← All works

Peshitta Apocalypse of Baruch

Peshitta (Syriac Old Testament) · 614 sections

1. Apocalypse of Baruch 44:9

   ܥ̇ܒܪ ܓܝܪ ܟܠܡܕܡ ܕܡܬܚܒܠ. ܘܐܙ̇ܠ ܟܠ ܡܐ ܕܡܐ̇ܬ ܘܡܬܛܥܐ ܟܘܠܗ ܙܒܢܐ ܕܗܫܐ. ܘܠܐ ܗ̇ܘܐ ܕܘܟܪܢ ܠܙܒܢܐ ܕܗܫܐ ܕܡܦܠܦܠ ܒܒ̣ܝ̈ܫܬܐ

2. Apocalypse of Baruch 44:10

   ܗ̇ܘ ܓܝܪ ܕܪܗ̇ܛ ܗܫܐ ܠܣܪܝܩܘܬܐ ܗܘ ܪܗ̇ܛ. ܘܗ̇ܘ ܕܡܨܠܚ ܒܥܓܠ ܢܦ̇ܠ ܘܡܬܡܟܟ

3. Apocalypse of Baruch 44:11

   ܡܕܡ ܓܝܪ ܕܥܬܝܕ̣ ܗ̇ܘ ܗܘ ܡܬܒܥܐ. ܘܡܕܡ ܕܒܬܪ ܟܢ ܐܬ̇ܐ̣. ܥܠ ܗ̇ܘ ܗܘ ܡ̇ܣܒܪܝܢܢ. ܐܝܬ ܓܝܪ ܙܒܢܐ ܕܠܐ ܥ̇ܒܪ.

4. Apocalypse of Baruch 44:12

   ܘܐ̇ܬܐ ܥܕܢܐ ܗ̇ܘ ܕܡܩܘܐ ܠܥܠܡ. ܘܥܠܡܐ ܚܕܬܐ. ܗ̇ܘ ܕܠܐܝܠܝܢ ܕܒܪܫܗ ܐܙ̇ܠܝܢ ܠܐ ܡܗܦܟ ܠܗܘܢ ܠܚܒ̇ܠܐ. ܘܥܠ ܐܝܠܝܢ ܕܐ̇ܙܠܝܢ ܠܬܫܢܝܩܐ ܠܐ ܡܪܚܡ. ܘܠܐܝܠܝܢ ܕܚ̈ܝܝܢ ܒܗ ܠܐ ܡܘܒܠ ܠܐܒܕܢܐ

5. Apocalypse of Baruch 44:13

   ܗܠܝܢ ܐܢܘܢ ܓܝܪ ܕܥܬܝܕܝܢ ܕܢܐܪܬܘܢ ܗܢܐ ܙܒܢܐ ܕܐܡܝܪ. ܘܕܝܠܗܘܢ ܗܝ ܝܪܬܘܬܐ ܕܙܒܢܐ ܕܡ̇ܠܝܟ

6. Apocalypse of Baruch 44:14

   ܗܠܝܢ ܐܝܠܝܢ ܕܐܬܩܢܘ ܠܗܘܢ ܐܘܨܪ̈ܐ ܕܚܟܡܬܐ. ܘܣܝ̈ܡܬܐ ܕܣܟܘܠܬܢܘܬܐ ܠܘܬܗܘܢ ܐܫܬܟܚ. ܘܡܢ ܪ̈ܚܡ̣ܐ ܠܐ ܐܪܚܩܘ. ܘܫܪܪܗ ܕܢܡܘܣܐ ܢܛ̣ܪܘ

7. Apocalypse of Baruch 44:15

   ܠܗܘܢ ܓܝܪ ܠܗܠܝܢ ܡܬܝܗܒ ܥܠܡܐ ܕܐܬ̇ܐ. ܡܥܡܪܗܘܢ ܕܝܢ ܕܫܪܟܐ ܕܣܓ̈ܝܐܐ ܒܢܘܪܐ ܗ̇ܘܐ ܀

8. Apocalypse of Baruch 45:1

   ܐܢܬܘܢ ܗܟܝܠ ܟܡܐ ܕܡܫܟܚܝܢ ܐܢܬܘܢ ܐܪܬܐܘܗܝ ܠܥܡܐ. ܡܛܠ ܕܕܝܠܢ ܗܝ ܓܝܪ ܗܕܐ ܠܐܘܬܐ

9. Apocalypse of Baruch 45:2

   ܐܢ ܓܝܪ ܬܠܦܘܢ ܐܢܘܢ ܡܚܝܢ ܐܢܬܘܢ ܠܗܘܢ • ܀ •

10. Apocalypse of Baruch 46:1

    ܘܥܢܘ ܒܪܝ ܘܣܒ̈ܘܗܝ ܕܥܡܐ ܘܐܡ̣ܪܘ ܠܝ. ܥܕܡܐ ܠܗܟܢܐ ܡܟܟܢ ܚܝܠܬܢܐ. ܕܢܣܒܟ ܡܢܢ ܒܥܓܠ

11. Apocalypse of Baruch 46:2

    ܘܫܪܝܪܐܝܬ ܢܗܘܐ ܒܚܫܘܟܐ. ܘܢܘܗܪܐ ܠܐ ܢܗܘܐ ܠܥܡܐ ܕܐܫܬܚܪܘ

12. Apocalypse of Baruch 46:3

    ܐܝ̇ܟܐ ܓܝܪ ܬܘܒ ܢܒܥܐ ܢܡܘܣܐ. ܐܘ ܡ̣ܢܘ ܡܦ̣ܪܫ ܠܢ ܒܝܬ ܡܘܬܐ ܠܚ̈ܝܐ

13. Apocalypse of Baruch 46:4

    ܘܐܡ̇ܪܬ ܠܗܘܢ ܕܠܘܩܒܠ ܬܪܘܢܘܣ ܕܚܝܠܬܢܐ ܠܐ ܡܫܟܚ ܐܢܐ ܕܐܩܘܡ. ܒܪܡ ܕܝܢ ܠܐ ܚܣ̇ܪ ܠܐܝܣܪܝܠ ܚܟܝܡܐ̣. ܘܠܐ ܒܪ ܢܡܘܣܐ ܠܓܢܣܗ ܕܝܥܩܘܒ

