← All works

Peshitta Apocalypse of Baruch

Peshitta (Syriac Old Testament) · 614 sections

1. Apocalypse of Baruch 1:0

   ܟܬܒܐ ܕܓܠܝܢܗ ܕܒܪܘܟ ܒܪ ܢܪܝܐ ܀ ܕܡܦܩ ܡܢ ܝܘܢܝܐ ܠܣܘܪܝܝܐ.

2. Apocalypse of Baruch 1:1

   ܘܗ̣ܘܐ ܒܫܢܬ ܥܣܪܝܢ ܘܚܡܫ ܕܝܘܟܢܝܐ ܡ̇ܠܟܐ ܕܝܗܘܕܐ̣. ܗܘ̣ܐ ܦܬܓܡܗ ܕܡܪܝܐ ܥܠ ܒܪܘܟ ܒܪ ܢܪܝܐ ܘܐ̣ܡ̣ܪ ܠܗ

3. Apocalypse of Baruch 1:2

   ܚܙ̣ܝܬ ܟܠܡܕܡ ܕܥ̇ܒܕ ܠܝ ܥܡܐ ܗܢܐ. ܒܝ̣ܫ̈ܬܐ ܕܥܒ̣ܕܘ ܗܠܝܢ ܬܪܝܢ ܫܒ̈ܛܝܢ ܕܦ̇ܫܘ. ܝܬܝܪ ܡܢ ܥܣܪܐ ܫ̇ܒ̈ܛܝܢ ܕܐܫܬܒܝܘ

4. Apocalypse of Baruch 1:3

   ܫܒ̈ܛܐ ܓܝܪ ܩܕ̈ܡܝܐ ܡܢ ܡ̈ܠܟܝܗܘܢ ܐܬܐܠܨܘ ܕܢܚܛܘܢ. ܗܠܝܢ ܕܝܢ ܬܪܝܢ ܗ̣ܢܘܢ ܐܠܨ̇ܝܢ ܗܘܘ ܘܥ̇ܨܝܢ ܠܡ̈ܠܟܝܗ̇ܘܢ̇ ܕܢܚܛܘܢ

5. Apocalypse of Baruch 1:4

   ܡܛܠ ܗܢܐ ܗܐ ܡܝܬܐ ܐܢܐ ܒܝܫ̣ܬܐ ܥܠ ܡܕܝܢܬܐ ܗܕܐ ܘܥܠ ܥܡܘܪ̈ܝܗ̇. ܘܬܬܪܝܡ ܡܢ ܩܕܡܝ ܥܕ ܙܒܢܐ. ܘܡ̇ܒܕܪ ܐܢܐ ܠܗ ܠܗܢܐ ܥܡܐ ܒܝܢܬ ܥܡ̈ܡܐ ܕܠܥܡ̈ܡܐ ܢܛܐܒ

6. Apocalypse of Baruch 1:5

   ܘܥܡܝ ܕܝܠܝ ܢܬܪܕܐ. ܘܢܐܬܐ ܙܒܢܐ ܘܢܒܥܘܢ ܡܨܠܚܢܘܬܗܘܢ ܕܙܒܢܝ̈ܗܘܢ ܀

7. Apocalypse of Baruch 2:1

   ܗܠܝܢ ܕܝܢ ܐܡ̇ܪܬ ܠܟ ܕܬܐܡܪ ܠܐܪܡܝܐ ܘܠܟܠ ܐܝܠܝܢ ܕܕܡ̇ܝܢ ܠܟܘܢ. ܕܬܬܪܚܩܘܢ ܠܟܘܢ ܡܢ ܗܕܐ ܡܕܝܢܬܐ

8. Apocalypse of Baruch 2:2

   ܡܛܠ ܕܥ̇ܒ̈ܕܝܟܘܢ ܐܝܬܝܗܘܢ ܠܗܕܐ ܡܕܝܢܬܐ̣ ܐܝܟ ܥܡܘܕܐ ܫܪܝܪܐ. ܘܨܠܘ̈ܬܟܘܢ ܐܝܟ ܫܘܪܐ ܚܝܠܬܢܐ ܀

9. Apocalypse of Baruch 3:1

   ܘܐܡ̇ܪܬ ܐܘ ܡܪܝܐ ܡܪܝ̣. ܠܗܕܐ ܐܬ̇ܝܬ ܠܥܠܡܐ ܕܐܚ̇ܙܐ ܒܒܝ̣ܫܬܗ̇ ܕܐܡܝ̣. ܠܐ ܡܪܝ

10. Apocalypse of Baruch 3:2

    ܐܢ ܐܫܟ̇ܚܬ ܪ̈ܚܡ̣ܐ ܒܥ̈ܝܢܝܟ̣. ܣܒ ܠܘܩܕܡ̇ ܪܘܚܝ ܕܐ̇ܙܠ ܠܝ ܠܘܬ ܐܒܗ̈ܝ̣. ܘܠܐ ܐܚ̇ܙܐ ܒܐܒܕܢܗ̇ ܕܐܡܝ

11. Apocalypse of Baruch 3:3

    ܡܛܠ ܕܬܪ̈ܬܝܗܝܢ ܐܠܨ̈ܢ ܠܝ ܣ̇ܓܝ. ܕܐܩܘܡ ܓܝܪ ܠܩܘܒܠܟ̣. ܠܐ ܡܫܟܚ ܐܢܐ. ܐܠܐ ܐܦ ܠܐ ܕܐ̇ܚܙܐ ܒܒܝ̣ܫܬܗ̇ ܕܐܡܝ ܡܫܟܚܐ ܢܦܫܝ

