← All works

Peshitta Apocalypse of Baruch

Peshitta (Syriac Old Testament) · 614 sections

1. Apocalypse of Baruch 27:11

   ܘܒܡܢܬܐ ܕܥܣܪ ܚܛܘܦܝܐ ܘܛܠܘܡ̣ܝܐ ܣܓܝܐܐ ܀ • •

2. Apocalypse of Baruch 27:12

   ܘܒܡܢ̇ܬܐ ܕܚܕܥܣܪܐ ܥܘ̣ܠܐ ܘܫܪܝܚܘܬܐ ܀

3. Apocalypse of Baruch 27:13

   ܘܒܡ̇ܢܬܐ ܕܬܪܬܥܣܪܐ̣ ܒܘܠܒܠܐ ܕܚܒܝܟܘܬܐ ܕܟܠܗܝܢ ܐܟܚܕܐ ܕܐܝܠܝܢ ܕܡܩܕ̈ܡܢ ܐܡܝܪ̈ܢ ܀ • •

4. Apocalypse of Baruch 27:14

   ܗܠܝܢ ܕܝܢ ܡܢ̈ܘܬܗ ܕܗ̇ܘ ܙܒܢܐ ܢܛܝܪ̈ܢ̣ ܘܗ̈ܘܝܢ ܡܚ̈ܠܛܢ ܚܕܐ ܒܚܕܐ. ܘܚܕܐ ܚܕܐ ܡܫܡ̈ܫܢ

5. Apocalypse of Baruch 27:15

   ܡܢܗܝܢ ܓܝܪ ܡܘܬܪ̈ܢ ܡܢ ܕܝܠܗܝܢ. ܘܡܢ ܕܐܚܪ̈ܢܝܬܐ ܢܣ̈ܒܢ ܘܡܢܗܝܢ ܕܝܠܗܝܢ ܘܕܐܚܪ̈ܢܝܬܐ ܡܫ̈ܠܡܢ̣. ܐܝܟ ܕܠܐ ܢܣܬܟܠܘܢ ܐܝܠܝܢ ܕܗܘ̈ܝܢ ܥܠ ܐܪܥܐ̇. ܒܗ̇ܢܘܢ ܝܘܡ̈ܬܐ ܕܫܘܠܡܐ ܗ̇ܘ ܕܙܒ̈ܢܐ • ܀

6. Apocalypse of Baruch 28:1

   ܒܪܡ ܕܝܢ ܟܠ ܕܢܣܬܟܠ ܗܝ̇ܕܝܢ ܢܬܚܟܡ.

7. Apocalypse of Baruch 28:2

   ܡܫܘܚܬܗ ܕܝܢ ܘܡܢܝܢܗ ܕܗ̇ܘ ܙܒܢܐ ܗ̈ܘܝܢ ܬܪ̈ܬܝܢ ܡ̈ܢܘܢ ܫܒܘ̈ܥܐ ܕܫܒܥܐ ܫܒܘ̈ܥܝܢ

8. Apocalypse of Baruch 28:3

   ܘܥܢ̇ܝܬ ܘܐܡ̇ܪܬ . ܛܒ ܗܘܐ ܕܐܢܫ ܢܡܛܐ ܘܢ̇ܚܙܐ. ܘܛܒ ܕܝܢ ܡܢ ܗܕܐ ܕܠܐ ܢܡܛܐ. ܕܠܐ ܢܦ̇ܠ

9. Apocalypse of Baruch 28:4

   ܐܠܐ ܐܡ̇ܪ ܐܦ ܗܕܐ

10. Apocalypse of Baruch 28:5

    ܢܫܘܛ ܗ̇ܘ ܕܠܐ ܡܬܚܒܠ ܠܗܠܝܢ ܕܡܬܚ̈ܒܠܢ. ܘܠܡܕܡ ܕܓ̣ܕܫ ܒܗܝܢ ܒܗܠܝܢ ܕܡܬܚܒ̈ܠܢ. ܕܒܠܚܘܕ ܠܗܠܝܢ ܕܠܐ ܡܬ̈ܚܒܠܢ ܢܚܘܪ

11. Apocalypse of Baruch 28:6

    ܐܢ ܕܝܢ ܡܪܝ ܫܪܝܪܐܝܬ ܥܬܝܕ̈ܢ ܐ̈ܢܝܢ ܕܢܐܬ̈ܝܢ ܗܠܝܢ ܕܩܕ̣ܡܬ ܐܡ̣ܪܬ ܠܝ. ܐܢ̇ܕܝܢ ܐܫ̇ܟܚܬ ܪ̈ܚܡ̣ܐ ܒܥܝܢ̈ܝܟ ܐܘܕܥܝܢܝ ܐܦ ܗܕܐ

12. Apocalypse of Baruch 28:7

    ܐܢ ܗ̣ܘ ܕܒܚܕ ܐܬܪܐ ܐܘ ܒܚܕܐ ܡܢ ܡܢܘ̈ܬܗ̇ ܕܐܪܥܐ ܥܬܝ̈ܕܢ ܕܢܗ̈ܘܝܢ ܗܠܝ̣ܢ. ܐܘ ܟܠܗ̇ ܐܪܥܐ ܡܪܓܫܐ ܀

13. Apocalypse of Baruch 29:1

    ܘܥ̣ܢܐ ܘܐܡ̣ܪ ܠܝ. ܕܟܘܠܗ̇ ܗܘ ܐܪܥܐ ܡܕܡ ܕܓܕ̇ܫ ܗܝ̇ܕܝܢ. ܡܛܠ ܗܢܐ ܟܠܗܘܢ ܐܝܠܝܢ ܕܚܝ̈ܝܢ ܢܪܓܫܘܢ