14. Apocalypse of Baruch 46:5

    ܒܠܚܘܕ ܕܝܢ ܐܢܬܘܢ ܛ̇ܝܒܘ ܠܒܘ̈ܬܟܘܢ ܕܬܫܡܥܘܢ ܠܢܡܘܣܐ. ܘܬܫܬܥܒܕܘܢ ܠܐܝܠܝܢ ܕܒܕܚܠܬܐ ܚܟܝܡܝܢ ܘܣܟܘ̈ܠܬܢܝܢ. ܘܛܝ̇ܒܘ ܢܦܫܟܘܢ ܕܠܐ ܬܗܘܘܢ ܡܪܚܩܝܢ ܡܢܗܘܢ

15. Apocalypse of Baruch 46:6

    ܐܢ ܓܝܪ ܬܥܒܕܘܢ ܗܠܝ̣ܢ. ܢܐܬܝܢ ܠܟܘܢ ܣܒܪ̈ܬܐ̣. ܗܠܝܢ ܕܩܕܡ̇ܬ ܐܡ̇ܪܬ ܠܟܘܢ. ܘܠܐ ܢܦ̇ܠܝܢ ܐܢܬܘܢ ܒܬܫܢܝܩܐ ܕܩ̇ܕܡܬ ܐܣ̇ܗܕܬ ܠܟܘܢ

16. Apocalypse of Baruch 46:7

    ܥܠ ܡܠܬܐ ܕܝܢ ܕܡܬܢܣܒ ܐܢܐ ܠܐ ܐܘ̇ܕܥܬ ܐܢܘܢ ܐܦ ܠܐ ܠܒܪܝ • ܀

17. Apocalypse of Baruch 47:1

    ܘܟܕ ܢܦܩ̇ܬ ܘܫ̇ܪܝܬ ܐܢܘܢ̣. ܐܙ̇ܠܬ ܠܝ ܡܢ ܬܡܢ. ܘܐܡ̇ܪܬ ܠ̣ܗܘܢ. ܗܐ ܐܢܐ ܐ̇ܙܠ ܐܢܐ ܥܕܡܐ ܠܚܒܪܘܢ. ܠܬܡܢ ܓܝܪ ܫܕܪܢܝ ܚܝܠܬܢܐ

18. Apocalypse of Baruch 47:2

    ܘܐܬ̇ܝܬ ܠܗ̇ܘ ܐܬܪܐ ܕܐܬܡܠܠ ܥܡܝ ܬܡܢ̇ ܘܝܬ̇ܒܬ ܬܡܢ. ܘܨܡ̇ܬ ܫܒܥܐ ܝܘܡ̈ܝܢ

19. Apocalypse of Baruch 48:1

    ܘܗ̣ܘܐ ܡܢ ܒܬܪ ܝܘܡܐ ܫܒܝܥܝܐ̣. ܨ̇ܠܝܬ ܩܕܡ ܚܝܠܬܢܐ ܘܐܡ̇ܪܬ

20. Apocalypse of Baruch 48:2

    ܐܘ ܡܪܝܐ ܩ̇ܪܐ ܐܢܬ ܡܐܬܝܬܗܘܢ ܕܙܒ̈ܢܐ ܘܩܝܡܝܢ ܩܕܡܝܟ̣. ܡܥܒܪ ܐܢܬ ܐܘܚܕܢܗܘܢ ܕܥ̈ܠܡܐ. ܘܠܐ ܥܨ̇ܝܢ ܠܟ. ܡܦܪܢܣ ܐܢܬ ܕܘܒܪܗܘܢ ܕܥ̈ܕܢܐ ܘܡܫܬܡܥܝܢ ܠܟ

21. Apocalypse of Baruch 48:3

    ܐܢܬ ܒܠܚܘܕܝܟ ܝܕ̇ܥ ܐܢܬ ܡܬܚܗܘܢ ܕܕܪ̈ܐ. ܘܠܐ ܓ̇ܠܐ ܐܢܬ ܪ̈ܐܙܝܟ ܠܣܓܝܐ̈ܐ

22. Apocalypse of Baruch 48:4

    ܡܘܕܥ ܐܢܬ ܣܘܓܐܐ ܕܢܘܪܐ ܘܩܠܝܠܘܬܐ ܕܪܘܚܐ ܬ̇ܩܠܬ

23. Apocalypse of Baruch 48:5

    ܒܕܩ̇ ܐܢܬ ܣܘܦܗܘܢ ܕܪ̈ܘܡܐ. ܘܥܡܝ̈ܩܬܐ ܕܚܫܘܟܐ ܒܨ̇ܐ ܐܢܬ

24. Apocalypse of Baruch 48:6

    ܦܩ̇ܕ ܐܢܬ ܠܡܢܝܢܐ ܕܥܒ̇ܪ ܘܡܬܢܛܪ̣. ܘܡܥܬܕܬ ܒܝܬ ܡܫܪܝܐ ܠܐܝܠܝܢ ܕܥܬܝܕܝܢ ܕܢܗܘܘܢ

25. Apocalypse of Baruch 48:7

    ܐܢܬ ܥܗܝܕ ܐܢܬ ܪܝܫܝܬܐ ܕܥ̣ܒܕܬ ܘܐܒܕܢܐ ܕܥܬܝܕ ܠܐ ܛܥܐ ܐܢܬ

26. Apocalypse of Baruch 48:8

    ܦܩ̇ܕ ܐܢܬ ܒܪ̈ܡܙܐ ܕܕܚܠܬܐ ܘܕܙܥܝܦܘܬܐ ܠܫܠܗܒ̈ܝܬܐ ܘܡܬܚ̈ܠܦܢ ܠܪ̈ܘܚܐ. ܘܒܡܠܬܐ ܡܩܝܡ ܐܢܬ ܡܕܡ ܕܠܝܬ ܗܘܐ. ܘܐܚܝܕ ܐܢܬ ܠܡܕܡ ܕܥܕܟܝܠ ܠܐ ܐܬ̣ܐ ܒܚܝܠܐ ܪܒܐ

