕܐܝܠܝܢ ܕܡܝܬܘ ܐܦܩܘ ܡܢ ܩܒܪ̈ܐ ܘܐܘܩܕܘ ܐܢܘܢ ܒܢܘܪܐ

19. Apocalypse of Baruch 66:4

    ܘܥܕܥ̈ܕܐ ܘܫܒ̈ܐ ܐܩܝܡ ܒܩܘܕ̈ܫܝܗܘܢ. ܘܠܡܣ̈ܝܒܐ ܐܘܩܕ ܒܢܘܪܐ. ܘܠܢܒ̈ܝܐ ܕܓ̈ܠܐ ܕܡܛܥܝܢ ܗܘܘ ܠܥܡܐ̣. ܐܦ ܠܗ̇ܢܘܢ ܐܘܩܕ ܐܢܘܢ ܒܢܘܪܐ. ܘܠܥܡܐ ܕܡܫܬܡܥ ܗܘܐ ܠܗܘܢ ܟܕ ܚܝ̈ܝ̣ܢ. ܐܪܡܝ ܐܢܘܢ ܒܢܚܠܐ ܕܩܕܪܘܢ. ܘܟ̣ܫܐ ܥܠܝܗܘܢ ܟܐ̈ܦܐ

20. Apocalypse of Baruch 66:5

    ܘܛܢ ܛܢܢܗ ܕܚܝܠܬܢܐ ܡܢ ܟܠܗ̇ ܢܦܫܗ. ܘܐܫܬܪܪ ܒܠܚܘܕܘܗܝ ܒܢܡܘܣܐ ܒܗ̇ܘ ܙܒܢܐ. ܐܝܟ ܕܠܐ ܢܫܒܘܩ ܠܐܢܫ ܥܘܪܠܐ ܐܘ ܕܡܪܫܥ ܒܟܠܗ̇ ܐܪܥܐ̇. ܟܘܠܗܘܢ ܝܘܡ̈ܬܐ ܕܚ̈ܝܘܗܝ

21. Apocalypse of Baruch 66:6

    ܗܢܘ ܕܝܢ ܕܢܣܒ ܝܘܬܪܢܐ ܕܠܥܠܡ ܘܗ̣ܘ ܢܫܬܒܚ ܠܘܬ ܚܝܠܬܢܐ ܝܬܝܪ ܡܢ ܣܓܝܐ̈ܐ ܒܙܒܢܐ ܐܚܪܝܐ

22. Apocalypse of Baruch 66:7

    ܡܛܠܬܗ ܓܝܪ ܕܗܢܐ ܘܡܛܠ ܐܝܠܝܢ ܕܕܡ̇ܝܢ ܠܗ ܐܬܒܪܝ ܘܐܬܥܬܕܝ ܬܫܒ̈ܚܬܐ ܡܝܩܪ̈ܬܐ ܗܠܝܢ ܕܐܬܐܡܪ ܠܟ ܡܢ ܩܕܝܡ

23. Apocalypse of Baruch 66:8

    ܗܠܝܢ ܐܢܘܢ ܡܝ̈ܐ ܢܗܝܪ̈ܐ ܕܚ̣ܙܝܬ ܀

24. Apocalypse of Baruch 67:1

    ܘܡ̈ܝܐ ܕܚܕܥܣܪ ܐܘ̈ܟܡܐ ܕܚܙ̣ܝܬ̣. ܗܕܐ ܗܝ ܒܝ̣ܫܬܐ ܕܓܕ̇ܫܐ ܗܫܐ ܠܨܗܝܘܢ

25. Apocalypse of Baruch 67:2

    ܐܘ ܣܒ̣ܪܬ ܕܠܝܬ ܠܗܘܢ ܥܩܬܐ ܠܡܠܐ̈ܟܐ ܩܕܡ ܚܝܠܬܢܐ̇. ܕܗܟܢܐ ܐܫ̣ܬܠܡܬ ܨܗܝܘܢ. ܘܕܗܐ ܥܡܡ̈ܐ ܡܫܬܒܗܪܝܢ ܒܠܒܘ̈ܬܗܘܢ ܘܟܢ̈ܫܐ ܩܕܡ ܦܬܟܪ̈ܝܗܘܢ ܘܐܡ̇ܪܝܢ. ܐܬܕ̣ܝܫܬ ܗ̇ܝ ܕܙܒܢܐ ܣܓܝܐܐ ܕܫܬ. ܘܐܫܬ̣ܥܒܕܬ ܗ̇ܝ ܕܡܫܥܒܕܐ ܗܘܬ

