← All works

Peshitta Apocalypse of Baruch

Peshitta (Syriac Old Testament) · 614 sections

1. Apocalypse of Baruch 53:2

   ܘܚܙܝܬܗ̇ ܠܥܢܢܐ ܗ̇ܝ ܕܥ̇ܒܪܐ ܚܪܝܦܐܝܬ ܒܪ̈ܗܛܐ ܩܠܝ̈ܠܐ. ܘܟܣܝܬܗ̇ ܠܟܠܗ̇ ܐܪܥܐ

2. Apocalypse of Baruch 53:3

   ܘܗ̣ܘܐ ܡܢ ܒܬܪ ܗܠܝܢ ܫ̣ܪܝܬ ܗܘܬ ܥܢܢܐ ܗ̇ܝ ܡܡܛܪܐ ܥܠ ܐܪܥܐ̇. ܡ̈ܝܐ ܕܐܝܬ ܗܘܐ̇ ܒܗ̇

3. Apocalypse of Baruch 53:4

   ܘܚ̇ܙܝܬ ܕܠܐ ܗܘܐ ܚܕܐ ܗܘܬ ܕܡܘܬܗܘܢ ܕܡ̈ܝܐ ܗ̇ܢܘܢ ܕܢܚܬ̇ܝܢ ܗܘܘ ܡܢܗ̇

4. Apocalypse of Baruch 53:5

   ܫܘܪܝܐ ܓܝܪ ܩܕܡܝܐ ܐܘܟܡܝܢ ܗܘܘ ܣ̇ܓܝ ܥܕܡܐ ܠܥܕܢܐ. ܘܡܢ ܒܬܪܟܢ ܚܙ̇ܝܬ ܕܢܗ̇ܪܝܢ ܗܘܘ ܡ̈ܝܐ. ܐܠܐ ܠܐ ܣܓܝܐܝܢ ܗܘܘ. ܘܡܢ ܒܬܪ ܗܠܝܢ ܬܘܒ̣ ܚ̇ܙܝܬ ܐܘܟܡ̈ܐ. ܘܡܢ ܒܬܪ ܗܠܝܢ ܬܘܒ ܢܗܝܪ̈ܐ. ܘܬܘܒ ܐܘܟܡ̈ܐ. ܘܬܘܒ ܢܗܝܪ̈ܐ

5. Apocalypse of Baruch 53:6

   ܗܕܐ ܕܝܢ ܗܘܬ ܥܕܡܐ ܠܬܪ̈ܬܥܣܪ̈ܐ ܙܒܢ̈ܝܢ. ܐܠܐ ܐܘܟ̈ܡܐ ܣܓܝܐ̈ܝܢ ܗܘܘ ܒܟܠܙܒܢ ܡܢ ܢܗܝܪ̈ܐ

6. Apocalypse of Baruch 53:7

   ܘܗ̣ܘܐ ܒܫܘܠܡܗ̇ ܕܥܢܢܐ ܘܗܐ ܐܡ̣ܛܪܬ ܡ̈ܝܐ ܐܘܟܡ̈ܐ. ܘܚܫܘܟܝܢ ܗܘܘ ܝܬܝܪ ܡܢ ܟܠܗܘܢ ܡ̈ܝܐ ܗ̇ܢܘܢ ܩܕ̈ܡܝܐ ܕܗܘܘ. ܘܢܘܪܐ ܡܚܠܛܐ ܗܘܬ ܒܗܘܢ. ܘܐܝ̇ܟܐ ܕܢܚ̇ܬܝܢ ܗܘܘ ܡ̈ܝܐ ܗܢ̇ܘܢ ܥܒ̇ܕܝܢ ܗܘܘ ܚܒ̇ܠܐ ܘܐܒܕܢܐ

7. Apocalypse of Baruch 53:8

   ܘܚܙ̇ܝܬ ܡܢ ܒܬܪ ܗܠܝ̣ܢ. ܠܗ̇ܘ ܒܪܩܐ ܕܚܙ̇ܝܬ ܗܘ̇ܝܬ ܒܪܝܫܗ̇ ܕܥܢܢܐ ܕܐܚܕܗ̇ ܘܐܚܬܗ̇ ܥܕܡܐ ܠܐܪܥܐ

8. Apocalypse of Baruch 53:9

   ܘܝܬܝܪܝܬ ܕܝܢ ܢܗ̣ܪ ܗܘܐ ܒܪܩܐ ܗ̇ܘ. ܐܝܟ ܕܢܢܗܪ ܠܟܠܗ̇ ܐܪܥܐ. ܘܐܣܝ ܠܗ̇ܢܘܢ ܐܬܪ̈ܘܬܐ. ܐܝ̇ܟܐ ܕܢܚܬܘ ܡ̈ܝܐ ܐܚܪ̈ܝܐ ܘܚ̇ܒܠܘ

9. Apocalypse of Baruch 53:10

   ܘܐܚܝܕ ܗܘܐ ܠܟܠܗ̇ ܐܪܥܐ. ܘܐܫܬܠܛ ܥܠܝܗ̇

10. Apocalypse of Baruch 53:11

    ܘܚ̇ܙܝܬ ܡܢ ܒܬܪ ܗܠܝܢ̣. ܘܗܐ ܬܪܥܣܪ̈ ܢܗܪ̈ܘܢ ܣ̇ܠܩܝܢ ܗܘܘ ܡܢ ܝܡܐ. ܘܚܕܝܪܝܢ ܗܘܘ ܠܗ ܠܗ̇ܘ ܒܪܩܐ ܘܡܫܬܥܒܕ̇ܝܢ ܗܘܘ ܠܗ

11. Apocalypse of Baruch 53:12

    ܘܐܢܐ ܡܢ ܕܚܠܬܝ ܐܬܬ̇ܥܝܪܬ ܰ

12. Apocalypse of Baruch 54:1

    ܘܒܥ̇ܝܬ ܡܢ ܚܝܠܬܢܐ ܘܐܡ̇ܪܬ. ܐܢܬ ܡܪܝܐ ܒܠܚܘܕܝܟ ܡܩܕܡ ܐܢܬ ܝܕ̇ܥ ܐܢܬ ܪ̈ܘܡܘܗܝ ܕܥܠܡܐ. ܘܡܕܡ ܕܒܙܒ̈ܢܐ ܓܕ̇ܫ ܡܝܬܐ ܐܢܬ ܒܡܠܬܟ. ܘܠܘܩܒܠ ܥ̇ܒ̈ܕܝܗܘܢ ܕܥܡܘܪ̈ܝܗ̇ ܕܐܪܥܐ ܡܣܪܗܒܬ ܪ̈ܫܝܗܘܢ ܕܙܒ̈ܢܐ. ܘܣܘܦܗܘܢ ܕܥ̈ܕܢܐ ܐܢܬ ܒܠܚܘܕܝܟ ܝܕ̇ܥ ܐܢܬ