27. Apocalypse of Baruch 48:9

    ܡܠܦܬ ܒ̣ܪ̈ܝܬܐ ܒܣܟܘܠܬܢܘܬܟ. ܘܡܚܟܡ ܐܢܬ ܡܘ̈ܙܠܐ ܕܢܫܡܫܘܢ ܒܛܟܣܝ̈ܗܘܢ

28. Apocalypse of Baruch 48:10

    ܡܫܪ̈ܝܬܐ ܕܠܐ ܡܢ̈ܝܢ ܩܝܡܝܢ ܩܕܡܝܟ ܘܡܫܡܫܝܢ ܒܛܟܣܝ̈ܗܘܢ ܢܝܚܐܝܬ ܠܪܡܙܟ

29. Apocalypse of Baruch 48:11

    ܫܡ̣ܥ ܠܥܒ̣ܕܟ ܘܨܘܬ ܠܒܥܘܬܝ

30. Apocalypse of Baruch 48:12

    ܡܛܠ ܕܒܩܠܝܠ ܙܒܢܐ ܐܬ̇ܝܠܕܢܢ. ܘܒܙܒܢܐ ܩܠܝܠܐ ܗ̇ܦܟܝܢܢ

31. Apocalypse of Baruch 48:13

    ܠܘܬܟ ܕܝܢ ܫ̈ܥܐ ܐܝܟ ܙܒ̈ܢܐ . ܘܝܘܡ̈ܬܐ ܐܝܟ ܕܪ̈ܐ

32. Apocalypse of Baruch 48:14

    ܠܐ ܗܟܝܠ ܬܪܓܙ ܥܠ ܒܪܢܫܐ. ܡܛܠ ܕܠܐ ܗܘܐ ܡܕܡ ܗܘ. ܘܠܐ ܬܬܚܫܒ ܥܠ ܥ̇ܒ̈ܕܝܢ

33. Apocalypse of Baruch 48:15

    ܡܢܐ ܓܝܪ ܐܝܬܝܢ ܚܢܢ. ܗܐ ܓܝܪ ܒܡܘܗܒܬܟ ܐ̣ܬܝܢ ܠܥܠܡܐ. ܘܐܙ̇ܠܝܢܢ ܕܠܐ ܒܨܒܝܢܢ

34. Apocalypse of Baruch 48:16

    ܠܐ ܓܝܪ ܐܡ̇ܪܢܢ ܠܐܒ̈ܗܝܢ ܕܐܘ̈ܠܕܢ. ܐܦܠܐ ܫܕܪܢ ܠܫܝܘܠ ܘܐܡܪ̈ܢ ܕܩ̇ܒܠܝܢ

35. Apocalypse of Baruch 48:17

    ܡܢܐ ܗܘ ܗܟܝܠ ܚܝܠܢ ܕܢܛܥܢ ܪܘܓܙܟ. ܐܘ ܡܢܐ ܚܢܢ ܕܢܣܝܒܪ ܕܝ̣ܢܟ

36. Apocalypse of Baruch 48:18

    ܐܢܬ ܐܓܢ ܥܠܝܢ ܒܪ̈ܚܡܝܟ̣. ܘܒܚܢܢܟ ܣܝܥܝܢ

37. Apocalypse of Baruch 48:19

    ܚܘܪ ܒܙܥܘܪ̈ܐ ܕܐܫܬܥܒܕܘ ܠܟ. ܘܦܪܘܩ ܠܟܠ ܐܝܠܝܢ ܕܡܬܩܪܒܝܢ ܠܟ. ܘܠܐ ܬܦܣܘܩ ܣܒܪܗ ܕܥܡܢ. ܘܠܐ ܬܩܛܘܥ ܙܒ̈ܢܐ ܕܥܘܕܪܢܢ

38. Apocalypse of Baruch 48:20

    ܗܢܘ ܓܝܪ ܥܡܐ ܕܓܒ̣ܝܬ. ܘܗܠܝܢ ܐܢܘܢ ܥܡܐ ܕܠܐ ܡܫܟܚܬ ܐܟܘܬܗ

39. Apocalypse of Baruch 48:21

    ܐܠܐ ܐܡܠܠ ܩܕܡܝܟ ܗܫܐ. ܘܐ̇ܡܪ ܐܝܟ ܕܡܬܚܫܒ ܠܒܝ

40. Apocalypse of Baruch 48:22

    ܥܠܝܟ ܬܟ̇ܝܠܝܢܢ ܕܗܐ ܢܡܘܣܟ ܠܘܬܢ. ܘܝܕ̇ܥܝܢܢ ܕܠܐ ܢܦ̇ܠܝܢܢ ܟܡܐ ܕܩܝ̈ܡܝܟ ܐܚܝܕܝܢ ܚܢܢ

41. Apocalypse of Baruch 48:23

    ܒܟܠܙܒܢ ܛܘܒܝܢ. ܐܦܢ ܒܗܕܐ ܕܠܐ ܐܬܚ̈ܠܛܢ ܒܥܡܡ̈ܐ

42. Apocalypse of Baruch 48:24

    ܟܠܢ ܓܝܪ ܐܝ̇ܬܝܢ ܚܕ ܥܡܐ ܡܫܡܗܐ ܕܢ̇ܣܒܢ ܚܕ ܢܡܘܣܐ ܡܢ ܚܕ. ܘܗ̇ܘ ܢܡܘܣܐ ܕܒܝܢܬܢ. ܡܥܕܪ ܠܢ. ܘܚܟܡܬܐ ܡܝܬܪܬܐ ܕܐܝܬ ܒܢ ܬܣܝܥܢ