14. Apocalypse of Baruch 29:2

    ܒܗ̇ܘ ܕܝܢ ܙܒܢܐ ܡܓܢ ܐܢܐ ܒܠܚܘܕ ܥܠ ܐܝܠܝܢ ܕܡܫܬܟܚܝܢ ܒܗܘܢ ܒܗ̇ܢܘܢ ܝܘܡ̈ܬܐ ܒܗܕܐ ܐܪܥܐ

15. Apocalypse of Baruch 29:3

    ܘܢܗܘܐ ܡܢ ܒܬܪ ܕܫ̇ܠܡ ܡܕܡ ܕܥܬܝܕ ܕܢܗܘܐ ܒܗܠܝܢ ܡܢܘ̈ܬܐ̣. ܗܝ̇ܕܝܢ ܢ̇ܫܪܐ ܕܢܬܓܠܐ ܡܫܝܚܐ

16. Apocalypse of Baruch 29:4

    ܘܢܬܓܠܐ ܒܗܡܘܬ ܡܢ ܐܬܪܗ. ܘܠܘܝܬܢ ܢܣ̇ܩ ܡܢ ܝܡܐ̣. ܬܪ̈ܝܗܘܢ ܬܢ̈ܝܢܐ ܪ̈ܘܪܒܐ ܗܠܝܢ ܕܒ̇ܪܝܬ ܒܝܘܡܐ ܚܡܝܫܝܐ ܕܒ̣ܪܝܬܐ . ܘܢܛܪܬ ܐܢܘܢ ܥܕܡܐ ܠܗ̇ܘ ܙܒܢܐ. ܘܗ̇ܝܕܝܢ ܢܗܘܘܢ ܠܡܐܟܘܠܬܐ ܠܟܘܠܗܘܢ ܐܝܠܝܢ ܕܡܫܬܚܪܝܢ

17. Apocalypse of Baruch 29:5

    ܐܦ ܐܪܥܐ ܬܬܠ ܦܐܪ̈ܝܗ̇. ܚܕ ܒܪ̈ܒܘ. ܘܚܕܐ ܓܦܬܐ ܢܗ̈ܘܝܢ ܒܗ̇ ܐܠܦ ܫܒܫ̈ܬܝܢ. ܘܚܕܐ ܫܒܫܬܐ ܬܥܒܕ ܐܠܦ ܣܓܘ̈ܠܝܢ. ܘܚܕ ܣܓܘܠܐ ܢܥܒܕ ܐܠܦ ܥܢܒ̈ܝܢ. ܘܚܕܐ ܥܢܒܬܐ ܬܥܒܕ ܟܘܪܐ ܕܚܡ̣ܪܐ

18. Apocalypse of Baruch 29:6

    ܘܐܝܠܝܢ ܕܟܦ̣ܢܘ ܢܬܒܣܡܘܢ. ܘܬܘܒ ܕܝܢ ܢܚܙܘܢ ܬܕܡܪ̈ܬܐ ܒܟܘܠ ܝܘܡ

19. Apocalypse of Baruch 29:7

    ܪ̈ܘܚܐ ܓܝܪ ܢܦ̈ܩܢ ܡܢ ܩܕܡܝ. ܠܡܝܬܝܘ ܒܟܠ ܨܦܪ ܘܨܦܪ ܪܝܚܐ ܕܦܐܪ̈ܐ ܕܒܣܡ̈ܢܐ. ܘܒܫܘܠܡܗ ܕܝܘܡܐ ܥ̇ܢ̈ܢܐ ܕܪ̈ܣܢ ܛܠܐ ܕܐܣܝܘܬܐ

20. Apocalypse of Baruch 29:8

    ܘܢܗܘܐ ܒܗ ܒܗ̇ܘ ܙܒܢܐ. ܢܚܘܬ ܬܘܒ ܡܢ ܠܥܠ ܐܘܨ̇ܪܐ ܕܡܢܢܐ. ܘܢܐܟܠܘܢ ܡܢܗ ܒܗܠܝܢ ܫܢ̈ܝܐ. ܡܛܠ ܕܗ̣ܢܘܢ ܐܢܘܢ ܕܡܛܝܘ ܠܫܘܠܡܗ ܕܙܒܢܐ ܀ •

21. Apocalypse of Baruch 30:1

    ܘܢܗܘܐ ܡܢ ܒܬܪ ܗܠܝܢ ܐܡܬܝ ܕܢܬܡܠܐ ܙܒܢܐ ܕܡܐܬܝܬܗ ܕܡܫܝܚܐ ܘܢܗܦܘܟ ܒܬܫܒܘܚܬܐ. ܗ̇ܝܕܝܢ ܟܘܠܗܘܢ ܐܝܠܝܢ ܕܕܡܟ̣ܘ ܒܣܒܪܗ ܩܝܡ̇ܝܢ

22. Apocalypse of Baruch 30:2

    ܘܢܗܘܐ ܒܗ̇ܘ ܙܒܢܐ̣. ܢܬܦܬܚܘܢ ܐܘܨܪ̈ܐ ܗ̇ܢܘ̇ܢ ܕܒܗܘܢ ܐܬܢܛܪ ܡܢܝܢܐ ܕܢܦܫ̈ܬܐ ܕܙܕܝ̈ܩܐ ܘܢܦܩ̈ܢ. ܘܢܬܚܙܐ ܣܘܓܐ̈ܗܝܢ ܕܢܦܫ̈ܬܐ ܐܟܚܕܐ ܒܚܕ ܟܢܫܐ̇. ܕܚܕܐ ܬܪܥܝܬܐ. ܘܢܚ̈ܕܝܢ ܩܕܡ̈ܝܬܐ̣ ܘܐܚܪ̈ܝܬܐ ܠܐ ܢܬܬܥ̈ܝܩܢ

23. Apocalypse of Baruch 30:3

    ܝܕ̈ܥܢ ܓܝܪ ܕܡܛ̣ܐ ܙܒܢܐ. ܕܐܡܝܪ ܥܠܘܗܝ̇. ܕܫܘܠܡܗܘܢ ܕܙܒ̈ܢܐ

24. Apocalypse of Baruch 30:4

    ܢܦܫ̈ܬܗܘܢ ܕܝܢ ܕܪ̈ܫܝܥܐ ܟܕ ܢܚ̈ܙܝܢ ܟܠܗܝܢ ܗܠܝ̣ܢ. ܗܝ̇ܕܝܢ ܝܬܝܪܐܝܬ ܢܫ̈ܘܚܢ

25. Apocalypse of Baruch 30:5

    ܝܕ̈ܥܢ ܓܝܪ ܕܡ̣ܛܐ ܬܫܢܝܩܗܘܢ ܘܐܬ̣ܐ ܐܒܕܢܗܘܢ ܀ ܀ ܀ ܀

26. Apocalypse of Baruch 31:1

    ܘܗ̣ܘܐ ܡܢ ܒܬܪ ܗܠܝܢ̣. ܐ̇ܙܠܬ ܐܢܐ ܠܘܬ ܥܡܐ ܘܐܡ̇ܪܬ ܠܗܘܢ. ܟܢ̇ܫܘ ܠܝ ܟܘܠܗܘܢ ܣܒܝ̈ܟܘܢ. ܘܐܡ̇ܪ ܠܟܘܢ ܡ̈ܠܐ