12. Apocalypse of Baruch 3:4

    ܚܕܐ ܕܝܢ ܐܡܪ ܐܢܐ ܩܕܡܝܟ ܡܪܝܐ

13. Apocalypse of Baruch 3:5

    ܡܢܐ ܗܟܝܠ ܗ̇ܘܐ ܡܢ ܒܬܪ ܗܠܝܢ. ܐܢ ܓܝܪ ܡܘܒܕ ܐܢܬ ܡܕܝܢܬܟ. ܘܡܫܠܡ̣ ܐܢܬ ܐܪܥܟ ܠܣܢܐ̈ܝܢ. ܐܝ̇ܟܢܐ ܬܘܒ ܡܬܕܟܪ ܫܡܗ ܕܐܝܣܪܝܠ

14. Apocalypse of Baruch 3:6

    ܐܘ ܐܝ̇ܟܢܐ ܢܡܠܠ ܥܠ ܬܫܒ̈ܚܬܟ. ܐܘ ܠܡ̣ܢܘ ܡܬ̇ܦܫܩ ܡܐ ܕܒܢܡܘܣܟ

15. Apocalypse of Baruch 3:7

    ܐܘ ܕܠܡܐ ܗ̇ܦܟ ܠܗ̇ ܬܨܒܝܬܐ ܠܟܝܢܗ̇. ܘܥܠܡܐ ܬܘܒ ܐ̇ܙܠ ܠܗ ܠܫܬܩܐ ܕܡܢ ܩܕܝܡ

16. Apocalypse of Baruch 3:8

    ܘܡܬܢܣܒ ܠܗ ܣܘܓܐܗܝܢ ܕܢܦܫ̈ܬܐ. ܘܟܝܢܐ ܕܒܢܝ̈ܢܫܐ ܬܘܒ ܠܐ· ܡܫܬܡܗ

17. Apocalypse of Baruch 3:9

    ܘܐܝ̇ܟܐ ܗܘ ܟܠ ܡܐ ܕܐܡ̣ܪܬ ܠܡܘܫܐ ܥܠܝܢ ܀ ܀ ܀ •

18. Apocalypse of Baruch 4:1

    ܘܐܡ̣ܪ ܠܝ ܡܪܝܐ. ܗܕܐ ܡܕܝܢܬܐ ܠܙܒܢܐ ܡܫܬܠܡܐ. ܘܥܡܐ ܡܬܪܕܐ ܒܙܒܢܐ. ܘܥܠܡܐ ܠܐ ܡܬܛܥܐ

19. Apocalypse of Baruch 4:2

    ܐܘ ܕܠܡܐ ܣܒ̇ܪ ܐܢܬ ܕܗܕܐ̣ ܗܝ ܡܕܝܢܬܐ ܗ̇ܝ ܕܐܡ̇ܪܬ ܥܠܝܗ̇ ܕܥܠ ܦܣ̈ܐ ܕܐܝ̈ܕܝ ܪܫܡܬܟܝ

20. Apocalypse of Baruch 4:3

    ܠܐ ܗܘܐ ܗܢܐ ܒܢܝܢܐ ܕܗܫܐ ܒܢ̣ܐ ܒܝܢܬܟܘܢ. ܗ̇ܘ ܕܡܬܓܠܐ ܠܘܬܝ. ܗ̇ܘ ܕܗܪܟܐ ܡ̣ܩܕܡ ܡܥܬܕ. ܡܢ ܟܕ ܐܬܚ̣ܫܒܬ ܕܐ̇ܥܒܕ ܦܪܕܝܣܐ. ܘܚܘܝܬܗ ܠܐܕܡ ܡܢ ܩܕܡ ܕܠܐ ܢܚܛܐ. ܘܟܕ ܐܥܒܪ ܦܘܩܕܢܐ ܐܬܓܠܙܬ ܠܗ ܡܢܗ. ܐܝܟ ܕܐܦ ܦܪܕܝܣܐ

21. Apocalypse of Baruch 4:4

    ܘܡܢ ܒܬܪ ܗ̇ܠܝ̣ܢ. ܚܘ̇ܝܬܗ ܠܥ̣ܒܕܝ ܐܒܪܗܡ ܒܠܠܝܐ. ܒܝܬ ܦܠܓ̈ܐ ܕܕܒܚ̈ܐ

22. Apocalypse of Baruch 4:5

    ܘܬܘܒ ܐܦ ܠܡܘܫܐ ܚܘ̇ܝܬܗ ܒܛܘܪ ܣܝܢܝ ܟܕ ܚܘ̇ܝܬܗ ܕܡܘܬܗ ܕܡܫܟܢܐ ܘܟܘܠܗܘܢ ܡܐ̈ܢܘܗܝ

23. Apocalypse of Baruch 4:6

    ܘܗܫܐ ܗܐ ܢܛܝܪܐ ܠܘܬܝ ܐܝܟ ܕܐܦ ܦܪܕܝܣܐ

24. Apocalypse of Baruch 4:7

    ܙܠ ܗܟܝܠ ܘܥܒ̇ܕ ܐܝܟ ܕܡܦܩܕ ܐܢܐ ܠܟ ܀ ܀ • •

25. Apocalypse of Baruch 5:1

    ܘܥ̇ܢܝܬ ܘܐܡ̇ܪܬ. ܥܬܝܕ ܐܢܐ ܗܟܝܠ ܕܐ̇ܗ̇ܘܐ ܚܝܒ ܒܨܗܝܘܢ ܕܢܐܬܘܢ ܣܢܐ̈ܝܟ ܠܗܢܐ ܐܬܪܐ. ܘܢܛܐܡܘܢ ܩܘܕܫܟ ܘܢܫܒܘܢ ܝܪܬܘܬܟ ܘܢܫܬܠܛܘܢ ܥܠ ܐܝܠܝܢ ܕܪܚܡ̣ܬ. ܘܢܐܙܠܘܢ ܬܘܒ ܠܐܬܪܐ ܕܦܬܟܪ̈ܝܗܘܢ. ܘܢܫܬܒܗܪܘܢ ܩܕܡܝܗܘܢ. ܘܡܢܐ ܥܒ̇ܕܬ ܠܗ ܠܫܡܟ ܪܒܐ