43. Apocalypse of Baruch 48:25

    ܘܟܕ ܨܠܝ̇ܬ ܘܐܡܪܬ ܗܠܝܢ. ܐ̇ܬܪܫܠܬ ܣ̇ܓܝ

44. Apocalypse of Baruch 48:26

    ܘܥ̣ܢܐ ܘܐܡܪ ܠܝ. ܐܢܬ ܦܫܝܛܐܝܬ ܨܠ̣ܝܬ ܐܘ ܒܪܘܟ. ܘܐܫܬܡܥ ܟܘܠܗܝܢ ܡ̈ܠܝܟ

45. Apocalypse of Baruch 48:27

    ܐܠܐ ܕܝܢ̣ܝ ܬܒ̇ܥ ܕܝܠܗ. ܘܢܡܘܣܝ ܬܒ̇ܥ ܙܕܩܗ

46. Apocalypse of Baruch 48:28

    ܡܢ ܡ̈ܠܝܟ ܓܝܪ ܡܬܝܒ ܐܢܐ ܠܟ. ܘܡܢ ܨܠܘܬܟ ܐܡܠܠ ܥܡܟ

47. Apocalypse of Baruch 48:29

    ܗ̣ܝ ܗܝ ܓܝܪ ܗܕܐ ܕܠܐ ܗ̣ܘܐ ܡܕܡ ܗ̇ܘ ܕܡ̇ܬܚܒܠ. ܘܐܪܫܥ ܐܝܟ ܗ̇ܘ ܕܡ̣ܨܐ ܕܢܥܒܕ ܡܕܡ. ܘܠܐ ܐܬܕܟܪ ܛܝܒܘܬܝ. ܘܠܐ ܩ̇ܒܠ ܢܓܝܪܘܬ ܪܘܚܝ

48. Apocalypse of Baruch 48:30

    ܡܛܠ ܗܢܐ ܡܬܢܣܒܘ ܡܬܢܣܒ ܐܢܬ. ܐܝܟ ܕܩ̇ܕܡܬ ܐܡܪܬ ܠܟ. ܘܐ̇ܬܐ ܙܒܢܐ ܕܐܡ̇ܪܬ ܠܟ.

49. Apocalypse of Baruch 48:31

    ܘܢܩܘܡ ܗ̇ܘ ܙܒܢܐ ܕܐ̇ܠܨ. ܢܐܬܐ ܓܝܪ ܘܢܥܒܪ ܒܚܐܦܐ ܚܪܝܦܐ. ܘܢܬܕܠܚ ܟܕ ܐܬ̇ܐ ܒܚܡܬܐ ܕܙܥܝܦܘܬܐ

50. Apocalypse of Baruch 48:32

    ܘܢܗܘܐ ܒܗ̇ܢܘܢ ܝܘܡ̈ܬܐ. ܢܬܬܢܝܚܘܢ ܟܘܠܗܘܢ ܥܡܘܪ̈ܝܗ̇ ܕܐܪܥܐ ܚܕ ܥܠ ܚܕ. ܡܛܠ ܕܠܐ ܝܕ̇ܥܝܢ ܕܩ̣ܪܒ ܕܝܢ̣ܝ

51. Apocalypse of Baruch 48:33

    ܠܐ ܗܘܐ ܓܝܪ ܣܓܝܐ̈ܐ ܚܟܝܡ̈ܐ ܡܫܬܟܚܝܢ ܒܗ̇ܘ ܙܒܢܐ. ܘܣܟ̈ܘܠܬܢܐ ܚܕܚ̈ܕܢܐ ܢܗܘܘܢ. ܐܠܐ ܐܦ ܐܝܠܝܢ ܕܝܕ̇ܥܝ̣ܢ ܝܬܝܪܐܝܬ ܢܫܬܩܘܢ

52. Apocalypse of Baruch 48:34

    ܘܢܗܘܘܢ ܫܡ̈ܥܐ ܣܓ̈ܝܐܐ ܘܛܒ̈ܐ ܕܠܐ ܙܥܘܪܝܢ. ܘܥ̇ܒ̈ܕܐ ܕܦܢ̈ܛܣܝܐ ܢܬܚܘܘܢ. ܘܢܬܬܢܘܢ ܡܘ̈ܠܟܢܐ ܠܐ ܙܥܘܪܝܢ. ܡܢܗܘܢ ܣܪܝܩܝܢ. ܘܡܢܗܘܢ ܢܫܬܪܪܘܢ

53. Apocalypse of Baruch 48:35

    ܘܢܗܦܘܟ ܐܝܩܪܐ ܠܨܥܪܐ. ܘܢܬܡܟܟ ܥܘܫܢܐ ܠܫܝܛܘܬܐ. ܘܬܫܬܪܐ ܬܩܢܘܬܐ. ܘܫܦܝܪܘܬܐ ܬܗܘܐ ܠܒܣܝܘܬܐ

54. Apocalypse of Baruch 48:36

    ܘܢܐܡܪܘܢ ܣ̈ܓܝܐܐ ܠܣܓ̈ܝܐܐ ܒܗ̇ܘ ܙܒܢܐ ܐܝ̇ܟܐ ܐܬܟܣ̣ܝܬ ܠܗ̇ ܣܘܓܐܐ ܕܣܟܘ̇ܠܬܢܘܬܐ. ܘܠܐܝ̇ܟܐ ܫܢ̣ܝܬ ܠܗ̇ ܣܘܓܐܐ ܕܚܟܡܬܐ

55. Apocalypse of Baruch 48:37

    ܘܟܕ ܗ̣ܢܘܢ ܡܬܚܫܒܝܢ ܗܠܝܢ̣. ܗܝ̇ܕܝܢ ܢܕܢܚ ܛܢܢܐ ܒܐܝܠܝܢ ܕܠܐ ܣ̇ܒܪܝܢ ܗܘܘ ܥܠܝܗܘܢ. ܘܚܫܐ ܢܐܚܘܕ ܠܐܝ̇ܢܐ ܕܫܠ̣ܐ ܗܘܐ. ܘܢܬܬܙܝܥܘܢ ܣܓ̈ܝܐܐ ܒܪܘܓܙܐ ܕܢܟܘܢ ܠܣܓܝܐ̈ܐ. ܘܢܥܝܪܘܢ ܠܚܝ̈ܠܘܬܐ ܕܢܐܫܕܘܢ ܕܡܐ. ܘܥܡܗܘܢ ܠܚܪܬܐ ܐܟܚܕܐ ܢܐܒܕܘܢ