26. Apocalypse of Baruch 67:3

    ܣܒ̣ܪܬ ܕܒܗܠܝܢ ܚ̇ܕܐ ܡܪܝܡܐ̣. ܐܘ ܫܡܗ ܡܫܬܒܚ̣

27. Apocalypse of Baruch 67:4

    ܐܠܐ ܡܢܐ ܢܗܘܐ ܠܕܝ̣ܢܗ ܟܐܢܐ

28. Apocalypse of Baruch 67:5

    ܐܠܐ ܡܢ ܒܬܪ ܗܠܝܢ ܢܬܬܚܕܘܢ ܒܐܘܠܨܢܐ̣. ܐܝܠܝܢ ܕܐܬܒܕܪܘ ܒܝܬ ܥܡ̈ܡܐ. ܘܒܚܣܕܐ ܢܥܡܪܘܢ ܒܟܠ ܐܬܪ

29. Apocalypse of Baruch 67:6

    ܡܛܠ ܕܟܡܐ ܕܨܗܝܘܢ ܡܫܠܡܐ ܘܐܘܪܫܠܡ ܚܪܒܐ. ܘܦܬܟܪ̈ܐ ܒܡܕܝ̈ܢܬܐ ܕܥܡ̈ܡܐ ܡܨܠܚܝ̣ܢ. ܘܥܛܪܐ ܕܬܢܢܐ ܕܒܣܡ̈ܐ ܕܙܕܝܩܘܬܐ ܕܡܢ ܢܡܘܣܐ ܕܥ̣ܟ ܡܢ ܨܗܝܘܢ. ܘܒܐܬܪܗ̇ ܕܨܗܝܘܢ ܒܟܠ ܕܘܟ̣. ܗܐ ܬܢܢܐ ܕܪܘܫܥܐ ܐܝܬ ܒܗ̇

30. Apocalypse of Baruch 67:7

    ܐܠܐ ܢܩܘܡ ܡ̇ܠܟܐ ܕܒܒܠ ܗ̇ܘ ܕܣܚܦ ܗܫܐ ܠܨܗܝܘܢ. ܘܢܫܬܒܗܪ ܥܠ ܥܡܐ. ܘܢܡܠܠ ܪ̈ܘܪܒܬܐ ܒܠܒܗ ܩܕܡ ܡܪܝܡܐ

31. Apocalypse of Baruch 67:8

    ܐܦ ܗ̣ܘ ܕܝܢ ܒܐܚܪܝܬܐ ܢܦ̣ܠ

32. Apocalypse of Baruch 67:9

    ܗܠܝܢ ܐܢܘܢ ܡ̈ܝܐ ܐܘ̈ܟܡܐ .

33. Apocalypse of Baruch 68:1

    ܘܡ̈ܝܐ ܕܬܪܥܣܪ ܢܗܝܪ̈ܐ ܕܚ̣ܙܝܬ̣. ܗܕܐ ܗܝ ܡܠܬܐ

34. Apocalypse of Baruch 68:2

    ܢܐܬܐ ܓܝܪ ܙܒܢܐ ܡܢ ܒܬܪ ܗܠܝܢ. ܘܢܦܠ ܥܡܟ ܠܐܢܢܩܐ. ܐܝܟ ܕܩܝܢܕܘܢܣ ܢܥܒܕܘܢ. ܕܢܐܒܕܘܢ ܟܠܗܘܢ ܐܟܚܕܐ

35. Apocalypse of Baruch 68:3

    ܒܪܡ ܕܝܢ ܢܬܦܪܩܘܢ. ܘܒܥܠܕܒ̈ܒܝܗܘܢ ܩܕܡܝܗܘܢ ܢܦܠܘܢ

36. Apocalypse of Baruch 68:4

    ܘܢܗܘܐ ܠܗܘܢ ܒܙܒܢ ܒܘܣܡܐ ܣܓܝܐܐ

37. Apocalypse of Baruch 68:5

    ܘܒܗ̇ܘ ܙܒܢܐ ܒܬܪ ܩܠܝܠ ܬܘܒ ܬܬܒܢܐ ܨܗܝܘܢ. ܘܢܬܩܢܘܢ ܬܘܒ ܩܘܪ̈ܒܢܝܗ. ܘܟܗ̈ܢܐ ܢܗܦܟܘܢ ܠܬܫܡܫܬܗܘܢ. ܘܬܘܒ ܢܐܬܘܢ ܥܡܡ̈ܐ ܐܝܟ ܕܢܫܒܚܘܢܗ̇

38. Apocalypse of Baruch 68:6

    ܒܪܡ ܕܝܢ ܠܐ ܡܠܝܐܝܬ ܐܝܟ ܕܒܩܕܡܝܬܐ

39. Apocalypse of Baruch 68:7

    ܐܠܐ̇ ܢܗܘܐ ܡܢ ܒܬܪ ܗܠܝܢ. ܬܗܘܐ ܡܦܘܠܬܐ ܕܥܡ̈ܡܐ ܣܓܝܐ̈ܐ

40. Apocalypse of Baruch 68:8

    ܗܠܝܢ ܐܢܘܢ ܡ̈ܝܐ ܢܗܝܪ̈ܐ ܕܚ̣ܙܝܬ ܀

41. Apocalypse of Baruch 69:1

    ܡ̈ܝܐ ܓܝܪ ܐܚܪ̈ܝܐ ܕܚ̣ܙܝܬ ܕܐܘܟܡܝܢ ܗܘܘ ܡܢ ܟܠܗܘܢ ܗ̇ܢܘܢ ܕܩܕܡܝܗܘܢ. ܗ̇ܢܘܢ ܕܗܘܘ ܡܢ ܒܬܪ ܡܢܝܢܐ ܕܬܪܥܣܪ ܕܟܢܝܫܝܢ ܗܘܘ ܐܟܚܕܐ. ܕܟܘܠܗ ܐܢܘܢ ܥܠܡܐ