13. Apocalypse of Baruch 54:2

    ܗ̇ܘ ܕܡܕܡ ܠܐ ܥܛ̣ܠ ܠܗ. ܐܠܐ ܟܘܠ ܡܕܡ ܦܫܝܩܐܝܬ ܒܪܡܙܐ ܥ̇ܒܕ ܐܢܬ

14. Apocalypse of Baruch 54:3

    ܗ̇ܘ ܕܥܘܡ̈ܩܐ ܐܝܟ ܪ̈ܘܡܐ ܐܬ̇ܝܢ ܠܘܬܟ. ܘܪ̈ܝܫܝ ܥܠܡ̈ܐ ܠܡܠܬܟ ܡܫܡܫܝܢ

15. Apocalypse of Baruch 54:4

    ܗ̇ܘ ܕܓ̇ܠܐ ܠܐܝܠܝܢ ܕܕܚ̇ܠܝܢ ܠܡܕܡ ܕܥܬܝܕ ܠܗܘܢ. ܕܡܢ ܗܪܟܐ ܢܒܝܐܐ ܐܢܘܢ̣

16. Apocalypse of Baruch 54:5

    ܡܘܕܥ ܓܢܒܪ̈ܘܬܐ ܠܐܝܠܝܢ ܕܠܐ ܝܕܥ̇ܝܢ. ܬܪܥ ܣܝܓܐ ܠܐܝܠܝܢ ܕܠܐ ܡܦܣܝܢ. ܘܡܢܗܪ ܚܫܘܟ̈ܬܐ ܘܓ̇ܠܐ ܟܣܝ̈ܬܐ ܠܐܝܠܝܢ ܕܕܠܐ ܡܘܡ ܐܢܘܢ. ܐܝܠܝܢ ܕܒܗܝܡܢܘܬܐ ܐܫܬܥܒܕܘ ܠܟ ܘܠܢܡܘܣܟ

17. Apocalypse of Baruch 54:6

    ܐܢܬ ܚܘ̣ܝܬ ܠܥ̣ܒܕܟ ܚܙܘܢܐ ܗܢܐ. ܓ̇ܠܐ ܠܝ ܐܦ ܦܘܫܩܗ

18. Apocalypse of Baruch 54:7

    ܝܕ̇ܥ ܐܢܐ ܓܝܪ ܕܥܠ ܐ̇ܝܠܝܢ ܕܒ̇ܥ̇ܝܬ ܡܢܟ ܢܣ̇ܒܬ ܦܬܓܡܐ. ܘܥܠ ܡܕܡ ܕܒ̇ܥܝܬ ܓܠ̣ܝܬ ܠܝ. ܘܐܘܕܥܬܢܝ ܒܐܝ̇ܢܐ ܩܠܐ ܐܫ̇ܒܚܟ. ܐܘ ܡܢ ܐܝܠܝܢ ܗܕ̈ܡܐ ܐܣܩ ܠܟ ܬܫܒܘܚܬܐ ܘܗܘܠܠܐ

19. Apocalypse of Baruch 54:8

    ܐܢ ܓܝܪ ܢܗܘܘܢ ܗܕܡ̈ܝ ܦܘ̈ܡܐ ܘܡܢ̈ܐ ܕܪ̈ܝܫܝ ܩ̈ܠܐ̣. ܐܦ ܠܐ ܗܟܢܐ ܡܫܟܚ ܐܢܐ ܕܐ̇ܦܪܥܟ ܬܫܒܘܚܬܐ. ܐܘ ܕܐ̇ܫܒܚܟ ܐܝܟ ܕܙܕܩ̇. ܘܠܐ ܬܫܒܘܚܬܟ ܡ̇ܫܟܚ ܐܢܐ ܕܐ̇ܬܢܐ̇. ܐܘ ܕܐܡ̇ܪ ܗܕܪܐ ܕܝܐܝܘܬܟ

20. Apocalypse of Baruch 54:9

    ܡܢܐ ܓܝܪ ܐܢܐ ܒܒܢܝܢ̈ܫܐ. ܐܘ ܡܢܐ ܚܫܝܒ ܐܢܐ ܒܐܝܠܝܢ ܕܡܝܬܪܝܢ ܡܢܝ ܕܫܡ̇ܥܬ ܗܠܝܢ ܟܘܠܗܝܢ ܬܡܝ̈ܗܬܐ ܡܢ ܡܪܝܡܐ. ܘܣܒܪ̈ܬܐ ܕܠܐ ܡܣܬ̈ܝܟܢ ܡܢ ܗ̇ܘ ܕܒܪܢܝ

21. Apocalypse of Baruch 54:10

    ܛܘܒ̈ܝܗ̇ ܠܐܡܝ ܒܝܠܕ̈ܬܐ. ܘܬܫܬܒܚ ܒܢ̈ܫܐ ܝܠܕܬܝ

22. Apocalypse of Baruch 54:11

    ܐܢܐ ܕܝܢ ܠܐ ܐܫ̇ܬܘܩ ܕܐܫ̇ܒܚ ܠܚܝܠܬܢܐ. ܐܠܐ ܒܩܠܐ ܕܫܘܒܚܐ ܐܬ̇ܢܐ ܬܕܡܪ̈ܬܗ

23. Apocalypse of Baruch 54:12

    ܘܡ̣ܢܘ ܓܝܪ ܡܬܕܡܐ ܒܬܕܡܪ̈ܬܟ ܐܠܗܐ. ܐܘ ܡܢ̣ܘ ܡܕܪܟ ܡܚܫܒܬܟ ܥܡܝܩܬܐ ܕܚܝ̈ܐ

24. Apocalypse of Baruch 54:13

    ܐܢܬ ܓܝܪ ܒܬܪܥܝܬܟ ܡܕܒܪܬ ܟܠ ܒܪ̈ܝܬܐ ܕܒܪܬ ܝܡܝܢܟ. ܘܐܢܬ ܟܘܠ ܡܒܘܥܐ ܕܢܘܗܪܐ ܠܘܬܟ ܬܩܢ̣ܬ. ܘܐܘܨܪ̈ܐ ܕܚܟܡܬܐ ܬܚܝܬ ܬܪܘܢܘܣ ܕܝܠܟ ܥܬ̣ܕܬ