26. Apocalypse of Baruch 5:2

    ܘܐܡ̣ܪ ܠܝ ܡܪܝܐ. ܫܡܝ ܘܬܫܒܘܚܬܝ ܥܠܡܐ ܕܠܥܠܡ ܐܝܬ ܠܗܘܢ. ܕܝ̣ܢܝ ܕܝܢ ܒܙܒܢܗ ܢܛ̇ܪ ܙܕܩܗ

27. Apocalypse of Baruch 5:3

    ܘܐܢܬ ܬܚܙܐ ܒܥܝ̈ܢܝܟ. ܕܠܐ ܗܘܐ ܒܥܠܕܒ̈ܒܐ ܣ̇ܚܦܝܢ ܠܨܗܝܘܢ. ܘܠܐ ܡܘܩܕܝܢ ܠܐܘܪܫܠܡ. ܐܠܐ ܠܕܝ̇ܢܐ ܡܫܡܫܝܢ ܠܙܒܢܐ

28. Apocalypse of Baruch 5:4

    ܐܢܬ ܕܝܢ ܙܠ ܘܥ̇ܒܕ ܟܘܠ ܡܕܡ ܕܐܡ̇ܪܬ ܠܟ.

29. Apocalypse of Baruch 5:5

    ܘܐܙ̇ܠܬ ܘܕܒ̇ܪܬ ܠܐܪܡܝܐ ܘܠܥܕܘ. ܘܠܣܪܝܐ ܘܠܝܒܫ. ܘܠܓܕܠܝܐ ܘܠܟܠ ܡܝܩܪ̈ܘܗܝ ܕܥܡܐ. ܘܐܝ̇ܬܝܬ ܐܢܘܢ ܠܢܚܠܐ ܕܩܕܪܘܢ. ܘܐܫܬ̇ܥܝܬ ܠܗܘܢ ܟܠ ܕܐܬܐܡܪ ܠܝ

30. Apocalypse of Baruch 5:6

    ܘܐܪܝܡܘ ܩܠܗܘܢ ܘܒܟܘ ܟܘܠܗܘܢ

31. Apocalypse of Baruch 5:7

    ܘܝ̇ܬܒܢ ܬܡܢ ܘܨܡܢ ܥܕܡܐ ܠܪܡܫܐ ܀ ܀ ܀

32. Apocalypse of Baruch 6:1

    ܘܗ̣ܘܐ ܠܝܘܡܐ ܕܡܚܪ̣. ܘܗܐ ܚܝܠܐ ܕܟ̈ܠܕܝܐ ܟܪܟܗ̇ ܠܡܕܝܢܬܐ. ܘܒܥܕܢ ܪܡܫܐ̣. ܫܒܩܬܗ ܠܥܡܐ ܐܢܐ ܒܪܘܟ. ܘܢ̇ܦܩܬ ܘܩ̣ܡ̇ܬ ܠܝ ܥܠ ܒܠܘܛܐ

33. Apocalypse of Baruch 6:2

    ܘܡܬܥܝܩ ܗ̇ܘܝܬ ܥܠ ܨܗܝܘܢ ܘܡܬܬܢܚ ܥܠ ܫܒܝܬܐ ܕܐܬܬ ܥܠ ܥܡܐ

34. Apocalypse of Baruch 6:3

    ܘܗܐ ܡܢ ܫܠܝܐ. ܪܘܚܐ ܕܚܝܠܐ ܐܪܝܡܬܢܝ. ܘܐܣܩܬܢܝ ܠܥܠ ܡܢ ܫܘܪܗ̇ ܕܐܘܪܫܠܡ ܠܥܠ

35. Apocalypse of Baruch 6:4

    ܘܚ̇ܙܝܬ ܘܗܐ ܐܪܒܥܐ ܡܠܐ̈ܟܝܢ ܩܝ̇ܡܝܢ ܥܠ ܐܪ̈ܒܥܬܝܗܝܢ ܙܘܝ̈ܬܗ̇ ܕܡܕܝܢܬܐ. ܟܕ ܐܚܝܕܝܢ ܗܘܘ ܚܕ ܚܕ ܡܢܗܘܢ ܠܡܦܐܕܐ ܕܢܘܪܐ ܒܐܝ̈ܕܘܗܝ

36. Apocalypse of Baruch 6:5

    ܘܡܠܐܟܐ ܐܚܪܢܐ ܢܚܬ ܗܘܐ ܡܢ ܫܡܝܐ ܘܐܡ̣ܪ ܠܗܘܢ. ܐܚܘܕܘ ܠܡܦܐ̈ܕܝܟܘܢ ܘܠܐ ܬܕܠܩܘܢ. ܥܕܡܐ ܕܐܡ̇ܪ ܠܟܘܢ

37. Apocalypse of Baruch 6:6

    ܐܫܬ̇ܕܪܬ ܓܝܪ ܕܠܘܩܕܡ ܐܡ̇ܪ ܠܐܪܥܐ ܡܠܬܐ. ܘܐܣ̇ܝܡ ܠܘܬܗ̇ ܡܕܡ ܕܦܩܕܢܝ ܡܪܝܐ ܡܪܝܡܐ

38. Apocalypse of Baruch 6:7

    ܘܚܙ̇ܝܬܗ ܕܢܚ̣ܬ ܠܒܝܬ ܩܕܘܫ ܩܘܕ̈ܫܐ. ܘܢܣ̣ܒ ܡܢ ܬܡܢ ܐ̈ܦܝ ܬܪܥܐ̣. ܘܐܦܘܕܐ ܩܕܝܫܐ. ܘܚܘܣܝܐ. ܘܬܪ̈ܬܝܢ ܠܘܚ̈ܐ. ܘܠܒܘܫܐ ܩܕܝܫܐ ܕܟܗ̈ܢܐ. ܘܦܝܪܡܐ. ܘܐܪܒܥܝܢ ܘܬܡ̈ܢܐ ܟܐ̈ܦܝܢ ܡܝܩܪ̈ܢ. ܗܠܝܢ ܕܠܒ̇ܫ ܗܘܐ ܟܗܢܐ ܘܟܘܠܗܘܢ ܡܐ̈ܢܝ ܩܘܕܫܐ ܕܡܫܟܢܐ