42. Apocalypse of Baruch 69:2

    ܦܠܓ ܓܝܪ ܡܪܝܡܐ ܡܢ ܩܕܝܡ. ܡܛܠ ܕܗ̣ܘܝܘ ܒܠܚܘܕܘܗܝ ܝܕ̇ܥ ܡܕܡ ܕܥܬܝܕ ܕܢܓܕܫ

43. Apocalypse of Baruch 69:3

    ܒܝ̣̈ܫܬܐ ܓܝܪ ܕܪ̈ܘܫܥܐ ܐܝܠܝܢ ܕܥܬܝܕܝܢ ܗܘܘ ܕܢܗܘܘܢ ܩܕܡܘܗ̣ܝ. ܩ̇ܕܡ ܚ̣ܙܐ ܕܘܒܪ̈ܝܗܘܢ ܫܬܐ

44. Apocalypse of Baruch 69:4

    ܘܕܥ̇ܒ̈ܕܐ ܛ̇ܒ̈ܐ ܕܙܕܝ̈ܩܐ ܕܥܬܝܕܝܢ ܕܢܫܬܠܡܘܢ ܩܕܡܘܗܝ. ܩܕ̇ܡ ܚ̣ܙܐ ܕܘܒܪ̈ܝܗܘܢ ܫܬܐ. ܣ̇ܛܪ ܡܢ ܐܝܠܝܢ ܕܥܬܝܕ ܕܢܥܒܕ ܒܫܘܠܡܗ ܕܥܠܡܐ

45. Apocalypse of Baruch 69:5

    ܡܛܠ ܗܢܐ ܠܐ ܡ̈ܝܐ ܐܘܟ̈ܡܐ ܥܡ ܐܘ̈ܟܡܐ. ܘܠܐ ܢܗܝܪ̈ܐ ܥܡ ܢܗܝܪ̈ܐ. ܫܘܠܡܐ ܗܘ ܓܝܪ ܀

46. Apocalypse of Baruch 70:1

    ܫܡ̣ܥ ܗܟܝܠ ܦܘܫܩܐ ܕܡ̈ܝܐ ܐܘܟܡ̈ܐ ܐܚܪ̈ܝܐ ܗܠܝܢ ܕܥܬܝܕܝܢ ܕܢܐܬܘܢ ܡܢ ܒܬܪ ܐܘܟ̈ܡܐ. ܗܕܐ ܗܝ ܡܠܬܐ

47. Apocalypse of Baruch 70:2

    ܗܐ ܝܘܡ̈ܬܐ ܐܬ̇ܝܢ. ܘܢܗܘܐ ܟܕ ܢܒܫܠ ܙܒܢܗ ܕܥܠܡܐ. ܘܢܐܬܐ ܚܨܕܐ ܕܙܪ̈ܥܘܗܝ ܕܒ̈ܝ̣ܫܐ ܘܕܛ̈ܒܐ. ܢܝܬܐ ܚܝܠܬܢܐ ܥܠ ܐܪܥܐ ܘܥܡܘܪ̈ܝܗ̇. ܘܥܠ ܡܕܒܪ̈ܢܝܗ̇ ܫܓܝܫܘܬܐ ܕܪ̈ܘܚܐ ܘܬܘܗܬܐ ܕܠܒܐ

48. Apocalypse of Baruch 70:3

    ܘܢܣܢܘܢ ܚܕ ܠܚܕ. ܘܢܬܓܪܓܘܢ ܚܕ ܥܠ ܚܕ ܠܩܪܒܐ. ܘܢܫܬܠܛܘܢ ܡܨܥܪ̈ܐ ܥܠ ܡܝܩܪ̈ܐ. ܘܢܬܬܪܝܡܘܢ ܒܨܝܪ̈ܐ ܥܠ ܡܫܒ̈ܚܐ

49. Apocalypse of Baruch 70:4

    ܘܢܫܬܠܡܘܢ ܣܓ̈ܝܐܐ ܠܙܥܘܪ̈ܐ. ܘܢܫܬܠܛܘܢ ܐܝܠܝܢ ܕܠܐ ܗܘܘ ܡܕܡ ܥܠ ܥܫܝ̈ܢܐ. ܘܢܬܝܬܪܘܢ ܡܣ̈ܟܢܐ ܥܠ ܥܬܝܪ̈ܐ. ܘܢܫܬܩܠܘܢ ܪ̈ܫܝܥܐ ܥܠ ܓܢܒܪ̈ܐ