27. Apocalypse of Baruch 31:2

    ܘܐܬܟܢܫܘ ܟܘܠܗܘܢ ܠܢܚܠܐ ܕܩܕܪܘܢ

28. Apocalypse of Baruch 31:3

    ܘܥ̇ܢܝܬ ܘܐܡ̇ܪܬ ܠܗܘܢ. ܫܡ̣ܥ ܐܝܣܪܐܝܠ ܘܐܡ̇ܪ ܠܟ. ܘܐܢܬ ܙܪܥܗ ܕܝܥܩܘܒ. ܨܘܬ ܘܐ̇ܪܬܝܟ

29. Apocalypse of Baruch 31:4

    ܠܐ ܬܛܥܘܢ ܠܨܗܝܘܢ. ܐܠܐ ܗ̣ܘܝܬܘܢ ܥ̣ܗܝܕܝܢ ܠܥܩ̈ܬܗ̇ ܕܐܘܪܫܠܡ

30. Apocalypse of Baruch 31:5

    ܗܐ ܓܝܪ ܝܘܡ̈ܬܐ ܐܬ̇ܝ̣ܢ ܘܢܬܢܣܒ ܠܚ̇ܒܠܐ ܟܠܡܕܡ ܕܗ̣ܘܐ. ܘܢܗܘܐ ܐܝܟ ܕܠܐ ܗ̣ܘܐ • ܀ •

31. Apocalypse of Baruch 32:1

    ܐܢܬܘܢ ܕܝܢ ܐܢ ܡܥܬܕܝܢ ܐܢܬܘܢ ܠܒܝܟ̈ܘܢ ܕܬܙܪܥܘܢ ܒܗܘܢ ܦܐܪ̈ܘܗܝ ܕܢܡܘܣܐ. ܡܓܢ ܥܠܝܟܘܢ ܒܗ̇ܘ ܙܒܢܐ ܕܥܬܝܕ ܚܝܠܬܢܐ̇. ܕܢܙܝܥ ܠܟܘܠܗ̇ ܒ̣ܪܝܬܐ

32. Apocalypse of Baruch 32:2

    ܡܛܘܠ ܕܡܢ ܒܬܪ ܩܠܝܠ ܙ̣ܒܢܐ ܢܬܬܙܝܥ ܒܢܝܢܗ̇ ܕܨܗܝܘܢ ܕܢܬܒܢܐ ܬܘܒ

33. Apocalypse of Baruch 32:3

    ܐܠܐ ܠܐ ܡܩܘܐ ܗ̣ܘ ܗ̇ܘ ܒܢܝܢܐ. ܐܠܐ ܬܘܒ ܡܢ ܒܬܪ ܙܒܢܐ ܡܬܥܩܪ. ܘܡܩܘܝܐ ܟܕ ܚܪܒܐ̣ ܥܕܡܐ ܠܙܒܢܐ

34. Apocalypse of Baruch 32:4

    ܘܡܢ ܒܬܪܟܢ ܡܬܒܥܝܐ ܠܡܬܚܕܬܘ ܒܬܫܒܘܚܬܐ. ܘܡ̣ܫܬ̣̇ܟܠܠܐ ܠܥܠܡ

35. Apocalypse of Baruch 32:5

    ܠܐ ܗܟܝܠ ܡܬܒܥܝܐ ܠܢ ܕܢܬܬܥܝܩ ܗܢܐ ܟܠܗ ܥܠ ܒܝܫ̣ܬܐ ܕܐܬܬ ܗܫܐ ܐܝܟ ܕܥܠ ܡܕܡ ܕܥܬܝܕ

36. Apocalypse of Baruch 32:6

    ܡܢ̣ ܬܪ̈ܬܝܗܝܢ ܕܝܢ ܥܩ̈ܬܐ̣. ܪܒ ܗܘ ܐܓܘܢܐ. ܐܡܬܝ ܕܥܬܝܕ ܚܝܠܬܢܐ ܕܢܚܕܬ ܒ̣ܪܝܬܗ

37. Apocalypse of Baruch 32:7

    ܘܗܫܐ ܠܐ ܬܬܩܪܒܘܢ ܠܝ ܥܕܡܐ ܠܩܠܝܠ ܝܘܡ̈ܝܢ. ܘܠܐ ܬܦܩܕܘܢܢܝ ܥܕܡܐ ܕܐ̇ܬܐ ܠܘܬܟܘܢ

38. Apocalypse of Baruch 32:8

    ܘܗ̣ܘܐ ܕܟܕ ܐܡ̇ܪܬ ܠܗܘܢ ܟܠܗܝܢ ܗܠܝܢ ܡ̈ܠܐ̣. ܐ̇ܙܠܬ ܠܝ ܐܢܐ ܒܪܘܟ ܠܐܘܪܚܝ. ܘܟܕ ܚܙܢܝ ܥܡܐ ܕܐ̇ܙܠ ܐܢܐ. ܐܪܝܡܘ ܩܠܗܘܢ ܘܐܝܠܠܘ ܘܐܡ̣ܪܘ

39. Apocalypse of Baruch 32:9

    ܠܐܝ̇ܟܐ ܐܙ̇ܠ ܐܢܬ ܠܟ ܡܢܢ ܒܪܘܟ . . ܘܫ̇ܒ̣ܩܬ ܠܢ ܐܝܟ ܐܒܐ ܕܫ̇ܒܩ ܒܢܘ̈ܗܝ ܝܬܡ̈ܐ ܘܐ̇ܙܠ ܡܢ ܠܘܬܗܘܢ ܀

