Heptateuchos

nigrantes toto consertus corpore saetas.

quem pater Esau placito de nomine dixit.

post, fraterna tenens manibus calcaria pressis,

nascitur insigni praediues mente Iacobus.

lustrabat senior uacuos uenatibus agros,

bucina raucisono dum conplet saxa tremore.

ast alius, blandi conseruans pectoris acta,

gaudebat patriis inlaesus uiuere tectis.

maiorem genitor tenero palpabat amore,

ast alium toto mulcebat pectore mater.

qui cum Niliacam lentem soluisset in unda,

conpositos fratrem nitentem sumere pastus

perpulit. ut primos sibimet deferret honores.

haec inter malesuada fames et prima malorum

conpulit a patriis uatem discedere terris.

Philistina petit rura, mox Gargara transit,

Abimelecha suo quae tum sub iure tenebat.

incedens claro dominum cum lumine uidit

arguentem dictis, adeat ne regna Canopi,

sed teneat solum, dominus quod praestitit. aruum.

"Nam licet ignotos inter uideare morari,

attamen inmensum genitor mansurus in orbem

semine multiplici gaudebis crescere gentes,

testamenta mei sument quae maxima uerbi."

ilicet in Geraris socia cum coniuge degens,

germanam potius paterno edisserit actu,

ne commota leui cupidine turba Philistim

coniugium uatis correptis tolleret armis.

at rex, dum patula lustrat secreta fenestra,

ludentem niuea cernit cum coniuge uatem,

conubiumque uidens cunctos sub lege cohercet,

ne sociam quisquam temptet raptare prophetae.

iamque famem dudum patriis qui fugerat oris,

hordea mollitae dum spargit credita terrae,

centenos laeto carpsit de caespite fructus.

nec minus interea placido ditescit in actu

multimodas inter pecudes terramque feracem.

continuo infelix torquet dum pectora, liuor

inriguos turbat puteos atque aggere conplet,

ut procul abscedens possessos linqueret agros.

euitans igitur tumidae discrimina rixae,

discessit mansitque diu conualle Gerarum,

et cum sollicito puteos dimitteret actu,

inuenit gelidas scatebroso e fomite lymphas.

exceptusque dolo pastorum deserit iras

inuisosque locos Litis de nomine signat.

promouet inde gradum rursusque egesta profundo

terra cauo gelidos in lucem protulit amnes.

et quia mordaci fuerat certamine trusus.

conpellat meritis liuentia pectora dictis

ac, postquam tetricas fregit pax aurea lites,

nomen Habundantis studuit transcribere terrae.

dumque sagax mutat celeri noua gramina passu,

deuenit ad colles, quibus est Iuratio nomen.

illic perspicuo dominum cum lumine cernit,

tempore quo medios euoluunt sidera cursus,

admonitus tristes e pectore trudere motus,

inuicto tutante deo per bella, per hostes.

excitus gelidos post somnum colligit artus

et uenerans structa dominum mox supplicat ara.

interea reges ueniunt Abimelus et Ozas,

Phicolo comitante simul ferrumque gerente,

ut, quia pacifico uellet se adiungere uati,

necteret insertis concordia foedera dextris.

excipitur placide mensaque expletus eadem

optatam reuehit posito discrimine pacem.

hinc inter medios surgit discordia fratres;

namque pater longo iamdudum grandior aeuo,

amissum cum sole diem oculosque sepultos

mente ferens placida mortemque instare recordans,

maiorem natum, pietas quem sola uidebat,

inpellit, sumat pharetram celeresque sagittas,

exhibeatque sibi carnes de more ferinas.

sumpturus patriae confestim munera linguae.

id Rebecca uidens carum dat scire Iacobum,

conpellens, geminos ut promptim deferat haedos

ac pro fratre uago studeat mactare parenti.

et, ne forte dolos nudaret corpore leui,

pellibus obtegitur, hirsutum quae fore praestent,

fraternaque toga praeuelans pectus et artus,

optulit indeptas uelut in uenatibus escas.

nec tamen occuluit penitus praenuntia corda.

namque senex, iuuenem totum dum dextera lustrat,

noscitat Esaum saetis, sed uoce Iacobum.

ac postquam conpressa fames dimotaque mensa est,

admonet, ut propius sese sistatque locetque.

ille ubi demisso successit uertice dextrae,

candida sanctiloqui percepit dicta parentis,

oscula dum pressis delibat dulcia labris.

nam post optata longae commercia uitae

anterior frater minimo seruire iubetur.

interea Esaus, longis discursibus actus.

uiscera iam saturo portabat capta parenti.

et licet officio multum placuisset et actu.

intercepta tamen non quiuit sumere dona.

inde irae et lacrimae et fraus quaesita nocendi:

quam Rebecca uidens fraterno in pectore prodit

Iacobumque monet cognatas uisere Carras

Labanumque suae germanum quaerere matris,

donec longa dies conceptas mitiget iras.