50. Apocalypse of Baruch 70:5

    ܘܢܫܬܩܘܢ ܚ̇ܟܝܡ̈ܐ. ܘܣ̈ܟܠܐ ܢܡܠܠܘܢ. ܘܠܐ ܬܫܬܪܪ ܗܝ̇ܕܝܢ ܡܚܫܒܬܐ ܕܒ̈ܢܝ ܐܢܫܐ. ܐܦ ܠܐ ܬܪܥܝܬܐ ܕܚܝ̈ܠܬܢܐ . ܘܠܐ ܢܫܬܪܪ ܣܒܪܗܘܢ ܕܐܝܠܝܢ ܕܡܣܒܪܝܢ

51. Apocalypse of Baruch 70:6

    ܘܢܗܘܐ ܕܝܢ ܡܐ ܕܗ̈ܘܝ ܗܠܝܢ ܕܡܩ̈ܕܡܢ ܐܡܝܪ̈ܢ̣. ܢܦܠ ܚܒܟܐ ܒܟܘܠܗܘܢ ܒܢܝ̈ܢܫܐ. ܘܡܢܗܘܢ ܒܩܪܒܐ ܢܦܠܘܢ. ܘܡܢܗܘܢ ܒܥܩ̈ܬܐ ܢܬܚܒܠܘܢ. ܘܡܢܗܘܢ ܡܢ ܐܝܠܝܢ ܕܕܝܠܗܘܢ ܐܢܘܢ ܢܬܥ̇ܘܟܘܢ

52. Apocalypse of Baruch 70:7

    ܢܓܠܐ ܕܝܢ ܡܪܝܡܐ ܠܗܢܘܢ ܥܡܡ̈ܐ ܕܩ̇ܕܡ ܥܬܕ. ܘܢܐܬܘܢ ܘܢܩܪܒܘܢ ܥܡ ܡܕܒܪ̈ܢܐ ܕܡܫܬܚܪܝܢ ܗܝ̇ܕܝܢ

53. Apocalypse of Baruch 70:8

    ܘܢܗܘܐ ܕܟܠ ܡ̇ܢ ܕܡܬܦܨܐ ܡܢ ܩܪܒܐ ܒܙܘܥܐ ܢܡܘܬ. ܘܕܡܬܦܨܐ ܡܢ ܙܘܥܐ ܒܢܘܪܐ ܢܐܩܕ. ܘܐܝ̇ܢܐ ܕܡܬܦܨܐ ܡܢ ܢܘܪܐ ܒܟܦܢܐ ܢܣܘܦ

54. Apocalypse of Baruch 70:9

    ܘܢܗܘܐ ܕܟܠ ܡ̇ܢ ܕܡܬܦܨܐ ܘܥ̇ܪܩ ܡܢ ܟܠܗܝܢ ܐܝܠܝܢ ܕܡܩ̈ܕܡܢ ܐܡܝܪ̈ܢ. ܡܢ ܐܝܠܝܢ ܕܙܟܘ ܘܐܙܕܟܝܘ̣. ܢܫܬܠܡܘܢ ܠܐܝܕ̈ܘܗܝ ܕܥܒ̣ܕܝ ܡܫܝܚܐ̣

55. Apocalypse of Baruch 70:10

    ܬܐܟܘܠ ܓܝܪ ܟܠ ܐܪܥܐ ܠܥ̈ܡܘܪܝܗ̇ ܀

56. Apocalypse of Baruch 71:1

    ܐܪܥܐ ܕܝܢ ܩܕܝܫܬܐ ܬܪܚܡ ܥܠ ܕܝܠܗ̇. ܘܬܓܢ ܥܠ ܥܡ̇ܘܪ̈ܝܗ̇ ܒܗ̇ܘ ܙܒܢܐ

57. Apocalypse of Baruch 71:2

    ܗܢܘ ܚܙܘܐ ܕܚܙ̣ܝܬ. ܘܗܢܘ ܦܘܫܩܗ

58. Apocalypse of Baruch 71:3

    ܐܬ̇ܝܬ ܕܝܢ ܐܢܐ ܕܐܡ̇ܪ ܠܟ ܗܠܝܢ. ܡܛܘܠ ܕܐܫܬ̣ܡܥܬ ܒܥܘܬܟ ܠܘܬ ܡܪܝܡܐ ܀

59. Apocalypse of Baruch 72:1

    ܫܡ̣ܥ ܕܝܢ ܐܦ ܥܠ ܡ̈ܝܐ ܢܗܝܪ̈ܐ ܕܥܬܝܕܝܢ ܕܢܗܘܘܢ ܒܫܘܠܡܐ̇ ܡܢ ܒܬܪ ܗܠܝܢ ܐܘܟܡ̈ܐ. ܗܕܐ ܗܝ ܡܠܬܐ