40. Apocalypse of Baruch 33:1

    ܗܠܝܢ ܐܢܘܢ ܦܘܩ̈ܕܢܐ ܕܦܩܕܟ ܚܒܪܟ ܐܪܡܝܐ ܢܒܝܐ ܘܐܡ̣ܪ ܠܟ݃

41. Apocalypse of Baruch 33:2

    ܚܙܝ ܠܗܢܐ ܥܡܐ ܥܕ ܐ̇ܙܠ ܐܢܐ ܘܐܬܩܢ ܫܪܟܐ ܕܐܚ̈ܝܢ ܒܒܒܠ. ܗܠܝܢ ܕܢܦ̣ܩ ܥܠܝܗܘܢ ܓܙܪ ܕܝܢ̣ܐ ܕܢܫܬܒܘܢ

42. Apocalypse of Baruch 33:3

    ܘܗܫܐ ܐܢ ܗ̣ܘ ܕܐܦ ܐܢܬ ܫܒ̣ܩܬ ܠܢ̣. ܛܒ ܗܘܐ ܠܢ ܕܢܡܘܬ ܟܠܢ ܩܕܡܝ. ܘܗ̇ܝܕܝܢ ܬܪܚܩ ܡܢܢ ܀

43. Apocalypse of Baruch 34:1

    ܘܥ̇ܢܝܬ ܘܐ̇ܡܪܬ ܠܗ ܠܥܡܐ ܚܣ ܠܝ ܕܐܫܒܘܩܟܘܢ ܐܘ ܕܐܪܚܩ ܡܢܟܘܢ. ܐܠܐ ܒܠܚܘܕ ܐ̇ܙܠ ܥܕܡܐ ܠܒܝܬ ܩܕܘܫ ܩܘܕ̇ܫܐ ܕܐܒܥܐ ܡܢ ܚܝܠܬܢܐ ܥܠܝܟܘܢ ܘܥܠ ܨܗܝܘܢ. ܕܐܢ ܐܬܢܗܪ ܡܕܡ ܝܬܝܪ. ܘܡܢ ܒܬܪ ܗܠܝܢ ܗ̇ܦܟ ܐܢܐ ܠܘܬܟܘܢ ܀

44. Apocalypse of Baruch 35:1

    ܘܐ̇ܙܠܬ ܐܢܐ ܒܪܘܟ ܥܕܡܐ ܠܐܬܪܐ ܩܕܝܫܐ. ܘܝܬ̇ܒ̣ܬ ܥܠ ܡ̈ܦܠܬܗ ܘܒܟ̇ܝܬ ܘܐܡ̇ܪܬ

45. Apocalypse of Baruch 35:2

    ܐܘ ܥ̈ܝܢܝ ܗ̈ܘܝܢ ܡܒܘܥ̈ܐ ܘܬܡܪ̈ܐ ܕܥ̈ܝܢܝ ܡܥܝܢܐ ܕܕܡ̈ܥܐ

46. Apocalypse of Baruch 35:3

    ܐܝܟ̇ܢܐ ܓܝܪ ܐܬܬܢܚ ܥܠ ܨܗܝܘܢ. ܘܐܝܟ̇ܢܐ ܐܬܐܒܠ ܥܠ ܐܘܪܫܠܡ

47. Apocalypse of Baruch 35:4

    ܡܛܠ ܕܒܗܢܐ ܐܬܪܐ ܐܝܟܐ ܕܡܬܓܪܓܚ ܐܢܐ ܗܫܐ. ܡܢ ܩܕܝܡ ܪܒ ܟܗ̈ܢܐ ܡܩܪܒ ܗܘܐ ܩܘܪ̈ܒܢܐ ܩܕܝܫ̈ܐ. ܘܣ̇ܐܡ ܗܘܐ ܒܗ ܥܛܪܐ ܕܒܣܡ̈ܐ ܕܪ̈ܝܚܢܐ ܒܣܝܡ̈ܐ

48. Apocalypse of Baruch 35:5

    ܗܫܐ ܕܝܢ ܐܬܥܒܕ ܥܦܪܐ ܫܘܒܗܪܢ. ܘܪܓܬܐ ܕܢܦܫܢ ܚܠ̣ܐ ܀

49. Apocalypse of Baruch 36:1

    ܘܟܕ ܐܡ̇ܪܬ ܗܠܝܢ ܕܡ̇ܟܬ ܬܡܢ. ܘܚܙ̇ܝܬ ܒܠܠܝܐ ܚܙܘܐ̣

50. Apocalypse of Baruch 36:2

    ܘܗܐ ܥܒܐ ܕܐܝ̈ܠܢܐ ܕܢܨܝܒ ܒܦܩܥܬܐ. ܘܚܕܝܪܝܢ ܗܘܘ ܠܗ ܛܘܪ̈ܐ ܪ̈ܡ̇ܐ ܘܩܫ̈ܝܐ ܕܫܩܝ̈ܦܐ. ܘܐܬܪܐ ܣܓܝܐܐ ܐܚܝܕ ܗܘܐ ܗ̇ܘ ܥܒܐ

51. Apocalypse of Baruch 36:3

    ܘܗܐ ܡܢ ܠܩܘܒܠܗ ܣܠ̣ܩܬ ܓܦܬܐ ܚܕܐ. ܘܡܢ ܬܚܘܬܝܗ̇ ܢܦܩ̇ ܗܘܐ ܡܒܘܥܐ ܒܢܝܚܐ

52. Apocalypse of Baruch 36:4

    ܘܡ̣ܛܐ ܕܝܢ ܗ̇ܘ ܡܒܘܥܐ ܥܕܡܐ ܠܥܒܐ. ܘܗ̣ܘܐ ܠܓ̈ܠܠܐ ܪ̈ܘܪܒܐ. ܘܐܛܝܦܘ ܗܠܝܢ ܓ̈ܠܠܐ ܠܗ̇ܘ ܥ̇ܒܐ. ܘܡܢ ܫܠܝܐ ܥܩ̣ܪܘ ܠܣܘܓܐܗ ܕܥܒܐ ܗ̇ܘ. ܘܣܚ̣ܦܘ ܠܟܠܗܘܢ ܛܘ̣ܪ̈ܐ ܕܚܕܪ̈ܘܗܝ

