← All works

Peshitta Apocalypse of Baruch

Peshitta (Syriac Old Testament) · 614 sections

1. Apocalypse of Baruch 14:9

   ܐܘ ܡ̣ܢܘ ܡܫܟܚ ܡܬܚܫܒ ܥܠ ܬܪܥܝܬܟ ܕܠܐ ܡܬܕܪܟܐ. ܐܘ ܡ̣ܢܘ ܡܡܬܘܡ ܡܢ ܐܝ̈ܠܝܕܐ ܐܫܟܚ ܪܝܫܐ ܐܘ ܫܘܠܡܐ ܕܚܟܡܬܟ

2. Apocalypse of Baruch 14:10

   ܟܘܠܢ ܓܝܪ ܐܬܕܡܝܢ ܠܗܒܠܐ

3. Apocalypse of Baruch 14:11

   ܐܝ̇ܟܢܐ ܓܝܪ ܕܗܒܠܐ ܣ̇ܠܩ ܕܠܐ ܡܢ ܠܒܐ ܘܗ̇ܦܟ ܕܥ̇ܟ̣. ܗܟܢܐ ܗܘ ܟܝܢܗܘܢ ܕܒܢ̈ܝ ܐܢܫܐ. ܕܠܐ ܒܨܒܝܢܗܘܢ ܐ̇ܙܠܝܢ. ܘܡܢܐ ܗ̇ܘܐ ܠܗܘܢ ܒܫܘܠܡܐ ܠܐ ܝܕ̇ܥܝܢ

4. Apocalypse of Baruch 14:12

   ܙܕܝܩ̈ܐ ܓܝܪ ܫܦܝܪ ܡܣܟܝܢ ܠܫܘܠܡܐ. ܘܕܠܐ ܕܚܠܬܐ ܡܢ ܗܢܐ ܥܘܡܪܐ ܐܙ̇ܠܝܢ. ܡܛܘܠ ܕܐܝܬ ܠܗܘܢ ܠܘܬܟ ܚܝܠܐ ܕܥ̇ܒ̈ܕܐ ܕܢܛܝܪ ܒܐܘܨܪ̈ܐ

5. Apocalypse of Baruch 14:13

   ܡܛܠ ܗܢܐ ܐܦ ܗ̣ܢܘܢ ܕܠܐ ܕܚܠܬܐ ܫܒ̇ܩܝܢ ܠܗ ܠܥܠܡܐ ܗܢܐ. ܘܟܕ ܬܟܝܠܝܢ ܒܚܕܘܬܐ ܡܣܟܝܢ ܕܢܩܒܠܘܢ ܥܠܡܐ ܕܡ̇ܠܟܬ ܠܗܘܢ

6. Apocalypse of Baruch 14:14

   ܠܢ ܕܝܢ ܘܝ ܠܐܝܠܝܢ ܕܐܦ ܗܫܐ ܡܨܛܥܪܝܢ̣ܢ. ܘܒܗ̇ܘ ܙܒܢܐ ܡ̇ܣܟܝܢܢ ܠܒܝ̣ܫ̈ܬܐ

7. Apocalypse of Baruch 14:15

   ܐܢܬ ܕܝܢ ܝܕ̇ܥ ܐܢܬ ܬܪܝܨܐܝܬ ܡܢܐ ܥܒ̣ܕܬ ܡܢ ܥܒ̣̈ܕܝܟ. ܡܛܠ ܕܚܢܢ ܠܐ ܡܫܟ̇ܚܝܢܢ ܕܢܣܬܟܠ ܒܡܕܡ ܕܛܒ. ܐܝ̇ܟܢܐ ܕܐܢܬ ܓܒܘܠܢ

8. Apocalypse of Baruch 14:16

   ܬܘܒ ܕܝܢ ܐܡܠܠ ܩܕܡܝܟ ܡܪܝܐ ܡܪܝ

9. Apocalypse of Baruch 14:17

   ܟܕ ܠܐ ܐܝܬܘܗܝ ܗܘܐ ܥܠܡܐ ܡܢ ܩܕܝܡ ܥܡ ܥܡܘܪ̈ܘܗܝ. ܐܬܚ̇ܫܒܬ ܘܐܡ̇ܪܬ ܒܡܠܬܐ. ܘܒܪ ܫܥܬܗ ܥܒ̈ܕܝܗܝܢ ܕܒ̣ܪ̈ܝܬܐ ܩܡܘ ܩܕܡܝܟ

10. Apocalypse of Baruch 14:18

    ܘܐܡ̣ܪܬ ܕܬܥܒܕ ܠܥܠܡܟ̣ ܒܪܢܫܐ ܡܦܪܢܣܢܐ ܠܥ̇ܒ̈ܕܝܟ. ܕܢܬܝܕܥ ܕܠܐ ܗܘܐ ܗ̣ܘ ܐܬܥܒܕ ܡܛܠ ܥܠܡܐ̣ ܐܠܐ ܥܠܡܐ ܡܛܠܬܗ

11. Apocalypse of Baruch 14:19

    ܘܗܫܐ ܚ̇ܙܐ ܐܢܐ ܕܥܠܡܐ ܕܐܬܥܒܕ ܡܛܠܬܢ ܗܐ ܡܩܘܐ. ܘܚܢܢ ܕܝܢ ܕܡܛܠܬܢ̇ ܗ̣ܘܐ ܐܙ̇ܠܝܢܢ ܀

12. Apocalypse of Baruch 15:1

    ܘܥ̣ܢܐ ܡܪܝܐ ܘܐܡ̣ܪ ܠܝ. ܫܦܝܪ ܐܬܕ̣ܡܪܬ ܥܠ ܡܐܙܠܗܘܢ ܕܒܢܝ̈ܢܫܐ. ܐܠܐ ܠܐ ܛܒܐܝܬ ܕܢܬ ܥܠ ܒܝ̣ܫ̈ܬܐ ܐܝܠܝܢ ܕܓܕ̈ܫܢ ܠܐܝܠܝܢ ܕܚ̇ܛܝܢ