56. Apocalypse of Baruch 48:38

    ܘܢܗܘܐ ܒܗ ܒܗ̇ܘ ܙܒܢܐ. ܢܬܚܙܐ ܓܠܝܐܝܬ ܠܟܠܢܫ ܚܘܠܦܗܘܢ ܕܙܒܢ̈ܐ. ܚܠܦ ܕܒܟܘܠܗܘܢ ܗܠܝܢ ܙܒܢ̈ܐ ܡܬܛܢܦܝܢ ܗܘܘ ܘܥ̇ܠܒܝܢ. ܘܐ̇ܙܠܝܢ ܗܘܘ ܐܢܫ ܐܢܫ ܒܥ̇ܒ̈ܕܘܗܝ. ܘܢܡܘܣܗ ܕܚܝܠܬܢܐ ܠܐ ܡܬܕܟܪܝܢ ܗܘܘ

57. Apocalypse of Baruch 48:39

    ܡܛܠ ܗܢܐ ܢܘܪܐ ܡܚܫ̈ܒܬܗܘܢ ܐܟܠܐ. ܘܒܫܠܗܒܝܬܐ ܢܬܒܚܪ̈ܢ ܡܪ̈ܢܝܬܗܝܢ ܕܟܘ̈ܠܝܬܗܘܢ. ܢܐܬܐ ܓܝܪ ܕܝ̇ܢܐ ܘܠܐ ܢܫܬܘܚܪ

58. Apocalypse of Baruch 48:40

    ܡܛܠ ܕܟܠ ܚܕ ܚܕ ܡܢ ܥܡܘܪ̈ܝܗ̇ ܕܐܪܥܐ ܝܕ̇ܥ ܗܘܐ ܟܕ ܡܥܘܠ. ܘܢܡܘܣܝ̣ ܠܐ ܝܕܥܘ. ܡܛܠ ܪܡܘܬܗܘܢ

59. Apocalypse of Baruch 48:41

    ܣܓܝܐ̈ܐ ܕܝܢ ܗܝ̇ܕܝܢ ܢܒܟܘܢ ܫܪܝܪܐܝܬ. ܥܠ ܚ̈ܝܐ ܕܝܢ ܝܬܝܪ ܕܥܠ ܡܝ̈ܬܐ

60. Apocalypse of Baruch 48:42

    ܘܥ̇ܢܝܬ ܘܐܡ̇ܪܬ. ܐܘ ܡܢܐ ܥܒܕܬ ܐܕܡ ܠܟܘܠܗܘܢ ܐܝܠܝܢ ܕܐܬܝܠܕܘ ܡܢܟ. ܘܡܢܐ ܢܬܐܡܪ ܠܚܘܐ ܩܕܡܝܬܐ ܕܠܚܘܝܐ ܐܫܬ̣ܡܥܬ

61. Apocalypse of Baruch 48:43

    ܕܗܢܐ ܟܠܗ ܣܘܓܐܐ ܐܙ̣ܠ ܠܚ̣ܒܠܐ. ܘܠܝܬ ܡܢܝܢܐ ܠܐܝܠܝܢ ܕܢܘܪܐ ܐܟ̇ܠܐ

62. Apocalypse of Baruch 48:44

    ܐܠܐ ܬܘܒ ܐܡ̇ܪ ܩܕܡܝܟ

63. Apocalypse of Baruch 48:45

    ܐܢܬ ܡܪܝܐ ܡܪܝ ܝܕ̇ܥܬ ܡܕܡ ܒܒ̣ܪܝܬܟ

64. Apocalypse of Baruch 48:46

    ܐܢܬ ܓܝܪ ܡܢ ܩܕܝܡ ܦܩ̣ܕܬ ܠܥܦܪܐ ܕܢܬܠ ܠܐܕܡ. ܘܐܢܬ ܝܕ̇ܥ ܐܢܬ ܡܢܝܢܗܘܢ ܕܐܝܠܝܢ ܕܐܬܝܠܕܘ ܡܢܗ. ܘܟܡܐ ܚܛܘ ܩܕܡܝܟ ܐܝܠܝܢ ܕܗܘܘ. ܘܠܐ ܐܘܕܝܘ ܠܟ ܠܥ̇ܒ̇ܘܕܗܘܢ

65. Apocalypse of Baruch 48:47

    ܘܥܠ ܟܠܗܝܢ ܗܠܝܢ. ܚܪܬܗܘܢ ܡܟܣܐ ܠܗܘܢ. ܘܢܡܘܣܟ ܗ̇ܘ ܕܥ̣ܒܪܘ̣. ܦ̇ܪܥ ܠܗܘܢ ܒܝܘܡܟ

66. Apocalypse of Baruch 48:48

    ܗܫܐ ܕܝܢ ܢܪܦܐ ܠܪ̈ܫܝܥܐ. ܘܥܠ ܙܕܝ̈ܩܐ ܢܒܥܐ

67. Apocalypse of Baruch 48:49

    ܘܐܬܢܐ ܛܘܒܗܘܢ ܘܠܐ ܐܫܬܘܩ. ܬܫܒܘܚܬܗܘܢ ܠܡܫ̇ܒܚܘ. ܗ̇ܝ ܕܢܛܝܪܐ ܠܗܘܢ

68. Apocalypse of Baruch 48:50

    ܫܪܝܪܝܬ ܓܝܪ ܐܝܟ ܕܒܙܒܢܐ ܩܠܝܠ ܒܗܢܐ ܥܠܡܐ ܕܥܒ̇ܪ ܕܚܝܝܢ ܐܢܬܘܢ ܒܗ. ܠܐܘܬܐ ܣܓܝܐܬܐ ܣܝܒܪܬܘܢ. ܗܟܢܐ ܒܥܠܡܐ ܗ̇ܘ ܕܣܘܦ ܠܝܬ ܠܗ. ܬܩܒܠܘܢ ܢܘܗܪܐ ܪܒܐ ܀