53. Apocalypse of Baruch 36:5

    ܘܪܘܡܗ ܕܥܒܐ ܡܬܡܟܟ ܗܘܐ. ܘܪܝܫܗܘܢ ܕܛܘ̣ܪ̈ܐ ܐܬܡܟܟ. ܘܛܒ ܐܬܚܝܠ ܡܒܘܥܐ ܗ̇ܘ. ܕܠܐ ܢܫܒܘܩ ܡܕܡ ܡܢ ܗ̇ܘ ܥ̇ܒܐ ܣܓܝܐܐ ܐܠܐ ܚܕ ܐܪ̇ܙܐ ܒܠܚܘܕ

54. Apocalypse of Baruch 36:6

    ܐܦ ܠܗ ܟܕ ܐܪܡܝ. ܘܠܣܘܓܐܗ ܕܥܒܐ ܗ̇ܘ ܐܘܒܕ ܘܥ̣ܩܪ. ܕܡܕܡ ܠܐ ܢܫܬܒܩ ܡܢܗ. ܐܦ ܠܐ ܐܬܪܗ ܢܬܝܕܥ. ܗ̣ܝ ܕܝܢ ܗ̇ܝ ܓܦܬܐ ܐ̇ܬܝܐ ܗܘܬ ܥܡ ܡܒܘܥܐ ܒܫܠܝܐ ܘܒܢܝܚܐ ܣܓܝܐܐ. ܘܐܬܬ ܥܕܡܐ ܠܐܬܪܐ ܚܕ ܕܠܐ ܪܚܝܩ ܗܘܐ ܡܢ ܐܪܙܐ. ܘܠܐܪܙܐ ܟܕ ܪܡ̣ܐ ܩܪܒܘܗܝ ܠܘܬܗ̣̇

55. Apocalypse of Baruch 36:7

    ܘܚ̇ܙܝܬ ܘܗܐ ܦܬ̣ܚܬ ܦܘܡܗ̇ ܓܦܬܐ ܗ̇ܝ. ܘܡܠ̣ܠܬ ܘܐܡ̣ܪܬ ܠܐܪ̇ܙܐ ܗ̇ܘ. ܠܐ ܗܘܐ ܐܢܬ ܗܘ ܐܪܙܐ ܕܐܫܬ̣ܚܪܬ ܡܢ ܥܒܐ ܕܒܝ̣ܫܬܐ. ܘܒܐ̣ܝܕܟ ܐܡܝܢܐ ܗܘܬ ܒܝ̣ܫܬܐ ܘܡܬܥܒܕܐ ܗܠܝܢ ܟܘܠܗܝܢ ܫܢ̈ܝܐ. ܘܛ̇ܒܬܐ ܠܐ ܡܡܬܘܡ

56. Apocalypse of Baruch 36:8

    ܘܡܬܚܝܠ ܗ̣ܘܝܬ ܥܠ ܕܠܐ ܕܝܠܟ. ܐܦ ܠܐ ܥܠ ܕܝܠܟ ܡܢ ܡܬܘܡ ܪܚܡܬ. ܘܡ̇ܬܚ ܗ̣ܘܝܬ ܐܘܚܕܢܟ ܥܠ ܐܝܠܝܢ ܕܪܚܝܩܝܢ ܡܢܟ. ܘܠܐܝܠܝܢ ܕܡܬܩܪܒܝܢ ܠܟ ܒܡܨܝ̈ܕܬܐ ܕܪܘܫܥܟ ܐܚ̇ܕ ܗ̣ܘܝܬ ܘܡܪܝܡ ܗ̣ܘܝܬ ܢܦܫܟ ܒܟܠ ܙܒܢ. ܐܝܟ ܗ̇ܘ ܕܠܐ ܡܫܟܚ ܕܢܬܥܩܪ

57. Apocalypse of Baruch 36:9

    ܗܫܐ ܕܝܢ ܣܪܗܒ ܙܒܢܟ ܘܡܛܝ ܥܕܢܟ

58. Apocalypse of Baruch 36:10

    ܙܠ ܗܟܝܠ ܐܦ ܐܢܬ ܐܪ̇ܙܐ ܒܬܪ ܥܒܐ. ܕܐܙ̣ܠ ܩܕܡܝܟ. ܘܗ̣ܘܝ ܥܡܗ ܚܠ̣ܐ. ܘܥܦܪܟܘܢ ܢܬܚܠܛ ܐܟܚܕܐ. ܘܕܡ̣ܟܘ ܗܫܐ ܒܥܩܬܐ ܘܫܠܘ ܒܬܫܢܝܩܐ. ܥܕܡܐ ܕܢܐܬܐ ܙܒܢܟ ܐܚܪܝܐ ܕܒܗ ܬܘܒ ܬܐܬܐ. ܘܝܬܝܪܐܝܬ ܬܫܬܢܩ • • ܀

59. Apocalypse of Baruch 37:1

    ܘܡܢ ܒܬܪ ܗܠܝܢ ܚܙ̇ܝܬܗ ܠܗ̇ܘ ܐܪܙܐ ܟܕ ܝܩ̇ܕ. ܘܠܓܦܬܐ ܟܕ ܪܒ̇ܝܐ̣ ܗ̣ܝ ܘܟܠ ܕܚܕܪ̈ܝܗ̇ ܗ̣ܘܐ. ܦܩܥܬܐ ܕܡ̣ܠܝܐ ܗܒ̈ܒܐ ܕܠܐ ܚܡ̇ܝܢ̇. ܘܐܢܐ ܕܝܢ ܐܬܬܥ̇ܝܪܬ ܘܩܡ̇ܬ ܀