13. Apocalypse of Baruch 15:2

    ܘܕܐܡ̣ܪܬ ܕܙܕܝܩ̈ܐ ܐܬܚܛܦܘ ܘܪ̈ܫܝܥܐ ܐܨܠܚܘ

14. Apocalypse of Baruch 15:3

    ܘܕܐܡ̣ܪܬ ܕܐܢܫ ܠܐ ܝܕܥܗ ܠܕܝ̣ܢܟ

15. Apocalypse of Baruch 15:4

    ܡܛܘܠ ܗܢܐ ܫܡ̣ܥ ܘܐܡ̇ܪ ܠܟ. ܘܨܘܬܝܢ ܘܐܫܡܥܟ ܡ̈ܠܝ

16. Apocalypse of Baruch 15:5

    ܫܦܝܪ ܠܐ ܝܕ̇ܥ ܗܘܐ ܒܪ ܐܢܫܐ ܕܝܢ̣ܝ ܐܠܘ ܠܐ ܩܒ̇ܠ ܢܡܘܣܐ. ܘܐܠܘ ܠܐ ܐܪܬܝܬܗ ܒܣܟܘܠܬܢܘܬܐ

17. Apocalypse of Baruch 15:6

    ܗܫܐ ܕܝܢ ܡܛܠ ܕܟܕ ܝܕ̇ܥ ܥܒܪ. ܘܡܛܠ ܗܢܐ ܐܦ ܟܕ ܝܕ̇ܥ ܢܫܬܢܩ

18. Apocalypse of Baruch 15:7

    ܘܥܠ ܙܕܝܩ̈ܐ ܕܐܡ̣ܪܬ ܥܠܝܗܘܢ ܕܡܛܠܬܗܘܢ ܐܬ̣ܐ ܗܢܐ ܥܠܡܐ. ܐܠܐ ܐܦ ܗ̇ܘ ܬܘܒ ܕܥܬܝܕ ܡܛܠܬܗܘܢ

19. Apocalypse of Baruch 15:8

    ܗܢܐ ܓܝܪ ܥܠܡܐ ܐܝܬܘܗܝ ܠܗܘܢ ܐܓܘܢܐ ܘܥܡܠܐ ܒܠܐܘܬܐ ܣܓܝܐܬܐ. ܘܗ̇ܘ ܗܟܝܠ ܕܥܬܝܕ ܟܠܝܠܐ ܒܬܫܒܘܚܬܐ ܪܒܬܐ ܀

20. Apocalypse of Baruch 16:1

    ܘܥܢ̇ܝܬ ܘܐܡ̇ܪܬ. ܡܪܝܐ ܡܪܝ̣. ܗܐ ܫܢ̈ܝܢ ܕܗܫܐ ܙܥܘܪ̈ܝܢ ܘܒܝ̣̈ܫܢ. ܘܡ̣ܢܘ ܡܫܟܚ ܕܒܗܢܐ ܩܠܝܠ ܢܐܪܬ ܗ̇ܘ ܕܠܝܬ ܠܗ ܡܫܘܚܬܐ ܀ •

21. Apocalypse of Baruch 17:1

    ܘܥ̣ܢܐ ܡܪܝܐ ܘܐܡ̣ܪ ܠܝ. ܠܘܬ ܡܪܝܡܐ̣ ܠܐ ܡܬܚܫܒ ܙܒܢܐ ܣܓܝܐܐ ܐܦ ܠܐ ܫܢ̈ܝܐ ܙܥܘܪ̈ܝܬܐ

22. Apocalypse of Baruch 17:2

    ܡܢܐ ܓܝܪ ܐܗܢܝ ܐܕܡ. ܕܚܝ̣ܐ ܬܫܥܡܐܐ ܘܬܠܬܝܢ ܫܢ̈ܝܢ. ܘܥ̣ܒܪ ܥܠ ܡܕܡ ܕܐܬܦܩܕ

23. Apocalypse of Baruch 17:3

    ܠܐ ܗܟܝܠ ܐܗܢܝ ܠܗ ܣܘܓܐܐ ܕܙܒ̣ܢܐ ܕܚ̣ܝܐ. ܐܠܐ ܐܝܬܝ ܡܘܬܐ. ܘܩܛ̣ܥ ܫܢ̈ܝܐ ܕܐܝܠܝܢ ܕܐܬܝܠܕܘ ܡܢܗ

24. Apocalypse of Baruch 17:4

    ܐܘ ܡܢܐ ܐܬܢܟܝ ܡܘܫܐ ܕܡܐܐ ܘܥܣܪܝܢ ܫ̈ܢ̣ܝܢ ܚ̣ܝܐ ܒܠܚܘܕ̇. ܘܡܛܠ ܕܐܫܬܥܒܕ ܠܡܢ̣ܘ ܕܓܒܠܗ̣ ܐܝܬܝ ܢܡܘܣܐ ܠܙܪܥܗ ܕܝܥܩܘܒ. ܘܐܢܗܪ ܫܪܓܐ ܠܓܢܣܗ ܕܐܝܣܪܝܠ ܀