25. Apocalypse of Baruch 54:14

    ܘܟܐܢܐܝܬ ܐܒ̇ܕܝܢ ܐܝܠܝܢ ܕܠܐ ܐܚܒܘ ܠܢܡܘܣܟ. ܘܬܫܢܝܩܐ ܕܕܝ̣ܢܐ ܡܩܒܠ ܠܐܝܠܝܢ ܕܠܐ ܐܫܬܥܒܕܘ ܠܐܘܚܕܢܟ

26. Apocalypse of Baruch 54:15

    ܐܢ ܐܕܡ ܓܝܪ ܩܕܡܝ ܚܛ̣ܐ. ܘܐܝܬܝ ܡܘܬܐ ܥܠ ܟܠ ܕܠܐ ܒܙܒܢܗ. ܐܠܐ ܐܦ ܐܝܠܝܢ ܕܐܬܝܠܕܘ ܡܢܗ ܟܘܠ ܐܢܫ ܐܢܫ ܡܢܗܘܢ ܛܝܒ ܠܢܦܫܗ ܬܫܢܝܩܐ ܕܥܬܝܕ. ܘܬܘܒ ܐܢܫ ܐܢܫ ܡܢܗܘܢ ܓܒ̣ܐ ܠܗ ܬܫܒ̈ܚܬܐ ܕܥܬܝ̈ܕܢ

27. Apocalypse of Baruch 54:16

    ܫܪܝܪܐܝܬ ܓܝܪ ܗ̇ܘ ܕܡܗ̇ܝܡܢ ܢܣܒ ܐܓܪܐ

28. Apocalypse of Baruch 54:17

    ܗܫܐ ܕܝܢ ܗܦܘܟܘ ܠܚ̣ܒܠܐ ܥ̈ܘ̇ܠܐ ܕܗܫܐ. ܡܛܠ ܕܚܪܝܦܐܝܬ ܡܬܦܩܕܝܢ ܐܢܬܘܢ ܕܒܙܒܢ ܐܣܠܝܬܘܢ ܐܢܬܘܢ ܣܟܘܠܬܢܘܬܗ ܕܡܪܝܡܐ

29. Apocalypse of Baruch 54:18

    ܠܐ ܓܝܪ ܐܠܦܟܘܢ ܥ̈ܒ̇ܕܘܗܝ. ܐܦ ܠܐ ܐܦܝܣܬܟܘܢ ܐܘܡܢܘܬܐ ܕܒ̣ܪܝܬܗ ܕܒܟܠܙܒܢ

30. Apocalypse of Baruch 54:19

    ܠܐ ܐܝܬܘܗܝ ܗܟܝܠ ܐܕܡ ܥܠ̣ܬܐ ܐܠܐ ܠܢܦܫܗ ܒܠܚܘܕ. ܟܠܢ ܕܝܢ ܐܢܫ ܐܢܫ ܗ̣ܘܐ ܠܢܦܫܗ ܐܕܡ

31. Apocalypse of Baruch 54:20

    ܐܢܬ ܕܝܢ ܡܪܝܐ ܥܠ ܐܝܠܝܢ ܕܓܠ̣ܝܬ ܠܝ ܦܫ̇ܩ ܠܝ. ܘܥܠ ܡܕܡ ܕܒ̇ܥܝܬ ܡܢܟ ܐ̇ܘܕܥܝܢܝ

32. Apocalypse of Baruch 54:21

    ܒܫܘܠܡܗ ܓܝܪ ܕܥܠܡܐ ܬܒܥܬܐ ܗܘ̇ܝܐ ܡܢ ܐܝܠܝܢ ܕܐܥܘܠܘ ܐܝܟ ܥܘ̣ܠܗܘܢ. ܘܡܫܒܚ ܐܢܬ ܠܡܗܝܡ̈ܢܐ ܐܝܟ ܗܝܡܢܘܬܗܘܢ

33. Apocalypse of Baruch 54:22

    ܠܐܝܠܝܢ ܓܝܪ ܕܒܕܝܠܟ ܐܢܘܢ ܐܢܬ ܡܕܒܪܬ. ܘܠܐܝܠܝܢ ܕܚ̇ܛܝܢ ܥ̇ܛܐ ܐܢܬ ܡܢ ܕܝܠܟ ܀ • •

34. Apocalypse of Baruch 55:1

    ܘܗ̣ܘܐ ܕܟܕ ܫܠܡ̇ܬ ܠܡܡܠܠܘ ܡ̈ܠܝܗ̇ ܕܨܠܘܬܐ ܗܕܐ̣. ܝܬ̇ܒܬ ܬܡܢ ܬܚܝܬ ܐܝܠܢܐ ܕܐܬܬܢܝܚ ܒܛܠܠܐ ܕܣܘ̈ܟܐ

35. Apocalypse of Baruch 55:2

    ܘܡܬܕܡܪ ܗܘ̇ܝܬ ܘܡܬܬܡܗ ܘܡܬܪܢܐ ܒܡܚ̣̈ܫܒܬܝ ܥܠ ܣܘܓܐܐ ܕܛ̇ܒܘܬܐ ܕܕܚ̣ܩܘ ܡܢܗܘܢ ܚܛ̈ܝܐ ܕܥܠ ܐܪܥܐ. ܘܥܠ ܬܫܢܝܩܐ ܣܓܝܐܐ ܕܒ̇ܣܪܘ ܥܠܘܗܝ. ܟܕ ܝܕ̇ܥܝܢ ܕܡܫܬܢܩܝܢ ܥܠ ܕܚܛ̇ܝܢ

