← All works
Peshitta Apocalypse of Baruch Peshitta (Syriac Old Testament) · 614 sections
Single column Two columns
Apocalypse of Baruch 77:13 ܐܒ̣ܕܘ ܠܗܘܢ ܓܝܪ ܪ̈ܥܘܬܗ ܕܐܝܣܪܝܠ . ܘܕܥ̣ܟܘ ܫܪ̈ܓܐ ܕܡܢܗܪܝܢ ܗܘܘ . ܘܟܠܘ̣ ܡܒܘ̈ܥܐ ܪܗܛܗܘܢ ܡ̣ܢ ܐܝܟ̇ܐ ܕܫ̇ܬܝܢ ܗ̇ܘܝܢ
Apocalypse of Baruch 77:14 ܚܢܢ ܕܝܢ ܐܫ̇ܬܒܩܢ ܒܚܫܘܟܐ ܘܒܗܝܠܐ ܕܥܒܐ . ܘܒܨܗܝܐ ܕܡܕܒܪܐ
Apocalypse of Baruch 77:15 ܘܥ̇ܢܝܬ ܘܐܡ̇ܪܬ ܠܗܘܢ . ܪ̈ܥܘܬܐ ܘܫܪ̈ܓܐ ܘܡܒ̈ܘܥܐ ܡܢ ܢܡܘܣܐ ܐܝܬܝܗܘܢ ܗܘܘ . ܘܐܢ ܚܢܢ ܐܙܠܝܢ ܚܢܢ ܐܠܐ ܢܡܘܣܐ ܩܝ̇ܡ ܗܘ
Apocalypse of Baruch 77:16 ܐܢ ܗܟܝܠ ܬܚܘܪܘܢ ܒܢܡܘܣܐ ܘܬܗܘܘܢ ܙܗܝܪܝܢ ܒܚܟܡܬܐ̣ . ܠܐ ܚܣ̇ܪ ܫܪܓܐ . ܘܪܥܝܐ ܠܐ ܥ̇ܢܕ . ܘܡܒܘܥܐ ܠܐ ܝܒ̇ܫ
Apocalypse of Baruch 77:17 ܒܪܡ ܕܝܢ ܐܝܟ ܕܐܡ̣ܪܬܘܢ ܠܝ . ܐܢܐ ܟܬ̇ܒ ܐܢܐ ܐܦ ܠܐܚܝ̈ܟܘܢ ܕܒܒܒܠ . ܘܐܫܕܪ ܒܝܕ ܒܢ̈ܝ ܐܢܫܐ . ܘܠܬܫܥܐ ܫܒ̈ܛܝܢ ܘܦܠܓܗ̣ ܗܟܢܐ ܐܟܬܘܒ ܘܐܫܕܪ ܒܝܕ ܦܪܚܬܐ
Apocalypse of Baruch 77:18 ܘܗ̣ܘܐ ܒܚܕ ܘܥܣܪܝܢ ܒܝܪܚܐ ܕܬܡܢܝܐ̣ ܐܬ̇ܝܬ ܐܢܐ ܒܪܘܟ . ܘܝܬ̇ܒܬ ܬܚܝܬ ܒܠܘܛܐ ܒܛܠܠܐ ܕܣ̈ܘܟܐ . ܘܐܢܫ̣ ܠܐ ܗܘ̣ܐ ܥܡܝ . ܐܠܐ ܐܢܐ ܒܠܚܘܕܝ̣
Apocalypse of Baruch 77:19 ܘܟ̇ܬܒܬ ܗܠܝܢ ܬܪ̈ܬܝܢ ܐܓܪ̈ܢ . ܚܕܐ ܫ̇ܕܪܬ ܒܝܕ ܢܫܪܐ ܠܬܫܥܐ ܫܒ̈ܛܝܢ ܘܦܠܓܗ̣ . ܘܐܚܪܬܐ ܫ̇ܕܪܬ ܠܐܝܠܝܢ ܕܒܒܒܠ ܒܝܕ ܬܠܬܐ ܐܢ̈ܫܝܢ
Apocalypse of Baruch 77:20 ܘܩ̇ܪܝܬ ܠܢܫܪܐ ܘܐܡ̇ܪܬ ܠܗ ܡ̈ܠܐ ܗܠܝܢ
Apocalypse of Baruch 77:21 ܠܟ ܥ̣ܒܕ ܡܪܝܡܐ ܕܬܗܘܐ ܡܥܠܝ ܡܢ ܟܠܗ̇ ܦܪ̈ܚܬܐ
Apocalypse of Baruch 77:22 ܘܗܫܐ ܙܠ ܘܠܐ ܬܫܪܐ ܒܐܬܪܐ . ܘܠܐ ܬܥܘܠ ܠܩܢܐ . ܘܠܐ ܬܩܘܡ ܥܠ ܟܘܠ ܐܝܠܢ ܥܕܡܐ ܕܬܥܒܪ ܦܬܝܗܘܢ ܕܡ̈ܝܐ ܣܓ̈ܝܐܐ ܕܢܗܪܐ ܦܪܬ . ܘܬܐܙܠ ܠܘܬ ܥܡܐ ܗ̇ܘ ܕܥ̇ܡܪ ܬܡܢ . ܘܫܕܝ ܠܗܘܢ ܐܓܪܬܐ ܗܕܐ
Apocalypse of Baruch 77:23 ܐܬܕܟܪ ܕܝܢ ܕܒܙܒܢܐ ܕܛܘܦܢܐ ܡܢ ܝܘܢܐ ܩ̇ܒܠ ܢܘܚ ܦܐܪܐ ܕܙܝܬܐ ܟܕ ܫܕܪܗ̇ ܗܘܐ ܡܢ ܩܒܘܬܐ
Apocalypse of Baruch 77:24 ܐܠܐ ܐܦ ܥܘܪ̈ܒܐ ܫܡ̇ܫܘ ܠܐܠܝܐ ܟܕ ܡܝܬܝܢ ܗܘܘ ܠܗ ܬܘܪܣܝܐ . ܐܝܟ ܕܡܬܦܩܕ ܗܘܐ ܠܗܘܢ
Apocalypse of Baruch 77:25 ܐܦ ܫܠܝܡܘܢ ܒܙܒܢܐ ܕܡܠܟܘܬܗ ܠܟܘܠ ܐܬܪ ܕܨ̇ܒܐ ܗܘܐ ܕܢܫܕܪ ܐܘ ܕܢܒܥܐ ܡܕܡ̣ . ܠܦܪܚܬܐ ܦܩ̇ܕ ܗܘܐ ܘܡܫܬܡܥܐ ܗܘܬ ܠܗ̣ . ܐܝܟ ܕܦ̇ܩܕ ܗܘܐ ܠܗ̇
Apocalypse of Baruch 77:26 ܘܗܫܐ̣ ܠܐ ܬܡܐܢ ܠܟ . ܘܠܐ ܬܪܟܢ ܠܝܡܝܢܐ ܐܘ ܠܣܡܠܐ . ܐܠܐ ܦ̣ܪܚ ܘܙܠ ܒܐܘܪܚܐ ܬܪܝܨܬܐ ܕܬܛܪ ܦܘܩܕܢܗ ܕܚܝܠܬܢܐ ܐܝܟ ܕܐܡ̇ܪܬ ܠܟ
Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source .