25. Apocalypse of Baruch 18:1

    ܘܥܢ̇ܝܬ ܘܐܡ̇ܪܬ. ܗ̇ܘ ܗܘ ܕܐܢܗܪ ܢܣ̣ܒ ܡܢ ܢܘܗܪܐ. ܘܩܠܝܠ ܐܝܠܝܢ ܕܐܬܕܡܝܘ ܒܗ

26. Apocalypse of Baruch 18:2

    ܗ̇ܢܘܢ ܕܝܢ ܣܓܝܐ̈ܐ ܕܐܢܗܪ ܠܗܘܢ ܢܣ̣ܒܘ ܡܢ ܚܫܘܟܗ ܕܐܕܡ. ܘܠܐ ܐܬܒܣܡܘ ܒܢܘܗܪܐ ܕܫܪܓܐ ܀

27. Apocalypse of Baruch 19:1

    ܘܥܢ̣ܐ ܘܐܡ̣ܪ ܠܝ. ܡܛܠ ܗܢܐ ܒܗ̇ܘ ܙܒܢܐ ܐܩܝܡ ܠܗܘܢ ܕܝܬܩܐ ܘܐܡ̣ܪ. ܗܐ ܣܡ̇ܬ ܩܕܡܝܟܘܢ ܚ̈ܝܐ ܘܡܘܬܐ. ܘܐܣܗܕ ܒܗܘܢ ܫܡܝܐ ܘܐܪܥܐ

28. Apocalypse of Baruch 19:2

    ܝܕ̇ܥ ܗܘܐ ܓܝܪ ܕܙܒܢܗ ܩܠܝܠ ܗܘ.. ܘܫܡܝܐ ܕܝܢ ܘܐܪܥܐ ܐܝܬܝܗܘܢ ܒܟܠ ܙܒܢ.

29. Apocalypse of Baruch 19:3

    ܗ̣ܢܘܢ ܕܝܢ ܡܢ ܒܬܪ ܡܘܬܗ ܕܗ̇ܘ ܚܛܘ ܘܐ̇ܥܒܪܘ. ܟܕ ܝܕ̇ܥܝܢ ܕܐܝܬ ܠܗܘܢ ܢܡܘܣܐ ܡܟܣܢܐ. ܘܢܘܗܪܐ ܗ̇ܘ ܕܠܐ ܡܫܟܚ ܗܘܐ ܕܢܛܥܐ ܒܗ ܡܕܡ. ܐܦ ܡܘܙ̈ܠܐ ܕܣ̇ܗ̇ܕܝܢ. ܘܐܢܐ ܘܥܠ ܟܠ ܕܐܝܬ ܕܐ̇ܢ ܐܢܐ

30. Apocalypse of Baruch 19:4

    ܐܢܬ ܕܝܢ ܠܐ ܬܬܚܫܒ ܒܢܦܫܟ ܥܠ ܗܠܝܢ. ܘܠܐ ܬܬܩܠܐ ܥܠ ܐܝܠܝܢ ܕܗܘ̈ܝ

31. Apocalypse of Baruch 19:5

    ܗܫܐ ܫܘܠܡܗ ܗܘ ܓܝܪ ܕܙܒܢܐ. ܐܘ ܕܨ̈ܒܘܬܐ̣ ܐܘ ܕܡܨܠܚܢܘܬܐ. ܐܘ ܕܨܥܪܐ ܡܬܒܥܐ ܘܠܐ ܫܘܪܝܗ

32. Apocalypse of Baruch 19:6

    ܡܛܠ ܕܐܢ ܢܗܘܐ ܒܪܢܫܐ ܡܨܠܚ ܒܩܕܡܝܬܗ ܘܒܣܝܒܘܬܗ ܢܨܛܥܪ̣. ܛܥ̇ܐ ܟܘܠܗ̇ ܡܨܠܚܢܘܬܐ ܕܗܘܬ ܠܗ

33. Apocalypse of Baruch 19:7

    ܘܬܘܒ ܐܢ ܢܗܘܐ ܒܪ ܐܢܫܐ ܡܨ̇ܛܥܪ̈ ܒܩܕܡܝܬܗ ܘܒܐܚܪܝܬܗ ܢܗܘܐ ܡܨܠܚ̣. ܠܐ ܡܬܕܟܪ ܬܘܒ ܨܥܪܗ

34. Apocalypse of Baruch 19:8

    ܘܬܘܒ ܫܡ̣ܥ. ܕܟܠܗ ܙܒܢܐ ܗܢܐ ܡܢ ܝܘܡܐ ܕܐܬܓܙܪ ܡܘܬܐ ܥܠ ܐܝܠܝܢ ܕܥܒ̇ܪܝܢ ܒܗ ܒܗܢܐ ܙܒܢܐ ܐܠܘ ܟܘܠ ܐܢܫ ܡܨܠܚ ܗܘܐ ܘܒܚܪܬܗ ܡܬܚܒܠ ܗܘܐ . ܠܣܪܝܩܘܬܐ ܗ̇ܘܐ ܗܘܐ ܟܠܡܕܡ ܀ • •

35. Apocalypse of Baruch 20:1

    ܡܛܠ ܗܢܐ ܗܐ ܝܘܡ̈ܬܐ ܐܬ̇ܝܢ̣. ܘܢܣܬܪܗܒܘܢ ܙܒ̈ܢܐ ܝܬܝܪ ܡܢ ܩܕܡ̈ܝܐ. ܘܢܪܗܛܘܢ ܥܕ̈ܢܐ ܝܬܝܪ ܥܠ ܐܝܠܝܢ ܕܥܒ̣ܪܘ. ܘܢܥܒܪ̈ܢ ܫܢܝ̈ܐ ܩܠܝܠܐܝܬ̣. ܝܬܝܪ ܥܠ ܗܠܝܢ ܕܩܝ̈ܡܢ