36. Apocalypse of Baruch 55:3

    ܘܟܕ ܗܠܝܢ ܘܐܝܠܝܢ ܕܕ̈ܡܝܢ ܠܗܝܢ ܡ̇ܬܚܫܒ ܗܘ̇ܝܬ. ܘܗܐ ܐܫܬܠܚ ܠܘܬܝ ܪܡܐܝܠ ܡܠܐܟܐ ܗ̇ܘ ܕܩܐ̇ܡ ܥܠ ܚܙܘ̈ܢܐ ܕܫܪܪܐ ܘܐܡ̣ܪ ܠܝ

37. Apocalypse of Baruch 55:4

    ܠܡܢܐ ܡܕܠܚ ܠܟ ܠܒܟ ܒܪܘܟ. ܘܠܡܢܐ ܫܓ̇ܫܐ ܠܟ ܡܚܫܒܬܟ

38. Apocalypse of Baruch 55:5

    ܐܢ ܓܝܪ ܫܡܥܐ ܗܘ ܫܡܥ̣ܬ ܒܠܚܘܕ ܥܠ ܕܝ̣ܢܐ ܗܟܢܐ ܐܬܬ̣ܙܝܥܬ̣. ܡܢܐ ܟܕ ܬܚܙܝܘܗܝ ܒܥܝܢܝ̈ܟ ܥܝܢܒܓܠܐ

39. Apocalypse of Baruch 55:6

    ܘܐܢ ܡܢ ܣܘܟܝܐ ܕܡܣܟܐ ܐܢܬ ܠܝܘܡܗ ܕܚܝܠܬܢܐ. ܗܟܢܐ ܐܫ̣ܬܪܝܬ. ܡܢܐ ܟܕ ܬܡܛܐ ܐܢܬ ܠܡܐܬܝܬܗ

40. Apocalypse of Baruch 55:7

    ܘܐܢ ܥܠ ܡܠܬܐ ܕܛܒ̣ܐ ܕܬܫܢܝܩܐ ܕܐܝܠܝܢ ܕܐܣܟܠܘ ܗܢܐ ܟܠܗ ܐܬܪܗܒܬ. ܚܕ ܟܡܐ ܟܕ ܗ̇ܘ ܥ̇ܒܕܐ ܢܓܠܐ ܬܡܝܗ̈ܬܐ

41. Apocalypse of Baruch 55:8

    ܘܐܢ ܫܡ̈ܗܐ ܕܛ̇ܒ̈ܬܐ ܘܕܒܝ̣̈ܫܬܐ ܕܐ̈ܬܝܢ ܗܝ̇ܕܝܢ ܫܡ̣ܥܬ ܘܐܬܬܥ̣ܝܩܬ. ܡܢܐ ܟܕ ܬܚܙܐ ܡܕܡ ܕܓܠܝܐ ܪܒܘܬܐ ܕܠܗܠܝܢ ܡܟܣ ܘܠܗܠܝܢ ܡܒܣܡ ܀

42. Apocalypse of Baruch 56:1

    ܒܪܡ ܕܝܢ ܡܛܠ ܕܒܥ̣ܝܬ ܡܢ ܡܪܝܡܐ ܕܢܓܠܐ ܠܟ ܦܘܫܩܗ ܕܚܙܘܐ ܕܚ̣ܙܝܬ. ܐܫܬܠܚܬ ܐܢܐ ܕܐܡ̇ܪ ܠܟ

43. Apocalypse of Baruch 56:2

    ܕܡܘܕܥܘ ܐܘܕܥܟ ܚܝܠܬܢܐ ܕܘܒܪ̈ܐ ܕܙܒ̈ܢܐ ܕܥܒ̣ܪܘ ܘܕܐܝܠܝܢ ܕܥܬܝܕܝܢ ܕܢܥܒܪܘܢ ܒܥܠܡܗ . ܡܢ ܪܝܫ ܒܪܝܬܗ ܘܥܕܡܐ ܠܫܘܠܡܗ. ܕܐܝܠܝܢ ܕܒܢܟܠܐ ܘܕܐܝܠܝܢ ܕܒܫܪܪܐ.

44. Apocalypse of Baruch 56:3

    ܐܝܟ̇ܢܐ ܓܝܪ ܕܚ̣ܙܝܬ ܥ̇ܢܢܐ ܪܒܬܐ ܕܣܠ̣ܩܬ ܡܢ ܝܡܐ. ܘܐܙ̣ܠܬ ܘܟܣܝܬܗ̇ ܠܐܪܥܐ̣. ܗܘ̣ܝܘ ܐܘܪܟܗ ܕܥܠܡܐ ܗ̇ܘ ܕܥ̣ܒܕ ܚܝܠܬܢܐ. ܟܕ ܐܬܚܫܒ ܕܢܥܒܕ ܥܠܡܐ

45. Apocalypse of Baruch 56:4

    ܘܗ̣ܘܐ ܕܟܕ ܢܦܩ̣ܬ ܗܘܬ ܡܠܬܐ ܡܢ ܩܕܡܘܗܝ. ܩܡ ܗܘܐ ܐܘܪܟܗ ܕܥܠܡܐ ܡܕܡ ܙܥܘܪ. ܘܐܬܬܩܢ ܐܝܟ ܣܘܓܐܐ ܕܣܘܟܠܗ ܕܗ̇ܘ ܕܫܠܚܗ

46. Apocalypse of Baruch 56:5

    ܘܐܝܟ ܕܚܙ̣ܝܬ ܩܕܡܝ ܒܪܝܫܗ̇ ܕܥܢܢܐ ܡ̈ܝܐ ܐܘܟ̈ܡܐ ܕܩܕܡܝ ܢܚܬܘ ܥܠ ܐܪܥܐ. ܗ̣ܝ ܗܝ ܡܥܒܪܢܘܬܐ ܕܐܥܒܪ ܐܕܡ ܒܪܢܫܐ ܩܕܡܝܐ

47. Apocalypse of Baruch 56:6

    ܡܛܠ ܓܝܪ ܕܟܕ ܐܥܒܪ ܡܘܬܐ ܕܠܐ ܒܙܒܢܗ ܗܘ̣ܐ. ܘܐܒܠܐ ܐܫܬܡܗ. ܘܥܩܬܐ ܐܬܥܬܕܬܝ. ܘܟܐܒܐ ܐܬܒܪܝ. ܘܥܡܠܐ ܐܫܬܟܠܠ. ܘܫܘܒܗܪܐ ܫܪܝ ܕܢܬܩܝܡ. ܘܫܝܘܠ ܬܒ̇ܥܐ ܕܬܬܚܕܬ ܒܕܡܐ. ܘܢܣܒܐ ܕܒܢ̈ܝܐ ܗ̣ܘܬ . ܘܪܬܚ̇ܐ ܕܐܒܗ̈ܐ ܐܬܥܒܕ. ܘܪܒܘܬܐ ܕܐܢܫܘܬܐ ܐܬܡܟ̣ܟܬ. ܘܛܝܒܘܬܐ ܚ̣ܡܬ