69. Apocalypse of Baruch 49:1

    ܒܪܡ ܕܝܢ ܬܘܒ ܐܒ̇ܥܐ ܡܢܟ ܚܝܠܬܢܐ. ܘܐܒ̇ܥܐ ܪ̈ܚܡ̣ܐ ܡܢ ܗ̇ܘ ܕܥܒ̣ܕ ܟܠ

70. Apocalypse of Baruch 49:2

    ܒܐܝ̇ܕܐ ܟܝ ܕܡܘܬܐ ܢܐܚܘܢ ܐܝܠܝܢ ܕܚ̈ܝܝܢ ܒܝܘܡܟ. ܐܘ ܐܝܟ̇ܢܐ ܡܩܘܐ ܙܝܘܗܘܢ ܕܡܢ ܒܬܪ ܗܝ̇ܕܝܢ

71. Apocalypse of Baruch 49:3

    ܠܗܕܐ ܟܝ ܨܘܪܬܐ ܕܗܫܐ ܢܣ̇ܒܝܢ ܗܝ̇ܕܝܢ̣. ܘܗܠܝܢ ܗܕܡ̈ܐ ܕܐܣܘܪ̈ܐ ܠܒ̇ܫܝ̣ܢ. ܗܢ̇ܘܢ ܕܗܫܐ ܒܒܝ̣̈ܫܬܐ ܐܝܬܝܗܘܢ ܘܒܗܘܢ ܡܫ̈ܬܡܠܝܢ ܒܝ̣ܫ̈ܬܐ. ܐܘ ܕܠܡܐ ܡܚܠܦ ܐܢܬ ܠܗܘܢ ܠܐܝܠܝܢ ܕܗܘܘ ܒܥܠܡܐ. ܐܝܟ ܕܐܦ ܠܥܠܡܐ ܀

72. Apocalypse of Baruch 50:1

    ܘܥܢ̣ܐ ܘܐܡ̣ܪ ܠܝ ܫܡ̣ܥ ܒܪܘܟ ܡܠܬܐ ܗܕܐ. ܘܟܬܘܒ ܒܥܘܗܕܢܗ ܕܠܒܟ ܟܠ ܕܝ̇ܠܦ ܐܢܬ

73. Apocalypse of Baruch 50:2

    ܡܦܢܝܘ ܓܝܪ ܡܦܢܝܐ ܐܪܥܐ ܗܝ̇ܕܝܢ ܠܡܝ̈ܬܐ ܕܡܩܒܠܐ ܗܫܐ ܕܬܛܪ ܐܢܘܢ. ܟܕ ܡܕܡ ܠܐ ܡܚܠܦܐ ܒܨܘܪܬܗܘܢ. ܐܠܐ ܐܝܟ ܕܩܒ̣ܠܬ ܗܟܢܐ ܡܦܢܝܐ ܠܗܘܢ. ܘܐܝܟ ܕܐܫ̇ܠܡܬ ܐܢܘܢ ܠܗ̣̇. ܗܟܢܐ ܐܦ ܡܩܝܡܐ ܠܗܘܢ

74. Apocalypse of Baruch 50:3

    ܗܝ̇ܕܝܢ ܡܬܒܥܐ ܓܝܪ ܠܡܚܘܝܘ ܠܐܝܠܝܢ ܕܚܝܝ̣ܢ. ܕܚܝܘ ܡܝ̈ܬܐ ܘܐܬܘ ܗ̇ܢܘܢ ܕܐܙܠܘ ܗܘܘ

75. Apocalypse of Baruch 50:4

    ܘܢܗܘܐ ܡܐ ܕܐܫܬ̣ܘܕܥܘ ܚܕ ܠܚܕ ܐܝܠܝܢ ܕܗ̇ܫܐ ܝܕ̇ܥܝ̣ܢ. ܗܝ̇ܕܝܢ ܢܥܫܢ ܕܝܢ̣ܐ. ܘܢܐ̈ܬܝܢ ܐܝܠܝܢ ܕܡܩ̈ܕܡܢ ܐܡܝܪ̈ܢ ܀

76. Apocalypse of Baruch 51:1

    ܘܢܗܘܐ ܡܢ ܒܬܪ ܕܥܒ̇ܪ ܗ̇ܘ ܝܘܡܐ ܕܩܝ̇ܡ. ܗ̇ܝܕܝܢ ܡܢ ܒܬܪ ܟܢ ܡܬܚܠܦܐ ܕܡܘܬܗܘܢ ܕܐܝܠܝܢ ܕܡܬܚܝܒܝܢ. ܐܦ ܬܫܒܘܚܬܗܘܢ ܕܐܝܠܝܢ ܕܡܙܕܕܩܝܢ

77. Apocalypse of Baruch 51:2

    ܡܬܥܒܕܐ ܓܝܪ ܕܡܘܬܗܘܢ ܕܐܝܠܝܢ ܕܗܫܐ ܡܪܫܥܝܢ ܒܝܫ ܡܢ ܡܐ ܕܐܝܬܝܗ̇. ܐܝܟ ܕܢܣܝܒܪܘܢ ܬܫܢܝܩܐ

78. Apocalypse of Baruch 51:3

    ܐܦ ܬܫܒܘܚܬܗܘܢ ܕܐܝܠܝܢ ܕܗܫܐ ܐܙܕܕܩܘ ܒܢܡܘܣܝ. ܗܠܝܢ ܕܐܝܬ ܗܘܐ ܠܗܘܢ ܣܘܟܠܐ ܒܚܝ̈ܝܗܘܢ. ܘܗܠܝܢ ܕܢܨܒܘ ܒܠܒܗܘܢ ܥܩ̇ܪܗ̇ ܕܚܟܡܬܐ. ܗܝ̇ܕܝܢ ܢܫܬܒܚ ܙܝܘܗܘܢ ܒܫܘܚ̈ܠܦܐ. ܘܬܬܗܦܟ ܕܡܘܬܐ ܕܐܦܝ̈ܗܘܢ ܠܢܘܗܪܐ ܕܝܐܝܘܬܗܘܢ ܕܢܫܟܚܘܢ ܕܢܣܒܘܢ ܘܢܩܒܠܘܢ ܥܠܡܐ ܕܠܐ ܡܐ̇ܬ. ܕܗܝܕܝܢ ܡܠܝܟ ܠܗܘܢ