39. Apocalypse of Baruch 6:8

    ܘܐܡ̣ܪ ܠܐܪܥܐ ܒܩܠܐ ܪܡ̇ܐ. ܐܪܥܐ ܐܪܥܐ̣. ܐܪܥܐ ܫܡ̣ܥ ܦܬܓܡܗ ܕܐܠܗܐ ܚܝܠܬܢܐ. ܘܩܒ̇ܠ ܗܠܝܢ ܕܡܓܥܠ ܐܢܐ ܠܟܝ. ܘܢܛ̇ܪ ܐܢܘܢ ܥܕܡܐ ܠܙ̈ܒܢܐ ܐܚܪ̈ܝܐ ܕܡܐ ܕܐܬܦ̣ܩܕܬ ܬܬܠܝܢ ܐܢܘܢ. ܕܠܐ ܢܫܬܠܛܘܢ ܒܗܘܢ̣ ܢܘܟܪ̈ܝܐ

40. Apocalypse of Baruch 6:9

    ܡܛܠ ܕܡ̣ܛܐ ܠܗ ܙܒܢܐ ܕܬܫܬܠܡ ܠܙܒܢܐ ܘܐܘܪܫܠܡ. ܥܕܡܐ ܕܢܬܐܡܪ ܕܬܘܒ ܬܗܦܘܟ ܬܬܩܢ ܠܥܠܡ

41. Apocalypse of Baruch 6:10

    ܘܦܬ̣ܚܬ ܐܪܥܐ ܦܘܡܗ̣̇. ܘܒܠ̣ܥܬ ܐܢܘܢ ܀

42. Apocalypse of Baruch 7:1

    ܘܡܢ ܒܬܪ ܗܠܝ̣ܢ. ܫܡܥܬܗ ܠܡܠܐܟܐ ܗ̇ܘ ܕܐܡ̇ܪ ܠܡܠܐ̈ܟܐ ܗܠܝܢ ܕܐܚܝܕܝܢ ܗܘܘ ܠܡܦܐ̈ܕܐ. ܫܪܘ ܗܟܝܠ ܘܣܚܘܦܘ ܫܘܪ̈ܝܗ̇ ܥܕܡܐ ܠܫܬܐܣ̈ܐ. ܕܠܐ ܢܫܬܒܗܪܘܢ ܒܥܠܕܒ̈ܒܐ ܘܢܐܡܪܘܢ ܕܚܢܢ ܣܚܦܢܝܗܝ ܠܫܘܪܗ̇ ܕܨܗܝܘܢ. ܘܐܘ̇ܩܕܢ ܐܬܪܗ ܕܐܠܗܐ ܚܝܠܬܢܐ

43. Apocalypse of Baruch 7:2

    ܘܐܚܕܬܘܢܝܗܝ ܠܐܬܪܐ ܕܩܐ̇ܡ ܗ̇ܘܝܬ ܒܗ ܡܢ ܩܕܝܡ ܀

44. Apocalypse of Baruch 8:1

    ܡܠܐ̈ܟܐ ܕܝܢ ܥܒ̣ܕܘ ܐܝܟ ܕܦ̣ܩܕ ܠܗܘܢ. ܘܟܕ ܒܕܪܘ ܙܘܝ̈ܬܗ ܕܫܘܪܐ̣. ܩܠܐ ܐܫܬܡܥ ܡܢ ܓܘܗ ܕܗܝܟܠܐ. ܡܢ ܒܬܪ ܕܢܦ̣ܠ ܫܘܪܐ ܕܐܡ̇ܪ

45. Apocalypse of Baruch 8:2

    ܥܘܠܘ ܒܥܠܕܒ̈ܒܐ ܘܬܘ ܣܢܐ̈ܐ. ܐܪܦܝ ܓܝܪ ܗ̇ܘ ܕܢܛ̇ܪ ܒܝܬܐ

46. Apocalypse of Baruch 8:3

    ܘܐ̇ܙܠܬ ܠܝ ܐܢܐ ܒܪܘܟ

47. Apocalypse of Baruch 8:4

    ܘܗ̣ܘܐ ܡܢ ܒܬܪ ܗܠܝ̣ܢ. ܥܠ ܚܝܠܐ ܕܟ̈ܠܕܝܐ. ܘܐܚܕܘܗܝ ܠܒܝܬܐ ܘܠܟܠ ܕܚܕܪ̈ܘܗܝ

48. Apocalypse of Baruch 8:5

    ܘܠܥܡܐ ܫܒܘ. ܘܡܢܗܘܢ ܩ̣ܛܠܘ. ܘܠܨܕܩܝܐ ܡ̇ܠܟܐ ܦܟ̣ܪܘ ܘܫܕܪܘܗܝ ܠܘܬ ܡ̇ܠܟܐ ܕܒܒܠ • ܀ ܀

49. Apocalypse of Baruch 9:1

    ܘܐܬ̇ܝܬ ܐܢܐ ܒܪܘܟ ܘܐܪܡܝܐ ܗ̇ܘ ܕܐܫܬܟ̣ܚ ܕܟ̣ܐ ܠܒܗ ܡܢ ܚܛܗ̈ܐ. ܗ̇ܘ ܕܠܐ ܐܬܐܚܕ ܒܠܒܘܟܝܗ̇ ܕܡܕܝܢܬܐ. ܘܨܪܝܢ ܡܐ̈ܢܝܢ ܘܒܟ̈ܝܢ. ܘܐܬܒܠܢ ܘܨ̈ܡܢ ܫܒܥܐ ܝܘܡ̈ܝܢ • ܀