48. Apocalypse of Baruch 56:7

    ܡܢܐ ܗܟܝܠ ܕܐܘܟܡ ܐܘ ܕܚܫܘܟ ܡܢ ܗܠܝܢ ܡܫܟܚ ܗܘܐ ܕܢܗܘܐ

49. Apocalypse of Baruch 56:8

    ܗܢܘ ܫܘܪܝܗܘܢ ܕܡ̈ܝܐ ܐܘܟܡ̈ܐ ܕܚ̣ܙܝܬ

50. Apocalypse of Baruch 56:9

    ܘܡܢ ܗܠܝܢ ܐ̇ܘܟ̈ܡܐ ܬܘܒ̣. ܐܘܟܡ̈ܐ ܡܬܝܠܕܝܢ ܗܘܘ. ܘܚܫܘܟ ܚܫܘ̈ܟܐ ܐܬܥܒܕ

51. Apocalypse of Baruch 56:10

    ܗ̣ܘ ܓܝܪ ܠܢܦܫܗ ܗ̣ܘܐ ܩܝܢܕܘܢܘܣ̣. ܐܦ ܠܡܠܐ̈ܟܐ̣ ܗ̣ܘܐ ܩܝܢܕܘܢܘܣ

52. Apocalypse of Baruch 56:11

    ܬܘܒ ܓܝܪ ܒܗ̇ܘ ܙܒܢܐ ܕܐܬܒܪܝ ܒܗ. ܐܝܬ ܗܘܐ ܠܗܘܢ ܚܐܪܘܬܐ

53. Apocalypse of Baruch 56:12

    ܘܢܚܬܘ ܡܢܗܘܢ ܘܐܬܚܠܛܘ ܥܡ ܢܫ̈ܐ

54. Apocalypse of Baruch 56:13

    ܘܗܝ̇ܕܝܢ ܐܝܠܝܢ ܕܗܟܢܐ ܥ̣ܒܕܘ̣. ܒܐܣܘܪ̈ܐ ܐܫܬܢܩܘ

55. Apocalypse of Baruch 56:14

    ܫܪܟܐ ܕܝܢ̇ ܕܣܘܓܐܐ ܕܡܠܐ̈ܟܐ ܕܡܢܝܢ ܠܝܬ ܠܗܘܢ ܐܬܟܠܝܘ

56. Apocalypse of Baruch 56:15

    ܘܐܝܠܝܢ ܕܥܡ̇ܪܝܢ ܗܘܘ ܒܐܪܥܐ ܐܒ̣ܕܘ ܐܟܚܕܐ. ܒܝܕ ܡ̈ܝܐ ܕܛܘܦܢܐ

57. Apocalypse of Baruch 56:16

    ܗܠܝܢ ܐܢܘܢ ܡ̈ܝܐ ܩܕܡ̈ܝܐ ܐܘܟܡ̈ܐ ܀

58. Apocalypse of Baruch 57:1

    ܘܡܢ ܒܬܪ ܗܠܝ̣ܢ. ܚܙ̣ܝܬ ܡ̈ܝܐ ܢܗܝܪ̈ܐ̣. ܗܢܘ ܡܒܘܥܗ ܕܐܒܪܗܡ. ܐܦ ܬܘܠܕ̈ܬܗ ܘܡܐܬܝܬܗ ܕܒܪܗ ܘܕܒܪ ܒܪܗ. ܘܕܐܝܠܝܢ ܕܕܡ̇ܝܢ ܠܗܘܢ

59. Apocalypse of Baruch 57:2

    ܡܛܠ ܕܒܗ̇ܘ ܙܒܢܐ ܕܠܐ ܟܬܒܐ ܢܡܘܣܐ ܠܘܬܗܘܢ ܡܫܬܡܗ ܗܘܐ. ܘܥ̇ܒ̈ܕܐ̇ ܕܦܘ̈ܩܕܢܐ ܗܝ̇ܕܝܢ ܡܫܬܠܡܝܢ ܗܘܘ. ܘܗܝܡܢܘܬܐ ܕܕܝ̣ܢܐ ܕܥܬܝܕ ܗܝ̇ܕܝܢ ܡܬܝܠܕܐ ܗܘܬ. ܘܣܒܪܐ ܕܥܠܡܐ ܕܡܬܚܕܬ̣. ܗܝ̇ܕܝܢ ܡܬܒܢܐ ܗܘܐ. ܘܡܘܠܟܢܐ ܕܚܝ̈ܐ ܕܡܢ ܒܬܪ ܟܢ ܐܬ̇ܐ ܡܬܢܨܒ ܗܘܐ

60. Apocalypse of Baruch 57:3

    ܗܠܝܢ ܐܢܘܢ ܡ̈ܝܐ ܢܗܝܪ̈ܐ ܕܚ̣ܙܝܬ ܀

61. Apocalypse of Baruch 58:1

    ܘܡ̈ܝܐ ܬܠܝܬ̈ܝܐ ܐܘܟ̈ܡܐ ܕܚܙܝܬ̣. ܗ̇ܢܘ ܚܒܟܐ ܕܟܠ ܚܛܗ̈ܐ̇. ܕܡܢ ܒܬܪܟܢ ܥ̣ܒܕܘ ܥܡܡ̈ܐ. ܡܢ ܒܬܪ ܡܘܬܗܘܢ ܕܗ̇ܢܘܢ ܙܕܝܩ̈ܐ. ܘܪܘܫܥܗ̇ ܕܐܪܥܐ ܕܡܨܪܝܢ ܕܡܪܫܥܝܢ ܗܘܘ. ܒܫܘܥܒܕܐ ܕܡܫܥܒܕܝܢ ܗܘܘ ܠܒܢܝ̈ܗܘܢ ܕܗܢ̇ܘܢ