60. Apocalypse of Baruch 72:2

    ܡܢ ܒܬܪ ܕܐܬ̈ܝܢ ܐܬܘ̈ܬܐ ܕܐܬܐܡܪ ܠܟ ܡܢ ܩܕܝܡ. ܟܕ ܢ̇ܫܬܓܫܘܢ ܥ̇ܡܡ̈ܐ. ܘܢܐܬܐ ܙܒܢܗ ܕܡܫܝܚܝ. ܘܢܩܪܐ ܠܟܠܗܘܢ ܥܡܡ̈ܐ. ܘܡܢܗܘܢ ܢܐܚܐ ܘܡܢܗܘܢ ܢܩܛܘܠ

61. Apocalypse of Baruch 72:3

    ܗܠܝܢ ܗܟܝܠ ܐ̈ܬܝܢ ܥܠ ܥܡ̈ܡܐ ܐܝܠܝܢ ܕܥܬܝܕܝܢ ܕ̇ܢܚܘܢ ܡܢܗ̇

62. Apocalypse of Baruch 72:4

    ܟܠ ܥܡܐ ܕܠܐ ܝܕ̇ܥ ܠܐܝܣܪܝܠ. ܘܕܠܐ ܕܫ ܠܙܪܥܗ ܕܝܥܩܘܒ̣ ܗ̣ܘܝܘ ܕܢܚܐ

63. Apocalypse of Baruch 72:5

    ܘܗܕܐ ܡܛܘܠ ܕܢܫܬܥܒܕܘܢ ܡܢ ܟܘܠ ܥܡ̈ܡܝܢ ܠܥܡܟ

64. Apocalypse of Baruch 72:6

    ܟܘܠ ܐܝܠܝܢ ܕܝܢ ܕܐܫܬܠܛܘ ܥܠܝܟܘܢ ܐܘ ܕܝܕܥܟܘܢ. ܗܠܝܢ ܟܘܠܗܘܢ ܠܚܪܒܐ ܢܫܬܠܡ̣ܘܢ ܀

65. Apocalypse of Baruch 73:1

    ܘܢܗܘܐ ܡܢ ܒܬܪ ܕܡܡܟܟ ܠܟܘܠ ܕܐܝܬ ܒܥܠܡܐ. ܘܝܬ̇ܒ ܒܫܠܡ̇ܐ ܠܥܠܡ ܥܠ ܬܪܢܘܣ ܕܡܠܟܘܬܗ. ܗ̇ܝܕܝܢ ܢܬܓܠܐ ܒܒܘܣܡܐ ܘܢܝܚܐ ܢܬܚܙܐ

66. Apocalypse of Baruch 73:2

    ܘܗܝ̇ܕܝܢ ܐܣܝܘܬܐ ܬܗܘܐ ܢܚ̇ܬܐ ܒܛܠܠܐ. ܘܟܘܪܗܢܐ ܢܬܪܚܩ. ܘܨܦܬܐ ܘܥܩܬܐ ܘܬܐܢܚ̈ܬܐ ܢܥܒܪ̈ܢ ܡܢ ܒܢܝܢܫ̈ܐ. ܘܬܗܠܟ ܚܕܘܬܐ ܒܟܠܗ̇ ܐܪܥܐ

67. Apocalypse of Baruch 73:3

    ܘܬܘܒ ܠܐ ܢܡܘܬ ܕܠܐ ܒܙܒܢܗ. ܘܠܐ ܡܢ ܫܠܝܐ ܢܓܕܫ ܣܩܘܒܠܐ ܡܕܡ

68. Apocalypse of Baruch 73:4

    ܘܕ̈ܝ̣ܢܐ ܘܡܪ̈ܫܘܬܐ ܘܚܪ̈ܝܢܐ ܘܬܒ̈ܥܬܐ ܘܕܡܐ ܘܪ̈ܓܝܓܬܐ ܘܚܣܡܐ ܘܣܢܐܬܐ. ܘܟܠ ܐܝܠܝܢ ܕܠܗܠܝܢ ܕܡ̈ܝܢ. ܠܚܘܝܒܐ ܢܐ̈ܙܠܢ ܟܕ ܢܫ̈ܬܩܠܢ

69. Apocalypse of Baruch 73:5

    ܗ̈ܢ̣ܝܢ ܐ̈ܢܝܢ ܓܝܪ ܗܠܝܢ ܕܠܗܢܐ ܥܠܡܐ ܡܠܝܢܝܗܝ ܒܝܫ̣̈ܬܐ. ܘܡܛܠ ܗܠܝܢ ܝܬܝܪܐܝܬ ܫܓܝܫ ܗܘܐ ܥܘܡܪܗܘܢ ܕܒܢܝ̈ܢܫܐ

70. Apocalypse of Baruch 73:6

    ܘܢܐܬ̈ܝܢ ܚܝܘ̈ܬܐ ܡܢ ܥܒܐ̣ ܘܢܫ̈ܡܫܢ ܠܒ̈ܢܝ ܐܢܫܐ. ܘܐܣܦܝܣ ܘܕܪ̈ܩܘܢܐ ܢܦܩܘܢ ܡܢ ܢܩܥ̈ܝܗܘܢ ܐܝܟ ܕܢܫܬܥܒܕܘܢ ܠܝܠܘܕܐ