60. Apocalypse of Baruch 38:1

    ܘܨ̇ܠܝܬ ܘܐܡ̇ܪܬ. ܡܪܝܐ ܡܪܝ. ܐܢܬ ܗܘ ܒܟܠܙܒܢ ܡܢܗܪ ܐܢܬ ܠܐܝܠܝܢ ܕܒܣܘܟܠܐ ܡܬܕܒܪܝܢ

61. Apocalypse of Baruch 38:2

    ܢܡܘܣܟ ܚ̈ܝܐ ܗܘ. ܘܚܟܡܬܟ ܬܪܝܨܘܬܐ ܗܝ

62. Apocalypse of Baruch 38:3

    ܐܘܕܥܝܢܝ ܗܟܝܠ ܦܘܫܩܗ ܕܗܢܐ ܚܙܘܐ

63. Apocalypse of Baruch 38:4

    ܐܢܬ ܓܝܪ ܝܕܥ ܐܢܬ ܕܢܦܫܝ ܒܟܠܙܒܢ ܒܢܡܘܣܟ ܡܬܗܦܟܐ ܗܘܬ. ܘܡܢ ܝܘܡ̈ܝ ܡܢ ܚܟܡܬܟ ܠܐ ܐܪܚ̇ܩܬ ܀

64. Apocalypse of Baruch 39:1

    ܘܥ̣ܢܐ ܘܐܡ̣ܪ ܠܝ. ܒܪܘܟ̣. ܗܢܘ ܦܘܫܩܗ ܕܚܙܘܐ ܕܚ̣ܙܝܬ

65. Apocalypse of Baruch 39:2

    ܐܝܟ ܕܚܙ̣ܝܬ ܥܒܐ ܣܓܝܐܐ ܗ̇ܘ ܕܚܕܝܪܝܢ ܗܘܘ ܠܗ ܛܘ̣ܪ̈ܐ ܪ̈ܡ̇ܐ ܘܩܫ̈ܝܐ. ܗܕܐ ܗܝ ܡܠܬܐ

66. Apocalypse of Baruch 39:3

    ܗܐ ܝܘܡ̈ܬܐ ܐܬ̇ܝܢ. ܘܬܬܚܒܠ ܗܕܐ ܡ̇ܠܟܘܬܐ ܗ̇ܝ ܕܒܙܒܢ ܚܒܠ̣ܬ ܠܨܗܝܘܢ. ܘܬܫܬܥܒܕ ܠܗ̇ܝ ܕܐܬ̇ܝܐ ܒܬܪܗ̇

67. Apocalypse of Baruch 39:4

    ܬܘܒ ܕܝܢ ܐܦ ܗ̇ܝ ܒܬܪ ܙܒܢܐ ܡܬܚܒܠܐ. ܘܬܩܘܡ ܐܚܪܬܐ ܬܠܝܬܝܬܐ. ܘܬܫܬܠܛ ܐܦ ܗ̇ܝ ܒܙܒܢܗ̇ ܘܬܬܚܒܠ

68. Apocalypse of Baruch 39:5

    ܘܡܢ ܒܬܪ ܗܠܝܢ ܬܩܘܡ ܡܠܟܘܬܐ ܪܒܝܥܝܬܐ ܕܐܘܚܕܢܗ̇ ܗ̇ܘܐ ܩܫ̣ܐ. ܘܒܝܫ ܝܬܝܪ ܡܢ ܕܗܠܝܢ ܕܗ̈ܘܝ ܩܕܡܝܗ̇. ܘܡܕܒܪܐ ܙܒ̈ܢܐ ܣܓܝܐ̈ܐ. ܐܝܟ ܥܒ̈ܐ ܕܦܩܥܬܐ. ܘܐܚ̇ܕܐ ܙܒܢ̈ܐ. ܘܬܬܪܝܡ ܝܬܝܪ ܡܢ ܐܪ̈ܙܐ ܕܠܒܢܢ

69. Apocalypse of Baruch 39:6

    ܘܢܬܛܡܪ ܒܗ̇ ܫܪܪܐ. ܘܢܥܪܩܘܢ ܠܘܬܗ̇ ܟܘܠܗܘܢ ܐܝܠܝܢ ܕܡܦܠܦܠܝܢ ܒܥܘ̣ܠܐ. ܐܝܟ ܕܥܪ̈ܩܢ ܚܝܘ̈ܬܐ ܒܝܫ̣̈ܬܐ ܘܚ̈ܠܕܢ ܒܥܒܐ

70. Apocalypse of Baruch 39:7

    ܘܢܗܘܐ ܡܐ ܕܩ̣ܪܒ ܙܒܢܐ ܕܫܘ̇ܠܡܗ̇ ܕܬܦܠ. ܗܝ̇ܕܝܢ ܬܬܓܠܐ ܪܝܫܝܬܗ ܕܡܫܝܚܝ. ܗ̇ܝ ܕܕܡܝܬ ܠܡܒܘܥܐ ܘܠܓܦܬܐ. ܘܡܐ ܕܐܬܓܠ̣ܝܬ ܬܥܩܘܪ ܣܘܓܐܐ ܕܟܢܫܗ

71. Apocalypse of Baruch 39:8

    ܘܗ̇ܝ ܕܚ̣ܙܝܬ ܐܪܙܐ ܕܪܡ̇ܐ ܗܘ ܕܐܫܬܚܪ ܡܢ ܗ̇ܘ ܥܒܐ. ܘܥܠ ܗܕܐ ܕܡܠ̣ܠܬ ܥܡܗ ܓܦܬܐ ܡ̈ܠܐ ܗܠܝܢ ܕܫܡ̣ܥܬ . ܗܕܐ ܗܝ ܡܠܬܐ ܀ • ܀

72. Apocalypse of Baruch 40:1

    ܡܕܒܪܢܐ ܐܚܪܝܐ ܕܗ̇ܝܕܝܢ ܢܫܬܚܪ ܟܕ ܚܝ. ܟܕ ܢܬܚܪܒܘܢ ܣܘܓܐܐ ܕܟܢܫܗ̇. ܘܢܬܦܟܪ ܘܢܣܩܘܢܝܗܝ ܥܠ ܛܘ̣ܪܐ ܕܨܗܝܘܢ. ܘܡܫܝܚܝ ܡܟܣ ܠܗ ܥܠ ܟܘܠܗܘܢ ܪ̈ܘܫܥܘܗܝ. ܘܢܟܢ̇ܫ ܘܢܣܝܡ ܩܕܡܘܗܝ ܟܠܗܘܢ ܥ̇ܒ̈ܕܝܗܘܢ ܕܟܢ̈ܫܘܗܝ