62. Apocalypse of Baruch 58:2

    ܒܪܡ ܕܝܢ ܐܦ ܗ̣ܢܘܢ ܐܒܕܘ ܠܐܚܪܝܬܐ

63. Apocalypse of Baruch 59:1

    ܘܡ̈ܝܐ ܪ̈ܒܝܥܝܐ ܢܗܝܪ̈ܐ ܕܚܙ̣ܝܬ̣. ܗ̣ܝ ܗܝ ܡܐܬܝܬܗ ܕܡܘܫܐ ܘܕܐܗܪܘܢ ܘܕܡܪܝܡ . ܘܕܝܫܘܥ ܒܪܢܘܢ ܘܕܟܠܒ̣. ܘܕܟܠܗܘܢ ܐܝܠܝܢ ܕܕܡ̇ܝܢ ܠܗܘܢ

64. Apocalypse of Baruch 59:2

    ܒܗ̇ܘ ܓܝܪ ܙܒܢܐ ܫܪܓܗ ܕܢܡܘܣܐ ܕܠܥܠܡ ܐܢܗܪ ܠܟܠ ܐܝܠܝܢ ܕܝܬ̇ܒܝܢ ܗܘܘ ܒܚܫܘܟܐ. ܕܠܐܝܠܝܢ ܕܡܗܝܡܢܝܢ ܢܘܕܥ ܡܘܠܟܢܗ ܕܐܓܪܗܘܢ. ܘܠܐܝܠܝܢ ܕܟ̇ܦܪܝܢ ܬܫܢܝܩܐ ܕܢܘܪܐ ܕܢܛܝܪ ܠܗܘܢ

65. Apocalypse of Baruch 59:3

    ܐܠܐ ܐܦ ܫܡܝܐ ܒܗ̇ܘ ܙܒܢܐ ܐܬܬܚܕܘ ܡܢ ܐܬܪܗܘܢ. ܘܕܬܚܝܬ ܬܪܘܢܘܣ ܕܚܝܠܬܢܐ ܐܬܬܙܝܥܘ. ܟܕ ܐܚܝܕ ܗܘܐ ܠܡܘܫܐ ܠܘܬܗ

66. Apocalypse of Baruch 59:4

    ܚܘܝܗ ܓܝܪ ܙܘܗܪ̈ܐ ܣܓܝܐ̈ܐ ܥܡ ܕܘܒܪ̈ܐ ܕܢܡܘ̈ܣܐ ܘܫܘܠܡܐ ܕܙܒܢܐ ܐܝܟ ܕܐܦ ܠܟ. ܘܬܘܒ ܕܝܢ ܕܡܘܬܗ̇ ܕܨܗܝܘܢ ܘܡܘܫܚ̈ܬܗ̇ ܕܡܬܥܒܕܐ. ܘܕܡܘܬܐ ܕܒܝܬ ܡܩܕܫܐ ܕܗܫܐ

67. Apocalypse of Baruch 59:5

    ܐܠܐ ܐܦ ܗܝ̇ܕܝܢ ܚܘܝܗ ܗܘܐ ܡܘܫ̈ܚܬܗ̇ ܕܢܘܪܐ. ܐܦ ܥܘ̈ܡܩܘܗܝ ܕܬܗܘܡܐ. ܘܝܘܩܪܗܝܢ ܕܪ̈ܘܚܐ. ܘܡܢܝܢܐ ܕܛܘ̈ܦܝ ܡܛܪܐ

68. Apocalypse of Baruch 59:6

    ܘܐܚܕܗ ܕܪܘܓܙܐ. ܘܣܘܓܐܐ ܕܢܓܝܪܘܬ ܪܘܚܐ. ܘܫܪܪܗ ܕܕܝ̣ܢܐ

69. Apocalypse of Baruch 59:7

    ܘܥ̇ܩܪܗ̇ ܕܚܟܡܬܐ. ܘܥܘܬܪܐ ܕܣܟܘܠܬܢܘܬܐ. ܘܡܒܘܥܐ ܕܐܝܕܥܬܐ

70. Apocalypse of Baruch 59:8

    ܘܪܘܡܗ ܕܐܐܪ. ܘܪܒܘܬܗ ܕܦܪܕܝܣܐ. ܘܫܘܠܡܗܘܢ ܕܥܠܡ̈ܐ. ܘܪܝܫ ܝܘܡܐ ܕܕܝܢ̣ܐ

71. Apocalypse of Baruch 59:9

    ܘܡܢܝܢܐ ܕܩܘܪ̈ܒܢܐ. ܘܐܪ̈ܥܬܐ ܕܥܕܟܝܠ ܠܐ ܐܬ̈ܝ

72. Apocalypse of Baruch 59:10

    ܘܦܘܡܗ̇ ܕܓܗܢܐ. ܘܩܝܡܐ ܕܬܒܥܬܐ. ܘܐܬܪܐ ܕܗܝܡܢܘܬܐ. ܘܕܘܟܬܐ ܕܣܒܪܐ

73. Apocalypse of Baruch 59:11

    ܘܕܡܘܬܐ ܕܬܫܢܝܩܐ ܕܥܬܝܕ. ܘܣܘܓܐ ܕܡܠܐ̈ܟܐ ܕܡܢܝܢ ܠܝܬ ܠܗܘܢ. ܘܚܝ̈ܠܘܬܐ ܕܫܠܗܒܝܬܐ. ܘܙܗܪܗܘܢ ܕܒܪ̈ܩܐ. ܘܩܠܐ ܕܪ̈ܥܡܐ. ܘܣܕܪ̈ܝ ܪ̈ܝܫܐ ܕܡܠܐ̈ܟܐ. ܘܐܘܨܪ̈ܐ ܕܢܘܗܪܐ. ܘܚܘ̈ܠܦܐ ܕܙܒ̈ܢܐ. ܘܥܘ̈ܩܒܐ ܕܢܡܘܣܐ