71. Apocalypse of Baruch 73:7

    ܘܢ̈ܫܐ ܗܝ̇ܕܝܢ ܬܘܒ ܠܐ ܢܗܘܐ ܠܗܝܢ ܟܐܒܐ ܡܐ ܕܝ̈ܠܕܢ. ܘܠܐ ܢܫܬܢܩܢ ܡܐ ܕܝܗ̈ܒܢ ܦܐܪ̈ܐ ܕܡܪܒܥܐ ܀ ܀

72. Apocalypse of Baruch 74:1

    ܘܢܗܘܐ ܒܗ̇ܢܘܢ ܝܘܡ̈ܬܐ. ܠܐ ܢܠܐܘܢ ܚܨܘ̈ܕܐ. ܘܠܐ ܢܥܡܠܘܢ ܐܝܠܝܢ ܕܒ̇ܢܝܢ. ܡܢ ܢܦܫܗܝܢ ܓܝܪ ܢܗܘ̈ܝܢ ܪ̈ܗܛܢ ܥܒ̈ܝܕܬܐ. ܥܡ ܐܝܠܝܢ ܕܥ̇ܒܕܝܢ ܠܗܝܢ ܒܢܝܚܐ ܣܓܝܐܐ

73. Apocalypse of Baruch 74:2

    ܡܛܘܠ ܕܙܒܢܐ ܗ̇ܘ ܫܘܠܡܐ ܗܘ ܕܡܕܡ ܕܡܬܚܒܠ. ܘܪܫܐ ܕܡܕܡ ܕܠܐ ܡܬܚܒܠ

74. Apocalypse of Baruch 74:3

    ܡܛܠ ܗܢܐ ܗܠܝ̇ܢ ܕܡ̈ܩܕܡܢ ܐܡܝܪ̈ܢ ܒܗ ܗ̈ܘܝܢ. ܡܛܠ ܗܢܐ ܪܚܝܩ ܗܘ ܡܢ ܒܝ̣̈ܫܐ. ܘܩܪܝܒ ܗܘ ܠܐܝܠܝܢ ܕܠܐ ܡ̇ܝܬܝܢ

75. Apocalypse of Baruch 74:4

    ܗܠܝܢ ܐܢܘܢ ܡ̈ܝܐ ܢܗܝܪ̈ܐ ܐܚܪ̈ܝܐ ܕܐܬܘ ܡܢ ܒܬܪ ܡ̈ܝܐ ܐܘܟ̈ܡܐ ܐܚܪ̈ܝܐ ܀

76. Apocalypse of Baruch 75:1

    ܘܥ̇ܢܝܬ ܘܐܡ̇ܪܬ. ܡ̣ܢܘ ܢܬܕܡܐ ܡܪܝ ܒܛ̇ܒܘܬܟ. ܠܐ ܓܝܪ ܡܬܕܪܟܐ

77. Apocalypse of Baruch 75:2

    ܐܘ ܡ̣ܢܘ ܢܒܨܐ ܪ̈ܚܡ̣ܝܟ ܗ̇ܢܘܢ ܕܠܐ ܡܣܬܝܟܝܢ

78. Apocalypse of Baruch 75:3

    ܐܘ ܡ̣ܢܘ ܢܕܪ̣ܟ ܣܘܟܠܐ ܕܝܠܟ

79. Apocalypse of Baruch 75:4

    ܐܘ ܡ̣ܢܘ ܡܨ̣ܐ ܕܢ̇ܬܢܐ ܡܚ̈ܫܒܬܗ ܕܡܕ̇ܥܟ

80. Apocalypse of Baruch 75:5

    ܐܘ ܡ̣ܢܘ ܡܢ ܝܠܝ̈ܕܐ ܢܣ̇ܟܐ ܕܢܐܬܐ ܠܗܠܝܢ. ܐܠܐ ܐܢ ܗ̇ܘ ܕܐܢܬ ܡܬܪܚܡ ܐܢܬ ܘܡܪܚܦ ܐܢܬ ܥܠܘܗܝ

81. Apocalypse of Baruch 75:6

    ܡܛܠ ܕܐܢ ܡܬܪܚܡܘ ܠܐ ܡܬܪܚܡ ܐܢܬ ܥܠ ܒܢܝ̈ܢܫܐ. ܐܝܠܝܢ ܕܬܚܝܬ ܝܡܝܢܟ ܠܐ ܡܫܟܚܝܢ ܕܢܡܛܘܢ ܠܗܠܝܢ. ܐܠܐ ܐܝܠܝܢ ܕܒܡܢ̈ܝܢܐ ܡܫܡ̈ܗܐ ܡܫܟܚܝܢ ܕܢܬܩܪܘܢ