50. Apocalypse of Baruch 10:1

    ܘܗ̣ܘܐ ܡܢ ܒܬܪ ܫܒܥܐ ܝܘܡ̈ܝܢ̣. ܗ̣ܘܐ ܥܠܝ ܦܬܓܡܗ ܕܐܠܗܐ ܘܐܡ̣ܪ ܠܝ

51. Apocalypse of Baruch 10:2

    ܐܡ̣ܪ ܠܐܪܡܝܐ. ܕܢܐܙܠ ܘܢܩܝܡ ܫܒܝܬܗ ܕܥܡܐ ܥܕܡܐ ܠܒܒܠ

52. Apocalypse of Baruch 10:3

    ܐܢܬ ܕܝܢ ܟܬܪ ܗܪܟܐ ܒܚܘܪܒܗ̇ ܕܨܗܝܘܢ. ܘܐܢܐ ܡܚܘܐ ܐܢܐ ܠܟ ܡܢ ܒܬܪ ܗܠܝܢ ܝܘܡ̈ܬܐ̣. ܡܕܡ ܕܥܬܝܕ ܕܢܓܕܫ ܒܐܚܪܝܬ ܝܘܡ̈ܬܐ

53. Apocalypse of Baruch 10:4

    ܘܐ̇ܡܪܬ ܠܐܪܡܝܐ ܐܝܟ ܕܦܩܕܢܝ ܡܪܝܐ

54. Apocalypse of Baruch 10:5

    ܘܗ̣ܘ ܕܝܢ ܐ̣ܙܠ ܥܡ ܥܡܐ. ܐܢܐ ܕܝܢ ܒܪܘܟ̣ ܗ̇ܦܟܬ ܐܬ̇ܝܬ. ܘܝܬ̇ܒܬ ܩܕܡ ܬܪ̈ܥܘܗܝ ܕܗܝܟܠܐ. ܘܐ̇ܠܝܬ ܐܘܠܝܬܐ ܗܕܐ ܥܠ ܨܗܝܘܢ ܘܐܡ̇ܪܬ̇·̇·

55. Apocalypse of Baruch 10:6

    ܛܘܒܘܗܝ ܠܗ̇ܘ ܕܠܐ ܐܬܝܠܕ. ܐܘ̇ ܠܗ̇ܘ ܕܐܬܝܠܕ ܘܡܝܬ

56. Apocalypse of Baruch 10:7

    ܠܢ ܕܝܢ ܠܐܝܠܝܢ ܕܚܝ̈ܝܢ ܘܝ ܠܢ. ܕܚ̈ܙܝܢ ܥܩ̈ܬܗ̇ ܕܨܗܝܘܢ. ܘܡܕܡ ܕܓܕܫܗ̇ ܠܐܘܪܫܠܡ

57. Apocalypse of Baruch 10:8

    ܐܩ̇ܪܐ ܠܣܝܪܝܢܘܣ ܡܢ ܝܡܐ ܘܐܢܬܝܢ ܠܠܝ̈ܬܐ ܡܢ ܡܕܒܪܐ ܐܬ̈ܝܢ ܘܫܐ̈ܕܐ ܘܝܪ̈ܘܪܐ ܡܢ ܥܒ̈ܐ. ܐܬܬܥܝܪܘ ܘܐܣܘܪܘ ܚܨ̈ܝܟܘܢ ܠܡܪܩܘܕܬܐ. ܘܣܒܘ ܥܡܝ ܐܘ̈ܠܝܬܐ ܘܐܪܩܕܘ̇ ܥܡܝ

58. Apocalypse of Baruch 10:9

    ܐܢܬܘܢ ܦܠܚ̈ܐ ܠܐ ܬܙܪܥܘܢ ܬܘܒ. ܘܐܢܬ ܐܪܥܐ̣ ܠܡܢܐ ܝܗ̇ܒܬ ܦܐܪ̈ܐ ܕܥ̈ܠܠܬܟܝ. ܐܚܘܕܝ ܒܓܘܟܝ ܚܠܝܘܬܐ ܕܡܙܘܢܝ̈ܟܝ

59. Apocalypse of Baruch 10:10

    ܘܐܢܬ ܓܦܬܐ ܠܡܢܐ ܡ̇ܘܣܦܬܝ ܕܬܬܠܝܢ ܚܡ̣ܪܟܝ. ܕܠܐ ܬܘܒ ܡܬܩܪܒ ܡܢܗ̇ ܒܨܗܝܘܢ. ܘܠܐ ܬܘܒ ܪܝܫ ܦܐܪ̈ܐ ܡܬܩܪܒܝܢ

60. Apocalypse of Baruch 10:11

    ܘܐܢܬܘܢ ܫܡܝܐ ܐܚܘܕܘ ܛܠܟܘܢ. ܘܠܐ ܬܦܬܚܘܢ ܐܘܨܪ̈ܐ ܕܡܛܪܐ

61. Apocalypse of Baruch 10:12

    ܘܐܢܬ ܫܡ̣ܫܐ ܐܚܘܕ ܢܘܗܪܗܘܢ ܕܙܠܝܩ̈ܝܟ. ܘܐܢܬ ܣܗܪܐ ܐܕܥܟ ܣܘܓܐܐ ܕܢܘܗܪܟ. ܠܡܢܐ ܓܝܪ ܬܘܒ ܢܕܢܚ ܢܘܗܪܐ ܐܝ̇ܟܐ ܕܢܘܗܪܗ̇ ܕܨܗܝܘܢ ܚ̣ܫܟ

62. Apocalypse of Baruch 10:13

    ܘܐܢܬܘܢ ܚ̈ܬܢܐ ܠܐ ܬܥܠܘܢ. ܘܒܬܘ̈ܠܬܐ ܒܟ̈ܠܝܠܐ̇ ܠܐ ܢܨܛܒ̈ܬܢ ܘܐܢܬܝܢ ܢܫ̈ܐ ܠܐ ܬܨ̈ܠܝܢ ܕܬܐ̈ܠܕܢ