36. Apocalypse of Baruch 20:2

    ܡܛܠ ܗܢܐ ܗܫܐ ܐܪܝܡܬܗ̇ ܠܨܗܝܘܢ. ܕܐܣܬܪܗܒ ܝܬܝܪܐܝܬ ܘܐܣܥܘܪ ܥܠܡܐ ܒܙܒܢܗ

37. Apocalypse of Baruch 20:3

    ܗܫܐ ܗܟܝܠ ܐܚܘ̇ܕ ܒܠܒܟ ܟܠܡܕܡ̣. ܕܡܦܩܕ ܐܢܐ ܠܟ. ܘܚܬܘܡ ܐ̈ܢܝܢ ܒܬܘ̈ܢܐ ܕܡܕܥܟ

38. Apocalypse of Baruch 20:4

    ܘܗܝ̇ܕܝܢ ܐܚ̇ܘܝܟ ܕܝ̣ܢܗ ܕܚܝܠܝ. ܘܐܘܪ̈ܚܬܝ ܕܠܐ ܡܬܥ̈ܩܒܢ

39. Apocalypse of Baruch 20:5

    ܙܠ ܗܟܝܠ ܘܐܬܩܕܫ ܫܒܥܐ ܝܘܡ̈ܝܢ. ܘܠܐ ܬܐܟܘܠ ܠܚܡܐ ܘܠܐ ܬܫܬܐ ܡ̈ܝܐ ܘܠܐ ܬܐܡܪ ܠܐܢܫ

40. Apocalypse of Baruch 20:6

    ܘܡܢ ܒܬܪ ܗܠܝ̣ܢ ܬܐ ܠܐܬܪܐ ܗܢܐ ܘܡܬܓܠܐ ܐܢܐ ܠܟ. ܘܫܪ̈ܝܪܬܐ ܐܡ̇ܠܠ ܥܡܟ. ܘܐܦܩ̇ܕܟ ܥܠ ܕܘܒܪܐ ܕܙܒ̈ܢܐ. ܐܬ̇ܝܢ ܐܢܘܢ ܓܝܪ ܘܠܐ ܡܫܬܘܚܪܝܢ ܰܰܰܰ

41. Apocalypse of Baruch 21:1

    ܘܐܙ̇ܠܬ ܡܢ ܬܡܢ ܘܝܬ̇ܒܬ ܒܢܚܠܐ ܕܩܕܪܘܢ. ܒܡܥܪܬܐ ܕܐܪܥܐ.. ܘܩܕ̇ܫܬ ܢܦܫܝ ܬܡܢ. ܘܠܚܡܐ̣ ܠܐ ܐܟ̇ܠܬ. ܘܠܐ ܟܦܢ̇ܬ. ܘܡ̈ܝܐ ܠܐ ܐܫ̇ܬܝܬ ܘܠܐ ܨܗ̇ܝܬ. ܘܗ̇ܘܝܬ ܬܡܢ ܥܕܡܐ ܠܝܘܡܐ ܫܒܝܥܝܐ. ܐܝܟ ܕܦܩܕܢܝ

42. Apocalypse of Baruch 21:2

    ܘܡܢ ܒܬܪܟ̣ܢ. ܐܬܝ̇ܬ ܠܐܬܪܐ ܗ̇ܘ ܕܡܠܠ ܥܡܝ ܬܡܢ

43. Apocalypse of Baruch 21:3

    ܘܗ̣ܘܐ ܒܡܥܪ̈ܒܘܗܝ ܕܫܡܫܐ. ܢܣܒܬ ܢܦܫܝ ܚܘܫܒܐ ܣܓܝܐܐ. ܘܫ̇ܪܝܬ ܕܐܡܠܠ ܩܕܡ ܚܝܠܬܢܐ. ܘܐܡ̇ܪܬ

44. Apocalypse of Baruch 21:4

    ܐܘ ܗ̇ܘ ܕܥܒ̣ܕ ܐܪܥܐ ܫܡܥܝܢܝ. ܗ̇ܘ ܕܩܒܥ ܪܩܝܥܐ ܒܡܠܬܗ . ܘܪܘܡܗܘܢ ܕܫܡܝܐ ܫܪܪ ܒܪܘܚܐ. ܗ̇ܘ ܕܩ̣ܪܐ ܡܢ ܪܝܫ ܥܠܡܐ̣ ܠܡܕܡ ܕܥܕܟܝܠ ܠܐ ܗܘ̣ܐ. ܘܡܫܬܡܥܝܢ ܠܟ

45. Apocalypse of Baruch 21:5

    ܐܢܬ ܕܠܐܐܪ ܦܩ̣ܕܬ ܒܪܡܙܟ. ܘܠܐܝܠܝܢ ܕܥܬܝ̈ܕܢ ܚܙ̣ܝܬ̣. ܐܝܟ ܐܝܠܝܢ ܕܥܒ̇ܪܢ

46. Apocalypse of Baruch 21:6

    ܐܢܬ ܕܠܚܝ̈ܠܘܬܐ ܕܩܝܡ̇ܝܢ ܩܕܡܝܟ ܒܚܘܫܒܐ ܪܒܐ ܡܕܒ̣ܪܬ. ܐܦ ܠܚܝ̈ܬܐ ܩܕܝ̈ܫܬܐ ܕܡܢܝܢ ܠܝܬ ܠܗܝܢ ܕܥ̣ܒܕܬ ܡܢ ܥܠܡ ܕܫܠܗܒܝܬܐ ܘܕܢܘܪܐ. ܗܠܝܢ ܕܩܝ̈ܡܢ ܚܕܪ̈ܝ ܬܪܘܢܘܣ ܕܝܠܟ ܒܙܥܝܦܘܬܐ ܡܕܒ̣ܪܬ