79. Apocalypse of Baruch 51:4

    ܒܗܕܐ ܓܝܪ ܝܬܝܪܐܝܬ ܢܬܬܢܚܘܢ ܐܝܠܝܢ ܕܐܬ̇ܝܢ ܗܝ̇ܕܝܢ. ܥܠ ܕܐܣܠܝܘ ܢܡܘܣܝ̇. ܘܣܟܪܘ ܐܕܢܝ̈ܗܘܢ ܕܠܐ ܢܫܡܥܘܢ ܚܟܡܬܐ. ܘܠܐ ܢܩܒܠܘܢ ܣܘܟܠܐ

80. Apocalypse of Baruch 51:5

    ܟܕ ܗܟܝܠ ܢܚܙܘܢ ܠܐܝܠܝܢ ܕܗܫܐ ܐܬܬܪܝܡܘ ܥܠܝܗܘܢ. ܕܗܝ̇ܕܝܢ ܡܬܬܪܝܡܝܢ ܘܡܫܬܒܚܝܢ ܝܬܝܪ ܡܢܗܘܢ. ܘܡܬܚܠܦܝܢ ܗܠܝܢ ܘܗܠܝܢ. ܗܠܝܢ ܠܙܝܘܐ ܕܡܠܐ̈ܟܐ. ܘܗ̇ܢܘܢ ܠܬܡܗܐ ܕܚܙ̈ܘܢܐ. ܘܠܚܙܬܐ ܕܕܡ̈ܘܬܐ ܝܬܝܪܐܝܬ ܢܫܘܚܘܢ

81. Apocalypse of Baruch 51:6

    ܠܘܩܕܡ ܓܝܪ ܚܙ̇ܝܢ. ܘܒܬܪܟܢ ܐ̇ܙܠܝܢ ܕܢܫܬܢܩܘܢ

82. Apocalypse of Baruch 51:7

    ܐܝܠܝܢ ܕܝܢ ܕܐܬܦܨܝܘ ܒܥ̇ܒ̈ܕܝܗܘܢ ܘܐܝܠܝܢ ܕܗ̣ܘܐ ܠܗܘܢ ܗܫܐ ܢܡܘܣܐ ܣܒܪܐ ܘܣܟܘܠܬܢܘܬܐ ܣܘܟܝܐ ܘܚܟܡܬܐ ܗܝܡܢܘܬܐ. ܢܬܚ̈ܙܝܢ ܠܗܘܢ ܬܡܝ̈ܗܬܐ ܒܙܒܢܗܝܢ

83. Apocalypse of Baruch 51:8

    ܚܙ̇ܝܢ ܓܝܪ ܗ̇ܘ ܥܠܡܐ ܕܠܐ ܡܬܚܙܐ ܠܗܘܢ ܗܫܐ. ܘܢܚܙܘܢ ܠܙܒܢܐ ܕܗܫܐ ܟܣ̣ܐ ܡܢܗܘܢ

84. Apocalypse of Baruch 51:9

    ܘܬܘܒ̣ ܠܐ ܢܥܬܩ ܐܢܘܢ ܙܒܢܐ

85. Apocalypse of Baruch 51:10

    ܒܡܪ̈ܘܡܘܗܝ ܓܝܪ ܕܗ̇ܘ ܥܠܡܐ ܢܥܡܪܘܢ. ܘܡܬܕܡܝܢ ܠܡܠܐ̈ܟܐ. ܘܡܬܦܚܡܝܢ ܠܟܘܟ̈ܒܐ. ܘܗ̇ܘܝܢ ܡܬܚܠܦܝܢ ܒܟܘܠ ܕܡܘ ܕܨ̇ܒܝܢ ܡܢ ܫܘܦܪܐ ܠܝܐܝܘܬܐ. ܘܡܢ ܢܘܗܪܐ ܠܙܝܘܐ ܕܬܫܒܘܚܬܐ

86. Apocalypse of Baruch 51:11

    ܢܬܦܫܛܘܢ ܓܝܪ ܩܕܡܝܗܘܢ ܦܬܝ̈ܘܗܝ ܕܦܪܕܝܣܐ. ܘܢܬܚܘܐ ܠܗܘܢ ܫܘܦܪܐ ܕܪܒܘܬܐ ܕܚ̈ܝܬܐ ܕܬܚܝܬ ܬܪܘܢܘܣ. ܘܟܘܠܗܘܢ ܚܝܠܘ̈ܬܐ ܕܡܠܐ̈ܟܐ ܕܐܚܝܕܝܢ ܗܫܐ ܒܡܠܬܝ. ܐܝܟ ܕܠܐ ܢܬܚܙܘܢ. ܘܐܚܝܕܝܢ ܒܦܘܩܕܢܐ ܐܝܟ ܕܢܩܘܡܘܢ ܒܐܬܪ̈ܘܬܗܘܢ ܥܕܡܐ ܕܬܐܬܐ ܡܐܬܝܬܗܘܢ

87. Apocalypse of Baruch 51:12

    ܘܡܝܬܪܘܬܐ ܕܝܢ ܬܗܘܐ ܗܝ̇ܕܝܢ ܒܙܕܝ̈ܩܐ ܝܬܝܪ ܡܢ ܕܒܡܠܐ̈ܟܐ

88. Apocalypse of Baruch 51:13

    ܢܩܒܠܘܢ ܓܝܪ ܩܕܡ̈ܝܐ ܠܐܚܪ̈ܝܐ. ܠܗ̇ܢܘܢ ܕܡܣܟܝܢ ܗܘܘ ܠܗܘܢ. ܘܐܚܪ̈ܝܐ ܠܐܝܠܝܢ ܕܫ̇ܡܥܝܢ ܗܘܘ ܕܥܒ̣ܪܘ

