Heptateuchos

Corpus Scriptorum Ecclesiasticorum Latinorum · Corpus Scriptorum Ecclesiasticorum Latinorum · 5,575 sections

gen.700
namque domus regis admissa piacula pendens,
gen.701
agmine morborum pariter grassante per omnes.
gen.702
germina femineis dudum decusserat aluis.
gen.703
uerum ubi pacificus uates pro rege poposcit
gen.704
procubus ante deum, promptim se laeta per omnes
gen.705
reddidit ubertas aluosque impleuit opimas.
gen.706
ipse etiam insuetis postrema in tempora uotis
gen.707
fit pater, et laeti reputans solacia risus.
gen.708
nuncupat Isacum, mandata et numinis alti
gen.709
efficit. octauo decerpens lumine tegmen
gen.710
e ueretro, stabilesque uidens iam promere gressus
gen.711
coniunctos inter socia de stirpe propinquos
gen.712
uescitur et mensis genitor gratatur opimis;
gen.713
nam desperatis maior fit gratia uotis.
gen.714
iamque puer puero iunctus dum ludit alumno.
gen.715
conpulit ignito matrem turgescere felle,
gen.716
ut famulam inuisam pariter cum pignore pellat, —
gen.717
et tamen inuitus senior, dum maxima iussa
gen.718
obseruat domini, pariter detrusit utrumque.
gen.719
at mulier postquam domini de sede remota est,
gen.720
auia dimoto lustrat secreta recessu.
gen.721
iamque panes cunctos uinumque insumpserat omne,
gen.722
exanimem lasso suspirans pectore natum;
gen.723
deuenit ad puteum, cui tum Iuratio nomen
gen.724
indiderat, maestoque inpleuit deuia questu:
gen.725
cum deus adflictae lacrimis trans aethera motus
gen.726
confirmat trepidam natoque ingentia dicit
gen.727
regna parata suo, cuius tum clade gemescat.
gen.728
ilicet inriguo scatebras de gurgite libans
gen.729
erigitur natoque simul gaudente laetatur.
gen.730
procedunt pia iussa dei; iam paruulus arcum
gen.731
tendere et aligeras coepit torquere sagittas.
gen.732
interea uates, ne quid clam forte pararet
gen.733
ductor Abimelechus, conectit foedera pacis.
gen.734
ut, quia de puteis fuerant certamina mota,
gen.735
reddita securam firmarent otia uitam.
gen.736
iuratur placitaeque manent concordia pacis.
gen.737
inde senex curuo terram dum sulcat aratro,
gen.738
ingentem laetis compleuit messibus aulam
gen.739
sublimemque deum supplex per uota precatus
gen.740
Philistinorum placidus consedit in aruis.
gen.741
in quibus aetherii temptatur numinis orsis,
gen.742
unicus ut natus gladio decumbat ad aram.
gen.743
nec mora, cum tumidi conscendit culmina collis,
gen.744
cornipedem ducens famulis natoque uadentem.
gen.745
tertia iamque die, cum sol candentior -axe
gen.746
fulgeret medio, totas dum contrahit umbras,
gen.747
dimittit pueros senior natumque capessit,
gen.748
ut sarmenta gerens, flammarum pabula, collo
gen.749
scanderet oppositi pariter fastigia collis.
gen.750
iamque adeo flammis surgentibus altar ad ipsum .
gen.751
sistitur, euinctus manibus posterga retortis.
gen.752
dumque pater natum properat diffindere cultro,
gen.753
eminus albentem prospectat sedulus agnum,
gen.754
qui melius fuso compleret sacra cruore.
gen.755
His actis uetulo decedit corpore Sarra.
gen.756
cumque locum busto praestarent pignora Cetis,
gen.757
dissensit uates, pretio taxare paratus.
gen.758
quadringenta dedit sestertia diues Ephrono,
gen.759
dum sociam duplici gaudet mandare sepulchro.
gen.760
nomen Mambra loco ueterum narrauerat aetas.
gen.761
ilicet e famulis quendam, quem uita fidesque
gen.762
fecerat insignem, conceptis dicere uerbis
gen.763
et iurare iubet, dextram dum subdit amicam
gen.764
conectitque femur. nullam de gente Chananna
gen.765
iungendam nato, quoniam de stirpe parentum
gen.766
sit ducenda magis; quae si fortasse resistat,
gen.767
mittendum caelo, facile qui molliat iram.
gen.768
ille alacris tumidis inponit dona camelis
gen.769
Assyriamque petit, iam cernens tecta Nachorae.
gen.770
dumque silens secum domini mandata reuoluit,
gen.771
conspicit eximiam uenientem fonte Rebeccam,
gen.772
quae non tarda uiro frigentes porrigit undas
gen.773
inuitatque domum. cuius sit filia, fatur;
gen.774
iungitur hospitio iuuenis, mox munera promit.
gen.775
omnibus explicitis uadit nuptura marito.
gen.776
iamque iter emensos prospectat comminus Isac,
gen.777
quem Rebecca uidens dorso defluxit ab alto
gen.778
obstipumque caput tenui uelamine condit.
gen.779
iunguntur taciti dominoque auctore laetantur.
gen.780
sed postquam senior centum transcenderat annos.
gen.781
septies et denos, largitus munera cunctis
gen.782
decessit, gemini donatus sede sepulchri.
gen.783
interea patrias indeptus filius aedes
gen.784
ad puteum degit, fuerat cui Visio nomen.
gen.785
iamque quater denos illic transegerat annos;
gen.786
coniuge cum dicta patriam ditauerat aulam:
gen.787
quae cum praecipuo canderet sidere formae,
gen.788
infecunda diu nesciuit gaudia matris.
gen.789
sed cum sanctifico dominum \'deposceret ore,
gen.790
heredem ut iustum coniunx grauidata crearet,
gen.791
auditur; geminis turgescit feta Rebecca.
gen.792
quae mirata diu crescentis pondera uentris,
gen.793
consulit aetherii supplex responsa tonantis
gen.794
agnoscitque suo populos in pectore binos
gen.795
disparibus meritis ad lumina surgere uitae.
gen.796
nam qui prima tenet meritae primordia lucis.
gen.797
subditus imperiis agitur seruire minoris.
gen.798
ergo ubi iam facili gignuntur pignora partu.
gen.799
corpore puniceo senior se promit ad auras,

Corpus Scriptorum Ecclesiasticorum Latinorum. CTS URN stoa0104c.stoa001.opp-lat1. Via the Perseus Digital Library / Open Greek and Latin TEI corpora. Licence: Available under a Creative Commons Attribution-ShareAlike 4.0 International License. Source.