63. Apocalypse of Baruch 10:14

    ܢܬܒ̈ܣܡܢ ܓܝܪ ܝܬܝܪܐܝܬ ܥܩܪ̈ܬܐ. ܘܢܚ̈ܕܝܢ ܐܝܠܝܢ ܕܠܝܬ ܠܗܝܢ ܒ̈ܢܝܐ. ܘܐܝܠܝܢ ܕܐܝܬ ܠܗܝܢ ܒܢ̈ܝܐ ܢܬܬܥ̈ܝܩܢ

64. Apocalypse of Baruch 10:15

    ܠܡܢܐ ܓܝܪ ܝܠܕ̈ܢ ܒܟܐܒ̈ܐ ܘܩܒܪ̈ܢ ܒܬܐܢ̈ܚܬܐ

65. Apocalypse of Baruch 10:16

    ܐܘ ܠܡܢܐ ܬܘܒ ܗ̇ܘܝܢ ܠܗܘܢ ܒ̈ܢܝܐ ܠܒܢܝ̈ܢܫܐ. ܐܘ ܙܪܥܗ ܕܟܝܢܗܘܢ ܠܡܢܐ ܬܘܒ ܡܫܬܡܗ. ܐܝ̇ܟܐ ܕܗܕܐ ܐܡܐ ܚܪܒ̣ܬ. ܘܒܢ̈ܝܗ̇ ܐܫܬܒܝܘ

66. Apocalypse of Baruch 10:17

    ܡܢ ܗܫܐ ܠܐ ܬܘܒ ܬܐܡܪܘܢ ܥܠ ܫܘܦܪܐ. ܘܠܐ ܬܬܢܘܢ ܥܠ ܝܐܝܘܬܐ

67. Apocalypse of Baruch 10:18

    ܐܢܬܘܢ ܕܝܢ ܟܗ̈ܢܐ ܣܒܘ ܩܠܝ̈ܕܐ ܕܒܝܬ ܡܩܕܫܐ. ܘܫܕܘ ܐܢܘܢ ܠܪܘܡܗܘܢ ܕܫܡܝܐ. ܘܗܒܘ ܐܢܘܢ ܠܡܪܝܐ. ܘܐܡ̣ܪܘ. ܛܪ ܒܝܬܟ ܐܢܬ. ܚܢܢ ܓܝܪ ܗܐ ܐܫܬܟܚܢ ܪ̈ܒܝ ܒܬ̈ܐ ܕܓ̈ܠܐ

68. Apocalypse of Baruch 10:19

    ܘܐܢܬܝܢ ܒܬܘ̈ܠܬܐ ܕܥ̈ܙܠܢ ܒܘܨܐ. ܘܫܪ̈ܝܐ ܥܡ ܕܗܒܐ ܕܐܘܦܝܪ. ܐܣܬܪܗܒܝܢ ܘܣ̈ܒܝܢ ܟܠܡܕܡ ܘܫ̣ܕ̈ܝܢ ܒܢܘܪܐ. ܕܬܘܒܠ ܐܢܘܢ ܠܘܬ ܗ̇ܘ ܕܥ̣ܒܕ ܐܢܘܢ. ܘܫܠܗܒܝܬܐ ܬܫܕܪ ܐܢܘܢ ܠܘܬ ܗ̇ܘ ܕܒ̣ܪܐ ܐܢܘܢ. ܕܠܐ ܢܫܬܠܛܘܢ ܒܗܘܢ ܒܥܠܕܒ̈ܒܐ ܀

69. Apocalypse of Baruch 11:1

    ܐܡ̇ܪ ܐܢܐ ܕܝܢ ܗܕܐ ܐܢܐ ܒܪܘܟ̣. ܠܩܘܒܠܟܝ ܒܒܠ. ܐܠܘ ܗܘ̣ܝܬܝ ܐܢܬܝ ܡܨܠܚܐ ܘܨܗܝܘܢ ܥܡܪܐ ܒܬܫܒ̈ܚܬܗ̣̇. ܟܐܒܐ ܗܘܐ ܠܢ ܪܒܐ ܕܗ̇ܘܝܐ ܗܘ̣ܝܬ ܫܘܝܐ ܠܨܗܝܘܢ

70. Apocalypse of Baruch 11:2

    ܗܫܐ ܕܝܢ ܗܐ ܟܐܒܐ ܕܠܐ ܡܣܬܝܟ. ܘܬܐܢܚ̈ܬܐ ܕܠܝܬ ܠܗܝܢ ܡܘܫܚ̈ܬܐ. ܕܐܢܬܝ ܗܐ ܡܨܠܚܬܝ ܘܨܗܝܘܢ̇ ܚ̣ܪܒܐ