47. Apocalypse of Baruch 21:7

    ܠܟ ܒܠܚܘܕܝܟ ܐܝܬ ܗܕܐ ܕܬܥܒܕ ܒܪܫܥܬܗ ܟܘܠ ܕܨܒ̣ܝܬ

48. Apocalypse of Baruch 21:8

    ܗ̇ܘ ܕܒܡܢܝܢܐ ܛܘ̈ܦܝ ܡܛܪܐ ܥܠ ܐܪܥܐ ܡܡܛܪ. ܘܫܘܠܡܗܘܢ ܕܙܒ̈ܢܐ ܥܕ ܠܐ ܢܐܬܘܢ. ܐܢܬ ܒܠܚܘܕܝܟ ܝܕ̇ܥܬ. ܚܘܪ ܒܒܥܘܬܝ

49. Apocalypse of Baruch 21:9

    ܐܢܬ ܓܝܪ ܒܠܚܘܕܝܟ ܡܫܟܚ ܐܢܬ ܕܬܣܝܒܪ ܠܟܠܗܘܢ ܐܝܠܝܢ ܕܩܝܡ̇ܝܢ. ܘܠܐܝܠܝܢ ܕܥܒ̇ܪܝܢ ܘܠܐܝܠܝܢ ܕܥܬܝܕܝܢ. ܠܐܝܠܝܢ ܕܚ̇ܛܝܢ ܘܠܐܝܠܝܢ ܕܡܙܕܕܩܝܢ. ܐܝܟ ܚ̇ܝܐ ܕܠܐ ܡܬܥܩܒ

50. Apocalypse of Baruch 21:10

    ܐܢܬ ܗܘ ܓܝܪ ܒܠܚܘܕܝܟ ܚ̇ܝܐ. ܕܠܐ ܡܐ̇ܬ ܘܠܐ ܡܬܥܩܒ. ܘܡܢܝܢܐ ܕܒܢܝ̈ܢܫܐ ܝܕܥܬ

51. Apocalypse of Baruch 21:11

    ܘܐܢ ܒܙܒܢܐ ܣܓ̈ܝܐܐ ܚܛܘ. ܘܐܚܪ̈ܢܐ ܠܐ ܗܘܐ ܩܠܝܠ ܐܙܕܕܩܘ

52. Apocalypse of Baruch 21:12

    ܐܢܬ ܝܕ̇ܥܬ ܕܐܝ̇ܟܐ ܡܢܛܪܬ ܚܪܬܐ ܕܐܝܠܝܢ ܕܚܛܘ. ܐܘ ܫܘܠܡܐ ܕܐܝܠܝܢ ܕܐܙܕܕܩܘ

53. Apocalypse of Baruch 21:13

    ܐܠܘ ܓܝܪ ܗܠܝܢ ܗܘܘ ܚ̈ܝܐ ܒܠܚܘܕ ܕܗܪܟܐ ܠܟܠܢܫ. ܠܝܬ ܗܘܐ ܡܕܡ ܕܡܪܝܪ ܡܢ ܗܕܐ

54. Apocalypse of Baruch 21:14

    ܡܢܐ ܓܝܪ ܡܗܢܐ ܚܝܠܐ ܕܗ̇ܦܟ ܠܟܪܝܗܘܬܐ. ܐܘ ܡܙܘܢܐ ܕܣܒܥܐ ܕܗ̇ܦܟ ܠܟܦܢܐ. ܐܘ ܫܘܦܪܐ ܕܗ̇ܦܟ ܡܣܬܢܐ

55. Apocalypse of Baruch 21:15

    ܒܟܠܥܕܢ ܓܝܪ ܟܝܢܗܘܢ ܕܒܢܝܢ̈ܫܐ ܡܬܚܠܦ

56. Apocalypse of Baruch 21:16

    ܐܘ ܠܐ ܡܕܡ ܐܝܟ ܡܐ ܕܐܝ̇ܬܝܢ ܗ̇ܘܐ ܓܝܪ ܡܢ ܩܕܝܡ. ܗܫܐ ܠܐ ܐܝ̇ܬܝܢ. ܘܐܝܟ ܡܐ ܕܐܝܬ̣ܝܢ ܗܫܐ. ܒܬܪ ܟܢ ܠܐ ܡܩ̇ܘܝܢܢ

57. Apocalypse of Baruch 21:17

    ܐܠܘ ܠܐ ܓܝܪ ܕܥܬܝܕ ܗܘܐ ܕܢܗܘܐ ܫܘܠܡܐ ܠܟܠ̣. ܠܣܪܝܩܘܬܐ ܗ̇ܘܐ ܗܘܐ ܫܘܪܝܢ

58. Apocalypse of Baruch 21:18

    ܐܠܐ ܟܠ ܕܐ̇ܬܐ ܡܢ ܠܘܬܟ ܐܘܕܥܝܢܝ. ܘܥܠ ܡܕܡ ܕܒ̇ܥܐ ܐܢܐ ܡܢܟ ܢܗ̇ܪܝܢܝ

59. Apocalypse of Baruch 21:19

    ܥܕܡܐ ܠܐܡܬܝ ܡܕܡ ܕܡܬܚܒܠ ܡܩܘܐ. ܘܥܕܡܐ ܠܐܡܬܝ ܙܒܢܗܘܢ ܕܡܝܘ̈ܬܐ ܡܨܠܚ. ܘܥܕ ܐ̇ܝܢܐ ܙܒܢܐ ܐܝܠܝܢ ܕܥ̇ܒܪܝܢ ܒܥܠܡܐ ܡܬܦܠܦܠܝܢ ܒܪܘܫܥܐ ܣܓܝܐܐ

60. Apocalypse of Baruch 21:20

    ܦܩܘܕ ܗܟܝܠ ܒܪ̈ܚ̣ܡܐ. ܘܐܩܝܡ ܟܠ ܕܐܡܪܬ ܕܬܝܬܐ. ܕܢܬܝܕܥ ܚܝܠܟ ܠܐܝܠܝܢ ܕܣܒ̇ܪܝܢ ܕܢܓܝܪܘܬ ܪܘܚܟ ܟܪܝܗܘܬܐ ܗܝ