73. Apocalypse of Baruch 40:2

    ܘܡܢ ܒܬܪ ܟܢ ܢܩܛܠܝܘܗܝ. ܘܢܓܢ ܥܠ ܫܪܟܗ ܕܥܡܝ ܗ̇ܘ ܕܡܫܬܟܚ ܒܐܬܪܐ ܕܓ̇ܒܝܬ

74. Apocalypse of Baruch 40:3

    ܘܬܗܘܐ ܪܫܝܬܗ ܩܝܡ̇ܐ ܠܥܠܡ. ܥܕܡܐ ܕܢܫ̣̇ܠܡ ܥܠܡܐ ܕܚ̇ܒܠܐ. ܘܥܕܡܐ ܕܢܬܡܠܘܢ ܙܒ̈ܢܐ ܕܡܩܕܡܝܢ ܐܡܝܪܝܢ

75. Apocalypse of Baruch 40:4

    ܗܢܘ ܚܙܘܟ ܘܗܢܘ ܦܘܫܩܗ ܀

76. Apocalypse of Baruch 41:1

    ܘܥ̇ܢܝܬ ܘܐܡ̇ܪܬ. ܠܡ̣ܢܘ ܘܠܟܡܐ ܗ̈ܘܝܢ ܗܠܝܢ. ܐܘ ܡ̣ܢܘ ܕܫ̇ܘܐ ܕܢܚܐ ܒܗ̇ܘ ܙܒܢܐ

77. Apocalypse of Baruch 41:2

    ܐܡ̇ܠܠ ܕܝܢ ܩܕܡܝܟ ܟܠ ܕܡܬܚܫܒ ܐܢܐ. ܘܐܒ̇ܥܐ ܡܢܟ ܥܠ ܐܝܠܝܢ ܕ̇ܪܢܐ ܐܢܐ

78. Apocalypse of Baruch 41:3

    ܡܛܠ ܕܗܐ ܚ̇ܙܐ ܐܢܐ ܣܓܝܐ̈ܐ ܡܢ ܥܡܟ ܕܐܪܚܩܘ ܡܢ ܩܝ̈ܡܝܟ. ܘܫܕܘ ܡܢܗܘܢ ܢܝܪܗ ܕܢܡܘܣܟ

79. Apocalypse of Baruch 41:4

    ܐܚܪ̈ܢܐ ܕܝܢ ܬܘܒ ܚ̇ܙܝܬ ܕܫܒ̣ܩܘ ܣܪܝܩܘܬܗܘܢ̣. ܘܥܪ̣ܩܘ ܬܚܝܬ ܟܢ̈ܦܝܟ

80. Apocalypse of Baruch 41:5

    ܡܢܐ ܗܟܝܠ ܗ̇ܘܐ ܠܗܘܢ ܠܗܠܝܢ. ܐܘ ܐܝܟ̇ܢܐ ܡ̇ܩܒܠ ܠܗܘܢ ܗ̣ܘ ܙܒܢܐ ܐܚܪܝܐ

81. Apocalypse of Baruch 41:6

    ܐܘ ܕܠܡܐ ܡܬܬܩܠܘ ܡܬܬܩܠ ܙܒܢܗܘܢ ܕܗܠܝܢ. ܘܐܝܟ ܕܢܬ̇ܥ ܡܬܩܠܐ ܗܟܢ ܡܬܕܝܢܝܢ • ܀ ܀ •

82. Apocalypse of Baruch 42:1

    ܘܥ̣ܢܐ ܘܐܡ̣ܪ ܠܝ. ܐܦ ܗܠܝܢ ܐܢܐ ܐܚ̇ܘܝܟ

83. Apocalypse of Baruch 42:2

    ܡܛܘܠ ܕܐܡ̣ܪܬ ܠܡ̣ܢܘ ܘܠܟܡܐ ܗ̈ܘܝܢ ܗܠܝܢ. ܠܐܝܠܝܢ ܕܗܝܡ̣ܢܘ ܗ̇ܘܝܐ ܛܒ̇ܬܐ ܕܡܩܕܡܐ ܐܡܝܪܐ. ܘܠܐܝܠܝܢ ܕܫܝ̇ܛܝܢ ܗ̇ܘܝܐ ܕܠܩܘܒܠܐ ܕܗܠܝܢ

84. Apocalypse of Baruch 42:3

    ܘܕܐܡ̣ܪܬ ܥܠ ܐܝܠܝܢ ܕܐܬܩܪܒܘ ܘܥܠ ܐܝܠܝܢ ܕܐܬܪܚܩܘ̣. ܗܕܐ ܗܝ ܡܠܬܐ

85. Apocalypse of Baruch 42:4

    ܗ̇ܢܘܢ ܕܡܢ ܩܕܝܡ ܐܫܬܥܒܕܘ. ܘܡܢ ܒܬܪܟܢ ܐܪܚܩܘ. ܘܐܬܚܠܛܘ ܒܙܪܥܐ ܕܥܡܡ̈ܐ ܕܚܒܝܟܝܢ. ܕܗܠܝܢ ܙܒܢܗܘܢ ܩܕܡܝܐ ܐܝܬܘܗܝ ܘܪ̈ܡܬܐ ܡܬܚܫܒ

86. Apocalypse of Baruch 42:5

    ܘܐܝܠܝܢ ܕܡܢ ܩܕܝܡ ܠܐ ܝܕܥܘ. ܘܡܢ ܒܬܪܟܢ ܝܕܥܘ ܚ̈ܝܐ. ܘܐܬܚܠܛܘ ܒܙܪܥܐ ܕܥܡܐ ܕܦܪܫ. ܕܗܠܝܢ ܙܒܢܗܘܢ ܩܕܡܝܐ ܪ̈ܡܬܐ ܡܬܚܫܒ

87. Apocalypse of Baruch 42:6

    ܘܝ̇ܪܬܝܢ ܙܒܢ̈ܐ ܠܙܒ̈ܢܐ ܘܥ̈ܕܢܐ ܠܥܕ̈ܢܐ. ܘܚܕ ܡܢ ܚܕ ܡܩܒܠܝܢ. ܘܗ̇ܝܕܝܢ ܠܫܘܠܡܐ ܢܬܦܚܡ ܟܘܠ ܡܕܡ. ܐܝܟ ܡܫܘܚܬܐ ܕܙܒ̈ܢܐ. ܘܐܝܟ ܫܥ̈ܐ ܕܥ̈ܕܢܐ