71. Apocalypse of Baruch 11:3

    ܡ̣ܢܘ ܢܗܘܐ ܕܝ̇ܢܐ ܥܠ ܗܠܝܢ. ܐܘ ܠܡ̣ܢܘ ܢܩܒܘܠ ܥܠ ܡܕܡ ܕܓܕܫܢ. ܐܘ ܡܪܝܐ ܐܝܟ̇ܢܐ ܣܝ̣ܒܪܬ

72. Apocalypse of Baruch 11:4

    ܫܟ̣ܒܘ ܐܒܗ̈ܬܢ ܕܠܐ ܟܐܒ̈ܐ. ܘܙܕܝ̈ܩܐ ܗܐ ܕܡܟܝܢ ܒܐܪܥܐ ܒܢܝܚܐ

73. Apocalypse of Baruch 11:5

    ܠܐ ܓܝܪ ܝܕܥܘܗ̇ ܠܥܩܬܐ ܗܕܐ. ܘܐܦ ܠܐ ܫܡܥ̣ܘ ܥܠ ܡܕܡ ܕܓܕ̈ܫܢ

74. Apocalypse of Baruch 11:6

    ܢܗ̈ܘܝܢ ܠܟܝ ܐܪܥܐ ܐܕ̈ܢܐ. ܘܐܢܬ ܥ̇ܦܪܐ ܠܒܐ. ܘܙܠܘ ܘܚܘܘ ܒܫܝܘܠ. ܘܐܡ̣ܪܘ ܠܡܝ̈ܬܐ

75. Apocalypse of Baruch 11:7

    ܛܘܒܝܟܘܢ ܠܟܘܢ ܝܬܝܪ ܡܢܢ ܕܝܠܢ ܕܚܝ̈ܝܢ ܚܢܢ ܀

76. Apocalypse of Baruch 12:1

    ܐܠܐ ܗܕܐ ܐܡ̇ܪ ܐܢܐ ܐܝܟ ܕܡܬܚܫܒ ܐܢܐ. ܘܐܡ̇ܠܠ ܠܩܘܒܠܟܝ ܐܪܥܐ ܕܡܨܠܚܐ

77. Apocalypse of Baruch 12:2

    ܠܐ ܗܘܐ ܒܟܠ ܙܒܢ ܦܠܓܗ ܕܝܘܡܐ ܡܫܠܗܒ. ܘܠܐ ܐܡ̇ܝܢܝܢ ܙܠܝܩ̈ܘܗܝ ܕܫܡܫܐ ܡܢܗܪܝܢ

78. Apocalypse of Baruch 12:3

    ܠܐ ܬܣܒܝܢ ܘܬܣܒܪܝܢ ܕܒܟܠܙܒܢ ܬܗܘܐ ܡܨܠܚܐ ܘܚ̇ܕܝܐ. ܘܠܐ ܣ̇ܓܝ ܬܬܪܝܡܝܢ ܘܬܫܥܒܕܝܢ

79. Apocalypse of Baruch 12:4

    ܫܪܝܪܐܝܬ ܓܝܪ ܒܙܒܢܗ̇ ܡܬܬܥܝܪܐ ܥܠܝܟܝ ܚܡ̣ܬܐ̇. ܗ̇ܝ ܕܗܫܐ ܒܢܓܝܪܘܬ ܪܘܚܐ ܐܝܟ ܕܒ̈ܦܓܘܕܐ ܐܚܝܕܐ

80. Apocalypse of Baruch 12:5

    ܘܟܕ ܐܡ̇ܪܬ ܗܠܝܢ ܨ̇ܡܬ ܫܒܥܐ ܝܘܡ̈ܝܢ ܀ •

81. Apocalypse of Baruch 13:1

    ܘܗ̣ܘܐ ܡܢ ܒܬܪ ܗܠܝܢ ܐܢܐ ܒܪܘܟ ܩܐ̇ܡ ܗ̇ܘܝܬ ܥܠ ܛܘ̣ܪܐ ܕܨܗܝܘܢ. ܘܗܐ ܩܠܐ ܐܬ̣ܐ ܡܢ ܡܪ̈ܘܡܐ ܘܐܡ̣ܪ ܠܝ

82. Apocalypse of Baruch 13:2

    ܩܘܡ ܥܠ ܪ̈ܓܠܝܟ ܒܪܘܟ. ܘܫܡ̣ܥ ܡܠܬܗ ܕܐܠܗܐ ܚܝܠܬܢܐ

83. Apocalypse of Baruch 13:3

    ܡܛܠ ܕܐܬܕܡܪܬ ܥܠ ܡܕܡ ܕܓܕܫܗ̇ ܠܨܗܝܘܢ. ܡܛܠ ܗܢܐ ܡܬܢܛܪܘ ܬܬܢܛܪ ܠܫܘܠܡܗܘܢ ܕܙܒ̈ܢܐ. ܕܬܗܘܐ ܠܣ̇ܗܕܘܬܐ

84. Apocalypse of Baruch 13:4

    ܕܐܢ ܢܐܡܪ̈ܢ ܡܡܬܘܡ ܡܕܝ̈ܢܬܐ ܐܝܠܝܢ ܕܡܨ̈ܠܚܢ ܕܠܡܢܐ ܐܝܬܝ ܥܠܝܢ ܐܠܗܐ ܚܝܠܬܢܐ ܦܘܪܥܢܐ ܗܢܐ

85. Apocalypse of Baruch 13:5

    ܐܡ̣ܪ ܠܗܝܢ ܐܢܬ ܘܐܝܠܝܢ ܕܕܡ̈ܝܢ ܠܟ. ܐܝܠܝܢ ܕܚ̣ܙܝܬܘܢ ܒܝ̣ܫܬܐ ܗܕܐ ܘܦܘܪ̈ܥܢܐ ܕܐ̇ܬܝܢ ܥܠܝܟܝܢ ܘܥܠ ܥܡܟܝܢ. ܒܙܒܢܗ ܕܓܡܝܪܐܝܬ ܢܬܪܕܘܢ ܥܡ̈ܡܐ̣

86. Apocalypse of Baruch 13:6

    ܘܗ̇ܝܕܝܢ ܢܩܘܘܢ

87. Apocalypse of Baruch 13:7

    ܘܐܢ ܢܐܡܪ̈ܢ ܒܗ̇ܘ ܙܒܢܐ ܕܐܡܬܝ

88. Apocalypse of Baruch 13:8

    ܬܐܡ̣ܪ ܠܗܝܢ ܐܢ̇ܬܝܢ ܕܐܫܬܝܬܝܢ ܚܡ̣ܪܐ ܡܨܠܠܐ̣. ܐܫܬܝܝܢ ܐܦ ܡܢ ܬܛܪܗ. ܕܝ̣ܢܗ ܓܝܪ ܕܪܡܐ ܕܠܐ ܡܣܒ ܒܐ̈ܦܐ ܗܘ