82. Apocalypse of Baruch 75:7

    ܚܢܢ ܕܝܢ ܐܝܠܝܢ ܕܩܝ̇ܡܝܢ ܚܢܢ ܐܢܗ̣ܘ ܕܢܕܥ ܥܠ ܡܕܡ ܕܐܬܝܢ. ܘܢܫܬܥܒܕ ܠܗ̇ܘ ܕܐܝ̇ܬܝܢ ܡܢ ܡܨܪܝܢ. ܬܘܒ ܐܬ̇ܝܢܢ ܘܡܬܕܟܪܝܢ ܚܢܢ ܐܝܠܝܢ ܕܥ̣ܒܪ. ܘܚܕܝܢ ܥܠ ܡܕܡ ܕܗ̣ܘܐ

83. Apocalypse of Baruch 75:8

    ܐܠܐ ܕܝܢ ܢܕܥ ܗܫܐ. ܕܥܠ ܡܢܐ ܐܬܝܢ. ܘܠܐ ܢܫܬܘܕܥ ܪܝܫܢܘܬܐ ܕܗ̇ܘ ܕܐܣܩܢ ܡܢ ܡܨܪܝܢ. ܐܬ̇ܝܢܢ ܬܘܒ ܘܒܥ̇ܝܢܢ ܐܝܠܝܢ ܕܗ̈ܘܝ ܗܫܐ. ܘܡܬܬܥܝܩܝܢ ܚܢܢ ܒܟܐ̈ܒܐ ܥܠ ܐܝܠܝܢ ܕܓ̣ܕܫ ܀

84. Apocalypse of Baruch 76:1

    ܘܥ̣ܢܐ ܘܐܡ̣ܪ ܠܝ. ܡܛܘܠ ܕܐܬܦܫܩ ܠܟ ܓܠܝܢܗ ܕܚܙܘܐ ܗܢܐ ܐܝܟ ܕܨܠ̣ܝܬ. ܫܡ̣ܥ ܡܠܬܗ ܕܡܪܝܡܐ. ܕܬܕܥ ܡܕܡ ܕܥܬܝܕ ܕܢܓܕܫ ܠܟ ܡܢ ܒܬܪ ܗܠܝܢ

85. Apocalypse of Baruch 76:2

    ܡܛܠ ܕܡܐܙܠ ܐܙ̣ܠܬ ܡܢ ܗܕܐ ܐܪܥܐ. ܒܪܡ ܕܝܢ ܠܐ ܗܘܐ ܠܡܘܬܐ. ܐܠܐ ܠܢܛܪܐ ܕܙܒ̈ܢܐ

86. Apocalypse of Baruch 76:3

    ܣܩ ܗܟܝܠ ܠܪܝܫܗ ܕܛܘܪܐ ܗܢܐ ܘܢܥܒܪܘܢ ܩܕܡܝܟ ܟܠܗܘܢ ܐܬܪ̈ܘܬܐ ܕܐܪܥܐ ܗܕܐ. ܘܕܡܘܬܗ̇ ܕܬܒܝܠ ܘܪܝܫܐ ܕܛܘ̣ܪ̈ܐ. ܘܥܘܡܩܐ ܕܢܚܠܐ. ܘܥܘܡ̈ܩܘܗܝ ܕܝܡܐ ܘܡܢܝܢܐ ܕܢܗܪ̈ܘܬܐ. ܕܬܚܙܐ ܡܢܐ ܫܒܩ ܐܢܬ. ܘܠܐܝ̇ܟܐ ܐ̇ܙܠ ܐܢܬ

87. Apocalypse of Baruch 76:4

    ܗܕܐ ܕܝܢ ܓܕ̇ܫܐ ܡܢ ܒܬܪ ܐܪܒܥܝܢ ܝܘܡ̈ܝܢ

88. Apocalypse of Baruch 76:5

    ܗܫܐ ܗܟܝܠ ܒܝܘ̈ܡܬܐ ܗܠܝܢ ܙܠ ܘܐܠܦܝܗܝ ܠܥܡܐ ܟܡܐ ܕܡܫܟܚ ܐܢܬ. ܕܢܐܠܦܘܢ ܕܠܐ ܢܡܘܬܘܢ ܒܙܒܢܐ ܐܚܪܝܐ. ܐܠܐ ܢܐܠܦܘܢ ܕܢܐܚܘܢ ܒܙܒ̈ܢܐ ܐܚܪ̈ܝܐ ܀

89. Apocalypse of Baruch 77:1

    ܘܐ̇ܙܠܬ ܐܢܐ ܒܪܘܟ ܡܢ ܬܡܢ ܘܐ̇ܬܝܬ ܨܝܕ ܥܡܐ. ܘܟ̇ܢܫܬ ܐܢܘܢ ܡܢ ܪܒܐ ܘܥܕܡܐ ܠܙܥܘܪܐ. ܘܐܡ̇ܪܬ ܠܗܘܢ