74. Apocalypse of Baruch 59:12

    ܗܠܝܢ ܐܢܘܢ ܡ̈ܝܐ ܪ̈ܒܝܥܝܐ ܘܢܗܝܪ̈ܐ ܕܚ̣ܙܝܬ ܀

75. Apocalypse of Baruch 60:1

    ܘܡ̈ܝܐ ܚܡ̈ܝܫܝܐ ܐܘ̈ܟܡܐ ܕܚ̣ܙܝܬ ܕܡܡܛܪܝܢ. ܗܠܝܢ ܐܢܘܢ ܥ̇ܒ̈ܕܐ ܕܥܒ̇ܕܝܢ ܗܘܘ ܐܡܘܪ̈ܝܐ ܘܠܘܚܫ̈ܬܐ ܕܚܪ̈ܫܝܗܘܢ ܕܥ̇ܒܕܝܢ ܗܘܘ. ܘܒܝ̣ܫ̈ܬܐ ܕܪ̈ܐܙܝܗܘܢ. ܘܚܒܟܐ ܕܛܢܦܘܬܗܘܢ

76. Apocalypse of Baruch 60:2

    ܐܠܐ ܐܦ ܐܝܣܪܐܝܠ ܐܬܛܢܦ ܗܝ̇ܕܝܢ ܒܚܛܗ̈ܐ ܒܝܘܡ̈ܬܐ ܕܕܝ̇ܢ̈ܐ . ܟܕ ܚܙ̇ܝܢ ܗܘܘ ܐܬܘ̈ܬܐ ܣܓܝܐ̈ܬܐ ܕܗ̈ܘܝܢ ܗ̈ܘܝ ܡܢ ܗ̇ܘ ܕܥܒ̣ܕ ܐܢܘܢ. .

77. Apocalypse of Baruch 61:1

    ܘܡ̈ܝܐ ܫܬܝܬ̈ܝܐ ܢܗܝܪ̈ܐ ܕܚ̣ܙܝܬ. ܗ̇ܘ ܗܘ ܙܒܢܐ ܕܐܬܝܠܕ ܒܗ ܕܘܝܕ ܘܫܠܝܡܘܢ

78. Apocalypse of Baruch 61:2

    ܘܗ̣ܘܐ ܒܗ̇ܘ ܙܒܢܐ ܒܢܝܢܗ̇ ܕܨܗܝܘܢ. ܘܚܘܕܬܐ ܕܒܝܬ ܡܩܕܫܐ. ܘܐܫ̣ܕ ܕܡܐ ܣܓܝܐܐ ܕܥܡ̈ܡܐ ܕܚܛܘ ܗܝ̇ܕܝܢ. ܘܩܘܪ̈ܒܢܐ ܣܓܝ̈ܐܐ ܕܐܬܩܪܒܘ ܗܝ̇ܕܝܢ ܒܚܘܕܬܐ ܕܒܝܬ ܡܩܕܫܐ

79. Apocalypse of Baruch 61:3

    ܘܫܠܡܐ ܘܫܝܢܐ ܒܗ̇ܘ ܙܒܢܐ ܩܐ̇ܡ ܗܘܐ

80. Apocalypse of Baruch 61:4

    ܘܚܟܡܬܐ ܒܟܢܘܫܬܐ ܡܫܬܡܥܐ ܗܘܬ. ܘܥܘܬܪܐ ܕܣܟܘܠܬܢܘܬܐ ܒܟܢ̈ܫܐ ܡܬܪܘܪܒ ܗܘܐ

81. Apocalypse of Baruch 61:5

    ܘܥܐܕ̈ܐ ܕܩܕܝܫܘܬܐ ܒܛܒܘܬܐ ܘܒܒܘܣܡܐ ܣܓܝܐܐ ܡܫܬܠܡܝܢ ܗܘܘ

82. Apocalypse of Baruch 61:6

    ܘܕܝܢ̣ܐ ܕܡܕܒܪ̈ܢܐ ܗܝ̇ܕܝܢ ܕܠܐ ܢܟܠܐ ܡܬܚܙܐ ܗܘܐ. ܘܙܕܝܩܘܬܐ ܕܦܘܩܕܢ̈ܘܗܝ ܕܚܝܠܬܢܐ ܒܫܪܪܐ ܡܫܬܡܠܝܐ ܗܘܬ

83. Apocalypse of Baruch 61:7

    ܘܐܪܥܐ ܕܐܬܪܚܡܬ ܗ̇ܝܕܝܢ ܒܗ̇ܘ ܙܒܢܐ. ܘܡܛܠ ܕܠܐ ܚ̇ܛܝܢ ܗܘܘ ܥܡܘܪ̈ܝܗ̣̇. ܝܬܝܪ ܡܢ ܟܠܗܝܢ ܐܪ̈ܥܬܐ ܡܫܬܒܚܐ ܗܘܬ. ܘܨܗܝܘܢ ܡܕܝܢܬܐ ܗܝ̇ܕܝܢ ܫܠܝܛܐ ܗܘܬ ܥܠ ܟܠ ܐܪ̈ܥܬܐ ܘܐܬܪ̈ܘܬܐ

84. Apocalypse of Baruch 61:8

    ܗܠܝܢ ܐܢܘܢ ܡ̈ܝܐ ܢܗܝܪ̈ܐ ܕܚܙ̣ܝܬ ܀ ܀

85. Apocalypse of Baruch 62:1

    ܘܡ̈ܝܐ ܫܒܝ̈ܥܝܐ ܐܘܟ̈ܡܐ ܕܚ̣ܙܝܬ̣. ܗ̣ܝ ܗܝ ܡܗܦܟܢܘܬܐ ܕܡܚܫܒܬܗ ܕܝܘܪܒܥܡ ܕܐܬܚܫܒ ܕܢܥܒܕ ܬܪܝܢ ܥ̈ܓܠܝܢ ܕܕܗܒܐ