88. Apocalypse of Baruch 42:7

    ܕܒ̇ܪ ܓܝܪ ܚܒ̇ܠܐ ܠܐܝܠܝܢ ܕܕܝܠܗ ܐܢܘܢ. ܘܚ̈ܝܐ ܠܐܝܠܝܢ ܕܕܝܠܗܘܢ ܐܢܘܢ

89. Apocalypse of Baruch 42:8

    ܘܡܬܩܪܐ ܥܦܪܐ. ܘܡܬܐܡܪ ܠܗ. ܦܢ̇ܐ ܡܕܡ ܕܠܐ ܗܘܐ ܕܝܠܟ ܗܘ. ܘܐܩܝܡ ܟܠܡܕܡ ܕܢܛ̣ܪܬ ܠܙܒܢܗ • ܀ •

90. Apocalypse of Baruch 43:1

    ܐܢܬ ܕܝܢ ܒܪܘܟ ܐܬܩܢ ܠܒܟ ܠܡܕܡ ܕܐܬܐܡܪ ܠܟ. ܘܐܣܬܟܠ ܐܝܠܝܢ ܕܐܬܚܘܝ ܠܟ. ܡܛܠ ܕܐܝܬ ܠܟ ܒܘ̈ܝܐܐ ܣܓܝܐ̈ܐ ܕܠܥܠܡ

91. Apocalypse of Baruch 43:2

    ܐܙܠܬ ܓܝܪ ܡܢ ܐܬܪܐ ܗܢܐ . ܘܥ̇ܒܪ ܐܢܬ ܡܢ ܐܬܪ̈ܘܬܐ ܐܝܠܝܢ ܕܡܬܚܙܝܢ ܠܟ ܗܫܐ. ܘܛܥ̣ܝܬ ܠܡܕܡ ܕܡܬܚܒܠ. ܘܠܐ ܡܬܕܟܪ ܐܢܬ ܬܘܒ ܠܐܝܠܝܢ ܕܒܝ̈ܢܬ ܡܝܘ̈ܬܐ ܐܝܬܝܗܝܢ

92. Apocalypse of Baruch 43:3

    ܙܠ ܗܟܝܠ ܘܦܩ̇ܕ ܠܥܡܟ ܘܬܐ ܠܐܬܪܐ ܗܢܐ. ܘܡܢ ܒܬܪܟܢ ܨܘܡ ܫܒܥܐ ܝܘܡ̈ܝܢ. ܘܗ̇ܝܕܝܢ ܐܬ̇ܐ ܠܘܬܟ ܘܐܡ̇ܠܠ ܥܡܟ ܀

93. Apocalypse of Baruch 44:1

    ܘܐ̇ܙܠܬ ܡܢ ܬܡܢ ܐܢܐ ܒܪܘܟ. ܘܐܬ̇ܝܬ ܠܘܬ ܥܡܝ. ܘܩ̇ܪܝܬ ܠܒܪܝ ܒܘܟܪܝ. ܘܠܓܕܠܝܐ ܪܚ̇ܡܝ . ܘܠܫܒܥܐ ܡܢ ܣ̈ܒܐ ܕܥܡܐ. ܘܐܡ̇ܪܬ ܠܗܘܢ

94. Apocalypse of Baruch 44:2

    ܗܐ ܐܢܐ ܐܙܠ ܐܢܐ ܠܝ ܠܘܬ ܐܒܗ̈ܝ ܐܝܟ ܐܘܪܚܐ ܕܟܘܠܗ̇ ܐܪܥܐ

95. Apocalypse of Baruch 44:3

    ܐܢܬܘܢ ܕܝܢ ܠܐ ܬܪܚܩܘܢ ܡܢ ܐܘܪܚܗ ܕܢܡܘܣܐ. ܐܠܐ ܢܛ̇ܪܘ ܘܙܗܪܘ ܠܥܡܐ ܕܐܫܬܚܪ. ܕܠܐ ܢܪܚܩܘܢ ܡܢ ܦܘܩܕܢ̈ܘܗܝ ܕܚܝܠܬܢܐ

96. Apocalypse of Baruch 44:4

    ܚ̇ܙܝܢ ܐܢܬܘܢ ܓܝܪ ܕܙܕܝܩ ܗܘ ܗ̇ܘ ܕܠܗ ܦ̇ܠܚܝܢ ܚܢܢ. ܘܒܐ̈ܦܐ ܠܐ ܢܣ̇ܒ ܓܒܘܠܢ

97. Apocalypse of Baruch 44:5

    ܘܚܙܘ ܡܕܡ ܕܓܕܫܗ̇ ܠܨܗܝܘܢ. ܘܡܢܐ ܡܛܗ̇ ܠܐܘܪܫܠܡ

98. Apocalypse of Baruch 44:6

    ܡܛܠ ܕܢܬܝܕܥ ܕܝܢ̣ܗ ܕܚܝܠܬܢܐ̇ ܘܐܘܪ̈ܚܬܗ ܕܠܐ ܡܬܥ̈ܩܒܢ ܘܬܪ̈ܝܨܢ ܐ̇ܢ̈ܝܢ

99. Apocalypse of Baruch 44:7

    ܐܢ ܓܝܪ ܬܣܝܒܪܘܢ ܘܬܩܘܘܢ ܒܕܚܠܬܗ ܘܠܐ ܬܛܥܘܢ ܢܡܘܣܗ. ܡܬܚܠܦܝܢ ܥܠܝܟܘܢ ܙܒ̈ܢܐ ܠܛ̇ܒ̈ܬܐ. ܘܬܚܙܘܢ ܒܒܘܝܐܗ̇ ܕܨܗܝܘܢ

100. Apocalypse of Baruch 44:8

     ܡܛܠ ܕܡܕܡ ܕܗ̇ܘܐ ܗܫܐ ܠܐ ܗܘܐ ܡܕܡ. ܡܕܡ ܕܝܢ ܕܥܬܝܕ ܕܢܗܘܐ̣. ܗܘ̣ܝܘ ܪܒ ܣܓ̇ܝ

← Previous · Next → — showing 201–300 of 614

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.