90. Apocalypse of Baruch 77:2

    ܫܡ̣ܥܘ ܒ̈ܢܝ ܐܝܣܪܝܠ. ܚܙܘ ܕܟܡܐ ܐܫܬܚܪܬܘܢ ܡܢ ܬܪܥܣܪ ܫܒ̈ܛܐ ܕܐܝܣܪܝܠ

91. Apocalypse of Baruch 77:3

    ܠܟܘܢ ܕܝܢ ܘܠܐܒ̈ܗܝܟܘܢ ܡܪܝܐ ܝܗ̣ܒ ܢܡܘܣܐ ܝܬܝܪ ܡܢ ܟܘܠܗܘܢ ܥܡܡ̈ܐ

92. Apocalypse of Baruch 77:4

    ܘܡܛܠ ܕܥܒ̣ܪܘ ܐܚ̈ܝܟܘܢ ܦܘܩ̈ܕܢܘܗܝ ܕܡܪܝܡܐ. ܐܝܬܝ ܥܠܝܟܘܢ ܘܥܠܝܗܘܢ ܬܒ̇ܥܬܐ ܘܠܐ ܚܣ ܥܠ ܩܕܡ̈ܝܐ. ܐܠܐ ܐܦ ܠܐܚܪ̈ܝܐ ܝܗ̣ܒ ܠܫܒܝܐ. ܘܠܐ ܫܒ̣ܩ ܡܢܗܘܢ ܫܪܟܢܐ

93. Apocalypse of Baruch 77:5

    ܘܗܐ ܐܝܬܝܟܘܢ ܗܪܟܐ ܥܡܝ

94. Apocalypse of Baruch 77:6

    ܐܢ ܗܟܝܠ ܬܬܪܨܘܢ ܐܘܪ̈ܚܬܟܘܢ ܠܐ ܐܙܠܝܬܘܢ ܐܦ ܐܢܬܘܢ ܐܝܟ ܕܐܙܠܘ ܐܚ̈ܝܟܘܢ. ܐܠܐ ܗ̣ܢܘܢ ܢܐܬܘܢ ܠܘܬܟܘܢ

95. Apocalypse of Baruch 77:7

    ܡܛܘܠ ܕܡܪܚܡܢܐ ܗܘ ܗ̇ܘ ܕܦ̇ܠܚܝܢ ܐܢܬܘܢ ܠܗ. ܘܡܪܚܦܢܐ ܗܘ ܗ̇ܘ ܕܡܣܒܪܝܢ ܐܢܬܘܢ ܒܗ. ܘܫܪܝܪܐ ܗܘ ܕܢܛܐܒ ܘܠܐ ܕܢܒܐܫ

96. Apocalypse of Baruch 77:8

    ܠܐ ܗܐ ܐܢܬܘܢ ܚܙ̣ܝܬܘܢ ܡܕܡ ܕܓܕܫܗ̇ ܠܨܗܝܘܢ

97. Apocalypse of Baruch 77:9

    ܐܘ ܕܠܡܐ ܣ̇ܒܪܝܬܘܢ ܕܐܬܪܐ ܚܛ̣ܐ̇. ܘ̇ܡܛܠ ܗܢܐ ܐܣܬܚܦ. ܐܘ ܐܪܥܐ ܡܕܡ ܐܣ̣ܟܠܬ. ܘܡܛܠ ܗܢܐ ܐܫܬ̣ܠܡܬ

98. Apocalypse of Baruch 77:10

    ܘܠܐ ܝܕ̇ܥܝܢ ܐܢܬܘܢ ܕܡܛܘܠܬܟܘܢ ܕܚ̣ܛܝܬܘܢ ܐܣܬܚܦ ܗ̇ܘ ܐܝ̇ܢܐ ܕܠܐ ܚܛ̣ܐ. ܘܡܛܠ ܐܝܠܝܢ ܕܐܥܘܠܘ ܐܫܬܠܡ ܠܒܥܠܕܒ̈ܒܐ̇. ܗ̇ܘ ܐܝ̇ܢܐ ܕܠܐ ܐܣܟܠ

99. Apocalypse of Baruch 77:11

    ܘܥ̣ܢܐ ܟܠܗ ܥܡܐ ܘܐܡ̣ܪܘ ܠܝ. ܟܘܠ ܕܡܨ̇ܝܢܢ ܕܢܗܘܐ ܥܗ̇ܕܝܢܢ ܛ̇ܒ̈ܬܐ ܕܥܒ̣ܕ ܥܡܢ ܚܝܠܬܢܐ. ܥܗܝܕܝܢ ܚܢܢ. ܘܐܝܠܝܢ ܕܠܐ ܥܗܝܕܝܢ ܚܢܢ ܗ̣ܘ ܒܪ̈ܚ̣ܡܘܗܝ ܝܕܥ

100. Apocalypse of Baruch 77:12

     ܒܪܡ ܕܝܢ ܗܕܐ ܥ̣ܒܕ ܠܢ ܠܥܡܟ. ܟܬܘܒ ܐܦ ܠܐܚ̈ܝܢ ܠܒܒܠ ܐܓܪܬܐ ܕܝܘܠܦܢܐ ܘܟܪܟܐ ܕܣܒܪܬܐ. ܕܐܦ ܠܗܘܢ ܬܚܝܠ ܡܢ ܩܕܡ ܕܠܐ ܬܐܙܠ ܠܟ ܡܢ ܠܘܬܢ

← Previous · Next → — showing 501–600 of 614

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.