89. Apocalypse of Baruch 51:14

    ܐܬܦܨܝܘ ܓܝܪ ܡܢ ܗܢܐ ܥܠܡܐ ܕܐܘܠܨܢܐ. ܘܐܢܝܚܘ ܡܢܗܘܢ ܛܥܢܐ ܕܥ̇ܩ̈ܬܐ

90. Apocalypse of Baruch 51:15

    ܒܡܢܐ ܗܟܝܠ ܐܘܒܕܘ ܒܢܝ̈ܢܫܐ ܚܝܝ̈ܗܘܢ. ܘܒܡܢܐ ܚ̇ܠܦܘ ܢܦܫܗܘܢ ܐܝܠܝܢ ܕܒܐܪܥܐ ܗܘܘ

91. Apocalypse of Baruch 51:16

    ܗܝ̇ܕܝܢ ܓܒܘ ܠܗܘܢ ܓܝܪ ܙܒܢܐ ܗܢܐ ܕܠܒ̣ܪ ܡܢ ܥܩ̈ܬܐ ܕܢܥܒܪ ܠܐ ܡܫܟܚ. ܘܓܒܘ ܠܗܘܢ ܙܒܢܐ ܗ̇ܘ ܕܡ̈ܦܩܢܘܗܝ ܬܐܢܚ̈ܬܐ ܘܒܝܫ̣̈ܬܐ ܡܠ̣ܝܢ. ܘܟܦܪܘ ܒܥܠܡܐ ܕܠܐ ܡܥܬܩ ܠܐܝܠܝܢ ܕܐܬ̇ܝܢ ܠܗ. ܘܐܣܠܝܘ ܙܒܢܐ ܘܬܫܒܘܚܬܐ ܕܠܐ ܢܐܬܘܢ ܠܐܝܩܪܐ ܕܩ̇ܕܡܬ ܐܡ̇ܪܬ ܠܟ • ܀ •

92. Apocalypse of Baruch 52:1

    ܘܥ̇ܢܝܬ ܘܐܡ̇ܪܬ. ܐܝܟ̇ܢܐ ܛ̇ܥܝܢ ܐܝܠܝܢ ܕܗܝ̇ܕܝܢ ܘܝܐ ܢܛܝܪ ܠܗܘܢ

93. Apocalypse of Baruch 52:2

    ܘܠܡܢܐ ܗܟܝܠ ܡܬܐܒ̇ܠܝܢܢ ܬܘܒ ܥܠ ܐܝܠܝܢ ܕܡܝܬܝܢ. ܐܘ ܠܡܢܐ ܒ̇ܟܝܢܢ ܥܠ ܐܝܠܝܢ ܕܐܙ̇ܠܝܢ ܠܫܝܘܠ

94. Apocalypse of Baruch 52:3

    ܢܬܢܛ̇ܪܢ ܐܘܠܝ̈ܬܐ ܠܪܝܫܗ ܕܗ̇ܘ ܬܫܢܝܩܐ ܕܥܬܝܕ. ܘܢܬܬ̈ܣܝܡܢ ܕܡܥ̈ܐ ܠܡܐܬܝܬܗ ܕܗ̇ܘ ܐܒܕܢܐ ܕܗ̇ܝܕܝܢ

95. Apocalypse of Baruch 52:4

    ܐܠܐ ܐܦ ܠܘܩܒܠ ܗܠܝܢ ܐܡ̇ܪ

96. Apocalypse of Baruch 52:5

    ܘܙܕܝ̈ܩܐ ܡܢܐ ܢܥܒܕܘܢ ܗܫܐ

97. Apocalypse of Baruch 52:6

    ܨܒܘ ܒܚܫܐ ܕܚ̇ܫܝܢ ܐܢܬܘܢ ܗܫܐ. ܘܠܡܢܐ ܓܝܪ ܚ̇ܝܪܝܢ ܐܢܬܘܢ ܒܡܨܛܠܝܢܘܬܗܘܢ ܕܣܢܝ̈ܟܘܢ

98. Apocalypse of Baruch 52:7

    ܛ̇ܝܒܘ ܢܦܫܟܘܢ ܠܡܕܡ ܕܢܛܝܪ ܠܟܘܢ. ܘܥܬܕܘ ܢܦܫܬ̈ܟܘܢ ܠܐܓܪܐ ܕܣ̣ܝܡ ܠܟܘܢ

99. Apocalypse of Baruch 52:8

    ܘܟܕ ܐܡ̇ܪܬ ܗܠܝܢ ܕܡ̇ܟܬ ܬܡܢ ܀

100. Apocalypse of Baruch 53:1

     ܘܚ̇ܙܝܬ ܚܙܘܐ. ܘܗܐ ܥܢܢܐ ܚܕܐ ܣ̇ܠܩܐ ܗܘܬ ܡܢ ܝܡܐ ܪܒܐ ܣ̇ܓܝ. ܘܚܐ̇ܪ ܗ̇ܘܝܬ ܒܗ̇. ܘܗܐ ܡܠܝܐ ܗܘܬ ܡ̈ܝܐ ܚ̇ܘ̣ܪ̈ܐ ܘܐܘܟܡ̈ܐ. ܘܓܘ̈ܢܐ ܣܓ̈ܝܐܐ ܐܝܬ ܗܘܐ ܒܗܘܢ ܒܡ̈ܝܐ ܗܠܝܢ. ܘܐܝܟ ܕܡܘܬܐ ܕܒܪܩܐ ܪܒܐ̣. ܡܬܚܙܐ ܗܘܐ ܒܪܝܫܗ̇

← Previous · Next → — showing 301–400 of 614

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.