86. Apocalypse of Baruch 62:2

    ܘܟܠ ܪ̈ܘܫܥܐ ܕܐܪܫܥܘ ܡ̈ܠܟܐ ܕܗܘܘ ܡܢ ܒܬܪܗ

87. Apocalypse of Baruch 62:3

    ܘܚܪܡܗ̇ ܕܐܝܙܒܠ. ܘܕܚܠܬ ܦܬܟܪ̈ܐ ܕܦܠ̣ܚ ܐܝܣܪܝܠ ܒܗ̇ܘ ܙܒܢܐ

88. Apocalypse of Baruch 62:4

    ܘܟܠܝܗ ܕܡܛܪܐ ܘܟ̈ܦܢܐ ܕܗܘܘ̣. ܥܕܡܐ ܕܢܐܟ̣̈ܠܢ ܢܫ̈ܐ ܦܐܪ̈ܐ ܕܟܪ̈ܣܬܗܝܢ

89. Apocalypse of Baruch 62:5

    ܘܙܒܢܐ ܕܫܒܝܬܗܘܢ ܗ̇ܘ ܕܐܬ̣ܐ ܥܠ ܬܫܥܐ ܫܒ̈ܛܝܢ ܘܦܠܓܗ. ܡܛܠ ܕܐܝܬܝܗܘܢ ܗܘܘ ܒܚܛܗ̈ܐ ܣܓ̈ܝܐܐ

90. Apocalypse of Baruch 62:6

    ܘܐܬ̣ܐ ܣܠܒܢܣܪ ܡ̇ܠܟܐ ܕܐܬܘܪ̈ܝܐ. ܘܫܒ̣ܐ ܐܢܘܢ

91. Apocalypse of Baruch 62:7

    ܥܠ ܥܡ̈ܡܐ ܕܝܢ ܣܓ̇ܝ ܗܘ ܠܡܐܡܪ̣. ܕܟܡܐ ܡܥܘܠܝܢ ܗܘܘ ܘܡܪܫܥܝܢ ܒܟܠܙܒܢ. ܘܠܐ ܡܡܬܘܡ ܐܙܕܕܩܘ

92. Apocalypse of Baruch 62:8

    ܗܠܝܢ ܐܢܘܢ ܡ̈ܝܐ ܫܒܝ̈ܥܝܐ ܐܘ̈ܟܡܐ ܕܚ̣ܙܝܬ ܀

93. Apocalypse of Baruch 63:1

    ܘܡ̈ܝܐ ܬܡ̈ܝܢܝܐ ܢܗܝܪ̈ܐ ܕܚ̣ܙܝܬ̣. ܗ̣ܝ ܗܝ ܟܐܢܘܬܗ ܘܬܪܝܨܘܬܗ ܕܚܙܩܝܐ ܡ̇ܠܟܐ ܕܝܗܘܕܐ. ܘܛܒܘܬܗ ܕܐܬܬ ܥܠܘܗܝ̇

94. Apocalypse of Baruch 63:2

    ܟܕ ܓܝܪ ܐܬܬܙܝܥ ܣܢܚܪܝܒ ܕܢܐܒܕ. ܘܪܘܓܙܗ ܫ̇ܓܫ ܗܘܐ ܠܗ ܕܐܝ̇ܟܢܐ ܢܐܒܕ ܀ ܀ • ܐܦ ܣܘܓܐܐ ܓܝܪ ܕܥܡܡ̈ܐ ܕܐܝܬ ܗܘܐ ܥܡܗ

95. Apocalypse of Baruch 63:3

    ܟܕ ܕܝܢ ܫܡ̣ܥ ܚܙܩܝܐ ܡ̇ܠܟܐ ܗܠܝܢ ܕܡܬܚܫܒ ܗܘܐ ܐܬܘܪܝܐ ܡ̇ܠܟܐ ܕܢܐܬܐ ܘܢܐܚܕܝܘܗܝ ܘܢܘܒܕ ܠܥܡܗ̇. ܠܬܪܝܢ ܫܒ̈ܛܝܢ ܘܦܠܓܗ ܕܐܫܬܚܪܘ. ܐܠܐ ܘܐܦ ܨܗܝܘܢ ܨܒ̇ܐ ܗܘܐ ܕܢܣܚܘܦ. ܗܝ̇ܕܝܢ ܐܬܬܟܠ ܚܙܩܝܐ ܥܠ ܥ̇ܒ̈ܕܘܗܝ. ܘܣܒܪ ܥܠ ܙܕܝܩܘܬܗ. ܘܡܠܠ ܥܡ ܚܝܠܬܢܐ ܘܐܡ̣ܪ

96. Apocalypse of Baruch 63:4

    ܚܙܝ ܕܗܐ ܡܛܝܒ ܣܢܚܪܝܦ ܕܢܘܒܕܢ. ܘܢܗܘܐ ܡܫܬܒܗܪ ܘܡܬܪܡܪܡ. ܡܐ ܕܐܘܒܕܗ̇ ܠܨܗܝܘܢ

97. Apocalypse of Baruch 63:5

    ܘܫܡܥܗ ܚܝܠܬܢܐ. ܚܟܝܡ ܗܘܐ ܓܝܪ ܚܙܩܝܐ. ܘܚܪ ܒܒܥܘܬܗ ܡܛܠ ܕܙ̇ܕܝܩ ܗܘܐ

98. Apocalypse of Baruch 63:6

    ܘܦܩ̣ܕ ܗܝ̇ܕܝܢ ܚܝܠܬܢܐ ܠܪܡܐܝܠ ܡܠܐܟܗ ܕܡܡܠܠ ܥܡܟ.

99. Apocalypse of Baruch 63:7

    ܘܢܦ̇ܩܬ ܘܐܘ̇ܒܕܬ ܠܣܘܓܗܘܢ ܗܠܝܢ ܕܗ̇ܘܐ ܗܘܐ ܒܠܚܘܕ ܡܢܝܢܐ ܕܪ̈ܘܪܒܢܝܗܘܢ ܡܐܐ ܘܬܡܢܐܝܢ ܘܚܡܫܐ ܐ̈ܠܦܝܢ. ܘܠܟܠ ܚܕ ܚܕ ܡܢܗܘܢ ܗܟܢܐ ܐܝܬ ܗܘܐ ܠܗ ܒܡܢܝܢܐ

100. Apocalypse of Baruch 63:8

     ܘܗ̣ܘܝܬ ܒܗ̇ܘ ܙܒܢܐ ܡܘܩܕ ܦܓܪ̈ܝܗܘܢ ܡܢ ܠܓܘ. ܡܐ̈ܢܐ ܕܝܢ ܘܙܝܢܐ ܡܢ ܠܒܪ ܢܛ̇ܪ ܗܘܝܬ ܡܛܠ ܕܝܬܝܪܐܝܬ ܬܕܡܪ̈ܬܗ ܕܚܝܠܬܢܐ ܢܬܚ̈ܙܝܢ. ܘܐܝܟ̇ܢܐ ܕܢܬܡܠܠ ܫܡܗ ܒܟܘܠܗ̇ ܐܪܥܐ

← Previous · Next → — showing 401–500 of 614

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.