61. Apocalypse of Baruch 21:21

    ܘܚܘܐ ܠܐܝܠܝܢ ܕܠܐ ܝܕ̇ܥܝܢ. ܘܚ̣ܙܘ ܡܕܡ ܕܓܕܫܢ ܘܠܡܕܝܢܬܢ ܥܕ ܗܫܐ. ܐܝܟ ܢܓܝܪܘܬ ܪܘܚܐ ܕܐܘܚܕܢܟ. ܡܛܠ ܕܐܢܬ ܩܪܝܬܢ ܥܠ ܫܡܟ ܥܡܐ ܚܒܝܒܐ

62. Apocalypse of Baruch 21:22

    ܟܘܠ ܗܟܝܠ ܡܢ ܗܫܐ ܟܝܢܐ ܡܝܘܬܐ

63. Apocalypse of Baruch 21:23

    ܘܓܥܘܪ ܡܟܝܠ ܒܡܠܐܟܗ ܕܡܘܬܐ. ܘܬܬܚܙܐ ܬܫܒܘܚܬܟ ܘܬܬܝܕܥ ܪܒܘ̇ܬ ܝܐܝܘܬܟ. ܘܬܬܚܬܡ ܫܝܘܠ ܕܡܢ ܗܫܐ ܠܐ ܬܣܒ ܡܝ̈ܬܐ. ܘܢܦܢܘܢ ܐܘܨܪ̈ܐ ܕܢܦܫ̈ܬܐ ܕܚܒ̈ܝܫܢ ܒܗܘܢ

64. Apocalypse of Baruch 21:24

    ܣܓܝܐ̈ܢ ܐ̈ܢܝܢ ܓܝܪ ܫܢ̈ܝܐ ܐܝܟ ܕܨ̈ܕܝܢ ܕܡܢ ܝܘ̈ܡܝ ܐܒܪܗܡ ܘܐܝܣܚܩ ܘܝܥܩܘܒ. ܘܕܟܠܗܘܢ ܐܝܠܝܢ ܕܕ̇ܡܝܢ ܠܗܘܢ. ܕܒܐܪܥܐ ܕܡ̇ܟܝܢ. ܗܠܝܢ ܕܡܛܠܬܗܘܢ ܐܡ̣ܪܬ ܕܒ̇ܪܝܬ ܥܠܡܐ

65. Apocalypse of Baruch 21:25

    ܘܗܫܐ ܚܘܐ ܒܥܓܠ ܬܫܒܘܚܬܟ. ܘܠܐ ܬܫܘܚܪ ܡܕܡ ܕܡܢܟ ܐܬܡܠܟ

66. Apocalypse of Baruch 21:26

    ܘܗ̣ܘܐ ܕܟܕ ܫܠܡܬ ܡ̈ܠܝܗ̇ ܕܨܠܘܬܐ ܗܕܐ. ܐܬܪܫܠܬ ܣ̇ܓܝ ܀ ܀ ܀

67. Apocalypse of Baruch 22:1

    ܘܗ̣ܘܐ ܡܢ ܒܬܪ ܗܠܝܢ̣. ܘܗܐ ܐܬܦܬܚܘ ܫܡܝܐ. ܘܚܙ̇ܝܬ ܘܚܝܠܐ ܐܬܝܗܒ ܠܝ. ܘܩܠܐ ܡܢ ܡܪ̈ܘܡܐ ܐܫܬܡܥ ܘܐܡ̣ܪ ܠܝ.

68. Apocalypse of Baruch 22:2

    ܒܪܘܟ ܒܪܘܟ̣. ܠܡܢܐ ܡܬܬܙܝܥ ܐܢܬ

69. Apocalypse of Baruch 22:3

    ܗ̇ܘ ܕܐ̇ܙܠ ܒܐܘܪܚܐ̣ ܠܐ ܡܫܠܡ ܠܗ̇. ܐܘ ܗ̇ܘ ܕܦ̇ܪܫ ܒܝܡܐ̇ ܐܠܐ ܡ̇ܛܐ ܠܠܡܐܢܐ ܡܫܟܚ ܢܬܒܝܐܐ̣

70. Apocalypse of Baruch 22:4

    ܐܘ ܗ̇ܘ ܕܡܫܬܘܕܐ ܠܐܢܫ ܕܢܬܠ ܠܗ ܡܘܗܒܬܐ ܐܠܐ ܡܫܠܡ ܠܗ̇ ܠܐ ܗܐ݃ ܓܠܝܙܘܬܐ ܐܝܬܘܗܝ

71. Apocalypse of Baruch 22:5

    ܐܘ ܗ̇ܘ ܕܙ̇ܪܥ ܐܪܥܐ ܐܠܐ ܒܙܒܢܗ̇ ܢܚܨܘܕ ܦܐܪ̈ܝܗ̇. ܠܐ ܗܐ݃ ܡܚܒܠ ܠܗ ܠܟܠܗ

72. Apocalypse of Baruch 22:6

    ܐܘ ܗ̇ܘ ܕܢܨ̇ܒ ܢܨܒܬܐ. ܐܠܐ ܬܪܒܐ ܥܕܡܐ ܠܙܒܢܐ ܕܙܕ̇ܩ ܠܗ̇. ܕܠܡܐ݃ ܡܣܟܐ ܗ̇ܘ ܕܢܨܒܗ̇ ܕܢܣܒ ܡܢܗ̇ ܦܐܪ̈ܐ̣