89. Apocalypse of Baruch 13:9

    ܡܛܠ ܗܢܐ ܥܠ ܒܢܘ̈ܗܝ ܠܘܩܕܡ ܠܐ ܚܣ. ܐܠܐ ܐܫܬܢܕ ܒܗܘܢ̣. ܐܝܟ ܕܒܣܢܐ̈ܘܗܝ. ܡܛܠ ܕܚܛܘ

90. Apocalypse of Baruch 13:10

    ܗܝ̇ܕܝܢ ܗܟܝܠ ܐܬܪܕܝܘ ܡܛܠ ܕܢܬܚܣܘܢ

91. Apocalypse of Baruch 13:11

    ܗܫܐ ܕܝܢ ܐܢܬܘܢ ܥܡ̈ܡܐ ܘܐܡ̈ܘܬܐ ܚܝ̇ܒܝܢ ܐܢܬܘܢ ܕܗܢܐ ܟܠܗ ܙܒܢܐ ܕܫܬܘܢܗ̇ ܠܐܪܥܐ. ܘܐܬܚܫܚܬܘܢ ܒܒ̣ܪܝܬܐ ܕܠܐ ܒܙܕܩܐ

92. Apocalypse of Baruch 13:12

    ܒܟܠܙܒܢ ܓܝܪ ܗ̣ܘܝܬ ܡܛܐܒ ܠܟܘܢ. ܘܐܢ̣ܬܘܢ ܗ̣ܘܝܬܘܢ ܟ̇ܦܪܝܢ ܒܛܝܒܘܬܐ ܒܟܠܙܒܢ ܀

93. Apocalypse of Baruch 14:1

    ܘܥܢ̇ܝܬ ܘܐܡ̇ܪܬ. ܗܐ ܐܘܕܥܬܢܝ ܕܘܒܪܗܘܢ ܕܙܒ̈ܢܐ . ܘܡܕܡ ܕܥܬܝܕ ܕܢܗܘܐ ܡܢ ܒܬܪ ܗܠܝܢ. ܘܐܡ̣ܪܬ ܠܝ ܕܠܥܡ̈ܡܐ ܐ̇ܙܠ ܦܘܪܥܢܐ ܕܐܬܐܡܪ ܡܢܟ

94. Apocalypse of Baruch 14:2

    ܘܗܫܐ ܝܕ̇ܥ ܐܢܐ ܕܣܓܝܐܝܢ ܐܢܘܢ ܐܝܠܝܢ ܕܚܛܘ. ܘܒܡܨܠܚܢܘܬܐ ܚܝܘ. ܘܐܙܠܘ ܡܢ ܥܠܡܐ. ܘܩܠܝܠ ܗܘ ܕܝܢ ܥܡ̈ܡܐ ܡܫܬܚܪܝܢ ܒܗ̇ܢܘܢ ܙܒ̈ܢܐ. ܗ̇ܢܘܢ ܕܠܗ̇ܢܘܢ ܡܬܐܡܪ̈ܢ ܡ̈ܠܐ ܐܝܠܝܢ ܕܐܡ̣ܪܬ

95. Apocalypse of Baruch 14:3

    ܘܡܢܐ ܓܝܪ ܝܘܬܪܢܐ ܐܝܬ ܒܗܕܐ ܐܘ ܡܢܐ ܕܒܝܫ ܡܢ ܗܠܝܢ ܕܚ̈ܙܝܢ ܕܓ̇ܕ̈ܫܢ ܡܣ̇ܟܝܢܢ ܕܢܚܙܐ

96. Apocalypse of Baruch 14:4

    ܬܘܒ ܕܝܢ ܐܡܠܠ ܩܕܡܝܟ

97. Apocalypse of Baruch 14:5

    ܡܢܐ ܝܬܪܘ ܗ̇ܢܘܢ ܕܝܕܥܘ ܩܕܡܝܟ ܘܠܐ ܐܙ̣ܠܘ ܒܣܪܝܩܘܬܐ ܐܝܟ ܫܪܟܐ ܕܥܡ̈ܡܐ. ܘܠܐ ܐܡܪܘ ܠܡܝ̈ܬܐ ܕܗܒ̣ܘ ܠܢ ܚ̇ܝ̈ܐ. ܐܠܐ ܒܟܠܙܒܢ ܡܢܟ ܕܚ̇ܠܝܢ ܗܘܘ. ܘܐܘܪ̈ܚܬܟ ܠܐ ܐܪܦܝܘ

98. Apocalypse of Baruch 14:6

    ܘܗܐ ܐܬܚܦܛܘ. ܘܐܦܠܐ ܡܛܘܠܬܗܘܢ ܪܚܡ̇ܬ ܥܠ ܨܗܝܘܢ

99. Apocalypse of Baruch 14:7

    ܘܐܢ ܐܚܪ̈ܢܐ ܐܪܫܥܘ ܡܬܒܥܐ ܗܘܐ ܠܗ̇ ܠܨܗܝܘܢ ܕܒ̇ܥ̈ܒܕܝܗܘܢ ܕܐܝܠܝܢ ܕܦܠܚܘ ܛ̇ܒ̈ܬܐ ܢܫܬܒܩ ܠܗ̇. ܘܠܐ ܒܥ̇ܒ̈ܕܝܗܘܢ ܕܥ̇ܒ̈ܕܝ ܥܘ̣ܠܐ ܬܛܒܥ

100. Apocalypse of Baruch 14:8

     ܐܠܐ ܡ̣ܢܘ ܡܪܝܐ ܡܪܝ ܡܕܪܟ ܠܗ ܠܕܝ̣ܢܟ. ܐܘ ܡ̣ܢܘ ܡܥܩܒ ܥܘܡܩܗ̇ ܕܐܘܪܚܟ. ܐܘ ܡ̣ܢܘ ܡܬܚܫܒ ܥܠ ܝܘܩܪܗ ܕܫܒܝܠܟ

Next → — showing 1–100 of 614

Electronic Peshitta Text, Peshitta Institute Amsterdam and the Eep Talstra Centre for Bible and Computer (ETCBC), via github.com/ETCBC/peshitta. Prepared by Constantijn Sikkel, Geert Jan Veldman and Willem van Peursen; Text-Fabric conversion by Dirk Roorda. Licensed CC BY-NC 4.0 as stated in the repository's docs/about.md; the ETCBC asks that commercial use be arranged with them or with Brill. The text follows the Vetus Testamentum Syriace where published and Codex Ambrosianus otherwise. Licence: CC BY-NC 4.0. Source.