73. Apocalypse of Baruch 22:7

    ܐܘ ܐܢܬܬܐ ܕܒܛܢܐ ܐܢ ܬܐܠܕ ܕܠܐ ܒܙܒܢܗ̇݃ ܠܐ ܡܩܛܠ ܩ̇ܛܠܐ ܠܗ ܠܥܘ̣ܠܗ̣̇

74. Apocalypse of Baruch 22:8

    ܐܘ ܗ̇ܘ ܕܒ̇ܢܐ ܒܝܬܐ ܐܠܐ ܢܛܠܠܝܘܗܝ ܘܢܫܟܠܠܝܘܗܝ ܠܡܐ݃ ܡܫܟܚ ܕܢܬܩܪܐ ܒܝܬܐ̣. ܐܡ̣ܪ ܠܝ ܠܘܩܕܡ ܗܠܝܢ • ܀ •

75. Apocalypse of Baruch 23:1

    ܘܥ̇ܢܝܬ ܘܐܡ̇ܪܬ. ܠܐ ܡܪܝܐ ܡܪܝ

76. Apocalypse of Baruch 23:2

    ܘܥܢ̣ܐ̇ ܘܐܡ̣ܪ ܠܝ. ܘܥܠ ܡܢܐ ܗܟܝܠ ܡܬܬܙܝܥ ܐܢܬ ܥܠ ܡܕܡ ܕܠܐ ܝܕܥ ܐܢܬ. ܘܥܠ ܡܢܐ ܡܣܬܪܗܒ ܐܢܬ ܥܠ ܡܕܡ ܕܠܐ ܡܦܣ ܐܢܬ

77. Apocalypse of Baruch 23:3

    ܐ̇ܝܟ̇ܢܐ ܓܝܪ ܕܠܐ ܛܥ̣ܝܬ ܠܒ̈ܢܝ ܐܢܫܐ ܐܝܠܝܢ ܕܩܝܡ̇ܝܢ ܘܐܝܠܝܢ ܕܥܒ̣ܪܘ̣. ܗܟܢܐ ܥܗܝܕ ܐܢܐ ܠܐܝܠܝܢ ܕܥܗܝܕܝܢ ܘܠܐܝܠܝܢ ܕܐܬ̇ܝܢ

78. Apocalypse of Baruch 23:4

    ܡܛܠ ܕܟܕ ܚܛ̣ܐ ܐܕܡ ܘܐܬܓܙܪ ܡܘܬܐ ܥܠ ܐܝܠܝܢ ܕܡܬܝܠܕܝܢ. ܗܝ̇ܕܝܢ ܐܬܡܢܝ ܣܘܓܐܗܘܢ ܕܐܝܠܝܢ ܕܡܬܝܠܕܝܢ. ܘܠܗ ܠܡܢܝܢܐ ܗ̇ܘ ܐܬܥܬܕ ܐܬܪܐ ܐܝ̇ܟܐ ܕܢܥܡܪܘܢ ܐܝܠܝܢ ܕܚܝ̈ܝܢ ܘܐܝ̇ܟܐ ܕܢܬܢܛܪܘܢ ܐܝܠܝܢ ܕܡܝܬܝܢ

79. Apocalypse of Baruch 23:5

    ܐܠܐ ܗܟܝܠ ܡܬܡܠܐ ܡܢܝܢܐ ܕܩܕܝܡ ܐܡܝܪ ܠܐ ܚ̇ܝܐ ܒ̣ܪܝܬܐ. ܪܘܚܝ ܓܝܪ ܒ̇ܪܝܐ ܚ̈ܝܐ. ܘܫܝܘܠ. ܡܩܒܠܐ ܡܝ̈ܬܐ

80. Apocalypse of Baruch 23:6

    ܘܬܘܒ ܐܝܬ ܠܟ ܕܬܫܡܥ ܡܕܡ ܕܥܬܝܕ ܕܢܐܬܐ ܡܢ ܒܬܪ ܗܠܝܢ ܙܒܢ̈ܐ

81. Apocalypse of Baruch 23:7

    ܫܪܝܪܐܝܬ ܓܝܪ ܩܪܝܒ ܗܘ ܦܘܪܩܢܝ ܕܢܐܬܐ. ܘܠܐ ܗܘܐ ܪܚܝܩ ܐܝܟ ܕܡܢ ܩܕܝܡ ܀

82. Apocalypse of Baruch 24:1

    ܗܐ ܓܝܪ ܝܘܡ̈ܬܐ ܐܬ̇ܝܢ ܘܢܬܓܠܘܢ ܣܦܪ̈ܐ. ܐܝ̇ܟܐ ܕܟܬܝܒܝܢ ܚܛܗ̈ܐ ܕܟܘܠܗܘܢ ܐܝܠܝܢ ܕܚܛܘ. ܘܬܘܒ ܐܦ ܐܘܨܪ̈ܐ ܐܝ̇ܟܐ ܕܙܕܝܩܘܬܗܘܢ ܕܟܠܗܘܢ ܐܝܠܝܢ ܕܐܙܕܕܩܘ ܒܒ̣ܪܝܬܐ ܐܬ̣ܟܢܫܬ

83. Apocalypse of Baruch 24:2

    ܘܢܗܘܐ ܕܝܢ ܒܗ̇ܘ ܙܒܢܐ̣. ܬ̣ܚܙܐ ܐܢܬ ܘܣܓܝܐ̈ܐ ܕܥܡܟ ܢܓܝܪܘܬ ܪܘܚܗ ܕܪܡܐ. ܗ̇ܝ ܕܒܟܠ ܕܪ ܘܕܪ. ܕܡܓܪ ܗܘܐ ܪܘܚܗ ܥܠ ܟܠܗܘܢ ܝܠܝ̈ܕܐ ܕܚ̇ܛܝܢ ܘܡܙܕܕܩܝܢ

84. Apocalypse of Baruch 24:3

    ܘܥܢ̇ܝܬ ܘܐܡ̇ܪܬ. ܐܠܐ ܗܐ ܡܪܝܐ ܐܢܫ ܠܐ ܝܕ̇ܥ ܡܢܝܢܐ ܕܐܝܠܝܢ ܕܥ̣ܒܪ̈ܝ ܘܐܦ ܠܐ ܕܐܝܠܝܢ ܕܥܬܝ̈ܕܢ

85. Apocalypse of Baruch 24:4

    ܗܐ ܓܝܪ ܐܦ ܐܢܐ ܡܕܡ ܕܓܕܫܢܝ ܝܕ̇ܥ ܐܢܐ. ܡܕܡ ܕܝܢ ܕܥܬܝܕ ܕܢܗܘܐ ܠܣܢ̈ܐܝܢ ܠܐ ܝܕ̇ܥ ܐܢܐ. ܘܐܡܬܝ ܦ̇ܩܕܬ ܥܒ̇ܕ̈ܝܟ ܀ ܀ ܀

86. Apocalypse of Baruch 25:1

    ܘܥ̣ܢܐ ܘܐܡ̣ܪ ܠܝ. ܐܦ ܐܢܬ ܬܬܢܛܪ ܥܕܡܐ ܠܗ̇ܘ ܙܒܢܐ. ܠܐܬ̇ܐ ܗ̇ܝ ܕܥܬܝܕ ܡܪܝܡܐ ܕܢܥܒܕ ܠܥܡܘܪ̈ܝܗ̇ ܕܐܪܥܐ ܠܚܪܬܐ ܕܝܘܡ̈ܬܐ

87. Apocalypse of Baruch 25:2

    ܗܕܐ ܗܟܝܠ ܐܬ̇ܐ ܗ̇ܘܝܐ

88. Apocalypse of Baruch 25:3

    ܟܕ ܬܐܚܘܕ ܬܘܗܬܐ ܠܥܡܘܪ̈ܝܗ̇ ܕܐܪܥܐ. ܘܢܦܠܘܢ ܒܐܘܠܨ̈ܢܐ ܣܓܝܐ̈ܐ. ܘܬܘܒ ܢܦܠܘܢ ܒܫܘܢ̈ܕܐ ܪ̈ܘܪܒܐ

89. Apocalypse of Baruch 25:4

    ܘܢܗܘܐ ܟܕ ܢܐܡܪܘܢ ܒܡܚ̈ܫܒܬܗܘܢ ܡܢ ܐܘܠܨܢܗܘܢ ܣܓܝܐܐ. ܠܐ ܡܬܕܟܪ ܬܘܒ ܚܝܠܬܢܐ ܠܐܪܥܐ. ܘܢܗܘܐ ܕܟܕ ܢܦܣܩܘܢ ܣܒܪܐ̣. ܗܝ̇ܕܝܢ ܢܬܬܥܝܪ ܙܒܢܐ ܀

90. Apocalypse of Baruch 26:1

    ܘܥܢ̇ܝܬ ܘܐܡ̇ܪܬ. ܙܒܢܐ ܟܝ ܣܓܝܐܐ ܡܩܘܐ ܐܘܠܨܢܐ ܗ̇ܘ ܕܗ̇ܘܐ. ܫܢ̈ܝܐ ܣܓܝܐ̈ܬܐ ܐܚ̇ܕܐ ܐܢܢܩܐ ܗ̇ܝ ܀

91. Apocalypse of Baruch 27:1

    ܘܥ̣ܢܐ ܘܐܡ̣ܪ ܠܝ. ܠܬܪܬܥܣܪܐ ܡܢ̈ܘܢ ܐܬܦܠܓ ܙܒܢܐ ܗ̇ܘ. ܘܟܠ ܚܕܐ ܚܕܐ ܡܢܗܝܢ ܡܬܢܛܪܐ ܠܡܕܡ ܕܣ̣ܝܡ ܠܗ̇ ܀

92. Apocalypse of Baruch 27:2

    ܒܡܢ̇ܬܐ ܩܕܡܝܬܐ ܪܝܫܐ ܕܙܘ̈ܥܐ ܗܘ̇ܐ ܀

93. Apocalypse of Baruch 27:3

    ܘܒܡܢܬܐ ܕ̇ܬܪ̈ܬܝܢ ܩ̈ܛܠܐ ܕܪ̈ܘܪܒܢܐ ܀

94. Apocalypse of Baruch 27:4

    ܘܒܡܢܬܐ ܕܬܠܬ ܡܦܘܠܬܐ ܕܣܓܝܐ̈ܐ ܒܡܘܬܐ ܀ •

95. Apocalypse of Baruch 27:5

    ܘܒܡܢ̇ܬܐ ܕܐܪܒܥ ܫܘܕܪܐ ܕܚܪܒܐ ܀

96. Apocalypse of Baruch 27:6

    ܘܒܡܢ̇ܬܐ ܕܚܡܫ ܟܦܢܐ. ܘܟܠܝܢܐ ܕܡܛܪܐ ܀

97. Apocalypse of Baruch 27:7

    ܘܒܡܢܬܐ ܕܫܬ ܙܘ̈ܥܐ. ܘܓܘܢ̈ܚܐ • • ܀

98. Apocalypse of Baruch 27:8

    ̇—̇—̇—̇— ܀

99. Apocalypse of Baruch 27:9

    ܘܒܡܢܬܐ ܕܬܡܢܐ̣. ܣܘܓܐܐ ܕܦܢܛܣ̈ܝܐ. ܘܦܓܥ̈ܐ ܕܫܐ̈ܕܐ ܀

100. Apocalypse of Baruch 27:10

     ܘܒܡ̇ܢܬܐ ܕܬܫܥ̣ ܢܦܠܐ ܕܢܘܪܐ ܀

← Previous · Next → — showing 101–200 of 614

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.